Aha Minisitiri Mukeshimana yabwiraga uwari uhagarariye BDF ko bagomba kurekura amafaranga agakoreshwa icyo yagenewe

Minisitiri Mukeshimana yabivuze ku wa 30 Kanama 2019, ubwo hatangizwaga umushinga wiswe ‘Envisage’ wo gufasha urubyiruko rwize kaminuza ruri mu buhinzi n’ubworozi kugira ngo rubone ubumenyi bwose nkenerwa bityo rubashe kuzamuka rwiteze imbere.

Ni umushinga uhuriweho n’Umuryango w’urubyiruko ruri mu buhinzi (RYAF), BDF, Christian University of Rwanda n’abandi bafatanyabikorwa, urwo rubyiruko rukazahabwa amahugurwa y’amezi atandatu, rukazakorera mu nzu za BDF ziri mu turere twose tw’u Rwanda zabagamo mudasobwa zifasha ababyifuza gukoresha Internet.

Ubusanzwe uwo mu rubyiruko wifuza kubona inguzanyo, akora umushinga akawujyana muri banki, akagaragaza uruhare rwe rw’ingwate rwa 50% noneho BDF na yo ikamwishingira 50% bityo agahabwa inguzanyo yifuza, gusa ngo barayitegereza amaso agahera mu kirere kubera gusiragizwa.

Minisitiri Mukeshimana yasabye BDF gukorana n’amabanki kugira ngo urubyiruko ruhabwe inguzanyo bitagoranye

Aha ni ho Minisitiri Mukeshimana yahereye avuga ko MINAGRI iba yarahaye amafaranga BDF ngo iyahe amabanki bityo urubyiruko rubone inguzanyo, akaba yasabye BDF ko ari yo yajya ivugana n’amabanki mbere.

Yagize ati “BDF irabihorera ikavuga ngo abo banki izemerera ni bo izishingira kandi muzi ko uru rubyiruko banki zitaruzi, hari n’abatagira amakonti cyangwa n’abayafite akaba adakora nk’uko babyifuza. BDF ni yo iziranye n’amabanki, nibakorane rero bityo amafaranga yacu asohoke akoreshwe”.

Minisitiri Mukeshimana yakomeje avuga ko ibyo bigomba gukorwa kugira ngo amafaranga akoreshwe ibyo yagenewe, bitabaye ibyo ngo hakaba hashakishwa ubundi buryo byakorwamo bitanyuze muri icyo kigo, kuko ayo mafaranga yagenewe urubyiruko ruri mu buhinzi atari ayo kuguma muri banki.

Umwe mu rubyiruko asobanura uko umushinga we ukora

Eugène Mukeshimana ufite umushinga wo guhinga urusenda mu Karere ka Bugesera, na we yemeza ko bishobotse ko bazajya babanza kunyura kuri BDF bagiye gusaba inguzanyo byaborohera.

Ati “Ibyo kuri twe ni byo byadufasha kuko iyo tugeze kuri banki bahita batubaza ingwate, bakareba uko konti zacu zikora, birumvikana ziba zikora gake bigahita bidusubiza inyuma. Icyadufasha ni uko twanyura kuri BDF noneho ikaba ari yo yegera banki, kubona ariya mafaranga byahita byoroha”.

Icyakora uyu musore witwa Eugène Mukeshimana urimo gutangira kwikorera ahamya ko amahugurwa bagiye kubona ari ingirakamaro, ko hari byinshi azabungura bityo n’uburyo bwo kubona inguzanyo bukaba bwakoroha.

Umuyobozi w’amashami ya BDF mu gihugu, Nkuusi Livingstone, yavuze ko ibyo Minisitiri yabasabye bagiye kureba uko bishyirwa mu bikorwa.

Ati “Inama Minisitiri yatugiriye twayakiriye, icyo tugiye gukora ni ugufatanya na MINAGRI turebe uko byakorwa bityo tube twahindura uko imishinga yahabwaga inguzanyo. Iyo Minisiteri kuba ibishyizemo imbaraga ari na yo ibifitiye ububasha, dufatanyije tuzabihindura”.

Igikorwa cyo gutangiza umushinga ‘Envisage’ wo gufasha urubyiruko rwize kaminuza ruri mu buhinzi n’ubworozi cyitabiriwe n’abantu b’ingeri zitandukanye

Yongeyeho ko ubumenyi abo ba rwiyemezamirimo bato bazakura muri iyo gahunda, buzatuma babasha gutunganya neza imishinga yabo bityo no kubaha inguzanyo byihute.

Umuryango RYAF w’urubyiruko ruri mu buhinzi urimo urubyiruko rusaga ibihumbi cumi na bibiri. Icyakora ababona inguzanyo z’imishinga yabo binyuze muri BDF ngo baracyari bake cyane ugereranyije n’abayisaba nubwo nta mibare yagaragajwe, nk’uko byatangajwe na Jean Baptiste Hategekimana, umuyobozi w’iryo huriro.

MENYA UMWANDITSI

Jean Claude Munyantore

Umunyamakuru

@ MunyantoreC

Reba inkuru zose nanditse ( 2072 )