Deogratias Nzabonimpa wayoboraga Rubavu mu buryo bw’agateganyo yamurikiye Mulindwa akazi kamutegereje

Icyakora yamubwiye ko ibyo bibazo bidakwiye kumukanga kuko azafatanya n’abandi bakozi b’Akarere ka Rubavu mu kubishakira ibisubizo, no kubaka Rubavu nziza.

Mulindwa avuga ko nta gishya azanye mu kuyobora Akarere ka Rubavu, ahubwo ngo aje gufatanya na bo kandi akazakorana na buri rwego mu byafasha Akarere gutera imbere ndetse abaturage bakagira imibereho myiza. Icyakora avuga ko ibizagerwaho byose bizakorwa mu bufatanye.

Mulindwa uvuga ko yiyizera mu gukurikirana ibikorwa, akavuga ko yakurikiranye amakuru y’Akarere ka Rubavu mu bibazo kahuye na byo mu bihe by’ibiza, mu gihe we yarimo ahangana n’ingaruka zatewe n’ibiza mu Karere ka Rutsiro.

Akarere ka Rubavu gafite amahirwe menshi mu iterambere ariko kari mu turere twagiye duhindura abayobozi benshi, aho kuva muri 2006 kamaze kuyoborwa n’abayobozi umunani muri manda eshatu.

Benshi bagiye bavaho begujwe, mu gihe abandi bagiye basezera babyita impamvu zabo bwite, ariko nyuma hakagaragazwa zimwe mu mbogamizi bahuye na zo.

Mulindwa Prosper, Umuyobozi mushya w’Akarere ka Rubavu, yabaye Umuyobozi w’Akarere wungirije ushinzwe iterambere ry’Ubukungu mu Karere ka Rulindo, ahava ajya gukora muri Minisiteri y’Ubutegetsi bw’Igihugu.

Mulindwa Prosper ni we muyobozi mushya w’Akarere ka Rubavu

Yayoboraga Akarere ka Rutsiro yari yararagijwe ndetse ahiyandikisha nk’umukandida mu nama njyanama, icyakora bitunguranye abantu bamubonye yiyamamariza kuba umujyanama mu nama njyanama y’Akarere ka Rubavu, hibazwa impamvu atiyamamarije aho asanzwe ayobora.

Asubiza Kigali Today, Mulindwa yatangaje ko yagiye mu Karere ka Rutsiro kuhayobora by’Agateganyo kandi igihe ahamaze ngo yashyize ibintu ku murongo.

Agira ati "Ntabwo natereranye Rutsiro, ahubwo nabonye ibyo nakoragayo hari abandi biyemeje kubikomeza, nifuza kuza gukorera mu Karere ka Rubavu nk’Akarere gafite umujyi wunganira umujyi wa Kigali."

Mulindwa avuga ko azihutisha serivisi kandi ibibazo by’abaturage bigakemurwa mu gihe, akaba yizeza abafite impano kuzigaragaza kandi Akarere kakabigiramo uruhare mu kwimakaza Rubavu nziza.

Avuga ku mwihariko wa Rubavu, Mulindwa yavuze ko yifuza kongera isuku, kumenyekanisha ibyiza bya Rubavu, abasura Akarere bakiyongera.

Mulindwa yahawe icumu n’ingabo byo kurinda Akarere

Kagabo Richard Rwamunono

Uyu mwanya awusimbuyeho, Nyirabihogo Jeanne d’Arc, weguye kuri izi nshingano.

Kagabo yari amaze imyaka 11 ari Umujyanama wa Guverineri w’Intara.

Akimara gutorwa, yavuze ko aje gufatanya n’abandi kwesa imihigo no guteza imbere abaturage.

Yagize ati "Nari maze imyaka 11 ndi Umujyanama wa Guverineri, nakurikiranaga imikorere y’Uturere, ubu rero ninjiye mu zindi nshingano ngiye kuba umujyanama ariko mfatanya n’abandi guteza imbere abaturage. Akarere kamaze igihe kaza mu myanya ya mbere mu mihigo, sinkwiye kuza ngo mbe ari jye utuma gasubira inyuma."

Ingamba afite ahanini ngo ni ukurushaho kwegera abaturage bakajya inama ku iterambere ryabo.

Mu kazi kamutegereje harimo kuvugurura inyubako z’Umujyi wa Rwamagana zishaje, imiturire ijyanye n’igishushanyo mbonera ndetse no guteza imbere abaturage cyane cyane mu kwihaza mu biribwa.

Nsengimana Claudien ni we utorewe kuyobora Akarere ka Musanze

Igikorwa cyabereye kuri uyu wa Kane Tariki 7 Ukuboza 2023, muri tumwe mu Turere tugize Intara y’Amajyaruguru twari tumaze igihe kitari munsi y’amezi ane tudafite Njyanama na Komite Nyobozi byuzuye, cyabanjirijwe no gutora abuzuza umubare w’abantu 17 bagize Inama Njyanama ku rwego rwa buri Karere bateganywa n’amategeko, ari na bo batowemo abuzuza Komite Nyobozi.

Nsengimana Claudien w’imyaka 43 y’amavuko watorewe kuyobora Akarere ka Musanze, yavuze ko mu byo azibandaho harimo no kuvugurura ubuhinzi bukaba ubushingiye ku ruhererekane nyongeragaciro ku buryo buba umusingi w’impinduka mu buhinzi.

Yavuze ko azanateza imbere imishinga binyuze mu gukorana n’ibigo by’imari n’amabanki, ishoramari rishingiye ku bukerarugendo butanga imirimo kuri benshi, kwimakaza imikorere n’imikoranire binoze kandi birambye.

Uretse Meya Nsengimana, abayobozi b’aka Karere bungirije bombi na bo bashimangiye kuzarangwa n’imikoranire inoze hagati yabo, abo bakorana ndetse n’abafatanyabikorwa b’Akarere, kunoza imiturire ari nako bakwirakwiza ibikorwa remezo aho bitaragera, guteza imbere uburezi, isuku, kuvana abaturage mu bukene; muri uko gushyigikira iterambere ry’abaturage bakaba bijeje kuzashyira imbere ubumwe n’ubudaheranwa by’Abanyarwanda.

Komite Nyobozi y’Akarere ka Musanze igizwe n’Umuyobozi w’Akarere Nsengimana Claudien(hagati) Uwanyirigira Clarisse Umuyobozi w’Akarere ka Musanze wungirije Ushinzwe Iterambere n’Ubukungu ndetse na Theobald Kayiranga Umuyobozi w’Akarere ka Musanze wungirije Ushinzwe Imibereho myiza y’Abaturage

Uretse Akarere ka Musanze, Komite Nyobozi y’Akarere ka Burera yari imaze igihe iburamo Umuyobozi w’Akarere, Mukamana Solina akaba ari we watorewe uwo mwanya.

Mukamana Soline ni we watorewe kuyobora Akarere ka Burera

Ni mu gihe Akarere ka Gakenke na ko kabonye Umuyobozi mushya ari we Mukandayisenga Vestine wishimiye icyizere yagiriwe na bagenzi be b’Abajyanama, avuga ko azacyubakiraho aharanira gufatanya n’abaturage mu gushyigikira imishinga iteza imbere urubyiruko n’umuryango, guteza imbere serivisi nziza kandi zitangiwe ku gihe n’ibindi bikubiye mu mirongo migari y’iterambere ry’aka Karere.

Mukandayisenga Vestine w’imyaka 36 y’amavuko ni we watorewe kuyobora Akarere ka Gakenke

Uturere tune two mu Ntara y’Amajyaruguru ntitwari dufite Abajyanama b’Akarere buzuye. Dutatu muri two ari two Burera, Gakenke na Musanze ni two tutari dufite Komite Nyobozi yuzuye, mu gihe mu Karere ka Rulindo ko hatowe umujyanama umwe wuzuza 30% by’abagore.

Muri utwo Turere twose habanje gutorwa Abajyanama buzuza Inama Njyanama, ubusanzwe iba igizwe n’abantu 17 nk’uko biteganywa n’itegeko.

Buri mukandida mu biyamamarije kujya mu bajyanama b’Akarere n’abagize Komite Nyobozi y’Akarere yagiye ahabwa igihe cy’iminota itarenga itatu akabwira Inteko itora imigabo n’imigambi y’ibyo azamarira abaturage.

Benshi mu batorewe ubuyobozi basimbuye abaheruka kwirukanirwa imikorere idahwitse

Abayobozi batorewe kuyobora Uturere twa Musanze, Burera na Gakenke, bose uko ari batatu na bamwe mu babungirije baje basimbura abayoboraga utwo Turere ari bo Ramuli Janvier wayobora Akarere ka Musanze, Uwanyirigira Marie Chantal wayoboraga Burera na Nizeyimana Jean Marie Vianney wayoboraga Akarere ka Gakenke ndetse na Kamanzi Axelle wari Umuyobozi wungirije Ushinzwe imibereho myiza y’Abaturage muri Musanze, bavanywe ku buyobozi na Perezida wa Repubulika Paul Kagame tariki 8 Kanama 2023, ku bwo kutuzuza inshingano zabo nk’uko bikwiye nk’uko byagaragajwe mu itangazo ryashyizweho umukono na Minisitiri w’Intebe, Dr Edouard Ngirente.

Uwanyirigira Clarisse, Umuyobozi w’Akarere ka Musanze wungirije Ushinzwe Iterambere n’Ubukungu

Mulindwa Prosper arahirira kuyobora Rubavu

Mulindwa ufite impamyabumenyi ya Ao mu Bukungu, avuga ko azibanda ku guteza imbere umujyi wa Gisenyi, by’umwihariko ubukerarugendo, kuzamura ubushobozi bw’imiryango ikennye no gufasha urubyiruko guhanga imirimo, ariko akaba yavuze ko yiyizeye mu gukurikirana ibikorwa.

Mu Karere ka Karongi, Mukase Valentine wari usanzwe ari Umuyobozi w’Akarere wungirije ushinzwe imibereho y’abaturage ni we watorewe kuyobora Akarere ka Karongi, naho umwanya yari asanzwe ariho awusimburwaho na Umuhoza Pascasie.

Mukase Valentine wari usanzwe ari Visi Meya ushinzwe imibereho y’abaturage atorewe kuyobora Akarere ka Karongi

Mukase yarahiriye kuzuza neza inshingano nshya

Mu Ntara y’Iburengerazuba hatowe Abajyanama binjira mu Nama Njyanama y’Akarere ka Rutsiro. Amatora yakomeje aho Inama Njyanama yitoyemo Umuyobozi w’Akarere n’abamwungirije.

Kayitesi Dative yatorewe kuyobora Akarere ka Rutsiro

Mu Karere ka Nyamasheke, Mupenzi Narcisse yatorewe kwinjira mu Nama Njyanama y’Akarere, anatorwa nk’Umuyobozi mushya w’Akarere ka Nyamasheke.

Mupenzi Narcisse ni we muyobozi mushya w’Akarere ka Nyamasheke. Yari asanzwe akora muri Minisiteri y’Ubutabera

Intara y’Iburengerazuba isanzwe ifite uturere turindwi ariko uturere tune ntitwari dufite abayobozi kubera ko bakuweho mu mezi ashize.

Umuhoza Pascasie ni we wabaye Visi Meya ushinzwe imibereho y’abaturage muri Karongi

Mu kubarura amajwi, Mulindwa Prosper yari imbere

Nzabonimpa Deogratias wayoboraga Akarere ka Rubavu yahawe ishimwe

Mulindwa impano hamwe n’icumu n’ingabo byo kurinda Akarere

Akarere ka Rubavu kari mu tugomba kubonerwa Abayobozi

Ni amatora ateganyijwe kubera mu Turere nka Rubavu, ahatorwa usimbura uwari Umuyobozi w’Akarere Kambogo Ildephonse wirukanywe tariki 06 Gicurasi 2023 n’Inama Njyanama y’Akarere ka Rubavu, azira kuba atarabashije kubahiriza neza inshingano yari afite.

Haratorwa abagize Inama Njyanama y’Akarere ka Rutsiro ndetse bitoremo Umuyobozi w’Akarere n’abamwungirije, nyuma y’uko abari bagize komite nyobozi n’abajyanama birukanywe.

Tariki 28 Kamena 2023, hasheshwe Inama Njyanama y’Akarere ka Rutsiro, nyuma yo kubona ko ubuyobozi bw’Akarere bwateshutse ku nshingano zabwo.

Inama Njyanama yasheshwe hashyirwaho Mulindwa Prosper, nk’Umuyobozi w’Akarere w’agateganyo, ubu akaba yiyamamariza kujya mu Nama Njyanama y’Akarere ka Rubavu.

Mu Karere ka Karongi Inama Njyanama yateranye mu nama idasanzwe tariki ya 23 Ukwakira 2023 yeguza umuyobozi wako, Mukarutesi Vestine azira kugirwa inama ntazubahirize.

Inama Njyanama idasanzwe yateranye kubera ikibazo cyihutirwaga, cy’imikorere y’Umuyobozi w’Akarere wagiriwe inama kenshi ntiyikosore.

Bimwe mu bivugwa byatumye yeguzwa, harimo ibibazo bibangamiye abaturage bitabonewe ibisubizo hamwe no gusiragiza abaturage badakemurirwa ibibazo.

Umuyobozi w’Akarere ka Nyamasheke yirukanywe mu kazi ku wa Mbere tariki 28 Kanama 2023, Inama Njyanama y’Akarere ka Nyamasheke yafashe umwanzuro wo kwirukana Umuyobozi w’Akarere, Appolonie Mukamasabo, mu nshingano zo kuyobora Akarere biturutse ku myitwarire n’imikorere idahwitse mu kazi ashinzwe.

Mu Ntara y’Amajyaruguru haratorwa abayobozi mu Turere twa Burera, Gakenke, na Musanze, naho mu Karere ka Rwamagana hatorwe usimbura umuyobozi w’Akarere wungirije ushinzwe Iterambere ry’Ubukungu mu Karere.

Mu Karere ka Musanze na ho haratorwa komite yose nyuma y’uko babiri birukanywe ku myanya yabo, naho Andrew Mpuhwe Rucyahana wari Umuyobozi w’Akarere wungirije ushinzwe Iterambere ry’Ubukungu akegura ku mirimo ye ku wa 24 Nyakanga 2023.

Mu Karere Gakenke haratorwa usimbura Umuyobozi w’Akarere Jean Marie Vianney Nizeyimana, na Marie Chantal Uwanyirigira wayoboraga Akarere ka Burera, bombi birukanywe mu myanya bari barimo.

Mu Karere ka Gicumbi ho nta matora yabaye, kuko Nzabonimpa Emmanuel wahoze ayobora ako Karere, aherutse kugirwa Umunyamabanga Nshingwabikorwa w’Agateganyo w’Intara y’Amajyaruguru, tariki 08 Kanama 2023, ariko Minisitiri w’Ubutegetsi bw’Igihugu, Musabyimana Jean Claude, akaba aherutse kubwira abatuye mu Karere ka Gicumbi ko n’ubwo uwo muyobozi ari mu zindi nshingano, hari ubwo yazabagarukira agakomeza inshingano ze zo kubayobora.