Ahazajya hacururizwa ibicanwa (pellets) bya BioMassters muri Rubavu

Iyo nzu y’ubucuruzi ifunguwe i Rubavu, ariko BioMassters yari isanzwe ikorera mu Mujyi wa Kigali no mu nkengero zawo, ikaba ikomeje kugeza ibicanwa bitangiza ikirere kandi bihendutse ku Banyarwanda benshi.

Mulindwa Prosper, Umuyobozi w’Akarere ka Rubavu, yabwiye Kigali Today ko gukoresha ibicanwa bya BioMassters bifasha Igihugu kugera ku ntego cyihaye z’Icyerekezo 2030, aho u Rwanda rwiyemeje kugabanya imyuka ihumanya ikirere ku kigero kirenga 38%, no gutuma byibuze 60% by’ingo zikoresha ingufu zisukuye mu guteka.

Ashimangira ko BioMassters ari igisubizo gifatika gifasha kugera kuri iyo ntego, ati “Ikoreshwa ry’ibicanwa bya BioMassters rifasha abaturage guteka neza, rirengera ubuzima bwabo, rikanabungabunga ibidukikije. Ni urugero rwiza rw’ishoramari rifasha abaturage n’Igihugu muri rusange”.

Uruganda rwa BioMassters rukorera mu Karere ka Rubavu, rufite ubushobozi bwo gutunganya toni zirenga 15 za pellets ku munsi, rukoresheje ibisigazwa by’ibikomoka ku bimera nk’ibarizo n’ibikomoka ku buhinzi. Uru ruganda rugeze kuri uyu muhigo nyuma yo kongererwa ubushobozi, kuko ubundi rwatunganyaga toni zirindwi (7) gusa, bikaba biri mu byishimiwe kuri uyu munsi.

Meya Mulindwa n’Umuyobozi Mukuru wa BioMassters mu Rwanda, Claudia Muench, bafungura inzu icururizwamo pellets i Rubavu

Uru ruganda kandi rufasha abaturage kubona imirimo, bagakora bakiteza imbere, rukaba ari kimwe mu bisubizo byo kurwanya ubushomeri mu Rwanda. Ikindi ni uko ari bumwe mu buryo Igihugu cyishakamo ibisubizo, byagifasha mu gukomeza kurwanya iyangirika ry’ikirere.

Mu Rwanda, abarenga 93.8% baracyakoresha inkwi n’amakara mu guteka, nk’uko byagaragaye mu bushakashatsi bwa 7 ku mibereho y’ingo (EICV7 2023/2024) bukorwa n’Ikigo cy’Igihugu cy’Ibarurishamibare (NISR). Imibare igaragaza ko buri mwaka hakoreshwa Toni zirenga Miliyoni 2 z’inkwi n’amakara, bikaba bigira uruhare rukomeye mu iyangirika ry’amashyamba no mu kongera imyuka ihumanya ikirere.

Ubushakashatsi bugaragaza ko umwotsi uturuka ku makara ufitanye isano n’indwara z’ubuhumekero, aho abarenga 7,000 bapfa buri mwaka mu Rwanda bazize indwara zijyanye n’umwotsi uturuka mu gikoni.

Gukoresha pellets za BioMassters bifite inyungu nyinshi ugereranyije n’amakara, kuko zitanga ubushyuhe bwinshi kandi burambye, aho ikilo kimwe (1) cya pellets za BioMasters gisimbura ibilo bibiri (2) by’amakara.

Uretse kuba pellets za BioMassters zitagira umwotsi, zisiga isuku mu gikoni kandi zikagabanya ikiguzi cyo guteka, kuko urugo rushobora kuzigama hagati ya 40% na 50% by’amafaranga rwatangaga mu kwezi, rukaba runarengeye amashyamba n’ibidukikije muri rusange.

Abayobozi basobanurirwa uko pellets zikoreshwa mu mashyiga ya BioMassters nanone

Ku rwego rwa Afurika, abarenga Miliyoni 900 bakoresha inkwi n’amakara mu guteka, gahunda ya BioMassters igira uruhare mu gushakira ibisubizo birambye ibihugu bikiri mu nzira y’Amajyambere. Ku rwego mpuzamahanga, ikoreshwa rya pellets rifasha kugabanya imyuka ihumanya, no gushyigikira intego z’Isi zo kurwanya ihindagurika ry’ikirere.

Abaturage bo mu Karere ka Rubavu bagaragaje ko bishimiye gukoresha ingufu zitangiza ikirere, ndetse bemeza ko bizabafasha kugira isuku no kugabanya imvune bahuraga na zo mu guteka.

Kabanyana usanzwe akoresha amakara, asaba ko ibicanwa bya BioMassters byakomeza kuboneka kandi bikaguma ku biciro byiza, kugira ngo bitazaca intege ababikoresha.

Agira ati “Twifuza ko BioMassters yakomeza kutuba hafi, ibicanwa byayo tugakomeza kubibona kandi ku giciro cyiza, mbese serivisi zayo zigakomeza kuba ntamakemwa. Ibi bizatuma twese dutandukana burundu n’imyotsi yadutezaga indwara z’ubuhumekero, ari na ko turengera ikirere”.

Akomeza ashimira Leta y’u Rwanda izana abafatanyabikorwa mu gufasha abaturage kubona ibicanwa bisobanutse.

Ati “Turashimira Perezida Kagame uhora utugezaho iterambere. Nk’ubu ibi bicanwa bitworohereza imirimo no kubungabunga ubuzima bwacu, icyo twisabira aba babitugezaho ni uko twazajya tubibona igihe cyose umuntu abikeneye.”

Ni ibicanwa bihendukira ababikoresha kandi ntibyangize ikirere kuko bitagira umwotsi

Umuyobozi Mukuru wa BioMassters mu Rwanda, Claudia Muench, avuga ko bafite gahunda yo kongera ibicanwa bakora, binyuze mu gushyira izindi nganda hirya no hino mu gihugu, hagendewe ku buryo abaturage bazagaragaza ko babikeneye ari benshi.

Yakomeje agira ati “BioMassters iri hano kugira ngo ikomeze guha abaturage serivisi nziza, ari na yo mpamvu twaguriye ibikorwa byacu hano muri Rubavu. Ibi biratuma twegera abakiriya bacu, tubafashe kubona ibyo bifuza batavunitse, ndetse n’ukeneye ubundi bufasha bujyanye n’ikoreshwa ry’ibicuruzwa byacu atubone byihuse”.

Uruganda rwa BioMassters rufatwa nk’intambwe ikomeye mu Rwanda, mu guteza imbere ingufu zisukuye no kubaka ejo hazaza harambye.

Ab’i Rubavu bishimiye iki gikorwa

Uruganda rwa BioMassters rukora ibi bicanwa rwaraguwe rwongererwa ubushobozi

Meya Mulindwa Prosper yemeje ko ibicanwa bya BioMassters bifasha abaturage guteka neza no kugira isuku

Amashyiga ya BioMassters

Kimenyi Valens

Ubuyobozi bwa Banki nkuru y’igihugu butangaza ko buri mwaka bufata icyumweru cyo kwegera abaturage no gukemura ibibazo bafite n’ibigo by’imari.

Muri 2024 ihuriro rya Banki Nkuru y’u Rwanda n’ibigo by’imari bakemuye ibibazo 1000, ubu aho bari gukorera mu karere ka Rubavu na Rutsiro bizeye ko bazahura n’abandi bafite ibibazo by’imari bigakemuka.

Ngendahayo Martin utuye mu murenge wa Rubavu mu Karere ka Rubavu avuga ko muri 2018 yafashe ibikoresho by’umurasire muri Mobisol ariko akaza kunanirwa kuwukoresha iki kigo gisubirana ibikoresho byacyo ariko yashyizwe muri CRB ahinduka bihemu ntiyongera kugira aho afata inguzanyo.

Agira ati “banyanditseho umwenda wa miliyoni n’ibihumbi 300 birenga, nyamara ibikoresho bari barabisubiranye, aho ngiye gufata inguzanyo bakambwira ko ndi muri CRB kubera umwenda nafashe. Negereye ikigo cya Mobisol kinsaba kwishyura umwenda kandi bari barasubiranye ibikoresho byabo. Ni ibintu byanshyize mu gihombo kuko byambujije kugira ahandi mfata inguzanyo.”

Uretse Ngendahayo hari abandi baturage benshi bagiye bashyirwa muri CRB kandi bararangije kwishyura umwenda bafashe muri banki. Hari abandi bashyizwe muri CRB batazi impamvu, ubu bakaba badashobora kubona inguzanyo mu gihe babaza ibigo by’imari impamvu byabashyize muri CRB bakabura ibisubizo.

Angelique Uwituze ushinzwe abakiriya muri TransUnion avuga ko ikigo akorera kibika amakuru y’ibigo by’imari kandi ayo makuru akusanywa n’ibigo by’imari, bityo kuba umuntu aba muri CRB bidaterwa n’iki kigo ahubwo biterwa n’abatanze amakuru.

Agira ati “abantu bajya muri CRB bitandukanye kuko amakuru akusanywa n’ikigo cy’imari bakorana, iyo umuturage amaze kwishyura hagombye gutangwa amakuru ko yamaze kwishyura ariko hari ibigo bitinda kuvugurura amakuru bigatuma umuturage afatwa nk’ufite umwenda kandi yararangije kwishyura.”

Angelique Uwituze asaba ibigo by’imari kujya bivugurura amakuru y’abakiriya babo mu kwirinda kubashyira aho batagombye kuba.

Agira ati “tubika amakuru y’ibigo by’imari, wisanga muri CRB kuko wahawe inguzanyo, niba warafashe inguzanyo ukayishyura wisanga muri CRB kuko twahawe amakuru niyo banki wafashwemo inguzanyo, iyo wishyura cyangwa warangije kwishyura niyo igomba kuduha amakuru y’uko ugenda wishyura cyangwa warangije kwishyura.”

Akomeza agira ati “Duhora twakira abaturage baje kutureba badusaba kubakura muri CRB, icyo dukora duhamagara ikigo cyaduhaye amakuru, ikigaragara ni uko ikigo kiba kitaratangiye amakuru ku gihe.”

Angelique Uwituze

Asaba ibigo by’imari gukoresha ikoranabuhanga bagatangira amakuru ku gihe kuko iyo amakuru adatanzwe bisiragiza umuturage bitari ngombwa.

Kimenyi Valence umuyobozi ushinzwe guteza imbere urwego rw’imari muri Banki Nkuru y’u Rwanda avuga ko hashyizweho urubuga rwitwa Intumwa chatbot kugira ngo rufashe abafite ibibazo mu bigo by’imari gukemuka, ariko byagaragaye ko hari abandi batazi kurukoresha bityo bituma hashyirwaho gahunda yo kwegera abaturage.

Agira ati “umwaka ushize twatangije iyi gahunda yo kuva mu biro, hamwe n’ibigo twahaye ibyangombwa bigera kuri 500 iyo dushyizemo umurenge sacco, buri kigo kiduha umuntu, umwaka ushize twakemuye ibibazo 1000, iyo tudahaguruka ibibazo 1000 ntibyari gukemuka.

Ubu aha turi Rubavu turajya mu nteko z’abaturage tujyane n’ibigo by’imari muri Rutsiro na Rubavu kandi baradufasha gukemura ibibazo, uyu munsi twahagurukijwe no kwegera abadashobora kutugezaho ibibazo cyangwa bigerere ku kigo cy’imari na BNR.”

Akomeza avuga ko CRB ifite itsinda rikemura ibibazo by’abaturage hakoreshejwe Intumwa chatbot ariko hari abatazi kuyikoresha.

Agira ati “Iyo ushyize ikibazo kuri Intumwa chatbot, BNR n’ibigo by’imari turabibona twese tugahita tugikurikirana kigakemuka ariko turi hano kugira ngo dufashe abadashobora gukoresha ikoranabuhanga mu kutugezaho ibibazo”

Ubusanzwe ikigo TransUnion kizwi nka CRB kibika amakuru y’abantu bakorana n’ibigo by’imari. Iyo ikigo kigiye gutanga inguzanyo ku muntu gishakira makuru y’umukiriya muri CRB kireba niba asanganywe inguzanyo, niba izo yafashe yishyura neza n’uko ahagaze mu gukorana n’ibigo by’imari.

Amakuru y’umukiriya mu gukorana n’ibigo by’imari agera kubakoresha cheque itazigamiye, n’abandi. Ibi byorohereza ibigo by’imari mu kumenya abo bakorana, ndetse bakabona n’abatanga cheque zitazigamiye.

Kimenyi Valence avuga ko ikibazo cy’abakorana n’ibigo by’imari bashyirwa muri CRB ntibakurwemo kiboneka henshi mu Rwanda, agasaba abaturage kuba inyangamugayo.

Abakozi b’ibigo by’imari, BNR na CRB bitabiriye gukemura ibibazo by’abaturage

Agira ati “niba ufashe inguzanyo muri banki yikoreshe icyo wateganyije kugira ngo utazananirwa kwishyura kandi wubahiriza amasezerano wakoze na banki.”

Akomeza agira ati “ ikindi ni byiza ko umuturage amenya amakuru CRB imufitiho niba ari ukuri, yaba ataboneye agakosorwa. Icyo dusaba abaturage ni ukuba inyangamugayo, bakirinda gutanga cheque itazigamiye kuko cheque si ingwate, niba udafite amafaranga kuri konti witanga cheque.”

Kimenyi Valence asaba ibigo by’amari bikorana nayo kubika amakuru y’abakiriya anoze, haba hari afite ikibazo bakayakosora kuko banki zigenzurwa kandi isanzwe itayakosora irahanwa.

Bamwe mu bantu bashobora kwisanga muri CRB ndetse bagafatwa nka bihemu harimo abantu batishyura imisoro mu kigo cy’imisoro n’amahoro “Rwanda Revenue Authority”, ufite ideni rya MTN na Airtel, cyangwa utishyura umuriro w’imirasire wa Mysol na Bboxx.

Umufatabuguzi w’Ikigo gishinzwe Amazi, Isuku n’Isukura (WASAC) utarishyuye imwe muri fagitire y’amazi, cyangwa ufitiye ideni ikigo cy’Ubwishingizi, nawe ashobora gufatwa nka bihemu ndetse ntiyemererwe kugira ahandi yasaba inguzanyo ngo ayihabwe.

Cyakora umuntu ashobora gukoresha telefoni ngendanwa akareba niba amakuru amwanditseho muri CRB akoresheje *707# agakurikiza amabwiriza akabona amakuru CRB imufiteho haba harimo ikibazo akayakosoza.

Bunamiye abikorera bazize Jenoside

Iki gikorwa cyabereye mu Karere ka Rubavu ku Rwibutso rwa Jenoside rwa Kanzenze (Bigogwe), rushyinguyemo imibiri 9,035 y’abazize Jenoside.

Perezida wa Ibuka mu Karere ka Rubavu Mbarushimana Gérard, avuga ko abateguye Jenoside bifuzaga kumaraho Abatutsi ariko ntibyashobotse kubera Abanyarwanda bakunda Igihugu, kandi bifuza kubaka Igihugu gihuriye ku bumwe bw’Abanyarwanda.

Ashimira ingabo zahoze ari iza RPA zatanze ubuzima kugira ngo Abatutsi barimo bicwa bashoboye gutabarwa.

Agira ati “Ingabo zahoze ari iza RPA dufitanye igihango, mwabuze ingingo zanyu murokora Abatutsi barimo bicwa. Dufitanye igihango kuko mwaturokoye imipanga yari yibasiye amajosi yacu, ntituzibagirwa ubwitange bwanyu, abo mwarokoye turabashima, turiho kandi twarashibutse.”

Mbarushimana avuga ko mu Karere ka Rubavu hari imiryango 48 y’ abikorera bazize Jenoside imaze kumenyekana, muri bo harimo n’abari Abahutu bazizwa gushaka Abatutsikazi, bishwe n’abo bakoreshaga, abacuruzi bagenzi babo na Leta basoreraga.

Akomeza avuga ko bishwe nyuma y’ihohoterwa bakorewe ririmo gusahurwa imitungo yabo.

Abayobozi batandukanye bitabiriye igikorwa cyo kwibuka abikorera bishwe muri Jenoside yakorewe Abatutsi

Perezida wa PSF, Ernest Nkurunziza, avuga ko Jenoside yakorewe Abatutsi yateguwe na Leta yariho ndetse yigisha abaturage ko kwica Umututsi atari icyaha.

Agira ati “Twasigaranye imfubyi n’abapfakazi, imitungo yarangijwe, ku bikorera mu Ntara y’Iburengerazuba ni umwanya wo kugaya bagenzi bacu bishoye mu bikorwa byo kwica Abatutsi bari abakiriya babo n’inshuti zabo.”

Guverineri w’Intara y’Iburengerazuba Ntibitura Jean Bosco, yihanganishije abo Jenoside yasigiye ibikomere, ibiboneka n’ibitaboneka.

Agira ati “Dushimira ingabo za RPA Inkotanyi zahagaritse Jenoside Isi yose irebera, ubutwari bwabo ni bwo dukesha ubuzima uyu munsi, kandi umwanya nk’uyu utwibutsa Abatutsi bishwe muri Jenoside yabakorewe harimo n’abikoreraga. Tugaya abashoye imitungo mu kwica Abatutsi harimo abakiriya babo.”

Akomeza agira ati “Umwanya nk’uyu iyo turebye ubumwe dufite dushimira ubuyobozi dufite, tukaba duharanira ko Jenoside itazongera kubaho ukundi. Hari ibihugu byagize ingengabitecyerezo ya Jenoside, harimo abagaragayeho ivangura n’abagoreka amateka y’Igihugu cyacu, ni abanzi b’amahoro. Bashaka gusubiza u Rwanda inyuma kandi rukataje mu nzira y’ubudaheranwa.”

Abasirikare barwanye urugamba rwo kubohora Igihugu bashimiye abikorera kubazirikana

Abikorera mu Ntara y’Iburengerazuba batanze inka ariko batanga n’igishoro ku miryango yarokotse Jenoside yakorewe abatutsi.

Kansirida Mukaruriba, umubyeyi w’imyaka 50 warokotse Jenoside yakorewe Abatutsi, yahawe igishoro cy’Amafaranga y’u Rwanda ibihumbi 500, avuga ko yari asanzwe afite igishoro cy’ibihumbi 100, ariko yahoraga ahomba.

Agira ati “Ibibazo by’ubukene nari mfite ubu biragabanutse, ngiye gutera imbere nk’abandi, ubu igishoro kigiye kwaguka, naho ubundi nari mfite ibihumbi 100, narwara nkakoramo, nagira akabazo nkakoramo bigatuma ntatera imbere, ariko ubu kiriyongereye ntabwo nzongera gusubira inyuma."

Ndagijimana yakomerekeye ku rugamba ntababajwe n’ingingo yatakaje

Ndagijimana Innocent warwanye urugamba rwo kubohora Igihugu no guhagarika Jenoside, avuga ko atababajwe n’uko yakomerekeye mu rugamba.

Agira ati “Mata 1994 nari i Jali mu rugamba ruhagarika Jenoside, uyu munsi iyo nsubije amaso inyuma urugamba twarwanye nshimishwa n’ibikorwa twakoze byo kurokora Abatutsi no kubohora Igihugu, nkaba ndi mu gihugu cy’ababyeyi”.

Guverineri Ntibitura ashyikiriza inka uwakomerekeye ku rugamba

Ndagijimana wakomeretse mu 2002 afite ipeti rya Caporal, avuga ko urugamba rwo kubohora Igihugu yashoboye kurusoza ari muzima, ariko nyuma hakomeje izindi ntambara harimo iz’abacengezi no gucyura impunzi z’Abanyarwanda zari zarafashwe bugwate muri Congo.

Nubwo avuga ko yakomerekeye muri izo ntambara ngo ntabwo byamuhungabanyije kuko ibyo arwaniye bizagerwaho, ubu akaba agomba gusigasira ibyagezweho.

Ati "Numva mfite ishema ry’aho Igihugu kigeze, nishimira ko ibyo twarwaniye byagezweho, nshima kuba ntacyitwa impunzi. Kuba ababyeyi baratashye mu gihugu cyabo ndetse Abanyarwanda bakaba bishimye, bayobowe neza. Dutewe ishema no kuba Abanyarwanda."

Ati “Uyu munsi sintekereza ku rugamba rwashize, ubu ntekereza urw’ iterambere, ngasaba abakiri bato gukunda Igihugu no kucyitangira, ni bo bayobozi b’ejo hazaza.”

Urwibutso rwa Kanzenze (Bigogwe) ruruhukiyemo imibiri 9,035 y’Abatutsi bishwe muri Jenoside.

Abasirikare bamugariye ku rugamba bahawe inka

Mu mwaka wa 2024, Akarere ka Rubavu kakiriye ba mukerarugendo basaga 250,000, harimo abagera ku 30% baturutse hanze y’u Rwanda. Aya mafaranga yinjijwe n’ubukerarugendo mu karere ka Rubavu mu 2024 agera kuri 4.2 miliyari Frw, akomoka cyane ku mahoteli, ubukerarugendo bwo ku mazi n’ibikorwa by’ubukerarugendo bwibanda ku musozi wa Rubavu, ibiyaga bya Kivu, no gusura ibikorwa by’amateka n’umuco.

Umuyobozi w’Akarere ka Rubavu, Mulindwa Prosper, agaragaza ko hari ibibanza birenga 10 byemejwe n’inama njyanama y’akarere bigenewe kubakwamo amahoteli y’inyenyeri 5, kandi abashoramari boroherezwa mu kubona ibyangombwa no guhabwa serivisi zihuse binyuze muri One Stop Center ya RDB.

Mu rwego rwo kwagura ubucuruzi, Akarere ka Rubavu kakiriye ishoramari rifite agaciro kari hejuru ya miliyari 18 Frw mu mwaka wa 2024, ririmo imishinga 15 minini ijyanye n’inyubako z’amacumbi, inzu z’ubicuruzi, n’amaresitora zigezweho.

Muri Rubavu investment forum Mulindwa yongeyeho ko bitewe n’imiturire n’imibereho y’abatuye aka karere, hakenewe inyubako zigezweho zo guturamo zishobora kwakira abagera ku 1,200, ibikorwa remezo bya siporo nka Kivu Intare Arena ifite ubushobozi bwo kwakira abantu barenga 1000 hamwe na Zipline ya Nengo Hill biteganyijwe ko izajya itwara abarenga 500 ku kwezi.

Minisitiri w’Ubucuruzi n’Inganda Sebahizi Prudence avuga ko hari imishinga yamaze gutegurwa naho indi irimo gutunganywa kugira ngo ishorwemo imari, asaba abashoramari kwitegura gushora imari no koroherezwa gihabwa serivisi zihuse.

Fred Karemera, Umuyobozi ukuriye One Stop Center muri RDB, yemeza ko abashoramari b’Abanyarwanda bashobora kugabanyirizwa imisoro ku gipimo kiri hagati ya 30% na 50% mu rwego rwo kubashishikariza gushora imari, yongeraho ko abashoramari bashobora kubona inguzanyo byoroshye.

Imbogamizi mu gutunganya umujyi wa Gisenyi zirimo kuvaho

Innocent Harerimana, umwe mu bikorera mu Mujyi wa Gisenyi, avuga ko isoko rishya rya Gisenyi rizarangiza ikibazo cy’ubucucike n’imyubakire idahwitse.

Isoko ririmo kuzura rifite ubushobozi bwo kwakira abacuruzi barenga 1,000, rikazatuma ubucuruzi bwiyongera ku kigero cya 35% mu gihe kitarenze imyaka ibiri.

Yongeraho ati: “Ubu inyubako nshya ziri kuzamuka mu mujyi wa Gisenyi zirenga 50, harimo amazu maremare 5 yubatswe mu myaka 2, bikaba bigaragaza ko ishoramari riri kwiyongera.”

Inganda, icyambu, na gare ya kijyambere
Mu rwego rwo kongera ibikorwa by’ubucuruzi n’imirimo, Akarere ka Rubavu kamaze gutegura ibibanza 240 bigomba kubakwamo inganda byitezwe kongera akazi ku bantu barenga 6,000.

Mabete Niyonsaba Dieudonné, Perezida w’urugaga rw’abikorera mu Karere ka Rubavu, asaba abikorera guhuriza hamwe imbaraga kugira ngo bongere ibikorwa by’ishoramari, by’umwihariko mu bijyanye no kubaka amacumbi aciriritse kuko ubucuruzi bwayo bwitezweho gutanga inyungu nyinshi bitewe n’abasura aka karere buri munsi.

Ababyeyi ba Nirere bishimiye inzu bahawe na FPR-Inkotanyi

Barihenda abitangaje nyuma yo gushyikirizwa n’Ubuyobozi bw’umuryango FPR-Inkotanyi mu Karere ka Rubavu inzu irimo ibikoresho, igikoni, ubwiherero n’ikiraro cy’inka kugira ngo bibafashe mu buzima bwabo.

Agira ati "Nshimimye Perezida Kagame Paul, nageze mu bibi abimfashamo n’umuryango wa FPR-Inkotanyi, bambaye hafi banyibagiza agahinda ko kubura umwana wanjye wagiye. Bampaye ibyiza baranyubakira inzu bampa n’inka ndabashimira."

Nyirabuhinja Venansiya umubyeyi wa Nirere Jeannette, avuga ko umuryango FPR-Inkotanyi wabaye hafi umuryango kuva Nirere yapfa.

Ati "FPR-Inkotanyi yaradufashije kuva Nirere yapfa, baduhaye amafaranga turikenura, ubu baduhaye inzu yuzuye ibikoresho, baduhaye inka, batubaye hafi cyane, turabashima kandi turishimye, kuko batubaye hafi bamenya uko tumeze kugeza n’ubu batwitaho."

Inzu bahawe irimo n’ibikoresho

Barihenda avuga ko Nirere ari we wari amutunze, akampahira naba mbyutse ngasanga yateguye amafunguro. Yaragiye ariko FPR-Inkotanyi na yo rwose yaramusimbuye imba hafi ndetse inkorera n’ibikorwa we atari gushobora.

Uwanyirigira Roseline, Umunyamabanga wa Komite nyobozi y’umuryango FPR-Inkotanyi mu Ntara y’Iburengerazuba yatangaje ko Nirere Jeannette yari umunyamuryango wa FPR-Inkotanyi kandi yatabarutse yaje gushyigikira umukandida w’umuryango.

Agira ati "Yatabarutse yaje gushyigikira umukandida w’umuryango, umuryango na wo ntabwo wamwibagiwe, ni yo mpamvu tuje kubashyikiriza ibyo yari kuzabakorera, kandi tuzaguma kubaba hafi. Uyu munsi tuje kubashyikiriza inzu, ibikoresho byo mu nzu, igikoni, ubwiherero n’inka mu kiraro, ibi byose ni byo kubafasha kandi umuryango urabazirikana."

Nirere Jeannette yatabarutse tariki 25 Kamena 2024, umuryango FPR-Inkotanyi wabaye hafi umuryango we ndetse ubuyobozi bwa FPR-Inkotanyi, bwijeje uyu umuryango kuzakomeza kubaba hafi.

Tariki ya 23 Kamena 2025, ubwo umukandida wa FPR-Inkotanyi yari ashoje igikorwa cyo kwiyamamaza mu Karere ka Rubavu mu Murenge wa Rugerero, habaye umuvundo w’abari baje kumushyigikira bituma babiri babura ubuzima, naho abandi 36 barakomereka.

Bakiriwe neza mu Rwanda

Bamwe mu Banyarwanda bavuganye na Kigali Today bagejejwe mu Rwanda saa tanu n’igice (11h30) tariki 22 Gicurasi 2025, bavuga ko bashima Imana kuba bongeye kugera mu Rwanda, ibintu bafataga nk’inzozi.

Ndahayo Claver utashye mu Karere ka Musanze mu Murenge wa Kinigi, avuga ko yishimiye kugera mu Rwanda kuko yajyaga abitecyereza ariko ntabishobore.

Agira ati "Ni amahirwe kuba dutashye, twabyifuje kenshi ariko ntihishoboke bitewe n’uko aho twabaga hayoborwaga n’inyeshyamba za FDLR. Turuhutse intambara zidashira".

Akigera mu Rwanda yatunguwe n’uburyo bakiriwe, avuga ko bihabanye n’amakuru bahabwaga bakiri mu mushyamba ya Congo.

Ati "Twakiriwe neza, turabona abantu beza bagufasha, bazanye imodoka zo kudutwara kandi FDLR yajyaga itubwira ko utashye yicwa."

Avuga ko ibyo yaboneye ku mupaka bimuha icyezere cy’imiyoborere y’Igihugu, yizeza abo asanze kubabanira neza, naho abo asize abasaba gutaha mu gihugu cyabo.

Abanyarwanda 642 nibo batashye mu kiciro cya gatatu, aho bagiye gusanga abandi 796 mu nkambi ya Nyarushishi mu Karere ka Rusizi, bakaba basanze abandi 360 bajyanywe mu nkambi ya Kijote mu Karere ka Nyabihu.

Murekatete Kayitaba Chantal, umujyanama wa Guverineri wa Kivu y’Amajyaruguru, yabwiye itangazamakuru ko barimo gukora ubukangurambaga bwo gucyura abanyamahanga mu gihugu cyabo.

Agira ati "Tumaze gucyura abagera mu 1,700 kandi tuzakomeza gushishikariza n’abandi gutaha."

Abanyarwanda babarirwa mu 2080 ni bo bamaze gushishikarizwa gutaha, aho bacyurwa na HCR.

Ku mupaka munini ahakirirwa Abanyarwanda bataha basanga imodoka zibategereje, bazanirwa jus zo kunywa, bapimwa indwara ndetse abarwaye bakitanwaho byihariye.

Abanyarwanda bataha mu Rwanda bavuye mu kigo bakusanyirijwemo mu mujyi wa Goma, nyuma yo gukurwa mu bice bitandukanye muri Masisi na Nyiragongo.

Bimenyimana umusore w’imyaka 30 avuga ko yicuza igihe yataye, agira ati "Nkanjye navukuye muri Congo, sinzi aho ntashye, ubu nibwo ngeze mu Rwanda, ariko ndabona ari heza. Nakuriye mu ntambara, nabayeho mu buhunzi ariko ndizera ko ubu birangiye kuba ngeze mu Rwanda. Twataye igihe batubeshya ko ugeze mu Rwanda apfa, abandi bakatubwira ko mu Rwanda haba inzara ariko turabona abantu baho bakeye."

Mu Rwanda bakiriwe na HCR, ubuyobozi bwa Minisiteri y’Ibikorwa by’Ubutabazi hamwe n’Akarere ka Rubavu.

Abanyarwanda batashye bahawe ikaze, babwirwa ko bagiye kwitabwaho haba mu kugira imibereho myiza no kwiteza imbere.

Bishimiye kuba baruhutse intambara z’urudaca

Babwiwe ko bagiye gufashwa kwisanga mu miryango bahabwa ubufasha bwo ku batunga, guhabwa ibyangombwa, kujyana abana mu ishuri no guhabwa ubwisungane mu kwivuza.

Ibarura ryakozwe na Leta ya Kinshasa muri Gicurasi 2015, ryagaragaje ko mu Burasirazuba bwa Congo habarurwa Abanyarwanda ibihumbi 208.

Aba bagiye babuzwa gutaha n’umutwe wa FDLR kuko aribo ukuramo urubyiruko winjiza mu gisirikare, ni bo ukoresha mu bikorwa byo gushaka ibitunga uyu mutwe ndetse bagakoreshwa mu buhinzi, mu bucuruzi bw’amakara n’imbaho, ndetse abandi bagakoreshwa mu gucuruza urumogi.

Umuyobozi bwa AFC/M23 buvuga ko burimo gucyura abanyamahanga mu bice bayobora, mu gushaka umutekano w’uduce bafashe.

Bishimiye gusubira mu gihugu cyabo

Abatashye baganiriye na Kigali Today bavuga ko bakuwe mu mu kigo cy’amashuri i Sake, aho bari bakambitse mbere yo gucyurwa mu Rwanda.

Bavuga ko bagiye mu nkambi i Sake bavuye mu bice bitandukanye muri Masisi, ubwo intarambara ya M23 na FARDC yari igeze mu bice bari batuyemo.

Sabato ni umwe mu batashye mu Rwanda, yambwiye Kigali Today ko ubuyobozi bwa M23 bwabasanze mu kigo babasaba kuhava none bageze mu Rwanda.

Avuga ko bifuzaga gutaha ariko bagatinya kubera FDLR na Mai Mai, zari aho bari batuye i Karenga.

Dr Oscar Balinda, umuvugizi wa AFC/M23 waherekeje Abanyarwanda ku mupaka yabwiye itangazamakuru ko gucyura Abanyarwanda biri muri gahunda bihaye yo gucyura abanyamahanga bari muri RDC.

Barakirwa neza mu Rwanda

Agira ati "Ibi biri muri gahunda ya AFC/M23 yo gucyura abanyamahanga bari mu gihugu cyacu, twabanje gucyura abacanshuro, twacyuye SADC, ubu turimo gucyura Abanyarwanda kuko hariya si iwabo. Ibi byiyongeraho ko bari indiri FDLR ikuramo abarwayi, bagahora bafashwe bugwate, ubu tubacyuye mu gihugu cyabo."

Dr Balinda avuga ko ubwo Leta ya Kinshasa yasinyaga amasezerano na CNDP 2009 harimo ingingo yo gucyura impunzi, baba Abanyekongo bagasubira mu gihugu cyabo, ariko n’Abanyarwanda bagataha, icyakora avuga ko bitubahirijwe.

Agira ati"Amasezerano yarasinywe ariko ntabwo yubahirijwe, ubu AFC nibwo turimo kubikorwa kandi tuzabikomeza."

Balinda avuga ko barimo gucyura Abanyarwanda bagera mu bihumbi 2, harimo 360 batashye tariki 18 Gicurasi 2025, n’aba 796 batashye uyu munsi avuga ko hari abandi basigaye bagomba gutaha.

Ubuyobozi bw’u Rwanda bwabakiriye ku mupaka wa La Corniche bwabahaye ikaze, bubajyana mu nkambi ya Nyarushishi mu Karere ka Rusizi, mu gihe abaje mbere bajyanywe mu nkambi ya Kijote.

Mulindwa Prosper, Umuyobozi w’Akarere ka Rubavu yababwiye ko bahawe ikaze mu gihugu cyabo, aho bagiye kwitabwaho mu mibereho n’iterambere.

Yagize ati "Muje mu gihugu gikunda abaturage, Igihugu cyigisha abana bakiri batoya ndetse n’abakuru bakagenerwa amasomo. Mugiye kubona itandukaniro ry’ubuzima muvuyemo n’ubwo mugiyemo, kandi mwumve ko ibyo mwabeshywe nta kuri kurimo. Mu Rwanda nta gihano cy’urupfu kihaba, hano ubutabera burakora, kandi uwarenganyijwe ararenganurwa."

Ati "Mugiye kwibagirwa intambara no guhangayika, hano hari gahunda nziza, aho umuturage ahabwa irangamuntu, umwana wese akiga, umwana akagaburirwa ku ishuri, watanga ibihumbi 3 ukavurwa umwaka wose. Mugeze mu gihugu mugiye guhabwa agaciro kandi muzabyishimira."

Abanyarwanda bakiriwe mu Rwanda biganjemo abagore n’abana, bigaragara ko bananiwe.

Meya Mulindwa yahaye ikaze abo Banyarwanda

Benshi bavuga ko bari muri Congo aho bari bafite imitungo irimo ubutaka n’amatungo, ariko bitaruka gutaha mu gihugu cyabo, aho bagiye kubaho mu mutekano, bitandukanye n’igihe bari bamaze baba mu ntambara.

Muri Gicurasi 2015, Leta ya Kinshasa yatangaje ko yabaruye Abanyarwanda bari muri DRC bagera mu 208,000 ndetse ibiganiro byahuje u Rwanda na RDC hamwe n’Ishami ry’Umuryango w’Abibumbye ryita ku mpunzi (HCR), bari baremeranyije ko impunzi mu bihugu byombi zitaha nubwo bitigeze byubahirizwa.

Dr Oscar Balinda akavuga ko Leta ya Kinshasa yabyanze kugira ngo ikomeze ibagire imbohe z’intambara, aho FDLR ikura abarwanyi.

Nubwo Leta ya Kinshasa yabaruye Abanyarwanda ibihumbi 208 bibarizwa mu Burasirazuba bwa DRC, mu Rwanda habarirwa impunzi z’Abanyekongo zigera ku bihumbi 81 bari mu nkambi zitandukanye.

VIDEO – Abanyarwanda batahutse mu Rwanda bari barafashwe bugwate na FDLR mu bice bitandukanye mu Burasirazuba bwa DRC, barizezwa kwitabwaho neza mu mibereho no mu iterambere.

Abarimo gutaha baragera mu bihumbi bibiri, harimo 360 batashye ku wa Gatandatu tariki 18 Gicurasi 2025… pic.twitter.com/XCdPlVRvQ6

— Kigali Today (@kigalitoday) May 20, 2025

Andi mafoto kanda HANO

Amafoto: Eric Ruzindana

Iki gikorwa cyatangijwe n’urugendo rwo Kwibuka

Minisitiri Sebahizi witabiriye igikorwa cyo kwibuka mu mujyi wa Gisenyi, avuga ko buri muntu atabona imbaraga zo gusubiramo amateka ashaririye y’ibyamubayeho muri Jenoside yakorewe Abatutsi, ariko n’abagira ubutwari bwo kuyatanga agomba kubungabungwa.

Agira ati “Turibuka amateka twanyuzemo, turibuka uruhare Abanyarwanda bayagizemo, turibuka politiki mbi yaranze Igihugu cyacu, ariko tuzirikana ko ari twe tugomba kwiyubaka, kongera kubaka Igihugu, tugahindura isura Igihugu cyacu cyambitswe n’abakiyoboye, isura Igihugu cyambitswe n’abakoloni ndetse tugahinduka ibyaremwe bishya.”

Minisitiri Sebahizi avuga ko Abanyarwanda bagomba gufata mu mugongo bakomeje abarokotse Jenoside yakorewe Abatutsi, baba abafite intege nke z’umubiri, bagakora ibishoboka byose mu kubafasha mu rugendo rw’ubuzima bwabo.

Avuga ko Jenoside yigishijwe nubwo batayivugaga mu mazina, ariko abakolonije u Rwanda muri raporo bakoraga bandikaga ijambo Jenoside bazi neza ibyo bakora, ikindi ngo mu mbwirwaruhame z’abanyapolitiki n’abandi bayobozi, habaga harimo ingengabiteKerezo ya Jenoside. Mu mashuri bahagurutsa abana babaza ubwoko bwabo.

Akomeza avuga ko kwibuka amateka ya Jenoside bituma abantu bumva neza ububi bw’ingengabitecyerezo yayo.

Ati “Amateka tugomba kuyamenya, ukuri tugomba kukumenya kandi tubungabunge aya mateka, kuko kwiyubaka bihera mu mitima y’Abanyarwanda, kandi icyiza kigomba gutsinda ikibi. Iyo twubaka Igihugu tuba duciye agasuzuguro, amahitamo meza dushaka ajyana n’uko twubatse Igihugu. Tugomba guharanira kwiyubaka kandi ni amahitamo yacu.”

Minisitiri Prudence Sebahizi

Mulindwa Prosper, Umuyobozi w’Akarere ka Rubavu, avuga ko Jenoside yakorewe Abatutsi mu Rwanda yagiye igira umwihariko, ariko uwa Gisenyi ari ubwicanyi bwahitanye Abatutsi benshi kandi mu gihe gito, bitewe n’uko hari Abatutsi bari bahatuye, abahakoreraga n’abandi bahaje bashaka guhungira mu cyahoze ari Zaïre.

Umuyobozi w’Akarere ka Rubavu ahumuriza abarokotse Jenoside yakorewe Abatutsi, ko ubuyobozi buzababa hafi kandi ibyabaye bitazongera ukundi.

Ati “Banyarubavu rero turabasaba kuba abantu bifatira ibyemezo, mutandukane no kugendera mu kigare, nk’uko bamwe muri gacaca bavugaga ko bashutswe. Urwibutso rwa Komini rouge ruruhukiyemo imibiri yabonetse, ariko hari indi itaraboneka, ntabwo habaho ukuri kurenze kumwe ku ngingo imwe”.

Ati “Turacyabona abantu bagoreka amateka, bashaka kuyavuga bakongeraho ibindi, tuzi ko hari abahunze bamaze guhekura u Rwanda, bumva bashaka gukomeza kwigisha Abanyarwanda ko gukora Jenoside yakorewe Abatutsi bari bafite ukuri. Ukuri ni ukumwe, habayeho Jenoside yakorewe Abatutsi, yakozwe n’abahutu bayobotse Guverinoma mbi, ukundi kuri ni uko batazongera gutsinda ngo bice Abatutsi ukundi.”

Ubuyobozi buzakomeza kuba hafi abarokotse Jenoside

Meya Mulindwa avuga ko ubuyobozi bw’Akarere ka Rubavu bwumva neza ubuyobozi bw’Igihugu, kandi bashyigikira abarokotse Jenoside mu kubafasha gukemura ibibazo bafite.

Ati “Kubaka amacumbi tubirimo neza, twatangiye gusana no kubaka inzu 85, ntabwo tuzarenza imyaka ibiri tutarashyira iki kibazo ku ruhande Dufatanyije n’abafatanyabikorwa bacu tuzabafasha kubona igishoro, imbaraga z’umubiri, kubaha amatungo magufi n’amaremere. Ibi ni igitonyanga mu nyanja tugendeye ku byo babuze, ariko tuzabaha urukundo nubwo tutasimbura abo mwabuze.”

Inzego z’umutekano zitabiriye igikorwa cyo kwibuka mu mujyi wa Gisenyi

Ambasaderi w’u Rwanda wihariye mu Karere k’Ibiyaga Bigari, Vincent Karega, avuga ko nta rurimi rwa gihutu, gitwa cyangwa gitutsi bibaho mu Rwanda, ahubwo ivangura ryazanywe n’abakoloni, ndetse abakoraga Jenoside barebaga mu irangamuntu ibyanditswemo, ariko nta tandukaniro hagati y’Abanyarwanda, ahubwo ibyabaye byagize ingaruka ku gihugu.

Agira ati “Ndahamya ko nta mwana n’umwe ufite ishema ry’uko abaturanyi babo barimbuwe na se cyangwa nyina, kandi ataragishije inama aho avuka. Hari imiryango yazimye, abari bato bakurana ibikomere ku mutima no ku mubiri, bakurira mu bigo byagize impuhwe birabarera.”

Akomeza avuga ko u Rwanda rufite politiki nziza yo kubaka ubumwe bw’Abanyarwanda.

Ati “Dufite Igihugu kirimo abantu bakomeretse, bababaye, bahungabanye, abakoze ibyaha, ababakomokaho bafite ipfunwe, ariko dufite politiki ivuga ko kera twashoboye kuba umwe, dukumira ubucakara, dukorera hamwe, kuki bitagaruka? Imbaraga z’ubumwe ni zo ziduhurije aha, ibyiza by’ubumwe ni byo bituma umuturanyi ataba umwanzi, akakubera isoko, amaboko, akakubera umutekano, akakubyarira abakwe cyangwa abakazana kubera politiki y’ubumwe.”

Turubaka politiki yo kwibuka kuko ibyabaye twabyigishijwe n’amahanga, ndetse Repubulika ya mbere n’iya kabiri bashishikariza abantu gufata amahiri n’imihoro bica abandi.

Yungamo “Ni amahano atuma amateka yacu aba amayobera, kubera imyumvire icuramye. Ni ngombwa ko twibuka kugira ngo tumenye ibyabaye twumve uburemere ibikomere byateye iki gihugu. Ntitwibuka kugira ngo duhore, ahubwo kugira ngo bitazasubira.”

Akomeza avuga ko kwibuka bifasha ababyiruka kumenya aho u Rwanda rwavuye.

Ati “Turibuka kugira ngo abana batuvukaho batagira ngo Igihugu gitekanye gutya byarikoze, bamenye ko byari bikomeye kandi badafite uburenganzira byo konona ibyakozwe, ariko ni umwanya wo kudaheranwa n’amateka, ahubwo agatsinda agahinda nubwo bitoroshye.”

Mulindwa Prosper, Umuyobozi w’Akarere ka Rubavu

Komini Rouge ni urwibutso rufite amateka yihariye, kuko ruherereye ahantu hari irimbi rya Ruliba, maze bakwica abo bitaga ibyitso by’Inkotanyi bakaza kubahamba hagati mu irimbi mu byobo byahacukurwaga.

Abayobozi batandukanye bitabiriye iki gikorwa

Itangazo ryashyizwe ahagaragara n’ Umuyobozi w’umuryango utabara imbabare CICR ritangaza ko amatsinda ya mbere agizwe n’abasirikare ba FARDC n’abapolisi n’abo mu miryango yabo batangira koherezwa Kinshasa.

Akomeza avuga CICR yasabwe kugira uruhare nk’umuhuza udafite aho abogamiye hagati y’umutwe wa M23 na Leta ya Kinshasa.

Itangazo rigira riti"CICR yasabwe gutanga ubufasha nk’umuhuza udafite aho abogamiye, ku wa 30 Mata 2025, yatangiye gukurikirana urugendo rw’amakamyo atwaye abantu bagera mu magana biganjemo abasirikare ba FARDC, abapolisi ba PNC ndetse n’imiryango yabo, baturutse i Goma berekeza i Kinshasa".

Rikomeza rigira riti "Bose bari bacumbikiwe mu kigo cya MONUSCO i Goma. Bakigera i Kinshasa, bazitabwaho n’ubuyobozi bwa Repubulika Iharanira Demokarasi ya Congo."

Abasirikare n’abapolisi basigaye mu mujyi wa Goma bahungira mu kigo cya Monusco nyuma y’uko abarwanyi b’umutwe wa M23 bari bamaze gufata umujyi wa Goma tariki ya 28 Mutarama 2025.

CICR itangaza ko iki gikorwa cyashobotse kubera ubufatanye bw’inzego zitandukanye burimo Minisiteri y’Ingabo ya DRC, MONUSCO, n’abahagarariye umutwe wa M23/AFC.

Umuvugizi wungirije wa AFC/M23 Dr Oscar Balinda yemereye Kigali Today ko abasirikare ba FARDC, Polisi n’imiryango yabo batangira kujyanwa Kinshasa, ndetse avuga ko banyuzwa inzira y’igitaka umuhanda wa Goma, Rutshuru kugera I Beni aho bazafatira indege.

ubuyobozi bw’ingabo za DRC FARDC bwishimiye iki gikorwa cya CIRC kigiye gukura abasirikare ba FARDC mu mujyi wa Goma ubu uyobowe n’umutwe wa M23.

Ni urugendo rusaba amasaha 10, CICR ikazaruherekezwamo n’ingabo za Monusco zizabacungira umutekano mu bice biyobowe na M23.

Bicyekwa ko abasirikare ba FARDC, Wazalendo, Polisi na FDLR babarirwa mu bihumbi bitanu bahungiye muri Monusco nyuma yo gutsindwa na M23 mu mujyi wa Goma, cyakora bivugw ako hari abashoboye gusohoka rwihishwa bakajyanwa i Beni na Monusco.

Hari amakenga ko mu basirikare ba FARDC barimo abarwanyi ba FDLR nabo bashobora kujyanwa Kinshasa, ibi bikazakomeza kuba umuzigo ku biganiro by’amahoro birimo gukorwa hagati y’u Rwanda na DRC mu gihe bahungubanya umutekano w’u Rwanda bakomeje guhinshwa no guhungishwa mu mayeri akomeye.

Ibi bikoresho birimo ibifaru bikururwa n’iminyururu ndetse n’iby’ibinyabiziga bisanzwe, ni bwo byatangiye kwambuka ku mupaka wa Rubavu.

Hari hashize igihe bivugwa ko SADC izataha inyuze ku kibuga cy’ indege cya Goma ariko ntibyakunda, ariko andi makuru na yo akavuga ko ngo batashakaga guca mu Rwanda, kuko ngo bumvaga ko cyaba ari igisebo.

SADC inyujije ibikoresho mu Rwanda nyuma yo gutsindwa n’ umutwe wa M23 mu mirwano yabaye mu bice bitandukanye mu Burasirazuba bwa Congo haba muri teritwari ya Masisi, Rutshuro, Nyiragongo n’ umujyi wa Goma.

Umuryango wa SADC wari wohereje ingabo zibarirwa mu bihumbi 5 mu Burasirazuba bwa DRC, cyakora uherutse gutangaza ko hari abasirikare bawo bagera muri 200 wabuze bikekwa ko biciwe mu mirwano bari bahanganyemo na M23.

VIDEO – Ibikoresho by’ingabo za SADC binyujijwe mu Rwanda nyuma y’uko mu minsi yashize SADC yashakaga kubicyura binyuze ku kibuga cy’indege cya Goma, ariko ntibyakunda.
SADC icyuye ibikoresho nyuma yo gutsindwa n’umutwe wa M23 mu mirwano yabaye mu bice bitandukanye mu… pic.twitter.com/7iKzab6SHP

— Kigali Today (@kigalitoday) April 29, 2025

VIDEO - Imodoka zitwaye ibikoresho by'ingabo za SADC zinyuze mu mujyi wa Musanze saa munani, zerekeza i Kigali. https://t.co/1JbODgLjj8 pic.twitter.com/vqgv6ffX1l

— Kigali Today (@kigalitoday) April 29, 2025

Uwo muhora abaturage bise "isoko mpuzamahanga" uri mu kagari ka Gikombe, Umudugudu wa Bushengo aho abatwaye magendu bakuye mu gihugu cy’abaturanyi cya Repubulika Iharanira Demokarasi ya Kongo bakunze kuyururukiriza, bakahahurira n’Abakiriya bayicururiza aho, ndetse abandi bakayijyana mu bindi bice by’umujyi.

Abayobozi b’Akarere ka Rubavu bavuga ko ibi bihungabanya umutekano harimo no kwibasira inzego z’umutekano igihe bagiye guhagarika ubwo bucuruzi butemewe.

Guverineri w’Intara y’Iburengerazuba Jean Bosco Ntibitura ari kumwe n’inzego z’umutekano baganiriye n’abaturage bo muri aka gace, ari naho abaturage baherutse kwitwara nabi, bagatera amabuye inzego z’umutekano ndetse abantu bagakomereka.

Guverineri yavuze ko ibyakozwe n’abaturage bidakwiriye agira ati “Abaturage mwirinde magendu. Mwashyiriweho uburyo buborohereza kubona ibyangombwa byambukiranya imipaka. Twe ntabwo twishimiye ubuhahirane bunyuze muri magendu, munyure ku mipaka yemewe dore ko mwanongererewe amasaha yo gukora.”

Akomeza avuga ko gukoresha inzira zitemewe bijyana no kunyereza imisoro kandi ufashwe arabihanirwa.

Maj Gen Eugène Nkubito Umuyobozi w’ingabo mu Ntara y’Iburengerazuba avuga ko ingabo z’ igihugu zishinzwe kurinda umupaka w’igihugu mu kurinda umutekano w abaturage n’ ibyabo, naho umutekano mu gihugu imbere ukarindwa n’ abaturage na polisi.

Avuga ko kuba hari abaturage batinyuka gutera amabuye ubuyobozi bidakwiye kuko ejo bazatera amabuye n’inzego z’umutekano.

Agira ati “nahawe inshingano zo kubarinda, kandi ntabwo warinda abo udakunda, turabakunda, twifuza ko mukora mugatera imbere ariko ntabwo dukeneye ko mutera imbere mukora ibyaha, mukore mwirinda gukora ibitemewe.”

Umuyobozi wa Polisi mu Ntara y’Iburengerazuba, Commissioner of Police (CP) Emmanuel Hatari avuga ko kurwanya inzego z’umutekano ari ukwiyahura.

Agira ati “Ni ibintu bitabaho aho abayobozi baza gufata abacuruza forode mukaza kubatera amabuye kuri buriya buryo, ntabwo bikwiye kwiyahura utera amabuye inzego z’umutekano. Numutera ibuye azagutera isasu kandi hari imico idakwiriye abanyarwanda b’iki gihe, hari ibihugu bibaho, ariko mu Rwanda hari ubuyobozi, urugomo rutumvira rugamije ubugizi bwa nabi ntibikwiriye.”

Abaturage bavuga ko hari abantu babo bafunzwe n’inzego z’umutekano kubera ibi bibazo bavuga ko byabaye ndetse bagasaba imbabazi ubuyobozi kuko ibyakozwe bitari bikwiye.

Manishimwe Françoise umwe mu bacururiza mu isoko rya Mpuzamahanga avuga ko iryo soko abarikoreramo bababarirwa, kuko byakozwe n’abandi.

Agir ati “ forode ibamo, nanjye nshuruza imyenda kandi nyirangura hariya, icyabaye abayobozi baje gufata magendu, kubera gutinya turiruka, gusa hari abandi bantu baje gukora ibikorwa bidakwiye kandi ntitwari tugihari, abo nibo bakoze ibyaha turimo kubazwa.”

Manishimwe asaba ubuyobozi bw’Intara n’inzego z’umutekano kubakorera ubuvugizi kuko ibyo bakora babiterwa n’amategeko ataborohera kandi bakeneye kubaho.

Agira ati “Mutwemerere tunyure ku mupaka, imyenda turangura i Goma mutwemerere tuyisorere itabanje kujya i Kigali ngo imareyo ukwezi, tuyisorere dukore neza twubahiriza amategeko.”

Usabyemariya Janviere asaba imbabazi avuga ko ibyabaye bidakwiriye abanyarwanda, cyakora avuga ko ikibazo cya magendu kivugwa mu Karere ka Rubavu giterwa n’uko abanyarubavu bashaka gukora kandi ibicuruzwa bibanje kujyanwa i Kigali bigatinda.

Abaturage batuye mu Karere ka Rubavu bavuga ko benshi badafite icyo gukora kandi bakeneye kubaho, ibi bakabishingira kuba badafite ubutaka bwo guhinga, aho kororera, igishora gihagije cyo gucuruza, bigatuma benshi bakora ubucuruzi bwambukiranya umupaka, nawo wari umaze igihe udakora neza.

Bavuga ko iyo baranguye imyenda ya caguwa I Goma bakayizana mu Rwanda itemerwa, mu gihe bajya kuyirangura i Kigali ikabahenda.

Basaba ko bakoroherezwa bakayirangura i Goma bakayisorera bagacuruza batekanye badahunga inzego z’umutekano kuko icyo banga si ugusora ahubwo ni uko bayizana ntiyemerwe igafatwa nka magendu.

Guverineri Ntibitura yabwiye Kigali Today ko iki kibazo akivuganaho n’ubuyobozi bw’ikigo gishinzwe imisoro n’amahoro, hakarebwa icyakorwa mu kurinda abaturage.

Hagati aho, yabwiye abasanzwe bacururiza muri iri soko bise ’Mpuzamahanga’ ko bazahabwa ibibanza mu yandi masoko.

Dusabe yishimanye n’abana bakuwe mu muhanda

Avugana na Kigali Today, Dusabe yatangaje ko ari mu rugendo rutegura kwizihiza imyaka 25 akorera Imana, kandi rujyana no gusohora indirimbo buri kwezi.

Agira ati "Maze imyaka 25 ndirimba indirimbo zo kuramya no guhimbaza Imana, indirimbo ya mbere yitwa ‘Mfite Umukunzi’ yasohotse mu 2000, muri 2004 nakoze album ya mbere yiswe Ibyiringiro, nakoze ibitaramo bitandukanye mu karere, ubu rero ngiye gukora igitaramo cyizihiza ibyo bikorwa byinshi nakoze.”

Alexis Dusabe avuga ko arimo gutegura album igizwe indirimbo 15 zizaba ziri mu kinyarwanda, igifaransa, igiswahili n’ icyongereza kandi buri kwezi asohora indirimbo, mu kwezi kwa Gashyantare na Werurwe yasohoye indirimbo.

Alexis Dusabe aririmbana n’abana indirimbo ze

Arongera ati “Ndimo gusohora indirimbo buri kwezi, maze gusohora indirimbo ebyiri harimo; ‘Amavuta y’Igiciro n’indi yitwa ‘Ntumukundire’ yasohotse muri Werurwe, indi igiye gusohoka yitwa ‘Ndashima Yesu’.”

Avuga ku bikorwa byo gusura abana ba Incredible Kids Academy, avuga ko yashimishijwe no gusura abana bakuwe mu muhanda, abandi n’imfubyi i Rubavu.

Ati “Nabanye nabo, turataramana, tugirana ibihe byiza kandi nshishikariza abantu ijambo rivuga ko idini nyakuri ari ugusura imfubyi n abapfakazi no kwirinda ibibi. Byanshimishije kubana, twabyinanye, turaganira bimbera byiza.”

Alexis Dusabe avuga ko mu gitaramo ‘Umuyoboro 25 years of talent and Grace’, azaba yizihiza imyaka 25 akora umurimo w’Imana, yifuza gutumira Incredible Kids Academy, kuko yabasanganye impano ndetse akaba yiyemeje kubabera umuvugizi.

Igishushanyo mbonera kizatuma ubutaka bwa Rutsiro bukoreshwa neza (Ifoto: GGGI)

Ni igishushanyo mbonera giteganyijwe kuboneka mu mezi atandatu ari imbere, kikaba kizatunganywa ku bufatanye bw’ikigo GGGI (The Global Green Growth Institute), Ikigo mpuzamahanga gifatanya na Guverinoma y’u Rwanda mu mishinga y’iterambere, kurengera ibidukikije

Umujyi wa Rutsiro (Ifoto: GGGI)

no guhangana n’ingaruka z’imihindagurikire y’ikirere

Jean Pierre Munyeshyaka, umukozi w’ikigo mpuzamahanga GGGI cyibanda ku bukungu burambye, avuga ko igishushanyo mbonera kizagena imikoreshereze y’ubutaka harebwa aho abantu bazatura n’ibizabafasha mu iterambere hatangijwe ibidukikije.

Ati “Tugendera ku bikorerwa ahandi bigashyirwa mu gishushanyo mbonera, bikazafasha akarere gutegura imikoreshereze y’ubutaka hirindwa ibyangiza ibidukikije.”

Munyeshyaka avuga ko bazakora igishushanyo mbonera bagendeye ku cyakozwe ku rwego rw’Igihugu, ibi bikazafasha ko ibyateganyijwe ku rwego rw’Igihugu bizajya mu gishushanyo cy’Akarere.

Hari abashaka gukoresha ubutaka bwabo ntibabyemererwe (Ifoto: GGGI)

Umuyobozi w’Akarere wungirije ushinzwe iterambere ry’Ubukungu mu Karere ka Rutsiro, Emmanuel Uwizeyimana, avuga ko aka karere gasanzwe kadafite igishushanyo mbonera gikoreshwa mu kugena imikoreshereze y’ubutaka, ndetse bigateza amakimbirane hagati y’abaturage n’ubuyobozi, mu gihe umuturage ashaka gukoresha ubutaka uko abishaka ntabyemererwe.

Agira ati “Igishushanyo mbonera y’imikoreshereze y’ubutaka kizakemura ibibazo byinshi bijyanye n’imikoreshereze yabwo, bitewe n’uburyo akarere karimo gutera imbere kandi kakira abashoramari benshi.”

Akomeza avuga ko kuba badafite igishushanyo giteganya imikoreshereze y’ubutaka bigira ingaruka ku bashaka gushora imari mu karere, bityo igishushanyo ni kiboneka kizatuma abaza gushora imari bamenya uko bakoresha ubutaka.

Akarere ka Rutsiro kazwiho ubuhinzi n’ubukerarugendo, ibi bikaba biterwa n’uko imirenge 7 muri 13 ikora ku kiyaga cya Kivu, ariko nta bikorwa by’amahoteri menshi birahagezwa bitewe n’uko nta gishushanyo kigaragaza ibikorwa byahagenewe n’uko bigomba kuhashyirwa.

Visi Meya Emmanuel Uwizeyimana (Ifoto: GGGI)

Akarere ka Rutsiro gafite igice kinini cya pariki ya Gishwati kitabyazwa umusaruro mu gukurura ba mukerarugendo.

Aka karere kazwiho kugira ubuhinzi bw’icyayi n’ikawa, nyamara ngo kubera kutagira igishushanyo mbonera bituma ubuhinzi buvangwa n’imiturire cyangwa byose bikabangamirwa n’ibiza bikunze kuhibasira.

Uwizeyimana avuga ko nyuma y’igishushanyo mbonera, bagiye kumenya buri gikorwa cy’iterambere aho kigomba gushyirwa kandi bizeye ko kizaramba.

Uyu muyobozi abwira abaturage ko batagiye guhagarika imikoreshereze y’ubutaka bwabo, ariko ngo aho bateganya gushyira ibikorwa binini nk’inganda, icyanya cy’imodoka zitwara abantu n’ibintu (gare) bazaba bakomeje kuhakoma, kuko igishushanyo mbonera kizagena imikoreshereze y’ubutaka kugera muri 2050.

Ubuyobozi bw’Akarere ka Rutsiro bwizera ko nyuma y’igishushanyo mbonera buzabona abashomari benshi babyaza umusaruro amahirwe aboneka; haba mu bukerarugendo buzamuka imisozi, ubw’imyemerere ahazwi nka Congo Nil, ubukerarugendo bwo mu mazi y’ikiyaga cya Kivu, ubw’ubuhinzi bushingiye ku bw’icyayi, ubworozi bw’inzuki, Pariki ya Gishwati hamwe n’ubucukuzi bw’amabuye y’agaciro.

Umujyi wa Rutsiro (Ifoto: GGGI)

Bakoze urugendo rwo Kwibuka

Agira ati "Ingengabitekerezo ya Jenoside yari ifitwe n’ingabo za FAR, interahamwe, CDR n’abandi bicanyi bamaze gutsindwa n’ingabo za FPR-Inkotanyi, bahungiye muri Zaïre aho bakomeje ibikorwa byo kwica Abatutsi."

Akomeza agira ati "U Rwanda dufite ubu, si rwo twari dufite mbere y’umwaduko w’abazungu. Ubwo imipaka yakatwaga hari Abatutsi bari mu Rwanda ariko hari n’abagumye hakurya y’umupaka. Aba nibo barimo kwibasirwa n’abasize bakoze Jenoside mu Rwanda bagahungira muri Repubulika Iharanira Demokarasi ya Congo."

Akomeza avuga ko bageze muri Zaïre bakomeza ibikorwa byo kwibasira Abatutsi, ibihumbi byinshi byahungiye mu Rwanda, abasigaye barimo kwicwa bashinjwa kuba Abanyarwanda.

Agira ati "Bakomereje kwica Abatutsi muri Zaïre, ibihumbi byinshi bihungira mu Rwanda, abasigayeyo nibo barimo kwicwa bashinjwa kuba Abanyarwanda, birengahije uko bakatiweho imipaka. Abakoze Jenoside mu Rwanda ingengabiteKerezo barayambukanye, bayigisha Abanyecongo ubu nabo bamenye guhiga Abatutsi."

Akomeza asaba imiryango mpuzamahanga guhagurukira ingengabitecyerezo ya Jenoside ikomeje kwaguka mu Burasirazuba bwa DRC, aho abasize bahekuye u Rwanda bashaka kugaruka kwica Abatutsi mu Rwanda.

Ati "Barateshejwe, bahungira muri Zaïre, ariko inshuro nyinshi bagaragaje inyota yo kugaruka kutwica, mu 1997, 1998 na 1999 barabigaragaje mu cyahoze ari Ruhengeri na Gisenyi, baragarutse mu yindi sura biyita abacengezi, ariko ibikorwa byabo byari ukwica Abatutsi. Ibyo kandi twongeye kubibona nyuma y’imyaka 31 aho imirwano yabaye mu mujyi wa Goma, aho guhangana na M23 barekeje imbunda mu Rwanda bararasa, twapfushije abantu."

Bacanye urumuri rw’icyizere

Abakoze Jenoside mu Rwanda bagaragaje inyota yo kwica Abatutsi mu 1998

Uretse Gasheja ugaragaza uburyo abasize bahekuye u Rwanda bagifite inyota yo kugaruka kwica abatutsi, Gasirimu Jean warokotse igitero cy’abacengezi mu Murenge wa Nyamyumba cyari kigamije kwica abakozi b’uruganda rwa Bralirwa tariki 19 Mutarama 1998, avuga ko cyari kigamije kwica Abatutsi.

Agira ati "Bralirwa yari ifite bisi ebyiri nini zitwara abakozi b’uruganda, kandi abakorana n’abacengezi bari barababwiye ngo imodoka itwara abakozi bo mu mujyi iba irimo Abatutsi. Twaraje tugeze aho badutegeye dusanga abacengezi batanu baduteze, bahagarika imodoka, ubwo shoferi yarimo ahagarara bahise bamurasa, isubira inyuma ihagama mu muferege, abandi bacengezi bahise baza bararasa batitaye kumenya ko hari uwarokoka."

Iyo bisi yari itwaye abantu barenga 50, Gasirimu avuga ko nyuma yo kurasa nk’iminota icumi ubakuriye yabasabye guhagarara kurasa, maze basaba abahutu barimo kuvamo.

Nubwo abantu benshi bari barashwe, abashoboye bavuze ko nta bahutu n’Abatutsi barimo, maze abacengezi bagira umujinya bongera kurasa imodoka ndetse bahita bayisukaho lisansi barayikongeza iragurumana.

Agira ati "Abacengezi bamaze gukongeza bisi, bamwe barashe imodoka bari mu muhanda, abandi bazamuka hejuru y’umuhanda barasa unyeganyega wese ahunga umuriro. Byabonekaga ko bafite umujinya wo kuba nta washyigikiye ibitecyerezo byabo."

Abagize FDLR bakomeje umugambi wo guhekura u Rwanda

Imigambi y’abakoze Jenoside mu Rwanda bahungiye muri RDC ikomeje kugaragazwa n’ibyo bakorera mu Burasirazuba bw’icyo gihugu, aho mu mwaka wa 2024 na 2023, Abatutsi benshi bazize uko baremwe haba mu mujyi wa Goma, teritwari ya Masisi ndetse imibare y’impunzi zihungira mu Rwanda yakomeje kwiyongera.

Umuyobozi w’Akarere ka Rubavu Mulindwa Prosper

Uretse kwica Abatutsi, abayobozi b’umutwe wa FDLR bakomeje gushuka urubyiruko rw’u Rwanda ngo rukomeze kubiyungaho.

Mu gikorwa cyo kwibuka ku nshuro ya 31 Jenoside yakorewe Abatutsi mu Karere ka Rubavu, Umuyobozi w’ako Karere Mulindwa Prosper, yavuze ko ubuyobozi bwa RDC, umuterankunga wa FDLR na Wazalendo, bagiye bashuka urubyiruko rw’u Rwanda kubagana, ndetse ubu hari abatangiye kugaruka.

Meya Mulindwa avuga ko Jenoside yakorewe Abatutsi yabereye rimwe mu gihugu hose, ko ibyabereye i Kibungo byarimo bibera i Gisenyi, Rusizi, Ruhengeri na Butare, bigaragaza ko byari byarateguwe.

Ati "Twaje kwibuka kugira ngo twongere dusubize icyubahiro abishwe bambuwe, bicwa urupfu rw’agashyingaguro, mu mbeho nyinshi ya Bugeshi, imvura y’itumba, bagatotezwa batitaye ku bana cyangwa ababyeyi".

Yungamo ati "Aha ni metero nke ngo umuntu yambuke umupaka, nyamara ibikorwa bya Jenoside byatangijwe i Kigali na Bugeshi byarimo bikorwa. Ibi bigaragaza ko yari yarateguwe. Twe uyu munsi twaje gufata mu mugongo no guhumuriza abarokotse Jenoside yakorewe Abatutsi, twaje kwibukiranya amateka yacu, kuko abicaga bari bazi abo bica, kandi nta cyaha bari bakoze uretse uko baremwe."

Hashize imyaka 31 RDC icumbikiye abahekuye u Rwanda, yarabakiriye ibagira abere, ndetse ibafasha guhembera urwango no kugaruka kurangiza ibyo basize batarangije mu kwica Abatutsi.

Akomera agira ati "Ubuyobozi bwacu bushyize imbere kubaka ubumwe n’ubudaheranwa bw’Abanyarwanda, abaturage ba Rubavu bakunda Leta yabo. Ubwo ingabo za FARDC n’abafatanyabikorwa babo barashe mu Rwanda, ntacyo bagezeho kuko basanze ingabo z’u Rwanda zihora ziteguye kurinda Abanyarwanda maze amabombe araswa mu Rwanda asamwa n’andi, ayabuza kugira ibyo yangiza. Turashimira ingabo zacu ziyobowe n’Umutoza w’ikirenga, Perezida Paul Kagame."

Akomera agira ati "Hari abaturage bacu bashukishijwe amafaranga binjizwa muri FDLR na Wazalendo, ubu turimo gukora ubukangurambaga, abari baragiye barimo kugaruka kandi turasaba abaturage bacu guhitamo neza, kuba mu gihugu cyabo. Abajya muri FDLR ni ukuba mu mashyamba bihamagarira urupfu, mu gihe Abanyarwanda batekanye bitabira kwiteza imbere."

Mulindwa ahumuriza abarokotse Jenoside yakorewe Abatutsi, ko nta Jenoside izongera kubaho ukundi, ahubwo ikigezweho ari ukwiteza imbere no kubaho neza.

Ubuyobozi bw’Akarere ka Rubavu bugaragaza ko imvura irimo umuyaga yasakambuye inzu 15, isenya urukuta rw’inzu, ibikoni 4, ubwiherero 8, usakambura ibyumba by’amashuri 12 ku bigo bya GS Kayanza na Sanzare mu Murenge wa Nyundo, hamwe na ECD Busasamana mu Murenge wa Busasamana.

Iyi mvura itamaze igihe kinini, yangije ibikorwa remezo by’amashanyarazi na hegitari 48 zihinzemo imyaka.

Ubuyobozi bw’Akarere ka Rubavu bugaragaza ko kuva tariki ya 26 Werurwe 2025, ibiza biterwa n’imvura n’umuyaga bimaze gusakambura ibisenge by’inzu 23, inkuta z’inzu 7, hasenyutse ubwiherero 9 n’ibikoni 9.

MINEMA yatangije umukoro ngiro wo guhangana n’ibiza

Ubuyobozi bw’Akarere ka Rubavu, MINEMA n’abafatanyabikorwa bayo tariki ya 4 Mata 2025, bakoze umukoro ngiro wo guhangana n’ingaruka zaterwa n’ibiza mu gihe hagwa imvura nyinshi, nk’uko byagaragajwe n’ikigo cy’Igihugu gishinzwe iteganyagihe.

ACP Egide Mugwiza, umuyobozi ushinzwe ubutabazi bwihuse muri MENEMA, avuga ko bateguye umwitozo bagamije kwitegura guhangana n’ibiza biboneka mu kwezi kwa kane n’ukwa gatanu, ahaboneka imvura nyinshi mu Rwanda.

ACP Mugwiza avuga ko bakoze umwitozo wo guhangana n’ingaruka z’imyuzure n’inkangu, biterwa n’imvura nyinshi igwa cyane cyane mu Burengerazuba bw’u Rwanda.

Agira ati “Muri Rubavu umugezi wa Sebeya ukunda guteza ibibazo nubwo hari ingamba zafashwe. Twateganyije umwiteguro kugira ngo turebe imikoranire y’inzego zose n’uburyo ziteguye mu bikorwa by’ubutabazi, haba gutegura ibikoresho no gutegura abaturage, n’uburyo bwo gushyira mu bikorwa ubutabazi bwihuse kugera abaturage basubijwe mu buzima busanzwe.”

MINEMA itangaza ko yiteguye guhangana n’ibiza aho byaba hose mu Rwanda, ibyo ngo bikorwa mu gutangira amakuru ku gihe, gutegura ibikoresho by’ubutabazi hamwe no kwimura abantu batuye mu manegeka.

Mu Rwanda habarurwa imiryango 1,622 igomba kwimurwa harimo 88 ituye mu Karere ka Rusizi, 452 ituye muri Rubavu, 424 ituye muri Rutsiro, 48 muri Karongi, 100 muri Nyamasheke, 69 muri Nyamagabe, 77 i Nyaruguru na 364 mu Karere ka Nyabihu.

MINEMA yibutsa Abanyarwanda kwirinda kugenda mu mvura mu gihe hari inkuba, kwirinda kugama munsi y’ibiti, gucomeka ibikoresho by’amashanyarazi no kwambuka imigezi mu gihe imvura irimo kugwa.

ACP Mugwiza ati “Byagaragaye ko abantu batwarwa n’imigezi bagerageza kwambuka mu gihe imvura irimo kugwa. Abantu birinde ibyabashyira mu kaga, bazirike ibisenge by’inzu kuko byinshi bitwarwa n’umuyaga.”

Umuyobozi w’Akarere ka Rubavu, Mulindwa Prosper, avuga ko ako Karere gashobora guhura n’ibiza byose uretse amapfa, kandi ko kwitegura guhangana n’ibiza biterwa n’imvura ari ingenzi, bitewe n’amateka n’imiterere y’Akarere ka Rubavu.

Umugezi wa sebeya wari usanzwe uteza ibiza ubu washyizweho ibikorwa remezo bituma utongera gutera abaturage, hubatswe inkuta ndende zikikije umugezi, hubatswe ikidendezi gifata amazi menshi y’umugezi kikayarekura buhorobuhoro, mu kwirinda ko uwo mugezi wongera kugira umuvuduko mwinshi.

Himuwe kandi imiryango yari ituriye Sebeya, mu kwirinda ko amazi yaba menshi ikaba yasenyerwa.

Meya Mulindwa avuga ko imiryango ibarirwa muri magana yari ifite ibibanza yamaze kubakirwa, mu gihe indi ibarirwa muri 800 idafite ibibanza hamaze gutegurwa aho izubakirwa.

Impande zombi zagiranye amasezerano yorohereza SADC gutaha

Inama yahuje abayobozi b’ingabo mu bihugu by’Afurika y’Epfo, Malawi na Zambia hamwe na Maj Gen Sultan Makenga na Brig Gen Byamungu Bernard na Guverineri w’Umujyi wa Goma, bumvikanye ko AFC/M23 igiye gufasha ingabo za SADC kwitegura gusubira mu bihugu zaturutsemo, kandi ibikorwa by’amakimbirane bari bafitanye bigahagarara.

Iyo nama yabereye mu mujyi wa Goma kuri uyu wa Gatanu tariki 28 Werurwe 2025, hakaba hemejwe ko ingabo za SADC zitegura gutaha nta gitutu, ndetse zikazatahana ibikoresho byazo birimo intwaro, ariko bakazasiga ingabo za FARDC zabahungiyeho.

Hemejwe kandi ko impande zombi zigiye gufatanya kugenzura imyiteguro yo gutaha kw’ingabo za SADC, ndetse zigakurikirana isanwa ry’ikibuga cy’indege cya Goma kizatangira gukora mu minsi iri imbere.

Ni amasezerano agezweho nyuma y’iminsi ishize ingabo za SADC ziri mu mujyi wa Goma, zitemerewe kugenda zitwaje intwaro muri uyu mujyi.

Sindayiheba Phanuel, Umuyobozi mushya w’Akarere ka Rusizi

Sindayiheba Phanuel uri mu Ntwari z’i Nyange, atorewe kuyobora Akarere ka Rusizi, nyuma y’amatora yabanje yamugejeje mu Nama Njyanama yako.

Mukakalisa Francine yatorowe kuba Umuyobozi w’Akarere ka Rusizi wungirije ushinzwe imibereho myiza y’abaturage.

Ntakirutimana Julienne yatorewe kuba Umuyobozi w’Akarere ka Karongi wungirije ushinzwe iterambere ry’Ubukungu

Dr Kibiriga Anicet yeguye kuri uyu mwanya ku itariki 23 Ugushyingo 2024, akaba yarajyanye na Dukuzumuremyi Anne Marie wari Umuyobozi w’Akarere Wungirije ushinzwe Imibereho myiza y’Abaturage, ndetse n’uwari Umujyanama uhagarariye Inama y’Igihugu y’Abagore (CNF), Jeanne Niyonsaba

Muzungu Gerald watorewe kuyobora Akarere ka Karongi

Ntakirutimana Julienne, FED Karongi

Mukakalisa Francine

Inyubako yatashywe

Umuyobozi w’ibitaro bya Gisenyi, CSP Dr Tuganeyezu Oreste, avuga ko mu kwezi bohereza abarwayi 60 mu bindi bitaro bitewe n’ubushobozi bukeya ibitaro bifite, ariko akemeza ko inyubako bahawe izatuma umubare boherezaga mu bindi bitaro ugabanuka.

Agira ati “Hari abarwayi twohereza ku bindi bitaro bitewe n’imiterere y’indwara, ariko hari n’abandi twoherezaga bitewe n’ubushobozi bukeya. Inyubako n’ibikoresho twahawe bizagabanya umubare w’abarwayi twohereza ahandi kuko tuzajya tubivurira.”

Inyubako yo kubagiramo yatanzwe na ‘Operation Smile’, ndetse igira uruhare mu kuvura abarwayi ku bitaro bya Gisenyi.

Ni inyubako yubatswe mu gihe cy’amezi atatu, hamwe n’ibikoresho byayishyizwemo bitwara agera kuri Miliyoni 300Frw.

Ku bitaro bya Gisenyi ubu hari abaganga baje kuvura abarwayi bafite ubusembwa ku mubiri, bakaba bamaze kuvura abarenga 50.

Nzakizwanimana Jean Népomuscène atangaza ko yari afite ikibyimba ku ijosi kitamurya, ariko kimubangamiye ndetse umuryango we umubuza kujya kwivuza batinya ko yapfa.

Ati “Nabibonye nk’igitangaza, naje kwivuza umuryango wanjye umbuza, ariko ngeze kwa muganga baramvuye mu minsi ibiri ndakira. Ubu utanzi ntiyamenya ko nagize ikibyimba, turashimira aba baganga bitanga.”

Ni inyubako ifite ibikoresho bigezweho bijyanye no kubaga abarwayi

Abaganga ba Operation Smile bavuga ko bitanga mu gufasha abantu bafite ubusembwa kugira ibyishimo.

Umwe mu baganga ati “Twasanze hari abantu batagira indorerwamo batinya kwireba kubera ubusembwa buri ku mubiri wabo, ariko iyo tubavuye, bishimira umubiri wabo ndetse bagashimishwa no kubaho.”

Ubuyobozi bwa Operation Smile butangaza ko bwatangiye buvura indwara y’ibibari, ariko bageze aho bavura n’izindi ndwara zisaba kubaga uruhu, ndetse bakaba bakora n’ibikorwa byo kubaka inyubako zikorerwamo ubuvuzi bwo kubaga, kongera umubare w’abaganga babaga uruhu ndetse bakora na ‘Plastic surgery’.

U Rwanda ruri mu bihugu 10 bifashwa na Operation Smile, kandi ngo imiyoborere myiza yarwo ituma ibikorwa by’uyu muryango bigera ku ntego zawo.

Andrew Karima, umuyobozi wa Operation Smile mu Rwanda, avuga ko impuguke zibaga indwara z’uruhu mu Rwanda zikiri nkeya, bityo bakaba bafite gahunda yo kubongera.

Agira ati “Hano i Gisenyi twatanze inyubako yo kubagiramo n’ibikoresho, ariko twatanze n’ibyumba abaganga bashobora gukurikiraniramo amasomo yo kubaga, ni uburyo bwiza bwo kwigisha abaganga bacu.”

Ahacumbikirwa abarwayi harongerewe

Karima avuga ko ubusanzwe umuganga umwe ubaga indwara z’uruhu, abarirwa abarwayi ibihumbi 5 mu gihe mu Rwanda hatabarirwa n’abaganga 10.

Ibitaro bya Gisenyi bifatwa nk’ibitaro byakira abarwayi benshi mu Rwanda, bikurikirana abaturage ibihumbi 550 bagize Akarere ka Rubavu, hakiyongeraho abavuye mu Turere twa Rutsiro na Nyabihu hamwe n’abavuye mu mujyi wa Goma.

CSP Dr Tuganeyezu Oreste avuga ko bari mu rugendo rwo kubyongerera ubushobozi, haba mu nyubako n’abakozi kuko byakira abarwayi benshi.

Operation Smile imaze kuvura abarwayi bafite indwara z’uruhu zikenera kubagwa 1788, icyakora ngo umubare w’abakeneye ubu buvuzi uracyari munini.

Karima avuga ko ubu abarwayi mu Rwanda bakoresha iminota 47 kugira ngo babe bageze kwa muganda, mu gihe intego ari ukutarenza iminota 30.

Ishimwe Pacifique Umuyobozi wungirije w’Akarere ka Rubavu ushinzwe imibereho myiza y’abaturage, avuga ko ashimira Minisiteri y’ ubuzima ibazanira abafatanyabikorwa babagezaho Serivisi z’ubuzima, kandi hari intambwe nziza imaze kugerwaho. Avuga ko bifuza ko ibitaro bigera ku rundi rwego, bikongera serivisi zihatangirwa.

Yishimiye ko haje abaganga babaga indwara zo ku ruhu

Ubwo abayobozi batahaga iyo nyubako

Ubwo Minisitiri Biruta yatangizaga iyubakwa ry’icyo kigombonezamikurire

Ni ikigo kizubakwa mu bikorwa bihuriweho n’inzego z’umutekano, mu gufasha abaturage kugira imibereho myiza n’iterambere, mu gihe u Rwanda rugiye kwizihiza imyaka 31 rwibohoye n’imyaka 25 Polisi y’u Rwanda ikorana n’abaturage.

Minisitiri Biruta avuga ko ibikorwa bihuriweho na Polisi n’Ingabo z’u Rwanda, bigira uruhare mu guteza imbere abaturage.

Agira ati "Buri mwaka Polisi igira ukwezi kwahariwe ibikorwa, ikora mu gufasha abaturage kwiteza imbere no kugira imibereho myiza.

Umwaka ushize bashyizeho ubufatanye bw’amezi atatu, hakozwe ibikorwa byinshi birimo kubaka imihanda n’ibiraro byangijwe n’Ibiza. Hubatswe amashuri, hakorwa ibikorwa by’ubuvuzi, hatanzwe amatungo n’ibindi bikorwa bifasha abaturage kugira ubuzima bwiza no kwihuta mu iterambere."

Uko iyo nyubako izaba imeze niyuzura

Akomeza avuga ko umutekano, iterambere n’imibereho myiza bigendana, kandi kimwe kibuze ibindi bitagerwaho.

Ati "Ndibutsa ko umutekano, iterambere n’imibereho myiza bihuriye hamwe, umutekano ubwawo tuwukeneye gufasha kugera ku iterambere n’imibereho myiza y’abaturage. Byose birajyana kandi biri mu nshingano z’inzego z’umutekano. Turizihiza imyaka 31 yo kwibohora n’imyaka 25 Polisi itangiye gukorana n’abaturage. Turiyibutsa akamaro k’umutekano n’iterambere rigezweho."

Minisitiri Biruta avuga ko umutekano udashoboka abaturage batabigizemo uruhare, abasaba gukemura ibibazo biri mu miryango.

Ati "Ibyaha biboneka bifitanye isano n’ubuzererezi bw’abana bata ishuri, bakajya mu muhanda bitewe n’amakimbirane mu muryango, na yo aterwa n’ubusinzi n’ibiyobyabwenge. Dufite uruhare mu gukemura ibibazo biboneka mu muryango, abaturage mu mudugudu bazi ingo zifite amakimbirane, nibabaganirize bitarafata igihe kirekire. Dukwiye gukurikirana ibibazo mu miryango ndetse tugashaka igisubizo kirambye."

Imirimo yahise ikomeza

Ikigo mbonezamikurire kigiye kubakwa mu Murenge wa Shyira mu Karere ka Nyabihu, kizuzura gitwaye Miliyoni 30Frw, kikazajya cyakira abana bari basanzwe bakirwa mu ngo z’abaturage. Ababyeyi bavuga ko bazabyishimira, kuko hari abatinyaga kubajyana mu ngo z’abaturanyi.

Umwe mu baturage wavuganye na Kigali Today yagize ati "Hari igihe umuturage wakira abana mugirana amakimbirane bigatuma utajyanayo umwana wawe, kandi utamujyanyeyo hari ibyo ahomba."

Ibikorwa bya Polisi y’u Rwanda n’Ingabo z’Igihugu byatangijwe, bizatahwa tariki 4 Nyakanga 2025, ubwo u Rwanda ruzizihiza umunsi wo Kwibohora.

Gen Gakwerere Jean Baptiste mu mpuzankano ya FARDC

Umuvugizi wungirije wa M23 Dr Oscar Balinda, yabwiye Kigali Today ko Gakwerere yafatiwe mu mujyi wa Goma n’abarinzi be, nyuma y’ imirwano ikarishye yabereye muri uwo mujyi tariki ya 27 na 28 Mutarama 2025.

Gen Gakwerere uvuka muri Shyorongi mu cyahoze ari Kigali Ngali nk’uko yabitangarije itangazamakuru, yemera ko yafashwe na M23 nyuma yo gutsindwa urugamba yari afatanyijemo n’ingabo za Leta ya Kinshasa FARDC.

Mu mwenda mwiza w’igisirikare cya FARDC n’ingofero y’umukara, yinjiye mu Rwanda aherekejwe n’abasirikare ba FDLR bamurindaga bagera kuri 15, barimo Maj Ndayambaje.

Ubuyobozi bw’Ingabo z’u Rwanda bwamwakiriye, bwatangaje ko agiye gushyikirizwa inzego zibishinzwe, kugira ngo hamwe n’abandi abakoze ibyaha bazabikurikiranweho mu nkiko, naho abadafite ibyaha bazashyirwe mu kigo cya Mutobo bigishwe, basubizwe mu buzima busanzwe.

Dr Oscar Balinda avuga ko bashyikirije Leta y’u Rwanda Gen Gakwerere n’abarwanyi ba FDLR, kuko ari Abanyarwanda bagomba gusubira mu gihugu cyabo.

Gen Gakwerere yageze mu Rwanda

Yagize ati "Mwarabibonye ko twacyuye abacanshuro barwaniraga mu mujyi wa Goma, twacyuye abasirikare ba SADC bari barwaye, tuzakomeza gucyura abasirikare b’abanyamahanga, naho abanyekongo tuzabaganiriza dufatanye kubaka igihugu cyacu".

Dr Oscar Balinda asaba amahanga kureka Abanyekongo bagakemura ibibazo byabo.

Ati "Dusaba imiryango mpuzamahanga kutureka tukajya mu biganiro tugakemura ibibazo byacu nk’Abanyekongo, ni yo mpamvu turimo gucyura abanyamahanga babyivangamo."

Kuba Gen Gakwerere yaje mu Rwanda yambaye imyenda y’igisirikare cya FARDC, ngo ni yo yambaraga ari ku rugamba arwana na M23, afatanyije n’ingabo za FARDC, SADC na MONUSCO.

Ubuyobozi bw’Ingabo z’u Rwanda butangaza ko kwambara imyenda ya FARDC kwa Gen Gakwerere, bigaragaza imikoranire ya Leta ya Kinshasa na FDLR.

Gen Gakwerere n’abamurindaga bafatiwe hamwe

Gen Gakwerere akaba yabwiye inzego z’umutekano, ko bari bafite gahunda yo kurasa M23 bakaza mu Rwanda.

Umwe mu basirikare b’u Rwanda bakiriye Gen Gakwerere yagize ati "Uriya n’abasirikare yari ayoboye bagize uruhare mu kurasa mu Rwanda mu ntambara iheruka, ndetse yatubwiye ko M23 yabatanze ku masaha bari bafite gahunda yo kurasa, ubundi bakarasa mu Rwanda."

Gakwerere acyuwe mu Rwanda afite ipeti rya Brig Gen, akaba umwe mu batangije umutwe wa FDLR, kuko yavuye mu Rwanda afite ipeti rya Lieutenant akorera mu ishuri rya gisirikare rya Butare.

Ashinjwa kugira uruhare muri Jenoside yakorewe abatutsi, cyane cyane mu rupfu rw’ Umwamikazi Gicanda n’uwahoze ari Perefe wa Butare, igikorwa ngo yoherejwemo na Capt. Nizeyimana.

Bose ni Abanyarwanda babaga murii FDLR nubwo bambaye imyenda ya FARDC

Reba ibindi muri iyi video:

VIDEO - Brig Gen Gakwerere wari mu buyobozi bukuru bwa FDLR na bagenzi be babarirwa muri 15 bamurindaga, bashyikirijwe u Rwanda nyuma yo gufatirwa muri DRC. Gakwerere na bagenzi be bari bambaye imyenda y'igisirikare cya FARDC, yemera ko bafashwe na M23 nyuma yo gutsindwa urugamba… pic.twitter.com/Xo78NK9vre

— Kigali Today (@kigalitoday) March 1, 2025

Imodoka zivanye abasirikare ba Afurika y’Epfo i Goma zerekeje mu Rwanda

Nyuma yo gutsindwa mu rugamba i Goma aho bari bafatanyijemo n’Ingabo za Repubulika Iharanira Demokarasi ya Congo, Wazelendo, umutwe w’iterabwoba wa FDLR ndetse n’Abarundi mu kwezi gushize, abasirikare ba SADC biganjemo aba Afurika y’Epfo bamanitse igitambaro cy’ umweru kigaragaza ko batsinzwe, basubira mu bigo barimo bibiri kimwe kiri Mubambiro ikindi ku kibuga cy’ indege i Goma.

Aba basirikare basabye gutaha banyuze ku kibuga cy’ indege cya Goma barangirwa kuko cyangijwe n’ intambara, bemererwa gutaha banyuze ku mupaka uhuza Goma na Gisenyi.

Kuva tariki 21 Gashyantare abasirikare ba SADC bemerewe gutaha ariko bashaka gutwara ibikoresho byabo by’intambara. Bivugwa ko ibi bikoresha byari bihishemo n’amabuye y’agaciro.

Umwe mu bayobozi ba M23 yabwiye Kigali Today ko abasirikare ba SADC bashatse gutaha bambaye imyenda itari iy’akazi ariko barabyangirwa.

Iki kandi, ngo basabye gutaha ariko nta munyamakuru ubafashe ifoto, ngo bagaragare mu itangazamakuru.

Agira ati" ibiganiro birakomeje kuko ntibashaka kujya mu itangazamakuru, kandi n’ ubwo ari abasirikare batsinzwe bari mu biganza byacu tugomba kubarinda."

Gen Sematama Charles wagizwe umuyobozi mushya wa Twirwaneho

Gen Sematama Charles asimbuye Makanika ku buyobozi bwa Twirwaneho, nyuma y’imyaka ine amwungirije.

Gen Sematama yagiye afatirwa ibihano n’ibihugu bitandukanye, kubera uruhare rwe mu miyoborere ya Twirwaneho.

Yinjiye muri Twirwaneho ku mugaragaro muri Gashyantare 2021, avuye mu ngabo za FARDC ayobora Regima ya 3411 yari i Kitshanga muri Teritwari ya Masisi.

Yataye umwanya yariho mu ngabo za FARDC yisunga kuri Twirwaneho, avuga ko agiye kurengera ubwoko bw’Abanyamulenge bwarimo bwicwa.

Gen Sematama ni umwe mu basirikare bakomeye bagize umutwe wa Twirwaneho, kubera ubumenyi yakuye mu mahugurwa atandukanye yahawe n’ingabo za FARDC.

Ibi bikagarazwa n’uburyo nyuma y’urupfu rwa Gen Makanika, abarwanyi ba Twirwaneho bahise bigarurira ibice bitandukanye birimo ikigo cya gisirikare, amashuri na radio ikorera mu bice bya Fizi.

Gen Sematama uvuka mu bice bya Kalunyo muri Kamombo, ni imbaraga zihumuriza Twirwaneho, akaba yarafatiwe ibihano n’Umuryango w’Abibumbye, Ubumwe bw’Uburayi na Amerika, bamushinga gushoza intambara n’urugomo.

Ni ibihano byafatiwe abandi bayobozi b’imitwe itandukanye nka M23 barimo; General Sultani Makenga ukuriye ingabo za AFC/M23, Lt Col Willy Ngoma umuvugizi wa M23, Gen Bernard Byamungu na we wa M23, William Yakutumba ukuriye Mai Mai Yakutumba, nyakwigendera Gen Michel Rukunda Makanika wayoboraga Twirwaneho.

Hari kandi Colonel Ruvugimikore Protogène bita Ruhinda wa FDLR warashwe na M23, Colonel Salomon Tokolonga w’ingabo za FARDC n’abandi.

Ni igikorwa umutwe wa M23 umazemo iminsi, aho ishaka guhindura imyumvire y’abasirikare ba Congo bakita ku mutekano, ntibahutaze abaturage.

Abapolisi n’ abasirikare ba FARDC bari bahuye na brig Gen Byamungu Bernard Umuyobozi wungirije w’igisirikare cya AFC/M23 abashimira gusanga umutwe wa M23 mu gufatanya guca akarengane gakorerwa abanyecongo mu bice bitandukanye by’ ibihugu.

Mu mujyi wa Goma aho bagejejwe n’ ubwato bwa Emmanuel, ku cyambu cya Goma bakirwa n’umuvugizi wungirije wa M23 Dr Oscar Barinda watangaje ko bagiye guhabwa amahugurwa ya kinyamwuga azabafasha kurinda umutekano w’abaturage.

Yagize ati" nk’uko twabisabye mbere yo gufata umujyi wa Goma, dusaba abasirikare n’abapolisi n’ abandi gushyira intwaro hasi bakadusanga. Aba nabo muri Bukavu barabikoze kandi bahisemo neza. Tugiye kubigisha igisirikare, ndetse n’icengezamatwara ryo kuba abanyamwuga."

Dr Barinda avuga ko bizanye bakaganira bakumva ibyiza byo gukorana na AFC/M23 bakaba bagiye gusanga abandi.

Agira ati" barabizi ko dufite igisirikare cy’ umwuga kandi amasomo bazahabwa ni atuma barinda abaturage bagahagarika ubwicanyi bukorerwa abaturage. Nabo ubwabo barabyivugira ko umutekano uhungabanywa n’ abashinzwe umutekano."

Kimwe mubyo abasirikare ba FARDC n’ abapolisi bazigishwa ni imyitwarire no kumva umurongo AFC/M23 mu guharanira imibereho myiza n’ iterambere ry’ umuturage wa DRC.

Mu mujyi wa Goma abasirikare ba FARDC n’ abapolisi bajyanywe kuri Stade unite kugira ngo bahabwe amabwiriza abafasha kujya mu mahugurwa.

Basanze abandi basirikare 2400 bishyikirije umutwe wa M23 ubwo wafataga umujyi wa Goma. Abariyo bavuga ko bafashwe neza kandi biteguye kuza gukorera igihugu cyabo.

Mu gihe ubuyobozi bwa AFC busaba abahoze ari abasirikare n’ abapolisi gutanga intwaro no kwishyikiriza ubuyobozi mu mujyi wa Goma, hari benshi mu basirikare n’ abapolisi bahishe intwaro bakuramo imyenda ya Gisirikare bihisha mu ngo.

Dr Oscar Barinda avuga ko ubuyobozi bwa AFC buganira na buri wese kugera ku muturage aho atuye kugira ngo bubake igihugu gifite umutekano kandi buri muturage yisangemo.

"Twasabye buri muturage wa DRC kudusanga tugakorana, turaganira na buri wese kugera aho umuturage atuye, abasirikare n’ abapolisi nabo turaganira kandi tubahamagarira kuza tukubaka igihugu cyacu."

Abasirikare n’ abapolisi bishyikirije umutwe wa M23 mu gihe imirwano ikomeje mu bice bitandukanye muri Teritwari ya Lubero naho muri Kivu y’ Amajyepfo imirwano yamaze kurenga Uvira.

VIDEO - Abapolisi basanzwe ari aba DRC 2,100 bakoreraga i Bukavu hamwe n' abasirikare ba FARDC 890 bageze i Goma mu gitondo cyo kuri iki Cyumweru, aho biyunze kuri AFC/M23.

Bazanywe n'ubwato bwitwa Emmanuel, bagera i Goma aho bashyizwe kuri Stade de l'Unité.

Bagiye guhabwa… pic.twitter.com/U9L3UYU7BY

— Kigali Today (@kigalitoday) February 23, 2025

VIDEO – Mu bageze i Goma bavuye i Bukavu, bashaka kujya muri M23 harimo abapolisi 900, abasirikare 100, abandi bantu basanzwe 300 na Wazalendo 15 biyemeje gufatanya na M23. Biteganyijwe ko abandi baza mu bindi byiciro. pic.twitter.com/LHm3q9TDb9

— Kigali Today (@kigalitoday) February 23, 2025

VIDEO – Abiganjemo abahoze mu gipolisi cya RDC biyemeje gufatanya na AFC/M23, muri morale nyinshi, barizeza ko bazakora akazi neza. Ubuyobozi bwa AFC/M23 bwabasabye kurangwa n’imyitwarire myiza (discipline), kugaragaza itandukaniro n'abasirikare ndetse n’abapolisi ba Tshisekedi,… pic.twitter.com/zwMZX2CaiR

— Kigali Today (@kigalitoday) February 23, 2025

Ni inzu zo mu kagari ka Mbugangari mu Murenge wa Gisenyi zarashweho na FARDC tariki ya 27 na 28 Mutarama 2025 ubwo mu mujyi wa Goma harimo kubera imirwano M23 yari ihanganyemo n’ingabo za leta ya DRC n’abo bari bafatanyije barimo; FDLR, SADC na Wazalendo.

Ibisasu byarashwe mu Rwanda byahitanye abantu 16, hangirika ibintu bitandukanye birimo abantu 161 bakomeretse.

Isesengura ryakozwe n’Akarere ka Rubavu ku bufatanye na Minisiteri ishinzwe Ibikorwa by’Ubutabazi (MINEMA) ryagaragaje ko inzu 293 zangiritse, harimo inzu 10 zasenyutse burundu, inzu 245 zangijwe isakaro, 38 zangirika cyane ibisenge, inzugi n’amabati.

MINEMA itangaza ko hazasanwa inzu 293 n’amashuri 7 bizatwara ingengo y’imari isaga miliyoni 527, Umunyamabanga Uhoraho muri Umunyamabanga Uhoraho muri MINEMA, Philippe Habinshuti

Philippe Habinshuti avugako inyubako z’amashuri zizasanwa zizatwara miliyoni 35, amazu y’abaturage kuyasana atware agera kuri miliyoni 400, ariko hari ibindi bikorwa byasanwe birimo amazi n’umuriro, akemeza ko byose bigomba gusanwa ubuzima bugasubira uko bwari bumeze cyangwa bukaba bwiza kurushaho.

Mu gihe hari imiryango 10 amazu yabo yasenyutse bakaba bakodesherezwa, Philippe Habinshuti avuga ko ibikorwa byo gusana bitazarenza amezi atatu.

Ni Teritwari iherereye mu ntara ya Kivu y’Amajyaruguru, ahitwa Butsorovya, imirwano ikaba yatangiye mu gitondo cyo kuri uyu wa Kabiri tariki 18 Gashyantare 2025.

Abaturage bari muri Lubero baravuga ko ingabo za FARDC na Wazalendo, aribo bagabye ibitero ku barwanyi ba M23. Bavuga kandi ko imirwano yatangiriye ahitwa Lubango ikomereza i Butsorovya aho ingabo za FARDC zazengurutse abarwanyi ba M23, gusa ngo imirwano yakomereje mu bice bine birimo Mambasa-Ndoluma, Mambasa-Lubango, Mambasa-Mutongo na Bingi-Mutongi.

Ibi ni ibice byegera umujyi wa Butembo muri Teritwari ya Lubero, aho abaturage benshi bakomeje kuva mu byabo.

Lubero ni imwe muri Teritwari zigize Kivu y’Amajyaruguru, naho izimaze gufatwa na M23 byuzuye harimo Rutshuru, Nyiragongo, umujyi wa Goma na Masisi, mu gihe Teritwari zitarafatwa zose harimo Lubero na Walikale, naho Beni imirwano ntirahagera.

Mu Ntara ya Kivu y’ Amajyepfo abarwanyi ba M23 bamaze kugenzura umupaka wa Kamanyola ndetse imirwano ikomereza muri teritwari ya Walungu.

Ingendo mu mazi y’Ikizu zari zarahagaze zongeye gufungurwa

Itangazo rya gatatu rya Guverineri Bahati Musanga Erasto, ryasohotse tariki 17 Gashyantare 2025, rivuga ko ingendo zo mu mazi mu kiyaga cya Kivu zizajya zikorwa amasaha 24 kuri 24.

Ubwato bwa Emmanuel busanzwe bukora ingendo zihuza imijyi ya Goma na Bukavu, nibwo bwahagurutse mbere y’ubundi mu gitondo, ku nkombe z’ikiyaga i Bukavu bwerekeje i Goma.

Bwari bwuzuye abagenzi, abenshi harimo abari baravuye mu mujyi wa Goma bahungira Bukavu, ariko kubera nta mirwano yabaye mu mujyi wa Bukavu bahitamo gusubira mu mujyi wa Goma.

Ingendo zo mu mazi y’ikiyaga cya Kivu ni zo zihuza Goma na Bukavu, mu gihe umuhanda ku ruhande rwa Repubulika Iharanira Demokarasi ya Congo udakoze, abantu bakifashisha amazi.

Bishimiye kongera kugenda mu mudendezo

Icyakora Abanyekongo benshi bakoresha umuhanda w’igitaka banyura mu Rwanda, kandi bakavuga ko aribyo bihendutse ndetse byihuse, kuko nyuma yo kwambuka umupaka wa Goma ujya Gisenyi ugafata imodoka zigenga, ukoresha amasaha 5 ukaba ugeze ku mupaka wa Kamembe na Bukavu, mu gihe gukora urugendo rwo mu mazi ukoresha ubwato mu kiyaga cya Kivu ukoresha amasaha agera 10.

Uretse ingendo zo mu mazi, umupaka wa Rusizi wongeye gufungurwa, abantu bakomeza ibikorwa byabo by’ubuhahirane.

Umujyi wa Bukavu uratekanye, mu gihe imirwano irimo yegera ibice bya Uvira, abarwanyi ba M23 bakaba bamaze kugenzura byuzuye umupaka wa Kamanyola, uri hagati ya Rusizi na Uvira.

Umupaka wo ku butaka hagati ya Rusizi na Bukavu na wo wafunguwe

Abantu baruzuza ibisabwa bakagenda nta nkomyi

Bishimiye gusubira mu gihugu cyabo

Muri aba Banyekongo 400, bamwe bavuye muri Kivu y’Amajyaruguru bahunga imirwano yarimo ibera muri Goma no mu bice bihakikije, nyuma yo kugera i Bukavu na ho imirwano irahabasanga bahungira mu Rwanda, abandi bakomereza Uvira na Kamanyola ariko baza gusanga ahantu hatekanye ari mu Rwanda.

Baganira na Kigali Today, abo baturage bavuze ko batashye mu gihugu cyabo, kandi bizeye ko umutekano wagarutse.

Umwe ati "Twahisemo gutaha, turashima u Rwanda rwatwakiriye neza, twari dutekanye. Twasabye gusubira iwacu barabyumva ndetse babidufashamo."

Abagore, abagabo n’abana benshi bagejejwe ku mupaka wa Rusizi I n’imodoka zashatswe n’u Rwanda, hagenzurwa ibyangombwa bemererwa gusubira mu gihugu cyabo."

Umupaka wa Rusizi I wanyuzweho n’Abanyekongo basubira mu gihugu cyabo, wari wafunzwe na M23, Dr Oscar Barinda umuvugizi wungirije wa M23, yabwiye Kigali Today ko bari barindiriye gukura abagizi ba nabi mu nzira, kugira ngo abataha muri Bukavu basange hatekanye.

Bashimye uko bakiriwe mu Rwanda

Umwe mu Banyekongo wavuganye na Kigali Today yagize ati "Ntabwo twari twahunze M23, twahunze imirwano, ariko duhunga n’abagizi ba nabi barimo FDLR na Wazalendo barimo barasa bica abantu. Ubu tuzi ko bavuye mu nzira, dutashye twishimye."

Umujyi wa Bukavu uratekanye, imirwano iravugwa muri Uvira no mu nkengero zaho, abasirikare ba FARDC bahanganye na Wazalendo zirimo kubaka ibikoresho bya gisirikare.

Reba ibindi muri iyi video:

Nsabimana Thadée

Ku itariki ya 17 Gashyantare 2025 saa yine za mu gitondo, nibwo Nsabimana yageze mu Rwanda avuye mu mujyi wa Bukavu, aho yari amazemo iminsi.

Ku mupaka wa Rusizi II, Nsabimana yabwiye Kigali Today ko ashima Imana kubera ageze mu Rwanda, kuko yumvaga ari inzozi kuzagaruka mu gihugu cye, ibi bikaba byatewe n’uko yafashwe n’ingabo za FARDC zikamushinja kuba umuntu utanga amakuru ku mutwe wa M23.

Agira ati "Baramfashe banshinja gukorana na M23, ko ndi umuntu ubarangira inzira, naberetse ‘Laisser passer’ yanjye, mbereka igihe nambukiye ndetse ko mfite n’urwandiko rw’amafaranga asabwa na Leta yabo ku Munyarwanda ujyayo, bambwira ko batabyumva ko icyandokora ari ugutanga Amadolari 200. Nabahaye Amadolari 10 nari mfite, barayakira, aho kundekura bafata umushumi nari mfite baramboha."

Nsabimana avuga ko yakomeje kubinginga bamubera ibamba

Ati "Narababwiye nti se ko nakoze ibyo twumvikanye nkabaha amafaranga kuki mutandekura? Bambwira ko ntabahaye amafaranga batandekura, by’amahirwe umuturage wa Bukavu anguriza Amadolari 40 biba 50 barandekura."

Nsabimana wongeye kugera mu Rwanda, avuga ko yari yihishe mu nzu kimwe n’abandi baturage b’umujyi w’a Bukavu, bavuga ko ingabo za FARDC zamaze kuwuvamo, ariko abana b’abasirikare bafata imyenda n’imbunda batangira kuzenguruka umujyi barasa.

Ati "Ku wa gatanu ingabo za FARDC zari zamaze kuva mu mujyi bahungira Uvira, gusa hari abana b’abasirikare bagiye mu kigo bafata imbunda n’imyenda, batangira kuzenguruka umujyi barasa."

Nsabimana avuga ko aba aribo bahungabanyije umutekano, bituma abaturage baguma mu mazu.

M23 yakiranywe ibyishimo mu Mujyi wa Bukavu

Nsabimana avuga ko ubwo M23 yageraga mu mujyi yabanje guhangana n’abo bafite intwaro, itangira kwigaragaza isukura umujyi.

Agira ati "Abaturage aho bayiboneye bayishimiye kuko yabakijije ibisambo, ubu abantu baratekanye, M23 iraboneka mu mihanda kandi abantu barumva bizeye umutekano."

Umujyi wa Bukavu kuva mu ijoro rya tariki 15 Gashyantare 2025, humvikanye ibikorwa byo gusahura, cyane cyane inzu z’ubucuruzi zibasirwa n’abafite imbunda barasa inzugi.

Abanyarwanda bahakorera bagera mu 2,000 bavuga ko ibicuruzwa byabo byibwe, bakaba basaba Leta y’u Rwanda kuzababa hafi.

Nsabimana avuga ko nubwo nta masasu arimo kumvikana mu mujyi wa Bukavu, abaturage bafite ubwoba ndetse ibikorwa byose birafunze, uretse butiki zo mu duce tumwe zigurirwa n’abaturanyi, ariko amaduka manini yari afunze ayandi yarasahuwe.

Uhagaze i Rusizi ubona abarwanyi ba M23 barinze umupaka wa Bukavu

Abaturage barimo kuva mu mujyi wa Bukavu bavuga ko nta ngabo za FARDC barimo kubona, nubwo hari amakuru avuga ko bongeye kugaruka mu mujyi.

Abaturage bavuganye na Kigali Today, bavuga ko mu mujyi wa Bukavu hari ibikorwa byo gusahura, abasirikare barwanye Kavumu bageze muri Bukavu bakuramo imyenda bajugunya n’intwaro barahunga.

Bavuga ko gusiga intwaro mu mujyi byagize ingaruka ku mutekano, kuko hari abana batoraguye impunda batazi kuzikoresha barimo kurasana.

Abarwanyi ba M23 barimo kuboneka mu mihanda itandukanye bakirwa n’abaturage, mu gihe abandi baturage barimo gusahura ibigo by’ubucuruzi, inganda n’handi hari ibicuruzwa.

Abanyarwanda bikorera ibicuruzwa mu mujyi wa Bukavu, bavuga ko bari mu bibasiwe n’ubusahuzi bugamije kubahombya.

M23 irimo kugenzura imipaka ya Bukavu ihuza RDC n’u Rwanda

M23 yakiriwe neza i Bukavu

Abaturage bishimiye kuza kwa M23

Tariki 8 Gashyantare, Rwabukwisi yarimo ahinga ku nkengero z’umupaka w’u Rwanda na Kongo mu Murenge wa Nzahaha, ariko kubera amasasu yarimo avugira hafi yabo ku ruhande rwa DRC ava mu murima arataha ari kumwe n’ umugore we.

Bagira bati" amasasu yaravuze, aho yarimo ahinga n’ umugore we, maze barahunga ariko isasu rifata umugabo."

Abandi bavuga ko isasu ryahitanye Rwabukwisi ryari rirashwe ku birindiro by’ ingabo z’ u Rwanda biri aho hafi.

Umuyobozi w’Akarere ka Rusizi wungirije ushinzwe iterambere ry’Ubukungu Alfred Habimana yagize ati" isasu ryarasiwe muri Congo ryamusanze mu Rwanda, yitura hasi, abamusanze aryamye bamujyanye kwa muganga basanga yarashwe mu gatuza."

Biteganyijwe ko Rwabukwisi azashyingurwa kuri uyu wa 12 Gashyantare.

Visi Meya yagize ati "Rwabukwisi yari asanzwe ari umuturage utishoboye, umuryango we urimo gukorana n’ Akarere kugira ngo ashyingurwe kandi duteganya ko azashyingurwa ejo."

Uyu Muyobozi agira inama abaturage kwitwararika mu gihe bumvise amasasu bakikinga aho adashobora kubagwaho.

Mu gihe abatuye i Bukavu bafite ubwoba bw’ intambara irimo isatira umujyi batuyemo, Habimana avuga ko ubuzima bukomeje kandi abaturage bakomeje ubuhahirane.

Maj Gen Sultan Makenga Umuhuzabikorwa w’igisirikare cya AFC akaba n’Umugaba mukuru w’ingabo zigamije impinduramatwara muri Kongo (ARC) yasuye abasirikare ba FARDC barwariye mu bitaro bya gisirikare bya Katindo.

Makenga yasuye aba basirikare b’igisirikare gihanganye n’umutwe ayoboye kuw 5 Gashyantare. Ni abasirikare bakomeretse mu ntambara yari ikaze mu gufata umujyi wa Goma.

Abarwanyi babarirwa mu bihumbi 40 barwanyije umutwe wa M23 bawubuza kwinjira mu mujyi wa Goma, imirwano ikomeye yabaye iminsi ibiri mu mujyi wa Goma, isiga inkomere zibarirwa mu bihumbi 3, mu gihe umuryango wabibumbye utangaza ko abaguye mu mirwano babarirwa mu bihumbi 3 n’ubwo hari indi mirambo itaragiye itangazwa.

Uretse abasirikare ba FARDC barimo kuvurirwa mu kigo cya Monusco, hari abasirikare barimo kuvurirwa mu bitaro bya gisirikare bya Katindo.

Ubuyobozi bwa AFC butangaza ko Maj Gen Sultan Makenga yasuye abasirikare barwariye mu bitaro bya gisirikare bya Katindo kugira ngo abahumurize kandi abakomeze.

Maj Gen Makenga yabwiye abasirikare ba FARDC ko bazitabwaho kandi bagakira, abasaba ko nibakira baziyunga kuri AFC.

Gusura abo yari ahanganye nabo ku rugamba birakururira icyizere abasirikare ba FARDC barwariye mu mujyi wa Goma, abasirikare bashyize intwaro hasi bakishyikiriza umutwe wa M23 hamwe n’ abasirikare bakomeje kwihisha mu ngo.

Maj Gen Makenga asuye abasirikare ba FARDC mu gihe abarwanyi ayoboye barimo kwigarurira ibice bitandukanye muri Kivu y’ Amajyepfo, naho muri Kivu y’ Amajyaruguru bamaze gufata byuzuye Teritwari ya Masisi, Rutshuru, Nyiragongo n’umujyi wa Goma.

Naho Teritwari abarwanyi ba M23 bamaze gufata bituzuye harimo Walikale na Lubero mu gihe Teritwari ya Beni abarwanyi ba M23 batarayigeramo.

VIDEO - General Major Sultani Makenga, Umuhuzabikorwa mu bya Gisirikare wa AFC akaba n’Umugaba mukuru w’ingabo zigamije impinduramatwara muri Kongo (ARC), yasuye abasirikare ba FARDC barwaye ndetse n'abakomerekeye ku rugamba bari bahanganyemo n'umutwe wa M23.

Ni igikorwa cyabaye… pic.twitter.com/BOYX2eodNF

— Kigali Today (@kigalitoday) February 8, 2025

Imodoka itwaye imibiri(i Buryo)

Saa sita zuzuye ni bwo imodoka ya MONUSCO itwaye iyi mibiri yageze ku mupaka uhuza Goma na Rubavu mu Burengerazuba bw’u Rwanda.

Yari ikurikiwe n’iyari itwaye abandi basirikare bakomerekeye ku rugamba, ndetse n’indi itwaye imizigo y’abaguye ku rugamba.

Inzego z’umutekano z’u Rwanda n’iz’abinjira n’abasohoka zakoze akazi kazo mbere y’uko izi modoka zikomeza urugendo ruziganisha mu ntara y’Amajyaruguru, hanyuma zigakomereza ku mupaka wa Cyanika uhuza u Rwanda na Uganda, aho baza gufatira indege ikomeza mu gihugu cyabo.

Igihugu cya Afurika y’ Epfo cyatangaje ko imirambo y’ abasirikare bayo baguye mu mirwano na M23 ari 14, ariko hari amakuru avuga ko imibiri yanyujijwe mu Rwanda ari 18, harimo 14 y’abasirikare ba Afurika y’ Epfo, babiri ba Tanzaniya na babiri ba Malawi.

Reba ibindi muri iyi video:

.

Ni impunzi ziganjemo abagore n’ abana bavuga ko bavuye muri Rutshuru na Masisi, ibice bari batuyemo batunzwe no guhinga no gutwika amakara.

Bavuga ko bari bishyikirije ishami ry’ umuryango wabibumbye ryita ku mpunzi HCR ngo batahe mu Rwanda tariki 27 Mutarama 2025, ariko kubera imirwano mu mujyi wa Goma gahunda irasubikwa.

Ubuyobozi bwa HCR buvuga ko bari 114 ariko umwe agira ikibazo cy’ uburwayi.

Umwe mu baganiriye na Kigali Today yagize ati "baraje basubira inyuma kubera imirwano, Kinshasa yabanje kwanga ko bataha ariko ubu barabyemeye tuje kubakira."

Urayeneza utashye mu Murenge wa Kanama mu Karere ka Rubavu avuga ko yabaga ahitwa Kamatembe, yari amaze ukwezi mu kigo cya HCR, atashye mu Rwanda n’ abana bane, naho impamvu yatumye adaha avuga ko byatewe n’ ababaca intege.

Agira ati "nahutse mpetswe ndi uruhinja, uwo twashakanye nawe ni uko, ntakintu cyo mu Rwanda tuzi, ariko iyo ushatse gutaha, hari abaduca intege ko gutaha bidashoboka."

Avuga ko aho yari atuye hari izindi mpunzi nyinshi kandi zishaka gutaha ariko zibura amakuru abafasha gutaha.

"Njye ndatashye ariko umugabo wanjye yasigaye, ategereje ko ngera mu Rwanda nkamubwira ko ari amahoro nawe agataha."

Abatashye barajyanwa mu kigo cya Kijote mu Karere ka Nyabihu bakitabwaho bakoherezwa mu miryango yabo, mbere yo koherezwa mu miryango bahabwa ibyo kubatunga mu mezi atatu, bahita bafotorwa bagahabwa irangamuntu ndetse bakishyurirwa ubwisungane mu kwivuza.

MINEMA ivuga ko umunyarwanda mukuru utashye mu Rwanda agenerwa amafaranga ibihumbi 40 iyo avuye mu kigo, nyuma akagenerwa amadolari 188, naho umwana agenerwa amadolari 115.

Ibirundo by’imyanda abari mu muganda bakusanyije

Nyuma y’ifatwa ry’umujyi wa Goma, hari hanyanyagiye imyenda ya gisirikare yatawe n’ingabo za FARDC na Wazalendo, bakihindura abaturage basanzwe. Hari kandi amasasu menshi n’imbunda byari bijyanyagiye mu mujyi, ubu birimo gukurwa mu nzira.

Abaturage batuye mu mujyi wa Goma babyukiye mu muganda, bavuga ko bishimiye gusukura umujyi wabo, bakura mu nzira ibishobora kubabangamira.

Ni umuganda watangiye mu gitondo saa kumi n’ebyiri mu bice byose bigize umujyi wa Goma, urangira saa tanu.

Ibice bimwe byari binyanyagiyemo ibikoresho bya gisirikare byahakuwe, ahari harunze imyanda irahakurwa, ndetse hamwe na hamwe ku kibuga cy’indege na Birere hari ahabonetse imirambo mu miferege na yo ikurwamo.

Imirimo mu mujyi wa Goma yatangiye, abacuruzi baracuruza, imodoka zitwara abagenzi mu bice byose zatangiye imirimo, icyakora hari inzu z’ubucuruzi zitarafungira kubera zasahuwe.

Ku mupaka hari urujya n’uruza rudasanzwe, abantu benshi bari barahungiye mu Rwanda barimo gusubira mu gihugu cyabo, mu gihe hari abandi barimo kuva mu mujyi wa Goma bakeka ko ingabo za FARDC zizagaruka kuhabohoza hakaba imirwano.

Abatuye umujyi wa Goma bari mu byishimo byo kuba bafite umutekano, nk’uko babyivugira.

Umwe mu baganiriye na Kigali Today yagize ati "Yego umujyi wacu uri mu maboko ya M23, ariko ubu turatekanye kurusha uko twari tumeze hari Leta. Ubu ntawe uhohoterwa na Wazalendo nk’uko byahoze, nta wamburwa ibye izuba riva, ntawe uraswa, ba bajura bari baratuzengereje biyise (40Voleurs) ntituzi iyo bagiye, ubuzima bumeze neza bikomeje gutya."

Umwe mu babyeyi warimo akubura imbere y’igipangu mu mujyi wa Goma ati "Ni isuku yacu, twari tubizi mu Rwanda none natwe byatugezeho, bizakomeze turabyishimiye."

Nubwo umuganda wabaye imyanda myinshi igakurwa mu nzira, hakenewe ko hakorwa iyindi miganda yikurikiranya isuku ikiyongera.

Bamwe mu bavuganye na Kigali Today bavuga ko M23 yazanye amatwara akarishye.

Bagira bati "Buri muntu wese afite ubwoba bw’aba bantu, ntibyemewe kunywa inzoga mu gitondo kandi aha bazibyukiragamo, urumva bizoroha? Barimo kutubuza ubusinzi, ibiyobyabwenge nk’urumogi, inzoga z’inkorano, nubwo ari byiza ariko kubihagarika bizagorana."

Urujya n’ uruza mu mujyi wa Goma rurahari, nta basirikare benshi baboneka mu mujyi uretse ahari abayobozi. Imodoka za gisirikare zasizwe na FARDC ziracyahagaze mu mihanda, ariko imodoka nyinshi ziratwarwa n’abantu ku giti cyabo.

Ku mupaka bamwe mu baturage mu Birere baraza kuvoma amazi mu Rwanda, ikibazo kivugwa ko kitarakemurwa ni internet.

Goma yavuye mu mwijima

Abaturage batuye mu bice bitandukanye by’uyu mujyi, babwiye Kigali Today kuri uyu wa Kane tariki 30 Mutarama 2025, ko M23 ibahaye ibyishimo nyuma yo kuva mu ntambara yari yabahangayikishije.

Nangaa yabwiye abanyamakuru ko bashaka gutanga ibisubizo ku baturage kandi bazabana neza.

Ikigo cya SOCODE gisanzwe gitanga amashanyarazi avuye mu birunga, gitangaza ko cyamaze kugeza umuriro ku Muyobozi uhereza abaturage amashanyarazi, kandi abagera kuri 75% by’abafatanyabikorwa bari mu mujyi wa Goma.

Abatuye mu bice bya Himbi bavuga ko banyuzwe no kubona umuriro, ndetse ko bizeye ko n’amazi meza agiye kuboneka.

Abaturage batuye mu mujyi wa Goma bakoresha umuriro utangwa na SOCODE, ariko hari abandi bakoresha umuriro uba mu Ntara ya Kivu y’Amajyepfo utangwa n’ikigo cya SNEl, Corneille Nangaa akaba avuga ko wahagaritswe na Leta mu guhima umutwe wa M23.

Abakora amashanyarazi bihutiye gusana ibyangiritse umuriro uraboneka

Nangaa avuga ko hari icyizere ko na wo uboneka vuba, abaturage bagashobora kubona amazi meza, hagakorwa isuku mu bice bitandukanye.

Abatuye umujyi wa Goma bakoresha amazi y’ikiyaga cya Kivu, agatunganywa hakoreshjwe imashini zikoresha umuriro. Icyakora kuba umuriro wari wakuweho byatumye n’imashini zitunganya amazi meza zihagarara, abaturage barayabura.

Bamwe mu batuye umujyi wa Goma bavuga ko bizera ko ubuyobozi bwa M23 buzafasha amashuri gutangira vuba, ndetse n’ibindi bikorwa bigasubukurwa.

Bavuga kandi ko habayeho ubujura mu gihe cy’imirwano mu mujyi wa Goma, abacuruzi benshi bakaba bazagorwa no kongera kubura umutwe.

Nyuma yokubona umuriro, abakora amazi na bo babirimo

Ibigo bicuruza lisansi bivuga ko yavomwe igashira, naho abacuruza butiki zarasahuwe.

Icyakora hakomeje kwibazwa uburyo umutwe wa M23 uzasubiza abakozi mu kazi kandi bagahembwa uko byari bisanzwe. Haribazwa kandi uko abatuye Goma bazajya babona impapuro z’inzira, uko amabanki azajya akorana na banki nkuru ziri i Kinshasa.

Abayobozi ba AFC/M23 babwiye itangazamakuru ko umuriro ugiye kuboneka bihita bikorwa

Corneille Nangaa avuga ko AFC itarwanya igihugu ahubwo irwanya ubutegetsi bwacyo

Nangaa uhakana gufashwa n’u Rwanda, avuga ko ari Umunyekongo kandi n’abo bafatanyije urugamba ari Abanyekongo bafite aho bakomoka. Avuga ko bashaka gukuraho ubutegetsi buriho bakubaka igihugu.

Agira ati "AFC/M23 dushaka gukuraho ubutegetsi butagize icyo bumariye abaturage, dushaka gushyiraho ubutegetsi bushakira imirimo urubyiruko rukava mu bushomeri. Dushaka ubutegetsi buhuza abanyagihugu, ubutegetsi buha abaturage ibyo bakeneye nk’ibikorwa remezo."

Ku kibazo cyo kugabanyamo igihugu cya Repubulika Iharanira Demokarasi ya Congo ibice, Nangaa avuga ko badashaka gucamo igihugu ibice ahubwo bashaka kubaka igihugu cy’Abanyekongo bashyize hamwe kandi biteza imbere.

Bisiimwa avuga ko bafashe Umujyi wa Goma kugira ngo basubize ibintu ku murongo nyuma yo kwangizwa n’ ubuyobozi buriho.

Ahereye ku banyamakuru bari basanzwe basebya umutwe wa M23, yabasabye kugaruka mu kazi kuko ntacyo bapfa.

Yagize ati" hari abanyamakuru bari basanzwe batuvuga nabi, batangiye kunyandikira ko bazagirirwa nabi.

"Nababwiye ko ntawe uzabakoraho, namwe ndabibabwiye, mugende mufungure ibikorwa, mufungure radiyo n’ ibindi banyamakuru mubwire abaturage amakuru abubaka."

Bisiimwa avuga ko abarwanyi ba Wazalendo babaye ibikoresho bya Leta ya Kinshasa, avuga ko bagomba kwigishwa gukunda igihugu bagikorera bitandukanye no kwica abanyagihugu.

Bisiimwa avuga ko ahazaza ha Wazalendo ari ukwigishwa ibibafasha gutegura ubuzima no guhanga imirimo atari ukubashyira mu mitwe y’ itwaza intwaro bagwamo.

Gahunda dufite kuri Wazalendo ni ukubasubiza mu buzima busanzwe, bakigishwa uko babaho mu buzima buzaza.

Turabasabye banyamakuru, aho mubabonye, mubabwire bagaruke tubafashe gusubira mu buzima, cyane ko n’ igisirikare bashyirwamo badahabwa ubumenyi bwatuma baba abasirikare b’igihugu.

Corneille Nangaa abitangaje mu kiganiro cya mbere akoranye n’ abanyamakuru, atera utwatsi abavuga ko bafashe umujyi wa Goma bafashijwe n’ u Rwanda.

Yagize ati " kuki ikitagenda kuri DRC bavuga u Rwanda? Dufite abanyafurika yepfo muri iki gihugu, abanyamalawi, Tanzania, Angola, Uganda na Sudani, nyamara ntibivugwa. Turarwana kubera impamvu zacu ntiturwanirwa n’ u Rwanda."

Bertrand Bisiimwa ukuriye igice cya politiki cy’ umutwe wa M23, avuga ko impamvu bitirirwa kurwanirwa n’ u Rwanda ari uko batsinda ingabo za FARDC.

Yagize ati" twitirirwa gufashwa n’ u Rwanda kubera tubatsinda, kandi tubatsinda kuko dufite impamvu zikomeye, izo mpamvu ni ukubaho, ni uburenganzira bwacu, mu gihe ingabo za FARDC zirwanira guhembwa. Twe turarwana kugirana ngo tubeho kandi tutabayeho tuzapfa, abandi bo barwanira gushaka amafaranga kandi ni impamvu itatuma badutsinda."

Mu bibazo byinshi abanyamakuru babaza M23 hano icyo izamarira abasirikare yafatiye ku rugamba, itangaza ko izabaha imyitozo bahakorera igihugu cyabo.

Nangaa avuga ko impunzi z’abanyecongo zigomba gutaha kandi bakazabana neza n’ ibihugu baturanye.

Ku kibazo cy’ amashanyarazi, atangaza ko Kinshasa yahagaritse amashanyarazi, amazi meza na Interineti ariko bo bihaye amasaha 48 ibibazo bikaba byakemutse.

Yasabye abantu gusubira mu mirimo bakarindirwa umutekano, asaba abahoze bavuga nabi M23 kuza bagakora akazi kabo kuko ntacyo izabakurikiranaho.

Saa saba zibura iminota 15 nibwo abacanshuro bari bakandagiye ku butaka bw’ u Rwanda, mu gihunga cyinshi kijyana no kubahiriza ibyo inzego z’umutekano zibabwiraga, bagiye ku murongo ubundi barasakwa.

Mu maso biboneka ko batari bizeye ko bari bwakirwe neza.

Nyuma yo gusakwa bashyiriwe ikashi zigaragaza ko binjiye mu Rwanda mu mpapuro z’inzira.

Mu nzira yo kujya mu modoka, bamwe babwiye Kigali Today ko bashimira u Rwanda.

Umwe yagize ati" thanks Rwanda"

Abandi benshi bavuganye n’umunyamakuru wa Kigali Today bavugaga ko bumva bameze neza.

Umwe yagize ati" ubu biragenda" ni ijambo yavuze ubona ko rimuvuye ku mutima azamura intugu nk’ uwiruhutsa.

Abacanshuro bavuye mu Karere ka Rubavu aho bakomeza mu mujyi wa Kigali aho bagomba gutegera indege zibageza mu gihugu cyabo.

Abacanshuro bo mu gihugu cya Romania bari bamaze igihe kigera ku mwaka muri Kivu y’ Amajyaruguru mu rugamba bari bahanganyemo n’ umutwe wa M23.

Ni akazi bari batumiwemo n’ igihugu cya Repubulika Iharanira Demokarasi ya Congo mu kubafasha guhangana na M23, mu bice bitandukanye muri Masisi, Lubero no mu mujyi wa Goma.

DRC yahakanye ko idakoresha abacanshuro mu kurwana na M23, ahubwo ko ari impugucye yazanye mu gutoza ingabo zayo FARDC.

Bagaragaye kenshi ku rugamba bahanganye na M23, bafatanya n’ ingabo za FARDC.

Abacanshuro basubiye mu gihugu cyabo, mu gihe ingabo za FARDC bafatanyaga zishyikirije umutwe wa M23, abandi bakuramo imyenda n’ ibikoresho bya gisirikare bihindura abaturage basanzwe.

Abacanshuro bacyuwe mu gihugu cyabo cya Romania nyuma yo guhungira mu kigo cya MONUSCO, inzira banyuzemo kugera ku mupaka babonaga abarwanyi ba M23, bari bahanganye.

VIDEO - Abacanshuro bari bategerejwe ku mupaka i Rubavu bahageze. Barwanaga ku ruhande rw'ingabo za Leta ya DR Congo muri Kivu y' Amajyaruguru, bakaba bagiye kunyura mu Rwanda basubizwa mu bihugu byabo. pic.twitter.com/gjx5qP2ORp

— Kigali Today (@kigalitoday) January 29, 2025

Ni abarwanyi bumvikanye inshuro nyinshi bahanganye n’ umutwe wa M23 mu bice bitandukanye birimo Teritwari ya Masisi mu mujyi wa Kitshanga, mu mujyi wa Sake no mu nkengero zayo, ndetse na Kanyabayonga.

Nyuma yo gutsindwa mu nzira ijya Butembo bagiye mu mujyi wa Goma kurwana ku kibuga cy’ indege bafatanyije n’abasirikare bahambaye ba FARDC.

Abancanshuro bageze ku mupaka w’u Rwanda na DRC

Nyuma y’ uko batsinzwe kurinda ikibuga cy’ indege cya Goma no mu mujyi wa Goma bahungiye mu kigo cya MONUSCO.

Ku isaha ya 9h47 nibwo bari bageze ku mupaka munini uhuza Goma na Gisenyi, benshi baboneka nk’ abananiye abandi bafite uburwayi, bageze mu Rwanda n’ imizigo yabo barasakwa ndetse bajya gutererwa amakashi mu mpapuro z’inzira, burizwa imodoka zibajyana Kigali.

Uko ari 288 bagiye kunyuzwa mu Rwanda bahungishwa na MONUSCO, hari amakuru avuga ko bashobora gusubizwa mu bihugu bakomokamo cya Romania.

Uretse abacanshuro, hari n’ abakozi bakoraga muri banki y’isi bagera muri 40 nabo bahungiye muri Monusco bakaba bagiye kunyuzwa mu Rwanda bahungishwa.

Mu mujyi wa Goma umutekano wagarutse, naho mu Karere ka Rubavu ibikorwa byongeye gusubukura kuko n’ abanyeshuri barasubira ku ishuri kwiga n’ubwo hari ayagiye araswaho, agomba gusanwa.

Abakongomani(barangajwe imbere n’uwambaye umupira wera)ku mupaka w’u Rwanda berekeje inzira itaha i Goma

Umuvugizi wungirije wa Guverinoma y’ u Rwanda Alain Mukurarinda yabwiye Kigali Today ko impunzi zishaka gutaha zemewe gutaha.

Yagize ati "hari abagera ku ijana bamaze kubisaba kandi ntitwabangira kuko bafite amakuru ko iwabo bimeze neza."

Impunzi zibarirwa muri 500 bari bahungiye mu Rwanda mu Karere ka Rubavu kubera gutinya imirwano yari mu mujyi wa Goma hagati y’ ingabo za FARDC n’ abarwanyi ba M23 kuva tariki 26 Mutarama 2025.

Abenshi bahungiye mu Rwanda bari bavuye mu bice bya Birere mu mujyi wa Goma, Majengo, Mabanga na Ndosho, bavugaga ko bahunga masasu menshi arimo kuvugira aho batuye baza mu Rwanda bizera ko batekanye.

Barekeje mu gihugu cyabo

Umupaka munini uhuza Goma na Gisenyi niwo urimo gukoreshwa ku bantu bari i Goma barimo gushaka kuza mu Rwanda, ukaba urimo gukoreshwa n’ abanyecongo bashaka gusubira mu gihugu cyabo.

M23 yamaze gufata Goma

Abashoferi n’abacuruzi 47 ni bo ba mbere binjiye mu Rwanda, nyuma y’uko M23 ifashe umujyi wa Goma. Abaganiriye na Kigali Today bavuga ko ingabo za FARDC zirimo kwishyikiriza M23.

Umwe yagize ati "Imana ishimwe twinjiye mu Rwanda ubu twongeye kubaho, hariya twari tuzi ko turi bugweyo."

Abinjiye mu Rwanda bavuga ko barimo kunyura ku ngabo za FARDC, zirimo kwitanga nyuma yo gutsindwa.

Abari baraheze i Goma bagiye guhita binjira mu Rwanda

Amasasu makeya arumvikana mu mujyi ariko ubuzima butangiye kugaruka, kuko hari abaturage batangiye kujyana ibicuruzwa mu mujyi wa Goma, umaze igihe mu ntambara abantu badasohoka.

M23 ifashe umujyi wa Goma ifite inshingano zo kugarura umutekano no kwambura intwaro imitwe yose yari yarazihawe na Leta ya Repubulika Iharanira Demokarasi ya Congo.

VIDEO - Imipaka ihuza Goma na Gisenyi yongeye gufungurwa, abantu bari baheze i Goma bataha mu Rwanda, nyuma y'uko umujyi wa Goma ufashwe na M23.

Abashoferi n'abacuruzi 47 ni bo ba mbere binjiye mu Rwanda. https://t.co/Rg68xWGMcB pic.twitter.com/BJYS9kKyQv

— Kigali Today (@kigalitoday) January 28, 2025

Ifite inshingano kandi zo gufasha umujyi kongera kubona amazi meza n’umuriro bimaze igihe bitari mu mujyi wa Goma.

M23 irahita yihutira gushyira ibintu mu buryo, imirimo ikongera igakorwa ndetse ubuzima bukagaruka mu mujyi wa Goma.

Impunzi ziva i Goma zikomeje kuza mu Rwanda

Imirwano ishyamiranyije abarwanyi ba M23 n’ingabo za FARDC, SADC na Wazalendo irakomeje mu bice bitandukanye mu mujyi wa Goma.

Abanyekongo barimo guhungira mu Rwanda baravuga ko imirwano irimo kubera mu bice bitandukanye, ariko aharimo kumvikana amasasu menshi ni ku kibuga cy’indege no mu nkengero zaho.

Abaturage batifuje ko amazina yabo atangazwa bavuga ko bavuye mu Birere, Majengo na Mabanga, bavuga ko bahisemo kuza mu Rwanda gushaka ahari umutekano.

Uyu ati "Tumaze iminsi turi munzu, nta gusohoka, ntabyo kurya, nta mazi, uretse kumva amasasu, ubuzima bwari budukomeranye, duhisemo kuza gushaka umutekano."

Impunzi zinjira mu Rwanda ziravuga ko zidashobora kwemeza uri kuyobora umujyi wa Goma, kuko ibice byinshi birimo kumvikanamo amasasu.

Imirwano irimo kubera mu mujyi wa Goma aho abarwanyi ba M23 bayizengurutse, ingabo za FARDC ntizifite uburyo bwo kubona ibyo kurya no kugemurirwa amasasu.

Abaturage baravuga ko abasirikare barimo gusahura ibyo kurya mu baturage naho amasasu ngo barayagendana.

Benshi mu ngabo za FARDC bakuyemo imyenda ya gisirikare, bararwana bambaye isanzwe.

Ati "Tuza twagiye tubona abantu bafite imbunda ariko ntushobora kumenya ngo ni ba nde, bambaye imyenda isanzwe kandi ntawe bavugisha."

Impunzi zibarirwa mu magana zirimo kwinjira ku mupaka munini uhuza Goma na Gisenyi, aho binjira ntawe ubatangira.

Bavuga ko mu Rwanda ariho bizeye umutekano mu gihe umujyi wose urimo kumvikanamo amasasu, kandi nta nzira yo gusohoka mu mujyi wa Goma uretse kuza mu Rwanda.

Abaturage baravuga ko bari kugwa mu mirwano ari benshi kandi nta butabazi ku bakomeretswa n’amasasu.

U Rwanda rumaze kwakira Abanyecongo babarirwa muri 500, ariko umubare ushobora kwiyongera mu gihe imirwano ikomeje mu mujyi wa Goma.

Imipaka ya Goma ubu ntawe uyirinze, abaturage bakavuga ko barimo kwambuka bakirwa n’inzego zishinzwe abinjira n’abasohoka mu Rwanda.

Imirwano irakomeye

Amasasu menshi n’ibibombe birimo birumvikana mu bice byegereye ikiyaga cya Kivu, mu gihe mu ijoro tariki 27 rishyira 28 Mutarama 2025, imirwano yari yahagaze.

Mu igenzura kugera saa sita z’ijoro umunyamakuru wa Kigali Today yakoze, amasasu makeya yumvikanaga mu bice bitandukanye mu mujyi wa Goma cyane cyane ahitwa Majengo, Ndosho, ahandi amasasu yumvikanaga mu nzira igana mu misozi ya Mutaho.

Nta bisasu biremereye byumvikanye mu ijoro mu mujyi wa Goma no mu nkengero zaho, ibi bibaka byahaye abantu agahenge ko kuruhuka.

Bamwe mu baturage batuye mu mujyi wa Goma bavuganye na Kigali Today bavuga ko badashobora kwemeza ni nde uyoboye umujyi wa Goma kubera imirwano yari yiriwe, itaratanga icyizere cyo kugaragaza ninde ufite itsinzi.

Mu gitondo saa kumi n’ebyiri n’iminota 25 nibwo hongeye kumvikana urusaku rw’imbunda nini n’intoya hafi y’ikiyaga cya kivu no mu mujyi wa Goma.

Imipaka irafunze ku buryo abantu badashobora gukomeza ubuhahirane, naho mu mujyi wa Gisenyi imirimo yari yongeye gutangira.

Abantu batuye ku mupaka bavuye mu mazu yabo mu mujyi wa Gisenyi hamwe n’abanyekongo bavuye mu mujyi wa Goma bashakiwe aho baba bacumbiwe mu Murenge wa Rugerero na Bigogwe.

Brig. Gen. Ronald Rwivanga, umuvugizi wa RDF

Umuvugizi w’ingabo z’u Rwanda Brig Gen Ronald Rwivanga atangaza ko ingabo za FARDC zarashe ibisasu mu Rwanda bigahitana abantu batanu, abandi 35 bagakomereka.

Brig Gen Rwivanga avuga ko abakomeretse bari kwitabwaho mu bigo nderabuzima mu mujyi wa Gisenyi, naho RDF ikomeje gufata ingamba zose mu gukumira abashaka gukora ibitero ku butaka bw’ u Rwanda.

Akomoza ku bisasu byarashwe mu Rwanda, avuga ko hari ibyarashwe mu Rwanda biburizwamo, ariko hari ibyashoboye kugwa mu Rwanda.

Ashimangira ko mu mujyi wa Gisenyi harimo kuboneka Imodoka za gisirikare mu bice bitandukanye zikumira ibisasu birimo kuraswa mu Rwanda.

Avuga ko u Rwanda ruzi ko rushobora guterwa n’ ingabo za FARDC na FDLR cyakora ngo RDF iriteguye.

Bamwe mu basirikare ba FARDC na Wazalendo bahungiye mu Rwanda, nyuma yo gutsindwa na M23 haje abarenga 120 kandi hari aho bajyanywe.

Abarwanyi ba M23 bakomeje guhangana n’ ingabo za FARDC mu bice bitandukanye mu mujyi wa Goma.

Mu mujyi wa Rubavu abantu bakomeje kuguma mu ngo mu kwirinda kuba bahura n’ amasasu arimo kuraswa mu mu kirere cy’ u Rwanda.

Abaganiriye na Kigali Today bavuga ko imirwano ku mugoroba tariki 26 Mutarama 2025 yari iteye ubwoba, bakajya kurara mu kigo cya MONUSCO, aho bakuwe bahungishirizwa mu Rwanda.

MONUSCO iratangaza ko abakozi bayo n’imiryango yabo bagera kuri 2040 bagomba gukurwa mu mujyi wa Goma, gusa bamwe mu bavuganye na Kigali Today bavuga ko batazi aho bajyanywe.

Nubwo bisanzwe ko ku mupaka haba abakozi bashinzwe abinjira n’abasohoka ba DRC n’u Rwanda, abantu barimo kuva i Goma binjira mu Rwanda ntibakirwa n’abakozi b’urwego rwabinjira n’abasohoka ba DRC, barimo kwakirwa n’u Rwanda gusa.

Baravuga ko mu mujyi wa Goma harimo kumvikana amasasu, nubwo abasirikare ba FARDC barimo guta imyenda n’imbunda mu muhanda bakiruka.

MONUSCO irimo guhungisha abakozi bayo

Innocent (izina ryahinduwe kubera umutekano we), avuga ko kuva muri Goma centre kugera ku mupaka nta musirikare uhagaragara, naho umupaka munini ukaba urinzwe na MONUSCO.

Avuga ko mu mihanda i Goma ntabantu bagenda, ahubwo bari mu nzu bakaba bategereje amasasu arangira ubuzima bugakomeza.

Amwe mu mafoto arimo gufatwa n’abaturage mu mujyi wa Goma, aragaragaza bamwe mu barwanyi ba Wazalendo barimo gusahura.

Imirwano irimo kubera mu birometero bine mu majyaruguru y’ Umujyi wa Goma, abantu benshi muri Goma batangiye kuva mu ngo zabo berekeza hafi y’ umupaka w’u Rwanda aho bamwe barimo kwinjira mu Rwanda n’ ibikapu byabo.

Abagore, abana n’ abagabo bose barimo kwinjira mu Rwanda, imodoka ni nyinshi ku mupaka munini, abanyamahanga ni benshi barimo guteza amakashe yinjira mu Rwanda, mu gihe hari abaturage badafite ibyangombwa babuze uko binjira mu Rwanda.

Abanyarwanda bari bagiye mu mujyi wa Goma baravuga ko batangiye guhohoterwa n’ abanyecongo babita M23.

Umwe wavuganye na Kigali Today avuga ko DRC yafunze umupaka muto uhuza Goma na Gisenyi, abanyarwanda bari Goma basabwa kunyura ku mupaka munini.

Agira ati " twari mu isoko rya Gahembe, twumva ibibombe abantu bariruka, tugeze ku mupaka muto dusanga urafunze. Kugera ku mupaka munini abanyecongo baradutangira bakatwambura badutera amabuye batwita M23."

Umupaka muto ubu nturi gukoreshwa bitewe n’ uko wafunzwe ku ruhande rwa DRC, ku ruhande rw’u Rwanda nabo bagira inama abantu kutambuka kuko umupaka wafunzwe.

Imirwano irumvikana Kanyarucinya, Munigi na Mutaho hafi cyane y’umujyi wa Goma, abanyarwanda baturiye umupaka bavuye mu ngo zabo kugira ngo hatagira amasasu abagwaho.

Bamwe mu baturage baravuga ko batinya ko hagira ibisasu bibagwaho.

Umwe yagize ati" iyo hari intambara yegera umujyi wa Goma, bamwe mu basirikare ba FARDC barasa mu Rwanda, ni byiza kuba dutanze akanya turagaruka birangiye."

Umubare b’abanyecongo barimo kwinjira mu Rwanda urimo kwiyongera, kubona amacumbi muri hôtel n’amazu yo kubamo mu mujyi wa Gisenyi biragoye, mu gihe bamwe barimo gukomeza birekeza Kigali na Musanze n’ ahandi bashobora gucumbika.

Abinjira mu Rwanda babwiye Kigali Today ko umubare w’abaza guhungira ushobora kwiyongera kuko benshi bagowe no kutagira ibyangombwa by’ inzira.

Abakozi ba UN batangiye guhunga bava mu mujyi wa Goma

Itangazo ryashyizwe ahagaragara na UN, risaba abantu badafite imirimo ikenewe cyane kuva mu mujyi wa Goma, ndetse bamwe batangiye kugera mu Rwanda nk’uko babyemereye umunyamakuru wa Kigali Today uri mu Karere ka Rubavu.

Mu mujyi wa Goma imodoka z’Umuryango w’Abibumbye zirimo gutwara abakozi bawo, n’abandi bakorera imiryango mpuzamahanga muri uwo mujyi ukomeje gusatirwa n’abarwanyi ba M23.

Itangazo ryashyizwe ahagaragara na UN rigira riti "Umuryango w’Abibumbye watangiye gukura mu mujyi wa Goma abakozi bawo badakenewe cyane, abakozi bakora mu biro, hamwe n’abandi bashobora gukomereza akazi ahandi bidasabye kuba mu mujyi wa Goma, mu gihe umutekano ukomeje kuba muke."

Umuryango w’Abibumbye uvuga ko nubwo abo bakozi bakuwe mu mujyi wa Goma, bitaza kugira ingaruka ku kazi bakora ko gutabara abari mu kaga, kuko abakozi bari mu butabazi baguma mu kazi mu gukurikirana abari mu kaga.

UN yongeyeho ko ikomeza gukorana n’abafatanyabikorwa na Leta mu kwita ku baturage bari mu kaga, naho gukura abakozi mu mujyi wa Goma bikaba bijyana n’uko umutekano uhagaze.

Imirwano irakomeje mu nkengero za Goma, abarwanyi ba M23 bakomeje kwihagararaho ahitwa Mubambiro mu bilometero 21 uvuye mu mujyi wa Goma, abandi barabarirwa ahitwa Rusayo aho bakomeje guhangana n’ingabo za SADC zavuye muri Tanzania na Afurika y’Epfo.

Abantu bakomeje guhunga Goma

Abarwanyi ba M23 bakomeje guhangana n’ingabo za FARDC, FDLR muri teritwari ya Nyiragongo ahitwa Kanyamahoro, aho imirwano imaze iminsi ntawe utsimbura undi munsi y’ikirunga cya Nyiragongo.

Abaturiye umujyi wa Goma na Gisenyi barimo kumva ibisasu biturika kuva saa saba z’ijoro za tariki 25 Mutarama 2025.

Ingabo za FARDC zarimo kurwana ku mujyi wa Goma zifatanyije n’iza MONUSCO, SADC na Wazalendo, aho barimo gukoresha indege n’ibitwaro bikomeye.

Hamaze gutangazwa ko abasirikare babiri ba MONUSCO bamaze kugwa mu mirwano barasiwe mu gifaru, naho abasirikare batatu b’Afurika y’Epfo bamaze kugwa mu mirwano.

Abaturage benshi barimo kuva mu mujyi wa Goma bavuga ko nta mutekano, kubura amashanyarazi, amazi meza na Interineti.

Bamwe mu baganiriye na Kigali Today bavuga ko barimo kuza mu mujyi wa Gisenyi, kugira ngo bumve bari mu mutekano, no kwegera ibikorwa remezo bikora neza.

Bamwe mu banyamahanga bashinzwe ikoranabuhanga ry’itumanaho, babwiye Kigali Today ko baje mu Rwanda kuko babona ibintu birimo kuba nabi, ndetse bakaba badashobora gukora kubera nta mashanyarazi.

Uyu ati "Twaje mu Rwanda kuko ariho twumva dutekanye, ikindi hari ibikorwa remezo bidufasha mu kazi."

Imwwe mu miryango ifite abantu bakora mu muro UN, babwiye Kigali Today ko basabwe kujya i Kigali, abandi bavuga ko bakomereza mu gihugu cya Uganda.

Hari abasirikare ba MONUSCO baguye muri iki gifaru

Abantu barimo guhunga umujyi wa Goma mu gihe amashuri yamaze guhagarara, abana bakaba bari mu ngo n’ababyeyi, kandi batazi igihe amashuri azatangirira.

Bamwe mu bana bavuga ko batewe ubwoba n’ibyo barimo kumva biturika, bakumva ko bajyanwa kure yabyo.

Imirwano yatumye ibiciro by’ibiribwa mu mujyi wa Goma bizamuka, ikilo cy’ibitunguru cyaguraga ibihumbi bine by’amafaranga ya Congo ubu kiragura ibihumbi umunani cyangwa icumi.

Mu mujyi wa Goma amahoteri amwe amaze kuzura abagenzi, abandi bakomereza mu mujyi wa Musanze na Kigali, mu gihe bategereje ko ibintu bisubira ku murongo.

Umujyi wa Gusenyi ukomeje kwakira abaturuka i Goma

Umujyi wa Goma uri mu kizima mu gihe wugarijwe n’ibura ry’amazi, bitewe n’uko ukoresha ay’ikiyaga cya Kivu, atunganywa hakoreshejwe amashanyarazi yamaze kubura.

Umujyi wa Goma uri mu icuraburindi mu gihe umaze amasaha 18 udafite internet, abahatuye bakaba bakomeje kugorwa n’ubuzima busanzwe bukenera ikoranabuhanga.

Radio Okapi yatangaje ko abarwanyi ba M23 bakomeje kwihagararaho mu birindiro byabo, mu gace ka Sake na Mubambiro ku bilometero 20 uvuye mu mujyi wa Goma, mu gihe imirwano ikomeje muri Rusayo no mu misozi ya kibati muri teritwari ya Nyiragongo.

Ambasade y’Amerika yamaze gusaba Abanyamerika bari muri Kivu y’Amajyaruguru, kuhava mu gihe imipaka n’ikibuga cy’indege bigikora.

Abanyamerika kandi babwiwe kugenzura gahunda zabo no kureba neza ko impapuro z’inzira zitararangiza igihe, ndetse bagategura ibikapu bashobora gutwara.

Ambasade y’Amerika ikaba itangaza ko idafite uburyo bwo gutabara Abanyamerika bari muri Kivu y’Amajyaruguru mu gihe bagira ikibazo.

Imiryango mpuzamahanga itabara imbabare isanzwe yita ku mpunzi myinshi yamaze kuva mu mujyi wa Goma, mu gihe abaturage basaga ibihumbi 400 bamaze kuva mu byabo mu nkengero muri Kivu y’Amajyaruguru.

Meya Mulindwa yahumurije abagenda muri Rubavu

Uyu muyobozi abitangaje mu gihe intambara mu nkengero z’umujyi wa Goma ikomeje, bamwe mu baturage hamwe n’abanyamahanga bakaza mu Rwanda batinya ko ibintu bishora kuba nabi.

Meya Mulindwa avuga ko batarakira impunzi zihunga imirwano, ko abaza ari abantu abafite ibyangombwa byambukiranya umupaka.

Agira ati "Nta mpunzi turakira ziza zivuga ko zishaka ubuhunzi, abo twakira ni abantu bafite ibyangombwa bigira muri za hoteli, abajya mu nshuti zabo cyangwa mu miryango yabo."

Nubwo nta mubare utangazwa w’abamaze kwinjira mu Rwanda, ku mupaka munini uhuza Goma na Gisenyi hari Abanyekongo bafite ibikapu, hari n’abanyamahanga bakorera imiryango mpuzamahanga.

Umuyobozi w’Akarere ka Rubavu avuga ko Akarere gatekanye mu mujyi no mu cyaro, abaturage bagiye mu mirimo nk’uko bisanzwe.

Ati "Abanyeshuri barajya ku mashuri, amasoko arafunguye, ubuzima burakomeje nk’ibisanzwe nubwo bumva ibiri kuvugira hakurya y’umupaka."

Imirimo irakomeje mu mujyi wa Gisenyi n’ahandi hose muri Rubavu

Mu gihe imirwano yakomeza hakagira abaturage bahungira mu Rwanda, Mulindwa avuga ko biteguye kwakira impunzi.

Agira ati "U Rwanda ruhora rwiteguye ibitunguranye, murabyibuka igihe cy’ibiza bya Sebeya cyangwa iruka ry’ikirunga cya Nyiragongo, n’ubu abafatanyabikorwa bacu twakorana mu kwakira impunzi zije."

Akomeza agira ati "Dufite amazi n’amashanyarazi n’ubundi bufasha bwakenerwa."

Inama ku bajya i Goma

Meya Mulindwa ati "Turasaba abaturage bajya i Goma gukoresha imipaka yemewe, birinde kujya ahabashyira mu kaga. Abayobozi baba ku mupaka bababwire amakuru yaho bagiye, bareke kugendera ku mpuha."

Uretse abaturage bafite ubwoba bakaza mu Rwanda, abatwara ibikamyo bipakiye ibicuruzwa bamwe barimo gutinya kujya i Goma.

Muri Rubavu hari umutuzo, ubuzima ni ibisanzwe

Izabayo Jean de Dieu, perezida w’ishyirahamwe ry’abatwara ibikamyo byambukiranya umupaka, avuga ko umuntu ushaka kujyana imodoka i Goma ayitwara nubwo hari abarimo gutinya kubera umutekano.

Agira ati "Twe mu Rwanda nta kibazo gihari, Serivisi zirakomeje ikibazo ni abashaka kujya hakurya batinya kubera umutekano. Gusa abashoferi baguma hano turakomeza kubitaho, hano bafatwa nko mu muryango bahabwa byose."

Bamwe mu bashoferi babwiye Kigali Today ko baraye mu Rwanda, kubera gutinya kwambuka umupaka bitewe n’umutekano mukeya.

Ku mupaka muto ubucuruzi burakomeje

Nubwo Abanyarwanda bakorera i Goma barimo kwirinda kwambuka, ndetse amaduka agakomeza afunze, abakoresha umupaka muto bavuga ko bakomeje kujyana ibicuruzwa mu mujyi wa Goma.

Icyakora abatwara amakamyo batinye kujya i Goma

Bagira bati "Turimo kujya i Goma hafi y’umupaka nta kibazo, abayobozi baratugira inama yo kudatinda, naho abajya kure bo ntibambuka."

Abanyarwanda bambuka bavuga ko hari inzu z’ubucuruzi zifunze kubera ubwoba, icyakora ngo amasoko arafunguye.

Abanyarwanda bavuga ko nubwo bumva ibisasu bikomeye mu nkengero za Goma, badafite ubwoba kuko bizeye umutekano mu Rwanda.

Imirwano ikomeje kubera mu nkengero za Goma, intambara irabera i Sake mu bilometero 27 mu burengerazuba bwa Goma, naho mu majyaruguru y’ iburasirazuba irabera mu kibaya hafi y’ikirunga cya Nyiragongo mu bilometero 20, icyakora hari indi mirwano mu majyaruguru ya Goma ahazwi nka Mugunga na Rusayo, munsi y’ikirunga cya Nyiragongo.

Abava i Goma bahungira mu Rwanda barakirwa neza

Abanyamakuru bakorera mu mujyi wa Goma babwiye Kigali Today ko abarwanyi ba M23 binjiye muri Sake mu masaha ya saa moya bituma abahaturiye batangira guhungira mu mujyi wa Goma.

Ababyeyi batuye mu nkengero za Mugunga na Mubambiro basabwe gucyura abana bari bagiye ku ishuri.

Umwe mu babyeyi yabwiye Kigali Today ati" umuyobozi ushinzwe uburezi muri Kivu y’ Amajyaruguru yohereje ubutumwa ko amashuri afunga, ubu mvuye kuzana umwana turi mu rugo."

Uyu mubyeyi utuye Keshelo avuga ko bafite ubwoba kuko ingabo nyinshi zirimo guhunga urugamba.

"Dutegereje igikurikiraho, abasirikare benshi barimo guhunga urugamba, abasirikare b’abanyamahanga (Wagner) bari Mubambiro bamaze gufunga imizigo baragiye urumva twizeye iki?"

Amabombe arimo kuvugira Sake no mu nkengero zaho arumvikana mu Rwanda, ndetse n’abanyarwanda bajya gukorera mu mujyi wa Goma bagabanyije ingendo.

Ku masaha ya saa yine, Abanyarwanda nibo baba ari benshi bajya I Goma, ariko ku mupaka munini hari imirongo miremire y’abanyecongo baza mu Rwanda.

Bamwe bari ku murongo harimo abanyecongo n’ abanyamahanga bafite ibikapu bitaremereye.

Imodoka zitwara abanyecongo bajya Bukavu, Uvira na Bujumbura ziyongereye ku mupaka munini uhuza Goma na Gisenyi.

Ku mupaka muto uhuza Goma na Gisenyi, abantu barambuka bajyana ibicuruzwa i Goma, Abanyarwanda bavuganye na Kigali Today bavuga ko batarenga Birere.

"Ntabwo twizeye umutekano wacu mu mujyi wa Goma, turimo kugeza ibicuruzwa hafi y’ umupaka tukagaruka.

Nubwo abinjira mu Rwanda aribo benshi, hari abarimo kujya I Goma, ariko abenshi ni abafite ibyangombwa bya Repubulika Iharanira Demokarasi ya Congo.

Imirwano ikomeye hagati y’ abarwanyi ba M23 n’ ingabo za Repubulika Iharanira Demokarasi ya Congo FARDC iri kubera mu nkengero ya Sake na Mugunga, impunzi nyinshi zirimo kwerekeza mu mujyi wa Goma.

Imirwano isatira umujyi wa Goma nyuma y’ uko M23 ifashe ibice byerekeza muri Kivu y’ Amajyepfo, aho bivugwa ko aba abarwanyi bageze ku birometero 62 uvuye mu mujyi wa Goma wekereza I Bukavu.

Mu masaha ya saa sita ibimodoka byinshi by’ igisirikare cya FARDC byongeye kwerekeza ku rugamba mu nkengero za Sake ahari kumvikana urusaku rw’amabombe.

Uretse Sake na Minova, biravugwa ko abarwanyi ba M23 binjiye ku kirwa cya Matanda cyegeranye na Nzulo ibikomeje gutera ubwoba abatuye umujyi wa Goma.

Umuvugizi wa FARDC muri Kivu y’ Amajyaruguru Lt Col Njike Kaiko yatanze amabwiriza ko nta bwato butoya bwemerewe kugenda mu masaha y’ ijoro no mu rukerera mu kurinda umujyi wa Goma.

Hagati aho, ubwato bunini butwara abantu tariki ya 22 Mutarama bwarimo bukora ingendo mu kiyaga cya Kivu, naho ingendo z’indege mu mujyi wa Goma zagabanutse ku kigero cya 70%.

Ikibuga cy’ indege cya Goma gisanzwe cyakira indege cyangwa ikaguruka mu minota 30, ariko ubu isaha irashira ikarenga nta ndege ihaguye cyangwa ngo ihaguruke.

Impungenge ku batuye umujyi wa Goma ni nyinshi ndetse n’ abajyana ibicuruzwa mu mujyi wa Goma, imodoka zabo ntizirimo kwambuka, inyinshi ziri mu mujyi wa Gisenyi.

Abasanzwe bafite ibigo bicumbira amakamyo ajya muri Congo bavuga ko imodoka zitarimo kwambuka cyane bitewe no gutinya umutekano mucye uri Goma.

Imirwano irakomeje ku mpande za Masisi na Lubero mu gihe bivugwa ko abandi barwanyi ba M23 bakomereje kwerekeza I Butembo, mu gihe abandi bari kumanuka muri Kivu y’ Amajyepfo, naho abandi bakagana muri Masisi berekeza i Walikale.

Intara ya Kivu y’ Amajyaruguru irimo kuberamo imirwano ingana 59.483 km², uduce tumaze gufatwa na M23 byuzuye harimo Teritwari ya Rutshuru na Masisi zingana na 5 289 km² 4734 km² Masisi, Nyiragongo 333 km².

Imirwano ikomereje muri teritwari ya Walikale ingana na 23.475km², Lubero 18096 km², mu gihe beni yo ingana na 7 484 km²

Imirwano irakomeye hagati ya M23 na FARDC

Abaturage batuye mu mujyi wa Sake babwiye Kigali Today ko batashoboye gusinzira, kubera ibibombe birimo kuraswa n’impande zihanganye.

Abarwanyi ba M23 begereye umujyi wa Sake nyuma yo gufata no gufunga byuzuye agace ka Minova kerekeza muri Kivu y’Amajyepfo, imirwano igaruka mu majyaruguru yegera umujyi wa Sake wari umaze igihe ufite agahenge.

Ibibombe byinshi birimo kugwa mu misozi ya Kimoka ikikije Sake, mu gihe abarwanyi ba M23 bavuye muri Masisi abandi bakava muri pariki y’Ibirunga bya Nyiragongo, barimo kurwana n’ingabo za Leta (FARDC) ziri mu mujyi wa Sake, abandi bari i Mubambiro wekereza mu mujyi wa Goma.

Ni imirwamo ikomeje gushyira umujyi wa Goma mu kaga, mu gihe umujyi wa Sake wafatwa na M23 abari mu mujyi wa Goma baba basigaranye inzira eshatu zo kuwuvamo harimo guhungira mu Rwanda, guhunga banyuze mu mazi y’ikiyaga cya Kivu no gukoresha ikibuga cy’indege cya Goma nubwo bitaba byizewe.

Abarwanyi ba M23 bamaze iminsi bazenguruka umujyi wa Goma, ndetse imirwano ikomeye imaze iminsi ibera muri Teritwari ya Nyiragongo mu kirunga cya Nyiragongo mu dusuzi dukikije Bibumba, Amabere y’Inkumi, Kanyamahoro na Kirimanyoka.

Nubwo abarwanyi ba M23 batashoboye kwinjira Kibati, ngo birukane ingabo za FARDC zihari bakomereje imirwano ibumoso bw’ikirunga cya Nyiragongo, aho imirwano ikomeye yerekeza mu mujyi wa Sake, ukoje kugotwa bigashyira mu kaga umujyi wa Goma.

Mu gitondo cyo kuri uyu wa Mbere tariki 20 Mutarama 2025, amabombe menshi yumvikanye mu bice bya Kamuronza muri Teritwari ya Masisi yegereye Sake, aho ingabo za FARDC zishaka kwirukana abarwanyi ba M23 bazengurutse Sake bavuye Masisi abandi muri Pariki y’Ibirunga, berekeza i Shove na Bukarara.

Uretse gufata umujyi wa Sake, abarwanyi ba M23 bamaze kwinjira mu Ntara ya Kivu y’Amajyepfo muri Teritwari ya Kalehe mu duce nka Lumbishi, ahakungahaye mu mabuye y’agaciro.

M23 ikomeje kwambura ibice bitandukanye ingabo za FARDC, mu gihe Perezida wa RDC, Félix Antoine Tshisekedi, yatangaje ko adashobora gushyikirana n’izi nyeshyamba, ibintu afata ko byaba ari ukurenga umurongo utukura, mu gihe bamwe mu baturage n’abasirikare batangiye kumusaba kuganira na zo, mu kwirinda gukomeza kumena amaraso no gushyira abaturage mu kaga.

Prosper Mulindwa uyoboye komite mu Karere ka Rubavu

Abatowe kuyobora inzego z’umuryango FPR Inkotanyi ku rwego rw’Akarere bavuga ko bashishikajwe no kwegera abanyamuryango no gukemura ibibazo by’ abaturage.

Mulindwa Prosper umuyobozi watorewe kuba umuyobozi wa komite nyobozi y’umuryango wa FPR inkotanyi mu Karere ka Rubavu, avuga ko abatowe bagiriwe icyizere kijyana no guhabwa inshingano.

Agira ati "Ndatanga icyizere nka chairman ko tuzahura tugasesengura inshingano zacu, kugira ngo dutangire inshingano neza. Tuzarangwa no gukora cyane, kubaha, kugisha inama no gushyira mu bikorwa ibyo tuzatumwa. Tuzareba kure, dutinyuke ibikomeye turinda ubumwe bw’ Abanyarwanda."

Yongeraho kandi ati "Mu nshingano dufite tugomba gusigasira umunyamuryango ufite umutekano, wize neza, udafite igwingira, ufite akazi kandi ufite ubuzima bwiza. Ibi tugomba kubikora neza kandi vuba."

Twagirayezu Gaspard, Komiseri mu muryango wa FPR Inkotanyi ku rwego rw’igihugu yasabye abamaze gutorwa kwishimira inshingano, yibutsa abatowe n’ abanyamuryango kujya inama no kwitabira ibikorwa.

Agira ati " tugomba kureba uko ibikorwa umuryango wemereye abaturage birimo gushyirwa mu bikorwa, abayobozi b’umuryango bagomba kureba ibyateguwe n’ umuryango mu myaka itanu uko bishyirwa mu bikorwa."

Agira ati"Tugomba guharanira ko ibyo Perezida yemereye abaturage bigerwaho vuba kandi neza."

Mu Karere ka Rubavu Mulindwa Prosper usanzwe ari umuyobozi w’Akarere ni we watorewe kuyobora komite nyobozi y’umuryango wa FPR inkotanyi. Hatowe kandiu umwungirije n’umunyamabanga, akazafashwa n’abakomiseri barimo ushinzwe ubukungu, imibereho, imiyoborere n’ubutabera.

Ibikorwa by’ amatora mu muryango wa FPR byatangiriye mu Mudugudu, utugari n’ imirenge. Nyuma y’ amatora yo ku rwego rw’Akarere hazakurikiraho ku rwego rw’Intara.

Abikorera biyemeje gufasha Etincelles FC kwiyubaka

Etincelles FC ikenera ku mwaka nibura Miliyoni 240Frw, ariko kubera ubushobozi bukeya Akarere kayigenera Miliyoni 120Frw gusa.

Ni amafaranga makeya hagendewe ku yakenewe mu gufasha ikipe kugura abakinnyi, kwitegura imikino no guhemba abakozi.

Ubuyobozi bwa Etincelles bwagaragaje amakarita azajya agurwa n’abakunzi b’ikipe, mu kuyifasha kongera ubushobozi.

Ni amakarita atatu, imwe igurwa ibihumbi 350,000Frw, igura 200,000Frw naho iya makeya izajya igura ibihumbi 20Frw.

Mabete Dieudonné Niyonsaba uyobora urugaga rw’abikorera mu Karere ka Rubavu, avuga ko bagiye gushishikariza abikorera gushyigikira ikipe no kugura amakarita, mu gukomeza kuyifasha kwiyubaka.

Agira ati "Ikipe iyo yakinnye abantu barishima, abacuruza baracuruza birenze, abavuye i Kigali bagateza imbere amahoteli, abahinzi n’aborizi bakagurirwa. Tugomba kuyifasha kongera ibyishimo by’abatuye, Akarere ka Rubavu n’Abanyarwanda muri rusange."

Amakarita yateganyijwe

Abikorera mu Karere ka Rubavu bavuga ko kugura ikarita bizafasha ikipe gushimisha abakunzi bayo, uretse kugura amakarita bagomba no gutera inkunga ikipe ikagira ubushobozi.

Umwe agira ati "Ubundi umukinnyi wa Etincelles yagombye guhembwa Miliyoni ku kwezi, yakinnye atakinnye, tugomba gutanga amafaranga arenze kugura ikarita."

Abikorera mu Karere ka Rubavu babarirwa mu ijana, batanze amafaranga agera kuri Miliyoni 13 n’ibihumbi 100 yavuye mu kugura amakarita no gutera inkunga ikipe, naho abakuriye urugaga rw’abikorera mu mirenge n’Abanyamabanga Nshingwabikorwa b’Imirenge igize Akarere ka Rubavu, bavuga ko bagiye gushaka abashyigikira Etincelles.

Tuyishime Jean Bosco, Nyakiriba avuga ko buri murenge ugiye gushaka nibura abantu 100 bagura amakarita, agasaba abantu kwiyongera mu gushyigikira ikipe.

Ndagijimana Enock, Perezida wa Etincelles, muri 2023 yabwiye Kigali Today ko iyi kipe igiye gufungura ikigo cy’ubucuruzi kizayifasha gushaka umutungo izajya ikoresha, ndetse ibi biyifashe kwikemurira ibibazo by’ubukungu ifite.

Ndagijimana yavugaga ko bimwe mu bikorwa bizabafasha kongera ubushobozi birimo kuganira n’abakunzi babo bari mu byiciro by’inganda, abikorera n’ibigo byamamaza, ibi bikazafasha ikipe gushaka ubushobozi buyitunga.

Ashingiye ku igenamigambi ryakozwe, yateganyaga ko kugera mu mpera za 2026 ibikorwa bya Etincelles bizayifasha kwitunga ku kigero cya 60%, mu gihe mu myaka itanu bazaba bitunga 100%.

Etincelles FC irimo gushakirwa ubushobozi

Ikamyo yakomerekeje abantu igonga n’ibitaro bya Gisenyi

Amashusho yafashwe na kamera agaragaza ikamyo yikoreye umucanga igonga ibitaro bya Gisenyi, bisanzwe biri mu ikoni rigora imodoka zikoreye kandi zihuta.

Ni impanuka yakomerekeyemo abantu bane harimo umushoferi n’uwo yari atwaye, hamwe n’abanyamaguru babiri.

Impanuka yakozwe n’imodoka yambaye Purake nomero RAF 698 Z, amakuru akaba avuga ko yatewe no kutaringaniza umuvuduko.

Umuvugizi wa Polisi mu Ntara y’Iburengerazuba mu butumwa bugufi yatanze, yavuze ko nta muntu wayiburiyemo ubuzima.

Yagize ati "Impanuka yabaye mu masaha ya saa kumi n’ebyiri z’igitondo, yakomereyekeyemo abanyamaguru babiri, Shoferi n’undi muntu yari atwaye."

Igipangu cy’ibitaro cyangiritse bikomeye

Umwe mu bakozi b’ibitaro bya Gisenyi yabwiye Kigali Today ko igipangu cy’ibitaro cyangiritse, ariko abakomeretse barimo kwitabwaho.

Impanuka z’imodoka nini zigonga ibitaro bya Gisenyi zimaze imyaka myinshi, ndetse abahanga bagasaba ko imodoka nini zihetse imizigo, zajya zikoresha umuhanda wa Byahi mu kwirinda impanuka ku bitaro bya Gisenyi.

Umuhanda wa Byahi wamaze kuzura, icyakora amabwiriza y’uko imodoka nini ari wo zakoresha ntarajyaho.

Zafashwe ijyanywe muri Congo mu buryo butemewe

Abaturage babwiye Kigali Today ko zafashwe n’inzego z’umutekano, ubwo zari zinyujijwe mu nzira itemewe.

Umwe mu baturage yagize ati "Abasirikare bacu ni inyangamugayo, bashoboraga kuzireka zikagenda, ariko banze ko zinyuzwa inzira itemewe barazihagarika."

Inka zashyikirijwe inzego z’ibanze, zirimo gushakisha uwaba yaribwe inka kugira ngo ashobore kuzisubizwa.

Amatangazo yatanzwe asaba kumenyesha uwaba yabuze inka agira ati "Uwamenya amakuru ku waba yabuze imwe muri izi nka yatumenyesha, zifashwe zari zijyanywe muri DRC ziciye mu nzira zitemewe."
Iryo tangazo rikomeza rigira riti "Ubu ziri mu maboko y’Ubuyobozi bw’Umurenge wa Rubavu, mudufashe dusangire amakuru."

Mu kwizihiza Noheli mu mujyi wa Gisenyi, habazwe inka 260 n’ amatungo magufi 86.

Inyama nyinshi zibagirwa mu Rwanda zoherezwa mu mujyi wa Goma, ibi bituma igiciro cyazo kizamuka mu mujyi wa Gisenyi, aho ikiro kimwe kigura amafaranga y’u Rwanda 5500, ariko zagera muri Goma kikiyongera, bamwe bagashaka kunyuza inka mu nzira zitemewe ngo bazijyane muri Congo.

Ubuyobozi bw’Akarere ka Rubavu busaba abaturage bajya muri Congo kunyura ku mipaka yemewe irimo umupaka munini uhuza Goma na Gisenyi ()Granda Barrière, umupaka muto (Petite Barrière) na Kabuhanga, kuko ariyo mipaka ikoreshwa mu buhahirane, ubuyobozi bugasaba abantu kwirinda kunyura mu nzira zitemewe.

Huye ni wo mujyi wubatswe mbere mu Rwanda, aho wari uzwi ku mazina ya Astrida mu 1920, ariko imikurire yawo ntiyihuse kuko indi mijyi yavutse nyuma yawo yagiye iwucaho gahoro gahoro, none ubu ugaragara nk’umujyi wasigaye inyuma.

‘ ’

Umuyobozi w’Akarere ka Huye Ange Sebutege avuga ko mu byo bashaka kuvugurura no kongera muri uyu mujyi ari inyubako zicumbikira abanyeshuri n’abahagenda.

Uwumukiza Rehema umuyobozi wungirije w’urugaga rw’abikorera mu karere ka Huye avuga ko hari ibyo bungutse mu kwagura umujyi wa Huye ndetse no kuwuteza imbere mu kugira isuku n’umutekano.

Agira ati “Twarebaga uburyo imijyi itera imbere, mu nyubako, isuku n’umutekano ariko bikajyana no gushyuha no mu gutegura ibirori. Icyo twabonye ni uko tugomba gukorera hamwe no gukorana n’inzego kugira ngo umujyi wacu urusheho kuba mwiza.”

Uretse kuba abikorera ba Huye bashaka guteza imbere umujyi wabo, bavuga ko bagomba kongera ibihakorerwa bakabigeza ku masoko mu Rwanda no mu mahanga.

Ibyo bibahaye umurongo nyuma yo gusura icyambu cya Rubavu cyohereza ibicuruzwa muri Repubulika ya Demokarasi ya Congo.

Umuyobozi w’Akarere ka Huye Ange Sebutege yabwiye Kigali Today ko asaba abaturage kwishyira hamwe no guhuza ubushobozi kugira ngo bongere ibikorwa by’itembere mu karere ayobora.

Barimo kubaka ahazamurikirwa ibicuruzwa

Umuyobozi w’Urugaga rw’Abikorera mu Ntara y’Iburengerazuba Ernest Nkurunziza, atangaza ko ari imurikagurisha ribera ku mucanga, rikaba riteganya kwakira abantu 200 nubwo abamaze kwiyandikaisha babarirwa 160.

Ni imurikagurisha rizitabirwa n’abikorera baturutse mu Turere tugize Intara y’Iburengerazuba, inganda zihakorera, ariko rizitabirwa n’abanyamahanga n’inganda zikomeye mu Rwanda.

Nkurunziza agira ati “Ni imurikagurisha rizitabirwa n’ibigo bitandukanye hano mu Rwanda, inganda zikomeye, ibigo bicuruza amabuye y’agaciro, hamwe n’abacuruza imodoka, ku buryo hari n’abashobora kuzitahana.”

Iri murikagurisha ryitezweho gufasha Abanyarwanda kuruhuka no kwizihiza iminsi mikuru isoza umwaka, cyane cyane abana bazaba bari mu biruhuko.

Agi ati “Harimo udushya twinshi tuzabera ku nkengero z’amazi, ubusanzwe habaga gukumira abantu kwegerea amazi ariko ubu abaryitabiye bazaba bashobora no kujya mu mazi, hazaba hari ubwato bubatembereza, hazazanwa ibikinisho by’abana, gufasha abantu kuruhuka no kwidagadura hazajya hatumirwa abahanzi bashimisha abantu buri munsi.”

RDB izaba iri hafi abazitabira imurikagurisha

Uwampayizina Marie Grace, umuyobozi wungirije w’urugaga rw’abikorera mu Ntara y’Iburengerazuba, avuga ko bateguye iri murikagurisha kugira ngo bafashe Abanyarwanda gusoza umwaka neza kandi bafite aho kwishimira no guhahira, asaba abantu kwitabira kugira ngo ribafashe gusoza umwaka neza.

“Turahamagarira Abanyarwanda kuryitabira bagahaha ndetse bagasoza umwaka neza, hazaba harimo byinshi byo guhaha, hazaba harimo kwidagadura ku babikunda ariko hazaba harimo ibishimisha ibyiciro byose haba mu bana, urubyiruko n’abakuze.”

Kubera ko umujyi wa Gisenyi wegeranye n’umujyi wa Goma, Nkurunziza avuga ko n’abo baturanyi batumiwe.

Imurikagurisha riteganyinywe gutangira ku itariki 18 kugera tariki 29 Ukuboza 2024.

Abayobozi ba PSF basobanura ku mikorere y’imurikagurisha

Imurikagurisha rizabera ku nkengero z’ikiyaga cya Kivu

Aba bakobwa babyariye iwabo bo mu Murenge wa Rugerero bavuga ko bahura n’ibishuko kubera ubukene kandi ababateye inda ntibabafashe, ibi bigatuma abadafite imiryango yihagazeho bishora mu busambanyi kugira ngo babone icyo bareresha abana.

Umwe muri bo, Niyogisubizo avuga ko abakobwa babyariye iwabo bahura n’ibishuko kandi bafite ubukene. "Sida ni nyinshi mu rubyiruko, abahungu baradushukisha amafaranga, kubera ubukene

umuntu arayafata, gusa habaho kwikingira."

Niyogisubizo asaba ko Leta yafasha urubyiruko rw’abakobwa kubona igishoro bakagira ibyo bakora kuko aribwo buryo bwatuma bahangana n’ ibishuko.

"Leta nirebe uko idufasha nibura abafite ubwenge bwo gucuruza batworohereze gucuruza tubashe gutunga abana bacu, abaduteye inda baradutererana, imiryango yacu nayo ugasanga ntiyishoboye, bigatuma byorohera abagabo bakwifuza kugushuka."

Ikigo vision jeunesse nouvelle mu bikorwa by’ ubukangurambaga mu kwirinda Virusi itera sida haba ibikorwa byo kwipimisha, urubyiruko rwinshi rw’abakobwa nibo bitabira kwipimisha kugira ngo bamenye uko bahagaze.

Frère Ringuyeneza Vital, Umuyobozi wa Vision Jeunesse Nouvelle avuga ko bafasha urubyiruko kugira ubuzima bwiza binyuze mu kwirinda icyorezo, ibiyobyabwenge.

Agira ati"ubwandu burimo kugenda buboneka, kandi urubyiruko rubyishoramo kubera, irari, ibishuko n’ ubukene. Tukaba turimo gufasha urubyiruko kwihangira akazi, tubigisha imirimo irimo;kudoda, gusuka, gukanika kugira ngo bamenye umwuga bashobore kwihangira umurimo."

Ikigo cy’Igihugu cy’Ubuzima (RBC) kigaragaza ko mu mwaka umwe abantu barenga 3200 bandura virusi itera SIDA, bakaba biganjemo urubyiruko, mu Rwanda habarurwa abantu basaga 230.000 bafite virusi itera SIDA, muri abo ababizi ni 96% ariko 98% muri abo bazi ko banduye bakaba bafata neza imiti igabanya ubukana bakagabanya ubukana bw’iyo virusi.

Aborozi baha inka ibibabi by’ibirayi n’ibitunguru biba byatewe umuti bikagira ingaruka ku musaruro w’amata

Aba borozi babarizwa mi mirenge izwi ho kuba ikigega cy’ibirayi n’ibitunguru byoherezwa mu Rwanda hose. Inka zabo, ngo baba bazigaburira ibisigazwa by’ibi bihingwa.

Amakusanyirizo akorera mu karere ka Rubavu yakira nibura buri cyumweru litiro ibihumbi 75 by’amata avuye mu borozi. Icyakora hari litiro zisaga ibihumbi 15 zo muri iriya mirenge ya ngo zidashobora kujyanwa ku ruganda rwa Mukamira.

Aborozi bavuganye na Kigali Today bavuga ko amata yabo adashobora kwakirwa n’uruganda bitewe n’impumuro yumvikanamo, iyi mpumuro ikaba iterwa n’uko bagaburira inka zabo ibisigazwa by’ibirayi n’ibitunguru.

Uwitwa Joel Munyanganizi utuye mu Murenge wa Bugeshi agira ati “Dufite ikibazo cy’ubwatsi duha amatungo, kubera kororera mu biraro. Tugerageza guha inka ibibabi by’ibirayi n’ibitunguru kuko nibyo hano duhinga, ariko iyo amata tuyajyanye ku makusanyirizo ntiyakirwa n’uruganda kubera impumuro yumvikanamo.”

Aba borozi batangaza ko amata yabo agurwa na rwiyemezamirimo ubahenda kuko nta yandi mahitamo bafite.

Yongeraho ati “ntiduhererwa ku giciro uruganda rutangiraho kuko ayancu agurwa n’abantu ku giti cyabo, ibi bijyana no kutwambura kuko umaze kugezamo umwenda munini aragenda hakaza undi, nyamara dufite amata meza agurwa n’uruganda ntitwahomba nk’uko bitubaho.”

Nyirabayazana wo guhomba abaturage bavuga ko ari ukubura ubwatsi bwagenewe guhabwa amatungo, bakagaragaza ko bafite ubwatsi umusaruro wabo waba mwiza ukajyanwa ku ruganda.

Rudasingwa Fidele umukozi w’ikigo gishinzwe iterambere ry’ubuhinzi n’ubworozi RAB mu Karere ka Rubavu ukurikirana ibikorwa by’umushinga RDDP II ufasha aborozi kongera inka zitanga umukamo no guteza imbere ibikorwaremezo by’ubworozi yabwiye Kigali Today ko iki kibazo kiboneka mu mirenge ikorerwamo ubuhinzi cyane, bigatuma abaturage bakoresha ubutaka bafite mu guhinga ntibasige ahaterwa ubwatsi bw’amatungo.

Agira ati “iki kibazo kiraboneka, ariko tubagira inama yo gutera ubwatsi ku miringoti no ku nkengero z’umurima kugira ngo bashobore kugaburira inka ubwatsi bwiza. Ikindi tubahugurira guteza imbere ubworozi kugira ngo bwunganire ubuhinzi kuko byose bitanga umusaruro.”

Rudasingwa avuga ko mu Karere ka Rubavu basanga abaturage aho bororera, bakabigisha kwita ku matungo. Ubu ngo imirenge yose yamaze kugezwamo imbuto y’ubwatsi bw’amatungo kugira ngo aborozi babubone hafi yabo, binyuze mu batubuzi b’ubwatsi.

Ubwatsi burimo urubingo ni imwe mu mbuto irimo kwegerezwa aborozi. Kuba ruterwa ku miringoti no ku ngengero z’imirima bigira uruhare rurenze kugaburira amatungo, kuko binafasha mu kurwanya isuri.

Umushinga RDDP II kuva wagera mu Karere ka Rubavu muri Nyakanga uyu mwaka, hamaze gutangwa ubwatsi buterwa kuri hegitare 15 zitezweho gufasha abarozi kongera umukamo.

Minisitiri Dr. Jimmy Gasore, Ambasaderi w’u Bwongereza n’uw’u Buholandi mu Rwanda batashye iki cyambu

Icyambu cya Nyamyumba gifite ubushobozi bwo kwakira toni ibihumbi 700 ku mwaka no kunyurwaho n’abantu bagera kuri miliyoni 2.7, kikaba cyakwakira ubwato bufite metero 60 bwikorera kontineri 30 icyarimwe.

Minisitiri w’Ibikorwa Remezo, Dr. Jimmy Gasore yatangaje ko iki cyambu kigiye kuba igeragezwa ry’ubwikorezi bwo mu mazi kuko harimo kubakwa icyambu cya Rusizi kigeze kuri 52% hakaba hazubakwa ibindi byambu mu Turere twa Karongi na Rutsiro.

Agira ati "Byagaragaye ko ingendo zo mu mazi zoroshya ubuhahirane ku giciro gito kandi zikabungabunga ibidukikije, mu Rwanda ikiyaga cya Kivu niho zitangirijwe kandi turizera ko zizatanga umusaruro."

Minisitiri Dr Jimmy Gasore yagaragaje ko iki cyambu kizagabanya ikiguzi cy’ubwikorezi

Minisitiri Dr. Jimmy Gasore yasabye abikorera gukoresha ingendo zo mu mazi kuko bigabanya umurongo w’imodoka zambukiranya imipaka, mu gihe ku cyambu hakoreshwa ubwato bwikorera ibicuruzwa byinshi.

Jacque Niyonshuti umwe mu bakoresha icyambu cya Nyamyumba avuga ko cyaboroheje akazi ndetse bigabanya imirongo y’ ibikamyo ku mupaka.

Agira ati "Turashimira Leta y’u Rwanda n’abafatanyabikorwa bubatse iki cyambu, birihutisha ingendo kandi bikagabanya umurongo w’amakamyo ku mupaka, iki cyambu gifite umwanya munini wakira ubwato bwikorera ibicuruzwa byinshi."

Iki cyambu cyuzuye gitwaye miliyoni 9,17 z’amadolari ya Amerika

Hitezwe ko ibicuruzwa biva ku cyambu cya Nyamyumba bizajya bigera ku kirwa cy’Ijwi byoroshye ndetse bikagera mu bice by’ icyaro bya Repubulika Iharanira Demokarasi ya Congo byari bisanzwe bigoye kuhageza ibicuruzwa bitewe n’imihanda igera muri Kivu y’Amajyaruguru na Kivu y’ Amajyepfo.

Inyigo yakozwe n’Ikigo TradeMark Afurika mu mwaka wa 2017, yagaragaje ko ingendo zo mu mazi zoroshya ubwikorezi ndetse bikagabanya igiciro cy’ubwikorezi kuri toni imwe kuko mu mwaka wa 2017 cyari $28.40 ariko muri 2024 kizagabanuka kikagera ku $12.17.

Ambasaderi w’u Bwongereza mu Rwanda, Alison Thorpe avuga ko u Rwanda rushimirwa umuhate mu koroshya ubucuruzi

Ambasaderi w’u Bwongereza mu Rwanda, Alison Thorpe avuga ko u Rwanda rushimirwa umuhate mu koroshya ubucuruzi, icyambu cyatashywe kikaba kizoroshya ikiguzi cy’ubwikorezi ndetse kigatanga akazi.

Icyambu cya Nyamyumba cyatangiye kubakwa kuva 2018 ariko kubera icyorezo cya COVID-19 cyuzuye muri 2023.

Ni icyambu cyuzuye gitwaye miliyoni 9,17 z’amadolari ya Amerika, harimo 50% yatanzwe na Guverinoma y’u Buholandi, 45% yatanzwe n’iy’u Bwongereza na 5% yatanzwe na Guverinoma y’u Rwanda

Iki cyambu kikaba gifite ububiko bw’ibicuruzwa bihanyuzwa, gucunga umutekano hakoreshejwe ikoranabuhanga, kuzimya inkongi hamwe no gutunganya amazi yanduye ahakoreshwa, kikaba cyarashyizweho station ya lisansi ifasha ibinyabiziga bihakorera ubwikorezi.

Ambasaderi w’u Buholandi mu Rwanda, Joan Wiegman

Umuyobozi w’Akarere ka Rubavu, Mulindwa Prosper

Mulindwa agira ati "Ishyirahamwe ry’Abanyarwanda bakeya bagiranye amasezerano n’Abanyecongo ko ibicuruzwa birimo inkoko, inyanya n’imbuto bigomba kujya muri Goma binyuze mu modoka, rikumira abambutsa bikeya binyura ku magare, ibasi no mu ntoki."

Mulindwa avuga ko ubucuruzi bwambukuranya umupaka bukorwa n’abantu benshi kandi bafite igishoro gito, kuba hakorwa ubucuruzi bwambukuranya umupaka bukoresha imodoka gusa bwateza akaga abantu benshi.

Agira ati "Nta bicuruzwa twahagaritse ahubwo twafunguye isoko kugira ngo ucuruza ku gatebo ajyane ibicuruzwa, ukoresha igare akore, ukoresha moto akore ndetse n’ukoresha imodoka abikore ariko hatabayeho gukumira bamwe ngo hakore abandi."

Abacuruzi baciriritse bari barakumiriwe kujyana ibicuruzwa muri RDC

ACT ikorera muri Congo, niyo ishyirwa mu majwi, mu gihe ubuyobozi bw’Akarere ka Rubavu buvuga ko umupaka muto uhuza Goma na Gisenyi ukoreshwa ku munsi n’abacuruzi ibihumbi 20, bityo kuba hakoreshwa imodoka gusa, byakumira abacuruzi baciriritse barenga ibihumbi 10 ku munsi.

Umuyobozi w’Akarere ka Rubavu wungirije ushinzwe iterambere ry’ubukungu, Deo Nzabonimpa avuga ko u Rwanda rwashyizeho politiki idaheza kandi batakwihanganira abaheza abandi mu bucuruzi.

Agira ati "Ubu bucuruzi bukorwamo cyane n’abafite ubumuga, none amagare yahagaritswe, ibi birabajyana mu buzima bubi, ibi biratuma abacuruzi bato batabona imibareho kubera inyungu z’abantu bakeya. Icyo dushaka, abacuruzi bose bakore badakomwe imbere."

Ubuyobozi bw’ Akarere ka Rubavu bushinja aya mashyirahamwe n’abacuruzi kuvana abantu benshi mu bucuruzi kandi ariyo mirimo bakora, kwangiza ibikorwa remezo kuko amasoko adakorerwamo bitewe n’uko izo modoka zisanzwe zizana ibicuruzwa zitabijyana mu isoko ngo bihabwe abacuruzi baciriritse ahubwo bihita bijyanwa muri Congo, hari no kwimisha akazi abafite ubumuga bari batunzwe n’ubwikorezi bw’ibicuruzwa bambukanaga umupaka.

Ubuyobozi b’Akarere ka Rubavu buvuga ko butakwihanganira abakumira abandi mu bucuruzi

Mulindwa Prosper avuga kohereza ibicuruzwa muri Congo hakoreshejwe imodoka, bibuza Abanyecongo kuza mu Rwanda ngo bihitiremo ibicuruzwa bashaka ahubwo bagasabwa kugura ibyo boherejwe kandi atari yo gahunda ya Leta.

Mulindwa avuga ko badafite ubushobozi bwo kujya gutanga amabwiriza mu kindi gihugu, ariko abayobozi bakuyeho imodoka zihaye uburenganzira bwo kujyana ibicuruzwa i Goma bigakumira abandi bacuruzi.

Mu Karere ka Rubavu hari amasoko ane akoreshwa mu bucuruzi bwambukiranya imipaka harimo isoko ryambukiranya umupaka wa petite barrière rikoreshwa mu gucuruza imbuto, isoko rya Mbugangari, Rukoko na Rugerero ahurizwamo ibicuruzwa bijyanwa muri Congo ariko kubera izi modoka zisanzwe ziyazanamo ibicuruzwa ubu zihita zibijyana muri Congo byahombeje abacuruzi baciriritse.

Indwara y’umusonga iravurwa igakira iyo yihutishijwe kwa muganga

Tariki ya 12 Ukuboza ni umunsi wahariwe kurwanya indwara y’umusonga, indwara iza mu zihitana ubuzima bw’abantu benshi kuko muri 2021 yahitanye miliyoni 2.2 harimo miliyoni 1.11 z’abantu barengeje imyaka 70, abantu bafite imyaka iri hagati ya 50 na 60 bagera ku bihumbi 366, naho abantu bafite hagati y’imyaka 15 kugera 49 hapfuye 160 hamwe n’abana ibihumbi 502 batarageza ku myaka itanu.

Dr Emmanuel Sibomana umuganga ukuriye ishami rirwanya uburwayi bw’ibibembe n’izindi ndwara zandurira mu myanya y’ubuhumekero mu gice gishinzwe kurwanya igituntu mu kigo cy’ubuzima RBC, asobanura ko indwara y’umusonga ari uburwayi bufata imyanya y’ubuhumekero ariko yo hasi kuko hari n’imyanya y’ ubuhumekero yo hejuru.

Akomeza avuga ko imyanya y’ubuhumekero yo hasi ari imyanya iri mu gihaha ahabera guhererekanya umwuka mwiza wa Oxygen uzwi nka O2 n’umwuka wanduye CO2.

Utwo duce two hasi iyo twafashwe na virusi cyangwa ibizwi nka bagiteri bishobora gutera umusonga, imwe mu ndwara ihitana abantu benshi cyane cyane abana batarageza ku myaka itanu hamwe n’abageze mu zabukuru.

Ubusanzwe abantu bose bashobora kurwara umusonga bitewe n’uko utwo dukoko tuwutera dusanzwe mu mwuka abantu bahumeka ariko ugira ingaruka cyane cyane ku bana baba badafite abasirikare bahagije barinda umubiri naho abantu bageze mu zabukuru bo bigaterwa no kugabanuka kw’abasirikare b’umubiri.

Udukoko dutera umusonga dukunze kugenda mu ivumbi n’umuyaga kandi iyo tugeze mu gihaha turoroka tukaba twakwangiza utwumba tujyamo umwuka umuntu ahumeka.

Ni udukoko tworoherwa kororoka mu gihe tugeze mu bihaha bikaba impamvu abantu bagirwa inama yo kugira isuku yo gukaraba no kwirinda kwandura ibicurane.

Bumwe mu buryo bukoreshwa mu kwirinda umusonga harimo gukingira abana batoya inkingo nka Pneumocoque mu kubarinda umusonga, konsa abana cyane mu kongera ubwirinzi no kugabura indyo yuzuye ku bana.

Ni mu gihe abantu bakuru basabwa kwirinda gutekera mu nzu, kugira isuku hirindwa gukoranaho, ubwirinzi bwo gupfuka umunwa ku bantu bakuru birinda ko banduzwa ibicurane, kwivuza byihuse ku bantu bafite ibicurane n’indwara zo mu buhumekero bwo hejuru kuko iyo zitavuwe bishobora kwanduza ubuhumekero bwo hasi.

Mu gihe hazaba hizihizwa umunsi wahariwe kurwanya umusonga, insanganyamatsiko ya 2024 igira iti ‘Guhumeka ni ingenzi, twirinde umusonga hakiri kare’.

Imibare yo mu nzego z’ubuzima mu Rwanda igaragaza ko mu mwaka wa 2000 no mu yindi myaka yakurikiyeho, impfu z’abana zari hejuru cyane, imwe mu mpamvu yateraga impfu nyinshi harimo umusonga ku bana batarageza ku myaka itanu, malaria n’impiswi.

Kugabanya impfu mu bana hashyizweho kuvura izo ndwara mu buryo bukomatanyije binyuze mu bajyanama b’ubuzima muri 2007 kandi byatanze umusaruro ku buryo bugaragara.

Indwara y’umusonga iza ku isonga mu ndwara ziboneka mu Rwanda kuko muri 2020 yageze ku bantu 543,595 banganaga na 26.3%, naho muri 2021 abantu bayirwaye bari 318,020 banganaga na 11.8% mu gihe 2022 yarwawe n’abantu 372,906 banganaga 16.4%, muri icyo gihe kandi idwara zo mu buhumekero bufatiyeho bwishe abantu 4% mu Rwanda.

Ku Isi umusonga niyo ndwara ihitana abana benshi batarageza ku myaka 5, naho uburyo bwo kuvura umusonga mu Rwanda hafashwe ingamba 2007 mu kuvura indwara zikomatanyije zirimo umuriro, Malaria n’umusonga bikozwe n’abajyanama b’ubuzima.

U Rwanda muri 2009 ni cyo gihugu cyabaye icya mbere munsi y’ubutayu bwa Sahara mu gukingira umusonga hakoreshejwe urukingo rwa Pneumocoque.

Rwaje rwiyongera ku zindi nkingo nka hémophiles, Influenza, zifasha kurinda abana umusonga, ubuyobozi bwa RBC bukaba busaba abantu kwivuza byihuse indwara z’ubuhumekero mu kwirinda ko zatera indwara y’umusonga.

Nubwo indwara y’umusonga ibarwa mu ndwara zihitana benshi bigaragara ko igenda igabanya ubukana kubera inkingo kuko 1980 yahitanye abantu miliyoni 3.42 harimo abana barenga miliyoni 2.5.

Min Dr Bizimana aganira n’urubyiruko ku mateka yaranze u Rwanda

Dr Bizimana avuga ko igihugu cyubakira ku kuri no ku muco kuko byunganira amateka n’indangagaciro zubaka umuntu, agasaba urubyiruko gushyira imbere indangagaciro ya Ndi umunyarwanda baharanira guteza imbere igihugu cyabo.

Agira ati “Mufite amahirwe ko mufite ubuyobozi bwiza, burwanya ivangura nk’iryaranze iki gihugu mu myaka yashize, Igihugu kibeshwaho n’abantu bacyo, nta gihugu kibeshwaho n’abanyamahanga. Muharanire kwigira, mwige mube abahanga, tureke kujya kugura ibyo tugura mu mahanga ahubwo tubyikorere, mureke ibivangira harimo ingengabitecyerezo ya jenoside n’ibindi bibatandukanya, ahubwo muhurize hamwe mwubake ibintu bikomeye, n’ayo mahanga tujya guhahiramo bubatse inganda kubera bashyize hamwe, natwe dushyire hamwe tuzatera imbere.”

Ubushakashatsi bugaragaza ko Igipimo cy’ubumwe n’ubwiyunge mu Banyarwanda cyagiye kizamuka, aho muri 2010 cyari kuri 82.3%, muri 2015 kigera kuri 92.5%, muri 2020 kigera kuri 94.7%.

Minisitiri Bizimana yibukije amahirwe urubyiruko rw’uyu munsi rufite, nyuma y’imyaka 30 Jenoside yakorewe Abatutsi ihagaritswe na FPR-Inkotanyi. muri ayomahirwe harimo ayo kwiga nta vangura no kugira uburenganzira bungana ku Banyarwanda bose, abasaba kuyasigasira no kuyashingiraho bagira uruhare mu Cyerekezo 2050.

Yasoje abasaba kwimakaza indangagaciro y’ubudaheranwa, agaragaza ko Abanyarwanda bagiye bahura n’ibibazo bitandukanye mu mateka yabo ariko ko nta na rimwe byabaheranye, ahubwo iteka bishatsemo ibisubizo bagasubiza ibibazo bibugarije.

Yabibukije ko intego yabo ikwiye kuba kurinda ibyagezweho no kubirinda hakoreshejwe uburyo bwose harimo n’imbuga nkoranyambaga, barwanya abapfobya n’abahakana Jenoside yakorewe Abatutsi n’abakwiza ivangura n’amacakubiri aho biva bikagera.

Muzungu Gerald yagizwe Meya w’Akarere ka Karongi w’agateganyo

Meya Muzungu azungirizwa na Maurice Nsabibaruta nk’umuyobozi w’Akarere wungirije ushinzwe iterambere ry’ubukungu, mu gihe uwari asanzwe ashinzwe imibere myiza y’abaturage yagumye mu nshingano.

Muzungu ahawe kuyohora Akarere ka Karongi, nyuma yo gusoza manda yo kuyohora Akarere ka Kirehe, n’aho Maurice Nsabibaruta yari asanzwe ari umukozi muri Minisiteri y’ubutegetsi bw’Igihugu, aho yari Umuyobozi Mukuru muri LODA ushinzwe iterambere n’imishinga.

Maurice Nsabibaruta niwe ugiye kuba ashinzwe iterambere ry’ubukungu mu Karere ka Karongi

Muzungu Gerald agiye kuyohora Akarere ka Karongi nyuma yo kwegura kwa Mukase Valentine wari umuyobozi w’Akarere ka Karongi hamwe n’uwari amwungirije ushinzwe iterambere ry’ubukungu, Niragire Théophile.

Ni impinduka zabaye tariki ya 15 Ugushyingo 2024, aho zasize abo bombi beguye ku nshingano zabo ndetse na Dusingize Donatha, wari Perezida w’Inama Njyanama w’Akarere ka Karongi, hakanirukanwa abakozi barenga 14 barimo abayobozi b’amashami.

Kuri uyu wa Gatandatu tariki ya 16 Ugushyingo 2024, nibwo Mukase Valentine na Muzungu Gerald bahererekanyije ububasha.

Muzungu Gerald na Mukase Valentine, bahise bahererekanya ububasha

Meya wa Karongi, Visi Meya ushinzwe ubukungu na Perezida wa Njyanama beguye

Beguye bitunguranye kuri uyu wa Gatanu tariki 15 Ugushyingo 2024, nyuma y’ibibazo by’imiyoborere bimaze iminsi iri muri aka Karere, ndetse hari n’abakozi b’Umurenge wa Murundi na bo basezeye ku mirimo yabo.

Mu ihuriro ry’ubumwe n’ubudaheranwa ku rwego rw’Akarere ka Karongi riheruka, hagaragajwe ikibazo cy’ihohoterwa rikorerwa abarokotse Jenoside yakorewe Abatutsi mu Murenge wa Murundi.

Mukase Valentine, wari umuyobozi w’akarere ka Karongi yeguye ku mirimo ye

Perezida w’Inama Njyanama y’Akarere ka Karongi, Dusingize Donatha yabwiye Kigali Today ko ntacyo yatangaza, asaba ko havugishwa Visi Perezida w’Inama Njyanama, Ngarambe Vedaste nawe wirinze kugira icyo atangaza avuga ko atwaye imodoka.

Hamaze iminsi hari isesengura mu mikorere y’ubuyobozi mu Turere mu Ntara y’Ibirurengerazuba, ibi bikaba ari umusaruro waryo.

Tumwe mu Turere twagenzuwe n’inzego z’umutekano zivuye i Kigali, ahandi hashyirwaho amatsinda agenzura imikorere y’abayobozi n’abakozi mu Turere harebwa ubushobozi bwabo.

Niragire Theophile, yari umuyobozi w’Akarere wungirije ushinzwe iterambere ry’ubukungu

Mu mpera z’Ukwakira 2023, nabwo Inama Njyanama y’Akarere ka Karongi yateranye mu nama idasanzwe maze yeguza uwari Umuyobozi w’ako Karere, Mukarutesi Vestine azira kugirwa inama ntazubahirize.

Dusingize Donatha wari Perezida w’Inama Njyanama nawe yeguye

Uretse abarobyi, hari n’abatunzwe no gucuruza ibituruka mu kiyaga cya Kivu

Akarere ka Rubavu gasurwa cyane kubera ubukerarugendo bukorwa ku nkengero z’amazi y’ikiyaga cya Kivu haba mu mujyi wa Gisenyi no mu Murenge wa Nyamyumba.

Benshi mu basura amazi y’ikiyaga cya Kivu, bishimira serivisi bahabwa zirimo gutembera mu bwato mu kiyaga cya Kivu, koga mu mazi, kurya amafi n’isambaza, izo serivisi zigatunga n’imiryango y’abazikoramo.

Ikiyaga cya Kivu gitunze ubuzima bwa benshi baba Abanyarwanda ndetse n’abanyamahanga, haba kuri serivisi bahatanga mu bukerarugendo, koga, abahasura kimwe n’abakoreramo ubworozi n’uburobyi.

Abakora uburobyi bishimira inyungu bakuramo

Aisha Bazubagira ni umubyeyi w’imyaka 60 kandi amaze imyaka irenga 30 akora uburobyi mu Kiyaga cya Kivu. Avuga ko adashoora kumenya umubare w’abo ikiyaga cya Kivu kigaburira kubera akazi gitanga. Icyakora avuga ko uburobyi agikoreramo ari bwo bumutunze.

Agira ati “Nakoze ubukwe mu 1982, nasanze umuryango w’umugabo wanjye bakora uburobyi na bwo mbwinjiramo, kandi ndengeje imyaka 60 nkiburimo. Nubwo ubu kubera ubushimusi no gukoresha imitego itemewe byagabanyije umusaruro, ariko gukora uburobyi byari akazi gatunze benshi.”

Benshi batunzwe n’uburobyi mu kiyaga cya Kivu

Bazubagira asanzwe afite imitego yitwa Icyerekezo ikoreshwa mu kuroba isambaza zikuze. Avuga ko uburobyi bushobora gutunga benshi kurusha abo butunga ubu mu gihe habaye igenzura no guca imitego iroba abana b’isambaza n’amafi kuko byangiza umusaruro.

Agira ati “Uribaza abana b’isambaza barobwa n’inzitiramubu baramutse bakuze batanga umusaruro mwinshi, ariko iyo mitego iraboneka kandi tugaragaza ko yangiza uburobyi. Turasaba inzego zibishinzwe guca ubushimusi n’ubujura bw’imitego mu burobyi."

Issa Gahimano, umurobyi mu kiyaga cya Kivu, avuga ko uretse uburobyi no gutwara ubwato mu kiyaga cya Kivu, iki kiyaga ari uruganda rutanga akazi. Agira ati “Nk’ubu twamaze kuroba kandi isambaza zamaze gukwira Igihugu cyose. Uretse njye warobye, reba abazitwaye, abazicuruza, urumva ko zitanga akazi gatunze benshi.”

Jean Claude Nizeyimana, umucuruzi w’isambaza mu Karere ka Rubavu, avuga ko isambaza zitunze abantu benshi cyane cyane abakora mu bucuruzi.

Agira ati “Nkatwe turangura n’abarobyi ariko hari abagore benshi baza bakazicuruza, hari abazizengurutsa mu ngo, abazikawusha bakazohereza i Kigali n’ahandi, mbese ugiye kureba abo ikiyaga cya Kivu gitunze ntawashobora kubabara."

Bamwe mu bakora uburobyi bavuga ko uretse kuba ari akazi kabatunze, ngo gafite icyo kabagejejeho. Gahimano utuye mu Murenge wa Rugerero avuga ko uretse kubaka inzu, yashoboye no gufasha abo baturanye gukora umuhanda mu Kagari ka Gisa, mu gihe Bazubagira we avuga ko yashoboye kubaka inzu mu mujyi wa Gisenyi abikuye mu burobyi.

Uretse abantu ku giti cyabo, hari abasore barenga 30 batwara ubwato mu mujyi wa Gisenyi kandi bakuramo imibereho. Bamwe mu bavuganye na Kigali Today bavuga ko ibikorwa byo gutembereza abantu mu mazi y’ikiyaga cya Kivu bitunze imiryango yabo.

Ubwato butwara ba mukerarugendo mu mazi y’ikiyaga cya Kivu

Hussein ni umwe muri bo. Agira ati “iyo dutwaye abantu tubatembereza mu mazi batwishyura amafaranga atandukanye ariko ashobora gutunga imiryango yacu, hari igihe umuntu ashobora gucyura nibura ibihumbi 50 cyangwa akabirenza kandi si makeya wakuyemo lisansi wakoresheje.”

Bimwe mu byo avuga ko bibangamira iterambere ryabo harimo ifungwa ry’imipaka rituma abasura umujyi wa Gisenyi bagabanuka hamwe n’ibyorezo nka Covid-19 n’ibindi byorezo bituma ingendo zihagarara.

Ikiyaga cya Kivu cyafashije u Rwanda kubona ingufu z’amashanyarazi

Ikiyaga cya Kivu ku ruhande rw’u Rwanda kibarirwamo ibishanga birindwi bishobora gucukurwamo gazi methane ibyazwa amashanyarazi.

Cyakora ibigo nka Kivu watt na Shema Power nibyo byatangiye kubyaza amashanyarazi gaz methane icukurwa mu kiyaga cya Kivu.

U Rwanda rukoresha Megawatt 50 zitunganywa na Shema power naho Kivu watt itunganya Megawatt 26 mu gihe ubu buyobozi bw’iki kigo bwari bwaragaragaje ko bushaka gutanga Mw 100.

Kuba ibi bigo bishobora gutanga nibura ingufu zingana na Mw 76 bifasha abanyarwanda bakenera ingufu guhanga imirimo ndetse bagashobora kwibeshaho no kubeshaho imiryango yabo.

Ikigo nka Gazmeth ubu kirimo kubaka ibikorwa byacyo kugira ngo gishobore gutanga gazi ikoreshwa mu guteka, uretse abakozi bazakora muri iki kigo, hari abazacuruza gazi n’abazayikoresha nabyo ibintu bizasiga abantu ibihumbi babonye imirimo.

Bimwe mu bikorwa remezo byubatswe ku Kivu bifasha mu kubyaza ikiyaga ingufu z’amashanyarazi

Ikiyaga cya Kivu gifite umutungu kamenere ufasha u Rwanda n’abanyarwanda mu iterambere ryabo, cyakora uko iminsi yiyongera niko umumaro wacyo urushaho kwiyongera haba ku bubaka amahoteli babona ababagana nabo bagatanga akazi ku babakorera ndetse bagatanga amasoko kubo bahahira, ariko harimo no gutezwa imbere ingendo zo mu mazi kuko harimo kubaka ibyambu ku nknegero z’ikiyaga cya Kivu, uretse icyambu cya Rubavu cyuzuye hakaba hateganywa kubakwa ikindi mu karere ka Rusizi na Rutsiro.

RDF yatangaje ko yababajwe n’umusirikare warashe abaturage mu kabari mu Karere ka Nyamasheke mu Murenge wa Karambi mu Kagari ka Rusharara, abantu batanu bakahasiga ubuzima.

Byabaye mu masaha y’urukerera tariki 13 Ugushyingo 2024, aho Sergeant Minani Gervais w’imyaka 39 yarashe abantu batanu bagapfa.

Abaturage bo mu kagari ka Rusharara bavuga ko byabereye mu isantere y’ubucuruzi ya Rubyiruko iherereye mu Mudugudu wa Kageyo, mu ma saa saba z’ijoro.

Imwe mu mpamvu yatumye Sgt Minani arasa abaturage ngo byatewe n’umujinya yagize nyuma yo guterana amagambo na nyiri akabari wamuhaye inzoga yamwishyuza undi ntiyishyure, bituma nyiri akabari agira ati «genda uzagwe mu ishyamba uzerera.»

Abaturage bavuga ko Sgt Minani, yagize umujinya agasohoka akagaruka arasa abari mu kabari ariko uwo bateranye amagambo anyura mu idirishya ashobora gukiza ubuzima bwe.

Ubuyobozi bw’ ingabo z’u Rwanda bwatangaje ko bwamaze guhagarika Sgt Minani kugira ngo azagezwe imbere y’ubutabera, Ubuyobozi bw’ ingabo z’u Rwanda bukaba bwihanganishije imiryango n’inshuti babuze ababo.

Umuti witwa EFFERARGAN VITAMIC C 500mg wakuwe ku isoko kubera ingaruka ugira ku wawufashe

Ubuyobozi bwa FDA butangaza ko imiti yose yinjira mu gihugu, ibanza kugenzurwa ndetse hakarebwa ubushobozi ifite n’indwara izavura.

Ibi kandi bijyana n’amakuru atangwa kuri iyo miti iyo igezwa ku isoko haba ku byiza byayo n’ingaruka itera, gusa hari igihe imiti itera ingaruka ku buzima bw’uwayikoresheje nyamara bitari byatangajwe, ibi bigatuma Ikigo cy’Igihugu gishinzwe kugenzura ubuziranenge bw’Imiti n’Ibiribwa mu Rwanda gihora gisaba abantu gutanga amakuru ku ngaruka bagizweho n’imiti n’inkingo.

Kigali Today iganira na Dr Ntirenganya Lazaro, umuyobozi ushinzwe gukurikirana ingaruka z’imiti no gukora ubushakashatsi ku miti mu kigo cya Rwanda FDA, yagarutse ku mpamvu yo gushishikariza abantu gutanga amakuru ku ngaruka baba bagizweho n’imiti kuko bifasha iki kigo kugenzura iyo miti.

Agira ati "Nyuma yo gufata imiti habaho ingaruka, gusa haba hari izizwi n’izitazwi, dusaba kugezwaho amakuru kugira ngo tugenzure izo ngaruka niba zakwihanganirwa cyangwa zatuma imiti ikurwa ku isoko."

Broncalène yakuwe ku isoko kubera ibibazo ushobora guteza ku bantu baterwa ikinya bagiye kubagwa

Akomeza agira ati "Buri muti uba ufite amakuru awuherekeje bijyanye no kugaragaza uko umuti ukoreshwa, ingaruka ugira hamwe no gutanga inama mu gihe uguteye ikibazo, urugero nka Promethazine bakubwira ko nuyikoresha urumva wacitse intege, gusinzira, bakakugira inama yo kwirinda gutwara imodoka yanyoye uwo muti."

Gutanga amakuru bifasha kuyakurikirana no kuyasesengura kugira ngo hamenyekane niba hari ingaruka nshyashya zitari zaramenyekanye mu gihe cy’ubushakashatsi.

Agira ati "Natwe iyo tubonye amakuru tugenzura ko ariyo ndetse tuyasangiza ishami ry’umuryango w’abibumbye ryita ku buzima, iyo ingaruka idasanzwe bikagaragara ko iremereye, hagafatwa umwanzuro wo gukura umuti ku isoko mu gihe hari indi ishobora gukoreshwa kandi itagira ingaruka ku buzima bw’ abantu."

Dr. Ntirenganya akomeza avuga ko hari imiti yagiye ikurwa ku isoko bitewe n’ingaruka ugira mu gihe cy’ikoreshwa. Atanga urugero rw’umuti uvura inkorora wa Broncalène wakuwe ku isoko mu Rwanda muri Nzeri 2022.

Tetracycline Hydrochloride Ophthalmic Ointment USP wakuwe ku isoko ry’u Rwanda

Agira ati "Mu byukuri si uko uriya muti utavura, ahubwo byatewe n’ingaruka ugira ku buzima bw’abantu zitari zaramenyekanye mbere, zishobora kuba ku muntu wawufashe agiye guterwa ikinya kuko byamugiragaho ingaruka."

Dr. Ntirenganya akomeza asobanura ko umuti wa Broncalène utakoranaga n’imiti y’ikinya ikoreshwa iyo umuntu agiye kubagwa.

Ati "Byaje kugaragara ko umuntu ufashe Broncalène, hanyuma mu byumweru bibiri akaza gukenera kubagwa agahabwa imiti ikoreshwa mu gutera ikinya, bigira ingaruka zitwa anaphylaxis, ni ingaruka ziremereye zishobora kuba ku muntu ukabona ko agize ikibazo mu buhumekero, umuvuduko w’amaraso ukazamuka, agakenera gufashwa ako kanya. Ni ingaruka yabagaho gake ariko kubera icyo kibazo byatumye uhagarikwa."

Gutanga amakuru ku ngaruka umurwayi agira ku miti n’inkingo ni ingenzi

Gutanga amakuru bifasha kumenya ingaruka nshya zitari zakabonetse mu bushakashatsi, bigatuma hari imiti ikurwa ku isoko aho gukomeza kugira ingaruka ku buzima bw’abantu. Ku rwego mpuzamahanga hari imiti yahagaritswe igera 460.

Umuti wa Ketoconazole wakuwe ku isoko bitewe n’ingaruka ugira ku buzima bw’abawufata

Umuti witwa Ketoconazole, mu Ukuboza 2022 wahagaritswe mu Rwanda, ni ibinini bivura indwara z’ibihumyo ku ruhu aho byaje kugaragara ko ugira ingaruka zo kwangiza umwijima kubawukoresha, ni umuti udakoreshwa cyane ariko kubera ko hari indi miti ikora nka wo byabaye ngombwa ko ukurwa ku isoko kubera ibyiza byawo birutwa n’ingaruka uteza.

Dr. Ntirenganya asaba abantu bose kwirinda gukoresha imiti batandikiwe na muganga kuko awemerera umurwayi agendeye ku burwayi bwe. Asaba abantu kwizera ko imiti ikoreshwa mu Rwanda ijyanwa mu isuzumiro kandi hakarebwa ko yujuje ubuziranenge.

Uyu Muyobozi akomeza avuga ko umurwayi ugizweho ingaruka n’umuti, agomba kubimenyesha umuganga kuko nabo batanga amakuru ku kigo cya Rwanda FDA, cyangwa umurwayi akaba yakwitangira amakuru kuri iki kigo.

Ku mupaka hagaragaye abantu benshi n’imodoka zabuze uko zambuka

Umupaka usanzwe unyurwaho n’abantu barenga ibihumbi bitanu ku munsi wahagaritse ibikorwa kubera inama yahuje u Rwanda, DRC na Angola, yiga ku kugarura umutekano mu Burasirazuba bwa DR Congo.

Ni inama ikurikiye izindi zabanje ziga uburyo hakemurwa ikibazo cy’ umutekano mucye mu Burasirazuba bwa Congo aho Repubulika Iharanira Demokarasi ya Congo ishinja u Rwanda kohereza Ingabo mu Burasirazuba gufasha umutwe wa M23 naho u Rwanda rukabihakana rushinja Repubulika Iharanira Demokarasi ya Congo gukorana n’umutwe wa FDLR uhungabanya umutekano w’u Rwanda.

Hitezwe ko ibi biganiro bibonera igisubizo umutekano mucye umaze igihe warabuze mu Burasirazuba bwa Congo, aho impuguke z’u Rwanda na DRC zumvikanye ku kurandura umutwe wa FDLR.

Minisitiri Nduhungirehe ari mu bitabiriye inama

FDLR imaze imyaka irenga 20 ihangayikishije umutekano w’u Rwanda, kuko ubufatanye bw’ ibihugu byombi byagiye byishyira imbaraga mu kurandura FDLR ariko ntibigerweho.

Mu mwaka wa 2009 hashyizweho ubufatanye bw’ ingabo hagati y’ u Rwanda na DRC bwiswe Omoja Wetu ariko bwaje guhagarara muri 2012 budashoboye kurandura FDLR.

Inama yabereye mu nyubako y’ umupaka wa DRC yitabiriwe n’intumwa z’ibihugu bitatu ariko hakiyongeraho impuguke mu birebana n’umutekano mu Karere harimo; MONUSCO, SADC n’imiryango ikurikiranira hafi umutekano wo mu Karere.

Ku ruhande rwa Repubulika Iharanira Demokarasi ya Congo, Lt Gen Fall Sikabwe ukuriye ibikorwa bya gisirikare muri Kivu y’ Amajyaruguru yitabiriye iyi nama, Madame Bintou Keita ukuriye MONUSCO na we yitabiriye iyi nama hamwe n’izindi mpuguke, aho bifuza igisubizo kirambye ku mutekano w’Uburasirazuba bwa Congo.

Muri iyi nama u Rwanda na Congo bashyizeho itsinda rigenzura agahenge k’amahoro

Itsinda ryashyizweho rigizwe n’abasirikare 18 bo mu gihugu cya Angola, batatu bo mu Rwanda, na batatu bo muri Repubulika Iharanira Demokarasi ya Congo.

Ni itsinda rigiye kugenzura agahenge k’amahoro nk’uko byemejwe mu biganiro byahuje u Rwanda na DRC byabereye i Luanda muri Angola mu nama yabaye tariki 04 Kanama 2024.

Minisitiri w’Ububanyi n’Amahanga w’u Rwanda, Amb. Olivier Ndihungirehe, yabwiye Kigali Today ko itsinda ryashyizweho rizagenzura ko agahenge kemejwe tariki ya 4 Kanama kubahirizwa mu Burasirazuba bwa Congo.

Yagize ati "Ibi si ibiganiro, kwari ugushyiraho urwego rugenzura agahenge kemejwe tariki 04 Kanama 2024, turizera ko uru rwego rugizwe n’ abasirikare 18 b’Angola, batatu b’u Rwanda na batatu ba DRC bazagenzura uko aka gahenge kubahirizwa."

Minisitiri Ambasaderi Nduhungirehe yavuze ko yizeye ko agahenge kazubahirizwa, kabone n’ubwo hari imirwano hagati ya M23 n’ingabo za Leta ya DRC.

Akomeza avuga ko aka gahenge nikajyaho umutwe wa FDLR ugahashywa, u Rwanda ruzakuraho ubwirinzi rwashyizeho.

Agahenge kagiye kujyaho mu gihe inyeshyamba za M23 zimaze kwigarurira 1/5 cy’Intara ya Kivu y’Amajyaruguru harimo Teritwari ya Masisi, Rutshuru agace gato ka Lubero na Walikale.

Ku mupaka hari abantu benshi n’imodoka zabuze uko zambuka

Ni umupaka usanzwe ufungurwa saa kumi n’ebyiri za mu gitondo, imodoka nyinshi zijyana ibicuruzwa n’ umucanga zikawujyana mu mujyi wa Goma.

Icyakora kuva mu gitondo nta modoka yambukaga ndetse n’ abagenzi bose bababujijwe kwambuka.

Umurongo w’imodoka zitwaye imizigo irimo lisansi, umucanga n’ibicuruzwa zitonze umurongo ku mupaka munini.

Abantu benshi basanzwe bakorera mu mujyi wa Goma batonze umurongo kandi ntibafite igisubizo niba umupaka ufungurwa.

Icyakora bamwe mu bakorera mu mujyi wa Goma barimo kunyura ku mupaka muto uhuza Goma na Gisenyi uzwi nka Petite barrière.

Abaturage bagerageje kwambuka yaba Abanyekongo cyangwa Abanyarwanda, abayobozi bo ku ruhande rwa Repubulika Iharanira Demokarasi ya Congo babasabye gusubira inyuma, bavuga ko bagiye mu nama,

Nubwo hataramenyakana impamvu yatumye umupaka ufungwa, harakekwa uburakari bwatewe no gutsindwa no gupfusha abasirikare benshi kwa FARDC ku rugamba ihanganyemo na M23 muri teritwari ya Masisi, Lubero na Walikale.

Bamwe bagerageje kwambuka umupaka basubijwe inyuma bavuga ko batakwemeza impamvu yatumye umupaka ufungwa kuko imikoranire y’umupaka muto imeze neza, hagacyekwa indi mpamvu itaramenyakana yatumye bamenyesha ko abashaka kujya muri Goma banyura kuri Petite Barrière aho gukoresha umupaka munini.

Icyakora bije bitunguranye mu gihe u Rwanda na DRC bamaze iminsi mu biganiro mu kugarura umwuka mwiza, ndetse hakaba harabaye kumvikana mu guhashya Umutwe wa FDLR uhungabanya umutekano w’u Rwanda na DRC.

Andi makuru ava i Goma aravuga ko ifungwa ry’umupaka rishobora kuba ryatewe n’ inama ya SADC yabereye hafi aho.

Raporo y’Umuryango w’Abaganga batagira umupaka (MSF) igaragaza ko ibikorwa byo guhohotera abagore n’abakobwa bigenda byiyongera

Ishami ry’umuryango w’abaganga batagira umupaka rikorera mu Burasirazuba bwa Repubulika Iharanira Demokarasi ya Congo rigaragaza ko mu mwaka wa 2023 bakiriye abagore n’abakobwa bafashwe ku ngufu bagera mu bihumbi 25, ukaba ari umubare wazamutse bitewe n’uko muri 2020 na 2021 bari bakiriye abagore n’abakobwa bagaragaza gufatwa ku ngufu bagera ku bihumbi 10.

Ni imibare y’abagore n’abakobwa bafatwa ku ngufu mu Ntara ya Kivu y’Amajyaruguru, Kivu y’Amajyepfo, Ituri, Maniema hamwe n’Intara ya Kasai yo hagati nk’uko biri muri raporo yashyizwe hanze tariki 30 Nzeri 2024.

William Hennequin, umuyobozi ushinzwe ibikorwa mu muryango w’abaganga batagira umupaka (MSF) atangaza ko umubare w’abagore n’abakobwa bafatwa ku ngufu bawumenya bashingiye ku babagana.

Agira ati « Ibi byose biterwa n’intambara zidashira mu Burasirazuba bwa Congo, ahaboneka imitwe myinshi yitwaza intwaro ikoresha umutungo kamere uhaboneka.»

Akomeza agira ati « Aba bagore n’abakobwa batugeraho bafashwe ku ngufu bagiye mu mirima guhinga bagahura n’abo barwanyi bitwaza intwaro. Ariko ntitwakwirengagiza nanone impunzi ziri mu nkambi zahunze intambara mu nkengero z’umujyi wa Goma.»

Avuga ko uretse abagore n’abakobwa bafatwa ku ngufu bagiye mu mirima, hari abafatwa bagiye gushaka ibicanwa mu mashyamba, abari mu nkambi bajya gushaka ibyo kubatunga no gushaka imirimo ibabeshaho.

Umubare w’abagore bafatwa ku ngufu muri DRC warazamutse

William Hennequin avuga ko nubwo umubare b’abagore n’abakobwa bafatwa ku ngufu ari munini, ngo benshi ntibashobora no guhabwa ubutabera bitewe n’aho bari.

Ishami ry’Umuryango w’Abibumbye ryita ku bana, UNICEF, ritangaza ko abagore n’abakobwa bagera kuri miliyoni 370 bahohoterwa mu bwana bwabo.

Raporo yatangajwe tariki 10 Ukwakira 2024 igaragaza ko umukobwa umwe mu bakobwa umunani aba agerwaho n’ibikorwa byo gufatwa ku ngufu atararenza imyaka 18. Icyakora iyi raporo ivuga ko umukobwa umwe muri batanu abwirwa amagambo yerekeye ibikorwa by’ihohotera atarageza ku myaka 18.

Ikirunga cya Nyamulagira cyongeye kuruka

Abaturage batuye mu bice bya Rutshuru na Masisi mu Ntara ya Kivu y’Amajyaruguru baravuga ko batangiye kubona umuriro mwinshi kuva tariki ya 12 Ukwakira 2024.

Nubwo abakozi b’ikigo gishinzwe igenzura ry’ibirunga bamaze igihe mu bikorwa by’imyigaragambyo kubera kudahembwa, Prof Charles Balagizi, umuyobozi wa OVG yatangarije ibinyamakuru byo muri Repubulika Iharanira Demokarasi ya Congo ko iruka rya Nyamulagira ririmo kuba kandi hari igikoma cyaka umuriro kirimo kumanuka mu kirunga kirimo gutemba cyerekeza mu Majyaruguru y’Iburengerazuba bw’ikirunga hamwe no mu mu Burengerazuba bw’Amajyepfo .

Avuga ko amafoto y’icyogajuguru agaragaza ko inzira eshatu zirimo kunyuramo igikoma gisohoka mu birunga kigatemba kimaze kugenda ibirometero birindwi.

Agira ati “Kuva tariki ya 13 Ukwakira 2024 ahagana mu ma saa kumi z’umugoroba, kuri Nyamulagira hagaragaye urumuri rwinshi hejuru y’ikirunga riterwa n’iruka ry’ikirunga.”

Ikirunga cya Nyamulagira giheruka kuruka mu kwezi kwa Werurwe 2023 nubwo iruka ryacyo ritagira ingaruka ku baturage kubera kuruka mu ishyamba ry’ibirunga. Icyakora cyegeranye n’ikirunga cya Nyiragongo giheruka kuruka muri Gicurasi 2021 gihitana abantu 32 ndetse gisenya amazu mu nzira zanyuzemo igikoma cy’amazuku.

Gitifu Uwimana Vedaste aherutse kugaragara mu mashusho asenya zimwe mu nyubako bivugwa ko zubatswe hadakurikijwe ibisabwa

Uyu muyobozi yari aherutse kugaragara asenyera abaturage bubatse mu kajagari, ndetse mu mashusho yagiye hanze, amugaragaza abaturage bashaka kumugirira nabi kubera umujinya bari bafite, bamwe bakavuga ko bari bubatse hari amafaranga bahaye abayobozi.

Nubwo mu ibaruwa Uwimana yanditse avuga ko asezeye ashaka kujya kwiga ndetse akemerera itangazamakuru ko ibyo yanditse ari ukuri, benshi babonye amashusho asenyera umuturage bavuga ko bishobora kuba ari yo ntandaro y’ubwegure.

Kigali Today yabonye imyanzuro y’Inama Njyanama y’Umurenge wa Nyakiliba yateranye nyuma y’igihe gito amashusho ya Uwimana Vedaste asenyera abaturage agiye hanze, Njyanama yiga ku bibazo biri mu myubakire, yanzura ko abayobozi babigizemo uruhare bagomba kuva mu nshingano.

Imyanzuro y’Inama Njyanama y’Umurenge wa Nyakiliba yandikiwe Umuyobozi w’Akarere ka Rubavu, igaragaza ko hahagaritswe abayobozi b’imidugudu bagaragaje intege nke mu gukumira no guhagarika inyubako z’akajagari, ndetse iyi myanzuro igaragaza ko habayeho no guhagarika bamwe mu bakozi b’Akarere ka Rubavu bakorera mu Murenge wa Nyakiliba barimo SEDO wa Gikombe na Nyarushyamba, ushinzwe imiturire mu Murenge wa Nyakiliba hamwe n’Umunyamabanga Nshingwabikorwa w’Umurenge.

Bamwe mu baturage barakariye umuyobozi wabasenyeye bakavuga ko hari abubaka babanje guha amafaranga abayobozi

Uretse kuba Inama Njyanama yaramenyeshaga Akarere ko hari abakozi bahagaritswe, Umuyobozi w’Akarere ka Rubavu, Mulindwa Prosper, we yamenyesheje Inama Njyanama ko aba bakozi bahagaritswe bagomba gushyikirizwa akanama gashinzwe imyitwarire ku rwego rw’Akarere kugirango bakurikiranwe.

Uretse abakozi b’Akarere bahagaritswe kubera kurebera akajagari mu myubakire, Perezida w’Inama Njyanama y’Umurenge wa Nyakiliba, Mwiseneza Majyambere Marc, tariki 12 Nzeri 2024 na we yanditse asezera ku nshingano, avuga ko asezeye kubera impamvu ze bwite.

Ibicuruzwa birimo umuceri, amavuta ya mukorogo, urumogi, n’ibindi biborera ku mupaka muto uhuza Goma na Gisenyi bigateza umwanda n’ umunuko

Mulindwa Prosper, Umuyobozi w’Akarere ka Rubavu, avuga ko iki kibazo kimaze igihe ndetse ko bimwe mu bicuruzwa byangiritse biri ku mupaka ariko badafite aho kubyerekeza.

Ni ibicuruzwa biri mu bwoko bw’ibibora, ibitabora nk’amavuta ya mukorogo hamwe n’urumogi, Mulindwa akavuga ko Akarere gakeneye ubushobozi bwo kubyangiza n’aho bigomba kujyanwa hateguwe.

Iyo ugeze ku mupaka muto uhuza Goma na Gisenyi uzwi nka Petite Barriere mu kigo kijyanwamo ibicuruzwa kizwi nka Magerwa ni ho ibyo bicuruzwa byangiritse bibikwa, bikaba biteye umwanda kuko hari n’ibyahaboreye bitarahakurwa.

Mulindwa aganira na Kigali Today yagize ati « hari ibicuruzwa biva kure, byagera hano hakaboneka ibyangiritse kandi ntabwo twabyohereza mu kindi gihugu, icyo gihe ibyangiritse birasigara. »

Uretse ibiva hanze bikomeza mu bindi bihugu byangirika bigasigara mu Rwanda hari n’ibicuruzwa biva mu bindi bihugu nka Repubulika Iharanira Demokarasi ya Congo byinjira mu Rwanda mu buryo bunyuranyije n’amategeko bigafatwa.

Agira ati «Hano tugira ibicuruzwa dufata bitagomba kwinjira mu gihugu, urugero nk’urumogi, hari amavuta yo kwitukuza atemewe, amashashi n’ibindi bicuruzwa bitewe mu Rwanda, iyo tubifashe birabikwa ariko iyo bibaye byinshi hakenera aho bijyanwa bikangizwa. »

Zimwe mu mpungenge ubuyobozi bw’Akarere ka Rubavu bugaragaza ni uko hari ibicuruzwa bikeneye umwihariko kandi bikaba bisaba ubushobozi burenze ubw’akarere kugira ngo byangizwe ndetse bishyirwe aho bitagira ingaruka ku baturage.

Umuyobozi w’Akarere ka Rubavu avuga ko bagerageje gukoresha ibitaro bya Gisenyi mu kwangiza ibi bicuruzwa kuko n’ubundi ibitaro bigira uburyo byangiza imiti n’ibikoresho byabyo, ariko basanze bihenze.

Agir ati « twakoze inyigo n’ibitaro bya Gisenyi, dusanga kwangiza ikilo kimwe nibura bidusaba amafaranga igihumbi. Ibaze amatoni dufata ukube n’ayo mafaranga, byagora ubushobozi dufite. »

Abayobozi barimo Minisitiri w’Inganda n’Ubucuruzi mu Rwanda, Prudence Sebahizi, baherutse gusura ibyo bicuruzwa byangirikiye muri MAGERWA

Nubwo ubuyobozi butagaragaza ingano y’ibicuruzwa bigomba kwangizwa, Kigali Today yabonye ikirundo cy’umuceri waboreye kuri Magerwa, ikirundo cy’imyenda ya Caguwa yafashwe, n’ibindi bicuruzwa bitazwi byose bikenewe kuhakurwa.

Minisitiri w’Inganda n’Ubucuruzi mu Rwanda, Prudence Sebahizi, aherutse kubwira Kigali Today iki kibazo kigiye kwigwaho kigahabwa umurongo.

Yagize ati « Ni ikibazo kuba hari ibicuruzwa biborera ku mupaka. Tugiye gukora ubuvugizi harebwa uko bizajya bihakurwa, ibibora bikorwemo ibindi nk’ifumbire cyangwa ibiryo by’amatungo naho ibigomba kwangizwa hashakwe uburyo byangizwa kandi bitagize ingaruka ku buzima bw’abaturage.

Ingabo za SADC nizo zihutiye gutabara abari muri ubwo bwato

Ni impanuka yabaye mu masaha saa tatu kuri uyu wa Gatatu tariki 3 Ukwakira 2024, ubwo ubwato buzwi ku mazina ya Merdi bwagize ikibazo cy’uko bwari butwaye abantu n’ibintu birenze ubushobozi bwabwo.

Ubu bwato bwari buvanye abantu n’ibicuruzwa mu Karere ka Karehe muri Kivu y’Amajyepfo muri Repubulika Iharanira Demokarasi ya Congo bwerekeza mu mujyi wa Goma buza kurushwa imbaraga n’ibyo buhetse burarohama.

Nubwo habaye ubutabazi bwihuse abantu 23 ni bo babonetse bapfuye, naho 47 bashoboye gutabarwa byihuse, abandi benshi babarirwa mu magana baburirwa irengero.

Hakoreshejwe ubutabazi bwose bushoboka mu gutabara abari muri ubwo bwato

Col Molatelo Motau mu ngabo zaje mu butumwa bwa SADC, avuga ko abantu bashoboye gutabarwa nubwo hakomeje igikorwa cyo gushakisha abandi baba babuguyemo bataraboneka.

Icyakora hari amakuru avuga ko harokotse abantu 52 n’imirambo 28 yamaze kugezwa mu buruhukiro bw’ibitaro by’Intara ya Kivu y’Amajyaruguru, abandi mu bitaro bya Kyeshero mu gihe hari abandi babiri bajyanywe mu buruhukiro bwa CH la Providence.

Ubwato bwakoze impanuka kubera kwikorera ibirenze ubushobozi bwabwo, ibi bikaba biterwa n’uko abatuye Umujyi wa Goma bajya gushaka ibibatunga mu bice bitandukanye kandi basabwa kunyura mu mazi mu gihe inzira zigemurira uyu Mujyi zikoresha ubutaka zafunzwe kubera intambara ziri mu nkengero ya Goma.

23 nibo bamenyekanye baguye mu mpanuka y’ubwato

Kuva intambara ya M23 n’ingabo za Leta yakwaduka, Abanyecongo benshi bari basanzwe bakura ibicuruzwa muri Teritwari ya Masisi, Rutshuru na Nyiragongo bimukiye muri Kivu y’Amajyepfo ahataragera intambara, abandi baza guhahira mu Rwanda.

Bitewe n’ibicuruzwa byinshi bikenerwa mu mujyi wa Goma, abanyecongo bajya kurangura bapakira ibiro byinshi bimwe mu biteza impanuka z’ubwato mu mazi y’ ikiyaga cya Kivu.

Guverineri wa Kivu y’Amajyepfo Jean Jacques Purusi yatangaje ko ubwato bwa Merdi bwari butwaye abantu barenga 100 kandi bufite ubushobozi bwo gutwara abantu 30, ashinja inzego z’umutekano wo mu mazi zitakoze akazi kazo neza ko kugenzura umubare w’abagenda mu bwato.

Hakozwe ubutabazi bwihuse

Inzira y’amazi niyo ikoreshwa mu guhuza Umujyi wa Goma na Bukavu kimwe n’utundi duce dukomeje guhahirana na Goma kubera intambara ikomeje guca ibintu mu nkengero za Goma.

Umujyi wa Goma utuwe n’abaturage barenze miliyoni imwe n’igice bagowe no kubona ibibatunga kuko byinshi ubu biza muri uyu Mujyi binyuze inzira y’amazi, ibindi bigakurwa mu Rwanda, ibi bikaba byaratumye ibiciro ku isoko bizamuka.

Indi mpanuka y’ubwato mu kiyaga cya Kivu iheruka tariki 17 Mata 2024, yahitanye abantu benshi barimo bava Karehe berekeza Kituku mu Mujyi wa Goma.

Ubwato bwa Merdi bwari buvanye abantu n’ibicuruzwa Karehe bwarohamye mu mazi y’ikiyaga cya Kivu

Impanuka yabaye kuri uyu wa 3 Ukwakira 2024, mu masaha ya saa satu bitewe n’uko ubu bwato bwari butwaye abantu n’ibintu birenze ubushobozi bwabwo.

Kuva intambara ya M23 n’Ingabo za Leta ya Congo, yakwaduha Abanyecongo benshi bari basanzwe bakura ibicuruzwa muri teritwari ya Masisi, Rutshuru na Nyiragongo batangiye kujya kubikura muri Kivu y’Amajyepfo ahataragera intambara, abandi baza guhahira mu Rwanda.

Gusa bitewe n’ibicuruzwa byinshi bikenerwa mu Mujyi wa Goma, Abanyecongo bajya kurangura bituma bapakira ibirengeje ubushobozi bw’ubwato bubyikorera bikaba impamvu mu biteza impanuka mu mazi y’Ikiyaga cya Kivu.

Françoise Namuganga umuyobozi w’agace ka Kyeshero hafi y’ahaguye ubwato avuga ko bikomeje kugorana kumenya abari mu bwato, abatabawe n’abarohamye.

Gusa amakuru avuga ko kugeza ubu hakurikijwe ibikorwa by’ubutabazi byahise bitangira gukorwa, harohowe imirambo 23 yari imaze kuboneka. 15 bajyanywe mu buruhukiro bw’ibitaro bikuru, 6 bajyanwa mu bitaro bya Keshero naho 2 bajyanwa ku bitaro bya Providence, mu gihe abandi bakiri gushakishwa.

Ubwo ubwato bwari butangiye kurohama mu mazi

Guverineri wa Kivu y’Amajyepfo Jean Jacques Purusi yatangaje ko ubwato bwa Merdi bwari butwaye abantu barenga 100 kandi bufite ubushobozi bwo gutwara abantu 30, ashinja inzego z’umutekano wo mu mazi zitakoze akazi kazo neza ko kugenzura umubare w’abagenda mu bwato.

Ubuyobozi bw’Intara ya Kivu y’Amajyaruguru, bwatangaje ko butanga amafaranga yose akenewe nyuma y’yi nsanganya.

Inzira y’amazi niyo ikoreshwa mu guhuza Umujyi wa Goma na Bukavu kimwe n’utundi duce dukomeje guhahirana na Goma kubera intambara ikomeje guca ibintu mu nkengero za Goma.

Umujyi wa Goma utuwe n’abaturage barenze miliyoni imwe n’igice bagowe no kubona ibibatunga kuko byinshi ubu biza muri uyu Mujyi binyuze inzira y’amazi, ibindi bigakurwa mu Rwanda, ibi bikaba byaratumye ibiciro ku isoko bizamuka.

Bamwe mu bageze mu zabukuru bashima uburyo Leta ibitaho

Busenge Thomas ni umusaza w’imyaka 72 utuye mu Murenge wa Mudende mu Karere ka Rubavu. Avuga ko abageze mu zabukuru bafashwa na Leta, abandi bagatungwa n’imiryango yabo, agasaba abakiri bato gutegura izabukuru zabo.

Agira ati «Twe Leta iradufasha, kandi dushaje neza ugereranyije n’abatubanjirije mu myaka yashize. Gusa turagira inama abakiri bato, kujya muri Ejo Heza, bakazigamira ahazaza habo, bakazasaza neza bishimye.»

Busenge avuga ko ugeze mu zabukuru atagomba gutegera amaboko abakiri bato, ahubwo akwiye gutungwa n’ibyo yakoze.

Ati «Kugera mu zabukuru bijyana no kuruhuka, gutungwa n’ibyo wakoze, ntibikwiye ko wanduranya ku bakiri bato na bo baba bakishakisha. Iriya gahunda ya Ejo Heza ni nziza ku barimo gusaza, abakiri bato bategure ubusaza bwabo. »

Bamwe mu bageze mu zabukuru muri Rubavu bashyikirijwe inka

Umuyobozi Wungirije ushinzwe Imibereho myiza y’Abaturage mu Karere ka Rubavu, Ishimwe Pacifique, ubwo yari mu birori byo kwizihiza umunsi mpuzamahanga wahariwe kuzirikana abageze mu zabukuru, tariki 01 Ukwakira 2024, yavuze ko umunsi wahariwe abageze mu zabukuru ujyana no kubagezaho inkunga zibashimira ibyiza bakoze bagishoboye.

Agira ati « Kuzirikana umunsi w’abageze mu zabukuru bijyana no kubagenera inkunga, bashimirwa ibikorwa baba barakoze, kuko bageze muri ndinda mwana. Uba umwanya wo kwibutsa abakiri bato kwita ku bageze mu zabukuru kuko baba barakoze akazi kabo neza bagafashwa gusaza neza. »

Mu gihe abageze mu zabukuru bashima gahunda ya Ejo Heza nk’uburyo bwo kwiteganyiriza gusaza neza, Ishimwe Pacifique na we avuga ko iyi gahunda ari ingirakamaro kuko yashyiriweho gufasha Abanyarwanda bose kwitegura neza izabukuru, agasaba abakiri bato gushyira imbaraga mu kwizigamira.

Abageze mu zabukuru batishoboye bahawe ibiryamirwa

Umuyobozi w’ishami ry’ubuzima mu Karere ka Nyamasheke, Jean Paul Byiringiro, yabwiye Kigali Today ko bashyizeho ingamba zikumira imirire mibi muri aka Karere, gukoresha ibikomoka ku matungo bikaba birimo gutanga umusaruro.

Kurwanya imirire mibi hakoreshejwe ibiboneka mu Karere ka Nyamasheke ni byo birimo gutanga umusaruro kuko umuturage ashobora kubibona igihe cyose. Ifu y’isambaza ziboneka mu kiyaga cya Kivu hamwe n’igi ry’umwana ni umwe mu mishinga irimo gufasha abaturage.

Akarere ka Nyamasheke gafite ikirere n’ubutaka bweraho ibiribwa bitandukanye, kakaba kadakwiye kugira imirire mibi, ariko byaje kugaragara mu igenzura ryakozwe ko kari mu turere dukennye ndetse bikagira ingaruka ku mikurire y’abana.

Byiringiro agira ati « Urebye igenzura ryakozwe muri 2010 na 2015, twakoze ibishoboka ngo tugabanye igwingira mu bana, aho kugabanuka rikiyongera, muri 2020 twari ku kigero cya 37.4% uribaza gufata abana ijana muri bo abarenga 30 bakaba bagwingiye? »

Akomeza avuga ko ubuyobozi bw’Akarere n’abafatanyabikorwa bahuje imbaraga kandi imwe mu nzira yabafashije ni gahunda izwi nko kubyara muri batisimu imiryango ifite abana bagwingiye.

Ati «Twegereye imiryango ifite abana bagwingiye, tureba ko ifite amafunguro y’ingenzi, harimo imboga, imbuto n’ibikomoka ku matungo ariko dusanga imiryango yose si ko ibibona. Dufatanyije na Orora Wihaze twakoze umushinga uzwi nk’inkoko y’umuryango, igi ry’umwana n’ifu y’isambaza, kandi byatanze umusaruro. »

Byiringiro avuga ko kuba mu Karere ka Nyamasheke harabonetse igwingira bitatewe n’uko ibiryo bibuze, ahubwo byaterwaga n’ubumenyi bukeya mu gutegura indyo yuzuye.

Agira ati « Hamwe na Orora Wihaze, twashishikarije abaturage gutegura indyo yuzuye, twararebaga tugasanga ibyo kurya bimwe barabifite ariko ugasanga mu mirenge yegereye ishyamba rya Nyungwe ibikomoka ku nyama ntibabirya kandi babifite ahubwo babishakamo amafaranga. Twasangaga umuco waho ari ukorora bakagurisha bishakira amafaranga, turebye abegereye ikiyaga cya Kivu, twasanze na bo baroba isambaza bakazigurisha batazirya, dushaka uburyo butuma bashobora kurya indyo yuzuye. »

Umushinga wa Orora Wihaze wafashije urubyiruko rwa Nyamasheke gukora ifu y’isambaza izwi ku mazina ya « Sambaza Flour Nashishe » ikwirakwizwa mu mirenge igafasha ababyeyi gutegura indyo yuzuye.

Byiringiro agira ati « abafashamyumvire bahuguye abaturage, babigisha gutegura iyi fu, aho bakoresha ikiyiko kimwe bagashyira mu biryo by’umuryango bigatanga umutekano ku mirire. »

Iradukunda Alain ushinzwe umusaruro mu ruganda rukora ifu y’isambaza avuga ko babyaza ifu isambaza bahabwa n’amakoperative aziroba mu kiyaga cya Kivu.

Agira ati « dukorana n’amakoperative abiri akora uburobyi akatuzanira isambaza tukazumutsa, tukazisya, dukora ifu y’isambaza umuntu ashobora gushyira mu biryo, ariko dukora n’indi dushobora gushyira mu gikoma. Ibi bifasha abadakunda kurya isambaza bazireba. »

Uruganda rw’ifu y’isambaza rufite ubushobozi bwo gukora ibiro 500 ku munsi. Icyakora imbogamizi zihari ni uko umusaruro uhagije w’isambaza mu kiyaga cya Kivu utaboneka ndetse igihe ikiyaga gifunze bigasaba ko bakoresha izo baba barabitse bigatuma umusaruro utagera kuri benshi kandi zikenewe cyane.

Iradukunda avuga ko kimwe mu bisubizo barimo gutekereza ari ukwikorera ibyuzi bw’isambaza, icyakora ngo bateganya no kuzajya bakoresha n’ifu iva mu mafi.

Lucia Zigiriza, umuyobozi wa Orora Wihaze, avuga ko bafashije Nyamasheke n’utundi turere bakoreramo kongera umusaruro w’ubworozi, aho abaturage bafashijwe korora inkoko abana bakabona amagi. Bafashije abahinzi kongera ubworozi bw’ingurube ndetse bigisha abaturage kubona intanga zizewe ku ngurube bigabanya indwara.

Zigiriza agira ati « Intego yari ukongera ibikomoka ku matungo ariko bakabirya, ibikorwa twishimira byatanze igisubizo harimo gufasha aborozi korora neza, kwegereza icyororo aborozi, korohereza aborozi kubona ibiryo by’amatungo, kurya umusaruro no kuwugeza ku isoko. »

Akomeza avuga ko ikibazo cy’imirire mibi kiboneka mu Rwanda giterwa n’imyumvire, ituma bamwe batinya guhaha ibiribwa bifite intungamubiri nk’amagi, isambaza, bagendeye ku kuvuga ko bihenda, agasaba abantu kujya bagura bicye bicye ariko bikaboneka.

Umushinga Orora Wihaze mu gihe cy’imyaka 5 umaze ukorera mu Rwanda wazamuye umusaruro w’ibikomoka ku matungo magufi nk’inkoko n’ingurube, witaye ku bikorwa byo kurwanya imirire mibi no guhuza aborozi b’amatungo magufi n’ibigo by’imari.

Minisitiri Nduhungirehe yavuze ko yatunguwe n’uburyarya bwa DRC ku guha ikaze abashaka guhungabanya umutekano w’u Rwanda

Iyi nyandiko ubuyobozi bwa DRC bwise ikinyoma, yashyizweho umukono tariki ya 26 Nyakanga 2024, n’umuyobozi w’ibiro by’Umukuru w’Igihugu, Antony Nkinzo Kamole, yemerera Ali Illiassou Dicko uruhushya rwo guhagararira Perezida Felix Tshisekedi mu biganiro na Niger.

Minisitiri Nduhungirehe yatangaje ko yatunguwe no kubona ibiro bya Perezida wa RDC bivuga ko iyo nyandiko ari ikinyoma, nyamara n’urukiko mpuzamahanga rwashyiriweho u Rwanda UNIRMCT, rwaroherereje kopi y’iyo nyandiko Minisiteri y’Ububanyi n’Amahanga ya Niger tariki ya 6 Nzeri, 2024.

Minisitiri Nduhungire kandi akomeza avuga ko na Minisiteri y’Ububanyi n’Amahanga n’Ubutwererane y’u Rwanda yakiriye iyo nyandiko ku ya 7 Nzeri 2024, saa munani n’iminota 54 (14h54).

Iyi nyandiko yashyizweho umukono n’umuyobozi w’ibiro bya Perezida wa DRC, igaragaza biganiro byari bigiye guhagararirwamo Tshisekedi, byari bigamije gusaba Leta ya Niger kweremera Abanyarwanda batandantu uburenganzira bwo kujya muri DRC.

Aba uko ari batandatu barimo Sagahutu Innocent, Nzuwonemeye François Xavier, Mugiraneza Prosper, Nteziryayo Alphonse, Ntagerura André na Zigiranyirazo Protais.

Basanzwe bacumbikiwe muri Niger, nyuma yo gukurikiranwa n’urukiko mpuzamahanga mpanabyaha rwa Arusha rwashyiriweho u Rwanda, ICTR, bakaza kuburana bagahamwa n’ibyaha ndetse barabifungirwa, bakaba bararangije igifungo ku byaha bya jenoside bari bakurikiranyweho.

Minisitiri w’ububanyi n’amahanga mu Rwanda Amb. Nduhungirehe avuga ko niba Guverinoma ya DRC, yaremeye kwakira no guha ubwisanzure aba Banyarwanda bahoze muri leta y’abatabazi yagize uruhare muri Jenoside yakorewe Abatutsi mu 1994 basanzwe baba mu gihugu cya Niger idakwiye kubikora yihishahisha.

Minisitiri Nduhungirehe yagize ati, “Niba Leta ya DRC ishaka guha ubwisanzure no kujya muri DRC abo Abanyarwanda, bahoze muri Leta y’abateguye Jenoside mu 1994, barimo uwabaye Captain ukiri mu mitwe yitwaje intwaro n’ishaka gukuraho ubutegetsi, niyemere ibikore itihishe inyuma y’urutoki rwayo ruhera".

Muri aba Banyarwanda Leta ya Congo ishaka guha uburenganzira bwo kwidegembya ku butaka bwayo, harimo Innocent Sagahutu wahoze ari Kapiteni mu ngabo za FAR, ndetse akaba afite imikoranire n’umutwe wa FDLR uhora ushaka guhungabanya umutekano w’u Rwanda.

Iyi nyandiko ubuyoboi bwa DRC bwagaragaje ko ari ikinyoma

Deogratias Nzabonimpa, umuyobozi w’Akarere ka Rubavu wungirije ushinzwe iterambere ry’ubukungu ashyira ifumbire mu myobo iterwamo ibirayi

Mu Karere ka Rubavu bateganya guhinga ibirayi kuri hegitare ibihumbi 6 mu gihembwe cy’ihinga 2024/2025A, bikazafasha kongera umusaruro w’ibirayi no guhaza isoko.

Deogratias Nzabonimpa, umuyobozi w’Akarere ka Rubavu wungirije ishinzwe iterambere ry’ubukungu, avuga ko barimo gusaba abaturage guhinga vuba basiganwa n’ikirere kuko bafite amakuru ko hazagwa imvura nkeya.

Agira ati "Turimo gusaba abaturage guhinga vuba basiganwa n’ikirere kuko dufite amakuru ko hazagwa imvura nkeya. Turimo guhinga ibirayi kuko bishobora kumara ukwezi mu butaka bitegereje imvura, ariko icyo dusaba abaturage ni ugukoresha ifumbire nyinshi y’imborera, ikindi bagomba kwitabira gufata ubwishingizi kugira ngo niba bahuye n’ibihombo bitazabageraho".

Ubuyobozi bw’Akarere ka Rubavu bushyize imbere guhinga ibirayi mu gihe ikilo kirimo kugura amafaranga 800, ibyo abaguzi bavuga ko ari menshi.

Abaturage bashyira ifumbire y’imborera mu myobo y’ibirayi

Akarere ka Rubavu gateganya guhinga hegitari ibihumbi 6 muri iki gihembwe cy’ihinga, hakaba hateganywa ko mu mezi ane (4) hazaboneka umusaruro w’ibirayi urenga toni ibihumbi 120 muri aka Karere.

Abahinzi basabwa gutanguranwa n’imvura, ndetse bagakoresha imbuto y’indobanure kuko ariyo yiziwe, cyakora bamwe bavuga ko ihenze kuko abatubuzi bayihabwa ku mafaranga 650 Frw ku kilo, mu gihe hari abayibona iri hejuru y’amafaranga igihumbi (1000 Frw).

Léandre Rwakayanga, ukuriye Tamira ikigo cya RAB gikorera mu Karere ka Rubavu, avuga ko ubuhinzi bufite imbogamizi z’imihindagurikire y’ikirere, agasaba abahinzi guhinga vuba kuko imbuto y’ibirayi ishobora kumara iminsi 60 itarangirika.

Akomeza avuga ko uburyo bwo kurwanya imihindagurikire y’ikirere ari ugutera ibiti bifata imiyaga ibyara imvura, ikindi ngo bagomba gufata amazi ateza isuri.

Imbuto y’ibirayi biterwa mu mirima

Agira ati "Dushishikariza abantu gutera ibiti bifata imiyaga itanga imvura, biraboneka ko ibicu biri mu kirere, ariko hakenewe ko dutera ibiti bibihagarika bikaduha imvura".

Rwakayanga avuga ko leta y’u Rwanda ifasha abahinzi kubona urubingo batera ku miringoti, rugafasha amatungo kubona ubwatsi ariko rugafata ubutaka.

Ashima uburyo bwo guhinga hakoreshwa imitabo, agasaba ko ahadakoreshwa imitabo hashyirwa imirwanyasuri ifata amazi.

Ubuyobozi bw’Akarere ka Rubavu bushyize imbere guhinga ibirayi

Amabwiriza Minisiteri y’ubuhinzi yageneye Uturere, agaragaza ko mu ngengo y’imari ya 2024-2025 hazahingwa hegitari 118,660 z’ibirayi, hagitari 320,955 z’ibigori, hegitari 707,477 z’ibishyimbo, imyumbati izahingwa kuri hegitari 79,118, ingano zizahingwa kuri hegitari 43,010, umuceri uzahingwa kuri hegitari 29,639 naho imboga zihingwe kuri hegitari 18,782.

Ibirayi bizahingwa mu mu Ntara y’Iburengerazuba, Amajyaruguru, hamwe n’Uturere twegereye ishyamba rya Nyungwe mu Ntara y’Amajyepfo.

Abagenzuzi bwite b’imari bifuza ko bahabwa agaciro mu bigo bakorera bakamenya amakuru y’ibihakorerwa

Ni bimwe mu byo bagarutseho kuri uyu wa Gatatu tariki 11 Nzeri 2024, mu nama nyunguranabitekerezo ngarukamwaka y’iminsi itatu, irimo kubera mu Karere ka Rubavu, ihurije hamwe abarenga 120 bo mu rugaga rw’abagenzuzi bwite b’imari (Institute of Internal Auditors - Rwanda), yateguye inama ngarukamwaka ya karindwi hagamijwe kugira ngo bige, banarebe aho umwuga wabo ugeze, hanarebwa inyongera nziza bakongeramo mu rwego rwo kubaka abagenzuzi b’imari b’umwuga bafasha ibigo bakorera mu gihugu, bakora neza akazi bashinzwe.

Abagenzuzi bwite b’imari bavuga ko nubwo harimo ibigenda bikemuka ariko hakigaragara imbogamizi hagati y’umugenzuzi bwite w’imari n’ikigo akorera, kubera ko akenshi usanga inama atanze zidafatwa nk’ikintu cya mbere cy’ibanze cy’ibintu bigomba gushyirwa mu bikorwa, bityo bikagira ingaruka zirimo kwisubiramo kw’amakosa ahora akorwa, bigatera ibihombo bitandukanye ibigo bikunda kugira.

Vincence Mukandanga ni umugenzuzi bwite w’imari muri Minisiteri y’Imari n’Igenamigambi (MINECOFIN), avuga ko bagihura n’imbogamizi zirimo kuba hari abayobozi batarumva neza umwuga wabo.

Kuba amakuru y’inama batanga adashyirwa mu bikorwa yose ni bimwe mu biteza ibihombo mu bigo

Ati “Rimwe na rimwe wajya kugenzura bakagufata nk’umugenzacyaha, ariko ubundi ubugenzuzi icyo bugamije ni ugutanga inama kugira ngo abayobozi ibyo biyemeje babikore neza, n’aho batarimo kubikora neza tukabaha inama zo kumera nk’aho tubakebura, tubabwira ko bari barabyiyemeje gutya ariko uwo murongo atari wo barimo kugenderamo.”

Arongera ati “Ibigo dukorana icya mbere ni uko bagomba kumva y’uko turi abafatanyabikorwa babo, ko turi aho kugira ngo tubafashe kugira ngo bashyire mu bikorwa inshingano zabo. Iyo tubahaye ibyo twabonye ko bitagenze neza, ikintu tubasaba ni uko za nama tuba twatanze bazishyira mu bikorwa kugira ngo ibyari bitari ku murongo bikosorwe kandi bikosorerwe ku gihe, kuko baramutse bazishyize mu bikorwa, cya gihombo cyakabaye, igikorwa kirangiye ntabwo kiba kikibaye.”

Perezida w’Urugaga rw’Abagenzuzi bwite b’imari, Fred Twagirayezu, avuga ko imbogamizi ziri hagati y’abagenzuzi bwite b’imari n’ibigo bakorera ziganjemo iz’uko inama batanga akenshi zidashyirwa mu bikorwa zose, bikaba impamvu y’ibihombo bikunda kugaragara mu bigo.

Perezida w’urugaga rw’abageenzuzi bwite b’imari, Fred Twagirayezu

Ati “Ugasanga aho yabonye ikosa n’inama yabitanzeho ntabwo bifashwe nk’ikintu cya mbere cy’ibanze cyo gushyirwa mu bikorwa, bikagira ingaruka z’uko iryo kosa rihora rigaruka, niho hava bya bihombo, akenshi na kenshi usanga abegenzuzi bwite b’imari barabivuze muri raporo zabo, ariko ukabona n’umugenzuzi Mukuru wa Leta iyo aje asanze rya kosa rigihari kandi umugenzuzi w’imbere mu kigo yari yarabivuze mbere ariko ntibikosorwe.”

Yungamo ati “Turashakako ubuyobozi bw’ikigo buha abagenzuzi b’imbere mu bigo agaciro, bakaba aba mbere mu kumenya amakuru y’ikirimo kubera mu kigo, ugasanga ntabwo yatumiwe ahaganirirwa ibikorwa n’icyerekezo by’ikigo, ntamenye aho ikigo cyerekeza ngo nawe agifashe muri urwo rugendo, atange inama zijyanye n’urugendo ikigo kirimo cyerekezamo.”

Umuyobozi Mukuru wa Banki y’iterambere y’u Rwanda, BRD, Pichette Kampeta Sayinzoga, avuga ko ahenshi usanga abagenzuzi bwite b’imari bafatwa nk’abacungamutungo kandi atari ko bimeze, kuko bafite inshingo zikomeye cyane.

Umuyobozi Mukuru wa Banki y’iterambere y’u Rwanda, BRD, Pichette Kampeta Sayinzoga

Ati “Mbere twumvaga ko abagenzuzi b’imari bari bashinzwe gufata abajura, amakosa, ntabwo ari zo nshingano z’umugenzuzi w’imari, kuko bashinzwe kugira inama ibigo kugira ngo bikore neza, kuko iyo tudafite sisiteme zidakora neza aribwo havuka ubujura, bakaba bashinzwe kutugira inama y’uko twanoza imikorere ku rwego rw’ibigo.”

Umugenzuzi Mukuru w’Imari ya Leta Alexis Kamuhire, avuga ko buri wese akwiye kubahiriza inshingano ze, kugira ngo birinde kugira amafaranga yangirika.

Umugenzuzi Mukuru w’imari ya Leta, Alexis Kamuhire asanga buri wese akwiye kubahiriza inshingano ze

Ati “Buri wese akwiye kumva inshingano ze, iyo hagize amafaranga yangirika, hari uba utubahirije inshingano ze nkuko bikwiye, icy’ingenzi ni uko buri wese akwiye kumva no kubahiriza inshingano ze, akumva ko amafaranga yahawe atari aye, ahubwo ari ayacu twese, agomba kutugirira akamaro, akayakoresha neza.”

Urugaga rw’abagenzuzi bwite b’imari b’ibigo bya Leta n’abikorera rugizwe n’abagenzuzi bwite b’imari barenga 190.

Iyi nama ihurije hamwe abarenga 120 bo mu rugaga rw’abagenzuzi bwite b’imari (Institute of Internal Auditors - Rwanda)

Abaturage batuye muri imwe mu Mirenge yo mu Turere two mu Burengerazuba, barasabwa kwita ku isuku cyane

Ni umuburo watanzwe mu gihe imvura y’ukwezi kwa Cyenda (Nzeri) yatangiye kugwa hakaba hari ibyago ko ishobora kwiyongera mu bihugu bituranye n’u Rwanda ikaba yagera mu Rwanda mu Ntara y’Iburengerazuba.

Itangazo RBC yandikiye MINALOC rigaragaza ko Imirenge ikora ku kiyaga cya Kivu mu Ntara y’Iburengerazuba ikeneye ubukangurambaga mu gufasha abaturage kwirinda cholera.

Bimwe mu bigomba kwitabwaho harimo gushishikariza abaturage gukoresha amazi meza, kwigisha abaturage kwita ku isuku n’isukura aho batuye, gukora ubukangurambaga mu gutegura amafunguro afite isuku, gushyira imyanda ahabugenewe hamwe kugera ku bantu bose bakangurirwa kugira isuku.

Ubuyobozi bwa RBC bugaragaza ko Imirenge igomba kwitabwaho iri mu Turere dutandatu (6) harimo; Nkombo, Nkanka, Nkungu, Giheke, Gihundwe, Mururu, Bweyeye na Bugarama muri Rusizi.

Hari Kagano, Kanjongo, Mahembe, Kirimbi, Macuba na Gihombo muri Nyamasheke, naho mu Karere ka Rutsiro harimo Kivumu, Mushubati, Gihango, Musasa, Boneza na Kigeyo.

Ibice by’Intara y’Iburengerazuba bigomba kwitabwaho mu gukumira cholera

Mu Karere ka Rubavu harimo Cyanzarwe ahazwi nka Busigari, Nyamyumba, Gisenyi na Kanama, mu gihe muri Karongi hagaragajwe Imirenge ya Gishyita, Mubuga, Bwishyura na Rubengera, mu gihe mu Karere ka Ngororero hagaragajwe Umurenge wa Kivumu.

Guverineri w’Intara y’Iburengerazuba, Dushimimana Lambert yabwiye Kigali Today ko ibihe by’imvura amazi atembana umwanda, bakaba bamaze iminsi bashishikariza abaturage kugira isuku.

Yagize ati, "Tubimazemo iminsi, kugira isuku ku mubiri, aho abantu batuye no gutegura amafunguro, bizadufasha kwirinda iki cyorezo kitaragera mu Rwanda".

Guverineri w’Intara y’Iburengerazuba avuga ko impamvu Intara y’Iburengerazuba isabwa gushyira imbaraga mu kwirinda cholera biterwa ni uko mu gihugu gituranye n’u Rwanda ihaboneka.

Agira ati "Nubwo itarahagera, mu bihugu duturanye irahaboneka kandi abaturage bacu bajyayo, bashobora kuyizana, tugomba gushyira imbaraga mu kuyikumira, ariko niyo batayizana tugomba kwirinda ko yakwirakwizwa n’imvura ikaba yatugeraho".

Icyorezo cya cholera mu Karere kimaze igihe kivugwa muri Repubulika Iharanira Demokarasi ya Congo, ndetse imvura yo mu itumba yatumye gihitana abantu benshi cyane cyane mu bihugu nk’u Burundi, Kenya, Tanzania na Uganda.

Uko icyorezo cya cholera cyari gihagaze ku mipaka yegereye u Rwanda

Imibare itangwa na OMS ishami ry’umuryango wabibumbye ryita ku buzima igaragaza ko abantu bagera mu bihumbi 230 bagaragayeho indwara ya cholera n’aho abandi ibihumbi 4 bagahitanwa nayo mu bihugu 14 by’Afurika y’Iburasirazuba hamwe na Afurika y’Amajyepfo mu mwaka wa 2023 kugeza muri Gashyantare 2024.

OMS igaragaza ko mu mwaka wa 2024 muri Gicurasi abantu 194,897 barwaye cholera n’aho abagera 1,932 irabahitana.

OMS itangaza ko kuva muri 2022 imaze gukusanya miliyoni 18 z’amadolari y’Amerika mu guhangana na cholera kandi muri 2024 hazakenerwa agera kuri miliyoni 50 z’amadolari mu guhangana na cholera.

Babiri bakekwa kuba abo mu Ngabo za Congo baje kwiba inka barateshwa

Aba basirikare binjiye mu Rwanda mu masaha ya saa cyenda z’igitondo tariki 5 Nzeri 2024, bashaka kwiba inka mu Kagari ka Rusura, umudugudu wa Kageyo, Isibo y’Icyerekezo.

Ni inka y’umuturage witwa Mfitumukiza Janvier watabaje irondo, bateshwa batarayambutsa mu kibaya cya Congo.

Umuyobozi ushinzwe umutekano mu Mudugudu wa Kageyo yabwiye Kigali Today ko baje ari abantu babiri umwe ajya ku muryango undi ajya kuzitura inka y’umuturage.

Agira ati "Bafunguye urugo arabyumva, arasohoka. Yahise abona uwo ku muryango atangira kumuvugisha amubaza uwo ariwe ntiyavuga, amukubita inkoni ntiyataka, amukubita indi ntiyataka, uwarimo azitura inka wari ufite imbunda arasa kuri Mfitumukiza amasasu abiri ariko ntiyamufata. Mfitumukiza yahise atabaza ariko n’abanyerondo baratabara n’abo basirikare bariruka."

Abaturage batuye mu Mudugudu wa Kageyo bavuga ko ayo masasu ntawe yakomerekeje, cyakora nabo ntibashoboye kubahagarika kuko bahise basubira muri Congo.

Ikibaya cya Congo gihana imbibi n’u Rwanda kirimo ingabo za Congo zivanze na FDLR na Wazalendo, ariko kubera imibereho babayeho baza kwiba ibyo kubatunga mu Rwanda.

Kuba ingabo za FARDC zaza kwiba inka mu Rwanda ni ibintu byabayeho no mu bihe bitandukanye.

Tariki 11/06/2014, ingabo za Kongo zinjiye ku butaka bw’u Rwanda zirasa ku birindiro by’Ingabo z’u Rwanda mu Karere ka Rubavu biba ngombwa ko Ingabo z’u Rwanda zirwanaho, umusirikare wa Congo ahasiga ubuzima. Byaje kumenyekana ko bari baje gutwara inka zari ku butaka bw’ u Rwanda.

Muri 2022 mu kwezi kwa munani (Kanama), umusirikare mu Ngabo za Repubulika Iharanira Demokarasi ya Congo (FARDC), yarasiwe ku butaka bw’u Rwanda mu Mudugudu wa Cyamabuye, Akagari ka Rusura, Umurenge wa Busasamana mu Karere ka Rubavu, mu gace kakunze kunyurwamo n’abarwanyi ba FDLR, byaje kumenyekana ko uyu musirikare wa Congo yarimo yirukanka ku bana bari baragiye intama ashaka kuzibaka.

Umuyobozi w’ingabo z’u Rwanda mu Ntara y’Iburengerazuba Maj Gen Eugene Nkubito aherutse kubwira abikorera mu Karere ka Rubavu ko barinzwe kandi abashaka guhungabanya umutekano w’u Rwanda batabishobora kuko na FDLR yose idashobora guhangana na batayo imwe y’ingabo z’u Rwanda.

Ni amabwiriza ajyanye no kugenzura abanyeshuri uko bahagaze mbere y’uko burira imodoka basubira ku ishuri cyangwa binjira mu kigo.

Ikigo cy’ igihugu gishinzwe ubuzima RBC gisaba ibigo by’amashuri gukumira icyorezo binyuze mu kugenzura abanyeshuri binjira mu kigo.

"Abanyeshuri bagomba gusuzumwa umuriro, ibindi bimenyetso bigaragara ku mubiri mbere yo kwinjira mu kigo."

Amabwiriza ya RBC agaragaza ko hagomba gushyirwaho ahantu habugenewe hakorerwa isuzumwa mbere y’uko abanyeshuri binjira mu mashuri, abanyeshuri batega imodoka, hasabwe ko ahantu bategera imodoka nka stade Nyamirambo n’ahandi hateganyijwe hashyirwaho isuzumwa mbere yo kwinjira mu modoka.

Isuzumwa rikorerwa abanyeshuri n’abandi binjira mu bigo by’amashuri rigimba gukomeza buri munsi mbere y’ uko amasomo atangira, kandi hakongerwa ubukangurambaga bw’isuku n’isukura, hibutswa isuku rusange n’isuku y’umuntu ku giti cyane.

RBC ivuga ko ubushita bw’inkende bwandurira mu mibonano mpuzabitsina yaba ikingiye cyangwa idakingiye, gusuhuzanya no gukora ku kintu cyakozweho n’uburwaye.

Umuntu urwaye ubushita atangira kugaragaza ibimenyetso mu minsi 2 kugera ku minsi 21, cyakora abanyarwanda bose basabwa kwirinda gukora ku muntu wagaragaje ibimenyetso by’ubushita birimo kugira ibiheri bimeze nk’ubushye bibabaza bituma umuntu ashaka kwishimagura, ufite ibyo biheri bikutera kubabuka ku mubiri, cyane cyane mu myanya ndangagitsina, mu maso, mu mugongo, ku biganza no ku birenge.

Ufite ubushita bw’ inkende arangwa no kugira umuriro mwinshi, kugira inturugunyu cyangwa amasazi no kubyimba mu nsina z’amatwi, kubabara umutwe bikabije no kubabara umugongo n’imikaya.

Bumwe mu buryo bwo kwirinda ubushita bw’inkende burimo kwirinda gukora ku muntu wgaragaje ibimenyetso, kwirinda gukorana mibonano mpuzabitsina n’umuntu wagaragaje ibimenyetso by’ubushita bw’inkende, ahubwo abantu bagakaraba intoki kenshi kandi neza bakoresha isabune n’amazi cyangwa imiti ikoreshwa mu gusukura intoki.

RBC isaba umuntu wese ugaragaje kimwe mu bimenyetso by’ ubushita bw’inkende kwihutira kujya ku kigo nderabuzima kimwegereye.

RBC ivuga ko mu Rwanda hagaragaye abarwayi bagaragaje ibimenyetso by’ ubushita bw’inkende mu kwezi kwa Nyakanga 2024 ariko bitaweho bamwe bakaba barakize basezererwa mu bitaro, mu gihe abandi bakomeje kwitabwaho kandi batarembye.

Ibikorwa byo gushyingura abo bantu birabera mu mujyi wa Goma ndetse habe ibikorwa byo kubaherekeza basomerwa misa nk’uko byateguwe n’ubuyobozi bw’Intara ya Kivu y’Amajyaruguru.

Bamwe mu bakuriye inkambi z’impunzi mu mujyi wa Goma bavuga ko bamaze gupfusha abantu barenga ibihumbi 5000 bazize kutitabwaho kuva intambara zatangira kwibasira ibice bya Rutshuru, Masisi na Nyiragongo.

Janvier Luanda akuriye impunzi mu nkambi ya Mugunga, avuga ko mu mezi abiri abamaze gupfa bazira uburwayi butandukanye.

yagize ati « mu mezi abiri tumaze kubura abantu batari bacye. N’ubwo abenshi bazira cholera kubera isuku nke, abandi bazira malaria, ariko hari n’abazira inzara imbeho n’umusonga, cyane cyane abana. »

Mu nkenegero z’umujyi wa Goma habarurwa inkambi nyinshi zicumbikiye impunzi zibarirwa mu icumi, ariko bamwe mu bazikuriye bavuga ko abari mu nkambi babayeho nabi.

Musekuru theo ukuriye inkambi ya Kanyarucinya avuga ko mu mezi abiri gusa inkambi akuriye imaze gupfusha abantu 17 barwaye bakabura uburyo bwo kwitabwaho.

Musekuru avuga ko kuva 2022 bamaze gupfusha abantu 1300 bazize uburwayi bwa korera na malaria byiyongeraho kubura imiti n’ibiryo bihagije.

Faustin Mahoro ukuriye inkambi ya Bulengo, avuga ko kuva muri 2023 bamaze gushyingura abantu 1500 bishwe n’indwara no kutitabwaho, ubu mu mezi abiri ashize bakaba bamaze gupfusha abantu 76.

Bahati Maniriho James ukuriye inkambi ya Buhimba avuga ko mu mezi abiri bamaze gupfusha abantu 48.

Judith Rushoti ukuriye inkambi ya Balaka avuga ko imaze kugwamo abantu 34 mu mezi abiri bazize, akongeraho ko abarwayi babura imiti, agasaba leta kubagoboka.

Yunzemo ati: «Ibaze mu mezi abiri gupfusha abantu 34, ubwo ntituvuze abazira amasasu, biratubabaza umutima kuko ubuyobozi butadufasha. »

Ndayambaje Irategeye uri mu nkamabi ya Rushagara avuga ko mu mezi abiri bapfushinze abantu 30, naho Justin Kamama ukuriye inkambi y’impunzi ya Don Bosco mu mujyi wa Goma avuga ko abona abantu bapfa cyane mu nkambi bazira kubura ubuvuzi n’ibiribwa.

DRC iri mu bihugu bifite impunzi nyinshi mu gihugu no hanze yacyo, muri teritwari ya Lubero habarurwa impunzi ibihumbi 165 zahunze intambara ihuje abarwanyi ba M23 mu bice bya Masisi na Rutshuru, naho mu Ntara ya Kivu y’Amajyaruguru habarurwa impunzi miliyoni 2 n’ibihumbi 67, mu gihe Teritwari ya Masisi ubwayo ifite impunzi zingana n’ibihumbi 448.

Abanyarubavu barishimira ko babonye uburyo bubafasha guhinga bakabona umusaruro no mugihe cy’impeshyi

Ubusazwe wasangaga mu Rwanda abahinzi bahinga kuva mu kwezi kwa Nzeri kugera mu kwezi kwa Kamena, aho igihe cy’impeshyi wasangaga nta buhunzi bukorwa bitewe n’uko cyabaga igihe cy’izuba ndetse n’abahinzi bakaruhuka.

Gusa uko abantu biyongera niko bavumbura n’uburyo butandukanye butuma no mu gihe cy’impeshyi bashobora kubyaza umusaruruo ubutaka bagashaka ibibatunga.

Ni muri urwo rwego Karere ka Rubavu abahinzi b’imboga n’imbuto bavuga ko kumenya gukoresha imborera bituma bahinga mu mpeshyi bakeza.

Byukusenge Zainabo, uhinga igice cya hegitari mu murenge wa Nyakiriba, avuga ko gukoresha ifumbire mborera byatumye umusaruro wiyongera.

Ibitunguru ni bimwe mu byo abahinzi bahinze bifashishije uburyo bwo gukoresha imborera

Agira ati "Nari nsanzwe mpinga mu gihe cy’imvura, ubutaka bukaruhuka mu gihe cy’izuba kubera tutashobora kubona amazi yo kuvomera, ariko ubu Kilimo trust yadufashije gukoresha ubutaka mu gihe cy’izuba duhangana n’imihindagurikire y’igihe, ubu ngiye kweza amashu n’ibitunguru byahinzwe mu kwezi kwa gatandu, mbikesheje ubumenyi nungutse."

Abahinzi bavuga ko bigishijwe gukora ifumbire y’imborera, mu gihe cy’izuba bayishyira mu murima, igafasha imyaka yabo guhangana n’izuba.

Ati "Ubu buryo butuma dukoresha ifumbire y’imborera, bigaha imirima yacu ubushobozi bwo guhangana n’izuba, iyo tugize Imana imvura ikagwa, iyi fumbire ibika amazi mu butaka. Ikindi ni uko byatumye tugabanya ifumbire mvaruganda twakoreshaga, bituma imirima yacu itangirika."

Abahinzi bakoze neza mu gukoresha uburyo bigishijwe bahawe ibikoresho bitandukanye

Abahinzi bo mu Karere ka Rubavu bavuga ko ubutaka bw’ibirunga bukeneye ifumbire y’imborera, mu gihe gukoresha ifumbire mvaruganda cyane byangiza umurima. "Gukoresha imborera uretse kongerera ireme n’ubutaka bitanga n’umusaruro mwiza."

Habumugisha Jean d’Amour ukuriye koperative ikora ubuhinzi bw’imboga avuga ko bafite ubuhinzi bwiza buhingira igihe ndetse bikagabanya ibihombo by’umusaruro wangirika kubera kubura amasoko.

Ibihingwa by’imboga birimo; amashu, ibitunguru, tungurusumu na karoti ubu biraboneka mu mirima mu Murenge wa Nyakiriba, mu gihe abaturage bavuga ko bagombye kuba barahagaritse guhinga kubera izuba.

Mu masoko ya Rubavu hagaragaramo umusaruro w’imboga zitandukanye zahinzwe mu buryo abaturage bigishijwe

Akarere ka Rubavu gafite ubutaka bw’ibirunga, ni ubutaka butagira imigezi ku buryo bashobora kuvomera, cyakora ngo gukoresha ifumbire y’imborera nabo bibafasha guhangana n’izuba ry’impeshyi.

Andrew Gashayija Umuyobozi wa Kilimo trust Rwanda, avuga ko bafashije abahinzi babarirwa mu 2600 gufata neza ubutaka no kurinda ibidukikije bongera umusaruro.

Agira ati "Turimo guhemba abahinzi bitwaye neza mu kubungabunga ubutaka babona musaruro ufasha Abanyarwanda kurwanya imirire mibi kandi barengera ubutaka."

Akomeza agira ati "Ubuhinzi turimo kwigisha abahinzi uyu munsi, ni ubuhinzi burengera ibidukikije, buhangana n’imihindagurikire y’ikirere, kandi umuhinzi agashobora kubona umusaruro uhagije. Ibi bituma ubutaka bukoreshwa neza haba abakora ubuhinzi uyu munsi nabo mu gihe kizaza."

Abahinzi bahize abandi bahawe ibikoresho

Mu Karere ka Rubavu abahinzi barenga 2600 bafashijwe gukora ubuhinzi burinda ubutaka, kandi abakoze neza barashimirwa harimo gukora ifumbire y’imborera no kubika umusaruro ugashobora kumara igihe kirekire.

Gashayija avuga ko abahinzi bahize abandi 60 bahembwe ibikoresho bibafasha mu buhinzi bifite agaciro ka miliyoni 30.

Umuyobozi w’ingabo mu Ntara y’Iburengerazuba, Maj Gen Eugene Nkubito yasabye abikorera mu Karere ka Rubavu gukora batekanye

Maj Gen Eugene Nkubito abitangaje mu gihe abatuye Akarere ka Rubavu bumva ibihuha by’abarwanyi ba FDLR bakorera mu burasirazuba bwa Congo, bivuga ko yabonye abaterankunga bigaca intege bamwe kandi bakagombye gukomeza gukora imirimo yabo.

Gen Maj Eugene Nkubito avuga ko bacungira umutekano w’Igihugu ku mupaka, naho inyuma y’umupaka hayoborwa n’abandi babikora uko babishaka, ariyo mpamvu haboneka FDLR irwanya Leta y’ u Rwanda.

Akomeza avuga ko nubwo bamwe bavuga ko FDLR yarangiye ngo igihari, ndetse yabonye abaterankunga. Cyakora avuga ko nubwo yakwihuriza hamwe igatera u Rwanda idashobora guhangana na batayo imwe y’Ingabo z’u Rwanda.

Agira ati "Nkabikorera ndagira mbizeze umutekano nk’uko Umukuru w’Igihugu yabibijeje, mukore mutekanye."

Maj Gen Eugene Nkubito warimo aganira n’abikorera bo mu Karere ka Rubavu yasabye kandi abatuye Umujyi wa Gisenyi guteza imbere isuku, hakaboneka itandukaniro hagati yawo na Goma kuko byakumira n’abasirikare ba FARDC bayobera mu Rwanda.

Agira ati "Hakeneye itandukaniro, kuburyo urenze umupaka abona ko yinjiye ahandi, umusibo ejo, umusirikare wabo yaraje azana n’umwana w’imyaka itanu, abasirikare bamubajije avuga ko atari yamenye ko yarenze umupaka. Hakenewe ko barenga umupaka bakabona ko bageze ahatandukanye n’iwabo."

Maj Gen Nkubito avuga ko itandukaniro ritagomba kuba mu kuzamura inyubako, ahubwo n’isuku ntibayibagirwe, agaragaza ko Umujyi wa Gisenyi ubonekamo umwanda w’amashashi n’amacupa byakoreshejwe. Agaragaza ko Umujyi uteye neza ariko abawutuye isuku iri hasi.

Si ubwambere Umujyi wa Gisenyi unenzwe kugira umwanda, cyakora abawutuye bavuga ko kimwe mu bikomeje kubangamira isuku ari isoko rya Gisenyi rimaze imyaka 14 ryubakwa ariko ritaruzura, rikaba impamvu ituma abikorera batabona aho gukorera bakazerereza ibicuruzwa.

Umujyi wa Gisenyi ubonekamo ibibanza bituzuye n’inyubako zishaje, abahatuye bakavuga ko nubwo basabwa kubaka no kuvurura Leta ariyo ifite ibibanza bitubatse n’inyubako icunga zishaje.

Ihuriro AFC ryahakanye kugirana amasezerano y’ubufatanye n’umutwe wa ADF NALU

AFC yabihakanye ibinyujije ku rukuta rwa X, nyuma y’uko abanditse iryo tangazo bavuga ko yagiranye amasezerano y’imikorere aho izajya iha ADF NALU ubushobozi bw’amafaranga n’ibikoresho mu kurwanya ingabo za Leta ya Kinshasa FARDC hamwe n’imitwe ikorana nayo yibumbiye muri Wazalendo.

Iryo tangazo rikomeza rivuga ko ubwo bufatanye bugamije gutuma uyu mutwe wa ADF uhagarika kwica abaturage aho ikorera muri teritwari ya Beni na Butembo ahubwo bakagaba ibitero ku ngabo za FARDC na Wazalendo mu kongera ubuso buyoborwa na AFC.

Imirwano yongeye kubura hagati ya M23 na FARDC

Imirwano hagati y’ingabo za DRC n’abarwanyi ba AFC/M23 muri teritwari ya Masisi yongeye kubura nyuma yaho ubuyobozi bwa M23 butangaje ko indege ya Leta ya Kinshasa ivogereye ikirere kiyoborwa na M23 muri teritwari ya Rutshuru, ikaraswaho igahungira muri Uganda.

Uretse indege ivugwa kuba yaravogereye ikirere cya M23, ingabo za Leta ya Kinshasa zifatanyije na Wazalendo (Abakunda igihugu) bagabye ibitero ku barwanyi ba M23 muri Masisi.

Laurence Kanyuka umuvugizi wa AFC yatangaje ko mu rukerera tariki ya 25 Kanama 2024 ingabo za Leta ya Kinshasa FARDC na Wazalendo bateye abarwanyi ba M23 mu duce twa Katwa, Itwe, Kikubo, Ubangu na Kamandi no mu nkengero za Kirumba, Kaina, Kanyabayonga mu gihe bari mu gahenge ko guhagarika imirwano.

Umutekano muke mu burasirazuba bwa Congo ukomeje kuba inzozi ku bahatuye bitewe n’imitwe yitwaje intwaro.

Mu mujyi wa Goma na Nyiragongo abaturage bavuga ko nta joro ricya hadapfuye abantu bikozwe n’abantu bitwaza intwaro, bagashinja abagize umutwe wa Wazalendo kugira uruhare muri ubwo bwicanyi.

Abanyarwanda benshi baherutse kugaragaza ko bishimiye gukomeza kuyoborwa na Perezida Kagame kandi ko bamufitiye icyizere, aho babigaragaje bamuhundagazaho amajwi angana na 99,18% mu matora y’Umukuru w’Igihugu yabaye tariki 14 na 15 Nyakanga 2024.

Kuri iki Cyumweru, abatuye i Kigali no mu tundi Turere, berekeje kuri Sitade Amahoro yavuguruwe ndetse ikongererwa ubushobozi, aho yakira ababarirwa mu bihumbi 45, bakaba baje kwirebera imbonankubone Perezida Kagame yongera kurahirira kubageza ku byiza byiyongera ku byo yagejeje ku Banyarwanda mu myaka ishize.

Bamwe mu bavuganye n’itangazamakuru bavuze ko bataryamye mu ijoro rishyira kuri iki Cyumweru kuko badashobora kuryama batarangije ubukwe bateguye.

Bamwe kandi bavuze ko bafata amatora y’u Rwanda nk’ubukwe, naho kurahira bikaba gutwikurura ari byo bifuza gukora kugira ngo basubire mu ngamba z’ibikorwa byo kubaka Igihugu no kugiteza imbere.

Si abanyarwanda gusa baje kwifatanya na Perezida Kagame muri ibi birori, kuko Abakuru b’Ibihugu na za Guverinoma 22, ba Visi Perezida batatu b’Ibihugu, ba Minisitiri b’Intebe babiri, Minisitiri w’Intebe Wungirije umwe, ba Perezida babiri b’Inteko zishinga Amategeko, Abayobozi batanu b’Imiryango Mpuzamahanga ndetse n’Imiryango yo mu Karere, n’izindi ntumwa nyinshi zitandukanye, na bo bitabiriye ibi birori.

Mu banyacyubahiro bitabiriye ibi birori harimo Andry Rajoelina wa Madagascal, Wavel Ramkalawan wa Seychelles, Dr William Samoei Ruto wa Kenya, João Lourenço wa Angola, Denis Sassou N’guesso wa Congo-Brazzaville, Gen Mamadi Doumbouya wa Guinée-Conakry, Gen. Clotaire Oligui Nguema wa Gabon, Faustin-Archange Touadéra wa Repubulika ya Santarafurika, Philippe Nyusi wa Mozambique, Perezida Sahle-Work Zewde wa Ethiopia, Samia Suluhu Hassan wa Tanzania, Ismaïl Omar Guelleh wa Djibouti, Hassan Cheikh Mohamoud wa Somalia, Salva Kiir Mayardit wa Sudani y’Epfo, Gen Abdel Fattah al-Burhane wa Sudani, Umwami Mswati III wa Eswatini, Perezida Mokgweetsi Masisi wa Botswana, Hakainde Hichilema wa Zambia, Emmerson Mnangagwa wa Zimbabwe, Perezida Nana Akufo-Addo wa Ghana, Umaro Sissoco Embaló wa Guinée-Bissau, Faure Essozimna Gnassingbé wa Togo.

Uretse abakuru b’ibihugu, hari n’abahagarariye ibihugu byabo barimo Maropene Ramokgopa Minisitiri w’Igenamigambi wa Afurika y’Epfo, Ousmane Sonko Minisitiri w’Intebe wa Sénégal, Jessica Rose Epel Alupo Visi-Perezida wa Uganda uri kumwe n’Umugaba Mukuru w’Ingabo za Uganda, Gen Muhoozi Kainerugaba, Patrice Trovoada Minisitiri w’Intebe wa Sao Tomé, Abdoulaye Diop w’Ububanyi n’Amahanga wa Mali, Olusegun Obasanjo wahoze ari Perezida wa Nigeria, Tiémoko Meyliet Koné Visi-Perezida wa Côte d’Ivoire, Ibrahim Boughali Perezida w’Inteko Ishinga Amategeko ya Algérie, Moussa Faki Mahamat Perezida wa Komisiyo y’Umuryango wa Afurika yunze Ubumwe na Louise Mushikiwabo Umunyamabanga Mukuru w’Umuryango Mpuzamahanga w’Ibihugu bikoresha ururimi rw’Igifaransa.

Tariki 18 Kanama 2017 ubwo Perezida Kagame aheruka kurahirira kuyobora u Rwanda, yatangaje ko gukorera Abanyarwanda ari ishema, ashima icyizere bakomeza kumugaragariza.

Yagize ati “Ndagira ngo mbashimire by’umwihariko, icyizere mwongeye kungirira. Ikiruta ariko, ni icyizere mwifitiye ubwanyu n’ikiri hagati yacu. Gukomeza kubakorera, ni ishema ryinshi kuri njye."

Bimwe mu byo Abanyarwanda bashimira Perezida Kagame harimo uburyo yagura umubano w’u Rwanda n’amahanga, ndetse u Rwanda akaruhesha ishema ku rwego mpuzamahanga. Abanyarwanda kandi bamushimira uruhare rwe mu mutekano u Rwanda rufite, kugeza ubwo rufasha ibindi bihugu by’amahanga kugarura umutekano muri ibyo bihugu.

Abahagarariye ibihugu byabo mu Rwanda bageze kuri Stade Amahoro ahagiye kubera Umuhango wo kwakira Indahiro ya Perezida wa Repubulika Paul Kagame

Icyimpaye Rosette benshi bamumenye ubwo yaserukanaga ikanzu y’umweru y’ubukwe mu gihe cyo kwiyamamaza. Ubu nabwo mu kurahira yaserukanye ikanzu iri mu mabara y’ibendera ry’Igihugu

Ku munsi wo gusoza ibikorwa byo kwiyamamaza i Gahanga muri Kicukiro ni uko yari yaserutse

Umukazana Germaine, umunyamakuru wa KT Radio (wambaye imyenda itukura) ni umwe mu bashyushyarugamba muri ibi birori

Umuhanzi King James asusurutsa abitabiriye ibirori

Akarasisi kari mu byashimishije abari muri Stade Amahoro

Amwe mu mafoto y’Abayobozi bakuru b’Ibihugu na Guverinoma bitabiriye uyu muhango:

Perezida wa Repubulika Paul Kagame na Madamu Jeannette Kagame ubwo bari bageze muri Stade Amahoro

Amafoto: Eric Ruzindana/Kigali Today, RBA & Ibiro by’Umukuru w’Igihugu

Ku musozi wa Nengo uzwiho amateka y’intambara ya mbere y’Isi hatangijwe ubukerarugendo

Gisagara Karim wateguye ubukererugendo ku musozi wa Nengo avuga ko ubukererugendo ku musozi wa Nengo butwara amasaha abiri cyangwa amasaha atatu bukaba buje kwiyongera ku bindi byiza bisanzwe biboneka mu mujyi wa Gisenyi.

Gisagara avuga ko gusura Nengo bituma umuntu ashobora kuruhuka no kureba ibyiza bya Gisenyi, ariko kandi ari ubukerarugendo buzafasha abahaturiye kubona imirimo.

Yagize ati "Imirimo ikorerwa aha itanga akazi, kandi duteganya gushyiraho isoko ry’ibikorwa n’abaturage (ubukorikori) bibafashe kwivana mu bukene, izi ni inyungu ku baturiye umusozi wa Nengo".

Iyo uri kuri uyu musozi uba ureba ibyiza by’Umujyi wa Rubavu

Umwe mu mwihariko wa Nengo, ni amateka y’intambara ya mbere y’isi yose, aho abahasuye bashobora kureba indaki yakoreshejwe n’Abadage mu ntambara y’isi yose bahanganyemo n’Ababiligi.

Gisagara avuga ko uretse kuzamuka umusozi wa Nengo gusa, abawusura bakunda gusenga bateguriwe aho gusengera.

Guverineri w’Intara y’Iburengerazuba Dushimimana Lambert avuga ko ubukererugendo bwa Nengo buzafasha abatuye Intara ayobora kureba ibyiza biri ku misozi ihabarizwa bikabyazwa umusaruro.

Abageze kuri uyu musozi bagenewe n’uburyo bubafasha kuruhuka

Agira ati "Ni amahirwe kugira abantu bafite ibitekerezo ku bukerarugendo bashobora kubyaza umusaruro ibyiza biri ku misozi yacu, ni byiza ko umusozi ubaye ibyiza bizajya biranga Akarere ka Rubavu n’Intara muri rusange, twifuza ko ibyo turi kubona hano no mu tundi Turere nabyo byabyazwa umusaruro."

Guverineri w’Intara y’Iburengerazuba avuga ko bagiye gushishikariza abaturage kuzamuka imisozi baruhuka, aho kubirekera abanyamahanga gusa.

Ubukerarugendo bwa Nengo buteganya kuzajya busurwa n’abantu 960, ndetse bakaba bateganya ko abantu bazajya biyongeraho 20% buri mwaka.

Kuri uyu musozi haboneka n’imva z’abasirikare b’abadage baguye mu ntambara ya mbere y’Isi

"Ubu dutangiye kubara kandi duteganya ko mu mwaka wa mbere tuzakira ba mukerarugendo 960, bagomba kuzajya biyongeraho 20% buri mwaka, kandi ibi bizajya bifasha abaturage baturiye uyu musozi haba guhanga umurimo no kwinjiza amafaranga."

Uretse ubukerarugendo bwo kuzamuka umusozi wa Nengo wakoreshejwe n’Abadage mu kurwanya Ababiligi, mu Karere ka Rubavu haboneka n’imva z’abasirikare b’abadage baguye muri iyo ntambara, hamwe naho abasirikare b’abadage bakoreraga imyitozo mu kuzamuka umusozi.

Zimwe mu mva ziboneka kuri uyu musozi

Akarere ka Rubavu kashyikirijwe ubukarabiro mu gukumira indwara ziterwa n’isuku nke

Ni ubukarabiro bwagiye bwubakwa mu Turere twegereye imipaka mu korohereza urujya n’uruza mu gukumira indwara zandurira mu isuku nke.

Uyu mushinga ukaba uri muri gahunda yo kubaka ubukarabiro 43 mu bihugu biri mu muryango wa Afurika y’Iburasirazuba (EAC) birimo Uganda, Tanzania, Sudani y’Epfo, u Rwanda n’u Burundi .

Ubu bukarabiro bwubatswe mu byiciro bibiri kuva mu mwaka wa 2021, hagamijwe gufasha abambukiranya imipaka n’abatuye mu bihugu bya EAC guhangana n’icyorezo cya Covid-19 n’izindi ndwara zandura abantu bakoranyeho.

Ni ubukarabiro buzafsha abaturage bakora ibikorwa byambukiranya umupaka

Ambasaderi w’u Budage mu Rwanda, Heike Uta Dettmann atangaza ko Igihugu cye ari umufatanyabikorwa mwiza mu bihugu bakoreramo bakaba barashimye gukorana n’umuryango wa EAC mu gufasha abatuye Akarere gukumira icyorezo cya Covid-19 n’izindi ndwara zandurira mu gusuhuzanya.

Agira ati "Igihugu cy’u Budage gifite gukorana neza n’abafatanyabikorwa bacyo kandi ubuyobozi bwa EAC bwagaragaje umushinga wo kubaka ubukarabiro mu bihugu biwugize dusanga ari ngombwa mu gufasha abatuye Akarere, tubitera inkunga."

Akomeza avuga ko ari ibikorwa bizafasha abatuye umuryango kwirinda indwara ziterwa n’suku nke "Twizera ko ari ibikorwa bizafasha abatuye Akarere n’ibihugu, Igihugu cy’u Budage kikazakomeza guteza imbere imishinga iteza imbere abana n’Abanyagihugu".

Ariik Aguer Malueth umunyamabanga wungirije wa EAC avuga ko icyo bashyize imbere ari ukoroshya ubuhahirane hagati y’ibihugu bigize umuryango wa EAC kandi urujya n’uruza rujyana n’ubuzima bwiza.

Ati "Twarebye umupaka wa Rubavu dusanga ukoreshwa n’abantu benshi bagera ku bihumbi 7 ku munsi, icyo twifuza ni uko abagize umuryango wa EAC bakomeza guhahirana, twashyizeho ubukarabiro kuko twizera ko buzabarinda indwara ziterwa n’isuku nke, bakore ubucuruzi bafite ubuzima bwiza".

Ubuyobozi bwa IOM butangaza ko ubukarabiro bwubatswe mu muryango wa EAC ari 43 kandi bwashyizwe ahahurira abantu benshi bukazafasha nibura abagera kuri miliyoni 6, naho mu Rwanda hakaba harubatswe ubugera kuri 16 harimo bune bwubatswe mu Karere ka Rubavu, Nyagatare 3, Musanze 4, Kirehe 4 naho Bugesera hubakwa bumwe (1).

Uyu mushinga umaze kubaka ubukarabirabiro bugera kuri 43 mu bihugu bitandukanye byo muri EAC

Ubwiherero bubiri (2) bwubatswe mu Karere ka Rubavu bwashyize mu isoko rya Majengo mu Mujyi wa Gisenyi, naho ubundi bufite n’ubwiherero bwashyizwe mu murenge wa Rugerero ahashyizwe ikibuga cyakira abahuye n’ibiza mu Karere ka Rubavu, nicyo kibuga cyakiriye impunzi z’Abanyecongo baheruka guhunga iruka ry’ikirunga cya Nyiragongo.

Umuyobozi w’Akarere ka Rubavu Mulindwa Prosper avuga ko bakiriye neza ibikorwa byongera isuku mu Karere ka Rubavu, akavuga ko bizarinda indwara abatuye Akarere ayobora bagashobora kwiteza imbere.

Olive Lembe, umugore wa Joseph Kabila, yatangaje ko abantu batazwi umubare bateye urugo rwabo bakaruzenguruka bashaka kurutwika.

Abashyigikiye ubutegetsi buriho muri RDC bakunze kugaragaza ko badashira amakenga Joseph Kabila wahoze ayobora icyo gihugu

Amakuru avuga ko abashinzwe kurinda Joseph Kabila bahanganye n’urubyiruko rushyigikiye Perezida Tshisekedi rwateye urugo rwa Kabila, ndetse bari bambaye imyenda yanditseho Perezida Tshisekedi.

Urubyiruko rwiyise Force du Progrès rurwanya abatavuga rumwe na Perezida Felix Tshisekedi bashatse gutwika urugo rwa Joseph Kabila ruherereye muri Komini Gombe mu mujyi wa Kinshasa mbere ya saa sita kugeza aho abarinzi bakoresheje amasasu ndetse hafatwa babiri.

Olive Lembe Kabila, umugore wa Joseph Kabila yikomye bikomeye Perezida Felix Tshisekedi hamwe n’uwahoze ari Minisitiri w’Ingabo Jean Pierre Bemba, avuga ko bibaye ku nshuro ya kabiri urugo rwabo ruterwa bahari.

Yagize ati “Iki gihugu twakivukiyemo, tugikuriramo, kandi tugikoreramo, twizera Imana kuko twese ku isi turi abacumbitsi. Joseph Kabila yagiriye neza iki gihugu kandi azakomeza kuba umubyeyi wa Demokarasi. Turizera ko Imana zagenda ku bantu bose bashaka kubuza amahoro umuryango wa Joseph Kabila kuko hari benshi afitiye akamaro harimo n’iki gihugu. Iyi ni inshuro ya kabiri ibi bibaye duhari.”

Bamwe mu bavugwaho kugaba igitero ku rugo rwa Kabila bafashwe

Olive Lembe Kabila yatanze ubuhamya ko abari bateye bari bagamije kumwica ubwe kandi bari benshi.

Avuga ko bazengurutse urugo abandi bashaka kwica urugi ngo binjire mu rugo, ibi bikaba biterwa n’abakuyeho uburinzi bwari bwarashyizweho mu kurinda urugo rwa Joseph Kabila.

Agira ati “Tugomba kwihagararaho kuko iki ni igihugu cyacu, sinzi niba abashaka kutugirira nabi bashobora kutwumvisha ko twasiga abaturage n’igihugu cyacu.”

Olive Lembe Kabila avuga ko Perezida Kabila akunzwe n’abaturage benshi kandi abashatse kumugirira nabi Imana izabahana.

Ababyeyi b’abana bafite ubumuga bari kwigishwa uko bagomba kubitaho

Ubuyobozi bw’Ubumwe Community Center burimo kwigisha ababyeyi bo mu Karere ka Rubavu ku bufatanye n’umuryango Home for Hope Foundation kugira ngo bahindure imyumvire n’uburyo bafata abana bafite ubumuga.

Justin Nshimiyimana umuyobozi mu kigo Ubumwe Community Center avuga ko abana bafite ubumuga mu miryango batari babayeho neza bitewe n’uko ababyeyi bananiwe kwakira ubumuga bw’abana babo.

Agira ati “Abana babayeho ubuzima butari bwiza kubera umuryango wagize ihungabana bitewe n’ubumuga bw’abana, ababyeyi ntibarebe ko umwana ashobora gufashwa akagira ubuzima bwiza ejo hazaza, icyo dukora ni ukubigisha uko bita kuri aba bana, ariko nyuma tuzareba ibikoresho bakeneye babihabwe ndetse twite ku bushobozi bw’umuryango ku buryo wafashwa ukagira ushobozi mu kwita ku mwana.”

Nshimiyimana avuga ko icyo bifuza ari ukwereka ababyeyi ko abana bafite ubumuga ari abana nk’abandi kandi bafashijwe bashobora kugira icyo bakora. Mu myaka itatu bazafasha imiryango 48 ifite abana bafite ubumuga, umuryango ukazongererwa ubumenyi n’ubushobozi.

Tuzahirwa Vincent impuguke mu gufasha ababyeyi b’abana bafite ubumuga avuga ko hari inama ababyeyi bahabwa kugira ngo bafashe abana bafite ubumuga kandi bigatanga umusaruro.

Aba babyeyi bazahabwa ubumenyi ndetse banongererwe ubushobozi

Agira ati “Icya mbere ababyeyi b’abana bafite ubumuga basabwa birimo kwereka umwana urukundo, uko umwereka urukundo niko agenda akwiyumvamo, kumugirira isuku, kumuha indyo yuzuye, kumutoza gukora icyo ashoboye haba kugenda cyangwa gukina, kuvuga kugira ngo umwana abashe kugaragaza ibyo ashoboye.”

Tuzahirwa avuga ko umwana ufite ubumuga akenera abamuba hafi, agasaba ababyeyi kwegera umwana ufite ubumuga kuko iyo yitaweho bitanga umusaruro.

Ati “Uko umwana ufite ubumuga yitabwaho n’ababyeyi ni ko bamenya uburyo bwo kumumenya nibyo akeneye haba kumuvuza ndetse no gusabana na we, ni ngomba ko ababyeyi bombi bafatanya ku mwitaho.”

Habarugira Adrien utuye mu Murenge wa Cyanzarwe, avuga ko umwana wabo asabwa kwitabwaho igihe kinini, bigatuma mu muryango hakora umuntu umwe undi akamwitaho.

Agira ati “Ni ubuzima bugoye ariko nanone ni umwana wacu, nk’ubu kugira ngo yitabweho bisaba ko mama we amwitaho nkajya gushakisha imibereho, yaba ari mama we wagiye nkamugumaho, urumva nk’umuryango ufite abandi abana ntidukoresha imbaraga zose mu guteza imbere umuryango.”

Habarugira avuga ko ashima abatekereza kongerera ubumenyi ababyeyi b’abana bafite ubumuga kuko bibubakamo urukundo n’imbaraga mu kwita ku bana babo, agasaba ko bajya bafashwa no kubona ubufasha bw’ibikoresho kugira ngo abana bafite ubumuga barusheho kugira ubuzima bwiza.

Mukeshimana Marie Claire avuga ko umwana we afite ubumuga bukomatanyije, bigasaba ko igihe cyose aba iruhande rwe amukorera isuku. Avuga ko ari ubuzima bugoye ariko kuba yahuye n’abandi babyeyi b’abana bafite ubumuga yumvishe ko atari wenyine ahubwo hari abandi basangiye ibibazo.

Agira ati “Njye nabaga mu rugo nita ku mwana wanjye, ariko icyo nabonye ni uko hari n’abandi bafite abana bafite ubumuga, icyo nishimiye ni uko twashoboye kuganira, ndetse duhabwa ubumenyi bw’uko tugomba kubitaho, ndizera ko hari impinduka ku mwana wanjye ni nubahiriza inama nahawe.”

Mukeshimana avuga ko mu byo akeneye kugira ngo ashobore kwita ku mwana we harimo gufashwa gukorera ubucuruzi aho atuye kugira ngo akomeze gufasha umwana we atavuye aho ari.

Justin Nshimiyimana avuga ko mu myaka itatu bazakurikirana imiryango 48 ifite abana bafite ubumuga mu Karere ka Rubavu bakazabafasha kububakira ubushobozi buzatanga impinduka ku mibereho y’umuryango n’ubuzima bw’umwana ufite ubumuga.

Ibarura Rusange ryakozwe muri 2022 ryagaragaje ko abantu bafite ubumuga mu Rwanda bagera ku 391,775, bangana na 3,4% bya miliyoni 13,24 z’abatuye u Rwanda.

Muri aba, abagore bafite ubumuga ni 216,826 naho abagabo ni 174,949. Intara y’Iburasirazuba ifite umubare munini aho abafite ubumuga ari 109,405 naho Intara y’Amajyepfo ifite 98,337.

Intara y’Uburengerazuba abafite ubumuga bangana na 88,967, Amajyaruguru ni 60,336 naho Umujyi wa Kigali ubarurwamo abafite ubumuga 34,730.

Abafite ubumuga bukomatanyije bagaragaje imbogamizi bafite mu bizamini bakora

Mu Karere ka Rubavu ku Kigo cy’amashuri Umubano wa mbere, hari abanyeshuri babiri barimo gukora ikizamini gisoza amasomo y’icyiciro cya mbere cy’amashuri yisumbuye bavuga ko biteguye neza kandi biteguye gutsinda, uretse zimwe mu mbogamizi bagaragarije ubuyobozi.

Nubwo batangiriye ku mibare bavuga ko ntakibazo bafite, ahubwo impungenge ziri ku buryo ibizamini by’indimi bitegurwa kuko usanga bitegurwa hatitawe ku bafite ubumuga bukomatanyije bakoresha ururimi rw’amarenga.

Ishimwe Pacifique, umuyobozi wungirije w’Akarere ka Rubavu ushinzwe imibereho myiza y’abaturage avuga ko zimwe mu mbogamizi bagaragarijwe n’abana bakora ikizamini harimo amasomo y’Ikinyarwanda aho babazwa amasaku n’ubutinde kandi batayakoresha.

Dr Mbarishimana asuzuma ibizami bikorwa n’abafite ubumuga

Agira ati “Hakozwe ubuvugizi ku bibazo by’amasaku n’ubutinde bisimbuzwa ibindi bibazo, ariko hari aho bashyiramo ibyivugo n’imigani kandi nabyo byigirwa mu miryango, mu gihe tubizi ko Abanyarwanda benshi batazi ururimi rw’amarenga, bigatuma ubwo bumenyi abafite ubumuga batabubonera mu miryango. Tukaba dusaba ko byazajya bisimbuzwa ibindi bibazo bashobora gusubiza.”

Abana babiri barimo gukora ibizamini mu Karere ka Rubavu bafashijwe kwiga n’ikigo cyita ku bafite ubumuga ndetse gifite ishuri ritanga uburezi budaheza, Ubumwe Community Center (UCC) aho abana bashoboye gutsinda amashuri abanza gikomeza kubakurikirana n’aho bajyanywe kwiga.

Ishimwe Pacifique avuga ko bagenzuye ko abana bafite ubumuga bukomatanyije biteguye neza ibizamini bya leta bagaragarizwa ibibazo bafite harimo impungenge z’uko abazakosora indimi bagomba kuba bazi indimi z’amarenga nk’aho abakoresha ururimi rw’amarenga mu Kinyarwanda bakoresha inshinga ziri mu mbundo.

Kimwe mu bibazo bagaragaje kiri mu bizamini by’indimi harimo Ikinyarwanda

Agira ati “Abakoresha ururimi rw’amarenga bakoresha inshinga ziri mu mbundo, urugero nk’interuro ivuga ngo Kamali yagiye, [….]abakoresha amarenga bavuga Kamali kugenda, [….], iyo ufite ubumuga yanditse kugenda mu mwanya wa yagiye, ukosora agira ngo yabyishe kandi ari uko bandika, tukaba dusaba ko abakosora abafite ubumuga baba bazi ururimi rw’amarenga.”

Ishimwe akomeza asaba ko ubuyobozi bugomba gutekereza ku bigo abana bafite ubumuga bukomatanyije bazoherezwaho kuko bakenera abarimu bazi ururimi rw’amarenga.

Abanyeshuri barimo gukora ibizamini bize mu ishuri ry’Ubumwe Community Center (UCC) mu Karere ka Rubavu ritanga uburezi budaheza, ndetse bamaze no gutsinda boherejwe ku kigo bakomeza gukurikiranwa n’ubuyobozi bwa UCC aho buboherereza abarimu bazi ururimi rw’amarenga babafasha gusubira mu masomo no kubasobanurira.

Umuyobozi w’ikigo cy’Igihugu gishinzwe uburezi mu Rwanda (REB), Dr Nelson Mbarushimana avuga ko kuba hari abanyeshuri bafite ubumuga bukomatanyije bigana n’abandi kugera aho bakorana ibizamini bigaragaza ko abafite ubumuga bashoboye kandi bakeneye kugirirwa icyizere no gufashwa.

Agira ati “ibi biragaragaza ko abafite ubumuga bashoboye, icyo badukeneyeho ni ubufasha bwaho bagowe, kandi turasaba n’abandi babyeyi kujyana abana ku ishuri bagafashwa kwiga.”

Dr Mbarushimana avuga ko ku mbogamizi zagaragajwe ku banyeshuri barimo gukora ibizamini zizashakirwa ibisubizo kugira ngo bashobore gukomeza kwiga.

Abanyeshuri batangiye ibizamini basabwe gukunda Igihugu n’umurimo

Umuyobozi wa REB watangije ibizami mu Karere ka Rubavu kuri uyu wa 23 Nyakanga 2024, yababwiye ko umunyeshuri urangwa n’indangagaciro ashobora gutegura ejo hazaza heza, ndetse kandi ko ikizami cyoroshye kuko cyateguwe hashingiwe ku byo bigishijwe.

Dr Mbarishimana ashimira n’ababyeyi bohereza abana ku ishuri ndetse ntibacikirize amasomo agira ati “Icyambere ni ukubashimira bagize umuhate, ntabwo bataye ishuri, dushimira ababyeyi n’ababarera, tugasaba ababyeyi guherekeza abana kuva mu mashuri y’inshuke kugera amashuri yisumbuye kuko ibi ni umusaruro mwiza w’ibyagezweho.”

Dr Mbarushimana asaba abanyeshuri bakoze ibizamini kuzirikana ko aribo mbaraga z’Igihugu kuko ejo bazatangira kwihangira umurimo bagendeye ku bumenyi bakuye mu ishuri, naho abandi bakomeze kaminuza bashaka kwicyemurira ibibazo no kubikemurira Igihugu.

Ubuyobozi bwa REB buvuga ko integanyanyigisho yigishwa ifasha abana kugira indangagaciro z’Ubunyarwanda no gutanga ubumenyi bubafasha gukemura ibibazo bahura nabyo ariko no kwitegura ejo hazaza.

Naho kubirebana no kuzamura ireme ry’ubuzima, Dr Mbarushimana avuga ko bashyizeho gahunda ifasha abana kumva amasomo y’Imibare, Ikinyarwanda n’Icyongereza aho kuva mu ntangiriro z’ukwezi kwa Kanama abana biga mu myaka itatu ibanza bayatsinzwe bazafashwa kuyasubiramo hakazarebwa abazatsinda bakimuka.

Abanyeshuri bakoze ibizami bisoza icyiciro cy’amashuri yisumbuye bangana na 56,537 mu gihe abarangiza icyiciro rusange bangana na 143,842, abarangiza TTC ni 4,068 naho TSS ni 30,922.

MINEDUC igaragaza ko abanyeshuri 235,572 aribo bazakora ibizamini bisoza umwaka w’amashuri wa 2023/2024 mu byiciro byose, bakaba bariyongereyeho 23,078 ugereranyije n’umwaka w’amashuri wabanje, aho abakoze bari 212,494.

Saa kumi n’ebyiri za mugitondo imipaka ihuza Goma na Gisenyi yari ifunguye, imodoka zitwaye imicanga n’ibicuruzwa zambuka. Abantu bakeya nibo barimo binjira mu Rwanda bavuga ko baje gutora, naho Abanyecongo batuye mu Rwanda bambuka bajya mu kazi.

Nubwo umupaka ufunguriwe buri wese Abanyarwanda bajya muri Congo ni bakeya, abavuganye na Kigali Today bavuga babanje kujya gutora bakabona kujya mu bikorwa byabo.

Kuri site ziberaho itora abantu si benshi kuko bamwe bazindutse bakabikora kare, kandi nabwo bari ku byumba bagomba gutoreraho.

Ku kigo cy’ishuri Umubano 1, ahatoreye abaturage batuye mu kagari ka Mbugangari, mu Murenge wa Gisenyi, ukuriye site y’ itora saa moya zuzuye yabanje kwibutsa abakorerabushake b’amatora inshingano zabo, ubundi arabarahiza.

Abafite ibikoresho birimo n’udusanduku tw’itora dushyirwamo amajwi basabwe kubifungura bakagaragariza abaturage ko ntakintu kirimo, maze babona kujya mu byumba by’itora.

Mu cyumba cy’ itora umuturage arabanza kwerekana indangamuntu agashakwa ku rutonde, agahabwa urupapuro rw’itora ruriho abakandida biyamamariza kuba Perezida, bakajya mu cyumba bihereramo bagatora, umuturage umaze gutora Perezida ahabwa urupapuro ruriho Abadepite narwo agatora akabona gushyirwaho akamenyetso ko yatoye agasohoka.

Ukuriye site y’itora yabanje kurahiza abakorerabushake

Kimwe mu bibazo biboneka ni abantu batari ku rutonde rw’itora kandi batiyimuye, gusa Komisiyo y’Amatora NEC yasohoye itangazo rivuga ko abatarabashije kwiyimura bemerewe gutorera kuri site z’itora zibegereye nyuma yo kugenzura ko banditse kuri lisiti y’itora, bagashyirwa ku mugereka.

Imirwano yakomeje mu gihe Amerika yasabye ko habaho agahenge

Ubuyobozi bw’ibiro bya Perezida wa Leta Zunze Ubumwe za Amerika, tariki 4 Nyakanga 2024 bwatangaje ko bwasabye ko impande zirwana mu Burasirazuba bwa Congo zitanga agahenge k’ibyumweru bibiri kuva tariki 5 kugera tariki 19 Nyakanga 2024.

Adrienne Watson, umuvugizi w’akanama gashinzwe umutekano, yagize ati “agahenge kareba ibice biri mu mirwano kandi birimo abaturage benshi bakeneye ubutabazi.”

Watson avuga ko impande zihanganye zemeye aka gahenge, ariko tariki 7 Nyakanga 2024 imirwano yakomeje mu bice bya Lubero aho abarwanyi ba M23 bavuga ko bakomeje kugabwaho ibitero n’ingabo za FARDC zifatanyije na Wazalendo.

Ahitwa Kasando muri Komini ya Kirumba, mu gace gasanzwemo ibikorwa byo kwakira abarwanyi bitandukanya n’imitwe yitwaza intwaro ni ho habereye imirwano, ndetse abarwanyi ba M23 bakaba bashoboye gutwika iki kigo cyarimo abarwanyi ba Wazalendo na FARDC.

Kambale Kinyali Yuston, umuyobozi w’ikigo cyakira abitandukanyije n’imitwe yitwaza intwaro, avuga ko kuba iki kigo cyangijwe n’imirwano ihuje abarwanyi ba M23 na Wazalendo bishobora gukoma mu nkokora ibikorwa byo kwambura intwaro abarwanyi b’imitwe yitwaza intwaro.

Yagize ati “Imirwano hagati ya M23 na Wazalendo ihagaritse ibikorwa byo kwambura intwaro imitwe yitwaza intwaro mu bice bya Kirumba, Kayna, Miriki na Kanyabayonga, kandi bizagira ingaruka ku kazi kacu n’umutekano w’abaturage.”

Ibice bya Kirumba, Kayna, Miriki na Kanyabayonga muri Teritwari ya Lubero ni hamwe hazwi nk’indiri y’abarwanyi ba FDLR, ndetse bamaze gutura, bakahakorera ibikorwa by’ubuhinzi n’ubucuruzi.

Abaturage bakomeje gukurwa mu byabo n’imirwano ihuje ingabo za Leta na M23

Kuba hamaze kwigarurirwa n’abarwanyi ba M23 byaciye intege ingabo za FARDC kuko bishobora gufungurira M23 gufata ibindi bice muri Butembo na Beni.

Mu gihe agahenge katarimo kubahirizwa, ubuyobozi bw’u Rwanda na Repubulika Iharanira Demokarasi ya Congo batangiye inzira y’ibiganiro i Zanzibar muri Tanzania.

Tariki 7 Nyakanga 2024 uwungirije Minisitiri w’ububanyi n’amahanga muri DRC, Gracia Yamba na Minisitiri w’u Rwanda, Olivier Nduhungirehe, bahuriye muri Tanzania ku buhuza bwa Tanzania na Sudani y’Epfo.

Paul Kagame afatwa nk’impano Abanyarwanda bahawe n’Imana

Mundebe Aliane umubyeyi w’imyaka 60 utuye mu murenge wa Ruhango mu Karere ka Rutsiro avuga ko ababazwa no kuba Perezida Kagame agenda asaza, akibaza niba Abanyarwanda bazabona undi muyobozi umeze nkawe.

Mu kiganiro yahaye Kigali Today, avuga ko bitewe naho Perezida Paul Kagame yakuye Abanyarwanda amufata nk’impano yavuye ku Mana kugira ngo abomore ibikomere bahuye nabyo.

Agira ati “Imyaka 30 irangiye ni urugendo rukomeye ku Banyarwanda; bafite umutekano n’iterambere, imibereho myiza yageze kuri bose.”

Akomeza agira ati “Urabona ndi umubyeyi w’imyaka 60, naravutse nsanga ababyeyi bacu bataryama munzu, ariko ubu twe imyaka 30 tuyimaze turyama mu nzu, dufite mutekano, Jenoside yadutwaye ababyeyi n’ibintu, ariko Paul Kagame yaraje aradusanasana, ababyeyi aratumenya, abana abaha kwiga, mbere ya Jenoside hariho ivangura ribuza bamwe kwiga, ariko Kagame yaraje yubaka amashuri, amavuriro, aduha Mituweli, girinka iraza, abarokotse Jenoside yakorewe abatutsi tubona amacumbi, ubuzima burongera buragaruka ninde watekerezaga ko byashoboka? Uyu mubyeyi ni impano twahawe.”

Abaturage bakoresha umuhanda wa Karongi, Rutsiro na Rubavu, bavuga ko badashobora kubona icyo bashima kiruta umuhanda wa Kivu Belt bahawe kuko wabaruhuye kugenda amaguru.

Mundebe Aliane umubyeyi w’imyaka 60 (Uri inyuma hagati)

Ni umuhanda watangiye gukorwa kuva 2014 uhuza uturere twa Rusizi, Nyamasheke, Karongi, Rutsiro na Rubavu, ukaba umuhanda ugenda witegeye Ikiyaga cya Kivu ariko wafashije abatuye Intara y’Iburengerazuba kugenderana no guhahirana nyuma y’uko batari bafite n’ubwato buhagije mu Kiyaga cya Kivu.

Mundebe avuga ko Abanyakarongi na Rutsiro yabaruhuye kugenda n’amaguru kuko mbere batari bafite imodoka zitwara abagenzi kubera umuhanda mubi. Ati “yaduhaye umuhanda uduhuza na Rubavu, mbere wari igitaka, umuhanda washyizweho amatara, twabonye amazi meza turavoma, ubuzima bumeze neza.”

Aho Umukandida wa FPR-Inkotanyi anyura yiyamamaza agaragarizwa urukundo n’abaturage benshi bavug ako ariwe bashaka, abatuye mu Karere ka Rutsiro, bavuga ko barangije gutora icyo bategereje ari itariki ya 15 Nyakanga bakemeza ibyo basezeranyije umukandida wa FPR-Inkotanyi.

Dr Telesphore Ndabamenye

Ku munsi wa karindwi w’ibikorwa byo kwamamaza Chairman wa FPR, Paul Kagame wari utegerejwe n’abaturage benshi ku kibuga cya Kagano mu Karere ka Nyamasheke, Dr Ndabamenye yavuze ko muri aka Karere bamukunda kandi bamwishimiye bitewe n’ibyiza byinshi yabagejejeho bishingiye ku miyoborere ye myiza.

Yavuze ko mbere Nyamasheke itafatwaga nk’akarere k’u Rwanda, ariko ubu byamaze guhinduka babikesha Chairman wa FPR-Inkotanyi, Paul Kagame.

Ati “Chairman ni we wa mbere washushanyije ikarita y’u Rwanda, adukura kuri Banyarwanda namwe Banyacyangugu, adushyira ku ikarita y’u Rwanda iriho uturere 30 harimo n’akarere ka Nyamasheke."

Mu gushimangira imiyoborere myiza ya Kagame ishingiye ku guteza imbere imibereho myiza y’abaturage begerezwa iby’ibanze bakeneye, Dr Ndabamenye yavuze ko aho yagenze hose mu mahanga ntaho yigeze abona umuyobozi ufata umuhanda w’ibilometero n’ibilometero, kuri buri metero ijana agashyiraho itara ndetse muri Nyungwe akahashyira Ingabo zatumye Akarere ka Nyamasheke gasigaye gafite umutekano udadiye.

Yagize ati, "Ibikorwa byanyu birivugira kuko aho abantu batinya mwahashyize umutekano ndetse muhashyira amahoteli nka One and Only yubashywe cyane."

Yakomeje agira ati, "Narize ndaminuje, naminurije mu Buholandi n’Afurika y’Epfo, ngiye gutaha bansaba kumpa akazi, ariko imiyoborere myiza yanyu yatumye ngaruka mu Rwanda."

Dr Ndabamenye avuga ko ikintu gikomeye Perezida Kagame yakoze ari ugufasha abaturage kwiteza imbere binyuze mu buhinzi bw’icyayi ahari ubwatsi bw’amashinge ndetse igiciro cyacyo kiriyongera aho ikilo kigeze ku mafaranga 300.

Mu myaka irindwi ishize mu Karere ka Nyamasheke bashimira Paul Kagame ko yabagejeje ku bikorwa bitandukanye bibateza imbere birimo ibikorwa remezo nk’imihanda, kwegerezwa amashanyarazi hubakwa urugomero rw’amashanyarazi rwa Nyirantaruko rufite ubushobozi bwo gutanga MW 1840. Ingo zifite amashanyarazi zavuye ku 20.639 muri Kamena 2017 zigera ku 74.140.

Abaturage b’Akarere ka Nyamasheke kandi bakomeje gufashwa mu rugendo rwo kwikura mu bukene, bahabwa amatungo magufi. Hubatswe kandi imidugudu itandatu y’icyitegerezo ari yo Bushekeri, Mataba, Kamabuye, Ruhinga, Kamina na Kabarore.

Bashima Chairman wa FPR kuba yarateje imbere uburezi, ndetse Nyamasheke babona Kaminuza ya Kibogora, mu gihe abari bahatuye bakoraga ingendo ndende bajya gushaka Kaminuza i Kigali.

Kureba andi mafoto menshi, kanda HANO

Reba muri iyi Video uko byari byifashe mu kwamamaza Kagame i Nyamasheke:

Perezida Kagame yasabye abanyarwanda kwirinda macakubiri

Yagize ati, "Ntawe twabuza kugira idini iri n’iri n’ubwoko ubu n’ubu, icyo duharanira ni ukuba umunyarwanda, ikindi icyo aricyo cyose washaka wakiba mu gihe kitabangamira abandi batari nkawe."

Yakomeje avuga ko iyo abantu bamaze kwiyumvamo kuba Umunyarwanda hibazwa icyo uwo muntu afite akaba ariho hashyirwa imbaraga.

Agira ati "Niho duhera twubaka ubukungu, ubuhinzi n’ubworozi bizamuka bikaba ibya kijyambere, kwikorera bakishingira imirimo bakiteza imbere, kwiga bakagira ubumenyi."

Umukandida wa FPR-Inkotanyi avuga ko buri wese afite ubwenge ariko adafite ubumenyi kuko ubumenyi bushakwa. Agira ati "Turifuza rero ko Umunyarwanda yiga, akagira ubumenyi akagarukira aho ashaka hose."

Chairman wa FPR, Paul Kagame avuga ko yifuza ko Abanyarwanda bagira ubuzima bwiza, ibikorwa remezo bikagera kuri bose ndetse ibitaro bikubakwa neza atari aho bavugutira imiti mu gikari.

Ati, "N’iyo mihanda mwavuze, amashanyarazi, n’ibikorwa remezo byose, hari ibimaze kugerwaho ariko hari ibindi dushaka kubaka, kandi twabigeraho dufite ubufasha bwanyu mu gikorwa dutegereje imbere tariki 15 Nyakanga 2024, namwe mukongeraho uruhare rwanyu."

Kagame yabwiye abatuye i Nyamasheke ko bazagera ku nganda n’ibindi Abanyarwanda bakenera bakihaza ndetse bagasagurira amahanga mu gihe bafite ibyangombwa byose.

Kimwe mubyo anenga ni uburyo hari ibicuruzwa byoherezwa hanze ku giciro gito bikongererwa agaciro bikagaruka bihenze.

Asaba ko Abanyarwanda bagomba kugira ubumenyi bwongera agaciro ibikorerwa mu Rwanda kuko bitanga akazi ku banyarwanda kandi nibyo FPR-Inkotanyi yifuriza Abanyarwanda.

Ati, "Icyo tubatezeho mwebwe rubyiruko rwacu n’abandi, ntimukitinye, ntimukagire umususu mu gihe cy’ibikorwa bya buri munsi, nibisaba ubumenyi dushake uko tubwongera."

Akomeza agira ati "Tike ya FPR irimo ubufasha ku bashaka kugira ibyo bakora, mujye mutinya ikibi ibindi ntimukitinye, ibidashobotse abantu babifatanya bigashoboka."

Umukandida wa FPR-Inkotanyi yasabye urubyiruko kugana ubuyobozi. Ati "Mubabwire muti turakora ibi, muradufasha iki?."

Yabwiye abaturage b’Akarere ka Nyamasheke ko ibyiza biri imbere, bahereye ku mutekano n’imiyoborere myiza bujyana no gukora kuko hashingiwe kuri ibyo ntagishobora kubananira.

Kureba andi mafoto menshi, kanda HANO

Reba muri iyi Video uko byari byifashe mu kwamamaza Kagame i Nyamasheke:

Mukabaramba wamamaje umukandida wa FPR-Inkotanyi ku mwanya wa Perezida yavuze ko ishyaka rye ryahisemo neza gufatanya na FPR kwamamaza Paul Kagame, bitewe n’agaciro aha indi mitwe ya politiki kuko bigaragaza kubaka ubumwe.

Agira ati "Abayobozi ba kera bananiwe gufatanya, bananirwa no kuyobora ahubwo bimakaza ivangura ryagejeje u Rwanda kuri Jenoside yakorewe abatutsi."

Mukabaramba Alvera

Mukabaramba avuga ko kwamamaza umukandida wa FPR-Inkotanyi bigoye kandi byoroshye kuko ibikorwa byivugira uhereye mu kuyobora urugamba rwo kubohora u Rwanda, kubaka Igihugu uhereye munsi ya zero, kugeza iterambere ku banyarwanda bose kugera mu bice by’icyaro birmo n’Umurenge wa Cyato uri kure.

Mukabaramba yavuze no ku bindi bikorwa remezo biri hirya no hino mu gihugu birimo Stade Amahoro yubatswe mu gihe gito, ati "Ku bwanjye nayise ’Bashize ivuga’."

Yakomeje agira ati "Mwaguye amarembo n’ibindi bihugu ku kiregero kiri hejuru hakoreshejwe indege ya Rwandair, kandi kera hahoze Air Rwanda imikorere yayo ntiyari isobanutse."

Mukabaramba avuga imiyoborere myiza ya Perezida Kagame yahaye ijambo umugore, ubwisungane mu kwivuza ndetse VUP itanga umusaruro.

Aha niho yashimiye umukandida wa FPR-Inkotanyi, Paul Kagame wubakiye abatuye Rusizi na Nyamasheke umuhanda wa Kivu belt, ati "Abatuye Rusizi na Nyamasheke umuhanda wa Kivu belt wadukuye mu bwigunge naho umutekano urigaragaza."

Mukabaramba yakomeje asaba abatuye Akarere ka Nyamasheke kwitura umukandida wa FPR-Inkotanyi bakamutora kumutora 100%. Abaturage bati, "Tumuhorane, tumuhorane washi".

Mukabaramba yasabye abatuye Nyamasheke gufasha umukandida wa FPR-Inkotanyi baharanira kuba abaturage beza kandi basigasira ibikorwa amaze kubagezaho n’aho urubyiruko rukareka kwishora mu biyobyabwenge.

Kureba andi mafoto menshi, kanda HANO

Reba muri iyi Video uko byari byifashe mu kwamamaza Kagame i Nyamasheke:

Nsenga Sandrine (ufite indangururamajwi) yashimye Kagame ku bw’inama aha Abanyarwanda zo gukora bakiteza imbere

Nsenga w’imyaka 25 avuga ko bitari gushoboka iyo atagira imiyoborere myiza kubera ubukene n’umurima wo guhinga ntawo yari afite ahubwo yahingaga mu mirima y’abandi bakagabana umusaruro.

Umukandida w’umuryango wa FPR-Inkotanyi saa tanu n’iminota 19 nibwo yari asesekaye mu murenge wa Kagano mu Karere ka Nyamasheke mu gikorwa cyo kwiyamamaza ku munsi wa Karindwi.

Imbaga y’abaturage benshi baje kumwakira bamweretse ibyishimo byo ku rwego rwo hejuru bavuga bati, "Muzehe wacu, muzehe wacu."

Perezida Kagame yasesekaye Kagano yambaye umupira w’umweru w’amaboko maremare uriho ibirango bya FPR Inkotanyi hamwe n’ipantalo y’umukara itandukanye nizo yari amaze iminsi yambaza zifite imifuka ku rihande "Pauche bombé".

Muneza de Grâce wayoboye ibiganiro byo kwamamaza umukandida w’Umuryango wa FPR-Inkotanyi yabwiye Kagame ko indongozi za Nyamasheke zimukunda kandi zifuza kumuhorana kubera ikoranabuhanga yabagejeho, umuhanda wa Kivu belt washyizwemo kaburimbo n’amatara na interineti ituma itumanaho ryihuta. Agira ati "Muzehe wacu tumuhorane washi"

Nsenga Sandrine ukora ubuhinzi bw’inyanya mu Karere ka Nyamasheke hamwe na Christian Ndayambaje ubyaza umusaruro ukomoka ku buhinzi bw’ibijumba, mu buhamya batanze babwiye Kagame ko batangiye ari ubuzima bugoye batira umurima bakagabana na nyiri umurima umusaruro uvuyemo ariko bishakamo ibisubizo kugera baguze umurima ndetse bafatirana amahirwe Igihugu gitanga.

Senga yavuze ko amaze kubona mu gihe cy’izuba umusaruro ugabanyuka, yashatse imirasire y’izuba izajya imufasha kuhira amazi avuye mu Kiyaga cya Kivu, bituma abasha guhinga mu bihe byose, bituma ava ku biro 50 yezaga agera kuri toni 3.

Aba bombi kandi bavuga ko bari mu batewe inkunga ya miliyoni 4 n’igice nyuma y’uko ibikorwa byabo bagizweho ingaruka n’icyorezo cya COVID-19.

Nsenga yavuze ko kugeza ubu ageze ku rwego agemurira inyanya mu Karere ka Rusizi na Karongi na Goma muri Repulika Iharanira Demukarasi ya Congo kandi ko ubucuruzi bwe akomeje no kubukorera ku ikoranabuhanga.

Nsenga avuga ko kubera iryo koranabuhanga ririmo TikTok, inyanya ze zisigaye zijya Congo Brazzaville kubera imiyoborere myiza.

Nsenga avuga ko urubyiruko rukomeje kurota kandi nibamara kumutora tariki 15 Nyakanga bizeye ko uruganda batangiye kubaka mu Murenge wa Nyabitekeri mu Karere ka Nyamasheke kugeza ubu rugeze ku gipimo cya 30% ruzatanga undi musaruro ufatika mu gutunga umusaruro ukomoka ku buhinzi bw’inyanya rukazivanamo Sauce Tomate na Ketchup.

Yashimiye Chairman wa FPR-Inkotanyi, Paul Kagame kubw’imiyoborere ye yateje imbere urubyiruko n’abana b’abakobwa, ndetse ko urubyiruko rwose rwiteguye kumuhundagazaho amajwi. Ati "Nk’urubyiro dufitanye igihango, tuzabatora ijana ku ijana."

Urubyiruko rwa Nyamasheke ruvuga ko kuba rufite Umuyobozi ukora cyane nabo bibasaba gukora cyane kugira ngo bongere umusaruro ndetse batange akazi no kugeza umusaruro w’ibyo bakora ku rwego mpuzamahanga.

Urubyiruko rw’i Nyamasheke rurashima imiyoborere y’umukandida wa FPR-Inkotanyi, Paul Kagame

Kureba andi mafoto menshi, kanda HANO

Reba muri iyi Video uko byari byifashe mu kwamamaza Kagame i Nyamasheke:

Agira “Twavuye kure. Mbere yo kuvugurura inzego z’imitegereke y’Igihugu, aha hitwaga i Cyangugu. Abayobozi bose bageraga aha baravugaga ngo ‘Banyarwanda, Banyarwandakazi namwe banya-Cyangugu […] Twashimishijwe n’uko mwaje muzana politiki itavangura, natwe twitwa Abanyarwanda.”

Yakomeje agira ati, "Uyu munsi twishimira ko ya mihanda mwatubwiye yatugezeho, imihanda yo mu kirere, mu mazi no ku butaka. Kuko Rwandair yatugezeho."

Nyirahabineza avuga ko abatuye Rusizi batagitinya imisozi kuko bahawe ibiraro bihuza imisozi. Ati, "Ubu Rusizi dufite amahoteli menshi, abakerarugendo babona aho barara. Bweyeye babonye umuhanda wa kaburimbo naho Nkombo babonye ubwato."

Nyirahabineza avuga ko abayobozi ba kera bavugaga ko bidashoboka ko amashanyarazi yambuka ikiyaga cya Kivu akagera ku kirwa cya Nkombo, ariko ubu baracana.

Avuga ko abaturage ba Bugarama bari barambuwe imirima bayisubiranye ubu bakaba bahinga umuceri.

Muri Rusizi byinshi bishimira birimo imihanda mishya no kwagura isanzwe kugira ngo Rusizi nka kamwe mu turere dufite imijyi yunganira uwa Kigali, ikomeze itere imbere.

Mu cyiciro cya mbere muri iyi gahunda yo guteza imbere imijyi, hubatswe imihanda ya kilometero 5,11 ku ngengo y’imari ya 5.444.976.714 Frw, mu gihe icyiciro cya kabiri kigizwe na kilometero 5,8 cyo cyatwaye arenga miliyari 5,8 Frw naho icya gatatu cya kilometero 5,64 cyatwaye arenga miliyari 7,6 Frw.

Kureba andi mafoto menshi, kanda HANO

Reba ibindi muri iyi Video:

Kagame Paul umukandida w’Umuryango wa FPR-Inkotanyi yakiriwe mu Karere ka Rusizi ku isaha ya saa tanu n’iminota 25 kuri uyu wa Gatanu tariki 28 Kamena 2024, aho abaturage bagaragaje ubudasa bwo kumwakira mu rurimi rwihariye ruvugwa n’abaturage ba Nkombo n’uduce tumwe twa Rusizi bamushimira ibyiza yabagejejeho birimo ibikorwa remezo.

Muri izo mvugo zizwi ku Nkombo ubwo bakiraga Kagame bagira bati "Kagame enyanya enyanya", bivuga ngo "Kagame ku isonga". Bakomeje bagira bati "Tukusima bwenene", bisobanuye "Turagushimira cyane".

Dieudonné Sibomana wayoboye gahunda yo kwamamaza umukandida w’Umuryango wa FPR-Inkotanyi mu Karere ka Rusizi avuga ko byinshi bashima harimo kuba baragizwe abanyarwanda.

Ati, "Muri byinshi dushima, uhamagaye buri wese mu bari hano yabona byinshi dushima."

Ndamwemera Jean Paul avuga ko yagize umugisha wo kudasumbya abo Kagame agaburira. Agira ati "Narize ndarangiza mu ishami ry’ubuhinzi, ntekereza gushaka akazi ariko nibuka ijambo utubwira ko Intore yishakira igisubizo. Ababyeyi banyishyuriye bakoresheje igihingwa cy’Ikawa, nanjye mpinga Ikawa ntera ibiti ibihumbi 15, kandi mfite inganda ebyiri z’Ikawa. Ibyo bikorwa tubikesha umutekano, ntitwikanga tujya mu murima tugahinga tukeza, tugasarura".

Yakomeje agira ati, "Nkorana n’urubyiruko 120 mu gutunganya umusaruro ndetse nkorana n’abahinzi 1260 hirya no hino mu Karere, ngurisha Ikawa mu bihugu by’Ubutaliyani, Ubwongereza n’Ubuholandi, kandi baza gusura aho dutunganyiriza Ikawa, bakaza bambaye Visit Rwanda, tugatunganya Ikawa bitewe n’ibyifuzo byabo."

Akomeza avuga ko kubera impanuro za Perezida Kagame yahawe igihembo muri Amerika. Ati, "Icyanshimishije ni uko bagushima cyane ngo dufite umusaza ukomeye, amahanga arakwemera."

Akomeza agira ati, "Nafatanyije na bagenzi banjye dushinga ikigo cy’ishuri kandi dufite abana biga neza bakajya mu bigo byiza."

Akomeza avuga ko Abanyarwanda bagirirwa icyizere kubera imiyoborere myiza, kandi kugira umutekano bituma abantu bisanzura mu mikorere.mAbatuye Rusizi bashima kuba barashyiriweho indege ituma bakorera i Kigali bagashobora gutaha.

Ndamwemera yavuze ko ibyo byose byagezweho kubera umutekano n’imiyoborere myiza, ashimangira ko gutora Perezida Kagame ari ukwizigamira kandi biteguye kumutora 100%.

Kureba andi mafoto menshi, kanda HANO

Reba ibindi muri iyi Video:

Ba komiseri ba FPR Inkotanyi bashyira indabo ku mva ya Nirere

Nirere Jeannette yapfuye tariki 25 Kamena 2024 nyuma yo gukomerekera mu muvundo wabaye tariki 23 Kamena 2024 mu bikorwa byo kwamamaza umukandida wa FPR-Inkotanyi mu Karere ka Rubavu.

Umuyobozi w’Akarere ka Rubavu Mulindwa Prosper yatangaje ko Nirere Jeannette yakomerekeye mu muvundo hamwe n’abandi bantu 36 ndetse bane bakoretse cyane bahita bihutanwa kuvurirwa i Kigali.

Mulindwa Prosper Umuyobozi w’Akarere ka Rubavu

Agira ati "Nirere Jeannette, agiye ari intwari, yari Umunyamuryango wa FPR-Inkotanyi, kandi yakomerekeye mu muvundo wabaye nyuma yo kuza gushyigikira umukandida wa FPR-Inkotanyi, yifuzaga gukorera Igihugu no gushyigikira Umuyobozi w’Umuryango wa FPR-Inkotanyi. Perezida Kagame Umuyobozi w’umuryango wa FPR-Inkotanyi yasabye ko hakorwa ibishoboka byose mu gufasha abaguye mu muvundo ndetse abakomeretse cyane bajyanwa kuvurirwa i Kanombe i Kigali. Abaganga bakomeye bose bamugezeho, ndetse abandi batatu bari kumwe bashoboye koroherwa, ariko Nirere Jeannette arigendeye."

Mulindwa avuga ko Nirere Jeannette yari Umunyamuryango wa FPR-Inkotanyi kandi uyu muryango uzakomeza kumuba hafi, yasabye abaturage n’abandi banyamuryango ba FPR gufasha uyu muryango yaratunze, no kuzafasha umwana w’imyaka 12 asize.

Nirere Jeannette waguye mu muvundo wabaye nyuma y’ibikorwa byo kwamamaza umukandida wa FPR-Inkotanyi

Hategekimana Olivier ni umuvandimwe wa Nirere Jeannette, avuga ko bari biriranywe tariki 22 Kanama 2024, ndetse bahana gahunda yo kujya gushyigikira umukandida wa FPR-Inkotanyi mu gitondo.

Agira ati, "Icyo mwibukiraho ni ijambo twaganiriye ku mugoroba dutegura kujya gushyigikira umukandida wa FPR-Inkotanyi. Twaransangiraga, arimo kunsaba ko ashaka ko namufasha kurera umwana we w’umukobwa akazashobora kwiga neza. Sinari nzi ko arimo kunsezera. Mu gitondo yagiye gushyigikira umukandida wa FPR-Inkotanyi ariko ntitwabonanye, twategereje ko ataha turamubura, ku munsi wa kabiri dutangiye gushakisha nibwo batubwiye ko yapfuye kuko yari yakomerekeye mu muvundo."

Ababyeyi ba Nirere Jeannette

Hategekimana Olivier avuga ko Nirere Jeannette ari we wari utunze umuryango.

Agira ati "Ni agahinda gakomeye kuri twe, niwe muntu twari dufite ushoboye, akita ku mwana we n’ababyeyi bacu none aragiye".

Akomeza asaba ko abanyamuryango ba FPR-Inkotanyi baba hafi umuryango Nirere asize. Ati, "Nkuko yari Umunyamuryango wa FPR-Inkotanyi, turasaba abanyamuryango gukomeza kwita ku muryango asize, bagafasha uyu mwana akazashobora kwiga neza."

Umwana wa Nirere mu gikorwa cyo gushyingura umubyeyi we

Ubuyobozi bukuru bw’Umuryango wa FPR-Inkotanyi bwohereje Papias Iragena Komiseri w’Ikoranabuhanga hamwe na Assoumpta Mbarushimana Komiseri w’Imibereho Myiza mu kwifatanya n’Umuryango wa Nirere Jeannette ndetse bubizeza kuzababa hafi.

Assoumpta Mbarushimana yabwiye umuryango wa Nirere ko bazakomeza kuwuba hafi, ariko asaba n’abandi banyamuryango gufasha Umuryango wa Nirere. Agira ati" Nirere wapfuye gitwari, Umuryango duhagarariye uharanira gushyira umuturage ku isonga. Niyo mpamvu wavuye ku Nyundo ngo ushyigikire Umukuru w’Umuryango wa FPR-Inkotanyi, ntakitarakozwe ngo dufashe ubuzima bwawe ariko ntibyakunze. Umuryango wa FPR-Inkotanyi urabizi ko wari amaboko y’Umuryango wawe, amaboko y’umwana wawe kandi tuzakomeza kubizirikana kandi tube hafi y’Umuryango udusigiye."

Komiseri wa FPR-Inkotanyi mu gikorwa cyo kwifatanya n’umiryango wa Nirere

Nirere Jeannette w’imyaka 40 apfuye asize umwana umwe, akurikiranye na Mutoni Ahishakiye w’imyaka 18 wapfuye tariki 23 Kamena 2024, nawe aguye mu muvundo wabaye ahabereye igikorwa cyo gushyigikira umukandida wa FPR-Inkotanyi mu Karere ka Rubavu.

Ubuyobozi bw’Akarere ka Rubavu butangaza ko 3 bari bakomeretse boherejwe kwitabwaho i Kigali barimo koroherwa naho abari mu bitaro bya Gisenyi nabo bafashijwe kandi ntakibazo bafite.

Ubwo Nirere Jeannette umurambo we wari ugejejwe ku irimbi rya Rugerero

Umwana wambaye umupira w’umukara niwe Nirere Jeannette asize

Umunyamabanga nshingwabikorwa w’Intara y’Iburengerazuba yihanganisha umunyeyi wa Nirere

Umubyeyi wa Nirere mu gahinda kenshi

Kari agahinda kenshi

Byari agahinda ku mwana wa Nirere Jeannette

Ababyeyi ba Nirere bashyira indabo mu mva

Ababyeyi ba Nirere Jeannette bashyira indabo ku mva

Ababyeyi ba Nirere Jeannette bashyira indabo ku mva

Inzego z’umutekano zari zitabiriye

Ingabo zahaye icyubahiro Nirere wazize muvundo

Ba komiseri mu muryango wa FPR-INKOTANYI, ubuyobozi bw’ingabo n’Akarere ka baje kwifatanya n’umiryango wa Nirere

Nirere Jeannette yashyinguwe akurikiranye na Mutoni Ahishakiye

Mutoni yashyinguwe mu cyubahiro

Ahishakiye Mutoni yaguye mu muvundo w’abaturage bari bagiye kwakira Paul Kagame, umukandida wa FPR-Inkotanyi ubwo yari yaje kwiyamamaza mu Karere ka Rubavu mu Murenge wa Rugerero tariki 23 Kamena 2024.

Uzarerwanimana Issa, umuvandimwe wa Mutoni avuga ko urupfu rwa Mutoni rwatewe n’abantu barimo bashaka gusohoka, ndetse bamwe bagonze abapolisi bari kumuryango bashaka gutaha.

Senateri Sindikubwabo yunamira umubiri wa Mutoni

Agira ati “yari yishimye ariwe uduterera indirimbo, ubwo amasaha yo gutaha yari ageze, abantu bashatse gusohoka ari benshi mu kivunge, ubwo bari bageze kumuryango bahasanze abapolisi babasaba kugenda bitonze ariko kubera imbaraga zari inyuma barasunitse bamwe bagwa hasi barabakandagira, tuje kureba dusanga nawe yabigendeyemo.”

Dr Sindikubwabo Jean Nepomuscene, wa Komisiyo y’imiyoborere muri FPR, Senateri Marie Rose Mureshyankwano, Ubuyobozi bw’Akarere ka Rubavu, inzego z’umutekano hamwe n’abandi bayobozi batandukanye mu muryango wa FPR-Inkotanyi ku rwego rw’Igihugu baje kwifatanya n’umuryango wa Ahishakiye Mutoni mu kumuherekeza.

Dr Sindikubwabo Jean Nepomuscene na Senateri Mureshyankwano

Sindikubwabo yatangaje ko Umuryango wa FPR-Inkotanyi wababajwe n’urupfu rwa Ahishakiye Mutoni, avuga ko bazakomeza kuba hafi y’umuryango we, yavuze kandi ko nubwo barimo baherekeza Mutoni hari undi muntu warimo uvurirwa mu bitaro bya Kanombe nawe witabye Imana.

Agira ati “Nubwo twaje guherekeza Mutoni, tubabajwe no kubabwira ko hari undi warimo avurirwa mu bitaro bya Kanombe witabye Imana, naho abandi barimo kwitabwaho.”

Abo mu muryango wa Mutoni bavuga ko Mutoni yavutse tariki 7 Ukwakira 2005, yashoboye kwiga amashuri abanza agenze mu mashuri yisumbuye mu mwaka wa kabiri ahagarika kwiga.

Dative Yashimye umukandida wa FPR Inkotanyi wabubakiye amashuri akabasha kwiga

Dusabirema usanzwe ari mu rubyiruko rw’abakorera bushake mu Karere ka Ngororero avuga ko yarangije amashuri yisumbuye muri 2016 aho yize kuvura amatungo.

Mu buhamya bwe, avuga ko ababyeyi be bamushakiye igishoro gito atangira kuvura amatungo no gutera intanga amatungo.

Agira ati "abaturage banyitaga wa mukobwa w’intanga".

Dative avuga ko kubera impanuro za Perezida Kagame yiteje imbere abikuye mu korora ingurube ndetse azigurishije akuramo ibihumbi 600 ashinga iguriro ry’imiti y’amatungo.

Yongereye igishoro atangira gucuruza inyongeramusaruro, yegera ba agronome mu Murenge atangirira ku mifuka 20, none ubu apakira Howo ifumbire ndetse baturage barahinga bakeza bagasagurira amasoko.

Yashimye Perezida Kagame wabubakiye amashuri kuko niyo yizemo akamugirira akamaro ndetse ahamya ko iyo atubakwa atari kuba uyu munsi yarize. Ati, "Abana ba Ngororero ntitwari kwiga iyo tutagira amashuri wubatse".

Yavuze ko mu Karere ka Ngororero bafite byinshi bashima birimo ibikorwa remezo nk’amashanyarazi n’amazi.

Dative yakomeje agira ati, "Iyo udashyiraho ihame ry’uburingane riteza imbere umukobwa sinari kuba mpagaze hano".

Dusabirema Dative yavuze ko yongeye kwishima ubwo yumvaga ko Paul Kagame azongera kwiyamamaza kuko kumutora ari ukwiteganyiriza.

Perezida Kagame yinjiye kuri stade ya Ngororero yambaye umupira w’umweru ufite amaboko maremare uriho ibirango bya FPR Inkotanyi hamwe n’ipantalo ijya gusa n’icyatsi, maze abaturage bose bati "ni wowe ni wowe, muzehe wacu, muzehe wacu."

Abateraniye kuri stade ya Ngororero baravuga ko babukereye kugira ngo bashimire Perezida Kagame uburyo yashoboye kubaha umutekano, amajyambere n’imibereho myiza.
Akarere ka Ngororero ni kamwe kari karazahajwe n’intambara y’abacengezi 1998 ndetse hari abanyeshuri bishwe ku ishuri rya Nyange nyuma yo kwanga kwitandukanya nk’uko bari babisabwe n’abacengezi.

Abaturage baje kwakira Perezida Kagame bavuga ko kuba bafite umutekano babimushimira ariko bikiyongeraho amajyambere babonye arimo imihanda, amashuri, amavuriro, amazi n’amashanyarazi.

Bamwe mu batuye akarere ka Ngororero kandi baturage bavuga ko bahinga bakeza, bakaba bashima imihanda bakorewe ituma bageza umusaruro wabo ku isoko.

Biteganyijwe ko Perezida Kagame namara kwiyamamaza mu Karere ka Ngororero akomereza ibikorwa byo kwiyamamaza mu Karere ka Muhanga

Seturatsinze Emmanuel ni umuturage mu murenge wa Hindiro mu Karere ka Ngororero, yabyutse saa cyenda ajya ahiyamamariza umukandida wa FPR-INKOTANYI kugira ngo amushimire ibyo yabagejejeho

Agira ati "Twaje kugaragariza ibyishimo dutewe nibyo yatugejejeho, yaduhaye imihanda ihuza imirenge, bituma umusaruro ugera ku isoko. Yaduhaye amashuri abana bariga kandi bagahabwa ifunguro bishyuye amafaranga makeya. Paul Kagame yaduhaye amashanyarazi n’amazi, urubyiruko rurahanga imirimo, dufite byinshi byo kumushimira ariko ikiruta ibindi ni umutekano, kuko umuturage agenda igihe ashakira kandi ntakibazo agira."

Seturatsinze avuga ko bizeye ko umukandida bashyigikiye azatsinda agakomeza kubateza imbere.

Ati, "Yahaye u Rwanda agaciro, Umunyarwanda arubashywe, turifuza ko ako gaciro gakomeza kwiyongera, turifuza ko ibyiza twagezeho bikomeza kwiyongera, abana bakiga, bagahanga imirimo, abari mu cyiciro cy’ubukene bakagabanuka."

Ingabire Olive ni umubyeyi w’imyaka 47, akaba amaze imyaka 7 arwaye kanseri. Avuga ko yaje gushyigikira Perezida Kagame kuko yahaye abanyarwanda amavuriro.

Agira ati "undebye ntiwamenya ko maranye imyaka irindwi kanseri, kubera imiyoborere myiza yaduhaye amavuriro. Naje kumushyigikira, naje kumubwira ko ndiho kubera imiyoborere myiza."

Ingabire avuga ko azashyigikira Paul Kagame agatsinda amatora agakomeza kugeza ibyiza ku banyarwanda.

Ati, "Abanyarwanda yaduhaye amata, abana kuva ku myaka ibiri bashyirwa mu mashuri, yarwanyije igwingira, ubuzima burushaho kuba bwiza. Tuzamutora kugira ngo amata akomeze yiyongere twibereho neza dufite umubyeyi wacu udutekerereza ibyiza."

Umukandida wa FPR Inkotanyi, Paul Kagame agiye kwiyamamaza mu Karere ka Ngororero nyuma ya Musanze na Rubavu.

Ni Akarere gaheruka guhura n’ibiza imihanda myinshi irangirika ndetse ibiraro bitwarwa n’imigezi, cyakora abaturage bavuga ko imiyoborere myiza itabatereranye kuko byahise bisanwa.

Ngororero nk’Akarere k’icyaro karimo gukwirakwizwamo amashanyarazi n’amazi.

Akarere ka Ngororero kazwi kugira ubucukuzi bw’amabuye y’agaciro, abaturage bavuga ko ubu bucukuzi bwatanze akazi kuri benshi bashobora gutunga imiryango yabo.

Mu migabo n’imigambi y’umuryango wa FPR-Inkotanyi biteganyijwe ko ibitaro bya Muhororo biri mu Karere ka Ngororero bizagurwa bifashe abatuye Ngororero kubona serivisi nziza z’ubuzima.

Abatuye i Rubavu bagaragarije i byishimo umukandida wa FPR Inkotanyi, Paul Kagame

Ni mu byishimo bamugaragarije kuri iki Cyumweru tariki 23 Kamena 2024, ubwo bari bateraniye mu Murenge wa Rugerero mu Karere ka Rubavu aho bari baje kumva imigabo n’imigambi no kumwereka ko bamushyigikiye kandi biteguye kumutorera kuzabayobora muri manda itaha y’imyaka itanu mu matora y’Umukuru w’Igihugu n’ay’Abadepite ateganyijwe hagati ya tariki 14-16 Nyakanga 2024.

Ubwo abaturage bo mu Karere ka Rubavu bangirizwaga ibyabo n’umugezi wa Sebeya, bamwe ndetse ukabatwara ubuzima, icyo gihe Perezida Kagame yarabasuye ndetse abizeza ubafasha. Ubu benshi bamaze kubona aho kuba abandi bakodesherezwa na Leta.

Umugezi wa Sebeye wateje ibiza byangirije abaturage

Minisitiri w’Urubyiruko n’Iterambere ry’Ubuhanzi, Dr. Utumatwishima Abdallah, akaba ari na Komiseri ushinzwe ubukangurambaga rusange, ni we washimye mu izina ry’Abanyarubavu, agira ati “Nyakubahwa Chairman, Abanyarubavu bantumye kugira ngo mbashimire by’umwihariko, ubwo umugezi wa Sebeya watezaga ibiza hano hanyuma bakabura abantu, bakabura ibintu ndetse bakanasenyerwa, Nyakubahwa Chairman mwarabatabaye ndetse ibikomeye mwabatabariye kuri iki kibuga."

Minisitiri Utumatwishima yagarutse no ku bikorwa by’iterambere abaturage b’Akarere ka Rubavu bamaze kugeraho mu nzego zitandukanye babikesha ubuyobozi bwiza ndetse n’umutekano.

Abaturage b’i Rubavu bashimye ko bakijijwe umugezi wa Sebeya

Ibiza byatewe n’umugezi wa Sebeya tariki 3 Gicurasi 2023 byatumye imiryango 5,048 ijyanwa mu nkambi, na ho imiryango 2,558 igumishwa mu nkambi.

Hari imiryango itarabona amacumbi kandi idafite n’ibibanza byo kubakamo, cyakora hakozwe inyigo zimbitse z’ahagomba kubakwa.

Uretse imiryango 250 yasenyewe na Sebeya imaze kubakirwa hari n’indi 300 irimo kubakirwa, cyakora hari indi 870 yasenyewe ikeneye ibibanza no kubakirwa.

Mu gushaka ibisubizo by’umugezi wa Sebeya, hubatswe icyobo kizwi nka ‘Damu’ gifata amazi ndetse kikayaca intege ku buryo umugezi wa Sebeya utazongera kuzura ngo usenyere abaturage. Hubatswe inkuta za metero 2 ku mpande z’umugezi wa Sebeya zibuza amazi kongera gutera abaturage.

Hongerewe ubunini bw’ikiraro cya Nyundo cyagize uruhare mu gukwiza amazi mu baturage kandi hashyirwa irondo rihoraho ricunga amazi ya Sebeya kugira ngo naba menshi, abaturage baburirwe hakiri kare, bahunge.

Uretse iyi mirimo yose yakozwe, abatuye i Rubavu bavuga ko ubwo bari mu kaga, Perezida Kagame yabasuriye ku gihe atigeze abatererana, bamwizeza kumutora kugira ngo ibyiza abagezaho bikomeze kwiyongera.

Paul Kagame yabashimiye ndetse ababwira ko abakunda nk’uko bamukunda, ndetse abifuriza guhora biteza imbere.

Ibikorwa byo kwiyamamaza ku mwanya wa Perezida ndetse n’Abakandida Depite, byatangiye ku wa Gatandatu tariki 22 Kamena 2024, amatora akaba ateganyijwe tariki 14-16 Nyakanga 2024.

Byari ibyishimo ku banyarubavu bari bakiriye umukandida wa FPR Inkotanyi, Paul Kagame

Abaturage ba Bugeshi babishingira kuba bari ku marembo y’igihugu kandi umutekano bahawe batakwemera icyawuhungabanya.

Musafiri wahawe amahugurwa yo kujya kwiga gukora ubuhinzi bw’ibirayi buteye imbere mu gihugu cy’Ububiligi, avuga ko aya mahugurwa yamufashije kwiga uko yazamura umusaruro w’ibirayi ndetse ashobora kugera ku nzozi yarafite zo kubaka inzu mu mujyi wa Gisenyi ayikuye mu birayi ndetse ashobora kuyishyiramo amakaro.

Kwiyubaka mu bukire, avuga ko byamuganishije ku kubungabunga umutekano waho atuye maze abaturage batuye muri Repubulika Iharanira Demokarasi ya Congo bakamuha amakuru mu gihe hari abashaka kuza guhungabanya umutekano w’u Rwanda.

Agira ati "Umuturanyi yarampamagaye ambwira ko hari abashaka kuza guhungabanya umutekano bakadusahura amafaranga, nanjye amakuru nyaha abashinzwe umutekano ndetse mbaha n’umpaye amakuru. Mu gihe tugishaka amakuru, wa muturage yongeye kumbwira ko abashaka gutera bagize ubwoba kuko bateye batasubirayo kubera uruhare rw’abaturage mu kwirindira umutekano."

Musafiri avuga ko abashaka gutera u Rwanda bakagera i Kigali batabigeraho banyuze ku batuye mu murenge wa Bugeshi kuko bahora bari maso.

Reba ibindi muri iyi Video

Saa tanu n’iminota 16 nibwo yari arangije gusuhuza abaturage benshi bamweretse ko bamwishimiye, maze hakurikiraho indirimbo y’umuryango wa FPR-Inkotanyi.

Abaturage bavuye mu Turere twa Nyabihu, Rutsiro na Rubavu ni bo baje gushyigikira Perezida Kagame, umukandida wa FPR Inkotanyi, icyo bashyize imbere akaba ari ukumushimira ibyo yabagejejeho.

Bamwe mu baturage bavuga ko barangije kumutora, igisigaye bategereje ngo ni itariki, bagashyira ikimenyetso ku mukandida bahisemo bashingiye ku byiza yabagejejeho.

Bamwe mu baturage bavuye mu Karere ka Rutsiro bavuga ko yabahaye umuhanda waborohereje ingendo.

Uwitwa Egide Mushimiye yavuye mu Murenge wa Mukura aho avuga ko yahagurutse saa sita z’ijoro.

Agira ati "Iwacu ni ho hari abacengezi baratubujije umutekano ariko yarabatsinze ubu turatekanye. Navuye iwacu saa sita z’ijoro ngenda amasaha abiri kugira ngo ngere aho mfatira imodoka kandi nta kibazo nagize. Nubwo ntari bumukoreho ariko ndamubona numve nishimye kuko yatugejeje kuri byinshi."

Yongeyeho ati "Mukura ryari ishyamba ritagize icyo ritumariye, ariko yabaye pariki ubu tubona inyungu ziyivuyemo. Barimo kutwubakira hoteli, mu gihe twari tuzizi ku Gisenyi no ku Kibuye."

"Yaduhaye umuhanda wa kaburimbo uhuza Gisenyi na Kibuye, ubu imyaka yacu igera ku isoko, mu gihe mu myaka yashize twahingaga umusaruro tukawumara tuwirira, n’uwo dushoboye kugeza ku isoko tugahendwa."

Kureba andi mafoto menshi, kanda HANO

Abaturage bavuye mu mirenge itandukanye kuva saa saba z’ijoro bari mu nzira bagana ahabera igikorwa cyo kwamamaza umukandida wa FPR-INKOTANYI bavuga ko bashaka kujya kwicara imbere bakamureba ndetse bakamushyigikira mu bikorwa ariko bamushimira ibyiza yabagejejeho.

Abaturage bo mu mujyi wa Gisenyi n’Umurenge wa Rubavu ni bamwe mu bazindutse, bakaba bavuga ko kuba baraye ijoro biri mu byo bamushimira nko kugira umutekano, mu gihe begeranye n’Igihugu gicumbikiye abashaka guhungabanya umutekano w’u Rwanda.

Perezida Paul Kagame agiye kwiyamamaza mu Karere ka Rubavu ku munsi wa kabiri atangiye ibikorwa byo kwiyamamariza kuyobora u Rwanda.

Abatuye mu Karere ka Rubavu bavuga ko uretse kumwakira bamwereka ko bamushyigikiye, biteguye kumutora.

Hitimana Jacques ukorera mu Karere ka Rubavu avuga ko ibyiza Abanyarwanda bamaze kugeraho babikesha Paul Kagame, bakaba bifuza kumutora kugira ngo ibikorwa abakorera ashobore kubyongera.

Agira ati "Hari ibihugu usanga abaturage bakigura abonnement (ifatabuguzi) ya telefone, ariko twe ubu guhamagara byarorohejwe kubera uriya mubyeyi, abantu bagenda amanywa n’ijoro ntacyo bikanga kubera umutekano tumukesha. Ibi byiyongeraho amatara ku mihanda, amazi hafi, abantu ntibagikora ingendo ndende. Yaduhaye Igihugu cyiza natwe tugomba kubimwereka tumutora."

Uwitwa Serafina utuye mu Murenge wa Kanama mu Karere ka Rubavu avuga ko Paul Kagame yabaye akabando ku bakuze, ikaba impamvu ituma bamukunda.

Abaturage batuye mu Turere twa Nyabihu, Rutsiro na Rubavu bahuriye mu Murenge wa Rugerero ahabera igikorwa cyo kwamamaza umukandida wa FPR-INKOTANYI, bamushimira ibyiza yabagejejeho birimo ibikorwa remezo, umutekano, imiyoborere myiza n’imibereho myiza.

Perezida Kagame yiyamamaza mu Karere ka Rubavu mu mwaka wa 2017 yari yijeje Abanyarubavu gukora batekanye, avuga ko abafite nta ntambara yamutera ubwoba.

Yagize ati "Nshaka ko amazi agera kuri buri wese maze mukore mwikorera, abacuruzi bacuruze, abahinga bahinge beze, aborora na bo batunge amagana batunganirwe. Igihugu twifuza kandi ni cyo gihugu dushobora kugeraho iyo twabishatse.”

Yiyamamaza mu 2017 mu Karere ka Rubavu aho yakiriwe n’abaturage bagera ku bihumbi 300, yavuze ko iterambere rigomba guhera kuri buri muntu na buri rugo rikagera hose.

Abiganjemo abatwara moto bakoze urugendo rw’ibirometero 10 bitegura kwakira umukandida wa FPR Inkotanyi

Ababarirwa mu magana bari kuri moto n’imodoka, bakoze urugendo rw’ibirometero 10 ruzenguruka Akarere ka Rubavu barutangiriye mu mujyi wa Gisenyi.

Bimwe mubyo Abanyarubavu bashimira Umukandida w’Umuryango wa RPF Inkotanyi, Paul Kagame harimo kubaha umutekano, ibikorwa remezo birimo imihanda, amashanyarazi n’amazi meza.

Biteganyijwe ko ku Cyumweru tariki 23 Kamena 2024 Umukandida w’Umuryango wa RPF Inkotanyi, Kagame aziyamamaza mu Karere ka Rubavu nyuma y’uko kuri uyu wa Gatandatu yatangiraga ibikorwa byo kwiyamamaza mu Karere ka Musanze.

Igikorwa cyo kwamamaza umukandida wa FPR-Inkotanyi, cyitabiriwe n’imbaga y’abaturage bari buzuye ikibuga cya Kaminuza y’u Rwanda ishami rya Busogo (UR-CAVM) cyakira abantu ibihumbi 300.

Umukandida wa FPR Inkotanyi, Paul Kagame ubwo yatangiraga ibikorwa byo kwiyamamaza byabereye mu Karere ka Musanze

Abanyamuryango ba FPR Inkotanyi baramamaza Paul Kagame hamwe n’indirimo "Paul Kagame arabanaga" imwe mu ndirimo ije kunganira indi yamenyekanye mu kwamamaza umukandida Paul Kagame izwi nka "Ndandambara yandera ubwoba" yaciye agahigo mu kugaragariza Perezida Kagame uburyo abanyarwanda bamukunda kandi bamufite ntacyabatera ubwoba.

Inyubako zigera ku 180 zegereye umugezi wa Sebeya zari zimaze umwaka zifunzwe zemerewe kongera gukoreshwa

Umuyobozi w’Akarere ka Rubavu, Mulindwa Prosper, avuga ko ibikorwa byakozwe bitumye abacuruzi bakorera ku nkengero z’umugezi wa Sebeya byongera gufungurwa harimo; icyobo gifata amazi angana na meterokibe (m³) miliyoni ebyiri, inkuta zifite ubuhagarike bwa metero ebyiri n’uburebure bwa metero 1200, hongerewe ubunini bw’ikiraro cya Nyundo cyagize uruhare mu gutuma amazi akwira mu baturage ndetse himurwa n’abaturage bari baturiye Sebeya mu ntera ya metero 10.

Agira ati “Nyuma y’ibikorwa byakozwe n’igenzura, turizera ko Sebeya yakumiriwe itazongera gusenyera abaturage.”

Mulindwa avuga ko nubwo ibyo bikorwa byakozwe, bashyizeho irondo rigenzura umugezi.

Agira ati "Twashyizeho irondo rihoraho iyo imvura iguye, kugira ngo amazi naramuka yiyongereye abaturage baburirwe."

Minisitiri w’Ibikorwa by’Ubutabazi, Maj Gen (Rtd) Albert Murasira, avuga ko bemereye abacuruzi baturiye Sebeya kongera gukora nyuma y’igenzura ry’ibikorwa byubatswe kuri Sebeya bitanga icyizere cya 90% mu gukumira amazi asenyera abaturage.

Ati "Twakoze amagenzura ahagije kandi atanga icyizere, tukaba twemereye abaturage gukomeza ibikorwa byabo."

Ibiza byatewe n’umugezi wa Sebeya tariki 3 Gicurasi 2023 batumye imiryango 5,048 ijyamwa mu nkambi, naho imiryango 2,558 yagumishijwe mu nkambi.

Mulindwa avuga ko hari imiryango myinshi itarabona amacumbi kandi idafite n’ibibanza byo kubakamo, cyakora akavuga ko Akarere ka Rubavu kakoze inyigo zimbitse z’ahagomba kubakwa.

Uretse imiryango 250 yasenyewe na Sebeya imaze kubakirwa, hari indi 300 irimo kubakirwa, cyakora hari indi 870 yasenyewe idafite ibibanza ikeneye ibibanza no kubakirwa.

Minisitiri w’Ibikorwa by’Ubutabazi, Maj Gen (Rtd) Murasira, avuga ko bakomeje gukodeshereza abasenyewe n’ibiza badafite aho kuba naho muri 2024 ngo hakodesherejwe imiryango ibihumbi bitanu mu kwirinda ko batwarwa n’ibiza.

MINEMA ivuga ko inzu zose zari zituye muri metero 10 ku mugezi wa Sebeya zakuweho uretse inyubako 3 zisigaye zirimo umusigiti n’inzu 2 zari zaratanzweho ingwate muri banki.

Amazu y’ubucuruzi yari ku nkengero za Sebeya yafunguwe yari mu mirenge ya Kanama na Rugerero mu Karere ka Rubavu, abaturage bafunguriwe bakavuga ko babyakiriye neza kuko bari barahagaritse ibikorwa.

Hatangijwe ukwezi ko kurandura igwingira mu bana bari munsi y’imyaka itanu

Umuyobozi mukuru NCDA abitangaje mu gihe hatangijwe ukwezi ko kurandura igwingira mu bana bari munsi y’imyaka itanu, aho u Rwanda ruri ku kigero cya 33% mugihe intego muri uyu mwaka wa 2024, iri janisha ryagombaga kumanuka rikagera kuri 19%.

Mu Karere ka Rubavu ahatangijwe ukwezi kw’imirire n’urugo mboneza mikurire mu kurwanya igwingira mu bana bari munsi y’imyaka itanu, imibare igaragaza ko kabarurwa abana bangana na 40% bafite imirire mibi.

Umuyobozi mukuru NCDA avuga ko barimo gufasha Akarere ka Rubavu kurwanya igwingira kuko gafite imibare myinshi nubwo yafashwe muri 2020.

Ingabire Assumpta agira ati, “Turasaba ababyeyi kugaburira abana indyo yuzuye irimo ibirwanya indwara, ibitera imbaraga birimo ibikomoka ku matungo, ikindi tubasaba ni ukugirira abana isuku, ibi bakabigeraho bakoresha imboga n’imbuto, tukaba tubereka uko akarima k’igikoni gakorwa kandi buri wese agomba kukagira.”

Ababyeyi barasabwa kugaburira abana babo indyo yuzuye no kugira isuku

Mu murenge wa Nyakiriba mu Karere ka Rubavu ahakorerwa ubukangurambaga, abana 34 bamaze gukurwa mu mirire mibi mu bana 44 babaruwe, naho mu karere ka Rubavu habarurwa amatsinda 64 agomba kurwanya imirire mibi mu karere kose.

Bamwe mu babyeyi bafashijwe kurwanya igwingira mu bana bavuga ko kwishyira hamwe bituma bahindura imyumvire ndetse bagafashwa kwikura mu bukene

Bagira bati, “Twe twazanye abana barwaye batubwira ko ari imirire mibi, ikigo nderabuzima cyaratugumanye, ndetse kiduha imirima, umurenge uduha imbuto kuko ntayo twari dufite, ubu turahinga tugasarura tukita ku bana bacu.”

Bamwe muri aba babyeyi bavuga ko bigishijwe gutegura indyo yuzuye kandi bizera ko batazongera kurwaza imirire mibi kuko bashyizwe mu matsinda aho bakora ibikorwa byo kubitsa no kugurirazanya, ndetse abafite ubushobozi bukeya bagashobora gufashwa.

Ababyeyi bishimira ko bahawe imirima bahingamo ibibafasha kugaburira abana babo

Uretse ubukene, bamwe mu babyeyi barwaje imirire mibi bavuga ko igwingira rikururwa n’amakimbirane n’imyumvire.

Ibikorwa byo kurwanya imirire mibi bizamara ukwezi, mu Karere ka Rubavu biteganyijwe ko bizagera ku bana 7500.

Hakozwe n’uturima tw’igikoni

Charles Munyaneza, Umunyamabanga Nshingwabikorwa wa Komisiyo y’Igihugu y’Amatora

Umunyamabanga Nshingwabikorwa wa Komisiyo y’Igihugu y’Amatora, Charles Munyaneza yabwiye Kigali Today ko abantu bazagira ibyago byo kubura indangamuntu bucya amatora aba ariko bari ku rutonde rwo gutora bazafashwa gutora.

Agira ati “Umuntu wese uzabura indangamuntu bucya ajya gutora cyangwa akayita ari mu nzira yo kujya gutora kandi ari ku rutonde rw’abagomba gukora azatora hifashishijwe abayobozi b’inzego zibanze nk’Umudugudu atuyemo bagomba kugaragaza ko bamuzi.”

Munyaneza avuga ko abantu bazaba bataye indangamuntu mu cyumweru kimwe bo basabwa gushaka icyangombwa gisimbura indangamuntu kandi bakagenzura ko bari ku rutonde rw’abagomba gutora.

Naho ikigo cy’igihugu gishinzwe indangamuntu NIDA gisaba abantu bakorewe indangamuntu kuzifata kuko gukora indangamuntu bitarenza ukwezi.

Ubuyobozi bwa NIDA butangaza ko hari abantu biyandikisha gufata indangamuntu ariko bakimuka aho batuye indangamuntu ikazaza barahavuye, barasabwa kujya kuzifata kugira bazazikoreshe mu gihe cy’amatora ateganyijwe mu kwezi kwa Nyakanga 2024.

Manago Dieudonne umuyobozi ushinzwe gukora indangamuntu no kuzitanga mu kigo NIDA avuga ko gukora indangamuntu bitarenza ukwezi, ahubwo imbogamizi hari abantu banga gusubira aho bifotoreje.

Agira ati “Twe gukora indangamuntu ntibirenza ukwezi, kandi iyo indangamuntu imaze gukorwa yoherezwa mu murenge, icyo dusaba abavuga ko batabonye indangamuntu ni ugusubira aho bifotoreje, nibasanga zitarakozwe bakabimenyesha igakorwa.”

Mu gihe hari abakeka ko NIDA izahagarika igikorwa cyo gukora indangamantu mu gihe hitegurwa amatora, Manago avuga ko NIDA idahagarika kuzikora, cyakora isaba abantu basabye ibyangombwa bisimbura indangamuntu kubisaba kuko zikorwa iyo zasabwe.

Abagabye iki gitero ngo bari bitwaje ibendera ryahoze rikoreshwa RDC icyitwa Zaire

Itsinda ry’abasirikare bafite ibirango by’ibendera ryakoreshwaga kera Repubulika Iharanira Demokarasi ya Congo icyitwa Zaïre, bagaragaye bazengurutse inyubako ya Vital Kamerhe, barasa abapolisi bamurinda.

Itangazamakuru mu mujyi wa Kinshasa rivuga ko abasirikare ba FARDC babarirwa muri 20, ari bo bagerageje gufata inyubako ya Perezida w’Inteko Ishinga Amategeko, icyo gitero kigwamo abapolisi babiri barinda Vital Kamerhe hamwe n’umwe mu basirikare bagabye icyo gitero.

Icyakora hifashishijwe abasirikare barinda Umukuru w’Igihugu, n’indege za Drones zidatwarwa n’abapilote, mu kurwanya abasirikare bagabye icyo gitero bari bambaye imyenda yihariye.

Abagabye iki gitero biravugwa ko bafashwe

Vital Kamerhe yatangaje ko we n’abo mu muryango we bameze neza, naho ingabo za Repubulika Iharanira Demokarasi ya Congo (FARDC) zigaragaragaza ko zafashe abasirikare bagabye icyo gitero, hamwe n’ibikoresho by’intambara bari bitwaje.

Bamwe mu bazatora bwa mbere, ni ukuvuga bafite imyaka 18 y’amavuko kuzamura, bavuga ko basaba Umukuru w’Igihugu uzatorwa gufasha urubyiruko kwihangira umurimo, gufasha urubyiruko koroherezwa kubona inguzanyo, hamwe no guteza imbere uburezi kuri bose.

Uwihirwe Jean Bonheur ufite imyaka 19 y’amavuko, avuga ko yishimiye kuba agiye kwitorera Umukuru w’Igihugu uzaba afite n’inshingano zo kubagezaho ibyo bamukeneyeho.

Agira ati “Numva ari ibintu by’agaciro kuba nzagira uruhare mu kwishyiriraho Perezida, ariko icyo musaba ni ukoroshya uburyo urubyiruko rubona inguzanyo bitabagoye. Basanzwe bajya muri Banki ariko urubyiruko rwakwa inguzanyo bikagorana. Tworoherejwe kubona inguzanyo tugashyira mu bikorwa imishinga yacu, byatuma tuva mu bukene tukiteza imbere."

Mu gihe hasanzweho gahunda ya BDF yashyiriweho abarimo urubyiruko, rwo ruvuga ko rutegerwa uko bikwiye mu gutegura imishinga no kuyishyira mu bikorwa bigatuma benshi batisanga mu guhabwa inguzanyo mu bigo by’imari.

Jacqueline Niyomufasha avuga ko afitiye amatsiko gutora bwa mbere kuko Perezida uzatorwa azaba yaramwitoreye.

Agira ati "Icyo Perezida uzatorwa yadufasha nk’urubyiruko ni ukurushaho kwiteza imbere nk’uko biri gukorwa, bakabona imirimo, inguzanyo ndetse agashyiraho n’uburyo urubyiruko ruva mu bushomeri binyuze mu kubegera."

Bamwe mu rubyiruko rukiri mu mashuri, basaba ko uwo bazatora yakongera imbaraga mu kurinda urubyiruko ibiyobyabwenge.

Umugwaneza Valentine utuye mu Karere ka Karongi avuga ko hari urubyiruko rutabashije kugera ku ishuri rugomba gufashwa kwiga imyuga ndetse rukabona icyo rukora.

Agira ati "Twagize amahirwe yo kwiga ariko hari urundi rubyiruko rutabashije kwiga. Icyo dukeneye ku wo tuzatora ni ukunoza uburyo urubyiruko rutize rwiga imyuga ndetse rukayishyira mu bikorwa aho kwishora mu biyobyabwenge."

Umunyamabanga Nshingwabikorwa wa Komisiyo y’Igihugu y’Amatora, Charles Munyaneza, avuga ko abazatora bwa mbere bo mu rubyiruko babarirwa muri Miliyoni ebyiri n’ibihumbi 300, akabasaba kureba niba bari kuri lisiti y’itora.

Munyaneza avuga ko urubyiruko ruzatora bwa mbere rusabwa kuba rufite indangamuntu, abatazifite bakazifata kuko ikigo cy’Igihugu cy’Indangamuntu kirimo kuzitanga. Akomeza asaba urubyiruko kureba aho ruzatorera no kwiyimura aho biri ngombwa ubundi bagakurikirana ibiganiro n’amahugurwa ajyanye n’amatora kugira ngo azagende neza.

Munyaneza avuga ko abo mu kigero cy’urubyiruko bazatora Umukuru w’Igihugu n’Abadepite bazaba ari benshi hagereranyijwe n’urubyiruko rwatoye bwa mbere muri 2017.

Abaturiye mu gice cya Gishwati bavuga ko uyu muhanda uje kubafasha kugera ku iterambere

Abaturage batuye mu Kagari ka Rega mu murenge wa Bigogwe bavuga ko byari bigoye kugeza umusaruro ku isoko ndetse ko umuhanda mubi watumaga imodoka ziza gutwara umusaruro w’ubuhinzi n’ubworozi zitabageraho uko babyifuza, ariko kubera umuhanda uhuza uturere twa Rubavu, Nyabihu na Ngororero urimo gushyirwamo kaburimbo nimero ya kabiri byatumye bagerwaho n’imodoka zitwara umusaruro.

Ntambara Epimaque utwara Moto avuga ko umuhanda utarakorwa byari bigoye gutwara abagenzi bigatuma n’abageza umusaruro ku isoko bibagora.

Agira ati “Umuhanda utaraza twagendaga dusunika dutinya amabuye yari mu muhanda wareba nabi ugatogoka ku musozi, ariko kubera umuhanda wakozwe ubu ni ukunyerera umuntu akagera iyo ajya. Byoroheje ingendo ndetse n’abafite umusaruro ukomoka ku buhinzi n’ubworozi imodoka zibasanga hano, mu gihe kera umuhanda utaraza abaturage baburaga isoko ry’umusaruro wabo kubera imodoka zatinyaga kunyura muri uyu muhanda.”

Aborozi bavuga ko amata yahoraga apfa bitewe no gutinda kugera ku ikosanyirizo, bati: “imodoka zatinyaga umuhanda, zaza zikaza zigengesera zikagera ku makusanyirizo zitinze amata akangirika, umworozi agahora mu gihombo, ariko ubu igihe cyose amata ageze ku ikusanyirizo, imodoka ziza kuyatwara, akagerera ku rugand igihe. Ibi byatumye amata apfa agabanuka abarozi tubyungukiramo, kandi n’abahinzi imodoka zitwara ibirayi zibisanga ku muhanda mu gihe mbere byabahendaga ku bimanura bakabigeza kuri kaburimbo.”

Uyu muhanda uri gushyirwamo kaburimbo ya Kabiri

Uretse abakora ubuhinzi n’ubworozi, abaturage baturiye umuhanda wa Gishwati bavuga ko bagejejweho amazi n’amashanyarazi bituma ubuzima bwabo burushaho kuba bwiza. Bavuga ko ivuriro rya Arusha riherereye mu nkengero za Gishwati ritari rifite amashanyarazi ariko yamaze kuhagera.

“Abaganga mu gihe cy’ijoro bakoresha itoroshi mu kuvura abarwayi, ariko ubu twagejejweho amashanyarazi, byorohereza n’imodoka zitwara abarwayi zishobora kutugeraho mu gutwara abarwayi.”

Umuyobozi w’Akarere ka Nyabihu wungirije ushinzwe iterambere ry’ubukungu Habanabakize Jean Claude avuga ko Akarere ka Nyabihu gashima imihanda yakozwe igafasha abaturage kugeza umusaruro ku isoko.

Agira ati “Akarere kacu gakungahaye ku buhinzi n’ubworozi, kuba katari gafite imihanda ibafasha kugeza amusaruro ku isoko cyari igihombo gikomeye, ariko ubu hakozwe ibirometero 210 by’imihanda y’imigenderano yorohereza abahinzi n’aborozi kugeza umusaruro ku isoko, muri Gishwati harimo kubakwa umuhanda wa kaburimbo uzaba ufite ibirometero 93, muri byo ibirenga 30 byamaze kuzura, bituma abaturage bahindura ubuzima.”

Habanabakize Jean Claude avuga ko hamaze gukorwa amaterasi abarirwa kuri hegitare ibihumbi 10 bituma ubutaka butagenda ndetse ifumbire iguma mu butaka umusaruro ukiyongera.

Ubuyobozi bw’uruganda rwa Mukamira rukusanya umusaruro w’amata agera kuri litiro ibihumbi 30 ku munsi ava mu turere twa Musanze, Nyabihu, Ngororero na Rubavu buvuga ko bitezeko uyu muhanda wa Gishwati nurangira umusaruro uziyongera.

Ubwato bwa Mantis Kivu Queen buherutse kugonga ibuye mu mazi

Ubwato bukora nka hotel bwa Mantis Kivu Queen uBuranga bwakoze impanuka tariki 29 Mata 2024 mu mazi y’ikiyaga cya Kivu mu Karere ka Nyamasheke, bwinjiramo amazi abari baburimo bakurwamo.

Munyaburanga Alain, Umuyobozi wa AFRINEST yabwiye itangazamakuru ko ubwato bakora buba bwujuje ibyangombwa harimo n’ikoranabuhanga riyobora ubwato, cyakora icyabaye amayobora akaba ari uburyo bwagonze ibuye mu mazi kandi bufite ikoranabuhanga ryashoboraga kubereka ibyatera impanuka bunafite n’umuntu umenyereye gutwara amato.

Nubwo ubuyobozi bw’ubu bwato bwatangaje ko harimo gukurikiranwa icyateye impanuka, ubuyobozi bw’ikigo AFRINEST bwubatse Mantis Kivu Queen buvuga ko ubwato bwari bwubatse neza kandi bufite ikoranabuhanga ribufasha kumenya ibiri munsi y’amazi.

Munyaburanga Alain, Umuyobozi wa AFRINEST

Munyaburanga avuga ko uruganda rwabo rufite ubushobozi bwo kubaka ubwato bwujuje ibyangombwa aho bushobora gukoresha Lisansi na Mazutu hamwe n’imirasire y’Izuba ndetse kandi bushobora kugurishwa ku rwego mpuzamahanga.

AFRINEST imaze kubaka ubwato 4 kuva batangira gukora harimo n’ubwato 20 bwasanwe bukoreshwa mu ngendo mu kiyaga cya Kivu. Mu bwato bwakozwe na Afrinest bwagurishijwe ku rwego mpuzamahanga hari ubwajyanywe gukoreshwa mu ruzi rwa Congo muri Repubulika Iharanira Demokarasi ya Congo.

Ubwato ‘Mantis Kivu Queen uBuranga’ nibwo bwato bwa mbere mu Rwanda bukora nka Hoteli y’inyenyeri eshanu bwari busanzwe bukorera mu mazi y’ikiyaga cya Kivu mu Turere twa Karongi, Nyamasheke, Rubavu na Rusizi.

Bufite uburebure bwa metero 35, bukagira ibyumba 10, aho gufatira amafunguro n’ibyo kunywa, ubwogero n’ibindi. Bufite KANDI ibyumba byo mu rwego rwo hejuru birimo ibishobora kwakira Abakuru b’Ibihugu.

Ubuyobozi burasaba imiryango kudaha akato no kwita ku bafite uburwayi bwo mu mutwe

Ubuyobozi bw’umuryango uharanira uburenganzira bw’abafite ubumuga UPHLS, utangaza ko ubuzima bwiza ari uburenganzira bwa buri wese. Buti: “dufatanye kurwanya akato n’ihezwa rikorerwa abafite uburwayi bwo mu mutwe n’abandi bafite ubumuga bwose.”

Mu bukangurambaga bushishikariza ababyeyi bafite abantu bafite uburwayi bwo mu mutwe kubageza kwa muganga, bamwe mu bafite ubu burwayi bavuga ko bahohoterwa n’imiryango yabo.

Mundanikure Didacienne umuturage mu murenge wa Nyundo Akarere ka Rubavu, avuga ko yagize uburwayi bwo mu mutwe bigatuma ahabwa akato kugera kubo mu muryango we.

Agira ati: “abafite uburwayi bwo mu mutwe ntibatwumva, niyo utanze igitekerezo aho utuye bagufata nk’utuzuye. Urugero ntanga ni ibyambayeho kugera aho abo mu muryango wanjye banze kunyumva no mu buyobozi bw’inzego zibanze bakanyimisha amabati na sima bavuga ko nsigaje igihe gito nkapfa.”

Mundanikure Didacienne yatangiye kugira ihezwa mu muryango ubwo byari bimaze kumenyekana ko yamaze kwandura virusi itera Sida mu mwaka wa 2000, cyakora aho imiti imugereyeho akayifata abo mu muryango bakabona ntacyo abaye baramugarukiye.

Akomeza avuga ko muri 2011 yagize ikibazo cy’igicuri, ariko kubera gutereranwa n’umuryango we byatumye ibibazo by’uburwayi bwe bwiyongera atangira kwibagirwa ndetse abantu baramwanga ngo ni umusazi ndetse uwo asuriye arwara igicuri.

Agira ati “abantu batangiye kunyinuba no kumpunga bavuga ko umuntu urwaye igicuri iyo agusuriye nawe urwara.”

Aka kato yagiye ahabwa nabo mu muryango we kageze no muri 2018 apfusha umwana yishwe n’abandi bantu ariko abura abamuherekeza, nabo yiyambaje ntibamufashe bituma ananirwa gukurikirana urubanza rw’urupfu rw’umwana we.

Abafite uburwayi bwo mu mutwe barasaba kudahabwa akato

Agira ati: “Sida yatumye mpabwa akato, igicuri kije birushaho. Nagize urubanza mbura umperekeza kugeza ndetse no kugukurikirana urubanza kuko nabuze umperekeza.”

Akomeza agira ati “Ihezwa mu miryango n’abaturanyi ryatumye niyanga, uwankundaga yaranyanze kubera ubutwayi bwo mu mutwe no kurwara Sida.”

Bigirimana Claver uyobora urugaga rw’abafite uburwayi bwo mu mutwe, asaba ko imiryango y’abafite uburwayi bwo mu mutwe igomba kubagirira impuhwe.

Agira ati “Imiryango dukomokamo nitugirire impuhwe, ibaze kuba umugore agira uburwayi umuryango ukamutererana akabaho adafite aho ataha, akaryamana n’abagabo 30 nta n’umwe yashatse."

Akomeza avuga ko nawe ubwe yahawe akato kubera yagize uburwayi bwo mu mutwe. Ati: “Mu rusengero intebe yanjyenyine, mu isoko ntawe ukwitaho, byatumye dutangira ubuvugizi kugira ngo twivugire kuko turiho kandi dukeneye gufashwa.”

Bigirimana avuga ko bamwe mu babyeyi bafite uburwayi bwo mu mutwe aho kujyanwa kuvuzwa bahabwa akato kugera n’aho abana bibyariye bakora ubukwe batabanje kubagisha inama cyangwa bakabubahisha.

Agira ati: “Mugenzi wanjye tubana mu buyobozi, yagiye gushyingira umukobwa ariko bamuhisha inama kuko bazi ko arwaye mu mutwe.”

Mugabo Bob Emmanuel, ufite ubumuga bwo kutumva, ariko akavuga ni umwe mu bagize inama y’ubutegetsi muri UPHLS avuga ko umuntu ufite uburwayi bwo mu mutwe ashobora kuvuzwa agakira, agukora akiteza imbere ndetse agateza imbere igihugu, ndetse agashobora kugira imibanire myiza n’abandi.

Ati: "Ufite uburwayi bwo mu mutwe ufashwe nabi bimugiraho ingaruka nyinshi cyane, usanga bafatwa ku ngufu bakanduzwa SIDA, usanga bamwe babahisha mu nzu ugasanga byabaviramo no gupfa, usanga ihezwa rihera mu ngo rikagera no mu zindi nzego bigatuma hari na serivisi bavutswa. Twahagurutse dusaba buri wese kumenya ko umuntu ufite uburwayi bwo mu mutwe ari umuntu nk’abandi."

Hatangijwe ubukangurambaga bwo kudaha akato abafite uburwayi bwo mu mutwe

Mukeshimana Mediatrice, umukozi w’ikigo cy’igihugu gishinzwe ubuzima RBC, ishami rishinzwe kwita ku buzima bwo mu mutwe, yemeje ko uburwayi bwo mu mutwe, ari uburwayi buvurwa bugakira asaba buri wese kwita ku muntu ufite ubu burwayi aho kumuheza.

Agira Ati: "Uburwayi bwo mu mutwe buravurwa bugakira turasabwa abaturage kwirinda kujyana urwaye mu buvuzi bwa Kinyarwanda babwita amarozi n’imyuka mibi, bamujyane kwa muganga yitabweho akire."

Umuntu agaragaza ko afite uburwayi bwo mu mutwe mu gihe atangiye kugira ikibazo cyo kubura ibitotsi, akivugisha bitandukanye naho ari, kubona amashusho abandi batabona, bikwiye ko abakuri hafi bamenya ko hari ibyahindutse umuntu agafashwa kujyanwa kwa muganga.

Ubushakashatsi bugaragaza ko umuntu umwe mu bantu batanu ashobora kugira uburwayi bwo mu mutwe, cyakora ubushakashatsi bwakozwe mu Rwanda bugaragaza ko abantu bafite agahinda gakabije bagera kuri 11%.

Mukeshimana Mediatrice avuga ko uburwayi bwo mu mutwe bwiyongereye mu bihe bya COVID-19, asaba ababyeyi mu miryango kwirinda amakimbirane cyane cyane ku bagore batwite kuko bishobora kugira ingaruka ku mwana atwite.

Umuyobozi w’Akarere ka Rubavu Mulindwa Prosper avuga ko mu Karere hari abafite uburwayi bwo mu mutwe kandi bagomba kwitabwaho no gukumira abandi bashobora kurwara.

Ati: "Ni uburwayi nk’ubundi buvurwa bugakira. Dufite ababyize bafasha abarwaye bagakira. Tureke guhohotera abagaragayeho uburwayi bwo mu mutwe, ubugaragayeho ajyanwe kwa muganga azahasanga abaganga, iyo basanze bikomeye yoherezwa ku bitaro kandi ubwishingizi mu kwivuza mutuweli irakoreshwa mu kwivuza."

Mulindwa anenga abayobozi mu nzego z’ibanze baheza urwaye uburwayi bwo mu mutwe, akavuga ko uvuwe agakira ashobora kugaruka mu muryango agafasha igihugu kwiteza imbere.

Habimana Alfred yatorewe kuba Umuyobozi Wungirije w’Akarere ka Rusizi

Ni umwanya asimbuyeho Ndagijimana Louis Munyemanzi weguye ku nshingano ze n’abandi bajyanama bane barimo Visi Perezida w’Inama Njyanama y’Akarere ka Rusizi tariki 2 Mata 2024.

Akarere ka Rusizi kabonye umuyobozi wungirije ndetse n’abajyanama batanu bo kuzuza Inama Njyanama aho hatowe Ngayaboshya Silas, Habimana Alfred, Karangwa Cassien, Uwizeye Odette na Mukakalisa Francine.

Ndagijimana Louis Munyemanzi n’abandi bajyanama beguye bavuga ko babikoze ku mpamvu zabo ariko byari bitewe n’amakimbirane yari muri aka Karere ndetse atuma Perezida w’Inama Njyanama, Visi Perezida w’Inama n]Njyanama n’abandi Bajyanama begura ku nshingano.

Abasimbuwe mu Nama Njyanama bari beguye ni Ndagijimana Louis Munyemanzi wari Umuyobozi w’Akarere wungirije ushinzwe iterambere ry’Ubukungu, Mukarugwiza Josephine wari umujyanama ariko akayobora Komisiyo y’Iterambere mu Nama Njyanama, Habiyakare Jean Damascène wari Umujyanama akaba yari Umuyobozi wa komite ngenzuzi muri Njyanama y’Akarere, na Kwizera Giovani Fidèle wari Umujyanama ariko akaba Visi Perezida w’Inama Njyanama y’Akarere ka Rusizi, bakaba bari beguye bakurikira Uwumukiza Beatrice wari Perezida w’Inama Njyanama ariko na we akaza kwegura.

Abari muri gare ya Rubavu babwiye Kigali Today ko Furaha usanzwe akorera Ritco yagonzwe n’umuyobozi w’iki kigo mu Karere Rubavu warimo asubira inyuma ashyira imodoka mu mwanya ngo ishyirwemo abagenzi.

Umwe muri bo yagize ati: “manager yamugonze atabishaka, ubwo yarimo asubira inyuma aramukandagira arakomereka ariko ageze kwa muganga ahita apfa."

Umuvugizi wa polisi ishami ryo mu muhanda yabwiye Kigali Today ko impanuka yabaye saa moya n’iminota 20 za mu gitondo, ubwo uyu muyobozi yashyiraga imodoka ku murongo ngo ijyemo abagenzi.

Agira ati "ibyabaye ni impanuka, ariko turasaba abantu kwirinda gukinisha imodoka, cyane cyane turabwira ba kigingi n’abandi babona umushoferi avuye mu modoka bagahita bayijyamo bakayitwara."

Umuvugizi wa polisi ishami ryo mu muhanda avuga ko uretse kuba iriya mpanuka yabaye muri gare ya Rubavu, ngo hari izindi mpanuka ziba ahapakirwa imicanga, asaba abantu kwirinda gukinisha imodoka.

"Umushoferi agomba kuva mu modoka ayishyize mu mwanya wayo, kandi nta wundi agomba guha kontaki ngo amutwarire imodoka "

N’ubwo Umuyobozi wa Ritco mu Karere Rubavu yagonze umwe mu bakozi be, asanzwe afite uruhushya rwo gutwara imodoka ariko rutari urw’imodoka yarimo gutwara.

Ibi yabigarutseho mu buhamya yatanze ku itotezwa ryakorewe Abatutsi mu yahoze ari Perefegitura ya Gisenyi nyuma y’ibitero by’Inkotanyi byo kubohora u Rwanda mu 1990.

Kayiranga wafunzwe mu byitso muri Gisenyi

Kayiranga avuga ko nyuma yo kugera ku mupaka wa Sudani bagarutse mu Rwanda mu 1974 agasubira mu ishuri ariko bagahorana ubwoba batinya ko ibikorwa byo kwica Abatutsi byakongera bikaba.

Kayiranga avuga ko mu 1990 urugamba rwo kubohora u Rwanda rwabaye ari umukozi muri Hotel Merdien, ndetse muri Gisenyi byaje gukomera ubwo Inkotanyi zafunguraga gereza ya Ruhengeri tariki 23 Mutarama 1991.

Avuga ko abayobozi batangiye gahunda yo kugenzura Abatutsi bahura n’abandi babashinja ko bakora inama.

Avuga ko muri Mutarama 1991 yagambaniwe ngo afungwe ariko arabimenya, ashaka gutoroka, ndetse asezera ku mubyeyi we, ariko kubera ko iyo wahungaga umuryango wajyaga mu kaga, ahitamo kubireka.

Agira ati “Nasubiye kuri Merdien nanga ko umuryango wanjye ujya mu kaga, umubyeyi wanjye yarwaraga asima, nsanga ningenda bazamugirira nabi. Nagiye gutegereza kuri Merdien, hari tariki 28 Mutarama saa yine, mbona abantu baje kundeba bambwira ko bashaka kumbaza kuri burigade.”

Kayiranga avuga ko yabajije icyo bamurega bamubwira ko ari Inkotanyi kandi amaze iminsi akoresha inama, akaba agomba kubisobanura.

Avuga ko ubuzima bwo muri burigade bwari bubabaje cyane kuko mu ijoro bazanaga Abagogwe babakomerekeje.

Ati “Umunsi umwe ndibuka bazanye umuntu yakomeretse, mu ijoro arataka, babaza usakuza baramubona kubera uburibwe yari afite, baramusohora bavuga ko bagiye kumuvura, baramukubita, aho yakomeretse bahasuka amazi, mu masaha y’igicuku wa muntu yababwiye ko afite inyota asaba amazi, maze ahita apfa.”

Mu byumweru bibiri bagiye kubafungira muri gereza yari yegeranye n’ikigo cya gisirikare cyari ahubatse Ibiro bya Polisi by’Intara y’Iburengerazuba.

Muri gereza ya Gisenyi yari yanditseho 1937 ngo basanzemo abantu bafungiye ibyaha bitandukanye bababwiraga ko bashatse babica kuko nta kindi gihano bahabwa.

Ati “Gufungwa uzira kuba icyitso wabaga umerewe nabi cyane. Batubwiraga ko bazadufata bugwate kandi ko Inkotanyi nizifata Gisenyi bazatwica.”

Avuga ko bari 96 bashyirwa muri bus babajyana i Kigali, aho bari bategerejwe n’abantu benshi bafite inkoni.

Ati “Uko uvuye mu modoka bagukubita, hari umugabo bakubise umutsi uraturika amaraso arava, uretse ko yagize amahirwe akomeza kubaho.”

Muri gereza ya Kigali twasanze hari abandi benshi bafunzwe, kuko mu Rwanda hari hafunzwe Abatutsi 7200 bivugwa ko Inkotanyi nizifata Kigali bazabica.

Ati “Twagize amahirwe Abadiplomate batangira kuvuga ko hari abantu bafunzwe kandi nta byaha baregwa. Muri gereza ya Kigali twari turenze ibihumbi bitanu, ku buryo iyo washakaga guhindukira wasabaga abo mwegeranye guhindukirira rimwe kubera kwegerana.”

Akomeza avuga ko muri Werurwe 1991 abakozi ba Croix-Rouge batangiye kubabwira ko bihangana.

Ati “Batubwiraga ko twihangana kuko abadufunze bashobora kudusimbura muri gereza. Njye navuyemo mu kwezi kwa kane gutangiye.”

Kayiranga avuga ko Jenoside yari yarateguwe kera kuko bafunguwe bari barogoshwe umuntu bahuye agahita abamenya. Ikindi cyari kigoye ni uko kuva muri Perefegitura ujya mu yindi byasabaga uruhushya.

Kayiranga yagiriwe inama yo guhunga, ariko asabye icyangombwa gituma ava muri Kigali arakimwa.

Ati “Superefe Bikumbira namusabye icyemezo arakinyima, ambwira ko nguma muri Kigali, gusa naje gushaka ibyangombwa byo gutura mbona uruhushya njya i Butare nkomeza njya i Burundi.”

Kayiranga ari i Burundi hari umuntu wamuzaniye ubutumwa bw’umuntu bari bafunganywe witwa Tabaro Modeste amwandikira amubwira ati “uzi amahane yanjye, ubu nsigaye nambara ishapule, dutegereje gupfa, umunsi uwo ari wo wose dushobora gupfa.”

Kayiranga avuga ko ibyabaye mu Rwanda ntawabyungukiyemo kuko n’abakoze Jenoside bahuye n’ihungabana bitewe n’ibyo bakoze, ati “kuko iyo muhuye babura aho bareba.”

Guverineri w’Intara y’Iburengerazuba, Dushimimana Lambert, avuga ko ibintu by’amoko ntacyo bimaze kuko byagejeje u Rwanda ahantu habi, Abanyarwanda bakaba bagomba guharanira ko bitagaruka ukundi.

Perefegitura ya Gisenyi ni imwe mu zateguriwemo Jenoside yakorewe Abatutsi, ndetse itangirirwamo igerageza kuva mu 1991 ku Batutsi bari batuye ahitwa mu Bigogwe.

Urwibutso rwa Gisenyi rwiswe Komine Rouge kubera ubugome ndengakamere bwahakorewe mu kwica Abatutsi

Abarokotse Jenoside yakorewe Abatutsi mu mujyi wa Gisenyi bavuga ko tariki 30 Mata 1994, imodoka irimo indangururamajwi yaciye mu mujyi wa Gisenyi, isaba abihishe kuva mu bwihisho kuko amahoro yabonetse, ko nta Mututsi uzongera kwicwa.

Uwitwa Habanzintwari Theogene wo mu itsinda ry’abana barokotse Jenoside yakorewe Abatutsi ryitwa ‘Wishavura’ avuga ko Abatutsi bavuye mu bwihisho bajyanywe muri Stade baricwa.

Agira ati “Uyu Murenge wacu wibuka tariki 30 Mata kuko nibwo hishwe Abatutsi benshi, nyuma yo kubabeshya ko habonetse ituze bakava mu bwihisho.”

Umuyobozi w’Akarere ka Rubavu, Mulindwa Prosper, asaba abatuye mu Mujyi wa Gisenyi kugaragaza ahakiri imibiri y’abishwe muri Jenoside itarashyingurwa mu cyubahiro.

Agira ati “Turacyabona amakuru macye cyane, nkaba nsaba Abanyarubavu uwo musanzu wo gutanga amakuru. Kuba hari abafite amakuru ariko badashaka kuyatanga, bigaragaza ubugwari bwa bamwe.”

Abayobozi batandukanye bitabiriye iki gikorwa barimo Visi Perezida wa Sena, Nyirasafari Espérance, Abasenateri, Abadepite, Guverineri Dushimimana Lambert, Ubuyobozi bw’Akarere ka Rubavu n’abaturage b’Umurenge wa Gisenyi

Ubu buhamya kandi bushingira ku byavuye mu rubanza rwa Colonel Anatole Nsengiyumva wahamijwe icyaha cya Jenoside n’Urukiko Mpuzamahanga Mpanabyaha rwashyiriweho u Rwanda, akatirwa igifungo cya burundu, cyaje kugabanywa gishyirwa ku myaka 15 mu bujurire.

Hari na Omar Serushago wahamijwe icyaha cya Jenoside n’Urukiko Mpuzamahanga Mpanabyaha rwashyiriweho u Rwanda, yemeye ko yakoze Jenoside akatirwa igifungo cy’imyaka 15.

Bernard Munyagishari, inkiko zo mu Rwanda zamuhamije icyaha cya Jenoside akatirwa igifungo cya burundu, naho Hassan Ngeze yakatiwe gufungwa burundu nyuma yo guhamwa n’icyaha cya Jenoside n’ibindi byaha byibasira inyoko muntu. Muri 2007 icyo igihano cyaragabanyijwe, ahanishwa igifungo cy’imyaka 35.

Bunamiye abasaga ibihumbi bitanu baruhukiye muri uru rwibutso

Urwibutso rwa Gisenyi ruzwi nka Komine Rouge, izina ryatanzwe muri Jenoside kubera ko ari ho hajyanwaga Abatutsi bababwira ko babajyanye kuri Komine kandi babajyanye kubica.

Aha bajyanwaga kwicirwa hari hasanzwe hari irimbi rishyingurwamo abantu bitabye Imana, ariko mbere gato ya Jenoside yakorewe Abatutsi, hagiye hacukurwa ibyobo bishyirwamo Abatutsi bicwaga bashinjwa kuba ibyitso.

Minisiteri y’Ubumwe bw’Abanyarwanda n’Inshingano Mboneragihugu, mu nyandiko zayo, ivuga ko guhera mu 1990, urugamba rwo kubohora u Rwanda rutangiye, Abatutsi bo mu zahoze ari Komine Mutura, Kayove, Nyamyumba ndetse n’abo muri Komine Kibirira bagiye bicwa bitwa ibyitso by’Inkotanyi, imirambo yabo ikaza kujugunywa mu byobo byari byaracukuwe mu irimbi rya Gisenyi mu rwego rwo gusibanganya ibimenyetso.

Hari n’abagiye bicirwa muri Gereza ya Gisenyi bakicwa mu ibanga, bakaza kujugunywa muri ibyo byobo.

Mu byihutishije Jenoside ku Gisenyi harimo uruhare rukomeye rwa Colonel Nsengiyumva Anatole wayoboraga ikigo cya gisirikari cya Gisenyi.

Inyandiko za Minisiteri y’Ubumwe bw’Abanyarwanda n’Inshingano Mboneragihugu zivuga ko Colonel Anatole Nsengiyumva hamwe na Colonel Theoneste Bagosora, Aloys Ntabakuze, na Joseph Nzirorera, bacuze umugambi wo gutsemba Abatutsi muri Perefegitura ya Gisenyi, batangira kubiba urwango, gutera impagarara, gutoza Interahamwe, gutanga imbunda, gukora amalisiti, no kwica Abatutsi bo mu ma Komine ya Gisenyi na Ruhengeri.

Ubwo indege yari itwaye uwari Perezida Habyarimana yaraswaga mu ijoro tariki ya 6 Mata 1994, Colonel Nsengiyumva Anatole yahise akoresha inama itegura ubwicanyi, ibera mu kigo cya gisirikari cya Gisenyi, yitabirwa n’abasirikari bo mu kigo cya gisirikari cya Gisenyi na Jandarumori, n’abakuru b’Interahamwe na CDR, maze Colonel Nsengiyumva abategeka guha imbunda Interahamwe, no gushyiraho bariyeri hose muri Gisenyi.

Tariki ya 7/4/1994, habaye indi nama ahari isoko rya Gisenyi, Anatole Nsengiyumva ategeka Interahamwe gutangira kwica Abatutsi, bakagenda inzu ku yindi, dore ko abaturage bari bategetswe kuguma mu rugo, ntawe ushobora gusohoka, keretse abasirikari n’Interahamwe.

Abatutsi bishwe mbere ni abari batuye hafi y’ikigo cya gisirikari n’ibitaro bya Gisenyi, imirambo yabo ikaba yari inyanyagiye hose. Imodoka zagendaga zitunda imirambo, ikajya kujugunywa mu byobo byacukuwe kuri Komine Rouge.

Amwe mu mafoto y’Abatutsi baruhukiye mu rwibutso rwa Komine Rouge

U Rwanda rwiteguye kwakira abimukira bava mu Bwongereza

Muri Werurwe 2024 byemejwe ko abimukira bimwe ubuhungiro mu gihugu cy’u Bwongereza bazoherezwa mu Rwanda.

Ikinyamakuru the Sun cyo mu Bwongereza cyatangaje ko umuntu woherejwe mu Rwanda yaje ku bushake ndetse ko yavuye mu Bwongereza tariki 29 Mata 2024 mu ndege isanzwe yo gutwara abagenzi.

U Rwanda rwemeje ko uwo muntu yageze mu Rwanda ariko rwirinda gushyira umwirondoro we hanze bitewe n’uko rushaka kubahiriza ubuzima bwite bwe.

U Rwanda rwateguye ko abimukira bazazanwa mu Rwanda bazakirirwa mu nyubako yitwa ‘Hope’ yubatse i Kagugu mu nkengero y’umujyi wa Kigali.

Minisiteri y’Ubutegetsi bw’Igihugu y’u Bwongereza ivuga ko amafaranga iha abarebwa no kujyanwa mu Rwanda ashobora kubafasha kuriha icumbi mu gihe gito mu Rwanda cyangwa akabarihira ibijyanye no kwiga nk’uko bashobora kuyakoresha mu bucuruzi.

Minisitiri w’Ubucuruzi w’u Bwongereza, Kemi Badenoch, yumvikanishije ko kuba hari umuntu wagiye mu Rwanda ku bushake bigaragaza ko u Rwanda ari igihugu gitekanye.

Yatangaje ko uwo muntu yahawe amapawundi 3,000 (abarirwa muri Miliyoni enye n’ibihumbi 800 mu mafaranga y’u Rwanda).

Imibare ya Leta y’u Bwongereza igaragaza ko abantu 19,253 badafite uburenganzira bwo kuguma mu Bwongereza bahakuwe ku bushake muri 2023. Muri bo, abantu 3,319 bahawe "amafaranga y’imperekeza" cyangwa barihirwa amatike y’indege na Minisiteri y’Ubutegetsi bw’Igihugu.

Minisiteri y’Ubutegetsi bw’Igihugu y’u Bwongereza yemeje ko u Rwanda rwemeye kwakira icyiciro cya mbere cy’abantu 5,700 basaba ubuhungiro.

Amakuru agera kuri Kigali Today aravuga ko iyo mpanuka yabaye ku mugoroba tariki 29 Mata 2024, ibera ku gice cy’amazi y’Akarere ka Nyamasheke mu Murenge wa Kagano aho bwagonze ibuye rinini, burangirika.

Ubuyobozi bwa ‘Mantis Kivu Queen uBuranga’ bwashyize hanze itangazo bwemeza iby’iyo mpanuka, busobanura ko abari mu bwato bashoboye gutabarwa bakurwamo, naho ubwato burakururwa bushyirwa ku nkombe.

Abatekinisiye b’ubwo bwato bihutiye gusuzuma imiterere y’iyo mpanuka no kugenzura ibyangiritse kugira ngo babusane, ubuyobozi bukizeza ko nyuma yo kubusana buzasubukura ibikorwa byabwo mu gihe kidatinze.

Ubwato ‘Mantis Kivu Queen uBuranga’ nibwo bwato bwa mbere mu Rwanda bukora nka Hoteli y’inyenyeri eshanu bukaba ubwato bukunzwe cyane cyane n’abatembera mu Rwanda.

Busanzwe bukorera mu mazi y’ikiyaga cya Kivu mu Turere twa Karongi, Nyamasheke, Rubavu na Rusizi.

Bufite uburebure bwa metero 35, bukagira ibyumba 10, aho gufatira amafunguro n’ibyo kunywa, ubwogero n’ibindi.

Bufite ibyumba byo mu rwego rwo hejuru birimo ibishobora kwakira Abakuru b’Ibihugu.

Abasura Rubavu barasabwa kwitondera Ikivu

Ubuyobozi bw’Akarere ka Rubavu bufashe izi ngamba mu kugabanya umubare w’abantu bagwa mu kiyaga cya Kivu, kuko umwaka wa 2023 abantu 15 bahitanywe n’amazi y’Ikivu mu Karere ka Rubavu, benshi barimo koga.

Umuyobozi wungirije w’Akarere ka Rubavu ushinzwe iterambere ry’ubukungu, Deogratias Nzabonimpa, akaba yatangarije Kigali Today ko hari abantu baza kwishimira ubwiza bw’ikiyaga cya Kivu batazi koga bakakigwamo bakahasiga ubuzima.

Agira ati “Zimwe mu ngamba zigomba kubahirizwa harimo kwambara umwambaro urinda abantu kurohoma, kwitwararika kujya mu mazi ku bantu batazi koga kimwe no kwisunga abazi koga kugira ngo babafashe.”

Abayobozi basabye abafite ibikorwa ku nkengero z’ikiyaga cya Kivu gukurikirana aboga

Ni ingamba zigomba kubahirizwa mu kugabanya imfu zitunguranye z’abantu basura Akarere ka Rubavu mu gihe impeshyi yegereje, aho gasurwa cyane.

Nzabonimpa avuga ko mu Rwanda hari imvura nyinshi kandi inkengero z’ikiyaga cya Kivu amazi yarazirengeye, ndetse n’abahafite ubutaka bakoresha bwatangiye kurengerwa n’amazi, abakoresha amato ashaje bakaba basabwa kuyahakura no kuyasimbuza, mu gihe abasura aka Karere basabwa kugenzura ubwato bakoresha.

Agira ati “Turasaba ko ubwato bushaje bwasimburwa, kandi n’umugenzi na we yagombye kugenzura ubwato agiye kwinjiramo kuko ni ubuzima bwe agomba kurengera, na ho kwambara umwenda wo kujyana mu mazi urinda umuntu kurohama ni itegeko.”

Yungamo ko ahantu hose hasurwa n’abantu benshi hagomba kuba hafite umuntu umenyereye koga, kandi ufasha abashaka kujya mu mazi mu kubarinda ko barohama.

Abaturage bahawe umwanya wo gutanga ibitekerezo

Hagendewe ku mibare itangwa n’ishami rya Polisi y’u Rwanda rikorera mu mazi, igaragaza ko mu 2023 abantu 15 baguye mu mazi mu Karere ka Rubavu, mu gihe kuva umwaka wa 2024 watangira abantu 2 aribo bamaze guhitanwa n’ikiyaga cya Kivu muri Rubavu.

Umugezi wa Sebeya wubakiwe inkuta ziwubuza gusenyera abaturage

Mwambutsa Céléstin, umuyobozi wa WASAC mu Karere ka Rubavu, atangaza ko mu gihe harimo kugwa imvura nyinshi, abaturage basabwa kubika amazi.

Agira ati “Muri iki gihe cy’imvura nyinshi muzajye muzigama amazi mu gihe muyafite muri ‘robinets’ zanyu. Uruganda rutunganya amazi rwa Gihira rwatangiye guhura n’ibibazo kubera imvura irimo kugwa mu Rutsiro na Nyabihu.”

Mwambutsa avuga ko tariki ya 21 Mata 2024, uruganda rwa Gihira rwahagaze amasaha 10 kubera imvura yaguye mu misozi ya Rutsiro, umugezi wa Sebeya ukamanura isuri bigatuma uruganda ruhagarara, bituma bamwe mu bafatabuguzi babura amazi.

Umugezi wa Sebeya ufite inkomoko mu misozi miremire mu Turere twa Nyabihu, Ngororero na Rutsiro, ndetse hamwe hacukurwa amabuye y’agaciro, bikagira ingaruka iyo imvura iguye ari nyinshi kuko amazi amanura isuri mu mugezi wa Sebeya, ukoreshwa n’inganda mu gutunganya amazi n’amashanyarazi.

Umugezi wa Sebeya, uretse kuba uturanye n’imiryango myinshi y’abaturage, ufitiye Igihugu akamaro mu bijyanye nibikorwa remezo.

Umugezi wa Sebeya ukoreshwa n’inganda eshatu zikora amashanyarazi, uruganda rwa Gihira rufite ubushobozi bwo gutunganya nibura metero kibe ibihumbi 23, ni uruganda rwongerewe ubushobozi mu gufasha abatuye Akarere ka Rubavu kubona amazi, ariko ruracyafite imbogamizi zo guhura n’isuri imanuka mu mugezi wa Sebeya, bigasaba ko babanza gufunga kugira ngo icyondo n’umucanga bitangiza imashini.

Uretse kuba abaturage babura amazi, isuri imanuka mu misozi ya Ngororero na Rutsiro igira ingaruka ku nganda zikora amashanyarazi, kuko na zo zidashobora gukomeza gukora mu gihe isuri ari nyinshi.

Leta y’u Rwanda yashoye abarirwa muri Miliyari 15Frw mu kubungabunga icyogogo cya Sebeya, hakorwa amaterasi ku misozi ikikije icyogogo cya Sebeya, gutera ibiti, guha abaturage inka, ibigega bifata amazi ku nzu no kugabanya inkwi zikoreshwa mu gucanwa.

Hubatswe ibyobo bifata amazi y’umugezi wa Sebeya, ndetse ku nkengero z’uwo mugezi haterwa ibiti, ariko imvura yaguye muri Gicurasi 2023, yasenyeye imiryango ibarirwa mu gihumbi abandi barimurwa.

Abaturiye Sebeya basabwa kwigengesera, kuko imvura ishobora kongera kugwa ikaba yagira ibyo yangiza.

Abaturage bavuye mu byabo mu Mujyi wa Bujumbura

Bimwe mu bihugu by’Afurika y’Iburasirazuba byugarijwe n’imyuzure yatewe n’imvura nyinshi, aho abantu 58 bamaze guhitanwa n’ibiza mu gihugu cya Tanzaniya n’abandi 13 mu gihugu cya Kenya.

Hari byinshi bimaze kwangirika mu bihugu nk’u Burundi, Zambia, Repubulika Iharanira Demokarasi ya Congo (RDC) na Repubulika ya Congo. Ishami ry’Umuryango w’Abibumbye ryita ku bana (UNICEF), ritangaza ko muri Congo-Brazzaville nibura abana ibihumbi 100 bakeneye ubutabazi bwihuse, mu gihe ibihumbi 49 ubu badafite aho kwigira muri Komini ya Mpouya mu majyaruguru y’uruzi rwa Congo.

Mu burasirazuba bwa RDC mu gace ka Kalemie, amazi menshi avuye mu kiyaga cya Tanganyika yinjiye mu nzu z’abaturage. Abaturage bavuga ko abagera muri 3500 bamaze kuva mu byabo kubera amazi y’ikiyaga cya Tanganyika n’imigezi yisukamo, inzu z’abaturage, inzu z’ubucuruzi n’ubuyobozi zose bazivuyemo.

Leta y’u Burundi yamaze gushyira hanze impuruza yo gufashwa, kuko amazi y’ikiyaga cya Tanganyika yamaze kwimura abarenze ibihumbi 100 bari batuye ku nkengero zacy, ndetse n’ibikorwa by’ubucuruzi birahagarara.

Itangazo ryashyizwe hanze na Guverinoma y’u Burundi, rigaragaza ko abantu 306,000 bakeneye ubutabazi, mu gihe abagera ku bihumbi 20 badafite aho kuba.

Amazi ya Tanganyika mu Burundi yarazamutse cyane arengera ahakorerwaga ibikorwa bitandukanye

Igihugu cy’u Burundi kikaba kibarirwa mu bihugu 20 bizibasirwa n’ibiza, bitewe n’imihindagurikire y’ikirere kugera muri Gicurasi 2024.

U Rwanda rurasabwa kwitegura

U Rwanda nk’igihugu cyahuye n’ibiza muri Gicurasi 2023, ubuyobozi bushinzwe iteganyagihe butangaza ko ukwezi kwa Kane n’ukwa Gatanu hazaboneka imvura nyinshi.

Iteganyagihe rigaragaza ko mu kwezi kwa Mata 2024, imvura izaboneka mu Rwanda iri ku gipimo cya mm 100 kugera kuri mm 300 mu gihugu hose, ariko mu Ntara y’Iburengerazuba ni ho hazaboneka imvura nyinshi iri mu bipimo bya mm 220 na mm 260, Musanze, Burera no mu Burengerazuba bwa bw’Akarere ka Nyaruguru.

Umuyobozi mukuru ushinzwe igenamigambi no guhangana n’ibiza muri Minisiteri y’Ibikorwa by’Ubutabazi (MINEMA), Rukebanuka Adalbert, yabwiye itangazamkuru ko mu myaka itanu ishize abantu 492 bahitanywe n’ibiza kandi abenshi bakubiswe n’inkuba.

Rukebanuka avuga ko igenzurwa ryakozwe rigaragaza ko Intara y’Iburengerazuba ifite ubudahangarwa bugera kuri 42% bwo kwirinda ibiza, hakaba hagomba gushirwaho ingamba zishoboka.

Ibiza biheruka kwibasira u Rwanda cyane cyane mu Ntara y’Iburengerazuba, byatwaye akayabo ka Miliyoni 500 z’Amafaranga y’u Rwanda.

Ndagijimana Céléstin asobanura ibyo bateganya mu kurwanya igwingira

Ibyo bitangajwe nyuma yo gusezerera abana 250 bari bamaze imyaka 22 bitabwaho n’iryo torero mu burezi, imyitwarire no kubategura kuba abantu bakuru.

Ndagijimana yabwiye Kigali Today ko uretse abo 250 bashoboye guherekeza mu myaka 22, babafasha mu mibereho n’imyigire, ngo bafite abandi bana 250 bagiye kwitaho ariko bakazajya bahera ku mwana ukiri mu nda ya nyina mu miryango ikennye.

Agira ati “Turaherekeza abana barerewe mu itorero bafashwa na Compassion International, kuva ku myaka itatu kugera ku myaka 22, aho tuba twizeye ko bamaze kuba bakuru, abiga baba bararangije amashuri ndetse benshi baragiye mu nshingano, kubasezerera ni ukabashimira igihe babanye natwe ariko tubasaba kujya mu buzima busanzwe, kandi bagakomeza kwitwara neza no kubaka Igihugu.”

Akomeza agira ati “Mu myaka 22 bafashijwe kwiga, batozwa ijambo ry’Imana, kubana n’abandi, tubigisha umuco n’uko bagomba kwitwara, kandi byatanze umusaruro kuko benshi barize barangiza kaminuza, bari mu nshingano zitandukanye bakorera Igihugu.”

Abasezerewe ngo biteguye gufasha barumuna babo

Avuga ko mu byiciro by’abana bagiye kuzajya bafata, bazibanda ku bavuka mu miryango ikennye kugira ngo batangire kubitaho bakibatwite.

Ati “Tugiye guhindura uburyo twita ku bana kuko tuzajya dufata umwana ufite umwaka zero, umubyeyi akimutwite, umubyeyi tumutoze gukorera hamwe n’abandi mu matsinda, tubafashe kubaka uturima tw’igikoni, tubahe amatungo kugira ngo umwana avuke hari ibyo azakenera byateguwe mu kubaho kwe adahuye n’igwingira.”

Bamwe mu bafashijwe bavuga ko ubuzima bwari kuba ukundi, iyo Compassion International itahaba.

Nkundibiza Jackson yavukiye mu Karere ka Musanze, avuga ko umuryango we wari ukennye ariko kubera Compassion yashoboye kwiga akarangiza amashuri none na we akaba arimo gufasha uribyiruko rwa Compassion rurangije, kwishyira hamwe kugira ngo bakomeze kwiteza imbere no gufasha barumuna babo.

Nkundibiza avuga ko umuryango wa Compassion International umaze gufasha abana bagera ku bihumbi 10 mu Rwanda, kandi bagomba gushyira hamwe imbaraga bakagira ibikorwa by’iterambere bageraho.

Agira ati “Zimwe mu mbogamizi tugira ni uko hari abarangiza ntitwongere kubabona, kandi tuba tugomba gushyira hamwe imbaraga tugafasha barumuna bacu ndetse tukagira n’ibikorwa duhuriramo mu kwiteza imbere. Nk’ubu mu Ntara y’Iburengerazuba twatangiye gukora amasabune y’amazi, kandi turateganya n’ibindi bikorwa bizadufasha kwiteza imbere. Turizera ko dukomeje guhurira hamwe twazagera kure tukubaka SACCO nk’abo muri Uganda.”

William Nisingizwe ukuriye ubufatanye n’amatorero muri Compassion mu Ntara y’Iburengerazuba, avuga ko bafite gahunda yo gukomeza guhuza abafashijwe na Compassion kugira ngo bIrinde ko hari uwahura n’ikibazo cy’ubukene, ahubwo bakazajya bamuba hafi mu bikorwa by’amajyambere.

Umunyamabanga Nshingwabikorwa w’Umurenge wa Kivumu, Icyizihiza Alida ashimira umuryango wa Compassion International n’itorero ry’Angilikani mu bikorwa byo gufasha abana no guharanira iterambere ryabo, avuga ko mu Murenge wa Kivumu bazakomeza gukorana mu guharanira kugira umuturage ubayeho neza kandi uteye imbere.

Akarere ka Rutsiro kaza ku mwanya wa mbere mu kugira abana bafite igwingira ku gipimo cya 33%, mu gihe u Rwanda ruteganya ko umwaka wa 2024 uzarangira rugeze ku gipimo cya 19%.

Ngo ntibikwiye ko umuntu ahabwa inka nyuma akayambuirwa

Ibyo bitangajwe nyuma y’uko hari abaturage bagaragaje ko bananiwe kwishyura ubwisungane mu kwivuza, bituma inka bahawe muri gahunda ya Girinka bazakwa zihabwa abandi.

Mulindwa Prosper, Umuyobozi w’Akarere ka Rubavu, avuga ko ubundi gahunda ya Girinka yatangijwe na Perezida wa Repubulika, Paul Kagame mu mwaka wa 2006, kandi aho yageze hose yagaragaje umusaruro, kuko yahinduriye abaturage imibereho.

Agira ati “Ni gahunda Umukuru w’Igihugu yemereye Abanyarwanda mu kubavana mu bukene, gufata umuntu utishoboye ukagerekaho ibindi umwaka kugira ngo umuhe inka, ntibikwiye. Umuturage ugezweho ku rutonde rwemejwe na komite ya Girinka, witeguye mu kubaka ikiraro agatera ubwatsi, agomba guhabwa inka akayorora yabyara akitura.”

Uyu muyobozi akomeza avuga ko inka yageze mu rugo itagomba kuruvamo, mu gihe hatabaye impamvu ikomeye kandi nabwo umuturage abanza kuganirizwa.

Agira ati “Kunyaga umuntu inka si ikintu cyo gushyirwa imbere, iyo habaye ikibazo, aregerwa akagirwa inama. Iyo nka ni iyo kumuvana mu bukene, si ikintu umuha ngo wongere ukimwake, inka yageze mu rugo igomba kuruhoramo, kuko inka ihindura ubuzima bw’umuryango.”

Meya Mulindwa Prosper

Akomeza agira ati “Twumvise umuturage wambuwe inka kubera ko atishyuye mituweli, tugiye gusesengura uko gahunda ya girinka ihagaze, turebe uko inka zinjiye mu murenge, uko zagiye ziturwa kuko hari aho inka zitangwa ariko ugasanga gahunda yo kwitura ntikomeza gutera imbere. Tuzareba inka uko zatanzwe, abituye, turebe niba hari izapfuye cyangwa izagurishijwe.”

Gahunda ya Girinka yatangijwe mu mwaka wa 2006, kugera muri 2024 imiryango irenga 480,000 yahawe inka ivuye kuri 297,230 muri 2017, mu gihe intego yari imiryango 486,230.

Ibaruwa yashyizweho umukono na Alphonse Rukaburandekwe, Umuyobozi Mukuru wa RHA, ivuga ko aya makaro ashyirwa ku nzu yagombye gukoreshwa mu bwogero, kuyakoresha ku zindi nyubako bikaba byangiza ibidukikije n’ubwiza bw’imijyi mu turere dutandukanye, asaba inzego zitandukanye kubikurikirana bitaragira ingaruka ku baturage.

RHA ikomeza itangaza ko gukoresha ayo makaro ku nyubako hanze bidatanga ubwiza bw’inyubako uko bikwiye, RHA ikaba igira inama Abanyarwanda n’ubuyobozi gusiga amarangi ku nkuta z’inyubako.

Kuva muri 2023 mu turere dutandukanye mu Rwanda amazu y’ubucuruzi yatangiye gushyirwaho amakaro asimbura amarangi yari asanzwe akoreshwa.

Bategetswe gushyira amakaro ku nyubako, ariko na byo byanenzwe

Abaturage baganiriye na Kigali Today mu Karere ka Musanze, bavuze ko muri Mutarama 2021, abafite inzu z’ubucuruzi mu nkengero z’umujyi wa Musanze bose bategetswe gukuraho amarangi asanzweho, bakayasimbuza irangi ry’ivu.

Bitarenze ukwezi kumwe, abo baturage babwiwe ko iryo rangi ritagezweho, basabwa kuryongeraho imitako ya Made in Rwanda izwi ku izina ry’imigongo.

Kubera ko yari gahunda itunguranye hategurwa inama ya CHOGM, bamwe mu baturage biyambaje amabanki mu rwego rwo kwirinda guhabwa ibihano byo kurenza itariki yari yagenwe yo gushyira iyo mitako ku nzu zabo.

Mu ntangiro za Werurwe 2024, abaturage bongeye gutungurwa no kubwirwa ko imitako ya made in Rwanda itakigezweho, basabwa kuyikuraho bagashyiraho amakaro, ndetse bahabwa itariki ntarengwa ya 31 Werurwe 2024, kuba basoje icyo gikorwa nk’uko biri mu mabaruwa bandikiwe, ibyo bikajyana no gusasa amapave ku mbuga z’imyubako zabo.

Umwe ati “Turimo kunanizwa mu buryo bukomeye, guhora badusaba gusiga amarangi bwacya ngo mukureho mushyireho imigongo, nyuma bati mukureho mushyireho amakaro biraduhombya. Nk’iyi nzu yanjye y’imiryango itatu irimo kunsaba miliyoni irenga ku makaro gusa”.

Arongera ati “Ongeraho n’amapave ndimo gusabwa, ayo mafaranga ntaho nayakura kuko ubwo badusabaga gushyiraho imitako ya made in Rwanda byansabye kujya muri banki na n’ubu ndacyishyura umwenda”.

Undi ati “Byose byicwa no gukora nabi inyigo bakaduhoza mu rungabangabo, babidutegetse nta kundi twabigenza ariko babimenye ko barimo kuduteza igihombo, guhora mu mavugurura adashira ni ikibazo. Ubu n’ibi by’amakaro badusabye nta mwaka bimara batadutegetse gusenya tukubaka ama etage”.

Abagaragaje icyo kibazo cyane ni abafite inyubako mu isantere aho bibaza uburyo bategetswe gushyira amakaro ku nzu mu gihe igice kinini cy’iyo santere kigizwe n’imihanda y’igitaka.

Mbere bari basabwe gushyiraho imigongo, ariko na yo basabwa kuyikuraho bagashyiraho amakaro

Umuyobozi w’Akarere wungirije ushinzwe iterambere ry’Ubukungu, Uwanyirigira Clarisse, avuga ko gushyira amakaro ku nyubako zabo biri mu nyungu za nyiri inzu n’iz’iterambere ry’umujyi wa Musanze.

Yagize ati “Gushyira amakaro ku nzu ni mu buryo bujyanye n’isuku, ariko ku itariki bahawe hazabamo ‘flexibilité’ (kuborohereza) icya ngombwa ni ukugira ubushake bwo kugaragaza ko uri mu nzira zo gushyira mu ngiro iyo gahunda. Ntabwo tugamije guca abaturage amande, turabizi ko umuntu ashobora guhura n’ikibazo akabura ubushobozi, igikuru ni ukugaragaza ubushake, iby’itariki tuzabiganiraho”.

Yasabye abarebwa n’icyo kibazo kugendana na gahunda nziza Leta iba yabateguriye, baharanira kugira umujyi mwiza usukuye, none ubuyobozi bw’ikigo gishinzwe imiturire bugaragaje ko kubakisha aya makaro binyuranyije n’imiturire mu Rwanda ndetse agomba gukurwaho.

Guhora basabwa kuvugurura ngo birabakenesha

Bamwe mu bikorera bavuganye na Kigali Today bavuga ko iyi gahunda yo gushyira amakaro ku nyubako z’ubucuruzi batazi aho yaturutse, ndetse ngo babajije Inama Njyanama z’uturere ariko babura igisubizo, mu gihe umuturage ushyira amakaro ku nzu avuga ko yabitegetswe.

Ibaruwa ikigo Rwanda Housing Authority cyandikiye inzego zitandukanye zirebwa n’iki kibazo:

Meya Mulindwa aganira n’abaturage

Umuyobozi w’Akarere ka Rubavu, Mulindwa Prosper, mu kiganiro yagiranye n’abaturage mu Murenge wa Cyanzarwe, yabasabye kureka ibikorwa bya magendu kuko ahakoreshwa mu kwinjiza magendu hakoreshwa n’abahungabanya umutekano.

Akomeza avuga ko uwinjiza magendu ashobora no kwinjiza ibikoresho bya gisirikare, byakoreshwa mu guhungabanya umutekano.

Ati "Aha turi ku mupaka, ni twe turi ku marembo arinze umutekano w’Igihugu, dufatanye gukumira icyahungabanya umutekano, harimo n’ibikorwa bya magendu."

Mu byumweru bibiri bishize, mu Murenge wa Cyanzarwe harasiwe umuturage winjizaga magendu, ndetse bibabaza abaturage kuko yarashwe ashaka kurwanya inzego z’umutekano, mu gihe abo bari kumwe bafashwe bagashyikirizwa ubuyobozi.

Meya Mulindwa asaba abaturage kurwanya magendu kuko iyo yinjiye mu gihugu, ihungabanya umukungu bwcyo, akaba abishingiraho kuko ibikorwa remezo byubakwa n’imisoro abaturage batanze, iyo bidakozwe rero Igihugu ntigishobora gukora ibyo cyateganyije.

Abaturage bo mu Mirenge ya Busasamana na Cyanzarwe, bamaze igihe basaba ko bashyirirwaho umupaka ubahuza na DRC, ibi bakabiterwa n’uko bakora ingendo ndende kugira ngo bashobore kwambuka umupaka.

Icyakora umuyobozi w’Akarere ka Rubavu, atangaza ko Leta y’u Rwanda yakoze ibyo isabwa gukora ndetse abayobozi basuye aho abaturage bifuza ko hashyirwa umupaka, gusa ni igikorwa cyakomwe mu nkokora n’icyorezo cya Covid-19, n’intambara ikomeje kubera mu burasirazuba bwa Congo.

Abayisiramu b’i Goma basengeye mu Rwanda mu gusoza ukwezi kwa Ramadhan

Mu kiganiro Umuyobozi wa Islam mu Ntara y’Iburengerazuba, Sheikh Mutarugera Cudra yahaye Kigali Today, yatangaje ko bakiriye abayisilamu benshi bavuye mu mujyi wa Goma, nyuma yo kwangirwa gusengera muri stade yaho.

Yagize ati "Sinakubwira umubare wabo kuko bari benshi, ariko ubaze imodoka zabo zarengaga 50, kandi twishimiye gusengera hamwe."

Sheikh Mutarugera yabwiye Kigali Today ko batari babiteguye, ahubwo ngo Abasilamu bo mu mujyi wa Goma basabye ubuyobozi gusengera muri stade barabangira, babategeka gusengera mu musigiti.

Agira ati "Benshi ntibabikunda gusengera mu musigiti kuri uyu munsi, kubera ko bazi ko mu Rwanda nta kibazo tugira, bahise biyambukira, baraza dufatanya isengesho."

Akomeza avuga ko nubwo bafatanyije isengesho batashoboye kwishimana, kuko mu Rwanda hari icyunamo.

Agira ati "Twababonye turabamenya kuko dusanzwe tuziranye, ariko ibikorwa byo kwishimana ntibyari gukunda kuko mu Rwanda turi mu cyunamo. Bamaze gusenga baritahira, kandi bishimiye kuza gusengera mu Rwanda muri stade bisanzuye nk’uko babyifuzaga."

Umuyobozi w’umujyi wa Goma, Komiseri Mukuru Kapend Kamand Faustin, yatangaje ko tariki 9 Mata 2024 yangiye abayisilamu mu mujyi wa Goma gusengera muri stade, kubera impamvu z’umutekano, abasaba kujya mu musigiti, ibintu bamwe batishimiye.

Abatuye umujyi wa Goma bakomeje kubangamirwa n’umutekano mucye uterwa n’abasirikare benshi n’imitwe yitwaza intwaro, ndetse bamwe mu baturage bakaba bavuga ko abarwanyi bo mu mutwe wa Wazalendo bitwaza intwaro babambura.

Mu gitondo cyokuri uyu wa Gatatu tariki 10 Mata 2024, urubyiruko rukaba rwafunze umuhanda Majengo-Kilijiwe bamagana ibikorwa by’ubwicanyi bukorwa n’abasirikare n’imitwe yitwaza intwaro.

Uko Yubahe yari ameze mbere na nyuma yo gufashwa akayungururirwa amaraso, ubu araseka

Mu kwezi kwa gashyantare 2024, nibwo Kigali Today yakoze inkuru itabariza Yubahe wari wakuwe ku buvuzi bwo kuyungurura amaraso kubera inshuro yemererwa n’ubwisungane mu kwivuza zari zarangiye.

Umuryango we wamucyuye mu rugo kugira ngo bategereze ko umunsi we wanyuma ugera, ariko ubwo inkuru yakorwaga igaragaza ko Yubahe urwaye impyiko akeneye ubufasha bwo kuyungurura amaraso, bw’amafaranga agera kuri Miliyoni eshanu mu gihe hategerejwe ko hakorwa ibizami byo gupima uwamwemereye impyiko no kuyimushyiramo, abantu batandukanye baritanze asubira ku buvuzi bwo kuyungurura amaraso yongera kugarura inseko.

Imwe mu ifoto yongeye kwereka umunyamakuru wa Kigali Today, Yubahe Beatrice yatangaje ko ashimira abantu bose bitanze akaba akiri muzima.

Agira ati “Kiriya gihe sinashoboraga kujya ku bwiherero, sinashoboraga kurya cyangwa kureba, numvaga ko ibyanjye byarangiye, ariko abagiraneza baritanze none narorohewe kandi mfite icyizere ko nzakira.”

Yubahe Beatrice wari ugeze mu mwaka wa gatatu w’amashuri yisumbuye, ariko akaza kurwara impyiko bitunguranye ndetse agahita ashyirwa ku buvuzi buyungura amaraso, avuga ko afite icyizere ko muri Nzeri azasubira ku ishuri agakomeza kwiga.

Agira ati “Ndizera ko abagiraneza bazakomeza kumfasha kugeza mpinduriwe impyiko maze ngasubira ku ishuri, kandi nifuza kwiga ikiganga, maze nanjye nkazajya nita ku barwayi.”

Nubwo yabyimbutse, akomeje ubuvuzi bwo kuyungurura amaraso ndetse akaba yarakuwe mu bitaro bya Gisenyi, aho yavurizwaga ahubwo yoherezwa kuvurizwa i Kigali ndetse yandikirwa imiti ababyeyi be bavuga ko ihenze, nubwo bitabaca intege zo kwizera ko umwana wabo azavurwa agakira.

Uwifashije Beatrice, umubyeyi wa Yubahe Beatrice ati “Iyabikoze izakomeza kubikora, kandi n’abagiraneza batwitayeho twizera ko bazakomeza kudufasha, kuko batangiye ibizami byo gupima ubushobozi bw’impyiko ya Yubahe Beatrice n’uzayimuha kugira ngo harebwe ko byahura.”

Bakomeje gusaba abagiraneza kubaba hafi

Uwifashije yabwiye Kigali Today ko iyo batagira abagiraneza umwana we aba yarapfuye, icyakora ngo ubufasha bwatanzwe n’abagira neza ni bwo burimo gukoreshwa mu kuyungurura amaraso no gukoresha ibizami n’ubwo amafaranga agiye kubashirana.

Agira ati “Twarafashijwe kandi turashima pe! Abantu tutazi twabonye baduha amafaranga, ndetse n’Umurenge wa Karago waduhaye ibihumbi 300, na ho Akarere ka Nyabihu kaduhaye ibihumbi 480. Twari twarabonye umuterankunga w’umuzungu wishyuraga buri cyumweru, ariko yaje guhagarara kuko ubu burwayi busaba amafaranga menshi, kuko ku Kimihurura dukoreyeyo ukwezi n’igice ari we wishyura.”

Uwifashije avuga ko we n’umwana we ubu barimo kuba muri Kigali, kuko umwana ayungururwa amaraso gatatu mu cyumweru bityo akaba atashobora gutaha iwabo i Nyabihu, akaba akomeje kugorwa no kubona aho kuba no kubona ibibatunga.

Agira ati “Nk’uyu munsi bamupimye basanga ari mu mutuku, kubera guhangayikishwa no kubona amafaranga yo kwa muganga, ntitwamenye ko akeneye imirire yihariye none abaganga batubwiye ko adashobora guhindurirwa impyiko akiri mu mutuku. Badutegetse ibyo tugomba kumugaburira ariko ntituzi aho bizava, twe twamuhaga ibishyimbo, akawunga n’ibindi tubonye, twabona yirira tukumva ko bimeze neza, ubu nabwo dutegereje ko Imana idufasha ikaduha icyerekezo.”

Umubyeyi we akomeza avuga ko ubufasha Yubahe Beatrice yari akeneye, hagiye kwiyongeramo kubona amafunguro yihariye, ariko akizera ko mu batuye muri Kigali hashobora kuboneka uwayabaha mu gihe bakomeje urugendo rwo gutegereza ko ahindurirwa impyiko.

Nubwo Ikigo cya RSSB cyari cyatangarije Kigali Today, ko umurwayi w’impyiko ukeneye kuyungurura amaraso ashobora kurenza inshuro 18 agenerwa, Uwifashije avuga ko kuva bakurwa mu bitaro bya Gisenyi, ubwisungane mu kwivuza ntacyo bwongeye kubafasha, ahubwo bishyura ijana ku ijana, akaboneraho gusaba abagiraneza gukomeza kubafasha kugira ngo bazashobore guhindura impyiko.

Ati “Turashimira abadufashije, kuko hari umusaruro byatanze, dukomeje kubona ubufasha umwana bamushyimo impyiko. Ndakomeza gusaba abagira icyo babona gukomeza kudufasha.”

Uwifashije ashingiye ku mafaranga bakoresha, avuga ko mu cyumweru kimwe bakoresha ibihumbi 240 mu kuyungurura amaraso, bakoresha imiti yishyurwa ibihumbi 60 ndetse hakaba n’ibindi bizamini bishobora gukorwa bitunguranye kandi na byo bihenda.

Akomeza avuga ko nubwo atamenya umubare w’amafaranga akenewe, ariko ngo kugeza mu kwezi kwa karindwi bazaba bakeneye nibura atari munsi ya miliyoni esheshatu.

Uwakwifuza gukomeza gutera inkunga uyu muryango, yanyura kuri nomero ya telefone ya nyina w’uyu mwana, Uwifashije Beatrice: 0791426650.

Inkuru bijyanye:

Yubahe urwaye impyiko akeneye ubufasha bwo kuyungurura amaraso

Bashyiriweho urubuga rusubiza ibyo bibaza ku mihindagurikire y’umubiri

Cyber Rwanda, ni urubuga rugamije kuzamura ubuzima n’imibereho y’urubyiruko rufite imyaka 12 kugera 24 mu Rwanda, rukaba rwarashyizweho ku bufatanye n’urubyiruko rwo mu Rwanda, hashyirwaho inkuru zishushanyije zigamije guhindura imyitwarire, gusubiza ibibazo byinshi bikunze kwibazwa n’urubyiruko.

Cyber Rwanda yatangijwe n’urubyiruko rwo mu Rwanda ku bufatanye n’umushinha YLABS, uzwi nka Youth Development Labs, uterwa inkunga n’Ikigega cy’Abanyamerika Gishinzwe Iterambere Mpuzamahanga (USAID).

Mu Karere ka Rubavu iki kigo kizakorana n’ikigo cy’urubyiruko gikorera mu Murenge wa Rugerero, aho urubyiruko rw’abafashamyumvire bahawe ubumenyi bwo gufasha bagenzi babo mu Mirenge ya Rubavu, Nyamyumba, Rugerero, Nyakiriba, Kanama na Nyundo.

Ikindi urubyiruko rugana iki kigo ruzajya rusanga iri koranabuhanga muri mudasobwa zose, bityo igihe cyose bakeneye amakuru babe bashobora kuyabona badategeje umukozi wo kuyabaha.

Igikorwa cyo gutangiza ku mugaragaro iyo gahunda ya Cyber Rwanda mu Karere ka Rubavu, cyabaye ku wa 5Mata 2024, gihuzwa n’igitaramo cyo guha ikaze urubyiruko ruje mu biruhuko.

Thérèse Bagwaneza, umukozi wa Cyber Rwanda ushinzwe ubushakashatsi, ubwo hatangizwaga iki gikorwa mu Karere ka Rubavu tariki 4 mata 2024, yatangaje ko urubuga rwa Cyber Rwanda rwashyizweho n’urubyiruko rw’Abanyarwanda kandi barushyiriraho Abanyarwanda, nyuma yo kubona ko ingimbi n’abangavu badafite aho bisanzurira mu kubona amakuru.

Agira ati "Ubusanzwe ni hehe urubyiruko rubona amakuru arebana n’ubuzima bw’imyororokere? Ku bigo nderahuzima, ibigo by’urubyiruko, abandi bayahabwa na bagenzi babo kandi havamo kubashuka no kubakoresha imibonano mpuzabitsina. Icyo Cyber Rwanda yaje gukora ni ugukoresha ikoranabuhanga mu gusubiza ibibazo ingimbi n’abangavu bafite, aho bajya ku rubuga bagasangaho ibibazo n’ibisubizo bibaza bagashobora kwiha intego."

Bagwaneza avuga ko bamaze kugera mu bigo birenga 50 by’amashuri, baganira n’urubyiruko rubyigamo, bakaba barakusanyije ibibazo byakuwe mu rubyiruko 1000 bagamije kumenya ibibazo birubangamiye n’icyakorwa ngo rufashwe gutegura ejo hazaza hano."

Ati “Kuri uru rubuga hari amakuru menshi n’inkuru zo gusoma, urubyiruko rurimo kwinjira mu ikoranabuhanga, ibintu bibafasha gukoresha igihe neza. Twari tuzi ibindi bigo bitanga serivisi ku rubyiruko, haziyongeraho gukoresha ikoranabuhanga”.

Louise Mwiseneza utuye mu Murenge wa Nyamyumba mu Karere ka Rubavu, avuga ko abakobwa bari mu kigero cy’imyaka 15 bagorwa no kubona amakuru.

Agira ati "Aho dutuye ntibyoroshye kubona amakuru ku mihindagurikire y’umubiri, benshi mu bana b’abakobwa bashukishwa imibonano mpuzabitsina bitewe no kudasobanukirwa, ariko turizera ko ubu buryo buje buzajya bufasha buri mwana kubona ukuri ntawe agombye kubaza, ntawe atinya, kuko hari abana batinya ku bigo by’urubyiruko cyangwa ibigo nderabuzima batinya abo bahasanga."

Urubyiruko rwishimiye urwo rubuga

Mwiseneza avuga ko uretse mu mijyi umwana w’umukobwa ashobora kubona ibikoresho by’isuku, bikenerwa n’umukobwa ngo mu cyaro biragorana, ariko kubera Cyber Rwanda yashyizeho abafashamyumvire bazajya bagera kuri buri mwangavu, ngo ashobore kugirwa inama no kumenya uko yitwara.

Abana b’abakobwa basabwa kwihagararaho no kwiha intego, bakitandukanya n’ababita isanane iyo bagiye mu biruhuko.

Ati "Twebwe abakuru tugomba kubaha amakuru, kubatoza umurimo no kuwunoza, si abantu bakuru bagomba kubayobya."

Ikibazo cy’abangavu baterwa inda kigaragara nk’igikomeje kwiyongera mu Rwanda, kuko mu mwaka wa 2023 mu Ntara y’Iburasirazuba hagaragaye abangavu 8801, bari hagati y’imyaka 14 na 19 batewe inda.

Ubu barimo kuvoma amazi mabi y’imigezi n’ibishanga

Bakomeza bavuga ko ikibazo cy’amazi gisa n’icyahagaritse ubuzima, kuko hari ababona injerekani y’amazi bayiguze amafaranga 800, bakavuga ko birimo kugira ingaruka ku isuku.

Ngamije Alexandre, Umuyobozi w’ishami rya WASAC mu Karere ka Rusizi, yabwiye Kigali Today ko icyo gihari kuva tariki 21 Werurwe 2024, ubwo umuyoboro w’amazi wari usanzwe uyagemura mu mirenge y’umujyi wangijwe n’ibiza.

Agira ati "Umusozi watwawe n’amazi bitera inkangu kandi ni ho hari itiyo igemura amazi mu mujyi wa Rusizi."

Akomeza avuga ko inkangu yabaye mu Murenge wa Gihundwe, akagari Shagasha, umudugudu wa Nyagatare ahari itiyo igemurira amazi umujyi wa Rusizi mu Mirenge ya Gihundwe, Kamembe, Nkanka n’agace ka Mwururu.

Agira ati "Iyi nkangu yabaye tariki 21 Werurwe 2024 yangije umuyoboro w’amazi mu buryo bugoranye ko wasimbuzwa, bituma dushaka indi nzira inyuzwamo amazi. Byabaye ngombwa guhanga inzira nshyashya, mbese twimura umuyoboro kuri metero 350, bisaba gushaka abakozi n’ibikoresho."

Ubuyobozi bwa WASAC butangaza ko bufite ikigega cya metero kibe 1000 gikora kidahagarara ku munsi, icyakora ubu ntikibona amazi kubera itiyo yangiritse kandi imirimo yo kuyisimbuza ntirarangira, ndetse n’ibikorwa byo gusaranganya amazi aboneka agezwa ku bitaro, gereza n’ibigo bihuriramo n’abantu benshi.

Ubuyobozi bwa WASAC butangaza ko bukomeje kugorwa n’ibikorwa byo kubaka umuyoboro kubera ibihe by’imvura.

Buti "Turimo gukora ibishoboka ngo turangize imirimo, ariko turimo kugorwa n’imvura irimo kugwa, kandi umuyoboro w’amazi ugomba kunyura nibura muri metero imwe n’igice y’ubujyakuzimu, kugerayo imvura igwa biragoye. Ikindi kirimo kugorana, kubera twahanze bundi bushya inzira y’amazi, ahantu hari ibikombe (amakoni) twubaka na sima aho amatiyo ateranyirizwa, kubera imvura ibyo twubaka na sima bitinda kuma."

Ngamije atanga icyizere ko amazi azagera ku baturage mu gihe cya vuba, kuko imirimo yo guca inzira yarangiye, bategereje gufunga amatiyo bakoherezamo amazi.

Umujyi wa Rusizi usanganywe abaturage bafite ifatabuguzi ry’amazi ya Wasac 10,400, ariko abatarimo kugerwaho n’amazi ni 9,000 abaturage bakaba basabwa kwihanganira ibikorwa byo gusana umuyoboro wangijwe.

Amashyuza aherereye mu murenge wa Nyamyumba ni ho hantu hasurwa cyane mu Karere ka Rubavu, ariko kandi ni ahantu hafite amateka ya jenoside yihariye muri ako karere.

Gervais Hitayezu umukuru wa Ibuka mu murenge wa Nyamyumba avuga ko umurenge wa Nyamyumba wari Komini ya Nyamyumba kandi hiciwe abatutsi benshi baburirwa irengero, hakaba hakomeje gushakishwa amakuru y’aho imibiri yabo yatawe.

Agira ati "abatutsi bo muri Nyamyumba, abatutsi bavuye Kayove barimo bahunga ubwicanyi bafatirwaga mu murenge wa Nyamyumba bakazanwa kwicirwa aha, bacukuye icyobo bahita bagera ku mazi, abatarashoboye kugishyirwamo batawe mu mazi mu kiyaga cya Kivu, amazi arabatwara, bamwe imibiri amazi yayijyanye muri Congo."

Mu biciwe ku mashyuza ndetse batabwa mu cyobo harimo abashoferi batwaraga amakamyo bari baje kurangura muri Bralirwa. N’ubwo batamenyekanye amazina yose, hari abavugwa nka Ignance wari waravuye I Kigali, Karangwa wari waje kurangura ibinyobwa bya Bralirwa, visikozi, Claude Kigingi, Gasana iwabo hari I Rwamagana, Jonathan wari waravuye i Rusizi, Viateur, Vianney wari waravuye Kibirira na Karurangwa wari waravuye i Kibungo hamwe na Mutembesa wari waravuye i Kigali.

Hitayezu yongeraho ko uretse kuba harabonetse imibiri igashyingurwa, ngo ntibazi imiryango y’aba bashoferi bishwe, agasaba ko ababa barabuze ababo bari abashoferi bari baragiye kurangura muri Bralirwa bazabegera bakabaha amakuru.

Akomeza avuga ko hari abaturage bakomeje kwinangira gutanga amakuru y’ahari imibiri y’abatutsi bishwe muri Jenoside.

Agira ati "Hari abinangira gutanga amakuru, hari abafite amakuru y’ahari imibiri bakomeje kwinangira, turasaba ko na bo bazaganirizwa bagatanga amakuru, maze abatazi aho ababo baguye nabo bakabona amahirwe yo kubashyingura mu cyubahiro."

Ni ibikorwa byabereye mu kigo cya Loni cya Thongping giherereye i Juba, byitabirirwa na Visi Perezida wa Sudani y’Amajyepfo Rebecca Nyandeng de Mabior, Komiseri Mukuru w’u Rwanda muri Uganda na Repubulika ya Sudani y’Amajyepfo, Col (Rtd) Joseph Rutabana aherekejwe na Col Emmanuel Ruzindana hamwe na Guang Cong wungirije intumwa idasanzwe y’umunyamabanga w’umuryango wabibumbye.

Visi Perezida wa Sudani y’Amajyepfo Rebecca Nyandeng yagaragaje ko Jenoside yakorewe Abatutsi yabaye isi irebera kandi ntacyo ntacyo yakoze ngo iyihagarike, ashimira u Rwanda kwiyubaka mu bikorwa by’iterambere n’ubumwe n’ubwiyunge nyuma y’uko ingabo z’ Inkotanyi zihagaritse Jenoside.

Nyandeng avuga ko u Rwanda rwabigezeho rubinyujije mu guha imbaraga urubyiruko n’abagore mu kubaka igihugu no kugira uruhare mu kubaka amahoro n’ubwiyunge.

Ashimangira ko Sudani y’Amajyepfo yifatanyije n’u Rwanda mu kurwanya ingengabitekerezo ya jenoside kandi asaba ko abandi bayobozi bo muri Afurika bahagurukira kurwanya imvugo y’urwango, ihohoterwa n’amakimbirane.

(Col Rtd) Joseph Rutabana, yongeye gushimangira ko Kwibuka ku nshuro ya 30 bijyana no kwibuka urugendo u Rwanda rwanyuzemo nyuma y’ihagarikwa rya Jenoside yakorewe Abatutsi, nibyo rwaciyemo mu kwiyubaka mu myaka 30 ishize.

Agaragaza ko n’ubwo u Rwanda rwatereranywe mu gihe cya jenoside yakorewe abatutsi, u Rwanda rushyize imbere ibikorwa byo kugarura amahoro no kurinda ubuzima bw’abaturage bari mu kaga.

Juliette Murekeyisoni uhagarariye abanyarwanda baba muri Sudani y’Amajyepfo bavuga ko nyuma yo guhagarika jenoside yakorewe abatutsi u Rwanda rwiyubatse kandi rutanga urumuri rw’icyizere ku bato, ndetse ruba n’isomo ku bindi bihugu.

Ibikorwa byo kwibuka Jenoside yakorewe Abatutsi mu banyarwanda bari muri Sudani y’Amajyepfo byabaye mu bice bitandukanye birimo: Torit, Yambio, Kuajok, Bentiu, Bor na Rumbek Malakal.

Ni inzu zubatswe ku bufatanye bwa Leta n’abaturage, aho uwubakiwe yagombaga kuba afite ikibanza, amabuye n’amatafari, Leta nayo ikazana ibisigaye.

Uretse mu karere ka Rubavu hubatswe amazu 69, mu Rwanda hose hujujwe amazu 342, harimo 15 yubatswe mu karere ka Rutsiro, Ngororero hubatswe 55, Karongi hubakwa 141, Nyabihu 53, naho mu Karere ka Burera hubakwa amazu 9.

Ni inzu zifite ibyumba bitatu, ubwiherero n’ubukarabiro hamwe n’igikoni kandi zikaba ifite n’umuriro w’amashanyarazi.

Dusabimana ni umwe mu babyeyi bari bifashije mbere y’uko Umugezi wa Sebeya umusenyera kuko yari afite inzu 8.

Nyuma yo gusenyerwa na Sebeya auyu mubyeyi watangiye urugendo rwo gucumbika, avuga ko atari afite icyizere cyo kongera kugira inzu yo guturamo, ariko abifashijwemo na Leta ubu yongeye kubona aho arambika umusaya.

Agira ati “nari mfite amazu umunani yose akodeshwa, kandi nta nzu yishyurwaga munsi y’amafaranga ibihumbi 40 ku kwezi. Ariko ubwo Sebeya yazaga isenya, yasenye n’amazu yanjye kugeza ku yo ntuyemo tujyanwa mu nkambi. Kubyakira byarangoye kuko numvaga ntabona ubushobozi bwo kongera kuzamura inzu, ariko nabonye njya ku rutonde ndubakirwa, none nongeye gutunga inzu.”

Dusabimana ashimira leta kuba yaramutecyereje ititaye ko yari afite amazu, ahubwo ikareba ko adafite aho kuba.

Mulindwa Prosper umuyobozi w’Akarere ka Rubavu, yasabye abaturage gufata neza amazu bahawe, asaba n’abandi batarubakirwa kwihangana kuko hari abandi bagiye kubakirwa babarirwa muri 300.

Agira ati” Tumaze kubaka inkuta ku mugezi wa Sebeya mu mirenge ya Rugerero, Nyundo na Kanama, kandi harimo gukorwa n’ibindi byafasha mu gukumira ko Sebeya yakongera gusenyera abaturage. Turabashimira uruhare rwanyu mu kwimura imiryango, ingo zose zari zituye kuri metero icumi uvuye kuri Sebeya, kuko na zo zari zibangamiwe n’umugezi wa Sebeya. Turabizeza ko tuzaguma kubaba hafi, dufatanya kubona aho kuba no kwirinda ko hari umunyarwanda wabaho nabi bitewe n’ibiza.”

Ibiza byabaye tariki 2 na 3 Gicurasi 2023 mu Karere ka Rubavu, byasize iheruheru imyiryango 1300 igizwe n’abantu barenga 5000, bashyizwe mu nkambi, abandi bacumbikirwa na bagenzi babo.

Habaruwe inzu 855 zasenyutse burundu mu gihe 719 zangiritse cyane, ari baturiye inknegero za Sebeya benshi barimuwe hategerejwe aho bagumba gutuzwa, mu gihe abandi bahafite ubutaka kandi bemerewe kuhatura barimo gufashwa kubaka.

Ibigo bitwara abagenzi birimo Mapasa car transit ni byo birimo gutwara abashaka kuva mu mujyi wa Goma wugarijwe n’ibibazo by’umutekano kubera imirwano ibera mu nkengero zawo.

Benshi mu bava mu mujyi wa Goma barerekeza mu mujyi wa Bukavu uri mu Ntara ya Kivu y’Amajyepfo, abandi bakajya mu mujyi wa Bujumbura mu gihugu cy’u Burundi.

Cyakora kugira ngo bashobore kuhagera, birasaba ko bitabaza umuhanda wa Kivu belt, wo mu Rwanda uhuza uturere twa Musanze-Rubavu, Rutsiro, Karongi Rusizi na Nyamasheke, kuko ari yo nzira yonyine ishoboka ku butaka kandi ihendutse nyuma y’inzira yo kunyura mu kiyaga cya Kivu.

Kigali Today yakurikiranye inzira abashaka kuva mu mujyi wa Goma banyuramo bajya i Bujumbura isanga hari imodoka z’abanyecongo zikoreshwa zinyuzwa mu Rwanda, cyakora ntamunyarwanda wazigendamo kuko bigoye ko yakwinjira i Burundi.

Bamwe mu batwara izi modoka bahaye amakuru Kigali Today batifuje ko amazina yabo atangazwa kubera umutekano wabo, bagira bati : “Ni urugendo rurerure kandi ruhenze”.

Kugira ngo umugenzi uvuye mu mujyi wa Goma agera mu mujyi wa Bujumbura, asabwa gutanga amadolari y’Amerika 30 ndetse akongeraho ibihumbi 4 by’amafaranga y’amanyekongo.

Hejuru yo kwishyura umugenzi asabwa kuba adafite urupapuro rw’inzira rw’u Rwanda kuko rutamuha umutekano mu nzira anyura agana i Bujumbura.

uwatanze amakuru agira ati “Dushobora kugutwara ariko ntituba twizeye urugendo kuko ku mupaka w’u Burundi bashobora kugusigarana ugasanga ukerereje urugendo rwacu.”

Abava mu mujyi wa Goma bajya mu mujyi wa Bujumbura binjira mu Rwanda mu masaha ya mu gitondo, umupaka ugifungurwa, nyuma yo kuzuza ibisabwa bakomeza umuhanda ugana i Rusizi bagera i Bugarama bakanyura ku mupaka wa Kamanyora bagakomeza Uvira bakabona kwinjira mu gihugu cy’u Burundi.

Abarundi n’abanyecongo bari basanzwe bagenderana banyuraga mu muhanda w’Akanyaru, Ruhwa n’umuhanda wa Bugesera, ariko kuva Leta y’u Burundi yafunga imipaka ibuhuza n’u Rwanda tariki 11 Mutarama 2024, abagenzi batangiye kunyura mu muhanda wa Kamanyora na Uvira.

Ikigo gitwara abagenzi Mapasa car Transit cyemerewe n’igihugu cy’u Burundi gutwara abarundi bajya muri DRC kuva Kanama 2022 banyuraga ku mupaka wa Ruhwa uhuza u Rwanda n’u Burundi ariko ubu wongeye gufungwa, bituma hakoreshwa umupaka wa kavinvira uhuza u Burundi na Congo ariko umuhanda ukaba ari mubi cyane ndetse urimo n’amazi ari yo mpamvu bahitamo guhenwa ariko bakanyura mu Rwanda ahari umuhanda mwiza n’ubwo urugendo ruhita rwuba rurerure.

Imodoka zizinduka mu gitondo ziva mu mujyi wa Goma zijya i Bujumbura, zifashishije imihanda yo mu Rwanda

N’ubwo u Rwanda rushinjwa n’ibihugu bituranye kugira uruhare mu kubihungabanyiriza umutekano, u Rwanda rugira uruhare mu kubifasha mu buhahirane; ibi bikaba bijyana n’uko ibicuruzwa byinshi mu mujyi wa Goma byose binyuzwa mu Rwanda bivuye mu gihugu cya Uganda, Kenya na Tanzania, ndetse n’ibiva mu gihugu cy’u Burundi bishaka kwinjira mu mujyi wa Goma bigomba kunyura mu Rwanda.

Uretse kuba u Rwanda ruhuza abashaka kuva I Goma bajya I Bujumbura, abanyecongo batuye Uvira bashaka kujya mu mujyi wa Bukavu nabo bisaba ko banyura mu Rwanda mu Karere ka Rusizi, ndetse hakaba harashyizweho imodoka zitwara abagenzi zizwi zitambuka umunota ku wundi.

Ikarita igaragaza ubutaka bwa Minisiteri y’Ingabo bwibasiwe n’abaturage

Inama yabaye tariki 29 Werurwe 2024 yemeje ko abaturage batuye ku butaka bwa MINADEF bahabwa ingurane bagashaka aho bajya gutura.

Perezida w’Inama Njyanama y’Akarere ka Rubavu, Dr Ignace Kabano, yabwiye Kigali Today ko abaturage bazimurwa ari abahatujwe kimwe n’abahituje hatitawe ku cyo ubutaka bwari bwaragenewe.

Agira ati “Bwari busanzwe ari ubwa Minisiteri y’Ingabo, ariko uko abayobozi bagiye basimburana, abaturage babaciye mu rihumye barahubaka. Icyo twemera ni uko abaturage babaruwe kandi bazimurwa ntawe uhutajwe nubwo hagomba kubahirizwa amategeko kuko Leta itifuza kwimura umuturage ngo ajye kubaho ubuzima bugoye usange abaye umutwaro wa Leta, ahubwo bazabarurirwa ubutaka n’ibyo bahakoreye bahabwe ingurane izabafasha kubaho neza.”

Hari ubutuweho n’abaturage

Kabano avuga ko bazimurwa kuko hagomba kujya ibikorwa rusange kandi abazimurwa bagomba kubanza kuganirizwa.

Abaturage bazimurwa basanzwe batuye ku butaka buri kuri hegitari 27 buherereye mu Karere ka Rubavu ku musozi wa Rwaza mu Kagari ka Rwaza mu Murenge wa Rugerero bukaba bwubatseho icyicaro cy’ubuyobozi bw’Ingabo mu Ntara y’Iburengerazuba.

Ni ikibazo cyatangiye kugaragara mu iyandikishwa ry’ubutaka, aho abaturage bapimishije ndetse bakanandikisha ubutaka bitaga ubwabo nyamara na Ministeri y’Ingabo ikavuga ko abaturage biyandikishijeho ubutaka bwayo.

Ikibazo cyinjiyemo inzego zitandukanye ndetse abayoboye Perefegitura ya Gisenyi bashyirwa mu majwi nk’uko bigaragazwa n’amasezerano y’ubukode bw’ubutaka bagiranye n’icyahoze ari Umujyi wa Gisenyi.

Ababutuyemo bagomba kwimurwa

Hakomeje kwibazwa uwari usanganywe ubutaka, bituma ubuyobozi bw’Akarere ka Rubavu bwandikira MINADEF busaba gukemura iki kibazo, MINADEF na yo yasabye MINALOC mu ibaruwa no 6712/DEF/7161/A/6572/023 yo ku wa 7/11/2023 isaba ubufasha mu gukemura iki kibazo cyo gusubiza imbago aho zahoze mbere y’umwaka wa 1995 ku musozi wa Rwaza ifiteho ibikorwa.

Ku wa 03/01/2024 MINALOC yandikiye MINADEF, Minisiteri y’Ibidukikije, Umuvunyi Mukuru, Ikigo cy’Igihugu gishinzwe Ubutaka, Intara y’Iburengezuba n’Akarere ka Rubavu, isaba ubufatanye mu gukemura iki kibazo.

Muri Mutarama 2024 nibwo MINADEF yasabwe guha ingurane abaturage bafite ibyangombwa bahawe na Leta bakimuka, na yo ikahakorera ibikorwa byayo.

Hari ahakoreshwa nk’isoko

Ubutaka abaturage babukoreraho ibikorwa bitandukanye

Ubu butaka buparikwaho n’amakamyo yinjira mu mujyi wa Gisenyi

Ndagijimana Louis Munyemanzi (iburyo) na Kwizera Giovani Fidèle (ibumoso)

Abajyanama bane batanze amabaruwa yo kwegura mu Nama Njyanama y’Akarere yateranye, bavuga ko beguye ku mpamvu zabo, bahita babyemererwa.

Ndagijimana Louis Munyemanzi wari Umuyobozi w’Akarere wungirije ushinzwe iterambere ry’ubukungu, yeguye nyuma y’amakimbirane amaze igihe amuvugwaho n’Umuyobozi w’Akarere, Kibiriga Anicet.

Ndagijimana yeguye hamwe na Kwizera Giovani Fidèle wari Umuyobozi wungirije w’Inama Njyanama, nubwo ari we wari uyiyoboye kuva tariki 16 Werurwe 2024, ubwo Uwumukiza Beatrice yeguraga ku nshingano zo kuba umujyanama mu Nama Njyanama y’Akarere ka Rusizi.

Mu kiganiro yahaye abanyamakuru, Umunyamabanga w’Inama Njyanama, Monique Uwimana yagize ati "Twabonye amabaruwa ane y’abagize Inama Njyanama basaba kwegura ku mwanya w’Ubujyanama n’izindi nshingano bari barahawe."

Abeguye ni Ndagijimana Louis Munyemanzi wari Umuyobozi w’Akarere wungirije ushinzwe iterambere ry’Ubukungu, Mukarugwiza Josephine wari umujyanama ariko akayobora komisiyo y’iterambere mu Nama Njyanama, Habiyakare Jean Damascène yari umujyanama akaba yari Umuyobozi wa komite ngenzuzi muri Njyanama y’Akarere, undi ni Kwizera Giovani Fidèle wari umujyanama ariko akaba Visi Perezida w’Inama Njyanama y’Akarere ka Rusizi.

Uwimana akomeza avuga ko batanze amabaruwa basaba kwegura kandi ku mpamvu zabo, avuga ko batabibangira.

Ati "Nta mpamvu yo kuzirikira umuntu mu bintu iyo agaragaje ko atabishaka."

Uwimana akomeza avuga ko bari abajyanama 17, kuba havuyemo batanu hari icyuho, kandi bagiye kureba icyo itegeko rigena mu kubasimbura.

Judith Suminwa Tuluka ni we Minisitiri w’Intebe mushya wa RDC

Judith Suminwa abaye Minisitiri w’Intebe wa mbere w’umugore wa Repubulika Iharanira Demokarasi ya Congo, akaba yari asanzwe ari Minisitiri ushinzwe igenamigambi.

Ni umuyoboke wa UDPS, ishyaka rya Félix Antoine Tshisekedi, akaba yarakoze mu mishinga iteza imbere abaturage mu Burasirazuba bwa Congo, yakoze muri Minisiteri y’Imari ya Leta ndetse akora no mu biro bya Perezida.

Judith Suminwa Tuluka abaye Minisitiri w’Intebe akaba asabwa gushyiraho Guverinoma ihuriweho n’amashyaka menshi abarizwa muri iki gihugu.

Agiyeho mu gihe iki gihugu gihanganye n’umutwe wa AFC/M23 urimo kwigarurira ibice bitandukanye mu Ntara ya Kivu y’Amajyaruguru aho urimo kuyobora iyi Ntara ku kigero cya 40%.

Arasabwa gushyiraho Guverinoma izahashya uyu mutwe uvuga ko mu minsi mikeya ugiye gufata umujyi wa Goma bagakomereza ibikorwa by’intambara mu zindi Ntara nk’uko byatangajwe na Corneille Nanga mu kiganiro aheruka kugeza ku batuye muri Teritwari ya Rutshuru.

Perezida Tshisekedi ashyizeho Minisitiri w’Intebe nyuma y’igihe anengwa kuba adashyiraho Guverinoma yita ku bibazo by’abaturage, mu gihe abari Abaminisitiri mbere y’amatora y’Umukuru w’Igihugu mu Kuboza 2023 beguye ku nshingano ariko bakomeza kuyobora.

Urubyiruko rwa Rotary Club rwahuriye i Rubavu

Iradukunda wavuye mu gihugu cy’u Burundi akaba ayoboye urubyiruko rwa Rotary Club ruzwi nka Rotaract, ruba mu muryango wa Afurika y’Iburasirazuba, avuga ko bahura rimwe mu mwaka bagakora ibikorwa bifasha urubyiruko, ariko 2024 bahisemo guhurira mu Rwanda bafasha ikigo cy’urubyiruko cya Rugerero cyigisha imyuga.

Iradukunda avuga ko nubwo urubyiruko rwa Rotary Club rusanzwe rukora ibikorwa biteza imbere umuryango mu bihugu bakomokamo, ngo bagira n’ibikorwa bihuza urubyiruko rw’Akarere kandi bishimiye kubikorera mu Rwanda, aho bashyize imbere kunga ubumwe no kubaka amahoro.

Agira ati “Twe dushyize imbere kunga ubumwe, gufatanya mu bikorwa bitwubaka tutagendeye ku mipaka, ahubwo tugafatanya mu kwiteza imbere no gukemura ibibazo bitwugarije.”

Akomeza avuga ko nyuma yo kwemeza ko bazakorera mu Rwanda, hashatswe igikorwa bakora basanga bazagikorera mu Karere ka Rubavu, bakusanya ubushobozi bwo gufasha abangavu batewe inda.

Ati “Twizera ko bizabagirira akamaro mu myigire yabo, kandi nk’urubyiruko rwa Rotary Club twishimiye kugera mu Rwanda tugafatanya n’urubyiruko rwaho kubaka ibikorwa biteza imbere bagenzi bacu.”

Bahawe ibikoresho bitandukanye bijyanye n’imyuga barimo kwiga

Iradukunda avuga ko urubyiruko rwa Rotary Club rushyize imbere kunga ubumwe mu muryango w’Afurika y’Iburasirazuba, kurusha uko bibona mu mipaka y’ibihugu batuyemo.

Agira ati “Icyo twifuza ni uko niba uri Umunyarwanda ukabona Umurundi cyangwa umukongomani, ugomba kumubonamo umuntu kurusha uko umubonamo ikindi, icyo dusaba abayobozi bacu, bashyire imbere guhuza abaturage kurusha uko bafunga imipaka, ahubwo bashakire igisubizo mu biganiro kugira ngo imishinga y’abaturage idahagarara.”

Umuyobozi w’Akarere ka Rubavu, Mulindwa Prosper, avuga ko Rotary Club ifite imishinga itandukanye mu Karere ka Rubavu, kandi bateganya kuyongera kuko ihindura ubuzima bw’abahatuye.

Agira ati “Biciye muri Kivu Lake Club yatabaye abaturage bagizweho ingaruka n’ibiza byabaye mu 2023, bagira uruhare mu gutera ibiti no kugeza amazi yo kuvomera imyaka ku baturage kandi iyi mikoranire izatuma twinjira mu yindi mishanga iteza imbere abaturage bacu.”

Mihigo Félix ukuriye urubyiruko rwa Rotary mu Rwanda rwitwa React Rwanda, avuga ko bahisemo kuza mu Karere ka Rubavu kuko basanze hari ikibazo cy’inda ziterwa abangavu bakava mu mashuri bakagira ubuzima bubi.

Agira ati “ibi byatumye dutangira gushaka igisubizo cy’uko babona imibereho myiza, binyuze mu myuga biga tubagenera ibikoresho kandi twizera ko izabagirira akamaro.”

Umuhoza Francine watewe inda ku myaka 17 wiga mu kigo cy’urubyiruko cya Rugerero, avuga ko yishimiye ibikoresho yashyikirijwe.

Ati “Nabyakiriye neza, kuko nk’umukobwa wabyaye mfite imyaka 17, sinasubiye mu ishuri, ariko Leta yanzanye hano Rugerero kwiga imyuga, kuba tubonye ibikoresho twigiraho bizatuma twiga neza, turangize dukora neza ibyo twize.”

Umuhoza avuga ko n’ubwo uwamuteye inda yamutereranye, ngo amasomo y’imyuga izamufasha gutegura ahazaza he n’umwana we.

Mulindwa Prosper umuyobozi w’Akarere ka Rubavu, ahura n’abayobozi b’inzengero n’amadini kuwa 29 Werurwe yabasabye kugira isuku ndetse bakayitoza n’abayoboke babo.

Ahereye ku bukarabiro bwagiye bwubakwa ku nsengero mu gihe cyo guhangana n’icyorezo cya Covid-19 yasabye abayobozi b’amadini kugenzura ko ubukarabiro n’ubwiherero bikora kandi bagatoza abantu kubikoresha mu kwirinda indwara ziterwa n’umwanda.

Agira ati “henshi mufite ubukarabiro, ariko abaheruka kureba ko bukora ni bande? Musabwa kugenzura ko bukora kandi bugashyirwamo amazi n’isabune abantu bagakomeza gukaraba n’ubwo Covid-19 itagihari, tugomba gukomeza kongera isuku mu baturage bacu.”

Mulindwa avuga ko hari aho yasanze insengero zifunga ubwiherero bw’abayoboke mu kwanga ko babwanduza, avuga ko ari ibintu bidakwiye, kuko iyo babufunze biteza umwanda.

Agira ati “Tuributsa abanyarubavu bose ko isuku itabaho icagase, ikitari isuku kiba ari umwanda. Hari hamwe dusanga ubwiherero babufunze kandi abantu bashobora kubukenera, ibyo dusanga bishobora kubangamira isuku.”

Kigali Today yagerageje kubaza abakirisitu bagana insengero n’amatorero bavuga ko hari amadini akora ubucuruzi ku bwiherero bakishyuza ababagana bigatuma abantu bakorera ibyagombye gukorerwa mu bwiherero hanze yabwo.

Uwamariya Suzana ni umukecuru w’imyaka 58, avuga ko aho asengera ubwiherero bwishyuzwa amafaranga ijana kandi utayafite utabwinjiramo.

Agira ati “Ibaze ko aho desengera badusaba gutanga imisanzu yo kubaka urusengero, yewe niyo badusabye amafaranga yo gufasha abakene turayatanga hamwe n’amaturo yo gufasha abashumba bacu, ariko ubwiherero twubatse iyo dushatse kubukoresha baratwishyuza, iyo udafite igiceri urabangamirwa, n’ubwo utabikorera aho ariko iyo dushoje ushaka hafi ubikorera.”

Niyonzima utuye mu mujyi wa Gisenyi ubwo tariki 30 Werurwe yajyaga mu gitaramo cya Pasika, avuga ko yishyuye amafaranga 200 y’ubwiherero kubera umwana we yashatse kwihagarika.

Agira ati “ibaze iyo umwana w’imyaka ine ashaka kwihagarika bakamwishyuza, kandi watuye n’ubundi akoreshwa mu mirimo ya yaho usengera, ibi bivuze ko udafite amafaranga ubwiherero utajya gusenga kuko wakorwa n’isoni.”

Nubwo Kigali Today yirinze gutangaza idini rishyirwa mu majwi, abakirisitu Basanga ubwiherero rusange butari bukwiye kwishyuzwa ahubwo yagakuwe mu mafaranga batura ariko ntibabangamire ababushaka baje gusenga, kuko babifata nk’ubucuruzi.

Umuyobozi w’Akarere ka Rubavu we, asaba insengero gufungurira abayobozi ubwiherero ahubwo bakita ku isuku yabwo kuko iyo bufunzwe cyangwa hakagira abakumirwa kubujyamo bitera umwanda.

Akebura insengero zamamaza ibiterane kwibuka gukuraho inyandiko bamanika babaza ibikorwa byabo kuko uwateguye yandurura.

Agira ati “nimwibaze kuba umuntu yaramanitse inyandiko zitumira abantu mu giterane, kikaba abantu bakitabira, ariko ntiyibuke kongera gukuraho inyandiko yamanitse, aba ategereje ko Akarere kazajya kuzikuraho? Turabasaba kudufasha guteza imbere isuku y’umujyi wacu.”

Umuyobzi w’Akarere ka Rubavu avuga ko amadini agomba guharanira kugira isuku haba kubayoboke babo, inzengero naho abakorera, agasaba ko insengero zigomba gufata amazi azivaho, gusibura ibyapa birang aaho abakorera ndetse bagatoza n’abayoboke kugira isuku.

Inzira z’amazi zidahagije zituma asenya imihanda n’ibindi bikorwa by’abaturage

Umujyi wa Gisenyi wagiye uhura n’ibibazo by’imyuzure mu bihe bitandukanye, abaturage bagasenyerwa abandi ibyo batunze bigatwarwa n’amazi bigafatwa nk’ibiza.

Uko imyaka ishira ni ko ikibazo cy’amazi y’imvura aturuka mu mirenge y’icyaro nka Busasamana agakomeza mu Mirenge nka Cyanzarwe na Rubavu yinjira mu mujyi wa Gisenyi, agasenyera abaturage kubera inzira ntoya zubatswe.

Amazi yinjira mu mujyi wa Gisenyi yiyongera uko umujyi ugenda waguka, ndetse n’ibikorwa remezo nk’imihanda bikiyongera, ariko inzira z’amazi ntizongerwe.

Umunyamabanga Nshingwabikorwa w’Umurenge wa Gisenyi, Tuyishime Jean Bosco, tariki 16 Werurwe 2024 mu muganda ku rwibutso rwa Komini Rouge, yatangaje ko umujyi ayoboye ufite ikibazo cy’amazi y’imvura ava mu mirenge y’icyaro, agateza ibibazo mu mujyi.

Yagize ati “Abaturage bacu bameze neza, ndetse n’abafite ibibazo turafatanya tukabicyemura, ndetse mu barebye mu maso murabibona. Ikibazo dufite kibangamiye umujyi wa Gisenyi ni amazi menshi amanuka mu mirenge duturanye, kubera inzira ntoya akuzura umuhanda akajya mu ngo z’abaturage akabangiriza.”

Tuyishime akomeza avuga ko amazi yangiriza abaturage kubera inzira ntoya, urugero yatanze akaba ari ikigo cy’amashuri cya Gacuba amazi yinjiemo akangiza ibirimo, asaba ubuyobozi bw’Akarere ka Rubavu kubafasha kubonera igisubizo amazi asenyera abaturage.

Umujyi wa Gisenyi ufite inzira z’amazi enye ziyajyana mu kiyaga cya Kivu, ariko bitewe n’uko umujyi ugenda waguka, amazi yariyongereye arusha ubushobozi inzira zimaze imyaka irenga icumi zikozwe.

Dr Ignance Kabano, Perezida w’Inama Njyanama y’Akarere ka Rubavu, yabwiye Kigali Today ko barimo gushaka igisubizo kirambye ku mazi yinjira mu mujyi wa Gisenyi, icyakora asaba abaturage na bo kugira uruhare mu gufata amazi ava ku nyubako zabo.

Ati “Dusaba abaturage gufata amazi ava ku nzu, kuko uko bayareka akagenda ni ko agenda yangiza.”

Abaturage basaba ko inzira z’amazi zongerwa ubunini zikanapfundikirwa

Uyu muyobozi avuga ko uretse gufata amazi avuye ku nyubako z’abaturage, hari umushinga wo kubaka umuhanda uhuza imirenge ya Busasamana, Cyanzarwe na Rubavu, bikazajyana no kongera inzira y’amazi ajya mu mujyi wa Gisenyi.

Ubuyobozi bw’Akarere ka Rubavu busabwa kubaka inzira z’amazi zipfundikiye, zituma abantu batinjiramo, mu gukumira ikibazo cy’ubujura bukorwa n’abana bambura abantu telefone bakaz
injiramo.

Abahagarariye amadini n’amatorero basabwe kugabanya urusaku mu bitaramo bya Pasika

Umuyobozi wa Polisi mu Karere ka Rubavu, SSP Karega Jean Bosco, avuga ko itegeko ritegeka kugabanya urusaku rimaze igihe rigiyeho, kandi amadini n’amatorero agomba kuryubahiriza.

Agira ati "Amabwiriza amaze igihe agiyeho, ntawe ugomba kuvuga ko atayazi, twe icyo dusabwa ni ukureba ko yubahirizwa kuko ni amabwiriza y’Igihugu."

Umuyobozi w’Akarere ka Rubavu, Mulindwa Prosper, avuga ko baganiriye n’abayobozi b’amadini n’amatorero kugira ngo bagenzure aho bageze bashyira mu bikorwa ibyo gushyiraho ibigabanya urusaku mu nsengero.

Agira ati "Turifuza ko ibivugirwa mu nsengero bigumamo, n’abakorera hanze bakirinda kugira uwo babangamira. Icyo dusaba abafite insengero ni ugushyiramo uburyo butuma urusaku rudasohoka."

Abayobozi mu Karere ka Rubavu baganira n’abahagarariye amadini n’amatorero

Mugabe Roger, umushumba w’itorero mu mujyi wa Gisenyi, avuga ko inama bagiriwe n’umuyobozi zije kubakomeza kuko bari basanzwe babizi.

Agira ati "Ubundi aya mabwiriza amaze igihe, kandi amatorero n’amadini amwe yatangiye kubishyira mu bikorwa, ariko hari ayandi atarabigeraho, kutwibutsa biratuma dushyiramo imbaraga kuko ntibikwiye ko twagira uwo dusakuriza mu gihe ari mu bikorwa bye."

Minisiteri y’ibidukikije muri 2023 yashyizeho amabwiriza akumira urusaku, hagamijwe gukemura ikibazo cy’urusaku rukabije ku baturage, ruva ku bikorwa by’iterambere bihuza abantu benshi, ishyira ahagaragara amabwiriza agaragaza ingano y’urusaku ntarengwa n’amasaha rumara ahahurira abantu benshi.

Abayobozi muri servisi z’ubuzima bitabiriye umunsi wo kurwanya igituntu

Indwara y’igituntu yandurira mu buhumekero, nta rukingo igira, ariko ishobora kuvurwa igakira.

Ishami ry’Umuryango w’Abibumbye ryita ku Buzima (OMS) ritangaza ko mu mwaka wa 2022 abantu miliyoni 7.5 barwaye igituntu kandi miliyoni 1.3 bahitanywe na cyo harimo ibihumbi 167 bari bafite ubwandu bwa virusi itera SIDA.

U Rwanda ni kimwe mu bihugu bihagaze neza mu kurwanya indwara y’igituntu mu Karere ka Afurika y’Iburasirazuba kuko imibare y’abandura yagabanutse ikava ku bantu 96 ku bantu ibihumbi 100 mu mwaka wa 2000, ikagera kuri 56 ku bihumbi 100 muri 2022.

Hakozwe ubukangurambaga bwo kurandura igituntu

Mu mwaka wa 2023 abarwayi b’igituntu bagaragaye mu Rwanda bari 9,417 kandi bahawe imiti barakira ku kigero cya 95% nubwo hakiri imyumvire iri hasi mu kumenya indwara y’igituntu n’uko yandura.

Ubushakashatsi bwakozwe muri 2020 bwagaragaje ko Abanyarwanda bangana na 68% ari bo bafite ubumenyi ku ndwara y’igituntu, kandi benshi mu bandura igituntu ntibihutira kujya kwa muganga.

Zirarushya Venant warwaye igituntu muri 2019 ariko akagikira, avuga ko yanduye bitewe no gusangirira ku gikombe kimwe n’abandi bantu babiri harimo urwaye igituntu.

Akomeza avuga ko yagaragazaga ibimenyetso by’igituntu ntabimenye, ariko yegereye abajyanama b’ubuzima bamufasha kujya kwa muganga, basanga arwaye igituntu.

Zirarushya Venant warwaye igituntu akaza kugikira asaba buri muntu kuba maso no kwirinda

Agira ati “Narishimaga cyane kandi nakirwaye mu mezi atandatu, kandi abo twasangiraga barapimwe barakibasangana.”

Akomeza avuga ko bimwe mu byamuranze arwaye igituntu harimo gukorora cyane, no gucika intege mu gihe cy’amezi abiri, avuga ko kurwara igituntu byamugwiririye, asaba Abanyarwanda kwirinda gusangirira ku muheha cyangwa ku gikombe kandi umuntu ugize inkorora imaze igihe kinini akajya kwa muganga.

Agira ati “Hari abantu bakunda gusangira itabi cyangwa gusangirira ku gikoresho kimwe bagomba kubireka kuko ishobora kuba inzira yo kwandura igituntu.”

Dr Migambi Patrick ukuriye agashami ko kurwanya igituntu mu Kigo cy’Igihugu cyita ku Buzima (RBC) avuga ko u Rwanda rufite intego yo kurandura indwara y’igituntu mu mwaka wa 2035 kandi bigomba kugerwaho buri wese abigizemo uruhare, kuko imwe mu mbogamizi bafite ari uko hari abagaragaraho igituntu bagahabwa imiti nyamara ntibayifate ngo bayirangize.

Agira ati “Ikibazo dufite ni imyumvire kuko ibikoresho turabifite kandi ubuvuzi butangirwa Ubuntu. Turifuza ko abantu basobanukirwa, bakamenya kwirinda ndetse n’urwaye akivuza hakiri kare.”

Dr Migambi Patrick, umuyobozi ushinzwe kurwanya igituntu muri RBC

Muri 2020 u Rwanda rwagombaga kugabanya abarwara igituntu kugera kuri 20%, ariko u Rwanda rwashoboye kugabanyaho 9% mu gihe impfu zo zagabanutseho 35%.

Uyu muyobozi avuga ko bahisemo kuza kwizihiriza uyu munsi mu Karere ka Rubavu kuko benshi mu barwara iyi ndwara baba bambukiranyije imipaka, agasaba abantu barwaye inkorora irenze ibyumweru bibiri, ndetse bagacika intege, kugana amavuriro bagasuzumwa.

Muri 2023 Minisiteri y’Ubuzima (MINISANTE) yagaragaje ko abarwaye igituntu biyongereyeho hafi 4,000 mu gihe cy’umwaka, kubera ko bavuye ku 5,538 bariho muri 2021/2022, bagera ku 9,417 muri 2022/2023, bivuze ko biyongereyeho 3879, naho mu mwaka wawubanjirije wa 2020/2021 bakaba bari 5435.

Abajyanama b’ubuzima bahawe ishimwe kubera uruhare bagira mu kugeza abarwayi b’igituntu kwa muganga

Ubwo abo bagore bashyikirizwaga sheki y’ayo mafaranga

Abagore bo mu Karere ka Rubavu bayahawe mu gihe bizizhiza Umunsi Mpuzamahanaga w’Umugore, usanzwe wizihizwa tariki 8 Werurwe, ariko abo mu Karere ka Rubavu bawizihije tariki 21 Werurwe 2024.

Ni amafaranga yagenewe amatsinda 21 y’abagore bakora ubucuruzi butandukanye, hamwe n’abandi 150 bakora ubucuruzi buciriritse, akazabafasha kongera igishoro cy’ibyo bakora, akaba yaratanzwe na Caritas Rwanda, nk’umwe mu bafatanyabikorwa b’akokarere.

Umuyobozi w’Akarere ka Rubavu wungirije ushinzwe iterambere ry’Ubukungu, Deogratias Nzabonimpa, avuga ko mu myaka 30, umugore yakoze ibikorwa bikomeye mu Rwanda, afasha Igihugu kwiyubaka.

Agira ati “Mu myaka 30, umugore yakoze ibikomeye mu iterambere ry’Igihugu, abagore bagize uruhare mu kubohora Igihugu, abagore bagize uruhare mu bikorwa by’imibereho myiza kandi n’ubu urugamba barukomeyeho. Ubu bakora ibyo kera batari bamenyereweho nko kugurutsa indege n’ibyogajuru, kandi umugore akomeje kugaragaza ko ashoboye.”

Bizihije Umunsi w’Abagore

Yungamo ko ubuyobozi buzakomeza kuba hafi umwana w’umukobwa n’umugore muri rusange, mu kumufasha kugera ku ntego ze.

Uretse abagore 300 bahawe igishoro cyo kwiteza imbere, hari abahawe ibikoresho byo mu rugo, abandi bahabwa aho kuba, ibintu bavuga ko bigiye guhindura imibereho yabo.

Nyirarukiko Zibiya ufite imyaka 50 wahawe matola n’ibikoresho byo mu rugo, avuga ko aribwo agiye kuryama kuri matola kuva yabaho, ashima Perezida Kagame ukomeje guteza imbere umugore.

Agira ati “Ndishimye kandi ndashimira Perezida Kagame, we utuzirikana akatwoherereza ubufasha. Nari mbayeho nabi, ntafite aho kuba none bampaye inzu, bampaye ibikoresho byo mu rugo ndetse bongeraho na matola, ngiye kubaho neza harakabaho Kagame.”

Hari abahawe ibikoresho byo mu rugo

Nyirarukiko avuga ko yari asanzwe acumbikiwe mu nzu z’abandi, ndetse akaryama ku bishogori, ariko umunsi w’umugore umuhinduriye ubuzima.

Umugore wo mu Karere ka Rubavu, ashimirwa uruhare yagize mu bikorwa biteza imbere Umunyarwanda, haba mu bucuruzi, imibereho myiza, ikoranabuhanga, uburezi n’umutekano, icyakora asabwa gukomeza inzira y’iterambere, kugira isuku, guteza imbere uburere bw’abana no kubungabunga umutekano.

Yishimiye ko agiye kuryama kuri matola

Harelimana Joseph (Apôtre Yongwe)

Urukiko rwa Gasabo rumuhamije icyaha nyuma y’uko Ubushinjacyaha bwagaragaje ko Apôtre Yongwe yashukishaga abantu kubatinyisha ikibi kugira ngo bamuhe amafaranga abasengere abandi akabizeza icyiza.

Ibi bikorwa byatumye Apôtre Yongwe asabirwa n’ubushinjacyaha igifungo cy’imyaka itatu n’ihazabu ya miliyoni 5 Frw, ariko nyuma yo gusuzuma ibimenyetso byatanzwe n’Ubushinjacyaha, hiyongeraho kuba Apôtre Yongwe yaraburanye yemera icyaha anagisabira imbabazi.

Urukiko rushingiye ku gihano cy’igifungo cy’imyaka ibiri yagombaga guhabwa ariko gishobora kugabanywa, Apôtre Yongwe yahanishijwe igifungo cy’umwaka umwe n’ihazabu y’amafaranga ibihumbi 750 Frw.

Icyakora urukiko rw’ibanze rwa Gasabo rwatangaje ko ibihano bihawe Apôtre Yongwe bisubitswe mu gihe cy’umwaka umwe, bivuze ko ahita afungurwa ariko mu gihe cy’umwaka akaba agomba kwitwararika kugira ngo adakora icyaha.

Apôtre Yongwe yafashwe tariki 01 Ukwakira 2023, akurikiranyweho icyaha cyo kwihesha ikintu cy’undi hakoreshejwe uburiganya, ibizwi nka ‘escroquerie’ mu rurimi rw’Igifaransa.

Apôtre Yongwe ni we washinze Televiziyo ya YONGWE TV ikunze gutambutswaho amakuru atandukanye mu by’iyobokamana n’imyidagaduro, akaba yarakunze kugaragara mu biganiro binyuzwa kuri YouTube bigaruka ku myemerere ye mu by’iyobokamana no ku myitwarire y’abandi bapasiteri mu myigishirize yabo.

Umuyobozi wa Polisi mu Karere ka Rubavu, SSP Karega Jean Bosco, ubwo yari mu rusengero rw’Abadivantisiti basenga ku isabato tariki 16 Werurwe 2024 yatangaje ko yifuza kubibutsa gahunda ya Gerayo Amahoro kuko kwirinda impanuka ari inshingano za buri wese.

Yagize ati “Tuje kwibutsa gahunda ya Gerayo Amahoro idusaba gukoresha neza umuhanda, kuko bidufasha gukumira impanuka zo mu muhanda.”

SSP Karega ashingiye ku mibare y’impanuka zagaragaye mu mezi atatu ya 2024, avuga ko impanuka zabaye mu Karere ka Rubavu ari 58, zahitanye abantu 12 harimo; abanyamaguru barindwi, abanyonzi babiri, umugenzi umwe wari mu modoka n’abamotari babiri.

Akomeza avuga ko izi mpanuka zabaye mu Karere ka Rubavu zakomerekeje abantu batatu ku buryo bukomeye, naho impanuka zari zoroheje zari 32.

Avuga ko kubahiriza amategeko y’umuhanda ku batwara ibinyabiziga ari imwe mu nzira yo gukumira impanuka, ariko ngo abagenzi na bo bafite uruhare runini mu gukumira impanuka.

Yakomeje ati “Umunyamaguru asabwa gukoresha neza umuhanda, kunyura mu nzira y’abanyamaguru mu gihe gikwiye, no kubanza gushishoza kugira ngo yambuke.”

“Umunyamaguru agomba kureba iburyo n’ibumoso mbere yo kwambuka inzira y’abanyamaguru, ariko ikindi gikomeye umunyamaguru asabwa kwirinda ni ukwambuka uvugira kuri telefone cyangwa washyize ibintu mu matwi bituma utumva.”

Avuga ko ubutumwa bugenewe abanyamaguru ari ugushishoza mbere yo kwambuka kandi bagakoresha ubwenge.

SSP Karega Jean Bosco uyobora Polisi muri Rubavu, ati “Imana yaguhaye amatwi, ubwenge n’amaso, bikoreshe mu kwambuka, kandi niba uri kumwe n umwana mufate akaboko wimusiga umwambutse.”

Uyu muyobozi avuga ko mu masaha yo kujya ku ishuri usanga imodoka zigonga abana kubera ko babura ababafasha kwambuka umuhanda, asaba ababyeyi gufasha abana kwambuka umuhanda.

Imibare yo mu bihe bitandukanye ya Polisi y’u Rwanda yerekana ko mu mwaka wa 2019, abantu 739 bahitanywe n’impanuka, muri 2020 zica 687, muri 2021 zitwara ubuzima bw’abagera kuri 655, naho mu muri 2022 zica abantu 617, mu gihe kugera mu Gushyingo 2023 hari hamaze kuba impanuka zirenga ibihumbi umunani, aho mu mezi atandatu gusa muri uwo mwaka, zari zimaze gutwara ubuzima bw’abantu 385.

Uwumukiza Beatrice

Ibaruwa yanditswe n’umwungirije, Kwizera Giovani Fidèle, atumira inama idasanzwe yo gusuzuma ubwegure bwe igira iti “nejejwe no kubandikira mbatumira mu nama idasanzwe y’Inama Njyanama y’Akarere ka Rusizi, izaba ku wa Gatandatu tariki 16/03/2024 saa satu ku biro by’Akarere ka Rusizi”.

Kwizera akomeza avuga ko ku murongo w’ibyigwa ari gusuzuma ubwegure bw’umuyobozi (Perezida) w’Inama Njyanama, ku mwanya w’ubuyobozi bwayo.

Nubwo hataramenyekana impamvu yatumye Uwumukiza Beatrice yegura ku mwanya wa Perezida w’Inama Njyanama, yari asanzwe ari umuyobozi w’Ikigo gishinzwe ubugenzuzi bw’Ubuziranenge, ihiganwa mu bucuruzi no kurengera abaguzi (RICA), umwanya yasimbuweho na Dr Mark Cyubahiro Bagabe.

Uwumukiza Beatrice asezeye ku mwanya wa Perezida w’Inama Njyanama nyuma y’igihe gito yari yandikiye Umuyobozi w’Akarere ka Rusizi, Dr Kibiriga Anicet, amusaba kuzisobanura mu Nama Njyanama izaterana, kubera imyitwarire imuranga mu gihe cy’icyunamo.

Inama Njyanama yari ikuriwe na Uwumukiza Beatrice yandikiye Dr Kibiriga igira iti “Iyi nyandiko yawe yo ku wa 1/03/2024 igaragaza ko woweibyo kwibuka bitakureba, ikomeje kubabaza Abanyarwanda bose by’umwihariko irashengura abacitse ku icumu rya Jenoside yakorewe Abatutsi mu 1994. Umuyobozi ni we ukwiye gutanga urugero mu kubumbatira ubumwe bw’Abanyarwanda."

Njyanama ikomeza ibwira umuyobozi w’Akarere ko nubwo ku wa 06 Werurwe aribwo yanditse ibaruwa asaba imbabazi, avuga ko muri iyi nyandiko yakoze amakosa y’imyandikire ndetse ko imvugo yakoresheje idakwiriye, ko yabivumbuye nyuma yo gukora ubusesenguzi.

Iyi Njyanama yibukije Meya Kibiriga ko atari ubwa mbere akoze amakosa kuko mu gihe cyo kwibuka ku nshuro ya 29 Jenoside yakorewe Abatutsi, bataburuye umubiri w’umuntu utarahigwaga muri Jenoside wo mu Murenge wa Nyakabuye, bakawujyana mu rwibutso rwa Jenoside rwa Nyarushishi, bakamushyingura mu cyubahiro.

Inama Njyanama yasabye ibisobanuro Meya Kibiriga, kuko ngo imyitwarire ye itari myiza ikunze kugaragara igihe cyo kwibuka cyegereje, ndetse imubwira ko bizasuzumwa yateranye.

Ubuyobozi bw’Akarere bwahagurukiye ikibazo cy’urugomo

Umuyobozi w’Akarere ka Rubavu, Mulindwa Prosper, abitangaje mu gihe abatuye ako karere mu Mirenge y’umujyi wa Gisenyi bavuga ko badatekanye kubera abantu bitwaza ibyuma mu masaha y’ijoro bakabambura, ndetse ushatse kubarwanya bakabimutera akaba yahaburira ubuzima.

Ni ibikorwa biboneka cyane mu Mirenge ya Gisenyi, Rubavu na Rugerero, abaturage bakaba bavuga ko bikorwa n’abiyita Abuzukuru ba shitani, bakunze kuba muri rigole (inzira y’amazi) abandi bakaba bacumbika ahantu batazwi, mu masaha y’ijoro bakajya mu bwambuzi.

Meya Mulindwa avuga ko batangiye guhashya ibi bikorwa kandi birimo gutanga umusaruro, ndetse mu Karere ka Rubavu bakaba baratangiye no guhagarika abakora ubucuruzi bwa telefone na mudasobwa byakoze, kuko ari bo nyirabayazana w’ubu bugizi bwa nabi.

Agira ati “Twagenzuye ibyo bacuruza, tukababaza inyemezabwishyu tukazibura, twababaza umwirondoro w’uwagurishije ukabura, kandi n’abambura baza kubibagurisha.”

Amabwiriza y’ikigo cya RICA gishinzwe kurengera umuguzi, avuga ko abagurisha ibintu byakoze bagomba kuba bafite inyemezabwishyu y’ibyo bacuruza, kimwe n’umwirondoro w’uwabibagurishije.

Abaturage bamwe bavuga ko urugomo rukomeje kwiyongera

Umuyobozi w’Akarere ka Rubavu agira ati “Mu gukemura ikibazo cy’ubujura bukabije mu mujyi wa Gisenyi, twatangiye guhagarika ababafasha harimo na Zidane wari uzwi cyane. Dufite urutonde rwabo, guhashya ubucuruzi bwa telefone n’ibindi biba bizatuma tumenya abakora ibi bikorwa.”

Ubuyobozi bw’Akarere ka Rubavu bwirinze kugaragaza amazi y’abamaze guhagarikwa, icyakora abatuye mu mujyi wa Gisenyi bavuga ko kuva muri 2024, abantu bacuruza telefone na mudasobwa bwakoze mu mujyi bose batawe muri yombi, hagendewe mu kubahiriza amabwiriza ya RICA.

Mu bikorwa by’urugomo biheruka, tariki 12 Werurwe 2024 mu Murenge wa Rubavu umugore witwa Kwiringira Sifa, w’imyaka 34, yishwe n’abagizi ba nabi bamuteye icyuma ahagana saa moya z’umugoroba.

Ikibazo cy’ubushomeri mu rubyiruko ni cyo nyirabayazana kuri bamwe, mu kwishora mu bikorwa by’ubugizi bwa nabi.

Ibarura rusange ryabaye mu Rwanda muri 2022, rigaragaza ko Abanyarwanda bafite akazi bangana na 45.9% kandi muri bo abagore bangana na 40.2%, mu gihe abagabo ari 52.4%.

Abafite akazi mu mijyi bangana 53.5% mu gihe mu cyaro ari 42.7 %, ibintu bituma hari abandi benshi basigara bashaka kubaho kandi badafite ikibatunga, bamwe bakishora mu bugizi bwa nabi n’ubwambuzi.

Mu Ntara y’Iburengerazuba abafite akazi ni 42.3%, mu gihe abatuye mu mijyi bafite akazi ari 48.2% naho mu cyaro bakaba 40.6%.

Umudugudu wa Muhira Mukamana avuga ko yahawemo inzu ariko nyuma akaza kuyamburwa

Mukamana Elevania yivugira ko ari mu babyeyi bazwi nka ‘Malayika Murinzi’ kubera umwana arera, ibi bikiyongeraho kuba atishoboye, ndetse ngo yabaga mu nzu yatijwe ariko ikaza gusenywa n’umugezi wa Sebeya.

Ubwo Umudugudu w’Icyitegererezo wa Muhira warimo wubakwa mu Karere ka Rubavu, ngo yahawe amahugurwa nk’abandi bagomba kuzajya muri uwo Mudugudu ndetse atombora n’inzu ifite nimero 340 ariko aza kuyimwa ku munota wa nyuma, agashinja ubuyobozi bw’Akarere kubigiramo uruhare.

Uyu mubyeyi yatakambiye Minisitieri y’Ubutegetsi bw’Igihugu, MINALOC, maze tariki 2 Gashyantare 2024, MINALOC yandikira Akarere ka Rubavu igasaba ko ikibazo cye gikemurwa hamwe n’abandi bagifitanye.

Minisitiri w’Ubutegetsi bw’Igihugu mu ibaruwa yandikiye Umuyobozi w’Akarere ka Rubavu ndetse akamenyesha Intara y’Iburengerazuba na Mukamana, igira iti “Nshingiye ku ibaruwa yo kuwa 03/10/2023 Mukamana Elevanie yandikiye Minisitiri w’Ubutegetsi bw’Igihugu asaba kurenganurwa ku karengane avuga ko we ari mu bubakiwe inzu mu Mudugudu w’Icyitegererezo wa Rugerero mu karere ka Rubavu, ndetse agatombora inzu ifite nimero 340 ariko kugeza ubu akaba atarahawe inzu ye yatomboye kandi nta muntu uyituyemo; nkwandikiye ngusaba gusuzuma no gukemura ikibazo cya Mukamana Elevanie n’abandi bagihuriyeho ukangenzaho raporo y’uko cyakemutse bitarenze tariki ya 25/02/2024.”

Icyo ubuyobozi bw’Akarere ka Rubavu bubivugaho

Kigali Today ivugana n’Umuyobozi w’Akarere ka Rubavu, Mulindwa Prosper, yatangaje ko Mukamana Elevanie nta nzu yahawe mu Mudugudu wa Rugerero, ko ahubwo ibyo avuga ari ibyo yishyizemo.

Mulindwa yagize ati “Uriya mubyeyi yakodesherejwe n’Akarere, gusa yishyizemo ko agomba kubona inzu mu Mudugudu w’Icyitegererezo wa Rugerero, n’iyo wamuha indi ntiyayemera, nyamara amabwiriza yagendeweho mu gutanga inzu ntayujuje kuko ari umuntu ukiri muto kandi zaragenewe abantu bakuru, ashoboye gukora akaba yabona ahandi ho kuba.”

Mulindwa avuga ko inzu zatanzwe ataraba Umuyobozi w’Akarere ka Rubavu, ariko yagenzuye raporo zakozwe n’abatomboye, asanga Mukamana Elevanie nta nzu yatomboye.

Ati “Urebye mu ibaruwa yanditswe na MINALOC isaba kugenzura ikibazo cye no kugikemura, twifashishije raporo y’abatowe kujya mu nzu kandi ntabwo arimo, sinzi n’aho yakuye iriya nimero avuga ko yatomboye.”

Abajijwe icyatumye Mukamana Elevanie ajyanwa mu kigo cya Nyabishongo kijyanwamo inzererezi mu Karere ka Rubavu, avuga ko atabigarukaho ariko yakoze ibibangamira umudendezo w’Abanyarwanda.

Mu gihe abaturanyi batabariza Mukamana Elevanie bavuga ko abana be bandagaye, Umuyobozi w’Akarere ka Rubavu Mulindwa Prosper avuga ko abana bari mu muryango nk’uko undi wese ufite umuryango yajyanwa.

Bamwe mu baturage bavuga ko Mukamana Elevanie yatomboye inzu, ariko ubuyobozi burabihakana, ndetse kuva yabona ibaruwa ya MINALOC yagiye ku nzu ya nimero 340 avuga ko ari yo yatomboye.

Umudugudu wa Rugerero watujwemo imiryango 142 yakuwe ahantu hatandukanye, cyakora hari inzu zitashyizwemo imiryango harimo n’iyi Mukamana Elevanie asaba gushyirwamo.

Ubuyobozi bw’Akarere ka Rubavu, buherutse gutangaza ko uyu Mudugudu wagaragayemo abaturage batishimye ndetse bagaragaza kutakira neza ibyemezo bya Koperative y’Umudugudu, bukaba buteganya amatora y’abagomba kuyiyobora, kuko abagiyeho Umudugudu ugitahwa hari abatarabishimiye.

Ishimwe Pacifique, Umuyobozi w’Akarere wungirije ushinzwe imibereho y’abaturage, avuga ko igihe abaturage bamaze mu Mudugudu bamaze kumenyana, bityo bikazoroha gutora ushobora kubayobora bazi neza.

Ku kibazo cy’inkoko bavuga ko ziribwa n’abayobora koperative, avuga ko imikoreshereze y’umutungo igaragazwa muri raporo, kandi ko bashyira amafaranga kuri konti, ahubwo ikibazo cyabaye ngo ni uko abaturage batizera ubuyobozi bwabo.

Cyakora kugira ngo bafashe abaturage guhindura imyumvire, babaye batujemo abakozi b’Akarere babana na bo kugira ngo babafashe mu bikorwa bya buri munsi harimo no guhindura imyumvire.

Ku rundi ruhande ariko, abahatujwe bavuga ko ikigamijwe ari ugushyirwaho igitutu no gucecekeshwa n’abo bakozi bashyizwe mu Mudugudu kandi bifashije.

Umuyobozi w’Akarere ka Rusizi, Dr Kibiriga Anicet

Inama Njyanama y’Akarere ka Rusizi yandikiye Meya, Dr.Kibiriga Anicet, imusaba ibisobanuro ndetse yamagana inyandiko idasigasira Ubumwe bw’Abanyarwanda.

Umuyobozi w’Akarere ka Rusizi, tariki ya 1 Werurwe 2024 yandikiye Komite ya Ibuka ku rwego rw’Akarere n’izindi nzego, akoresha amagambo afatwa nko gushinyagurira abarokotse Jenoside yakorewe Abatutsi.

Igika cya kabiri cy’ibaruwa Umuyobozi w’Akarere yanditse kigira giti "nshingiye kandi ko amatariki yanyu y’umwihariko ari hejuru y’itariki 16/06/2024, mbandikiye mbatumira mu nama yo kwemeza amatariki twazibukiraho abanyu bazize Jenoside yakorewe Abatutsi mu 1994 ku wa Mbere tariki 04/03/2024.”

Inama Njyanama y’Akarere ka Rusizi yandikiye Umuyobozi w’Akarere igira iti “iyi nyandiko yawe yo kuwa 1/03/2024 igaragaza ko wowe bitakureba ikomeje kubabaza Abanyarwanda bose by’umwihariko irashengura abacitse ku icumu rya Jenoside yakorewe Abatutsi mu 1994."

Inama Njyanama ikomeza igira iti "Umuyobozi ni we ukwiye gutanga urugero mu kubumbatira ubumwe bw’Abanyarwanda."

Inama Njyanama ikomeza ibwira Umuyobozi w’Akarere ko ku wa 06 Werurwe 2024 yanditse ibaruwa asaba imbabazi avuga ko muri iyi nyandiko yakoze amakosa y’imyandikire ndetse ko imvugo yakoresheje idakwiriye ndetse ko yabivumbuye nyuma yo gukora ubusesenguzi.

Iyi Nama Njyanama yibukije Meya Kibiriga ko atari ubwa mbere akoze amakosa kuko mu gihe cyo kwibuka ku nshuro ya 29 Jenoside yakorewe Abatutsi, bataburuye umubiri w’umuntu utarahigwaga mu gihe cya Jenoside wo mu Murenge wa Nyakabuye, bakawujyana mu rwibutso rwa Jenoside rwa Nyarushishi, bakamushyingura mu cyubahiro.

Inama Njyanama yasabye ibisobanuro Meya Kibiriga kuko ngo imyitwarire ye itari myiza ikunze kugaragara iyo igihe cyo kwibuka cyegereje, ndetse imubwira ko bizasuzumwa yateranye.

Kigali Today ivugana na Vestine Kayishema ukuriye umuryango wa IBUKA mu Karere ka Rusizi, yatangaje ko amakosa ari mu ibaruwa bayabonye ariko Umuyobozi w’Akarere agasaba imbabazi.

Agira ati “Ni byo amakosa twarayabonye ariko umuyobozi yanditse indi isaba imbabazi, dukeka ko ari amakosa yakozwe n’uwanditse ibaruwa kuko na we yahise asaba imbabazi akibibona.”

Umuyobozi w’Akarere ka Rusizi Dr Kibiriga Anicet yanditse ibaruwa irimo ibyo yise amakosa mbere tariki ya mbere Werurwe 2024, naho ibaruwa yisegura ayandika tariki ya 6 Werurwe 2024 mu gihe inama yari yahamagaje yagombaga kuba tariki 4 Werurwe 2024.

Mu ibaruwa yisegura, yagize ati “Nyuma y’uko ubutumire busohotse n’inama ikaba, ku wa Mbere tariki 04/03/2024, ku mugoroba w’uwo munsi ubuyobozi bw’Akarere bwasanze mu butumire harimo ikosa ry’imyandikire ahakoreshejwe amagambo adakwiye, aho kwandika amatariki tuzibukiraho (abacu) bazize Jenoside yakorewe Abatutsi mu 1994 muri Nyarushishi, Murangi no muri Mutimasi tukandika (abanyu)bazize Jenoside yakorewe Abatutsi mu 1994…”

Akomeza agira ati “Tumaze gusesengura ubu butumire twababajwe cyane n’amakosa y’imyandikire twakoze mu kwandika ubwo butumire, tukaba tubisabiye imbabazi ku Munyarwanda wese waba warabonye ubu butumire n’undi wese waba warabyumvise.”

Umuyobozi Mukuru Ushinzwe Itumanaho n’Ubufatanye muri Ministeri y’Ubumwe bw’Abanyarwanda n’Inshingano Mboneragihugu, Paul Rukesha, yabwiye Kigali Today ko barimo gukurikirana ikibazo cy’iriya nyandiko kandi ko bazagira icyo batangariza Abanyarwanda, cyakora asaba Abanyarwanda kwitwarararika imvugo n’inyandiko zijyanye n’igihe cyo kwibuka Jenoside yakorewe Abatutsi.

Agira ati “Kwibuka Jenoside yakorewe Abatutsi ni inshingano za buri Munyarwanda, kandi ku bijyanye n’imvugo n’inyandiko bikoreshwa, hari amategeko abigenga, turasaba buri muntu kwigengesera mu mvugo n’inyandiko akoresha.”

Rukesha yabwiye Kigali Today ko barimo gutegura amabwiriza yibutsa Abanyarwanda imyitwarire mu mvugo no mu nyandiko bigomba gukoreshwa mu bihe byo kwibuka ku nshuro ya 30 Jenoside yakorewe Abatutsi.

Ibaruwa yandikiwe Umuyobozi w’Akarere:

Uwiringiyimana Ibrahim wagombaga kwiga nyuma ya saa sita, yasigiwe umwana n’umubyeyi we wari wagiye mu mirimo, cyakora kubera gukunda ishuri, aho gusiba ishuri ahitamo guheka umwana amujyana ku ishuri hamwe n’ibyo agomba kumuha.

Umuyobozi w’Akarere ka Rubavu Mulindwa Prosper avuga ko bashimye ubutwari bw’umwana wanze gusuzugura umubyeyi ariko yanga no kureka ishuri.

Agira ati “hari ubutumwa bw’umwana wahawe inshingano akanga kuzita ariko yanga no gusiba ishuri. Hari icyo byatweretse nk’ubuyobozi bw’Akarere ko hari abana bakoreshwa imirimo ivunanye, ariko hari n’ababyeyi bafite imyumvire yo kubuza abana kwiga kandi kwiga ni uburenganzira bw’umwana. Icyo twakoze twahembye umwana kubera umuhate yagaragaje wo gukunda ishuri, ariko n’umubyeyi arahwiturwa.”

Abarezi bo ku kigo Uwiringiyimana yigaho bavuga ko batunguwe no kubona umwana aje kwiga ahetse undi.

Nirere Judith, umurezi kuri GS Rambo, avuga ko yabonye Uwiringiyimana mu masaha ya nyuma ya saa sita aje kwiga ahetse murumuna we, avuga ko nyina ahora amubwira ngo asibe ishuri amurerere umwana.

Uyu murezi avuga ko Uwiringiyimana yageze ku ishuri, bagenzi be bamaze gufata amafunguro ya saa sita, biba ngombwa ko ubuyobozi bw’ikigo bumushakira amafunguro ye, naho umwana uhetswe ahabwa umukozi wita ku isuku amwitaho mu gihe Uwiringiyimana yarimo akurikirana amasomo mu ishuri, naho ubuyobozi bw’ikigo bushakisha umubyeyi kugira ngo aze atware umwana.

Niyonsaba Martin, umuyobozi w’ikigo cya GS Rambo washyize hanze amafoto arimo guhemba Uwiringiyimana Ibrahim ibikoresho by’ishuri, avuga ko Uwiringiyimana yashimwe nk’umunyeshuri w’ukwezi.

Agira ati “Uwiringiyimana Ibrahim wiga mu mwaka wa kabiri w’amashuri abanza, yasigiwe umwana yanga gusiba ishuri aza amuhetse. Twatumijeho umubyeyi araganirizwa ndetse anasabwa guheka umwana kugira ngo Ibrahim yige, ikigo cyashimiye Ibrahim kiranamuhemba, byigisha abandi gukomera ku ishuri”.

Umuyobozi w’Akarere ka Rubavu, avuga ko byaberetse ko hari abana basiba ishuri bitewe n’ababyeyi, akomeza avuga ko bagiye kubihagurukira mu nama zihuza abayobozi n’abaturage, umugoroba w’ababyeyi n’andi matsinda azabafasha gutuma abana bafashwa kugaruka ku ishuri.

Minisiteri y’Uburezi mu Rwanda ifatanyije n’ikigo cyo muri Qatar baherutse gutangiza umushinga ugamije gusubiza mu ishuri abana baritaye, ariko ukazibanda no ku gukuraho inzitizi zituma abana bata ishuri.

Bimwe mu bikorwa uzakora harimo kugaragaza ibibazo abana bahura na byo mu miryango bituma bareka ishuri, ariko harimo no kongera umubare w’ibyumba, kongerera ubumenyi abarezi, kongera ikoranabuhanga mu kwigisha kugira ngo byorohere abana kwiga, ariko harimo no gushakisha abana bataye ishuri bakajya mu mirimo itandukanye.

Meya Mulindwa yabwiye abaturage ko ikitari isuku kiba ari umwanda

Ubuyobozi bw’Akarere ka Rubavu bubitangaje mu gihe bwinjiye mu kwezi kw’isuku n’umutekano, bukaba busaba abaturage kwita ku isuku ikigaragara ko ari umuzigo kuri bamwe.

Mulindwa Prosper, Umuyobozi w’Akarere ka Rubavu, avuga ko atifuza ko abaturage bakomeza kwitiranya umwanda n’isuku nkeya.

Agira ati “Hari imvugo akarere tutifuza gukomeza gukoresha ijyanye n’isuku nkeya, iyo atari isuku ni umwanda, ntabwo isuku nkeya ibaho, kandi ahatari isuku haba hari umwanda, bivuze ko ugomba gukurwaho hakajyaho isuku.”

Meya Mulindwa asaba ko n’abubaka bagomba kugira isuku bakirinda gukoresha amabati asumbana cyangwa inzitiramubu zacitse.

Inzego z’umutekano zifasha abaturage mu isuku

Ibikorwa byo kongera isuku mu Karere ka Rubavu, bigomba kujyana no kuzirika ibisenge by’inzu hirindwa ko zatwarwa n’umuyaga, gukura mu nzira z’amazi ibitaka bimanurwa n’isuri, hamwe no kugira ubwiherero kuri buri rugo.

Akarere ka Rubavu gahanganye n’ikibazo cy’isuku mu Murenge wa Nyamyumba, mu gihe mu myaka yashize uwari Umunyamabanga Nshingwabikorwa w’uwo murenge, yirukanwe ku nshingano azira kuba abaturage bitumye mu muhanda, na ho bamwe mu baturage bavuganye na Kigali Today bavuga ko kutagira ubwiherero bakituma ku gasozi biterwa no kutagira ubushobozi bwo gucukura ubwiherero, n’aho babucukuye bakabura ubushobozi bwo kubutinda no kubutwikira.

Nzabakurikiza Evariste, umusaza w’imyaka 60, yabwiye Kigali Today ko nta bwiherero agira kubera intege nke.

Agira ati “Nkanjye nagerageje gucukura ubwiherero ariko kubera intege nke ntibinkundira, kandi n’amafaranga yo gucukuza ubwiherero sinayabona, ibyo rero bituma tujya kubutira, twabubura tukajya kwiherera mu gihuru.”

Imirenge ya Rubavu bitabiriye gukora isuku no mu ngo z’abaturage

Akarere ka Rubavu kaza ku mwanya wa mbere mu kurwaza indwara z’inzoka zo mu nda, ibi ngo bikaba biterwa no kutagira amazi meza n’ubwiherero.

Bifuza ko ahatangirwa udukingirizo muri Rubavu hongerwa

Nubwo udukingirizo tugurishwa mu nzu zigurisha imiti (pharmacy), tugatangirwa ubuntu ku bigo nderabuzima, ntibibuza ko hari abadukenera bakatubura bigatuma bishora mu gukora imibonano mpuzabitsina idakingiye, bakaba bakwandura virusi itera Sida.

Abanyamuryango ba RRP+ bavuga ko Akarere ka Rubavu kari mu turere tugendererwa n’abantu batandukanye, bakaba basaba ko abahagenda n’abahatuye bafashwa kwirinda virusi itera Sida.

Mukakibibi Perusi ukuriye RRP+ mu Karere ka Rubavu, avuga ko ubwandu bwa virusi itera Sida bwagabanutse, bitewe n’imiti yegereyjwe abafite virusi itera Sida kandi bakayihabwa ku buntu, ariko bidahagije mu gihe hari icyuho gishobora gutuma abandi bandura.

Agira ati “Kuva ku mugore utwite kugera ku musaza, imiti ibageraho kandi batishyuye bigatuma ubwandu budakomeza kwiyongera, gusa zimwe mu mbogamizi dufite ni uko ahantu hahurira abantu benshi muri uyu mujyi usurwa cyane hataboneka udukingirizo. Ikindi ni uko urubyiruko rwihisha rugakora imibonano mpuzabitsina idakingiye.”

Yungamo ko bakomeje ubuvugizi kugira ngo abana bafite imyaka iri hagati ya 15 na 20, bapimwe bamenye uko bahagaze, bitabweho ndetse bahagarike kwanduza abandi mu gihe bakora imibonano mpuzabitsina idakingiye.

Ati “Buriya umuntu ufite virusi itera Sida ufata imiti ntiyanduza nk’utayifita, ni yo mpamvu dushaka ko urubyiruko mu mashuri rupimwa bakamenya uko bahagaze, abanduye bagahabwa imiti mu gukumira ko ubwandu bukomeza kwiyongera.”

Mukakibibi avuga ko Akarere ka Rubavu kakira abantu batandukanye kandi bafite ibyago byo kwandura, agasaba ko ahantu hatangirwa udukingirizo hongerwa.

Agira ati “Akarere ka Rubavu kari mu turere tugendwa cyane bitewe n’ingendo zambukiranya imipaka, hari abahasohokera ku mazi na bo bashobora gukenera gukora imibonano mpuzabitsina, aba bose bakeneye ahantu hatandukanye bashobora kubona udukingirizo bitabaye ngombwa ko badusanga mu maguriro, kuko hari abagira isoni bakaba bakora imibonano idakingiye bakandura virusi itera Sida.”

Umubyeyi Samusi utuye mu mujyi wa Gisenyi, avuga ko virusi itera Sida iboneka mu rubyiruko hakaba hakenewe kurwegera birenze uko bisanzwe.

Ati “RRP+ ihugura abakorerabushake kugira ngo bazagere kuri benshi, ariko harimo n’abatigaragaza. Urubyiruko rufite amatelefone, babona byinshi bakabishyira mu bikorwa bagahura n’abantu bakuru bafite virusi itera Sida ndetse hakaba n’abana bayivukana, banduza abandi iyo batikingiye. Turasaba ko urubyiruko rwegerwa cyane”.

Simbizi Abdoul Hakim wo mu Murenge wa Nyamyumba, we asaba ko abakora uburobyi na bo bitabwaho cyane, kuko bari mu kiciro gifite ibyago byo kwandura virusi itera Sida.

Ubukangurambaga mu kwirinda virusi itera Sida burakomeje

Biraboneye Africain Umunyamabanga mukuru w’urugaga rw’amasendika y’abakozi mu Rwanda CESTRAR

Ibi bikajyana n’uko mu bigo by’abikorera abakozi badafite amasezerano ahuriweho n’urwego bakorera bituma batishimira akazi bakora.

Umunyamabanga mukuru w’urugaga rw’amasendika y’abakozi mu Rwanda CESTRAR, Biraboneye Africain avuga ko mu bikorera harimo ibibazo by’abakozi bafatwa nabi, itonesha no kwirukanwa, asaba ko hakwiye kubaho ibiganiro rusange byafasha umukozi.

Ati: “Gukora imishyikirano rusange kugera ku masezerano rusange, bigafasha abakozi n’abakoresha kugira ibyo bongeramo bijyanye n’umurirmo bakora, bigateza imbere umurimo unoze, bikagira ingaruka nziza mu guteza imbere imibereho myiza y’abakozi n’abaturage.”

Biraboneye avuga ko abakozi bo mu Rwanda harimo abishimiye umushahara bahabwa mu gihe abandi bahabwa umushahara utajyanye n’ibyo bakora.

“Abakozi ba Leta uko umushahara ugenwa n’uko ubonekera ku gihe bashobora kubyishimira, n’ubwo aha tutavuga ku ngano y’umushahara ariko uburyo bakoramo ntibafashwe nabi. Ibi ariko si ko biri mu rwego rw’abikorera kuko abenshi ntibafashwe neza bitewe n’umushahara bahabwa, kutumvikana ku mikorere y’akazi, amasaha y’akazi, uburenganzira bwaho bakorera, kwitabwaho mu kazi, gutonesha , gushyirwa mu kazi no kugakurwamo, bituma hari benshi bakeneye ubuvugizi, ndetse hakaba gushyikirana hagati y’abakozi n’abakoresha bikagira icyo bihindura.”

Imwe mu nyungu iboneka iyo abakozi n’abakoresha bagiranye ibiganiro ni ukwiyongera k’umusaruro mu kazi.

Biraboneye avuga ko iyo habayeho ibiganiro hagati y’umukozi n’umukoresha bumvikana ku mikorere ndetse hakabaho kwiyongera k’umusaruro kuko umuntu akora abikuye ku mutima kandi akishimira guteza imbere ikigo yizeye ko uko cyunguka nawe kimuteza imbere.

Nubwo mu bigo bya Leta abakozi boroherezwa mu kazi, haracyaboneka ubusumbane.

Biraboneye akaba avuga ko basaba leta gushyiraho umushahara fatizo ushingirwaho mu kugena umukozi.

Ibi, abishingira ku mushahara uhabawa abakozi b’inzego zibanze mu Ntara utangana n’uhabwa abakozi b’inzego zibanze mu mujyi kandi bose bakora akazi kamwe.

Agir agira ati “Muri leta naho hari abakora akazi kamwe badahuza umushahara cyane cyane mu nzego zibanze, mu tugari dukorera mu Ntara no mu mujyi wa Kigali, abayobozi mu turere, abaganga mu bitaro no mu bindi bice bitandukanye. Icyo dukora ni ubuvugizi kuko abakora umurimo umwe bakwiye guhabwa umushahara ungana.”

Asaba ko hakorwa inyigo y’umushahara fatizo, ndetse ikagena ibindi byongerwa umukozi wa leta bishingiye aho akorera n’ubuzima akoreramo.

Agira ati “Dushishikariza amasendika mu butegetsi bwite bwa leta gukora ubuvugizi, iki kibazo cy’ubusumbane ku mushahara ugenwa, kandi twabiganiriye na leta n’abikorera ariko ntiturabona igisubizo, nubwo batubwira ko bashaka kubanza guhanga imirimo myinshi kugira ngo uwo mushahara ushyirweho.”

Mu Rwanda nta mushahara fatizo urimo, ibi bituma abantu bishyiriraho umushahara, nubwo benshi bituma bahabwa umushahara muto utajyanye n’ubuzima babayeho, ahubwo umukoresha agena umushahara bitewe n’uko abishaka, bigakomeza kugushamo abakozi.

Sendika zimwe zatangiye kuganiriza abikorera gushyiraho amasezerano ajyanye n’akazi

Ing Mutsindashyaka Andre umunyamabanga mukuru wa sendika y’abakozi bakora mu bucukuzi bw’amabuye y’agaciro (Mine) na Kariyeri (REWU) avuga ko bateye intambwe mu kuganiriza ibigo bikora muri Mine na Kariyeri aho abakoresha baganiriye n’abakozi ndetse bakora amasezerano y’akazi ajyanye n’akazi bakora, bikaba imwe mu mpamvu yongera umusaruro muri ibi bigo kandi n’abakozi bakishimira umusaruro bahabwa.

Agira ati “Ku birabana no mu bucukuzi tumaze kugira 34% by’abakozi bafite amasezerano yanditse ariko mu biganiro tugenda tugirana n’ishyirahamwe ry’abacukuzi mu Rwanda n’abanyamuryango baryo tureba uko abakozi bagira amasezerano yanditse kuko niryo pfundo ry’iterambere haba ku mukozi n’umukoresha.”

Akomeza avuga ko abakozi bafite amasezerano yanditse bateganirizwa n’izabukuru ntazabe umuzigo kuri leta mu gihe agize imyaka 60, ndetse aya amasezerano afasha umukozi kubona ubwishingizi igihe akoze impanuka mu kazi nkuko ayajyana muri banki agahabwa inguzanyo akaba yagira ikindi yikorera kikamuteza imbere.”

Gatari Pierre uyobora sosiyete CEMINYAKI icukura amabuye y’agaciro mu murenge wa Nyamyumba mu karere ka Rubavu, avuga ko kwegerwa na Sendika REWU byatumye abakozi barushaho kwisanzura mu kazi n’uburenganzira buriyongera byongera umusaruro w’ikigo.

Agira ati “REWU itaraza ntitwumvaga inyungu twabigiramo kuko ivuganira abakozi, ariko tumaze kugirana ibiganiro, abakozi bishimiye uburenganzira bagenerwa n’itegeko, batangira gukora bishimiye, kandi natwe umukoresha tubona umusaruro wiyongera kuko umukozi azi inshingano ze, azi amategeko amugenga bigatuma akunda akazi.”

Gatari avuga ko mbere babahembaga mu ntoki ariko kubera amasezerano y’akazi bahemberwa muri banki nubwo abakozi benshi batishimira guhemberwa muri banki kubera zibakata amafaranga.

“Tubashishikariza guhemberwa muri banki no gufata inguzanyo bakiteza imbere.”

Gatari avuga ko gusinyana amasezerano n’umukozi bikura umuzigo ku mukoresha kuko bituma yubahiriza amategeko ndetse umukozi yagira n’ibyago by’impanuka akabona abamwunganira n’umuryango we mu gihe bataragirana amasezerano bahoraga mu bibazo n’abakozi.

Amashanyarazi afatwa nka kimwe mu by’ingenzi byihutisha iterambere ry’abaturage n’iry’Igihugu muri rusange

Hashingiwe ku buryo amashanyarazi yagiye atangwa mu baturage, Umujyi wa Kigali ni wo ufite ingo nyinshi zifite amashanyarazi ku kigero cya 89.7%, mu Ntara y’Iburasirazuba ingo zifite amashanyarazi zigera kuri 57.6%, mu Ntara y’Amajyaruguru ni 54.1%, Intara y’Iburengerazuba 56.7% naho Intara y’Amajyepfo ni 55.1%.

Iyo raporo igaragaza ko u Rwanda rutuwe n’ingo 3,312,743 zifite abaturage 13,246,394 naho ingo zifite amashanyarazi zikaba zigera kuri 74%.

U Rwanda rurakataje mu kwegereza amashanyarazi abaturage mu rwego rwo kubafasha kwikura mu bukene, guhanga imirimo no koroherezwa kugerwaho n’ikoranabuhanga.

Umuriro w’amashanyarazi ni imwe mu nzira yorohereza umuturage kugera kuri byinshi yifuza harimo gucana, kongera umuriro muri telefoni, gukora ibikorwa bimuteza imbere nko gusudira, imashini zibaza, kogosha, imashini zisya imyaka, n’indi mirimo itandukanye ifasha abaturage kuva mu bwigunge no kwiteza imbere.

Mu Nama y’Umushyikirano iheruka mu ntangiriro z’uyu mwaka wa 2024, Minisitiri w’Intebe Dr Ngirente Edouard yatangaje ko ingo zifite amashanyarazi mu Rwanda zageze kuri 74% zivuye kuri 34% mu myaka irindwi ishize, cyakora hakaba hari umuhigo ko mu mwaka wa 2024 Abanyarwanda bose bazaba bagerwaho n’amashanyarazi.

Nubwo hari umuvuduko mu kongera amashanyarazi afatiye ku muyoboro mugari mu bice bitandukanye by’u Rwanda, u Rwanda rukomeje n’umuvuduko wo kongera ingufu zikomoka ku mirasire y’izuba, ingomero na Gaz Methane.

Imibare yatanzwe n’Ikigo cy’Igihugu gishinzwe Ibarurishamibare muri 2023, igaragaza ko ingomero zikorera mu Rwanda zigenda zongera ubushobozi mu gutanga ingufu z’amashanyarazi.

Urugomero rwa Ntaruka mu mwaka wa 2020 rwatanze ingufu z’amashanyarazi zingana na 28,210,700 Kwh, mu gihe mu mwaka wa 2022 zari zigeze kuri 33,212,000 kwh, bivuze ko mu myaka itatu ziyongereyeho kilowatt 5,001,300 (kwh).

Urugomero rwa Mukungwa I mu mwaka wa 2020 rwatanze kilowatt 55,063,465, ariko muri 2022 rwatanze kilowatt 64,886,161, mu gihe urugomero rwa Mukungwa II rwatangaga kilowatt 18,812,940 muri 2022 rwatanze kilowatt 21,673,371.

Mu Rwanda habarirwa ingomero nini n’intoya 30, inganda zikora ingufu zikomoka ku mirasire y’izuba eshatu, ibigo bikora ingufu zikomoka ku muyaga 5, ibigo bya Gaz Methane bibiri n’ibigo bikora ingufu z’amashanyarazi avuye kuri nyiramugengeri bibiri.

Ibi bigo byinjizaga ingufu z’amashanyarazi zingana na kilowatt 790,178,601.36 muri 2020 ariko muri 2022 byari birimo gutanga ingufu z’amashanyarazi zingana na kilowatt 1,033,762,056.06.

Ingo zari zifite amashanyarazi muri 2002 zari 5%, 2012 zari 17.9% mu gihe 2022 zari 61% naho muri 2024 zimaze kugera kuri 74%.

Raporo y’imyaka ya 2017-2022 igaragaza uko Uturere twari duhagaze mu kugeza amashanyarazi ku baturage:

itegeko ry’umuryango n’imirire myiza rizafasha abana kugira imikurire myiza

Mu igenzura ryakozwe muri Kamena 2023 mu cyumweru cyahariwe ubuzima bw’umubyeyi n’umwana, ryagaragaje ko igwingira mu bana bafite amezi atandatu kugera ku bafite amezi 23, riri ku gipimo cya 25.2%, rigaragaza ko abana bafite amezi atandatu kugera ku munani igwingira riri ku kigero cya 12%, mu gihe abana bafite amezi 12 kugera kuri 17, riri ku kigero cya 28.3%.

Ubushakashatsi bugaragaza ko umubare munini w’abana bagihura n’igwingira uboneka mu bafite amezi 18 kugera ku mezi 23, aho bagera kuri 36.3%.

U Rwanda rugaragaza ko hagati y’abana b’abakobwa n’abahungu, abakomeje guhura n’igwingira ari abahungu bari kuri 29.6% mu gihe abakobwa bari kuri 20.8%.

Intara y’Iburengerazuba ikize ku biribwa, ni yo ikomeje kuza imbere mu kugira umubare w’abana bafite igwingira ku kigero cya 28.3%, Amajyaruguru 28.1%, Iburasirazuba 24.7%, Amajyepfo 22.3%, naho Umujyi wa Kigali ugeze kuri 20.9%.

Akarere ka Rutsiro gafite abana benshi bafite ikibazo cy’igwingira, aho kiri kuri 35.1% naho Akarere ka Nyarugenge akaba ari ko gafite abana bakeya bafite ikibazo cy’igwingira ku ijanisha rya 11.8%.

Mu turere tw’icyaro, Kirehe ni ko gafite abana bakeya bafite igwingira ku kigero cya 14.6% na Huye ifite 16.8%.

U Rwanda rufite intego ko umwaka wa 2024 rugomba kuba rwagabanyije igwingira kugera kuri 19%, ndetse mu myanzuro y’Inama y’Abaminisitiri yateranye tariki 27 Gashyantare 2024, yagaragaje ko hagiye kujyaho itegeko rigenga umuryango n’imirire myiza, ikazaba imwe mu nzira ikumira imirire mibi mu bana n’igwingira.

Ikigo cy’Igihugu gishinzwe imikurire no kurengera umwana, kigaragaza ko mu mwaka wa 2022-2023 abana 739,527 bahawe ifu ya Shisha Kibondo, mu gihe ababyeyi bayihawe bari 480,560.

Leta yashyizeho gahunda zihutisha kurwanya imirire mibi mu bana, hakoreshejwe Shisha Kibondo ihabwa abagore batwite n’abonsa, amata ahabwa abana bari mu mirire mibi, gahunda zijyanye n’isuku n’isukura, ifishi yo gukurikirana imikurire y’umwana no gukangurira ababyeyi kugira akarima k’igikoni.

Ibi bikaba biterwa n’uko ababyeyi benshi badasobanukiwe indyo yuzuye n’uko itegurwa, nk’aho mu Karere ka Rubavu keza imyaka myinshi irwanya imirire mibi ijyanwa ku isoko, imiryango igakomeza kugira abana bafite imirire mibi.

Ishami ry’Umuryango w’Abibumbye ryita ku bana (UNICEF), ritangaza ko imirire myiza ari ishingiro ryo kubaho k’umwana, ubuzima ndetse no gukura cyane cyane mu minsi 1,000 ya mbere y’ubuzima bw’umwana.

Uyu muryango ushimira u Rwanda intambwe igaragara rwateye mu kurwanya imirire mibi, kuko hagati y’umwaka wa 2010 na 2015, ibigero by’imirire mibi mu bana bari munsi y’imyaka 5 byavuye kuri 44% bigera kuri 38%.

Uturere turakora ibishoboka ngo dushobore kugera ku gipimo cya 19%, Akarere ka Rubavu gakoresheje abafatanyabikorwa kashoboye kugera kuri 20.6 %, umubare utanga icyizere ko 2024 izarangira barageze ku ntego yatanzwe.

Uko igwingira ryari rihagaze mu turere mu 2023

Umuyobozi w’Akarere ka Rubavu wungirije ushinzwe iterambere ry’Ubukungu, Nzabonimpa Deogratias, yabwiye Kigali Today ko abafatanyabikorwa barimo gufasha Akarere kwigisha abaturage kongera umusaruro, ariko bakibuka no gutegura indyo nziza kuko hari abahinga bakishimira kugurisha ntibazigamire imiryango yabo.

Innocente Turinimigisha ukorera umuryango Sight and Life ukorera mu Karere ka Rubavu, avuga ko imwe mu nzira bashoboye gukoresha mu gufasha abatuye ako karere, ari ukwegera abaturage bakarebera hamwe ibibazo biri mu rugendo rw’ubuhinzi n’ubworozi, gutegura umurima, kubona imbuto n’inyongeramusaruro no kugeza umusaruro ku isoko.

Turinimigisha avuga ko uretse kuba ibi bikorwa bituma umusaruro uboneka ari mwinshi, ngo baganira n’uburyo bwo kuwucunga, no kuwugeza ku isoko ariko bakigisha n’ababyeyi gutegura indyo yuzuye ituma abagize umuryango bagira ubuzima bwiza.

Bamwe mu bakurikiranye amasomo y’ubuhinzi mu murima bagaragaza ibyo bungutse

Umuryango RDO (Rwanda Development Organization) ubifashijwemo n’uw’Abaholandi (SNV) bamaze gufasha abafashamyumvire 160 mu turere twa Ngororero, Nyabihu, Rutsiro na Rubavu mu kongera umusaruro binyuze mu buhinzi-ndumburabutaka.

Modeste Ntibitura ni umwe mu bahinzi b’ibirayi, ibigori n’imboga wahawe ubumenyi ku buhinzi ndumburabutaka mu Karere ka Rubavu. Avuga ko muri ubu buhinzi yagerageje gukora ibyo yize mu gihe cy’umwaka, yongerera ubutaka umwimerere, babasha kwikorera amafumbire akungahaye ku myungu ngugu ibihingwa bikenera, umusaruro uriyongera.

Agira ati “umushinga wadufashije mu gusubiza ubutaka umwimerere, turwanya indwara n’ibyonnyi, twize uburyo dusimburanya ibihingwa, uburyo dushobora kuvanga ibihingwa bikarinda ibindi ibyonnyi, twakoreshaga amafumbire mvaruganda menshi bikica imirima, ariko ubu twikorera ifumbire tukayivanga n’ifumbire y’imborera n’imvaruganda umusaruro ukiyongera.”

Hari icyizere ko gahunda y’ubuhinzi ndumburabutaka izongera umusaruro

Ashingiye ku bipimo akura mu murima we, agira ati “nari nsanzwe mpinga ibirayi, imboga n’ibigori nkoresheje uburyo busanzwe nkashyiramo ifumbire mvaruganda, ubu nikorera ifumbire y’imborera iza yunganira imvaruganda, imyunyu ngugu igihingwa gikenera tukazishakira muri ayo mafumbire, twaba dushaka ko igihingwa kigira imyungu ngugu ku kigero gitoya tukayibona, aho twezaga toni 20 ubu turahabona toni 32 kugera kuri 40.”

Ntibitura avuga ko hari ibyo yungutse mu gihe cy’umwaka wose akurikirana ishuri ryo mu murima. Ati “Icyo nungutse ni ubumenyi n’ifaranga ryiyongereye, ndimo guhinga ariko abana nzabyara nzabasigira ubutaka bwiza bufite umwimerere.”

Akomeza avuga ko ibyo yigiye mu ishuri ryo mu murima yabisangije bagenzi be, kandi ko na bo batangiye kubona inyungu yabyo, mu minsi iri imbere Abanyarwanda bakazajya babona umusaruro mwiza kandi mwinshi uvuye mu buhinzi.

Ati “ibyo namenye nabyigishije abandi, kandi umusaruro babona wariyongereye. Ikintu buri wese agomba kwishimira ni uko twiteza imbere ndetse tugahaza Igihugu no kurengera ibidukikije.”

Abahinzi bagaragaje ibyo bungutse mu gihe cy’umwaka bamaze bigira mu murima

Byukusenge Zainab, umwe mu bafashijwe kumenya amasomo yo mu murima, avuga ko ibyo yahawe byamugejeje ahantu heza.

Agira ati “Ntaragera mu ishuri sinashoboraga kumenya guhitamo imbuto nziza, sinari nzi intera umuntu akoresha atera imbuto bigatuma hari imbuto iba imfabusa, ariko ubu nzi intera nkoresha iyo ntera ibirayi, ibishyimbo nzi intera ngomba gukoresha ingana na cm 20. Ubu aho nakuraga ibiro 100 by’ibishyimbo mpakura ibiro 200, ibirayi aho nakuraga 300kg mpakura 800kg ndetse hari n’igihe hava toni imwe.”

Byukusenge Zainab avuga ko ibyiza yabonye mu buhinzi ndumburabutaka ari uko akoresha neza ifumbire yikorera, imborera n’ifumbire mvaruganda hamwe no kuvanga imyaka, bikagabanya amafaranga akoresha mu guhaha, ahubwo akongera ayo yinjiza.

Eugene Rwibasira, umuyobozi w’umuryango ‘Rwanda Development Organization’ avuga ko umushinga w’ubuhinzi ndumburabutaka ugendanye no kwigisha abaturage guhinga bakoresheje ishuri ryo mu murima, bikazamura ubutaka buhingwaho, bikongera umusaruro bigamije no gufata neza ubutaka mu kurengera ibidukikije mu turere twa Ngororero, Nyabihu, Rutsiro na Rubavu ahakunze kuboneka isuri.

Mu turere twa Ngororero, Nyabihu, Rubavu na Rutsiro abahinzi 160 bamaze guhabwa ubumenyi

Avuga ko uyu mushinga ugamije kuvugurura ubutaka bukagarura umwimerere wabwo, kandi ngo byatangiye gutanga umusaruro kuko bamaze guha ubumenyi abahinzi 160 kandi buri wese afite amatsinda agenda agizwe n’abantu bagera kuri 50, akabagezaho ibyo yize neza na we ashyira mu bikorwa.

Rwibasira avuga ko uburyo bwo kwigishiriza abahinzi mu murima bwazamuye umusaruro, bituma aho abahinzi bezaga toni 20 z’ibirayi ubu bageze kuri toni 30, hakaba n’uwagejeje kuri toni 45 akorejeje ibyo yigishijwe bijyane no kugabanya gukoresha ifumbire mvaruganda ahubwo bagakoresha ifumbire mborera kuko ari yo iboneka kandi igafata ubutaka.

Akomeza avuga ko bizatanga umusaruro mu kwihaza ku biribwa, ndetse bigire uruhare mu guhangana n’imihindagurikire y’ikirere.

Rwibasira avuga ko bifuza gushishikariza urubyiruko kubikora nk’umwuga ndetse rugahanga imirimo haba mu gukora ifumbire no kuyigeza ku bahinzi.

Umusaruro w’ubuhinzi ushobora kongerwa mu bwinshi no mu bwiza

Ati “Turimo kugerageza gutera ibikoreshwa mu gukora ifumbire nubwo dufite ubutaka butoya ariko hari ibyo dufite tudakoresha nk’ibishogori, ibisigazwa by’ibigori n’ibindi bifatwa nk’ibyonnyi kandi dushobora kubikoresha mu gukora ifumbire nka Kimbazi. Ikindi guhinga ibitunguru hagati y’indi imyaka ni byiza, kuko ibitunguru birasarurwa ariko burya binukira ibyonnyi mu murima bigatuma umuhinzi akoresha imiti mikeya.”

Abahinzi bavuga ko kwikorera ifumbire bibafasha mu buhinzi bwabo ariko ngo biragoye kuko bimwe mu byatsi bakoresha mu gukora ifumbire bitakiboneka cyane bigasaba ko babihinga, hakaba ubwo aborozi basanga babyihereye inka.

Abahinzi bamwe barashimiwe

Bamwe mu bahinzi biteguye kongera umusaruro

Hamwe mu hatashyizwe inkuta hateye impungeng abaturage

Muri Gicurasi 2023, umugezi wa Sebeya wangije ibitari bike ku nkengero zawo, ndetse wambuka n’umuhanda usenyera abaturage benshi naho abagera mu 10 batakaza ubuzima.

Hafashwe ingamba zo kwimura abatuye ku nkengero z’uyu mugezi, ubundi hatangira ibikorwa byo gukumira ingaruka zawo, aho harimo kubakwa urukuta rwa metero ebyiri rubuza amazi kongera kurenga umugezi akangiriza abawuturiye.

Ikigo cy’u Rwanda gishinzwe Ubumenyi bw’Ikirere, Meteo Rwanda, gitangaza ko itumba rya 2024 muri rusange riteganyijwemo imvura iri hejuru gato y’isanzwe igwa mu Itumba, iri hagati ya 200 mm na 700 mm mu gihugu.

Imvura iteganyijwe izaturuka ahanini ku bushyuhe bwo mu Nyanja ngari ya Pasifika bukiri hejuru muri iki gihembwe cy’Itumba 2024, bigatuma ahenshi mu karere u Rwanda ruherereyemo ndetse no mu bice byinshi by’Igihugu, hateganywa imvura iri hejuru gato y’isanzwe igwa hagati ya Werurwe na Gicurasi.

Ubuyobozi bwa Meteo Rwanda butangaza ko imyaka yabonetsemo imvura ijya gusa n’iteganyijwe mu Itumba rya 2024, ari itumba ryo muri 2010 na 2016.

Hateganyijwe imvura nyinshi mu turere tumwe na tumwe

MetehoRwanda ikomeza ivuga ko imvura iri hagati ya milimetero 600 na 700 iteganyijwe mu Karere ka Rutsiro, Amajyepfo y’Uturere twa Rubavu na Gakenke, ibice byinshi by’Uturere twa Rulindo na Gicumbi, uburengerazuba bw’Uturere twa Huye, Nyamasheke, Rusizi na Nyanza, amajyaruguru y’iburasirazuba bw’Akarere ka Nyamagabe, ibice byo hagati mu Karere ka Muhanga n’amajyaruguru y’Akarere ka Ngororero.

Imvura iri hagati ya milimetero 700 na 800 iteganyijwe mu burasirazuba bw’Uturere twa Rusizi na Nyamasheke, Amajyepfo y’Akarere ka Karongi, uburengerazuba bw’Uturere twa Nyamagabe na Nyaruguru, mu turere twa Musanze na Nyabihu, amajyaruguru n’uburengerazuba bw’Uturere twa Gakenke na Burera, amajyaruguru y’iburasirazuba bw’Akarere ka Rubavu no mu bice byo ku Ndiza muri Muhanga.

Ubuyobozi bwa Meteo Rwanda butangaza ko bitewe n’imvura nyinshi yaguye mu Muhindo (Nzeri-Ukuboza) wa 2023, igakomeza mu Rugaryi (Mutarama-Gashyantare) 2024, yatumye ubutaka busoma mu bice byinshi by’Igihugu.

Meteo Rwanda, Minisiteri y’Ibidukikije, Minisiteri ishinzwe Ibikorwa by’Ubutabazi, Ikigo cy’u Rwanda gishinzwe Iterambere ry’Ubuhinzi n’Ubworozi (RAB), barasaba inzego zose za Leta, imiryango idaharanira inyungu, imishinga itandukanye ikorera mu Rwanda, ibigo by’abikorera n’Abaturarwanda bose muri rusange, ko bakwiriye gushingira ku iteganyagihe bagafata ingamba zijyanye no gukumira ingaruka zituruka ku mvura nyinshi iteganyijwe mu Itumba rya 2024.

Ibi bigo bisaba ko hagomba kwihutishwa ibikorwa by’isarura no gufata neza umusaruro, kwita ku bikorwa byo kurwanya isuri, kwita ku bikorwa remezo birimo gusibura imigende n’imiyoboro y’amazi, gufata amazi no kuyayobora ahabugenewe, guhinga ku gihe hakurikijwe ingengabihe itangwa n’abashinzwe ibikorwa by’iyamamazabuhinzi, gufata ingamba zo kurwanya indwara n’ibyonnyi biterwa n’imvura nyinshi.

Ubuyobozi bwa Meteo Rwanda busaba Abanyarwanda kwitwararika ahakorerwa imirimo y’ubucukuzi bw’amabuye na kariyeri, kuzirika ibisenge, kubahiriza amabwiriza yo kwirinda gukubitwa n’inkuba byaba na ngombwa bakimuka ahantu hashyira ubuzima bwabo mu kaga, nko munsi y’imikingo, ahantu hahanamye no mu nzu zangiritse bigaragara ko zamaze kwinjirwamo n’amazi.

Harimo kubakwa ibiraro biri hejuru ku mugezi wa Sebeya

Abaturiye Sebeya bafite impungenge ku nkuta zirimo kubakwa

Abaturage baturiye Sebeya bavuga ko bashima imirimo yo kubaka inkuta zikumira amazi ku nkengero z’umugezi, ariko bakavuga ko bafite impungenge ko amazi ashobora kunyura ahatarubatswe.

Bitegetsimana Malachie, umuturage mu mudugudu wa Gasenyi, Umurenge wa Nyundo, agira ati “urabona ko Sebeya yubakiwe, ariko dufite impungenge ku hantu bagiye basiga, hari igihe amazi yahanyura akaba yakwangiza”.

Akomeza agira ati “Twe nk’abaturage icyo dukora ni ukurinda ibyakozwe, turinda ko hagira ubisenya, naho ibyo bakoze turabishima ndetse iruhande rw’izi nkuta tuzahatera ibiti kugira ngo byongere ubwiza bw’uyu mugezi.

Nyiranzafashwanimana Serafina wo mu Murenge wa Nyundo, avuga ko afite impungenge z’ahantu hagiye hasimbukwa ntihubakwe.

Ati “Ahubatswe ntabwo hakongera gusenyuka duhereye uko bubatse, gusa hari ahasigaye kandi ni ho ubushize hatwaye ubuzima bw’abantu. Ubu hari imifuka, amazi yongeye kuza yahanyura, na ho ahari inkuta hahangana n’amazi ya Sebeya.”

Inkuta zubatswe zitanga icyizere cyo gukumira amazi ya Sebeya

Umugezi wa Sebeya unyura mu mMrenge ya Kanama, Nyundo na Rugerero ikinjira mu kiyaga cya Kivu, nubwo hubatswe urukuta rw’amabuye rufite metero ebyeri rukumira amazi kongera gutera abaturage, hari ahagiye hasimbukwa ntihubakwe bituma abaturage bagira impungenge.

Uretse kubaka urukuta rubuza amazi kugera mu baturage, hongerewe uburebure bw’ibiraro binyurwaho n’abaturage kugira ngo bitazongera kubuza amazi gutambuka.

Imvura yaguye muri Gicurasi 2023 yasenyeye abatari bake

Impamvu za politiki ntizibuza ko ibihugu bikomeza gusangira amashanyarazi

Icyakora nubwo umwuka hagati y’u Rwanda n’u Burundi udahagaze neza, ibihugu byombi bikomeje gusangira amashanyarazi akorwa na Sosiyete Mpuzamahanga y’Amashanyarazi y’Ibihugu byo mu Biyaga Bigari (SINELAC) ikorera ku mugezi wa Rusizi, sosiyete yashinzwe n’Umuryango w’Ubukungu w’Ibihugu by’Ibiyaga Bigari (CEPGL).

Ni ikigo kimaze imyaka irenga 40 kuko cyashinzwe mu 1983 nyuma y’amasezerano yashyizweho umukono hagati y’ibihugu bigize uyu muryango wa CEPGL.

Ku mugezi wa Rusizi hari ingomero eshatu ariko intego ya SINELAC ni imikorere y’urugomero rw’amashanyarazi rwa Ruzizi II rufite ubushobozi bwo gukora Megawatt 44 ku isaha, nubwo umuyobozi w’iki kigo Fidèle Ndayisaba yabwiye Kigali Today ko urugomero rurimo gukora ku kigero cya 70% bitewe n’ibibazo bitandukanye.

Amashanyarazi akorwa na SINELAC acuruzwa mu bigo bitatu mu bihugu bigize umuryango wa CEPGL binyuze mu masosiyete y’amashanyarazi y’ibyo bihugu, arimo REGIDESO ikorera mu gihugu cy’u Burundi, SNEL muri Repubulika Iharanira Demokarasi ya Congo na EUCL mu Rwanda.

Urugomero rw’amashanyarazi rwa Ruzizi II, rwashyizwe ku mugezi wa Rusizi uhuza u Rwanda na DRC, hagamijwe kongera ingufu z’amashanyarazi mu bihugu bitatu.

Abayobozi b’ibihugu bahuza imbaraga mu kurinda ingomero za Rusizi

Fidèle Ndayisaba yabwiye Kigali Today ko ubuyobozi bwa SINELAC bukorana ibiganiro ku bihugu by’u Rwanda na DRC mu kurinda imigezi ya Rusizi ifite inganda zitanga amashanyarazi.

Agira ati “ni Ukwibutsa kuko byarateganyijwe kandi hari amategeko yo kurengera ibidukikije agomba kubahirizwa ku bibujijwe ku migezi no ku biyaga ndetse no ku nkengero zabyo, muri ibi biganiro bakibutswa igihombo giterwa no kutubahiriza amabwiriza yagenwe ku bihugu bigize umuryango wa CEPGL, hashingiwe ku ngomero z’amashanyarazi ziri ku mugezi wa Rusizi zashyiriweho Leta eshatu zirimo, u Rwanda, u Burundi na DRC.”

Mu mpera za Gashyantare 2024 imvura nyinshi yaguye mu Rwanda mu Karere ka Rusizi mu Murenge wa Nyakarenzo itera inkangu ifunga umugezi wa Rusizi bigira ingaruka ku baturage ba Repubulika Iharanira Demokarasi ya Congo (DRC) ndetse bamwe barimuka. Iyi nkangu yagize uruhare mu kwangiza umugezi wa Rusizi ukoreshwa na SINELAC mu gukora amashanyarazi.

Fidèle Ndayisaba uyobora SINELAC avuga ko iyi nkangu yabangamiye ingomero ariko hatabaye ikibazo gituma uruganda ruhagarara cyangwa ngo amashanyarazi abure.

Sosiyete ya SINELAC ikomeje gutanga amashanyarazi ku Rwanda, u Burundi na DRC

Avuga ko igitaka cyagiye mu rugomero kigafata umwanya wagenewe amazi bigatanga akazi ko kubikuramo nubwo bihenda kuko bisaba ibikoresho byishyurwa amafaranga menshi akenera imashini zitumizwa hanze kugira ngo zikuremo icyo cyondo.

Urugomero rwabangamiwe ni Ruzizi II ikaba ifite ubushobozi bwo gukora Megawatt 44 ku isaha nubwo rusanzwe rukora ku kigero cya 70%.

Ndayisaba avuga ko inkangu zikomeje byagira ingaruka ku rugomero rw’amashanyarazi, ariko akavuga ko hari ubwirinzi inganda zisanganywe mu kurinda ibyondo bijya mu nganda.

Ndayisaba avuga ko abaturage baturiye umugezi wa Rusizi ku ruhande rw’u Rwanda na DRC basabwa kubahiriza amabwiriza yagenewe kubungabunga imigezi kuko iyo ibikorwa byabo bigize ingaruka ku rugomero, byangiza amashanyarazi yoherezwa muri ibyo bihugu bitatu bigize umuryango wa CEPGL.

Urugomero rw’amashanyarazi rwa Ruzizi II rutanga amashanyarazi mu bihugu by’u Burundi, u Rwanda na DRC

Bilariziyoze ikomeje kugaragara mu Rwanda aho Abanyarwanda 41% barwaye inzoka, ndetse bikaba byaramenyekanye ko ikwirakwira binyuze mu kwituma ku gasozi no gukwirakwiza umwanda wo mu musarane, ukoreshwa mu buhinzi nk’ifumbire yo mu bwiherero.

Hitiyaremye Nathan, Umukozi muri RBC ushinzwe isuku n’isukura hagamijwe kurwanya no gukumira indwara zititabwaho uko bikwiye, yabwiye Kigali Today ko amagi y’inzoka ya Ascaris ashobora kumara imyaka itanu atarapfa.

Agira ati “Abantu bakoresha ifumbire yo mu bwiherero bashobora gukwirakwiza inzoka ya Ascaris bibwira ko barimo gukoresha ifumbire mu kongera umusaruro, ariko amagi y’inzoka aba arimo gukwirakwira kuko ashobora kumara imyaka itanu atarapfa.”

Akomeza avuga ko iyo abantu bakoresheje iyi fumbire, amagi y’inzoka ya Ascaris imvura iyo iguye atarukira ku bimera, abantu babisarura bakayajyana mu rugo. Iyo batabisukuye neza abinjiramo, iyo imvura iguye amagi atembanwa n’amazi akajya mu bishanga, abahinzi bahinga akabinjiramo

Inzoka ya belariziyoze yabonetse mu kiyaga cya Muhazi

Hitiyaremye avuga ko ubushakashatsi bwakozwe bwagaragaje ko inzoga ya belariziyoze iba mu mazi y’ikiyaga cya Muhazi, icyakora ngo ntiyakwemeza ko iba mu mazi yose y’ikiyaga.

Agira ati “ahamaze kumenyekana ni ikiyaga cya Muhazi, ariko ntitwakwemeza ko ari mu mazi yose y’ikiyaga, ariko ubushakashatsi bwabonye ko muri ayo mazi ibamo.”

Hitiyaremye avuga ko ubushakashatsi bukomeje no mu bindi biyaga kugira ngo Abanyarwanda bamenye aho iri bayirinde.

Agira ati “Inzoka ya belariziyoze ni mbi kuko igira ingaruka ku bukerarugendo, iyo mukerarugendo amenye ko iri mu mazi y’ikiyaga aragikikira, turasaba abaturage gukumira inzira inyuramo ikwirakwira.

Hitiyaremye avuga ko inzoka ya Belariziyoze ibangamiye ubukerarugendo kuko iboneka mu bishanga, kuko abahinga mu bishanga ibinjiramo, abajya koga mu biyaga na bo barayandura.

U Rwanda ruhanganye n’indwara 21 zititabwaho harimo n’inzoka zo mu nda, hakaba hari intego ko muri 2030 u Rwanda rwaba ruzigejeje ku gipimo kiri hasi.

Aho abarwara inzoka zo mu nda baba bari munsi ya 20% bavuye kuri 41%, cyakora hari urugendo rurerure kuko hari uturere abarwayi b’inzoka bari hejuru ya 60%.

Ubuyobozi bwa RBC butangaza ko kugabanya indwara y’inzoka buzabigeraho bukoresheje gutanga ibinini by’inzoka, aho bizajya bitangwa kabiri mu mwaka ariko mu turere byagaragaye ko uburwayi bw’inzoka buri hejuru ya 60% hazajya hatangwa ikinini cy’inzoka rimwe mu mezi atatu.

Ni imyigaragambyo bakoze mu ituze, bavuga ko ubuzima babayemo busharira, bifuza amahoro mu gihugu cyabo bagataha.

Benshi mu bahungiye mu Rwanda bavuga ko batangiye guhunga nyuma y’uko bamwe bo mu miryango yabo batangiye kwicwa bazira kuba ari Abatutsi, abandi bahunze nyuma yo guhigwa bikomeye ndetse bagatwarirwa imitungo.

Shukuru Clarisse, umubyeyi w’abana bane, yahungiye mu Rwanda avuye muri Teritwari ya Rutshuru. Avuga ko yahunze mu Kwakira 2023 nyuma y’uko umugabo we wari mu bwoko bw’Abatutsi abagize umutwe wa Wazalendo na FDLR bamusanze mu nzu bakamukorera iyicaruhozo barangiza bakamutwara.

Shukuru Clarisse, umubyeyi w’abana bane wavuye ahitwa Kiwanja muri Rutshuru

Ati “Binjiye mu nzu bavuga ko baje gushaka umwanzi, ababajije icyo bashaka bahita batangira kumukubitira imbere y’abana bamushinja kuba Umututsi. Bamupfutse igitambaro mu maso baramutwara ntitwongeye kumenya iherezo rye. Uko iminsi ishira naramushakishije ndaheba, ahubwo Wazalendo bagahora bansura mpitamo guhungisha abana."

Shukuru n’abana be bane bari mu nkambi ya Nkamira aho avuga ko ubuzima budahagaze neza.

Ati "Ubuzima hano ntibumeze neza, turasaba imiryango mpuzamahanga kudukorera ubuvugizi Jenoside ikorerwa Abatutsi igahagarara, tugashobora gusubira iwacu. Aha turafashwa ariko ntitubayeho neza nk’uko twari tubayeho iwacu."

VIDEO: Sifa Clarisse ni Umunyecongo🇨🇩 uba mu nkambi ya Nkamira - @RubavuDistrict, akaba n'umubyeyi w'abana bane. Mu kiganiro yagiranye na mugenzi wacu @sebuharara, yavuze ko yahungiye mu #Rwanda muri 2023 avuye i Rutshuru. Ngo ni nyuma y'uko abagize imitwe ya #Wazalendo na #FDLR… pic.twitter.com/1O0XyV2Lty

— Kigali Today (@kigalitoday) March 4, 2024

Bamwe mu mpunzi bari mu nkambi ya Nkamira bavuga ko ubwicanyi bakorerwa bumaze imyaka myinshi kuva mu 1994, ubwo abasize bakoze Jenoside yakorewe Abatutsi mu Rwanda bahungiraga mu yahoze ari Zaïre.

Bagira bati "Jenoside yakorewe Abatutsi mu Rwanda yarahagaritswe ikomerezwa muri Congo. FDLR zimaze igihe zica Abatutsi zibatwara n’ibyabo, nyamara Leta irarebera ntacyo ikora, ahubwo yabahaye ibikoresho, ibashyira muri Wazalendo. Yabahaye ubushobozi bwo kutwica bitwaje intambara ya M23. Turasaba Leta ihagarike Jenoside dukorerwa, dushobore gusubira mu byacu."

Mu bikorwa byo kwamagana Jenoside ikorerwa Abatutsi muri Repubulika Iharanira Demokarasi ya Congo, impunzi ziri mu nkambi ya Nkamira zigira ziti "Twamaganye Jenoside ikorerwa Abatutsi muri Kivu y’Amajyaruguru, Abanyamulenge muri Kivu y’Amajyepfo hamwe n’Abahema muri Ituri."

U Rwanda rucumbikiye impunzi z’Abanyekongo barenga ibihumbi 80 bacumbikiwe mu nkambi ya Nkamira mu Karere ka Rubavu, Kigeme mu Karere ka Nyamagabe, Kiziba mu Karere ka Karongi, Mahama mu Karere ka Kirehe na Nyabiheke mu Karere ka Gatsibo.

Inkambi ya Nkamira icumbikiye impunzi z’Abanyekongo ibihumbi 6, naho abamaze kuyinyuramo ni ibihumbi 14.

Raphael Rusangiza (uri hagati)

Raphael Rusangiza uvuka i Masisi avuga ko bakorewe Jenoside inshuro nyinshi ariko ubu bigeze ku rwego rwo kubamaraho.

Yagize ati "Uko utubona aha turi abacikacumu, abasigayeyo ntabwo bazarokoka. Tshisekedi ntashaka ko Abatutsi babaho kandi ahanini akoresha FDLR yavuye mu Rwanda imaze abantu. Si ubwa mbere duhunze kuko mu myaka irenga makumyabiri ishize twahungiye i Mudende, abacengezi nabwo batwicamo abarenga ibihumbi bibiri,. Turasaba imiryango mpuzamahanga guhagarika jenoside irimo gukorerwa abatutsi muri Repubulika Iharanira Demokarasi ya Congo."

VIDEO: Impunzi z’Abanyecongo zibarizwa mu nkambi ya Kiziba iherereye muri @KarongiDistr zirasaba ubutegetsi bwa Repubulika iharanira Demokarasi ya Congo🇨🇩, abacanshuro ndetse n’ibihugu bibashyigikiye guhagarika Jenoside ikomeje gukorerwa Abatutsi bo muri Nord Kivu, Abanyamulenge… pic.twitter.com/bchphF4chu

— Kigali Today (@kigalitoday) March 4, 2024

VIDEO: Impunzi z’Abanyecongo zibarizwa mu nkambi z’impunzi za Nkamira muri @RubavuDistrict na Kiziba iherereye muri @KarongiDistr zazindukiye mu myigaragambyo y’amahoro mu rwego rwo kwamagana Jenoside ikorerwa Abatutsi bo muri Kivu ya ruguru, Abanyamurenge bo muri Kivu y’epfo… pic.twitter.com/rq4JYw0vJs

— Kigali Today (@kigalitoday) March 4, 2024

Reba ibindi muri iyi video:

Video: Eric Ruzindana

Igisirikare cya Afurika y’Epfo (SANDF), gitangaza ko tariki ya 29 Gashyantare 2024, abasirikare b’iki gihugu bari mu butumwa bw’akazi bwa MONUSCO muri DRC, umusirikare yarashe mugenzi we na we arirasa.

Aba basirikare barasanye mu gihe muri uku kwezi abandi basirikare babiri baje mu butumwa bw’akazi muri DRC, barashwe n’abarwanyi ba M23 baragapfa.

Leta ya Afurika y’Epfo isanzwe ifite ingabo zoherejwe mu butumwa bw’akazi muri MONUSCO, hakaba n’abandi 2900 boherejwe mu butumwa bwa SADC mu gufasha Leta ya Kinshasa kurwanya inyeshyamba za M23, zikikije umujyi wa Sake ndetse bakaba baramaze kugota umujyi wa Goma, no gufunga umuhanda uhuza uwo mujyi n’uwa Bukavu.

Leta ya Afurika y’Epfo yateganyije gukoresha Miliyoni 100 z’Amadolari mu rugamba rwo kurwanya M23 muri DRC.

Tariki ya mbere Werurwe 2024, Abakuru b’ingabo mu bihugu bya Afurika y’Epfo, Malawi, Tanzania, u Burundi na DRC, baherekejwe n’ibimodoka by’imitamenwa bya FARDC na SADC, basuye umujyi wa Sake umaze igihe uberamo imirwano kugira ngo barebe uko urugamba ruhagaze, n’icyakorwa kugira ngo bashobore gusubiza inyuma abarwanyi ba M23.

Josep Borrell Fontelles, Umuyobozi Mukuru ushinzwe Ububanyi n’Amahanga mu Muryango w’Ubumwe bw’u Burayi (EU)

Josep Borrell Fontelles yabwiye abagize Inteko Ishinga Amategeko y’u Burayi ko Umuryango w’ubumwe bw’ibihugu by’i Burayi ubabajwe no kwiyongera kw’abasirikare no kwiyongera kw’ihohoterwa mu Burasirazuba bwa Repubulika Iharanira Demokarasi ya Congo (DRC) n’ingaruka biri kugira ku baturage.

Akomeza avuga ko kwiyongera kw’ibikorwa by’ihohoterwa n’urugomo byatumye abaturage benshi bava mu byabo kandi ntibabona uko bagezwaho ubutabazi, ndetse ibikorwa by’ihohoterwa bikaba bigira ingaruka ku burenganzira bwa muntu n’amategeko mpuzamahanga arengera ikiremwamuntu ntiyubahirizwe.

Avuga ko Umuryango w’ubumwe bw’ibihugu by’Uburayi wongereye ubushobozi mu gutabara abari mu kaga ndetse utanga miliyoni 100 z’amayero mu 2023, ariko benshi mu bagirwaho ingaruka n’intambara ntibagerwaho n’ubutabazi bitewe n’imirwano ikomeje kwiyongera.

Agira ati “Twifatanyije n’umuyobozi wa komisiyo y’umuryango wa Afurika Yunze Ubumwe, Moussa Faki Mahamat watangaje tariki 21 Gashyantare 2024 ko nta gisubizo cya gisirikare cyakemura iki kibazo.”

Akomeza agira ati “Uburyo bw’ibiganiro bya politiki byuzuye bishobora gukemura ibibazo by’umutekano muke kandi byakorwa mu gushyira mu bikorwa ibyemezo byafashwe n’inama ya Luanda na Nairobi mu kubahiriza ubusugire, ubumwe n’ubuhahirane mu bihugu bigize Akarere.”

Umuryango w’ubumwe bw’ibihugu by’i Burayi ukomeje kwamagana ibikorwa by’imitwe yose yitwaje intwaro ikorera mu Burasirazuba bwa DRC, ugasaba imitwe yitwaza intwaro guhagarika imirwano.

Leta ya Kinshasa isabwa guhagarika inkunga n’ubufatanye n’umutwe wa FDLR n’indi mitwe yitwaje intwaro, igaharanira kurinda abaturage bayo, ndetse ubuyobozi bwa DRC bukagenzura ko amabwiriza yahaye FARDC yo kwitandukanya na FDLR yubahirizwa.

Umuryango w’ubumwe bw’ibihugu by’Uburayi usaba ko imvugo zihembera urwango n’ivangura ry’amoko zihagarara kuko zifatwa nka nyirabayazana wa Jenoside yakorewe Abatutsi igiye kwibukwa ku nshuro ya 30.

Umuryango w’ubumwe bw’ibihugu by’Uburayi wabitangaje mu gihe Perezida Félix Tshisekedi yari ku mugabane w’i Burayi mu gihugu cy’Ububiligi aho yagiye gusaba ko amasezerano u Rwanda rwagiranye n’ Umuryango w’ubumwe bw’ibihugu by’Uburayi ateshwa agaciro.

Umuryango w’ubumwe bw’ibihugu by’Uburayi uvuga ko amasezerano wagiranye n’u Rwanda mu guteza imbere ubucukuzi bw’amabuye y’agaciro azibanda ku mahame yashyizweho arimo kugenzura inkomoko y’amabuye y’agaciro no gukorera mu mucyo, hamwe no kurwanya icuruzwa ry’amabuye y’agaciro rinyuranyije n’amategeko.

Josep Borrell avuga ko uretse kuba aya masezerano barayagiranye n’u Rwanda, bayasinye na DRC.

Agira ati “Twasinye amasezerano mu guteza imbere ubucukuzi bw’amabuye y’agaciro na DRC n’u Rwanda, ni ubushake dufite mu gufasha Akarere k’Ibiyaga bigari mu gukemura ikibazo cy’amabuye y’agaciro mu nyungu z’ibihugu n’abatuye Akarere.”

U Rwanda ntirwigeze rwitambika ku masezerano Umuryango w’ubumwe bw’ibihugu by’Uburayi wagiranye na DRC ariko yo ikomeje kugaragaza ko ayo wagiranye n’u Rwanda adakwiye, mu gihe ubufatanye mu guteza imbere ubucukuzi bw’amabuye y’agaciro buzibanda ku kugaragaza inkomoko yayo.

Perezida Félix Tshisekedi avuga ko amasezerano adakwiye ahubwo u Rwanda rugomba gufatirwa ibihano, akarushinja kwiba umutungo kamere w’igihugu cye.

Agira ati “Nishimiye uruhande ruhagazwemo n’Ububiligi rwibaza kuri aya amasezerano kuko azagenzura inkomoko y’amabuye y’agaciro n’inzira anyuzwamo, kandi twizera ko bizaboneka ko akurwa muri DRC amasezerano agahagarara.”

Amasezerano yasinywe hagati y’u Rwanda n’ Umuryango w’ubumwe bw’ibihugu by’Uburayi yasinywe hagati ya DRC n’uyu muryango mu Kwakira 2023, akaba azafasha uyu muryango kumenya ukuri ku mabuye ava mu Karere k’ibiyaga bigari no gukuraho urwicyekwe n’ibirego bishingiye ku mutungo kamere.

Kuva mu 2012 u Rwanda rugendera ku mabwiriza ya Minisitiri No 002/2012 agena uburyo bw’iyubahirizwa ry’ubuziranenge bw’amabuye y’agaciro mu karere k’ibiyaga bigari mu kubahiriza amasezerano ku Mutekano, Umutuzo n’Iterambere mu Karere k’Ibiyaga Bigari, yashyizweho umukono i Nairobi ku wa 15/12/2006 nk’uko yemejwe n’Iteka rya Perezida no 44/01 ryo ku wa 15/11/2007.

Amabuye y’agaciro arebwa akaba ari gasegereti, wolufuramu, koluta na zahabu agomba gucukurwa, gucuruzwa, koherezwa mu mahanga no kwinjira mu gihugu ari uko yubahirije amahame shingiro yose n’uburyo yubahirizwa nk’uko yashyizweho n’Inama Mpuzamahanga mu Karere k’Ibiyaga Bigari (ICGLR).

Nyamara ni ko Karere mu myaka itatu ishize abagatuye bahuye n’ibibazo byo kubura isoko ry’umusaruro, ndetse n’ubu bamwe bavuga ko bafite ikibazo cy’indwara bita Sembeshyi, ikomeje kwangiza ubuhinzi bw’ibirayi mu Mirenge ya Mudende, Bugeshi na Busasamana.

Bamwe mu bavuganye na Kigali Today, bavuga ko byatewe n’uko abafatanyabikorwa mu buhinzi babegereye mu kubagezaho imbuto n’inyongeramusaruro, ndetse n’isoko ry’umusaruro ribonekera igihe.

Serivisi z’ubuhinzi zishimwa ku gipimo cya 63.2%, igipimo cyarazamutse kivuye kuri 61.1% mu bushakashatsi bwari bwakozwe 2022, naho abagabo bashima serivisi z’ubuhinzi ku gipimo cya 63.4% mu gihe abagore bazishima ku gipimo cya 63.0%.

Serivisi z’ubuhinzi zitanzwe neza zifasha igihugu kwihaza mu biribwa, ndetse zigafasha segiteri y’ubuhinzi kongera ubungu mu gihugu n’ibyoherezwa hanze y’Igihugu.

Abanyarwanda bagaragaza ko uru rwego rw’ubuhinzi rufite ibibazo byinshi birimo; imihindagurikire y’ikirere, indwara z’ibihingwa, inganda zitunganya umusaruro zidahagije, ihuza n’ikurikiranabikorwa ridahagije, ubukangurambaga butagera kuri bose, ubuziranenge bw’umusaruro butitabwaho hamwe n’ibikorwa remezo bidahagije.

Izi mbogamizi zituma hari aho umusaruro uboneka udahagije, ariko hari n’aho uboneka ntushobore kugera ku isoko, abahinzi bakabihomberamo.

RGB igaragaza ko abaturage bakora ubuhinzi babajijwe uko babona serivisi z’ubuhinzi, zakoreweho ubushakashatsi arizo kubona imbuto ku gihe, kubona inyongeramusaruro ku gihe, kubona imbuto n’inyongeramusaruro bihagije, kubona imiti y’ibihingwa ku gihe, isoko ry’umusaruro, kurwanya indwara z’ibihingwa, ubuhunikiro rusange bw’umusaruro, ubwanikiro rusange bw’umusaruro, gutunganya no kongerera agaciro ibikomoka ku buhinzi, kuhira imyaka no gukoresha imashini zihinga.

Uko uturere duhagaze mu gushima serivisi z’ubuhinzi

Ubushakashatsi bwerekana ko abagabo ari bo benshi mu cyiciro cy’abikorera, mu gihe abagore biganje mu cyiciro cy’abakorera abandi, bikaba biterwa n’uko abagore badafite uburenganzira busesuye ku butaka bwo guhinga ugereranije n’abagabo.

Benshi mu Banyarwanda bakora imirimo yerekeranye n’ubuhinzi, 84.2% ntibarengeje amashuri abanza barimo 15.4% b’urubyiruko (18-30).

Zimwe muri serivisi zifite intege nke mu buhinzi harimo gukoresha imashini, aho 68% bagaragaza ko batazishimira, kuhira imyaka 71% na bo bagaragaza ko zitabanyura mu gihe zishimwa na10.4%.

Abakora muri servisi z’ubuhinzi 66%, bagaragaza ko servisi z’ubuhunikiro zikiri hasi mu gihe 20.3% bazishimira, naho servisi z’ubwanikiro bunengwa ku gipimo cya 64.6%, abazishima bari kuri 22.6%.

Serivisi yishimiwe mu buhinzi kurusha izindi irebana n’isoko ry’umusaruro, aho yishimiwe ku kigero cya 65.2% bitewe n’izamuka ry’ibiciro ku isoko, naho 33.2% bagaragaza ko batayishimiye.

Bimwe mu byifuzo bigaragazwa n’abahinzi birimo gukomeza ingamba zo kunoza imicungire n’imikoreshereze y’inyongeramusaruro, gukumira no kurwanya indwara z’ibihingwa, kunoza imikorere no kongera inganda zitunganya umusaruro w’ibikomoka ku buhinzi, kunoza imikorere yo gufasha abahinzi kubona imashini zikoreshwa mu buhinzi no mu kuhira imyaka, hamwe no kunoza imicungire y’umusaruro n’isoko ryawo.

Akarere ka Rubavu

Akarere ka Rubavu kaje ku mwanya wa mbere mu gushima serivisi z’ubuhinzi ku gipimo cya 75.2%, mu mwaka wa 2022 kari kagize igipimo cya 50.6%, naho Akarere ka Musanze kagize igipimo kiri hasi n’amajwi 52.7%, mu mwaka wa 2022 kari gafite igipimo cya 59.6%.

Akarere ka Gisagara kari ku mwanya wa mbere n’igipimo cya 78.7%, ubu cyaramanutse kigera kuri 66.5%.

Ambasaderi wa Algeria aganira na Minisitiri w’Ububanyi n’Amahanga wa DRC

Itangazo rya Minisiteri y’Ububanyi n’amahanga muri DRC ryashyizwe kuri X, rigira riti “Ambasaderi wa Algeria i Kinshasa, Mohamed Yasid Bouzid yakiriwe mu biro bya Minisitiri w’Intebe wungirije ushinzwe ububanyi n’amahanga, Christophe Lutundula, kugira ngo atange ibisobanuro ku rugendo rw’umugaba w’ingabo za Algeria, yagiriye mu Rwanda tariki 20 Gashyantare 2024.”

Tariki 19 Gashyantare 2024, Gen Saïd yageze mu Rwanda, ahura n’Umugaba w’Ingabo z’u Rwanda, Gen Mubarakh Muganga.

Gen Saïd Chanegriha, yahuye na Minisitiri w’Ingabo Juvenal Marizamunda, ndetse abwira itangazamakuru ati “Byari ngombwa ko dushaka uburyo butandukanye twagiriramo ubufatanye, kugira ngo dukemure ibibazo biri imbere, dutekereza ku bibangamiye Afurika n’uturere duturanye. Ibiganiro byacu birakomeje, kandi muri uru ruzinduko imikoranire yacu irongererwa imbaraga."

Ubwo Ambasaderi wa Algeria yagiriraga uruzinduko mu Rwanda

U Rwanda rufitanye umubano n’igihugu cya Algeria ndetse muri Kanama 2023, Perezida Paul Kagame yakiriye Ambasaderi wa Algeria mu Rwanda, ufite icyicaro i Kigali ari we Mohamed Mellah.

Ambasaderi wa Algeria mu Rwanda, Mohamed Mellah, yagaragaje ko yishimiye kuba agiye kugira uruhare mu kwagura ubufatanye n’umubano mwiza, usanzwe uri hagati y’igihugu cye n’u Rwanda.

Leta ya Kinshasa ikomeje kwangiza isura y’u Rwanda, harimo no kugaragaza kutishimira ko umubano mwiza rufitanye n’ibindi bihugu.

Urugero ruherutse ni amasezerano yasinywe hagati y’u Rwanda n’Umuryango w’Ubumwe bw’Ibihgu by’u Burayi (EU), agamije guteza imbere ubucuruzi bw’amabuye y’agaciro, nabwo uhagarariye uyu muryango muri DRC agahita ahabamazwa mu biro bya Minisitiri w’Ububanyi n’amahanga igitaraganya, gusobanura kuri ayo masezerano, akabwirwa ko u Rwanda nta mabuye y’agaciro rugira, ahubwo ayo rugurisha ruyakura muri DRC.

General Saïd Chanegriha yahuye na Minisitiri w’Ingabo w’u Rwanda

Icyakora uhagarariye EU muri DRC, Nicolas Berlanga Martinez, yatangaje ko amasezerano u Rwanda rwagiranye n’uwo muryango azafasha mu kugaragaza inkomoko y’amabuye y’agaciro akurwa mu Rwanda, naho ku bibazo byo kugarura amahoro mu karere, avuga ko bikwiye gucishwa mu biganiro.

Abarwaye impyiko bishimiye ko bazajya babasha kwivuza bifashishije Mituweli

Gasana Gallican, umuyobozi ushinzwe ubukangurambaga muri RSSB mu kiganiro aherutse kugirana na KT Radio, yatangaje ko hari amavugururwa mu gufasha abantu bafite indwara zidakira zirimo impyiko na kanseri.

Yagize ati “Dusanzwe dutanga serivisi za kanseri hakoreshejwe mituweli hifashishijwe ibitaro bya kanseri bya Butaro, naho abarwayi b’impyiko bitabwaho kugera mu bitaro bya King Faisal harimo no kuzihindura.”

Gasana avuga ko abarwayi b’impyiko basanzwe bakorerwa serivisi yo kuyungurura amaraso, bigakorwa bigenwe n’umuganga ubakurikirana, ariko ngo n’abantu batarwaye impyiko ku rwego rwa burundu bashobora gufashwa.

Izindi mpinduka ziri mu itegeko ririmo gukorwa ni ukwemerera abakoresha mituweli bahinduriwe impyiko kugura imiti bakoresheje mituweli, ibintu byari bisanzwe bigoye abarwayi b’impyiko.

Jeannette Musabwasoni ufite imyaka 28 avuga ko yashoboye guhindura impyiko abifashijwemo na Minisiteri y’Ubuzima. Icyakora nubwo benshi bazi ko guhindura impyiko ari ukongera kubona ubuzima, avuga ko nabwo umurwayi agorwa no kubona ubushobozi bwo kubona imiti aba agomba gufata buri munsi.

Aganira na Kigali Today, yagaragaje uburyo umurwayi w’impyiko nibura ku munsi akenera amafaranga atari munsi y’ibihumbi umunani by’imiti agomba gufata, kandi iyo miti akazayifata ubuzima bwe bwose.

Abakoresha ubundi bwisungane mu kwivuza nka RAMA cyangwa MMI n’ibindi bigo hari igihe bafata imiti igera ku bihumbi 12 ku munsi, cyakora umurwayi wivuriza kuri Mituweli we aba agomba gushaka nibura imihumbi 8 byo kugura imiti ku munsi.

Agira ati “impyiko ni indwara ibabaza ariko ihenda, nk’ubu nkenera nibura amafaranga agera ku bihumbi 8 yo kugura imiti, kandi iyo miti uyikoresha ubuzima bwawe bwose, urumva iyo udafite ubwishingizi uburyo biguhenda.”

Avuga ko kuba ikigo cya RSSB cyaratangaje ko iyi miti bazajya bayifata bunganiwe na mituweli ari ubufasha bukomeye buzatuma bamwe bashobora gucuma iminsi.

Agira ati “ubundi umurwayi w’impyiko ibintu akenera iyo agaragaye ko arwaye ni ukumufasha kuyungurura amaraso, ariko iyo impyiko yangiritse burundu bisaba kuyihindura. Ni ibintu bisaba ubushobozi buhenze, cyakora turashima ko ubu bisigaye bikorerwa mu Rwanda mu bitaro bya Faisal. Iyo umaze guhindura impyiko hari imiti uba ugomba gufata buri munsi igurwa amafaranga atari munsi y’ibihumbi umunani, na yo iyo utayibonye ushobora kubura ubuzima.”

Abarwayi b’impyiko baganiriye na Kigali Today bavuga ko bakoroherezwa gukoresha ibizami bya dialyse kuko bibahenda, bagasaba ko ugaragaye ko impyiko zangiritse burundu batamugenera inshuro 18 nk’uko bisanzwe ahubwo akomeza gufashwa nk’uko abakoresha ubundi bwishingizi bafashwa.

Marie Chantal Byukusenge ukoresha RAMA avuga ko we akoresha amafaranga yo kugura imiti nibura ibihumbi 12 ku munsi, bivuze ko yiyishyurira 100% yajya asabwa nibura ibihumbi 360 ku kwezi, ibintu bitamworohereza, agashima ko abakoresha ubwisungane mu kwivuza bwa Mituweli na bo batekerejweho.

Byukusenge avuga ko hari abarwayi b’impyiko bashoboye kuzisimbuza ariko kubera kubura ubushobozi bwo kugura imiti ya buri munsi bagapfa. Kuba imiti izajya yishyurwa hariho nkunganire ya Mituweli bikaba ngo hari abo bizarinda gupfa.

Nubwo Gasana Gallican, umuyobozi ushinzwe ubukangurambaga muri RSSB atatangaje ibiri mu itegeko ririmo kuvugururwa, ubuyobozi bw’iki kigo bwagaragaje ko bukomeje kongera serivisi buha abagenerwabikorwa babo.

Mu ntangiriro z’ukwezi kwa Gashyantare 2024, Minisitiri w’Ubuzima, Dr Nsanzimana Sabin, yasobanuye ko hari indwara zari zisanzwe zivurirwa hanze y’Igihugu bikagora abakoresha ubwisungane mu kwivuza, ariko ubu zisigaye zivurirwa mu Rwanda, harimo kuvura kanseri n’impyiko ndetse n’abakoresha ubwisungane mu kwivuza bakaba bafashwa.

Yagize ati “Hari urutonde rushya mu bijyanye n’insimburangingo zihenze n’inyunganirangingo, hari n’urutonde rw’imiti mishya ya kanseri n’izindi ndwara zikomeye umuntu atabashaga kwivurizaho harimo nko gusimbuza impyiko, kubaga umutima kuko zivurizwaga hanze n’ubundi bitakorerwaga ku bwisungane mu kwivuza.”

Akomeza agira ati “Ubu birimo gukorerwa mu Rwanda bigomba kujyana na serivisi zishyurwa n’abanyamuryango ba Mituweli hano mu Rwanda. Nko gusimbuza impyiko, ubu turi muri gahunda yo kuyishyira muri Mituweli.”

Ku kigendanye n’igikorwa ku miti ikenerwa n’abageze mu zabukuru itabasha kuboneka muri Farumasi n’ibitaro bya Leta, Minisitiri w’Ubuzima yavuze ko nubwo ubushobozi bwa Mituweli bukiri buke, kuri ubu urutonde rw’ibyishyurwa rwavuye kuri 887 rukaba rugeze ku 1400 mu mwaka wa 2024.

Sembeshyi ni indwara yitiriwe umuturage mu Murenge wa Mudende mu Karere ka Rubavu. Ni indwara ifata ibirayi nyuma y’ukwezi bimaze guterwa, bikagaragara nk’ibihindura amababi ndetse agahindura ibara nk’aho byeze, nyamara wabikura ugasanga nta kintu kiriho.

Bamwe mu baturage bahinga ibirayi mu mirenge ya Bugeshi na Busasamana mu Karere ka Rubavu bavuga ko ari indwara imaze imyaka igera muri itatu, ikaba ngo ikomeje kubatera igihombo kuko umurima yagezemo nta musaruro bakuramo.

Ibirayi byafashwe na Sembeshyi bigaragara nk’ibyeze kandi ari ukubabuka

Pierre-Célestin Dusabimana, umuhinzi w’ibirayi mu Murenge wa Busasamana, yabwiye Kigali Today ko iyo ndwara yayirwaje mu murima ndetse iramuhombya. Yagize ati “Iyo yageze mu murima ntacyo ukuramo kuko aho ugomba gusarura toni eshanu hari n’igihe ubura imbuto.”

Dusabimana avuga ko abashinzwe ubuhinzi bamubwiye ko kugira ngo ishobore gukira bagomba gusimburanya ibihingwa, none bamwe mu bahinzi ahahingwa ibirayi batangiye kuhahinga ibijumba.

Ndayazi Augustin utuye mu Murenge wa Bugeshi avuga ko indwara y’ibirayi ya Sembeshyi yabahombeje kandi imaze imyaka igera muri itatu, akavuga ko bari bazi ko iterwa n’uburwayi bw’ubutaka.

Agira ati “Iyo yageze mu murima ntacyo ukuramo. Twari tuzi ko iterwa n’uburwayi bw’ubutaka, abandi bakatubwira ko iterwa n’ifumbire cyangwa imbuto mbi, gusa yagiye ikomeza kwigaragaza.”

Venerand Mbarushimana, umukozi ushinzwe ubuhinzi mu Murenge wa Bugeshi, avuga ko Sembeshyi atari indwara ahubwo ari ikibazo kimaze imyaka igera muri itatu bitewe n’imbuto irwaye cyangwa ibura ry’imyunyungugu mu butaka.

Agira ati “Biterwa no gutera imbuto itameze neza cyangwa igihingwa kikabura imyungu ngugu bigatuma kimera nk’ikibabuka.”

Mbarushimana avuga ko uburyo bwiza bwo kwirinda iyo ndwara ari ugutera imbuto nziza hamwe no gukoresha ifumbire nziza y’imborera igejeje igihe cyo gukoreshwa.

Kuba hari abahinzi bavuga ko Sembeshyi yatumye bareka guhinga ibirayi bakajya guhinga ibijumba, ubuyobozi bw’Akarere ka Rubavu butangaza ko butari buzi iki kibazo kuko bugendera ku bumenyi bwa Siyansi kandi bukaba bwari butarabona amakuru.

Mulindwa Prosper, Umuyobozi w’Akarere ka Rubavu, ubwo yaganiraga n’umunyamakuru wa Kigali Today, yamubwiye ko bari batarabona amakuru, ariko ko bagiye kubikurikirana bafatanyije n’abahanga mu buhinzi.

Akarere ka Rubavu kari mu turere duhinga cyane ibirayi, aho abaturage bageze ku rwego rwo gusarura toni 45 kuri hegitari.

Telefone ifasha benshi muri serivisi zitandukanye

U Rwanda rukomeje guteza imbere ikoranabuhanga kandi itumanaho ni imwe mu nzira ifasha Abanyarwanda kwihuta mu iterambere.

Telefoni zigendanwa uretse kwitaba no guhamagara, zikora akazi kenshi gatandukanye harimo kubitsa no kubikuza, kwigisha, henshi zasimbuye televisiyo n’amazu y’isomero, zikoreshwa nka radiyo, mu gihe ahandi zifasha abahinzi kumenya amakuru y’imihindagurikire y’ikirere no kumenya uko ibiciro bihagaze ku isoko.

Ibarura rusange ryakozwe mu 2022 ryagaragaje ko abanyarwanda bangana na 78.1% batunze telefoni, mu gihe mu mwaka wa 2012 abari batunze telefoni bari 54.1 naho mu 2002 abari batunze telefoni bari 2.3%.

Nubwo telefoni ikoreshwa byinshi bitandukanye, ibarura ryagaragaje ko Abanyarwanda bakoresha Internet muri 2022 bari 22.8%, kandi abenshi baboneka mu mujyi wa Kigali bangana na 54%, Amajyepfo abakoresha internet bari 16.1%, Intara y’Iburengerazuba 17.1%, Intara y’Amajyaruguru 17.2% naho Intara y’Iburasirazuba ni 18.6%.

Ubugenzuzi busanzwe bukorwa n’urwego rw’Igihugu rushinzwe Imiyoborere RGB, mu Kuboza 2023 bwagaragaje ko mu Rwanda Akarere ka Kicukiro ari ko kaza ku mwanya wa mbere mu gukoresha ikoranabuhanga ku ijanisha rya 82% kavuye kuri 81.7% muri 2022, Akarere ka Rubavu kaza ku mwanya wa kabiri na 81.1% kavuye kuri 72.7% naho Akarere ka gatatu ni Nyarugenge ifite 80.9% ivuye kuri 83%.

Mu gihe uturere dutanu turi inyuma ari Bugesera ifite 69.1% ivuye kuri 74.1% muri 2022, Ngororero ifite 66.8% ivuye kuri 72.8%, Musanze ifite 65.8% ivuye kuri 74.2% muri 2022, Gatsibo 63.4% ivuye kuri 74.6% mu gihe Kayonza iza ku mwanya wa nyuma n’ijanisha rya 63.4% ivuye kuri 74.6%.