Senateri Ntawukuriryayo avuga ko gukora ubushakashatsi bisaba ko umuntu aba yarize imibare, ubutabire n’ubugenge

Byari mu nama nyunguranabitekerezo abasenateri bahuriyemo n’abayobozi bo muri Minisiteri y’uburezi, mu Nteko Nshinga Amategeko y’u Rwanda, umutwe wa Sena kuri uyu wa kabiri tariki ya 09 Mutarama 2018.

Muri iyo nama yari igamije kureba urwego ubushakashatsi no guhanga udushya bigezeho mu Rwanda, abasenateri bagaragaje ko ubushakashatsi bwo mu Rwanda bukiri hasi ugereranyije n’ubukorerwa mu bindi bihugu.

Abasenateri bagaragaje ko ubushakashatsi bushobora guteza imbere igihugu bugomba gushingira ku ireme ry’uburezi ritangwa neza kuva mu mashuri abanza kugeza muri za kaminuza n’amashuri makuru.

Senateri Ntawukuriryayo Jean Damascène yavuze ko n’ubwo u Rwanda rwanyuze mu bibazo birukomereye, hakwiye kwitabwa ku ndangagaciro z’ubushakashatsi.

Agira ati “Ni byiza ko duhuye na Minisiteri y’uburezi nyuma y’ibiganiro twagiranye n’abandi. Tugiye mu burezi bw’uyu munsi n’ibibazo barwana nabyo, njye bintera ibibazo kandi mpora mbivuga, ntabwo ushobora gukora ubushakashatsi utarize imibare.”

Akomeza agira ati “Ntabwo ushobora kumbwira ngo umuntu azakora ubushakashatsi mu gihe yavuye mu mashuri abanza yiga akajya mu yisumbuye yiga akazajya muri kaminuza yiga ariko atiga imibare, ubutabire n’ubugenge.”

Senateri Prof Laurent Nkusi we yagaragaje ko ubushakashatsi bwo mu Rwanda bukomeje kubangamirwa na byinshi.

Agira ati “Ubushakashatsi bwo mu Rwanda bukwiye kuva ku rwego ruriho bukazamuka ku buryo buhangana n’ubw’abandi bari ku rwego mpuzamahanga kuko aribyo bituma buhabwa agaciro.”

Umunyamabanga wa Leta ushinzwe amashuri y’imyuga n’ubumenyingiro, Olivier Rwamukwaya yavuze ko Minisiteri y’uburezi n’izindi nzego bafatanya bagiye kongera gukora ibishoboka byose kugira ngo hakorwe ubushakashatsi.

Agira ati “Muri za kaminuza harimo intege nke mu bushakashatsi ariko Minisiteri y’uburezi yarabihagurukiye ngo harebwe uko bwatezwa imbere.”

Abayobozi muri MINEDUC bitabye Inteko ku kibazo kirebana n’ubushakashatsi

Rwamukwaya yijeje ko ingengo y’imari idahagije ishyirwa mu bushakashatsi hari kwigwa uburyo yakongerwa buri rwego rufite aho ruhuriye n’ubushakashatsi rukabigiramo uruhare binyuze mu kigega kizashyirwaho.

Mu Rwanda ubu habarirwa abashakashatsi 721 nk’uko bitangazwa na Minisiteri y’uburezi ari nayo ikurikirana ibikorwa byabo.

Rtd Brig Gen Jean Damascene Sekamana wagiye mu kiruhuko cy’izabukuru

Mu itangazo ryasinyweho n’umuvugizi wa RDF Lt Col Innocent Mugemangango rivuga ko biturutse ku busabe bwa Brig Gen Sekamana yemerewe kujya mu kiruhuko cy’izabukuru n’Umugaba w’Ikirenga w’Ingabo z’u Rwanda akaba n’Umukuru w’igihugu ashingiye ku bubasha afite bwo kohereza ba ofisiye bari ku rwego rwa
Jenerali mu kiruhuko cy’izabukuru.

Yabitangaje mu itangazo ryasohotse kuri uyu wa Mbere tariki 8 Mutarama 2018.

iryo tangazo risobanura ko muri Sitati yihariye igenga RDF mu ngingo ya 82 havugwamo ko ba Ofisiye bakuru bo ku rwego rwa Jenerali boherezwa mu kiruhuko cy’izabukuru ku myaka 55 ariko ko ishobora kongerwaho itanu inshuro imwe bitewe n’inyungu z’akazi ka RDF.

Brig Gen Sekamana w’imyaka 60 y’amavuko iyo ngingo niyo yagendeweho yemererwa ikiruhuko cy’izabukuru yari yasabye.

Uyu musirikare mukuru w’ingabo z’u Rwanda yinjiye mu gisirikare cya RPA mu gihe cy’urugamba rwo kubohora igihugu mu mwaka wa 1990.

Mu mirimo yakoze harimo kuba yarigeze kuba umuyobozi w’Urwego rw’Iperereza muri Gendarumeri (G2).

Yabaye umuyobozi wa Batayo n’uwa Brigade aba kandi n’Umuyobozi
w’agateganyo wa Diviziyo y’Ingabo z’igihugu (RDF).

Mu butumwa bw’amahoro bw’Umuryango w’Abibumbye muri Sudani y’Epfo yanabaye umuyobozi wungirije ushinzwe ibikorwa bya gisirikare.

Kuri ubu Brig. Gen. Sekamana yari Umuhuzabikorwa ushinzwe ibyo kongera umusaruro mu ngabo z’igihugu, Umutwe w’inkeragutabara.

Madamu Ingabire Marie Immaculée uyobora umuryango mpuzamahanga urwanya ruswa n’akarengane ishami ry’u Rwanda (Transparency International Rwanda)

Yabitangaje ubwo yitabiraga ikiganiro “Ubyumva Ute?” cyahise kuri KT Radio, Radio ya Kigali Today kuri uyu wa mbere tariki ya 08 Mutarama 2018.

Madamu Ingabire avuga ko abana batandukanye bishora mu byaha babiterwa ahanini n’imiryango baba baturukamo itabaha uburere bukwiye.

Agira ati “Iyo umwana atabonye urukundo ntashobora kuzakunda ndetse n’iyo abuze urukundo bimugiraho ingaruka mu buzima bwe bwose.”

Aho niho yahereye avuga ko hari abana bafungiye muri Gereza ya Nyagatare babona indyo yuzuye batabonaga mu miryango yabo.

Ati “Hari abana usanga gufungwa bibabereye amahirwe nk’abana bashobora kumara iminsi ibiri batariye.”

Akomeza avuga ko hari n’abantu bakuru usanga ingo zabo zirutwa na gereza kubera kurangwamo amakimbirane atuma batabasha kugera ku mibereho myiza ngo bayigezeho n’abana babyaye.

Muri icyo kiganiro kitwa “Ubyumva Ute?” cyari cyanatumiwemo umuyobozi bw’urwego rw’igihugu rushinzwe imfungwa n’abagororwa (RCS), CIP Hillary Sengabo, asobanura ku byaha abana bakora bigatuma bafungwa, ibibazo bahura nabyo ndetse n’uko bishakirwa umuti.

Avuga ko muri gereza y’abana ya Nyagatare abana bitabwaho uko bikwiye, abatarize bakigishwa n’abari abanyeshuri bagakomeza guhabwa amasomo ajyanye n’aho bari bageze biga mu gihe bakoraga icyaha.

Bamwe mu bana bafungiye i Nyagatare bakoze ibizamini bya Leta muri 2017

CIP Hillary Sengabo yavuze ko kugeza ubu bamwe muri abo bana bafungiye muri gereza ya Nyagatare harimo abakoze ibizamini by’amashuri abanza n’iby’icyiciro rusange kandi bose bakaba barabitsize.

Abana basabwe muri rusange kutishora mu byaha kuko bibagiraho ingaruka. Ababyeyi nabo bibukijwe ko bagomba kwita ku burere bw’abana babo babaha urukundo kugira ngo bazakurane indangagaciro na kirazira.

Ibyaha abana bakora bikabafungisha ni kimwe n’ibindi byaha abantu bakuru bakora mu gihe biba byarateganyijwe ko ari ibyaha bihanwa n’amategeko ahana ibyaha mu Rwanda.

Mpayimana ubwo yari ari mu kiganiro n’abanyamakuru

Mpayimana uvuga ko aziyamamaza nk’umukandida wigenga, yatangaje ibyo mu kiganiro yagiranye n’abanyamakuru ku mugoroba wo ku wa gatanu tariki ya 05 Mutarama 2018.

Avuga ko ashima ibyo igihugu kimaze kugeraho gusa asobanura ko nawe yifuza gutanga umusanzu we wo kubaka igihugu ari muri politiki.

Akomeza avuga ko nk’umukandida wigenga azahatanira amatora y’abagize inteko ishinga amategeko ndetse abinyujije muri uwo mwanya akazaharanira ko nta munyarwanda wakomeza kwitwa impunzi.

Abanyamakuru bamubajije icyo ateganya mu gihe yaba yongeye kugira amahirwe make ntatsindire uwo mwanya maze asubiza ko ibyo bitazamuca intege.

Agira ati “Nzakomeza gutanga umusanzu wanjye ntabwo nzacika intege ariko ubu ndasaba ko mu matora y’abadepite umukandida wigenga wagize munsi y’amajwi atanu ku ijana yajya abarirwa ku ijanisha riri hasi cyane.”

Akomeza avuga ko nk’umukandida uherutse kuva mu matora y’umukuru w’igihugu byari bikwiye ko abamusinyiye yakomeza kubifashisha bitabaye ngombwa ko yongera kujya gushaka abandi ngo bamusinyire.

Mpayimana avuga ko kandi itangazamakuru azakomeza kurikorera ubuvugizi ashakisha uburyo ryakora kinyamwuga ndetse rikazamurirwa ubushobobozi.

Agaruka ku matora y’umukuru w’igihugu yatsinzw, avuga ko yagenze neza ndetse yishimiye ibyayavuyemo ngo akaba ari nacyo gikomeje gutuma ashishikazwa no gukomeza kugaragara mu ruhande rwa politiki y’u Rwanda.

Mpayimana kuri ubu uvuga ko uhugiye mu gushakisha imibereho yikorera ku giti cye, mu matora y’umukuru w’igihugu yatsinzwe yaje ku mwanya wa kabiri agira amajwi 0.73% .
Yakurikiwe na Dr Frank Habineza w’ishyaka riharanira Demokarasi no kurengera ibidukikije wagize amajwi 0.48% ari nayo yabaye aya nyuma.

Muri ayo matora yabaye mu mucyo no mu bwisanzure nk’uko byemejwe n’indorerezi mpuzamahanga, Perezida Paul Kagame niwe wegukanye intsinzi y’umwanya w’umukuru w’igihugu abona amajwi ari hejuru ya 98%.

Muri iyi minsi hakaba haradutse abatekamutwe biyitirira uyu mwuga, bakajya kurangiza imanza z’abaturage bgamije kubiba amafaranga.

Umunyamabanga Nshingwabikorwa w’Urugaga rw’Abahesha b’inkiko b’umwuga , Anastase Balinda

Ni muri urwo rwego urugaga rw’abahesha b’inkiko b’umwuga ruburira abantu ko nta muntu ukwiye kubarya amafaranga yabo yiyitiriye uwo mwuga kandi nta bubasha yabiherewe n’amategeko.

Anastase Balinda, Umunyamabanga Nshingwabikorwa w’uru rugaga yabitangaje ubwo yasobanuraga ikibazo cy’umuntu uherutse kwiyita umwe mu bahesha w‘inkiko w’umwuga akarangiza urubanza kandi nta bubasha yari abifitiye uretse kwishakira amaramuko.

Icyo kibazo cy’uwitwa Mutesa Epimaque cyamenyekanye ubwo Minisiteri y’ubutabera yarahizaga abahesha b’inkiko b’umwuga 126 mu muhango wabereye mu cyumba cy’urukiko rw’ikirenga ku wa 28 Ukuboza 2017 mu mujyi wa Kigali.

Anastase Balinda yabwiye Kigali Today ko uwo mugabo witwa Mutesa Epimaque yarangije urubanza atarabirahirira nk’uko biteganywa n’amategeko.

Yongeyeho ko uwo Mutesa Epimaque yibonye ku rutonde rw’abatsinze ikizamini cy’abahesha b’inkiko b’umwuga maze nyuma bugacya ajya kurangiza imanza nta bubasha arabihererwa.

Balinda atanga inama z’uko umuburanyi wese usaba ko arangirizwa urubanza agomba kugira ubushishozi akareba ko umuntu ugiye kumuhesha ibyo yatsindiye abifitiye ububasha.

Yagize ati “ Umuhesha w’inkiko w’umwuga afite ibimuranga birimo ikarita iriho amazina ye n’ifoto ye ikabaho na telefoni y’urugaga ku buryo niyo itakaye nitwe babimenyesha“.

Akomeza asobanura ko mu gihe iyo karita yaba ari impimbano, umuburanyi usaba kurangirizwa urubanza yajya yifashasha urubuga rwabo rwa internet akareba abahesha b’inkiko bari mu mwuga kimwe n’abawirukanwemo ariko bakaba bagenda babeshya ko bakiri mu mwuga.

Yunzemo ati “Uwashaka wese kurangirizwa urubanza rwe kandi yirinze abo batekamutwe yajya yafashisha ubwo buryo.”

Aba birukanywe burundu mu mwuga w’abahesha b’inkiko

Avuga ko urubanza rurangijwe n’umuntu utabifitiye ububasha bituma ibyakozwe byose nta gaciro bigira kandi uwasabye ko rurangizwa ku gahato biba byamusabye gutanga igihembo gikwiye kuri uwo wiyise umuhesha w’inkiko w’umwuga.

Urugaga rw’abahesha b’inkiko ruvuga ko kimwe n’izindi nzego byoroshye ko umuntu yarwiyitirira agamije gushakisha amaramuko.

Ati “Ibyo ni nk’uko wahura n’umuntu akavuga ko aguciriye urubanza cyangwa se ugahura n’undi akakwandikira imiti yo kwa muganga kandi atari we.”

Mu mwaka ushize wa 2017 urugaga rw’abahesha b’inkiko rwahagaritse abahesha b’inkiko b’umwuga 18 bitewe n’amakosa y’umwuga batahuweho.

Gacinya yakatiwe gufungwa iminsi 30 y’agateganyo

Ibyo byemejwe mu rubanza rwe kw’ifunga n’ifungurwa ry’agateganyo rwasomwe ku mugoroba wo kuri uyu wa kane tariki ya 04 Mutarama 2018.

Gacinya ukuriye ikompanyi yitwa yitwa MICON, ntiyagaragaye mu isoma ry’urwo rubanza.

Gusa ariko mu iburanisha ry’uru rubanza kw’ifunga n’ifungurwa ry’agateganyo, ryabaye mbere, Gacinya yahakanaga ibyo aregwa byose ndetse agasaba ko yarekurwa akajya kwita ku muryango we.

Urukiko rufata icyemezo cy’uko afungwa by’agateganyo iminsi 30, rwatangaje ko hari impamvu zikomeye zagaragajwe n’ubushinjacyaha zituma uregwa yafungwa mbere y’urubanza.

Zimwe muri izo mpamvu harimo gutinya ko yatoroka ndetse no kuba ibyaha akurikiranyweho bihanishwa igihano cy’igifungo kigera ku myaka ibiri.

Ibindi urukiko rwashingiyeho rumufunga ni raporo ya komisiyo y’abadepite ishinzwe imicungire y’imari n’umutungo bya leta yagaragaje ko Gacinya yahawe isoko ryo gukwirakwiza amapoto y’amashanyarazi mu Karere ka Rusizi ariko akishyurwa amafaranga y’umurengera adahuye n’ibikorwa byari byakozwe.

Kuri ibyo haniyongeraho kuba yarabeshye ko imirimo yagenze neza ariko nyuma bikaza kugaragara ko yatanze ibikoresho bitujuje ubuziranenge ndetse n’iyo irimo ikaba yari yarakozwe nabi.

Mu gushyiraho ayo mapoto y’amashanyarazi iperereza ryerekanye ko yakoreshaga ibyondo mu mwanya wa sima agamije gusondeka.

Muri miliyoni zisaga 495RWf yishyuwemo miliyoni zisaga 242 mu gihe byari bidahwanye n’imirimo yagaragazaga ko yakoze.

Bitewe n’ibyagezweho mu iperereza bihamya Gacinya ko yakoze ibyo byaha, urukiko rwategetse ko afungwa by’agateganyo iminsi 30 ariko akaba afite iminsi itanu yo kuba yajuririra icyo cyemezo.

Amakosa agaragara mu bucuruzi bw’ibirayi yahagurukiwe

Kuri uyu wa 1 Mutarama 2018 itangazo ryashyizweho umukono na Minisitiri w’Ubucuruzi n’inganda Vincent Munyeshyaka ryagaragaje ibihano by’amakosa akorwa mu bucuruzi bw’ibirayi n’ibihano byayo.

Iryo tangazo ryagenewe abayobozi bo mu nzego z’ibanze rigaragaza ko gushyiraho ibyo bihano biri mu rwego rwo gukomeza kunoza imicuririze y’ibirayi no kwirinda guhanisha ikosa rimwe ibihano bitandukanye ari nabyo byatezaga akajagari mu itangwa ry’ibihano.

MINICOM ibinyujije muri iyo nyandiko yashyize ahagaragaza buri kosa n’ibihano ryateganyirijwe kugira ngo aribyo bikurikizwa n’abayobozi b’inzego z’ibanze.

Ibyo bihano bivuga ko mu mujyi wa Kigali Ikosa ryo kutubahiriza ibiciro byumvikanyweho mu isoko bihanishwa ibihumbi 30 frw naho kutagira icyangombwa gitangwa n’ikusanyirizo bigahanishwa ibihumbi 300 Frw.

Muri Kigali, ikosa ryo kutagira icyangombwa cya site yaranguriweho ariyo Nzove na Mulindi uwafashwe azajya ahanishwa amande y’ibihumbi 100 frw.

Iryo tangazo rikomeza risobanura ko mu Ntara abatubahirije ibiciro byumvikanyweho ku muhinzi no ku ikusanyirizo hazajya hafatwa amafatanga y’ikinyuranyo kiri hagati y’igiciro nyacyo n’icyo yaranguriyeho ukube toni imodoka yikoreye nyuma hongerweho amande y’ibihumbi 200 Frw.

Agapfa kaburiwe ni Impongo

Mu gihe kutagira icyangombwa gitangwa n’ikusanyirizo byo bizajya bihanishwa amafaranga ibihumbi 300 Frw.

Ku bijyanye n’abayobozi b’amakoperative bashobora kwihisha inyuma y’ibyo byemezo bagakoresha iby’impimbano bazajya bahagarikwa ndetse banakurikiranwe n’ubutabera hakurikijwe amategeko ahana ibyaha mu Rwanda.

Minisitiri Munyeshyaka muri iryo tangazo avuga ko abaciwe amande bazajya bishyura mu kigo cy’igihugu gishinzwe imisoro n’amahoro (RRA) kuri konti itari iy’imisoro.

Ibi bihano ku makosa agaragara mu bucuruzi bw’akajagari bw’ibirayi bije bikurikira ibiciro byashyizwe ahagaragara na MINICOM mu mpera z’umwaka ushize wa 2017 bizubahirizwa muri muri iki gihembwe cyose cy’ihinga.

Abadepite ntibemeranyije n’ingingo itagaragaza uburyo Jenoside yateguwe

Mu ngingo ya 92 mu mushinga w’itegeko rihana ibyaha mu Rwanda igaragaza ko Jenoside ikorwa hacuzwe umugambi.

Ariko Evode ushinzwe ivugururwa ry’amategeko muri Minisiteri y’Ubutabera (MINIJUST) yatanze ingingo itagaragaza ko Jenoside itegurwa, maze abadepite babitera utwatsi bavuga ko hajyamo ko "yateguwe".

Bwa mbere yabanje gutorwa kuri 37 ku badepite 69 bitabiriye. Bane barayanga, 22 barifata, imfubusa ziba esheshatu.

Abadepite bataritoye bahise bababazwa n’uko itowe maze hasabwa ko yasubirwamo. Mu kongera gutora 20 nibo batoye, 14 barayanga, 25 barifata naho imfabusa ziba 10. Iyi ngingo yahise idatorwa isubizwa komisiyo ngo izongere irivugurure.

Bibaye mu gihe Evode Uwizeyimana yagaragazaga ko hacuzwe umugambi muri Jenoside yakorewe abatutsi mu 1994, ibintu bihise byamaganwa.

Abadepite bavuze ko batemeranya no kuvuga ko hacuzwe umugambi basaba ko hajyamo ko yateguwe.

Iyi ngingo ya 92 yahise isubizwa muri komisiyo n’iya 93 iyishamikiyeho nayo isubizwa inyuma, kugira ngo izigweho ikosorwe ijyane n’amateka ya Jenoside yakorewe abatutsi mu Rwanda kuko yateguwe.

Depite Mudidi Emmanuel ni umwe mu banze ko iyi ngingo avuga ko jenoside itabayemo gutegurwa byaba ari ubwicanyi (Massacre).

Yagize ati "Mu Rwanda ntihabaye ubwicanyi kuko nibwo bucurirwa umugambi naho Jenoside igategurwa."

Inteko rusange y’abadepite yo ku gicamunsi cyo kuwa 28 Ukuboza 2017 yitabiriwe n’abadepite 69 mu gihe ubusanzwe bagomba kuba 80 mu nteko ishinga amategeko.

Igishushanyo kigaragaza uko ubu buryo bukora

Iwacu w’imyaka 20 y’amavuko yiga iby’ikoranabuhanga mu ishuri rikuru rya Akilah institute for Women riherereye mu mu Mujyi wa Kigali. Umushinga we yawize nyuma yo kubona ko abantu benshi bagorwa no kugendana za sharijeri za telefoni n’iza mudasobwa.

Avuga ko icyo kibazo cyo guhora abantu bagendana za sharijeri bibabangamira, bikagorana kurushaho mu gihe bagize aho bahurira buri wese ashaka gusharija.

Yabwiye Kigali Today ko igitekerezo cy’uyu mushinga yakigize ubwo yahombaga amahirwe yo kumurika umushinga yari afite bitewe no kubura umuriro muri mudasobwa ye igendanwa.

Uwo mushinga yagombaga kuwumurikira mu nama ya Youth Connekt y’umwaka wa 2017. Ariko bitewe n’uko mudasobwa itari ifite umuriro kandi ntayari kubona aho acomeka bimuviramo gutakaza ayo mahirwe bahamagaza undi wari ukurikiyeho.

Yagize ati “Nagombaga kumurika umushinga ugaragaza uburyo kwishyura amazi bishobora kujya bikorwa nk’uko kwishyura umuriro bigenda,hakishyurwa amafaranga umuntu afite. Ariko ntibyanshobokeye kuko mudasobwa yanjye yari yazimye maze ngezweho baransimbuka birambabaza cyane.”

Iwacu Evra Grâce yatangiye umushinga yise “Yego Charger”

Aho niho Iwacu yavanye igitekerezo cy’umushinga wo gukoresha akamashini kinjiza umuriro muri telefoni na za mudasobwa nta rusinga cyangwa imigozi (Wireless).

Umushinga we ugizwe n’akuma yise “Yego Charger” kazajya gashyirwa kuri telefoni iyo ari yo yose cyangwa mudasobwa maze umuriro ukajyamo uvuye ahantu hari akandi kuma ka ‘Power Transmitter’.

Avuga ko ‘Yego Charger’ itandukanye n’ubundi buryo buzwi nka ‘Power Bank’, kuko yo isharija telefoni mu gihe runaka ubundi umuriro yari ifite washira ikibazo cy’umuriro kigakomeza.

Ati “Nabanje gukora ubushakashatsi mbona ko ku isi hose nta handi iryo koranabuhanga riri ndetse n’abagerageje kubikora babikoze gusa kuri telefoni zo mu bwoko bwa iPhone nk’umwihariko wayo.

“Ariko njye uburyo bwa ‘Yego Charger’ kuri buri telefoni yose na mudasobwa zirimo, buzajya bukoreshwa kandi mu buryo burambye kurusha ubwari busanzweho ku isi nkurikije ubushakashatsi nakoze.’

Uruganda rwa Apple rukora telefone za iPhone ni rwo rwonyine rwari rufite ubu buryo, nk’uko Iwacu abivuga

Umushinga we uri mu marushanwa yo guhatanira miliyoni y’Amadorari y’Amerika

Iwacu Evra Grace ari mu itsinda na bagenzi be barimo Ange Wibabara na Joyce Munyana bose biga muri Akilah Institute.

Umushinga wabo uhanganye n’indi ihatanira igihembo gihatanirwa n’amatsinda y’abanyeshuri bo muri za kaminuza zo hirya no hino ku isi.

Icyo gihembo cya miliyoni imwe y’Amadorari kizatangirwa muri Leta zunze ubumwe z’Amerika,gitanzwe n’umuryango wa Hult Foundation muri 2018.

Iwacu Evra Grâce ari gusobanura umushinga we

Muri ayo marushanwa hatoranywa itsinda ryahize ayandi ku isi mu kugira igitekerezo gishobora guhindura ubuzima bwa benshi ku isi,kigahabwa ayo mafaranga kugira ngo gishobore kuzashyirwa mu bikorwa, nk’uko bisobanurwa n’urubuga rwa Hult Prize Foundation.

Iwacu ni umwana wa 11 mu muryango we. Yize amashuri abanza mu Karere ka Nyanza, akomereza ayisumbuye mu Rwunge rw’amashuri rwa Marie Reine de la Paix, asoreza amashuri ye yisumbuye muri Ecole Technique Saite Emmanuel de Masaka mu ishami ry’ubumenyi mu bya mudasobwa.

Ubu yiga mu mwaka wa nyuma mu ishami ry’ikoranabuhanga rya mudasobwa mu ishuri rikuru rya Akilah Institute for Women riri mu Mujyi wa Kigali.

Maniraguha Drocella amaze kubyara kuri Noheli

Uwo mubyeyi utuye mu Murenge wa Bushoki mu Karere ka Rulindo,akimara kubyara abo bana b’impanga biyongera ku bandi bane yari afite,yahise atangaza ko ahuye n’ikibazo cy’uko azabarera kubera ko asanzwe ari umukene ubarizwa mu cyiciro cya kabiri cy’Ubudehe.

Nyuma y’inkuru Kigali Today yamukozeho ifite umutwe ugira uti " Arasaba ubufasha bwo kwita ku mpanga eshatu yabyaye kuri Noheli" Akarere ka Rulindo atuyemo katangaje ko kiyemeje kugira ubufasha kamugenera.

Mu kiganiro cyihariye na Kigali Today,Umuyobozi w’Akarere ka Rulindo Kayiranga Emmanuel yatangaje ko bakimara kumva iyo nkuru,batangiye kwiga uko bafasha uwo mubyeyi mu buryo burambye kuko imibereho n’ubuzima arimo bitamworoheye.

Yagize ati " Ubu turi gukora ibyo twita "Profiling" ni ukuvuga kureba ubushobozi afite ndetse no kwiga icyo yafashwa kugira ngo abana yabyaye bashobore kwitabwaho uko bikwiye.

Aha tureba niba yahabwa inka bagakamirwa amata cyangwa niba harebwa n’ikindi yafashwa kuko hari ubwo yahabwa inka ntigire icyo imufasha"

Kayiranga akomeza avuga ko bitarenze icyumweru kimwe amakuru y’imibereho y’umuryango we ndetse n’icyo azafashwamo byose bizaba byamenyekanye.

Yunzemo ati " Ikigaragara ni uko ubuyobozi bw’Akarere ka Rulindo bugomba kuzamufasha byanze bikunze kuko ntibyoroshye ko umubyeyi yonsa abana batatu kandi mu bisanzwe bigaragara ko nta bushobozi afite.

Kayiranga Emmanuel Umuyobozi w’Akarere ka Rulindo avuga ko uwo mubyeyi ashakirwa ubufasha ku buryo bwihuse

Kumufasha byo bigiye gukorwa binyuze mu kureba ubufasha bw’ibanze bwamugirira akamaro kurusha ubundi".

Uyu mubyeyi wibarutse impanga eshatu kuri Noheli afite umugabo bamaze kubyarana abana birindwi barimo n’izo mpanga eshatu.

Nta mikoro yo kurera abo bana bafite,kuko babarizwa mu cyiciro cya kabiri cy’ubudehe cy’abantu bafashwa na Leta kubera ko baba batishoboye.

Akarere ka Rulindo ni kamwe mu turere dutanu tugize Intara y’Amajyaruguru,gafite abaturage 43,507 bari mu cyiciro cya mbere cy’ubudehe.

Abaturage b’ako karere bose ni 316,987 babaruwe mu byiciro byose by’ubudehe nk’uko imibare itangwa n’ubuyobozi bw’Akarere ibigaragaza.

Abaganga babyaje Maniraguha bari bishimye ko yabyaye neza abana batatu

Uyu mubyeyi utuye mu Karere ka Rulindo, Umurenge wa Bushoki, Akagali ka Gasiza mu Mudugudu wa Rulindo, arasaba ubufasha buzamufasha kwita kuri aba bana, ngo kuko bavutse biyongera kuri bane yari asanganywe kandi asanzwe afite ubushobozi buke mu muryango.

Yagize ati " Kubyara nabigizemo umugisha ariko kandi mpangayikishijwe n’imibereho yabo. Rwose uwagira ubufasha ubwo aribwo bwose azamfashe kuko njye n’umugabo wanjye ntacyo tuzabona cyo kubatungisha."

Abo bana batatu b’impanga bavutse neza umwe afite ikiro 1,670 uwakurikiyeho afite 1, 430 undi afite 1,570.

Bakimara kuvuka bahise babajyana mu cyuma kibashyushya gusa nta kindi kibazo bafite nk’uko byemezwa n’abaganga ba CHUK bari kubakurikirana.

muri ibi bitaro kandi kuri uyu munsi wa Noheri havukiye abandi bana batatu, bavutse neza ndetse n’ababyeyi babo bari bameze neza nk’uko Umunyamakuru wa Kigali Today wabasuye yabitangarijwe n’abaganga bababyaje.

Uwamahoro Enatha umwe muri abo babyeyi waje aturuka mu murenge wa Rusororo muri Gasabo yabyabye umukobwa w’ibiro bitatu n’amagarama 200 ahita umwita Ramba Noella.

Urayeneza Ramba Jean Paul kimwe n’umugore we wabyaye kuri Noheri babwiye Kigali Today ko bagize umugisha wo kubyara ku munsi wizihizwaho ivuka rya Yezu.

Uwamahoro yagize ati " Ni ibyishimo bikomeye ndetse umutima wanjye uranezerewe cyane kuba mu masaha ya saa mbiri n’iminota 40 nari mbyaye ku munsi udasanzwe wa Noheri".

Mu rugo rwa Ramba na Uwamahoro ibyishimo byongeye kubigaragariza kuri Noheri bayibyaramo umwana w’umukobwa

Yakomeje avuga ko uwo mwana yabyaye ari uwa kabiri agize mu muryango ndetse ko ari ibyishimo bije byiyongera ku byo bari bafite bijyanye n’ivuka ry’umwana w’Imana.

Undi mubyeyi witwa Mukeshimana Clementine yibarutse saa kumi n’imwe zo muri iki gitondo kuri Noheri tariki 25 Ukuboza 2017.

Uyu mugore usanzwe ari umwarimukazi kuri GS Cyivugiza mu mujyi wa Kigali umwana we yavutse neza avukana ibiro 3, 66 umwana ahita amwita Ashimwe Emmanuella Taiicha.

Iri zina Taicha avuga ko yarikoreye ubushakashatsi kuri Internet agasanga rifite igisobanuro kijyanye n’abana bavutse kuri Noheri mu rurimi rw’igiheburayo.

Mu byishimo byinshi avuga ko uyu mwana wa gatatu abyaye kuri Noheri amwongereye ibyishimo bikomeye ku giti cye ndetse no mu muryango we kubera ko avutse ku munsi yemera ko wavutsweho na Yezu ufatwa ku isi nk’umucunguzi ku bamwemera.

Uyu mubyeyi yishimiye kubyara kuri Noheri ahita yita umwana we Taicha

Dr Gashema Heritier uri mu itsinda ry’abaganga babyaje abo babyeyi avuga ko yishimira ko abana bose bavutse bameze neza kandi bakavuka mu gihe imiryango myinshi y’abanyarwanda ikomeje kwishimira umunsi mukuru wa Noheri.

Ati " Ibi natwe abaganga byadushimishije kuba abana bose bavutse bameze neza ndetse na ba nyina bakaba bamerewe neza. Ni ibyishimo bikomeje mu miryango yabo ndetse no ku gihugu muri rusange".

Dr Gashema yatangaje ko banejejwe nuko ababyeyi bose babyaje babyaye neza

Aba bana bose bavutse kuri Noheri ababyeyi babo bose bahisemo kubita amazina ajyanye n’ivuka rya Yesu/Yezu ryizihizwa n’abakristu hirya no hino ku isi.

Kigali Today yabakoreye incamake y’amakuru yaranze ubutabera nk’imwe mu nkingi enye guverinoma y’u Rwanda igenderaho,bukaba n’indorerwamo ya buri gihugu kigendera ku mategeko.

Imena Evode wahoze muri guverinoma y’u Rwanda yatawe muri yombi akurikiranyweho itonesha

Muri 2017 Evode Imena wahoze ari Minisitiri yagejejwe imbere y’ubutabera akurikiranyweho ibyaha birimo itonesha

Imena Evode wahoze ari Umunyamabanga wa Leta muri Minisiteri y’Umutungo Kamere yatawe muri yombi tariki ya 27 Mutarama 2017 akurikiranyweho icyaha cyo gufata icyemezo gishingiye ku itonesha.

Mu isomwa ry’urubanza ku ifunga n’ifungurwa ry’agateganyo,urukiko rwisumbuye rwa Nyarugenge rwamwemereye kuburana adafunze.Nyuma yo kuburanisha urubanza mu mizi, Imena yaje kugirwa umwere ku itariki 7 Ukuboza 2017.

Yagizwe umwere mu gihe ubushinjacyaha bwamusabiraga igifungo cy’imyaka irindwi n’indishyi za miliyoni 686Frw.

Ayo mafaranga yari yasabwe na Kompanyi yitwa "Nyaruguru Mining Ltd "kubera ko ngo icyo cyemezo Imena yafahse igihe yari akiri umuyobozi, cyayigizeho ingaruka.

Munyagishari woherejwe na ICTR yakatiwe igifungo cya burundu

Bernard Munyagishari yamaze gukatirwa igifungo cya burundu

Urukiko Rukuru rwa Kigali rwahamije Bernard Munyagishari icyaha cya Jenoside rumukatira gufungwa burundu,ku itariki 20 Mata 2017.

Munyagishari yari yoherejwe mu Rwanda n’Urukiko rwa ICTR akurikiranweho ibyaha bya Jenoside, birimo icyaha cyo kwica n’icyaha cyibasiye inyokomuntu no gufata abagore ku ngufu yakoze mu gihe cya Jenoside yakorewe Abatutsi muri Mata 1994.

Yafashwe ku itariki 25 Gicurasi 2011 muri Repubulika iharanira Demokarasi ya Congo, yoherezwa i Arusha ku itariki 14 Kamena 2011.

Munyagishari wayoboraga MRND mu cyahoze ari Perefegitura ya Gisenyi, yagejejwe mu rukiko bwa mbere ku itariki 20 Kamena 2011 i Arusha, nyuma yoherezwa kuburanira mu Rwanda ku itariki 24 Nyakanga 2013.

Munyagishari yasomewe icyemezo cy’urubanza adahari kuko yari amaze igihe yararwikuyemo, agaragaza ko atemera abavoka yahawe.

Urubanza rwa Sous-Lieutenant Henry Jean Claude Seyoboka rwongeye gusubikwa kugeza mu gihe kitazwi

Seyoboka ubwo yohererezwaga ubutabera bw’u Rwanda avanwe muri Canada

Seyoboka na we ukurikiranyweho ibyaha bya Jenoside yari umusirikare mu zahoze ari ingabo z’u Rwanda (FAR), yagejejwe i Kigali ku itariki 18 Ugushyingo 2016, yoherejwe na Canada.

Urubanza rwe rwaburanishijwe n’urukiko rwa Gisirikare rwa Nyamirambo rufata icyemezo cyo kurusubika mu gihe kitazwi, ubwo hari ku itariki 27 Mata 2017.

Byari ku nshuro ya gatatu urubanza rwe rusubitswe kubera impamvu yo kuba atarabona umwunganira mu mategeko.

Seyoboka yagiye agaragaza ko adashobora kuburana mu gihe Minisitiri w’Ubutabera ataramwandikira amwemerera ko Leta izamwishyurira umwunganizi mu mategeko.

Ubushinjacyaha bwa Gisirikare,icyo gihe bwatangaje ko atagomba gushakirwa abamwunganira, kuko amasezerano u Rwanda rufitanye na Canada ateganya ko umuntu woherejwe n’ubutabera ari we ushakirwa umwunganizi, mu gihe Seyoboka we yirukanwe ku butaka bwa Canada.

Umwavoka wakaga ruswa avuga ko ayitumwa n’abacamanza yatawe muri yombi

Nyiramikenke Claudine umwavoka wunganira abantu mu nkiko, yatawe muri yombi akurikiranweho kwaka ruswa abakiriya be abumvisha ko ari iyo guha abacamanza kugira ngo bazoroshye ibihano.

Uyu munyamategeko yagejejwe imbere y’urukiko rwisumbuye rwa Nyarugenge ku itariki ya 13 Nyakanga 2017 aburana urubanza ku ifunga n’ifungurwa ry’agateganyo.

Icyo gihe ubushinjacyaha bwamushinjaga kwitwaza ko umugabo we ari umucamanza kandi ko na we aziranye n’abacamanza benshi, agasaba ko bamuha ruswa akazayibaha bakoroshya ibihano.

Uwari umunyamakuru wa Radio na TV 10 yahamijwe icyaha cy’ubwambuzi bushukana

Urukiko rwahamije Eminante icyaha cy’ubwambuzi bushukana

Umunyamakuru Mugabushaka Jeanne de Chantal uzwi nka Eminante yakatiwe igifungo cy’imyaka itatu n’amezi abiri nyuma yo guhamwa n’icyaha cy’ubwambuzi bushukana.

Yahawe icyo gihano n’urukiko rw’ibanze rwa Kacyiru ku itariki 12 Gicurasi 2017, nyuma y’uko yari yatawe muri yombi ku itariki 27 Ugushyingo 2016.

Intandaro yo gutabwa muri yombi kwe, yari amafaranga yakaga abanyamadini ababeshya ko azabashakira ibyangombwa mu buyobozi bw’Urwego rw’igihugu rw’imiyoborere (RGB) kandi ari uburyo bwo kugira ngo abarye amafaranga.

Eminante yari umunyamakuru akanakunda no kugaragara mu bikorwa byo gutora Nyampinga w’u Rwanda no mu kuyobora ibiganiro mpaka by’ahantu hatandukanye.

Anne Rwigara yararekuwe, Diane Rwigara n’umubyeyi we baguma muri gereza

Abo kwa Rwigara bagejejwe imbere y’ubutabera muri 2017

Abo mu muryango w’umunyemari Rwigara Assinapol barimo abakobwa be Anne Rwigara, Diane Rwigara n’umubyeyi wabo Adeline Mukangemanyi Rwigara bahuriraga ku cyaha cyo kugambirira guteza imvururu cyangwa imidugararo muri rubanda.

Ariko kuri Mukangemanyi hakiyongeraho icy’ivangura n’amacakubiri naho Diane Rwigara we akiharira icyaha cyo gukora no gukoresha impapuro mpimbano bose bagejejwe imbere y’ubutabera.

Urukiko rwisumbuye rwa Nyarugenge rwemeje ko nta bimenyetso bifatika Ubushinjacyaha bufite bwashingiraho bushinja Anne Rwigara kugambirira guteza imvururu,ahita arekurwa.

Abandi bafatirwa icyemezo cyo gufungwa iminsi 30 y’agateganyo ishobora kongerwa kubera impamvu z’iperereza ariko barajuriye mu rukiko rukuru rwa Kigali icyo cyemezo nticyakurwaho.

Igitabo cy’amategeko ahana ibyaha cyatangiye kuvugururwa

Mu gihe itegeko N° 01/2012/OL ryo kuwa 02/05/2012 rishyiraho igitabo cy’amategeko ahana ririmo kuvugururwa mu nteko ishiga amategeko y’u Rwanda, hagiye habaho impaka ku ngingo zimwe na zimwe mu gihe iri tegeko ryavugururwaga.

Imwe muri izo ngingo zavuguruwe ni ingingo ya 165 mu gitabo cy’amategeko ahana ibyaha mu Rwanda, iteganya ko gukuramo inda byemewe bitewe n’imwe mu mpamvu zo kuba umugore yatwaye inda atayishaka kubera gukoreshwa imibonano mpuzabitsina ku ngufu,kuba yarashyingiwe ku ngufu,kuba yatewe inda n’uwo bafitanye isano ya hafi kugera ku gisanira cya kabiri,kuba inda itwiswe ibangamiye cyane ubuzima bw’umwana cyangwa ubw’umubyeyi.

Ibyo byemezwaga gusa iyo nyir’ugusaba gukuramo inda yagaragarije muganga icyemezo cy’urukiko rubifitiye ububasha.

Gusa mu gitabo gishya cy’amategeko ahana ibyaha mu Rwanda kirimo kunonosorwa, kujya mu rukiko ntibikiri ngombwa kuko ngo byagiraga ingaruka ku muntu ushaka gukurwamo inda.

U Rwanda rwakiriye inama mpuzamahanga yiga ku guca umuco wo kudahana

U Rwanda rwakiriye inama mpuzamahanga yiga ku guca umuco wo kudahana

Iyo nama yabaye ku itariki 21 Ugushyingo 2017 i Kigali mu Rwanda,ihuriyemo abahagarariye imiryango itari iya Leta, Abarimu muri za Kaminuza, Abahagarariye sosiyete sivile n’impuguke zitandukanye mu by’amategeko.

Afungura iyo nama ku mugaragaro umunyamabanga wa Leta muri Minisiteri y’ubutabera ushinzwe Itegeko nshinga n’andi mategeko, Uwizeyimana Evode, yavuze ko u Rwanda nk’igihugu kiyemeje kugendera ku mategeko ( Rule of law) cyahagurukiye guca umuco wo kudahana gifatanije n’ibindi bihugu.

Yagize ati "U Rwanda ruhagaze neza mu gushyiraho amategeko ahamye ndetse no guca umuco wo kudahana ku baba bakurikiranweho ibyaha ibyo ari byo byose birimo ibiri ku rwego mpuzamahanga ndetse n’ibyambukiranya imipaka."

Wayamo Foundation yateguye iyo nama ku nkunga y’Ubudage, ubusanzwe ni umuryango utegamiye kuri Leta uteza imbere ihame ryo kugendera ku mategeko hatangwa ubutabera no guteza imbere itangazamakuru ridafite aho ribogamiye.

Umuturage yareze Musenyeri Tadeyo Ntihinyurwa mu izina ry’Abanyarwanda ikirego cye giteshwa agaciro

Ikirego cya Manirareba Herman cyateshejwe agaciro

Urukiko rwisumbuye rwa Nyarugenge rwanze kwakira ikirego cya Manirareba Herman, wareze Musenyeri Ntihinyurwa Thadeyo amushinja gutesha agaciro umuco Nyarwanda awita uw’igishenzi, akawusimbuza uwa Gikirisitu.

Urukiko rwatangaje ko rwanze kwakira ikirego cya Manirareba rushingiye ku kuba Manirareba yari yareze mu izina ry’Abanyarwanda,akaba nta kigaragaza ko koko ari bo bamutumye.

Ikindi kirego cyateshejwe agaciro,Manirareba yaregaga Musenyeri Ntihinyurwa ngo ni uko yemeje ibonekerwa ry’i Kibeho akavuga ko ari Bikiramariya wabonekeye abantu, mu gihe we ahamya ko ari Nyirarumaga ufatwa nk’ukomokaho ubusizi mu Rwanda wababonekeye.

Ibyo birego bye byose byateshejwe agaciro ariko Manirareba we yanga kuva ku izima avuga ko azakomeza akarega mu nkiko zose azashobora kugeramo.

Ikinyamakuru cyandikirwa muri Canada cyabeshye ko Dr Mugesera arembye kandi ari muzima

Dr Leon Mugesera wabeshyewe ko arembye kandi ari muzima

Ku wa Gatanu tariki 1 Ukuboza 2017, Ikinyamakuru cyandikirwa muri Canada cyitwa "La Presse", cyatangaje inkuru ivuga ko Dr Leon Mugesera ufungiye ibyaha bya Jenoside muri gereza ya Nyanza arembye bikomeye.

Icyo Kinyamakuru cyashinjaga Leta y’u Rwanda kumutererana, gusa itangazamakuru ryakoze iperereza rigaragaza ko ayo makuru nta shingiro yari afite,ahubwo risanga Dr Mugesera ameze neza kurusha uko yari ameze mbere.

Iyo nkuru ya La Presse yari ifite umutwe ugira uti “la santé de Léon Mugesera se détériorerait de jour en jour", bivuze ngo ubuzima bwa Mugesera bwaba burushaho kumera nabi uko bukeye.

Jean-Thomas Léveilllé wayanditse, avuga ko ayo makuru ayakesha uwunganira Dr Mugesera, Me Jean Felix Rudakemwa, ndetse n’umugore wa Dr Mugesera witwa Gemma Uwamariya uri muri Canada.

Dr Mugesera ubwe yemereye umunyamakuru wa Kigali Today wamusuye ko nta kibazo cy’uburwayi afite, ahamya ko n’ibicurane bidakanganye yari yarwaye, ubuyobozi bwa gereza ya Nyanza afungiyemo bwamujyanye kwa muganga agahabwa imiti maze agahita akira.

Mu kwezi kwa Mutarama k’umwaka wa 2012, nibwo Leta ya Canada yohereje Leon Mugesera mu Rwanda, uwo musaza ufite imyaka 65, ashinjwa ibyaha bya Jenoside, birimo ‘imbwirwaruhame y’ivangura yavugiye ahitwa ku Kabaya mu 1992.

Urukiko rukuru

Icyo cyemezo cyafashwe mu masaha y’umugoroba wo kuri uyu wa kane tariki 21 Ukuboza 2017.

Ni nyuma y’uko abo bana bari bajuririye urukiko rukuru rwa Kigali barusaba ko rubagabanyiriza igifungo bari bakatiwe n’urukiko rwisumbuye rwa Gasabo.

Ku itariki ya 18 Kamena 2017 abo banyeshuri batwitse “Dortoir” (icumbi) riraramo abanyeshuri 45 ba Riviera High School riherereye mu Karere ka Gasabo.

Urukiko rwisumbuye rwa Gasabo rwari rwakatiye igihano cy’igifungo cy’umwaka abana babiri undi rumukatira imyaka ine kubera ko atorohereje ubutabera mu kwemera icyaha no kugisabira imbabazi.

Ubujurire bw’abo bana bunganirwaga na Me Minsiragwira Assoumani bwasabaga kubagabanyiriza igihano cy’igifungo bahawe.

Babiri muri bo bari bakatiwe umwaka bagabanyirijwe bahabwa amezi ane y’igifungo naho uwari wakatiwe imyaka ine agabanyirizwa igifungo kigirwa amezi atanu.

Bose uko ari batatu ayo mezi bakatiwe n’urukiko rukuru rwa Kigali bari bayamaze bafunze bityo bituma bahita barekurwa.

Me Minsiragwira Assoumani wunganiraga abo bana yasabaga mu rubanza rw’ubujurire ko abo bana bagabanyirizwa ibihano kugira ngo bashobore kuzagira amahirwe yo gukomeza kwiga.

Ibi nibyo byafashweho icyemezo n’umucamanza arabagabanyiriza, ibintu byahise bishimisha imiryango yabo bana ikavuga ko ihawe ubutabera.
Me Minsiragwira aganira na Kigali Today yavuze ko anyuzwe n’ubutabera bwahawe abana yunganiraga.

Akomeza avuga ko ibihano bari bahawe byari biremereye ndetse byagombaga kubavutsa amahirwe yo kwiga.

Agira ati “Ndishimye kubera ko abo nunganira bahawe ibihano twasabaga kugira ngo abana bashobore gukomeza kwiga.”

Imiryango abo bana bakomokamo nayo yaje kumva imyanzuro y’urukiko yagaragazaga akanyamuneza ariko abayigize birinda kugira icyo batangariza itangazamakuru.

Usibye aba bana bagabanyirijwe ibihano bagataha hari n’abandi bari bajyanwe mu kigo ngororamuco kubera ko bari munsi y’imyaka 14 y’amavuko.

Aba bana batwitse ishuri rya Riviera high School baje biyongera ku bandi batwitse ishuri ry’ubumenyi rya Byimana mu karere ka Ruhango bakabikora inshuro 3 ubwo hari mu mwaka wa 2013.

Richard Kandt Umudage witiriwe iyo nzu ndangamurage

Iryo vugurura ryakozwe nyuma y’uko Abasenateri bagize komisiyo y’ubukungu n’imari baherukaga gukorera urugendo rw’akazi kuri iyo ngoro ku wa 18 Gicurasi 2016, bagasanga hari bimwe mu byahamurikirwaga bitajyanye naho, bikwiye kuhavanwa hagashyirwa ibindi bijyanye n’amateka yaho.

Muri iyo ngoro,ubu hagaragaramo amafoto yafashwe mu gihe cy’ubukoroni Abadage bakoreye Abanyarwanda, hagati mu myaka ya 1885 kugeza mu 1918, aho yerekana imibereho y’Abanyarwanda muri icyo gihe.

Umuyobozi Mukuru w’Ikigo gishinzwe Ingoro z’Igihugu z’Umurage w’u Rwanda, Amb. Masozera Robert niwe wafunguye ku mugaragaro iyo ngoro, mu mpera z’icyumweru gishize.

Yavuze ko izo mpinduka zizongera umusaruro icyo kigo cyabonaga ku kwezi,ubusanzwe ubarirwa hagati ya Miliyoni ebyiri na miliyoni ebyiri n’igice z’amafaranga y’u Rwanda yatangwaga n’abashyitsi bari hagati ya 1000 na 1200.

Yagize ati “Aya mavugurura azongera ubwiza bw’iyi ngoro ndetse n’umubare w’abayisura wiyongere kuko hari byinshi bishya byongerewemo”.

Inzu Richard Kandt yabayemo ubwo yari mu Rwanda

Byinshi mu byashyizwe muri iyo ngoro ya Richard Kandt byari bifitwe n’Abadage kandi bigaruka ku mateka y’Abanyarwanda mu gihe cy’ubukoroni .

Ibyo bikaba byari igihombo ku Banyarwanda kuko amateka yabo yari afitwe n’abandi ,Umunyarwanda ushaka kuyamenya ntagire aho ayasanga.

Ambasaderi Dr Peter Woeste uhagarariye Ubudage mu Rwanda yavuze ko yishimira ivugururwa ry’iyo ngoro yerekana amateka y’Abadage n’Abanyarwanda mu Rwanda rwo hambere.

Ati “Ni byiza ko iyi ngoro ihariwe icyo yagenewe gusa kuruta uko yari imeze, igaragaramo ibintu bivangavanze”.

Muri iyi ngoro hagaragaramo ibyari ibiro bya Richard Kandt

Richard Kandt witiriwe iyo ngoro ni we Mudage watuye mu Rwanda mu mbere y’abandi ndetse ni we wagiriye inama Umwami Yuhi V Musinga guhitamo Kigali nk’Umurwa mukuru w’u Rwanda kubera uko yahagenzuye akabona ari ho hantu hari hanogeye ijisho.

Uwo mugabo iyo aba akiriho kuri uyu wa 17 Ukuboza 2017 yari kuba yujuje imyaka 150 kuko yavutse ku itariki 17 Ukuboza 1867.

Itabi rya SHISHA ryaciwe burundu mu Rwanda

Iryo tangazo ryashyizweho umukono na Minisitiri w’ubuzima, Dr Diane Gashumba
rigaragaza ko icyo cyemezo gitangira gushyirwa mu bikorwa guhera kuri uyu wa gatanu tariki 15 Ukuboza 2017.

Guhera kuri iyo tariki birabujijwe gukoresha, kwamamaza cyangwa gutumiza mu mahanga impombo zifashishwa mu kunywa itabi rya SHISHA ku butaka bw’u Rwanda.

Iryo tangazo rikomeza rivuga ko icyo cyemezo cyafashwe hashingiwe ku bubi bw’iryo tabi bwagaragajwe n’ishami ry’umuryango w’Abibumbye wita ku Buzima (WHO).

Nk’uko WHO ibivuga, kunywa itabi rya Shisha bigira ingaruka ku buzima bw’urinywa zirimo ko umwotsi waryo ushobora gutera kanseri y’ibihaha, indwara z’umutima n’izindi.

MINISANTE ikomeza ivuga ko uzanyuranya n’iri tangazo azabihanirwa hakurikijwe amategeko.

Icyo cyemezo cyo guhagarika itabi rya SHISHA cyije nyuma y’iminsi mike KT Press, ikinyamakuru cya Kigali Today cyandika mu cyongereza gikoze inkuru icukumbuye igaragaza uburyo itabi rya SHISHA rikoreshwamo ibiyobyabwenge birimo urumogi.

Itangazo ryatanzwe na MINISANTE

Ubusanzwe Shisha ryari itabi rigira impumuro y’imbuto zinyuranye ndetse rimwe na rimwe hakaba aho rivangwamo n’urumogi.

Urinywa akurura umwuka yifashishije umugozi uba ucometse ku ruhombo riba riturukamo ariko ryabanje kunyura mu mazi.

Ibyo bikorwa hanifashishijwe ikara ricanwa ku mutwe w’urwo ruhombo.

Mu Rwanda SHISHA igaragara cyane mu tubari two mu mujyi wa Kigali no mu Ntara aho riba rinyobwa n’urubyiruko rw’abasore n’inkumi baba basa nk’abinezeza.

IGP Gasana Emmanuel (hagati) avuga ko umupolisi ugaragaweho ruswa yirukanwa

Yabitangaje mu kiganiro Polisi y’Igihu yagiranye n’abanyamakuru, ku mugoroba wo ku itariki 13 Ukuboza 2017.

Ubushakashatsi bwo muri 2017 bwakozwe n’umuryango urwanya ruswa n’akarengane, ishami ry’u Rwanda (TIR) bwagaragaje ko mu ishami rya Polisi y’igihugu rishinzwe umutekano wo mu hagaragaramo ruswa ku kigero cya 11.67%.

IGP Emmanuel Gasaba avuga ko barwanya ruswa mu nzego za Polisi zose kuburyo ugaragahweho kuyakira yirukanwa.

Akomeza avuga ko Polisi iri mu nzego zigeragezwa cyane kubera ko hari ubwo usanga hari bamwe mu bacuruzi bafite ibicuruzwa bibarirwa muri za miliyari baba badashaka ko bahanirwa ibyaha bagashyira polisi mu mutego wo kurya ruswa.

Agira ati “Umupolisi wariye n’idolari rimwe arirukanwa kuko nta bwo twabyihanganira na gake ni nayo mpamvu twashyizeho urwego rushinzwe kurwanya ruswa muri Polisi.”

Umuvugizi wa Polisi y’igihugu, ACP Theos Badege yatangaje ko hakozwe byinshi bigamije kugabanya ruswa birimo no kwifashisha ikoranabuhanga hagamijwe gutuma usaba serivisi ntaho yahurira n’umupolisi.

Akomeza avuga ko mu myaka hafi itatu ishize abapolisi bagera ku 180 basezerewe mu mirimo yabo kubera ruswa, ibintu ahuza no kuba harashyizweho imbaraga mu kurwanya ruswa hatangazwa n’abayifatiwemo.

Polisi y’igihugu yagiranye ikiganiro n’abanyamakuru

Polisi y’igihugu kandi yanagarutse ku birebana n’umutekano ivuga ko wagenze neza mu mwaka wa 2017.

Muri uwo mwaka impanuka zo mu muhanda zahitanye abantu 369 abandi 685 barakomereka. Abantu bakaba bahamagarirwa kwitwararika mu minsi mikuru isoza umwaka wa 2017 kugira ngo umutekano uzarusheho gukomeza kuba mwiza.

Evode waburanaga ari hanze agizwe umwere

Mu isomwa ry’urubanza Evode Imena ntiyigeze agaragara imbere y’urukiko usibye umwunganizi we Me Kamanzi Cyuma wari waje kumwumvira imyanzuro y’urubanza hamwe n’abo mu muryango we.

Ku birego yari ukurikiranweho n’ubutabera birimo gufata icyemezo gishingiye ku itonesha byakekwaga ko yakoze ubwo yari akiri mu mwanya w’ubuyobozi.

Urukiko rwasanze kudatanga uruhushya rw’ubucukuzi kuri Kompanyi Nyaruguru Mining Ltd hirengagijwe icyemezo cy’akanama nta rwango rwari rubirimo cyangwa itonesha kuko byari mu nshingano ze.

Urukiko rwemeje ko Evode Imena agirwa umwere nyuma yo kwanzura ko ibyaha bitamuhama bitewe n’uko ibimenyetso byatanzwe n’ubushinjacyaha ndetse n’abatangabuhamya bidafite ishingiro.

Umucamanza wasomye icyo cyemezo cy’urukiko yasobanuye ko ubushinjacyaha butashoboye kugaragaza ibimenyetso bimuhamya ibyaha bwamushinjaga.

Hagendewe ku bivugwa n’abahanga mu ishakishwa ry’ibimenyetso urukiko rwavuze ko gushidikanya birengera uregwa ndetse ko bidahagije gukeka ko umuntu yakoze icyaha mu gihe hatagaragazwa ibimenyetso simusiga byashingirwaho mu kumuhamya icyaha.

Kubera ko Ubushinjacyaha butigeze bugaragara mu isomwa ry’urubanza ntibyamenyekanye niba bizajuririra icyemezo cy’urukiko cyagize Evode Imena umwere ku byaha bwari bumukurikiranyeho.

Muri urwo rubanza Evode Imena yasabirwaga n’ubushinjacyaha igifungo cy’imyaka irindwi ndetse Kompanyi ya Nyaruguru Mining Ltd ikuririra ku kirego cyatanzwe n’ubushinjacyaha isaba indishyi zikomoka ku cyaha yari akurikiranweho zingana na Miliyoni zisaga 686 frw.

Umwunganizi wa Imena Evode ari we Me Kamanzi Cyuma n’abo mu muryango wa Imena bagaragaje ko bishimiye icyemezo cy’urukiko ariko birinda kugira icyo batangariza itangazamakuru ryari ku rukiko rwisumbuye rwa Nyarugenge ruri i Nyamirambo mu Mujyi wa Kigali.

Senateri Mukasine Marie Claire wari uyoboye ibi biganiro

Ibyo byagarutsweho kuri uyu wa kabiri tariki 05 Ukuboza 2017 mu nama nyunguranabitekerezo ku guhangana na ruswa, inzitizi zikigaragara n’ingamba zafatwa mu kuyirwanya.

Ni inama yari ihuriwemo n’Abasenateri, Abadepite, Inzego z’ubutabera, Polisi y’Igihugu, Urwego rw’Umuvunyi, Urwego rw’Umugenzuzi mukuru w’imari ya Leta n’abandi, ikaba yafunguwe na Senateri Mukasine Marie Claire, umuyobozi w’iryo huriro.

Senateri Mukasine yavuze ko iryo huriro ryishimira intambwe u Rwanda rwateye mu kurwanya ruswa n’ibindi byaha bifitanye isano nayo gusa asobanura ko hari ibyuho mu mategeko ahana ruswa mu Rwanda ariko ko byatangiye kuzibwa.

Yagize ati " Amategeko ariho yo kurwanya ruswa arimo ibyuho ariko turashima ko byatangiye gusibwa binyuze mu mategeko mashya arimo kuvugururwa hagamijwe kurwanya ibyaha birimo na ruswa n’ibindi bifitanye isano nayo".

Aimable Havugiyaremye, Umuyobozi mukuru wa Komisiyo y’igihugu ishinzwe kuvugurura amategeko yavuze ko ibyo byuho bigaragara mu kurwanya ruswa ndetse bituma abiyikurikiranweho badahanwa by’intangarugero.

Yagize ati" Hari ibyaha bifitanye isano na ruswa usanga ibihano byabyo bigaragaramo intera nini mu kubihana kuko hari ubwo umucamanza atanga igihano gito".

Havugiyaremye yavuze ko nko gusaba no kwaka indonke bihanishwa igihano cy’igifungo kiva ku myaka ibiri kugeza ku myaka itanu.

Ati" Urumva ko intera iri hagati y’iyo myaka ari nini umucamanza ashobora gutanga igihano gito nk’uko kiri mu itegeko,urumva rero ko harimo icyuho rimwe na rimwe igihano ugasanga kidahuye n’uburemere bw’icyaha kiba cyakozwe gifitanye isano na ruswa".

Abafite aho bahuriye bose no kurwanya ruswa mu Rwanda bitabiriye inama nyunguranabitekerezo yabereye mu Nteko

Akomoza ku bindi byuho bya ruswa n’ibindi bifitanye isano nayo bigaragara mu mategeko yavuze ko kuba nta buryozwacyaha bubaho k’uwatanze ruswa cyangwa uwayakiriye agamije gufasha ubutabera kuyimenyekanisha na byo birimo icyuho.

Yagaragaje ko bitandukanye n’ibikubiye mu masezerano mpuzamahanga y’umuryango w’abibumbye yabereye i New York ku wa 31/10/2003 arebana no kurwanya ruswa.

Yunzemo ati" Gushora umuntu mu cyaha ugamije kubona uko umuhana ntibyemewe muri ayo masezerano mpuzamahanga u Rwanda rwashyizeho umukono".

Kuba ibyuho byinshi byari bikiboneka mu mategeko ahana ibyaha mu Rwanda birimo na ruswa, hari icyizere ko amategeko arimo kuvugururwa azaba atomoye ngo kuko kugeza ubu hari ibyo wasangaga ari amakosa kandi ari ibyaha nk’uko Jean Bosco Mutangana, Umushinjacyaha mukuru yabitangaje.

Bamwe mu bagize ihuriro rirwanya ruswa mu Nteko Ishinga amategeko y’u Rwanda

Yavuze ko hari ibyuho mu mategeko ahana y’u Rwanda byatezaga imikorere mibi ihombya leta amafaranga menshi bikanayihendesha,kandi iyo mikorere ntishobore gukurikiranwa nk’icyaha.

Ashima ivugurura ry’amategeko ariho muri iki gihe mu Rwanda, Jean Bosco Mutangana yavuze ko ibyo byuho byose bizazibwa ndetse ko batanze ibitekerezo babisaba.

Yagize ati" Ntabwo dushimishijwe no gufunga Abanyarwanda ariko abahamwe n’ibyaha bagomba kujya babihanirwa bahabwa ibihano bihwanye n’ibyaha byakozwe".

Mutangana yavuze ko akenshi ibyuho biri mu mategeko byifashishwaga n’abavoka ugasanga bikomereye ubushinjacyaha mu manza ziba zaregewe inkiko.

Ati " Avoka agira amayeri nk’igihumbi yo gusenya ubushinjacyaha kandi ni uburenganzira bwe rero ibyuho byose bigomba gusibwa".

Abadepite bagize ihuriro rirwanya ruswa bashimye iryo vugururwa ry’amategeko agamije kuziba ibyo byuho by’abarya ruswa biswe ibisambo byasabiwe no kujya bishyirwa ku karubanda.

Ihuriro rya APNAC- Rwanda ryashyizweho ku itariki ya 10 Mutarama 2005 mu buryo bwo gufasha Guverinoma y’u Rwanda mu bikorwa byo gukumira no kurwanya ruswa n’ibindi byaha bifitanye isano na yo.

Manirareba Herman wareze Musenyeri Ntihinyurwa gupfobya Umuco wa Kinyarwanda

Urukiko rutangaje ko rwanze kwakira ikirego cya Manirareba rushingiye ku kuba Manirareba yari yareze mu izina ry’Abanyarwanda akaba nta kigaragaza koko ko ari bo bamutumye.

Ikindi kandi ngo Leta ni yo ishinzwe kubungabunga umuco Nyarwanda, Manirareba akaba nta burenganzira afite bwo kurega uwaba afite icyo yatesheje agaciro mu muco kuko nta bubasha, ndetse nta n’ubushobozi abifitiye.

Ikindi kirego cyateshejwe agaciro Manirareba yaregaga Musenyeri Ntihinyurwa ngo ni uko yemeje ibonekerwa rya Kibeho akavuga ko ari Bikiramariya wabonekeye abantu, mu gihe we ahamya ko ari Nyirarumaga ufatwa nk’ukomokaho ubusizi mu Rwanda wababonekeye.

Urukiko rumaze gutesha agaciro icyo kirego, Manirareba atangaje ko ajuririye icyo cyemezo, ubujurire bwe bukaba bugomba kuzasuzumwa mu gihe kitarenze iminsi 30.

Muri urwo rubanza Musenyeri Ntihinyurwa ndetse n’umwunganira mu mategeko, ntibagaragaye mu rukiko kuri uyu munsi.

Abadepite banenze umuyobozi w’Ibitaro bya Rwinkavu utitabye Komisiyo y’Abadepite ishinzwe uburenganzira bwa muntu, ahubwo akohereza umuhagararira

Kuri uyu wa Mbere tariki 29 Ugushyingo 2017, niho byari biteganijwe ko Dr Habiyaremye Michel yitaba Komisiyo y’imibereho myiza y’abaturage mu Nteko ishinga amategeko. Ariko byaje kurangira atari we uje ahubwo yohereze undi umuhagarariye.

Komisiyo yari yamutumije kugira ngo asobanure ikibazo bagejejweho n’uwitwa Inema Rosine uvuga ko yarenganijwe mu itangwa ry’akazi ku mwanya w’umucungamutungo w’ibyo bitaro yapiganiye.

Uwo Inema Rosine yatakambiye inzego bireba azigaragariza ko mu kizamini cyo kuvuga (Interview) yarenganijwe hakabamo akarengane, kuko yakoreshejwe icyo kizamini n’abantu babiri mu gihe amategeko agenga itangwa ry’akazi muri Leta avuga ko bagomba kuba ari batatu.

Uwari woherejwe ari we Uwimana Claudine yasabwe gutanga raporo yari yitwaje ivuga uko icyo kibazo cyakemutse ariko we asabwa gutaha nta bisobanuro birenze atanze kuri icyo kibazo kuko atari we wari watumijwe.

Depite Rwaka yavuze ko nta mpamvu yo kumutega amatwi ngo asobanure byinshi ku kibazo atatumiwemo, igitekerezo benshi mu ba Depite bashyigikiye.

Yagize ati " Muri iki kibazo twatumiye umuyobozi w’ibitaro niba ataje intumwa ye ntacyo tuvugana, ahubwo yasiga raporo yarangiza agataha kuko ibibazo abazwa nta kintu kinini bimurebaho kuko si we twandikiye dusaba kuzitaba."

Uwimana yabwiye Kigali Today ko yoherejwe n’umuyobozi we yibwira ko aza kumuhagararira mu Nteko bigashoboka.

Ati "Kubera ko atabashije kuboneka njye nawe twumvaga ko nta kibazo ubonetse yaza akabisobanura ariko ntabwo ariko bigenze ntanze raporo njye bansaba gutaha."

Akomoza kuri iyo raporo yatanze, yasobanuye ko nyuma yo gusanga ibyakozwe bitubahirije amategeko bafashe icyemezo cyo guha akazi umukandida wari watanze ikirego kandi ubu akaba yitegura gutangira akazi.

Uwimana yongeyeho ko kugira ngo Inema Rosine akoreshwe ikizamini cyo kuvuga n’abantu babiri byatewe n’uko uwa gatatu yari arwaye ntabashe kuboneka.

Ati "Aho bigaragariye ko hakozwe amakosa yarakosowe ndetse uwatakambye ko yarenganijwe ahabwa andi mahirwe ubu aritegura gutangira akazi."

Abadepite bihanangirije ibyo bitaro, bavuga ko atari ubwa mbere biregewe komisiyo y’abakozi ba Leta, kandi bikagera no ku bagize inteko bishinjwa kutubahiriza amategeko agenga abakozi ba Leta.

Umuvunnyi mukuru Anastase Murekezi yifatanije n’abavoka mu birori byabo

Gukurikirana ibibazo abantu bakabaye baririnze rugikubita ni zimwe mu mbogamizi Abavoka bavuga ko bagihura nazo, muri iki gihe cyo kwizihiza imyaka 20 urugaga rwabo rumaze rushinzwe mu Rwanda.

Me Julien- Gustave Kavaruganda, Perezida w’Urugaga rw’Abavoka mu Rwanda (RBA), yabitangaje ubwo urwo rugaga rwizihizaga isabukuru kuri uyu wa Mbere tariki 27 Ugushyingo 2017.

Ati “Usanga akenshi babagana ari uko bafunzwe baguze isambu mu buryo butubahirije amategeko cyangwa se basabwe gukurikiranwaho ibyaha by’imisoro.

“Avoka agishwa inama igihe cyose yaba mu gushaka ko agukorera amasezerano ukumira ko havuka ibibazo byakugiraho ingaruka.”

Abayobozi banyuranye barimo Johnston Busingye bakase umugati

Me Kalinganire Ignace Steven, umwe mu bagize urugaga rw’Abavoka avuga ko abantu bakwiye kubafata nk’abajyanama mu by’amategeko, kuko birinda abantu kujya mu nkiko.

Ati “Avoka ni ugira inama abantu uko bakwirinda ibibazo bishobora kuvuka kandi bikabagiraho ingaruka.Ni ugira inama abantu mu gushinga ibigo by’ubucuruzi no kubafasha gukemura ibibazo bitagiye mu nkiko byananirana akaba yagana inkiko.”

Abavoka bo hirya no hino ku isi bari baje kwifatanya na bagenzi babo bo mu Rwanda mu isabukuru

Uwo Munyamategeko agira inama abaturage kwita ku mategeko bakayagiraho ubumenyi bw’ibanze, kuko nta wavuga ko atayazi mu gihe agiye kumuhana ngo azabibonemo inyungu.

Mu myaka 20 ishize urugaga rw’Abavoka bo mu Rwanda,ruvuga ko twateye imbere n’abigitsina gore bakaruyoboka,ubu rukaba rufite abanyamuryango 1.200 hirya no hino mu gihugu.

Abavoka hirya no hino mu gihugu bitabiriye ibirori by’isabukuru yabo

Ubwo Aline Gahongayire na Gahima Gabriel bitabiraga urubanza rubatanya burundu

Ni icyemezo cyafashwe kuri uyu wa kabiri tariki 28 Ugushyingo 2017.

Ababuranyi bombi bari bitabiriye isomwa ry’urubanza rw’ubutane bwasabwe na Gahima Gabriel ashaka gutandukana n’umugore we Aline Gahongayire, uzwi mu ndirimbo zihimbaza Imana.

Urukiko rw’ibanze rwavuze ko Gahima na Gahongayire bari bamaze amezi 12 batabana nk’umugabo n’umugore bagomba guhabwa ubutane.

Bombi bari barasezeranye ivangamutungo rusange ariko kubera ko nta mwana n’umutungo bombi bari bafitanye buri wese yemerewe kujya ukwe n’undi kwe.

Nyuma y’isomwa ry’urubanza rwamaze iminota itagera kuri itanu, bombi bagaragaje ko bishimiye icyo cyemezo baramwenyura ndetse bagishyiraho umukono wemeza ko umwe atanye n’undi burundu.

Kigali Today yifuje kuvugana na bo, buri wese yanga kugira icyo atangaza avuga ko ari ibintu birebana n’ubuzima bwabo bwite.

Gahima Gabriel na Gahongayire Aline basezeranye kubana ku itariki ya 20 Ukuboza 2013.

Ubwo Aline na Gahima bakoraga ubukwe

Mu iburana ry’urubanza rwabo rwa gatanya, Gahongayire Aline yagaragaje ko yifuza gutana n’umugabo we anagaragaza ko afite inyota yo kuzongera gushakana undi mugabo kuko ngo abona akiri muto. Gusa ariko Gahima ntiyerure neza ko azongera agashaka.

Ingingo ya 237 y’igitabo cya mbere cy’urwunge rw’amategeko mbonezamubano mu gace kayo ka kabiri ivuga ko buri wese mu bashyingiranywe ashobora gusaba gutana burundu.

Yabisaba kubera igihano k’icyaha gisebeje cyane, ubusambanyi, guhoza undi ku nkeke, kwanga gutanga ibitunga urugo, guta urugo igihe cy’amezi 12 nibura, no kumara nibura imyaka itatu batabana ku bushake bwabo.

Rosine Duquesne Kamagaju (wambaye umuhondo) na Ilibagiza Immaculée mu gikorwa cy’ubukangurambaga ku ndwara ya Autism

Icyo gikorwa cyakorewe i Kigali ku mugoroba wo ku cyumweru tariki 26 Ugushyingo 2017.

Muri icyo gikorwa hakusanijwemo miliyoni zirenga 45RWf zizafasha abana barwaye “Autism” no guhemba abakozi bahuguriwe kwita kuri abo bana.

Rosine Duquesne Kamagaju, umuyobozi w’ikigo cyita kuri abo bana cyitwa "Autism Rwanda" avuga ko indwara ya “Autism” yigaragaza ku bana mu buryo butandukanye.

Agira ati “Ni indwara ivukanwa n’abana bakarangwa n’imyifatire idasanzwe irimo kugira amahane, gutinda kuvuga no kugirira abandi urugomo ku ishuri ndetse n’iwabo mu miryango”.

Akomeza avuga ko kwita ku mwana urwaye “Autism” bisaba ubumenyi bwihariye kugira ngo ashobore kwitabwaho mu muryango.

Yibutsa ko iyo abo bana bitaweho usanga bafite ubwenge n’ubushobozi nk’ubw’abandi mu gihe babonewe ibyangombwa bibafasha kwiga.

Ahamya ko uko inkunga zigenda ziboneka ubushobozi bukiyongera, bizabafasha cyane mu kwita kuri abo bana, bashakirwa abarimu b’inzobere bahagije kuri ubu burwayi kuko ngo buri mwana aba agomba kugira umwarimu we ku giti cye.

Ilibagiza Immaculée niwe wagize uruhare mu gutegura icyo gikorwa

Madame Ilibagiza Immaculée,Umunyarwandakazi utuye muri Amerika (USA), umwanditsi w’ibitabo akaba ari nawe wagize uruhare mu itegurwa ry’icyo gikorwa, yashimiye abakitabiriye n’uburyo batanze ubufasha.

Agira ati “Nk’umuntu ukurikirana iby’amabonekerwa ya Bikiramariya mu nyigisho ze dusabwa kugira umutima w’impuhwe.

Akomeza agira ati “Nicyo cyatumye dutekereza ku bana barwaye Autism nyuma y’uko twasanze icyo kibazo kiri mu Rwanda kandi nkaba nari maze guhura n’umuntu ubizobereyemo.”

Abitabiriye icyo gikorwa bakusanyije miliyoni 45RWf

Alice Muhongerwa, umubyeyi witaribiriye icyo gikorwa avuga ko agiye gushishikariza ababyeyi bafite abana bahuye n’ubwo burwayi kugana ikigo kibitaho mu Rwanda aho kubatererana.

Agira ati“Hari ababyeyi bahisha abana bafite kiriya kibazo. Ubu ni umwanya mwiza wo kubabwira ko bagomba kubegereza inzobere zikabafasha cyane ko n’icyo kigo cyageze mu Rwanda.”

Nkusi Juvenal ukuriye Komisiyo ya PAC aravuga ko ikoranabuhanga mu itangwa ry’amasoko rizaca burundu ruswa yayavugwagamo

Byatangajwe na perezida wa komisiyo y’Abadepite ishinzwe imikoreshereze y’imari n’umutumngo bya Leta (PAC) ubwo yasuzumaga umushinga w’itegeko rigenga amasoko ya Leta, kuri uyu wa kane tariki 23 Ugushyingo 2017.

Ba rwiyemezamirimo basabye PAC ko muri uwo mushinga w’itegeko hazashyirwamo igihe gihagije cyo gutanga ibitekerezo cyangwa ubujurire bitewe n’icyiciro cy’isoko umuntu yagiriyemo akarengane ndetse hagashyirwaho n’uburyo buhamye bugaragaza ko igitekerezo cyangwa ubujurire bwakiriwe bukanasuzumwa.

Inama yari igamije kwiga ku buryo bwo guca umuco wo kudahana muri EAC

Iyo nama yafunguwe kuri uyu wa 21 Ugushyingo 2017 i Kigali mu Rwanda ihuriyemo abahagarariye imiryango itari iya Leta, Abarimu muri za Kaminuza, Abahagarariye sosiyete sivile n’impuguke zitandukanye mu by’amategeko.

Afungura iyo nama ku mugaragaro umunyamabanga wa Leta muri Minisiteri y’ubutabera ushinzwe Itegeko Nshinga n’andi mategeko, Uwizeyimana Evode, yavuze ko u Rwanda nk’igihugu kiyemeje kugendera ku mategeko ( Rule of law) cyahagurukiye guca umuco wo kudahana gifatanije n’ibindi bihugu.

Ati " U Rwanda ruhagaze neza mu gushyiraho amategeko ahamye ndetse no guca umuco wo kudahana mu baba bakurikiranweho ibyaha ibyo ari byo byose birimo ibiri ku rwego mpuzamahanga ndetse n’ibyambukiranya imipaka".

Yakomeje avuga ko yishimira abateguye iyi nama iri ku rwego mpuzamahanga ndetse bagahitamo ko ibera mu Rwanda,ikitabirwa n’impuguke mu by’amategeko zifite aho zihuriye n’ishyirwamubikorwa ry’ayo hagamijwe guteza imbere ubutabera.

Yunzemo ati " Ndashimira ubufatanye bukomeje kuranga ibihugu byo mu karere mu kurwanya ibyaha birimo ibikorwa hifashishijwe ikoranabuhanga, ibyaha mpuzamahanga n’ibindi bigenda bigaragara."

Umushinjacyaha mukuru Jean Bosco Mutangana mu kiganiro yatanze yagarutse ku ntambwe u Rwanda n’ibihugu byo mu karere bihuriyeho mu kurwanya ibyaha mpuzamahanga n’ibyambukiranya imipaka.

Yagize ati " Jenoside yakorewe Abatutsi mu Rwanda nka kimwe mu byaha mpuzamahanga,u Rwanda rwahagurukiye gushyikiriza ubutabera abayigizemo uruhare yaba abari mu gihugu ndetse n’abahungiye ubutabera mu bihugu by’amahanga.

Yongeyeho ko ibyo byose bikorwa mu rwego rwo guca umuco wo kudahana wagiye ugaragara mu gihugu mbere ya Jenoside yakorewe Abatutsi mu Rwanda.

Ati " Mu gitabo cy’amategeko ahana ibyaha mu Rwanda mbere ya 1994 ntihagaragaragamo icyaha cya jenoside murumva ko harimo icyuho cyari kigamije kudahana abagize uruhare muri jenoside yakorewe Abatutsi mu Rwanda."

Umushinjacyaha mukuru Jean Bosco Mutangana atanga ikiganiro

Ambasaderi uhagarariye igihugu cy’Ubudage mu Rwanda Dr Peter Woeste yavuze ko yishimira intambwe u Rwanda rwateye mu bijyane no gushyiraho ubutabera buhamye.

Agira ati " Uyu ni umwanya mwiza ku Rwanda mu kugaragaza uko rwashoboye guteza imbere ubutabera hagamijwe guca umuco wo kudahana n’ubwo ari intego ibihugu byinshi bihuriyeho."

Ambasaderi uhagarariye igihugu cy’Ubudage mu Rwanda Dr Peter Woeste

Muri iyo nama isoza imirimo yayo kuri uyu wa 22 Ugushyingo 2017 hateguwemo ibiganiro by’impuguke zirimo Adeniran Akingbolaham, umujyanama mu by’amategeko wa Visi-Perezida wa Nigeria, Gerard Niyungeko, umucamanza wahoze ari perezida w’urukiko nyafurika rw’uburenganzira bwa muntu.

Abandi batanga ibiganiro ni Gerhard van Rooyen, umuyobozi ushinzwe abakorewe ibyaha n’abatangabuhamya mu rukiko mpuzamahanga mpanabyaha (ICC) na Mike Chibita, umuyobozi w’ubushinjacyaha muri Uganda, william Rosato, umukozi mu biro by’ubushinjacyaha bwa ICC n’abandi.

Wayamo Foundation wateguye iyo nama ku nkunga y’Ubudage ni umuryango utegamiye kuri Leta uteza imbere ihame ryo kugendera ku mategeko hatangwa ubutabera no guteza imbere itangazamakuru ridafite aho ribogamiye.

Mbere yo kwinjira muri Kaminuza imyenda y’abakobwa yabanzaga gupimwa

Iyi kaminuza izwi ku izina rya Kaminuza ya Mudende cyangwa Kaminuza ya Masoro ni imwe muri Kaminuza zo mu Rwanda zizwiho gutanga amabwiriza akarishye arebana n’amasomo ahatangirwa ndetse n’imyambarire ku banyeshuri bahiga.

Dr Niyobuhungiro Aimable, umuyobozi mukuru ushinzwe ibibazo by’abanyeshuri n’imibereho yabo muri iyo kaminuza, yatangarije Kigali Today ko bitewe n’imyemerere y’abayishinze nta na rimwe bemerera umunyeshuri ko yambara ibintu bijyanye n’uko we yishakiye.

Agira ati “ Iyi ni kaminuza yegamiye ku itorero ry’Abadivantisiti b’umunsi wa Karindwi, umuntu wese uhiga tugirana nawe amasezerano tukamwereka ibyo yemerewe n’ibyo abujijwe, iyo ibiri muri ayo mabwiriza bimunaniye ntiyakwirirwa akomezanya natwe ariko usanga abantu benshi badukundira izo ndangagaciro”.

Dr Niyobuhungiro Aimable avuga ko bagendeye ku myemerere yabo batazigera bemerera umunyeshuri kwambara uko yishakiye

Iyo kaminuza amwe mu mabwiriza yayo avuga ko bitemewe kwambara imyambaro y’impenure, amaherena, imyenda ifashe umubiri, ibikomo n’imikufi kimwe n’indi mirimbo iyo ariyo yose.

Mu minsi yashize nibwo buri mukobwa cyangwa umugore wiga muri iyo kaminuza yapimwaga umuzenguruko w’ipantaro ye basanga yegereye umubiri we agasubizwa iwabo kuyikuramo nta mpaka zibayeho.

Dr Niyobuhungiro yemeza ko ubwo buryo bwakoreshejwe ariko bakaza kudohora nyuma yo gusanga amapantaro basabaga ko abanyeshuri bambara atakiboneka mu isoko ry’imyenda.

Ati “Igice cyo hasi twarakirengagije dusigara ducunga ko hejura umwambaro udahambiriye kubera ko twasanze ipantaro twasabaga abakobwa kwambara bitari byoroshye kuzibona mu isoko”.

Umwe mu bakobwa biga muri AUCA wirinze gutangaza amazina ye kubera ingaruka bishobora kumugiraho yabwiye Kigali Today ko ubwo bapimaga ipantaro zabo igice cyo hasi byababangamiraga.

Yagize ati “Ni ukuri byari ibintu bitubangamiye gusa ntibyamaze kabiri. Njye sinabirwanyije cyane kuko burya iyo umukobwa yambaye akikwiza nibwo ubona ko aba yiyubashye”.

Depite Mukazibera Agnes akaba ari Perezida wa Komisiyo y’abadepite ishinzwe uburezi, ikoranabuhanga, umuco n’urubyiruko ubwo tariki 17 Ugushyingo 2017 komisiyo ayoboye yahasuraga yatangarije Kigali Today ko amabwiriza nkayo akarishye akunda gushyirwaho muri iyo kaminuza ntacyo yangiza ku bwisanzure bw’abahiga.

Depite Mukazibera Agnes avuga ko byari bikwiye ko amabwiriza akarishye ntacyo abangamiyeho komisiyo ayobora

Ati “ Iyi ni kaminuza y’abadivantiste amabwiriza yose bashyiraho arebana n’itorero ryabo umuntu yahitamo kuyubahiriza cyangwa yamunanira akajya kwiga ahandi twe nka komisiyo nta nenge ayo mabwiriza tuyabonamo”.

Kaminuza ya Mudende yashinzweho mu 1979 ifungura imiryango tariki 15 Ukwakira 1984.

Yihariye udushya twinshi turimo ko umuntu usibye ibikorwa byateguwe na Kaminuza nta mpamvu acibwa amande kimwe n’uko umunyeshuri usibye inshuro enye mu isomo rimwe atemererwa gukora ikizamini cyaryo.

Siboyintore avuga ko hari abashinjwa Jenoside yakorewe Abatutsi mu Rwanda babeshya ko bapfuye kandi bakiriho

Ubushinjacyaha buvuga ko ari zimwe mu ngorane buhura nazo mu gukurikirana abakekwaho Jenoside, nk’uko bwabitangarije abanyamakuru kuri uyu wa Kabiri tariki 14 Ugushyingo 2017.

Jean Bosco Siboyintore, umuyobozi w’ishami rishinzwe gukurirana abakekwaho Jenoside yakorewe Abatutsi bahungiye hanze y’igihugu, avuga ko hari abatahuwe ko bifashishije abantu bakabatangira amatangazo yo kubabika bavuga ko bapfuye.

Yagize ati “Hari umuntu umwe uri mu gihugu ntashaka kuvuga izina yaje kwitaba Imana kandi akiriho n’ubu aracyariho arangije baramubika barangije kumubika bajya no gushyingura ariko bashyingura umuvure!
“Bashyinguye umuvure bashyiraho umusaraba barangije amatangazo aracicikana mu Rwanda ngo umuntu yarapfuye, nyuma arangije aragenda yihinduza isura ye ashyiraho ibyanwa ariko iperereza rizageraho rimugaragaze.”

Siboyintore yirinze kugaragaza amazina ariko avuga ko hari n’ukekwaho kugira uruhare muri Jenoside yakorewe Abatutsi wari wihishe mu mahanga wazanywe kuburanira mu Rwanda wigeze kubikwa ko yapfuye muri 2010 ariko muri 2013 akagezwa mu gihugu.

Ati “Ikintu cyo kubeshya bagamije kujijisha ntabwo tukemera n’ubwo tuzi ko gupfa ari ibintu bibaho ariko abenshi bakihisha inyuma.”

Igihugu kivugwaho kuba gicumbikiye umubare munini w’Abanyarwanda benshi bakekwaho kuba baragize uruhare muri Jenoside yakorewe Abatutsi mu Rwanda ni Repubulika iharanira demokarasi ya Congo ifite abantu 254 igakurikirwa na Uganda ifite abantu 226.

Ubushinjacyaha bukuru buvuga ko abantu 835 bari hirya no hino ku isi 21 ari bo bafashwe 18 bagahamwa n’icyaha n’aho batatu imanza zabo zikaba ziri mu bujurire.

Musenyeri Tadeyo Ntihinyurwa, umushumba wa Diyosezi ya Kigali

Yabitangaje ubwo uwitwa Manirareba Herman yagezaga ikirego cye mu rukiko rwisumbuye rwa Nyarugenge mu Mujyi wa Kigali kuri uyu wa mbere tariki ya 13 Ugushyingo 2017.

Manirareba w’imyaka 42 avuga ko arega Musenyeri Ntihinyurwa, umushumba wa Diyoseze Gatolika ya Kigali kuba yaratesheje agaciro umuco Nyarwanda awita uwa "gishenzi".

Mu nama ntegurarubanza yabaye, Manirareba yagaragaje ko arega mu izina ry’Abanyarwanda, akarega Musenyeri Ntihinyurwa kuba ari umwe mu bemeje amabonekerwa y’i Kibeho mu Karere ka Nyaruguru, agahamya ko babonekewe na Bikiramariya ngo kandi byari ukubeshya.

Me Ndengeyingoma Yvonne wari uhagarariye Musenyeri Ntihinyurwa yasabye ko icyo kirego kitakwakirwa kubera ko inyito yacyo idahuye n’ibyo urega asaba urukiko.

Agira ati "Urega bigaragara ko nta ruhushya yabiherewe n’Abanyarwanda kandi we avuga ko yareze mu izina ryabo. Kuba nta bubasha n’ubushobozi bwo kurega, ndasaba ko urukiko rwatesha agaciro ikirego cye ntikizakirwe.”

Urega yavuze ko nk’Umunyarwanda yemerewe kuvugira Abanyarwanda mu gihe hari ibijyanye n’umuco byagoretswe bikenewe gukosorwa mu izina ryabo.

Yifashishije zimwe mu ngingo z’itegeko nshinga yumvikanishije ko afite uburenganzira bwo kurega mu izina ry’Abanyarwanda mu gihe hari ibyatokoje umuco wabo kandi ari wo bose bahuriyeho.

Muri iyo nama ntegurarubanza yabajijwe n’urukiko impamvu arega Musenyeri Ntihinyurwa kandi bigaragara ko yagombaga kurega kiriziya Gatolika maze Manirareba asubiza ko kwangiza umuco byakozwe n’umuntu ko bitakozwe n’inyubako benshi bita Kiliziya.

Agira ati “Urebye ibitabo byagiye byandikwa usanga utavuga Kiliziya Gatolika ngo ibijyanye n’amabonekerwa yabereye i Kibeho byumvikane neza utavuzemo Musenyeri Ntihinyurwa kuko ari umwe mu bagize uruhare mu kuyemeza. Kandi niwe nabashije kubonera imyirondoro uretse ko hari n’abandi nzagobokesha mu rubanza.”

Manirareba wagaragaye mu rukiko yitwaje umurundo w’impapuro yabwiye Kigali Today ko aregera indishyi nyinshi zibarirwa muri triyari 12 z’Amadolari y’Amerika.

Natsinda urubanza ngo ayo mafaranga azashyirwa mu isanduku ya Leta ariko igice kinini cy’ayo gihabwe abarokotse Jenoside yakorewe Abatutsi mu Rwanda.

Ati "Mu gihe naba nsinzwe urubanza ntabwo bizaba bivuze ko ubutabera buzaba burangiriye aho nzakomeza no mu zindi nkiko zisumbuye kuri urwo ruzaba rwafashe icyemezo kirenganya Abanyarwanda kuko ari bo ndegera nanjye ndimo.”

Bamwe mu bakurikiranye iyo nama ntegurarubanza bari buzuye mu cyumba cy’iburanisha, banyuzagamo bagaseka ibirego bya Manirareba bavuga ko yaje kwisekereza abantu.

Icyakora hari n’abemeza ko uwo mugabo aramutse akomeje gutegura neza urubanza rwe ashobora kuzarutsinda.

Bakabivuga bashingiye ku kuba umuco waragiye wangirika kandi bikozwe n’ibikorwa by’abakoroni baje bitwaje Imana.

Iburanisha ry’urubanza Manirareba aregamo Musenyeri Ntihinyurwa ruzaburanishwa mu mizi yarwo ku itariki ya 30 Ugushyingo 2017; nk’uko byatangajwe n’umucamanza wo mu rukiko rwisumbuye rwa Nyarugenge mu Mujyi wa Kigali.

Linda umaze imyaka 54 azengurika isi yageze i Kigali

Yabitangarije i Kigali nyuma y’amasaha make ageze mu Rwanda mu rugendo rwe arimo rwo kuzenguruka isi kuri moto. Yageze mu Rwanda ku itariki ya 08 Ugushyingo 2017.

Linda ukomoka mu Bwongereza ariko utuye muri Australia ahamya ko amaze imyaka 54 azenguruka isi kuri moto. Yatangiye urugendo rwe rwo kuzenguruka isi mu mwaka wa 1963 akiri inkumi.

Linda avuga ko ari ku nshuro ya kabiri ageze mu Rwanda kuko bwa mbere yarugezemo mu 1974 nabwo akaba yari arimo azengura isi kuri moto.

Agira ati “Nkimara kumva inkuru mbi y’uko u Rwanda rwabayemo Jenoside yakorewe Abatutsi nifuje kongera kuhagaruka nk’uko mubibona.”

Akomeza agira ati “Gusa maze gusura urwibutso nababajwe n’inzira karengane zishyinguyemo ariko kandi nyurwa n’uburyo u Rwanda rukeye rukaba rwarihuse mu iterambere ukurikije ibibazo rwanyuzemo.”

Akomeza avuga ko azabera u Rwanda intumwa nziza y’ibijyanye n’ibyo ubwe yiboneye n’amaso ye.

Ati “U Rwanda ni igihugu nabonyemo isuku ku bantu ndetse naho bagenda mu mihanda, ni igihugu nabonye kigendera ku mategeko ngeranyije n’ibindi nanyuzemo mu myaka 54 ishize. Muzakomereze aho.”

Linda ahamya ko yasanze u Rwanda rurangwa n’isuku

Akomeza avuga ko azamara mu Rwanda ibyumweru bibiri ubundi asubire muri Uganda aho yaje mu Rwanda aturutse. Nyuma yaho ngo nibwo azagurisha moto agendaho ubundi asubire muri Australia.

Ati “Umwaka wa 2017 ugiye kurangira nibwo niteguye gusubira aho ntuye muri Australia, ahantu mperuka nkiri umukobwa muto.”

Yanze kubyara kuko yikundira gutembera

Linda ahamya ko mu rugendo rwo kuzenguruka ibihugu bitandukanye byo ku isi yifashisha ubushobozi bwe bwite.

Avuga ko hari ibihugu ageramo agakora akazi bakamuhemba akabona amafaranga yo gukomeza kubaho.

Atanga urugero avuga ko hari aho yageze akigisha abantu icyongereza bakamwishyura.

Kubera ko azi gucuranga ibyuma bimwe bya muzika hari aho agera akabacurangira bakamwishyura.

Yongeraho ko yanze kubyara ku bushake bwe kugira ngo abana be batazabaho nabi kandi yikundira ingendo zikorewe hirya no hino na Moto.

Linda azi gucuranga umwirongi n’ibindi bicurangisho

Avuga ko izo ngendo amaze gukora imyaka 54 zigamije kumenyana n’abantu bo ku isi n’imico yabo ya gakondo kugira ngo abone uko ayihuza n’imico ye.

Ati “Mu ngendo nkora nshimishwa no guhura n’abantu b’imico itandukanye tukaganira twungurana ibitekerezo biranshimisha kandi muri izo ngendo kuko nashoboye kwandikamo ibitabo bitatu.”

Linda avuga ko kandi muri izo ngendo ze ahura n’ibibazo bitandukanye birimo kwibwa ibikoresho no kurwara.

Ahamya ko ariko izo ngendo yazigiriyemo amahirwe menshi yo guhura n’abantu b’imitima myiza bagiye bamwishimira nawe akabishimira.

Ubusanzwe bimenyerewe ko ba mukerarugendo bazenguruka isi kuri moto baba bafite moto zikomeye kandi zihenze.

Linda we afite moto iciriritse avuga ko yaguze muri Uganda, Amadorali ya Amerika 1000, akabakaba muri miliyoni imwe y’amafaranga y’u Rwanda.

Aha ni mu mwaka wa 1978 ubwo yari ari muri Marocco

Avuga ko kubera amaze imyaka myinshi azenguruka isi, moto yatangiranye zagiye zisaza.

Ahamya ko kandi yafashe ingamba zo kujya agura moto mu gihugu agezemo kuko gutwara ibintu byinshi mu ndege bihenze.

Uko yagize igitekerezo cyo kuzenguruka isi

Linda yavukiye mu Bwongereza. Akiri muto ababyeyi be bimukiye muri Australia. Ni imfura iwabo mu bana bane barimo abakobwa babiri bashatse. Musaza wabo nawe ariko ngo yanze gushaka ku bushake bwe.

Akiri muto ngo yagiye kwiga gutwara ibinyabiziga mu ishuri ry’umukunzi wa murumuna we.

Yize gutwara ibinyabiziga bitandukanye ageze kuri moto ngo yumva biramuryoheye yiyemeza gukomeza kuyitwara.

Linda yatangiye kuzenguruka isi akiri umukobwa w’inkumi

Kubera ko ngo yakuze ari umuntu ukunda kugira amatsiko, ashaka kumenya ahantu hatandukanye, yaje kujyana n’inshuti ze gutembera bari kuri moto biramushimisha yiha gahunda yo gukomeza kuzenguruka mu bihugu bitandukanye ngo arebe uko hameze.

Urugendo rwe rwo kuzengurika isi yarutangiriye mu Burayi.

Uretse kuba Linda ari umukerarugendo, ni umwanditsi w’ibitabo, umuhanzi n’umucuranzi ndetse ni umusizi wabigize umwuga.

Imbuga za interineti akoresha muri izo ngendo ze ni www.lindab.id.au hamwe na www.haefale.de/linda

Linda yakuze ari umwana ukunda gutembera

Andi mafoto menshi kanda hano

Evode Imena (wambaye ikoti ry’umukara) na Ndamage umurega (wambaye ishati y’umweru) hamwe n’ababunganira babiri

Byari mu rubanza rwaberaga mu rukiko rwisumbuye rwa Nyamirambo mu Mujyi wa Kigali, rwabaye kuri uyu wa Gatatu tariki 8 Ugushyingo 2017.

Yisobanuraga ku birego akurikiranweho n’ubushinjacyaha birimo itonesha, icyenewabo no guhimba inyandiko, abihakana avuga ko ibyo ashinjwa byose ari akagambane yakorewe.

Ubushinjacyaha bwagaragaje ko intandaro y’ibyo birego yabaye uruhushya rwo gucukura amabuye y’agaciro rwagombaga guhabwa Kampani yitwa Nyaruguru Mining, ariko ikaza kurwimwa rugahabwa iyitwa Mwashamba ku bwo gutonesha.

Uhushinjacyaha bwanagaragaje ko mu kwimwa urwo ruhushya kwa Nyaruguru Mining hagaragayemo na ruswa, aho Imena Evode yasabye nyiri kampani kuzibwiriza agira icyo amuha undi yabyanga bikamuviramo kudahabwa uruhushya.

Ndamage arasaba indishyi y’akababaro ya miliyoni 686Frw

Evode Imena wafashe hafi igihe cy’isaha irenga yisobanura ku byo akuriranweho, yagaragaje ko ari umwere ko nta n’indishyi n’imwe akwiye kuzatanga bitewe n’uburyo avuga ko arenganamo.

Yagize ati "Njyewe Imena Evode aba Minisitiri bibiri bigeze kuba bankuriye mu kazi bimye uruhushya Nyaruguru Mining ruhabwa Mwashamba kubera ko yari yujuje ibisabwa kandi byari byabonetse mu nzira zemewe n’amategeko."

Yongeyeho ko kuba Uruhushya Mashamba yahawe rwari mu nzira zemewe n’amategeko, ntaho umuntu yahera avuga ko habayemo kumutonesha ngo cyane ko nizo mpushya zitari zasabiwe mu gihe kimwe.

Yunzemo ati" Yaba Nyaruguru Mining ndetse na Mwashamba nta muntu dufite icyo dupfa cyangwa isano iyo ariyo yose usibye iy’ubunyarwanda twese duhuriyeho."

Ati "Akanama kari gashinzwe kwiga dosiye z’abasabye guhabwa impushya ku bw’Uburiganya niko kazanyemo ibi bibazo byo kugonganisha inzego kandi imyanzuro y’ako Ministeri afite uburenganzira bwo kuyivuguruza mu gihe hari ibigomba gukosorwamo."

Yongeye Ati " Kuba ako kanama karabyemeje ko Nyaruguru Mining ihabwa uruhushya si ihame ko bitagombaga kuvuguruzwa na Minisitiri nicyo cyatumye urwo ruhushya rudatangwa".

Ndamage Straton nyiri Kampani ya Nyaruguru Mining yari yitabiriye urubanza, yeregeye indishyi z’uburenganzira yimwe biturutse ku maherere ashingiye ku itoneshwa.

Ati" Kuba akanama gashinzwe impushya ku bucukuzi n’ubushakashatsi ku mabuye y’agaciro karemeje ubusabe bwanjye kandi biga iyo dosiye bakaba bari bayihawe na Minisiteri yagashyizeho ikagaha ubwo bubasha ariko ntibwubahirizwe harimo itonesha ku wundi wahawe ubwo burenganzira kandi atari we wari ubugenewe."

Ndamage asabye ko urukiko ko rwategeka Evode Imena gutanga indishyi z’akayabo ka Miliyoni zisaga 686Frw kubera ingaruka yateje. Isoma ry’uru rubanza ryashyizwe tariki 7 Ukuboza 2017.

Evode Imena ukurikiranweho gufata icyemezo gishingiye ku itonesha yabaye umunyamabanga wa Leta muri Minisiteri y’umutungo Kamere, kuva tariki 26 Gashyantare 2013 akurwa kuri uwo mwanya tariki 4 Ukwakira 2016.

Murekezi Vincent wambaye amapingu akurikiranywe n’ubutabera bwa Malawi ku byaha bya Jenoside yakoreye mu Rwanda

Iki cyifuzo cyatangiwe mu Nteko Ishinga Amategeko y’u Rwanda, umutwe w’abadepite, kuri uyu wa 06 Ugushyingo 2017, ubwo hasuzumwaga ishingiro ry’imishinga y’amategeko ajyanye n’amasezerano yo kohererezanya abahamwe n’ibyaha ndetse n’ababikurukiranyweho hagati ya Repubulika y’u Rwanda na Repubulika ya Malawi.

Aya masezerano yashyiriweho umukono i Lilongwe muri Repubulika ya Malawi ku wa 23 Gashyantare 2017.

Depite Begumisa Safari Theoneste umudepite mu nteko ishinga amategeko y’u Rwanda yasabye ko mu gihe aya masezerano yaba yatangiye gushyirwa mu bikorwa, umucuruzi Murekezi wahungiye muri Malawi yahita yoherezwa mu Rwanda akaburanishirizwa aho ibyaha bya Jenoside yakorewe Abatutsi mu Rwanda yabikoreye.

Yagize ati “ Uyu munsi turangije kuyatora, wenda hari abantu bakiri mu nkiko barimo kuburana nko muri Malawi. Ndibaza niba dufite uburenganzira bwo gukurikirana uko urwo rubanza rugenda .

Ndatanga nk’urugero kuri Murekezi wagiye uhindura za pasiporo ukabona ko ari ibintu by’amafuti, ndetse ugasanga hari ikintu yagiye atanga mu nkiko bikagaragara ko n’igihano yahabwa kizaba kidahagije”.

Abagize Inteko Ishinga Amategeko bari kwiga Imishinga itandukanye y’Amategeko

Umunyamabanga wa Leta muri Minisiteri y’ubutabera ushinzwe itegeko Nshinga n’andi mategeko Evode Uwizeyimana wari uhagarariye Guverinema asobanura iyo mishinga yayo mategeko, yavuze ko atashyiriweho abantu runaka.

Agira ati “Aya masezerano ntabwo areba umuntu runaka ngo namara kuboneka bihite birangira. Ni nk’ayandi mategeko amara igihe kirekire cyangwa se igihugu kikaba gishobora kuyavamo”.

Uwizeyimana yongeyeho ko icyo u Rwanda ruzakora ari ugukurikirana urubanza nk’abandi bose, ariko hatagira ibyaha akurikiranwaho kandi yarabikoreye mu Rwanda, igihugu kikazakomeza kubimukurikiranaho.

Murekezi ubutabera bw’u Rwanda bumukurikiranyeho ibyaha bya Jenoside yakorewe Abatutsi, ibyaha byibasiye inyoko muntu ndetse n‘ubufatanyacyaha mu gukora Jenoside no gucura umugambi wayo, yakoreye mu yahoze ari segiteri Tumba mu karere ka Huye.

Kugeza ubu niwe Munyarwanda wari watangiye kuburanishwa n’ubutabera bwa Malawi, mu gihe muri icyo guhugu ubushinjacyaha bukuru bwoherejeyo impapuro zo guta muri yombi abantu 36 bihisheyo ubutabera kubera uruhare bakekwaho kugira muri Jenoside yakorewe abatutsi mu Rwanda.

Me Evode Uwizeyimana Umunyamabanga wa Leta muri Minisiteri y’Ubutabera ushinzwe itegeko nshinga n’andi mategeko

Abahinzi ntibishimiye serivisi bahererwa mu buhinzi, cyane cyane izibateza imbere

Ubu bushakashatsi buzwi nka “Citizen Report Card 2017” bwashyizwe ahagaragara n’Urwego rw’Igihugu rw’Imiyoborere (RGB), irumurikiye Inteko ishinga amategeko, bwagaragaje ko serivisi z’ubuhinzi n’ubworozi ziri ku mwanya wanyuma.

Ubu bushakashatsi buba bugamije kugaragaza uko abaturage babona imiyoborere n’imitangire ya serivisi hirya no hino mu Gihugu cyane cyane mu bice 15 bifatwa nk’ifatizo ry’ubukungu bw’igihugu.

Prof Shyaka Anastase umuyobozi wa RGB, yavuze ko ubwo bushakashatsi bwerekanye ko serivisi zitangirwa mu buhinzi zishimiwe kugeza kuri 52.5% naho ubworozi buri kuri 56% gusa.

Prof Shyaka Anastase mu kiganiro n’abanyamakuru nyuma yo kumurika ubwo bushakashatsi

Urwego rwa RGB ruwerekanye ko abaturage babajijwe, basubije ko ubuhinzi burimo ibibazo byo kutabona inguzanyo mu ma banki n’ibigo by’imali, ibijyanye no kongerera agaciro ibikomoka ku buhinzi n’ibindi.

Uzabakiriho Elias, umuhinzi mworozi wo mu karere ka Nyamagabe wabigize umwuga kuva mu mwaka wa 1982 yabwiye Kigali Today ko nk’umuntu ukora muri urwo rwego arubonamo ibibazo bitandukanye kandi leta ishobora gushakira umuti bigakemuka.

Yagize ati “Ifumbire ni ingenzi mu buhinzi ariko kugeza na n’ubu umuhinzi aracyagorwa no kubona amafaranga agura yayindi bita ko ari ari ifumbire mvaruganda nka NPK n’izindi."

“Buriya hakozwe ubukangurambaga bufite imbaraga, umuturage akigishwa gukoresha imborera ndetse no kuyitegurira byafasha umuhinzi atiriwe atakaza amafaranga menshi ajya kuyigura.”

Uzabakiriho anenga uburyo igihugu kigitumiza imbuto mu mahanga rimwe na rimwe ugasanga ntibereye nziza umuturage ngo imuhe umusaruro ujyanye n’imvune aba yagize.

Yatanze urugero ati “Nk’ubu imbuto z’ingano, ibigori n’izindi hari zimwe ziva mu mahanga zagera mu Rwanda ugasanga zazanye indwara.

“Hashyizweho uburyo zose zajya zituburirwa mu Rwanda byagabanya amafaranga igihugu gitanga kijya kuzana izo mu mahanga kandi usanga nazo zitatanze umusaruro. Ibyo kandi byanakorwa no ku bwatsi bw’amatungo bugatuburirwa mu Rwanda.”

Ubwo bushakashatsi bwashyizwe ahagaragara mu gihe tariki 01 Ugushyingo 2017 Abadepite basabye ko Minisitiri w’Ubuhinzi n’Ubworozi, Dr Mukeshimana Gerardine agomba gutumizwa mu Nteko Ishinga Amategeko agatanga ibisobanuro ku bibazo bikigaragara mu buhinzi n’ubworozi mu Rwanda.

Babisabye ubwo bagezwagaho raporo ya Komisiyo y’Ubuhinzi n’Ubworozi n’Ibidukikije ku ngendo zari zimaze iminsi zikorerwa mu turere tw’igihugu mu rwego rwo kureba itegurwa ry’igihembwe cya mbere cy’ihinga ndetse n’imikoreshereze y’ibishanga.

Ubushakashatsi bwa RGB bwagaragaje ko umutekano muri rusange wishimiwe n’Abanyarwanda bari ku gipimo cya 92.63%.

Inzego z’umutekano ziyobowe n’Ingabo z’igihugu n’amajwi 99.1% zigakurikirwa na Polisi y’igihugu ifite amajwi 98.1%, hagakurikiraho DASSO ifite amajwi 84.7%.

Umuyobozi mushya wa BPR, Maurice K. Toroitich (ufite micro), umuyobozi w’inama y’ubutegetsi mushya Prof Njuguna Ndung’u (hagati) na Sanjeev Anand wari umuyobozi wa BPR

Abo bayobozi barimo umuyobozi mushya wa BPR, Maurice K. Toroitich n’umuyobozi w’inama y’ubutegetsi mushya Prof Njuguna Ndung’u beretswe abakiriya ku mugoroba wo ku itariki ya 30 Ukwakira 2017.

Maurice K. Toroitich wasimbuye Sanjeev Anand, yavuze ko yiteguye kuzamura urwego rw’ikoranabuhanga iyo Banki iriho hifashishijwe telefoni.

Agira ati “Twifashishije ikoranabuhanga rigezweho turashaka kugeza BPR ku isura nshya twegera abakiriya bacu nk’uko twabitangiye.”

Akomeza avuga ko ubuyobozi bwa BPR buzakomeza guharanira ko Abanyarwanda bose bayishimira kandi bakayibonamo hagendewe ku buryo bahabwamo serivisi.

Yongeyeho ko hirya no hino mu gihugu aho BPR ifite amashami serivisi zayo zizibanda mu guhaza ibyifuzo by’abakiriya. Niho yahereye asaba abayigana kuyigirira icyizere.

Banakase "Gateau"

Sanjeev Anand wari umuyobozi wa BPR yashimye ubufatanye bwabayeho hagati ye n’abo bakoranaga.

Agira ati “Ubwo nari umuyobozi wa BPR muri iki gihugu nahagiriye ibihe byiza byinshi birimo no kugwiza inshuti ntabwo nzabajya kure nzakomeza mbabe hafi.”

Umuyobozi mushya w’inama y’ubutegetsi ya BPR, Prof Njuguna Ndung’u yijeje abakiriya ba BPR ko mu byo ishyize imbere ari imikoreshereze y’ikoranabuhanga mu gutuma boroherwa no kubona serivisi basanzwe bahabwa.

Agira ati “Tuzakomeza kubaha serivisi nziza musanzwe mubona ariko hiyongereho n’akarusho mu rwego rw’ikoranabuhanga rigezweho.”

Abakiriya ba BPR basusurukijwe b’umuhanzi Mani Martin

Banki y’abaturage y’u Rwanda (BPR) yatangiye ari koperative yari ifite intego yo kuzamura imibereho myiza y’abanyamuryango bayo mu by’ubukungu,uko yagiye itera imbere byaje gutuma igurwamo imigabane n’ikigo cya Atlas Mara.

Mu mashami yayo ari hirya no hino mu gihugu,kuri ubu hiyongeraho icyicaro cyayo gikuru kiri kubakwa mu Mujyi wa Kigali.

Abagize inteko ishinga amategeko bumijwe n’ikibazo cy’umwana watawe na nyina agasigara arererwa mu kiraro cy’ingurube

Ikibazo cy’uwo mwana cyazamuwe ubwo Komisiyo y’Igihugu ishinzwe uburenganzira bwa Muntu mu Rwanda yagezaga ku bagize Inteko ishinga amategeko y’u Rwanda, raporo y’ibikorwa byayo byo mu mwaka wa 2016-2017 na gahunda y’ibikorwa by’umwaka wa 2017-2018, kuri uyu wa mbere tariki 30 Ukwakira 2017.

Uwo mwana amaze gutabwa na nyina, yafashwe nabi atangira kugaragaza ibibazo by’imirire mibi. Abadepite babwiwe ko ingingo z’umubiri we zatangiye kononekara, biba ngombwa ko ajyanwa kwa muganga.

Nyina yafashe icyemezo cyo guta uwo mwana bitewe n’uko nyirakuru atamwemeraga, ahitamo kumushyira nyina.

Bimwe mu byababaje abagize inteko birimo kuba muri iyo raporo havugwamo ko Akarere ka Muhanga kageneye Nyirakuru w’uwo mwana ibihumbi 100Frw, mu gihe ari we wagize uruhare mu kurerera uwo mwana mu kiraro cy’ingurube.

Imitwe yombi y’abagize inteko ishinga amategeko bari bateranye kugira ngo bagezweho raporo ya komsiyo ishinzwe uburenganzira bwa muntu

Depite Mukakarangwa Clotilde yagize ati “Hari aho bigaragaga ko Akarere ka Muhanga ngo katanze ibihumbi 100Frw kabiha uriya nyirakuru Esperance kandi bigaragara ko yamufashe nabi akaba mu kiraro cy’ingurube.”

Yakomeje agira ati “Ese ayo amafaranga yari ayo kubaka aho aba? Ese uriya muntu watinyutse akamushyira hariya azayakoresha agire icyo amumarira? Akarere ka Muhanga kashingiye kuki gatanga ariya mafaranga?”

Depite Muhongayire Christine nawe yagaragaje intimba atewe n’imibereho y’uwo mukobwa yibaza ku butabera uwo mwana yahawe kugira ngo arenganurwe.

Ati “Ni ukuri iri ni ihohoterwa rikomeye! Ngo na Nyirakuru baramufunze barangije barongera baramufungura. ”

Yasabye ko akarere gakwiye gushakira uwo mwana, uri mu kigero cy’imyaka 17 ahandi aba aho kugira ngo akomeze abane na nyirakuru kandi ari we watumye abaho nabi.

Umuyobozi wa Komisiyo y’Igihugu y’Uburenganzira bwa muntu, Nirere Madeleine yasobanuye ko icyo kibazo cyatangiye gukurikiranwa ku buryo kizasigira isomo abantu bafata abana nabi.

Ati “Twagezeyo dusanga icyihutirwa ari ukumujyana kwa muganga kuko yari afite imirire mibi. Tumujyana mu bitaro,akarere kemera kumufasha gaha Nyirakuru ibimutunga.Iyo bajyaga kugaburira uwo mwana, bafataga ibiryo bakamujugunyira nkujugunyira imbwa aho yabaga bari barahafunze.”

Yatangaje ko urubanza uwo nyirakuru akurikiranywemo gufata nabi umwuzukuru we ruzaba rwatangiye kuburanishwa mu minsi iri imbere. Yavuze ko na nyina w’uwo mwana nawe yamaze kuboneka akazahamagazwa mu rubanza.

Nirere yasobanuye ko uwo mwana yafashwe akajyanwa mu kigo cyita ku bana bafite ubumuga cyo mu karere ka Muhanga, ku buryo hari icyizere ko ubuzima bwe buzongera bukamera neza.

Abasenateri bizeje ubuvugizi CNLG kugira ngo ibashe kwegurirwa inyandiko zose Zijyanye na Jenoside yakorewe Abatutsi

Icyo cyifuzo cyagejejwe kuri komisiyo ya Sena y’u Rwanda ishinzwe Imibereho myiza y’Abaturage, uburenganzira bwa muntu n’ibibazo by’abaturage kuri uyu wa 27 Ukwakira 2017.

Abasenateri bagize iyi komisiyo bari muri gahunda yo kumenya no kugenzura ibikorwa bya Guverinoma, mu bijyanye n’ishyinguranyandiko n’amasomero mu Rwanda.

Umunyamabanga Nshingwabikorwa wa Komisiyo y’Igihugu yo kurwanya Jenoside Dr Bizimana Jean Damascène yavuze ko kuba itegeko ryarabahaye ububasha bwo kubika inyandiko za Gacaca, bikwiye ko n’izindi nyandiko zose zo mu manza zirebana na jenoside zikwiye kwegurirwa CNLG.

Yagize ati “ Hari imanza nyinshi zagiye ziba guhera muri 1995 ziri hirya no hino mu nkiko. Zije zikajya hamwe zaba umutungo munini ku bashakashatsi baza hano bashaka kumenya byinshi kuri jenoside yakorewe Abatutsi mu Rwanda”.

Dr Bizimana yereka Senateri Musabeyezu zimwe mu nyandiko zibitswe na CNLG

Dr Bizimana yanasabye ko iyo komisiyo ya Sena ikwiye kureba uburyo n’izindi nyandiko zitari mu nkiko ariko zifite aho zihuriye na Jenoside yakorewe Abatutsi mu Rwanda, zayegurirwa kubera ko ari nayo yabiherewe ububasha.

Ati “ Tumaze kugira ubushobozi n’ubumenyi bwo kubika neza amadosiye ajyanye na Jenoside.”

Yakomeje avuga ko kugeza ubu CNLG yamaze kubika inyandiko za Gacaca zingana na Miliyoni 30 mu buryo bw’ikoranabuhanga rigezweho, hagamijwe kuzirinda gukomeza kwangirika.

CNLG ikaba yarabifashijwemo n’umuryango utari uwa Leta Aegis Trust usanzwe ucunga urwibutso rwa Jenoside rwa Kigali.

Senateri Narcisse, Musabeyezu aganira na Kigali Today yatangaje ko icyo cyifuzo cya CNLG gifite ishingiro avuga ko biteguye kugikorera ubuvugizi kugira ngo hashyirwe hamwe amakuru ajyanye na Jenoside yakorewe Abatutsi mu Rwanda.

Bimwe mu bitabo biri mu isomero rya CNLGbivuga kuri Jenoside yakorewe Abatutsi

CNLG ivuga ko kubika inyandiko zose zirebana na Jenoside yakorewe Abatutsi hifashishijwe ikoranabuhanga, bizatuma zibikwa mu buryo burambye ndetse mu gihe hakenewe gukorwa ubushakashatsi bikaba byakwihuta.

Nkusi Juvenal, Perezida wa komisiyo yo mu nteko ishinzwe gukurikirana umutungo wa leta (PAC)

Icyo ni icyifuzo cyaragajwe na bamwe mu Badepite ku gicamunsi cyo kuri uyu wa gatatu tariki 25 Ukwakira 2017, ubwo Komisiyo ishinzwe kugenzura imikoreshereze y’ingengo y’imari ya Leta (PAC) yagezaga ku nteko rusange y’Abadepite raporo y’igenzura ku ikoreshwa ry’ingengo y’imari y’imyaka ya 2012/ 2013 na 2013/ 2014.

Nkusi Juvenal, Perezida wa PAC yagaragarije abagize inteko rusange y’Abadepite ko mu mwaka wa 2012/ 2013, Inteko ishinga amategeko yakoze imyanzuro 28 muri yo 13 gusa ihwanye na 46% akaba ari yo ishyirwa mu bikorwa.

Abadepite bagendeye kuri ibyo bipimo by’imyanzuro yashyizwe mu bikorwa iri ku kigero cyo hasi, bagaye uburyo ingamba ziba zafashwe mu rwego rwo kunoza imicungire y’umutungo wa leta zidashyirwa mu bikorwa kandi ugasanga ibigo bimwe na bimwe nibyo bihora bigaruka.

Abadepite basabye ko PAC ihabwa ububasha burenze ubwo gutanga inama na raporo

Depite Mporanyi Theobald wabimburiye Abadepite 9 batanze abandi gusaba ijambo yanenze ibigo bihora bishyirwa muri raporo y’imikoreshereze mibi y’umutungo wa Leta.

Agira ati “Njye numva nkurikije ibyo tumaze kubona n’uko twashyiraho itegeko kuko, nitwe tuyashyiraho tugaha PAC ububasha bw’ubugenzacyaha n’ubushinjacyaha kuko niba tugenzura tukerekana ibintu uko bimeze,twajya kureba tugasanga ishyirwa mu bikorwa ririmo amakosa.

Umuntu yakwibaza impamvu bahora bagaruka imbere yacu ntitugire icyo tubakoraho twarabyerekanye kuki tutashyiraho ubwo bubasha kandi ari twe dushyiraho amategeko.”

Mukamurangwa Sebera Henriette we yavuze ko niba inkiko zisanzwe zarananiwe gukemura ikibazo cyihariye cy’ubujura no gusesagura umutungo wa Leta hakwiye kujyaho ubucamanza bwihariye.

Ati “Nk’uko twashyizeho Inkiko Gacaca ku kibazo cyihariye na hano ikibazo cyihariye cy’ubujura no gusesagura umutungo, twashyiraho ubucamanza bwihariye.”

PAC yaragaragarije abagize inteko rusange y’Abadepite ko muri rusange hari imanza 378 zijyanye n’imikoreshereze mibi y’imari n’umutungo wa Leta muri zo haburanywe imanza 78, Leta itsinda 68 mu gihe izisigaye kiziri mu nkiko.

Bamwe mu bagize inteko Ishinga amategeko y’u Rwanda umutwe w’abadepite

Ubwo busabe bwatanzwe kuri uyu wa Kabiri tariki 24 Ukwakira 2017, ubwo Umunyamabanga wa Leta muri Minisiteri y’ubutabera ushinzwe ibyerekeye Itegeko nshinga n’andi mategeko, Evode Uwizeyimana yari imbere y’inteko ishinga amategeko.

Yayigezagaho ibijyanye n’umushinga w’itegeko rikumira kandi rihana iyezandonke (Money laundering) no gutera inkunga iterabwoba ryo muri 2008 ririmo kuvugururwa.

Manirarora Annoncée, Umudepite mu Inteko ishinga amategeko y’u Rwanda yagaragaje impungenge atewe no kuba icyaha cy’iyezandonke kitari mu byaha bidasaza kimwe n’ icyaha cya jenoside, ibyaha byibasiye inyokomuntu n’ibyaha by’intambara n’icyaha cyo kunyereza umutungo wa Leta cyongerewe mu mategeko ahana y’u Rwanda arimo kuvugururwa.

Yagize ati “Ushishoje neza wakabonye ko icyaha cy’iyezandonke gikwiye kuba icyaha kidasaza kuko gifitanye isano na ruswa kandi ruswa ifite ingaruka zikomeye ku bukungu bw’igihugu.

“Nkaba natekerezaga ko mu gihe cyo gusuzuma uyu mushinga harebwa ibyaha n’ibihano iki cyaha cyakagombye kuba icyaha kidasaza kuko harimo amayeri menshi ashobora no kuzavumburwa bitinze. Mu gihe cyo gusuzuma uyu mushinga mu buryo bwimbitse bizarebweho neza.”

Uwizeyimana ufite mu nshingano ze ibyerekeye itegeko nshinga n’andi mategeko yavuze ko bidakwiye ko u Rwanda rugwa mu mutego wo kugena ko ibyaha hafi ya byose bidasaza.

Ati “Ubu ngubu tugomba kuzitondera uyu mutego wo kuvuga ngo ibyaha bidasaza kuko dushobora kuzisanga buri wese avuze ikimubabaje ko cyaba icyaha kidasaza.

“Ubu ngubu umuntu araza akakubwira ati ihohoterwa ni icyaha kidasaza undi nawe akaza akakubwira ati iterabwoba, iterabwoba ni ikintu kugeza ubu kitagira igisobanuro ku rwego mpuzamahanga kuko abarikora usanga bavuga ko rifite impamvu zumvikana’’.

Uwizeyimana yasobanuye ko icyakozwe mu mategeko ahana ibyaha mu Rwanda, hagaragajwe ko mu gihe cyose uwakoze icyaha atarakurikiranwa, nta wavuga ko icyo cyaha cyashaje.

Avuga ko kuba umuntu mbere yarakoraga icyaha akigendera hashira imyaka runaka akazongera akugaruka atagikurikiranywe bitazongera kubaho mu mategeko ahana arimo kuvuguruwa ko ahubwo azajya akuriranjwa igihe cyose abonekeye.

Itegeko rigena ko iyezandonke ari umutungo ukomoka ku kintu cyose amategeko ateganyije nk’icyaha.

Urugero rw’iyezandonke ni nko gukomora umutungo ku bucuruzi bw’ibiyobyabwenge. Aho bimenyekaniye uwo mutungo ugomba gufatwa n’ukekwaho icyo cyaha agakurikiranwa.

Uwizeyimana Evode, umunyamabanga wa Leta muri Minisiteri y’ubutabera ushinzwe ibyerekeye Itegeko Nshinga n’andi mategeko avuga ko abakora uburaya bafatwa nk’inzira akarengane

Inteko ishinga amategeko,umutwe w’Abadepite yatoye umushinga w’iryo tegeko ryemejwe n’abadepite bari mu cyumba cy’inteko rusange yateranye ku gicamunsi cyo kuri uyu wa kabiri tariki 24 Ukwakira 2017.

Uwizeyimana Evode,Umunyamabanga wa Leta muri Minisiteri y’ubutabera ushinzwe ibyerekeye Itegeko nshinga n’andi mategeko, wari uhagarariye guverinoma, niwe wagejeje ku Badepite ibijyanye n’umushinga w’iryo tegeko.

Yavuze ko icyaha cy’icuruzwa ry’abantu ari icyaha gikomeye kandi gihungabanya uburenganzira bwa muntu.

Agira ati “Leta y’u Rwanda yahaye uburemere bukomeye iby’icyo cyaha gikomeje kugenda cyongera ubukana kandi ishyiraho ingamba zo kukirwanya hafashwa ababa bagizweho ingaruka na cyo.”

Akomeza avuga ko n’ubwo amategeko ahana ibyaha mu Rwanda ahana icyo cyaha hari hakigaragaramo icyuho cyo kutarengera abo cyagizeho ingaruka no kugena uburyo bakwitabwaho.

Yagaragaje ko umuntu wicuruza iryo tegeko riri gutegurwa ritamuhana kuko aba ari inzirakarengane ibihe byose.

Ati “Muri iri tegeko icyarebwe ni umuntu umucuruza cyangwa uwamushoye muri ibyo bikorwa by’uburaya”.

Yongeyeho ko uburaya bugaragara muri uwo mushinga w’itegeko busobanura neza ko umuguzi w’indaya ari we ugomba guhanwa hatitawe ku kuba ari umugabo cyangwa umugore.

Ati “Umuguzi w’indaya ntabwo yahanwaga ni cyo cyatumye tuvuga tuti reka duhangane n’abagura turebe ko bitazagabanya abigurisha.

Niba dushushubikanya indaya zihagaze ku muhanda uriya muntu we uparika imodoka akayitwara ku mugaragaro, abantu bakabyihorera byo byitwa iki? Abashaka kwiterera urwenya babyita lifuti ariko ntabwo nibaza ko ariko bimeze.”

Abadepite batoye umushinga w’Itegeko ryerekeye gukumira, kurwanya no guhana icuruzwa ry’abantu no gushakira inyungu mu bandi

Uwizeyimana Evode, Umunyamabanga wa Leta muri Minisiteri y’ubutabera ushinzwe ibyerekeye Itegeko nshinga n’andi mategeko yamaze impungenge Abadepite asobanura ko uwashoye undi mu buraya n’ugura indaya bazabihanirwa.

Nyuma yo kumva ibyo bisobanuro, Abadepite bari mu Nteko rusange bemeje ishingiro ry’umushinga w’itegeko ryerekeye gukumira, kurwanya no guhana icuruzwa ry’abantu no gushakira inyungu mu bandi.

Umuyobozi w’ihuriro ry’abaganga batera ikinya mu Rwanda (RAA) Alexis Mutangana

Umuyobozi w’ihuriro ry’abaganga batera ikinya mu Rwanda (RAA) Alexis Mutangana avuga ko icyo gitabo kizafasha mu gukemura amwe mu makosa yabonekaga muri uwo mwuga arimo kuba hari n’abakoraga ibyo badafitiye ubushobozi.

Ati “Byagiye bigaragagara ko hari ubwo umuntu asabwa gukora ibirenze ubushobozi bwe ndetse hari n’ubwo ashobora gusabwa gukora ibyo adafitiye ububasha cyangwa uburenganzira.”

Arongera ati “ubu rero twakoze igitabo gikubiyemo amategeko cyangwa uburyo bw’imikorere ku buryo umuganga utera ikinya agomba kuba afite aho ahera naho ugarukira, akamenya ibyo akora n’ibyo yirinda kugira ngo atazavaho akora amakosa”.

Mutangana yongeraho ko kuba ubuzima bw’umuntu buhenze ibyo bisaba ko umuntu wese ugiye kugira icyo abukoraho mu buvuzi agomba kuba abifitiye ubushobozi buhagije bugaragaza ibyo yemerewe n’ibyo atemerewe.

Umukozi wa Minisiteri y’ubuzima Alphonsine Mukamunana yabwiye Kigali Today ko ishyirwaho ry’icyo gitabo ku bakora umwuga wo gutera ikinya mu Rwanda bizakemura amakosa yabonekaga kuri bamwe bakoraga ako kazi kwa muganga.

Ati “Iyi ni intambwe nziza cyane kuko izagabanya akajagari kuko buri wese azaba azi aho ahera n’aho agarukira mu bumenyi bwe bwo gutera ikinya”.

Banditse igitabo kigenga imikorere y’abatera ikinya

Ngiruwonsanga Pascal,Umuyobozi w’ibitaro by’Akarere ka Nyanza avuga ko kuba icyo gitabo kizagaragaza imirongo migari y’ibyo utera ikinya akwiye gukora bitewe n’urwego rwe, bizagabanya impanuka za hato na hato zagaragaraga nko kuba umurwayi yaterwa ikinya ntakivemo.

Icyo gitabo cy’amapaji 40 cyanditswe n’ubuyobozi bw’ihuriro ry’abaganga batera ikinya mu Rwanda ku bufatanye n’urugaga rw’Abakora imirimo ishamikiye ku buvuzi (RAHPC).

Bamporiki Eduard Umuyobozi w’itorero ry’igihugu

Byasabwe n’umuyobozi w’itorero ry’igihugu, Bamporoki Edouard mu biganiro byamuhuje n’Abasenateri bagize komisiyo y’ubutwererane, ububanyi n’amahanga n’umutekano, kuri uyu wa 23 Ukwakira 2017.

Muri icyo kiganiro cyabereye ku cyicaro gikuru cy’itorero ry’igihugu, Bamporiki yagaragarije abo Basenateri ko kuba abantu bafunguwe muri za gereza zo mu Rwanda bahita bajya mu muryango Nyarwanda, ari ibintu abonamo ikibazo gikwiye gushakirwa umuti bakajya babanza kunyuzwa mu itorero.

Yagize ati “Gufata umuntu wafunzwe imyaka 20 akava muri gereza yinjira mu rugo asanga umwana n’umugore twatoje bafite imyumvire ifite aho igeze ni ikibazo. Ikindi tubona nk’ikibazo ni uko kuba umuntu arekurwa akava muri sosiyete y’abakoze Jenoside n’abakiyihakana bikaba nk’aho ari bo bamuha umugisha mbere yo gusubira mu rugo ari ikibazo".

Umuyobozi w’itorero ry’igihugu yavuze ko adahakana ko muri za gereza bahabwa inyigisho, ariko izo nyigisho zifite ingorane zazo kuko uwo bazihaye ararana na wa wundi uhakana cyangwa wakoze jenoside bakazatandukana ari uko arangije ibihano bye.

Ati “ Twe nk’itorero biratugarukira tugatekereza ukuntu uwo mugororwa urangije ibihano bye yasubira mu muryango Nyarwanda akitwara neza, ariko hatabayeho kuva muri gereza uhitira mu rugo”.

Bamporiki yagaragaje ko icyo cyifuzo kikibangamiwe n’ibibazo by’amikoro bityo asaba Abasenateri gukora ubuvugizi,kugira ngo ingengo y’imari ingana na miliyoni 400 Frw ku mwaka ihabwa iyo komisiyo ishobore kongerwa, bitewe n’ibikorwa byinshi yifuza gukora bigarurira indagagaciro na kirazira bamwe mu Banyarwanda bataye.

Perezida wa Komisiyo y’ububanyi n’amahanga, ubutwererane n’umutekano muri, Sena Rugema Michel yizeje ubuvugizi komisiyo y’igihugu y’itorero

Perezida wa Komisiyo y’ububanyi n’amahanga, ubutwererane n’umutekano muri Sena Rugema Michel yavuze ko we na bagenzi be bazakorera ubuvugizi icyo cyifuzo cya Komisiyo y’itorero ry’igihugu.

Uruzinduko rw’abo Basenateri rwari mu rwego rwo kumenya no kugenzura ibikorwa bya Guverinoma mu gushyira mu bikorwa ihame remezo ryo gukumira no guhana icyaha cya jenoside, kurwanya ihakana n’ipfobya no kurandura burundu ingengabitekerezo ya Jenoside n’ibyo igaragariramo byose.

Abagize inteko ishinga amategeko basaba ko HRW yasaba imbabazi Abanyarwanda

Ibyo byatangajwe ubwo abagize inteko ishinga amategeko y’u Rwanda imitwe yombi hamwe na Komisiyo y’Igihugu y’Uburenganzira bwa Muntu baganiraga ku iperereza ry’iyo komisiyo rishingiye kuri Raporo ya HRW, kuri uyu wa kane tariki ya 19 Ukwakira 2017.

HRW iherutse gushyira hanze raporo ishinja inzego z’umutekano z’u Rwanda kwica abashinjwa ubujura abandi ikabakorera iyicarubozo.

Iyo Raporo yahawe umutwe ugira uti"All Thieves must be killed", yatangiye gukorwa kuva mu 2003 kugeza mu 2016.

Iyi raporo yasohotse muri Nyakanga 2017 ivuga ko hari Abanyarwanda bishwe n’inzego z’umutekano zirimo abasirikare, abapolisi na DASSO.

Komisiyo y’uburenganzira bwa muntu mu Rwanda yeretse inteko ishinga amategeko ko abo bantu HRW yebeshye ko bishwe hari abakiriho.

Hanahishuwe ko bamwe mu bakuweho amakuru y’ibihuha bavanwaga mu byaro byo mu turere twa wa Rubavu na Rutsiro bakaza i Kigali bakabaha amafaranga, ibintu abagize inteko ishingamategeko bagaragaje ko nta bunyamwuga burimo.

Kubera iyo mpamvu, abagize inteko ishinga amategeko basaba ko HRW yasaba imbabazi umuryango nyarwanda by’umwihariko abavuzwe muri iyo raporo.

Inteko ishinga amategko kandi yasabye Guverinoma y’u Rwanda gushakira abunganira abo raporo ya HRW ivuga ko bapfuye kandi bakiriho kugira ngo bayikurikirane mu nkiko kubera ko bahungabanyijwe n’ibinyoma bikubiye muri iyo raporo.

Hasabwe kandi ko ubufatanye bwari hagati ya HRW n’u Rwanda buseswa niba itemeye kwisubiraho ngo isabe imbabazi.

Hari n’abadepite bifuje ko bazenguruka igihugu bamagana HRW mu baturage bagezweho na raporo y’ibihuha yakoze.

Inteko ishinga mategeko irasaba kandi Guverinoma y’u Rwanda kuyigaragariza icyo yabikozeho mu gihe kitarenze iminsi mirongo 30.

Umuvunyi mukuru, Anastase Murekezi yeretse inteko ishingamategeko uburyo inkiko zimwe zikijenjeka ku cyaha cya ruswa

Yabitangaje ubwo yagezaga raporo y’ibikorwa by’umwaka wa 2016-2017 na gahunda y’ibikorwa 2017-2018, ku bagize inteko ishinga amategeko imitwe yombi ku wa mbere tariki 16 Ukwakira 2017.

Umuvunyi Mukuru avuga ko mu madosiye bakurikiranye basanze hari bamwe bashinjwaga ruswa bagizwe abere mu buryo budasobanutse.

Agira ati “Hari miliyoni 12RWf zashyizwe na rwiyemezamirimo kuri konti y’umugore w’uwahoze ari umunyamabanga Nshingwabikorwa w’Akarere ka Rutsiro yagombaga,uwo mugore akaba yaragombaga kuyahaho uwahoze ari umuyobozi w’akarere icyo gihe.”

Akomeza agira ati “Ariko urukiko rw’ibanze rwafashe icyemezo ko abaregwa badahamwa n’icyaha rubagira abere mu gihe hari ibimenyetso bigizwe na konti yanyujijweho ayo mafaranga n’impapuro zakoreshejwe mu kubitsa no kubikuza.”

Akomeza avuga ko atiyumvisha uburyo uwatanze ayo mafaranga n’umwe mu baregwa babyiyemerera ariko urukiko rukarengaho rukabarekura, umwe muri bo agatoroka.

Abagize inteko ishinga amategeko imitwe yombi banagaragarijwe ko hari n’indi dosiye yarimo ruswa y’ibihumbi 900RWf yatanzwe inyujijwe kuri Konti y’umwe mu baregwa, wahoze ari umunyamabanga Nshingwabikorwa w’Umurenge wa Nyundo mu Karere ka Rubavu.

Umuvunyi mukuru agira ati “Iyo ruswa yari yayihawe n’uwo yari yahaye isoko ryo kubaka amashuri ariko urukiko rukuru, urugereko rwa Musanze rwarajuririwe abari bakatiwe rubagira abere ruvuga ko ruswa igomba gutangwa mu ibanga rikomeye bityo ko abaregwa atari injiji ku buryo bari gutanga ruswa bashyize amafaranga kuri konti ku buryo byagaragarira buri wese.”

Abagize Inteko ishinga amategeko bavuga ko ikibazo cy’inkiko zirekura abahamwe na ruswa bazagishakira umuti

Urwego rw’umuvunyi ruvuga ko ruri mu ihurizo ryo kumenya niba ruswa yanyujijwe kuri konti y’umuntu runaka itazajya ikurikiranwa.

Abagize inteko ishinga amategeko imitwe yombi bijeje umuvunyi mukuru ko ibyo bibazo kimwe n’ibindi bigiye kwigwaho bigashakirwa umuti.

Agira ati "Ni ukuzicarana n’abakuriye urwego rw’ubutabera, urwego rw’umuvunyi ndetse n’ubushinjacyaha bukuru hakigwa uburyo abo baba bagizwe abere hakumirwa itoroka."

Akomeza agira ati "Hagakorwa iperereza umucamanza bigaragara ko yitwaje ihame ryo guca urubanza akurikije uko abyumva agamije kugira uwo akingira ikibaba nawe yajya abibazwa."

Akomeza avuga ko kuba ruswa inyuzwa kuri konti na byo ari ibanga rikomeye ngo kuko buri wese atapfa kumenya ayo umuntu yashyize kuri konti y’umuntu runaka mu buryo bumworoheye.

MINISANTE ihamya ko mu bitaro hakigaragara abarwayi banga guhabwa amaraso

Mu mezi abiri ashize mu bitaro bya Ruhengeri, hagaragaye umubyeyi wabyariye muri ibyo bitaro atakaza amaraso menshi, abaganga bafata umwanzuro wo kumwongerera amaraso ariko arabatsembera.

Uwo mubyeyi utarifuje ko dutangaza amazina ye, yavuze ko imyemerere ye itamwemerera guterwa amaraso. Ahamya ko ari umuhamya wa Yehova.

Nyuma ariko hiyambajwe ubuyobozi bumufasha kumva akamaro ko guterwa amaraso, nyuma yemera kuyaterwa.

Umuvugizi wa Minisiteri y’ubuzima mu Rwanda, Malick Kayumba yatangarije Kigali Today ko ikibazo cya bamwe mu Banyarwanda banga guterwa amaraso kiriho.

Gusa ariko avuga ko kugira ngo Umunyarwanda abeho neza agomba kuba afite amagara mazima.

Agira ati "Kugira ngo umuntu akomeze kuhaho yemera n’Imana ye ni uko agomba kuba ari muzima ariko turacyafite ikibazo cy’abantu bamwe na bamwe kubera imyemerere yabo batemera ko bahabwa amaraso mu gihe ari indembe mu bitaro."

Akomeza agira ati "Ibyo biracyasaba imbaraga nyinshi z’ubukangurambaga ariko niko bigomba kugenda kuko kwigisha ari uguhozaho."

Akomeza avuga ko batari bakora ubushakashatsi ngo hamenyekane umubare w’abantu banga guterwa amaraso cyangwa abagizweho ingaruka no kwanga guterwa amaraso.

Kayumba Malick avuga ko umurwayi aterwa amaraso yabanje kubyumvikanaho na muganga.

Muganga ugiye kuyamutera ahabwa uburenganzira butangwa nabo mu muryango we mu gihe bigaragara ko adafite ubushobozi bwo kwifatira icyemezo cyangwa afite ikibazo cy’uburwayi bukomeye.

Ati "Gufata icyemezo cyo gutera umuntu amaraso kiri mu byo muganga asabira uburenganzira nyir’ubwite cyangwa abo mu muryango we gusa hari bamwe banga gutanga ubwo burenganzira ari naho ikibazo kiri kugeza ubu."

Yakwemera agapfa aho guterwa amaraso

Abahamya ba Yehova ni bamwe mu bavugwaho kwanga guterwa amaraso igihe barembye.

Musabyimana Julius, usengera mu idini ry’Abahamya ba Yehova avuga ko nawe adashobora guterwa amaraso kabone n’iyo yaba arembye.

Agira ati "Ndaguhamiriza neza ko ntashobora guhabwa amaraso icyakora hari uburyo bwo kuvurwa hadakoreshejwe amaraso bukoreshwa mu kuvura abarwayi b’Abahamya ba Yehova ubwo njye nibwo nemera butabonetse nakwemera ngapfa."

Akomeza avuga ko mu gihe muganga yaba abyirengagije akamutera amaraso, bibaye ngombwa ashobora kwitabaza inkiko akamukurikirana.

Icyo amategeko y’u Rwanda abivugaho

Abanyamategeko bo mu Rwanda bahamya ko nta tegeko ririho rihana umuntu warokoye ubuzima bw’undi.

Impuguke mu mategeko akaba yunganira abantu mu mategeko, Me Karinganire Ignace Steven avuga ko itegeko nshinga ry’u Rwanda ryo muri 2015 mu ngingo yaryo ya 13 hari aho rivuga ko umuntu ari umunyagitinyiro, Leta n’izindi nzego zose zayo zigomba kumwitaho.

Abantu batandukanye batanga amaraso yo gufasha indembe kwa muganga

Akomeza avuga ko nta muntu ugomba kwishingikiriza imyemerere ye kuko Leta y’u Rwanda idashingiye ku idini.

Ahubwo ngo icyo igamije ni uguteza imbere Abanyarwanda nk’uko bigaragara mu ngingo ya kane y’itegeko nshinga rya Repubulika y’u Rwanda ryo muri 2003 ryavuguruwe mu 2015.

Me Karinganire avuga ahubwo ko kwanga gutabara umuntu uri mu kaga ari cyo cyaha gihanirwa.

Ati « Ntaho umuganga wakijije umuntu uri mu kaga ashobora gukurikiranwa kuko n’ubwo umuntu yapfa nta burangare yabigizemo adashobora gukurikiranwa. »

Abahamya ba Yehova ku isi hose ntibemera gutanga amaraso, kuyahabwa, kujya mu gisirikare, kujya mu mirimo ya Leta, kutajya muri politiki n’ibindi nk’uko bigaragara ku rubuga rwabo rwa interineti.

Uyu munyeshuri ari gukora "Drone" azashyira hanze muri 2018

Uyu munyeshuri wiga muri Kaminuza y’u Rwanda (UR) muri Koleji y’ubumenyi n’ikoranabuhanga, atangaza ibi mu gihe yatangiye gukora indege nto itagira umupilote izwi ku izina rya “Drone”.

Nteziryayo w’imyaka 22, uvuka mu Karere ka Rwamagana, wiga mu mwaka wa kabiri mu ishami ry’ibijyanye n’iby’ingufu (Mechanical Engineering and energy) yabwiye Kigali Today ko inzozi zo gukora indege yazigize afite imyaka umunani y’amavuko.

Agira ati “Igitekerezo cyo gukora indege cyatangiye mu bwana icyo gihe ngakora imodoka ariko nkumva sinyuzwe. Aho ngereye muri Kaminuza nibwo nashatse gukabya izo nzozi maze nkora indege nto idagira umupilote.”

Drone ari gukora ni aho igeze. Aracyashyiraho ibikoresho

Akomeza avuga ko ari mu mwaka wa mbere wa Kaminuza yakoze indege nto itagira umupilote iraguruka ariko kubera ko hari ibyo yaburagaho byatumye atangira umushinga wo gukora indi iteye imbere mu ikoranabuhanga, ariyo ari gukora ubu.

Ibyo byose abifashwamo n’abafatanyabikorwa yagejejeho umushinga we barimo ikigo kitwa FAB LAB gikorera mu Rwanda.

Abo nibo bamufasha kubona ibikoresho byose akoresha iyo “Drone”, ubundi bumenyi bwo gukora izo ndege akabubona yifashishije interineti. Ibikoresho bimwe yifashisha harimo ibikarito, amadebe, za dinamo n’ibindi.

Nteziryayo ahamya ko iyo ndege itagira umupilote ari gukora azayimurika mu mpera z’umwaka wa 2018.

Ati “Mbere ntangira gukora iriya ndege nto naje kongera nkavugurura nta baterankunga nari mfite kandi narayikoze mbigeraho.”

Akomeza agira ati “Ubu mfite abaterankunga kandi nizeye neza ko inzozi zanjye zizaba impamo ngakora indege nagambiriye kuva mu bwana bwanjye.”

Bimwe mu bikoresho azashyira kuri iyo "Drone"

Dusabe Miriam, umuyobozi mukuru w’ikigo cya FAB LAB gikorera mu Rwanda ari nacyo gikurikiranira uwo musore, avuga ko bafasha ababagana bafite imishinga y’ikoranabuhanga.

Agira ati “Kugeza ubu dufite imishinga 10 ubona ko ifatika tuyitera inkunga y’ibikoresho ndetse tukabashakira n’abantu b’impuguke kugira ngo bazagere kubyo bashaka batagize ikibazo cy’ubuhsobozi buke.”

Iyo ni Drone yakoze bwa mbere

Abagize EASTECO basuye uruganda rukora za mudasobwa ruri i Kigali mu Rwanda

Byatangajwe mu kiganiro n’abanyamakuru cyahuje Komisiyo y’Umuryango w’Afurika y’Iburasirazuba ishinzwe guteza imbere ubumenyi n’ikoranabuhanga (EASTECO) cyabereye i Kigali ku wa kane tariki 12 Ukwakira 2017.

Umunyamabanga Uhoraho muri Minisiteri y’Umuryango w’Afurika y’Iburasirazuba akaba n’umuhuzabikorwa w’iyo komisiyo muri EAC, Edith Nsaija Mwanje yavuze ko mu myaka itanu iri imbere ibikorwa byo guteza imbere ubumenyi, ikoranabuhanga no guhanga udushya mu bihugu byo muri EAC bizashorwamo miliyoni 22$, arenga miliyari 18RWf.

Agira ati “Muri ayo mafaranga harimo imisanzu ya buri gihugu kigize umuryango wa EAC ndetse harimo n’amafaranga y’inkunga igamije guteza imbere ubumenyi n’ikoranabuhanga muri ibi bihugu byo mu karere.”

Akomeza avuga ko mu gihe cy’imyaka itanu uyu mushinga uzamara uzahindura byinshi ku rubyiruko ruri munsi y’imyaka 30 kuko ari rwo rukunze kwitabira ibijyanye n’amasomo ya siyansi, ikoranabuhanga no guhanga udushya.

Ati “Ikoreshwa ry’ikoranabuhanga riri mu bizafasha urubyiruko rwo mu karere kubona imirimo mu buryo bworoshye ndetse no guhora bafite inyota yo guhanga udushya”.

Abagize EASTECO bakomoka mu bihugu byo mu karere

Umuyobozi w’ishami rishinzwe ibikorwa bijjyanye n’imiyoborere myiza muri Minisiteri y’ububanyi n’amahanga n’umuryango w’ibihugu by’Iburasirazuba, Nshunguyinka John avuga ko u Rwanda nk’igihugu kiyemeje guteza imbere ubumenyi n’ikoranabuhanga kizarushaho kungukira muri uwo mushinga.

Agira ati “Ni amahirwe ku Banyarwanda n’igihugu muri rusange kuko u Rwanda rushyigikiye ikoranabuhanga nk’inzira iyobora izindi gahunda zose z’iterambere.”

EASTECO ifite icyicaro i Kigali ihuriweho n’u Burundi, Kenya, Tanzania, Sudani y’Amajyepfo, Uganda n’u Rwanda.

Mupenzi George, umuyobozi w’Akarere ka Nyagatare ari mu kazi

MINALOC yabitangaje ibinyujije ku rubuga rwayo rwa Twitter mu ma saa sita zo kuri uyu wa gatatu tariki ya 11 Ukwakira 2017.

Ubwo butumwa bwo kuri Twitter bugira buti "Amakuru akwirakwizwa ko Mayor Mupenzi George wa Nyagatare yeguye ku mirimo ye cyangwa yafunzwe ni impuha. Ababikwirakwiza barabeshya."

Amakuru akwirakwizwa ko Mayor Mupenzi George wa Nyagatare yeguye ku mirimo ye cyangwa yafunzwe ni impuha. Ababikwirakwiza barabeshya

— RwandaLocalGov (@RwandaLocalGov) October 11, 2017

Amakuru y’ibihuha yavugaga ko umuyobozi w’Akarerere ka Nyagatare yaba yafunzwe cyangwa yeguye, yatangiye gukwirakwizwa n’abantu bataramenyekana mu gitondo cyo kuri uyu wa 11 Ukwakira 2017.

Twagerageje kuvugana na Mupenzi George ariko ntibyadukundiye kuko inshuro twamuhamagaye ntiyitabye telefone. Twamwoherereje n’ubutumwa bugufi nabwo ntiyabusubiza.

Gusa ariko ubwo twandikaga iyi nkuru twaje kumenya ko uwo muyobozi yari ari mu nama.

Ibihuha byavugaga ko umuyobozi w’Akarere ka Nyagatare yeguye cyangwa yafunzwe bije mu gihe hakunze kumvikana abayobozi batandukanye mu nzego z’ibanze beguye.

Lt Gen Romeo Dallaire atanga ikiganiro

Yabitangaje ubwo yagezaga ikiganiro ku basirikare, abapolisi n’abasiviri 24 bo mu bihugu birindwi byo ku mugabane w’Afurika batangiye amahugurwa y’ibyumweru bibiri kuri uyu wa 10 Ukwakira 2017 i Kigali.

Lt Gen Romeo Dallaire avuga ko Umuryango w’Abibumbye wagize intege nke mu kurengera Abatutsi bicwaga mu Rwanda mu 1994.

Agira ati “ Dukwiye gukura isomo rikomeye kuri Jenoside yakorewe Abatutsi mu Rwanda, abajya mu butumwa bw’amahoro bakumva ko icyo bakwiye kugira ari ubushishozi bagashyira imbere ubumuntu kurusha gukurikiza amabwiriza y’abashobora kubagusha mu mutego bitewe n’inyungu zabo bwite”.

Yakomeje avuga ko bigaya cyane kuba mu gihe cya Jenoside yo mu Rwanda, ingabo z’umuryango w’abibumbye zaraguye mu mutego wo kujya mu ruhande rumwe maze ntushobore kwita ku Batutsi b’inzirakarengane bamburwaga ubuzima muri icyo gihe.

Ati “Buri gikorwa cyose ukoze mu gihe uri mu butumwa bw’amahoro kigomba kwita cyane ku gushyira imbere ubumuntu”

Umugaba w’ingabo z’u Rwanda Gen Patrick Nyamvumba

Umugaba w’ingabo z’u Rwanda, Gen Patrick Nyamvumba watangije ayo mahugurwa ku mugaragaro yagarutse ku musaruro wayo avuga ko yizera ko abayahawe bazakora kinyamwuga.

Ati “Iki gihe cy’ibyumweru bibiri turizera ko muzasangira uburanararibonye buzatuma murushaho gukora mu buryo bwa kinyamwuga mu butumwa bwose bwo kugarura amahoro muzoherezwamo”.

Col. J.K Mukasa, umusirikare wo mu ngabo z’igihugu cya Uganda wanasuye urwibutso rwa Jenoside rwa Kigali yatangaje ko Jenoside yakorewe Abatutsi mu Rwanda nta handi izongera kuba ngo habeho uburangare nk’ubwabayeho.

Abasirikare, abasiviri n’abapolisi bahuguwe ku gukumira no kurwanya Jenoside, ubwicanyi ndengakamere bukorewe abantu ndetse n’ubutabera bwunga, bakomoka mu bihugu bya Uganda, Tanzaniya, Kenya, Sierra Leone, Ghana, Zambia n’u Rwanda.

Abahugurwa basuye urwibutso rwa Kigali

Ayo mahugurwa bayateguriwe n’ikigo cy’igihugu cy’amahoro ku bufatanye n’urwego rw’ingabo z’Abongereza rufasha mu bikorwa byo kugarura amahoro mu karere k’Afurika y’Iburasirazuba( BPST-EA)

Bafashe ifoto y’urwibutso

Ubwo hamurikwaga ubwo bushakashatsi muri INES-Ruhengeri

Ibyo byagaragajwe muri ubwo bushakashatsi bwashyizwe ahagaragara ku itariki ya 29 Nzeli 2017.

Ubwo bushakashatsi bwakorewe mu turere 10 tw’u Rwanda mu gihe cy’imyaka ibiri, bushyirwa mu bikorwa mu gihe cy’amezi atatu.

Gonzalve Nshimiyimana, umwarimu wa INES - Ruhengeri akaba n’umuyobozi ukuriye ikigo gishinzwe guteza imbere imishinga muri iryo shuri rikuru, niwe wayoboye ubwo bushakashatsi.

Avuga ko bakoze ubwo bushakashatsi bashaka kugaragaza isano iri hagati yo kubona akazi no gutanga umutekano mu gihugu.

Nyuma yo kubukora ngo basanze hari bamwe bahera mu bushomeri kubera ko bize amashuri menshi; nk’uko Nshimiyimana abisobanura.

Agira ati “Uko umuntu yongera amashuri menshi ni ko yongera n’ibyago byinshi byo kutabona akazi.”

Ibyo bintu byatunguye bamwe mu bamurikaga ubwo bushakashatsi. Gusa ariko Nshimiyimana yasobanuye ko akenshi umuntu wize cyane akagira amashuri ahambaye hari ubwo atangira gusuzugura imirimo imwe n’imwe.

Ati “Hari ubwo atangira gusuzugura imirimo akumva ko atayikora bitewe n’urwego yumva agezemo. Ibyo rero ni byo bijyana no kubura icyo akora akaba umushomeri.”

Akomeza avuga ko umuntu wize amashuri menshi hari n’ubwo ibikoresho yifashisha na byo bidapfa kuboneka kubera urwego rw’amashuri agezeho bigatuma hamwe na hamwe batamukoresha maze akaba atakaje amahirwe yo kubona akazi.

Nshimiyimana yongeyeho ko atarwanya kwiga cyane ahubwo ko abize amashuri menshi bagomba kumva ko imirimo yose bayikora cyangwa se bakayihanga n’ubwo yaba iciriritse.

Yasobanuye kandi ko ubwo bushakashatsi bwakorewe ku bantu 204 bwagaragaje ko kubona umurimo bifitanye isano n’umutekano w’igihugu.

Yifashishije ibyo yagezeho mu bushakashatsi yatangaje ko umuntu ufite umurimo ari isoko nziza yo gutanga umutekano mu gihugu cye mu gihe umuntu,udafite icyo akora ashobora kujya mu bikorwa byo kuwuhungabanya.

Guverineri Gatabazi avuga ko azafatanya n’abanyamadini kurwanya umwanda mu Ntara y’Amajyaruguru

Ikibazo cy’umwanda kigarukwaho kenshi mu biganiro bitandukanye bibera mu turere tugize iyo ntara.

Abaguverineri bose bayoboye Intara y’Amajyaruguru mu byo bavuze ko bazashyira imbere mu miyoborere yabo hari harimo ko bazarwanya umwanda mu baturage n’ubwo bigaragara ko udacika burundu.

Guverineri Gatabazi umaze ibyumweru bitatu agizwe Guverineri w’iyo ntara nawe ahamya ko bamwe mu baturage bo mu ntara ayobora bagira umwanda haba mu ngo zabo ndetse no ku mubiri.

Avuga ko mu kurwanya uwo mwanda agiye gutangira urugamba rwo kugeza amazi meza kandi ahagije ku baturage bose bagize iyo ntara kugira ngo abavuga ko bagira umwanda kubera kubura amazi ntibazongere kubona urwitwazo.

Agira ati “Ndashaka ko abantu bagira isuku ku mubiri bakagira isuku mu byo barya bakagira isuku aho barara bakagira isuku aho bataha ndetse no mu mikorere yabo.”

Yongeraho ati “Hari umuntu uba uzwiho ko yambara umwenda umwe gusa ugasanga abayobozi b’inzego z’ibanze baramucaho akagenda agahinga agataha akaryama adakarabye abo tuzabigisha mu buryo butari ubwo kubahutaza bumve neza ko isuku ikenewe.”

Akomeza avuga ko umwanda ari mu mutwe. Ahamya ko aharanira gusubiza mu baturage umuco wabagaho cyera w’uko abakobwa bakuburaga bagatunganya iwabo mu ngo n’aho abahungu bagakora ibintu by’ubukorikori.

Guverineri Gatabazi avuga kandi ko mu kurwanya umwanda mu ntara ayobora azifashisha amadini aho abayoboke bayo bazajya bigishwa isuku mu kiliziya, mu nsengero, mu misigiti n’ahandi kuko ikibazo cy’umwanda kitananirana kandi hari byinshi byakozwe bigashoboka mu ntara ayobora.

Abaturage bahamya ko igituma bamwe mu baturage bo mu Ntara y’Amajyaruguru bagira umwanda ari uko bazindukira mu mirima bagataha batinze bakabura umwanya wo kwiyitaho.

Umwe muri bo witwa Ntahontuye Marceline agira ati “Nk’ubu twatangiye igihembwe cy’ihinga turi kubyukira mu murima tugataha bwije. Urumva ko ngera mu rugo ngatangira gushaka ibyo guteka ubwo se uwambona uko mba meze yabuzwa n’iki kunyita umunyamwanda.’’

Mugenzi we witwa Nyiranizeyimana Alphonsine ariko ntiyemeranya nawe.

Agira ati “Isuku ni mu mutwe kuko umuntu ashobora kujya guhinga yataha agakaraba kandi agasa neza. Iyo utabyitoje ukiri muto kugira isuku cyangwa ngo ubitozwe biragorana iyo umuntu amaze gukura."

Bari bumiwe batangajwe n’ibyo uwo mukozi ari gukora

Mu ma saa saba zo kuri uyu wa gatatu tariki ya 20 Nzeli 2017, nibwo hari hari abantu bahagaze bashungereye, batangajwe n’ibyo uwo mukozi akora.

Abafashamyimvire mu buhinzi muri Musanze bahembwe amagare yo kubafasha kugera ku bahinzi

Bahawe ibyo bihembo ubwo muri ako karere hatangizwaga igihembwe cy’ihinga cya 2018 A, cyatangirijwe mu Murenge wa Cyuve ku wa gatatu tariki ya 13 Nzeli 2017.

Abo bafashamyumvire uko ari 60 baturuka mu mirenge 15 igize Musanze, bahawe ibihembo bitandukanye birimo ibigega bifata amazi, amagare, amapompo atera umuti mu myaka n’ingorofani ku bantu bane bo muri buri murenge.

Bahawe ibyo bihembo kuko bagize uruhare mu kongera umusaruro ukomoka ku buhinzi mu gihembwe cy’ihinga 2017 B.

Nizeyimana Innocent, umwe muri abo bafashamyumvire avuga ko igihembo cy’ipompo yahawe kimwongereye imbaraga zo kurushao gukora.

Agira ati “Natangiye mpinga ku murongo mu gihe mu kagari kacu batari bakabimenye. Nyuma nakomeje gukora neza aho ntuye abaturage babonye ibyo nkora ko bifite umusaruro na bo batangira kubikora.”

Banahembwe ibigega bifata amazi

Umuyobozi w’Akarere ka Musanze, Habyarimana Jean Damascène yavuze ko itangwa ry’ibyo bihembo ari agahimbazamusyi bageneye abo bafashamyumvire bitewe n’uruhare bagira mu iterambere ry’ubuhinzi bwa kijyambere bukorerwa muri ako karere.

Yakomeje avuga ko gutanga ibihembo kuri abo bafashamyamvire byitezweho no kuzazamura umuhati wa bagenzi babo maze nabo bakarushaho gushishikarira gukora ubuhinzi bw’umwuga.

Ati “Ibi bihembo dutanze biri mu rwego rwo gutuma bagenzi babo kimwe n’abandi bahinzi muri rusange bagira inyota yo gukora kugira ngo na bo bazahembwe ibirenzeho.”

Banahembwe amapompo yo gutera umuti mu myaka

Ubusanzwe abafashamyumvire bavuga ko umurimno wabo w’ubukangurambaga mu by’ubuhinzi bawukoraga nta gihembo bategereje ariko bagashimangira ko kuba batangiye guhemba bamwe muri bo bakora neza bizakangura n’abandi.

Akarere ka Musanze ni kamwe mu turere two mu Ntara y’Amajyaruguru dufatwa nk’ikigega cy’ibirirwa mu Rwanda kubera impamvu z’ubutaka bw’aho bw’amakoro butanga umusaruro n’ikirere cy’aho kibonekamo imvura ihagije.

Polisi yafatanyije n’urubyiruko bubakira igikoni uwapfakajwe na Jenoside

Icyo gikorwa cyabaye ku wa kabiri tariki ya 12 Nzeli 2017, cyanitabiriwe na Polisi y’igihugu ikorera muri ako karere n’uwari intumwa y’ishami ry’umuryango w’abibumbye ryita ku iterambere (UNDP), cyaranzwe no kubakira Mamuwera igikoni n’akarima k’igikoni.

Uwo mubyeyi ufite imyaka 44 y’amavuko wapfakajwe na Jenoside yakorewe Abatutsi, atangaza ko kubakirwa n’urubyiruko abibonamo ikimenyetso cy’imiyoborere myiza ituma urubyiruko rubona umwanya wo gukora ibikorwa birushaho kubaka amajyambere arambye.

Urwo rubyiruko rwubakiye uwo mubyeyi rwari ruri mu byiciro binyuranye birimo abarangije kwiga n’abatararangiza kwiga.

Umuyobozi w’urwo rubyiruko rw’abakorera bushake (Youth Volunteers), Murangamirwa Théodore avuga ko ibikorwa nk’ibyo bamaze kubikora hirya no hino mu Karere ka Musanze kandi ababikorerwa bakaba bagenda barushaho kubyishimira.

Agira ati “Mu bintu dukora by’ibanze harimo gufatanya na Polisi mu kurwanya ibyaha no kubikumira. Ariko hejuru yabyo dukora ibikorwa byo kwiteza imbere ndetse tukaboneraho no gufasha abatishoboye.”

Akomeza avuga ko mu Mirenge y’Akarere ka Musanze bamaze kubakira abatishoboye batandukanye.

Jenoside yakorewe Abatutsi yasigiye Mamuwera ubumuga

Banaboneraho umwanya wo gutanga ubutumwa bukangurira abaturage kurwanya ibyaha no kubikumira.

Ikindi ngo mu byo bishimira kurusha ibindi kugeza ubu,ni uko mu Karere ka Musanze hari hakunze kuboneka ibyaha ariko bikaba byaragabanutse.

Ati “Mu karere ka Musanze higeze kurangwa ibyaha byinshi bitewe no kuba duturiye igihugu cya Congo ariko ibintu byagiye bihinduka ntabwo bikiri nka kera.”

Abahuguwe uko ari 31 baturuka mu bihugu birindwi byo muri Africa

Babitangarije i Musanze mu kigo cy’igihugu cy’amahoro ( Rwanda Peace Academy) ubwo hasozwaga amahugurwa y’abasirikare, abapolisi n’abasiviri baturuka mu bihugu bya Kenya, Uganda, Comoros, Somalia, Seychelles, Sudani n’u Rwanda, ku itariki ya 08 Nzeli 2017.

Maj Marcel Mbabazi, ushinzwe amahugurwa muri Rwanda Peace Academy avuga ko hirya no hino muri Afurika hakigaragara ibibazo by’imidugararo bihutarizwamo uburenganzira bw’umwana.

Agira ati “Aba ngaba bahuguriwe kugira ngo nabo bazabashe kwigisha abandi ku byerekeranye n’uburenganzira bw’umwana no kumurinda icyatuma agira ihungabana nko mu gihe cy’amakimbirane cyangwa se igihe cy’intambara.”

Akomeza avuga ko iyo habaye intambara, abana baharenganira ugasanga uburenganzira bwabo bw’ibanze burahungabanye.

Ati “Abasirikare, abapolisi ndetse n’abasivili bakurikiranye amasomo yo kubungabunga uburenganzira bw’umwana mu gihe cy’imidugararo, bazajya bifashishwa mu guhugura bagenzi babo boherejwe mu butumwa bwo kubungabunga amahoro, hirya no hino ku isi haba hagaragaye imidugararo.”

Suzan Seruyange ukomoka mu gihugu cya Uganda, umwe mu bitabiriye ayo mahugurwa avuga ko inshingano y’ibanze atahanye ari ukumva ko uburenganzira bw’umwana mu bihe by’intambara bugomba kwitabwaho ndetse ibyo bigatozwa buri wese.

Agira ati “Ndateganya kuzakora ibishoboka byose kugira ngo menyekanishe uburenganzira umwana afite mu bihe by’intambara.”

Abahuguwe bahawe "Certificate"

Munyawera Muvuna Dominique wo mu Rwanda asobanura ko batahanye ubumenyi bwinshi bazaheraho bigisha abandi.

Agira ati “Ibyo dutahanye ni byinshi kuko ni amahugurwa yigisha abantu bazajya bahugura abandi.

Abantu benshi ntabwo bazi ko abana bafite amategeko abarengera kandi aribo bahura n’ibibazo byinshi by’intambara.”

Ayo mahugurwa yo kurengera uburenganzira bw’umwana mu bihe by’intambara yatanzwe n’umutwe w’Ingabo za Afurika y’Iburasirazuba zihora ziteguye gutabara aho rukomeye (EASF), Rwanda Peace Academy n’Umuryango Mpuzamanahanga wita ku burenganzira bw’Umwana (Save the Children International) ku nkunga y’Ikigega Mpuzamahanga cya Leta ya Suwedi cyita ku butwererane n’iterambere.

Uyu munya-Ukraine wiyemeje kugera mu bihugu 50 byo isi yageze mu Rwanda anyurwa n’isuku yahasanze

Grechishkina yageze mu Rwanda ku wa mbere ku itariki ya 04 Nzeli 2017, aturutse mu gihugu cya Tanzania.

Kuri uyu wa gatatu tariki ya 06 Nzeli 2017, uyu mukobwa yagaragaye mu mujyi wa Musanze ari kuri moto ye akoresha muri urwo rugendo, ahetseho imiziko irimo ibyangombwa bitandukanye bimufasha mu rugendo.

Anna avuga ko urwo rugendo rwo kuzenguruka mu bihugu bitandukanye byo ku isi yarutangiye ku itariki ya 27 Nyakanga 2013, ahagurukiye iwabo mu mujyi wa Kiev mu gihugu cya Ukraine.

Akomeza avuga ko muri urwo rugendo rumaze imyaka ine, amaze kuzenguruka mu bihugu 32 birimo ibihugu 10 byo muri Afurika. Intego ye ngo ni ukuzagera mu bihugu 50.

Ahamya ko muri ibyo bihugu byose amaze kunyuramo u Rwanda rwamugaragarije ubudasa.

Agira ati “U Rwanda ni igihugu gifite isuku ndetse gifite gahunda. Ibyo ubibonera mu baturage ndetse n’umurongo mugari igihugu gifite nyuma y’imyaka irenga 20 ishize rubayemo Jenoside yakorewe Abatutsi.”

Anna avuga ko amaze kuzenguruka mu bihugu 32 harimo 10 byo muri Afurika

Akomeza avuga ko kuzenguruka isi ari inzozi yagize akiri muto maze amaze gukura ashaka uburyo bwo kuzishyira mu bikorwa.

Agira ati “Nkiri umwana muto natangiye kuyiyumvamo (moto) maze gukura ndayigura nyuma nkorera uruhushya rwo kuyitwara rwo muri Ukraine, maze kurubona nibwo natangiye kugira inzozi zo kuba nazenguruka isi nyifashishije binyuze mu mushinga wanjye nise “ I have a Dream (Mfite inzozi)”.

Anna akomeza avuga ko namara kuzenguruka muri ibyo bihugu yiyemeje kugeramo azahita asubira iwabo urwo rugendo rwose akarwandikaho igitabo.

Muri urwo rugendo akoresha amafaranga yizigamiye. Ariko ngo hari n’ubwo inshuti ze zo muri Ukraine zimwoherereza ubufasha.

Yagize inzozi zo kuzenguruka isi kuva akiri muto

Avuga ko hari n’abandi bantu ku giti cyabo baho anyura bashimishwa n’ibyo arimo bakamuha ubufasha.

Ati “Ngenda ngaragariza abantu baho nyura hose ku isi ko ibintu byose bishoboka ndetse nkabagaragariza ko bagomba kugira inzozi nziza kandi bagaharanira kuzigeraho. Nubwo umuntu umwe yahinduka ku bwanjye intego yanjye izaba igezweho.”

Kuri ubu yafunguye urubuga rwa interineti rwitwa www.ihaveadreamtravel.com aho ababishaka bose bashobora gukurikirana amakuru ye.

Anna ahamya ko narangiza urwo rugendo azandika igitabo

Anna ahamya ko kuva yatangira kuzenguruka isi mu bihugu bitandukanye, aho amaze guhura n’ubuzima bukomeye ari muri Australia na Singapore kubera ubuzima bwaho buhenze.

Akomeza avuga ko kandi muri urwo rugendo agenda ahura n’ibibazo bitandukanye birimo gukoresha amafaranga mu buryo atari yateganyije no kwibwa bya hato na hato aho agenda anyura.

Ibihugu byo muri Afurika asigaje kunyuramo ni Uganda, Kenya, Ethiopia, Sudani, Misiri nyuma yaho azahita asubira i Burayi.

Uko niko mu Kinigi ahazabera umuhango wo Kwita Izina hameze. Uwo mutako uko mu ishusho y’ingagi

Uwo muhango uzabera mu mudugudu wa Nyagisenyi mu Kagari ka Nyonirima mu murenge wa Kinigi muri Musanze.

Ahateguwe kuzizihirizwa ibyo birori ni munsi y’ikirunga cya Sabyinyo aho uba ucyitegeye hamwe n’ibindi birunga bishoreranye mu buryo bubereye amaso.

Mu gutegura ahazizihirizwa ibyo birori hakozwe imitako ikozwe mu migano yerekana inyamaswa zisurwa na ba mukerarugendo by’ukwihariko zirimo ingagi, intare, isatura n’izindi.

Umuyobozi w’Akarere ka Musanze, Habyarimana Jean Damascene avuga ko ibyo birori bizaba birimo abashyitsi b’Imena basaga 3000 hakurikijwe ubutumire bwatanzwe, baturutse mu Rwanda no hanze yarwo.

Inyamaswa zitandukanye ziri muri Pariki z’u Rwanda hari imitako izigaragaza

Iyo ni Intare

Iyo ni Inkura

Muri santere ya Kinigi

Amashami atanu yo muri Ines -Ruhengeri yari yarafunzwe yongeye gufungurwa

Ibyo byatumye ku wa mbere tariki ya 10 Nyakanga 2017, ubuyobozi bw’iryo shuri rikuru riherereye mu Mujyi wa Musanze n’abanyeshuri baryigamo bakora ibirori byo kwishimira icyo gikorwa.

Abacuruzi bayikikije nabo basazwe n’ibyishimo bavuga ko bagiye kongera gucuruza bakabona amafaranga.

Bavuga ko bitewe n’ubwinshi bw’abanyeshuri bari baratashye byari byarabahombeje kuko bari abakiriya babo babagurira ibiribwa bakanabacumbikira mu nzu zikodeshwa ziri hanze y’ishuri.

Murerwa Jean Yves afite inzu ikodeshwa ifite imiryango 45. Icumbikira abanyeshuri 100 bo muri INES-Ruhengeri. Umuryango umwe abawucumbikamo bishyura ibihumbi 15RWf buri kwezi.

Avuga ko ubwo ayo mashami yo muri INES-Ruhengeri yahagarikwaga abanyeshuri yari acumbikiye hafi ya bose bagiye, hagasigara abari bacumbitse mu miryango itatu gusa.

Aya macumbi yari yarafunze imiryango kuko abanyeshuri bigaga mu mashami yafunzwe bayacumbikagamo bagiye

Murerwa avuga ko yagize igihombo kuko mbere abo banyeshuri bataragenda yinjizaga ibihumbi 675RWf ku kwezi ariko aho bagendeye ku kwezi yinjizaga ibihumbi 45RWf gusa kandi ngo hari hashize amezi atatu arenga abo banyeshuri bagiye.

Akomeza avuga ko yishimiye kuba abo banyeshuri bagarutse kwiga. Akemeza ko igihombo yagize azagikuramo.

Impamvu INES yari yarafungiwe amashami

INES-Ruhengeri ni rimwe mu mashuri makuru na kaminuza bibarirwa mu icumi byagenzuwe mu mpera z’umwaka w’amashuri wa 2016-2017.

Nyuma yo kugenzurwa amwe muri ayo mashuri yafungiwe amashami andi afungirwa byose ku buryo bw’agateganyo kuko imikorere n’imyigishirize yabyo ngo bitatangaga ireme ry’uburezi ryifuzwa mu Rwanda.

Abanyeshuri bigaga mu mashami yafunzwe bagarutse kuko yongeye gufungurwa

INES-Ruhengeri yafungiwe amashami atanu arimo iry’ubumenyi bwa mudasobwa (Computer Science) n’iry’ibijyanye n’ubuzima (Biotechnology) mu gashami k’ibimera (Plant Option).

Hiyongeraho iry’ibijyanye n’ubuzima mu gashami k’ibiribwa (Food Option), irijyanye n’ubwubatsi (Civil Engineering) n’iry’ubumenyi bw’ibijyanye na Laboratwari (Biomedical Laboratory Sciences).

Nyuma yo kuzuza ibyo basabwa na Minisiteri y’Uburezi (MINEDUC), ayo mashami yose yarafunguwe guhera muri Werurwe 2017.

Ibyo nibyo byatumye muri INES-Ruhengeri bakora ibirori n’ubusabane baranasenga bashimira Imana, umuhango wayobowe na Musenyeri wa Diyoseze ya Ruhengeri, Harorimana Vincent.

Umuyobozi wa INES–Ruhengeri, Padiri Dr Hagenimana Fabien yabwiye abanyeshuri bahiga ko bahisemo gukoresha ibyo birori kugira ngo bishimire umuhati n’imbaraga bagize mu kwihutisha gushyira mu bikorwa ibyo bari basabwe na MINEDUC.

Yagize ati “Turi hano kugira ngo twishimire ibyiza byo kuba abanyeshuri barererwaga muri uru rugo bongeye kurugarukamo kandi ibyo twasabwe nabyo byarakozwe.

Uyu munsi abashyitsi bakuru dufite ni abanyeshuri bari bamaze amezi batiga ariko ubu amasomo akaba yongeye gukomeza nk’uko byari busanzwe.”

Bavugije n’ingoma

Abanyeshuri bashimiye kugaruka kwa bagenzi babo barabaririmbira

Akomeza avuga ko kuba amashami amwe n’amwe yari yarafungiwe imiryango ariko abanyeshuri bayigamo bagasubira iwabo byatumye bafunguka bagashakisha ibyo basabwaga.

Ati “Turanashimira abanyeshuri bahagarikiwe amashami ariko bagakomeza kutugirira icyizere. Ubu bose bakaba bagarutse nta n’umwe muri bo wagiye kwiga ahandi.”

Ndayishimiye Pacifique wiga mu ishami ry’ibijyanye n’ubwubatsi wari umaze amezi arenga atatu atiga yabwiye Kigali Today ko anejejwe cyane no kuba agiye gukomeza kwiga.

Agira ati “Hanze hariya mu buzima bwo kutiga twari turi mu bibazo bikomeye birimo kuduseka ngo twagiye kwiga muri Kaminuza zidafite ibyangombwa, aho tugeze hose bikadutera ipfunwe.”

Ubuyobozi bw’ishuri rikuru rya INES-Ruhengeri butangaza ko kugira ngo bakomorerwe ayo mashami yari yarahagaritswe byabatwaye Miliyoni zirenga 100RWf yaguzwe ibikoresho basabwaga.

Abanyeshuri bo muri Ines-Ruhengeri bakoranye ibirori n’ubuyobozi bw’iyo kaminuza bishimira ko bakomorewe

Padiri Dr. Fabien Hagenimana umuyobozi wa INES Ruhengeri

Abaforomo barangije mu ishuri ry’ubuzima rya Ruli bahawe impamyabumenyi ya A1

Iryo shuri ry’ubuzima rya Ruli (Higher Institute of Health: Sainte Rose de Lima), riherereye mu Karere ka Gakenke ryatanze izo mpamyabumenyi ku itariki ya 06 Nyakanga 2017.

Mbere yo kuhabwa izo mpamyabumenyi abo baforomo babanje kurahirira imbere y’Imana n’abantu ko bazuzuza uko bisabwa inshingano zabo zo kwita ku barwayi.

Uwajeneza Pauline, umuyobozi w’ishuri ry’ubuzima rya Ruli yabwiye abo banyeshuri barangije ko kwiga bitarangiriye aho ahubwo ko bagomba gukomeza kwiyungura ubumenyi.

Yanabibukije ko mu kazi kabo k’ubuforomo bagomba kwitanga bakajya bakira neza abarwayi babahumuriza aho kubahutaza.

Abo baforomo bahawe impamyabumenyi bahamya ko bazishimiye ariko ngo byari kuba byiza iyo baba bahawe iz’icyiciro cya kabiri cya Kaminuza kuko arizo zari kuzabafasha guhangana n’abandi ku isoko ry’umurimo.

Niyigena Anselme, umwe muri abo baforomo avuga ko nyuma yo kurangiza ayo masomo agiye gushaka ahandi yiga icyiciro cya kabiri cya kaminuza.

Barabivuga mu gihe bo bahawe impamyabumenyi z’icyiciro cya mbere cya Kaminuza (A1). Bifuza ko no kuri iryo shuri hashyirwa icyiciro cya kabiri cya kaminuza.

Abaforomo bose barahiriye kuzuza inshingano zabo z’ubuganga

Umuyobozi ushinzwe ireme ry’uburezi mu nama nkuru y’uburezi (HEC), Dr Baguma Abdallah yavuze ko hari ibigomba kuzuzwa kugira ngo iryo shuri ryemererwe icyiciro cya kabiri cya kaminuza.

Akomeza avuga ko iryo shuri ry’ubuvuzi rya Ruli niryuzuza ibisabwa bijyanye n’imyigishirize n’ibikoresho bisabwa nta kabuza bazahabwa uburenganzira bwo kwigisha icyo cyiciro.

Iryo shuri ry’ubuzima rya Ruli riherereye mu cyaro. Imihanda ihagera ni ibitaka kandi idakoze neza. Abahiga bavuga ko kandi bakunze kubura amazi meza ndetse na rezo za telefone((Network) ni ikibazo.

Ibyo bibazo byose ariko umuyobozi w’Intara y’Amajyaruguru, Musabyimana Jean Claude yabijeje ko batangiye kubishakira ibisubizo birambye kuko ngo nk’imihanda yo yatangiye gukorwa.

Ibitaro bya Shyira ni icyitegererezo mu bwiza no mu bunini mu Ntara y’u Burengerazuba

Ni ibitaro bya mbere by’icyitegerezo mu bwiza no mu bunini byubatswe mu Ntara y’i Burengerazuba, kuko bifite ibyumba 150 bigezweho byifashishwa muri serivisi zitandukanye z’ubuvuzi, nk’uko bitangazwa na Malick Kayumba ushinzwe itangazamakuru n’itumanaho muri Minisiteri y’Ubuzima.

Avuga kandi ko abaganga bakora muri ibyo bitaro na bo bashyiriweho akarusho ko gukora bacumbikirwa kuko bubakiwe amacumbi 34 yubatswe hafi yabyo, mu rwego rwo kuborohereza mu kazi kabo ka buri munsi.

Uwo muyobozi kandi avuga ko ibyo bitaro byubatswe mu gihe gito ugereranije n’icyo byagombaga kuzuzuriraho, bitewe n’uko byubatswe n’inararibonye mu bwubatsi zaturutse mu Nkeragutabara.

Ati” Mu kubaka ibi bitaro ndetse n’amacumbi y’abaganga babikoramo byatwaye amezi 11 mu gihe ubusanzwe iyo bitubakwa n’Inkeragutabara byagombaga gutwara imyaka itatu kugira ngo bibe byuzuye.

Kuba iyo mirimo yarihutishijwe byatumye hazigamwa Miliyari 4 z’amafaranga y’u Rwanda.”

Ibi bitaro bizakira abantu benshi bavunikaga bakora ibirometero bitandatu

Abaturage baturiye ibyo bitaro bavuga ko mbere y’uko begerezwa ibi bitaro, bakoraga urugendo rw’ibirometero bitandatu bajya kwivuza, kandi batwaye abarwayi mu ngobyi.

Mukeshimana Dancilla utuye ku birometero bike byaho ibitaro bya Shyira byubatse
yabwiye Kigali Today ko kwegerezwa ibyo bitaro byababereye igisubizo.

Yagize ati “Mbere y’uko twegerezwa ibi bitaro bishya bya Shyira ibyari bisanzweho
byadusabaga gukora urugendo rw’ibiremetero birenga bitandatu kugira ngo tugezeyo umurwayi twabaga duhetse mu ngobyi.”

Akomeza avuga ko ikibazo bahuraga nacyo ari nk’umubyeyi uri kunda cyangwa undi murwayi urembye cyane byasabaga ko yihutishwa kandi uburyo bwo kumuheka mu ngobyi butabimerera.

Abaturiye ibitaro bya Shyira bahuriza ku kuvuga ko nta murwayi azongera kugezwa kwa muganga bigoranye kuko ibitaro bya Shyira bizajya byifashishwa mu kugeza abarwayi kwa muganga hakoreshejwe imbagukiragubara zabyo.

Ikindi bishimira n’uko igihe bageze kwa muganga bazajya bahabwa serivisi zose kubera ko ibitaro bya Shyira byubatswe ari icyitegerezo .

Ubusanzwe ibitaro bya Shyira byari bisanzweho byari byarubatswe mu 1937, bitakijyanye n’igihe, ugereranije n’ibyo bishya bubakiwe na Leta y’u Rwanda.

Kuri uyu munsi wo kwibohora kandi Perezida Kagame yanatashye umudugudu w’icyitegererezo wa Kazirankara, watujwemo abatishoboye bahereye ku bari batuye mu manegeka bari mu cyiciro cya mbere cy’ubudehe.

Umudugudu w’icyitegererezo ugizwe n’inzu 17

Uwo mudugudu ugizwe n’inzu 17, agakiriro ndetse n’inzu mberabyombi, inzu imwe ikaba igomba kuzajya iturwamo n’imiryango ine.

Abapolisi bakuru 26 baturuka mu bihugu 10 byo muri Afurika basoje amasomo ajyanye n’ubuyobozi

Yabivuze ubwo abapolisi bakuru 26 baturuka mu bihugu 10 byo muri Afurika basozaga amasomo y’icyiciro cya gatatu cya kaminuza y’ibijyanye no kuyobora abapolisi, gusigasira amahoro no gukemura amakimbirane yari amaze umwaka atangirwa mu ishuri rikuru rya Polisi y’u Rwanda riherereye i Musanza.

Tariki ya 02 Nyakanga 2017 ubwo hasozwaga ayo masomo, Minisitiri Busingye yavuze ko abo bapolisi basoje amasomo yabo yo ku rwego rwo hejuru icyo basabwa ari ubufatanye bunoze hagati yabo n’abaturage bashinzwe kurindira umutekano.

Agira ati “Abaturage bagomba kwibona muri Polisi, Polisi igomba kwibona mu baturage kugira ngo kwemerwa kwayo ntibibe ko itegeko ribiteganya gusa ahubwo bibe kubera ko umuturage yibona muri polisi na polisi ikibona mu muturage bose bakuzuzanya.”

Akomeza avuga ko ubufatanye buri hagati ya polisi yo mu bihugu bitandukanye byari muri ayo masomo y’icyiciro cya gatanu bugamije kurwanya ibyaha bitewe n’uburyo isi igenda irushaho kuba umudugudu umwe.

Ati “Ibintu birebana no gukora ibyaha, gukurikirana ibyaha, kubahiriza amategeko n’ibindi byinshi cyane bisigaye bitangirira mu gihugu kimwe bikajya mu cya kabiri bikajya mu cya gatatu bikarangirira mu kindi. Igikorwa kimwe gishobora gutangirira mu Rwanda kikarangirira muri Somaliya n’ahandi.”

Busignye yongeyeho ko guhuriza hamwe abapolisi b’ibihugu bitandukanye mu masomo amwe bifasha mu kubaka ubufatanye bwa polisi kandi bigatuma hatagira abasigara inyuma mu kurwanya ibyaha.

Minisitiri Busingye yabwiye abapolisi barangije amasomo ko bagomba gukora igituma abaturage babibonamo

CP SM Etyang wo mu gipolisi cya Kenya yatangaje ko atahanye byinshi yungukiye mu masomo yatumye bagira ubumenyi bwo kuyobora bagenzi babo.

Agira ati “Ni amasomo azamfasha mu bibazo bigiye bitandukanye birimo kurwanya iterabwoba, ibiyobwabwenge n’andi makimbirane yavuka mu gihugu cyanjye.”

Abo bapolisi bakuru bahabwaga ayo masomo na Polisi y’u Rwanda ku bufatanye na Kaminuza Nkuru y’u Rwanda n’ishuri rya Polisi yo mu Bwongereza (Bramshill Police College).

Baturuka mu bihugu byo muri Afurika aribyo Ethiopia, Kenya, Malawi, Namibia, Sierra Leone, Somalia, Sudan, South Sudan, Uganda n’U Rwanda.

Ababyeyi bajya mu gikoni cy’umudugudu bakigishwa uko bategura indyo yuzuye nk’iyi igaragara ku ifoto

Byatangajwe ubwo hasozwaga inama MINALOC yagiranaga n’abashinzwe ubuzima mu turere, abashinzwe ubuzima mu bitaro n’abayobozi bashinzwe imiyoborere n’imibereho myiza y’abaturage mu rwego rw’intara, yaberaga i Musanze ku itariki ya 29 Kamena 2017.

Ibyo byatangajwe kandi mu gihe kuri ubu mu Rwanda abana bangana na 38 % bari munsi y’imyaka itanu bagize ikibazo cyo kugwingira.

Umunyamabanga uhoraho muri MINALOC, Odette Uwamariya yavuze ko ibibazo by’imirire mibi no kugwingira bidaterwa no kuba nta biribwa biri mu gihugu.

Ahubwo ngo imyumvire ikiri hasi ya bamwe mu babyeyi niyo ibitera kuko ngo baba bafite ibiribwa bihagije ariko ntibamenye uburyo babitegurira abana babo.

Uwamariya avuga ko iyo myumvire igomba guhinduka bityo bakamenya uko bategura amafunguro ya buri munsi.

Akomeza avuga ko ababyeyi bagomba kwita ku mwana wavutse no kumukurikirana mu gihe cy’iminsi 1000 akitabwaho kugira ngo agire amahirwe yose ashoboka mu mikurire ye.

Agira ati "Dufite hirya no hino uturima tw’igikoni, amata atangwa ku bana n’ibikoni by’umudugudu birahari.

Turifuza ko imbaraga zahuzwa kugira ngo icyo kibazo gikemuke ariko bihereye ku guhindura imyumvire ku buryo ikibazo cy’imirire mibi kirandurwa."

Bamwe mu babyeyi bo mu Karere ka Burera bagaragaza uburyo igikoni ari kimwe mu birandura ikibazo cy’imirire mibi.

Umunyamabanga uhoraho muri MINALOC, Odette Uwamariya

Uwitwa Nyirabakunzi Vestine avuga ko umwana we yagize ikibazo cy’imirire mibi atari uko abuze ibyo kumugaburira. Ariko ngo yitabiriye igikoni cy’umudugudu kiramufasha, kimwereka uko agomba gutegura ifunguro maze umwana we agarura umubiri mwiza.

Agira ati "Igikoni cy’umudugudu cyaramufashije cyane kuko cyahinduye ubuzima bw’umwana wanjye ubu amerewe neza ari mu ibara ry’icyatsi ryerekana ko ameze neza."

Mugenzi we witwa Niyonsenga Samuel ahamya ko igikoni cy’umudugudu ari cyo cyatumye bamenya indyo yuzuye ko igizwe n’ibirinda indwara, ibitera imbaraga n’ibyubaka umubiri bigizwe n’imboga, imbuto n’ibinyabijumba.

Kansiime James wari umunyamabanga nshingwabikorwa w’Akarere ka Gakenke

Kansiime James yeguye abinyujije mu ibaruwa yandikiye inama Njyanama y’Akarere ka Gakenke asaba kwegura ku bw’impamvu ze bwite.

Ayo makuru yemejwe na Hitimana Telesphore, Perezida w’inama njyanama y’Akarere ka Gakenke, wabwiye Kigali Today ko bari bukore inama idasanzwe ikaba ariyo izemerezwamo iby’ubwegure bwa Kansiime James.

Kansiime James yeguye mu gihe we n’abayobozi bane bakoranaga bakurikiranwe n’ubutabera ku byaha byo gukoresha inyandiko mpimbano no gutanga amasoko mu buryo butubahirije amategeko.

Ibyo ngo babikoze ubwo hubakwaga ikigo nderabuzima cya Minazi kiri mu Karere ka Gakenke.

Inkubito z’Icyeza zeretswe ko gukoresha nabi Imbuga Nkoranyambara bishobora kwica ejo hazaza habo

Babisabwe ubwo bari bari mu biganiro bateguriwe na Imbuto Foundation, kuri iki cyumweru tariki ya 25 Kamena 2017.

Ibyo biganiro byari biteraniyemo abana b’abakobwa biga mu mashuri yisumbuye yo mu Ntara y’Amajyaruguru n’Intara y’Iburangerazuba berekwa uburyo bashobora kwigirira icyizere bategura neza ejo hazaza habo.

Eng. Murekatete Marie Claire, ushinzwe ikoranabuhanga mu kigo cy’Igihugu cy’iterambere (RDB) yaganiriye nabo bana b’abakobwa ku bijyanye n’Imbuga Nkoranyambaga.

Yabasobanuriye ibyiza n’ibibi by’imbuga nkoranyambaga mu gihe urubyiruko rwaba ruzikoresheje nabi ku buryo bishobora kwangiza ahazaza habo.

Agira ati “Ni kenshi usanga bamwe mu rubyiruko bashyize amafoto ku mbuga nkoranyambaga bambaye ubusa cyangwa bagaragaza imyitwarire idahwitse. Bariya ujye umenya ko ejo cyangwa ejo bundi bishobora kuzabagiraho ingaruka.

Ndababwiza ukuri ko henshi batanga akazi babanje kureba uwo bagiye kugaha uko bitwara ku mbuga nkoranyambaga babarizwaho. Ntabwo bazabona wigaragaza nk’umusinzi cyangwa umuntu w’uburere buke kuri Twitter, Facebok n’ahandi ngo bizabure kukwicira amahirwe yari agutegereje.”

Akomeza avuga ko imbuga nkoranyambaga hari ibyiza zigeza ku bantu ariko hari n’ibibi zishobora guteza ndetse bikaba byakururira uwabikoze kuzicuza ubuzima bwe bwose.

Inkubito z’Icyeza zeretswe uburyo zishobora kwigirira icyizere zitegura neza ejo hazaza

Niyinsaba Esther wiga mu ishuri ryisumbuye ry’ubumenyi rya Musanze yabwiye Kigali Today ko bungutse byinshi binyuze mu mpanuro zose bahawe n’Imbuto Foundation.

Agira ati “Tugomba kujya tureba ibyo tugiye gushyira ku mbuga nkoranyambaga kugira ngo bitazabasha kutugiraho ingaruka mbi bitewe n’igihe runaka tugezemo.”

Mugenzi we witwa Twizerimana Yvonne wiga mu rwunge rw’amashuri rwitiriwe Intumwa rwa Rwaza avuga ko akurikije impanuro bahawe yaje kubona ko imbuga nkoranyambaga zikoreshejwe nabi n’urubyiruko zishobora kuzabasigira igisebo mu gihe cyabo kiri imbere.

Agira ati “Mu bakobwa turazi ko mu Rwanda hatorwamo ba Nyampinga hari ubwo nshobora gushyira ibintu ku mbuga nkoranyambaga nkiri muto igihe cyagera ngashaka kwiyamamaza ngo ntorwe ariko abantu bakazana amafoto yanjye yo muri iyo myaka agaragaza ko ntabikwiriye maze inzozi zanjye zikaba zirarangiye.”

Umuryango Imbuto Foundation watangiye guhemba abana b’abakobwa baba babaye indashyikirwa aribo Inkubito z’Icyeza mu mwaka 2005.

Abayobozi batandukanye barimo Minisitiri Musoni n’abahagarariye Amerika n’Ubudage mu Rwanda bashyira ibuye ry’ifatizo ahazubakwa urugomero ku mugezi wa Mukungwa

Umuhango wo gutangiza ibikorwa byo kubaka urwo rugomero mu nkengero z’uwo mugezi uri mu Karere ka Musanze, wabaye ku itariki ya 21 Kamena 2017.

Musoni James, Minisitiri w’ibikorwa-remezo wari witabiriye uwo muhango yavuze ko urwo rugomero rw’amashanyarazi ruzuzura mu mwaka wa 2018.

Agira ati “Uru rugomero rufite ubushobozi bwa Megawatt 2,6 rukaba ruzubakwa mu gihe cy’umwaka umwe maze amashanyarazi yarwo atangire gukoreshwa”.

Akomeza avuga ko igihugu cy’u Rwanda kirimo gutera imbere vuba ku buryo hifuzwa ko amashanyarazi akomeza kugera ku baturage, abanyenganda n’abandi bose bayakeneye.

Kuri ubu u Rwanda rufite ingufu z’amashanyarazi zingana na Megawatts 208 zituruka ku ngomero zitandukanye ziri mu Rwanda.

Biteganijwe ko urwo rugomero nirwuzura ruzatanga amashanyarazi ku baturage barenga ibihumbi 100 barimo abo mu mirenge wa Rwaza, Nkotsi na Muko yo mu Karere ka Musanze.

Batarimpamvu Protais utuye mu Murenge wa Rwaza avuga ko biteguye iterambere bakesha ayo mashanyarazi.

Agira ati “Kugeza iki gihe umuriro urakenewe mu gihugu hose kuko utugezeho ibikorwa byinshi byahagera, abana bakabona akazi cyane nko gusudira n’ibindi”.

Mu mirenge yo mu Karere ka Musanze itagerwaho n’amashanyazi abayituyemo bavuga ko bakoreshaga uburyo bwa gakondo burimo kumurikisha ibishirira n’udutadowa mu nzu, bagakora urugendo rw’ibirometero kugira ngo bagere ahari amashanyarazi.

Ku nkengero z’uyu mugezi wa Mukungwa niho hagiye kubakwa urwo rugomero rw’amashanyarazi

Umuyobozi w’Akarere ka Musanze, Habyarimana Jean Damascene avuga ko kubyaza umugezi wa Mukungwa amashanyarazi bizatuma abaturage bagera ku mibereho myiza muri rusange.

Ibihumbi 525 by’Amadorari y’Amerika, asaga Miliyoni 439RWf, yatanzwe n’abo bashoramari bo muri Amerika n’arenga miliyoni esheshatu z’Amadorari y’Amerika, abarirwa muri miliyari 5RWf, yatanzwe n’abashoramari bo mu Budage niyo azubaka urwo rugomero rw’amashanyarazi.

Umuhango wo gutangiza ibikorwa byo kurwubaka wanitabiriwe n’Ambasaderi w’Amerika mu Rwanda, Erika Barks-Ruggles hamwe na Dr Peter Woeste uhagarariye Igihugu cy’Ubudage mu Rwanda.

Charles Munyaneza, umunyamabanga nshingwabikorwa muri Komisiyo y’igihugu y’amatora

Charles Munyaneza, umunyamabanga nshingwabikorwa muri Komisiyo y’igihugu y’amatora yabitangaje mu kiganiro “Ubyumva ute?” cyatambutse kuri KT Radio, uyu munsi tariki 19 Kamena 2017.

Muri icyo kiganiro Munyaneza yavuze ko abamaze gutanga kandidature zabo ku mwanya w’umukuru w’igihugu komisiyo y’amatora itabafata nk’abamaze kuba abakandida ba nyabo ngo kuko igihe cyo kubatangariza abanyarwanda kitaragera.

Yagize ati “Rwose tubonereho umwanya wo kongera kubisobanura uyu munsi nta bakandida dufite. Ubu uyu munsi icyo dufite kuva tariki 12 z’uku kwezi ni abantu bifuza kuzaba abakandida bagahatanira umwanya w’umukuru w’igihugu.

Munyaneza atangaza ko abanyanyarwanda bazamenya abakandida tariki 07 z’ukwezi kwa karindwi 2017.

Ati “ Nibwo tuzatangariza abanyarwanda tubabwire tuti uyu n’uyu runaka yatugejejeho ibyangombwa biteganwa n’itegeko dusanga biruzuye niwe twemeje kuba umukandida ku mwanya wa Perezida wa Repubulika”.

Yongeyeho ko kugeza ubu abifuza kuba abakandida ku mwanya w’umukuru w’igihugu mu matora ateganyijwe muri Kanama 2017 bamaze kuba batatu aribo Dr Frank Habineza uhagarariye ishyaka rya Green Party, Mwenedata Gilbert na Barafinda Sekikubo Fred.

Icyakora ubwo yari muri icyo kiganiro yahishuye ko tariki 20 Kamena hari undi wifuza kuba umukuru w’igihugu cy’u Rwanda uzatanga Kandidature ye hanyuma kwakira kandidature zose bigasozwa tariki 23 z’uku kwezi.

Yakomeje atangaza ko tariki 07 Nyakanga aribwo abanyarwanda bazamenyeshwa abemerewe kuba abakandida ku mwanya w’umukuru w’igihugu ndetse n’abazaba bangiwe.

Munyaneza ashimangira ko abatanze kandidatute zabo kimwe n’abakizitegura abanyarwanda bakomeza kubafata nk’abifuza kuba abakandida kugeza igihe cyo gutangariza abazaba bemerewe.

Ku birebana n’abakandida bazaba bemerewe niba bashobora kuzarindirwa umutekano mu gihe cyo kwiyamamaza, Munyaneza yavuze ko inzego z’umutekano arizo zizahitamo igikwiye ariko asobanura ko kuba u Rwanda ari igihugu gifite umutekano nta kibazo bashobora kugira.

Nshimibyayo Pierre ufite ubumuga yihangiye umurimo wo kogosha

Uyu musore w’imyaka 23 y’amavuko uvukana n’abana batanu azwi nk’umwogoshi w’umwuga mu gasantere ka Nama ko mu murenge wa Rambura mu karere ka Nyabihu ari naho yavukiye.

Ni umwe mu basore n’inkumi bahuguwe n’umuryango mpuzamahanga ufasha urubyiruko mu kwihangira umurimo wa TechnoServe watangiye gukorera mu karere ka Nyabihu mu mwaka wa 2015.

Uyu Nshimibyayo avuga ko yafashijwe n’uyu mushinga mu kumufungurira amaso agatekereza ku murimo yakora ujyanye n’ubushobozi bwe bw’umubiri, kandi ukamwinjiriza amafaranga akibeshaho atagiye mu muco mubi yakuze yanga wo gusabiriza.
Agira ati “Mfite ubumuga bugaragara kuko navutse nyunyutse amaguru ariko amaboko n’umutwe byanjye birakora niyo mpamvu bigomba kuzambeshaho nkazasaza ntanduranyije ngo nsabirize”.

Nshimibyayo asobanura ko kuva atangiye kogosha nyuma yaho gato yasabye inguzanyo y’ibihumbi ijana y’u Rwanda (100.000frw) ari nayo yahereyeho yagura umushinga we.

Ati“Mu gihe kitarenze umwaka iyo nguzanyo nari nyishyuye. Nagombaga kuzarangiza kuyishyura mu kwezi kwa munani muri uyu mwaka wa 2017 ariko ubu tuvugana namaze gukiranuka na Banki yayimpaye”.

Nk’uko Nshimibyayo Pierre yabitangarije Kigali Today mu buhamya bwe ngo ibyo amaze kugeraho bibarirwa agaciro k’ibihumbi 800 RWf, ubariyemo amatungo yoroye ndetse n’ayo yizigamira mu bimina.

bamwe mu rubyiruko bamaze kwihangira imirimo

Mu itangwa ry’inyemezabumenyi ku bahuguwe na Technoserve mu karere ka Nyabihu umuyobozi w’ako karere, Uwanzwenuwe Thenoneste yavuze ko urwo rubyiruko rwihangiye imirimo rukwiye kubera abandi urugero rwiza.

Ati “Muri aka karere hari urundi rubyiruko rutaramenya akamaro ko gutekereza imishinga yarubyarira inyungu ariko ndizera ko arirwo rutahiwe mu kwigira kuri aba bagenzi babo”.

Umuryango wa Technoserve mu turere tw’igihugu ukoreramo umaze guhugura n’urubyiruko ibihumbi 10 ku kwihangira imirimo nk’uko Tuyisenge Angelique ukuriye uwo muryango ku rwego rw’Igihugu abivuga.

Abarwayi bazaga kwivuriza muri Eden Business ni aho babaga

Abo barwayi babonetse ubwo ubuyohozi bw’Akarere ka Musanze bwakoraga igenzura mu mavuriro harebwa atujuje ibyangombwa bitangwa na Minisiteri y’Ubuzima (MINISANTE), tariki ya 14 Kamena 2017.

Ahazwi nko muri “Eden Business” hakuriwe n’uwitwa Dr Rekeraho Emmanuel wahoze akuriye Ishyirahamwe ry’abavuzi gakondo mu Rwanda (AGA – RWANDA), niho ubwo buyobozi bwasanze abo barwayi baryamye.

Mu gikari cya “Eden Busines” iherereye mu Mujyi wa Musanze, niho abayobozi basanze abo barwayi.

Kugira ngo bahagere byabasabye kumanukira ku rwego bateye ku rukuta kuko nta bundi buryo bwari bwarashyizweho bwo kuhagera kuko abo barwayi bahavurirwaga mu buryo bw’ibanga.

Ubusanzwe hari hari umuryango uturuka hanze ujyayo ariko bari barawufunze kugira ngo hatazagira umuntu n’umwe umenya ibikorerwa inyuma. Bivuze ko n’abarwayi banyuraga kuri urwo rwego bajya kwivuza.

Kugera aho abarwayi bavurirwaga byasabaga kunyura ku rwego kuko nta wundi muryango uhagera

Umunyamakuru wa Kigali Today wari uri kumwe n’abo bayobozi yabonye abarwayi batandatu bigaragara ko barembye baryamye mu kumba gato katagira idirishya, karimo imifariso ishashe hasi yegeranye, ahantu bigaragara ko hari umwanda.

Witegereje uko hameze wakwibaza uko babagaho kuko nta hantu ho kogera hahari n’ubwiherero buhari burimo isuku nke.

Abo barwayi kimwe n’abandi bari bari hanze, bajijishaga bavuga ko ari abakozi ba “Eden Busines”, bari baraturutse hirya no hino mu gihugu.

Nsabimana Jean Claude, umwe muri abo barwayi akomoka mu Karere ka Ngororero. Avuga ko yari yaje kwivuza umutwe nyuma yo kumva bamamaza iryo vuriro kuri radiyo.

Agira ati “Navuye i Ngororero nza kwivuriza muri EDEN Business kuko numvaga ku maradiyo bavuga ko ari ivuriro rikomeye.”

Akomeza avuga ko yari ahamaze ibyumweru bibiri. Uwo mutwe yari arwaye ngo ntiwakiraga, akeka ko ari uwo bamuroze nuko ahitamo kujya kuwivuza muri iryo vuriro.

Abajyaga kwivuriza muri Eden Business baturukaga hirya no hino mu gihugu

Nyuma yo kubona ibyo byose, ubuyobozi bwakoraga igenzura bwahise butumizaho imbangukiragutabara (Ambulances) zijyana abo barwayi mu bitaro bikuru bya Ruhengeri kugira ngo bitabweho n’abaganga b’inzobere maze “Eden Business” ihita ifungwa.

Mujawamariya Marie Claire, Umuyobozi wungirije w’Akarere ka Musanze ushinzwe imibereho myiza y’abaturage avuga ko bibabaje kuba abantu bashobora kuvurirwa ahantu nk’aho.

Agira ati “Birababaje kuba hari Abanyarwanda bari babayeho mu buzima nk’ubu nyamara indwara bivuza zishobora kuvurirwa mu bigo nderabuzima n’ibitaro bibegereye.”

Hitabajwe Ambulances kugira ngo zijyane abo barwayi kwa muganga

Ntihazwi amafaranga abarwayi bajyaga kwivuriza muri “Eden Busines” batangaga kuko ntawemeye gutanga amakuru kuri byo.

Gusa ariko hari amakuru avuga ko ayo umurwayi azanye yose bayakiraga. Ikindi ngo iyo umurwayi yakiraga akabura ayo kwishyura, bamufatiraga bakamokoresha indi mirimo agataha ari uko akoze imirimo ihwanye n’amafaranga yari kuzishyura.

Muri “Eden Busines” bahasanze kandi ibidomoro byuzuye ibinyobwa bitaga ko ari imiti kandi ari inzoga maze biramenwa. Hamenwe ibidomoro 30 kandi ikidomoro kimwe kiba kirimo litiro 250.

Muri iyi minsi ubuyobozi bw’Akarere ka Musanze buhagurukiye igikorwa cyo kugenzura amavuriro atujuje ibisabwa na MINISANTE.

Eden Business yahise ifungwa kuko itujuje ibyangombwa

Nyuma y’iminsi itatu icyo gikorwa gitangiye hamaze gufungirwa imiryango y’amavuriro atandatu arimo Eden Business, Zirumuze, Ibanga ry’ibimera, Imbaraga z’ibimera, Better Side na Hora Group.

Muri ayo mavuriro hakuwemo ibintu bitandukanye bitangaje byakoreshwaga mu kuvura abantu ku buryo hari n’aho basanze impu z’inyamaswa zo mu ishyamba.

Abasirikare basoje amahugurwa bafata ifoto y’Urwibutso

Yabibasabye mu muhango wo gusoza amasomo ya gisirikare bari bamazemo umwaka, yaberaga mu Ishuri rya Gisirikare ry’Inyakinama mu Karere ka Musanze.

Yagize ati " Aya masomo mwahawe uretse kubongerera ubumenyi murasabwa no kugira uruhare mu gutuma akarere turimo n’Afurika muri rusange haba ahantu hubashwe".

Gen Kabarebe yakomeje asaba abarangije ayo masomo kuzashingira ku bunararibonye basangiye mu gihe barimo biga kugira ngo Afurika irusheho gutekana.

Gen Kabarebe ageza Ijambo ku basirikare bakuru basoje amahugurwa kuri uyu wa Gatanu

Itangwa rya Dipolome n’impamyabushobozi z’icyiciro cya gatatu cya Kaminuza byahawe abo basirikare bakuru byahuriranye no kwishimira isabukuru y’imyaka itanu ishize iryo shuri bizeho rimaze rishinzwe.

ACP Jean Marie Twagirayezu wo muri polisi y’u Rwanda wakurikiranye ayo masomo ndetse akandika n’igitabo cyagenewe igihembo yatangaje ko ubumenyi bahawe buzagirira akamaro umugabane w’Afurika mu birebana n’umutekano.

Avuga ku gitabo cye yasobanuye ko iterabwoba rishobora kurwanywa habayeho ubufatanye bw’abashinzwe umutekano ndetse n’abaturage.

Ati " Nshingiye ku ngero z’ahagiye haba ibibazo by’iterabwoba uburyo nyabwo bwo kurirwanya ni ubufatanye bw’abaturage n’inzego z’umutekano".

Gen Patrick Nyamvumba Umugaba mukuru w’Ingabo za RDF atanga Impamyabumenyi ku basirikare basoje amasomo

Lt Col Like Like wo mu Gisirikare cya Zambia yatangaje ko agiye gusubira mu gihugu cye yungutse ubumenyi bwo ku rwego rwo hejuru.

Yunzemo ati " Amasomo twabonye yabaye ingirakamaro ku buryo tudatashye uko twaje ahubwo dusubiranyeyo ubumenyi".

Abarangije amasomo bagize n’umwanya wo kwiga amasomo ajyanye n’imiyoborere ndetse bakora n’ingendo-shuri zishimangira ibyo bize.

Amasomo yose bahawe yamaze igihe cy’umwaka bakaba barayateguriwe n’igisirikare cy’u Rwanda ku bufatanye na Kaminuza y’u Rwanda(UR).

Muri bo ufite ipeti rito ni majoro naho ufite ipeti rinini afite irya Koloneli.

Ishuri rikuru ry’igisirikare cy’u Rwanda rya Nyakinama muri Musanze ryafunguwe mu mwaka wa 2012 na Perezida Paul Kagame akaba n’umugaba w’ikirenga w’ingabo z’u Rwanda (RDF).

Amabendera y’ibihugu byitabiriye aya masomo

Ibirori byabimburiwe n’akarasisi k’ingabo z’igihugu

Bahabwaga injyana na Kompanyi y’umuziki ya RDF

Gen Kabarebe, Gen Patrick Nyamvumba na Gen Maj Kazura Jean Bosco

Abatumirwa bitabiriye uyu muhango

Dr Murigande Charles wo muri Kaminuza y’u Rwanda nawe yitabiriye uyu muhango

Gen Kabarebe yasoje uyu muhango atanga ubutumwa mu gitabo cy’Abasuye iki kigo

Abanyamakuru b’ibitangazamakuru bitandukanye bari mu mahugurwa abera i Musanze

Ayo mahugurwa y’iminsi itanu arakurikiranwa n’abanditsi b’ibitangazamakuru byo mu Rwanda, yatangiye tariki 29 Gicurasi 2017 mu Karere ka Musanze.

Prof Niyomugabo Cyprien wo mu ntebe y’inteko y’ururimi n’umuco (LARC), watangije ayo mahugurwa avuga ko guhugura Abanyamakuru bo mu Rwanda ku mikoreshereze y’ururimi rw’Ikinyarwanda bizavanaho amakosa amwe n’amwe agaragara mu itangazamakuru.

Agira ati “Abanyamakuru bari muri aya mahugurwa, turashaka ko bazaba abarinzi b’Ikinyarwanda bakakirinda abacyangiza uko bishakiye ndetse na bo ubwabo bakiheraho.”

Akomeza avuga ko mu bushakashatsi bunyuranye bwagiye bukorwa hari aho byagaragaye ko mu itangazamakuru hari Abanyamakuru bakoresha Ikinyarwanda bataragize amahirwe yo kukiga mu buryo burambuye.

Ahamya ko mu kuvana amagambo mu ndimi z’amahanga ashyirwa mu Kinyarwanda nabyo bigaragaramo ikibazo kiyongeraho no kuba bamwe bavangavanga amagambo y’Ikinyarwanda n’izindi ndimi.

Prof Niyomugabo asobanura ko ibyo bibazo bigaragara mu bitangazamakuru byo mu Rwanda ari byo byatumye hategurwa ayo mahugurwa, agamije gusiba icyo cyuho kiboneka mu nyandiko zitangazwa kandi zikagera kuri benshi.

Ati “Imwe mu nzira yorohera abantu ni ugutira amagambo kandi mu by’ukuri haba hari amagambo meza aboneye ashobora gukoreshwa yaba adahari nabwo abantu bakayahanga.”

Prof Niyomugabo ahamya ko ayo mahugurwa bageneye Abanyamakuru azatuma Ikinyarwanda gisigasirwa

Hakizimana Elias wandikira ibitangazamakuru bitandukanye mu buryo bwigenga (Freelancer) ashima ubumenyi ku mikoreshereze y’Ikinyarwanda bazungukira muri ayo mahugurwa.

Uwo munyamakuru abona ko amahugurwa nk’ayo akwiye kugera no mu bindi byiciro by’abantu bakoresha ururimi rw’Ikinyarwanda kubera amateka igihugu cyanyuzemo atuma bamwe bavanga Ikinyarwanda n’izindi ndimi z’amahanga.

Agira ati “Abayobozi bakwiriye amahugurwa nk’aya kugira ngo niba barimo gukoresha ururimi rw’Ikinyarwanda ari rwo bakomeza gukoresha gusa.”

Ayo mahugurwa yateguwe na LARC ifatanije n’inama nkuru y’itangazamakuru mu Rwanda (MHC) ku nkunga y’ishami ry’umuryango w’abibumbye ryita ku burezi, ubumenyi n’umuco (UNESCO).

Ihuriro ry’Ubumwe n’Ubwiyunge muri Musanze ririmo abahoze ari abayobozi nka Mpembyemungu Winifrida wayoboraga Akarere ka Musanze (wambaye ubururu) na Sembagare Samuel wahoze ayobora Akarere ka Burera (hagati wambaye ikoti ry’umukara)

Ryatangijwe ku wa kabiri tariki 23 Gicurasi 2017 na Komisiyo y’Igihugu y’Ubumwe n’Ubwiyunge ku nkunga y’umuryango wiswe International Alert.

Iryo huriro rigizwe n’abarinzi b’igihango, inyangamugayo za Gacaca, abari mu myanya y’ubuyobozi muri iki gihe n’abahoze ari abayobozi, bose bakaba bagambiriye gutanga umusanzu wabo mu kubaka ubumwe n’ubwiyunge Abanyarwanda bakeneye kugira ngo igihugu kirusheho kwiyubaka.

Iryo huriro kandi rigamije kwimakaza umuco w’amahoro, ubufatanye, ubumwe n’ubwiyunge mu bayobozi no mu baturage hagamijwe guteza imbere imibanire myiza. Hakiyongeraho gusesengura ibyabangamira ubumwe bw’abaturage no gufata ingamba zo gukomeza kubuteza imbere.

Kuba iryo huriro ryongewemo abahoze ari abayobozi b’uturere biri mu byabashimishije.

Bagahamya ko ari iby’agaciro kongera kugirirwa icyizere mu gutanga umusanzu wo kubaka u Rwanda rwunze ubumwe bw’abarutuye, nk’uko Sembagare Samuel wari umuyobozi w’Akarere ka Burera, ubu akaba atuye mu Karere ka Musanze, abisobanura.

Agira ati “Nta gisa nko kuba bongeye kutuzirikana bakatwibuka kuko iyo abantu barwanye intambara hari abayitangiza bakayitsinda abandi bakaba inkomere iyo abo bose babazirikanye bagasabwa gutanga umusazu wabo ibyo bintu birushaho kubashimisha.”

Fidèle Ndayisaba, Umunyamabanga Nshingwabikorwa wa Komisiyo y’Igihugu y’ubumwe n’Ubwiyunge (NURC), watangije iryo huriro, yatangaje ko ishyirwaho ry’iryo huriro rizatuma abakiri mu myanya y’ubuyobozi n’ababuhozemo bagira urubuga rwo kusangiriramo ubunararibonye bose bafite.

Agira ati “Ihuriro ry’ubumwe n’ubwiyunge ni urubuga Abanyarwanda bafite ubunararibonye mu nshingano barimo ubu, bahuriraho n’abafite ubunararibonye bakesha kuba baragize uruhare mu kugarura ubumwe bw’Abanyarwanda.”

Akomeza avuga ko iryo huriro ry’ubumwe n’ubwiyunge muri Musanze, rizashyirwaho mu turere twose no mu mirenge yose.

Ubwo iryo huriro ryatangizwaga hatanzwe ubuhamya bwa bamwe mu bagize umuryango wa Unity Club Intwararumuri hagaragazwa ibyiza byo kwishyira hamwe kw’abahoze ari abayobozi.

Ambasaderi John William Gelling

Ni amahugurwa yari agamije kwiga gukumira Jenoside, ubwicanyi ndengakamere bukorerwa abantu benshi hamwe n’uburyo bwo gutanga ubutabera bwunga mu gihe bishoka.

Ambasaderi w’Ubwongereza mu Rwanda, John William Gelling wari muri uyu muhango,yavuze ko Leta y’Ubwongereza izakomeza gufasha mu bikorwa byose bijyanye no kubungabunga amahoro.

Yagize icyo avuga ku Rwanda agira ati “Ndishimira ko aya amahugurwa yabereye mu Rwanda mu gihugu cyabashije kwiyubaka bihagije nyuma yo kuva mu bibazo cyanyuzemo bya Jenoside yakorewe abatutsi yahitanye abantu benshi”.

Abitabiriye aya mahugurwa bo bo bavuga ko nyuma y’ubuhamya bumvise

Umunyakenyakazi Zaituna Ramadhan wari muri ayo amahugurwa avuga ko ubuhamya yumvanye abarokotse Jenoside yakorewe Abatutsi mu kimwe n’ibiganiro bahawe n’impuguke zinyuranye byatumye yiyemeza guharanira ko Jenoside itazasubira kubaho.

Yagize ati “Bwari ubwa mbere nganiye n’abantu bafite ibyo bazi byinshi kuri Jenoside n’ubwicanyi bukorerwa abantu ariko nibura nabashije kubonana abo tuganira mbasha kubimenyaho byinshi birimo ibiyibanziriza ndetse n’uburyo bwo kuyikumira”.

Akomeza avuga ko binyuze mu mahugurwa yahawe byamweretse ko Jenoside ikwiye gufatirwa ingamba zo kuyirwanya.

Yunzemo ati “ Ntabwo twarebye ku Rwanda gusa ahubwo twarebye no mu bindi bihugu nka Yogoslavia,Cambodia, Sierra Leone, Repubulika ya Centra Africa twiga uburyo abantu bagiye bicwa maze twiyemeza ko mu bihugu byacu bya Afurika Jenoside idakwiye kubibamo”.

Abitabiriye amahugurwa bavuye mu bihugu bitandukanye

Umuyobozi w’Ikigo cy’Igihugu cy’Amahoro (Rwanda Peace Academy) Col. Jill Rutaremara yavuze ko ubunararibonye bwose n’ubumenyi bahawe bagomba kugira intego yo kurwanya jenoside kandi bakumva ubwabo ko aribo bireba.

Ati “Ikintu kiba gishyizwe imbere muri aya mahugurwa ni ubutabera bwunga uwo muryango wagize ibyo bibazo ndetse igihugu kikabigira ibyacyo”.

Abari bakurikiranye ayo mahugurwa bakomoka muri Komore, Uganda Tanzaniya, Ethiopia, Malawi, Kenya, Somaliya n’u Rwanda.

Minisitiri w’Ingabo Gen James Kabarebe ni we wasoje ibi biganiro byari bimaze iminsi itatu

Babitangaje mu muhango wo gusoza ibiganiro by’iminsi itatu byavugaga ku bibazo by’umutekano wa Afurika muri iki gihe, byasojwe kuri uyu wa gatatu tariki 17 Gicurasi 2017 .

Maj. Prince Tandoh wo mu ngabo z’Igihugu cya Ghana wari muri ibyo biganiro, yavuze ko muri byinshi bigiyemo havuyemo kuba batagomba kurebera ibibazo by’umutekano muke.

Yagize ati “Hano twahahuriye turi abantu bakomoka mu bihugu bitandukanye. Tugiye gushyira mu bikorwa ibyo twahigiye dufasha ibihugu byacu gushakira umuti ibibazo by’umutekano muke.”

Lt Col H Chilengo wo mu Ngabo za Malawi

Lt Col H. Chilenga waje aturuka mu ngabo za Malawi yongeyeho ko ubunararibonye basangiye muri ibi biganiro, bwabaye ingirakamaro mu gutuma hafatwa ingamba zo kurwanya ibibazo by’umutekano muke bigaragara ku mugabane w’Afurika.

Ati “Ikibazo cyo kurwanya iterabwoba, ibiyobwabwenge cyangwa icuruzwa ry’abantu ntabwo kireba umuntu ku giti cye ahubwo kireba abantu bose. Gisaba ubufatanye bw’ibihugu bitandukanye”.

Uretse aba basirikare bo mu bihugu by’amahanga bafashe ingamba zo kutarebera ibihungabanya umugabane wa Afurika mu by’umutekano, n’igisirikare cy’u Rwanda cyiyemeje kubera abandi urugero mu kubungabunga umutekano wa Afurika n’ahandi.

Lt Col Joseph Ndayishimiye ku ruhande rw’ingabo z’u Rwanda (RDF), yashimangiye ko guhangana n’ibibazo by’umutekano muke byugarije Afurika n’isi muri rusange bishyizwe imbere n’igisirikare cy’u Rwanda.

Lt Col Joseph Ndayishimiye wa RDF

Gen. James Kabarebe Minisitiri w’ingabo z’u Rwanda wasoje ibyo biganiro, yashimiye ababyitabiriye anabaha umukoro wo kuzabyaza umusaruro ubumenyi n’ubunararibonye bahakuye.

Yagize ati “Ndizera neza ko umusaruro wari utegerejwe wagezweho. Niyo mpamvu ngira ngo nshimire ababiteguye ndetse n’ababikurikiranye”.

Yanasabye kandi ko ubumenyi n’ubunararibonye basangiye, byazagezwa no mu bihugu byabo, ku buryo Afurika bayishakira umutekano uhamye.

Umubyeyi wo muri Nyabihu aha umwana we ufite ubumuga igikinisho yamukoreye mu bitambaro

Abo babyeyi bavuga ko amahugurwa bahawe n’umuryango utegamiye kuri Leta wita ku burenganzira bw’abana bafite ubumuga ECD (Empowering Children with Disabilities) ariyo yatumye bamenya gukora ibikinisho by’abo bana no kumenya icyo byabafasha mu mikurire yabo.

Mukandekezi Elina utuye mu Murenge wa Mukamira mu Karere ka Nyabihu avuga ko ubu yamaze kumenya gukora bimwe mu bikinisho by’abana yifashishije bimwe mu bikoresho biboneka iwabo mu giturage.

Agira ati “Gukora igikinisho cy’umwana wanjye wavukanye ubumuga bukomatanije ntibikiri ikibazo kuko ushobora gufata umwenda ushaje ukawumubangiramo umupira wabona umwanya mu gakina.”

Uwambajimana Marie Goretti nawe yahawe amahugurwa nk’ayo yo gukora ibikinisho by’abana avuga ko kwibwira ko ibikinisho by’abana bikorerwa mu mahanga gusa byari ukwibeshya.

Yunzemo ati “Binyuze mu mahugurwa twahawe twize byinshi byakorwamo ibikinisho by’abana.Urugero ushobora gufata urupapuro ukarukoramo indege ndetse n’aho bahinga amasaka ushobora gufata igikenyeri ukagikoramo aka modoka umwana agakina nta kibazo”

Abana bo muri Nyabihu bafite ubumuga bahurizwa hamwe bagatozwa gukina kugira ngo bitazabaviramo kwigunga

Turatsinze Félicien, umukozi w’umuryango ECD wita ku burenganzira bw’abana bavukanye ubumuga bukomatanije wahuguye abo babyeyi avuga ko ibikinisho by’abana bifite uruhare rukomeye mu mikurire y’ubwonko bwabo yaba abafite ubumuga cyangwa abatabufite.

Agira ati “Umwana udakina burya aba afite icyo abura. Niyo mpamvu igikinisho kimufasha mu gukura k’ubwenge bwe ndetse n’iyo akina n’ababyeyi be nabyo bimwongerera ubusabane akumva ko yitaweho.”

Yongeraho ko umwana udafashwa mu gukina ngo yidagadure,iyo akuze bimuviramo guhora yigunze kuko aba ataratojwe gukina akiri muto kugira ngo abikurane.

Ibikinisho bihabwa abana si ngombwa kugura ibyakorewe mu mahanga. Ababyeyi nabo bashobora kubikora bagendeye ku bikoresho bibari hafi. Iki cyakozwe n’umubyeyi wo muri Nyabihu ni moto ikozwe mu mikwege

Ngabonziza Louis, umuyobozi mukuru wa ECD akangurira ababyeyi kugirana ubusabane n’abana bakina bifashishije ibikinisho baguze cyangwa bikoreye ubwabo mu miryango.

Umushinga wa ECD ukorera mu Turere twa Musanze, Gakenke na Nyabihu wita ku burenganzira b’abana bafite ubumuga ariko by’umwihariko abavukanye ubumuga bukomatanije.

Iki gikino nacyo cyakozwe n’umubyeyi wo muri Nyabihu. Ni intare ibaje mu giti

Uyu muvuga butumwa (wambaye ikoti ry’umukara) yagaragaye mu mujyi wa Musanze abwiriza mu muhanda

Uwo muvugabutumwa yagaragaye mu Mujyi wa Musanze mu ma saa cyenda z’igicamunsi kuri uyu wa kane tariki ya 11 Gicurasi 2017.

Yagaragaye rwagati muri uwo mujyi imbere y’isoko rya Musanze, ashagawe n’abantu amagana bigaraga ko bamwe banyuzwe abandi batangajwe n’inyigisho ari kubaha “z’ijambo ry’Imana”.

Yakomeje arigisha abantu bakomeza kwiyongera atangira no kubaka amaturo bamwe muri bo bikora mu mufuka bamuha amafaranga.

Uyu muvugabutumwa ukomoka i Rubavu avuga ko ubutumwa atanga yabuhawe n’Imana kugira ngo abugeze aho bishoboka hose.

Akomeza avuga ko kwaka amaturo abo aba yabwirije mu nzira ari ngombwa kuko ngo ayo mafaranga bamuha ari ayo gushyigikira umurimo arimo w’Imana.

Yabwirizaga abantu bamwe bafashijwe

Gusa ariko bamwe mu bakurikiranye izo nyigisho ze ntibabyakiriye kimwe. Hari abavuga ko ari umutekamutwe ushaka uko yambura abantu,nk’uko umwe mu baturage abivuga.

Agira ati "Njye ntabwo nemeranya n’uriya muvugabutumwa kuko biriya ni ubutekamutwe mbese ni ukwishakira imibereho muri rusange niko nabibonye.

Ashobora gukusanya abantu kuriya akabaka amaturo akahavana nk’ibihumbi bitanu yagera hirya gato nabwo agakusanya abandi akahakura andi agakomeza atyo bukira akoreye nk’ibihumbi 20RWf ku munsi.Ubwo se mu kwezi urabona ataba yibitseho iritubutse.

Rwose biriya ni ubwambuzi bushukana nk’ubundi njye sinabishyigikira ahubwo ni ibyo kwamaganwa, abashaka kubwiriza bakajya babikorera mu nsengero cyangwa bakabwiriza abantu batabatse ibyabo.”

Gusa ariko hari abandi banyuzwe n’ibyo uwo muvugabutumwa yakoraga,nk’uko uwitwa Mukanoheri Francoise abivuga.

Agira ati "Njye nabonye ari ukumufasha kugira ngo nawe atahe mu rugo rwe agira icyo afata nk’ifunguro kuko rwose aba yitanze akareka gukorera urugo rwe agira ngo abwirize abantu.”

Byageze aho bamuha amaturo

Undi utifuje gutangaza izina rye nawe yerekanye ko ashyigikiye uwo muvugabutumwa agira ati “Uriya Mugabo nabonye nta kibazo kumuha amaturo nyuma y’uko yari amaze kubwiriza.

Gusa yasabye abantu kujya bashishoza ngo kuko n’umutekamutwe ashobora kwambura abantu ibyabo yitwaje ivugabutumwa".

Uwo muvugabutumwa yavuze ko mu turere 18 tw’igihugu amaze kubwirizamo, mu myaka itanu ishize hamwe bamuha amafaranga ahandi ntayahabone.

Ahamya ko ayo mafaranga yaka abaturage atari amaturo kuko ngo nta cya cumi yaka abantu kandi bose bamuha biturutse ku bushake bwabo.

Yirinze gutangaza amafranga yakuye muri abo baturage uretse ko byagaragaraga ko atubutse kuko abenshi bamupfumbatishaga inoti.

Abantu bari bashungereye ari benshi

Ingabo zigize umutwe udasanzwe (Special Operations Forces) zatanze amaraso yo gufasha indembe

Icyo gikorwa cyo gutanga amaraso cyakorewe muri icyo kigo kuri uyu wa gatandatu tariki 06 Gicurasi 2017.

Kitabiriwe na Brig Gen Innocent Kabandana uyobora umutwe w’Ingabo udasanzwe mu ngabo z’u Rwanda.

Yabwiye Kigali Today ko icyo gikorwa cyo gutanga amaraso cyakozwe muri gahunda rusange ingabo z’u Rwanda zirimo yo gutanga umusanzu wazo zifasha abaturage binyuze muri gahunda izwi nka “Army week”.

Agira ati “Twebwe icyo twashoboye ni ukunganira dutanga amaraso tuzi ko akenerwa n’abantu mu buryo bunyuranye."

Yongeyeho ko hirya no hino abasirikare barimo kuvura abaturage ku buntu abandi bakaba barimo kubafasha mu bikorwa bijyanye n’ubuhinzi, ubwubatsi no gusana ibiraro n’ibindi byose hagamijwe kuzamura imibereho myiza yabo.

Ati “Ntabwo kubaka igihugu ari ukukirwanira gusa iyo ukirwaniriye haba hasigaye no kucyubaka iyo ni inshingano duhabwa n’amategeko kandi ni umuco mu ngabo z’u Rwanda (RDF).”

Abarenga 400 batanze amaraso yo gufasha indembe

Alexia Mukamazimpaka, umukozi w’ikigo cy’Igihugu gishinzwe ubuzima mu Rwanda (RBC) ukora mu ishami rishinzwe gutanga amaraso avuga ko kuba ingabo z’Igihugu zitanga amaraso yo gufasha indembe ari urugero rwiza rwo kwigira ku ngabo z’u Rwanda.

Agira ati “Kuba ingabo z’u Rwanda zitanga amaraso ntabwo ari ibintu bikwiye kubonwa na RBC gusa bikwiye kubonwa n’amaso y’Abanyarwanda bose bakabona ko ari urugero rwiza ingabo zirimo gutanga.”

Akomeza avuga ko kuba umusirikare arwanirira igihugu cye yarangiza akagira n’uruhare mu gutuma abaturage bagira ubuzima bwiza ari ibintu byo gushimira ingabo z’u Rwanda. Abarenga 400 batanze amaraso.

Iri soko rya Kijyambere rya Musanze ryuzuye ritwaye miliyari 7,5RWf (Photo Jean Pierre Twizeyeyezu)

Iryo soko riherereye mu Mujyi wa Musanze ryuzuye ritwaye Miliyari 7,5RWf; nk’uko bitanganzwa n’ubuyobozi bwa GOICO (Gorilla Investment Company), isosiyete yibumbiyemo abikorera 89 bo muri ako karere.

Niyonzima Reymond, umuyobozi w’iyo GOICO avuga ko 70% by’ayo mafaranga yujuje iryo soko ari inguzanyo ya banki.

Andi ngo yaturutse mu banyamuryango b’iyo sosiyete aho umunyamuryango yasabwaga gutanga umugabane wa miliyoni 5RWf.

Nyuma y’aho ariko ngo amafaranga yabaye make basaba abanyamuryango babishoboye ko uwo mugabane bawukuba inshuro 10.

Imbere muri iryo soko ry’i Musanze ni uko haba hasa kumanywa (Photo Jean Pierre Twizeyeyezu)

Niyonzima avuga ko igitekerezo cyo kubaka iryo soko rishya rya kijyambere cyaturutse ku mpanuro bahabwa n’ubuyobozi.

Agira ati “Igitekerezo cyo kubaka isoko rya Musanze cyatujemo gihereye ku nyigisho z’Umukuru w’igihugu cyacu ukunda kuvuga ko abantu bagomba gukura amaboko mu mifuka bagakora.”

Akomeza avuga ko mbere yo kubaka iryo soko rya kijyambere, abacuruzi baho bakoreraga mu bucucike, yise ko bwari ubwo mu manegeka.

Ati “Twasabye ikibanza kuko isoko twari dufite ryari mu bucucike ku buryo abantu barikoreragamo bari bamaze nk’abari mu manegeka.”

Niyonzima ahamya ko abacuruzi biyujurije iryo soko bifuza ko ryazafungurwa n’Umukuru w’gihugu.

Ati “Urabona kiriya ni igikorwa cy’indashyikirwa cyakozwe n’abantu bishyize hamwe ni cyo cya mbere kiri muri Musanze kandi kiremereye gikomeye.

Kugitaha twumva twebwe ubwacu tutagitaha twenyine tutari kumwe n’Umukuru w’igihugu cyane ko twese ari we twigiraho byose.”

Bamwe mu bacuruzi bo muri Musanze bamaze kugeza ibicuruzwa byabo muri iryo soko mu gihe abandi bitegura kuryimukiramo.

Isoko rya Kijyambere rya Musanze urirebeye ahirengeye (Photo Jean Pierre Twizeyeyezu)

Muhire Pacifique umwe mu bamaze kugeza ibicuruzwa muri iryo soko avuga ko ryujuje ibyagombwa byose.

Agira ati “Isoko twimukiyemo ni ntamakemwa igisigaye nk’abacuruzi ni ukureba ko tuzaribonamo urwunguko.”

Isoko rya Kijyambere rya Musanze ryujuje ibyangombwa bikenewe birimo parikingi z’imodoka, Kamera zicunga umutekano, intabaza (Alerts) zishobora kuburira abantu mu gihe habaye ikintu gishobora guteza umutekano muke.

Andi mafoto y’isoko rya Kijyambere rya Musanze

Ku manywa

Uko iryo soko riba risa nijoro urirebeye inyuma: Photos: Muzogeye Plaisir

Uko iryo soko riba risa imbere nijoro: Photos: Jean Pierre Twizeyeyezu

Ubwo bageragezaga kuzimya umuriro mu ruganda

Uwo mugabo w’imyaka 36 y’amavuko yitabye Imana aguye mu bitaro bya CHUK i Kigali mu rukerera rwo kuri uyu wa 21 Mata 2017.

Iyo nkongi y’umuriro yibasiye urwo ruganda rwitwa “ Umurage Enterprise Ltd “ tariki 19 Mata 2017. Muri batatu bari bakomerekeyemo, uwo Hakizimana Evariste witabye Imana niwe wari umerewe nabi cyane.

Hakizimana n’abo bari hamwe bakomeretse boherejwe mu bitaro bya Ruhengeri ariko we ubutabazi yahabwaga bukomeje kunanirana yoherezwa mu bitaro bya CHUK i Kigali ari naho yaguye.

Mu kiganiro na Kigali Today, Niyigaba Jean Pierre, umuyobozi w’uruganda rwa “Umurage Enterprise LTD” yatangaje ko Hakizimana yitabye Imana aguye mu bitaro bya CHUK,aho yari yajyanwe ngo akomeze kwitabwaho byisumbuyeho.

Yagize ati “Ni byo koko wa mukozi w’uruganda wajyanwe kwa muganga amerewe nabi yitabye Imana ubu twagiye kuzana umurambo we i Kigali kugira ngo ushyingurwe mu Karere ka Musanze. Ni inkuru ibabaje ariko twayakiriye gutyo”.

Inkongi y’umuriro yibasiye uruganda rukora inzoga muri Tangawizi rw’i Musanze yanangije ibintu bifite agaciro ka miliyoni hafi 50 RWf, nk’uko Niyigaba Jean Pierre umuyobozi w’urwo ruganda yabitangaje.

Polisi y’igihugu ishami rishinzwe kuzimya umuriro muri Musanze niyo yahagobotse izimya igice kimwe cyari cyafashwe cy’inyubako y’urwo ruganda, bituma inkongi y’umuriro idafata igice cyari gisigaye .

Inkongi y’umuriro yibasiye urwo ruganda rukora inzoga muri Tangawizi. Aha bari kuzimya

Iyo nkongi yibasiye urwo ruganda ruherereye mu Kagari ka Kabeza mu Murenge wa Cyuve, mu ma saa saba zo kuri uyu wa gatatu tariki ya 19 Mata 2017.

Urwo ruganda rwahiye igice kimwe, imodoka izimya umuriro ya Polisi y’igihugu itabara ikindi gice kitarafatwa.

Abakozi barwo batatu bakomerekejwe n’iyo nkongi y’umuriro yatunguranye. Umwe muri bo niwe wakomeretse bikomeye. Bose bajyanwe mu bitaro bya Ruhengeri kugira ngo bakomeze kwitabwaho.

Umunyamabanga nshingwabikorwa w’Umurenge wa Cyuve, Nsengiyumva Telesphore yatangarije Kigali Today ko bakeka ko iyo nkongi y’umuriro yaba yatewe na “installation” y’insinga z’amashanyarazi ikoze nabi.

Agira ati “Urebye uko bigaragara muri compteur [Mubazi] byaba byatewe n’insinga z’amashanyarazi kuko nizo zabanje gushya haza umwotsi maze uruganda rutangira gucumba rwafatwa n’inkingi y’umuriro."

Kizimyamwoto ya Polisi y’igihugu yahise iza gutabara

Mu Kiganiro na Kigali Today, Niyigaba Jean Pierre umuyobozi w’urwo ruganda yatangaje ko mubazi ariyo yabanje gushya igacumba umwotsi waje gutanga inkongi y’umuriro yibasiye igice kimwe cy’urwo ruganda.

Agira ati “Habayemo “circuit” tubona hajemo umwotsi mu gihe tukigenzura ibibaye nibwo twabonye hano hirya mu rusenge harimo gucumba umwonsi mwinshi cyane."

Akomeza avuga ibintu byangijwe niyo nkongi y’umuriro bifite agaciro ka miliyoni hafi 50RWf.

Yongeyeho ko urwo ruganda rwafashwe n’inkongi y’umuriro kimwe n’Abakozi barwo bose bari bafite ubwishingizi.

Polisi y’Igihugu mu ishami rishinzwe kuzimya inkongi, nyuma y’ibikorwa by’ubutabazi, yakanguriye abaturage bari aho iyo nkongi y’umuriro yabereye kwirinda inkongi z’umuriro ndetse inabasobanurira imikorere ya Kizimyamoto.

Inkongi y’umuriro ishobora kuba yaketswe n’insiga z’amashanyarazi

Aba bari gufatanya na Polisi kuzimya inkongi

<img88134|ce

Umushinjacyaha Mukuru Jean Bosco mutangana Ari mu kiganiro muri KT RADIO

Umushinjacyaha mukuru w’u Rwanda, Jean Bosco Mutangana yatangarije KT Radio (Radio ya Kigali Today LTD) ko impapuro nk’izo zimaze no gutangwa mu bihugu 33 byo hirya no hino ku isi.

Igihugu cy’Ubufaransa akaba ari cyo u Rwanda rwoherejemo impapuro nyinshi ugereranyije n’ibindi bihugu byo ku mugabane w’Uburayi.

Yagize ati “Iyo ugiye kureba nk’ibihugu bya mbere icumi twoherejemo izo mpapuro mu by’ukuri Ubufaransa nicyo gihugu kiza mu bihugu bya mbere ku mugabane w’Uburayi cyoherejwemo impapuro 38”.

Mutangana yasobanuye ko izo mpapuro zohererejwe Igihugu cy’Ubufaransa no mu bindi bihugu by’Uburayi, Amerika n’Afurika binyuze mu bufatanye mu iperereza (Cooperation in Criminal Matters) buri hagati y’ubushinjacyaha bw’u Rwanda n’ibihugu byo kuri iyo migabane.

Ati “Ubushinjacyaha bukuru bw’u Rwanda icyo bukora ni iperereza bukorana n’inzego z’ubugenzacyaha tukanyurwa n’amaperereza twakoze kugira ngo abe afite agaciro ku buryo umuntu runaka ashyirwa ku rutonde rw’abashakishwa”.

Igihugu cy’Ububiligi nacyo kiri ku mugabane w’Uburayi nicyo kugeza ubu kimaze kuburanisha abantu benshi bagize uruhare muri Jenoside yakorewe Abatutsi muri Mata 1994 bari bagihungiyemo aho kuva muri 2005 cyatangiye kubaburanisha.

Kugeza ubu ubushinjacyaha bukuru bw’u Rwanda bumaze gutanga impapuro zo guta muri yombi abakekwaho Jenoside yakorewe Abatutsi muri Mata 1994 bihishe mu bihugu bitandukanye birimo Uganda (168), Repuburika Iharanira Demokarasi ya Congo (158), Ubufaransa (38), Ububiligi (37), Malawi (36), USA (23), Ubuholandi(18), Tanzania (18) n’u Burundi (15).

Ubushinjacyaha bukuru bw’u Rwanda kandi buvuga ko hari abandi abantu 480 nabo bakekwaho uruhare bagize muri Jenoside yakorewe abatutsi muri Mata 1994, bari hirya no hino ku isi bufite amakuru yaho baherereye, gahunda yo kubashyiriraho impapuro zibafata ikaba iri kunozwa.

Minisitiri Johnston Busingye ubwo yari ari mu kiganiro kuri KT Radio

Yabitangaje ubwo yari ari mu kiganiro kuri KT Radio (Radio ya Kigali Today Ltd), tariki ya 08 Mata 2017.

Minisitiri Busingye avuga ko mu mpapuro 691, zatanzwe kuva muri 2007 zisaba ko abakekwaho kugira uruhare muri Jenoside yakorewe Abatutsi bafatwa bakagezwa imbere y’ubutabera, muri zo 40 gusa nizo zifitiwe igisubizo.

Avuga ko icyo ari ikibazo n’ubwo ibyo bihugu byashyize umukono ku mazezerano mpuzamahanga yo mu 1948 arwanya akanakumira icyaha cya Jenoside.

Akomeza avuga ko ariko igituma badatabwa muri yombi ari uko bagera mu bihugu bahungiyemo bagakorana bya hafi n’ubuyobozi bw’ibyo bihugu, bikabakingira ikibaba.

Minisitiri Busingye avuga ko indi mpamvu ituma abakekwaho icyaha cya Jenoside bahungiye mu bindi bihugu badatabwa muri yombi ari uruhare ibyo bihugu nabyo biba byishinja.

Agira ati “Nk’u Bufaransa muribuka igihe Gacaca yari igitangira hagiye habaho ibintu bitandukanye nk’amashyirahamwe yo guhisha ukuri yari afite n’akazina bayihaye kiswe “Ceceka” igamije guhisha ukuri.”

Akomeza avuga ko kandi igituma abakekwaho icyaha cya Jenoside yakorewe Abatutsi badatabwa muri yombi n’ibihugu bahungiyemo ari uko bahagera bakiyoberanya.

Ati “Ibihugu byinshi byo muri Afurika n’ubwo biba byarashyize umukono kuri ariya masezerano mpuzamahanga akenshi abantu babihungiyemo kwiyoberanya kwabo birihuta cyane.”

Usanga hano yari azwi nka perefe, umucuruzi ukomeye, burugumesitiri ariko ugasanga hari ahandi ageze agakora nko mu mirima, yoroye inka! Niyo afashwe usanga abantu batangajwe n’uko ariwe bashakishaga mu myaka yose.”

Minisitiri Busingye avuga ko nubwo ibyo byose buhari, ntibizabuza u Rwanda gukomeza kubakurikirana kuri icyo cyaha cya Jenoside uko bizagenda kose.

Ati “Umuntu uri hanze wese wagize uruhare muri Jenoside yakorewe Abatutsi agomba kubibazwa kuko umuntu ari hanze y’u Rwanda bitavuze ko ari hanze y’ubutabera.”

Mu myaka 10 ishize impapuro zita muri yombi abakekwaho icyaha cya Jenoside zigiye hanze, abantu 17 bakekwaho kugira uruhare muri Jenoside yakorewe Abatutsi bari bihishe mu mahanga boherejwe kuburanira mu Rwanda.

Abandi 21 baburanishirizwa mu bihugu bari bahungiyemo; nk’uko Jean Bosco Mutangana, Umushinjacyaha mukuru w’u Rwanda abitangaza.

Abaturage baturiye Parike bamaze gusirimuka babikesha imirimo ibabyarira inyungu bakesha kuyibungabunga

Abaturage bavuga ibyo ni abatuye imirenge ya Nyange na Kinigi bigishijwe kubungabunga iyo Pariki irimo ingagi, ubu bakaba barahurijwe hamwe mu makoperative akora ibintu bitandukanye birimo ubukorikori.

Karakowe Peruth, umukecuru w’imyaka 65 y’amavuko atangaza ko kuva mu bwana bwe parike y’ibirunga yayifataga nk’aho ntacyo imumariye. Ariko kuri ubu ngo iyo myumvire yarahindutse kuburyo amadevize ayivamo yamukuye mu bukene.

Agira ati “Parike y’ibirunga niyo twavomagamo amazi, ibiti biyigize tukabyangiza nkana dushakamo ibiti byo gucana ariko ubu bigeze muri 2017 iyo myumvire yarahindutse kuko ubu tubayeho neza ariyo tubikesha.

Ubu mfite inzu yanjye nziza kandi sinjye njye nyine uyifite kuko abaturitye parike bamenye akamaro ko kuyibungabunga.”

Akomeza avuga ko guhindura imyumvire mu baturage kwabayeho kuva muri 2004 ubwo ishyirahamwe SACOLA (Sabyinyo Community Livelihood Association) ryashingwaga ugamije gukangurira abaturage baturiye ishyamba ry’ibirunga kurushaho kuribungabunga.

Abaturage bo mu murenge wa Nyange bujurijwe ibiro by’umurenge babikesheje amadovize ava muri Pariki y’ibirunga

Binyuze muri SACOLA abaturage bo mu mirenge wa Nyange na Kinigi begerejwe amazi meza n’amashuri y’abana babo abandi bibumbira muri makoperative y’ubworozi n’ubuhinzi.

Tariki ya 04 Mata 2017, abo baturage batashye ibikorwa bitandukanye bagezeho babikesha iryo shyirahamwe.

Bimwe muri ibyo bikorwa harimo ibiro by’umurenge wa Nyange, byuzuye bitwaye miliyoni 55RWf.

Byubatswe biturutse ku byifuzo by’abatuye uwo murenge nyuma yo kubona ko ibiro by’umurenge wabo bitari bikijyanye n’igihe kubera ubwinshi bw’ababikoreramo kandi byo byari bito.

Nsengiyumva Pierre Célestin, Perezida wa SACOLA yabwiye Kigali Today ko ibikorwa by’iryo shyirahamwe byose bitoranywa hakurikijwe ibyifuzo by’abaturage.

Bigenwa kandi hagendewe ku ngano y’amafaranga atangwa na ba mukerarugendo baba baje gusura Parike y’Ibirunga bakaboneraho no gucumbika muri Hoteli yubatswe n’iryo shyirahamwe.

Agira ati “Abo baturage bo mu murenge wa Nyange nibo bahisemo ko ibiro by’umurenge wabo byubakwa nuko bimaze gusesengurwa n’abantu babigira imishinga birubakwa.”

Ibyumba by’amashuri abanza bya Kabwende mu Kinigi byubakiwe abana baturiye hafi ya Parike y’Ibirunga

Umuyobozi w’Akarere ka Musanze, Habyarimana Jean Damascène avuga ko abaturage baturiye Pariki y’Ibirunga bahisemo guharanira kuyibungabunga bayirinda ba rushimusi nyuma yo kubona ko yababereye imbarutso yo kwiteza imbere.

Akomeza avuga ko SACOLA mu mirenge ikoreramo habonetse impinduka mu iterambere ry’ubukungu bw’abaturage binyuze mu bukangurambaga ikora bwo kubungabunga ishyamba rya Parike y’ibirunga.

Usibye amafaranga abaturiye ishyamba ry’ibirunga bavana mu byo bagurisha kuri ba mukerarugendo, Ikigo cy’Igihugu cy’Iterambere (RDB) cyibagenera amafaranga yitwa “Revenue Sharing” angana na 5% by’ayo ba mukerarugendo baba binjije.

Abaturiye Pariki y’Ibirunga bagabirwa inka

Abantu benshi baje gufata mu mugongo imiryango yashyinguye abayo

Uyu muhango wakozwe kuri uyu wa 31 Werurwe 2017, bashyingurwa mu irimbi rusange riri mu murenge wa Cyuve.

Iyi gahunda yo kubimura ikozwe nyuma y’uko abadepite bagize komisiyo y’ubumwe bw’abanyarwanda, uburenganzira bwa muntu no kurwanya Jenoside basabye ko aba bantu bimurwa.

Ubwo basuraga inzibutso za Jenosode zo muri Musanze tariki 03 Ukwakira 2016 ngo batunguwe no kubona mu rwibutso rwa Muhoza imibiri y’abazize Jenoside yakorewe abatutsi mu 1994, ishyinguye hamwe n’abishwe n’abacengezi mu 1997.

Muri urwo ruzinduko abo badepite bavuze ko ibyakozwe n’Akarere ka Musanze ari ugupfobya Jenoside yakorewe abatutsi, ubuyobozi bw’abwo karere bwasabye imbabazi bwizeza abo badepite ko bizakosorwa.

Imibiri y’abishwe n’abacengezi mu 1997 yashyinguwe mu irimbi

Habyarimana Jean Damascene, umuyobozi w’Akarere ka Musanze avuga ko kuba icyo gikorwa cyo kwimura abo bantu cyarafashe igihe kirekire, byatewe n’ubwumvikane buke hagati y’ubuyobozi bwariho n’imiryango yaba bantu.

Yagize ati “Ku bijyanye n’igihe kirekire cyatambutse kigera ku myaka makumyabiri, byumvikane ko byatewe n’ikibazo cyabayeho cyo kuba abafite ababo hariya n’ubuyobozi n’uburyo byagombaga gukorwamo bitanogejwe mu gihe cyabyo”.

Muhoza Rwasibo Pierre uhagarariye umuryango IBUKA muri Musanze aganira na Kigali Toda mu mwaka ushize wa 2016, yavuze ko uyu muryango wahoraga usaba ubuyobozi ko aba bantu bakwimurwa ariko ntibubikore.

Yagize ati “Mu nzibutso z’Abazize Jenoside yakorewe abatutsi muri Mata 1994 mu Rwanda nta bandi bantu bagomba gushyingurwamo cyane ko na bariya bantu bishwe n’abacengezi Jenoside yari yaramaze guhagarikwa mu 1997”.

Iki gikorwa kigezweho byarabanje kugorana, kuko habanje gukorwa inama nyinshi zo kumvisha iyi miryango impamvu abantu babo bishwe n’abacengezi bagomba kuvanwa mu rwibutso, n’ubwo nabo bishwe bazira ko ari Abatutsi.

Iyi miryango yaje kubyumva ndetse ivuga ko uyu munsi yatunguwe cyane ikanashimishwa n’ubufasha bw’akarere, no kuba yabonye abantu benshi bayitabara mu gihe yari izi ko iba iri yonyine muri uyu muhango.

Bashyinguwe mu irimbi rya Cyuve

Imibiri yabonetse yose hamwe ni 43 iyashyinguwe ni imibiri 29, iyindi bene yo bakomoka mu kinigi bifuje ko bayishyingura mu ngo zabo barabisa maze barabibemerera.

Indi mibiri y’abasirikare bane ba RDF nayo yari mu Rwibutso rwa Muhoza yo izashyingurwa I Kanombe mu irimbi rya gisirikare.

Umuyobozi w’Intara y’Amajyaruguru, Musabyimana Jean Claude avuga ko isuku iri muri bimwe ashyize imbere

Yatangaje ibi ubwo yagiranaga ikiganiro n’abayobozi batandukanye bo mu turere tugize Intara y’Amajayaruguru, tariki ya 28 Werurwe 2017.

Guverineri Musabyimana ahamagarira abayobozi guhindura ingamba zari zisanzweho kugira ngo ikibazo cy’isuku idahagije kivugwa mu Ntara y’Amajyaruguru gicike burundu.

Akomeza avuga ko abayobozi bagomba gushyiraho ingamba zituma umuco w’isuku n’isukura ukwira hose kandi ukitabwaho nkuko ivanjiri yitabwaho mu Kiliziya.

Agira ati “Mu Ntara y’Amajyaruguru dushyize imbere ibintu bitatu birimo umutekano usesuye, umuco w’isuku ndetse no kurwanya ruswa n’akarengane.

Uko Padiri yita ku ivanjiri ye mu Kiliziya niko n’abaturage bacu tugiye kubatoza kwita ku isuku.”

Ikibazo cy’umwanda mu Ntara y’Amajyaruguru ni kimwe mu bibazo bikunze kuvugwa n’ubuyobozi bwaho.

Uwo mwanda ugaragara cyane cyane ku mubiri no mu ngo z’abaturage. Aho usanga bamwe bambaye imyambaro yahinduye ibara kubera umwanda naho mu ngo zimwe na zimwe ugasanga nta n’ubwiherero bagira.

Abandi nabo ngo ugasanga ntibaheruka kwikoza amazi, bava guhinga ntibakarabe ntibanikureho uburimiro.

Ubuyobozi buhamya ko uwo mwanda uri mu byatumye Akarere ka Musanze kaba aka nyuma mu turere tw’igihugu mu mihigo y’umwaka wa 2015/2016.

Musabyimana Jean Claude ubwo yagirwaga Guverineri w’Intara y’Amajyarugur yijeje abaturage ko agiye kwita kuri gahunda ijyanye n’isuku no kurandura ingengabitekerezo ya Jenoside, yita ahanini ku guteza imbere ubukungu bw’iyo Ntara.

Iki cyemezo nicyo kigaragaza ko umuntu yandikishije ubutaka bwe

Uyu muryango utangaza ibi nyuma y’uko ukoze igenzura mu turere 11 tw’igihugu ugasanga hakiri bamwe mu Banyarwanda batunze ubutaka batabufitiye icyangombwa cya burundu kibahesha uburenganzira kuri ubwo butaka mu rwego rw’amategeko.

Mimi Justin ushinzwe ibikorwa by’uyu mushinga RISD aburira Abanyarwanda bagifite ubutaka butabanditseho ko atari ubwabo.

Agira ati “Umuntu wese ufite ubutaka butamwanditseho si ubwe! Ahubwo aribeshya kuko icyangombwa cya burundu ari cyo cyonyine kigaragaza nyir’ubutaka.”

Akomeza avuga ko Abanyarwanda aho bari hose mu gihugu bagomba kwitabira kwandikisha ubutaka bwabo bakabubonera icyangombwa cya burundu aho gutunga izindi mpapuro zidafatwa nk’ikimenyetso nyakuri cya nyir’ubutaka.

Ngo ni ngombwa abaturage begera abakozi b’ikigo cy’igihugu gishinzwe ubutaka kugira ngo basobanuze ibibazo byose baba bafite ku butaka bwabo.

Ikindi kandi ngo ababwandikishije nabo bahamagarirwa kwegera abo bakozi kugira ngo babasobanurire icyo bagomba kubukoresha hagendewe ku gishushanyo mbonera cy’aho buherereye.

Déo Nzamwita, Umuyobozi w’Akarere ka Gakenke ashima ubufatanye bwabayeho hagati yabo na RISD mu kuzenguruka imirenge 17 muri 19 igize ako Karere, abayituye bagakangurirwa kwandikisha ubutaka bwabo.

Agira ati “Uyu muryango waradufashije kuko wakoze ubukangurambaga hafi mu mirenge yose igize Akarere ka Gakenke ufasha abaturage kugira imyumvire ibafasha kumenya ko ubutaka bita ubwabo butabanditseho ari ukwibeshya.”

Appolinarie Bamurange utuye mu Murenge wa Karambo mu Karere ka Gakenke yishimiye ubumenyi bahawe binyuze muri ubwo bukangurambaga avuga ko buzabafasha gukemura amakimbirane.

Agira ati “Ufite icyangombwa cya burundu yabonye mu nzira nziza twamenye ko ari we nyir’ubutaka ahasigaye akaba asabwa kububyaza umusaruro.”

Mu Karere ka Gakenke, kamwe mu turere umuryango wa RISD, ukoreramo hagaragara abaturage 85% bafite ibyangombwa bya burundu by’ubutaka bwabo mu gihe 15 % bo bumvaga bitari ngombwa ko bashaka icyangombwa cya burundu mbere y’uko hakorwa ubukangurambaga.

Drone mu kirere cy’i Musanze irimo gufata amafoto y’ubutaka

Tariki ya 23 Werurwe 2017 nibwo bakoze bwa mbere igerageza ry’ako kadege, kaguze ibimbi 30 by’amayero (arenga miliyoni 26RWf) ryakorewe mu murenge wa Busogo mu Karere ka Musanze.

Padiri Dr. Hagenimana Fabien, umuyobozi wa INES- Ruhengeri avuga ko iryo gerageza ryakozwe mu rwego rwo kureba amafoto ako kadege gato gafata mu gikorwa cyari kigamije gupima imbibe z’imirima bahisemo.

Agira ati “Twakoze iryo geregeza rya drone kugira ngo turebe niba amafoto ifata hari aho atandukaniye nayafashwe n’indege muri 2008.”

Akomeza avuga ko ubwo hakorwaga iryo geregeza rya Drone babifashijwemo n’abakozi b’ikigo cy’Abanyarwanda cyitwa CHARIS Company cyahawe uburenganzira bwo kugurutsa za “Drones”.

Abakozi b’ikigo cya CHARIS Company bayoboye ibikorwa by’igerageza rya Drone

Ahamya ko amafoto atandukanye yafashwe n’iyo ”Drone” azegereranwa hifashishijwe porogaramu ya mudasobwa yabugenewe, nuko azabyazwemo ikarita yerekana imbibi z’imirima yafotowe.

Umushinga wiswe “It’s For Land” ishuri rikuru rya INES – Ruhengeri ryakoreshejemo iyo “Drone” mu buryo bw’igerageza, uhuriweho na Kaminuza gaturika ya Louvain na Kaminuza ya Twente, ugamije kwerekana itandukaniro riri hagati y’amafoto yafashwe na “Drone” n’ayafashe n’indege isanzwe.

Ikindi kandi ngo iyo “Drone” ya INES – Ruhengeri izanifashishwa mu kwigishirizaho abanyeshuri biga mu mashami ajyanye no gupima ubutaka (Land survey and Land administration Management).

Iyo niyo Drone yakoreweho igeregeza muri INES- Ruhengeri, ipima ubutaka

Padiri Dr. Hagenimana agira “Twamaze kwemeza uburyo ikoreshwa rya Drone rizajya ryigishwa muri ayo mashami ku buryo umunyeshuri wacu azamenya uko ikoreshwa akanasesengura amafoto yafashwe nayo n’ibindi.”

Umwarimu wigisha muri INES- Ruhengeri witwa Ir Nkerabigwi Placide yatangiye gukurikirana mu gihugu cy’u Bufaransa, amasomo arebana n’imikoreshereze ya Drones.

Mu Rwanda ikoreshwa rya Drone ryari rimenyerewe mu kwifashishwa mu bikorwa by’ubuvuzi nko gutwara amaraso agezwa ku barwayi bayakeneye.

Aha bitegerezaga mu kirere uko Drone ifata amafoto y’ubutaka

Ba Ofisiye 30 b’ingabo z’u Rwanda bari guhugurwa ku gukumira iyinjizwa ry’abana mu gisirikare

Ayo mahugurwa atangirwa mu kigo cy’amahoro (RPA)giherereye mu Karere ka Musanze mu Ntara y’Amajyaruguru, yatangiye kuri uyu wa 20 Werurwe akazasozwa tariki 31 Werurwe 2017.

Barayahabwa n’umuryango witiriwe Gen Romeo Dallaire (The Romeo Dallaire child soldiers Initiative) ugamije kurwanya icyo kibazo, ukaba ufite icyicaro muri kaminuza ya Dalhousie mu gihugu cya Canada.

Uyu Gen. Roméo Dallaire niwe wari uyoboye ingabo z’Umuryango w’Abibumbye zari mu Rwanda mu gihe cya Jenoside yakorewe Abatutsi muri Mata 1994.

Col Jules Rutaremara, Umuyobozi w’ikigo cy’amahoro cy’u Rwanda (RPA) afungura aya mahugurwa, yavuze ko ingabo z’u Rwanda hari ubumenyi zari zisanganywe ku gukumira iyinjizwa n’ikoreshwa ry’abana mu gisirikare.

Yagize ati « u Rwanda rwigeze kugira abana baza mu ntambara bashaka ubuhungiro mu ngabo RDF ikiri RPA (Rwandese Patriotic Army).

Abo bana babonye ubuhungiro ariko igihugu kimaze gufatwa, Leta y’u Rwanda yahise ibakura mu ngabo ibasubiza mu buzima busanzwe ».

Darin Revees ushinzwe amahugurwa mu muryango witiriwe Gen. Romeo Dallaire

Col Jules Rutaremara yongeyeho ko ubu nta kibazo cy’abana binjira mu gisirikare leta y’u Rwanda igifite.

Ati «U Rwanda rwohereza ingabo ahantu henshi aho icyo kibazo kiri.

Kuba twebwe ingabo zacu zijya ahantu hari icyo kibazo birumvikana ko u Rwanda ari igihugu gikwiye kuba gifata iya mbere mu kurwanya icyo kibazo.»

Col Rutaremara yakomeje avuga ko muri Gicurasi 2016, hasinywe amasezerano y’ubufatanye hagati y’igisirikare cy’u Rwanda n’umuryango witiriwe Gen. Romeo Dallaire.

Darin Revees ushinzwe amahugurwa muri uwo muryango witiriwe Gen. Romeo Dallaire akaba yari amuhagarariye, yavuze ko bagiranye ubufatanye n’igisirikare cy’u Rwanda kugira ngo impande zombi zirusheho gusangira ubunararibonye.

Darin Revees aha Col Jill Rutaremara igitabo Gen. Romeo Dallaire yanditse ku bibazo birebana n’abana binjizwa mu gisirikare

2nd Lt Emerance Mukeshimana wo mu ngabo z’u Rwanda witabiriye ayo mahugurwa yabwiye Kigali Today ko, azatanga umusanzu we mu kurwanya no gukumira iyinjizwa n’ikoreshwa ry’abana mu gisirikare.

Umuryango witiriwe Gen. Romeo Dallaire ukorera ku isi hose ukaba warashinzwe muri 2007.

Imibare itangwa n’uyu muryango igaragaza ko ubu ku isi habarirwa abana ibihumbi 250 bagiye binjizwa mu gisirikare mu bihe bitandukanye by’intambara.

Hafashwe ifoto y’urwibutso

Minisitiri w’Intebe Murekezi ahamagarira abanyamadini n’amatorero kugira uruhare rugaragara muri gahunda za Leta

Yabitangarije mu birori yifatanyijemo n’itorero ry’Abangilikani mu muhango wo kwimika Rev. Samuel Mugiraneza Mugisha, wagizwe umushumba wa Diyoseze ya Shyira, tariki 05 Werurwe 2017.

Minisitiri w’Intebe, Anastase Murekezi avuga ko gahunda Leta isabamo ubufatanye bwa buri wese zirimo uburezi, ubuvuzi, isuku kuri bose n’ahantu hose, ubuhinzi n’ubworozi no kuzigamira ejo hazaza.

Aha niho ahera ahamagarira amadini n’amatorero gushishikariza abayoboke bayo kugira uruhare rugaragara muri izo gahunda.

Agira ati “Umukristu ugira isuku, witeganyiriza akariha ‘Mutelle de Santé’ (Mitiweri) hakiri kare, akizamura, niwe mukirisitu Imana yishimira.”

Akomeza abahamagarira kandi kurangwa n’urukundo, amahoro, ituze, ubusabane, ubufatanye n’ubupfura kuko ngo “ibyo biramutse bibuze muryango Nyarwanda ibyo twakora byose ntabwo byaramba.”

Musenyeri Rev. Samuel Mugiraneza Mugisha ahabwa ibyangombwa bimugira umushumba wa Diyosezi ya Shyira

Minisitiri w’Intebe Murekezi yakomeje ashimira Itorero ry’Abangilikani mu Rwanda kubera ibikorwa by’iterambere rigeza ku Banyarwanda.

Ati “Zimwe mu ngero nziza zigaragaza ubufatanye ni Ibitaro bishya byiza bya Shyira, byubatse muri Vunga mu Karere ka Nyabihu, bizuzura muri uku kwezi kwa Werurwe 2017.”

Yongeyeho ko harimo n’Ibitaro bya Gahini mu Karere ka Kayonza ndetse n’ibitaro bya Kigeme mu Karere ka Nyamagabe kimwe n’Ibigo Nderabuzima n’ibigo by’Amashuri atandukanye biri hirya no hino mu gihugu.

Minisitiri w’Intebe Murekezi kandi yifurije Musenyeri Rev. Samuel Mugiraneza Mugisha kuzaba umushumba mwiza.

Ati “Uzagere ikirenge mu cya Yesu; muzavure kandi mwomore ibikomere ku mitima y’ Abakirisitu banyu.”

Musenyeri Samuel Mugiraneza Mugisha avuga ko afashijwe n’Imana yamwitayeho kuva akivuka, azakora neza imirimo ashinzwe.

Agira ati “Kuva mvutse nagiye mbona ukuboko kw’Imana niyo mpamvu nta bwoba mfite kuko iyabitangiye ari nayo izabisohoza.”

Musenyeri Samuel Mugiraneza yasimbuye Musenyeri Shyira Dr Laurent Mbanda.

Rev. Samuel Mugiraneza Mugisha wabaye umwepiskopi wa Diyosezi ya Shyira

Musenyeri Mugisha yari amaze imyaka 16 akora umurimo w’ivugabutumwa muri iyi diyosezi ya Shyira nka Pasiteri. Yabaye umuvugizi w’iyo Diyosezi anayibera umuyobozi mukuru ushinzwe abakozi, ari nawo murimo yakoraga ubu.

Mbere yaho yabaye umuyobozi ushinzwe abakozi muri Kaminuza y’u Rwanda yahoze ari SFB, Uyu Musenyeri yize ibijyanye n’iyobokamana (Theologie).

Diyoseze ya Shyira yatangiye tariki 15 Mutarama 1984, imaze kugira abakristu 102.000. Ikorera mu Ntara y’Amajyaruguru mu turere twa Musanze, Burera, Gakenke n’Intara y’Uburengerazuba mu Karere ka Nyabihu.

Abayobozi batandukanye bari bitabiriye umuhango wo kwimika musenyeri mushya wa Diyosezi ya Shyira

‘

Izi mbwa zororerwa kuri Nyirangarama zitabwaho mu buryo bwihariye zigatozwa ibintu bitandukanye zikabifata byihuse

Izo mbwa zorowe na Sina Gerald, umushoramari w’Umunyarwanda umenyerewe mu kubyaza umusaruro ibikomoka ku buhinzi n’ubworozi mu Rwanda, wanatangije "Entreprise Urwibutso".

Byari bimenyerewe mu Rwanda ko umuntu ashobora kujya ku isoko agatanga amafaranga arenga ibihumbi 100RWf akaba yagura inka, ingurube cyangwa andi matungo amenyerewe mu bworozi mu Rwanda.

Kuri ubu ntibitangaje ko ushorora kubona umuntu utanga amafaranga arenze aguze inka y’ishashi, akagura ikibwana cy’imbwa akajya kucyorora.

Ibi byemezwa na Sina uhamya ko hari abantu batandukanye baza kugura imbwa yoroye, nabo bakajya kuzorora mu ngo zabo.

Agira ati “Ikibwana kimwe cy’ubwoko bw’izi mbwa kigura amafaranga y’u Rwanda ibihumbi 300 kuko abazizi bazikundira ubushobozi bwihariye zifite bwo guhabwa ubutumwa zikabusohoza bwose uko bwakabaye.”

Izi mbwa zororerwa kuri Nyirangarama ikibwana cyazo kigura ibihumbi 300RWf

Izo mbwa yoroye z’imvamahanga, ziri mu bwoko butandukanye nka Sheepdog, Berger Anois na Berger Allemand.

Korora izo mbwa birahenze kuko mu byo zirya harimo inshyushyu n’ibindi biribwa bigurirwa ahantu habukenewe birimo ibyitwa “Feed Stuff of Paty”; nkuko Niyigena Pascal umuganga w’amatungo ukurikirana izo mbwa abisobanura.

Agira ati "Ku birebana n’ubushobozi bwo kuzitunga ntabwo ari buri wese wabishobora nkuko atari buri wese wakorora inka kuko ziriya mbwa zikenera igaburo rya mu gitondo, saa sita na nimugoroba.”

Akomeza avuga ko imbwa imwe ihabwa igaburo riguza amafaranga atari munsi 1000RWf. Kandi ngo mu magaburo zihabwa bisaba kwitwararika kuko iyo harimo umunyu ni bibi kuko utuma zikuka amenyo, ukanazipfura ubwoya.

Niyigena avuga ko kandi ziriya mbwa bibujijwe kuziha inyama mbisi. Mu kuzikorera isuku nabyo ni ngombwa cyane kuko ngo iyo zirwaye inzoka, zishobora kuzikwirakwiza mu bantu mu buryo bwihuse.

Nubwo zigoye kuzorora ariko zikora imirimo itandukanye ifite akamaro. Zifite ubushobozi bwo gutozwa kandi zigafata vuba ibyo zatojwe kuburyo zifashishwa mu gusaka ibiyobyabwenge n’intwaro no kurinda umutekano.

Ibyo zibitozwa n’abantu b’impuguke hashingiwe ku cyo zizakora. Ariko ngo n’umuntu ku giti cye uyiguze ashobora kuyitoza ibyo ashaka ko izajya imufasha mu rugo, ikabifata byihuse.

Izi mbwa zororerwa kuri Nyirangarama kirazira kuzigaburira igaburo ririmo umunyu

Ibyo bitandukanye n’ibyo hambere aho bamwe bafataga imbwa nk’inyamaswa iciriritse itunzwe no guhiga ifuku, udusamunyina n’utuyongwe, ikaba iyo kurinda urugo gusa.

Hategekimana Etienne ufatanya na Niyigena kwita ku mbwa zororerwa kuri Nyirangarama avuga ko abagura izo mbwa badakangwa n’ibiciro byazo kuko bazi akamaro zifite.

Agira ati “Abantu baza kuzigura zikiri ibibwana bazitoza uko bashaka kuko zifite ubushobozi bwo gufata vuba. Urebye ni nacyo abantu bazikundira, ntibakangwa n’uko ibiciro byazo biri hejuru.”

Izo mbwa zageze kuri Nyirangarama muri 2009

Izo mbwa zororerwa kuri Nyirangarama, zahageze bwa mbere tariki ya 12 Gicurasi 2009.

Sina Gerald avuga ko mu bihugu bitandukanye byo ku isi yagezemo ariho yakuye icyo gitekerezo cyo korora imbwa zifite ubushobozi bwo mu rwego rwo hejuru mu birebana no gucunga umutekano.

Ati “Kuba imbwa nka ziriya zabarizwaga mu mahanga ya kure ariko ubu zikaba zishobora kuboneka iwacu mu Rwanda ni ikintu cyo kwishimira kuko byerekana ko nta kintu na kimwe cyasigaye inyuma mu iterambere ry’igihugu.”

Izi mbwa zororerwa kuri Nyirangarama zifashishwa mu gusaka no gucunga umutekano

Hakozwe igereranya kuva mu mwaka wa 2010, ngo bagurisha ibibwana biri hagati ya 16 na 20 buri mwaka.

Niyigena wita kuri izo mbwa avuga ko abazigura bari mu byiciro bitandukanye barimo Abanyarwanda n’abanyamahanga.

Ati "Abantu baza kuzigura bari mu byiciro bitandukanye barimo Abanyarwanda ndetse n’abanyamahanga ariko uko imyaka ihita Abanyarwanda bagenda barushaho kuba umubare munini.”

Abahanga bavuga ko imbwa ari itungo rishobora gutozwa ibintu byinshi kandi mu ndimi zitandukanye ikabifata vuba ugereranyije n’andi matungo yose abantu bakunze kubana nayo mu ngo.

Izi mbwa zatangiye kororerwa kuri Nyirangarama muri 2009

Nezimana w’i Musanze yihangiye umushinga wo gukora inzoga n’umutobe mu bijumba. Aha yari afite icupa ririmo inzoga akora mu bijumba

Usibye inzoga n’imitobe akora muri ibyo bijumba, anakoramo amandazi n’ibisuguti.

Ntezimana avuga ko amezi atanu amaze akora uwo mushinga, yahawe icyemezo cyo kuwushyira mu bikorwa kuburyo ngo hari inzoga, imitobe, ibisuguti n’amandazi yatangiye gushyira ku isoko abantu batandukanye bakabyishimira.

Kuri ubu amaze gushora amafaranga ibihumbi 100RWf muri uwo mushinga ariko ngo amaze gukuramo inyungu ingana n’ibihumbi 500RWf.

Uko yahanze uwo murimo

Uyu musore azarangiza kaminuza muri 2017, avuka mu Murenge wa Nkotsi mu Karere ka Musanze akaba avuga kwihangira umurimo byamujemo akiga mu mashuri yisumbuye ubwo yigaga ibijyanye n’umuhinzi n’ubworozi.

Ariko ngo izo nzozi ze zabaye impamo ubwo yageraga muri Musanze Polytechnic, akiga ibijyanye n’ubuhinzi no gutunganya umusaruro ukomoka ku buhunzi.

Agira ati “Nahanze umurimo mpereye ku gihingwa cy’ikijumba ngikoraho ubushakashatsi ndetse narebye uko hirya no hino ku isi bashobora kukibyaza umusaruro, aho niho nahereye ntangira kugikoramo umutobe, inzoga, amandazi n’ibisuguti.”

Akomeza avuga ko uwo mushinga yawutangiriye mu bitekerezo abishyira hamwe ubundi kaminuza yigamo nayo imufasha kubishyira mu bikorwa.

Ntezimana w’i Musanze anakora imitobe

Ntezimana akomeza avuga ko yatangiye agura ibijumba bya 2000RWf. Yarabihase, arabikamura ubundi umutobe uvuyemo awujyana muri Laboratwari yo kuri iyo kaminuza awukoreraho ubushakashatsi.

Kuva ubwo ngo nibwo yabonye ko ibijumba byavamo umutobe n’inzoga binyobwa, ahita atangira kuwukora ashishikaye.

Avuga ko kugira ngo umutobe w’ibijumba uvemo inzoga, abanza kuwucanira mu cyuma gitanga ubushyuhe bwa dogere 100, icyo cyuma agihabwa n’ubuyobozi bwa kaminuza yigaho.

Uwo mutobe ariko hari indi miti yongeramo kugira ngo uhindure ibara bikawurinda kwangirika.

Iyo miti ayigurira mu Mujyi wa Kigali. Ikiro kimwe cyayo akigura amafaranga 3000RWf akagikoresha mu mezi atandatu kuko ibyo akora bitari byaba byinshi.

Akomeza avuga ko ariko umutobe ugomba kuvamo inzoga abanza akawutara.

Ntezimana avuga agereranyije, mu bilo 10 by’ibijumba havamo umutobe ungana na litiro 40, ashobora gufungura agakuramo umutobe usanzwe unyobwa cyangwa inzoga.

Akomeza avuga ko ikilo kimwe cy’ibijumba akigura 150RWf. Afite abakozi batanu ba nyakabyizi. Ku munsi, umwe amuhemba 2000RWf ariko ngo hari n’undi bafatikanya ibijyanye n’uwo mushinga.

Abo bakozi ba nyakabyizi ngo nibo bamufasha guhata ibijumba, kubikamura babivanamo umutobe ndetse no mu gupfundikira amacupa arimo umutobe cyangwa inzoga.

Ntezimana w’i Musanze mu bijumba anakuramo ibisuguti n’amandazi

Ntezimana yungamo avuga ko nyuma yo kubona ko ibyo akora bibyara inyungu ari mu nzira zo kujya kwandikisha umushinga we mu kigo cy’igihugu cy’iterambere (RDB) kugira ngo hatagira undi muntu uzawiyitirira.

Ikindi avuga ngo ni uko ibyo akora birimo inzoga, amandazi, umutobe n’ibisuguti abikuye mu bijumba yagiye ku bimurika i Kigali kuri Petit Stade mu gihe habaga inama y’igihugu y’Umushyikirano muri 2016.

Nta kibazo afite cyo kuzashomera

Ntezimana avuga ko nta mpungenge atewe n’icyo azakora nyuma yo kurangiza kwiga Kaminuza kuko akiri ku ntebe y’ishuri yamaze gutegura icyo azakora.

Agira ati “Njye nta kibazo cy’ubushomeri nzahura ntacyo nyuma y’amezi make nsigaje ngo ndangize kwiga kaminuza kuko ubu namaze gutegura ko nzaba rwiyemezamirimo mbikesheje ubumenyi bw’ibyo nize kandi natangiye kubyaza umusaruro.”

Ntezimana w’i Musanze yereka abantu inzoga akora mu bijumba

Uyu musore w’imyaka 26 y’amavuo akomeza avuga ko afite inzozi zo kuzagura uwo mushinga ukamenyekana mu gihugu no hanze yacyo.

Ntezimana agira inama urubyiruko rwiga arubwira ko narwo rukwiye gutangira gutekereza ibyo ruzakora aho gutekereza gusa kujya gusaba akazi.

Gafotozi Louise ubwo yaasangizaga ubunararibonye bwe abahugurwa na Kigali Today mu gufotora

Yasangije ubunararibonye bwe abantu 15 bari muri ayo mahugurwa mu ruzinduko yahagiriye, tariki 07 Gashyantare 2017.

Louise T. Koonce avuga ko gufotora ari umwuga nk’iyindi yose ibeshaho abantu benshi ku isi mu gihe babikora babikunze.

Agira ati “Gufotora kimwe n’iyindi myuga myinshi ku isi iyo ubikoze ubikunze bikubyarira inyungu bikagutunga wowe n’umuryango wawe mugatera imbere.”

Uyu gafotozi w’umugore unigisha gufutora, yanagize umwanya wo kwereka abahugurwa na Kigali Today amafoto yagiye afata mu bihe bitandukanye.

Ati “Ifoto nyayo ubundi igomba kuba ivuga ikaganagaragaza igikorwa mu buryo bwa kinyamwuga maze ubutumwa bugatambuka.”

Yifashishije ifoto yerekanye uburyo igikorwa gishobora kugaragazwa ariko ba nyiri ukugikora bo ntibagaragare mu gihe bibaye ngombwa ko hahishwa amasura yabo.

Muri ubwo bunararibonye bwe mu gufotora yahishuriye abahugurwa ko gufata ifoto nziza bidasaba kugira kamera ya rutura (Professional Camera) kugira ngo gafotozi abone iyo yifuza ifite umucyo aribyo we yise “Clarity” mu ruririmi rwe rw’icyongereza.

Habimana Emmanuel, umwe mu bahugurwa mu avuga ko yishimira ubumenyi amaze kunguka mu gihe cy’ibyumweru bibiri bishize yigishwa.

Agira ati “Nshimishijwe cyane no kubona gafotozi w’umunyamerika ampagarara imbere akavuga ibintu bikorerwa kuri ‘camera’ nkamukurikira nta hantu ntakaye mu gihe asobanura.

Nizeye neza ko amahugurwa y’ukwezi ndimo azashira ndi ku rwego mpuzamahanga mu gufata amafoto ku buryo nzabibyaza umusaruro nkihangira umurimo.”

Abahugurwa mu gufotora n’ababahugura bari kumwe na Gafotozi Louise T. Koonce

Amahugurwa ku gufotora atangwa n’Ikigo cy’itangazamakuru cya Kigali Today Ltd ku nkunga y’ikigo cy’igihugu gishinzwe guteza imbere imyuga n’ubumenyingiro (WDA).

Agamije gusiba icyuho cy’ubunyamwuga buke bugaragara hamwe na hamwe mu gufotora mu Rwanda.

Miss Natete Liliane avuga ko afite indoto zo kuzakora muri Banki y’Isi

Miss Liliane, usigaje igihe kigera ku kwezi agasimburwa, avuga ariko nubwo uwo muhigo umwe atawuhiguye hari n’ibindi bitandukanye yishimira ko yagezeho.

Byinshi ku buzima bwihariye bw’uyu Nyampinga bikubiye mu kiganiro yagiranye n’umunyamakuru wa Kigali Today (KT) ukorera mu karere ka Musanze.

KT: Umuntu aramutse yumvise Miss wa INES Ruhengeri w’umwaka wa 2016 yakumva ko ari muntu ki?

Miss: Ahh Murakoze! Miss INES Ruhengeri wa 2016 ni umukobwa witwa Natete Liliane ufite imyaka 20 y’amavuko muri uyu mwaka wa 2017, wiga mu mwaka wa kabiri mu bijyanye na Economics “Ubukungu”. Ndi umwana wa karindwi iwacu kuko twavutse turi icyenda.

Navukiye ku Kibuye aho bita i Karongi mu murenge wa Bwishyura mu kagari ka Kiniha aho ngaho niho nigiye Primaire (amashuli abanza).

Amashuri yisumbuye yose nyigira mu mujyi wa Kigali. Ubu kaminuza ndi kuyigira mu Ruhengeri (Musanze). Ndi mwene Rutaganira Louis na Mukantwali Thaciana.

KT: Iyo umuntu ari Miss hari ibikorwa by’imishinga aba ufite wowe byari ibihe?

Miss: Ahh! Nari mfite ibikorwa bigera kuri bine numvaga byanze bikunze ngomba kubikora wenda nyuma hakaziramo n’ibindi.

Icya mbere nyamukuru nashakaga gukora kwari ugukora ‘campain’ cyangwa se ubukangurambaga mu rubyiruko ku bijyanye no kuzigama nahereye mu bigo by’amashuri yisumbuye mbigisha uburyo bakwizigamira bakiri bato. Icyo cyo nagikoze umwaka ushize wa 2016 mu kwa karindwi.

Ikindi nashakaga gukora ni uguteza imbere imivugire y’ururimi hano muri INES Ruhengeri ariko cyo sinakigezeho. Ikindi nakoze ni ugusura abana baba bari hamwe n’ababyeyi babo bafungiye muri gereza, icyo nacyo naragikoze.

Nagiye njya mu bikorwa byo gutoresha ba Nyampinga mu mashuri yisumbuye ya hano Musanze n’ibindi.

KT: Muri iyi manda yawe ubu irimo kugana ku musozo ni ikihe kintu mu mishinga yawe wari ufite ukaba ubona ko cyakubereye igufa ku buryo utakibashije ntubashe kukigeraho nk’uko wari wabiteganyije?

Miss: Icyo kintu rero nakivuze ariko ndakigarukaho ni Languages (Indimi) ikibazo kirahari mu bijyanye n’abanyeshuli. Abana baritinya kuvuga mu rurimi urwo arirwo rwose.

Nashatse kubakundisha kuvuga ururimi (Icyongereza) ariko byarangoye kugeza ubwo binanirana burundu. Benshi baba banakuze kuri njyewe rero kugira ngo ubumvishe biragora kuko bashobora gutekereza bati Miss arirata kuba atuzanaho ibintu by’indimi.

Akumva ko kuba arangije akaba ageze mu wa kane ntacyo bimumariye. Rwose byarangoye ahubwo haramutse habaye izindi mbaraga icyo kintu kigakorwa byanshimisha cyane.

KT: Iyo umuntu ari Nyampinga haba hari ibyo abantu baba bifuza kumumenyaho. Mu myaka yawe ugezemo ni iki kigushimisha?

Miss: (Araseka)! Ikintu cyanshimishije mu buzima bwanjye kuva aho ngiriye mu ishuri kugeza n’ubu muri Kaminuza ni uko ndi umuhanga. Ibyo rero ntabwo bishobokera abantu bose kuko hari abatangira neza bagasoza nabi.

Ariko njyewe ikintu kinshimisha n’uko ngira amanota meza sinigeze nsibira kandi nta n’ibyo ntenganya. Ababyeyi banjye nabo bashimishwa n’uko ndi umuhanga biranshimisha.

KT: Niba atari ibanga wigeze kuvuga ko ugeze mu mwaka wa kabiri muri kaminuza waba warimutse ufite amanota angahe?

Miss: Muri University (Kaminuza) maze kurenga umwaka umwe nimutse mu wa kabiri mfite amanota 15/20 ntabwo ari meza ariko naragerageje.

KT: Niba hari ikigushimisha ubwo hari n’ikikubabaza rwose nacyo wakitubwira?

Miss: Hahahaha! Ikintu cyambabaje? Mana we ko ntajya mbabara se? Ikintu kimbabaza cyane ni ukwicuza. Iyo nakoze ibintu nkabigoreka ndicuza uwo niwe mubabaro wanjye. Ariko kuvuga ko umuntu yapfuye ngo ndababara n’abandi barapfa ntacyo nabihinduraho.

Kuri njye iyo nicujije niwo mubabaro wanjye wa mbere. Iyo nkoze ikintu nyuma kikantera kwicuza nicyo kimbabaza cyane peeee!!

KT: Hanyuma Miss ni ayahe mafunguro cyangwa ikindi kintu urya ukumva kikuguye ku nzoka ukakishimira?

Miss: Eeeeh!! Yewe yewewewe! Muri rusange nkunda ibiryo byose ariko hari ibyo nkunda cyane. Nkunda umugati peee! Yaba mu gitondo saa sita na nimugoroba nkunda umugati ugakurikirwa n’ama chips (Amafiriti).

Miss Natete ubwo yatorwaga muri Werurwe 2016 ari kumwe n’ibisonga bye

KT: Tubwire umuntu wumva akubereye icyitegererezo mu buzima bwawe?

Miss: Umuntu wa mbere mfataho icyitegererezo ni mukuru wanjye. Impamvu ni intwari pee! Bitewe n’ibyo yagiye akora mu muryango cyangwa se imibereho yari ihari icyo gihe narabibonaga nkavuga nti ninkura nzaba nkawe.

KT: Uwo mukuru wawe yitwa nde akora he?

Miss: Yitwa Uwamwezi Grace akora muri African Union i Nairobi

KT: None se Miss waba ufite inshuti mukundana? Iyo nshuti niba atari ibanga wayivuga?

Miss: Ohh! Mana yanjye! Ndayifite rwose. Gusa sinamuvuga ibyo birahagije. Nko muri 2021 ndateganya kuzaba nibura nanjye mfite urugo ngashaka nkaba umubyeyi.

KT: Ufite inzozi zo kuzakora iki mu gihe uzaba umaze kwiga amasomo yawe yose uyarangije?

Miss: Ikintu nshaka kandi mfite mu nzozi zanjye ni ukuzakora muri World Bank (Banki y’isi) ngomba gukora muri iriya banki kandi inzozi zanjye nzazikabya.

KT: Hirya no hino hari ubwo humvikana impanuka zatewe n’inkongi y’umuriro tuvuge nko mu cyumba cyawe iramutse ihabaye ni iki waramira mbere y’ibindi byose.

Miss: Ohh my Laptop (Mudasobwa yanjye ngendana)! Laptop yanjye niyo ya mbere … Telefoni se oya ni Laptop.

KT: Uri Miss ariko uri urubyiruko, ni iki wumva warubwira ukurikije n’uko ubona ibintu hanze hano?

Miss: Ikintu nabwira urubyiruko ni ugukura amaboko mu mufuka rugakora. Umuntu wese aba ashaka kubaho neza ariko ntabwo bipfa kuva mu ijuru ngo bikugweho. Burya n’umubyeyi ashobora kukurera ariko ntiyabikora kugeza upfuye.

KT: Ni iki wabwira ababyeyi bumva ko kuba Miss cyangwa se Nyampinga bishobora kubyarira umwana w’umukobwa ingorane?

Miss: Hari ababyeyi bagira izo mpungenge bafite impamvu wenda bazi ukuntu umwana wabo ameze. Ariko muri rusange aya ni amahirwe iyo uyabujije umwana wawe uba umuhemukiye rwose.

Ntibagashyire umupaka ku bintu by’amahirwe nk’ibi byo kuba Miss no guteza imbere umwana w’umukobwa.

Njye mbona iyo umuntu abaye Miss aribwo arushaho kwiyubaha. Njye narabibonye ukuntu nari meze mbere n’uko meze ubu biratandukanye nta n’ahantu bihuriye. Ni ibintu byiza bituma umwana akura agatangira gutekereza akiri mutoya.

KT: Muri uyu mwaka wa 2017 turitegura gutora Miss Rwanda kandi nawe wavamo umukandida, habuze iki ngo nawe witabire ayo marushanwa y’ubwiza azamuke ku rwego rw’igihugu.

Miss: Ubu ntabwo niteguye kubera ko ntabasha kubifatanya n’ishuli. Ndamutse nshaka kujya muri Miss Rwanda najyamo nyuma yo mu wa gatatu.

KT: Urumva se uteganya kuzisazira utabaye Miss Rwanda?

Miss: Hahahah! Ndakeka nzaba nkiri keza cyakora abantu bakunze kubimbwira cyane! Nk’uwo mukuru wanjye na Mama baba bashyushye mbega bumva ko ngomba kuzajya muri Miss Rwanda.

Ariko buriya nka nyuma yo kwiga muri 2018 cyangwa 2019 nshobora kuba najya muri Miss Rwanda.

KT: Urumva se ushobora kuzaba uri mu bipimo neza?

Miss: Ntawe umenya aho bwira ageze nshobora wenda kuzaba ndi mwiza kurusha uko ubu meze.

KT: Ni iki wakongeraho ku kiganiro tugiranye?

Miss: Ikintu nakongeraho ni ugushimira Kigali Today kuba mwantekereje mukavuga muti reka tuganire na Miss INES Ruhengeri kandi nanjye biba binshimishije burya haba hari ibintu uba ufite mu mutima udashobora kuvuga nta muntu ubikubajije.

Iyo ugize amahirwe ukabona umuntu ugufasha kugira ngo uvuge burya uraruhuka. Ndanezerewe kandi ni ukuri ndabashimiye!

KT: Urakoze nawe!

Esperance Inshutiraguma amurika ubushakashatsi bwakozwe na RGB ku bijyanye n’ibipimo by’imiyoborere mu nzego z’ibanze

Byagaragajwe mu bushakashatsi bwiswe “Citizen Report Card 2016” RGB yamurikiye abayobozi b’inzego z’ibanze bo mu Karere ka Musanze tariki ya 17 Mutarama 2016.

Espèrance Inshutiraguma, wamuritse ubwo bushakashatsi yagaragaje ko igipimo cy’imitangire ya serivisi muri ako karere kiri kuri 69.3% mu gihe ku rwego rw’Igihugu hasabwa kutajya munsi y’igipimo cya 85%.

Akomeza avuga ko ibyo biri mu bituma Akarere ka Musanze katesa imihigo uko byifuzwa. Ariko ngo gutanga serivisi byongewemo ingufu byatanga umusaruro.

Agira ati “Icyo tubasaba ni ukumanuka mukarushaho kwegera abaturage mukumva ibyifuzo byabo mbere na mbere ndetse bikagenderwaho mu itegurwa ry’imihigo.”

Ikindi ni uko abanyamusanze babajijwe muri ubwo bushakashatsi uko babona isuku yo mu maresitora n’utubari. Abayigaye bagera ku gipimo cya 67.7% naho abagaya iyo mu ngo no ku mubiri bagera ku ijanisha rya 67.2%.

Ikindi ubushakashatsi bwerekanye muri Musanze n’uko abangana na 54.4% batazi imikorere y’urwego rwa Njyanama mu karere kabo.

Bamwe mu bayobozi bo mu Karere ka Musanze beretswe ibyavuye mu bushakashatsi bwakozwe na RGB

Abaturage batandukanye bo muri Musane bahamya ko imitangire ya serivisi muri ako karere ikiri hasi. Bakemeza ko ibyo ubwo bushakashatsi bwagaragaje ari ukuri; nkuko umwe mu baturage abisobanura.

Agira ati “Hambere aha mu mirenge hari abayobozi umuntu yajyaga gushaka akababura bahari kubera kutagaragaza gahunda bagiyemo maze bigatuma dusiragizwa nta mpamvu.”

Ndabereye Augustin, umuyobozi wungirije w’Akarere ka Musanze ushinzwe iterambere ry’ubukungu, wari Uhagarariye akarere yemeranyije n’ubushakashatsi bwa RGB maze yizeza ko hagiye kunozwa ibitanoze bagaragarijwe.

Bariga ku kurwanya ihohoterwa rikorerwa abagore n’abana mu ntambara

Izo nyigisho ziri gutangirwa mu kigo cy’igihugu cy’amahoro (Rwanda Peace Academy) kiri mu karere ka Musanze zizamara ibyumweru bibiri, zatangiye kuri uyu wa 16 Mutarama 2017.

Major Marcel Mbabazi, ushinzwe amahugurwa muri Rwanda Peace Academy wari uhagarariye umuyobozi w’icyo kigo avuga ko ayo mahugurwa agamije kungurana ibitekerezo ku buryo abagore n’abana barushaho kurindwa mu bihe by’imidugararo.

Agira ati “Twaje kugira ngo twungurane ibitekerezo kuko birazwi neza ko mu gihe cy’imidugararo cyangwa intambara abagore n’abana barahohoterwa.

Rero twaje kureba icyakorwa kuri icyo kintu tubereka intambwe u Rwanda rwateye mu kurwanya iryo hohoterwa.

Kuba u Rwanda rufite ibigo birwanya ihohoterwa rishingiye ku gitsina hari byinshi tuzabasangiza birebana n’ubunararibonye igihugu gifite mu kurirwanya.”

Amahugurwa ku kurwanya ihohoterwa rikorerwa abagore n’abana bazayaramo ibyumweru bibiri

Capt Rose Marie, waturutse mu ngabo za Malawi avuga ko iwabo ubu bwoko bw’ihohoterwa bubayo.

Ahamya ko ayo mahugurwa azavanamo ubumenyi butuma akangurira abasirikare bagenzi be kurirwanya, bafatanyije n’imiryango itegamiye kuri Leta ifite kurwanya ihohoterwa iryo ariryo ryose mu nshingano.

Agira ati “Rimwe nigeze kujya mu gihugu cya Repubulika iharanira demokarasi ya Congo abagore baho bakorerwa ihohoterwa rikomeye icyakora ubu nongeye kugira ikindi gihugu njyamo nk’umusirikare wabihuguriwe nagira uruhare mu kurirwanya.”

Amahugurwa yitabiriwe n’abasirikare, abasivili n’abapolisi baturutse hirya no hino muri Afurika

Col Rtd Andre Grobbelaar, ni umujyanana mu by’igipolisi mu kigo cy’Umushinga w’Igihugu cy’Ubwongereza ushyigikira ibikorwa byo kubungabunga amahoro muri Afurika y’Iburasirazuba ariwo wateye inkunga ayo mahugurwa.

Avuga ko ko ihohoterwa rikorerwa abana n’abagore ari ikibazo kigomba guhagurukirwa hose kigafatirwa ingamba abantu bakakiganiraho.

Ayo mahugurwa yitabiriwe n’abasirikare 12, abapolisi 5 n’abasivili 10.

Manzi yerekena urufunguzo rw’imodoka yehembwe nk’umukobwa witwaye neza mu bizamini bisoza amashuli abanza muri 2016

Uyu mwana w’umukobwa ufite imyaka 13 y’amavuko, wiga mu ishuri rya Wisdom School iri i Musanze, yahawe icyo gihembo mu muhango wateguwe n’icyo kigo wo gushimira abanyeshuri batsinze neza mu bizamini bya Leta, wabaye tariki ya 15 Mutarama 2017.

Rekeraho Emmanuel, se w’uwo mukobwa, yamushyikirije urufunguzo rw’imodoka ye bwite nk’ikimenyetso cyuko ayimuhaye kuko iyo yamwemereye atarayimugurira.

Akomeza avuga ko azamugurira imodoka nshya y’ivatiri ya Toyota, zimwe bakunze kwita "Gikumi".

Avuga ko iyo modoka azayigura bidatinze. Ariko ngo kubera ko umwana we adafite imyaka imwemerera gutwara imodoka, izajya iba mu rugo bamushakire umushoferi ajye amutwara.

Agira ati “Uyu muhigo nawuhize umwana yiga mu ishuri ry’incuke mvuga ko nakomeza kwiga akazagira amanota menshi nzamuha imodoka.

None ubu mu bizamini bisoza amashuli abanza muri 2016 yabaye umwana wa kabiri wagize amanota menshi ku rwego rw’Igihugu.”

Akomeza avuga ko umwana we yari afite umuhati wo kuzagira amanota menshi ku rwego rw’igihugu.

Ati “Kuba mu bana barenga ibihumbi ijana yatsinze ari umwana wa kabiri mu gihugu byaranejeje cyane mu mutima wanjye .

Akiri mu mashuri y’incuke icyo gihe namubwiye ko naramuka abaye uwa mbere ku rwego rw’igihugu nzamuha imodoka kandi icyo gihe nta modoka nari ntunze.

Uyu munsi wa none narazamutse ngeze ku rwego rwo hejuru niyo mpamvu nagombaga gusohoza uwo muhigo.”

Rekeraho n’umukobwa we yahembye imodoka amushimira ko yahize benshi mu bizamini bya Leta

Rekeraho avuga ko kandi yigishije umukobwa we gutwara imodoka kuburyo ngo yamaze no kubimenya. Nagira imyaka imwemerera gutwara imodoka ngo azajya yitwara.

Manzi Aimée n’umuryango we basanzwe batuye mu Karere ka Kamonyi.

Mu rwego rw’igihugu mu bizamini bisoza amashuri abanza, Manzi ari mu cyiciro cya mbere bivuze ko ari mu cyiciro cy’abanyeshuri bafite amanota ya mbere. Muri rusange afite amanota 5.

Yishimiye cyane igihembo yahawe, akomeza ahamagarira abana bagenzi be kwiga bashyizeho umwete kuko ariwo watumye atsinda neza.

Mu ishuli rya Wisdom School, Manzi Aimée yizeho, abana bose bahiga batsinze 100%; nk’uko bivugwa na Nduwayesu Elie, umuyobozi w’ikigo.

Kurya ibinyabwoya muri Zambia ni umuco usanzwe

Ibyamuritswe muri iryo serukiramuco harimo indirimbo n’imbyino gakondo, imyambarire, ibiryo n’ibinyobwa bya gakondo kimwe n’ibikorerwa mu nganda zo mu bihugu bitandukanye byo muri Afurika.

Lt Col Like Like ukomoka mu ngabo za Zambia akaba n’umwe mu banyeshuri bo mu ishuri rikuru rya gisirikare yamuritse ibirebana n’umuco w’igihugu cye agaragaza uburyo iwabo baryamo ibinyabwoya, umuco utamenyerewe mu Rwanda.

Yagize ati “Ibinyabwoya iwacu biraribwa kandi nanjye ndabirya kuko bikungahaye mu ntungamubiri. Abana babirya abagore bakabirya. Bishobora kuribwa n’uwo ariwe wese kandi akagira ubuzima bwiza”.

Hamuritswe ibiribwa byo mu bihugu bitandukanye

Tuyishime Delphine umwe mu banyarwanda bafashe kuri ibyo binyabwoya nk’ifunguro bakabirya avuga ko byamuryoheye n’ubwo byari bayabatangaje kuko ari umuco utamenyerewe mu Rwanda.

Yagize ati “ Ibinyaboya nabiriye numva biraryoshye cyane ku buryo nta kibazo nabibonyemo mu buryohe bwabyo”.

Abakomoka muri Zambiya bitabiriye iryo serukiramuco bavuga ko ibinyabwoya iwabo babifata bakabyanika bikuma ubishatse akaba yabikaranga agakora isosi akabirisha ubugari.

Col Justus Majyambere,umuyobozi ushinzwe inyigisho mu ishuri rikuru rya gisirikare mu Rwanda yavuze ko hategurwa iryo serukiramuco byari mu rwego rwo kumenya imico yabo babana ku buryo bituma bamenyana kurushaho.

Yagize ati “ Ibibazo by’umutekano byinshi ntabwo bikigira umupaka w’ibihugu niyo mpamvu bisaba ko tumenyana no mu buryo bw’imico”.

Imbyino nyarwanda

Col Mujyambere yakomeje avuga ko kugira ngo habeho Afurika imwe n’icyerekezo kimwe bisaba ko abantu bamenyana ndetse umuco ukabigiramo uruhare mu kubahuza.

Ati “ Ntabwo twagira Afurika imwe abantu bataziranye kandi ibintu byinshi bituma abantu bamenyana harimo imico itandukanye”.

Iri serukiramuco ryari ryitabiriwe n’u Rwanda, Kenya, Malawi, Uganda, Zambia, Ghana, Nigeria, Senegal, Ethiopia, Tanzaniya na Sudani y’Amajyepfo.

Abo nibo batandatu bazahagararira Intara y’Amajyaruguru muri Miss Rwanda 2017

Abandi baturuka ahandi harimo n’umujyi wa Kigali.

Bamenyekanye mu gikorwa cyo kubatoranya cyabereye mu mujyi wa Musanze ku cyumweru tariki 15 Mutarama 2017.

Mu bakobwa umanani banyuze imbere y’akanama Nkemurampaka, hatambutse batandatu barimo Umutesi Winnie, Mutagoma Diane, Umutoni Josine, Uwimbabazi Adeline, Mukunde Laurette na Umwali Aurore.

Gusa ariko Mukunde Laurette na Umwali Aurore nibo bahagarariye Intara y’Amajyaruguru bayivukamo.

Umwali Aurore azahagararira Intara y’Amajyaruguru muri Miss Rwanda 2017 anayivukamo

Mukunde Laurette, w’imyaka 18 y’amavuko ufite ibiro 70 n’uburebure bwa metero 1,75 avuga ko yifitemo icyizere cyo kuzegukana ikamba rya Nyampinga w’u Rwanda muri 2017.

Miss Sharifa Umuhoza waserukiye iyi Ntara y’Amajyaruguru muri Miss Rwanda 2016, ayivukamo, avuga ko kuba abakobwa bo mu Ntara y’Amajyaruguru badakunze kwitabira Miss Rwanda babiterwa no kwitinya.

Agira ati “Ubwitabire buke buterwa no kwitinya ariko ntabwo mbibona kubo mu Ntara y’Amajyaruguru gusa ahubwo buri mu ntara zose.”

Akomeza avuga ko nawe mbere yo kwitabira amarushanwa ya Nyampinga w’u Rwanda yari afite imyumvire y’uko abakobwa bajya mu marushanwa y’ubwiza ari abo mu mujyi wa Kigali gusa.

Mukunde Laurette nawe avuka mu Ntara y’Amajyaruguru

Miss Sharifa, wegukanye ikamba ry’igisonga cyane kane muri Miss Rwanda 2016, avuga ko ariko abakobwa mu Ntara y’Amajyaruguru batangiye gutinyuka.

Agira ati “Kuba narahagarariye Intara y’Amajyaruguru nyivukamo kandi nkagera kure hashoboka nibyo bitangiye kwereka abakobwa bo muri iyo ntara ko nabo bavamo ba Nyampinga.”

Miss Sherifa Umuhoza yari yaje gushyigikira ba Nyampinga bazahagararira Intara y’Amajyaruguru avukamo

Igikorwa cyo gutoranya abazajya muri Nyampinga w’u Rwanda muri 2017, gifite umwihariko kuko mu bagize akanama nkemurampaka haba harimo n’uyivukamo uvuga rikumvikana bitandukanye n’indi myaka yashize.

Uko bari umunani bari bategereje kumenya abari butambuke bagahagararira Intara y’Amajyaruguru muri Miss Rwanda 2017

Mike Karangwa, Turatsinze Glycerie na Rwabigwi Gilbert bari bagize akanama nkemurampaka. Uyu mugore wicaye hagati avuka mu majyaruguru mu murenge wa Busogo muri Musanze

Ibikorwa b’ubucuruzi bizimukira mu mazu yabugenewe aherereye mu Mujyi rwagati

Rwomushana Augustin, uyobora ishami rishinzwe iterambere ry’ubukungu mu Mujyi wa Kigali, yabivugiye mu kiganiro “Ubyumva ute?“ kinyura kuri KT Radio, Radiyo y’ikigo cy’itangazamakuru cya Kigali Today.

Muri icyo kiganiro Rwomushana yavuze ko gutanga umunsi ntarenga wo kwimurira ibikorwa by’ubucuruzi mu nzu zabugenewe, bigamije kugabanya akajagari, buri kintu gikorerwa aho cyagenewe.

Yagize ati” Ubukangurambaga buriho ni ubwo kuvana abantu mu nzu zagenewe guturwamo, tubajyana mu nzu zagenewe ubucuruzi.

Bibaye ari ugushakira abakiriya ayo mazu nk’uko bamwe babivuga, hashyirwaho itegeko ko ubucuruzi bwose bujya muri iyo miturirwa gusa, n’abakoreraga mu mazu yemewe y’ubucuruzi bagategekwa kwimuka bakaza muri iyo mituritwa.”

Uyu muyobozi kandi yasabye abakorera ubucuruzi mu mazu yagenewe guturamo kuzubahiriza igihe ntarengwa bahawe cy’amezi atatu, cyo kuzaba baramaze kwimukira mu mazu yabugenewe.

Ati”Mu Mpera z’ukwezi kwa Werurwe 2017 abantu basabwe kuba bamaze kwimukira mu mazu yabugenewe, kandi abatazabyubahiriza bizabagiraho ingaruka.”

Mu mujyi wa Kigali ibiro by’imishinga myinshi bikorera mu nzu zo guturwamo

Muri iki kiganiro kandi Rwomushana ahumuriza abafite impungenge zo guhendwa muri aya mazu, avuga ko Umujyi wa Kigali wamaze kugirana ibiganiro na ba nyirayo, mu kugabanyiriza ababagana ibiciro.

Ati” Ntihagire uhangayikishwa no kwimuka kuko Umujyi wa Kigali wagiranye ibiganiro na ba nyiri aya mazu kandi bemeye kugabanya ibiciro.”

Yongeyeho kandi ko muri aya mazu hamaze gutegurwa uburyo bwo kurwanya akajagari ka serivise zizayatangirwamo, avuga ko ntahantu uzasanga utubari dufatanye n’ibiro kuburyo byabangamira imitangire ya serivise muri ibyo biro.

Umujyi wa Kigali watangaje ko abakorera ubucuruzi mu mazu yagenewe guturamo, mu mpera z’ukwezi kwa Werurwe 2017 bagomba kuba baramaze kwimukira mu mazu yagenewe ubucuruzi.

Rwomushana avuga ko bizeye ko abantu bazabishyira mu bikorwa nta gahato, mu rwego rwo gushyira ibintu mu mwanya wabyo.

Minisitiri w’Intebe Anastase Murekezi yizeza abarimu ko ibibazo bafite bizakemuka. Aha yari ari kumwe n’abayobozi batandukanye bifotozanya na zimwe mu ntore z’Indemyabigwi

Yabitangaje ubwo yasoza itorero ry’Indemyabigwi ry’abarimu bo turere twa Musanze, Gakenke, Burera na Nyabihu, bari bateraniye mu mujyi wa Musanze, kuri uyu wa kane tariki ya 12 Mutarama 2017.

Agira ati "Leta y’u Rwanda yakemuye byinshi kandi yageze kuri byinshi niyo mpamvu nibikibagoye bizakemuka.”

Akomeza avuga ko bakwiye kugira ishema kuko uruhare bagira mu burezi nta wabona ikuguzi cyabwo. Agira ati “Ishema rya Mwarimu ni ukurerera igihugu.”

Abarimu bo mu turere twa Musanze, Burera, Gakenke na Nyabihu nibo basoreje itorero mu mujyi wa Musanze kuri Stade Ubworoherane

Abarimu batandukanye bakunze kuvuga ko umushahara bahembwa utajyanye n’ibiciro byo ku isoko bihora bizamuka.

Gusa ariko Minisitiri w’Intebe akomeza ahamagarira abarimu kwiteza imbere bagendeye kuri gahunda zitandukanye Leta yabashyiriyeho.

Ati "Mwashyiriweho umwarimu Sacco, Girinka mwarimu n’icumbi rya mwarimu kandi n’izindi gahunda ziteza imbere imibereho myiza y’umunyarwanda ntimuzihejwemo.”

Iri torero ry’abarimu ryari rimaze iminsi 10 ryari rihuje abarezi bigisha mu mashuri y’incuke, abanza n’ayisumbuye yigisha ubumenyi n’ayigisha imyuga n’ubumenyingiro, yaba aya Leta, afashwa na Leta n’ayigenga mu gihugu hose.

Mu Rwanda hose ryitabiriwe n’abarezi 54895 batorejwe ku masite 131 yo mu turere twose tw’igihugu.

Abarimu barangije itorero bagaragaje ibyo baryigiyemo birimo akarasisi ka gisilikare

Minisitiri w’Intebe, Murekezi yakomeje abwira abarimu ko bagomba gutandukana n’ingeso mbi zose zishobora kubanduriza isura mu muryango nyarwanda.

Yababwiye ko nta mwarimu ukwiye kugaragara mu byaha bya ruswa, asambanya abana b’abakobwa yigisha cyangwa ngo agaragare mu bikorwa bihembera amacakubiri n’ingengabitekerezo ya Jenoside.

Abo barimu bashoje itorero bahigiye imbere ya Minisitiri w’Intebe na Minisitiri w’uburezi Dr Musafiri Malimba Papias ko bagiye kurushaho guteza imbere uburezi mu Rwanda.

Umuyobozi wa Polisi y’igihugu mu Ntara y’Amajyaruguru, Assistant Commissioner of Police (ACP) Bertin Mutezintare mu kiganiro n’abanyonzi.

Babisabwe mu kiganiro umuyobozi wa Polisi y’igihugu mu Ntara y’Amajyaruguru ACP Bertin Mutezintare yagiranye n’abatwara abantu n’ibyabo bazwi nk’abanyonzi bakorera mu Mujyi wa Musanze, tariki 4 Mutarama 2017.

ACP Bertin Mutezintare yavuze ko ayo makenga ari mu rwego rwo gufatanya na polisi mu kurwanya no gukumira ibyaha batangira amakuru ku gihe.

Yagize ati “Nubona umuntu ukamwishisha ujye utungira agatoki polisi y’igihugu imugwe gitumo ndetse n’ubwo nyuma yo kumufata twasanga nta kintu guhungabanya umutekano yitwaje.

Basabwe kujya bagira amakenga ku bantu batwaye ku magare.

Ntacyo tuzakunenga ahubwo ikibi n’uko yahungabanya umutekano ugasigara wicuza impamvu utamutanzeho amakuru ku gihe.”

Yongeyeho ati “Niba urimo unyonga igare ukabona igisambo bajya bavuga ko aricyo kijya gitobora amazu witegereza ko gitobora amazu ahubwo ujye ubivuga twirwarize.”

Umunyambanga Nshingwabikorwa w’Intara y’Amajyaruguru Jabo Paul nawe yatanze ikiganiro kuri abo banyonzi bakorera mu mujyi wa Musanze, yavuze ko ariko bakwiye gukorai byo byose batirengagije umutekano wabo mu muhanda.

Ati “Ikintu cya mbere nabonye mu mujyi wa Musanze n’uko amagare, moto n’imodoka bigenda bibyigana ku buryo abanyamagare aribo bahura n’impanuka kurusha abandi kuko umunyegare bamukomaho akitura hasi.”

Abanyonzi baganiye n’izi nzego z’ubuyobozi mu Ntara y’Amajyaruguru bazijeje gukorana bya hafi na hafi barwanya ibyaha ndetse nabo ubwabo bakirinda ibitera impanuka.

Iki kiganiro cyatanzwe hagati y’ubuyobozi bw’Intara y’Amajyaruguru na polisi ihakorera cyari gihuje abanyonzi barenga 800 bari kuri stade Ubworoherane yo mu karere ka Musanze.

Habyarimana Joseph wakomotseho Imvugo igira iti "Tubari Inyuma Haki ya Mungu"

Muri izo mvugo harimo eshanu zakunzwe kugarukwaho cyane mu biganiro, zikaba ari izi zikurikira.

1.Tubari inyuma Haki ya Mungu

Bwa mbere mu Rwanda iyi mvugo “Tubari inyuma Haki ya Mungu” yumvikaniye mu Nama y’Igihugu y’Umushyikirano yabereye i Kigali mu mpera za 2016, ikoreshejwe n’umusaza witwa Habyarimana Joseph ukomoka mu Karere ka Rusizi mu Murenge wa Gikundamvura.

Uyu musaza yabivuze ashima intambwe u Rwanda rwateye nyuma ya Jenoside yakorewe abatutsi muri mata 1994, maze mu buryo busekeje avuga ko yatunguwe n’inyubako ya Kigali Convention Center iyo nama y’umushyikirano yari iteraniyemo.

Mu binezaneza bivanzemo no gusetsa, Habyarimana Joseph yabwiye imbona nkubone Umukuru w’Igihugu cy’u Rwanda, Paul Kagame ko yishimira ibyiza akomeje kugeza ku Rwanda n’abanyarwanda. Agira ati “Uturi imbere, tukuri inyuma…. Haki ya Mungu’’.

Kubera uburyo iyi mvugo yahise yamamara ndetse n’uwo musaza ikamugira icyamamare cyane cyane ku mbuga nkoranyambaga, i Musanze bo bayisamiye hejuru batangira nabo kuyikoresha mu buzima bwabo bwa buri munsi.

Umwaka wa 2016 warangiye benshi mu banya Musanze bigana iyi mvugo mu kugaragariza umuntu runaka ko bamushyigikiye muri gahunda afite yaba mu bukwe cyangwa mu birori bitandukanye.

Mupenzi Annanie wo muri aka karere ati “ Umuntu wese ufite nk’ubukwe abamuziye mu nama usanga bamubwira ngo Tukuri inyuma haki ya mungu .“

2.Ntabwo byavamo

Iyi mvugo nayo yagiye yumvikana mu bantu b’ingeri zitandukanye cyane cyane abakora ibikorwa by’ubucuruzi buciriritse mu masoko, ndetse n’abatwara abantu mu binyabiziga, Ikaba ikoreshwa mu gihe bahakana bivuye inyuma.

Shingiro wo Mu Mujyi wa Kigali agira ati” Iyi mvugo abamotari barayikoresha cyane. Umubwira aho ushaka kujya, ukamubwira amafaranga ufite, yakumva ari make agahita akubwira ngo “Ntabwo byavamo” ishakire undi rwose.”

3. Kuba mu mandazi

“Kuba mu mandazi” ni imvugo yakoreshejwe cyane n’urubyiruko ndetse na bamwe mu bantu bakuru, iyo bashakaga kwerekana ko umuntu runaka atazi iyo biva n’iyo byerekeza, mbese ko ari mu bujiji.

Iyi mvugo yabereye benshi inshoberamahanga, aho bibazaga inkomoko yayo n’ ubu itaramenyekana, ariko bagiye basobanukirwa ko umuntu uri mu mandazi, ari umuntu uri mu bujiji, bashaka kumubwira ngo ave mu bujiji bakamubwira bati ” Va mu mandazi”.

4.Ikiryabarezi

Iyi mvugo yadutse bwa mbere mu Rwanda muri 2016 ihimbwe n’abantu bo mu Ntara y’Amajyepfo cyane cyane mu turere twa Nyanza na Ruhango, bavuga umukino w’amahirwe wari umaze kurarura urubyiruko.

Uyu mukino umuntu yashyiraga amafaranga ijana muri icyo cyuma bise Ikiryabarezi, kikaguha urwunnguko cyangwa se ugahomba.

Iri zina ry’Ikiryabarezi ryahimbwe bashaka kunenga abagishoramo amafaranga, kuko cyagiye kiyabarya ugasanga inyungu arizo nke kurusha igihombo cyabateraga.

Abiswe “Abarezi” ni abagishoragamo amafaranga, naho icyo cyuma cyitwa “ Ikiryabarezi” .

Leta y’u Rwanda yakomeje kubona uburyo ibyo byuma byakoraga mu kajagari maze bimwe muri byo biza guhagarikwa na Minisiteri y’ubucuruzi n’inganda mu Rwanda.

Nyuma yaho bimwe muri ibyo byuma bihagaritswe imvugo “Ibiryabarezi” yahise ivanwa kuri ibyo byuma, ahubwo ikoreshwa cyane miu rubyiruko, bashaka kuvuga abagore n’abakobwa bambara impenure bagamije kureshya abagabo.

5.Ndagatora Mama

Iyi mvugo ikoreshwa cyane na bamwe mu rubyiruko kimwe n’abantu bakuze bagenda mu Mujyi wa Musanze no mu nkengero zawo, aho bakunda gukoresha iri jambo mu ndahiro.

Abenshi bavuka muri aka gace bavuga ko iyi ndahiro ikoreshwa iyo umuntu yafashe icyemezo ntakuka, badashobora kwisubiraho.
Biriteye Gerome agira ati” Iyo umuntu wa hano arahiye ati “Ndagatora mama” hari icyo yakwimye uba ugomba gukurayo amaso ugashakira ahandi.

Kandi iyo mugiranye amakimbirane akarahira ati “ Ndagukubita ndagatora mama”, burya ushatse wakuramo akawe karenge kuko iyo udahunze arabikora, kuko umwanzuro wo kwishora mu mirwano uba wamaze gufatwa”.

Inzu ikorerwamo n’umukobwa watekewe umutwe, bakamwiba amafaranga

Iby’ubu bujura byabereye kuri imwe mu nzu zikorana na Banki mu kubitsa no kubikuza ziri ahitwa i Nyamagumba mu mujyi wa Musanze; kuri uyu wa kane tariki ya 05 Mutarama 2017.

Umukobwa wibwe ayo mafaranga, utifuje ko izina rye ritangazwa, yabwiye Kigali Today ko yabonye abasore babiri bari mu modoka, baje baparika imbere y’inzu akoreramo.

Agira ati “Kimwe n’abandi bakiriya bose nakira nabo baje barampamagara ndasohoka batangira kumbaza niba babitsa bakanabikuza ndabibemerera.

Mu gihe narimo mbasobanurira sinamenyeye igihe umwe muri bo wari ufitanye isiri nabo yinjiriye mu nzu nuko aranyiba.

Maze kubasezera ariko batabikuje cyangwa ngo babitse ninjiye mu nzu nsanga banyibye ndebye aho bari baparitse nabwo nsanga imodoka yabo barayirukankanye.

Nahise mbara nsanga banyibye ibihumbi 75 by’u Rwanda ari nabyo nari mfite hamwe na telefone nifashisha mu kazi.”

Uyu mukobwa akimara kwibwa n’abo basore, avuga ko bari abasirimu, ntiyigeze atabaza cyangwa ngo atange ikirego cy’uko yibwe kuko kuko ngo nta birango yabashije kufata by’iyo modoka yakoreshejwe n’abo bajura.

Sibomana Japhet, umwe mu bari aho ubwo bujura bwabereye avuga ko icyatumye uwo mukobwa yibwa ari uko yabonye abo basore akabibeshyaho kandi ari abatekamutwe.

Agira ati “Isomo rikwiye kuva muri ubu bujura bwabaye ni iryo kutizera abantu ngo umuntu wese uwo abonye umufatemo inyangamugayo ngo nuko yambaye neza cyangwa ari mu modoka ihenze.

Kuko hari ubwo byaba ari ibikoresho yifasha ku kwiba abantu ibyabo nk’uko uriya mukobwa byamubayeho.”

Ubujura nk’ubu bwo kwiba abantu amafaranga yabo ntibwaherukaga mu mujyi wa Musanze by’umwihariko muri ako gace ka Nyamagumba kibiwemo uwo mukobwa nk’uko bamwe mu bahatuye babivuga.

Ubutabera nk’imwe mu nkingi enye igihugu cy’u Rwanda cyubakiyeho bwaranzwe na byinshi bitandukanye mu mwaka wa 2016.

Iby’ingenzi twegeranyije byaranze uyu mwaka birimo imanza zaciriwe ndetse n’abaregwa kugira uruhare muri Jenoside yakorewe abatutsi muri Mata 1994 abatorotse ubutabera bagafatwa ngo bakurikiranwe.

Col Tom Byabagamba n’abagenzi be bahamijwe ibyaha n’urukiko

Col Tom Byabagamba, Rtd Kabayiza Francois na Rtd Brig Gen Frank Rusagara bahamijwe ibyaha

Col Tom Byabagamba wigeze kuba akuriye abasirikari barinda umukuru w’Igihugu cy’u Rwanda, Perezida Kagame, muri Werurwe 2016 yakatiwe igifungo cy’imyaka 21 anamburwa n’impeta za gisirikare.

Abo bari kumwe Rtd Brig Gen Frank Rusagara yakatiwe igifungo cy’imyaka 20, uwari umushoferi we Demob Sgt Kabayiza Francois ahanishwa igifungo cy’imyaka itanu n’ihazabu y’amafaranga ibihumbi 500 RWf.

Urubanza rutangira Col Tom Byabagamba yaregwaga icyaha cyo gukwiza nkana ibihuha agomesha rubanda arwangisha ubutegetsi. Hari mu mwaka wa 2014.

Iki cyaha gihanishwa ingingo ya 463, iteganya igifungo kuva ku myaka icumi kugeza ku myaka cumi n’tanu.

Ikindi cyaha cyarimo gusebya Leta giteganywa kandi kigahanishwa ingingo ya 660 iteganya igifungo kuva ku myaka itatu kugeza ku myaka itanu n’ihazabu y’amafaranga y’u Rwanda kuva kuri miliyoni imwe kugeza kuri miliyoni eshanu.

Ikindi cyaha cyari uguhisha nkana ibintu byagombye gufasha kugenza icyaha gikomeye.

Biteganywa kandi bigahanishwa ingingo ya 327 yo mu gitabo cy’amategeko ahana ibyaha mu Rwanda.
Iteganya igifungo kuva ku myaka ibiri kugeza ku myaka itanu n’ihazabu y’amafaranga y’u Rwanda kuva ku bihumbi 500 kugeza kuri miliyoni ebyiri.

Umuyobozi w’ingoro z’umurage w’u Rwanda yatawe muri yombi

Umuliisa Alphonse wayoboraga ingoro z’umurage w’u Rwanda yatawe muri yombi agezwa imbere y’urukiko nyuma yemererwa kurekurwa by’agateganyo. Hari mu mpera z’ukwezi kwa Gicurasi 2016.

Umulisa Alphonse yagejejwe imbere y’ubutabera nyuma yirukanwa burundu mu bakozi ba Leta

Ubushinjacyaha bwagaragaje ko ibyaha yari akurikiranyweho ari ugutanga inyungu zidafite ishingiro mu gushyira mu bikorwa amasezerano, icyo gutanga isoko bitanyuze mu ipiganwa n’icyo kurigisa cyangwa konona umutungo.

Nyuma yaho yaje kwirukanwa burundu mu bakozi ba Leta nk’uko bigaragara mu itangazo ry’Ibyemezo by’Inama y’Abaminisitiri yateranye ku itariki ya 12 Ukwakira 2016.

Dr Rose Mukankomeje nawe yagejejwe imbere y’ubutabera mu mwaka wa 2016

Undi muyobozi watawe muri yombi akagezwa n’imbere y’urukiko ni Dr Rose Mukankomeje waje kugirwa umwere n’ubutabera ariko bwari bwagaragaje ko ntawe butinya ndetse ko imbere y’amategeko abantu bose bareshya.

Dr Mugesera wahereye muri 2013 aburana yakatiwe burundu muri 2016

Muri Mata 2016 Urugereko rw’Urukiko Rukuru ruburanisha Imanza mpuzamahanga n’ibyaha byibasiye inyoko muntu nibwo rwakatiye, Dr Leon Mugesera igifungo cya burundu nyuma y’igihe kirekire yari amaze aburana kuva muri 2013.

Mugesera yoherejwe na Canada kuburanira mu Rwanda ku byaha bishingiye ku ijambo yavugiye ku Kabaya mu 1992 ari naryo ryahamagariye abahutu kwica abatutsi muri Jenoside.

Uyu Mugesera yagejejwe mu Rwanda tariki 25 Mutarama 2012 ndetse rubanza rwe ruri mu manza z’abaregwa uruhare bagize muri jenoside yakorewe abatutsi rwatinze kurusha izindi mu Rwanda.

Bamwe mu bashinjwa kugira uruhare muri Jenoside bari mu mahanga bavanweyo

Muri Werurwe u Rwanda rwakiriye Ladislas Ntaganzwa wafatiwe muri Repubulika Iharanira Demokarasi ya Congo mu mpera z’umwaka ushize wa 2015.

Ntaganzwa Ladislas ubwo yagezwaga mu Rwanda

Uyu mugabo w’imyaka 54 y’amavuko yafashwe akekwaho ibyaha bya Jenoside yakorewe abatutsi mu Rwanda. Ibi akaba ashinjwa ku bikora mu myaka ya za 90 na 94 ubwo yari Burugumesitiri w’iyahoze ari Komini Nyakizu.

Ladislas Ntaganzwa yoherejwe mu Rwanda muri 2016 ku bufatanye n’urugereko rwasimbuye urukiko mpuzamahanga rwashyiriweho u Rwanda rukorera Arusha.

Dr Leopold Munyakazi wari umaze imyaka irenga 12 ashakishwa n’ubutabera bw’u Rwanda kugira ngo akurikiranweho uruhare yagize muri Jenoside yakorewe abatutsi, yagejejwe mu Rwanda muri Nzeri 2016 yoherejwe na Leta Zunze ubumwe za Amerika.

Dr Leopold Munyakazi mu maboko ya Polisi y’igihugu

Uyu mugabo w’imyaka 66 ufite impamyabushobozi y’ikirenga mu by’indimi yari yacitse ubutabera bw’u Rwanda muri 2004 nyuma y’uko yari yafunguwe by’agateganyo kugira ngo ngo hakomeze iperereza.

Mu kwezi kw’Ugushyingo 2016 u Buholandi bwoherereje u Rwanda abagabo babiri barimo Mugimba Jean Baptiste na Iyamuremyue Jean Claude bombi bakekwaho kugira uruhare muri Jenoside yakorewe Abatutsi mu Rwanda.

Mu mwaka wa 2012 nibwo hatangiye ibikorwa byo gushaka uburyo abo bagabo bombi bakoherezwa mu Rwanda bakaba ariho baburanishirizwa.

Mugimba Jean Baptiste

Mugimba Jean Baptiste yari umukozi wa Banki Nkuru y’Igihugu akaba n’Umunyamabanga Mukuru w’ishyaka ry’intagondwa z’abahutu ryitwaga “ CDR”.

Iyamuremye Jean Claude uzwi ku izina rya "Nzinga"

Iyamuremye Jean Claude yari umuyobozi w’Interahamwe muri Kicukiro akaba n’umwe mu bayoboke b’ishyaka rya MRND,akaba akekwaho kugira uruhare muri Jenoside yakorewe abatutsi mu Mujyi wa Kigali.

Mu kwezi k’ugushyingo muri 2016 , Seyoboka Henri Jean Claude nibwo yagejejwe mu Rwanda yoherejwe na Canada kugira ngo ubutabera bw’u Rwanda bumukurikiraneho ibyaha bya Jenoside yakorewe Abatutsi yakoreye muri Nyarugenge.

S/L Seyoboka Herni Jean Claude yagejejwe mu rukiko

Uyu seyoboka yari yaraburanishijwe adahari n’urukiko Gacaca rwa Nyarugenge rumukatira igifungo cy’imyaka 19.

Leta y’u Rwanda yagaragaje Abafaransa 22 bakekwaho kugira uruhare muri Jenoside

Nyuma y’uko Leta y’u Rwanda itahwemye kugaragazaga uruhare rwa leta y’Ubufaransa muri Jenoside yakorewe abatutsi mu Rwanda.

CNLG igaragaza urutonde rw’abasirikare 22 b’u Bufaransa bakekwaho kugira uruhare muri Jenoside yakorewe Abatutsi (Photo internet)

Komisiyo y’igihugu yo kurwanya Jenoside muri 2016 yasohoye urutonde rw’abafaransa 22 bakekwaho kuba bari mu mugambi witegurwa ry’umugambi mubisha wa jenoside yakorewe abatutsi mu Rwanda.

Ubushinjacyaha bukuru bw’u Rwanda bwatangaje ko aba basirikare bamenyeshejwe binyuze mu nzira zemewe ndetse bwasabye Leta y’Ubufaransa binyuze muri Ambasade y’u Rwanda iri i Paris kuzaborohereza muri iryo perereza riteganyijwe.

U Rwanda na LONI ntibavuze rumwe ku bijyanye n’ububiko bw’amadosiye y’abakoze Jenoside

Hagati ya Leta y’u Rwanda n’Akanama gashinzwe amahoro n’umutekano ku isi ntibavuze rumwe ku bijyanye n’ubusabe bwari bwatanzwe n’u Rwanda bw’uko ububiko bw’amadosiye yaburanishijwe na ICTR bushyirwa i Kigali.

Ubwo busabe u Rwanda butahwemye kugaragaza bwajemo igitotsi ku wa 25 Ugushyingo 2016 ubwo Arusha muri Tanzaniya habaga umuhango wo kuyashyingura, aho u Rwanda muri uwo muhango rutari ruhagarariwe.

Perezida Kagame yatanze imbabazi kuri zimwe mu mfungwa

Perezida Kagame yahaye imbabazi abakobwa n’abagore bahaniwe icyaha cyo gukuramo inda n’abana bakatiwe bafite munsi y’imyaka 16, mu ntangiriro z’uku kwezi k’Ukuboza 2016.

Uretse abahawe imbabazi na Perezida Kagame, Inama y’Abaminisitiri yenemeje ko imfungwa 814 zifungurwa by’agateganyo nk’uko byasohotse mu byemezo by’Inama y’Abaminisitiri yateranye kuri uyu wa 09 Ukuboza.

Abagororwa 814 bahawe imbabazi

Iyo nama yanavanye ku mwanya w’Umushinjacyaha Mukuru, Richard Muhumuza wari uwumazeho imyaka itatu, imutangaho umukandida ku mwanya w’Umucamanza mu rukiko rw’Ikirenga.

Kuri uwo mwanya w’Umushinjacyaha Mukuru inama y’Abaminisitiri yatanze Mutangana Jean Bosco nk’umukandida.

Aba bombi kuri iyo myanya bahise banemezwa n’Inteko Ishinga Amategeko, Umutwe wa Sena.

Uko ari inzu 200 imwe muri zo yuzuye itwaye asaga miliyo 9RWf

Babitangaje mu muhango wo gutaha ku mugaragaro inzu 200 z’icyerekezo, zubakiwe abahoze mu manegeka bo mu mirenge itandukanye y’uturere twa Nyabihu na Musanze, wabaye tariki ya 23 Ukuboza 2016.

Ayo mazu yubatswe mu mudugudu wiswe Green Village uherereye mu Kagari ka Kabyaza mu murenge wa Mukamira, mu karere ka Nyabihu, yuzuye atwaye miliyari 1 na miliyo ni 684RWf.

Mukanoheri Béatrice, umwe mu bari batuye mu manegeka avuga ko inzu nziza yubakiwe igiye kumufasha kujya aryama agasinzira ntacyo yikanga.

Agira ati "Ahantu nari ntuye narengerwaga n’amazi Ingabo na Polisi by’igihuhu akaba aribo baza kuntabara.’’

Uyu mubyeyi w’abana umunani atanga ubuhamya avuga ko kuba ubu yinjiye mu mwaka wa 2017 afite aho kuba heza kandi hajyanye n’icyerekezo ari ibintu ashimira Leta y’u Rwanda.

Mukanoheri Béatrice avuga ko abakuwe mu manegeka ubu batujwe mu nzu z’icyerekezo

Usibye ku ba abo baturage barubakiwe inzu, banubakiwe ikiraro cy’inka, igikoni, ubwiherero n’ubwogero, ibigega bifata amazi bahabwa n’amashanyarazi n’imirindankuba. Ibikoresho byo mu nzu nibo babyishakira.

Aho bari batuye mu manegeka, bakozwe neza hashyirwa amaterase y’indinganiro kuburyo bakomeza gusubirayo bakajya kuyahinga.

Abatujwe muri uwo mudugudu banejejwe no gutura aho batazongera guhura n’ibiza

Dr Vincent Biruta, Minisitiri w’umutungo kamere avuga ko bitarenze umwaka wa 2020 abaturage babarirwa muri 65 % bazaba batuye mu mudugudu naho 35% basigaye bakazaba batuye mu mijyi.

Abo baturage bahawe amazu y’icyitegererezo yaberetse amahirwe bafite yo kuba batuye mu mudugudu.

Agira ati "Mufite amahirwe yo gutura hafi y’ibikorwaremezo birimo imihanda, amashuri, amazi n’umuriro. Icyo musabwa ni ukubibyaza umusaruro kugira ngo bibateze imbere."

Dr Vincent Biruta yahamagariye abavanwe mu manegeka kubyaza umusaruro ibikorwaremezo begerejwe hafi yabo

Imirimo yo kuyubaka yo mazu uko ari 200, yakurikiranwe n’Inkeragutabara bahawe isoko n’umushinga ugamije guhangana n’ingaruka z’imihindagurukire y’ikirere mu majyaruguru y’iburengerazuba bw’u Rwanda (RV3CBA).

Yubatswe ku nkunga y’ishami ry’umuryango w’abibumbye ryita ku bidukikije (UNEP) ribinyujije mu kigega « Adaptation Fund’’.

Urusengero rwubatswe hagati y’ingo z’abaturage

Abaturiye urwo rusengero bavuga kuva mu mwaka wa 2012, urwo rusengero ruhubatse, batajya bagira umutuzo nk’abandi.

Margarita Mukankindo, w’imyaka 84 y’amavuko umwe mu baruturiye avuga ko rubabangamira iyo abarusengeramo bari kuririmba, bakubita ibyuma n’imizindaro kuburyo ngo yumva mu mutwe we bitameze neza.

Agira ati “Urebye uburyo basenga barasakuza kandi mu rusengero baruhoramo nk’abanyeshuri bari mu ishuri.”

Abaturiye urwo rusengero bavuga ko rwaje ruhabasanga, baramaze gutura. Ntibumva ngo uburyo hatangwa uburenganzira bwo kubaka urusengero hagati y’amazu y’abaturage.

Umuturage utifuje ko amazina ye atangazwa avuga ko abasengera muri urwo rusengero badasakuje nta kindi baba bababangamiyeho.

Agira ati “Baramutse basenze ariko urusaku ntirutugereho ntacyo byaba bitwaye kuko nk’abana bakeneye kuruhuka ndetse n’abandi bantu bakuru baba bavuye mu kazi bananiwe.”

Pasiteri Innocent Munyurangabo uyobora urwo rusengero rwitwa “Itorero ry’Ubumwe bw’Abakristu mu Rwanda” amara impungenge abo baturage avuga ko muri 2017 aribwo bateguye uburyo bwo kugabanya urwo rusaku.

Agira ati “Mu ngengo y’imari y’umwaka wa 2017 kiriya kibazo cyo kugabanya urusaku nicyo tuzakemura mbere y’ibindi byose”.

Umuyobozi wungirije w’Akarere ka Musanze, ushinzwe imibereho myiza y’abaturage Uwamariya Marie Claire yasabye ko bagabanya urusaku rw’imizindaro ikoreshwa n’urwo rusengero.

Abahamagarira kandi kwihutisha ingamba zihamye zo gukemura icyo kibazo cy’urusaku mu buryo bwa burundu.

Mu gitabo cy’Amategeko ahana ibyaha mu Rwanda, mu ngingo yacyo ya 600 hateganyijwe ibihano bihabwa muntu wese ukora icyaha cyo gusakuza no gutera induru mu ijoro ku buryo bihungabanya umutuzo w’abaturage.

Ahanishwa igifungo kuva ku minsi umunani kugeza ku mezi abiri n’ihazabu y’Amafaranga y’u Rwanda kuva ku bihumbi 50 kugeza kuri miliyoni imwe cyangwa kimwe gusa muri ibyo bihano.

Minisitiri w’uburezi Dr Musafiri avuga ko ubushakashatsi budakwiye guhera mu bubiko

Yabitangarije mu birori by’umunsi mpuzamahanga wahariwe ubumenyi u Rwanda rwizihirije mu ishuri rikuru ry’ubumenyingiro rya INES- RUHENGERI kuri uyu wa 20 Ukuboza 2016.

Minisitiri Musafiri yavuze ko ubushakashatsi burimo ubukorerwa muri laboratwari, ari ko hari n’ubundi buba bugomba kugezwa ku baturage bakabubyaza umusaruro.

Yagize ati “Hari ubushakashatsi bukorerwa muri za Laboratwari ni ngombwa kuko buba ari ubw’ibanze ariko ubugira akamaro n’ubwo umuntu agenda agakorera mu murima w’abaturage”.

Yakomeje avuga ko iyo umuturage yerekerewe urugero n’uko ikirayi gihingwa ndetse n’ifumbire igikoreshwaho uko igomba kuba ingana, ubwo bushakashatsi bugirira umuturage akamaro kuruta ubwaheze aho bwakorewe bugafungiranwa mu bubiko.

Ati “Icyo nicyo dukangurira abakora ubushakashatsi; kurushaho kugabanya icyuho kiri hagati yabo n’abaturage bakaberekera ibintu mu buryo bw’ibikorwa”.

Umunsi mpuzamahanga wahariwe ubumenyi witabiriwe n’abantu b’ingeri zinyuranye

Ishuli rikuru rya INES - Ruhengeri ryizihirijwemo umunsi mpuzamahanga wahariwe ubumenyi, ryashimiwe intambwe rimaze gutera mu guhuza ibiva mu bushakashatsi n’abaturage binyuze mu masomo ya siyansi ahigishirizwa.

Kuba amasomo ya siyansi atigishwa henshi mu mashuri makuru na kaminuza nabyo byagaragaye nk’ikibazo cyasobanuwe na Padiri Dr Hagenimana Fabien uyobora iri ishuri.

Ati “Imyigishirize y’amasomo ya siyansi irahenda, abarimu nabo baba ari bake cyane kandi bihagazeho.
Rero uramutse ushinze ishuli ugamije inyungu zawe bwite ntiwakwigisha ibirebana n’amasomo y’ubumenyi”.

Bimwe mu binyobwa byamuritswe byakozwe n’abanyeshuri bo muri siyanse

U Rwanda rwizihije umunsi mpuzamahanga wahariwe ubumenyi ku nsanganyamatsiko igira iti “Tubungabunge amahuriro y’ubumenyi n’ingoro ndangamurage z’ubumenyi, twimakaza amahoro n’iterambere rirambye”.

Umunsi mpuzamahanga wahariwe ubumenyi washyizweho n’ishami ry’umuryango w’Abibumbye ryita ku burezi, ubushakashatsi n’umuco (UNESCO) kuva mu mwaka wa 2001.

Ubusanzwe uyu munsi wizihizwa tariki 10 Ugushyingo buri mwaka.

Polisi yahise itabara izimya umuriro wari wibasiye iyo nzu ariko nta cyarokotse mu byari birimo

Inkongi y’umuriro yafashe urugo rwe ruherereye mu kagari ka Cyabararika mu murenge wa Muhoza mu karere ka Musanze, mu ma saa saba z’amanywa ku itariki ya 15 Ukuboza 2016.

Mu gihe cy’iyo nkongi, Twezerimana avuga ko atari ari iwe mu rugo. Umugore we n’abana nabo ntibari bari bahari.

Agira ati “Sinabona uko mbivuga kuko iriya nkongi y’umuriro yabaye ntari mu rugo gusa ndakeka ko yatewe n’umuriro w’amashanyarazi.”

Uyu mugabo w’imyaka 52 y’amavuko yakomeje avuga ko ntacyo yabashije kuramura mu nzu ye usibye imyenda yari yambaye.

Ati “Byose byatikiriye mu nzu birashya birakongoka ntacyo nsigaranye ubu ikinteregereje ni ugucumbika hamwe n’umuryango wanjye w’abana batandatu.”

Twizerimana wahishije inzu n’ibiyirimo arasaba ubufasha

Iyo nzu n’ibyahiriyemo, Twizerimana avuga ko bifite agaciro kagera kuri miliyoni 50RWf.

Akomeza asaba ubufasha uko bwaba bumeze kose kuko nta kindi kintu asigaranye mu byo yari atunze mu nzu ye.

Ababonye iyo nkongi bahamya ko yari ifite ubukana kuko babanje gushyiraho akabo bawuzimya ariko ukananirana. Imodoka ya polisi izimya umuriro nayo yahageze icubya umuriro ariko ntihagira ikirokoka.

Mbere yuko Polisi itabara abaturage babanje kuzimya iyo nkongi ariko ibarusha imbara

Rwabugande Benoni, uyoboye by’agateganyo Akarere ka Musanze kubera ko umuyobozi w’Ako karere n’abamwungirije bitabiriye inama y’igihugu y’umushyikirirano ya 14, yihanganishije umuryango wagezweho n’iyo nkongi y’umuriro.

Agira ati “Ibi byabaye abaturage bakwiye kubikuramo isomo ko mu gihe cyose bafite ibintu by’agaciro bagomba kubishinganisha kugira ngo birinda ko byagerwaho n’impanuka iyariyo yose ikabateza igihombo”.

Habyarimana Jean Damascene arahirira kuyobora Akarere ka Musanze

Yabitangaje nyuma yo gutorerwa kuyobora Akarere ka Musanze, tariki ya 14 Ugushyingo 2016.

Mu mihigo y’umwaka wa 2015-2016, Akarere ka Musanze kaje ku mwanya wa 30. Ahamya ko icyatumye ako karere kaza kuri uwo mwanya yamaze kukimenya akaba yiteguye kugikosora.

Agira ati “Ikibazo cyariho n’uko abaturage bacu batahawe uburenganzira bakwiriye bwo kuba batezwa imbere nk’uko babyifuza. Ibyo rero niteguye kubikosora.”

Akarere ka Musanze kandi kagaragayemo ingengabitekerezo ya Jenoside; nkuko byagaragajwe n’ubushakashatsi bwashyizwe ahagaragara na Komisiyo y’Igihigu y’Ubumwe n’Ubwiyunge muri 2016.

Ubwo bushakasgatsi bugaragaza ko 78.9% by’abaturage bo muri Musanze babajijwe, basubije ko hari abaturage bagifite ingengabitekerezo ya Jenoside mu gihe abangana na 79.2 % bo basubije ko hari abandi bakibona mu ndorerwamo y’amoko.

Habyarimana avuga ko yiteguye guhangana n’icyo kibazo binyuze mu kwegera abaturage.

Agira ati “Byaragaragaye ko Akarere ka Musanze kagaragayemo ingengabitekerezo ya Jenoside. Ibi ngibi ni ikibazo gikomeye ariko twiteguye guhangana nacyo kigakemuka mu buryo bwa burundu.

Tuzabigeraho ari uko twigishije abaturage bacu mu bikorwa by’umuganda n’ahandi kugira ngo batandukane n’ibijyaniranye n’ingengabitekerezo ya Jenoside.”

Mukadariya Providence, umujyanama mu nama njyanama y’Akarere ka Musanze ukomoka mu murenge wa Busogo avuga ko ubufatanye bw’abaturage n’ubuyobozi bukenewe mu kurandura ikibazo cy’ingengabitekerezo ya Jenoside.

Agira ati “Twese hamwe dufatanyije n’abayobozi turashaka kurandura ingengabitekerezo ya Jenoside n’imizi yayo yose tukayitwika binyuze mu nama abaturage bagirwa n’ubuyobozi.”

Habyarimana Jean Damascene watorowe kuyobora Akarere ka Musanze

Habyarimana yagize amajwi 253 naho uwo bari bahanganye ariwe Twizerimana Innocent agira amajwi 19. Impabusa ziba indwi, mu gikorwa cy’amatora cyabaye kuri uyu wa gatatu tariki ya 14 Ukuboza 2016.

Habyarimana atowe nyuma y’amezi hafi abiri ashize uwari umuyobozi w’Akarere ka Musanze, Musabyimana Jean Claude agizwe umuyobozi w’Intara y’Amajyaruguru.

Habyarimana avuka mu mudugudu wa Manjari, mu Kagari ka Murago mu murenge wa Gataraga ho mu Karere ka Musanze. Afite imyaka 40 y’amavuko. Arubatse, afite umugore n’abana bane.

Afite impamyababushobozi y’icyiciro cya kabiri cya kaminuza mu iterambere ry’icyaro yavanye mu cyahoze ari ishuri rikuru ry’ubuhinzi n’ubworozi rya Busogo ( ISAE BUSOGO).

Yabaye umukozi ushinzwe irangamimerere mu cyahoze ari Akarere ka Mutobo (ubu ni mu Karere ka Musanze) mu gihe cy’imyaka 10 nyuma, yaho aba Rwiyemezamirimo.

Nyuma yaho yabaye umujyanama mu nama njyanama y’Akarere ka Musanze, atorerwa kuba umuyobozi wungirije w’Akarere ka Musanze ushinzwe iterambere ry’ubukungu.

Ubwo Musabyimana Jean Claude, wari umuyobozi w’Akarere ka Musanze yagirwaga umuyobozi w’intara y’Amajyaruguru, nibwo Habyarimana yagizwe umuyobozi w’agateganyo w’Akarere ka Musanze.

Umuhire ari mu igaraje akoreramo muri Musanze

Umuhire w’imyaka 20 yahanze umurimo wo gukora ibyuma bifata “Bande feri” (Bande de Freins), bifata feri z’imodoka, yifashishije ubumenyi yaboneye mu mahugurwa.

Akomeza avuga ko kwihangira uwo murimo yabitekereje kubera ko kwiga amashuli asanzwe byari byamunaniye.

Agira ati “Uyu murimo nawutangiye mu mwaka wa 2015 nyuma y’uko nari mvuye kwiga muri Uganda mu gihe cy’amezi atandatu.”

Bande de Freins zikorwa na rwiyemezamirimo Umuhire Catherine w’imyaka 20 y’amavuko

Akomeza avuga ko yatangiranye igishoro cy’ibihumbi 250RWf yahawe n’iwabo. Yatangiye gukora, ibyo akora abantu barabikunda, atangira kubona inyungu.

Agira ati “Ubu mu gihe gito maze nkora, imitungo yanjye bwite irimo n’ibikoresho nkoresha muri aka kazi bifite agaciro ka miliyoni 3RWf.”

Ku myaka 20 yihangiye umurimo umwinjiriza iritubutse

Uwinema Joselyne acuruza ibyuma by’imodoka mu mujyi wa Musanze, birimo na “Bande de freins”.

Avuga ko “Bande de freins” zituruka mu ruganda azigurisha 2500RWf mu gihe izikorwa na Umuhire Catherine azigurisha ibihumbi 2000RWf.

Akomeza avuga ko abakiriya bakunze kugura izo zikorwa na Umuhire kuko ziramba kandi zikaba zihendutse.

Agira ati “Biriya byuma bikorwa na Umuhire Catherine, abaguzi barabikunda kuko baramutse batabikunda ntibaza babitubaza twabirangura bikadupfira ubusa.”

Igaraje Umuhire akoreramo ibyuma bizwi nka bande feri

Umuwe mu bagura “Bande de freins”, utifuje ko amazina ye atangazwa, avuga ko ku bwe ibyuma byakozwe n’uwo rwiyemezamirimo aribyo akunda cyane kurusha ibyo mu ruganda.

Agira ati “Ziriya ‘Bande de freins’ zo mu ruganda njye ndazikoresha zikabanduka mbere y’izo ngura z’inkorano zikorwa n’uyu mukobwa.”

Umuhire agira inama abakobwa bagenzi be kimwe n’abandi bantu, gutinyuka bagahanga imirimo ibateza imbere.

Uwari umunyamabanga Nshingwabikorwa w’Intara y’Iburengerazuba Jabo Paul yimuriwe mu Ntara y’Amajyaruguru

Iki cyemezo cyafashwe mu nama y’Abaminisitiri yateranye, iyobowe na Perezida wa Repubulika Paul KAGAME, tariki ya 09 Ukuboza 2016.

Mu itangazo ry’ibyemezo by’iyo nama y’abaminisitiri niho hagaragaramo izo mpinduka zabaye ku bari abanyamabanga nshingwabikorwa b’intara enye z’Igihugu.

Madamu Izabiliza Jeanne wari umunyambanga Nshingwabikorwa w’Intara y’Amajyepfo yasimbuwe kuri uwo mwanya na Mushaija Geoffrey.

Mu ntara y’Iburasirazuba uwari umunyamabanga Nshingwabikorwa wayo Makombe Jean Marie Vianney yasimbuwe na Habimana Kizito.

Habimana Kizito yari asanzwe ari umuyobozi wungirije ushinzwe ubutegetsi n’imari mu Ishuri rikuru ryigisha imyuga n’ubumenyingiro mu Ntara y’Iburasirazuba.

Habimana Kizito wagizwe umunyamabanga Nshingwabikorwa w’Intara y’Iburasirazuba

Mu Ntara y’Iburengerazuba uwari umunyamabanga nshingwabikorwa wayo Jabo Paul yimuriwe mu Ntara y’Amajyaruguru asimbura Kabagamba Deo wakuwe kuri uwo mwanya.

Jabo Paul yasimbuwe na Habiyaremye Pierre Celestin wari usanzwe ari umunyamabanga Nshingwabikorwa w’Akarere ka Nyamasheke.

Habiyaremye Pierre Celestin wagizwe umunyamabanga Nshingwabikorwa w’Intara y’Iburengerazuba

Izi mpinduka zije zikurikira izabayeho ku bayobozi b’intara aho uwari guverineri w’Intara y’Amajyepfo Munyantwari Alphonse yahawe kuyobora Intara y’Iburengerazuba agasimburwa na Mureshyankwano Marie Rose.

Uwari umuyobozi w’Intara y’Amajyaruguru Bosenibamwe Aimé yasimbuwe na Musabyimana Jean Claude. Intara y’Iburasirazuba yahawe kuyoborwa na Kazayire Judith asimbura Uwamariya Odette.

Uwimbabazi Agnes umwe mu rubyiruko rwa Musanze wishimira iki kigo

Iki kigo cyafunguwe na Judith Uwizeye, Minisitiri w’abakozi ba Leta n’umurimo mu muhango wabereye mu Karere ka Musanze kuri uyu wa 6 Ukuboza 2016.

Minisitiri Uwizeye afungura icyo kigo yavuze ko gifite intego yo guhuza abashaka akazi n’abagatanga, kizanahugura abashaka akazi ku buryo bagasabamo n’imyitwarire igomba kubaranga mu gihe bakora ibizamini.

Yagize ati “Inshingano z’iki kigo ni ebyiri z’ingenzi, zirimo guhuza abatanga akazi n’abagashaka ndetse no kubaka ubushobozi bw’abashaka ako kazi”.

Akomeza avuga ko abashaka akazi bazajya bahugurwa ku buryo bwo gukora imyirondoro yabo ndetse n’uburyo bitwara bakanasubiza mu bizamini, cyane cyane ibyo kuvuga “Interview”.

Yasabye ko icyo kigo begerejwe kibyazwa umusaruro n’abashaka akazi bose, ndetse ko hari na gahunda yo gushyiraho uburyo amakuru ku itangwa ry’akazi, akajya agera kuri buri wese binyuze mu bigo nk’icyo.

Bamwe mu rubyiruko rumaze igihe gito rwiyandikishije ngo rufashwe kubona akazi,baravuga ko cyatangiye kubaha icyizere ko bazakabona.

Hafashwe ifoto y’urwibutso nyuma yo gufungura icyo kigo

Mwamarakiza Martin wize iby’ubumenyi bwa mudasobwa muri Kaminuza, avuga ko nyuma yo kwiyandikisha muri icyo kigo yatangiranye n’amahugurwa amufasha kumenya uko bandika umwirindoro usaba akazi.

Aha kandi ngo banigishwa uko umukandida agomba kwitwara mu gihe cy’ikizamini cyo kwandika cyangwa kuvuga.

Ati “Ikintu cyiza nabonye muri iki kigo n’uko gifasha umuntu aho yajya hose mu gihugu kujya mu bubiko bwacyo agakuramo umwirondoro we, asabiraho akazi”.

Icyo kigo cyiswe “Musanze Employment Service Center” cyafunguwe mu Karere ka Musanze na Minisiteri y’abakozi ba Leta n’umurimo (MIFOTRA) ku bafatanye n’ubuyobozi bw’Intara y’Amajyaruguru.

Kije cyiyongera ku kindi kigo bikora kimwe, cyafunguwe mu Mujyi wa Kigali.

Abanyabugeni bo mu ntara y’Amajyaruguru bifuza ko imurikagurisha ryajya riba ku munsi wo Kwita Izina

Musabyinama Jean Claude, Guverineri w’iyo ntara avuga ko mu gihe cyo “Kwita Izina” abana b’ingagi bakira abashyitsi bakomeye bagera ku 3000 b’abanyamahanga, biyongeraho ku bandi basaga ibihumbi 100 baba baturutse hirya no hino mu gihugu.

Abo bantu bose basanzwe basiga amafaranga muri iyo ntara kuko ahanini bacumbika mu mahoteri yaho bakanahafatira amafunguro.

Guverineri Musabyinama avuga ko bantu bose barushaho gusiga amafaranga mu Ntara ayoboye hongerewe ibindi bikorwa cyane cyane iby’ubucuruzi by’ibikorerwa mu Rwanda.

Agira ati “Turashaka ko haboneka ibikorwa bitandukanye bigenda birushaho kongerera agaciro igikorwa cyo kwita izina ingagi.”

Ibirori byo Kwita Izina byitabirwa n’abantu babarirwa mu bihumbi

Tariki ya 05 Ukuboza 2016, ubwo abikorera bo mu ntara y’amajyaruguru basozaga imurikagurisha ryari rimaze iminsi ry’iminsi 11 ribera muri Musanze, batanze ikifuzo ko ubutaha iryo murikagurusha riba ku munsi wo “Kwita Izina”.

Kemerwa André umunyabugenzi, ukora ibihangano by’inyoni z’amoko atandukanye kugira ngo ibyo akora bijye bigaragarizwa abitabira uwo muhango.

Agira ati “Iri murikagurisha ritegurwa n’abikorera bo mu ntara y’amajyaruguru rikwiye kujya rihuzwa n’umuhango ngarukamwaka wo kwita izina ku buryo ibyo dukora tubona umwanya wo kubyereka abanyamahanga baba bitabiriye uriya muhango.

Bajya bava cyangwa bajya kwita izina ingagi bakanyura mu imurikagirisha natwe tukabereka intambwe abikorera bo mu Rwanda bateye by’umwihariko batagiye kure y’intara bajemo.”

Mugenzi we witwa Manizabayo Joseph yungamo ati “Inzira ibajyana mu Kinigi ahabera umunsi wo kwita izina ingagi ni hano i Musanze.

Rero haramutse hari imurikagurisha ryatubyarira umusaruro kandi abo banyamahanga bakajyana n’ishusho nziza rusange y’u Rwanda mu byo twagezeho.”

Uku niko Abakandida baba bagaragara muri porogaramu ya mudasobwa ishobora kwifashishwa mu matora

Uyu munyeshuri wiga mu mwaka wa kane mu ishami ry’ubumenyi bw’ibya mudasobwa (Computer Sciences), avuga ko iyo progaramu yakwifashishwa mu matora, amatora akagenda neza.

Iyi programu ikora ku buryo uyifashisha atora, atora rimwe gusa. Iyo ashatse kugerageza gutora ubwa kabiri ntimukundira.

Agira ati "Iriya porogaramu ikozwe ku buryo igihe cyo gutora iyo kirangiye porogaramu ihita yifunga ku buryo nta muntu wakongera gutora nyuma yaho ngo bimukundire ndetse ntinemerera umuntu gutora inshuro ebyiri. »

Mu kugerageza iyo porogaramu, ishuri rikuru rya INES-Ruhengeri ryayikoresheje mu gikorwa cy’amatora y’abahagarariye komite nshya y’umuryango w’abanyeshuli isumbura icyuye igihe, tariki ya 02 Ukuboza 2016.

Icyo gihe igikorwa cy’amatora cyarangiye neza kuburyo nta kibazo iyo porogaramu yagaragaje.

Niyonshuti Yves wahimbye porogaramu yifashishwa mu matora akoresheje ikoranabuhanga rya Mudasobwa

Umunyeshuri wakoze iyi porogaramu avuga ko gukoresha iryo koranabuhanga mu gutora bifasha abantu gukoresha igihe cyabo neza, batorera aho bari kandi bikagabanya n’amafaranga batanga bajya gutora cyangwa bavayo.

Niyonshuti avuga ko igitekerezo cyo gukora iyo porogaramu cyamujemo nyuma yo kubona ko u Rwanda ruri kwihuta mu mikoreshereje y’ikoranabuhanga mu buzima butandukanye.

Agira ati "Nk’uko abayobozi b’Igihugu cyacu badahwema kugaragaza ko hifashishijwe ikoranabuhanga hakemuka ibibazo bitandukakanye, nibyo byatumye nanjye nshakisha umusanzu natanga ku gihugu.”

Akomeza asobanura ko kugira ngo izo nzozi ze azigereho yabifashijwemo n’umwarimu we ubigisha mu gashami k’ubumenyi mu bya mudasobwa yigamo.

Iyo porogaramu yifashishijwe mu matora yabereye mu ishuri rikuru rya INES-Ruhengeri

Mnyentwali Clement, wafashije uwo munyeshuli kugera ku nzozi ze avuga ko bazakorera ubuvugizi icyo gihangano kugira ngo cyifashishwe no mu yandi matora akorwa ahantu hatandukanye.

Agira ati “Icyo twifuza ni uko ikoranabuhanga riyobora ubuzima bw’Abanyanyarwanda, tuzakomeza kunononsora ubu buryo kugeza ubwo buzamenyekana bukifashishwa mu bigo bitandukanye."

Ubu buryo bwo gutora hifashishijwe ikoranabuhanga ni ubwa mbere bukozwe mu mateka y’ishuri rikuru rya INES – Ruhengeri kuva ryashingwa mu mwaka wa 2003.

Ujeneza Germaine avuga ko amacupa ya palasitiki yajugunywe bo bayabyaza umusaruro. Aha yari bimwe mu bikoresho bakura muri ayo macupa

Iyi koperarive ikorera mu Murenge wa Muhoza, igizwe n’umubare munini w’abagore bahoze mu bukene. Bose hamwe ni 27 barimo abagabo babiri.

Urayeneza Germaine, umuyobozi w’iyo koperative avuga ko imitako n’ibindi bikoresho bakora muri ayo macupa abantu batandukanye baba bajugunye, babigurisha bikamaha amafaranga bakikura mu bukene barengera n’ibidukikije.

Agira ati “Kuri twe ariya macupa y’amazi abantu baba bajugunye ni imari ikomeye kuko dufite uburyo budasanzwe tuyakatamo tukayabyazamo imitako, amaherena, udukapu tw’abagore n’ibindi byinshi bifite akamaro karenze kuyajugunya.”

Uwo mutako w’ururabo ukozwe mu macupa y’amazi

Akomeza avuga ko uwo mwuga watumye babasha kwigurira igitenge n’ibindi bakenera batarinze gutegereza ibyo bahabwa n’abagabo babo. Ahubwo ngo bafatanya n’abo bagabo babo bagateza imbere umuryango.

Avuga ko bagize igitekerezo cyo kubyaza umusaruro amacupa yashizemo amazi nyuma yo kubona ko aho yatawe ahateza umwanda ukagira n’ingaruka ku bidukikije.

Agira ati “Hari n’igikombe twegukanye ku rwego rw’igihugu cyatanzwe n’Ikigo cy’igihugu gishinzwe kwita ku bidukikije (REMA) nyuma y’uko twari twakoze ameza muri ziriya mpapuro mukunze kubona abantu bajugunye.”

Ibikoresho bakora mu macupa y’amazi banabijyanye mu imurikagurisha ryateguwe n’Urugaga rw’abikorera mu Ntara y’Amajyaruguru (PSF) ryatangiye tariki 25 Ugushyingo kugeza tariki ya 05 Ukuboza 2016.

Ayo ni amarido akozwe mu macupa aba yashizemo amazi yifashishwa ahantu hatandukanye nko mu maresitora

Mujawamariya Hillary ni wabonye ibyo abo bagore bakora, yatunguwe n’uburyo amacupa y’amazi yajugunywe abyazwamo umusaruro kandi atongeye gusubizwa mu ruganda.

Agira ati “Ariya macupa y’amazi tujugunya mbonye ko ashobora kubyazwamo umusaruro ari uko ngeze muri iri murikagurisha ry’ibikorerwa iwacu mu Rwanda.”

Usibye kuba bakora imitako n’ibindi bikoresho mu macupa yashyizemo amazi, banakusanya ibindi bintu biba byajugunywe birimo impapuro n’utuyiko rwa parasitiki nabyo bakabikoramo imitako.

Koperative IWACU HEZA yatangiye gukora mu mwaka wa 2011. Muri 2014 nibwo ibikorwa byayo byatangiye kumenyekana maze na REMA iyiha igihembo maze abayigize kibatera imbaraga zo kurushaho gukora.

Aka gakapu k’abagore ko mu ntoki gakozwe mu macupa aba yajugunwe

Iyi ndorerwa itakishije utuyiko twa palasitiki abantu bakoresha rimwe bakajugunya

Aya meza yo akozwe mu mpapuro ziriya zisanzwe ziba zajugunywe

Uyu musore yari yarayogoje abaturage abambura abakangisha kwiyitirira igitangazamakuru

Yajyaga mu baturage akabashyiraho ibikangisho byo kuvuga ko nibatamuha amafaranga abandika mu kinyamakuru.

Uyu musore kandi ngo hari n’abacuruzi bo muri aka Karere bavuga ko yabatse amafaranga avuga ko agiye kubamamaza, ariko bikarangira batabonye inyandiko zibamamaza mu kinyamakuru yiyitiriraga.

Intandaro yo kugira ngo atabwe muri yombi yabaye ibikorwa by’umutekano muke yari amaze iminsi agaragaramo mu tubari mu masaha ya nijoro, aho yitwazaga ubunyamakuru akanywa akagenda atishyuye, nk’uko Polisi ibivuga.

Uyu musore aganira n’itangazamakuru yavuze ko atigeze yiyitirira Kigali Today, ahubwo ngo ibyo yakoraga byose byari mu izina ry’ikinyamakuru Rwanda Today abereye umuyobozi n’umwanditsi mukuru.

Yagize ati" Navuze ko ndi umuyobozi wa RwandaToday abantu bumva Kigali Today kuko ariyo basanzwe bazi cyane".

Nzabandora Leon, umwanditsi mukuru wa Kigali Today, yemeje ko uyu musore atari umunyamakuru wa Kigali Today nk’uko abyiyitirira, avuga ko ibyo yakoze mu izina rya Kigali Today akwiye kubibazwa ku giti cye.

Yagize ati "Abanyamakuru ba Kigali Today barazwi kandi ni abanyamwuga. Ntibashobora kugaragaramo umuntu nk’uyu ugenda wangiza isura y’itangazamakuru”.

Polisi yatangaje ko uyu musore yacumbikiwe kuri sitasiyo ya polisi, akekwaho ibyaha birimo imyitwarire irimo ubwambuzi bushukana no gushyira ibikangisho ku bantu, yihishe inyuma y’ikigo cy’itangazamakuru adakorera.

Ntiharamenyekana ingano y’ibyo uyu musore yambuye, ariko Polisi yo muri aka Karere ikomeje iperereza mu baturage kugira ngo hamenyekane umubare w’ abaturageyambuye ndetse n’ingano y’ibyo yabambuye.

Abayobozi batandukanye n’abasilikare bari mu mahugurwa

Abo basirikare barimo n’Ingabo z’u Rwanda (RDF) bateraniye mu mahugurwa y’ibyumweru bibiri, abera mu kigo cy’u Rwanda cy’amahoro (Rwanda Peace Academy) giherereye muri Musanze, tariki 28 Ugushyingo 2016.

Brig Gen. Dr Rudakubana Charles atangiza ayo mahugurwa yavuze ko abayitabiriye azabagirira akamaro mu kubungura ubumenyi mu birebana n’imicungire y’abakozi n’ibikoresho byifashishwa mu butumwa bwo kubungabunga amahoro.

Agira ati “Aya amahugurwa y’ingirakamaro ni umwanya mwiza wo kuyavomamo ubumenyi buhagije mu bazabahugurwa ku buryo umunsi mwoherejwe mu butumwa bwo kubungabunga amahoro bizabafasha kuzuza neza inshingano zanyu.”

Akomeza avuga ko igikorwa cyo guhuriza hamwe ingabo zo mu karere u Rwanda ruherereyemo bisaba ko habaho amahugurwa nk’ayo kugira ngo bose bayagireho imyumvire imwe bahuriza hamwe ubunararibonye.

Abasilikare bo muri EAC bari kwiyungura ubumenyi mu kubungabunga amahoro

Ambasaderi w’u Bwongereza mu Rwanda, William Gelling avuga ko Ubwongereza buzakomeza gutera inkunga no gufasha igisirikare cyo muri EAC mu bijyanye no kubungabunga amahoro.

Agira ati “Ibihugu byose bihagarariwe muri aya mahugurwa by’umwihariko u Rwanda byatanze umusanzu ukomeye mu bikorwa byo kubungabunga amahoro mu butumwa byagiye byoherezwamo.

Niyo mpamvu igihugu cy’u Bwongereza gitewe ishema n’inkunga gitanga binyuze mu kigo cy’Ingabo z’Abongereza gifasha ibihugu byo mu Karere ka Afurika y’Iburasirazuba (British Peace Support Team- Eastern Africa).”

Bamwe mu basirikare bazabahugura hamwe n’abazahugurwa mu bijyanye no kubungabunga amahoro mu bihugu bigize EAC

Abo basirikare bitabiriye ayo mahugurwa baturutse mu bihugu byo mu karere k’Afurika y’Iburasirazuba arimo ingabo zaturutse muri Uganda, Kenya, Tanzaniya n’u Rwanda.

Yateguwe na Rwanda Peace Academy ku nkunga y’Ubwongereza.

Amahugurwa yatangijwe na Brig Gen. Dr Rudakubana Charles

Ambasaderi w’u Bwongereza mu Rwanda, William Gelling yishimiye imyitwarire y’ingabo z’u Rwanda mu butumwa bwo kubungabunga amahoro zoherezwamo

Mu babagwa muri bitaro bya Ruhengeri harimo n’ababazwe mu muhogo

Tariki ya 25 Ugushyingo 2016 nibwo begerejwe iyo serivizi ubwo hatangizwaga icyumweru cyahariwe ibikorwa by’ubuvuzi bw’inzobere mu kubaga mu bitaro bya Ruhengeri biri mu Karere ka Musanze.

Abagezweho n’iyi servisi bavuga ko kujya kwivuriza mu bitaro bikuru bya Kaminuza bya Kigali (CHUK) byababeraga imvune ndetse bikabatwara amafaranga menshi.

Sempabuka Jean Damascene wo mu Karere ka Ngorerero avuga ko kuva aho atuye ajya kwivuriza muri CHK byasabaga byamutwaraga 4000RWf atabariyemo amutunga.

Agira ati “Ubu ni amahirwe akomeye kuba mbagiwe mu bitaro bya Ruhengeri ni hafi y’iwacu kuko kugira ngo mpagere byantwaye amafaranga 900 y’u Rwanda.”

Abahawe serivisi yo kubwaga bishimiye ko bavuriwe hafi yaho batuye

Usibye kuba bakora urugendo rurerure bajya kwibagishiriza i Kigali byabasabaga no gutegera abarwaza babo bikarushaho kubahenda mu ngendo zo kujyayo no kugaruka.

Agira ati “Ibi byose turabishimira Leta y’u Rwanda kuba izirikana abaturage bayo igahitamo kubahera serivisi hafi y’aho batuye.”

Dr Ndimubanzi Patrick, umunyamabanga wa Leta muri Minisiteri y’ubuzima (MINISANTE) avuga ko iyo serivisi igamije korohereza abarwayi ingendo bakoraga bajya kwivuriza kure yaho batuye.

Agira ati “Mu bitaro bya Ruhengeri, Kibungo na Kibuye abaganga b’inzobere bazajya basanga abarwayi aho bari babavure mu gihe kingana n’icyumweru.”

Akomeza avuga ko ahanini kuba abarwayi batabona hafi yabo abaganga b’inzobere biterwa n’ubuke bwabo.

Yatangaje ko mu myaka irindwi iri imbere aribwo ikibazo cy’ubuke bw’abaganga b’inzobere kizaba kitagikomereye igihugu.

Agira ati “ Hari abo dufite bari kwiga bashakisha ubuzobere mu kubaga, gusinziriza n’ibindi.”

Mu bitaro bya Ruhengeri aho babagira abarwayi

Mu bitaro bya Ruhengeri mu gihe kingana n’icyumweru abawayi barenga 200 nibo bateganyijwe ko bazaba babazwe n’izo nzobere z’abaganga mu kubaga, zaturutse muri CHUK.

Abaturanyi n’inshuti z’umuryango wagize ibyago baje kuwutabara mu bitaro bya Ruhengeri

Byabaye ubwo abo bana bafataga ifunguro rya saa sita z’amanywa barihawe na se ubabyara mu gihe nyina yari adahari yagiye kuca incuro ; ku itariki ya 20 Ugushyingo 2016.

Nyirasafari Gaudance, nyina w’abo bana yatangarije Kigali Today ko umukuru muri bo yari afite imyaka 10 undi irindwi n’undi itanu y’amavuko. Babiri bari abakobwa undi ari umuhungu.

Agira ati "Nari nagiye gushaka imibereho na se ubabyara asigara abashakira imibereho abatekera imyumbati bamaze kuyirya batangiye gutumba bigeze nimugoroba natangiye kubashakira ibyo guteka ariko nkabona bararembye.’’

Akomeza avuga ko abo bana batatu bakomeje kumererwa nabi bakajyanwa kwa muganga bikananirana aribwo babohereje mu bitaro bya Ruhengeri bakahagera bamaze gushiramo umwuka.

Nyirasafari yasigaranye umwana umwe yari ahetse bari bajyanye guca incuro.

Se ubyara abo bana nawe wariye kuri iyo myubati yageze mu bitaro bya Ruhengeri arembye cyane ariko akomeza kwitabwaho n’abaganga nyuma yaho atora agatege.

Se w’abo bana bitabye Imana nawe yariye kuri iyo myumbati ariko agera kwa muganga baramuvura aroroherwa

Dr Cyiza Francois Regis, ukora muri serivisi ishinzwe indwara zo mu mubiri mu bitaro bya Ruhengeri, avuga ko nta bushobozi bafite bwo gupima icyishe abo bana.

Agira ati ‘’Nta bushobozi dufite bwo kubipima ngo tumenye icyo bazize ariko dukurikije ko ari imyumbati turakeka ko ariyo yabiteye kuko hari ubwoko bw’imyumbati irimo ibinyabutabire bishobora kwica umuntu.’’

Uyu muganga w’ibitaro bya Ruhengeri avuga ko hari ubwoko bw’imyumbati kimwe n’ibindi birirwa bishobora kwica uwabiriye.

Imyumbati izwi ku izina rya "Gitamisi" niyo abantu bakeka ko abo bana bariye ikabahitana. Bemeza ko iyo mymbati uyiriye wese itamugwa neza kuko irimo ubumara.

Akenshi abaturage bayihinga mu rwego rwo kuyiryamo ubugari kuko babanza kuyinika bwa bumara bugashiramo.

Ifoto y’urwibutso y’abahuguwe n’abayobozi batandukanye

Babitangaje ubwo basozaga amahugurwa y’iminsi umunani yaberaga muri icyo kigo kiri mu Karere ka Musanze, tariki ya 16 Ugushyingo 2016.

Ayo mahugurwa yigaga ku mahame ya Kigali arebana no kurengera abasivili mu bihe by’intambara.

Uko ari 36 baturutse mu bihugu 14 byo hirya no hino ku isi harimo n’u Rwanda, biyemeje ko ikibazo cy’abasivili bapfa kandi ntaho bahuriye n’intambara cyitabwaho mu buryo bwo hejuru.

Maj. Muyunda Nyoka waturutse muri Zambiya yavuze ko ayo mahame ayajyanye mu gihugu cye nk’umukoro agomba kwitaho.

Agira ati “Icyo dutahanye n’uko nk’abasirikare dufite inshingano tutagomba kwiuraho zo kurinda abasivili ahantu aho ariho hose urugamba rukomeye kandi bigaragara ko bashobora kuharenganira muri iyo mirwano.”

Yakomeje avuga ko ku giti cye nahamagarwa mu butumwa bwo kubungabunga amahoro, hakavuka ibyo bibazo bisaba ko harengerwa abasivili, atazazuyaza kurinda abasivili.

Maj.Fransisca Aholo waturutse muri Ghana avuga ko mu mahame 18 ya Kigali bize arengera abasivili atazigera yinangira cyangwa ngo atinde mu gihe hari abasivili agomba kurengera.

Agira ati “Ni ibyo ntahanye kandi ni byo ngomba gukora mu gihe nzaba ngiye mu butumwa bwo kubungabunga amahoro.”

Gen Patrick Nyamvumba, Umugaba mukuru w’Ingabo z’u Rwanda (RDF) akangurira abitabiriye ayo mahugurwa kuzaba abambasaderi beza baharanira ko ibyo bungutse bigera kuri benshi, bikanatanga umusaruro ku buryo abasivili barengerwa mu gihe cy’intambara.

Ayo mahugurwa yateguwe n’Ingabo z’u Rwanda (RDF) ku nkunga y’igihugu cy’u Buholande na Leta Zunze Ubumwe z’Amerika.

Ikipe y’ingabo z’Igihugu yatahanye intsinzi y’ibitego bitatu

Uwo mukino wa gicuti, w’mupira w’amaguru, wabereye ku kibuga cy’umupira w’amaguru cya Nyakinama, i Musanze, ku mugoroba wo ku cyumweru tariki ya 13 Ugushyingo 2016.

Ni umukino wari urimo ishyaka ryinshi. Ikipe y’ingabo z’Igihugu yasatiriye cyane ikipe y’abanyamakuru.

Igice cya mbere cy’uwo mukino cyarangiye Ikipe y’ingabo z’Igihugu itsinze ibitego 2 ku busa bw’abanyamakuru.

Mu gice cya kabiri ibintu byaje guhinduka abanyamakuru babona igiteko kimwe ariko baboneza ingabo nazo zibona ikindi gitego, nuko umukino urangira ari ibitego 3 kuri 1 cy’abanyamakuru.

Nyuma y’uwo mukino amakipe yombi yishimiye ko uwu mukino wageze ku ntego yawo y’ubusabane bwari bugamijwe.

Ikipe y’abanyamakuru batandukanye bakorera mu Ntara y’Amajyaruguru yabanje mu kibuga

Lt Col Richard Karasira wavuze mu izina ry’ikipe y’Ingabo z’igihugu yo mu ishuri rikuru rya Gisirikare rya Nyakinama yavuze ko kugirana ubusabane n’abanyamakuru ari ibintu bishimiye.

Agira ati “Abanyamakuru basanzwe baza muri iki kigo twabatumiye bari mu kazi kabo ko gutara amakuru bakerekerwa aho banyura none abasirikare baberekeraga nibo bahuriye mu mukino w’ubusabane.”

Eric Mugwaneza, wavuze mu izina ry’Abanyamakuru yatangaje ko umukino wahuje ingabo n’abanyamakuru bo mu Ntara y’Amajyaruguru watumye n’abanyamakuru ubwabo bahura kuko bamwe muri bo batari baziranye.

Agira ati “Nyuma yo kuba muri abasirikare mwabaye n’abahuza hagati yacu kuko natwe ubwacu hari abo twahuriye muri uyu mukino tukamenyana.”

Wari umukino wa gicuti ariko ugaragaramo ishyaka ryinshi

Abanyamakuru bo mu Ntara y’Amajyaruguru basabye uwo mukino wa gicuti n’ingabo z’Igihugu mu rwego rwo kwishimira umubano mwiza bafitanye kandi bifuza ko wakomeza.

Andi mafoto y’umukino

Abantu banyuranye mu nkengero z’Ikibuga bari baje gufana

Umunyamakuru Uwimana Emmanuel wa RBA niwe wari umunyezamu w’ikipe y’abanyamakuru

Ikipe y’ingabo z’igihugu i Nyakinama zari zambaye hejuru umutuku naho iy’abanyakuru yambaye hejuru orange

Nyuma y’umukino hakurikiyeho ubusabane

INES-Ruhengeri igiye kujya yifashisha Drone mu kwigisha

Dr Fabien Hagenimana, umuyobozi w’iri shuri avuga ko ikoreshwa rya drone ari ikoranabuhanga rigezweho bashaka kujya bifashisha mu bushakashatsi n’abanyeshuri biga iby’ubutaka bakayigiraho.

Yagize ati “Abiga iby’ubutaka amafoto bifashisha yafashwe n’indege ayandi afatwa n’icyogajuru ariko icyo tuyanenga ni uko atagaragara neza nkafatwa n’akadege katagira umupirote kuko kayafata kegereye ubutaka ibipimo byo kuba wakwibeshya bikagabanuka”.

Dr Hagenimana Fabien uyobora ishuri rikuru rya INES- Ruhengeri

Akomeza avuga ko iyo drone yamaze kugera mu Rwanda, kaguzwe amafaranga ibihumbi 30 by’amayero.

Umwarimu uzafasha abanyeshuri nawe ni umunyarwanda uvuye mu Bufaransa kwiga ibirebana n’imikoreshereze yayo.

Dr Hagenimana atangaza ko usibye kuba abanyeshuli bazunguka ubumenyi mu ifatwa ry’amafoto, hari n’inyungu ku baturage bakoresha ubutaka.

Ati “Mu Rwanda akenshi dukunda kuvuga ibyo guhuza ubutaka ariko ugasanga abantu basa nk’abagereranya, ariko kazajya kaguruka kazane ibipimo bya nyabyo by’ubuso bwegeranyijweho ubutaka, nta kwibeshya”.

Ishuri rya INES-Ruhengeri

Asobanura ko abanyeshuli bazajya bigishirizwa kuri ako kadege nabo bazajya bajya ku isoko ry’umurimo bafite ubumenyi burenze ubw’abarangizaga mbere.

Ir Nkerabigwi Placide, umwarimu wa INES – Ruhengeri uherutse kuva mu Bufaransa kwiga iby’imikoreshereze y’ako kadege avuga ko kugakoresha bizatuma bagira amafoto meza aruta ayafatwaga mu buryo bwari busanzwe.

Ubuyobozi bwa INES- Ruhengeri buvuga ko ako kadege kageze mu Rwanda kakaba kari mu kigo cy’u Rwanda cyakira ibicuruzwa bitumizwa mu mahanga (MAGERWA).

Ishyiga bakoresha batekesheje Biogaz

Babigaragaje ubwo abantu icumi bari bayobowemo na Eng Wondimu Tekle, umunyamabanga wa Leta muri Minisiteri ishinzwe amashyanyarazi no kuhira imyaka mu gihugu cya Ethiopia bakoreraga urugendoshuri mu karere ka Musanze, tariki 09 Ugushyingo 2016.

Basuye abaturage bo mu murenge wa Gashaki bimuwe mu birwa biri mu kiyaga cya Ruhondo, bagatuzwa mu midugudu.

Umudugudu wo mu murenge wa Gashaki wakorewemo urugendoshuri ry’itsinda ryaturutse muri Ethiopia

Abo baturage borojwe inka, banubakirwa Biogaz. Baratiye abo Banya-Ethiopia ko gukoresha Biogaz byababereye igisubizo; nkuko Nkurikiyimana Vedaste, umwe muri abo baturage abisobanura.

Agira ati “Twaryaga bitugoye kubera ikibazo cy’ibicanwa bidakunze kuboneka muri aka gace ariko ubu abana bajya ku ishuli mu gitondo banyoye igikoma na saa sita basanga ibiryo byahiye.”

Yakomeje avuga ko kuba barakuwe mu birwa bari batuyemo, ikabatuza mu mudugudu bakitabwaho, ari ibintu bibereka ko iterambere ryabagezeho.

Mugenzi we agira ati “Ubu isaha n’isaha umuntu ava mu mirimo ye agateka nta myotsi mbese nta zindi mvune umuntu ahura nazo ajya gutashya.”

Umunya-Ethiopia Eng Wondimu Tekle wasuye Akarere ka Musanze mu rugendoshuri

Eng Wondimu Tekle yavuze ko ibyo babonye mu karere ka Musanze n’ahandi mu Rwanda bizahindura imibereho ya bamwe mu baturage bo mu giuhugu cye.

Agira ato “Uru rugendoshuri rubaye ingirakamaro cyane ubu buryo bwo gutuza abaturage hamwe mu cyaro twabubigiyeho.”

Abaturage bari batuye muri ibyo birwa biri mu kiyaga cya Ruhondo

Umuyobozi wungirije mu karere ka Musanze ushinzwe imibereho myiza y’abaturage wari kumwe nabo bashyitsi yavuze ko kuba hari abaza kubigiraho bituma barushaho gukora byiza kandi byinshi.

Abayobozi n’abaje mu mahugurwa baturutse hirya no hino ku isi bafashe ifoto y’urwibutso

Ibyo byatangarijwe i Nyakinama muri Musanze, ubwo hatangizwaga amahugurwa y’iminsi umunani agamije kwimakaza amasezerano ya Kigali arengera abasiviri mu bihe by’intambara; tariki 09 Ugushyingo 2016.

Ayo mahugurwa ari kubera mu Kigo cy’u Rwanda cy’Amahoro (Rwanda Peace Academy, yitabiriwe n’ibihugu 14 byo hirya no hino ku isi birimo n’u Rwanda.

Lt Col René Ngendahimana, umuvugizi w’agateganyo wa RDF yavuze ko hirya no hino mu butumwa bwo kubungabunga amahoro igisirikare cy’u Rwanda kiza ku isonga mu kurengera abasivili.

Lt Col Rene Ngendahimana asobanura ubunararibonye ingabo z’u Rwanda zifite mu kurengera abasiviri mu bihe by’intambara

Avuga ko ariko hari ahandi hamwe na hamwe ayo mahame yo kurengera abasivili atubahirizwa.

Agira ati “Ubwo bunararibonye mu kurengera abasivili mu gihe cy’intambara niwo muco u Rwanda rushaka gutangaho icyitegererezo ariko na none rukagira ibyo narwo rubungukiraho.

Kugira ngo ayo mahame agende acengera mu gisirikare no mu bandi bantu bajyanwa mu butumwa bwo kubungabunga amahoro hirya no hino ku isi.”

Ambasaderi w’u Buholande mu Rwanda, Frederique Maria De Man atangaza ko yishimira kuba igihugu cye kigira uruhare mu itegurwa ry’amahugurwwa nk’ayo.

Agira ati “Hari imikoranire myiza n’ubufatanye butuma nterwa ishema no kuba igihugu cyanjye cy’u Buholande nacyo kigira uruhare mu mahugurwa nk’aya.”

Abayobozi mu nzego zinyuranye bitabiriye umuhango wo gutangiza ayo mahugurwa

Minisitiri w’ubutabera akaba n’intumwa nkuru ya Leta, Johnston Busingye avuga ko ayo amahugurwa yuzuzanya n’amahame ya Kigali yashyizweho umukono ku matariki ya 28 na 29 Gicurasi 2015.

Ayo mahame yashyizweho umukono n’ibihugu byitabiriye biturutse hirya no hino ku isi.

Ibihugu byitabiriye ayo mahugurwa ari kubera i Nyakinama ni Burukinafaso, Ghana, Kenya, Malawi, Senegal, Sierra Leone, Sudani y’Amajyepfo, Uganda, u Buholandi, Tanzania, Leta Zunze Ubumwe z’Amerika, Zambia, Zimbabwe n’u Rwanda.

ACP Bertin Mutezintare aganira n’abaturage b’Umurenge wa Gataraga ku bibi byo kwihanira no kwigomeka

Polisi y’igihugu ikorera mu Karere ka Musanze ihamya ko abo baturage, bo mu Murenge wa Gataraga, bashatse kwica uwo mukecuru mu ijoro ryo ku itariki ya 05 Ugushyingo 2016.

Polisi ikomeza ivuga ko abaturage bashatse kwica uwo mukecuru ariko ubuyobozi bw’umurenge wa Gataraga hamwe na Polisi barahagoboka ntacyo barakora.

Uwo mukecuru bamuzizaga ko ngo yaba ariwe waroze umugabo ufite imyaka 31 y’amavuko, wari witabye Imana.

Polisi ifatanyije n’ubuyobozi baburijemo igitero cy’abo baturage maze abo baturage badukira imodoka y’umuyobozi w’Umurenge wa Gataraga bayimenagura ibirahuri.

Ibyo byatumye Guverineri w’Intara y’Amajyaruguru, Musabyimana Jean Claude n’inzego z’umutekano zikorera muri iyo ntara bagirana inama n’abaturage bo mu Murenge wa Gataraga, mu rwego rwo kwamagana icyo gikorwa, tariki ya 08 Ugushyingo 2016.

Umuyobozi w’Intara y’Amajyaruguru Musabyimana Jean Claude yihanangiriza abaturage b’umurenge wa Gataraga muri Musanze ku muco mubi badukanye w’urugomo

Umuyobozi wa Polisi y’u Rwanda mu Ntara y’Amajyaruguru, ACP Bertin Mutezintare yamaganye imyitwarire abo baturage bagaragaje.

Agira ati “Nta muntu n’umwe wemereye kwihanira mu Rwanda ahubwo mu gihe hari ikibazo mwabimenyesha ubuyobozi bukabafasha mu kugikemura.”

Akomeza yibutsa abo baturage ko ibiyobyabwenge nk’urumogi n’inzoga zitemewe babireka maze abasaba kutabinywa no kutabicuruza ahubwo bagatanga amakuru y’ababikora.

Guverineri Musabyimana yabwiye abo baturage ko badakwiye kwishyiramo ko umuntu wese wapfuye urupfu rw’ikirago aba yarozwe.

Bamwe mu baturage b’Umurenge wa Gataraga bijeje ubuyobozi ko batazasubira kwigomeka no kwihanira umuntu wese bakekaho icyaha kubera ko bo batemerewe gutanga ibihano.

Bosenibamwe ahererekanya ibitabo na Guverineri Musabyimana wamusimbuye ku buyobozi bw’umuryango FPR Inkotanyi mu Ntara y’amajyaruguru

Guverineri Musabyimana yatorewe uwo mwanya binyuze mu matora yakozwe n’inteko rusange idasanzwe y’umuryango wa FPR-Inkotanyi ku rwego rw’Intara y’Amajyaruguru, yateranye tariki ya 06 Ugushyingo 2016.

Guverineri Musabyimana yagize amajwi 98%. Umwali Juliette bari bahanganye yagize amajwi 2%. Abanyamuryango 347 nibo bari bagize inteko itora.

Bosenibamwe yahise atanga imfunguzo n’ibitabo bikubiyemo ibyakozwe n’ibiteganyijwe gukorwa ku rwego rw’umuryango FPR-Inkotanyi mu Ntara y’Amajyaruguru.

Yifurije Guverineri Musabyimana kuzagira imirimo myiza akaba ari nayo imuranga.

Agira ati “Aho umuryango muwusanze ni heza ariko muzarusheho guteza imbere ibikorwa byawo naho ibyakozwe ariko bikaba bigikomeza bizasozwe neza ndetse byongerwe.”

Bosenibamwe yahawe impano y’ishimwe ashimirwa ibyo yagezeho afatanyije n’abanyamuryango

Guverineri Musabyimana yashimiye abanyamuryango bamugiriye icyizere bakamutora abasezeranya ko yiteguye gukomeza gufatanya nabo nk’uko yabitojwe.

Agira ati “Inkoni y’ubushumba nahawe ni ikimenyetso gikomeye nzifashisha mu kuyobora ndetse nkanayifashisha mu gukebura abazakosa”.

Guverineri Musabyimana yijeje abanyamuryango kuzashyira imbere ibikorwa biteza imbere umuryango FPR Inkotanyi

Undi watowe muri komite y’umuryango FPR-Inkotanyi mu Ntara y’Amajyaruguru ni uwungirije perezida w’umuryango ariwe Muhizi Jules Aimable.

Yagize amajwi 90% atsinze Sisi Jean Damascène wagize amajwi 10% by’inteko yatoye igizwe n’abanyamuryango 347.

Abagize inteko itora bari baturutse mu turere twose tw’Intara y’Amajyaruguru

Abanyamuryango ba FPR-Inkotanyi bavuga ko muri iyo Ntara ibikorwa 30 byari biteganyijwe gukorwa muri byo 18 byarangiye mu buryo bwa burundu n’ibisigaye bikaba biri hafi kurangira.

Gasamagera Wellars, Komiseri mu muryango wa RPF-Inkotanyi yibukije abanyamuryango ko bakwiye guharanira inyungu rusange bakegera abaturage.

Nyuma y’urupfu rwe benshi bitabiriye kuza kureba aho yari acumbitse

Urupfu rw’uyu musore, wari uri mu kigero cy’imyaka 40 y’amavuko, wakoraga akazi k’ubukarani ngufu mu Mujyi wa Musanze, rwamenyekanye ku mugoroba wo ku itariki ya 05 Ugushyingo 2016.

Ingabire Christine, wari ucumbikiye nyakwigendera mu gihe cy’imyaka itanu, ahamya ko uwo musore yari amaze igihe kingana n’ukwezi yararembeye mu nzu.

Ariko ngo mbere yuko ashiramo umwuka yabanje gutaka cyane bagiye kureba basanga yitabye Imana.

Agira ati “Abana bumvise ataka mu kanya gato bagiye kureba basanga ashizemo umwuka kuko yari amaze iminsi arembeye mu nzu. Turakeka ko ari ikibazo cyo kutagira Mitiweri kandi akaba wenyine mu nzu.”

Ndamiye yari arwariye mu nzu ya wenyine kandi ntagire umugeraho

Basebya Alphonse, wabanaga na Ndamiye mu ishyirahamwe rimwe ry’abakarani ngufu, uvuga ko nta bwisungane mu kwivuza yari afite.

Akeka ko ngo ari yo mpamvu yatumye Ndamiye arembera iwe mu rugo maze ntashobore kujya kwa muganga, kwivuza.

Agira ati “Rwose iyo agira ubwisungane mu kwivuza,akajya kwa muganga agifatwa n’uburwayi, ndakeka ko abaganga bagombaga kugira icyo bakora ku buzima bwe ibintu bigishoboka.”

Mushiki wa Ndamiye witwa Nyirabazungu Florence avuga ko nyuma y’igihe gito bamenye ko arwaye bateganyaga kuza bakamuvuza ariko ngo bahise bumva inkuru yuko yapfuye.

Bose nubwo bavuga ko nyakwigendera yari arwaye, yararembye nta numwe uzi indwara yari arwaye cyangwa icyaba cyamwishe.

Umunyamabanga Nshingwabikorwa w’umurenge wa Muhoza, Manzi Jean Pierre nawe avuga ko icyishe Ndamiye kitaramenyekana. Akeka ko yaba yazize kuba mu nzu wenyine akarwara akabura umuvuza.

Aha niho ahera asaba abaturage kwivuriza igihe ndetse bakanafashanya mu gihe umwe muri bo yarwaye.

Atoza akarasisi akanakayobora

Mfitumukiza, wiga INES Ruhengeri, avuga ko uwo mwuga akora umutunze kuko akunze gutumirwa henshi kujya gusurutsa ibiriro akora akarasisi.

Avuga ko iyo bamutumiye wenyine, abamutumiye bamwishyura ibihumbi 50RWf. Akomeza avuga ko ariko yashinze itorero (bande) ikora akarasisi. Iyo bayitumiye yose, bayishyura ibihumbi 500RWf.

Agira ati “Mu birori uko byaba bimeze kose kugira ngo niyerekane mu karasisi cyangwa ntoze umuntu ku giti cye kugeza igihe abimenyeye nishyurwa ibihumbi 50 by’u Rwanda bitagomba kujya munsi kandi kuri konti yanjye harabyibushye ntabwo hariho ubusa.”

Akomeza avuga ko mu birori bitandukanye by’ubukwe no mu birori by’ibigo by’amashuri ariho akunze gutumirwa.

Uyu mukobwa avuga ko kwiyerekana mu karasisi bimutunze kuko aho abikoze ku giti cye yishyurwa ibihumbi 50RWF

Mfitumukiza avuga ko uwo mwuga umutunze ndetse ko n’undi washaka kuwugira umwuga nawe wamubeshaho ukamuteza imbere.

Uyu mukobwa utemera kuvuga imyaka ye y’amavuko, avuga ko yatangiye gukora umwuga wo kwiyerekana mu karasisi mu mwaka wa 2014.

Akomeza avuga ko ibijyanye no gukora akarasisi yabyigiye mu gihugu cya Kenya mu ishuri ryitwa “Kikuyu Alliance Girls School”. Yagiyeyo kubyiga abikesheje amahugurwa yoherejwemo n’itorero rya Anglican mu Rwanda.

Ikindi ngo ni uko yasabwe kenshi kuba yajya mu nzego z’umutekano ariko we ntabyemere kuko ngo inzozi ze ari ugukora kwa muganga.

Akabihuza n’amasomo y’ibya Laboratwari (Laboratory Sciences) yiga mu ishuli Rikuru rya INES Ruhengeri.

Mfitumukiza avuga ko hari abamutinya bavuga ko atari umukobwa nk’abandi

Mfitumukiza avuga ko kubera uburyo ateye nk’abahungu, akaba yaranavutse mu muryango w’abahungu gusa, hari benshi bamutinya bakeka ko yaba atari umukobwa kimwe n’abandi.

Agira ati “Abahungu rwose barantinya bakavuga ko ntari umukobwa ariko umuhungu umwe niwe washoboye gutinyuka arantereta ansaba urukundo kandi byaramuhiriye asanga noroshye nk’imboga n’ubwo ngaragara nk’abahungu.”

Mfitumukiza yize amashuri yisumbuye mu ishuri rya Saint Vincent-Ruhengeri. Ubu yiga muri INES-Ruhengeri, abibangikanya n’akandi kazi yahawe ku bunyamabanga mu itorero ry’abangilikani.

Abagabiwe inka bahamya zigiye kubasubiza ku mata

Yabivuze ubwo imiryango itandatu itishoboye yo muri musanze yagabiwe inka n’ishuri rikuru ry’ubumenyingiro rya Musanze (Musanze Polytechnic) nyuma y’umuganda rusange wabaye tariki ya 29 Ukwakira 2016.

Nteziyaremye w’imyaka 40 y’amavuko, utuye mu murenge wa Kimonyi, nyuma yo guhabwa inka ibyishimo byaramurenze avuga ko agiye kongera kunywa amata aherukaga akiri muto.

Agira ati “Ndanezerwe cyane ndetse sinabona uko mbivuga gusa ndashima gahunda ya Girinka kuko ngiye kongera kunywa amata mu gihe nayaherukaga nkiri umwana baheka mu ngombyi.”

Iyo nka yahawe avuga ko izamuhindurira ubuzima ikanabuhindurira n’abagize umuryango we cyane cyane abana be bakazakura banywa amata.

Agira ati “Ubu njye namaze kubona ko nzagira amasaziro meza kuko umuntu wanyoye amata ashisha yumva akagira ubuzima bwiza n’ubw’abagize umuryango.”

Mu nka bagabiwe harimo n’izihaka

Abagabiwe inka bahamya ko nta bundi buryo bari bafite bwari kuzatuma borora inka uretse guhanga amaso gahunda ya Girinka.

Umuyobozi mukuru w’agateganyo wa Musanze Polytechnic, Abayisenga Emile yatangaje ko muri zimwe mu nshingano z’iryo shuri harimo no guhindura imibereho y’abaturage baturanye naryo.

Agira ati “Binyuze mu bumenyingiro twigisha bujyanye n’ubuhinzi n’ubwubatsi mu guhundura imibereho y’abatuye agace ishuri riherereyemo.”

Marie Claire Uwamariya, umuyobozi wungirije ushinzwe imibereho myiza y’abaturage mu karere ka Musanze yashimangiye ko inka bahawe zizazanira impinduka nziza abazihawe barwanya imirire mibi, bakabona n’ifumbire.

Ishuri rikuru ry’ubumenyingiro rya Musanze ryanishyuriye abatishoboye 321 ubwisungane mu kwivuza (Mitiweli).

Ikiraro bubakiwe kizakuraho inzitizi mu buhahirane

Icyo kiraro gihuza abaturage bo mu tugari twa Guriro na Birembo mu murenge wa Rambura mu karere ka Nyabihu cyatashwe kuri uyu wa 27 Ukwakira 2016.

Senzira Jean Claude umwe mu bakoresha iki kiraro, avuga ko kizoroshya ingendo n’ubuhahirane, kuko umugezi cyambukiranya wa Basera wajyaga wuzura bakabura aho banyura.

Yagize ati “Abanyeshuli baburaga uburyo bajya kwiga kimwe n’abantu bakuru, cyane iyo umugezi wa Basera wabaga wujujwe n’amazi y’imvura”.

Uwitwa Murekatete Esperance yatangaje ko ubuhahirane n’imigenderanire hagati y’abatuye muri ako gace igiye kurushaho koroha bitewe n’uko imbogamizi ku mpande zombi yavanweho.

Uburebure bw’icyo kiraro bungana na metero 40

Ati “Ubu nta muturage imvura ishobora kugwa yagiye guhaha hakurya mu kandi kagari ngo agumeyo ategereze ko amazi agabanuka abone gutaha”.

Uretse kubura uko abaturage bambuka uwo mugezi wa Basera hari n’abagiye bawugwamo bagerageza kuwambuka mu gihe amazi y’imvura yabaga yuzuye, bakahasiga ubuzima barohamye.

Umuyobozi wungirije ushinzwe iterambere ry’ubukungu mu karere ka Nyabihu, Mugwiza Antoine yavuze ko icyo kiraro cyubakiwe abaturage nyuma y’uko babisabye ubuyobozi.

Ati “Iki kiraro mukibonye nyuma y’uko mwari mwarabisabye kenshi ubuyobozi, kugira ngo mworoherwe n’ubuhahirane n’imigenderanire, muzagifate neza kandi mukibyaze umusaruro”.

Ubuyobozi bw’Akarere ka Nyabihu n’abafatanyabikorwa babo

Icyo kiraro cyuzuye gitwaye akayabo ka miliyoni zisaga 20 z’amafaranga y’u Rwanda.

Uruhare rw’Akarere ka Nyabihu rwari 40% urw’umufatanyabikorwa Bridges To prosperty ari 60% ari nayo yakurikiranye imirimo yo kucyubaka.

Abantu bakuru nabo batazi kwambuka imihanda bazajya bambutswa

Uyu muhango watangijwe ku mugaragaro na Polisi y’igihugu ikorera mu karere ka Musanze, tariki ya 26 Ukwakira 2016.

Abo bantu, babihuguriwe, bazajya bambutsa abanyeshuri bava cyangwa bajya ku ishuri n’abandi bantu bakuru batazi kwiyambutsa imihanda yo mu mujyi wa Musanze iba irimo urujya n’uruza rw’ibinyabiziga.

Ibyo ngo bizakumira impanuka; nkuko IP Etienne Kabera, ushinzwe umutekano wo mu muhanda mu karere ka Musanze, abivuga.

Agira ati “Iki gikorwa cyo gushyiraho abantu bashinzwe kwambutsa abanyeshuli mu masangano y’imihanda bizagabanya impanuka ndetse bitume n’ababyeyi babo bana batekana aho bari hose batikanga impanuka.”

Polisi y’igihugu muri Musanze yashyiriyeho abanyeshuli uburyo bwo kujya bambutswa imihanda

Polisi ivuga ko mu karere ka Musanze nibura buri kwezi abantu bane bahura n’impanuka zikabasigira ubumuga cyangwa se bamwe muri bo zikabahitana.

Itanga urugero rw’umunyegare mu minsi ishize wagonzwe n’ikamyo ari mu isangano y’umuhanda mu mujyi wa Musanze agahita ahasiga ubuzima.

Niyo mpamvu rero ngo yahise ihugura abantu, ibigisha uburyo bazajya bambutsa abadashobora kwiyambutsa iyo mihanda yo mu mujyi.

Umwe mu bahuguriwe kwambutsa abanyeshuli mu mujyi wa Musanze

Umurungi Yvette, umwe mu bari bitabiiriye uwo muhango, yabwiye Kigali Today ko yishimiye kuba abana babo bagiye kujya bambutswa imihanda n’abantu babihuguriwe.

Agira ati “Hari ubwo umuntu yatumaga umukozi kwambutsa umwana umuhanda nawe ubwe atazi kuwiyambutsa, ubwo rero aho wicaye ku kazi cyangwa mu rugo ukumva nabyo nta mahoro biguhaye ariko ubu imitima isubiye mu gitereko.”

Minisitiri Francis Kaboneka( Hagati) yemeza ihererekanyabubasha hagati ya Bosenibamwe na Musabyimana wamusimbuye

Byatangajwe mu muhango w’ihererekanya bubasha hagati ye n’uwo asimbuye ku buyobozi bw’intara y’amajyaruguru, Bosenibamwe Aimé, tariki ya 25 Ukwakira 2016.

Muri uwo muhango Bosenibamwe yabwiye umusimbuye ko mu gihe kingana n’imyaka umunani amaze ayobora iyo ntara avuga ko ikibazo cy’umwanda aricyo asize kitararangira. Yamusabye kuzabishyiramo imbaraga kigakemuka.

Agira ati “Isuku nicyo gipimo (Indicateur) cya mbere cy’iterambere ku muturage. Kuko n’ubwo wakubaka imihanda ya kaburimbo,amahoteri meza ariko abaturage batarumva neza akamaro k’isuku ntacyo byaba bimaze.

Niyo mpamvu nsaba umuyobozi unsimbuye ko yabishyiramo imbaraga intara y’amajyaruguru ikaba urwererane”.

Umuyobozi mushya w’Intara y’amajyaruguru, Musabyimana Jean Claude avuga ko icyo kibazo cy’umwanda nta kabuza azakirwanya kuko agiye gushyira imbere ubufatanye n’inzindi nzego mu rwego rwo kurushaho kwegera abaturage.

Agira ati “Abaturage b’intara y’amajyaruguru tugiye kurushaho kubaba hafi tubagaragariza urukundo bitari ukuvuga ngo ndagukunda ahubwo twite ku mibereho myiza yabo”.

Abayobozi mu nzego zitandukanye bo mu ntara y’amajyaruguru bitabiriye iryo hererekanya

Umwanda uvugwa muri bamwe mu baturage b’intara y’amajyaruguru ugaragarira cyane cyane mu ngo zabo.

Usanga bamwe bakirarana n’amatungo mu nzu abandi ugasanga nta bwiherero bagira, bakajya kwiherera mu bisambu cyangwa bagatira abaturanyi.

Ikindi ni uko no ku mihanda cyangwa n’ahandi hahurira abantu benshi uhabona abana cyangwa n’abantu bakuru bambaye imyenda yahinduye ibara kubera umwanda.

Abandi ugasanga ntibajya bakaraba ku mubiri bikabaviramo kurwara indwara ziterwa n’umwanda.

Bosenibamwe akomeza abwira uwamusimbuye ko ikindi atatunganyije mu buryo bunoze ari iterambere ry’inganda zitunganya umusaruro ukomoka ku buhinzi. Niho ahera asaba Guverineri Musabyimana kuzabyitaho.

Ati “Twari tumaze kugera ku musaruro ushimishije ariko nta nganda twari twakagezeho zihagije zitunganya uwo musaruro”.

Minisitiri w’ubutegetsi bw’igihugu Francis Kaboneka yabwiye umuyobozi mushya w’intara y’Amajyaruguru ko agomba gukunda abaturage nk’uko Perezida Paul Kagame, wamugiriye icyizere cyo kuyobora iyo ntara, abakunda.

Bubakiwe amashuri mashya ku bufatanye n’abanyarwanda baba mu Budage

Abanyeshuri b’iri shuri ryubatswe mu mwaka wa 1978, baterwaga ubwoba no kuba amashuri ashobora kubagwira igihe cy’imvura, nk’uko Uwamahoro Valentine umwe muri bo abivuga.

Yagize ati “Imvura yaragwaga tugakuka imitima ndetse hagira n’ikindi twikanga tukumva ko ayo mashuri agiye kutugwira”.

Uwamahoro akomeza avuga ko kubakirwa ibyumba by’amashuri bishya babibonyemo igisubizo kuko ubu basigaye biga batuje.

Ati “Abakobwa twe twanashyiriweho icyumba kitugenewe kubera ibibazo byihariye dushobora guhura nabyo mu gihe turi ku ishuri. Ubu ntitugihangayitse”.

Tuyisabe Providence ukuriye Diaspora Nyarwanda yo mu Budage ari nayo yateye inkunga iyubakwa ry’aya mashuri, avuga ko basuye iki kigo babona amashuri ari ikibazo gikomeye.

Amashuli bari bafite kuva mu 1978 yari agiye kuzabagwaho

Ibi byatumye batekereza kububakira kuko ngo babonaga gikomereye banyeshuri n’ababyeyi baharerera.

Ati “Twafashe icyemezo cyo kubaka andi asimbura ayo yari amaze gusaza kuko abana bagomba kwigira ahantu heza nk’abayobozi b’ejo hazaza h’igihugu n’abanyarwanda.”

Umuyobozi w’akarere ka Musanze w’agateganyo, Habyarimana Jean Damascene ashima aba banyarwanda bagize igitekerezo cyiza, bagakusanya amafaranga bakubakira barumuna babo.

Icyo asaba abanyeshuri biga muri aya mashuri ni ukubyaza umusaruro amashuri bubakiwe.

Ati“Kwigira ahantu heza bizajyane no kongera umusaruro w’amanota meza”.

Abanyarwanda baba mu Budage bafatanyije n’itorero rya Pentekote mu Rwanda bamaze kubaka kuri icyo kigo ibyumba by’amashuri 11 byatwaye amafaranga arenga miliyoni 124 frw.

Minisitiri Busingye asobanura ko ikiguzo cy’umutekano cyishyuwe kuri buri munyarwanda

Yabitangaje ubwo yasuraga urubyiruko rw’abasore 47 bagororerwa mu kigo Ngororamuco cya Kinigi muri Musanze, tariki ya 18 Ukwakira 2016.

Yavuze ko abishora mu bikorwa by’urugomo, ubujura, gukoresha ibiyobyabwenge n’ibindi byaha bihungabanya umutekano baba bibeshya kuko ikiguzi cy’umutekano cyatanzwe, umunyarwanda akaba agomba kubaho atekanye.

Agira ati "Ngira ngo murabizi sibyo ? Ikiguzi cy’umutekano cyaratanzwe fagiture yawo yarishyuwe 100% nta mwenda. Utekereza rero ngo ashobora kuwuhungabanya akihindura uwananiranye ntabwo bishoboka."

Akomeza akebura urwo rubyiruko arusaba gufatanya n’abandi kubaka u Rwanda. Yababwiye ko bakwiye kugira iyo mitekerereze bagakura bumva ko nta kintu na kimwe gikwiye guhungabanya umutekano w’abanyarwanda.

Agira ati "Ushaka ko dufatanya imiryango irakinguye ariko wawundi uvuga ngo rwose njyewe sinzafatanya nabo nashaka azarorere ariko umutekano w’abanyarwanda ntawuzongera kuwuhungabanya…..zero!

Amahoro, ituze kimwe n’utwawe wavunikiye ni uburenganzira. N’ubwo yajya gutwara inkoko dufite inshingano n’uburenganzira bwo kubimubuza kuko uwo muntu ujya gutwara inkoko ikiguzi cy’umutekano we cyarishyuwe.’’

Rumwe mu rubyiruko rwigishirizwa mu kigo ngororamuco cya Kinigi

Uwamahoro Théoneste, umwe muri urwo rubyiruko, yemeza ko yiyahuzaga ibiyobyabwenge, akiba abantu abubikiriye. Ariko ngo yafashe umwanzuro arabireka nyuma y’inyigisho yaherewe mu kigo ngororamuco cya Kinigi.

Agira ati "Ubu sinkiri umunywi w’urumogi n’umujura ahubwo niteguye gukoresha amaboko yanjye nkiteza imbere.’’

Kuva mu ntangiro ya 2016 urubyiruko 2130 nirwo rumaze kunyura mu kigo ngororamuco cya Kinigi.

Abaturage bari benshi ahabereye ubwo bwicanyi

Uwo mugore w’imyaka 26 y’amavuko yari afite inda y’imvutsi n’umwana w’imyaka ibiri yishwe mu ijoro rishyira kuri uyu wa 14 Ukwakira 2016 ari iwe mu rugo.

Umugabo avuga ko umugore we yishwe n’abagizi ba nabi. Ariko abaturanyi be bamushinja bakamushinja kuba ariwe wiyiciye umugore kuko ngo iyo aba yatewe n’abagizi ba nabi yari kuvuza induru.

Nyirakamana Dative, umuturanyi w’uwo muryango yatangarije Kigali Today ko nyakwigendera yaba yishwe n’umugabo we biturutse ku makimbirane.

Agira ati “Ntabwo nabihamya neza ariko hagati yabo hagiye havuka intonganya za hato na hato, umugore anenga imyifatire y’umugabo we ko itari myiza mu buryo bw’imibanire yabo.”

Inzu yabo nta hantu yatobowe cyangwa ngo hicwe urugi ku buryo byakorohera buri wese kwemeza ko muri urwo rugo batewe n’abagizi ba nabi bakabinjirana mu nzu; nkuko umwe mu baturage abihamya.

Agira ati “Umugabo yabyutse avuga ko yabanje kurwana n’abo bagizi ba nabi ariko nta gikomere ndetse no mu gihe avuga ko yari yatewe n’abagizi ba nabi nta nduru yumvikanye. Njye mbona ariwe wamwishe.”

Gakina Kaliwabo Gerard, umuyobozi w’Akagari ka Bukinanyana, ahabereye ubwo bwicanyi, avuga ko bigoye kwemeza ko uwo mugabo yaba yatewe n’abagizi ba nabi.

Agira ati "Uriya mugabo yatubwiye ko yabanje kurwana nabo bagizi ba nabi bakamukubita isuka akayikinga ukuboko ariko nta gikomere na mba yagize byongeye nta nduru yumvikanye.’’

Polisi y’igihugu ikorera mu Karere ka Nyabihu yatawe muri yombi uwo mugabo n’abandi babiri bikekwa ko bari bafatanyije.

Bose ubu bafungiye kuri Station ya polisi ya Mukamira mu gihe iperereza rigikomeje.

Abavandimwe n’inshuti Nzirinda yari afite bahuriye iwe bafata mu mugongo abana asize

Urupfu rwa Nzirinda rwamenyekanye mu gitondo cyo ku itariki ya 08 Ukwakira 2016. Bamwe mu basanze umurambo wa nyakwigendera mu ishyamba bavuga ko yaba yishwe anizwe n’abagabo batatu barimo batema ibiti mu ishyamba rye ; nkuko uwitwa Twizerimana Jean Damascene abisobanura.

Agira ati "Hari abana bari mu ishyamba babonye abagabo batatu birukankana ibiti nyuma bageze aho byatemwaga basanga nyir’iryo shyamba araharyamye yashizemo umwuka nibo bahuruje abaturage bahageze basanga yapfuye maze bahita bamujyana mu bitaro kugira ngo akorerwe isuzuma hamenyekane icyamwishe."

Uwo murambo bahise bawujyana mu bitaro bya Ruhengeri kuwukorera isuzuma. Ariko ngo basanze nta gikomere ufite ku mubiri ; nkuko Manzi Jean Pierre uyobora umurenge wa Cyuve, Nzirinda yari atuyemo, abisobanura.

Agira ati "Umurambo wa Nzirinda wajyanwe mu bitaro nta gikomere ufite niho abantu bamwe bahereye bavuga ko nta mirwano yabaye hagati ye n’abo bajura."

Akomeza avuga ko mu iperereza bashakishije abo bagabo bari bamubereye mu
ishyamba batema ibiti bye ariko ngo bamaze gufata ukekwa umwe.

Agira ati "Umwe muri abo bagabo batatu bashinjwa urupfu rwe yatawe muri yombi agerageza gutorokera mu gihugu cya Uganda ahita ashyirwa mu maboko ya polisi y’igihugu ikorera mu karere ka Musanze."

Nzirinda yitabye Imana afite imyaka 58 asize abana b’abakobwa batanu.

Abaturage baturanye n’iki kigo bavuga ko bajyaga babona abantu bagurisha abanyeshuri ibiyobyabwenge

Babitangaje nyuma yo guhabwa ikiganiro n’umupolisi ushinzwe guhuza ibikorwa bya Polisi n’iby’abaturage mu Karere ka Musanze, IP Viateur Ntiyamira, tariki ya 06 Ukwakira 2016.

Manzi Innocent, wiga mu mwaka wa gatandatu imibare, ubugenge n’ubumenyi bw’isi (MPG) avuga ko ibiganiro bahawe na polisi byabagiriye akamaro mu kurushaho kumva neza ingaruka mbi z’ibiyobyabwenge.

Agira ati “Twe hano ibiyobyabwenge ntiwabihanywera keretse ari mu biruhuko.”

Polisi yahaye ikiganiro abo banyeshuri nyuma yuko hagiye hafatwa abantu bafite urumogi, bagiye kurugurisha mu baneyshuri.

Muri 2013 hafashwe umusore n’umugore bafatanwe udupfunyika tw’urumogi tune bagiye kutwinjiza mu kigo cya Sonrise High School. Muri 2012 ho hafashwe abagabo babiri bafite udupfunyika tubiri bari bashyiriye abanyeshuri.

IP Viateur Ntiyamira akebura abanyeshuli biga muri Sonrise High School

Ayo makuru yose yatanzwe n’abaturage baturiye icyo kigo bavuga ko basanzwe babona abantu bagurisha ibiyibyabwenge mu banyeshuri.

Uwingabire Minique, umuyobozi ushinzwe amacumbi n’imyitwarire myiza y’abanyeshuri ahakana ibivugwa ko haba hari abana bitwara nabi banywa ku biyobyabwenge.

Agira ati “Hari amakuru yigeze kuvugwa ko abana baha baba banywa ibiyobyabwenge ariko twe ntabyo tubona kuko imyitwarire yabo tuba tuyikurikiranira hafi.”

Umunyeshuri witwa Umuhire Joyce, wiga mu mwaka wa kane we yemera ko hari bagenzi be bashobora kuba bakoresha ibiyobyanwenge. Ariko akavuga ko ibiganiro bahawe na Polisi bizabafasha kubirwanya mu kigo bigamo.

Agira ati “Muri sosiyete nk’iyi y’abanyeshuli ntihaburamo abana bitwara nabi ariko icyiza n’uko baba baburiwe bakabagaragariza ingaruka zose bashobora guhura nazo".

Abanyeshuri bahawe umwanya bishimira impanuro bahawe na polisi y’Igihugu

IP Viateur Ntiyamira yabwiye abanyeshuri ba Sonrise High School ko bijanditse mu biyobyabwenge ntacyo bashobora kugeraho.

Agira ati “Nta muntu wanyoye ibiyobyabwenge ugira mu mutwe hakora neza kuko n’izina ubwabyo rirabisobanura ko ari ibiyobyabwenge. Rero sinzi impamvu abantu by’umwihariko mukiri bato mwabishidukira mukabikoresha kuko nta kindi bizabamarira usibye kubayobya ubwenge.

Igihugu kibategerejeho ibyiza byinshi kuko nimwe mbaraga zacyo zizavamo abayobozi beza, abapolisi beza, abasirikare beza n’abandi bantu bafitiye igihugu akamaro”.

Ibikorwa bya muntu bihumanya amazi akibasira ubuzima bw’abantu

Byatangajwe na Vincent de Paul Kabalisa, umuyobozi mukuru wungirije ushinzwe umutungo muri RNRA, ubwo hasozwaga amahugurwa y’iminsi itatu yabereye mu Karere ka Musanze, yari agenewe inzego zitandukanye zifite aho zihuriye no kubungabunga amazi; tariki ya 06 Ukwakira 2016.

Agira ati “Tumaze kubona ko ikibazo cy’ibikorwa bya muntu bihumanya amazi mu mu buryo butandukanye twasabye Minisiteri y’ubuhinzi n’ubworozi kimwe n’izindi nzego zirimo abahagarariye abagore n’urubyiruko n’abandi kwitabira aya mahugurwa kugira ngo dufatire hamwe ingamba zo kudahumanya amazi.”

Akomeza avuga ko batewe inkeke na bimwe mu bikorwa bya muntu bigenda birushaho guhumanya amazi.

Akomeza avuga ko ayo mahugurwa yateguwe kugira ngo abantu bamenye uburyo amazi ashobora gucungwamo kandi atagize ingaruka ateza ku buzima bw’abantu.

Vincent de Paul Kabalisa umuyobozi mukuru wungirije ushinzwe umutungo muri RNRA

Kabalisa avuga ko abantu bagomba kumenya kwita ku isuku y’amazi ntibemere ko hagira imyanda iyashokeramo ikayahumanya.

Ubushakashatsi bugaragaza ko ku isi, abantu babarirwa muri miliyoni eshatu n’igice bapfa buri mwaka bazize indwara ziterwa no kunywa amazi mabi.

Mu cyegeranyo cyakozwe n’umuryango w’abibumbye (UN), mu mwaka wa 2010 cyo kigaragaza ko amazi mabi yica abantu kurusha intambara.

Maniraho Venuste, ukomoka mu murenge wa Cyuve muri Musanze wahuye avuga ko nyuma yo guhura n’ibiza yarushijeho kumenya neza uburyo agomba kurinda ubutaka bwe ngo butajyanwa n’isuri, bukangiza amazi.

Muhizi Jules, umuyobozi wungirije w’Akarere ka Gicumbi, ushinzwe iterambere ry’ubukungu, Aimable witabiriye ayo mahugurwa avuga ko bungutse byinshi birebana n’imicungire y’amazi ku buryo aho kuba ikibazo agiye kubabera igisubizo.

Yagize ati “Ubumenyi tubonye nibwo tugiye gusangiza abaturage tuyoboye kugira ngo bumve neza uko ikibazo cy’imicungire y’amazi kimeze ariko natwe tubasobanurira tubifiteho ubumenyi”.

Ambassade y’u Buholandi mu Rwanda itangaza ko mu myaka ine, yateganyije inkunga ingana na miliyoni 18€, abarirwa muri miliyari 15RWf, mu rwego rwo kwita ku micungire y’amazi y’inzuzi n’imigezi mu gihugu; nk’uko Jan Vlaar umukozi muri iyo ambasade abivuga.

Musabyimana Jean Claude ashimira Perezida Paul Kagame wamugiriye icyizere akamugira Guverineri w’Intara y’Amajyaruguru

Tariki ya 04 Ukwakira 2016 nibwo Perezida Paul Kagame yagize Musabyimana Jean Claude, Guverineri w’Intara y’Amajyaruguru, ashingiye ku biteganywa n’itegeko nshinga rya Repubulika y’u Rwanda ryo muri 2003 riherutse kuvugururwa mu mwaka ushize wa 2015.

Musabyimana Jean Claude yavukiye mu Karere ka Burera mu mwaka wa 1972. Afite impamyabushobozi w’icyiciro cya kabiri cya Kaminuza mu buhinzi n’icya gatatu mu birebana n’imikoreshereze y’amazi.

Yakoze imirimo inyuranye irimo kwigisha amasomo y’ubuhinzi mu cyahoze ari ishuri rikuru ry’ubuhinzi n’ubworozi rya ISAE-Busogo. Yanakoze muri Minisiteri y’ubuhinzi n’ubworozi (MINAGRI) mbere yo kwinjira muri Politiki.

Musabyimana wubatse ufite abana batatu b’abahungu, mbere yo kuba Guverineri w’Intara y’Amajyaruguru, yari asanzwe ari umuyobozi w’akarere ka Musanze. Umwanya yatorewe ku itariki ya 26 Gashyantare 2016.

Mbere yo kuba umuyobozi w’ako karere yari yabanje kuba umuyobozi wungirije ushinzwe iterambere ry’ubukungu. Uwo mwanya yawutorewe tariki ya 27 Kamena 2014.

Mbere yo kujya muri nyobozi y’Akarere ka Musanze yari umujyanama muri njyanama y’ako karere, ukomoka mu murenge wa Cyuve akaba yari akuriye komisiyo y’ubukungu.

Ubwo yari umuyobozi w’Akarere ka Musanze, nibwo ako karere kaherekeje utundi mu mihigo y’umwaka wa 2015-2016.

Guverineri w’Intara y’Amajyaruguru, Musabyimana Jean Claude yari asanzwe ari umuyobozi w’akarere ka Musanze

Tariki ya 03 Ukwakira 2016, umunsi umwe mbere yuko aba Guverineri w’Intara y’Amajyaruguru, Musabyimana yasabye imbabazi Abadepite bagize komisiyo y’ubumwe bw’Abanyarwanda, uburenganzira bwa muntu no kurwanya Jenoside ubwo basuraga Akarere ka Musanze.

Yasabye imbabazi nyuma yuko abo badepite basanze muri ako karere hari amakosa abamubanjirije basize bakoze. Ayo makosa arimo ay’inzibutso za Jenoside zitujuje ibisabwa.

Ashimira Perezida Kagame

Ubwo yagiranaga ikiganiro na Kigali Today, kuri uyu wa gatatu tariki ya 05 Ukwakira 2016, yashimiye Perezida Paul Kagame wamugiriye icyizere akamuha inshingano zo kuyobora intara y’amajyaruru avukamo.

Agira ati “Ntabwo nigeze ntekereza ko muri politiki nzagera kuri uru rwego ngezeho gusa icyo nari nzi ni uko iyo umuntu akoze neza agakora inshingano ze neza byanze bikunze atera imbere kandi niba ubu ngenda nzamuka ni uko ababibona, babona ko nshobora kuba mbikora neza.”

Musabyimana avuga ko mu nzozi zo mu bwana yatekerezaga kuzaba “Enjeniyeri” (Engineer) mu bintu runaka. Ni naho ngo yakurije kwiga ibirebana n’ubuhinzi, akabikoramo akanabiminuzamo.

Ati “Nkiri umunyeshuri na mbere yaho cunakundaga ibintu bimeze nk’ubukorikori byo gukunda gukora utuntu n’utundi.” Tu

Musabyimana yabwiye Kigali Today ko kwiyumvisha ko yagizwe guverineri w’intara y’amajyaruguru byabanje kumugora kubyakira ariko nyuma yaho akaza kubyakira.

Ibibazo uyu muguverineri mushya asanze mu ntara y’amajyaruguru birimo ikibazo cy’isuku nke mu baturage. Harimo kandi ikibazo cy’ibiyobyabwenge nka kanyanga kigaragara kigaragara mu turere dutandukanye muri iyo ntara.

Muri uru rwibutso rwa Jenoside rwa Muhoza imibiri y’abazize Jenoside yakorewe abatutsi ishyinguye hamwe n’abishwe mu ntambara y’abacengezi mu 1998

Aba badepite bagize komisiyo y’ubumwe bw’abanyarwanda, uburenganzira bwa muntu no kurwanya Jenoside babibonye ubwo basuraga Akarere ka Musanze tariki ya 03 Ukwakira 2016.

Depite Mwiza Esperance, visi perezida w’iyo komisiyo, n’abo bari bari kumwe, basuye zimwe mu nzibutso z’abazize Jenoside yakorewe Abatutsi ziri muri ako karere, basanga zitujuje ibisabwa.

Urugero ni nkaho basuye urwibutso rwa Jenoside rwa Muhoza bakabona imwe mu mibiri y’abazize Jenoside yakorewe Abatutsi mu 1994 iri hamwe n’abantu bishwe n’abacengezi mu 1998.

Banasuye urwibutso rwa Jenoside rwa Busogo ariko batungurwa no gusanga narwo rutujuje ibisabwa.

Abadepite bageze ku Rwibutso rwa Jenoside rwa Busogo basanga rutujuje ibisabwa

Abadepite ntabwo babyishimiye maze basaba umuyobozi w’akarere ka Musanze kubikosora byihuse, abo bantu bishwe n’abacengezi bakajya gushyingurwa mu irimbi rusange.

Depite Mwiza Esperance yabwiye Kigali Today ko batashye bafite ishusho y’uko nta rwibutso rwa Jenoside na rumwe babonye mu karere ka Musanze, rwujuje ibisabwa nk’uko biteganwa n’amategeko y’inzibutso.

Kubera izo mpamvu, umuyobozi w’Akarere ka Musanze, Musabyimana Jean Claude yasabye imbabazi abo badepite abizeza ko bizakosorwa. Kuko ngo amakosa yose babonye yakozwe n’abayobozi bamubanjirije ku buyobozi bw’akarere ka Musanze.

Agira ati “Nsabye imbabazi ku makosa abayobozi bose bambanjirije bakoze ariko tugiye gukosora ibitaragenze neza duhereye ku nama zose twagiriwe”.

Umuyobozi w’Akarere ka Musanze yasabye imbabazi ku makosa ya bamwe mu bayobozi bamubanjirije

Musabyimana yabwiye Kigali Today ko akenshi abantu iyo bakora, bashobora gukosa ariko avuga ko ikibi ari ukugira ngo abantu bakore amakosa nibarangiza bayaryamemo.

Agira ati “Ibyo twabonye byakozwe uko bitagomba ubu twe twiteguye ko ibyo bintu tubishyira ku murongo tukabikosora kandi bigatungana ku buryo bitagira umuntu bibangamira”.

Senateri Bizimana Evariste anenga abanyamusanze ko badohotse mu ngamba zo kurwanya ingengabitekerezo ya Jenoside

Yabitangaje tariki 01 Ukwakira 2016, nyuma y’umuganda wo gutangiza icyumweru cyahariwe ubumwe n’ubwiyunge wakorewe mu mudugudu wa Susa mu kagari ka Ruhengeri, murenge wa Muhoza.

Yagira ati “Mu ndamukanyo yanyu muvuga, ubumwe n’ubwiyunge mwarangiza mugashyiraho n’agakeregeshwa k’abaturage bo mu ntara y’amajyaruguru, muvaga ko ingengabitekerezo ya Jenoside muyirandurana n’imizi yayo mukayitwika igashya igakongoka ubuziraherezo.

Hari ibintu bibiri byabakubise hasi nshaka kubabwira kugira ngo abantu bose bari hano bamenye ko tugomba kuvanamo icyo kirarane kibi cyane kitwanduza kuko ibyo tuvuga bitandukanye n’ibyo dushyira mu ngiro.”

Senateri Bizimana yatangaje ibyo agendeye ku bushakashatsi bwakozwe na komisiyo y’ubumwe n’ubwiyunge bwasohotse muri 2016.

Ubwo bushakashatsi bugaragaza ko akarere ka Musanze kari ku isonga y’utundi turere tw’igihugu mu kugira ingengabitekerezo ya Jenoside n’abantu bakibona mu ndorerwamo y’amoko.

Bugaragaza ko 78.9% by’abaturage babajijwe mu Karere ka Musanze, basubije ko mu hari abaturage bagifite ingengabitekerezo ya Jenoside naho abangana na 79.2 % basubiza ko hari abandi baturage bakibona mu ndorerwamo y’amoko.

Bamwe mu baturage bo mu Karere ka Musanze ariko ntibemerenya n’ubwo bushakashatsi; nkuko umwe muri bo utifuje ko izina rye ritangazwa, aboisobanura.

Agira ati “Ntabwo mbyumva ko muri Musanze twaza ku isonga muri ibyo bibi kuko mbona tumaze kuba bamwe”.

Abaturage b’i Musanze basabwe guhuza indamukanyo yabo n’ingiro

Umuyobozi w’akarere ka Musanze, Musabyimana Jean Claude we ntahakana ko mu baturage ayoboye harimo bamwe bagifite ingangabitekerezo ya Jenoside n’ibindi bikorwa bibi biyishamikiyeho. Avuga ko batangiye urugamba rwo kuyirwanya.

Agira ati “Dufatanye mu kuyirandura kuko ikojeje isoni buri wese wo muri Musanze”.

Ibipimo by’ubumwe n’ubwiyunge bigaragaza ko mu myaka iri hagati ya 2005 na 2008 muri Musanze bari ku isonga mu kurwanya ingengabitekerezo ya Jenoside kurusha ahandi.

Minisitiri Kaboneka akangurira abaturage bo muri Musanze gucika ku muco mubi w’ubuharike

Tariki 30 Nzeli 2016 ubwo Minisitiri Kaboneka yifatanyaga n’abaturage b’umurenge wa Gacaca mu karere ka Musanze, mu gutangiza igihembwe cya mbere cy’ihinga cya 2016/2017, yaganiriye nabo bamugezaho ibibazo ndetse n’ibyifuzo.

Minisitiri Kaboneka yatangajwe no kubona ko mu bibazo 10 byamugejejweho, hari higanjemo iby’ibuharike bukowa na bamwe mu bagabo bashakira abagore ku bandi, n’abakobwa bijyana ku bagabo ngo babagire abagore hatubahirijwe amategeko.

Agira ati “Ishusho rusange nkuye mu karere ka Musanze ni iy’umuco mubi w’ubuharike no kwishyingira. Abakobwa barishyingira bagerayo bagasanga abandi bagore hanyuma n’abagabo bashuka abakobwa”.

Yakomeje ahanura abanyamusanze abasaba kureka uwo muco mubi, ubateza ibibazo mu miryango.

Yabwiye ababa bafite umutima wo kujya mu buharike, kubireka. Ahubwo asaba abagabo kubana n’umugore bashhakanye mu buryo byemewe n’amategeko, hirindwa ko amategeko yabibahanira.

Ati “Burya iyo umugabo aharitse umugore we aba yishe amategeko kandi arabihanira”.

Bamwe bisobanuye ku kibazo cy’ubuharike nyuma yo kugishinjwa n’abagore babo

Ababyeyi basabwe uruhare rwabo mu kurushaho kwigisha abana babo cyane cyane ab’abakobwa. Kugira ngo bareke umuco mubi wo kwishyira abagabo ngo babagire abagore.

Nta mubare nyawo uzwi w’imiryango yo muri Musanze igaragaramo ubuharike. Gusa ariko abaturage bagaragaza ko ihari ko ndetse bene iyo miryango ibayeho nabi. Ngo ihora mu ntonganya, abana bakahagorerwa.

Nsekanabo Théogene, utuye mu murenge wa Gacaca, atangaza ko nta cyiza cy’ubuharike usibye guteza amakimbirane mu muryango.

Agira ati “Ubuharike buteza amakimbirane mu miryango bugatuma abana bavutse bandagara bakaba ibirara kuko baba batitaweho n’iwabo”.

Abaturage b’Umurenge wa Gacaca banakanguriwe gahunda yo kuboneza urubyaro birinda kubyara abo badashoboye kurera.

Peacemaker Mbungiramihigo akebura ibitangazamakuru kudaha urubuga abafite ibyo bapfa ngo basebanye

Mbungiramihigo avuga ko hari igihe ibyo bitangazamakuru bigwa mu mutego, bigatambutsa ibitekerezo by’abasomyi b’inkuru runaka, bitabanje kubigenzura. Ibyo ngo ntibikwiye kuko ibitekerezo bya bamwe muri abo basomyi biba ari ibihuha, birimo n’urwango.

Agira ati “Birumvikana ko abantu bagomba kwisanzura bagatanga ibitekerezo, bakavuga ibyo bashaka ariko na none kwisanzura ntibivuga gutukana, gusebanya cyangwa gutangaza ibihuha”.

Akomeza avuga ko ubusanzwe inkuru itambuka habayeho kubanza kuyijora (Kuyisuzuma), ababishinzwe bagahitamo igikwiye kiri hagati yo kuyireka cyangwa kuyitambutsa.

Tariki ya 23 Nzeli 2016, ubwo Mbungiramihigo yafunguraga amahugurwa y’iminsi itandatu yagenewe abanyamakuru b’ibitangazamakuru byandikira kuri interineri, yabasabye kujya bakora ubungenzuzi kugira ngo hatabaho gutambutsa ibitekerezo by’amasomyi b’inkuru bafite ibyo bapfa hagati yabo.

Abanyamakuru bahamya ko ayo mahugurwa bari guhabwa azabungura ubumenyi

Ayo mahugurwa yitabiriwe n’abanyamakuru bagera kuri 30. Agamije kubongerera ubumenyi mu bijyanye n’imikoreshereze y’imbuga nkoranyambaga ndetse no kubafasha kugira ubumenyi bw’ibanze ku ikorwa ry’imbuga za interineti. Ari kubera mu mujyi wa Musanze.

Abanyamakuru bitabiriye ayo mahugurwa bahamya ko bazayungukiramo byinshi batari bazi bizabongerera ubumenyi; nkuko Umurengezi Regis, umunyamakuru wa Izuba Rirashe abisobanura.

Yagize ati “Hari byinshi ndimo kunguka kuko ikoranabuhanga ni ibintu bihora bihinduka niyo mpamvu umuntu ahugurwa kugira ngo ajyane n’igihe”.

Urwego rw’inama nkuru y’itangazamakuru mu Rwanda (MHC) rwateguye ayo mahugurwa ku nkunga y’ishami ry’umuryango w’abibumbye rishinzwe iterambere (UNDP).

Bavuga ko gukoresha amagare bihendutse, kurusha ubundi buryo bwose bwakoreshwa mu ngendo, z’urujya n’uruza mu mujyi wa Musanze.

Bigendera ku magare kuko ahenduka ugereranyije n’amamodoka

Twahirwa Yves ukorera muri mujyi, avuga ko mu myaka ibiri ishize aribwo yatangiye gukoresha igare, nyuma yo kubona ko ahendwa cyane n’ingendo.

Agira ati “ Urugendo rwose ukoze uko rwaba rungana kuri moto wishyura amafaranga 300. Ntaragura igare nishyuraga agera ku 1200 ku munsi.
Ngaho nawe bara amafaranga nakoreshaga mu gihe cy’ukwezi, wumve ukuntu yari menshi ”.

Kujya ku kazi no kuvayo hifashishwa igare urugendo rukoroha

Mugenzi we wavuze ko yitwa Ally, nawe yunzemo avuga ko gukoresha igare mu mujyi wa Musanze bihendutse, kandi byoroshya ingendo, ku buryo burambye.

Ati “Igare ryiza rigura nibura amafaranga atari munsi y’ibihumbi 100, ariko rigakemura ibibazo by’ingendo zo mu Mujyi ku buryo bwa burundu”.

Amwe mu magare agezweho mu mujyi wa Musanze

Abadafite ubushobozi bwo kugura igare rigezweho, Ally avuga ko bahitamo gutega abanyonzi, cyangwa se bakayakodesha.

Amagare agezweho akoreshwa mu ngendo mu mujyi wa Musanze, atumizwa mu gihugu cya Uganda nk’uko bamwe mu bayacuruza babivuga.

Prof. Nshuti Manasseh washinze Kaminuza ya Kigali, yavuze ko umuntu wize agomba kugira umuco, bitaba ibyo akaba ntacyo yubakiyeho.

Prof Nshuti Manasseh yasabye abanyeshuri bashya kujyanisha Ubumenyi n’umuco

Yabivuze ku mugoroba wo kuri uyu wa Kabiri tariki 20 Nzeli 2016, ubwo Kaminuza ya Kigali ishami rya Musanze, yakiraga abanyeshuri bashya 120.

Aba banyeshuri baje kwiga muri iyi kaminuza, mu mwaka w’amashuri wa 2016/2017.

Uyu mugabo ufite ubunararibonye mu myigishirize ya za Kaminuza, yababwiye ko umuco ugomba kubaranga mu gihe bakiri ku ntebe y’ishuri, ndetse n’igihe bazaba barangije kwiga.

Yagize ati “Umuntu wize udafite umuco, ntacyo yaba yubakiyeho kuko byombi biruzuzanya .

Ntabwo kimwe cyabaho ngo ikindi kibure, ngo umuntu azagire icyo ageraho mu buzima”.

Prof Nshuti Manasseh yabwiye abo banyeshuri ko kwiga cyane ndetse no kwiga mu mahanga, bidakwiye gutuma bata umuco.

Ati “ Nize mu mahanga ariko ibyo ntibyatumye ntakaza umuco w’igihugu cyanjye. N’ aba banyamahanga mubona bari mu Rwanda, ntabwo basubira iwabo baratakaje uwabo”.

Bamwe mu banyeshuri bakiriwe muri Kaminuza ya Kigali ishami rya Musanze

Bamwe mu banyeshuri bakiriwe muri iyi Kaminuza , bishimiye ko ibazaniye impinduka n’ubumenyi, bizabafasha kwigirira akamaro ndetse bakakagirira igihugu.

Umukundwa Jessica ubahagarariye yagize ati “Iyi Kaminuza izanye byinshi twaridukeneye kugira ngo dufatanye n’abandi mu kubaka igihugu”.

Iyi Kaminuza ifite icyiciro cya kabiri cya kaminuza mu icungamutungo, izajya yongeraho amasomo afasha abacungamutungo, kuba abanyamwuga bemewe ku rwego rw’isi.
Ku mpamya bumenyi isoza icyiciro cya kabiri cya kaminuza mu icungamutungo, bazajya bongererwaho indi yitwa Certified Public Accountant, igaragaza ubunyamvuga mu icungamutungo.

Kaminuza ya Kigali ishami rya Musanze, ifite abanyeshuri 598 bashaka impamyabushobozi z’icyiciro cya kabiri n’icya gatatu cya kaminuza mu mashami anyuranye .

Muri ayo mashami harimo icungamutungo, ubushabitsi, ikoranabuhanga n’ibindi bikenewe ku isoko ry’umurimo.

Umuturage yafatanywe intwaro za gisirikare mu rugo iwe

Aya makuru yemejwe n’umuvugizi wa polisi y’igihugu mu ntara y’Amajyaruguru akaba n’umugenzacyaha muri iyi Ntara IP Innocent Gasasira.

Avuga ko polisi y’Igihugu yahafatiye Nzabihimana, igisasu cya gerenade hamwe n’icyuma cya gisirikare (Bayonet) bibitse iwe, kuri uyu wa 20 Nzeli 2016.

Yagize ati “Nibyo koko uriya mugabo iwe hafatiwe gerenade ariko amakuru yatanzwe n’umugore we kugira ngo bimenyekane”.

Ubuyobozi bwa Polisi buvuga ko umugore wa Nzabihimana yatanze amakuru nyuma y’amakimbirane bombi bari bagiranye mu rugo rwabo.

IP Gasasira avuga ko uwo mugabo yahise atabwa muri yombi ubu akaba afungiye kuri station ya polisi ya Muhoza, aho akomeje gukorwaho iperereza.

Ati “Polisi y’igihugu ibisubiramo kenshi ko gutunga imbunda mu buryo butemewe n’amategeko bihanirwa niyo mpamvu yahise atabwa muri yombi akaba akurikiranwe n’ubugenzacyaha”.

Mu izina rya polisi y’Igihugu, IP Innocent Gasasira yibukije abantu bose batunze intwaro mu buryo butemewe n’amategeko kuzisubiza, bitaba ibyo bazifatanwa bakabihanirwa hakurikijwe amategeko.

Ingingo ya 671 mu mategeko ahana y’u Rwanda, ivuga ko umuntu wese utunga intwaro, uyitiza, uyitanga, uhindura ibimenyetso byayo mu buryo ubwo ari bwo bwose, abihanirwa.

Ahanishwa igifungo kuva ku mezi atandatu kugeza ku mwaka umwe, n’ihazabu y’amafaranga y’u Rwanda, kuva ku bihumbi 300frw kugeza kuri miliyoni eshatu, cyangwa kimwe gusa muri ibyo bihano.

Abanyamuryango ba "Duhaguruke/Kora" baravuga komite yabo yanyereje umutungo

Uwizeyimana Solange wari uyoboye ubugenzuzi bw’umutungo avuga ko icyo gihombo cyatewe na komite nyobozi iyobowe na Munyarubibi Leonard, perezida akaba n’ubahagarariye imbere y’amategeko.

Uwizeyimana yagize ati :“Twabanje guhangana kugira ngo ubugenzuzi bw’umutungo bukorwe aho bukorewe twatunguwe no gusanga miliyoni zisaga 30 zararigishijwe na komite nyobozi kuko yakoraga ibyo ishatse itagishije inama abanyamuryango”.

Impaka zikomeye zavutse hagati y’ubuyobozi bw’iyi mpuzamakoperative na bamwe mu banyamuryango mu nama rusange y’ubugenzuzi bw’umutungo yabaye kuri uyu wa 20 Nzeli 2016.

Benshi mu banyamuryango bemeranya n’ibyo raporo yagaragaje muri iyi nama.

Munyarubibi Leonard na komite ayoboye, bamaganye ibiyivugwamo ndetse bavuga ko ntacyo bishinja, uwashaka yazarega aho ashaka hose abagize komite bakazisobanura.

Munyarubibi ati :“Nta bwoba mfite bwo kuba nakurikiranwa mu nkiko kuko ibyo nakoze byose nabikoze mbigiyeho inama n’abari bahagarariye koperative, rero niba ntacyo bagiye batangariza bagenzi babo ibyo si amakosa yanjye”.

Munyarubibi ushinjwa gukoresha umutungo w’abanyamuryango uko yishakiye, avuga ko icyo azira ari impinduka yashatse kubazanira ahubwo bakayigomekaho.

Ati “Impinduka yose iravuna nicyo kibazo cyabaye, naho ibyo kurigisa umutungo ntabwo ari byo usibye gushaka kumparabika”.

Ubwo izi mpaka zabaga, umukozi w’ikigo cy’igihugu gishinzwe amakoperative, Emmanuel Kayigamba yari ahari, abizeza ko bagiye gushakira umuti, umwanzuro ukazatangazwa kuwa 27 Nzeli 2017.

Kayigamba Emmanuel umukozi wa RCA yijeje abanyamuryango ba "Duhaguruka/ Kora" gukemura ibibazo byabo

Uwamahoro Latifah wabaye umunyamabanga mukuru wa FERWAFA

Yemejwe n’ inteko rusange idasanzwe ya FERWAFA, yateraniye muri Hotel la Palme i Musanze, kuva tariki 17 kugeza 18 Nzeli 2016.

Yashyizweho asimbura Mulindahabi Olivier wahoze muri uwo mwanya, akaza kuvaho akatiwe igifungo cy’amezi atandatu n’ urukiko rw’ibanze rwa Nyarugunga.

Yakatiwe nyuma yo guhamwa n’ icyaha cyo gufata icyemezo gishingiye ku itonesha, ubucuti n’icyenewabo, mu itangwa ry’isoko ryo kubaka Hoteli ya FERWAFA.

Murindahabi wasimbuwe nyuma yo gukatirwa igifungo cy’amezi atandatu

Nzamwita Vincent Degaule uyobora FERWAFA, yavuze ko uyu munyamabanga yarambagijwe akabonwamo ubushobozi bwo kuyobora, agatoranywa nta piganwa.

Yagize ati “ Amategeko tugenderaho, avuga ko uyu mwanya ushobora gupiganirwa igihe abantu bafite umwanya wo kujonjora, bagatanga ibizami, utsinze agahabwa uyu mwanya.”

Avuga kandi ko ayo mategeko yemerera komite nyobozi gukora ubushakashatsi bwayo, igahitamo ushobora gufata uyu mwanya hatabayeho ipiganwa, akemezwa mu nteko rusange.

Umuyobozi wa FERWAFA, anavuga ko Uwamahoro bamuhisemo, bashingiye ku buhanga bamuziho mu micungire y’abantu n’ibintu (Management), kandi afite n’ icyo azi ku mupira w’amaguru.

Ati “Mu biganiro twagiranye, yatubwiye ko yigeze gukina umupira w’amaguru yiga mu mashuri abanza”.

Nzamwita Vincent Degaule uyobora FERWAFA

Uwamahoro azakorerwa isuzumwa mu kazi ry’ igihe kingana n’amezi atandatu, nyuma ahabwe amasezerano y’akazi asanzwe.

Abagore 300 bari abazunguzayi bemerewe inkunga ya miliyoni 6

Iyi nkunga bahawe n’Akarere ka Musanze, iyo nkunga ikaba ije nyuma y’igihe gito akarere gashakiye abo bagore aho gukorera mu rwego rwo kubafasha kwivana mu bukene.

Umuyobozi w’karere wungirije ushinzwe ubukungu n’iterambere muri aka karere Habyirimana Damascène abashishikariza gukorera hamwe, kugira ngo bizabagirire akamaro.

Yagize ati “ Ubwo akarere kabanje kubashakira aho gukorera ubu mukaba mutewe inkunga, igisigaye ni ukurushaho gukorera hamwe ubundi mugahindura imibereho, mugana mu iterambere ryanyu bwite, ndetse n’iry’igihugu muri rusange”.

Umuyobozi w’akarere yavuze ko abo bagore bahagaritse ubucuruzi bwo ku muhanda babikesha iyo nkunga.

Ati “Uburyo bwo kwirirwa muzenguruka mu mihanda ari nako mukwepana n’abashinzwe umutekano, nta kamaro ahubwo ibyiza ni uko mwakwishyira hamwe, Leta ikagira aho ibasanga hazwi ikanabafasha”.

Aba bagore bamaze umwaka baretse ubucuruzi bwo mu muhanda, bishyize hamwe batangira gucuruza ibiribwa birimo imboga n’imbuto.

Mukamuganga Seraphine, umukuru w’impuzamashyirahamwe bibumbiyemo avuga ko ashimira cyane Leta yabatekerejeho ikabatera inkunga.

Mukamuganga asaba bagenzi be kurangwa n’ubunyangamugayo kugira ngo bazashobore kubyaza inyungu inkunga batewe n’Akarere ka Musanze.

Ati “Akarere kaduhurije hamwe nyuma duhabwa aho gukorera bidatinze duhawe inkunga, ubu tugiye gukora twiteze imbere kandi nta bibazo dufitanye n’ubuyobozi kuko gukorera mu kajagari nibyo byari ikibazo hagati yacu n’ubuyobozi”.

Aba bagore 300, bahamya ko amafaranga bemerewe azahindura imibereho yabo, kuko ubucuruzi bwo mu muhanda ntacyo bwari bwarabagejejeho.

Nyuma yo kwishyira hamwe nabwo bavuga ko bitari byoroshye, kuko amikoro yari macye, ariko ubu bizeye kuzamuka kubera inkunga bemerewe.

N’ubwo igihe ntarengwa cyo gushyikirizwa aya mafaranga kitatangajwe, ubuyobozi buvuga ko ari iminsi minsi ya vuba.

Umuyobozi w’Akarere ka Musanze asobanura impamvu akarere ayoboye kabaye akanyuma mu mihigo

Yabitangarije mu nama yabaye tariki ya 14 Nzeli 2016, yahuje ubuyobozi bw’ako karere n’abaturage bagatuye.

Agira ati “Biteye isoni kubona abashyitsi bava mu mahanga bagera muri Musanze berekeza mu Kinigi baje gusura ingagi ariko bakagenda bahura n’abana barwaye amavunja”.

Uyu muyobozi w’Akarere ka Musanze yakomeje avuga ko hari imirenge imwe n’imwe y’akarere usanga abantu babyukira mu mirimo ariko bakibagirwa isuku ku mubiri no ku myambaro.

Ati “Ikibazo cy’isuku idahagije kiri mu byatumye Akarere ka Musanze kaza ku mwanya w’inyuma mu mihigo ariko bigomba guhagurukirwa buri muturage wese abigizemo uruhare”.

Indi mpamvu yatanzwe na Musabyimana, yatumye baza inyuma mu mu turere 30 tugize u Rwanda, ni imitangire mibi ya muri serivisi.

Gusa ariko uyu muyobozi yijeje abaturage ko bagiye gushakira umuti ibibazo byose byatumye akarere kaza ku mwanya wa nyuma mu mihigo y’uturere tw’Igihugu.

Bamwe mu baturage bo mu Karere ka Musanze batangajeko batatunguwe n’uwo mwanya akarere kabo kabonye mu mihigo.

Bamwe mu baturage bo muri Musanze ngo ntibatunguwe n’umwanya akarere kabo kajeho mu mihigo

Umwe muri bo yagize ati “Imitangire ya servisi duhabwa iyo tugeze ku biro by’imirenge imwe n’imwe ndetse no ku biro by’akarere ubwako usanga bakiri ba bayobozi basiragiza abaturage kandi nta mpamvu”

Iyi Twegerane yahiye irakongoka

Kuri uyu wa kabiri tariki ya 13 Nzeli 2016, mu ma saa saba za kumanywa, nibwo iyi modoka itwara abagenzi, yo mu bwoko bwa “Hiace”, yahiye. Abantu batandukanye bahise bahurura, bajya kureba ibibaye.

Abantu bari benshi bareba ibibaye

Nta muntu wahiriye muri iyo modoka nta n’uwo yakomerekeje. Abakora mu igaraji yahiriyemo, bavuga ko barimo bayikora ngo bayijyane muri “Controle Techinique”. Mu kuyikora ngo habayemo “circuit” ako kanya ihita ishya.

Polisi y’igihugu yahise itabara, izimya uwo muriro

Abo bakozi bahise batangira kuyizimya ariko umuriro ubarusha ingufu . Polisi y’igihugu yahise ibatabara ihosha uwo muriro, irawuzimya; nkuko Nigisubizo Richard, umwe mu bakozi b’iryo garaji abisobanura.

Agize ati "Ni ikibazo cyabaye mu nsiga cyateje “circuit” kuko ntabwo ari umuntu wayitwitse abishaka ariko ku bw’amahirwe nta muntu wahiye cyangwa ngo akomereke.

Turabishimira Polisi kuko iyo idatabara bwangu hari izindi modoka zari gushya cyangwa uwo muriro ugafata izindi nyubako nazo zigashya bigateza akaga”.

Harerimana Abdou, umuyobozi w’iryo garaje ryahiriyemo iyo modoka, avuga ko bigoye kwemeza icyateye iyo nkongi y’umuriro kuko ngo mu gihe iyo modoka yashyaga atari ahari nawe yaje bamuhuruje.

Ati “Ntabwo navuga ibyabaye ntahari kuko icyo gihe naba nigereranyije n’Imana ibera hose icyarimwe”.

Sekivange Emmanuel, umushoferi w’iyo modoka, yirinze kugira icyo atangaza kubera uburyo byagaragaraga ko yananiwe kwakira ibyamubayeho.

Iyo “ Twegerane” yakoraga mu muhanda Musanze-Rubavu

Muri iki gipangu bibyemo bamanukiye ku rwego

Mu rukerera rwo ku itariki ya 12 Nzeli 2016 nibwo abajura bateye mu Kagari ka Ruhengeri. Bateye ubwoba abaturage, batangaza ko bakutse imitima nyuma yo kubona uburyo bibye urugo ku rundi; nkuko Ndagijimana Jean Paul abisobanura.

Agira ati “Ubujura nk’ubu bwakorewe mu rugo rw’umuturanyi wacu mu gihe yari yatashye muri week-end gusura umuryango we twe buduteye impungenge kuko hari hashinze imyaka itatu twifitiye amahoro umuntu aryama ntagire icyo yikanga”.

Uyu Ndagijimana akomeza avuga ko bishoboka ko abantu baba bamaze kwirara kubera igihe cyari gishize batibwa.

Ati “Urebye ahantu hose bibye ni ku muhanda wa kaburimbo kuba rero abo bajura bibye ntibafatwe biragaragara ko abarara irondo bamaze kudohoka mu gucunga umutekano ku buryo n’undi mugizi wa nabi wese ashobora kubaca mu rihumye akazambya ibintu”.

Umugore, utifuje ko amazina ye atangazwa, we avuga ko amafaranga basabwa y’irondo baba bayatangira ubusa mu gihe ryaba ryaradohotse kugeza aho abajura biba ariko ntihagire ubakoma mu nkokora.

Abo bajura bibye abaturage ibikoresho bitandukanye birimo amasafuriya, amasahane, n’imifariso.

Mu myaka itatu ishize hari aho abajura batoboraga amazu mu mujyi wa Musanze

Umunyamabanga Nshingwabikorwa w’umurenge wa Muhoza, Sebashotsi Jean Paul avuga ko irondo ritigeze ridohoka ahubwo abo bajura babaciye mu rihumye.

Sebashitsi yahumurije abatuye mu murenge wa Muhoza kudakangaranwa n’ubwo bujura ahubwo abasaba kurushaho gufatanya mu gucunga umutekano bakanatangira amakuru ku gihe.

Agira ati “Iki kibazo cy’ubujura tugiye kugihagurikira kuko nticyari gisanzwe ariko n’abaturage babidufashemo nabo mu kwirindira umutekano”.

Muri aka gace k’umujyi wa Musanze ahazwi nko kuri Nyamagumba ubu bujura buciye icyuho bwabereye ngo bwaherukaga kuba mu myaka itatu ishize.

Afunzwe azira amagambo yavuze

Nsabuwiteka wo mu murenge wa Busogo i Musanze, yatawe muri yombi tariki ya 08 Nzeli 2016. Yari ku murongo hamwe n’abandi baturage yisobanura imbere ya Visi Perezida w’Umutwe w’Abadepite mu Nteko Nshinga Amategeko y’u Rwanda, Jeanne d’Arc Uwimanimpaye.

Intandaro y’ifatwa n’ifungwa rya Nsabuwiteka yabaye amagambo arimo ikinyabupfura gike yasubije Visi Perezida w’Umutwe w’Abadepite mu gihe yari imbere ye. Yisobanura ku kirego umugore we yari amaze kugaragaza cyuko amatungo yo mu rugo rwabo ayagurisha atabimumenyesheje.

Visi Perezida w’Umutwe w’Abadepite atanga inama kuri uwo mugabo, yamubwiye ko umugabo n’umugore bagomba kuzuzanya umwe muri bo ntagire icyo akora atakimenyesheje mugenzi we.

Umugabo mu gusubiza Visi Perezida w’Umutwe w’Abadepite yamwutse inabi agira ati “Are weee! Barakubeshye!!” Akurikizaho n’andi magambo y’ikinyabupfura gike yahise amuviramo gutabwa muri yombi.

Umunyamabanga Nshingwabikorwa w’umurenge wa Busogo, Twagirimana Edouard yatangarije Kigali Today ko Nsabuwiteka yahise afatwa akaba afungiye kuri Sitasiyo ya Polisi ya Busogo.

Agira ati “Uriya mugabo yahise afatwa arafungwa inzego zibishinzwe zifite ibyaha zimukurikiranyeho, akaba agomba kwisobanura”.

Abaturage bo mu murenge wa Busogo ubwo bari mu biganiro n’Abadepite

Ingingo ya 539 mu gitabo cy’amategeko ahana ibyaha mu Rwanda, ivuga ko umuntu wese ukoza isoni mu magambo umwe mu bagize Inteko Ishinga Amategeko mu gihe akora umurimo yatorewe cyangwa biturutse kuri uwo murimo ahanishwa igifungo kuva mwaka umwe kugeza ku myaka ibiri .

Hiyongeraho n’ihazabu y’amafaranga y’u Rwanda kuva ku bihumbi mirongo itanu, kugeza ku bihumbi magana atanu cyangwa kimwe gusa muri ibyo bihano.

Iyo ngingo ikomeza ivuga ko niba gukoza isoni byabereye mu nama y’Inteko Ishinga Amategeko cyangwa byakorewe umwe mu bayobozi bakuru b’Igihugu, ibihano biteganyijwe mu gika cya mbere cy’iyi ngingo byikuba kabiri.

Eric Serubibi wari uhagarariye RHA asobanura ibyiza byo kuzifashisha ikoranabuhanga mu itanga ry’impushya zo kubaka

Byatangarijwe mu mujyi wa Musanze, tariki ya tariki 06 Nzeli 2016, mu muhango wo gutangiza ku mugaragaro iryo koranabuhanga, hagendewe ku bishushanyo mbonera by’imijyi yunganira umujyi wa Kigali. Uyu muhango wateguwe n’ikigo cy’igihugu gishinzwe imiturire (RHA) ku nkunga ya Banki y’Isi.

Eric Serubibi, wari uhagarariye ubuyobozi bw’ikigo cy’Igihugu gishinzwe imiturire yavuze ko kwifashisha ubu buryo bushya bw’ikoranabuhanga mu itangwa ry’impushya zo kubaka bizakemura ikibazo cy’imikorere yari isanzweho aho byafataga igihe kinini ndetse bigatuma na bamwe mu baturage babyinubira.

Yagize ati “Kwifashisha ikoranabuhanga byoroshya ubuzima bwa buri munsi bw’abantu niyo mpamvu mu itangwa ry’impushya zo kubaka naho ritibagiranye”.

Imwe mu mujyi yunganira umujyi wa Kigali mu Rwanda izakoreshwamo iri koranabuhanga irimo umujyi wa Musanze, Rubavu, Muhanga, Huye, Rusizi na Nyagatare yari inahagarariwe muri uyu muhango.

Muhutangabo Joseph, umuyobozi w’ibiro bishinzwe ubutaka mu karere ka Musanze ari naho uyu muhango wabereye ku rwego rw’Igihugu atangaza ko gukoresha ikoranabuhanga mu gutanga impushya zo kubaka bizagabanya urujya n’uruza rw’abaturage bakoraga ingendo bajya aho ibyo biro bikorera.

Ati “Iri koranabuhanga rizajya ryifashisha interneti ndetse aho iri mu mujyi abayicuruza nabo bazahugurwa ku mikoreshejeze yaryo ku buryo umuturage bazajya babimufashamo”.

Umunyamabanga uhoraho muri Minisiteri y’Ibikorwa Remezo Christian Rwankunda yahumurije abaturage muri rusange ababwira ko mu ikoreshwa ry’iri koranabuhanga harimo inyungu nyinshi mu bijyanye na serivisi inoze kandi yihuse.

Abayobozi batandukanye bitabiriye uwo muhango

Iri koranabuhanga mu itangwa ry’impushya zo kubaka ryahereye mu mujyi wa Kigali mbere y’uko rigezwa mu mijyi itandatu ishyirwa ku mwanya wa kabiri mu gihugu ikaba ari nayo iwunganira.

Mu mujyi wa Kigali aho iri koranabuhanga ryahereye, ryorohereje abashoramari b’inyubako zitandukanye mu kuba babasha kubona mu gihe kitarenze ukwezi ibyangombwa byo kubaka bari bakeneye nk’uko byatanzwemo ubuhamya.

Uyu musore w’imyaka 31 y’amavuko, ubu afungiye kuri station ya polisi ya Muhoza mu karere ka Musanze .

Atangaza ko urwo rumogi yafatanywe, yari aruvanye mu gihugu cy’abaturanyi cya Uganda.

Urumogi na Kanyanga byafatanywe ukwekwaho kuba Umurembetsi

Mu kiganiro na Kigali Today, uyu musore yasobanuye ko uwo mutwe w’Abarembetsi akekwa kubamo, ariwo ukwirakwiza ibiyobyabwenge by’urumogi na Kanyanga, biturutse muri Uganda. Anavuga ko we ari ubwa mbere yari atangiye gukorana n’ Abarembetsi.

Yagize ati " Ndicuza nkanasaba imbabazi ko ntazasubira. Ibi nabyinjiyemo nizezwa inyungu nyinshi none birangiye mbikurijemo kujya muri gereza”.

Avuga kandi ko nyuma y’uko atawe muri yombi, ahamagarira bagenzi be bari bahuriye muri ubwo bucuruzi kubireka, bakajya mu yindi mishinga ibyara inyugu.

IP Innocent Gasasira, umuvugizi wa polisi y’Igihugu mu Ntara y’Amajyaruguru, yavuze ko uyu musore akurikiranyweho icyaha cyo gukwirakwiza ibiyobyabwenge, gihanwa n’igitabo cy’amategeko ahana ibyaha mu Rwanda.

Ati “Polisi y’Igihugu nta na rimwe izihanganira umuntu uwo ariwe wese ukwirakwiza ibiyobyabwenge.

yaba umwe cyangwa benshi, bazajya batabwa muri yombi babihanirwe nk’uko amategeko abiteganya”.

Umuntu wese winjiza, ugurisha mu gihugu ibiyobyabwenge n’urusobe rw’imiti ikoreshwa nka byo mu buryo bunyuranije n’amategeko, ahanishwa igifungo kuva ku myaka itatu kugeza ku myaka itanu .

Kuri iki gihano hiyongeraho ihazabu y’ amafaranga ava ku bihumbi 500, kugeza kuri miliyoni eshanu , nk’uko ingingo ya 594 yo mu gitabo cy’amategeko ahana ibyaha mu Rwanda ibiteganya.

Yicishijwe inkoni akekwaho kwiba amashu mu murima.

Muberwa w’imyaka 59, wakomokaga mu Karere ka Nyamagabe, yari amaze iminsi acumbitse muri uyu murenge, ari na ho yaguye ahagana mu ma saa cyenda z’ijoro ryo kuri uyu wa kabiri tariki 9 Kanama 2016.

Muganamfura Sylvestre, Umunyamabanga Nshingwabikorwa w’Umurenge wa Mukingo, yatangarije Kigali Today ko uwo mugabo yakubiswe n’abaturage bari baraye mu murima w’amashu bayarinda abajura.

Yagize ati “Hari umugabo wari urariye umurima w’amashu ye kuko bajyaga bayiba, yafatiye uwo mugabo wishwe mu murima we aramukubita, nyuma ukekwaho ko yari umujura biza kumuviramo urupfu.”

Muganamfura yavuze ko abakekwaho icyaha cyo kwica umwe muri bo yafashwe ashyikirizwa Polisi y’Igihugu ikorera mu Karere ka Nyanza, mu gihe undi watorotse agikurikiranwa.

Yaboneyeho no kwamagana icyo gikorwa cyo kwihanira, avuga ko ibikowa nk’ibyo bidakwiye mu Rwanda. Asobanura ko ufashwe yiba cyangwa akora ikindi cyaha akurikiranwa na Polisi.

Ingingo ya 151 mu gitabo cy’amategeko ahana ibyaha mu Rwanda, ivuga ko iyo gukubita cyangwa gukomeretsa umuntu byateye urupfu uwakoze icyaha ahanishwa igifungo kuva ku myaka icumi kugeza ku myaka cumi n’itanu.

Iyo ngingo ikomeza ivuga ko uwakoze urwo rugomo yabigambiriye cyangwa yabanje gutega igico ahanishwa igifungo cya burundu.

Kubera ubujura bw’inka bumaze gufata indi ntera muri Nyagisozi bakajije irondo.

Umunyamabanga Nshingwabikorwa w’Umurenge wa Nyagisozi, Nsengiyumva Alfred, avuga ko ashima ubufatanye bwaranze ubuyobozi n’abaturage batuye muri uwo murenge mu gushakisha inka zari zibwe mu bihe bitandukanye zigafatwa ndetse zigasubizwa ba nyirazo ku mugaragaro.

Agira ati “Nshimira abaturage ko mu gihe hibwa ziriya nka barushijeho gukaza amarondo no gukomeza gukurikirana irengero ryazo babifashijwemo n’ubuyobozi bw’umurenge”.

Akomeza agira ati “Abaturage ubu basigaye barara irondo bafite terefoni ihamagarwa ku buntu. Ibyo bidufasha guhanahana amakuru ndetse n’igihe ubuyobozi bubasuye bikoroha kuko buba buzi neza aho baherereye”.

Avuga ko kuva iyo terefoni yatangira gukoreshwa byatumye uburyo bwo guhanahana amakuru bworoha ngo kuko ikintu kibaye gihita kimenyekana ubuyobozi bukagikurikirana.

Nsengiyumva asobanura ko inka zose abajura bagerageje kwiba muri uwo murenge zafashwe ndetse ubu zikaba zaramaze gusubizwa ba nyira zo.

Uwitwa Habimana Félix utuye mu Mudugudu wa Mwokora, Akagari ka Kabuga mu Murenge wa Nyagisozi ni umwe mu baturage bari bibwe inka nyuma ikaza gufatwa akayisubizwa.
Agira ati “Ndashimira abaturage n’ubuyobozi ko bwatubaye hafi bigatuma inka yanjye yibwe mbasha kuyisubirana”.

Uyu mworozi kimwe n’abagenzi be bari bibwe inka mu minsi mike ishize mu Murenge wa Nyagisozi ariko nyuma zigafatwa bakazisubirana, na we ashimira ubufatanye bukomeje kuranga abaturage n’ubuyobozi bw’umurenge wabo mu gukumira ubujura bicungira umutekano wabo muri rusange.

Babiri mu bafatanwe izo nka bazibye bari baturutse mu Karere ka Nyamagabe gahana imbibi n’Umurenge wa Nyagisozi mu kKrere ka Nyanza, nk’uko Nsengiyumva Alfred, umuyobozi y’uyu murenge abivuga.

Iyo nkongi y’umuriro yabaye ku wa 05 Kanama 2016 itwika ishyamba rya Leta n’iry’abaturage ku buso bwa hegitari 15 ariko ku bw’amahirwe uwo muriro urazima.

Musabye Emmanuel, ushinzwe Imari n’Ubutegetsi mu Murenge wa Rwabicuma akaba yasigariyeho Umunyamabanga Nshingwabikorwa w’uyu murenge utari uhari, avuga ko iyo mpanuka yabaye ubwo uwo murwayi wo mu mutwe yotsa ibijumba.

Yagize ati “Uwo mugabo yari yaragiye mu Bitaro bya Ndera bivura abarwayi bo mu mutwe aracika, aragaruka. Ubwo yotsaga ibijumba, inkongi y’umuriro yafashe ishyamba ry’abaturage uko umuriro wagiye wiyongera n’ishyamba rya Leta ryari hafi aho.”

Uyu muyobozi yibukije abaturage muri rusange ko bagomba gukomeza kwitwararika muri iki gihe cy’impeshyi bakirinda gucana umuriro ushobora kuba intandaro yo gutwika, cyane cyane nk’aho baba batwika amakara.

Muri uyu murenge wa Rwabicuma mu Karere ka Nyanza, hari hashize iminsi mike na bwo hatwitswe ubuso bwa hegitari zigera kuri 60 z’ishyamba biturutse ku muriro wakongerejwe mu murenge bahana imbibi wa Mukingo mu Karere ka Nyanza.

Minisitiri Uwacu hamwe n’abandi bayobozi barimo Minisitiri Kanimba na Minisitiri Musoni baha abana amata.

Umuganura wizihirijwe i Nyanza ku rwego rw’igihugu mu muhango wabereye kuri Stade y’Akarere ka Nyanza kuri uyu wa gatanu tariki 5 Kanama 2016.

Minisitiri w’Umuco na Siporo, Uwacu Julienne wari umushyitsi mukuru mu birori byo kwizihiza Umuganura, yavuze ko ari umunsi ukomeye kandi w’amateka mu Rwanda.

Minisitiri Uwacu avuga ko Umuganura ari ikimenyetso cyo kwicisha bugufi kw’abayobozi.

Agendeye ku mateka y’Umuganura mu Rwanda yawugereranyije no kwiyoroshya no kwicisha bugufi kwagiye kuranga abakurambere b’u Rwanda.

Yagize ati “Umuganura ni umunsi wo kwicisha bugufu hagati y’abayobozi n’abayoborwa kuko wari umunsi w’umwihariko umwami yagombaga gusangiraho na rubanda akaba ari we ubazimanira.”

Yongeyeho ko mu gihe hizihizwa umuganura nabwo abantu bagomba gusubiza amaso inyuma bakareaa umusaruro bagezweho maze bakawishimira.

Bamwe baturage bitabiriye uyu muhango.

Umuyobozi w’Intara y’Amajyepfo, Alphonse Munyantwari yavuze ko ku munsi w’Umuganura mu Rwanda nta muntu waganuraga ari wenyine ngo niyo mpamvu abanyarwanda bagomba kumva ko bakikijwe n’umukuru w’igihugu.

Ati “Umunsi w’umuganura tugomba kwishimira umusaruro, tukanishimira ko Perezida wa Repubukika yatugejeje kuri byinshi.”

Mu Karere ka Nyanza hizihirijwe Umuganura ku rwego rw’igihgugu hamuritswe bimwe mu byo abaturage bagezeho ari na byo bagiye bishimira.

Bamuritse bimwe mu bigize umuco Nyarwanda.

Mbonigaba Egide, umwe mu bamurikaga umusaruro w’ibyo bagezeho babisanisha n’Umunsi w’Umuganuro yabwiye Kigali Today ko we n’abagenzi be bishimira aho bavuye naho bageze mu kwiteza imbere kubera umusaruro mu buhinzi babonye.

Ati“Nk’urubyiruko dufite byinshi twaje kuganuza bagenzi bacu birimo inyanya, ibitoki byavuye ku kwishyira hamwe tugakora.”

Birasa Crispin ushinzwe kongera umusaruro mu ruganda rw’imyumbati rwa Kinazi ruri mu karere ka Ruhango avuga ko kwizihiza Umunsi w’Umuganura hanamurikwa ibyavuye mu musaruro byerekana ko nta nzara iri mu gihugu kuko umusaruro ubwawo wiyerekana.

Umuganura mu Karere ka Nyanza waranzwe no guha abana amata n’imbyino za gakondo zijyanye n’umuco w’abanyarwanda bo mu Rwanda rwo hambere.

Andi mafoto

Amafoto: Roger Rutindukanamurego

Uyu munyabufindo wo muri DRC yitobora inda n’umunwa ntave amaraso na make.

Uyu Munyekongo ni umwe mu baje bitabiriye iryo Serukiramuco Nyafurika ry’imbyino gakondo ryasorejwe i Nyanza kuri uyu wa 04 Kanama 2016.

Mu myambarire idasanzwe, abyina imbyino gakondo y’igihugu cye yitoboye inda nyuma y’akandi gashya yakoreye mu Karere ka Kayonza akitobora umunwa akoresheje uruhindu, ariko ntave amaraso ndetse n’aho yatoboye ntihabe hagaragara.

Bamwe mu batuye i Nyanza babonye ibyo uwo Munyekongo yakoze baketse ko haba hari izindi mbaraga zimukoresha kugira ngo ashobore gukora icyo gikorwa kitamenyerewe mu muco w’abantu.

Ntezimama Jean Luc ni umwe mu mbaga y’abantu bari bitabiriye iryo serukiramuco ryasorejwe i Nyanza mu Rukali akaba yatangajwe n’iyo migirire y’uwo Munyekongo.

Aganira na Kigali Today, yagize ati “Ni ubwa mbere mbonye umuntu witoboza uruhindu ku mubiri we ariko ntave amaraso, mu gihe ihwa rijomba umuntu amaraso akava ariko uriya we ibye birantangaje”.

Ubwo yitoboraga umunwa mu Karere ka Kayonza.

Undi mukecuru na we wari mu isozwa ry’iri serukiramuco yaje kwihera ijisho yumijwe n’ibyakozwe n’uwo Munyecongo avuga ko yifitemo ubundi bushobozi.

Ati “Buri wese agira ubugenge bwe ariko uriya Munyekongo we yakoze ibyo benshi tutari tumenyereye”.

Umuyobozi w’Itorero uwo Munyekongo witobora umunwa abarizwamo, avuga ko buriya bufindo ari ubuhanga bihariye mu muco wabo ntaho buhuriye n’imyuka mibi.

Abaturage banatunguwe no kumva ababyinnyi b’imbyino gakondo bo mu gihugu cya Misiri baririmba mu Kinyarwanda indirimbo“ Twabigezeho “ bashima ibyo igihugu cyagezeho nyuma ya Jenoside yakorewe Abatutsi mu Rwanda.

Iri Serukiramuco Nyafurika ry’imbyino ryitabiriwe n’ibihugu bya Kenya, Senegal, Repubulika iharanira Demikrasi ya Kongo, Misiri n’u Rwanda.

Ifoto yafatiwe mu gitaramo "I Nyanza twataramye 2015". Ni igitaramo cyakesheje.

Abafite amahoteri, amazu acumbikira abagenzi, utubari n’uburiro basabwe kwita ku isuku mu nama itegura isozwa rya FESPAD yabaye ku gicamunsi cyo kuri uyu wa 1 Kanama 2016.

Umuyobozi w’Akarere ka Nyanza, Ntazinda Erasme, yagize ati “Isuku ni kimwe mu bigomba kuturanga nk’umuco w’Abanyarwanda kugira ngo igihugu cyacu kizakomeze kuhabonera isura nziza”.

Abagize komite ishinzwe kugenzura isuku mu Karere ka Nyanza basabwe gutangira kuyigenzura kuva kuri uyu wa 02 Kanama 2016 mu amahoteri, amazu acumbikira abagenzi, utubari, uburiro n’ahandi kugira ngo aho babona ikibazo gikosorwe hakiri kare.

Ntazinda yaboneyeho gutumira abaturage b’Akarere ka Nyanza n’abo mu turere bihana imbibi mu birori by’Iserukiramuco Nyafuruka, iby’umuganura ndetse no mu gitaramo cyiswe “I Nyanza Twataramye”.

Amahoteri yizeza ko yiteguye ku buryo yiteguye gushyiraho akarusho mu isuku no mu mitangire ya serivisi.

Umwe mu banyamahoteri yagize ati “Muri hoteri yacu imyiteguro irarimbanije kandi twizeye neza ko servisi tuzaha abazatugana izaba ari iyo mu rwego rwo hejuru”.

Uru ruhurirane rw’ibirori bizabera mu Karere ka Nyanza kuva ku wa 4-5 Kanama 2016 bikaba bizitabirwa n’abantu bari hagati y’ibihumbi bitanu na birindwi, barimo n’abanyamahanga.

Umukozi w’Ikigo cy’Igihugu cy’Ubutaka, Slyvain Muyombano, asobanura akamaro ko gutunga icyangombwa cya burundu cy’ubutaka.

Icyumweru cyo gukangurira abaturage bo mu Ntara y’Amajyepfo kwiyandikishaho ubutaka bwabo mu buryo bwa burundu mu Majyepfo cyasorejwe i Nyanza kuri uyu wa 29 Nyakanga 2016.

Muyombano Sylvain, umubitsi w’Impapurompamo z’Ubutaka unungirije ushinzwe Intara y’Amajyepfo, yagize ati “Umuntu wagura ubutaka n’ufite ibyagombwa by’agateganyo by’ubutaka yakwihombera nk’uriwe muri Tombola izwi ku izina ry’ ‘ikiryabarezi’ kuko ubutaka bwitwa ko ari ubw’umuntu ari uko abufitiye icyangombwa cya burundu.”

Muyombano yasabye abaturage kwita ubutaka ubwabo ari uko bamaze kubwiyandikishaho burundu.

Ati “Ubutaka buba ubw’umuntu ari uko yamaze kububonera icyangombwa cya burundu naho ibindi kwaba ari ukwibeshya”.

Bamwe mu bayobozi batandukanye bari bitabiriye uwo muhango.

Umuyobozi w’Akarere ka Nyanza Wungirije ushinzwe Ubukungu, Kajyambere Patrick, yavuze ko mu gusobanurira abantu hifashishijwe Tombola yiswe “Ikiryabarezi” biturutse mu kuba bamwe bamaze iminsi bayitakazaho ibyabo bagahomba.

Uyu muyobozi yakomeje yumvikanisha ko nyir’ubutaka ari ubufitiye icyangombwa cya burundu bitaba ibyo umuntu akaba yabutakaza nk’uriwe n’”ikiryabarezi”.

Insanganyamatsiko y’ubwo bukangurambaga yagiraga iti "Gukoresha neza ubutaka bunyanditseho isoko y’umutekano n’iterambere ryanjye."

Hagendewe kuri iyo nsanganyamatsiko, abaturage bibukijwe ko ubutaka ari ubukungu bukomeye ndetse bukaba ari umutungo w’ikirenga kuko umuntu ashobora kubwifashisha akagana ibigo by’imari n’amabanki agahabwa inguzanyo akiteza imbere.

Zimwe mu nka zagabiwe abagore bo mu Karere ka Nyanza.

Kwishimira gahunda ya Girinka byongeye kugaragazwa n’abagore bo mu mirenge ya Busasamana, Mukingo na Rwabicuma, ubwo kuri uyu wa 26 Nyakanga 2016, bagabirwaga inka 30 n’Umuryango Mpuzamahanga wa ACTION AID ku bufatanye n’umushinga FVA, Ishami rya Nyanza.

Nyirantibenda Rose w’imyaka 45 utuye mu Murenge wa Busasamana muri Nyanza akaba ari umwe muri abo bagore bahawe inka, yishimye avuga ko kuva abayeho ari ubwa mbere agiye gutunga inka ayita iye bwite.

Mu mvugo yumvikanamo akanyamuneza, yagize ati “Kuva mbayeho, ni ubwa mbere ngiye gutunga inka. Nari umworo none mpindutse umutunzi mbikesheje gahunda ya Girinka yatangijwe n’Umukuru w’Igihugu cyacu, Paul Kagame.”

Yunzemo, ati “Ubu ndishimye ahubwo ndumva nshaka kurira kubera ibyiza nkorewe n’ubuyobozi nkaba mpawe inka.”

Uwahabwaga inka yababwaga n’ibikoresho byo kuyitaho ayirinda indwara.

Imiryango ya Action Aid na FVA yafatanyije kugabira abo bagore inka, ivuga ko ibyo babikoze mu rwego rwo gushyigikira gahunda ya Girinka Munyarwanda yatangijwe na Perezida Paul Kagame.

Josephine Uwamariya, umuyobozi wa ACTION Aid – Rwanda, yagize ati “Uguhaye inka burya aba aguhaye ubushobozi kugira ngo ubuhereho witeza imbere.”

Umuyobozi w’Akarere ka Nyanza Wungirije ushinzwe Imbereho Myiza, Mutesi Solange, avuga ko kuva na kera, guhana inka byari ikimenyetso cy’ubucuti, asaba buri wese wahawe inka muri abo bagore kutazahemukira Umukuru w’Igihugu cy’u Rwanda watangije iyo gahunda yo kubagabira.

Abagore bishimiye kugabirwa izo nka barabyina.

Inka 30 zatanzwe zibanjirije izindi zizakomeza guhabwa abo bagore mu rwego rwo kubafasha kugerwaho n’iterambere mu miryango bakomokamo.

Ibi ni bimwe mu babivugwa na bamwe mu baturage bari bishimiye kubona imbona nkubone isiganwa ry’amagare ryitiriwe umuco “Race for Culture” ryaturutse mu karere ka Nyamagabe rigasorezwa mu karere ka Nyanza kuri uyu wa gatandatu tariki 23/07/2016.

Iri rushanwa ryitiriwe umuco ryari rinogeye ijisho

Mu buryo bw’amatsiko menshi abaturage bari babukereye bareba iryo siganwa ry’amagare ryitiwe umuco ryasoreje i Nyanza ahafatwa nk’igicumbi gicumbikiye umuco nyarwanda kubera ibimenyetso by’amateka y’abami bo mu Rwanda rwo hambere bihagaragara.

Ishimwe Ferdinand uvuka i Nyanza akaba ari naho atuye avuga ko ashimishwa no kuba mu karere kazwiho kuba ari igicumbi cy’umuco Nyarwanda.

Yagize ati “ Namenye mu gitondo cyo kuri uyu wa gatandatu ko mu Karere ka Nyanza hasorezwa irushanwa ry’amagare ryitiwe umuco mpita ndikunda ntaranaribona kuko nahise niyumvisha ko ariwo rigamije guteza imbere no kurushaho kuwumenyekanisha mu ruhando mpuzamahanga”.

Uyu musore w’imyaka 32 y’amavuko asobanura ko kwiyumvamo kuba uw’ I Nyanza ku gicumbi cy’umuco nyarwanda bituma akunda ibikorwa byose bihwitirirwa bigamije kuwumenyenisha.

Ati “Nta gihombo mbona mu kuba ndi uwo ku gicumbi cy’umuco Nyarwanda ubu nkaba ndi hano i Nyanza ku muhanda naje gushyigikira irushanwa ry’amagare ryawitiriwe kandi riza gusorezwa mu karere ntuyemo. Nshyigikiye umuco by’umwihariko harimo iri rushanwa ry’amagare ryawitiriwe”.

Umunyarwanda Hadi Janvier yahaga umwitangirizwa abo bari kumwe bose mu isiganwa

Hadi Janvier w’umunyarwanda ni we watsinze irushanwa asize abandi bakinnyi bari kumwe b’abanyamahanga n’abanyarwanda kuva mu karere ka Nyamagabe kugera mu Karere ka Nyanza nyuma yo kuzengurukwa umujyi wa Nyanza inshuro 14 mu gihe kingana n’amasaha 3 n’iminota 19.

Iri rushanwa ryitiriwe umuco “Race for Culture” ryegukanwe n’umunyarwanda ryateguwe na FERWACY riterwa inkunga na SKOL, COGEBANQUE, Rwandair, Horizon Express na Kigali Today yatanze igihembo cy’ishimwe kuri Hadi Janvier wegukanye intsinzi y’iri rushanwa.

Nyiramayira wisabira kurenganurwa na Perezida Paul Kagame.

Mu 2015 nibwo umwana w’uyu Nyiramayira yishwe n’umugabo w’umuturanyi we, wahise atabwa muri yombi akanafungwa ariko nyuma aza kurekurwa yitwa ko afite uburwayi bwo mu mutwe.

Nyiramayira utihanganira kubona uwo mugabo yidegembya, avuga ko ababazwa no kuba uwo mugabo yitwa umurwayi wo mu mutwe kandi mu gihe yicaga uwo mwana we yari umucuruzi wamenyaga n’iby’urugo rwe agatunga umugore n’abana be nta kibazo.

Yagize ati “Wabishingira he se ubyemeza ko umugabo urera abana be agatunga urugo n’umugore wavuga ko ari umurwayi wo mu mutwe? Kuki se atafashe umwana we ngo umukubite ku rukuta amwice?”

Uyu mugore avuga ko Perezida w’u Rwanda Paul Kagame ariwe wenyine yisabira kuba yamurenganura kuko abona ko atahawe ubutabera yari ategereje.

Bamwe mu bahoze ari abaturanyi b’uyu mugabo ushinjwa urupfu rw’uwo mwana, bemeza ko yigeze kugira ikibazo cyo mu mutwe ariko ngo igihe yakoraga ubwo bwicanyi babonaga ari muzima.

Umugore w’uyu mugabo ukekwaho icyaha cy’ubwicanyi, we yatangarije Kigali Today ko umugabo we yishe uwo mwana w’umuturanyi nyuma y’iminsi micye yari ishize agaragaza ibimenyetso by’uburwayi bwo mu mutwe.

Umuyobozi w’Akarere ka Nyanza, Ntazinda Erasme avuga ko ikibazo cy’uyu mugore kizwi ariko ko ntacyo bagikoraho, kuko mu rubanza rwabaye rwemeje ko ukekwaho gukora icyaha yari umurwayi wo mu mutwe aricyo cyashingiweho mu kutamukurikirana.

Ati “Inama twagira ababyeyi b’uriya mwana wishwe ni ukuregera indishyi bitewe n’uko urubanza rwaciwe akarere ntacyo karukoraho.”

Uyu mugabo ushinjwa urupfu rw’uyu mwana ubu acururiza mu Karere ka Huye akaba ari naho yimuriye urugo rwe aruvanye mu Karere ka Nyanza.

Ingingo ya 101 mu gitabo cy’amategeko ahana ibyaha mu Rwanda, ivuga ko nta buryozwacyaha bubaho iyo ushinjwa yari arwaye ibisazi mu gihe yakoraga icyaha.

"Ibiryabarezi" byahagaritswe ababikinaga bati "Nibashaka bazabifunge burundu".

Umuyobozi w’Akarere ka Nyanza, Ntazinda Erasme, yasobanye ko imirimo yose ijyanye na Tombola yakoresherezwaga mu karere yabaye ihagaritswe kugeza igihe ubuyobozi bwa kompanyi buzagaragaza ibyangobwa by’umwimerere bwasabwe.

Yagize ati “Ubuyobozi bw’iyi Kompanyi icuruza serivisi z’imikino y’amahirwe bwaje budusaba gukorera mu karere kacu, icyo gihe baza bazanye ibyangombwa bituzuye ariko twatunguwe no kubona bo biha uburenganzira bwo gutangira gukora tutarabubemerera.”

Umuyobozi w’Akarere ka Nyanza yakomeje avuga ko imicungire y’ibyo byuma byifashishwaga mu mikino y’amahirwe yarimo akajagari ku buryo byatezaga umutekano muke ndetse bikararura abana.

Ntazinda Erasme yunzemo ati “Hari abana bishoraga muri iyo mikino y’amahirwe bakemererwa kuyikina kandi bizwi neza ko nta mafaranga bakorera maze ugusanga bariba iwabo bikabararura”.

Akarere ka Nyanza karashidikanya kuri iki cyangombwa kompanyi y’"Ibirwabarezi" yagashyikirije.

Avuga ko ikindi cyari giteye inkeke ari urugomo n’ubujura bwakorerwaga aho ibyo byuma bya Tombora yiswe “ikiryabarezi “ byakoreraga.

Yatangaje ko “Ibiryabarezi “ bizongera gukora ari uko ba nyirabyo bagaragaje ibyangombwa by’umwerere bahawe n’ikigo gishinzwe iterambere mu Rwanda (RDB) kandi hakanubahirizwa amategeko agomba kugenga aho iyo Tombora ikorera.

Bamwe mu bari abakiriya bagana ibyo byuma bajya gutombora bavuga ko batigeze babazwa n’uko iyo tombora yabaye ihagaritswe n’Akarere ka Nyanza.

Umwe muri bo yagize ati “Ibi byuma ngo ni ibiryabarezi byampombeje mu bucuruzi bwanjye, nazaga gukina nizeye gutsinda ariko ngataha amara masa. Rwose nibashaka bazabyirukane nta terambere byatuzaniye”.

Ibaruwa y’akarere ihagarika "ibiryabarezi".

Tombora yiswe “Ikiryabarezi” ni imwe mu mikino y’amahirwe yemewe ariko ahanini yagiye ivugwaho guteza ibibazo birimo kurarura urubyiruko n’abana batarageza imyaka 18.

Kigali Today yashatse kuvugana na Chen Jian, uhagarariye kompanyi ya Tombola y’”Ikiryabarezi” mu Rwanda kugira ngo agire icyo avuga ku kuba yahagarikiwe imirimo muri Nyanza ariko ntibyashoboka.

Umunyamabanga Nshingwabikorwa w’Akagari ka Rwesero, Théophile Nizeyimana, avuga ko ubwo bujura bwabaye ku wa 14 Nyakanga 2016 mu ma saa munani z’amanywa.

Akomeza avuga ko abibye iyo mudasobwa bishe urugi rwinjira iwe mu biro maze bakayihaterura.

Agira ati “Mu biro harimo n’amafaranga ariko ntayo bajyanye, ni yo mpamvu kugeza n’ubu ntariyumvisha icyo uwibye iriya mudasobwa yari agamije kuko hari byinshi yagombaga kujyana ariko ntabyo yafashe”.

Ati “Ntabwo natize aho nari ngiye ariko mu kanya gato nagarutse nsanga urugi rw’ibiro nkoreramo barumennye na mudasobwa nkoresha mu kazi bayibye”.

Nyuma yo kwibwa iyo mudasobwa bafashe ingamba zo gukaza uburinzi ku manywa byiyongera ku irondo rya nijoro.

Nyuma yo kwibwa mudasobwa y’akazi, ubuyobozi bw’ako kagari ngo bwahise butanga ikirego muri Polisi kugira ngo ibafashe gukora iperereza hamenyakane uwayitwaye n’icyo yari agamije.

Ubwo bujura buje bukurikira ubuherutse gukorerwa mu Biro by’Akarere ka Nyanza na bwo hakibwa mudasobwa z’abagakoramo.

Mu mpera za 2013, na bwo mu Bitaro by’Akarere ka Nyanza mu Mujyi wa Nyanza hibwe inshuro ebyiri mu munsi umwe kandi mu cyumba kimwe ibikoresho byarimo mudasobwa igendanwa n’icyuma cyifashishwaga mu kugaragariza abantu benshi ibiri muri mudasobwa bita projecteur, na bwo birangira byose biburiwe irengero.

Yasanzwe mu nzu yapfuye amarabira.

Macumbi, w’imyaka 31 y’amavuko ukomoka mu Karere ka Bugesera, yandikaga igitabo gisoza amasomo ye kuko yari mu mwaka wa kane mu Ishami ry’Ikoranabuhanga n’Icungamutungo.

Kuri uyu wa 13 Nyakanga 2016, abo babanaga mu gipangu aho yari acumbitse mu Mudugudu wa Bigega mu Kagari ka Kibinja hafi gato ya Kaminuza ya UNILAK ishami rya Nyanza, ni bwo bamenye ko mugenzi wabo yapfuye.

Uwimana Angelique, wari ucumbitse mu gipangu kimwe n’icyo Macumbi Abel yabagamo, yabwiye Kigali Today ko uwo munyeshuri ashobora kuba yaritabye Imana mbere.

Yagize ati “Ku manywa yo kuri uyu wa kabiri tariki 12 Nyakanga 2016 nagiye kumukomangira ku rugi rw’iwe hari ikintu nshaka kumutira, ndakomanga mbonye adakinguye ndamureka, bukeye bwaho mbonye ko atigeze akingura nasubiyeyo mpengereje mu rugi mbona agaramye mu ruganiriro rw’inzu yari acumbitsemo.”

Uyu mugore avuga ko amaze kubona ko amuhamagara ntiyitabe kandi akaba yari yakingiyemo imbere mu nzu yabimenyesheje inzego z’ubuyobozi na zo zitabaza Polisi iraza yica urugi isanga yamaze kwitaba Imana, umurambo uhita ujyanwa mu Bitaro bya Nyanza kugira ngo usuzumwe.

Bamwe mu banyeshuri biganaga na Macumbi Abel kimwe n’abo babanaga muri AERG /UNILAK-Nyanza babajwe cyane n’urupfu ry’uyu musore bavuga ko yari icyitegererezo mu mibanire myiza n’abandi kandi akagira umurava mu myigire ye.

Inka z’inyambo ziri mu byagaragarijwe abakora isuzuma ry’imihigo mu Karere ka Nyanza.

Abakozi b’iki kigo batangaje ibi kuri uyu wa Gatatu tariki 13 Nyakanga 2016, ubwo bari mu gikorwa cy’isuzuma ry’imihigo y’umwaka wa 2015 - 2016, rizamara iminsi ibiri mu Karere ka Nyanza.

Munyaneza Michel, umukozi wa IPAR uyoboye itsinda ry’abo bakozi, yasobanuye ko igikorwa barimo kigamije kureba ibyagezweho n’ibitaragezweho mu mihigo kugira ngo bifatirwe ingamba.

Aganira n’abakozi b’Akarere ka Nyanza mbere y’uko igikorwa cyo gusuzuma imihigo gitangira, yavuze ko ubuyobozi bw’Akarere ka Nyanza bwerekanye ko imihigo yagezweho ku gipimo cya 95% ariko ko hakwiye gukorwa igenzura rikabishimangira.

Yagize ati “Hari ubwo mushobora kuba mwarikosoye mwenyine hari ibyo mwirengagije. Icyo gihe amanota yamanuka ariko nta nubwo ari igitangaza ko amanota mwihaye yazamuka.”

Isuzuma ry’imihigo mu Karere ka Nyanza ryitabiriwe n’inzego zose zifite aho zihuriye na yo.

Umuyobozi w’Akarere ka Nyanza, Ntazinda Erasme, yagaragarije abari muri iri suzuma ry’imihigo baturutse ku rwego rw’igihugu ko mu mwaka ushize w’ingengo y’imari wa 2015 – 2016, imihigo akarere kahize yose muri rusange yagezweho ku bipimo bishimishije ndetse bikaba byaragize uruhare mu iterambere ry’abaturage.

Ntazinda yagize ati “Hari ibipimo twarengeje birimo inyubako nshya y’Akarere, Kubaka icyumba ababyeyi babyariramo na laboratwari mu bitaro by’Akarere ka Nyanza.”

Ku rundi ruhande ariko, ngo hari umuhigo wo gukwirakwiza amashanyarazi utaragezweho biturutse kuri rwiyemezamirimo utarubahirije amasezerano yagiranye n’Akarere ka Nyanza.

Undi muhigo utarageze ku bipimo bya nyabyo byari byiyemejwe n’Akarere ka Nyanza ni uw’ubwisungane mu kwivuza bwagarukiye kuri 71% nk’uko Umuyobozi w’Akarere ka Nyanza yabivuze.

Akarere keretse abasuzuma imihigo ku rwego rw’igihugu uko amata y’i Nyanza aterekwa.

Mu mihigo y’umwaka wabanje wa 2014-2015, Akarere ka Nyanza kari kaje muri dutatu twa mbere, gahabwa n’igikombe.

Mukampabano avuga ko batewe inkeke n’ubujura aho batuye.

Ibi biba cyane cyane mu Kagari ka Gatagara aho bamwe mu baturage bamaze iminsi batangaza ko bibwa mu ngo kugeza n’ubwo umujura aterura inkono ku ziko akayijyana.

Mukampabano Béatha, w’imyaka 57 y’amavuko utuye mu Mudugudu wa Kinyogote mu Kagari ka Gatagara, avuga ko umuturanyi we aherutse gusiga amazi y’umuceri ku ziko yajya mu nzu agasanga isafuriya barayitwaye.

Agira ati“Hirya aha ku muturanyi wanjye baherutse gusiga amazi ku ziko, agiye gato kuzana umuceri mu nzu yagarutse asanga isafuriya bayitwaye.”

Uyu mukecuru yakomeje avuga ko abakekwaho kuba inyuma y’ubwo bujura ari bamwe mu bantu bashya bimukira mu mudugudu wabo baturutse ahandi kandi bakaza bahirukanwe kubera ingeso mbi zirimo n’ubujura.

Bishimangirwa na Musabyeyesu Mariya, na we utuye muri uwo Mudugudu wa Kinyogote, uvuga ko mu minsi mike ishize bafatiye ibikoresho byo mu rugo n’amatungo magufi mu rugo rw’umugabo wari uhacumbitse wajyaga yiba mu kagari gahana imbibe n’akabo akabihazana.

Musabyeyesu avuga ko muri urwo rugo rwe hafatiwe amasafuriya, ibisorori, imyenda, inkoko n’inkwavu byibwaga ahandi akabihazana.
Yagize ati “Yahingiraga abantu ariko yaba ahinguye akiba, mbese wabonaga yifata neza birenze ubushobozi afite agahorera inkoko izindi akajya kuzigurisha kandi ntaho azororera.”

Tariki 08 Nyakanga 2016 uwo mugabo yafashwe n’irondo risanga mu nzu acumbitsemo ibikoresho bitandukanye bisubizwa ba nyira byo nk’uko Musabyeyesu abivuga.

Nkundineza Pascal, Umunyambanga Nshingwabikorwa w’Akagari ka Gatagara ubu bujura buvugwamo, yatangarije Kigali Today ko uwo mugabo wafatanwe ibyo bikoresho n’amatungo yibye yashyikirijwe Polisi ikorera mu Karere ka Nyanza.

Akomeza asaba abaturage ba Gatagara kwita ku irondo kandi na bo ubwabo bakagira uruhare mu kwicungira umutekano.

Aba-Islam bo mu Ntara y’Amajyepfobasoreje igisibo mu Karere ka Nyanza.

Byatangajwe n’Umuyobozi wa Islam mu Karere ka Nyanza, Sheikh Kabiriti Assuman, tariki 06 Nyakanga 2016 mu busabane bwahuje Aba-Islam n’inshuti zabo hamwe n’abayobozi bo mu nzego bwite za Leta bo mu Ntara y’Amajyepfo.

Sheikh Assumani Kabiriti yishimiye intambwe u Rwanda rumaze gutera, by’umwihariko muri Islam abereye umuyobozi mu Karere ka Nyanza.

Yagize ati “Twabohotse nk’abandi Banyarwanda tunabohoka nk’Aba-Islam batari bazi inkomoko yacu mbere ya Jenoside yakorewe Abatutsi. Ni yo mpamvu kutabyishimira byaba ari ukunyagwa zigahera”.

Yakomeje avuga ko mbere je Jenoside yakorewe Abatutsi, umunsi wo gusoza igisibo cya “Ramadhan” utahabwaga agaciro nk’uko muri Leta y’Ubumwe bw’Abanyarwanda bimeze.

Yunzemo ati “Ndi muto mu bantu turi kumwe muri ubu busabane ariko mbere ya Jenoside yakorewe Abatutsi mu Rwanda nta radio nigeze numva yifurije Aba-Islam umunsi mukuru wabo”.

Mufti w’u Rwanda, Sheikh Salim Hitimana, wifatanyije n’Aba-Islam bo mu Ntara y’Amajyepfo muri ubwo busabane, avuga ko Aba-Islam ari bamwe mu bantu bari barahejwe mu gihugu bakitwa amazina atuma bafatwa nk’indyarya bagatakarizwa icyizere mu bo babana.

Ati “Aba-Islam imirimo bari bazwiho ni ubushoferi n’ubukanishi bw’amamodoka ariko nta mu-Islam wabaga depite, senateri, umucamanza, umuganga ukomeye cyangwa ngo ayobore akarere nk’abandi.”

Kayiranga Muzuka Eugène, Umuyobozi w’Akarere ka Huye akaba yari n’intumwa y’Umuyobozi w’Intara y’Amajyepfo muri ubwo busabane, yasabye Aba-Islam bo muri iyo ntara gukomeza gufatanya n’abandi Banyarwanda mu kubaka amahoro arambye mu gihugu.

Urubyiruko ni rwo ahanini rwitabira ubukangurambaga mu kurwanya SIDA.

Hakizimana John ushinzwe guhuza abafite ubwandu bwa SIDA na serivisi z’ubuvuzi mu mushinga wa AHF RWANDA, avuga ko mu ngamba bahuriyeho na Minisiteri y’Ubuzima mu Rwanda, ari uko mu mwaka wa 2020, nta bwandu bushya bugomba kuba bukiboneka mu gihugu.

Ubwo yari mu Karere ka Nyanza tariki 30 Kamena 2016, mu gikorwa cy’ubukangurambaga bw’iminsi itatu ku kwirinda SIDA no gupima ku bushake virusi itera SIDA, Hakizimana yabwiye abaturage ko kugira ngo ibyo bigerweho, na bo basabwa kubigiramo uruhare birinda inzira zose ubwandu bushya bwa SIDA bushobora kwinjiriramo.

Yagize ati “Izo ngamba ntabwo zireba Minisiteri y’Ubuzima mu Rwanda n’abafatanyabikorwa bayo gusa, ahubwo bisaba buri wese kuzigira ize, hakirindwa ubusambanyi nk’imwe mu nzira SIDA yanduriramo.”

Umukozi wa AHF asobanura ingamba ziriho mu kurwanya SIDA.

Uyu mushinga watanze udukingirizo ku buntu usaba abaturage ko mu gihe babaniwe kwifata, bashobora kutwifashisha aho gushora ubuzima bwabo ngo bahuriremo n’ubwandu bushya bwa virusi itera SIDA, kugeza ubu idafite umuti n’urukingo.

Yanasobanuye ko mu gihe havuzwe ubwandu bushya ibyo biba bisobanura abantu biyongera ku mubare w’abari basanzweho mu kwandura SIDA.

Ati “Nta bundi bwoko bwa SIDA bwaje ahubwo ikiriho abantu basabwa ni uguhagarika umubare w’abakomeza kwandura kandi harafashwe ingamba zo gukumira icyo cyorezo.”

Abaturage bakurikiranye ubu butumwa bw’ubukangurambaga ndetse bakanipimisha ku bushake virusi itera SIDA, bavuga ko bazagira uruhare mu gukumira ubwandu bushya, bareka ingeso mbi z’ubuharike n’ubushoreke kuko zigira uruhare mu kongera ubwandu bwa SIDA.

Ubu bukangurambaga mu Karere ka Nyanza bwasoje abantu bagera kuri 600 bipimishije ubwandu bw’agakoko gatera SIDA ku buntu banamenyeraho uko bahagaze.

Uru rubyiruko rwiyemeje guteza imbere Made in Rwanda rukora inkweto.

Urwo rubyiruko rwibumbiye muri koperative “Intaganzwa” ikorera mu murenge wa Busasamana mu karere ka Nyanza, ruvuga ko umusanzu warwo ku gihugu rwiyemeje gutanga ari uwo kugabanya amafaranga igihugu gitakaza mu gutumiza inkweto hanze yacyo kandi zishobora gukorerwa mu Rwanda.

Uwitwa Habineza Jean Paul, Visi Perezida w’iyo koperative, avuga ko batangiye basana inkweto zishaje ariko nyuma babona ko ibyo bidahagije, bongeraho no gukora inkweto nshya.

Agira ati “Mu byatumye dutangira gukora inkweto nshya ni uko twabonaga amafaranga yoherezwa mu mahanga yari menshi kandi rimwe na rimwe bakazana inkweto z’ibisigazwa by’abanyamahanga.”

Habineza avuga ko koperative yabo iri muri zimwe muri koperative zashyize umukono ku gikorwa cyo guhagarika inkweto za Caguwa zatumizwaga mu mahanga zikaza bigaragara ko ntacyo zimariye abanyarwanda.

Ati “Kuva umushinga wacu twawaguriramo gukora inkweto nshya, icyo dusaba ni ukutugana ubundi tukabakorera ibijyanye n’ibyifuzo byabo kandi duteje imbere iby’iwacu”.

Mu nkweto bakora ifite igiciro gito igurishwa ibihumbi bitanu naho urukweto rufunze rukozwe mu ruhu barugurisha ibihumbi 20 by’amafaranga y’u Rwanda.

Ubuyobozi bw’iyi koperative ikora ikweto ikanazisana yo mu karere ka Nyanza bwizeza Abanyarwanda ubushobozi mu byo bakora.

Abagize iyi koperative bavuga ko batangiye kwiga uburyo banashyiraho ishuri ryigisha urubyiruko gukora inkweto ngo ku buryo ibiganiro babigeze kure n’ubuyobozi bw’akarere ka Nyanza bakoreramo.

Mu imurikabikorwa ry’iminsi itatu ryasojwe ku wa 30 Kamena 2016, ihuriro ry’abafatanyabikorwa mu iterambere ry’akarere ka Nyanza ari na bo bariteguye, bashimye ubuyobozi bw’iyi koperative buyigenera umudari w’ishimwe.

Nshimyumukiza Martin, Perezida w’Ihuriro ry’abafatanyabikorwa mu iterambere ry’akarere ka Nyanza, yavuze ko umusaruro w’ibikorwa by’iyi koperative ugaragara, abasaba kongera ingufu mu byo bakora bijyanye na gahunda Guverinema y’u Rwanda ishyize imbere ya “Made in Rwanda”.

Ikoranabuhanga ryifashishwa mu gusuzuma ibinyabiziga riri mu byahesheje IPRC Kavumu igihembo.

Hari ku mugoroba wo ku wa 30 Kamena 2016 i Nyanza, ubwo hasozwaga imurikabikorwa ry’iminsi itatu ryari ryateguwe n’ihuriro ry’abafatanyabikorwa mu iterambere ry’Akarere ka Nyanza (JADF).

Mu gutanga ibihembo bashingiye k’udushya abantu bagiye bagaragaza mu imurikabikorwa ndetse n’uburyo bagiye bakira ababagana.

Icyo gihembo IPRC Kavumu yagihataniye n’imiryango mpuzamahaga itari iya Leta, imiryango nyarwanda itari iya Leta, ibigo bya Leta n’iby’abikorera, Kaminuza ya UNILAK/Ishami rya Nyanza n’abandi batandukanye bari bahuriye muri iryo murikabikorwa.

Kalisa Edouard, wari intumwa y’Ikigo cy’Igihugu gishinzwe Imiyoborere (RGB) ari na we wari umushyitsi mukuru muri uwo muhango, ni we hashyikirije IPRC Kavumu icyo gihembo anashima muri rusange udushya twaranze iryo imurikabikorwa.

Yagize ati “Hari ibyo nanjye nabonye mbura uko niyumvisha niba koko byaba bikorerwa mu Karere ka Nyanza birimo ikoranabuhanga mu myuga, ubuhinzi n’ibindi”.

Batanze ibihembo mu byiciro bitandukanye.

Iyi ntumwa ya RGB yasabye abaturage kudapfusha ubusa utwo dushya bamurikiwe kandi dukorerwa iwabo.

Ati “Icyo iri murikabikorwa riba rigamije ni ukugira ngo abantu bigire ku bandi buri umwe wese agaragaze ibyo akora n’agashya abifitemo”.

Nkurunziza Eric, Umukozi wa IPRC Kavumu akaba ari na we wakiriye icyo gikombe cy’ababaye indashyikirwa mu imurikabikorwa yabwiye Kigali Today ko icyo gihembo bahawe cyerekanye ko ibyo bakora bishimwa na bose muri gahunda bafite yo guteza imbere imyuga.

Ati “Iki gihembo duhawe kitwongeyemo imbaraga zo gukomeza gukora kandi kitweretse ko ibyo dukora hari abantu babiha agaciro”.

Ishuri ry’Imyuga n’Ubumenyingiro rya Kavumu ryerekanye intera ikomeye rimaze kugeraho mu gusuzuma ibinyabiziga hakoreshwejwe ibyuma kabuhariwe by’ikoranabuhanga.

Mu karere ka Ruhango aho iyi Tombola yahereye, abana ntibakumirwa. Ifoto: Eric Muvara/Kigali Today.

Uyu mukino witwa Ikiryabarezi wageze mu mu Karere ka Nyanza uturutse mu Karere bihana imbibi ka Ruhango, aho ababyeyi bari bamaze iminsi bamaganira kure imikorere y’iyo tombola.

Iki Kiryabarezi ni imwe muri tombola zeweme mu Rwanda. Uyikina afata igiceri cy’amafaraga ijana y’u Rwanda ukayashyira mu cyuma gikozwe mu buryo bw’ikoranabuhanga, agakanda ku kimenyetso ahisemo kikaba ari na cyo kimuhesha amahirwe yo gutsinda cyangwa gutsindwa.

Nibura ahantu harenga 20 hahurira abantu benshi hagiye hari ibyo byuma mu mujyi wa Nyanza. Cyakora, aho biri binengwa n’ababyeyi ko abana babishyiramo amafaranga ntihagire ubakoma mu nkokora ngo ababuze.

Niringiyimana Moise, umwe mu bakorera hafi yaho kimwe muri ibyo byuma cyashyizwe mu mu mujyi wa Nyanza, ngo ababazwa n’uko kuva mu gitondo kugeza nimugoroba kiba kibisikanaho abantu bakuru barimo n’abana baba baje gukina bakeneye urwunguko rw’amafaranga.

Aganira na Kigali Today, uyu mubyeyi yatangaje ko abantu baza gukina iyo tombola, barimo n’abana, bashoramo amafaranga bizeye ko babona inyungu z’ikirenga ariko abenshi bikarangira bahombye.

Ati “Rimwe na rimwe abantu bakuru barimo n’abana baza bitwaje ibiceri nk’iby’ibihumbi bibiri, icyuma kikayarya bagasigara baririra mu myotsi.”

Hari imiryango imwe n’imwe yagezweho n’ingaruka z’Ikiryabarezi

Uwababyeyi Josee, umubyeyi wemeza ko icyo cyuma cyamugizeho ingaruka, avuga ko aherutse gutuma umwana we w’imyaka 16 y’amavuko mu isoko rya Nyanza akagaruka arira avuga ko yasanze abandi bakina na we agakina, nyuma we kikamurya atabonye urwunguko rw’amafaranga yari yizeye gutsindira.

Aha ni ahari ibyuma bya Tombola y’ikiryabarezi mu mujyi wa Nyanza. Ifoto: J.P Twizeyeyezu/Kigali Today.

Agira ati “Akimara kumbwira ko amafaranga muhaye ayakiniye mu Kiryabarezi, nabuze aho ndigitira kuko nta yandi mafaranga nari mfite. Naje kureba ko bayansubiza ariko ntibyanshobokera kuko bambwiye ko Abashinwa ba nyira cyo ari bo baza kugikuramo amafaranga kandi ko nta mpuhwe baba bafitiye umuntu.”

Uwababyeyi akomeza avuga ko izo ngaruka zamugezeho ziterwa no kuba hatararebwe ikigero cy’umwana we waje gutombora.

Agira ati “Abana ntibakorera amafaranga. Kwemera ko baza gukina imikino nk’iriya y’Ikiryabarezi ni ikibazo inzego z’ubuyobozi zigomba gufatira ingamba kuko abana bacu kigiye kuzabararura, abandi bavemo abajura kuko ntiwajya urambika igiceri cy’ijana ngo ugaruke ukihasange. Leta nidutabare.”

Ubwo hari saa sita z’amanywa abana bamwe bava ku ishuri abandi bajyayo, hari bamwe bemereye Kigali Today ko iyo bagiye bashaka gutombora kuri ibyo byuma, batajya bababuza.

Umwe muri bo yagize ati “Upfa gusa kuba ufite igiceri cy’ijana uragenda ugakina, nta muntu ukubuza. Iyo uriye aba ari amahirwe yawe wahomba na bwo ugataha urira kuko ni wowe uba wizanye.”

Kayitare Yves ukorera umurimo w’ubucuruzi mu turere twa Nyanza na Ruhango avuga ko hari umugore aherutse kubona mu Ruhango wariwe amafaranga yose yari yajyanye guhaha mu isoko.

Agira ati “Hari umugore mperutse kwibonera mu Ruhango wariwe ibihumbi bibiri byari ibyo guhahisha. Ndatekereza ko uwo mugore atashoboye gusubira iwe mu rugo kuko umugabo yari bumumerere nabi cyane.”

Ubuyobozi bw’Akarere ka Nyanza bwiyemeje gukumira abana muri iyi Tombola

Umuyobozi w’Akarere ka Nyanza, Erasme Ntazinda, yabwiye Kigali Today ko yamenye ingaruka uwo mukino wiswe “Ikiryabarezi” watangiye guteza mu karere abereye umuyobozi, cyane cyane mu bana bari munsi y’imyaka 18 y’amavuko.

Uyu muyobozi w’Akarere ka Nyanza avuga ko bafashe ingamba nyuma y’inguruka zari zatangiye kwigaragaza, bamwe mu babyeyi bagasaba ko abana babo bakumirwa muri iyo tombola.

Yagize ati “Abantu bose bafite biriya byuma bya Tombola ku nzu zabo ni bo bafitanye imikoranire n’ababihazanye. Twabasabye kubikuraho bigakodesherezwa inzu zizwi ku buryo ushaka gutombora yinjiramo habanje kurebwa ko yujuje imyaka y’ubukure.”

Ntazinda yakomeje avuga ko ubuyobozi bw’Umurenge wa Busasamana ari na ho ibyo byuma by’Ibiryabarezi biri, bwasabwe guhita bukurikirana imikoreshereze yabyo.

Ikibazo cy’Ikiryabarezi cyahagurukije ubuyobozi bw’Umurenge wa Busasamana.

Ku birebana n’abantu bakuru bajya muri iyo tombola bakaribwa amafaranga, Umuyobozi w’Akarere ka Nyanza yavuze abantu bakuru bemerewe gukina, cyakora abasaba kubyitwaramo neza kugira ngo hatagira uwo bizasenyera urugo amafaranga ye ari ho yayatakarije.

Icyo amategeko y’u Rwanda abivugaho

Dukundane Jean Luc Frederic, umunyamategeko akaba n’umwunganizi mu nkiko ukorera mu nzu y’ubufasha mu by’amategeko (MAJ) mu Karere ka Nyanza, avuga ko kwemerera umwana kujya mu mikino y’amahirwe nka Tombola kandi isabwamo amafaranga ari icyaha gihanwa n’amategeko ahana ibyaha mu Rwanda.

Yagize ati “Umwana uwo ari we wese uri munsi y’imyaka 18 y’amavuko afatwa nk’umunyantege nke udashobora kwifatira icyemezo mu buryo bw’imitekerereze. Ni yo mpamvu amategeko amurengera.”

Uyu munyamategeko yabisobanuye yifashishije ingingo ya 324 yo mu gitabo cy’amategeko ahana ibyaha mu Rwanda, avuga ko kudakumira umwana mu mikino nk’iyi ya Tombola atakarizamo amafaranga, bishobora guhanisha iyo ngingo.

Iyo ngingo ibuza umuntu wese kubonerana undi, kubera intege nke, irari, ubukene cyangwa ubujiji bwe, akamukoresha, abyigiriye cyangwa abigiriye undi, amasezerano y’urwunguko cyangwa y’indi yezandonke birengeje urwunguko rusanzwe, ashingiye ku mwenda amuhaye, cyangwa ku masezerano yandi arebana n’umutungo utimukanwa cyangwa wimukanwa amuhaye.

Urenze kuri ibyo, iyo ngingo imuteganyiriza guhanishwa igifungo kuva ku mezi atandatu kugeza ku myaka ibiri n’ihazabu y’amafaranga y’u Rwanda kuva ku bihumbi magana abiri kugeza kuri miliyoni cyangwa kimwe gusa muri ibyo bihano.

Bamwe mu bahuguwe bata ifoto y’urwibutso hamwe n’abayobozi.

Umuhango wo kubashyikiriza inyemezabumenyi ku bijyanye n’ubumenyi bwo kwihangira imirimo kimwe n’iyo inkunga wabaye kuri uyu wa 23 Kamena 2016.

Umuyobozi wa Technoserve mu Rwanda, Tuyisenge Angelique, mu mpanuro yahaye urwo rubyiruko, yavuze ko ubumenyi rwahawe ari urufunguzo rw’ubukire.

Yagize ati “Urufunguzo rufungura urugi ariko iyo rufungujwe ingufuri itari iyarwo ntacyo bitanga! Birasaba rero ko mukoresha ubumenyi mwahawe mu kwiteza imbere kugira ngo mugere ku bukire”.

Tuyisenge yongeyeho ko abenshi ku isi bateye imbere, na bo bagiye bahera ku bintu bike ariko bafite intego y’icyo bari bagamije kuzageraho.

Ati “Abantu bose bafite aho bageze ku isi bafite aho bahereye, byabafashe imyaka. Na mwe rero mukore muzagera ku byo mwifuza muhereye ku bumenyi mwahawe bwo kwihangira umurimo”.

Umuyobozi wa Technoservice, Angelique Tuyisenge, ashyikiririza impamyabumenyi umwe mu bahuguwe.

Ihozabarira Betty ni umwe muri urwo rubyiruko rubarirwa muri 854 rwahuguwe akaba yahawe inkunga y’ibihumbi 410FRW azamufasha kuvugurura umushinga yatangiye w’ubworozi.

Ati “Iyo ntahugurwa ku buryo bwo kwihangira imirimo ndetse no kuyikurikirana ubu mba nkiri mu bukene bukabije kuko nta mahirwe nagize yo gukomeza kwiga ayisumbuye ngo nibura ari byo mpugiramo.”

Umuyobozi w’Akarere ka Nyanza, Ntazinda Erasme, yishimiye ubumenyi bungutse mu kwihangira imirimo.

Yijeje ubuyobozi bwa Technoserve ko bazakomeza kuba hafi urwo rubyiruko rwahuguwe kugira ngo aho gusubira inyuma bazakomeze batere imbere babikesheje kuba barihangiye imirimo.

Yatawe muri yombi ashinjwa kunyereza asaga miliyoni 3 muri VUP.

Uyu mukozi w’umurenge yatawe muri yombi nyuma y’uko abaturage bamushinje imbere y’Umuyobozi w’Akarere ka Nyanza, Ntazinda Erasme, mu nama yakoranye na bo kuri uyu wa kabiri tariki 21 Kamena 2016.

Mbarubukeye Vedaste, Umunyamabanga Nshingwabikorwa w’Umurenge wa Busoro, kuri iki kibazo yabwiye yadutangarije ko ayo mafaranga yayibye k’uy’ubudehe agenewe kubakwamo isoko ryo mu cyaro, Ivuriro ndetse n’ishuri ry’inshuke ry’abana.”

Umuvugizi wa Polisi mu Ntara y’Amajyepfo akaba n’Umugenzacyaha muri iyi ntara, CIP André Hakizimana, yemeye ko uwo mukozi koko yatawe muri yombi ndetse avuga ko akurikiranyweho amafaranga arenga miliyoni eshatu yarigishijwe.

CIP Hakizimana yakomeje avuga ko abakoresha amafaranga ya Leta bagomba kurangwa n’ubunyangamugayo.

Ati “Icyo nasaba ubuyobozi bw’uturere twohereza amafaranga mu mirenge agenewe gahunda za Leta, bagomba gushyiraho komite zo kuyacunga na zo zigizwe n’inyangamugayo kuko abaturage hari ubwo bababonerana bakarigisa amafaranga yabo y’iterambere”.

Yatangaje ko mu guhe uyu mukozi yaba ahamijwe icyo cyaha yahanishwa igifungo kuva ku myaka irindwi kugeza ku myaka icumi n’ihazabu y’amafaranga yikubye inshuro kuva kuri ebyiri kugeza kuri eshanu z’agaciro k’umutungo warigishijwe cyangwa wononwe nk’uko ingingo ya 325 mu gitabo cy’amategeko ahana y’u Rwanda ibiteganya.

Mugisha Janvier, ukekwaho kurigisha amafaranga ya gahunda y’ubudehe mu Muremge wa Busoro, ubu ari mu maboko ya Polisi ikorera muri uwo murenge, mu gihe yari amaze imyaka ibarirwa muri itanu akorera muri uwo murenge.

Mukamwiza wavuze mu izina ry’imiryango y’abibukwa atewe intimba no kuba bamwe muri bo bataraboneka ngo bashyingurwe mu cyubahiro.

Igikorwa cyo kwibuka izo nzirakarengane cyakozwe, ku wa 17 Kamena 2016, na bamwe mu miryango yarokotse Jenoside, Ubuyobozi bw’Intara y’Amajyepfo n’uturere tuyigize hamwe n’inshuti zabo zaje kubafata mu mugongo.

Mu rwego rwo kubibuka no kubunamira hashyizwe indabo ku rukuta rwanditseho abagera kuri 98 bari abakozi b’izahoze ari perefegutura ya Gitarama, Butare na Gikongoro bimaze kumenyakana ko bazize Jenoside yakorewe Abatutsi mu 1994.

Mukamwiza Gloriose, wavuze mu izina ry’imiryango y’ababuze ababo muri Jenoside, yavuze ko babazwa na bamwe muri bo baburiwe irengero, imyaka 22 ikaba ishize batarabasha kuboneka ngo bashyingurwe mu cyubahiro.

Yagize ati “Habyarimana Jean Baptiste wahoze ari umuyobozi w’icyahoze ari perefegitura ya Butare mu gihe cya Jenoside yarafashwe afungirwa mu biro by’inyubako yahoze akoreramo maze ihinduka gereza ye”.

Uyu Mukamwiza ni mushiki Habyarimana Jean Baptiste. Yavuze ko bafite amakuru ko Leta yahoze yiyita iy’abatabazi yamuvanye i Butare ikamujyana i Murambi ya Gitarama bagenda bamuzungurukana.

Amwe mu mazi y’abakoreraga perefegitura zavuyemo Intara y’Amajyepfo bazize Jenoside yakorewe Abatutsi.

Mu ijwi ryuje intimba n’agahinda, yasabye Ubuyobozi bw’Intara y’Amajyepfo gukomeza gushakisha amakuru y’aho yaba yariciwe kugira ngo ashobore gushyingurwa mu cyubahiro.

Ati “Nyakubahwa Guverineri w’Intara y’Amajyepfo, nkanjye uhagaze hano nka mushiki we mfite agahunda gasaze kuko ntashoboye kumushyigura ngo ahabwe icyubahiro cye cyari kimukwiye”.

Mu buhamya bwatanzwe n’uwitwa Kayitesi Immaculée yavuze ko Jenoside yakorewe Abatutsi ijya kuba byose byari byarateguwe.

Ati “Mbere y’uko Jenoside itangira bimwe mu bigo bya Leta n’amashuli akomeye y’ i Nyanza byatangiye kujya biyoborwa n’abantu bari barateguwe mu gushyira mu bikorwa umugambi wa Jenoside”.

Umuyobozi w’Intara y’amajyepfo, Alphonse Munyantwari, yavuze ko Jenoside itazongera kubaho abishingira ku gaciro Leta y’ubumwe iha abaturage bayo.

Uwo mubyeyi ahamya ko umuhungu we yamufashe ku ngufu akamusambanya kuri uyu wa 16 Kamena 2016, akanamukuramo amenyo abiri bagundagurana amwiyama.

Umunyamabanga Nshingwabikorwa w’Umurenge wa Kibirizi, Habineza Jean Baptiste, yabwiye Kigali Today ko uwo musore ari mu maboko ya Polisi akurikiranweho icyaha cyo gufata nyina umubyara ku ngufu akanamusambanya.

Yagize ati “Iby’uko uwo musore yaba yasambanyije umukecuru we ni ko biri kuvugwa ariko haracyakorwa iperereza kugira ngo hamenyekane ko ibyo byaba ari ukuri.”

Habineza Jean Baptiste yongeyeho ko uwo musore ukekwaho gusambanya nyina yari yasinze.

Hari amakuru avuga ko uwo musore atitwara neza mu bandi kubera kunywa ibiyobyabwenge.

Uwo mukecuru ushinja umuhungu we kumusambanya ndetse bikamuviramo no gukuka amenyo abiri, yahise yoherezwa kwa muganga kugira ngo akorerwe isuzuma.

Umunyamabanga Nshingwabikorwa w’Umurenge wa Kibirizi, Habineza Jean Baptiste, yamaganye icyo gikorwa cy’urukozasoni avuga ko gifitanye isano n’ubusinzi no gukoresha ibiyobyabwenge, asaba ko abantu babireka kuko ababinywa bibagira imbata bakitesha agaciro ndetse n’ibikorwa bakoze bikabagiraho ingaruka.

Ubwo twateguraga iyi nkuru twashatse kuvugana n’Umuvugizi wa Polisi y’Igihugu mu Ntara y’Amajyepfo akaba n’Umugenzacyaha muri iyi Ntara, CIP André Hakizimana, kugira ngo agire icyo abivugaho ariko ntibyashoboka.

Ibiro by’umurenge wa Mukingo bifite bamwe mu baturage basaba kurenganurwa.

Iki kibazo kiri mu kagari ka Nkomero mu Murenge wa Mukingo mu karere ka Nyanza. Bamwe mu bavuganye na Kigali Today, basobanura ko mu 2011 ayo mafaranga bayahaye uwahoze ari muganga w’amatungo mu murenge wabo mu bihe bitandukanye.

Nteziryayo Silas umwe muri abo baturage, avuga ko yahaye 3000Frw uwahoze ari muganga w’amatungo yabo witwa Habimana Janvier ayita ko ari ubwisungane bw’amatungo, kugira ngo ajye ashobora kubavurira amatungo yabo mu gihe yarwaye.

Kuri konti bigaragara ko nyuma ya 2011 nta yandi mafaranga yongeye kuyibikwaho mu gihe ku dupapuro tw’ubwishyu bigaragara ko nyuma yaho yakomeje gutangwa.

Agira ati “Njye na bagenzi banjye buri umwe wese kuva yamuha ayo mafaranga ntawongeye kumubona, ndetse n’ikitubabaza cyane n’uko nyuma yaho twagiye turwaza inka tworoye ariko bwa bwisungane mu buvuzi bw’amatungo twatanze ntibugire icyo butumarira.”

Umunyamabanga Nshingwabikorwa w’umurenge wa Mukingo, Muganamfura Sylvestre yemera ko ayo mafaranga yatanzwe ariko ntihagire umuturage n’umwe agoboka mu kumuvurira amatungo.

Ati “Nibyo koko abaturage batanze ayo mafaranga ariko bigaragara ko yagiye anyuzwa kuri konti yo mu murenge SACCO nyuma biza guhagarara ntiyongera kunyurayo.”

Tumwe mu dupapuro abaturage bavuga ko bishyuriragaho Mitiweri y’amatungo.

Uyu muyobozi w’umurenge yatangaje ko harebwe kuri ya konti bagasanga iriho ibihumbi birenga 63 FRW.

Akomeza avuga ko nyuma ya 2011 nta yandi mafaranga yongeye kunyuzwaho ari byo byerekana ko habayemo ikibazo.

Habimana Janvier wahoze ari muganga w’amatungo mu Murenge, yahakanye ko ntaho ayo mafaranga yari ahuriye nayo, avuga ko ayo yagiye ahabwa yose yayashyikirije komite yo kuyacunga abaturage ubwabo bitoreye.

Mu rwego rwo kugaragaza irengero ry’ayo mafaranga hatangiye gukorwa iperereza mu baturage bayatanze, nayo babona kuri konti kugira ngo bayasubize abaturage bizwi neza ko ntayarigishijwe.

Habimana waciwe umunwa ku manywa y’ihangu ku wa 14 Kamena 2016, avuga ko yabanje gutongana n’uwawumuciye biturutse ku mwenda wa 5000FRW yamwishyuzaga.

Agira ati “Namubonye ndamwishyuza ideni amfitiye ariko aho kugira ngo anyishyure yahise ansimbukira anduma umunwa”.

Ideni ry’amafaranga ibihumbi bitanu yamwishyuzaga ngo ryari ritabariwemo inyungu y’igihumbi yagombaga kujya atanga buri kwezi.

Habimana yageze kwa muganga nta bwisungane mu kwivuza afite bamuca ibihumbi bigera kuri cumi na birindwi by’u Rwanda nk’uko abivuga.

Uwamurumye umunwa yatawe muri yombi ajyanwa kuri Sitasiyo ya Polisi ya Busasamana ari hamwe n’abandi batatu bikekwaho ubufatanyacyaha.

Bamwe mu baturage babibonye bavuga ko urwo rugomo rwatewe n’inzoga zitemewe z’inkorano zihacururizwa bihishahisha inzego z’umutekano. Umwe muri bo utivuze izina yagize ati “ Byatewe n’ibiyobyabwenge nta kindi.”

Muri ako gace kiswe kuri 40 mu Mujyi wa Nyanza byabereye, Polisi ikunze kuhafatira ibiyobyabwenge n’abanywi babyo ikanabakangurira kubireka kubera ko ari byo bikunze kugira uruhare mu guhungabanya umutekano.

Byabaye kuri uyu wa 12 Kamena 2016 ubwo uwo musore yasiramurwaga n’umuforomo ngo wari umaze iminsi mike afungiwe farumasi kubera kutuzuza ibyangombwa.

Umunyamabanga Nshingwabikorwa w’umurenge wa Busoro, Mbarubukeye Vedaste, yaduhamarije ayo makuru agira ati “Ni byo koko hari umusore wasiramuwe n’umuforomo bari mu rugo mu gipangu babanamo nyuma byamuviriyemo kumererwa nabi arabyimbirwa bikomeye”.

Mbarubukeye yakomeje avuga ko uwo musore yamaze kubyimbirwa akajya ku Kigo Nderabuzima cya Kinazi nyuma babona ko bikomeye na bo bakamwohereza ku Bitaro bya Kinazi ari naho arwariye.

Ati “Amakuru dufite ni ay’uko uwo musore yabonye atangiye kubyimbirwa igitsina akijyana ku kigo nderabuzima nyuma bikomeje gukomera yoherejwe ku bitaro”.

Uyu muyobozi w’umurenge avuga ko uwo muforomo yahise atoroka atinya kuba yakurikiranwaho kuba yasiramuye umuntu nta burenganzira abifitiye.

Yakomeje agira inama abaturage yo kutajya ku bantu babonetse bose ngo babasabe serivisi z’ubuvuzi harimo n’izi zigendanye no kwisiramuza.

Agendeye ku gikorwa cyo gusiramura cyabaye kuri uwo musore nyuma kikamugiraho ingaruka, uyu Muyobozi w’Umurenge wa Busoro yabasabye kujya bagana ibigo nderabuzima n’ibitaro bizwiho gutanga servisi mu buryo bwemewe.

Ati “Gusiramurwa ni igikorwa gikorerwa kwa muganga ubifitiye uburenganzira. Kujya mu bavuzi ba magendu ntabwo byemewe biteza ingaruka ku buzima bikaba byabaviramo n’urupfu”.

Yongeyeho ko gusiramurwa bikorerwa kwa muganga wemewe ariko hakaba hari n’izindi servisi zihariye zibitangamo umufasha cyane cyane nko mu cyumweru cyahariwe ibikorwa by’ingabo z’igihugu aho ababishaka bose basiramurwa kandi ntihagire izindi ngaruka zivuka.

Ubwo twandikaga iyi nkuru Kigali Today yashatse kuvugana n’uwo musore uri mu bitaro bya Kinazi nyuma yo gusiramurwa bikamuviramo kubyimbirwa bikomeye ariko ntibyashoboka.

Byatangajwe n’Umuyobozi w’Akarere ka Nyanza, Ntazinda Erasme, muri gahunda yo gukemura ibibazo by’abaturage mu ruhame yahereye mu Murenge wa Mukingo kuri uyu wa 8 Kamena 2016.

Abaturage babaza ibibazo byabo mu bwisanzure kandi mu ruhame, ubuyobozi bw’akarere bugafatanya n’inzego z’ibanze n’abaturage gushaka umuti.

Ntazinda Erasme yavuze ko gahunda yari isanzweho yo gukemurira ibibazo by’abaturage mu biro yari ifite ingorane zo kudatanga umusaruro ugereranyije n’uboneka iyo abaturage bakemuriwe ibibazo byabo mu ruhame abayobozi babasanze iwabo mu cyaro.

Yagize ati “Gukemura ibibazo by’abaturage utageze aho byabereye byari bifite ingaruka yo guhora bigaruka kuko abaturanyi b’uwakemuriwe ikibazo batamenya uko byagenze bityo haza umuyobozi mushya na we akakizwa cya kibazo”.

Yakomeje avuga ko ibyo biboneka ahanini iyo haje umuyobozi wo mu rwego rwo hejura nk’Umukuru w’Igihugu.

Ati “ Icyo gihe yakizwa ibibazo byinshi kandi ibyinshi biba byarakemuwe ariko hakaba ikosa ry’uko ahanini biba bitarakemuriwe mu ruhame”.

Umuyobozi w’Akarere ka Nyanza, Erasme Ntazinda, aganira na bamwe mu baturage bo mu Murenge wa Mukingo.

Aganira na Kigali Today, Mayor Ntazinda yavuze ko kwegera abaturage hagamijwe kubakemurira ibibazo bijyanye na gahunda yo kubegereza ubuyobozi n’ubushobozi.
Rubongeka Juvenal, umwe mu baturage b’Umurenge wa Mukingo wakemuwemo ibibazo by’abaturage mu ruhame, yavuze ko iyi gahunda yo kubegera ituma badakoresha amatike bajya gushaka umuyobozi ubakemurira ibibazo.

Ati “ Gukemurirwa ibibazo iyo umuturage asanze abayobozi ku biro byatwaraga amafaranga menshi y’ingendo rimwe na rimwe akabura itike maze agahitamo kubana n’ikibazo.”

Gukemura mu ruhame ibibazo by’abaturage kandi, ngo bituma bagaragaza akarengane bamwe mu bayobozi b’inzego z’ibanze bakorera bibwira ko ntaho umuturage azahurira n’umuyobozi wo kurwego rwo hejuru.

Muri gahunda yo gukemurira mu ruhame ibibazo by’abaturage muri Mukingo hakiriwe ibibazo mirongo itatu na bine kandi hafi ya byose bibonerwa umuti.

Yafashwe kuri iki cyumweru tariki 05 Kamena 2016 nyuma y’aho ubwe yinjiye mu bwiherero akaguruka avuga ko atunguwe no kubona umwana yari atwite amaze kugwa mu musarane.

Nyina w’uyu mukobwa n’abaturanyi ni bo bihutiye kubimenyesha Polisi maze uwo mwana akurwa mu musarani naho uwo mukobwa atabwa muri yombi nk’uko Ngirimana David, Umunyamabanga Nshingwabikorwa w’agateganyo w’Umurenge wa Ntyazo yabidutangarije.

Yagize ati “ Yagiye mu bwiherero agaruka avuga ko umwana amucitse akava mu nda akagwa mu musarane ariko babishidikanyijeho bahamagara Polisi kugira ngo bikorweho iperereza”.

Umuvugizi wa Polisi mu Ntara y’Amajyepfo akaba n’Umugenzacyaha muri iyi Ntara, CIP André Hakizimana , yanenze iyo myitwarire ndetse asaba abantu kubaha ubuzima bw’umwana kuva agisamwa kugeza ubwo akuze kugira ngo birinde ingaruka zo mu rwego rw’amategeko.

Ati “ Igihe umukobwa yatewe inda yaba abishaka cyangwa byakozwe mu bundi buryo atumvikanyeho n’uwayimuteye ntabwo ari we wifatira icyemezo cyo kuyikuriramo ahubwo byemezwa n’urukiko bigakorwa n’abaganga nyuma y’icyemezo cy’urukiko kibyemeza ”.

Icyaha cyo kwikuramo inda gihanwa n’ingingo ya 162 yo mu gitabo cy’amategeko ahana y’u Rwanda.

Iyo ngingo ivuga ko umuntu wese wikuyemo inda ahanishwa igifungo kuva ku mwaka umwe kugeza ku myaka itatu n’ihazabu y’amafaranga y’u Rwanda kuva ku bihumbi mirongo itanu kugeza ku bihumbi magana abiri.

Urubyiruko rwo mu Karere ka Nyanza ubwo rwakoraga urugendo rwo kwibuka bagenzi barwo bazize Jenoside.

Urubyiruko rwo mu karere ka Nyanza rwiga mu mashuli yisumbuye ruvaga ko kuba batabona ibitabo bivuga ku mateka nyakuri y’Abanyarwanda, bituma bakomeza kwigishirizwa iwabo ku ishyiga inyigisho zakwirakwije n’abakoroni.

Manirakiza Eric w’imyaka 25 avuga ko we na bagenzi be bagorwa no kubona mu masomero ibitabo bivuga ku mateka nyakuri y’Abanyarwanda bikavuguruza ibyo ababyeyi babo bigishirijwemo.

Agira ati “Nk’urubyiruko dufite inyota yo kumenya amateka adashingiye ku nyigisho z’abakoroni babibye amacakubiri mu banyarwanda bikabageza kuri Jenoside yakorewe abatutsi muri Mata 1994 mu Rwanda.”

Fidel Ndayisaba yasabye abajijutse kwandika ibitabo nyakuri ku mateka y’u Rwanda.

Manirakiza avuga ko kuba ibitabo bivuga ku mateka nyakuri bitagaragara ngo urubyiruko rubisome bifite ingaruka y’amakuru, bamwe muri bo bakomeza kwigishwa n’iwabo mu miryango usanga afite ibisigisi by’abakoroni.

Ati “Inyigisho zicamo amacakubiri Abanyarwanda zigishijwe igihe kinini mbere ya Jenoside yakorewe Abatutsi mu Rwanda ndetse abantu bakuru bariho icyo gihe usanga ari zo bagifite mu mitwe yabo, kandi nta cyiza izo nyigisho zasize usibye kubageza kuri jenoside yakorewe abatutsi barenga miliyoni imwe bishwe mu Rwanda bazizwa uko baremwe.”

Izi mpungenge ni zimwe mu zagaragarijwe umunyamabanga wa komisiyo y’Igihugu y’Ubumwe n’Ubwiyunge Fidel Ndayisaba, yaganiraga n’abakozi mu karere ka Nyanza kuri gahunda ya “Ndi Umunyarwanda” tariki 2 Kamena 2016.

Mudahinyuka Narcisse, umwe mu bayobozi b’ibigo by’amashuli yo mu Karere ka Nyanza muri icyo kiganiro yagaragaje impungenge baterwa n’ibira ry’ibitabo bivuga ku mateka nyakuru y’abanyarwanda.

Ati “Urubyiruko twigisha mu bigo by’amashuli usanga rufite inyota yo kumenya ariko imbogamizi iracyari mu bitabo biyavuga bitagamije kuryanisha abanyarwanda.”

Ndayisaba yavuze ko iki kibazo kizabonerwa umuti ariko anasaba abajijutse kubigiramo uruhare bakandika ibitabo.

Ubuyobozi bw’Akarere ka Nyanza bwanenzwe ko imwe mu mihigo itararangira kandi habura iminsi itageze ku kwezi ngo umwaka w’ingengo y’imari urangire.

Mu ruzinduko rw’iryo tsinda rwabaye tariki 3 Kamena 2016, hasuzumwe amaraporo ndetse bamwe bajya mu mirenge kureba ko ibyahizwe mu mihigo ya 2015-2016 ari byo byashyizwe mu bikorwa.

Iri tsinda rivuga ko muri rusange imihigo yagenze neza ariko hakaba hari n’indi ikenewe kongerwamo ingufu kugira ngo ibashe kurangirana n’iminsi y’uku kwezi kumwe gusigaye ngo umwaka w’ingengo y’imari usozwe.

Imwe muri iyo mihigo ni irebana n’ubuhinzi bw’imyumbati yagombaga guhingwa ku buso bwa hegitari ibihumbi bine mu Murenge wa Ntyazo, ariko abagize iri tsinda basanze ubuso bwahinzwe buri hasi y’ubwari buteganyijwe.

Harimo kandi umuhigo w’amatara yo ku muhanda ataramara gukwirakwizwa ahari hateganyijwe, nk’uko biri mu mihigo ya 2015-2016.

Madamu Izabiriza yasabye ko Akarere ka Nyanza kihutisha imihigo yose bigaragara ko iri mu bukererwe kugira ngo isuzuma rikorwa ku rwego rw’Igihugu ryiteguwe, rizasange byose biri mu murongo.

Uyu muyobozi yongeyeho ko mu bigomba kwitwararikwa ari ukwirinda kubeshya ko imihigo yagezweho ariko wagera aho yashyiriwe mu bikorwa ikabura.

Ati “Icyo isuzuma riba rigamije ni ukwereka urikorerwa ibyo abura kugira ngo abikore bigishoboka, anagirwe n’inama ku bibazo bimwe na bimwe yagiye agira, uko ashobora kubikemura.”

Umuyobozi w’Akarere ka Nyanza Wungirije ushinzwe Imari n’Iterambere ry’Ubukungu, Kajyambere Patrick, yavuze ko ibitaranozwa bagiye kubishyira mu bikorwa kugira ngo uyu mwaka urangire byamaze kujya mu buryo.

Mu mihigo ya 2014 – 2015, Akarere ka Nyanza kaje mu turere dutatu twa mbere mu gihugu, gahabwa igikombe cy’imihigo na Perezida Paul Kagame.

Fidel Ndayisaba mu kiganiro kuri Gahunda ya Ndi Umunyarwanda mu karere ka Nyanza.

Fidel Ndayisaba yabitangaje mu kiganiro yagejeje ku bakozi b’Akarere ka Nyanza cyabaye kuri uyu wa kane tariki 2 Kamena 2016 kigamije kubasobanurira gahunda ya “Ndi Umunyarwanda.”

Ndayisaba yasobanuye ko nyuma ya Jenoside yakorewe Abatutsi muri Mata 1994 mu Rwanda, hari bamwe mu bafitanye isano n’abayigizemo uruhare usanga bitwa ibigwari ku bwo kuba baba basabye imbabazi.

Yagize ati “Umuco wo gusaba imbabazi si ubugwari ahubwo ni umuti ukiza ukomora imitima iba iremerewe n’icyaha cya jenoside yakorewe abatutsi mu Rwanda.”

Fidel Ndayisaba yifashishije bimwe mu byo abahanga mu myitwarite ya muntu bavuga ku gusaba imbabazi, yavuze ko kuzitanga bemeje ko kuzitanga ari impano isumba izindi zose naho kubika inzika bikaba igihombo cya mbere mu buzima.

Ikiganiro cya Ndi umunyarwanda cyitabiriwe n’abakozi batandukanye bo mu Karere ka Nyanza.

Emma Marie Bugingo, Komiseri muri Komisiyo y’Igihugu y’ubumwe n’ubwiyunge mu kiganiro yatanze yagaragaje uburyo gahunda ya “Ndi umunyarwanda” ariyo nzira nziza yo kugeza Abanyarwanda ku bumwe n’ubwiyunge burambye.

Ati “Iyo umuntu yiyumvamo Ubunyarwanda ntaho aba agihuriye n’amoko yakoreshejwe mu Rwanda, agasenya ubumwe bwabo maze akabageza kuri jenoside yakorewe Abatutsi mu Rwanda.”

Yakomeje avuga ko gahunda ya Ndi Umunyarwanda itagomba gufatwa nk’ibiganiro gusa ahubwo igomba kuba ubuzima bwa buri munsi bw’Abanyarwanda, hagamijwe kutagira undi muntu n’umwe bemerera kubameneramo ngo abacemo amacakubiri.

Bamwe mu bitabiriye gahunda ya Ndi umunyarwanda bashimye ibyo imaze kugeza ku Banyarwanda cyane cyane ndetse nicyo abana bato bakibyiruka bayitegerejeho.

Mudahinyuka Narcisse, umuyobozi w’ikigo cy’ishuli ryisumbuye rya ESPANYA, yatanze inyunganizi muri icyo kiganiro, asaba ko abana bose babyiruka bagomba kwigishwa mu mashuli isomo ryo gukunda igihugu kugira ngo bakurane uwo muco.

Bamwe mu bana bugarijwe n’imirire mibi muri Nyanza.

Ikibazo cyahise gihagurutsa akarere n’abafatanyabikorwa, kugira ngo ibigo nderabuzima bifashe aba bana barimo 168 bari mu ibara ry’umutuku bivuga ko bafite imirire mibi ikabije, na 633 bari mu ibara ry’umuhondo rivuga abana bafite imirire mibi ariko idakabije.

Umwe mu bashinzwe ibikorwa by’ubuzima b’ukorera ku kigo nderabuzima cya Gatagara, Kabera Dorothee avuga ko bamaze iminsi bahugurwa ku buryo nabo bazahugura abajyanama b’ubuzima, bagaca icyo kibazo cy’imirire mibi burundu.

Abazahugura abandi bahawe isomo ngiro ryo kondora abana bari mu mirire mibi.

Agiea ati “Urebye ntabwo ibiryo byabuze ahubwo uburyo babigaburiramo abana nibwo budahwitse kuko batazi uko babibavangira.”

Umushinga Muri Nyanza François-Xavier Bagnoud (FXB) wakoze ubu bushakashatsi, uvuga ko iyi mibare ari iyatanzwe n’abajyanama b’ubuzima mu midugudu yose noneho nabo bakayikusanya, Ngiruwonsanga Narcisse, ushinzwemo imirire, isuku n’isukura abisobanura.

Ati “Iyi mibare tuyemeranyaho n’ubuyobozi bw’Akarere ka Nyanza kuko bwayikoreye igenzura abo bireba basanga ifite ishingiro.”

Ngiruwonsanga umukozi wa FXB ahugura abazahugura abandi ku kwita ku mirire y’abana.

Ngiruwonsanga avuga ko urutonde rw’abo bana bari munsi y’imyaka itanu n’imiryango bagiye baherereyemo mu midugudu izwi ku buryo ubu barimo kwitabwaho n’ibigo nderabuzima bibegereye babifashijwemo n’abajyanama b’ubuzima.

Nshimyumukiza Martin ukora mu Karere ka Nyanza, yasabye abasoje amahugurwa tariki 27 Gicurasi ko inyigisho bahawe zijya gukemura ikibazo kiriho imirire mibi mu bana bari munsi y’imyaka itanu igacika.

Umwe mu barwariye mu bitaro bya Nyanza n’umwana we nyuma y’uko bariye inyama z’ihene yipfushije. Ifoto: J.P Twizeyeyezu/Kigali Today.

Abaturage bariye izo nyama z’ihene yipfushije ku gicamunsi cyo ku wa Mbere, tariki 23 Gicurasi 2016, maze bigeze mu masaha y’umugoroba, batangira kuruka no gucibwamo ndetse no kuribwa umutwe mu buryo bukomeye.

Nyirahategekimana Cansilda urwariye mu bitaro bya Nyanza, yabwiye Kigali Today ko iyo hene yateje ibibazo yari iye ariko ikaza kwipfusha mu buryo butunguranye.

Avuga ko imaze kwipfusha, yayisangiye n’abaturanyi be maze nyuma y’amasaha make, abayiriyeho batangira kuribwa mu nda, kuruka no gucibwamo, ku buryo abafashwe bajyanwe kwa muganga ari indembe.

Barwariye mu cyumba cy’indwara zo mu mubiri mu Bitaro bya Nyanza. Ifoto: J.P Twizeyeyezu/Kigali Today.