Akenshi mu Karere ka Nyagatare, abahinzi iyo bamaze gusarura batwara imyaka mu ngo, ibisigazwa byayo bigasigara mu mirima.

Igihe cyo gutegura ubutaka bitegura ikindi gihembwe cy’ihinga bamwe batwika bya bisigazwa kugira ngo biborohere guhinga.

Umukozi w’Akarere ka Nyagatare uyobora ishami ry’ubuhinzi, ubworozi, amashyamba n’umutungo kamere avuga ko gutwika ibisigazwa by’imyaka ari bitemewe, kuko umuriro ushobora kuva mu murima ukaba wafata imisozi igashya.

Asaba abaturage kubicikaho kuko bifite ingaruka zitari nziza, ndetse hakaba hari n’ibihano biteganywa n’ikigo gishinzwe kubungabunga ibidukikije.

Itegeko no 48/2018 ryo kuwa 13/08/2018 rigenga ibidukikije ingingo ya 52, iteganya ihazabu yo mu rwego rw’ubutegetsi y’amafaranga y’u Rwanda ibihumbi 25 ku muntu wese utwika imyanda yo mu rugo binyuranyije n’amategeko, ibiyorero, amapine n’amapulasitiki.

Ikindi gikomeye ariko, ngo ni uko gutwika byica udusimba dusanzwe mu butaka dutuma ubutaka buhumeka neza.

Ati “Iyo umuntu atwitse hari udusimba tuba mu butaka dutuma buhumeka neza duhita dupfa, utwo dusimba iyo dupfuye ubutaka ntibuhumeka neza n’imyaka uhahinze ntitanga umusaruro nk’uko wakabonetse”.