Umuyobozi w’Intara y’Uburasirazuba, Uwamariya Odette, avuga ko ibi biterwa n’uko minisiteri y’ubuhinzi (MINAGRI) n’ikigo gishinzwe guteza imbere ubuhinzi (RAB) batatanze ibikoresho byo kubakira abahinzi ubwanikiro bw’umusaruro wabo, ari naho uwo musaruro uzahunikwa.

Francois Nsengiyumva ushinzwe gahunda yo gukumira ibyangiza umusaruro w’ubuhinzi no kuwuhunika neza ku rwego rw’igihugu we avuga ko kuba abahinzi badafite aho basarurira umusaruro mwinshi bejeje ari amakosa y’inzego z’ibanze.

Nsengiyumva agira ati “Twakoranye amanama menshi n’abayobozi b’Intara y’Uburasirazuba, twemeranya ko bitarenze tariki 30/01/2012 bazaba bamaze kubaka ubuhunikiro, natwe tukabaha amahema agezweho yo kubusakara ku buryo ibihingwa bibitswemo bigumana ubuziranenge n’umwimerere wabyo. Nyamara ariko kugera uyu munsi kuwa 31 Mutarama, ntabwo abo bayobozi baratwereka aho bubatse.”

Nsengiyumva yavuze cyakora ko ubu hatangiye gahunda yihuse ya RAB na MINAGRI yo kubaka ubwo bwanikiro kuko inzego z’ibanze zananiwe kubwubaka, bukaba buzaboneka mu minsi ya vuba.

Hatari Jean d’Amour