Iyi nka yahawe Nyirabahizi yiswe Kiroko cya Manchester United

Babitangaje ku gicamunsi cyo ku wa 24 Kamena 2023, ubwo bashyikirizaga inka uwarokotse Jenoside utishoboye, wo mu Murenge wa Gitoki mu Karere ka Gatsibo.

Kananga Emmanuel, umwe mu bafana b’iyo kipe yo mu cyiciro cya mbere mu Bwongereza, avuga ko iki gikorwa cyo kuremera uwarokotse Jenoside utishoboye ari ngarukamwaka, kandi kigakorwa mu minsi 100 yo kwibuka Jenoside yakorewe Abatutsi mu 1994.

Avuga ko ibi bikorwa mu rwego rwo gushyigikira gahunda yatangijwe na Perezida wa Repubulika, yo koroza Abanyarwanda inka ndetse no kugaragaza ubudasa bwabo nk’abafana ba Manchester, aho batagomba kuba abavuzanduru gusa ahubwo banashyigikira gahunda z’Igihugu.

Ati “Twasanze tugomba gushaka ubudasa budutandukanya n’abandi bafana, tutagomba gutwarwa n’amarangamutima yo gufana gusa, ntitube abafana b’abavuzanduru twirukanka ku misozi twagiye guhurira ahantu berekana imipira, ahubwo dufite n’inshingano zo kwita kuri bagenzi bacu batishoboye.”

Abaturanyi bishimiye ko mugenzi wabo yorojwe

Umunyamabanga Nshingwabikorwa w’Umurenge wa Gitoki, Rugengamanzi Steven, avuga ko kuba abafana b’iyo kipe bishakamo ubushobozi bakoroza utishoboye, bikwiye no gutera ishyari abafana b’andi makipe nabo bakajya bagira ibikorwa bakora bigamije kuzamura imibereho y’abaturage, aho guhanganira ku makipe bakunda.

Agira ati “Yego twagira umwanya wo kujya impaka bitewe n’iyo buri wese afana, ariko na nyuma tukibuka nk’abanyagihugu ko tugomba kugira ibikorwa bifasha abatishoboye haba kububakira, kubishyurira mituweli n’ibindi, aho kubaratira amakipe dufana.”

Nyirabahizi Pelagie warojwe inka, avuga ko ubundi yavukiye mu nka ndetse azibyukiramo, ariko ngo abishe umuryango we n’inka ntibazisize.

Avuga ko kuba yarabashije kurokoka, akitabwaho mu buryo bwose bushoboka, byamuhaga n’ikizere cyo kongera gutunga inka.

Ati “Navukiye mu mata nyabyirukiramo ariko abicanyi bantwariye umuryango banatwara ibyacu, ariko nongeye kwishima ndetse imyaka 63 nari mfite ngiye kugaruka muri 40. Iyi nka izampa ifumbire ndetse n’inshuti kuko sinzanywa amata jyenyine nzayasangira n’abaturanyi.”

Bunamiye inzirakarengane zishyinguye muri uru rwibutso

Uretse inka ifite agaciro k’Amafaranga y’u Rwanda 400,000 yanahawe umunyu, imiti yo kuyivura no kuyoza ndetse n’ipompo n’icyemezo cy’uko inka ye iri mu bwishingizi, ku buryo ikibazo yagira yahita ashumbushwa.

Aba bafana ba Manchester United, mbere y’uko baza koroza Nyirabahizi, bahereye ku rwibutso rwa Jenoside rwa Kiziguro mu rwego rwo kumenya amateka ya Jenoside mu cyahoze ari Komini Murambi, ariko no kunamira inzirakarengane zirenga 20,000 zishyinguye muri urwo rwibutso.

Umuyobozi wa MMI, Lt Col Dr King KAYONDO n’abakozi ba MMI, bari kumwe n’abayobozi b’inzego z’ibanze n’izindi nzego z’umutekano mu Murenge wa Jali, basuye urwibutso rwa Jali, bashyira indabyo kandi bunamira abarenga ibihumbi 25 bashyinguye muri urwo rwibutso.

Semarenga Placide warokotse Jenoside yakorewe Abatutsi mu 1994, yatanze ubuhamya bugaruka ku bihe by’akaga banyuzemo muri Jenoside yakorewe Abatutsi mu Murenge wa Jali no mu mirenge iwegereye irimo uwa Nduba na Gikomero.

Abandi bafashe ijambo barimo Lt Col Dr King KAYONDO, uhagarariye IBUKA mu Karere, ndetse na Jean Marie Vianney Ntaganzwa, Umuyobozi ushinzwe abakozi mu Karere ka Gasabo akaba yari n’umushyitsi mukuru.

Mu ijambo ryabo bashimiye ingabo zahoze ari iza RPA zari ziyobowe na Perezida wa Repubulika Paul Kagame ku ruhare rukomeye bagize mu guhagarika ubwicanyi no gutabara Abatutsi mu rugamba rwo kubohora Igihugu.

Abakozi b’Ikigo cya Gisirikare cy’Ubwishingizi ku Ndwara (MMI), bagabiye inka zirindwi abarokotse Jenoside yakorewe Abatutsi batishoboye batuye mu Mirenge ya Jali na Nduba, mu Karere ka Gasabo.

Iki gikorwa cyahuje urubyiruko rusaga 1000 rwaturutse mu turere twose tw’Igihugu tariki ya 9 Kamena 2023, kibera mu Ntara y’Amajyepfo muri Gymnase y’Akarere ka Gisagara.

Mukiza avuga ko yavutse nyuma ya Jenoside yakorewe Abatutsi, akura arerwa na Nyina gusa kuko se yaheze mu mashyamba ya Congo, akaba ari mu mutwe witwaje intwaro wa FDLR.

Mukiza ageze mu mwaka wa gatanu w’amashuri abanza, yaje kumenya amateka ya se umubyara ko yaheze mu mashyamba ya Congo, atangira kumva bimuteye ipfunwe kuko yari yarumvise ko yabyawe n’umubyeyi ufite umugambi wo gutera u Rwanda.

Ati “Kuva icyo gihe twagize ubwoba n’abavandimwe banjye dutangira kumva ko tuzagirirwa nabi n’ubuyobozi ndetse n’abaturage, kuko Papa wacu ari mu bashaka guhungabanya umutekano w’Igihugu”.

Mukiza avuga ko uretse ubwoba yagiraga nta kibazo na kimwe yigeze agira mu buzima bwe, cyo kuba yahorwa imigambi yase yo gutera u Rwanda.

Amashuri abanza yayize ku kigo bita Mbandari mu Karere ka Ngororero, yize ari umuhanga aba uwa mbere ariko kubera ko abantu bo muri ako gace ishuri ryari ryubatsemo, bari bazi ababyeyi be, yabagaho asa nk’uwihisha ariko nanone umutima ukamubwira ko atari ngombwa ko ntawe uzamuhora ibikorwa n’imigambi ya se.

Ati “Ndabyibuka niga mu mashuri abanza nabaga uwa mbere ndangiza natsinze neza ku rwego rw’igihugu, batangaje abazahembwa tugeze mu mwaka wa 4 w’amashuri yisumbuye, icyo gihe nari mu bagomba guhembwa ariko ntabwo nabonye igihembo, ntangira kubihuza nuko papa ari muri FDLR”.

Abandi bana bari bahembwe baje kubwira Mukiza ko na we ari ku rutonde rw’abagomba guhembwa, arebye amazina yasohotse mu kinyamakuru cy’Imvaho Nshya asanga aye ariho ariko atinya kujya kubaza ighembo cye.

Nyuma yaje kubiganiriza nyina amubwira ko bashobora kuba baramwimye mudasobwa kubera amateka ya se, amubwira ko ntaho bihuriye ahubwo agomba kubaza akamenya igihembo yagenewe akajya kugifata.

Mukiza avuga ko ngo mu mateka yabwiwe yatumye u Rwanda rubamo Jenoside, harimo n’ivangura ryakorerwaga Abatutsi ntibahabwe amahirwe yo kwiga amashuri yisumbuye, ndetse na Kaminuza.

Avuga ko yigaga yumva ko atazabona amahirwe yo kwiga kaminuza, ariko kugeza ubu ashima imiyoborere myiza y’u Rwanda kuko atigeze ahezwa mu myigire ye.

Mukiza arangije amashuri yisumbuye yabashije kwiga Kaminuza, arihirwa na Leta yaba we n’abavandimwe be.

Avuga ko nyuma yo kubona ko ibitekerezo bye bitandukanye n’ukuri yakuze abona ko imiyoborere myiza y’Igihugu, yafashe umwanzuro wo kugira amahitamo ye atandukanye n’aya se.

Ati “Jyewe n’abavandimwe banjye twahisemo kwifatanya n’Igihugu mu bushobozi bwose dufite, twitandukanya n’umubeyi wacu ushaka guhungabanya umutekano w’Igihugu cyacu. Ndashishikariza urubyiruko rugenzi rwanjye, abanduta ndetse n’abo nduta kwifatanya tukarwanya ushaka guhungabanya umutekano w’u Rwanda, ndetse bagafata iya mbere mu kumwamagana bakoresheje imbuga nkoranyambaga n’ubundi buryo bwose bwashoboka, bwo kwamagana abashaka kugarura amacakubiri mu Banyarwanda.

Ati “Nitwe mbaraga z’Igihugu, nitwe twagisenya cyangwa tukacyubaka. Turwane, duhangane n’abantu bapfobya Jenoside yakorewe Abatutsi, n’abavuga amakuru mabi atari yo ku gihugu cyacu”.

Reba ibindi muri iyi video:

Mushimiyimana avuga ko yarokotse Interahamwe akarokoka na macinya

Mushimiyimana avuga ko Abatutsi bari bavuye impande zitandukanye z’Igihugu bahungiye i Kabgayi bakicwa buri munsi ku buryo umuntu yabaraga ubukeye, kuko impunzi zari zaraturutse i Nyacyonga zagiraga uruhare mu kwica Abatutsi.

Mushimiyimana avuga ko ku itariki ya 31 Gicurasi 1994 yagerageje kwiyahura mu musarane kubera uburwayi bwari bumumereye nabi, yasaba umuti bakawumwima yumva nta buzima agitegereje usibye kwiyahura gusa, ananirwa guca mu mwobo w’umusarane.

Avuga ko kuri iyo tariki ya 31 Gicurasi aribwo byari bikomeye, kuko abasirikare n’Interahamwe bari barimo kwitegura guhunga, ariko bashaka kugenda bamaze kwica Abatutsi.

Agira ati “Ku itariki ya 02 Kamena 1994 twari twiteguye kwicwa kuko umusozi wose wa Kabgayi wari wagoswe n’Interahamwe n’abasirikare biteguye kuturimbura, maze mu masaha ya saa tatu n’igice twumva ya masasu y’Inkotanyi avuga nko gukoma amashyi, abicanyi barahunga turokoka dutyo”.

Abayobozi bari bitabiriye barimo na Guverineri Kayitesi Alice

Yongeraho ati “Nanjye wari urwaye macinya sinzi aho imbaraga zavuye, ubwo nari ndokotse kabiri kuko Inkotanyi zasanze ndwaye nenda gupfa mba ndokotse macinya, ndokoka n’Interahamwe”.

Mushimiyimana avuga ko yarokotse afite imyaka 17 ariko agira ubuzima bubi bw’ihungabana kuko yari asigaye wenyine mu muryango.

Agira ati “Nyuma y’imyaka 29 ishize ndi jyenyine mu buzima kuko ababyeyi n’abavandimwe banjye umunani nta n’umwe nasigaranye, byatumye nshaka kujya nkomeza kwiyambura ubuzima kubera kwiheba, ariko nariyubatse ndiho ku bw’Inkotanyi”.

Bamwe mu bashyitsi bari baje kwifatanya n’ab’i Kabgayi kwibuka

Mushimiyimana ubu ni umubyeyi w’abana batatu akaba ari Umuyobozi wungirije w’Inama Njyanama y’Akarere ka Gisagara, mu rwego rwo kwiyubaka akaba yarize amashuri kugeza muri Kaminuza aho arimo kwiga icyiciro cya nyuma cya Kaminuza (PhD).

Ubwo bibukaga ku nshuro ya 29 Abatutsi bazize Jenoside yakorewe Abatutsi i Kabgayi, abarokotse Jenoside bashimiye cyane izahoze ari ingabo za RPA Inkotanyi zabarokoye zikabasubiza ubuzima dore ko mu bihumbi 50 by’Abatutsi bari bahungiye i Kabgayi, abasaga ibihumbi 12 barokowe n’Inkotanyi.

Itariki ya 02 Kamena 1992 ntizibagirana mu mateka y’abari barahungiye mu bigo bitandukanye bya Kabgayi, kuko ari wo munsi wa nyuma bari bategereje kwicwa, ariko Inkotanyi z’amarere zirahagoboka, bake bari basigaye zibasubiza ubuzima.

Bashyize indabo ku rwibutso rwa Kabgayi

Hashyinguwe imibiri 47 yabonetse n’iyari iri mu mva zo mu ngo

Imiryango ihagarariye abashyinguye mu rwibutso rwa Kabgayi bashima ubutwari bw’Inkotanyi

Imibiri 1,236 yabonetse mu isambu ya Paruwasi ya Mibilizi kuva mu kwezi kwa Werurwe, indi mibiri ine (4) iboneka mu yindi mirenge.

Iyi mibiri yashyinguwe mu rwibutso rwa Mibilizi aharuhukiye indi mibiri y’Abatutsi bishwe mu gihe cya Jenoside.

Minisitiri w’Ubumwe bw’Abanyarwanda n’Inshingano Mboneragihugu, Dr. Bizimana Jean Damascene, yafashe mu mugongo ababuze ababo muri Jenoside yakorewe Abatutsi, anabibutsa ko Igihugu gikora ibishoboka byose ngo Jenoside itazongera kubaho ukundi, ati "Mufite u Rwanda rubakunda rutari rwa rundi rwamennye amaraso y’abanyu."

Minisitiri Dr. Bizimana yamaganye ibivugwa na Twagiramungu Faustin

Minisitiri Dr. Bizimana yavuze ko kuba hari Abanyarwanda bahisha amakuru y’ahari imibiri y’Abatutsi bishwe mu gihe cya Jenoside ari ikimenyetso cyo kuyipfobya no kugira ingengabitekerezo yayo.

Ati “Ndagaya abantu benshi bapfobya Jenoside yakorewe Abatutsi cyane cyane ababa mu bihugu by’amahanga bakomoka mu Karere ka Rusizi harimo Twagiramungu Faustin wiyita Rukokoma”.

Minisitiri Dr. Bizimana Jean Damascene

Minisitiri Dr. Bizimana yagaye umusaza Twagiramungu uvuga ku mugaragaro ko atemera Jenoside yakorewe Abatutsi, akavuga ko bitangaje cyane kuko iyo mvugo yayadukanye kuva agiye kuba mu Bubiligi, itandukanye n’ibyo yavugaga akiri Minisitiri w’Intebe w’u Rwanda, n’ibyo yavuze akanabyandika mu gihe yazaga kwiyamamaza mu mwaka wa 2003 ashaka kuba Perezida w’u Rwanda icyo gihe.

Ati “Nibutse ko Twagiramungu igihe yari Minisitiri w’Intebe yagiye mu bikorwa byo kwibuka Jenoside yakorewe Abatutsi nk’iki turimo hano i Mibilizi akamagana abyibwirije intagondwa za Hutu Power zateguye Jenoside zikanayishyira mu bikorwa. Twakwibaza tuti kuki icyo gihe yemeraga Jenoside ubu akaba ayihakana, nyuma yo gutsindwa amatora akerekeza iyo mu Bubiligi? Ni ikimenyetso ko abeshya kandi ukuri akuzi”.

Minisitiri Bizimana yavuze ko Twagiramungu Faustin tariki 12 Nzeri 1994 ubwo yari Minisitiri w’Intebe w’u Rwanda yahaye ikiganiro umunyamakuru Gerard Papy wakoreraga ikinyamakuru La Libre Belgique cyo mu Bubiligi avuga ko Leta y’u Rwanda itagomba kugirana imishyikirano na Leta y’Abatabazi n’ingabo za EX-FAR zatsinzwe zimaze gukora Jenoside, ariko ubu Twagiramungu yabaye inshuti bikomeye n’abo yamaganaga kubera Jenoside basize bakoze mu Rwanda.

Ati “Ikigaragara ni uko hakiri abandi bantu hanze y’Igihugu bagifite ingengabitekerezo ya Jenoside kandi bagishaka kuyibiba mu Banyarwanda. Urubyiruko ni mwe mbaraga z’ejo hazaza, turabasaba kwamagana no kwirinda ibihuha binyuzwa ku mbuga nkoranyambaga kuko bigamije amacakubiri no gutandukanya Abanyarwanda”.

Minisitiri Bizimana yagarutse no ku bamenyekanye mu mwambaro w’Abihayimana bakomoka muri Cyangugu, barimo Rudakemwa Fortunatus, Murengerantwari Théophile na Thomas Nahimana, agaragaza ko babaswe n’ingengabitekerezo ya Hutu Power, asaba urubyiruko kugendera kure imvugo zabo.

Minisitiri Bizimana yashimye intambwe imaze guterwa mu kwimakaza ubumwe bw’Abanyarwanda aho igeze kuri 94,3%, avuga ko nubwo Jenoside yashegeshe u Rwanda ariko Abanyarwanda bataheranywe, asaba Abanyarwanda gukomeza guharanira ko ubumwe bugera ku 100%.

Mu buhamya bwatanzwe na Kabera Oswald uhagarariye imiryango yashyinguye ababo, yavuze ko abari bahungiye kuri Kiliziya ya Mibilizi bishwe urubozo n’agashinyaguro ndetse hanahishwa amakuru y’aho bashyizwe ngo bashyingurwe, bakaba bagiye gushyigurwa nyuma y’imyaka 29.

Ati “Ibitero bikaze byaje hano i Mibilizi biratwica, bamwe tubasha kurokoka ariko turashimira Inkotanyi zadufashije tukarokoka tukaba twarongeye kwiyubaka”.

Abayobozi mu nzego zitandukanye bifatanyije n’abakomoka i Rusizi ndetse n’abaharokokeye mu gushyingura mu cyubahiro imibiri yabonetse

Bamwe mu bayobozi bitabiriye ijoro ryo kwibuka

Babigaragarije mu ijoro ryo kwibuka ku nshuro ya 29 Jenoside yakorewe Abatutsi ku rwibutso rwa Jenoside rwa Kabgayi, ahatanzwe ubuhamya bugaragaza ukuntu Abatutsi bavanguwe bagatotezwa bakagirirwa nabi mu bihe bitandukanye, kandi bigakorwa hibasirwa ibyiciro by’abakuru n’abato ntawe ubarengera kandi hari ubuyobozi.

Mu buhamya bwa Thomas wo mu Murenge wa Muhanga warokokeye i Kabgayi, yavuze ko kuva akiri umwana yahohoterwaga n’abana b’Abahutu, ariko ntagire umurengera haba mu nzira ava ku ishuri, haba no mu bindi bikorwa birimo n’imikino y’abana, kugera igihe yigiriye inama yo kuva mu ishuri.

Asobanura ko bigeze no kumukubita bakamukuramo urwara rw’ino, ariko yaregera umuyobozi w’ishuri hakabura uhanwa, ubwo yigaga mu mwaka wa kabiri w’amashuri abanza ahitwaga mu Kibanda, mu Murenge wa Muhanga.

Avuga ko yatangiye kubona ko Abatutsi bazicwa mu cyiswe Muyaga, aho basahuye imitungo y’iwabo irimo n’inka atazibagirwa yabyaraga inyana yitwaga Gacinya, ndetse bakabatwikira inzu, bimara igihe gitoya babacira ‘Ikiganda’ (ikimeze nk’inzu y’ubuhungiro) baba ari cyo baturamo.

Avuga ko nyuma yo gusubira ku ishuri ageze mu mwaka wa kane w’amashuri abanza yakomeje guhohoterwa we na bagenzi be, kugeza igihe babimuriye ku kigo bigaho babajyana ku kindi kigo, ariko nabwo ntibiborohere kuko kuva aho bigaga bakomezaga guhohoterwa.

Agira ati, “Twaratahaga abana b’Abahutu bakadukoreraho ubufindo bwo kudutega inkoni ngo uyirenga akubitwe, ariko n’utanayirenga ugaca hepfo yayo urakubitwa, tukemera tugakubitwa, twebwe ntawashoboraga kubibishyura”.

Avuga ko mu 1978 yavuye mu ishuri burundu kubera kumutesha agaciro we na bagenzi be, se amuha isambu atangira ubuhinzi bw’urutoki akomeza ubuzima nabwo butari bumeze neza, kuko no mu baturage Umututsi yahoraga ahohoterwa.

Agira ati, “Uwitwaga Umututsi wese yahoraga akubitwa ntahabwe ijambo yajya mu kabari nk’abandi agakubitwa, mbese ubuzima bukomeza kumera nabi”.

Natanze icyiru ngo nasuzuguje umugore wa mukuru wanjye w’Umuhutukazi

Avuga ko mu 1992 mukuru we wari warashatse Umuhutukazi bagiranye amakimbirane aturutse ko ngo asebya umuryango kuko yita ku Batutsi, dore ko yari agiye no kwicwa kubera ko yasuye mwene wabo wari umaze igihe gito afunguwe mu bitwaga ibyitso by’Inkotanyi.

Icyo gihe ngo wa mukuru we yagize umujinya bituma bamuhimbira ibirego, ko arimo kubasebya no kwambika isura mbi umuryango, bituma bajya kumurega kuri Komini ngo avuge ikibimutera.

Bacanye umuriro mu ijoro ryo kwibuka i Kabgayi

Agira ati, “Hashize iminsi ibiri mukuru wanjye n’umugore we baraza bavuga ko ngenda mbagambanira mbavuga uko batari bajya kundega kuri Komini ya Buringa, mpasanga Burugumesitiri bitaga Nyaminani baza kumpanisha igihano cyo gutanga ibihumbi bitandatu ko nasuzuguje umugore wa mukuru wanjye”.

Avuga ko mukuru we n’umugore we bamureze ibintu byinshi bibaho n’ibitabaho, ariko arabihakana, ndetse banatumiza uwari Resiponsabure wa Serire y’iwabo na we aje amutangira ubuhamya bw’uko nta kosa amuziho, ariko baranga baramuhana.

Agira ati, “Natanze umugabo kuri resiponsabure barankwena ngo umva uko kivuze, ariko aje avuga ko usibye ibibazo bisanzwe na mukuru wanjye nta kosa yigeze anshinja, ndetse avuga ko n’abaturage bashobora kundenganura, ariko bantegeka ko ntanga icyiru cy’uko nasuzuguje umugore wa mukuru wanjye, ndigura ntanga ayo bitandatu barandekura”.

Avuga ko bakomeje kumwibasira kugera mu 1994, ubwo ku itariki ya 08 Mata ibitero byaje bigahita bitwara inka ze, bagasiga bamubwiye ko ntacyo yavuga kuko bamugiriye impuhwe bagatwara inka we ntibamwice.

Bashyinguye mu cyubahiro imibiri y’Abatutsi yabonetse

Abarokokeye i Kabgayi bagaragaza ko n’ubwo habayeho igihe kibi cyo guhohoterwa n’ubuyobozi ndetse n’abaturage, ubu bishimira ko bongeye kwiyubaka bagakora ibikorwa bibateza imbere.

Bagaragaza ko ubuyobozi bwiza bubaha icyizere cyo gukomeza ubuzima, kuko uburenganzira bambuwe ubu babusubijwe, kandi bakaba babanye neza n’abaturanyi kubera gahunda y’ubumwe n’ubwiyunge yaciye amacakubiri mu Banyarwanda.

ADEPR Gasave bibukiye mu Rusengero

Umudiyakoni waho witwa Rutagarama Wenceslas waharokokeye avuga ko muri 1994 abahungiye muri urwo rusengero bageraga kuri 200, uwari umushumba wabo Pasiteri Habineza Joseph akabahisha abicanyi.

Rutagarama ati "Pasiteri Habineza Joseph yabaye umushumba mwiza kuko yahagaze mu nshingano abwira abantu ko nta Muhutu nta Mututsi uri hariya ahubwo hari Abakristo, ubwo ni ubutwari, turabona ko yahagaze neza mu mwanya we".

Rutagarama avuga ko Jenoside muri biriya bice itahatinze, kuko ngo nyuma y’uko Inkotanyi zirashe burende y’ingabo zari iza Leta Ex FAR i Kagugu ku itariki ya 11 Mata 1994, Gisozi abicanyi bahise bayihunga.

Pasiteri wa ADEPR Gasave, Rev Binyonyo hamwe n’Ubuyobozi bw’Umurenge wa Gisozi na Polisi bashyira indabo ku Rwibutso ruri ku rusengero

Rutagarama avuga ko ku munsi wakurikiyeho ku itariki ya 12 Mata, Pasiteri Habineza na we n’ubwo ngo atishinjaga ubwicanyi, yahungiye rimwe n’abari i Gasave aza kugaruka Kigali yose yamaze gufatwa.

Rutagarama avuga ko nyuma yaho Pasiteri Habineza Joseph yaje kwitaba Imana ageze mu zabukuru, n’ubwo ngo yumvaga yamusabira gushyirwa mu barinzi b’igihango.

Umushumba wa Paruwasi ya Gasave, Rev Pasiteri Binyonyo Mutware Jérémie avuga ko yigiye kuri Pasiteri Habineza uko yabungabunga intama(Abakristo) akemera no kuzipfira.

Ubuyobozi bwa ADEPR Gasave bwabanje kujyana bamwe mu banyetorero biganjemo urubyiruko ku Rwibutso rwa Kigali ku Gisozi, bajya kumva amateka ya Jenoside yakorewe Abatutsi mu 1994.

Rev Binyonyo akavuga ko biyemeje kujya bigisha abayoboke b’Itorero ADEPR kurwanya Jenoside no kwirinda amacakubiri, bashingiye ku Ijambo ry’Imana.

Rev Binyonyo ati "Twigisha ko abantu bose bagomba kugira ubumwe, Imana yaremye umuntu umwe, yaremye Adamu n’umufasha we Eva, abantu bose ni ho bakomotse, nta mpamvu y’amacakubiri n’ubwo yazanywe n’abakoroni, ariko ntabwo tuyemera".

Umubyeyi usengera muri ADEPR Gasave witwa Ernestine Kagoyire avuga ko baramutse batabaye maso, abasize bakoze Jenoside bahunze Igihugu ngo bashobora kwanduza urubyiruko bakoresheje ibyo batangaza ku ikoranabuhanga.

Kagoyire akavuga ko bagiye kuba hafi urubyiruko bakarwigisha gukunda Igihugu no kwima amatwi ibivugirwa kuri murandasi bitarwubaka.

Umuyobozi wa Ibuka mu Murenge wa Gisozi, Sangwa Didier Seth asaba ADEPR n’andi madini n’amatorero muri rusange, kwigisha mu nsengero umuco nyarwanda wo gukundana no gutabarana.

Mu rusengero rwa ADEPR Gasave ngo hahishwemo Abatutsi barenga 200 mu gihe cya Jenoside

Babanje gusura urwibutso rwa Jenoside bajyanye urubyiruko

Bamwe mu bitabiriye kwibuka abagore n’abana

Mu biganiro byatangiwe mu gikorwa cyo kwibuka abana n’abagore basaga 470 biciwe kuri Duwane mu Murenge wa Bweramana mu Karere ka Ruhango, byagarutse ku miterere y’umwana ko aba ameze nk’imbuto ibibwa ikazera, kuko umwana aba azakura akavaho undi muryango.

Mu mvugo y’Itorero ry’Igihugu, abana kugeza ku myaka itanu bafite amazina arimo Ibirezi n’Imbuto, bigasanishwa neza n’ubwiza bw’umwana n’ubutunzi bumuhishemo nk’imbuto yabibwe izavamo ibitunga umuryango mugari cyangwa kwaguka kwawo.

Minisitiri w’Iterambere ry’Umuryango, Prof. Bayisenge avuga ko kwica abagore n’abana nk’abantu ubusanzwe bafatwa nk’abanyantege nke, ari kimwe mu bimenyetso bigaragaza uko Jenoside yari igamije kuzimya Umututsi aho ava akagera.

Prof. Bayisenge yagize ati “Kwica abagore n’abana ni ikimenyetso cyo kuzimya burundu no gukuraho uwitwaga Umututsi wese aho ava akagera, kuko umugore ni we utwita akabyara, umwana akazakura akavamo inkingi y’umuryango, kubica rero ni umugambi wo guzimya umuryango ngo utazongera gushibuka”.

Minisitiri Bayisenge avuga ko abakoze Jenoside bari bagizwe n’urubyiruko, uyu munsi hakaba habyiruka urundi rubyiruko rukwiye kugira uruhare mu kubaka Igihugu, ari na ho ababyeyi bafite umukoro ukomeye wo kwigisha urubyiruko rufite mu biganza ejo hazaza h’Igihugu.

Agira ati, “Amateka atagoramye abana bazayakura iwacu mu miryango, ni ho rero nk’ababyeyi dusabwa kwigisha urubyiruko kuko umuryango ni wo gicumbi cy’uburere, turasabwa rero gutuma imiryango yacu iba isoko y’amahoro, indangagaciro n’imibereho myiza y’urubyiruko”.

Minisitiri Bayisenge avuga ko kwica abagore n’abana byari bigamije kurimbura Umututsi wese ngo hatazagira ushibuka

Asaba kandi urubyiruko kwirinda amacakubiri ayo ari yo yose ahubwo rukigira ku miyoborere myiza, aho Igihugu gisaba abagituye kubana neza no gukora cyane kugira ngo bazagire Igihugu kizira umwiryane ahubwo cyubaha uburenganzira bwa buri wese.

Agira ati “Dufite aho dukura amateka meza nko ku ngabo zari iza RPA Inkotanyi kuko zabohoye u Rwanda zigarura ituze n’ubuzima. Nimwigire kuri urwo rugero kuko aho Igihugu kigeze cyiyubaka hari mu biganza byanyu. Mufite ikoranabuhanga ryabafasha kwiga amateka atagoramye kandi nta rwitwazo rwo kuvuga ko mukiri bato kuko ntakibuze ngo umusanzu wanyu muwutange”.

Kwica abagore n’abana bari bahungiye kuri Duwane mu Murenge wa Bweramana mu Karere ka Ruhango, biri mu bituma Akarere ka Ruhango kaza ku mwanya wa gatatu mu kugira imiryango myinshi y’Abatutsi yazimye kuko gafite isaga 1000.

Abana bazanye indabo ahicirwaga abandi bana

Imiryango yazimye ibarirwa hafi mu bihumbi 16, igizwe n’abantu hafi ibihumbi 69, bikaba bigaragaza kubangamira no guca intege umuryango wari ushinzwe kurindwa na Leta nk’uko biteganywa n’itegeko Nshinga rya Repubulika.

Uturere twa Karongi, Nyamagabe na Ruhango tuza ku myanya ya mbere mu kugira imiryango y’Abatutsi bishwe ikazima burundu, bikaba bigaragaza ko Jenoside yari igamije kwica Umututsi uwo ari we wese kugira ngo atazongera kubaho.

Abarokotse Jenoside kuri Duwane bavuga ko n’ubwo inzu y’amateka yari yahungiyemo abo bagore n’abana yamaze kugurwa n’Akarere ka Ruhango, hari n’indi byegeranye na yo yicirwaho impinja zikubiswe ku nkuta na yo bifuza ko yagirwa ikindi kimenyetso cy’amateka.

Minisitiri Bayisenge ashyira indabo ahiciwe abana kuri Duwane

Inzu yiciwemo abagore n’abana yari iy’umuturage usanzwe ubu yaguzwe n’Akarere ka Ruhango igirwa ikimenyetso cy’amateka ya Jenoside

Guverineri Kayitesi ashyira indabo ku nzu y’amateka y’ahiciwe abana muri Jenoside

Amwe mu mazina y’abana n’abagore biciwe kuri Duwane

Ni igikorwa cyatangiriye kuri CHUK ahashyizwe indabo ku rwibutso rwaho, bakomereza ku Gisozi aharuhukiye imibiri isaga ibihumbi 250 y’abazize Jenoside yakorewe Abatutsi, barabunamira ndetse bahashyira indabo.

Abatanze ubuhamya muri icyo gikorwa bavuze amateka yabo kuva bagitangira gukora muri CHUK, ivanguramoko ryagaragaye muri bamwe mu bo bakoranaga, aho bagize uruhare mu bwicanyi ariko hari n’abandi bagize umutima wo kurokora bagenzi babo.

Umuyobozi mukuru wa CHUK, Dr Mpunga Tharcisse, yahumurije abarokotse bakoraga muri ibyo bitaro, anizeza urubyiruko ko Jenoside itazongera ukundi.

Yagize ati “CHUK mbere ya Jenoside byari ibitaro bikomeye bibamo abaganga b’inzobere, bafite ubumenyi ariko bijanditse muri Jenoside. Abandi barahizwe bicwa na bagenzi babo, haba mu kazi ndetse n’imiryango yabo, byerekana ko abaganga bateshutse ku mahame yabo”.

Ati “Jenoside yatubereye ikimenyetso gikomeye, ko uwo uri we wese igihe kigeze ushobora gutakaza ubuzima. Abakozi dufite ubu baracyari bato, bari mu gihugu cyiza kiriza amacakubiri, umukoro bafite ni uwo guhindura amateka yaranze Igihugu babihereye mu gutanga serivisi batavangura, kugira ngo bagarurire icyizere Abanyarwanda bari baratakaje kuko muganga wari ushinzwe kubavura yahindutse umwanzi akanabica”.

Umuyobozi mukuru w’ishami ry’ubuvuzi muri Minisiteri y’Ubuzima, Dr Ntihabose Corneille, yatanze ubutumwa agendeye ku miterere ya Jenoside yakorewe Abatutsi, cyane cyane mu rwego rw’ubuvuzi kuko harimo ibice bibiri aho abaganga n’abaforomo bakoze Jenoside, n’ikindi gice cy’Abatutsi bazize Jenoside.

Ati “Turinenga ko abaganga batatiriye inshingano, impuhwe, amahame y’umwuga yo kwita ku barwayi, maze bajya mu byo bigishwaga byo kwanga no gukora Jenoside. Ikindi ni umwanya wo kwibuka abari Abaforomo n’Abaganga bazize Jenoside, rero ubutumwa dutanga ni ihumure”.

Yasobanuye ko kuri ubu mu gukumira ko ayo mahano yazongera kubaho, bashishikariza abaganga bose gukorera hamwe.

Ati “Mu guharanira ubumwe, ubu dushishikariza abaganga gukorera hamwe haba mu kazi na nyuma, ku buryo baganira ku mateka mabi yoretse Igihugu, ndetse bakareba aho kigeze hafatwa umwanzuro wo gutera imbere, hasigasirwa ibyagezweho”.

Avuga ko impamvu yabyo ari ukugira ngo abantu badakomeza guhugira mu kazi kenshi bityo bagatakaza ubumwe bwabo, buri wese yihugiraho n’ibindi, kuko baba biyibagije aho Igihgu cyavuye.

Hari mu gikorwa cyo kwibuka ku nshuro ya 29 Jenoside yakorewe Abatutsi mu 1994, banazirikana abacuruzi bazize Jenoside, cyabaye ku wa 26 Gicurasi 2023. Ni igikorwa cyabereye i Huye.

Umuyobozi w’urugaga rw’abikorera mu Ntara y’Amajyepfo, Dr Céléstin Kubumwe, yagize ati “Amateka ya Jenoside mu Rwanda agaragaza bamwe mu bikorera bafashe iya mbere muri Jenoside barica, barasahura, abandi batanga inkunga zaguze ibikoresho byakoreshejwe mu kwica Abatutsi.”

Yunzemo ati “Twavuga ko bakoreshaga ubushobozi bwabo mu gusenya Igihugu. Twebwe dukwiye kuzirikana inzirakarengane zishwe, tukanaharanira ko Jenoside itazasubira ukundi, kandi tugasubiza icyizere cy’ubuzima abarokotse Jenoside.”

Hon. Senateri Innocent Nkurunziza na we wari uhari, yasabye abikorera bo mu Ntara y’Amajyepfo, ndetse n’Abanyarwanda muri rusange kunga ubumwe no kubaho nta vangura, kugira ngo babashe gukomeza kugira uruhare mu iterambere ry’Igihugu.

Ati “Uyu munsi Abanyarwanda dusabwa ko aho turi hose twunga ubumwe, nta vangura iryo ari ryo ryose, ryaba irishingiye ku karere, ku idini cyangwa ubwoko ndetse na buri wese, yaba umugabo cyangwa umugore, bakumva ko bafite uruhare rungana mu guteza imbere Igihugu cyabo.”

Yunzemo ati “Aha rero nkaba ngira ngo mvuge ko uruhare rw’Urugaga rw’abikorera rukenewe mu kuzuzanya, no kugira uruhare rufatika mu kubaka ubukungu bw’Igihugu.”

Senateri Innocent Nkurunziza

Muri iki gikorwa cyo kwibuka, abikorera bo nu Ntara y’Amajyepfo baremeye imiryango y’Abarokotse Jenoside batishoboye bo mu Turere two mu Majyepfo, mu rwego rwo kubafasha gukomeza kwiyubaka.

Hatanzwe inka 15 n’ibiribwa bifite agaciro ka Miliyoni zirenga ebyiri. Hari kandi n’inzu ebyiri zirimo kubakwa.

Dr Céléstin Kubumwe, Perezida wa PSF mu Majyepfo

Depite Mukabalisa ashyira indabo ku rwibutso rwa Mayunzwe

Nzaratsi ni umusozi abicanyi bazamuragaho Abatutsi bayiye kubicira urw’agashinyaguro, ku rutare ruriri mu mpinga yawo, ari na wo bise Karuvariyo, umusozi uzwi muri Bibiliya ku bemera Yezu Kristu ko ari ho yazamuwe akajya kubambirwa mu mpinga yabo mbere y’uko yicwa.

Nkurayija Jean Claude uhagarariye imiryango y’Abafite ababo bashyinguye mu rwibutso rwa Mayunzwe, avuga ko hamaze kuba ibiganiro n’abaturage bakemera gutanga metero imwe y’ubutaka i buryo n’i bumoso, kugira ngo inzira yaguke, ariko byaba byiza Akarere kagize icyo gakora kugira ngo nibura inzira igere kuri metero eshanu z’ubugari.

Avuga ko iyo nzira izaba ireshya na kilometero imwe n’igice uvuye ku Rwibutso rwa Mayunzwe, ari yo yari inzira yanyuzwagamo Abatutsi bagiye kwicirwa ku gasongero k’umusozi wa nzaratsi wariho urutare babiciragaho.

Agira ati “Igihugu cyadusubije uburenganzira, turashimira Leta yatumye abarokotse Jenoside bumva gahunda y’ubumwe n’ubwiyunge byatumye tubana n’abishi bacu, abana babo bakaba babana n’abacu. Nta kidodo na kimwe tugifite ahubwo natwe tureba iterambere ry’Igihugu n’iryo dufatanyije. Turashimira n’abaturage bemeye kuduha ku butaka bwabo ngo twubake ikimenyetso cy’amateka y’inzira abacu banyuzemo bajya kwicwa”.

Abasenateri n’Abadepite batabaye i Mayunzwe

Kabanda Callixte, umwe mu bagize inama nkuru ya IBUKA ku rwego rw’Igihugu, avuga ko mu bimenyetso by’amateka hanazirikanwa ibijyanye n’inzira yo kurokora bamwe mu batutsi barokowe n’izahoze ari Ingabo za RPA Inkotanyi, aho hari zimwe muri izo ngabo zahasize ubuzima.

Kabanda avuga ko arimo gukora ubuvugizi bujyanye no Kwibuka kugira ngo abana bakomoka ku barokotse Jenoside, bazumve amakuru nyayo ashingiye ku bimenyetso by’amateka ya Jenoside.

Agira ati "Abana bacu bakeneye kumenya aho amajwi y’ababyeyi babo yumvikanye bwa nyuma bikaba bisaba ko aho hose habungabungwa, ku butaka bwamenetseho amaraso yabo, ndetse ahantu hose mu matongo ayo mateka akazurwa hakongera kubaho".

Avuga ko abakoze Jenoside ntawe uzabirukankana ku gasozi cyangwa ngo babavugirize induru, ahubwo bakeneye guhabwa imibereho bagakora muri ibyo bikorwa byo kuzura imiryango bashenye, byo kongera kuhubaka, kongera gufukura amariba n’ibindi bikorwa.

Bamwe mu bitabiriye kwibuka i Mayunzwe

Avuga ko abishwe bagiye banze Igihugu kuko nacyo cyari cyabanze, ariko ko abana barokotse n’urubyiruko bakwiye kubyaza umusaruro umwanya Igihugu cyiza cyabahaye bakiteza imbere, bikabera isomo abakoze Jenoside.

Agira ati "Hari umubyeyi wagiye kwicwa bamusaba ikintu yifuza mbere yo kwicwa, asaba abicanyi kubanza kwica abana be kuko yatekerezaga ko kubasiga ku Isi ntaho bazaba basigaye mu Gihugu cy’abagome. Yabikoze yihebye azi ko gusiga abana be ntacyo bizaba bibamariye, barabica bamusorezaho, urumva ko Abantu bari barihebye kubera Igihugu cyabanze”.

Perezida w’Inteko Ishinga Amategeko, Mukabalisa Donatille, avuga ko Kwibuka no kumva amateka ashaririye Igihugu cyanyuzemo, ari ugufata umwanya wo kwiyemeza kurwaniriria Igihugu, kugira ngo gisubirane ishema cyambuwe n’abicanyi.

Avuga ko uburyo Abatutsi bateshejwe agaciro mbere yo kwicwa, bikwiye gutuma hafatwa umwanya wo kureka ibindi byose hakabaho kubunamira, no kudaheranwa n’amateka mabi.

Depite Mukabalisa asezeranya abarokokeye i Mayunzwe gukomeza kubaka ibimenyetso by’amateka

Agira ati "Abarokotse bahisemo kureba imbere kuko basangaga bafite inshingano zo kubaka Igihugu, nk’uko abo twibuka uyu munsi bari bafite intumbero yo guharanira amahoro no guteza imbere Igihugu n’ubwo bitabakundiye".

Asezeranya Abarokotse i Mayunzwe ko abagize Inteko Ishinga Amategeko batazabatererana, mu bikorwa byose batekereza, byo gusigasira ibimenyetso by’amateka ya Jenoside yakorewe Abatutsi i Mayunzwe.

Urwibutso rwa Mayunzwe ruruhukiyemo abiciwe ku musozi wa Nzaratsi wiswe Karuvariyo

Abitabiriye kwibuka i Mayunzwe

Bacanye urumuri rw’icyizere

Iki cyifuzo bongeye kukigaragaza ku Cyumweru tariki 21 Gicurasi 2023, ubwo muri iri shuri bibukaga ku nshuro ya 29 Jenoside yakorewe Abatutsi mu 1994.

Uhagarariye AERG muri PIASS, Nyilimbibi Gilbert yagize ati “Mutwereke aho baguye. Niba ari aho bararaga tubimenye, niba ari na hano turi tubimenye. Hano haba harimo abanyeshuri b’abanyamahanga, ku buryo iyo natwe Abanyarwanda turimo tubazanya amakuru, usanga bavuga ko bigayitse.”

Yunganiwe na Claudine Murekatete, umwe mu bagize Komite nyobozi ya IBUKA mu Karere ka Huye, na we wagize ati “Nk’uko tubizi, abantu bicwaga abandi bahari. Ntabwo bivuze ko ahangaha habuze umuntu n’umwe wahagarara ku makuru y’uburyo abo bantu bishwe n’aho bajugunywe, kugira ngo bahakurwe, bashyingurwe mu cyubahiro, n’imiryango yabo iruhuke ku mitima.”

Bifuje ko hamenyekana irengero ry’Abatutsi biciwe muri PIASS

Yanavuze ko kuba harabuze utanga amakuru ari ibyo kugawa, afatiye ku kuba muri PIASS harigaga abantu batozwa kuba abakozi b’Imana, maze yungamo ati “Byari bikwiye ko niba koko tuzi kandi twubaha Imana dukorera, aha haba umwihariko wo kugira ngo hakorwe ikintu cy’ubumuntu, wenda turenge Jenoside yabaye ariko noneho tugire umukoro wo kuvuga ngo hariya hari abantu, bakurwemo, bashyingurwe mu cyubahiro.”

Umuyobozi w’ishuri PIASS, Dr Penine Uwimbabazi, avuga ko kugeza ubu Abatutsi bazize Jenoside bazwi muri iri shuri rikuru ry’Abaporotesitanti ari batandatu, harimo abanyeshuri batanu n’uwari umuyobozi muri ryo. Icyo gihe ryitwaga ishuri rya tewolijiya, ryabaye PIASS nyuma ya Jenoside, rimaze kongerwamo andi mashami.

Agira ati “Hari ubushakashatsi bwakozwe, tubasha kumenya ko hari abanyeshuri batatu muri bo baguye hano mu kigo, ariko mu by’ukuri ntiturabasha kumenya aho babashyize. Ubushakashatsi buracyakomeje, ariko turizera ko tuzageza igihe tubabona, na bo tukabashyingura mu cyubahiro.”

Umuyobozi w’Akarere ka Huye, Ange Sebutege, we yifuje ko ubushakashatsi ku kumenya amateka ya Jenoside muri PIASS bwakomeza, n’abanyeshuri bakaba babigiramo uruhare.

Yanasabye abanyeshuri guharanira kumenya amateka y’u Rwanda muri rusange, aho batazi bakaba basobanuza, kugira ngo bamenye aho u Rwanda rwavuye bityo babashe no kumenya aheza rurimo kugana, kandi na bo bagire uruhare mu kurwubaka.

Hashyizwe indabo mu mugezi wa Sebeya watawemo Abatutsi bishwe muri Jenoside

Umuhoza Marie Aimable, umubyeyi w’imyaka 62 warokokeye mu Murenge wa Nyundo, ufite abo mu muryango we batawe mu mazi, avuga ko gushyira indabo ku migezi bumva ko bahaye ababo icyubahiro.

Agira ati “Gushyira indabyo hano bituma numva ntuje mu mutima wanjye, numva nishimye ko ndi kumwe na bo uyu munsi”.

Abitabiriye igikorwa cyo kwibuka Abatutsi bishwe muri Jenoside batawe mu mazi, basabye ko hashyirwa urwibutso ku mugezi wa Sebeya, kugira ngo rufashe imiryango kwibuka neza ababo bahiciwe.

Umuhoza agira ati “Urwibutso kuri uyu mugezi ruzadufasha kwibuka ayo mateka mabi abacu bahuye nayo, kugira ngo nituhanyura tukareba amazina yabo, twumve ko ababyeyi bacu bahawe agaciro.”

Abanyeshuri na bo bitabiriye icyo gikorwa

Umuhuzabikorwa wa Dukundane, Sixbert Habimana, atangaza ko kwibuka abishwe muri Jenoside yakorewe Abatutsi bajugunywe mu mazi, ari ukubungabunga amateka y’Igihugu kandi bijyana no kurwanya ingengabitekerezo ya Jenoside.

Depite Jean Pierre Hindura, witabiriye igikorwa cyo kwibuka abishwe batawe mu mazi mu Karere ka Rubavu, yasabye ababyeyi kubwira abana babo amateka uko ari.

Agira ati "Hariho ababyeyi bamwe na bamwe bataravuga ukuri kuri Jenoside yakorewe Abatutsi n’ibyabaye. Ni byiza kwigira ku mateka kugira ngo bifashe urubyiruko kuyobora iki gihugu ".

Umugezi wa Sebeya usanzwe uhuza imirenge ya Kanama, Nyundo na Rugerero, wabaye igikoresho mu kwica Abatutsi, aho hari abatawe muri uyu mugezi ukabatembana mu kiyaga cya Kivu.

Abayobozi b’Akarere ka Rubavu n’abaturage bitabiriye icyo gikorwa

Bunamiye inzirakarengane ziruhukiye mu rwibutso rwa Kigali

Iyi Koperative ivuga ko aho Abanyamuryango bayo bari hose bazajya bafatanya na Leta kurwanya ingengabitekerezo ya Jenoside, binyuze mu kubwiriza abayifite.

Umwe mu bagize iyo Koperative, Muhumuza Iddi, avuga ko bumva ku maradiyo hari abantu bagifite ingengabitekerezo ya Jenoside ndetse no mu baturanyi babo ngo hari abayipfobya n’abayihakana.

Mu rwego rwo kwirinda kureberera, Abanyamuryango ba CODACE biyemeje ko mu gihe cyo Kwibuka bajya bakora ubukangurambaga mu baturanyi, bugamije kwibagiza abantu amateka mabi banyuzemo.

Muhumuza yagize ati "Tuzajya tugerageza tubabwirize, tube nk’Itorero tubabwire bumve, kuko nta kindi bakora uretse kugendera mu murongo mwiza wa Leta. Ntabwo tuzemera ko Igihugu cyacu cyasubira mu icuraburindi".

Umuyobozi wa Koperative CODACE, Nkusi Assiel, yibutsa abapfobya n’abahakana Jenoside yakorewe Abatutsi ko abayihagaritse, na we arimo, ko ntaho bagiye.

Ati "Nibasubize amerwe mu isaho kuko nta gihe batayipfobeje, ariko bamenye ko kuyipfobya no kuyihakana bitazigera bibaha imbaraga zo kugira icyo bageraho".

Abanyamuryango barenga 80 bagize iyi koperative basuye Urwibutso rwa Jenoside rwa Kigali (ku Gisozi), banafata umwanya wo kwisuzuma aho bageze mu rugendo rwo kwiyubaka, no gufata mu mugongo abarokotse Jenoside.

Umwe mu banyamuryango ba CODACE witwa Rutayisire Rose warokotse Jenoside, avuga ko Kwibuka bimusubizamo ubumuntu, kuko ngo bimuha kwishima no kudaheranwa n’agahinda.

Yagize ati “Iki gikorwa cyadushimishije cyane nk’abacitse ku icumu rya Jenoside, kuko hano kuri uru rwibutso rwa Gisozi mpafite abavandimwe (bahashyinguwe), kuba rero CODACE yamfashije kuza kubibuka, ni igikorwa gikomeye cyane.”

Rutayisire Rose ufite mikoro

Mu rugamba rwo kwiyubaka, Rutayisire avuga ko yashoboye kwiyubakira inzu no kwigurira imodoka, CODACE ikayiha akazi. Bimuhesha amafaranga yo kwishyurira abana ishuri no kwiteza imbere.

Abanyamuryango b’iyo koperative muri rusange bishimira ko bamaze kuzuza inzu ifite agaciro k’Amafaranga y’u Rwanda miliyoni 160, ikaba izagirwa hoteli, ndetse ko abana babo abenshi ngo barimo kurangiza amashuri ku buryo nta kibazo cy’imibereho mibi bafite.

Umuyobozi wa Ibuka mu Murenge wa Kanombe, Christine Utetiwabo, ashimira iyo koperative igizwe ahanini n’abagize uruhare mu kurokora Abatutsi bicwaga muri Jenoside.

CODACE "Cooperative de Development des Anciens Chauffeurs de l’Etat", igizwe n’abahoze ari abashoferi ba Leta basezerewe ubwo muri 2003 hashyirwagaho gahunda ya ’zero charroi’, yo kwegurira abikorera ibijyanye no gutwara abakozi ba Leta.

Marie Claire Gatayire yavuze ko mu Misa yo gusabira imiryango yazimye, bateguye amaturo yo gutura akubiyemo ubuzima babagamo mu miryango yabo ndetse anakubiyemo ibisobanuro n’ibisabisho byo kubatura Nyagasani.

Ati “Amaturo twagennye y’uyu munsi tugiye gutura afite ibisobanuro byihariye kuko n’ubundi uyu munsi iki gitambo kirihariye cyagenewe kuzirikana imiryango itararokotsemo n’umuntu n’umwe muri Jenoside yakorewe Abatutsi mu 1994.”

Aya maturo yazanywe n’abantu 15 nk’umubare ufite igisobanuro kuko mu ibarura umuryango GAERG wakoze ukarirangiza mu 2019 wasanze imiryango y’Abatutsi ibihumbi 15,593 yarazimye burundu nta wo kubara inkuru warokotse.

Ati “Turatura ikarita y’u Rwanda kuko nta musozi w’u Rwanda utaramenetseho cyangwa se utaranyoye amarasao y’Abatutsi bishwe muri Jenoside 1994. Gutura iyi karita y’u Rwanda ni ikimenyetso cyo gusaba amahoro, ubumwe ubwumvikane ubudaheranwa, n’uburumbuke mu butaka, mu mirima, mu mazi n’amashyamba by’u Rwanda”.

Hatuwe Agapira k’Ibirere hazirikanwa abana bato n’urubyiruko rw’u Rwanda rwazize Jenoside yakorewe Abatutsi. Banabasabiye kuruhukira mu mahoro y’Imana, inzozi zabo n’imiryango bari kuzubaka yarimbuwe itarubakwa.

Amwe mu maturo batuye

Hasabiwe abana b’u Rwanda umugisha, ubwenge, umutima n’amaboko yabo ngo bibe indashyikirwa biheshe Imana ikuzo.

Hatuwe Urugori hazirikanwa abari n’abategarugori b’u Rwanda, hazirikanwa ubwenge, ubwiza n’ubwitonzi Imana yabahaye.

Ati “Turasaba Imana iduhoze agahinda n’ishavu tugira iyo tubibutse”.

Hatuwe Ingabo n’icumu hazirikanwa abasore n’abagabo b’intarumikwa barasaniraga u Rwanda baharanira amahoro bishwe muri Jenoside yakorewe Abatutsi.

Hatuwe n’Inkoni yitwazwa n’abageze mu zabukuru hazirikanwa abasaza n’abakecuru bazize Jenoside yakorewe Abatutsi. Bari abajyanama, inshuti n’icyitegererezo ku bana babo, imiryango inshuti n’abaturanyi babatura Imana kugira ngo ibakire Ijabiro.

Hatuwe amazi nk’ikimenyesto cy’Ubuzima ku mubiri no kuri roho kuko ashushanya Batisimu bahawe. Aya mazi bayatuye basabira imitima yakomerekejwe n’urwango igifite ishavu n’agahinda ngo Imana iyomore kandi iyikize maze Yezu umukiza ayuzuzemo urukundo, ineza n’ubutungane ayifuzamo.

Hatuwe amata nk’ikimenyetso cy’uburere bwiza, ubupfura n’uburumbuke Imana yahaye u Rwanda n’imiryango yazimye muri Jenoside yakorewe Abatutsi.

Ati “Turatura indabo nk’ikimenyetso cy’ubwiza n’urukundo, turazitura tuzirikana imiryango yazimye kandi tuyereka urukundo twayikundaga kandi tukiyikunda kuko urukundo rudapfa, ruhoraho iteka. Baracyariho mu mitima yacu tuzahora tubakunda”.

Hatuwe Buji zishushanya urumuri rwa Kiristu, kuko Imana yivugiye iti “Urumuri nirwakire mu mwijima, izo Buji zikaba ari igihamya ko Yezu Kristu yazutse kandi akazazura n’abazize Jenoside yakorewe Abatutsi”.

Hatuwe Hositiya hazirikanwa ko Kirisitu ari umugati Nyabuzima kandi iyo Hositiya ikaba ari umubiri wa Kirisitu, ko Kiristu ari we wamanutse mu ijuru kugira ngo umuhabwa wese agire ubugingo buhoraho. Ati “ Hositiya turayitura dusabira abacu bazize Jenoside yakorewe Abatutsi”.

Ati “Turatura na Divayi tuzirikana ko ari amaraso y’isezerano muri Kirisitu, abacu bishwe muri Jenoside tuzirikana ko bameshe amakanzu yabo mu maraso ya Kirisitu bavuye mu magorwa akaze, nibaturize mu bwami bw’Imana nibaturize mu bwami bw’Imana ubu n’Iteka ryose”.

Nkuranga Jean Pierre, Umuyobozi wa GAERG, yagize ati “ Abacu barishwe, imiryango yarazimye burundu ariko hari ikintu kimwe, twizera ko abacu bari mu biganza by’Imana”.

Nkuranga avuga ko mu gihe cya Jenoside abishwe bose bahuriye ku isengesho rimwe ryo kwambaza Nyagasani rigira riti “Isi iratwanze ariko turabizi neza ko wowe utaturekura utwakire mu biganza byawe. Ari abishwe ari abarokotse iryo sengesho bose bararivuze”.

Uretse gusabira abo mu miryango yazimye no kubibuka, wabaye n’umwanya mwiza wo gushima Imana yarokoye Abatutsi bicwaga, uba n’umwanya wo gushima Imana yashoboje Inkotanyi zikabasha kugira abo zirokora, ubu Abanyarwanda bakaba bafite ubuyobozi bwiza.

Antoine Cardinal Kambanda yavuze ko ari iby’agaciro gakomeye gufata umwanya wo kwibuka imiryango yazimye mu rwego rwo kubasubiza agaciro.

Antoine Cardinal Kambanda atura igitambo cya Misa

Ati “Nitubakumbura intashyo tuzajya tuzinyuza kuri Yezu Christu, kandi tugomba guhanga uburyo bwo kubana na bo, no kubibuka tubinyujije mu masengesho yo kubasabira, na bo aho bari baradusabira imbere y’Imana. Ababyeyi, abavandimwe n’inshuti tuba twibuka, twemera ko badaheranwa n’urupfu”.

Antoine Cardinal Kambanda avuga ko umuntu uvutsa undi ubuzima yibwira ko akemuye ikibazo aba yibeshya, kuko baba bazahurira mu rubanza rw’Imana.

Antoine Cardinal Kambanda yavuze ko abarokotse badakwiye guheranwa n’agahinda, ahubwo ko bagomba gukomeza gutwaza gitwari kandi bagakomeza kubana n’ababo binyuze mu isengesho ndetse bagakomeza no kubasabira.

Ubukana n’ubugome bw’abakoze Jenoside, byatumye miryango isaga ibihumbi 15 y’Abatutsi izima burundu. Imibare y’agateganyo y’ibarura ry’imiryango yazimye ryakozwe kuva mu 2009 kugeza mu 2019, igaragaza ko muri Jenoside yakorewe Abatutsi, imiryango 15,593 igizwe n’abantu 68,871 mu Turere 30 twose tw’u Rwanda yazimye.

Ni igikorwa cyitabiriwe na Minisitiri w’Uburinganire n’Iterambere ry’Umuryango, Prof Bayisenge Jeannette, wari Umushyitsi Mukuru, ndetse n’abarerewe muri iyi Seminari yitiriwe Mutagatifu Vincent.

Iki gikorwa cyatangijwe n’igitambo cya Misa cyo gusabira abazize Jenoside yakorewe Abatutsi by’umwihariko abaguye muri Seminari Nto yitiriwe Mutagatifu Vincent.

Umutoni Jean Luc warokokeye muri iki kigo ubwo yari afite imyaka 16 y’amavuko yagarutse ku nzira ibabaje yanyuzemo bikamuviramo kuhaburira abavandimwe be ndetse n’umubyeyi.

Ntagara Innocent wari uhagarariye IBUKA, yagarutse ku nshingano zo kwibuka ndetse n’agaciro ku buhamya mu gihe nk’iki, asaba abakiri bato barererwa muri iri shuri kwanga uwo ari we wese wababibamo urwango.

Yagize ati “Impamvu zo kwibuka ni ukubwira abayikoze ko nta cyiza basaruye, ni ukubwira abayirokotse kandi ngo mukomere.”

Mu butumwa bwe, Minisitiri Prof Bayisenge yagarutse ku ruhare rw’ababyeyi mu gutoza abakiri bato indangagaciro nzima.

Minisitiri Prof Bayisenge yasabye ababyeyi gutoza abakiri bato indangagaciro nzima

Yagize ati “Abakoze Jenoside nta rukundo bigishwaga. Biragoye kwiyumvisha uko gukunda Igihugu babyumvaga. Ntabwo wakunda Igihugu ngo ucyambure amaboko.”

Yasabye abarezi kandi gutekereza ku burere baha ababyiruka, baharanira kuraga abana Igihugu kizira Jenoside.

Reba ibindi muri iyi Video:

Babitangarije mu gikorwa cyo kwibuka ku nshuro ya 29 Jenoside yakorewe Abatutsi i Gitwe mu Murenge wa Kabagari, ahiciwe Abapasitoro 81 bari bahahungiye n’imiryango yabo yabanje kwicwa, bo bakaza kwicwa nyuma.

Basobanuriwe ibice bitandukanye bizaba bigize inzu y’amateka y’Abapasitoro 81 bishwe

Muhayimana Charles uhagarariye imiryango y’abafite ababo bashyinguye mu Rwibutso rwa Kabagari, avuga ko iyo nzu y’amateka izaba irimo ibice bitandukanye bigaragaza imibereho yabo mu gihe cya Jenoside, uko bishwe, n’amateka agaragaza ubutabera n’ibyakurikiyeho mu nzira y’isanamitima, n’ubumwe n’ubwiyunge.

Agira ati, “Hazaba harimo ibibumbano by’abo bapasitoro 81, uko bari babayeho mu cyumba bahungiyemo, ubwoba no kubunza imitima bamwe basoma Bibiliya abandi bahengereza mu madirishya, kugeza ubwo bagabwaho igitero bagapakirwa mu modoka bakabajyana kubica”.

Avuga kandi ko iyo nzu y’amateka izaba igaragaza ubuhamya bw’abajyanywe ku Gitovu muri Nyanza kuhicirwa, ubuhamya bw’uko bahageze n’uko bishwe bagahambwa, uko bakubitwaga, uko bongeye gutabururwa, icyumba cy’ubutabera, n’icyumba cy’imbamutima z’abo mu miryango yabo.

Inzu Abapasitoro babagamo izaherwaho igirwa iy’amateka

Mu rugo rw’iyo nzu kandi hazaba hari ibiti 81 mu busitani bihagarariye buri umwe, utuyira duteyemo indabo zitandukanye 81, uruzitiro rushushanya inzira zitandukanye, hakazanakorwa kandi gahunda yo gusura amatorero y’abo bapasitoro, bari baturutse hirya no hino.

Muhayimana avuga ko imbanzirizamushinga mu kubaka iyo nzu y’amateka ikeneye ubushobozi bw’amafaranga, akaba asaba buri wese wakundaga abo bapasitoro n’abandi bafatanyabikorwa kwitanga ngo hazaboneke ubwo bushobozi.

Agira ati, “Niba tubasha kubaka amazu, tukagura amamodoka n’ibindi, tuzitange kugira ngo tuzagire ibyo dukora bizatuma dusiga Igihugu kiriho, cyane ko hazaba harimo n’ubutumwa bwa Guverinoma bugaragaza amagambo meza yubaka ya Perezida wacu, n’ubw’Itorero ry’Abadiventisiti b’Umunsi wa Karindwi mu Rwanda”.

Avuga ko kwica Abapasitoro n’imiryango yabo, ari ugutsindwa kw’Iyobokamana mu Rwanda, ariko kubibuka no kubungabunga amateka ya Jenoside ari uburyo bwo gutegura Igihugu cyiza kizubakwa n’abana b’Abanyarwanda.

Bashyize indabo ku rwibutso

Perezida w’Umuryango IBUKA uharanira inyungu z’abarokotse Jenoside yakorewe Abatutsi mu Karere ka Ruhango, Me Nyandwi Bernard, avuga ko kuba hari inzu y’amateka igiye kubakwa ikiyongera ku kubika amateka ya Jenoside, hakanewe ko n’abandi bagifite amakuru bakomeza kuyatanga.

Asaba cyane cyane Abakirisitu bizera Imana kugira uruhare mu gutanga ayo makuru, kuko ari bwo bazaba bagaragaje ko ari abana b’Imana koko, kandi kuyahisha bikaba ari ukwihemukira ubwabo haba ku bakoze Jenoside n’abafite andi makuru badatanga.

Agira ati, “Kuba ufite ibiganza biriho amaraso, ugafata Bibiliya ukajya gusenga, ariko ukaba utarasaba Imana imbabazi, birakwiye ko mu buryo bwo gusenga neza babohora abarokotse Jenoside bakabereka aho bashyize ababo kuko ni byo byabakomeza”.

Uwavuze mu izina ry’Umuyobozi w’Itorero ry’Abadiventisiti b’Umunsi wa Karindwi mu Rwanda, na we yagaragaje ko abakoze Jenoside bakwiye gusaba imbabazi kugira ngo barokore ubugingo bwabo butazacirwaho iteka, kuko ibyo bakoze birenze iby’abantu bakwiye kuba bitwararika byanditse muri Bibiliya.

Depite Edda Mukabagwiza yasabye Abakirisitu kongera kubaka ubumwe

Visi Perezida w’Inteko Ishinga Amategeko Umutwe w’Abadepite, Edda Mukabagwiza, avuga ko kuba Abakirisitu barafashe iya mbere mu kwica abo basengana ari ikigaragaza ko koko Jenoside ari icyaha ndengakamere, bityo ko bakwiye kugira uruhare mu kubaka ubumwe bw’Abanyarwanda bashenye.

Agira ati “Ubundi umukirisitu ntiyica. Kwitwa umukirisitu ntibisimbura ubumwe bw’Abanyarwanda bwasenyutse ubu bukaba buri kubakwa. Ni ngombwa gutera intambwe no kunyura mu nzira zishobora gutuma abantu bongera kwiyubaka, kuko usibye kuba abarokotse Jenoside baratanze imbabazi, abayikoze na bo bahawe ibihano bito, abandi barababarirwa”.

Avuga ko izo zose ari ingero zikwiye gufasha abantu gutera intambwe yo gushimangira ubumwe bw’Abanyarwanda.

Kwibuka muri CHUB byabimburiwe n’urugendo

Yabibwiye abari bitabiriye igikorwa cyo Kwibuka ku nshuro ya 29 Jenoside yakorewe Abatutsi muri ibi bitaro, tariki 19 Gicurasi 2023, barimo abakozi bo muri ibi bitaro ndetse n’abafite ababo bahiciwe mu gihe cya Jenoside yakorewe Abatutsi mu mwaka wa 1994.

Dr Christian Ngarambe yavuze ko kumenya umubare w’abaguye muri ibyo bitaro bitoroshye kuko bivugwa ko hari abarwayi ndetse n’abarwaza bagiye bahakurwa bakajya kwicwa, cyane cyane batwawe n’abasirikare bo muri ESO, ariko ko hari 150 bazwi bishwe mu gihe cy’iminsi itatu gusa.

Yanavuze ko bagaya abaganga bagera kuri 25 bakoraga muri ibyo bitaro bagize uruhare mu bwicanyi bwahabereye nyamara bari bararahiriye gufasha abaje babagana bose, kimwe n’abanyeshuri bigaga mu ishami ry’ubuganga bahimenyerezaga umwuga batatu bahamwe n’icyaha cya Jenoside, ndetse n’abandi bahakoraga barimo abaforomo n’ababyaza bagera kuri 35.

Dr Christian Ngarambe, Umuyobozi w’Agateganyo wa CHUB

Yunzemo ati “Kwibuka rero biduha umwanya w’umwihariko wo gusubiza agaciro inzirakarengane zakambuwe zikicwa urw’agashinyaguro, ariko by’umwihariko mu bitaro tukongera tukabonamo isomo nk’abavuzi ryo kurushaho kumenya agaciro k’umuntu, tukirinda kongera gukora icyatandukanya Abanyarwanda, ariko tugaha n’icyizere abaza batugana.”

Mu bijyanye no kugarurira icyizere ababagana, kuri ibi bitaro biyemeje gutanga serivisi nziza ku bantu bose, ariko no kubitoza abaganga bakiri ku ntebe y’ishuri.

Dr Nkubito Pascal, inzobere mu buvuzi bw’ababyeyi muri CHUB, agira ati “Murabona twebwe turanabyina tuvamo mu kiganga. Ariko mu kwigisha abazavamo abaganga mu gihe kiri imbere, twibanda ku gukora ku buryo bazbazakosora serivisi mbi ndetse n’ubwicanyi bwakorewe abagombaga guhabwa ubuzima ahubwo bakabwamburwa.”

Yakomeje agira ati “Icyo kandi twatangiye kukigeraho. Serivisi ubu ni ikintu dushyize imbere nk’abaganga kugira ngo uje atugana wese atubonemo amakiriro, ikintu cyose cyamufasha kugira ngo asunike iminsi.”

Bashyize indabo ku rwibutso rwa Jenoside rwa Kaminuza

Kwibuka muri CHUB bijyanirana no kuremera abarokotse Jenoside batishoboye, baba abo mu miryango y’abahaguye cyangwa bahakoraga. Inka batanze kuva muri 2012 kugeza mu mwaka ushize wa 2022, hamwe n’izo zagiye zibyara zimaze kugera kuri 471.

Bamwe mu bayobozi bitabiriye Kwibuka Jenoside muri CHUB. Uhereye iburyo ujya ibumoso: DG Dr. Christian Ngarambe, Senateri Evode Uwizeyimana na Visi Meya w’Akarere ka Huye, Annonciata Kankesha

Bashyize indabo ku rwibutso

Ibyo kandi ngo byanashyigikirwaga n’ubuyobozi bwariho bwa Komini Masango, kuko hari abapolisi bari bashyigikiye ubwicanyi bakanabukora, kandi interahamwe zikabohoza abakobwa b’Abatutsikazi ubuyobozi ntibugire icyo bukora.

Itariki ya 14 Gicurasi 2023, ni itariki mbi Abatutsi bo mu yahoze ari Komini Masango, ubu ni mu Murenge wa Kabagari, bibuka kuko ari bwo biciwe ahahoze ari inkambi yari hafi ya Komini, ahari hahungiye Abatutsi benshi, ubu ku rwibutso rwa Jenoside hakaba haruhukiye imibiri isaga 6000, mu gihe abandi benshi bishwe bajugunywe mu migezi irimo Mwogo, Kiryango na Nyabarongo.

Niyiduha Josephine warokokeye mu Kabagari, avuga ko uwari Burugumesitiri Mpamo Isdras wayoboraga iyo Komini, akaba ari umwe mu bagize uruhare mu kwica Abatutsi bari bahahungiye, kandi agashumuriza Abatutsikazi interahamwe ngo zibakorere ibya mfura mbi.

Hon. Mukabagwiza ashyira indabo ku rwibutso

Niyiduha avuga ko kuri bariyeri hari interahamwe z’abakobwa zicaga nabi abagore b’Abatutsikazi, kuko zabazizaga ko ari beza.

Agira ati "Hari interahamwekazi zatwicaga nabi cyane, zivuga ngo twazitwaye abagabo ngo twarabenzwe mwebwe murarongorwa none reka tubiyicire mwaraduhemukiye, zikatwica urupfu rubi zipfura abagore imisatsi, no kubashwiragiza bihimura kuri iryo shyari ry’uko Abatutsikazi ari beza".

Niyiduha avuga ko yari afite imyaka 14 muri Jenoside, ku buryo yabashaga kugenda yihishahisha, akaza guhungana n’uwari umucuruzi mu Ruhango bakagera muri Karongi, ahari harinzwe n’ingabo z’Abafaransa, ariko naho ubwicanyi bwakomezaga gukorwa ntibagire icyo bakora.

Niyiduha yarokotse igitero cy’Abatwa cyari kigiye kumuhitana, ubu arubatse kandi yarize aranaminuza akaba ashimira Leta y’Ubumwe bw’Abanyarwanda yahagaritse Jenoside akabasha kurokoka akaba amaze kwiyubaka, akaba ashishikariza buri wese warokotse gukomera no kubabarira ababiciye, kugira ngo bakomeze kwiyubaka badafite intimba.

Hon. Mukabagwiza avuga ko abakirisitu bakwiye kubaha bagenzi babo aho kubica

Umuyobozi w’Akarere ka Ruhango, Habarurema Valens, avuga ko hazakomeza kwita ku nzibutso no kubungabunga ibimenyetso by’amateka ya Jenoside, kongera ibice by’inzibutso aho bikenewe, kwimakaza ibikorwa by’ubumwe n’ubwiyunge mu nzira ya ’Ndi Umunyarwanda’, no kwita ku mibereho myiza y’abarokotse Jenoside uko bishoboka.

Iyahoze ari Komini Masango, yiganjemo abayoboke benshi b’idini ry’Abadivantisiti ku buryo hari interahamwe zicaga abatutsi bahurira mu matsinda y’itorero, nk’uko byagendekeye Niyiduha wahigwaga n’urubyiruko rw’abadivantisiti (Abajiya), ari naho Visi Perezida w’Inteko Ishinga Amategeko umutwe w’Abadepite, Edda Mukabagwiza, anenga abiyitaga abakirisitu kuba barijanditse muri Jenoside bakica abo basenganaga, dore ko n’abihayimana bakoze Jenoside.

Agira ati "Ubundi amadini yakabaye agira uruhare mu guhuza abantu, kandi abayoboke bayo bagakundana kuko byagaragaye mu buhamya, ko aho gukora ibyo ahubwo bishe bagenzi babo".

Niyiduha avuga ko interahamwe z’abakobwa zabaga kuri bariyeri zikica abagore b’Abatutsikazi

Avuga ko Kwibuka ari umwanya wo kwemera ko imibiri itarashyingurwa mu cyubahiro, ikwiye kuba itangwaho amakuru kugira ngo igaragare, na yo ishyingurwe mu cyubahiro.

Avuga ko Kwibuka ari n’umwanya wo gusubiza amaso inyuma kugira ngo abarokotse Jenoside bazirikane aho bageze, bivuye mu bwitange bw’izahoze ari ingabo za RPA Inkotanyi, no kwishimira ko ejo hazaza hagaragazwa n’imiyoborere myiza no kuzirikana ubutwari bw’abarokotse Jenoside yakorewe Abatutsi, bwo kwihangana, kwakira no kubabarira.

Asaba kwamaganira kure abakomeje guhembera amacakubiri, abasebya u Rwanda, no kurushaho kugaragaza ukuri kugira ngo Abanyarwanda bakomeze kunga ubumwe.

Hanashyinguwe imwe mu mibiri yavanywe mu matongo y’abarokotse Jenoside

Meya Habarurema avuga ko bazakomeza kwita ku mibereho y’abarokotse Jenoside

Senateri Nyirasafari yabitangaje mu gikorwa cyo kwibuka Jenoside yakorewe Abatutsi mu cyahoze ari Bigogwe aho yatangiye mu 1991, ubwo hatangizwaga urugamba rwo kubohora Igihugu.

Igice cya Bigogwe cyahoze kigizwe na Komini ya Mutura na Rwerere n’andi makomini nka Kanama na Karago aho Abatutsi bagiye bahigwa bakicwa bitwa ibyitso, abandi bagafungwa, ubundi bakaburirwa irengero.

Ni Jenoside yakozwe n’urubyiruko rwatojwe n’abasirikare bari mu kigo cya gisirikare cya Bigogwe, bakaba baragize uruhare rukomeye mu guhiga Abatutsi mu mashyamba ya Gishwati no gutoza Interahamwe.

Senateri Nyirasafari yavuze ko abatuye mu Bigogwe atari bonyine ahubwo bagomba kugira imbaraga.

Yagize ati "Jenoside yabaye yarateguwe kandi ikibihamya ni uko ibyabaye mu gace kamwe biboneka n’ahandi kuko bitateguriwe agace kamwe ahubwo byateguriwe Abatutsi bose."

Yakomeje avuga ko abafite amateka bagomba kuyatanga kugira ngo abavutse nyuma ya Jenoside yakorewe Abatutsi bashobore kumenya amateka y’Igihugu.

Ibikorwa byo kwibuka mu yahoze ari Bigogwe byabereye ku rusengero rwa Bweramana mu Murenge wa Mudende ahari harahungiye Abatutsi barenga 500 ariko hakarokoka abatarenze icumi.

Gashati warokokeye muri uru rusengero rwa Bweramana avuga ko mu 1990 Inkotanyi zitangiye urugamba rwo kubohora Igihugu bahuye n’ingorane.

Yagize ati "Ibikorwa byo guhohotera Abatutsi byatangiye mbere y’uko Inkotanyi zitera, ariko urugamba rwo kubohora Igihugu rutangiye, abaturage bamwe batangiye kudutera mu ngo, naho ku ishuri abana bakatubwira ko tubanukira amavuta y’inka kandi nabibonye kuva ku myaka 7 kugera ku myaka 18."

Yakomeje avuga ko hari Abatutsi benshi mu muryango bishwe mbere ya 1994 naho muri Mata 1994 bahura n’ibintu bikomeye kubera ko bari baturiye ikigo cya gisirikare cya Bigogwe kuko abari bayoboye ikigo basaga n’aho akazi kabo kari ako gukurikirana Abatutsi batuye mu Bigogwe bakabafunga babashinja kuba ibyitso by’Inkotanyi.

Ati "Muri Mata 1994 hano i Bweramana hateraniye Abasirikare, Interahamwe n’abaturage, batera Abatutsi mu ngo kuva mu rukerera saa kumi n’imwe za mu gitondo. Abatutsi birwanyeho bakoresha amabuye n’imiheto n’amacumu, urugamba rumara iminota 30 nyuma haza abafite intwaro duhungira ku rusengero ahari hahungiye n’abandi Batutsi, dukomeza ibikorwa byo kwirwanaho dukoresheje amabuye, gusa hakoreshejwe imbunda abantu bahungira mu rusengero bagerekeranye, maze Interahamwe zizenguruka urusengero zica amadirishya zikajya zinagamo grenade ubundi usimbutse Interahamwe zikamutema."

Gashati avuga ko ibikorwa byo kwica Abatutsi byagejeje mu masaha y’ijoro kandi abashoboye kurokoka ntibarenze umunani.

Gashati akomeza ubuhamya avuga ko yahungiye mu ishyamba rya Gishwati aho Interahamwe zazaga kubahiga zikoresheje imbwa kandi benshi bishwe ntibigeze baboneka ngo bashyingurwe.

Inzu nyina wa Munyeshyaka yari atuyemo mu Nzove

Akimara kugera muri iyo Paruwasi yahise avana nyina Mukarukaka Félicité mu Bugesera, amwimurira mu nzu yamuguriye mu mudugudu wa Rutagara ya mbere, mu Kagari ka Nzove, Umurenge wa Kanyinya mu Karere ka Nyarugenge.

Ibyo Padiri Munyeshyaka yabikoze agira ngo avane nyina hafi y’Abatutsi bo mu Bugesera, abo we yitaga ibyitso by’Inkotanyi, bityo amushyire hafi ye muri Nyarugenge.

Nyina wa Munyeshyaka yari asanzwe ari umukirisitu gatorika, ndetse Paruwase ya Sainte Famille yaje kubaka hepfo y’urugo rwe inzu, yaberagamo amasengesho y’umuryango remezo, abakecuru badafite intege zo kugera kuri paruwase ku Cyumweru akaba ari yo bateraniragamo.

Mu rugendo rwo kwibuka ku nshuro ya 29 Jenoside yakorewe Abatutsi mu 1994, rwabaye ku itariki 13 Gicurasi 2023, uwitwa Ahorukomeye Félix watanze ubuhamya kuri Jenoside yakorewe Abatutsi mu Nzove, yavuze uburyo mu gihe cya Jenoside, benshi mu Batutsikazi basenganaga na nyina wa Munyeshyaka hamwe n’imiryango yabo bamuhungiyeho, hanyuma Munyeshyaka akamutegeka kutagira Umututsi acumbikira.

Ahorukomeye Félix warokokeye mu Nzove

Ahorukomeye yaragize ati “Benshi mu Batutsikazi n’imiryango yabo bigiriye inama yo guhungira kwa nyina wa Padiri Munyeshyaka, kugira ngo barebe ko Padiri yaza kubahungishiriza hamwe na nyina akabajyana kuri Sainte Famille, ariko Munyeshyaka yaje guha nyina amabwiriza yo kutagira Umututsi n’umwe ahisha iwe.”

Ahorukomeye yakomeje avuga ko nyina wa Munyeshyaka yubahirije ibyo yamutegetse, abaje kumuhungiraho bose akababwira ko bagomba guhungira muri ya chapel y’umuryango remezo yubatswe na Paruwase Sainte Famille, kugira ngo bacungirwe umutekano, ariko nyuma y’icyumweru interahamwe zaje kuhabasanga zirahabicira bose.

Ahorukomeye yaragize ati “Icyagaragaye ni uko Padiri Munyeshyaka yari azi umunsi n’isaha Abatutsi bari barahungiye muri Chapel ya Nzove bari bwicirweho, kuko uwo munsi ari bwo yaje kuvana nyina mu Nzove akamujyana wenyine muri Paruwase ya Sainte Famille, abandi bagasigara bicirwa muri ya Chapel yari yubatse imbere y’urugo rwa nyina.”

Abatutsi biciwe mu Nzove bajugunywe muri Nyabugogo no muri Nyabarongo

Uyu Mupadiri wagize uruhare runini muri Jenoside yakorewe Abatutsi, n’ubwo yakunze gukingirwa ikibaba na Kiliziya Gatolika, yaje kugaragaraho ingeso y’Ubusambanyi, ndetse aza no kwemera ko afite umwana yabyaranye n’umugore w’Umunyarwandakazi witwa Mukakarara Claudine.

Ibi byatumwe Umushumba wa Kiliziya Gatorika Papa Francis, afata icyemezo cyo kumwirukana burundu mu mirimo y’Igipadiri, anahabwa akato ahantu hose hakorerwa imirimo irebana na Kiliziya gatolika.

Mu bikorwa by’ubugome ndengakamere byaranze Padiri Munyeshyaka Wenceslas, witwazaga imbunda atari umusirikare, harimo kuba we ubwe yarashyikirizaga interahamwe Abatutsi babaga bahungiye muri Sainte Famille, ndetse akaba yaranahamijwe ibyaha byo gufata ku ngufu abana b’abakobwa b’Abatutsikazi, bamwe akabahemba kubahungishiriza muri Hotel des Mille Collines yarindwaga n’Ingabo za MINUAR, ababyanze akabagabiza Interahamwe zikabica.

Munyeshyaka yabaga afite imbunda

Umuryango uharanira inyungu z’abacitse ku icumu rya Jenoside yakorewe Abatutsi, hamwe na Leta y’u Rwanda bakomeje gusaba u Bufaransa ko bwamuta muri yombi, agashyikirizwa ubutabera kugira ngo aryozwe amaraso y’intama z’imana yagabije ibirura, kandi yaritwaga ko ari we mushumba wazo.

Yabibasabye tariki ya 13 Gicurasi 2023, ubwo mu Karere ka Nyagatare, hashyingurwaga mu cyubahiro imibiri 94 y’Abatutsi bazize Jenoside bari bashyinguwe mu nzibutso eshatu zari zisanzwe, bakaba bimuriwe mu rwibutso rushya.

Urwibutso rwa Jenoside rushya rw’Akarere ka Nyagatare rwuzuye rutwaye amafaranga y’u Rwanda asaga miliyari imwe na Miliyoni 115 (1,115,220,869 Frw) harimo imirimo y’ubwubatsi, igenzurabikorwa ndetse no kwimura abaturage.

Rugizwe n’inzu ikorerwamo imirimo isanzwe, ibyumba by’amateka y’u Rwanda mbere y’abakoloni kugeza ku rugamba rwo kwibohora, imva ndetse n’aho abantu bashobora gufatira ikawa mu gihe basuye urwibutso, ndetse n’ubusitani.

Minisitiri Bizimana yagarutse ku mateka ya Jenoside mu yahoze ari Komini Muvumba ndetse na Ngarama aho urugamba rwo kubohora Igihugu rugitangira Abatutsi batangiye kwicwa, abandi bafungwa mu byitso.

Yavuze ko urugamba rwo kubohora Igihugu rugitangira, mu Karere ka Nyagatare ari ho hatangirijwe igikorwa cyo gushora urubyiruko muri Jenoside aho baherewe imyitozo yo kwica mu Kigo cya gisirikare cya Gabiro.

Yasabye urubyiruko kutajya mu murengwe ngo bibagirwe aho u Rwanda rwavuye.

Yagize ati “Abato ntibajye mu murengwe ngo birengangize aho u Rwanda rwavuye, nibarengere iki Gihugu, barengere u Rwanda rwa twese, u Rwanda kandi abanyamahanga bagendamo bakakirwa, tukabana neza.”

Yabasabye kandi kwirinda ingeso mbi harimo ikoreshwa ry’ibiyobyabwenge kuko byatuma batabasha kwibeshaho neza.

Mu buhamya bwe, Aloys Rutagarama wageze mu Karere ka Nyagatare mu mwaka wa 1987 aje gukora akazi k’uburezi i Matimba hafi n’ahatangirijwe urugamba rwo kubohora u Rwanda, yavuze ko urugamba rugitangira, abasirikare na bamwe mu baturage b’Abahutu bateye ku Kigo, bahigamo Abatutsi ariko ku bufatanye n’abanyeshuri bakuru, bahungisha abana basubira iwabo.

Rutagarama wari ugishinga urugo yakomeje gutotezwa n’abasirikare, ariko ku bw’amahirwe abasha kurokoka.

Yashimye Leta yabubakiye urwibutso rushya ruhesha agaciro ababo bishwe muri Jenoside, kuko hari abatari bashyinguwe ahantu heza.

Ati “Ni igikorwa cyabaye cyiza kuko hari abari bashyinguye mu buryo butabahesha agaciro. Twe barokotse byaturuhuye imitima, turashima Leta by’umwihariko Perezida wa Repubulika kuko badutekerejeho.”

Uwavuze mu izina ry’imiryango yashyinguye ababo, yavuze ko imiturire ya Nyagatare ubwayo yoroheraga abicanyi kumenya abo bica bidasabye kumenya inkomoko yabo kuko Abahutu bari batuye ahitwa muri Peyizana naho Abatutsi batuye ahitwaga amaranshi.

Urugamba rwo kubohora Igihugu rugitangira ngo abatuye mu maranshi batangiye gutwikirwa no kwicwa, ubwicanyi bukaba bwari buyobowe na Burugumesitiri Rwabukombe Onesphore wayoboraga Komini Muvumba ndetse n’Abarundi babaga i Rukomo mu nkambi.

Yasabye ko ababa bazi aho imibiri y’Abatutsi bishwe muri Jenoside yajugunywe bahagaragaza kugira ngo na yo ishyingurwe mu cyubahiro.

Ni umuhango witabiriwe n’abayobozi batandukanye, barimo abahagarariye Imiryango n’ibihugu byabo, abayobozi ba Leta Zunze ubumwe z’Abarabu ndetse n’inshuti z’u Rwanda.

Ambasaderi w’u Rwanda muri UAE, Emmanuel Hategeka, yasabye abari aho gufata umwanya wo kubanza kunamira no guha icyubahiro abazize Jenoside, ndetse no kuzirikana abayirokotse, ahamagarira amahanga kongera imbaraga mu kwamagana abagikomeje guhakana Jenoside yakorewe Abatutsi mu 1994.

Ambasaderi Hategeka yavuze ko uyu mwanya wo kwibuka, ari ukuzirikana ubuzima ndetse n’inzozi ababyeyi, abavandimwe ndetse n’inshuti bavukijwe imburagihe, bicwa mu buryo bw’agashinyaguro, byose bihagarikiwe na Guverinoma yari iyobowe n’intagondwa icyo gihe.

Ambasaderi Emmanuel Hategeka

Ati: “Buri mwaka ni yo mpamvu dufata uyu mwanya wo kunamira no kuzirikana izo nzirakarengane ndetse no gufata mu mugongo no guhumuriza abarokotse.”

Yakomeje avuga ko n’uyu munsi aho imyaka igeze, hakiri amatsinda y’abantu bakomeje guhakana no gupfobya Jenoside yakorewe Abatutsi, harimo abantu bajijutse ndetse n’impuguke bose bagamije gukwirakwiza inkuru z’ibinyoma zigamije kugoreka amateka.

Ati: “Kwibuka ku nshuro ya 29 bigomba kuba umuhamagaro wo kongera kudukangura, duhagurukire rimwe duhangane n’abakomeje guhakana Jenoside.”

Bacanye urumuri rw’icyizere

Ambasaderi Hategeka yakomoje ku ngengabitekerezo ya Jenoside ndetse n’imvugo z’urwango zikomeje kugaragara mu bice bitandukanye bya Afurika n’isi muri rusange, agaragaza ko mu gihe imiryango mpuzamahanga idahagurutse ngo ikorere hamwe mu kurwanya ibyo bikorwa mu kwirinda ko hari amateka yakongera kwisubiramo, umuntu ashobora kuzongera guhura n’ibihe bibi by’icuraburindi.

Yagaragaje intambwe u Rwanda rumaze gutera mu myaka 29 ishize nyuma ya Jenoside yakorewe Abatutsi mu 1994, avuga ko bitari kugerwaho iyo Igihugu kiba kitayobowe neza, binyuze muri Politiki igamije ubumwe bw’Abanyarwanda, iterambere ry’imibereho myiza ndetse no guharanira ejo heza hazaza.

Yakomeje agira ati: “Turashimira ibitambo by’abacitse ku icumu bemeye gutanga imbabazi ndetse bikaba inzira yakinguriye amarembo y’ubumwe n’ubwiyunge. Turashima kandi abagabo n’abagore bemeye kwitanga bayobowe na Perezida Paul Kagame bakarwanya ubutegetsi bwateguye Jenoside, bagahagarika Jenoside yakorewe Abatutsi.”

Ambasaderi Emmanuel Hategeka, yasabye abitabiriye uyu muhango by’umwihariko urubyiruko ko buri wese afite inshingano zo kubungabunga no guhora bazirikana Kwibuka no kurinda ibyagezweho n’Igihugu.

Ati: “Urubyiruko rukeneye gusobanukirwa byimbitse amateka y’u Rwanda ndetse no guhindura imyumvire no kuba intwararumuri z’ejo hazaza nta n’umwe usigaye inyuma.”

Yasoje kandi ashimira abafatanyabikorwa batandukanye bagize uruhare mu iterambere no kongera kwiyubaka k’u Rwanda, avuga ko bashyize ikiganza mu guhindura imibereho y’u Rwanda.

Ati: “U Rwanda rurakinguye kuri buri wese kandi rukeneye ubufatanye buhuriweho mu gutegura ejo hazaza heza.”

Emmanuel Mureramanzi (uri hagati), ashyikirizwa inka n’umuyobozi w’ibitaro bya Kibilizi (iburyo) ndetse n’Umuyobozi w’Akarere ka Gisagara (ibumoso)

Emmanuel Mureramanzi w’imyaka 41, akaba atuye Mu Mudugudu wa Mareba, Akagari ka Kibilizi, Umurenge wa Kibilizi, ni we wahawe inka. Yarabyishimiye kuko ngo kugeza ubu yororaga amatungo magufi gusa.

Nyuma yo kuyishyikirizwa, yagize ati “Iri tungo rikuru mbonye rigiye kuzamura ya yandi matoya, urugo rukure. Urumva amatungo matoya ntakamwa, atanga ifumbire. Mbonye itungo rikuru rikamwa rikanatanga ifumbire. Ni igikorwa cyiza.”

Kuri we kandi, ngo kuremera uwarokotse Jenoside bimwubaka mu buryo bw’ubukungu ariko no mu mutima.

Ati “Niba wari ugeze aho ugiye kwibura, ukabona abantu baracyatekereza kuba bakuzamura no kuba bagusananira mu buzima bwa buri munsi, birashimisha. Ni igikorwa cyiza mu bijyanye no kwiyubaka.”

Akomeza agira ati “Ntiwasabwa kubaka umuturirwa utarabasha kubaka n’umudugudu. Iyo rero urimo wiyubaka ukabona inkunga igufasha kuzamura nk’igikwa, uhita ubasha kuzamuka, ukagira aho ugera.”

Umuyobozi w’ibitaro bya Kibilizi, Dr Vedaste Mbayire, avuga ko bibuka Jenoside yakorewe Abatutsi kugira ngo bibukiranye ko bagomba gukora neza, birinda amacakubiri ayo ari yo yose

Ibitaro bya Kibilizi byashinzwe mu mwaka wa 2006. Ntibyariho mu gihe cya Jenoside. Umuyobozi wabyo kuri ubu, Dr Vedaste Mbayire, avuga ko impamvu na bo bibuka ari ukubera ko Jenoside yakoze ku Banyarwanda bose.

Ikindi, kuri bo ngo ni igihe cyo gufata umwanya wo kuzirikana amarorerwa yabereye mu bigo nderabuzima biri mu gace gakorana n’ibi bitaro, no kugira ngo bibukiranye ko bagomba gukora neza, birinda amacakubiri ayo ari yo yose.

Ati “Abakora mu bigo by’ubuvuzi, twese batwita abaganga. Iyo twibuka tuba tugira ngo twibukiranye ko tugomba gutanga serivise nziza kugira ngo bwa bumwe Umukuru w’Igihugu cyacu yatuzaniye dukomeze tubusigasire. Ntabwo tuzajya ku rugamba ngo turasane kuko urugamba rw’amasasu rwarangiye. Kugira ngo dukomeze tube intwari tuba tugomba no gukora neza akazi dushinzwe.”

Umuyobozi w’Akarere ka Gisagara, Jérôme Rutaburingoga, yasabye ko abantu bakomeza kuba hafi abarokotse Jenoside batibagirwa no kubashimira uruhare bagaragaje mu kubaka Igihugu, batanga imbabazi

Umuyobozi w’Akarere ka Gisagara, Jérôme Rutaburingoga, yaboneyeho gusaba muri rusange ko abantu bakomeza kuba hafi abarokotse Jenoside, haba mu gihe cy’iminsi 100 yo kwibuka ndetse no mu bindi bihe, batibagirwa kubashimira uruhare bagaragaje mu kubaka u Rwanda batanga imbabazi ku babahemukiye.

Mu bitaro bya Kibilizi bibutse Jenoside yakorewe Abatutsi

Ni igikorwa cyabanjirije kwimurira imibiri 94 y’Abatutsi bishwe muri Jenoside mu rwibutso rushya rw’Akarere ka Nyagatare, yari isanzwe iri mu nzibutso eshatu mu Mirenge ya Gatunda, Matimba na Kiyombe, igikorwa cyabaye ku wa Gatandatu tariki ya 13 Gicurasi 2023.

Mu buhamya bwe, Pasiteri Mutsinzi William warokotse Jenoside yakorewe Abatutsi mu Karere ka Nyagatare by’umwihariko i Gakirage, yavuze ko yavukiye i Gahini mu Karere ka Kayonza arahaba ari umwana ariko akomeza gutotezwa abuzwa kwiga, bituma ababyeyi bamwimurira ahandi i Muhura, ubu ni mu Karere ka Gatsibo.

Aha na ho ngo yahakoreye ikizamini gisoza amashuri abanza ariko amanota ye ntiyasohoka nanone bituma ababyeyi bamwohereza mu Gihugu cya Uganda aba ari ho akomereza amashuri.

Agarutse mu Rwanda yasanze ababyeyi barimukiye mu Murenge wa Rwempasha ariko na ho ntibahatinda bimurirwa i Gakirage hafi na Pariki y’Akagera icyo gihe ku buryo hari abishwe n’isazi ya Tsetse.

I Gakirage ngo hari hagoswe n’Ikigo cya Gisirikare iruhande rumwe, urundi Pariki y’Akagera ndetse n’Inkambi y’impunzi z’Abarundi bari batuye i Rukomo.

Tariki ya 08 Ukwakira 1990 ngo batewe n’abasirikare ba Leta (EX-FAR) bica Abatutsi bakoresheje imbunda.

Pasiteri Mutsinzi avuga ko bamwe mu bakirisitu barimo basengana yabasabye kwinjira muri Pariki y’Akagera bakerekeza i Nyagatare banyuze inzira ya Ryabega kubera ko bari batangiye kubarasaho amasasu menshi.

Avuga ko kurokoka kwe kwaturutse ku kwihisha mu mahwa no mu musarane imbere, kandi ngo ntacyo byamutwaye kubera ko umubiri wari utacyumva ububabare cyangwa ngo anukirwe.

Ati “Twazitiriraga Intare ngo itaturira inka, twafataga imiyenzi imbere n’inyuma tukahuzuza amahwa ngo itanyuramo ariko nihishemo kandi amahwa sinayumvise. Nyuma nashatse kujya mu rugo rwanjye mbona umusirikare ahagaze imbere y’umuryango undi mu irembo mpungira mu musarane.”

Akomeza agira ati “Uri mu byago ntanukirwa burya hanukirwa hakanababara uri mu mahoro kuko nakuyeho ibiti gake ninjiramo hasi mu mwanda nihisha mu nguni uwo munsi ndarokoka.”

I Gakirage ngo haratwitswe, inka ziraribwa ahanini bigizwemo uruhare n’abasirikare ba Leta, impunzi z’Abarundi ndetse n’Interahamwe ziturutse ahitwa Cyabayaga.

Abarokokeye i Gakirage ngo ni ababashije kunyura muri Pariki bagakomeza bagana muri Uganda, kimwe n’ababashije kwambuka umugezi w’Umuvumba na bo bakerekeza muri Uganda.

Umuyobozi Nshingwabikorwa w’Akarere ka Nyarugenge, Ngabonziza Emmy, yitabiriye ijoro ryo kwibuka

Ni igikorwa cyatangiye mu ijoro ryo kwibuka tariki 8 ndetse n’umunsi w’ibiganiro wabimburiwe no gushyira indabo ahashyinguye ababo ku rwibutso rwa Gisozi ruri mu Mujyi wa Kigali. Bagaragaje ko bafite imbogamizi nyinshi bityo bakifuza ko zavugutirwa umuti, tariki 9 Gicurasi 2023.

Umwe mu babyeyi waganiriye na Kigali Today wafashwe ku ngufu mu gihe cya Jenoside, icyo gihe akaba yari atwite inda y’ukwezi kumwe agaterwa SIDA ndetse n’umwana akayivukana, yagaragaje ko ubwo bumuga butaborohera bitewe n’akato bahabwa kuko umukobwa we bakomeza kumubenga iyo bamenye icyo kibazo.

Depite Edda Mukabagwiza ari mu bitabiriye kwibuka mu Murenge wa Nyakabanda

Mu bindi yavuze ni uko Leta yabafasha kongera amafaranga y’ingoboka. Ati “Duhabwa ibihumbi 12 ku kwezi, ugendeye ku isoko ririho ubu ntibikunda. Nyaguramo ibiro bine by’ibishyimbo, ntacyo kubitekesha, ntacyo kubirisha kandi tugomba kurya neza bitewe n’uko ndi ku miti igabanya ubukana, imiti y’i Ndera kubera umutwe udakira, mbese amafaranga ntahagije”.

Muri Nyakabanda bibutse abagore n’abakobwa mu gihe cya Jenoside bafashwe ku ngufu, bamwe bagaterwa ibisongo mu myanya y’ibanga.

Undi musaza watanze ubuhamya yagize ati “Mfite ubumuga natewe na Jenoside, nta menyo mfite, intoki baraziciye barandashe, nta nzu yo kubamo ni ugukodesha. Mu by’ukuri dukeneye kwitabwaho mu buvuzi ndetse tugahabwa n’amacumbi byadufasha”.

Perezida wa IBUKA mu Murenge wa Nyakabanda, Usanase Yvonne, ashima ibimaze kugerwaho mu myaka 29 ishize ariko akavuga ko hakiri n’urugendo rw’ibikeneye gukorwa. Ati “Leta yaradufashije bamwe bariga babona akazi ariko hari n’abatarakabona. Dufite ababyeyi badafite amacumbi, abayafite akeneye gusanwa ndetse kandi turifuza ko hano twakubakirwa urukuta rwashyirwaho amazina y’abacu bishwe muri Jenoside”.

Umuyobozi Nshingwabikorwa wungirije w’Akarere, Nshutiraguma Esperance wari muri iki gikorwa yavuze ko hari ikiri gukorwa ku byifuzo by’abarokotse Jenoside cyane ko ari n’ingenzi. Ati “Mu by’ukuri ibi bibazo turabizi ndetse biri gushakirwa umuti yaba ibijyanye n’amacumbi akeneye gusanwa, kubaka amashya, gahunda y’ubuvuzi, ndetse n’amafaranga y’ingoboka. Ikindi hatagize igihinduka, urukuta ruzashyirwaho amazina y’Abatutsi biciwe muri Nyakabanda, mu gihe cyo kwibuka ku nshuro ya 30 Jenoside yakorewe Abatutsi ruzaba rwarabonetse”.

Bacanye urumuri rw’icyizere

Mu Murenge wa Nyakabanda hiciwe Abatutsi bari hejuru ya 800, hakabamo 600 bizwi aho baguye, n’abandi bitaramenyekana aho baherereye ari na ho bahera basaba ababigizemo uruhare gutanga amakuru maze bakabasha gushyingura ababo mu cyubahiro.

Mu gihe cya Jenoside, tariki 8 n’iya 9 Gicurasi 1994 muri Nyakabanda hishwe Abatutsi benshi, nyuma y’uko uwari warigize Konseye Nyirimanzi Gregoire asohoye itangazo abwira Abatutsi bihishe gusohoka bakigaragaza, kuko icumu ryunamuwe kandi nyamara ngo yari amayeri yo kubatsemba.

Bashyize indabo ku mva ziruhukiyemo ababo

Perezida wa IBUKA mu Karere ka Nyarugenge, Rukemampunzi Jean Claude

Umuhanzi Bonhomme yaririmbiye abitabiriye iki gikorwa

Yabibwiye abitabiriye igikorwa cyo kwibuka abari abakozi b’amakomine yabumbiwe mu Karere ka Huye bazize Jenoside yakorewe Abatutsi mu mwaka w’1994, cyabaye tariki ya 5 Gicurasi 2023.

Abakozi b’Akarere ka Huye bitabiriye igikorwa cyo kwibuka abari abakozi b’amakomine yabumbiwe muri Huye, bazize Jenoside

Mu buhamya bwe yavuze ukuntu Jenoside iba yari umwarimukazi w’imyaka 32, akaba yari afite umugabo n’abana bane, akaba ku bw’amahirwe yararokotse Jenoside nyamara atarigeze yihisha kuko yabaye kuri CHUB nyuma y’uko yatewe inkota akanakubitwa ubuhiri bufite imisumari mu mutwe; ahirukanwe ajya kuba kuri EAR, hanyuma kuri Perefegitura.

Inkotanyi ziza yari yarajyanywe mu Irango, mu rwego rwo “gukura umwanda kuri Perefegitura” aho hamwe n’abandi bari kumwe ngo bari barindirijwe kuzicwa ku itariki ya 5 Nyakanga, borosa Perezida Habyarimana ngo wari gushyingurwa kuri iriya tariki.

Jenoside yahitanye abe ndetse n’umugabo we, ariko ku bw’amahirwe abana be bararokoka.

Nyuma ya Jenoside yaharaniye kwigira kuko yabashije no kwiga kaminuza, akayiga mu gihe umwana we w’imfura we yari hafi kuyirangiza.

Patricie Kandekezi avuga ko Abatutsi bazize Jenoside babaye ibitambo by’abayirokotse, bityo bakaba babafitiye umwenda wo kubaho neza

Yashoje ubuhamya bwe asaba abarokotse Jenoside guharanira kwigira, bagakora ahabo n’ah’ababo bagiye.

Yagize ati “Mu gihe twibuka abacu, tujye twibuka indangagaciro zabarangaga. Amaraso yabo yamenetse yabaye ibitambo twebwe tubaho, umwenda dufite rero ni uwo gukora ibyiza kandi tukabaho neza. Umwenda dufitiye igihugu n’Inkotanyi zaturokoye ni uwo kubaho tukabaho neza, ntitwigire abasinzi, ntitwigire abasambanyi, tugakora ahacu n’ah’abacu bagiye.”

Yanashimye aho u Rwanda rugeze mu kwiyubaka, ariko asaba ubuyobozi gushyira imbaraga mu guharanira ubumwe kuko iyo yitegereje abona butaragerwaho.

Yagize ati “Wenda mu rubyiruko sinamenya uko byifashe, ariko mu bakuru bangana natwe ubwo bumwe ni ku munwa. Kuko nk’iyo tugiye mu giturage aho tuvuka, tureba uko batureba, uko batwangiriza ibikorwa tugirayo, tugasanga ubwo bumwe butaragerwaho. Abatuyobora muracyafite umurimo ukomeye ariko Imana ikomeze ibashoboze, bizagenda neza, kandi natwe tuzakomeza kubafasha kubaka iki gihugu mu ntege zacu.”

Umuyobozi w’Akarere ka Huye, Ange Sebutege

Umuyobozi w’Akarere ka Huye, Ange Sebutege, yasabye abakozi b’Akarere kurushaho gusobanurira abato amateka u Rwanda rwaciyemo.

Ati “Abarezi barusheho kwigisha neza amateka na gahunda ya Ndi Umunyarwanda turusheho kuyisobanura neza kuko Madame Patricie yatubwiye ko hari intambwe tugikeneye gutera.”

Ubuyobozi bwa Ofisi y’Igihugu y’Amaposita (NPO), buvuga ko icyo kigo cyabaye umuyoboro unyuzwamo inyandiko n’amabaruwa abantu bohererezanyaga, bikubiyemo amakuru y’uburyo bagomba gukora Jenoside.

Kwibuka ku wa Kabiri tariki 9 Gicurasi 2023 abari abakozi 26 bakoreraga Iposita, byitabiriwe n’inzego zinyuranye zirimo n’ibigo byigenga byashoye imari mu Ikoranabuhanga n’Itumanaho mu Rwanda.

Minisitiri w’Ikoranabuhanga na Inovasiyo, Paula Ingabire, yasabye abakorana na Minisiteri ayobora bose kwerekana uruhare rwabo mu kurwanya abahakana n’abapfobya Jenoside yakorewe Abatutsi bakoresheje Ikoranabuhanga, kuko na bo ngo ari wo muyoboro bakoresha.

Minisitiri Ingabire yagize ati "Mwumvise ko ibinyamakuru ndetse n’abakozi b’Iposita bafatanyije gutegura ubutumwa busakaza urwango, rero Abanyarwanda twese, by’umwihariko abakora mu bijyanye n’ikoranabuhanga no guhanga ibishya ntidukwiye kureberera".

Ibigo bishamikiye kuri MINICT byibutse abari abakozi b’Iposita bazize Jenoside yakorewe Abatutsi

Ati "Nimureke dukoreshe iryo koranabuhanga duhangane n’abarikoresha bakomeje kugoreka amateka yacu, duharanire Ubumwe bw’Abanyarwanda no gusigasira ibimaze kugerwaho muri iyi myaka 29 ishize".

Iposita ifatwa nka mukuru w’ibigo byose mu Rwanda bishinzwe ikoranabuhanga n’itumanaho, kuko ari yo yonyine ngo yabagaho mbere ya 1994.

Umuyobozi Mukuru wa Ofisi y’Igihugu y’Amaposita, Celestin Kayitare, avuga ko Itumanaho ry’amabaruwa n’izindi nyandiko byanyuzwaga mu Iposita nk’umuyoboro w’ibitekerezo bya Jenoside, none n’ubu itumanaho rikoresha murandasi ngo ni ryo ririmo gukwirakwiza ingengabitekerezo ya Jenoside.

Ati "Dusaba abakozi bose bo muri uru rwego kumva uburemere bw’umwihariko bafite, bakagombye gushingira ku bushobozi n’ubumenyi bafite bakarwanya ingengabitekerezo ya Jenoside, kuko ibintu bikorerwa kuri Internet barabizi, babihoraho, biri mu kazi kabo ka buri munsi".

Kayitare avuga ko abakoresha ibyuma by’ikoranabuhanga bagakwiye kuba bandika basubiza abapfobya n’abahakana Jenoside, bashingiye ku mateka baba bumvise ahabereye gahunda zo Kwibuka.

Uwitwa Niyongira Emmanuel warokotse, akaba yarakoreye Iposita kuva mu 1985, avuga ko Ikinyamakuru cyitwaga Kangura gishinjwa gukwirakwiza amacakubiri, n’ubwo ngo cyandikirwaga ku Gisenyi, ibyinshi mu byashyirwagamo ngo babiteguriraga mu biro by’Iposita.

Umuyobozi Mukuru wa Ofisi y’Igihugu y’Amaposita (NPO) Celestin Kayitare amaze gushyira indabo ku Rwibutso rw’i Kigali ku Gisozi

Mukamurara avuga ko yakomerekejwe cyane n’ibyo yabonye i Kibeho

N’ubwo Jenoside iba hari mu biruhuko, abandi banyeshuri bakaba bari iwabo, abo muri Marie Merci bo bari ku ishuri bitewe n’imyigaragambyo yari yahabaye ishuri rigafungwa, hanyuma aho abanyeshuri bagarukiye bo bakabwirwa ko bagomba kwiga mu kiruhuko, kugira ngo barihe igihe bari bataye baratashye.

Jenoside iba rero ngo hari bagenzi babo b’Abatutsi bagerageje guhunga, baza kubabwira ko bishwe, hanyuma basabwa kuguma mu kigo bigagamo, bakaba ari ho barindirwa. Icyo gihe yari afite imyaka 14, yigaga mu mwaka wa kabiri w’amashuri yisumbuye.

Agira ati “Umuzamu Kimbo ni we wazanye ako kana. Kari gafite nk’umwaka. Yaravuze ngo numvise ngize impuhwe kuko nsanze kari konka nyina wapfuye. Tugakorere iki? Tuti kazane.”

Hamwe n’abandi banyeshuri baragafashe bakajya bakararana, bakakagaburira bakanagaha icyayi, ariko nyine kakarara karira.

Mukamurara ati “Hashize iminsi mikeya wa muzamu yaragarutse aravuga ngo urabona karara karira, none tugakorere iki? Amajwi amwe ati mwice andi ngo mureke, biza kugera igihe hasigaye humvikana mwice gusa. Yahise aza arakanshikuza kuko ari njyewe wari ugafite, agakubita ubuhiri bumwe gusa, gahita gapfa. Yazamuye ubuhiri mpita nipfuka mu maso, yagiye kugata mu musarane ntareba. Twari duhagaze imbere ya dortoir, imisarane yari hafi aho.”

Umunsi umwe ngo babajyanye kumvira misa muri Koleje (ubu ni muri GS Mère du Verbe), ariko ibyo yabonye mu nzira bajyayo na byo byaramukomerekeje.

Ati “Twaciye ku bana b’imyaka itatu n’ine. Bari benshi bahagaze, batitira, banyagiwe, bafite ibikomere gusa gusa, bashonje, bakajya bavuga ngo wantwaye, baranyicira hano! Ukabura icyo ukora, nturi bumukoreho, nturi bunamurebe, urareba wihishe abajandarume ngo batabona ko ugize impuhwe.”

Yungamo ati “Tujya muri koleje kandi nabonye umugabo na we ntari nzi avumbutse mu mirambo. Yari yihishe mu mirambo nta n’uzi ko arimo, atwumvise akeka ko ari interahamwe. Bahise bamwirukaho, mbona baramutemaguye.”

Mukamurara kandi ngo ntajya yibagirwa abana batatu batoya b’umukozi wakoraga mu gikoni cyo ku ishuri ryabo, baje kuhamushakira bakabahisha ko yishwe. Ngo babahishe muri iki kigo bakajya babashyira ibiryo, hanyuma rimwe bagiye kubareba basanga bari gukururuka, bavunwe imigongo.”

Amarira amubunga mu maso ati “Batubujije kubaha ibiryo. Abo na bo ntituzi iherezo ryabo.”

Kiliziya ya Kibeho yiciwemo Abatutsi benshi cyane iri hafi cyane y’ishuri Mari Merci. Mukamurara avuga ko ku kibuga cy’iyi Kiliziya hari imirambo myinshi cyane, ku buryo ngo kuyishyingura kwari ugukora ibirundo hanyuma bakazana igitaka bakabarenzaho.

Amazina y’Abatutsi bishwe muri Marie Merci yanditswe ku rwibutso (monument) rwahubatswe

Asoza iki gitekerezo cy’ibyamukomerekeje agira ati “Ibintu byabereye aha i Kibeho mu by’ukuri njya nirinda kubitekerezaho. Iby’inzira naciyemo sinjya mbitindaho cyane, uko iwacu bapfuye na bene mama simbitindaho kuko ntari kumwe na bo. Ariko ibyabereye hano i Kibeho kuko nabirebaga n’amaso yanjye, binsubiza inyuma bigatuma ntekereza cyane, nkumva mbuze ubumuntu bw’umuntu.”

Aho bari muri Koleje Mukamurara yaje guhungana n’abandi bana icyenda b’abahungu biganaga, banyura mu nzira igoranye ariko baza kugera i Burundi.

Muri iri shuri yigagamo habarwa abanyeshuri b’Abatutsi bishwe 80, abarimu umunani ndetse n’abandi bakozi batandatu.

Mu ishuri Marie Merci bagerageje kwica Abatutsi no mu 1992

Mukamurara avuga ko na mbere ya Jenoside, abanyeshuri bagenzi babo bigeze gushaka kubica babaziza ko ari Abatutsi, bakaza gukizwa n’uko abana bo kwa Depite Rugira babimenye bakabibwira Padiri wayoboraga iri shuri.

Agira ati “Diregiteri yamaze kubimenya atujyana muri kiliziya, akomeza kutuganiriza atubwira iby’urukundo. Wabonaga agera aho akabura ibyo avuga. Twahavuye mu masaa saba z’ijoro tujya kuryama.”

Bukeye bwaho, abana b’Abahutu bigaga muri iryo shuri ngo babonye umugambi wabo upfubye, maze bose bambaye imyenda y’umukara bajya ku irimbi ryari hafi aho k’Uwarunyerera, bahamba umutumba bavuga ko bahambye Diregiteri wabo Sebera n’abandi Batutsi bose.

Icyo gihe bamwe bahambaga umutumba, ku ishuri hari abasirikare benshi bavuze ko haraye haburijwemo umugambi wo kwica Abatutsi.

Ibi byatumye abanyeshuri b’Abatutsi bahunga. Baje kugaruka hashize iminsi, haje Minisitiri w’Uburezi.

Ati “Nababajwe no kuba haravuzwe ko ubwicanyi bwari bwateguwe n’Abatutsi, ukibaza ukuntu umuntu wateguye ubwicanyi ari na we wahunze, bikagutangaza.”

Icyo gihe abanyeshuri b’Abatutsi bamwe barirukanywe, na Padiri wayoboraga iri shuri akurwaho.

Nyuma yaho ni bwo abanyeshuri bigaragambije ngo binubira ibiryo no kudahabwa umuziki, ari na byo byabaviriyemo ko Jenoside iba bo bari ku ishuri.

Musenyeri Hakizimana yasabye imbabazi ku bw’abayobozi b’ibigo bya kiliziya bitwaye nabi

Ubwo tariki ya 7 Gicurasi 2023 ishuri Marie Merci hamwe n’andi mashuri yari i Kibeho, mu gihe cya Jenoside ari yo GS Mère du Verbe na St Paul kimwe n’ikigo nderabuzima cya Kibeho, byose bikaba ari ibya Kiliziya Gatolika, bibukaga Jenoside yakorewe Abatutsi, Musenyeri Céléstin Hakizimana, yasabye imbabazi ku bw’abayobozi b’ibi bigo bitwaye nabi.

Yagize ati “Amashuri twaje kwibukamo yatangiye kera. Yagize abayobozi banengwa, bakemangwa. Abongabo turabasabira imbabazi, ab’ubungubu tukabasaba ko twajyana n’u Rwanda tugezemo, n’amatwara mashya kandi meza, ariko cyane cyane amatwara Yezu Kiristu yatuzaniye, turangwa n’urukundo nta n’ivangura.”

Abitabiriye igikorwa cyo kwibuka basabwe kurangwa n’urukundo, ubumwe n’amahoro

Padiri uyobora ishuri Marie Merci kuri ubu, Aphrodice Mugenzi, na we yasabye abanyeshuri n’abakozi bo muri ibi bigo byibutse bose kurangwa n’urukundo, ubumwe n’amahoro, mu rwego rwo kwirinda icyasubiza u Rwanda mu icuraburindi rwanyuzemo.

Umuvunyi Mukuru, Nirere Madeleine, yunamiye abashyinguye mu rwibutso rwa Musanze

Ababwirwa amateka ya Jenoside yakorewe abatutsi ahari iyo ngoro y’Ubutabera (Cour d’Appel de Ruhengeri), batungurwa no kumva ko ahatangirwaga ubutabera ariho habaye indiri y’ubwicanyi, ibifatwa nk’umwihariko w’Isi yose.

Ubwo Ubuyobozi n’abakozi b’Urwego rw’Igihugu rw’Umuvunyi, basuraga urwo rwibutso kuri wa Gatanu tariki 05 Gicurasi 2023, mu rwego rwo kunamira abazize Jenoside bahashyinguye, no gufata mu mugongo abacitse ku icumu rya Jenoside, Twizere Rusesero Feston, Perezida wa IBUKA mu Karere ka Musanze, yasabye ubuvugizi ku Muvunyi, ngo urwo rwibutso rushyirwe mu nzu ndangamateka ya Jenosode yakorewe Abatutsi.

Mbere yo kubagezaho icyo cyifuzo, yabanje kugaragaza ubugome bwari burangajwe imbere n’abari abayobozi bakuru b’Igihugu, n’amayeri bakoresheje kugira ngo imbaga y’Abatutsi barenga 800 bashyinguye muri urwo rwibutso, bicirwe muri iyo ngoro y’Ubutabera.

Ati “Hari uruhare runini rwo kwica abantu rwakozwe n’ubutegetsi bwariho icyo gihe, nyuma y’uko bagiye bicira Abatutsi hirya no hino, mu nsengero, ku biro by’ubuyobozi aho bahungiraga bizera ko bashobora kuhabonera ubuzima. Bize umutwe wo gushuka ababaga barokotse, kugira ngo bagere mu ngoro y’Ubutabera”.

Umuvunyi Mukuru wungirije, Odette Yankurije, ashyira indabo aharuhukiye imibiri isaga 800 y’inzirakarengane

Arongera ati “Uwabaga yihishe, kubera uko yabaga afite ububabare akiyumvisha ko mu ngoro y’Ubutabera ntawe ukwiye kuhicirwa, bamwe bagiye bizana abandi bakabazanwa babumvisha ko ntacyo baba. Nibwo batangiye kubica urw’agashinyaguro, bikorwa n’abayobozi, abasirikare n’umutwe w’interahamwe uzwi ku izina rya ‛Amahindure’, wateguwe utozwa ubugome no gukora ibintu bibi bidasanzwe, bagamije kurimbura uwitwa Umututsi wese”.

Uwo muyobozi wa IBUKA, avuga ko n’ubwo baharaniye kubona urwibutso, icyo cyifuzo kikaba kigezweho nyuma y’imyaka 27, yagize ubuvugizi asaba ku byo urwo rwibutso rubura.

Ati “Mu mateka y’inzibutso, hano ni ho hantu honyine ku Isi biciye abantu mu nzu y’Ubutabera, noneho mu cyumba cyiburanisha, tukaba twumva ari ikintu gikomeye muri bimwe mu bimenyetso bya Jenoside yakorewe Abatutsi mu Rwanda. Twumva ko kuba urwibutso gusa bidahagije, ahubwo byaba inzu y’amateka kugira ngo Isi yose izabyigireho”.

Abakozi b’Urwego rw’Umuvunyi bunamiye Abashyinguye mu rwibutso rwa Jenoside rwa Musanze

Umuvunyi Mukuru, Nirere Madeleine, yavuze ko guhitamo gusura urwo rwibutso, hari byinshi rwihariye, nk’ingoro y’ubutabera yiciwemo abatutsi basaga 800, mu gihe bizwi ko ugeze mu nyubako y’Ubutabera aba abonye uburuhukiro, ahantu abantu baba bizeye kurenganurwa.

Na we aremeza ko aho hantu ariho bibaye bwa mbere ku rwego rw’Isi, kumva ko mu ngoro y’Ubutabera hiciwe abantu kandi hakagombye kuba amakiriro, avuga ko bagiye gukora ubuvugizi ku cyifuzo cya IBUKA, cy’uko urwo rwibutso rwa Jenoside rwagirwa inzu ndangamateka ndetse igashyirwa no mu murage wa UNESCO.

Ati “Ubuvugizi tugiye kubukora, nk’Urwego rw’Umuvunyi rumwe mu nzego nkuru z’Ubutabera, mu nama nkuru y’ubucamanza tuzabiganira. Icya mbere ni ukubigeza kuri Perezida w’Urukiko rw’Ikirenga, tukabiganira na MINUBUMWE, kugira ngo bizafatirwe umwanzuro, nibimara kwemezwa bizamenyekana”.

Ikindi urwego rw’Umuvunyi rugiye gukurikirana mu gufasha abarokotse Jenoside mu Karere ka Musanze, harimo gahunda yo kurangiza imanza za Gacaca 82 zitararangizwa, ikibazo cy’abarokotse Jenoside ari bato batigeze bamenya aho imitungo y’ababyeyi babo iherereye n’ibindi.

Nirere Madeleine yabasezeranyije kubakorera ubuvugizi ku cyifuzo cyabo

Abakozi b’urwego rw’Umuvunyi bahawe ubuhamya ku bwicanyi ndengakamere bwakorewe Abatutsi bari bahungiye mu ngoro y’Ubutabera

Abarokotse Jenoside bashyinguye mu cyubahiro ababo babonetse

Uwo mugabo wamenyekanye aho yihishe ngo yakoze Jenoside ahitwa i Ngoma ku Kibuye, ariko ahungira mu bihugu byo hanze akomeza kuburirwa irengero, ku buryo uwamushakishaga yamenye amakuru ye binyuze ku mbuga nkoranyambaga, yahuriyeho n’umukobwa w’ushakishwa maze baba inshuti.

Uwo mugabo ugishakishwa mu Gihugu cya Cameroun, ngo yabonywe n’umwana wahigwaga icyo gihe kuri Ngoma, amakuru ye akaba yaramenyekanye ko hari agace ko mu mujyi wa Douala muri Cameroun yihishemo.

Umuyobozi uhagarariye IBUKA mu Karere ka Ruhango, Kabanda Callixte, ubwo yagezaga ikiganiro ku bitabiriye igikorwa byo Kwibuka ku nshuro ya 29 Jenoside yakorewe Abatutsi ku Mayaga mu Karere ka Ruhango, yavuze ko kugira ngo uwo mugabo hamenyekane aho yihishe, byakomotse mu gukoresha neza imbuga nkoranyambaga.

Kabanda avuga ko imbuga nkoranyambaga zagira akamaro mu gufata abicanyi bacyihishe zikoreshejwe neza

Avuga ko umwana w’umuhungu warimo yihisha abashakaga kumwica kuri Ngoma mu gihe cya Jenoside, yabonye uwo mugabo yica Abatutsi, uwo mwana akomeza guhungana n’izindi mpunzi, bagerana muri Congo Kinshasa, zigiye kumwica arazicika ajya mu kindi Gihugu, aza no kugera mu Bufaransa aho yaje no kwinjira igisirikare cyaho.

Avuga ko uwo muhungu yakomeje gushakisha uwo mugabo, ariko amakuru ye ntiyayamenya, kugeza ubwo yagiraga amahirwe abona umukobwa we ku mbuga nkoranyambaga, maze bamaze kumenyana amwigiraho inshuti barakundana, kugeza igihe bahanye gahunda yo gusurana.

Byabaye ngombwa ko bahana gahunda yo guhurira muri Cameroun, maze umukobwa amaze kubonana n’umusore bakundaniye kuri (Facebook), amusaba ko yanamwereka ababyeyi, ari nabwo hamenyekanye ko uwo mugabo aba hafi aho yihisha, ubu akaba arimo gushakishwa.

Agira ati "Urwo ni urugero rugaragaza ko imbuga nkoranyambaga zikoreshejwe neza, n’abandi nka Kagabo Charles na Jacques ku Rutabo, bafatwa bagashyikirizwa ubutabera. Ibi bintu birakora kandi bikoreshejwe neza byagira akamaro mu kumenya aho abashakishwa baherereye".

Imibiri 40 yashyinguwe mu cyubahiro mu rwibutso rw’Akarere rwa Ruhango

Kabanda ahamagarira buri wese ushaka kurwana urugamba rwo ku mbuga nkoranyambaga, mu guhangana n’abakwiza ingengabitekerezo ya Jenoside, kubikorana ubwenge bwatuma bagera ku ntego aho gusakuza, kuko n’abakwirakiza ingengabitekerezo batagisakuza cyane, kuko ngo bagamije imikorere mishya icecetse, bise (Revolution bucece), igamije gukomeza kubiba urwango mu Banyarwanda.

Agira ati "Urebye ntibagisakuza cyane ariko birumvikana kuko nta n’icyo bafite bavuga, twebwe rero dufite icyo tuvuga dukwiye kubasanga tukakibabwira, ngo batangiye Revolution bucece, ariko twe tuzababwira".

Abakoresha imbuga nkoranyambaga mu gukwirakwiza ingengabitekerezo ya Jenoside, bakomeje kwamaganwa mu biganiro bitangwa mu gihe cyo Kwibuka Jenoside yakorewe Abatutsi, zimwe mu mpamvu zigaragazwa zituma babikora, zikaba zirimo ipfunwe ry’abana bamize ingengabitekerezo y’ababyeyi babo, no kuba abo babyeyi badashaka kugaragaza ukuri kuri Jenoside yakorewe Abatutsi.

Abantu basabwe gukoresha neza imbuga nkoranyambaga

Mu gikorwa cyo Kwibuka ku nshuro ya 29 Jenoside yakorwe Abatutsi ku Mayaga, cyabaye ku wa 30 Mata 2023, Abanyamayaga bitabiriye ari benshi banashyingura mu cyubahiro imibiri 10 yabonetse, n’indi 30 yavanywe mu mva ziri mu ngo z’Abarokotse Jenoside, aho banashimiwe gukomeza kumva ko ababo bashyingurwa hamwe n’abandi mu cyubahiro mu nzibutso.

Bamwe mu bitabiriye kwibuka ku Mayaga

Ingabo z’Inkotanyi zashimiwe umurava n’ubwitange zagaragaje zirokora Abatutsi

Mu Buhamya bwe, Bayingana Anne Marie, umwe mu barokokeye mu rufunzo rukikije umugezi w’Akanyaru, avuga ko Jenoside yabaye afite imyaka 15 y’amavuko, ihitana ababyeyi be ndetse n’abavandimwe bane.

Avuga ko uru rufunzo rwiciwemo Abatutsi benshi bigizwemo uruhare n’abasirikare, abari abayobozi ndetse n’interahamwe. Abari basigaye ari bazima ngo baje gutabarwa n’Inkotanyi ariko hasigaye ngerere.

Bayingana avuga ko n’ubwo Jenoside yabasigiye ibikomere ku mubiri no ku mutima, ariko babashije kwiyubaka ndetse bakaba bakataje mu rugamba rw’iterambere.

Ati “Dufite ikizere cyo kubaho, dufite ikizere cyo kuba mu Gihugu kizira Jenoside, tuzarwanya Jenoside n’ingengabitekerezo yayo. Leta y’ubumwe yarakoze, yakuyeho amoko kandi tubayeho, turatuje kandi turakomeye, ndetse tuzaharanira kubaka Igihugu kizira Jenoside.”

Hashyizwe indabo hejuru y’urufunzo rwari rwihishemo Abatutsi benshi

Minisiteri y’Ubumwe bw’Abanyarwanda n’Inshingano Mboneragihugu, ivuga ko kugira abicanyi bamenye ko muri urwo rufunzo harimo Abatutsi benshi bihishemo, bifashishije indege maze bategura umugambi wo kubatsemba.

Mbere ngo babanje kujya bagaba ibitero bakica bacye kuko ngo batinyaga kwinjira kure muri urwo rufunzo rw’inzitane, dore ko n’umuntu atashoboraga kubona uwo bihishanye.

Abasirikare n’interahamwe ngo bavuye impande zitandukanye, mu kigo cya gisirikare cya Gako, Ngenda na Gashora, abavuye muri Komini Gicumbi, Gikomero, Mbogo, Nyamabuye n’ibindi bice bya Gitarama, Mugina n’ahandi, impunzi z’Abahutu zavuye ku Ruhuha n’izavuye Nyacyonga, baje muri bisi za ONATRACOM ari benshi cyane, bavuza induru n’amafirimbi, bigabanyamo ibitero byinshi maze bagota urwo rufunzo.

Hari n’abaturutse mu masegiteri ya Kanzenze ya Rulindo na Musenyi yari akikije urufunzo, abandi ku ruhande rwa Ntarama maze baraza bica Abatutsi bari mu rufunzo kuva nka saa yine z’amanywa, kugera saa kumi n’imwe z’umugoroba, bacyurwaga n’uko bavugaga ko hari abataha kure bafite urugendo rurerure rw’amasaha menshi.

Kugira ngo babashe kuvumbura no kwica Abatutsi bari mu rufunzo hakoreshejwe indege zarasagamo ibisasu biremereye

Abasirikare bararasaga bakanatera ibisasu mu rufunzo, maze interahamwe zitwaje imihoro, amacumu, ibisongo, ubuhiri burimo imisumari bitaga ‘nta mpongano y’umwanzi’, inkota n’izindi ntwaro gakondo bakica Abatutsi, dore ko nta wahungaga, kuko batabashaga kwiruka mu rufunzo.

Abasirikare n’interahamwe babanzaga no gusaka abo bishe ngo babacuze ibyo bambaye cyangwa barebe ko nta mafaranga bafite, maze bagera ku bakobwa bakabanza kubasambanya babashyize ahumutse gato cyangwa aho barunze ibifunzo batemye, barangiza bakabatera ibisongo mu myanya ndangagitsina cyangwa bakabakubitamo imihoro babashinyagurira, bakabasiga bambaye ubusa.

Ibyo bitero byo mu rufunzo byabaga biyobowe n’umuyobozi w’ikigo cya gisirikare cya Gako, Colonel Pheneas Munyarugarama, ubu ushakishwa n’ubutabera mpuzamahanga, uwahoze ari Superefe wa Superefegitura Kanazi, Gasana Djuma, Gatanazi Bernard wari Burugumesitiri wa Komini Kanzenze, Kararangabo Vincent wari umugenzuzi w’amashuri.

Babanje gukora urugendo rwerekeza ku rufunzo rwahawe izina rya CND rwatikiriyemo Abatutsi benshi

Hari kandi Nsabyemuganwa wahoze ari umuyobozi w’amashuri abanza ya Cyugaro, Bizimana wahoze ari umuyobozi w’Amashuri abanza ya Nyamata, Pasiteri Uwinkindi Jean, Gasharankwanzi Sylvestre, umusirikare witwaga Sebugingo, Bizimungu wari umupolisi n’abandi bicanyi.

Ayo makuru yatanzwe ku Cyumweru tariki ya 30 Mata 2023, ubwo hibukwaga Abatutsi benshi biciwe mu rufunzo babatije CND rugabanya Ntarama, Rulindo na Mugina ya Kamonyi.

Abakoze Jenoside ku Mayaga batarafatwa barasabirwa gufungirwa mu cyumba cy’umukara

Ibi byasabwe na Kabandana Callixte, umwe mu bagize inama y’ubuyobozi y’Umuryango IBUKA ku rwego rw’Igihugu, wari uhagarariye uwo muryango muri icyo gikorwa.

Kabandana yagarutse ku nzu y’amateka, imaze imyaka isabwa ngo yubakwe ku rwibutso rw’Akarere ka Ruhango ruri aho i Kinazi. Iyo nzu y’amateka izaba igize igice cya kane cy’urwo rwibutso, kuko hasanzwe hari ibindi bice bitatu aribyo imva ebyiri ziruhukiyemo imibiri isaga ibihumbi 63, ubusitani bwo kwibukiramo (Jardin de la mémoire) ndetse n’ubusitani bwo kwirwanaho kw’abanyamayaga (Jardin de la résistance).

Mu kugaragaza ko inzu y’amateka iri mu byihutirwa, Kabandana yagize ati “Nagira ngo nsabe iyo nzu y’amateka ibe mu byihutirwa, kuko twifuzamo n’icyumba cy’umukara, kugira ngo ba Barundi bariye imitima y’ababyeyi n’abavandimwe bacu byibura tube tubafunze mu mazina. Impamvu cyangwa icyaba gituma uyu munsi tutababona zizarangira, kandi nizitarangira abadukomokaho nibajya muri icyo cyumba, bazajye bamenya ko hari Abarundi bariye imitima ya ba se na ba sekuru batafashwe”.

Bacanye urumuri rw’icyizere

Yongeyeho ko icyo cyumba nikiboneka muri iyo nzu y’amateka, hazashyirwamo amazina n’amafoto ya ba ruharwa bandi batarafatwa, nk’uwari Burugumesitiri wa Komini Ntongwe Charles Kagabo, uzwiho ubugome burenze urugero burimo gushishikariza abaturage yayoboraga ngo bahungire kuri Komini abizeza kuhabarindira. Nyuma yahise abahamagarira abicanyi barimo abasirikare, abajandarume, interahamwe ndetse n’Abarundi bari impunzi zari zikambitse aho i Kinazi ahitwa i Nyagahama, maze babahukamo barabatsemba.

Hari kandi uwitwa Nsabimana Jacques wari umwarimu bari barahimbye Pilato kubera ubugome bwe. Uyu yari yarateye intebe ku cyobo cyari cyariswe CND ahitwa ku Rutabo, bakajya bamuzanira abatutsi akabacira urwa Pilato, ari naho izina ryakomotse. Hari n’abandi benshi batarafatwa barimo abari abakonseye.

Mu byakunze kugarukwaho cyane aha ku Mayaga ya Ntongwe, ni ubugome ndengakamere bwakoreshwaga mu kwica Abatutsi baho, cyane cyane ibyakozwe n’impunzi z’Abarundi birimo imbabura bari barashinze mu masangano y’imihanda mu Bulima bwa Kinazi, maze bamara kwica abatutsi bakabakuramo imitima bakayotsa.

Amatariki Abanyamayaga batajya bibagirwa ni aya 20 na 21 Mata, aho Burugumesitiri Kagabo yashutse Abatutsi bari barimo kwicirwa kuri Komini ngo bajye kuri Superefegitura mu Ruhango, aho babizezaga gucungirwa umutekano byisumbuyeho, maze basanga abicanyi bateguwe babategeye mu kibaya cya Nyamukumba babahukamo n’amasasu na za gerenade n’imihoro, barabarimbura harokoka mbarwa.

Abacitse ku icumu aho ku Mayaga bibumbiye mu muryango Amayaga Genocide Survivors Foundation (AGSF), bakaba basaba ko aho Nyamukumba naho hazashyirwa ikimenyetso cy’urwibutso rw’ubwicanyi ndengakamere bwahabereye.

Urwibutso rw’Akarere ka Ruhango ruri i Kinazi nirwo rukuru muri ako karere, rukaba kugeza ubu rushyinguyemo imibiri isaga ibihumbi 63.

Kabandana Callixte asaba ko inzu y’amateka yakwihutishwa kandi hagashyirwamo icyumba cy’umukara gifungirwamo amazina n’amafoto y’abicanyi batarafatwa

Buri mwaka hakorwa urugendo ruva Nyamukumba rukagera ku biro by’Umurenge wa Kinazi byahoze ari ibya Komine Ntongwe

Urwibutso rw’Akarere ka Ruhango ruri i Kinazi

Babitangaje mu gikorwa cyo Kwibuka ku nshuro ya 29 Jenoside yakorewe Abatutsi ku Mayaga, ku rwibutso rwa Jenoside rwa Ruhango, ahashyiguwe imibiri isaga ibihumbi 63, ubu hakaba hanashyinguwe n’indi mibiri 40 yavanywe hirya no hino mu ngo.

Umuyobozi w’Akarere ka Ruhango, Habarurema Valens, avuga ko bishwe bigizwemo uruhare n’uwari Burugunesitiri wa Komini Ntongwe, Kagabo Charles. Meya Habarurema yagejeje icyifuzo kuri Perezida w’Inteko Ishinga Amategeko Umutwe w’Abadepite ko bafashwa kubaka inzu y’amateka, izatwara hafi miliyari imwe y’amafaranga y’u Rwanda ikabika ayo mateka.

Yagize ati "Turifuza ko ariya mafaranga mwatuba hafi akaboneka kugira ngo yubakwe kuko kugeza ubu ku rwibutso hakorwa amasuku gusa, ariko hakenewe no gushyira amakuru muri iyo nzu y’amateka kugira ngo ijye ifasha abantu Kwibuka, banagaragarizwa uruhare rw’ubuyobozi mu gutegura no gukora Jenoside.

Umuyobozi w’Umuryango w’abarokotse Jenoside yakorewe Abatutsi ku Mayaga, Evode Munyurangabo, yavuze ko ibisabwa mu gukusanya amakuru azashyirwa mu nzu y’amateka bari kubitegura, akifuza ko habaho kuzamura ingengo y’imari y’Akarere ka Ruhango umwaka utaha yafasha mu kubaka iyo nzu y’amateka.

Avuga ko abitwa Kagabo Charles na Nsabimana Jacques ndetse n’Abarundi bari barahungiye i Kinazi, batarakurikiranwa n’ubutabera, kandi barakoze Jenoside ndengakamere muri Ntongwe

Kabandana Callixte waje ahagarariye IBUKA ku rwego rw’Igihugu, avuga ko kuva tariki 07 Mata 2023 hatangijwe ibikorwa byo Kwibuka ku nshuro ya 29 Jenoside yakorewe Abatutsi, hagaragaye Ingengabitekerezo ya Jenoside, ibyo kandi bikajyana no kuba hari abakomeje guhishira amakuru ku hajugunywe imibiri y’Abatutsi bishwe, urugero rukaba ibirimo kubera i Rusizi ahamaze gukurwa imibiri isaga 1000.

Yagize ati “Hariya hantu bishe Abatutsi nta gihunga kuko Inkotanyi zari zitanahegereye, ku buryo kudatanga amakuru mbifata nk’ubwende ariko bunashingiye ku ngengabitekerezo ya Jenoside, kuko bariya bantu ntibavumbutse mu mwobo hari abari bazi ko bahari".

Ku kijyanye no kubaka inzu y’amateka, asaba ko byakwihutirwa, kandi hagashyirwamo icyumba cy’umukara cyafungirwamo amazina y’Abarundi bicaga abantu bakabakuramo imitima bakayotsa bakayirya.

Agira ati “Muri iyo nzu y’amateka twumva hazashyirwamo icyumba cy’umukara gifungiyemo amazina y’abo Barundi ndetse n’amazina ya Burugumesitiri Kagabo n’amafoto ye igihe atarafatwa ngo agezwe imbere y’ubutabera".

Avuga ko guhora kw’abarokotse Jenoside ari ukongera gusubiranya ibyo ababiciye bangije, bakajya iwabo bakahubaka, bakorora, ingo bakomokamo zikongera kuzuka zikagarura ubuzima.

Perezida w’Inteko Ishinga Amategeko Umutwe w’Abadepite, Mukabalisa Donatille, anenga abagifite amakuru ku bishwe muri Jenoside ntibayatange, kandi ko bidakwiye ko abantu bakoze Jenoside bakanababarirwa bakomeza guhishira amakuru y’ahari imibiri.

Depite Mukabalisa Donatille yasabye abazi amakuru y’ahari imibiri itarashyingurwa mu cyubahiro kuyatanga

Asaba abantu gukomeza gusigasira ubumwe bwagezweho, kandi ko n’Igihugu cyanyuze mu bibi byinshi, hakaba hari intambwe ishimishje imaze guterwa, aho buri wese Igihugu kimuha amahirwe angana n’aya mugenzi we.

Yagize ati “Tugomba guharanira gutera intambwe idasubira inyuma, kugira ngo abazatura mu Gihugu cy’ejo hazaza bazabeho neza. Ni yo mpamvu dukwiye kurwanya abagihembera amacakubiri bashinyagurira abarokotse Jenoside".

Ku kijyanye no kuba bifuza inzu y’amateka, avuga ko Abadepite bari banagejeje iyo ngingo ku Nteko rusange, kandi ko bizashakirwa igisubizo gishingiye ku bushobozi bw’Igihugu.

Abarokotse Jenoside yakorewe Abatutsi ku Mayaga bishimira uko bamaze gutera intambwe biteza imbere bakanateza imbere Igihugu muri rusange, kandi biyemeje gukomeza ibikorwa bituma babaho mu buzima bubahesha icyubahiro.

Minisitiri wa MINIBUMWE yifatanyije n’Abanyagisenyi kwibuka Jenoside yakorewe Abatutsi muri Perefegitura ya Gisenyi

Minisitiri Dr. Jean Damascene Bizimana uyobora MINIBUMWE wifatanyije n’abanyarubavu kwibuka Jenoside yakorewe Abatutsi mu cyahoze ari Perefegitura ya Gisenyi, yihanganishije abarokotse Jenoside yakorewe Abatutsi by’umwihariko abafite ababo bashyinguye kuri Komine Rouge.

Dr. Bizimana avuga ko mu cyahoze ari Perefegitura ya Gisenyi Jenoside yagize ubukana bukomeye kubera abategetsi ba gisivili n’aba gisirikari, abenshi muri bo bakomokaga ku Gisenyi nka Col. Bagosora Théonèste, barwanyije Amasezerano y’Amahoro ya Arusha yo gusaranganya ubutegetsi na FPR-Inkotanyi, ahubwo bagakangurira Abahutu kwica Abatutsi.

Kuri Komini Rouge hashyinguwe imibiri y’Abatutsi benshi bajugunywaga mu byobo byari byarateguwe

Avuga ko umuntu wese wagaragazaga kugirira impuhwe Abatutsi na we yatotezwaga, ndetse bamwe bakisanga batemerewe kujya mu zindi perefegitura bazira gusa ko bafasha Abatutsi.

Minisitiri wa MINUBUMWE yasabye ababyeyi kwigisha abana indangagaciro y’ubumwe. Yagize ati "Abana bagomba kwigishwa ubumwe kandi bakabyigishwa bakiri bato. Ntabwo dushaka ko abana bigishwa ko Igihugu ari icya Gahutu, Gatutsi cyangwa Gatwa. Ni icya Kanyarwanda."

Yaburiye abigisha urwango badashaka gusohoka mu ngengabigekerezo ya Jenoside. Yagize ati "Ntabwo tuzabemerera ko bangiza sosiyete, twese tugomba kubarwanya."

Kabanda Innocent warokokeye muri Gisenyi avuga ko kuri Komini Rouge habereye ubugome bukomeye burimo kwica abana bakubiswe ku biti, n’ubu bikihaboneka.

Umubiri wa Nzaramba Jean Marie Vianney wabonetse washyinguwe mu Rwibutso rwa Komini Rouge

Yagize ati “Ubwicanyi ndengakamere bwabereye aha, tariki ya 30 Mata nibwo hishwe Abatutsi benshi muri Gisenyi kuko ifatwa nk’iyo kumaraho Abatutsi. Aha hari ibiti Interahamwe zikubitaho abana b’impinja bazanwa banga kwivuna nyuma y’uko zimaze kwica ba nyina.”

Yakomeje asobanura ko kuri Komini Rouge hari hazwi nk’irimbi rusange, ariko urugamba rwo kubohora Igihugu rutangiye hajugunywe Abatutsi bishwe hirya no hino muri Gisenyi, ndetse hakaba haracukuwe ibyobo rusange bajugunyagamo Abatutsi bicwaga.

Urwibutso rwa Komini Rouge

I Ngoma mu Karere ka Huye bashyinguye imibiri itandatu yabonetse mu mirima

Yabibwiye abari bitabiriye igikorwa cyo kwibuka ku nshuro ya 29 Jenoside yakorewe Abatutsi mu 1994, mu Murenge wa Ngoma mu Karere ka Huye, tariki 30 Mata 2023, barimo abantu bakuru ariko n’urubyiruko rutari rukeya.

Mu ijambo rye yashimye kuba igikorwa cyo kwibuka cyitabiriwe n’abantu benshi, cyane cyane ashima kuba harimo urubyiruko rwinshi, kuko ari bo bifuza ko bamenya neza amateka y’u Rwanda, kugira ngo batazibwira ko uko Leta y’u Rwanda ihihibikanira umuturage ari ko byahoze, bityo bakamenya ko ari bo bagomba gusigasira ibyagezweho.

Yagaye kandi kuba umujyi wa Butare wari ugizwe ahanini n’Umurenge wa Ngoma kuri ubu, wari umujyi w’abanyabwenge, ukaba warabagamo abacuruzi bakomeye, abihayimana benshi, biyambuye ibyo byose, bakiyambika icyasha cy’ubwicanyi bazahorana.

Yagize ati “Iyo usesenguye neza, abateguye Jenoside bakayishyira no mu bikorwa na bo usanga batarikundaga. Igihugu cyo ntabwo bagikundaga, kuko ugikunda ntabwo wagisenya. Ariko na bo ubwabo ntibikundaga kuko niba bagifite n’imiryango, baranayifite, nta murage muzima bayisigiye.”

Abayobozi batandukanye bunamiye abishwe muri Jenoside

Minisitiri Ingabire afatiye ku kuba muri iyi minsi ahitwa i Mibirizi harimo kuboneka imibiri itari mike y’Abatutsi bishwe muri Jenoside, intandaro ikaba yarabaye gukora amaterasi, yongeye no kwibutsa ko bidakwiye kuba nyuma y’imyaka 29 abantu bakingingirwa kugaragaza aho imibiri y’Abatutsi yashyizwe, kugira ngo ababo babashe kubashyingura mu cyubahiro.

Yagize ati “Ikibabaje kinatangaje ni uko iyo abantu babonetse abantu batangira noneho kuvuga amakuru: babishe umugenda, aba ni ba naka bari baturutse aha.... Tuzi neza ko hari abantu bazi aho abantu bakiri, n’ubifite mu mutima simpamya ko atekanye, kuko afite ibanga rikomeye kandi ritari ryiza. Rero turabasaba abantu bakoreshe ubushobozi ubwo ari bwo bwose, batange amakuru.”

Kwibuka mu Murenge wa Ngoma byajyaniranye no gushyigura imibiri itandatu yabonetse mu mirima, harimo uwabashije kumenyekana w’uwari umwarimu wa EAV Kabutare, Furere Grégoire.

Umukobwa we Aline Tumukunde yavuze ko bashima Imana kuba barabonye umubiri we, bakaba babashije kuwushyingira mu cyubahiro, anavuga ko mu rwego rwo kwirinda guheranwa n’agahinda biyemeje kujya bibuka ibyiza.

Aline Tumukunde na murumuna we

Mu byiza bibuka ku babyeyi babo bari n’abarimu bombi, harimo kuba barabatoje kwihangana no guharanira kwigira, kuko ari byo bizabahesha kubaho nta wubasuzugura.

Ati “Iyo twabaga turi ku meza, ni bwo batuganirizaga, bakatubwiraga uko tugomba kwihangana mu buzima. Twavugaga ukuntu twatotejwe ku ishuri, ukuntu muri karitsiye abana badutoteza batwita inyenzi, bakavuga bati ntimukabasubize. Mujye mwihangana, mubibwire Imana.”

Bo ngo bumvaga bakwihorera, ariko ababyeyi bagakomeza kubigisha, bakanabatoza gukunda bagenzi babo n’ubwo bo batabakunda.

Bashyize indabo ku rwibutso rwa Jensode rwa ngoma

Umunyamabanga wa Leta muri Minisiteri y’Ubutegetsi bw’Igihugu, Assoumpta Ingabire

Kwibuka i Ngoma mu Karere ka Huye byitabiriwe n’abatari bake

Abafite ababo bashyinguye mu rwibututso rwa Jenoside rwa Karama bifuza ko rwubakwa neza, rukaba urw’Akarere

Hon. Antoine Mugesera na we ukomoka i Karama, wigeze no kuba Perezida w’umuryango uharanira inyungu z’abacitse ku icumu rya Jenoside yakorewe Abatutsi mu mwaka w’1994 (IBUKA), ni umwe mu bashyigikiye icyo gitekerezo.

Ubwo i Karama bibukaga ku nshuri ya 29 Jenoside yakorewe Abatutsi, tariki 21 Mata 2023, yagize ati “Ahantu hose haguye Abatutsi iteka usanga hafite akantu kihariye kaharanga. Umwihariko wa Karama ni umubare munini w’Abatutsi bahaguye. Si uwo turata, ariko ni ikintu cyari gikwiye kwitabwaho, tukubakirwa urwibutso rwiza.”

Yongeraho ko n’umuhanda uturuka kuri kaburimbo ugana i Nyaruguru ukagera kuri uru rwibutso, ureshya n’ibilometero nka bibiri, bifuza ko na wo washyirwamo kaburimbo, bityo kurugeraho bikoroha.

Ubundi i Karama ngo hahungiye Abatutsi barenga ibihumbi 100, bari baturutse hirya no hino higanjemo abakomokaga muri Komine Runyinya (ari yo Karama kuri ubu), ndetse no muri Nyaruguru.

Abavuga uyu mubare bawuhera ku kuba uwari Padiri mukuru wa Paruwasi Gatolika yaho, ari na ho bari bahungiye, yari yagiye agerageza kubandika ashaka kumenya umubare wabo kugira ngo abone uko abakira inkunga y’ibiryo muri Caritas.

Icyakora, abahaguye bo ngo babarirwa mu bihumbi 75, ariko uwo mubare wose nturabasha gushyingurwa kuko hari abataramenyekana aho baherereye. Abashyinguye mu rwibutso rwaho ngo bakuwe mu byobo bigera ku 1335.

Abenshi mu bahaguye bishwe ku itariki ya 21 Mata 1994, kandi kubera ko bari benshi ngo habayeho kubanza kubateramo gerenade no kubarasa, kugira ngo bacibwe intege zo kwirwanaho mbere yo koherezwamo abafite imihoro n’ubuhiri bakabiraramo.

Babishe kandi nyuma y’uko bari baciye amatiyo y’amazi bashoboraga kwifashisha, n’ayo mu mugezi utemba bakaba bari bayamennyemo umuti wa kirorini, bituma babura amazi yo kunywa n’ayo kwifashisha mu bundi buryo bwose.

Bukeye bwaho, abagore n’abana bari basigaye batari banabashije guhunga, ngo bafatiranywe ku bw’inzara bari bafite bahabwa igikoma kiroze, barapfa. Bose hamwe babarirwa mu gihumbi.

Hon. Mugesera avuga ko akurikije uko batekereza urwibutso rw’i Karama rwagombye kuba rumeze, uruhari ubu arugereranya n’imva, na yo yabonetse biturutse mu bushobozi bwagiye bwegeranywa n’Abarokotse Jenoside bahakomoka.

Ati “Abantu bagiye bikora mu mifuka, inshuti ikaguha amafaranga makeya. Twubatse akantu, ntiturakita urwibutso, tukita imva.”

Iki gitekerezo gishyigikiwe n’Umunyamabanga Nshingwabikorwa wa IBUKA, Naphtal Ahishakiye ugira ati “Uru rwibutso rukwiye gukorwa neza, rukaba urwibutso rwo ku rwego rw’Akarere, kandi rugashyirwamo ibya ngombwa byose, ku buryo n’amateka yaho azakomeza akabungabungwa.”

Akomeza agira ati “Mu kurwubaka hagiye hagaragara imbaraga nyinshi z’abafite ababo hano. Uyu munsi twasaba ko Akarere kabishyira muri gahunda kagashakisha ingengo y’imari, rukaba urwibutso nibura rwo ku rwego rw’Akarere, rugahabwa n’ibyangombwa byose, kandi birashoboka.”

Umuyobozi w’Akarere ka Huye, Ange Sebutege, avuga ko gahunda Akarere gafite ari ugukomeza kubungabunga neza inzibutso zizagumaho n’urwa Karama rurimo, ariko ko hari izo bazahuza nk’uko byatangiye kuganirwaho n’abo bireba bose.

Naho ku bijyanye n’Urwibutso rw’Akarere ruzagaragaza amateka ya Jenoside muri Huye, ngo ruzubakwa mu mujyi wa Huye.

Ku bijyanye n’igitekerezo cyo gushyira kaburimbo mu muhanda ugana ku rwibutso rwa Jenoside rwa Karama, ngo ni cyiza ariko mu gihe ubushobozi butaraboneka ndetse n’indi yihutirwa itararangira, uyu muhanda bazakomeza kuwubungabunga no kuwusana igihe wangiritse.

Jean Paul Habimana

Jean Paul Habimana wari ufite imyaka 12 mu gihe cya Jenoside yakorewe Abatutsi, yabivuze tariki 29 Mata 2023 mu buhamya ku buzima bwe mu gihe cya Jenoside, yavugiye imbere y’abari bateraniye i Mata mu gikorwa cyo kwibuka ku nshuro ya 29 Jenoside yakorewe Abatutsi.

Mu buhamya bwe yavuze ukuntu mu gihe cya Jenoside yagiye ahunga, ari wenyine kuko yari yaburanye n’abe, akaza kugera i Burundi, kandi ngo mu byo yahuye na byo bitajya bimuvamo harimo kubona abantu bapfuye harimo n’ababyeyi.

Agira ati “Kubona umwana yonka nyina wapfuye, kubona umubyeyi yamburwa umwana bakajya kumwica ngo ni uko ari umuhungu, ... Ikindi ntazibagirwa ni umwana biciye hejuru y’intebe nari nihishemo, amaraso ye akajya antonyangira."

Naho ku bijyanye n’ibyatumaga arakarira Umukuru w’Igihugu ngo ni ukuba atari yemerewe kwica na we abamwiciye abe harimo mushiki we yakurikiraga ndetse n’abo mushiki we wo kwa se wabo yahungiyeho bakamwereka ko bamwakiriye hanyuma bakamuhururiza abicanyi.

Yungamo ati “N’aho twanyuraga duhunga baravugaga ngo nimuzamure amaboko muvuge ngo Kagame yaradushutse Kagame yaradushutse. Icyo gihe twebwe ntitwari tunamuzi. Noneho nkavuga nti ese uyu muntu ntanazi ni kuko batwica bavuga ngo yaradushutse?”

Jean Paul Habimana yagezeho yumva ko kwihorera bitari ngombwa ahereye ku iterambere rye bwite ndetse n’iry’u Rwanda muri rusange.

Ati “Jenoside yabaye kubera ubuyobozi bubi. Na n’iyi saha hari ibihugu tujya twumva bifite abayobozi babi bahagarikira abaturage bakica abandi. Mbona ukuntu bigenda bisigara inyuma mu iterambere. Rero Perezida naje kumubabarira numva ndabohotse kuko nabonye ko iyo dukomeza bamwe bihorera abandi bihorera, twari gusigara inyuma.”

I Mata muri Nyaruguru, bitabiriye kwibuka Jenoside yakorewe Abatutsi

Yongeyeho ati “Ubu ndi umugabo ndubatse, mfite abana batatu. Nabonye amahirwe, mbona akazi, nubaka umuryango. Iyo nza kujya kwihorera, hari igihe mba narabipfiriyemo, wenda nkicwa n’uwo najyaga kwihoreraho. No mu bo nababariye hari uwo nyuma nakeneragaho ikintu na we akankeneraho ikindi. Birarangira pe! Narababariye, byarashize, n’Umukuru w’Igihugu ndamukunda kandi ndamushimira.”

Ignace Munyaneza, ubu ni impuguke mu by’ubwubatsi akaba n’umugenagaciro. Na we avuga ko yasanze kwihorera babujijwe nta mumaro byari bifite, ahubwo asanga byari ibyo gusenya Igihugu.

Jenoside iba ngo yari afite imyaka icyenda, ariko irangiye ngo yumvaga yakwihorera cyane cyane ku wamwiciye se.

Ati “Kutihorera mbere ntitwabyumvaga, ariko Leta ishyiramo ingufu, baratwigisha. Iyo twihorera uyu munsi ntabwo tuba tuvuga Jenoside yakorewe Abatutsi. Tuba tuvuga intambara, gusubiranamo n’ibindi. Inzira yo kubyumva no kubyakira ntabwo yari yoroshye. Twasanze ari inzira nziza kandi yatanze umusaruro mwiza.”

Ababyeyi bamburiwe abana kuri bariyeri ya Mukangango bashyize indabo aho abahungu babo biciwe

Ababyeyi bamburiwe abana kuri iyo bariyeri bakahicirwa bavuga bashinyaguriwe cyane kuko abana babo bamaraga kwicwa, ababyeyi bagategekwa kubajugunya mu cyobo babatabagamo cyangwa hakaba n’ababyeyi basabwa kwiyicira abana babo, mu rwego rwo kubababaza no kubashinyagurira.

Mukamurenzi Beatrice wambuwe abana bakicirwa kuri bariyeri ya Mukangango avuga ko uwo mubeyi yabaye gito akica abana b’abahungu, nk’uko byagenze ku bana bishwe ku bwa Herodi (uvugwa mu mateka) ashaka kwica umwana w’Imana Yezu Kristu, kandi uwo mugore na we yari afite umwana w’umuhungu yigishaga kwica.

Agira ati "Na n’ubu abana bacu turacyabumva mu majwi batubwira ko tubatokoza, ko tubasize, mu majwi menshi atandukanye, guhamba abana bacu babona ntabwo tubyibagirwa, ubwo twategekwaga kubashyira mu cyobo bishwe ariko bataranogoka, ariko uyu munsi turashimira abandi bagore beza b’umutima bari kudufasha mu buyobozi no kwiyubaka kubera Perezida Kagame ureba kure".

Bibukira ku giti cyicirwagwaho abana

Uwimana Appolinarie wari ufite abana bane b’abahungu biciwe kuri iyo bariyeri avuga ko bifuje ko umwana w’umuhungu aba umukobwa bigatuma babambika amakanzu, ariko biba iby’ubusa kuko babamburaga imyenda, bakareba ibitsina byabo, basanga ari umuhungu bakamwica.

Agira ati, “Banyiciye abana bane b’abahungu barambwira ngo nimpaguruke njye kubahamba, mbwira umuntu aramfasha turaterura, bamwe ari bazima bakambaza ukuntu mbasize, tubamarira mu rwobo basigara babataba. Nahoranaga amarira buri munsi ariko ubu kubera ubumwe n’ubwiyunge narakize, ibikomere bigenda bigabanuka".

Umunyamabanga Nshingwabikorwa w’Umurenge wa Nyarubaka, Providence Mbonigaba, avuga ko banenga Mukangango wiyambuye ububyeyi akambara urwango n’ubuhemu akica abana b’abahungu agamije gutsemba Umututsi, agasaba abarokotse Jenoside gukomera no kudaheranwa n’ibikomere by’amateka ya Jenoside.

Mbonigaba Providence uyobora Umurenge wa Nyarubaka avuga ko bagaya Mukangango wari washyizeho uburyo bwo kwica abahungu

Buregeya Theoneste wari ufite imyaka 14 warokokeye kuri bariyeri ya Mukangango n’umuhungu we, avuga ko uwo muhungu wa Mukangango batazi ahantu yaba aherereye, akaba ngo ari we wari mubi cyane ugereranyije na nyina kuko ari we wari ushinzwe gukubita abana ku giti bicirwagaho.

Avuga ko abavandimwe be b’abahungu bagera ku icumi mu muryango biciwe kuri iyo bariyeri, we akaza kurokorwa no kuba abagore bakubitwaga baramuguyeho, abicanyi ntibabashe kumubona munsi y’abo bagore kuko yari yambaye n’ikanzu.

Agira ati “N’ubwo mama yari yanyambitse ikanzu, iyo banyambura imyenda bari kubona ko ndi umuhungu bakanyica. Njyewe narokowe n’umugore bakubise cyane imbaraga zimushiranye angwa hejuru ntibabasha kungenzura kuko nari nambaye ikanzu ya mushiki wanjye, ariko abagera ku icumi mu muryango wanjye b’abahungu barabishe".

Buregeya avuga ko nyuma yo kwica barumuna be areba, bababwiye ko bahaguruka bagakomeza urugendo bakazicirwa ahandi kuko umugambi wa bariyeri ya Mukangango kwari ugushaka abana b’abahungu gusa n’abagabo.

Umuyobozi w’Akarere ka Kamonyi Dr. Nahayo Sylvere avuga ko Mukangango yabaye urugero rubi rw’umugore wahekuye Igihugu, ariko ko ubu Leta y’Ubumwe bw’Abanyarwanda yubatse umugore ushoboye gukorera Igihugu akaba intangarugero muri byose, bityo ko bikwiye ko abagore bamunenga ariko bakanitandukanya n’ibikorwa by’ubugome kuko umugore ari umutima w’urugo rurema umuryango n’Igihugu.

Agira ati “Ubundi umubyeyi w’umugore arerera u Rwanda. Uriya mwana we babaga bari kumwe birakwiye ko urubyiruko rumenya gutandukanya icyiza n’ikibi n’iyo byaba ari iby’ababyeyi babo. Uyu munsi turashimira abagore bagize uruhare mu kubohora Igihugu, kandi bakomeje gahunda yo kubaka Igihugu. Turanenga ababaye ibigwari bakica bagenzi babo, bakica n’abana kandi ari ababyeyi".

Abashyitsi bari baje kwifatanya n’Umurenge wa Nyarubaka

Umurenge wa Nyarubaka ugizwe n’igice cyahoze ari Komini Nyamabuye na Musambira, abahiciwe bakaba barimo bagerageza guhungira i Kabgayi, ariko bariyeri zari mu mayira zikaba zaragoye benshi kuhagera. Mukangango wicaga abana babanje kugenzura ibitsina byabo ntakiriho, n’umuhungu we wamufashaga ngo ntawe uzi irengero rye.

Baririmbiwe n’umuhanzi ukiri muto witwa Sage

Bakoze urugendo rwo kwibuka

Abaturage bari benshi mu Kwibuka muri Nyarubaka

Intwaza zahawe indabo zizitura abo mu miryango yabo

Intwaza zafashe umwanya wo kwibuka abari bagize iyo miryango, babatura indabo, bacana n’urumuri rw’icyizere bagira bati “Bana bacu, bakunzi bacu, muhora mu mitima yacu, tubibuka iteka. Muruhukire mu mahoro ya Nyagasani.”

Intwaza UZABAKIRIHO Thérèse yatanze ubuhamya bw’inzira yo guhigwa no kwicwa yanyuzemo muri Jenoside yakorewe Abatutsi, aho yavuze uko umuryango we wose bawishe, asoza ashimira Perezida Kagame wunamuye icumu, Abanyarwanda bakongera kubona amahoro.

Intwaza zashimiye abayobozi beza bazitaho

Atangiza umuhango wo kwibuka Jenoside yakorewe Abatutsi mu rugo rw’Impinganzima i Huye, Umuyobozi w’Akarere ka Huye wungirije ushinzwe Ubukungu n’Iterambere, Kamana André, yashimye ababyeyi b’Intwaza bakomeje gutwaza nyuma y’amateka mabi banyuzemo, anashimira Unity Club ihora ibitaho.

Kamana yavuze ko ari igihe cyo kongera kubereka ko n’ubwo babuze ababo ariko bafite igihugu kibakunda.

Umuyobozi wa AVEGA Agahozo, Kayitesi Immaculée, yashimye Unity Club irangajwe imbere na Madamu Jeannete Kagame, ku bw’uruhare bagira mu kwita ku Babyeyi b’Intwaza bafasha kudaheranwa n’agahinda, bikabongerera imbaraga mu kubaka ubudaheranwa.

Umuyobozi wa AVEGA Agahozo, Kayitesi Immaculée

Ati “Kuba hafi aba babyeyi bibongerera imbaraga bikabaha icyizere cy’ubuzima, bikabafasha kubaka ubudaheranwa”.

Intumwa ya Minisiteri y’Ubumwe bw’Abanyarwanda n’Inshingano Mboneragihugu, Dr. Claudine Uwera Kanyamanza, yavuze ko hazabaho gufatanya n’izindi nzego z’ubuybozi zitandukanye mu bikorwa byo gukomeza kwita kuri aba babyeyi b’Intwaza.

Dr. Claudine Uwera Kanyamanza, Intumwa ya MINUBUMWE

Ati “MINUBUMWE izakomeza gufatanya na Unity Club ndetse n’abandi bafatanyabikorwa mu guharanira ko Ababyeyi b’Intwaza bakomeza kugira imibereho myiza mu rugendo biyemeje rwo gutwaza gitwari”.

Minisitiri Kayisire Marie Solange wavuze mu izina rya Madamu Jeannette Kagame, yijeje ko batazahwema gushimira Intwaza ubutwari bwabaranze nyuma ya Jenoside yakorewe Abatutsi mu 1994 kuko banze guheranwa n’agahinda.

Hon. Kayisire yasabye abaje kwifatanya n’Intwaza kwibuka kuri iyi nshuro ya 29 Jenoside yakorewe Abatutsi, gukomeza igihango cyo kubabera abana.

Minisitiri Kayisire yari ahagarariye Unity Club Intwararumuri

Muri uyu muhango hatanzwe ikiganiro nyunguranabitekerezo ku ruhare rwa Ndi Umunyarwanda mu komora ibikomere mu rubyiruko, cyagizwemo uruhare n’urubyiruko: Delphine Niyongira, Jean Mbarubukeye n’Umurinzi w’Igihango Anaclet Dufitumukiza.

Urugo rw’Impinganzima rwa Huye rutuyemo ababyeyi 99 barimo abasaza 7 n’abakecuru 92.

Umuryango Unity Club Intwararumuri ugamije gutanga umusanzu mu kubaka ubumwe bw’Abanyarwanda, washinzwe mu 1996 ukaba ugizwe n’abayobozi bakiri muri Guverinoma n’abayihozemo ndetse n’abo bashakanye.

Intwaza zacaniye urumuri rutazima imiryango yabo yishwe muri Jenoside

Indabo batuye imiryango yabo

Muri icyo gikorwa cyabaye tariki 28 Mata 2023, abayobozi n’abakozi ba NESA basobanuriwe amateka y’abazize Jenoside bashyinguye muri uru rwibutso, barabunamira ndetse bashyira indabo ku mva, mu rwego rwo kubibuka no kubaha icyubahiro.

Umuyobozi wa NESA, Dr. Bahati Bernard, yavuze ko bakozwe ku mutima cyane n’ibyo babonye i Murambi bigatuma bafata ingamba zo kubaka Igihugu cyiza, gifite ejo heza, hazira amacakubiri, kandi ko gusura inzibutso bizajya biba igikorwa ngarukamwaka.

Yongeyeho ko bahisemo kuremera abantu batandatu mu barokotse Jenoside mu rwego rwo kubafasha gukomeza kwiyubaka. Ati: “Twumvise bidahagije kugira ngo tuze dusure uru rwibutso hanyuma tugende. Urwibutso aho ruri mu Karere haba harimo abarokotse Jenoside yakorewe Abatutsi kandi batishoboye. Dukurikije ukwitanga kw’abakozi ba NESA twaje gusanga bariya batandatu ari bo twabasha gufasha tukabashyikiriza ibyo kurya mu bushobozi bwacu hanyuma tukababonera n’uburyo babona icyo kwambara”.

Umuyobozi wa NESA, Dr. Bahati Bernard

Abarokotse Jenoside yakorewe Abatutsi baremewe, bavuze ko bishimiye cyane ubufasha bagenewe na NESA.

Umwe muri bo witwa Nsabimana Callixte yagize ati: “Ndishimye cyane pe! Hari igihe umuntu aba aryamira aho ariko nk’ubu muba mudukoreye, umuntu akabasha kubona icyo gushyira mu nda. Imana ijye ibaha umugisha rwose”.

Abaremewe bishimiye inkunga bahawe

Umuyobozi w’Akarere ka Nyamagabe wungirije Ushinzwe Imibereho myiza y’Abaturage, Uwamariya Agnès, yashimiye cyane ubuyobozi bwa NESA, ndetse avuga ko kwibuka binyuze mu gusura inzibutso bitanga ubutumwa bukomeye mu kumenya ukuri.

Uwamariya yanenze cyane abagihakana bakanapfobya Jenoside yakorewe Abatutsi ariko agaragaza ko Igihugu kiticaye ubusa.

Ati: “Birababaje cyane kuba umuntu uzi ubwenge kugeza ubu akaba atarumva umurongo mwiza Ighugu kirimo wo kubaka ubumwe bw’Abanyarwanda ngo na we abashe guhinduka. Ariko n’ubwo bwose bimeze gutyo, dushima cyane Leta y’ubumwe irangajwe imbere na Nyakubahwa Perezida Paul Kagame ko hariho imbaraga z’uko dukumira ibyo byose.”

Visi Meya Uwamariya Agnès yashimiye ubuyobozi bwa NESA

Yongeyeho ati “Ni yo mpamvu dushyira imbaraga mu kwigisha urubyiruko ayo mateka bakayamenya, n’utarabashije kuba muri ayo mateka nk’urubyiruko iyo abibonye arasobanukirwa kandi iyo abisobanukiwe avanamo isomo ko nta kintu cyaruta ubumwe bw’Abanyarwanda”.

Basuye ibice binyuranye bigize urwibutso rwa Murambi

Minisitiri Dr. Bizimana Jean Damascene

Minisitiri Dr. Bizimana yagize ati “Kugira ngo ibihugu bishyireho amategeko ahana iki cyaha cya Jenoside, haracyakenewe imbaraga zo gukomeza kumvisha binyuze mu mibanire n’imikoranire y’Inteko zishinga Amategeko y’ibindi bihugu ko Jenoside ari icyaha mpuzamahanga, uwayikoze n’uwayipfobeje bakaba bakwiye guhanwa.”

Minisitiri Dr. Bizimana yabagaragarije uruhare rw’Abanyapolitiki mu itegurwa n’ishyirwa mu bikorwa rya Jenoside yakorewe Abatutsi, abereka zimwe mu ngamba zo kurwanya abahakana n’abapfobya Jenoside yakorewe Abatutsi.

Ati “Ni mwe mutora amategeko, ni mwe mukora igenzura rya Guverinoma, muzi imiterere ya Politiki nziza iri mu Rwanda. Nimuyimenyekanishe kuko kumenyekanisha Politiki nziza iri mu Rwanda ubwabyo byafasha mu kurwanya abapfoya n’abahakana Jenoside ku buryo buremereye.”

Minisitiri Dr. Bizimana yagaragaje ko uhereye mu myaka ya 1959 ubutegetsi bubi bwakomeje guhembera urwango mu baturage akenshi bwakurikirwaga n’ubwicanyi bwibasiraga Abatutsi mu myaka myinshi.

Perezida wa Sena, Dr. Kalinda François Xavier

Perezida wa Sena, Dr. Kalinda François Xavier yavuze ko nk’Inteko Ishinga Amategeko, ari ngombwa gufata umwanya wo kwibuka abazize Jenoside yakorewe Abatutsi, mu rwego rwo kubasubiza icyubahiro, no kwihanganisha imiryango y’abafite ababo bibukwa, n’abarokotse Jenoside yakorewe Abatutsi bose.

Ati “Kwibuka ni ngombwa, kugira ngo duhamye ingamba kandi twiyubakemo imbaraga n’ubushobozi. Tubigire intego ihamye, ko twese tugomba gukora buri kintu cyose kiri mu bubasha bwacu no mu bushobozi bwacu, twubaka u Rwanda ruzira amacakubiri”.

Dr. Kalinda yasabye abagize Inteko Ishinga Amategeko kuba ku isonga mu kurwanya politiki mbi, kuko ari yo yabaye intandaro ya Jenoside yakorewe Abatutsi 1994.

Ati “Dufite uruhare rukomeye tubinyujije mu nshingano dufite, rwo kurandura burundu ingengabitekerezo ya Jenoside, ivangura n’amacakubiri, tugashyira imbere ubumwe bw’Abanyarwanda no gushyiraho uburyo bukwiye kugira ngo, Abanyarwanda bagire amahirwe angana mu mibereho yabo ntawe uhejwe”.

Perezida w’Inteko Ishinga Amategeko Umutwe w’Abadepite, Donatille Mukabalisa

Perezida w’Inteko Ishinga Amategeko Umutwe w’Abadepite, Donatille Mukabalisa, yashimangiye ko abanyepolitiki b’iki gihe bakwiye kugira amahitamo meza kuko ari yo abumbatiye ahazaza h’Igihugu.

Perezida wa Sena, François Xavier Kalinda yibutsa abanyapolitiki kwamagana politiki mbi yagizwe umuco mu myaka yo hambere ikanageza Igihugu kuri Jenoside yakorewe Abatutsi.

Umuyobozi Mukuru wa RSSB, Regis Rugemanshuro, yirinze kuvuga ibikorwa ngarukamwaka byose basanzwe bakorera abarokotse, cyane cyane imiryango y’abari abakozi ba Caisse Sociale du Rwanda(CSR).

Rugemanshuro yagize ati “Ubutumwa tubaha uyu munsi ni ubw’urukundo no kubakomeza, nk’uko urugendo rw’imyaka ishize 29 twarugendanye na bo, turabizeza ko tuzakomeza kubaba hafi.”

Ati “RSSB ifite ibikorwa bitandukanye ngarukamwaka ikorana n’imiryango itandukanye ndetse na Leta y’u Rwanda, bijyanye no gufasha abarokotse Jenoside yakorewe Abatutsi, ibyo bikorwa bizakomeza ndetse n’uyu mwaka byarabaye.”

Umuyobozi Mukuru wa RSSB, Regis Rugemanshuro

Rugemanshuro avuga ko n’ubwo atavuga ibyo bikorwa byose, harimo gahunda yo kubakira abakorotse batagira amacumbi, ndetse no gufasha abasigaye ari impfubyi.

Uwitwa Emilier Mugiraneza, umwana w’uwahoze ari umukozi wa Caisse Sociale du Rwanda (RSSB y’ubu), ashima ko uru rwego rwamufashije rukamwishyurira muri Kaminuza, ubu akaba ari umuhanga mu gukora ibikoreshwa n’amashanyarazi (Electronics).

Komiseri mu mpuzamiryango IBUKA ushinzwe kugenzura Umutungo, Pascal Ndayambaje na we ashima Leta y’u Rwanda na RSSB by’umwihariko, kuba abarokotse Jenoside bakomeje kubakirwa amacumbi, agasaba ko habaho no kubafasha kurwanya ubushomeri.

Ndayambaje ati “Hari ikibazo cy’ubushomeri, umubare utari muto w’abarangije amashuri makuru na za kaminuza ntabwo bafite akazi, ibi bituma hari abishora mu biyobyabwenge mu buryo bwo guhunga icyo kibazo. turasaba umuryango mugari wa RSSB kudufasha guhangana n’icyo kibazo cy’ubushomeri.”

Abari abakozi 19 bakoreraga Isanduku y’Ubwitenyirize y’u Rwanda (Caisse Sociale du Rwanda) ubu bibukwa ku nshuro ya 29, ni Bicakumuyange Augustin, Gahama Félix na Gashugi Léonce.

Hari na Imfurayabo Charlotte, Umuhumuriza Yvonne, Mukangoboka Prudentienne, Gakwaya François, Karebwayire Claudine, Kadakemwa Candide, Mutangampundu Adèle, Rutabayiru Jean Bosco na Kayitesi Médiatrice.

Bibutse kandi Rutayisire Cyrill, Nyinawamwiza Jacqueline, Vuguziga Josiane, Rutayisire Déogratias, Rutazibwa Jean Marie Vianney, Ruyiranga Nzeli Alfred na Twagiramungu Evariste.

Pasiteri Mukiza Joas wo mu itorero Angilikani muri Paruwasi ya Kicukiro, akaba anahagarariye imiryango ishingiye ku myemerere mu Murenge wa Kicukiro, yavuze ko bateguye igikorwa cyo kwibuka ku rwego rw’Umurenge nk’ihuriro ry’amadini n’amatorero bafatanyije n’ubuyobozi bw’Umurenge wa Kicukiro.

Babanje kujya i Nyanza ku rwibutso gushyiraho indabo no kunamira inzirakarengane zihashyinguye, bashyira n’indabo ku rukuta rwanditseho amazina y’abazize Jenoside yakorewe Abatutsi, urukuta ruri muri uwo Murenge wa Kicukiro ku rusengero rwa ADEPER, ari na ho habereye ibiganiro.

Mu biganiro byahatangiwe harimo icyatanzwe na Rev. Past Antoine Rutayisire, wagarutse ku ruhare rw’amadini n’amatorero mu gusana Igihugu. Rutayisire yagaragaje ko abanyamadini n’amatorero bakwiye gufata umwanya nk’uyu wo kwibuka kugira ngo batazagwa mu mikorere mibi nk’iyaranze abo mu gihe cya Jenoside birengagije ibyo basanzwe bemera, bakica bagenzi babo.

Pasiteri Rutayisire kandi yanashimye ko abanyamadini n’amatorero ubu bumva akamaro k’igikorwa nk’iki kuko kwibuka bigitangira ngo abo mu madini n’amatorero bari mu babirwanyije, bavuga ko bituma amadayimoni azamuka, aho ngo bamwe babonaga abahungabanye bakabarambikaho ibiganza babasengera ngo ni amadayimoni abafashe.

Rev. Past Antoine Rutayisire

Yanabwiye abanyamadini n’amatorero bagifite ingengabitekerezo n’ivangura kubireka, aho usanga ngo hakirimo n’abafite imyumvire yo kuvangura abantu barebeye ku miterere y’umubiri wabo.

Ku bufatanye na IBUKA, abanyamadini n’amatorero mu Murenge wa Kicukiro barateganya no guha ubufasha abarokotse Jenoside batishoboye, aho bibanda ku bafite ibyo bakora nk’ubucuruzi, bakabashyigikira mu rwego rwo kuzamura ubushobozi bwabo.

Mukiza Joas uhagarariye imiryango ishingiye ku myemerere mu Murenge wa Kicukiro, yashimiye abagize uruhare bose muri iki gikorwa, ashimira by’umwihariko Umuryango Irere Foundation watanze imashini eshatu zidoda zizahabwa abarokotse Jenoside bize kudoda, bakazazifashisha mu kuzamura ubushobozi bwabo bw’imibereho.

Mukiza Joas uhagarariye imiryango ishingiye ku myemerere mu Murenge wa Kicukiro

Mukiza abajijwe icyo atekereza ku bari abayoboke b’imiryango ishingiye ku myemerere babirenzeho bakishora muri Jenoside yakorewe Abatutsi, yavuze ko bibabaje kuba abantu barambuye abandi ubuzima, agasanga ababikoze nta rwitwazo icyo gihe bari bakwiye kugira kuko hari bagenzi babo bakoze neza bakarokora abahigwaga.

Ati “Turashaka rero ko abo bantu bakoze neza igikwiriye tubigiraho. Turigisha abantu kurangwa n’urukundo, kandi nyuma ya Jenoside amadini n’amatorero yagize uruhare runini mu isanamitima. N’uyu munsi ni byo turimo, kandi turizera ko ibyabaye bitazongera.”

Bacanye urumuri rw’icyizere

Umuyobozi Nshingwabikorwa w’Akarere ka Kicukiro, Mutsinzi Antoine, na we witabiriye icyo gikorwa cyo Kwibuka Jenoside yakorewe Abatutsi cyateguwe n’ihuriro ry’amadini n’amatorero, yashimiye ubuyobozi bw’Umurenge wa Kicukiro bwafatanyije n’abanyamadini n’amatorero gutegura iyo gahunda.

Ati “Pasiteri Rutayisire atwibukije umukoro wacu ko amadini n’amatorero afite uruhare rukomeye mu gufasha abarokotse Jenoside batishoboye mu bikorwa byo kwiyubaka no kwiteza imbere, mu gufasha kunga Abanyarwanda, kubakangurira kuvugisha ukuri, no kudaheranwa n’agahinda. Ni ubutumwa bukomeye ku buryo buri wese abutekerejeho, Igihugu cyacu cyaba Igihugu kitarangwamo amacakubiri, ahubwo cyaba Igihugu giharanira gutera imbere.”

Mutsinzi Antoine yavuze ko nk’inzego za Leta biteguye gukomeza gukorana n’abanyamadini n’amaterero muri urwo rugendo rwo guteza imbere Igihugu no kugisana, ndetse no gufatanya gukemura ibibazo bitandukanye bibangamiye umuryango nyarwanda.

Uwo muhango wabaye ku wa Gatanu tariki 28 Mata 2023, wabimburiwe no gushyira indabo ku rwibutso rwa Jenoside ruri ku cyicaro cya BK, uwari uhagarariye Minisiteri y’Ubumwe bw’Abanyarwanda n’Inshingano Mboneragihugu (MINUBUMWE), yibutsa abifatanyije n’icyo kigo mu gikorwa cyo kwibuka, amateka yaranze BK kuva yashingwa mu 1967 kugera nyuma ya Jenoside yakorewe Abatutsi.

Amwe mu mateka babwiwe harimo uburyo kuva icyo kigo cyashingwa cyatangiranye ibikorwa by’irondamoko, byanatizwaga umurindi n’agace yubatsemo kubera ko ari hamwe mu hantu hakoreraga ibigo bya Leta bikomeye byacuriwemo umugambi wa Jenoside yakorewe Abatutsi.

Bimwe muri ibyo bigo birimo ibiro bya Perezida wa Repubulika byarimo ishami ry’iperereza byakoreraga ahubatse Umujyi wa Kigali. Hakorerwagamo ibikorwa bitandukanye byo gutoteza Abatutsi. Ku ruhande rwabyo hakoreraga Minisiteri y’Ububanyi n’Amahanga n’Ubutwererane na yo yarimo abantu bagize uruhare rukomeye muri Jenoside yakorewe Abatutsi barimo Jean Bosco Barayagwiza wari Umuyobozi Mukuru muri iyo Minisiteri.

Bacanye urumuri rw’icyizere

Ku ruhande gato ahubatse Hotel Marriot hari Minisiteri y’Ingabo z’Igihugu yarimo intagondwa nyinshi z’abasirikare barimo benshi baburanishijwe ku byaha byo gutegura no gushyira mu bikorwa Jenoside yakorewe Abatutsi. Iyo Minisiteri yari ituranye n’ikigo cya gisirikare cya Camp Kigali, cyarimo abasirikare benshi n’imiryango yabo bari biganjemo abahezanguni benshi.

Umuyobozi Mukuru wa BK Group, Béata Habyarimana, avuga ko hari ibigo bitandukanye byagiye bikora ubushakashatsi bugaragaza uko mu kazi habagamo ivangura mu myaka yashize kugeza Jenoside ibaye. Yakomoje no ku gitabo bashaka kwandikamo amateka yaranze iyo Banki muri Jenoside yakorewe Abatutsi.

Umuyobozi Mukuru wa BK Group, Béata Habyarimana

Ati “Dutekereza ko natwe nka BK dushobora kugira icyo gitabo kikazafasha n’abandi bazakoramo, kugira ngo twese hamwe tumenye amateka kandi tubashe gukumira ingengabitekerezo ya Jenoside na Jenoside ubwayo”.

Minisiteri y’Ubumwe bw’Abanyarwanda n’Inshingano Mboneragihugu, ivuga ko kwandika amateka ya Jenoside yakorewe Abatutsi mu zari inzego za Leta n’iz’abikorera zariho kugeza muri Mata 1994, ari umwanzuro wafashwe n’Inama y’Igihugu y’Umushyikirano yateranye muri 2015, ku buryo kuva icyo gihe inzego zitandukanye zagiye zikora ubushakashatsi.

Umukozi wa MINUBUMWE ukora mu ishami ry’ubushakashatsi, Valens Bimenyimana, avuga ko ibigo na za Minisiteri zitandukanye bagiye bakora ubushakashatsi butandukanye ku mateka yabo, kandi ngo hari icyo bifasha.

Bimenyimana Valens avuga ko gukora ubushakashatsi bifasha urwego kurushaho kumenya no gusobanukirwa amateka ya Jenoside yakorewe Abatutsi

Ati “Icyo bifasha ni ukumenyekanisha ukuri kw’amateka ya Jenoside yakorewe Abatutsi, kubera ko ubuzima bw’abakoreraga mu rwego uru n’uru, mu kigo nka BK, ni ubuzima bwihariye kuri icyo kigo, ariko bukaba n’ubuzima rusange bw’Abatutsi bose bo mu Rwanda, uko batotejwe, uko bicwaga, uko bimwe amahirwe mu bihe bitandukanye”.

Akomeza agira ati “Ibyo ngibyo yari politike rusange, ariko noneho wagera mu kigo ukahasanga umwihariko. Uwo mwihariko ni ho ugomba kumenyekana kugira ngo uko kuri kwa Jenoside yakorewe Abatutsi gushakwa kumenyekane kandi kube kuzuye”.

Abo mu miryango y’abahoze ari abakozi ba BK bazize Jenoside yakorewe Abatutsi, bashimiye icyo kigo uburyo kizirikana abahoze ari abakozi bacyo, bibukwa buri mwaka, ariko kandi banasaba ko ababakomokaho barushaho gufasha mu rwego rwo kubona akazi mu gihe hari amahirwe abonetse muri icyo kigo, kugira ngo birusheho kubafasha kwiteza imbere.

Imiryango y’abari abakozi ba BK bazize Jenoside yashimiye BK uburyo ihora izirikana abavandimwe babo bazize Jenoside yakorewe Abatutsi

Mu bigo bitanu bigize BK Group habarirwa abakozi bagera ku 1,250 benshi bakaba bari hagati y’imyaka 30-40 ku buryo bakeneye kumenya byinshi ku mateka yaranze ikigo bakorera.

Agace BK yubatsemo gafite amateka ku itegurwa n’ishyirwa mu bikorwa rya Jenoside yakorewe Abatutsi kubera ibigo bya Leta bikomeye byahakoreraga

Bashyize indabo ku rwibutso rwa Jenoside rwa BK

Umuyobozi Mukuru wa BK Group Plc yashyize indabo ku rwibutso rwa Jenoside rwa BK

Umuyobozi Mukuru wa BK, Dr Diane Karusisi, yunamira abahoze ari abakozi ba BK bazize Jenoside yakorewe Abatutsi

Amafoto: Moise Niyonzima/Kigali Today

Abaturage bitabiriye igikorwa cyo gushaka imibiri

Utamuriza Vestine uhagarariye IBUKA mu Karere ka Rusizi, yatangarije Kigali Today ko igikorwa cyo gushaka imibiri y’Abatutsi bishwe mu gihe cya Jenoside kigikomeje, ku mibiri yabonetse mbere hakaba hamaze kwiyongeraho imibiri 223.

Ati “Kuva tariki 23 Werurwe 2023 kugera tariki 26 Mata 2023 hari hamaze kuboneka imibiri 588, igikorwa kirakomeza mu minsi ibiri haboneka abandi 223, bose hamwe abamaze kuboneka ni 811”.

Ibi bikorwa bizakorwa kugeza iyi sambu yose irangiye kugira ngo babe bizeye neza ko nta mubiri barimo bahinga hejuru udashyinguwe mu cyubahiro.

Iyi mibiri yabonetse muri iyi sambu ya Paruwasi ubwo abaturage bakora mu mushinga CDAT (Commercialization and De-Risking for Agricultural Transformation Project) wo guteza imbere Ubuhinzi bugamije ubucuruzi no kugabanya ibibubangamira, bahingaga bakora amaterasi y’indinganire bakabona imibiri bagahita batanga amakuru.

Hafashwe icyemezo cyo gusenya amaterasi mu rwego rwo kureba niba nta yindi mibiri yaba iri munsi

Utamuriza avuga ko buri munsi hagenda hagaragara imibiri y’abantu bishwe, akavuga ko bigaragara ko abari bahungiye muri iyi Paruwasi biciwe muri ako gace, bari benshi cyane bakaba bagikomeje gushakisha kugeza ubwo iyo sambu yose bazayirangiza.

Ibikorwa byo kwibuka byagombaga kuba tariki ya 29 na 30 Mata muri uyu mwaka muri ako gace byarasubitswe kugira ngo habanze hasozwe iki gikorwa cyo gushakisha indi mibiri yaba iri muri iyo sambu ya Paruwasi. Hazakurikiraho igikorwa cyo gutegura uko iyi mibiri izashyingurwa mu cyubahiro.

Utamuriza asaba abakoze Jenoside ndetse n’abandi baturage batahigwaga muri icyo gihe kugira ubutwari n’umutimanama wo kuvugisha ukuri, bagatanga amakuru y’ahakiri imibiri kugira ngo ishyingurwe mu cyubahiro.

Abakozi b’Ibitaro bya Gatonde bagaye abari abaganga batatiye umwuga wabo bakijandika muri Jenoside

Mu muhango wo kwibuka ku nshuro ya 29 Jenoside yakorewe Abatutsi, wabaye tariki 27 Mata 2023 ku rwego rw’Ibitaro bya Gatonde biherereye mu Karere ka Gakenke mu Ntara y’Amajyaruguru, abakozi babyo bashimangiye ko bafitiye Igihugu umwenda w’imikorere ihindura isura mbi bagenzi babo bagaragaje ubwo bijandikaga mu gutegura no gushyira mu bikorwa Jenoside yakorewe Abatutsi, bakirengagiza kurengera ubuzima bw’inzirakarengane.

Dr Dukundane Dieudonné, Umuyobozi w’Ibitaro bya Gatonde, agira ati: “Kwibuka Jenoside yakorewe Abatutsi ni inshingano zacu kuko bituma turushaho gusobanukirwa amateka y’Igihugu cyacu, dore ko muri twe harimo n’urubyiruko rwavutse nyuma ya Jenoside. Rero tuyashingiraho turwanya icyatandukanya Abanyarwanda, bikanadufasha kwimakaza ubunyarwanda nk’isano iduhuza, kandi tukunguka imbaraga zo gukomeza urugendo rwo kwiyubaka no gusigasira amahoro dufite ubungubu”.

Abakozi b’ibitaro bya Gatonde basanga kwibuka ari umwanya mwiza wo gusubiza amaso inyuma no kwigira ku mateka y’igihugu bakubaka ibishya

Abitabiriye umuhango wo kwibuka Jenoside yakorewe Abatutsi, bunamiye banashyira indabo mu mugezi wa Mukungwa, wajugunywemo inzirakarenga z’Abatutsi bishwe muri Jenoside, bazishyira no ku rukuta rwanditsweho amazina ya bamwe mu bawujugunywemo, nk’ikimenyetso cyo kubasubiza agaciro bambuwe.

Mu gihe cya Jenoside, bamwe mu Batutsi bicirwaga mu makomini harimo iya Gatonde, Ndusu, Kigombe n’ahandi byegeranye, Interahamwe zabajugunyaga mu mugezi wa Mukungwa abandi zikabarohamo ari bazima nk’uko bigarukwaho na Ndihazanyirayo Alphonsine, wiciwe umugabo ndetse n’abana be bane muri Jenoside bakaba barajugunywe muri uwo mugezi.

Yagize ati: “Abatutsi benshi barimo abo mu makomini ya kure n’abari batuye ino aha ngaha mu gace kegeranye n’uyu mugezi, babicishaga imihoro n’amahiri ashinzemo imisumari barangiza bakabarohamo. Ari abakuze ndetse n’abana batoya, barabazingazingaga bakabarohamo ari bazima abandi bamaze kubica ku buryo byageze aho amazi yose y’umugezi ahinduka amaraso gusa. Mu bajugunywemo harimo n’abana banjye bane bishwe muri batanu nari narabyaye. Uretse Papa wabo ushyinguwe mu Rwibutso rwa Buranga, abo bana bose nta n’umwe nabashije kubona ngo nshyingure mu cyubahiro kugeza ubu”.

Umuyobozi w’Akarere ka Gakenke, Nizeyimana Jean Marie Vianney, avuga ko gukumira ingengabitekerezo, amacakubiri ndetse no kubakira ku bumwe bw’Abanyarwanda ari igihamya ntakuka kigaragaza ko amateka nk’aya atazasubira ukundi. Uruhare rw’abakozi b’ibi bitaro ngo rurakenewe cyane mu kurushaho gusigasira ibyo u Rwanda rwagezeho.

Mu kunamira inzirakarengane zajugunywe mu mugezi wa Mukungwa, Umuyobozi w’akarere ka Gakenke Nizeyimana JMV yasabye abaganga kuba maso birinda amacakubiri kandi bakarangwa n’imibanire myiza no mu miryango

Yagize ati: “Amateka atugaragariza mu buryo budakuka ko Jenoside yagizwemo uruhare n’abiganjemo injijuke, zirimo n’abaganga bavuraga mu mavuriro atandukanye, bagaragaje ubugwari binyuze mu kwigisha amacakubiri no kuyishyira mu bikorwa, kuko hari Abatutsi babaga bahungiye mu bitaro bakicirwamo, ahandi ugasanga bamwe mu baganga bagize uruhare mu kuyobora ibitero no gutanga amabwiriza yo kwica”.

Yongeyeho ati “Abaganga b’ubu rero tubashishikariza kwamaganira kure urugero rubi nk’urwo rwaranze abababanjirije, bibanda cyane ku kurengera ubuzima, bakazirikana ko bari mu b’ingenzi bakenewe mu kurengera ubuzima bw’abantu no kuba abateramahoro”.

Depite Habineza Frank witabiriye gahunda y’ibitaro bya gatonde yo kwibuka Jenoside yakorewe Abatutsi, yashimye umuhate w’abarokotse Jenoside yakorewe Abatutsi mu rugendo rwo kwiyubaka no kwigarurira icyizere nyuma y’amateka mabi banyuzemo.

Depite Frank Habineza yifatanyije n’abakozi b’ibitaro bya Gatonde mu muhango wo kwibuka Abatutsi, by’umwihariko bajugunywe mu mugezi wa Mukungwa

Asanga gushyigikira gahunda y’ubumwe n’ubwiyunge no kwimakaza imibanire myiza, ari inzira nyayo yo kurandura burundu ingengabitekerezo ya Jenoside.

Yagize ati: “Ayo mateka mabi tuzi aho yatugejeje. Kuyakumira biradusaba gukomeza gushyira hamwe tugasaba kandi tugatanga imbabazi, urubyiruko rugashishikarira gukoresha ikoranabuhanga mu guhangana n’abagoreka amateka yacu, tukubakira ku musingi ukomeye twashyiriweho n’Ingabo zahagaritse Jenoside zikabohora Igihugu, twitabira gahunda za Leta, turushaho no kwirinda icyadusubiza inyuma”.

Mu kurushaho kwita ku mibereho y’abarokotse Jenoside yakorewe Abatutsi, Ibitaro bya Gatonde byishyuriye ubwisungane mu kwivuza imiryango 71 yo mu Murenge wa Mugunga, hagamijwe kuyunganira mu buryo bwo kwivuza bitabagoye.

Ibi bitaro byatangiye gutanga serivisi guhera mu mwaka wa 2021, bikaba biha serivisi abasaga ibihumbi 84 bo mu Mirenge ya Mugunga, Janja, Busengo, Muzo, Rusasa na Cyabingo.

Urukuta ndangamateka rwanditsweho amazina ya bamwe mu bishwe muri Jenoside bakajugunywa mu mugezi wa Mukungwa, bahashyize indabo nk’ikimenyetso cyo kubunamira no kubasubiza agaciro bambuwe

Imiryango y’abiciwe i Nyamishaba yashyize indabo mu Kivu mu rwego rwo kubibuka

Karenzi Bosco wigaga muri EAFO Nyamishaba waje kurokoka, avuga ko ku itariki ya 15 Mata 1994 mu masaha ya saa tatu z’igitondo ari bwo ibitero by’Interahamwe n’Abajandarume byateye kuri icyo kigo, bakica Abatutsi bari bahahungiye n’abanyeshuri n’abarimu b’Abatutsi bari bahari, kugeza mu masaha y’igicamunsi ubwo imvura yagwaga bagasubika kwica bakajya kugama.

Karenzi avuga ko abicanyi bari bagose imihanda yose ikikije ikiyaga cya Kivu ku buryo nta bundi buhungiro bwari buhari usibye kwiyahura mu mazi, ariko nabwo ababigerageje ntibyabahiriye kuko Interahamwe zafashe ubwato zibakurikiramo zikajya zigenda zibatema, bashiriria mu kiyaga cya Kivu.

Avuga ko Ikivu cyari cyabaye amaraso kubera gutemeramo abantu, aho abageragezaga koga ngo bomoke hakurya babakurikiye n’ubwato bagenda batemwa banarasa abari babashije kujya mu Kivu.

Avuga ko Ikivu cyifashishijwe nk’intwaro yo kwica Abatutsi bari bahungiye i Nyamishaba, kuko bagotaga umusozi bagafunga n’amayira, hagasigara inzira y’Ikivu yonyine.

Bibukiye ku kiyaga cya Kivu ahajugunywaga Abatutsi bahungiye i Nyamishaba

Avuga ko mu muryango we habarurwaga nk’abantu 80 ariko yarokotsemo wenyine, akibaza impamvu abantu bemeye gukora Jenoside Kandi nyamara baranigishwaga ijambo ry’Imana mu madini bari kumwe.

Agira ati, "Turifuza ko twajya twibuka abacu biciwe hano n’abashyizwe mu Kivu buri wa 15 Mata kuko ni yo tariki yatuma amateka ya hano atazima, kuko niba hano hari Abatutsi basaga ibihumbi bitatu byishwe kuva ku wa 15 kugeza ku wa 18 Mata, ntabwo twajya tubibuka mu matariki 25 kandi itariki bishweho izwi".

Karenzi kandi asaba ko mu marembo ya IPRC Nyamishaba hashyirwa ikimenyetso cy’amateka y’abarohwagwa mu Kivu biganjemo abakobwa b’Abatutsi bategetse kwiroha mu Kivu ubyanze akajyamo babanje kumutema, bituma hari n’abiyahuramo banga gutemwa.

Karenzi wigaga muri EAFO Nyamishaba afite amakuru ahagije yatuma itariki yo kwibukiraho iba iya 15 Mata

Agira ati, "Aho twashyize indabo ntabwo ari ho harohwaga abari bahungiye hano, ahubwo byabereye neza hano mu marembo ya Nyamishaba ndumva ari ho twajya dushyira indabo, kandi hagashyirwa ikimenyetso cy’amateka".

Perezida wa IBUKA mu Karere ka Karongi Ngarambe François, yasezeranyije ko hagiye kwigwa uko hazashyirwaho ikimenyetso cy’Abatutsi biciwe mu mazi y’Ikivu kuko cyabaye intwaro yo kwica Abatutsi kuva mu 1959, aho nko ku kirwa cya Nyamunini hicirwaga abitwaga Abarunari (UNAR), ni ukuvuga Abatutsi babaga mu ishyaka rya UNAR barimo na Sekuru.

Ngarambe avuga ko kuva mu 1959 ikiyaga cya Kivu cyabaye intwaro yo kwica Abatutsi i Nyamishaba

Agira ati, “Ikivu cyatumariye abacu ariko hari n’abo cyakijije. Ni ngombwa ko tuzajya tukibukiraho tugashaka amateka yabo kandi tukanamenya abararokotse bigaga hano kugira ngo dukusanye amakuru".

Avuga ko Kwibuka bifasha urubyiruko kumenya ukuri ku byabaye, kandi rukiyemeza kutazabisubira, ukaba umwanya wo kunenga ubuyobozi bubi bwagiriwe icyizere n’abaturage bakabuhungiraho bukabica, ukaba n’umwanya wo gushimira Leta nziza yagaruye ihumure mu Rwanda, abaturage bakaba bariho batuje.

Umuyobozi wa IPRC Karongi avuga ko bakomeje gukusanya amakuru y’abaguye muri EAFO Nyamishaba

Umuyobozi wa IPRC Karongi, Ingabire Dominique, avuga ko mu rwego rwo gukomeza kwibuka abari abakozi n’abanyeshuri ba EAFO Nyamishaba na ETO Kibuye zabaye IPRC Karongi, babaruye abagera kuri 11 bishwe muri ETO Kibuye, ariko bari no gukora ubushakashatsi ngo bamenye abaguye muri Nyamishaba kugira ngo amazina yabo yongerwe ku rwibutso.

Yagize ati “Hari amakuru tugishakisha kugira ngo bose tujye tubibukira hamwe. Ubu turashyira indabo mu Kivu no ku rwibutso ndetse no muri IPRC mu rwego rwo kubibuka, ariko tuzakomeza gukora ibikorwa bituma amakuru yabo amenyekana bakajya bibukwa bose kuko tutaramenya abarokotse bose ngo tumenye n’abishwe".

Uwambajemariya avuga ko hagiye kuganirwa uko Kwibuka i Nyamishaba byahuzwa n’itariki Abatutsi bari bahahungiye biciweho

Umunyamabanga Nshingwabikorwa w’Intara y’Iburengerazuba, Uwambajemariya Florence, avuga ko kubera ko gushyira ibimenyetso ahiciwe Abatutsi bisaba kubyumvikanaho na Minisiteri y’Ubumwe bw’Abanyarwanda n’Inshingano Mboneragihugu, bagiye gufatanya n’ubuyobozi bw’Akarere kugira ngo icyo gitekerezo gitangwe.

Avuga ko ku kijyanye no kwibuka ku wa 15 Mata na byo bizarebwaho kugira ngo amatariki ahuzwe n’amateka ya Nyamishaba, kandi hazaganirwa uko urwibutso rwa Nyamishaba rwakomeza kubumbatira amateka y’abishwe bajugunywe mu kiyaga cya Kivu.

Urwibutso rwa Nyamishaba ruruhukiyemo imibiri isaga ibihumbi bitatu

Bacanye urumuri rw’icyizere

Urubyiruko rwitezweho gukura ruzi neza amakuru kuri Jenoside yakorewe Abatutsi

Umuyobozi wa Ibuka mu Karere ka Rubavu, Mbarushimana Gérard, akaba yongeye gushimira ubuyobozi bw’uruganda rwa BRALIRWA, rwateguye igikorwa cyo kwibuka abakozi barukoreraga n’imiryango yabo, kimwe n’abandi Batutsi bishwe muri Jenoside yabakorewe mu 1994, kuko abo bitaga abavandimwe, inshuti n’abo bakoranaga, bizeraga ko babahisha bagakiza ubuzima bwabo, basanze barabaye inyamaswamuntu, ati “abo bose turabibuka”.

Mbarushimana avuga ko n’ubwo ibyo byabaye bitaciye intege abarokotse Jenoside yakorewe abatutsi.

Agira ati “Turabashimira ko mwemeye gutanga imbabazi ku babiciye haba ku bazisabye n’abatarazisabye, mugakomeza kwihangana, kwitanga no kudaheranwa n’agahinda. Ubwo ni ubudasa dukwiriye kubigiraho twese, maze tukabishingiraho dufatanya mu kubaka ejo hazaza heza, hazira amacakubiri, ivangura n’ingengabitekerezo ya Jenoside.”

Akomeza ashimira BRALIRWA yashyizeho gahunda yo kwibuka abatutsi bishwe muri Jenoside, ndetse igakomeza kwita ku miryango y’abarokotse, bari bafite ababyeyi n’abavandimwe bakoraga muri icyo kigo, agasaba ko n’ibindi bigo byabareberaho.

Agira ati “Bikwiye kubera urugero rwiza n’ibindi bigo yaba ibyariho mu gihe cya Jenoside n’ibyavutse nyuma, bikajya bitegura gahunda zo kwibuka, kuko zifasha kongera kuganira ku mateka yaranze Igihugu cyacu, no guharanira ko atazongera kuba ukundi.”

Umunyamabanga Nshingwabikorwa w’Akarere ka Rubavu, Ruhamyambuga Olivier, avuga ko Abanyarwanda baranzwe n’ubumwe n’ubudaheranwa, mbere na nyuma y’umwaduko w’abakoloni, ndetse agaragaza ko bagize ubutwari bwo guhagarika Jenoside yakorerwaga abatutsi mu 1994, mu gihe amahanga yarimo arebera.

Uruganda rwa BRALIRWA rutegura ibikorwa byo kwibuka abakozi barwo bishwe muri Jenoside, ndetse rugakomeza gufata mu mugongo imiryango yabo hafashwa abana biga, n’ubwo abarangije basaba ko bafashwa kubona imirimo.

Kimwe mu bintu byakajije Jenoside yakorewe abatutsi mu Mujyi wa Gisenyi no mu nkengero z’urwo ruganda, harimo kuba rwari rurinzwe bikomeye kubera hari habitswe umurambo wa Perezida Habyarimana, mbere yo kujyanwa mu cyari Zaïre.

Umutangabuhamya wigaga muri iryo shuri, Karenzi Bosco wari unahafite mukuru we wahigishaga banabanaga, avuga ko abanyeshuri baturukaga muri Perefegitura za Byumba na Ruhengeri bigaga baba mu kigo, kuko imirwano yaberaga muri utwo duce yatumye badasubira iwabo mu gihe cy’ibiruhuko bya Pasika.

Karenzi avuga ko ku wa 15 Mata 1994, abantu bari ahitwa Ruhiro batewe n’igitero cy’abitwaje intwaro bakaraswaho, bakigira inama yo kuza kwihisha mu nyubako za EAFO Nyamishaba, kandi ko abahakoraga n’abanyeshuri bafashije kuranga aho abari bahunze bihishe kandi nabo bajya mu bwicanyi.

Agira ati "Abanyeshuri nibo bajyaga gusohora abantu aho bihishe, bakabakusanyiriza ahantu hamwe noneho bakaberekeza inzira y’ikivu, babatema babaroha mu Kivu. Harimo umwarimu witwaga Domitien, niryo nibuka, nigeze no kumva ko yaba afite umwanya ukomeye mu buyobozi bw’Igihugu cy’u Burundi, turifuza ko ubutabera bwakomeza kudukurikiranira abo bantu".

Karenzi avuga ko kugira ngo arokoke byaturutse ku wari Kontabure w’ishuri wamukinguriye ahabikwaga ibikoresho akamuhishamo akaza kuvamo mu ijoro, agahungira ku kirwa cya Nyamunini, abandi benshi ngo biciwe mu kigo kuri iyo tariki ya 15 Mata.

Ntukanyagwe avuga ko hari abakoze Jenoside batorotse Gacaca ntibahanwe batangiye kwigaragaza

Abandi bashyirwa mu majwi n’abarokotse Jenoside ni abatorotse ubutabera nyuma yo gukekwaho ibyaha bya Jenoside, bagakatirwa ibihano ariko ntibabikore, bakaba baratangiye kugaruka mu Muryango Nyarwanda, nyuma y’uko hashize igihe batagaragara, nk’uko byemezwa na Ntukanyagwe Jean Laurent, uhagarariye imiryango y’abafite ababo bashyinguye mu Rwibutso rwa Nyamishaba.

Umuyobozi w’umuryango uharanira inyungu z’abarokotse Jenoside yakorewe Abatutsi (IBUKA), mu Karere ka Karongi, Ngarambe Vedaste, avuga ko hakwiye kumenyekana amakuru y’ahaherereye abakoze Jenoside i Nyamishaba bacyidegembya, kuko hari abantu benshi batigeze bemenyekana ko bakurikiranwe n’ubutabera, kuko abenshi babaga i Nyamishaba batahavuka.

Agira ati "Igikurikiyeho ni ukubahiga, tukabahiga hirya no hino bagafatwa bagashyikirizwa ubutabera kuko icyaha cya Jenoside ntigisaza. Turababaye kuko abatwiciye abantu batakurikiranwe uko bakabaye, ariko tuzakomeza kubashakisha kandi dukeneye kubona amakuru kugira ngo ababishinzwe bate muri yombi abo batwiciye".

Naho ku kijyanye n’abakatiwe na Gacaca badahari, bagahengera ibihano byabo byararangiye bakongera kwigaragaza, Ngarambe avuga ko hagiye gushyirwa imbaraga mu kubagaragaza aho bari nabo bafatwe, barangize ibihano byabo kuko bidakwiye ko uwahamijwe icyaha cya Jenoside yidegembya adakoze ibihano.

Umuyobozi wungirije w’Akarere ka Karongi ushinzwe iterambere ry’ubukungu, Niragire Theophile, avuga ko umuntu wakatiwe n’Inkiko Gacaca agatoroka akwiye gufatwa akarangiza igihano cye, akabona gukomeza ubuzima busanzwe, kandi hatazabaho kurebera bene muntu, naho abari hanze y’Igihugu bo bakaba bazakomeza gukuriranwa uko amakuru amenyekana.

Agira ati "Umugabo asiga ikimwirukaho ntabwo asiga ikimwirukamo. Amaraso azabahama uko byamera kose kandi icyaha cya Jenoside ntigisaza, aho bizamenyekanira hose bazakurikiranwa”.

Iyari EAFO Nyamishaba ubu yabaye IPRC Karongi

Abatutsi biciwe i Nyamishaba benshi baroshywe mu Kivu, hakaba hifuzwa ko hashyirwa ikimenyetso cy’amateka kigaragaza ubwo bwicanyi, kandi Urwibutso rwa Nyamishaba ntirwimurwe kuko ari kimwe mu bigaragaza uko Jenoside yakozwe muri ako gace.

Iri huriro ry’urubyiruko ritegurwa na Never Again Rwanda, ribaye ku nshuro ya 12, rikaba ryitabiriwe n’ababarirwa muri 200 biganjemo urubyiruko rwo mu miryango n’amashyirahamwe aharanira amahoro, abaturutse mu miryango mpuzamahanga itari iya Leta (NGOs) igira uruhare mu kubaka amahoro, abaturutse mu mashuri makuru na za kaminuza, abahagarariye inzego za Leta, n’abandi bafatanyabikorwa batandukanye.

Iki gikorwa cyabereye ku rwibutso rwa Jenoside rwa Kigali ruri ku Gisozi, abacyitabiriye bakaba babanje gusura urwo rwibutso no kunamira abasanga ibihumbi 250 barushyinguyemo bazize Jenoside yakorewe Abatutsi.

Umuyobozi mukuru wa Never Again Rwanda Dr. Joseph Nkurunziza Ryarasa, mu ijambo rye, yavuze ko n’ubwo hashize imyaka 29 Jenoside yakorewe Abatutsi ibaye, muri iyi minsi haracyagaragara abayipfobya, ababwira abandi amagambo yuzuye urwango n’ivangura, ku buryo baramutse batamaganywe bashobora kongera bagakora Jenoside.

Dr Ryarasa ati “Ni yo mpamvu kwibuka ari ngombwa cyane, bitari ukwibuka gusa Jenoside yakorewe Abatutsi mu 1994, ahubwo tugomba no gukuramo amasomo yadufasha uyu munsi n’ejo, tugaharanira ko Jenoside itazongera kubaho ukundi.”

Umuyobozi mukuru wa Never Again Rwanda , Dr. Joseph Nkurunziza Ryarasa

Dr. Ryarasa yabwiye urubyiruko ko nk’abayobozi ndetse n’abafata ibyemezo b’ubu ndetse n’ahazaza, bafite imbaraga zo guhindura imyumvire y’abandi bantu no guteza imbere umuco w’amahoro, kubahana, guharanira iterambere ndetse n’ubwiyunge.

Ati “Mu rwego rw’Akarere kacu, dukwiye kuzirikana ko tudashobora gutera imbere twenyine mu gihe abaturanyi bacu bari mu ntambara. Amateka atwereka ko urwango rwambukiranya imipaka rukiriho, rero nk’urubyiruko, tugomba guhaguruka tukabyamagana.”

Umuyobozi w’Ishami rishinzwe Kwibuka no gukumira Jenoside muri Minisiteri y’Ubumwe bw’Abanyarwanda n’Inshingano Mboneragihugu (MINUBUMWE), Dr. Assumpta Muhayisa, na we wari muri iki gikorwa, ashima ibiganiro nk’ibi bihuza abiganjemo urubyiruko kuko bitanga icyizere cy’ahazaza heza h’u Rwanda n’Isi muri rusange.

Dr. Assumpta Muhayisa wo muri MINUBUMWE yibukije urubyiruko ko ari rwo mizero y’Igihugu

Ati “Urubyiruko ni yo maboko, ni bo ejo hazaza. Rero kuri twebwe nk’ababyeyi, kwigisha urubyiruko amateka ya Jenoside n’ingaruka zayo, ni ukwiteganyiriza, kandi biduha icyizere ko imbere ari heza. Urubyiruko turarusaba guhaguruka rukarwanya ingengabitekerezo ya Jenoside kugira ngo ibyo abakuru bahagaritse Jenoside bagezeho bitazateshwa agaciro.”

Bamwe mu rubyiruko bitabiriye ibi biganiro na bo batahanye ingamba zo kurushaho guharanira amahoro n’ubumwe, birinda ivangura, ndetse bakamagana abakirangwaho bene ibyo bikorwa bibi.

Irakoze Gisele Sandrine

Umwe muri bo witwa Irakoze Gisele Sandrine waje ahagarariye umuryango witwa ‘Ndabaga Impact’ yagize ati “Iyi nama idufashije kumva ko natwe nk’urubyiruko dufite uruhare muri gahunda zo kwibuka ndetse no kubaka Igihugu, turushaho kwamagana by’umwihariko ingengabitekerezo igaragara cyane cyane ku mbuga nkoranyambaga.”

Wilson Muhirwa

Mugenzi we witwa Wilson Muhirwa, umukorerabushake ukorana na Never Again Rwanda, ariko akagira n’ibindi bikorwa yikorera ku giti cye nka rwiyemezamirimo, yagize ati “Twasanze nk’urubyiruko tugomba gutanga umusanzu wacu kugira ngo ibyabaye ntibizongere kuba. Inama nk’izi ziradufasha kuko twongera gutekereza ku mateka mabi yagejeje u Rwanda kuri Jenoside yakorewe Abatutsi, ndetse tukarebera hamwe n’icyakorwa ubu kugira ngo amateka mabi atazongera, cyane cyane turwanya abayihakana, abayipfobya, abakigaragaza ingengabitekerezo ya Jenoside, ndetse n’imvugo zibiba urwango n’amacakubiri.”

Hatanzwe ibiganiro bigamije kugaragaza ububi bwa Jenoside, no kugaragaza uruhare rw’urubyiruko mu kubaka ahazaza heza

Urubyiruko rubinyujije mu mikino, rwigishije abari aho ububi bw’ingengabitekerezo ya Jenoside, ruhamagarira bagenzi babo kuyirwanya bifashishije cyane cyane imbuga nkoranyambaga, dore ko ari na zo zifashishwa cyane n’abayikwirakwiza

Batahanye umugambi wo gusigasira ibyagezweho, no kurwanya abagerageza kubisenya

Oliva Umuhoza

Umuhoza yahuye n’ubuzima bumugoye cyane nyuma ya Jenoside, ariko ahamya ko Imana yagiye imwomora ibikomere ikoresheje abantu, nubwo hari n’abantu bamubaniye nabi nyuma ya Jenoside bigatuma yumva yaniyahura bikarangira.

Amateka y’itotezwa ku muryango wa Umuhoza, yatangiye mu myaka yo hambere ubwo Sekuru wari Umushefu mu gihe cy’ubukoloni yirukanwaga aho yari atuye mu yahoze ari Gitarama, ubu ni mu Karere ka Muhanga. Aho ni mu gihe Abatutsi benshi bameneshwaga bagahunga Igihugu mu myaka ya 1959.

Nyuma hari umunyamahanga wakoreraga mu Rwanda icyo gihe, wamufashije kubona akazi mu bucukuzi bw’amabuye y’agaciro muri Rwinkwavu, ndetse umwe mu bana batatu sekuru yari afite, ari we se wa Umuhoza, na we yaje kubona akazi aho mu mabuye y’agaciro, batangira kubaho mu buzima bwiza.

Umuhoza yari umukobwa umwe mu muryango avukana n’abahungu batanu. Jenoside itangira mu 1994, Umuhoza yari kwa Nyina wo muri Batisimu, kandi bari baturanye.

Umuhoza agira ati “Numvise abantu basakuza cyane, ngira ubwoba, mbyutsa mama wo muri Batisimu, ngira ngo ni abajura baje, gusa we yari abizi”.

Mu gihe Umuhoza yari akibaza ibibaye, ngo yumvise Papa we aza yiruka ari kumwe na musaza we mukuru, avuga ko Nyina wa Umuhoza wari urwaye, Nyirakuru wa Umuhoza n’abandi bana bavukana na Umuhoza bose bamaze kwicwa.

Nyina wa Umuhoza wo muri Batisimu yari yarashatse umugabo w’Umuhutu, akumva nta kibazo we azagira, ndetse asaba ko yagumana Umuhoza akamuhisha, ariko Papa wa Umuhoza yumva atizeye ko umwana we yahabonera umutekano aramujyana.

Papa wa Umuhoza yahisemo kumujyana ari kumwe na musaza we mukuru batangira kwihisha mu bihuru biri hafi y’urugo rwabo, bagakomeza kumva abantu bataka.

Mu buhamya bwe, Umuhoza yagize ati “Nakomezaga gusunika Papa mubwira ngo ajye kubatabara, ariko akanyihorera kuko yari azi ibirimo kuba. Nakomeje guhatiriza kugeza ubwo anshyize ku rutugu turamanuka tujya mu kabande muri iryo joro”.

Umuhoza na Papa we ndetse na musaza we mukuru bamaze iminsi mikeya bihishe, nyuma se yibuka umuntu basenganaga ku rusengero yumva yizeye ko yabahisha, batangira urugendo rujya iwe. Bageze iwe, yarabakiriye arabahisha, ariko Interahamwe ziza kumenya ko bahari, barahava bajya kwihisha ahandi.

Muri uko kwihisha, Umuhoza avuga ko babonaga ibintu byinshi biteye ubwoba, we ngo ntazibagirwa umwana yabonye arimo yonka ibere rya Nyina wari wamaze kwicwa.

Umuhoza yagize ati “Muri ibyo bihe bigoye byose twari turimo, Papa yakomezaga gusenga, ariko njyewe sinahumbyaga amaso, ndeba aho abicanyi baturuka. Numvaga ari abantu bahiga umuryango wanjye gusa, sinari nzi ko ari Igihugu cyose kirimo guhiga ubwoko bumwe” .

Ifoto igaragaramo Umuhoza Olive (ubanza ibumoso) nyuma gato ya Jenoside yakorewe abatutsi

Umunsi umwe, Interahamwe zaraje zivumbura Umuhoza, ari kumwe na Papa we ndetse na musaza we mukuru, ngo zibabonye zirababwira ziti “Uyu munsi turica abahungu n’abagabo gusa. Tuzakurikizaho abagore n’abana nyuma.”

Ako kanya, zahise zica Papa wa Umuhoza na musaza we, imwe muri izo Nterahamwe ijyana Umuhoza mu rugo rwayo.

Umuhoza ati “Kuva ubwo, uko najyaga kuvoma nanyuraga ku murambo wa Papa nakundaga na musaza wanjye baryamye aho hasi, ngatekereza ko bakiri bazima, kuko ntari nzi uko umuntu apfa, narabanyeganyezaga ngo babyuke, ariko bikanga”.

Umuhoza avuga ko ibyo yabikoze iminsi mikeya, kugeza ubwo hari abana bamubwiye bati, “Ugomba kumenya ko Papa wawe yapfuye kandi atazagaruka.”

Nyuma gato, Umuhoza avuga ko imirambo yari imaze kubora, abicanyi bakayijugunya mu cyobo. Interahamwe yari yarajyanye Umuhoza mu rugo rwayo, yamusigaga aho, ikajya kwica abandi Batutsi . We yari aho, baramufashe nk’umwana ariko ntibyamushimishaga.

Umuhoza agira ati, “Sinigeze mbifata nk’igikorwa cy’urukundo, kwica Data, hanyuma bakankiza, ni ikintu ntigeze nshima” .

Umuhoza Olive nyuma ya Jenoside

Iyo Nterahamwe yari yiyemeje kugumana Umuhoza kuko ngo yavugaga bati “Ni umwana w’umukobwa mutoya wasigaye wenyine, ntacyo atwaye kuko umuryango we wose twarawurangije.”

Umuhoza agira ati “Ubwo ni bwo namenye ko ari njyewe warokotse njyenyine. Ntibigeze bamenya ko Imana yari ifite umugambi mwiza kuri jye.”

Umunsi umwe, umusirikare wari wamenye amakuru ya Umuhoza yaje muri urwo rugo, Umuhoza atekereza ko ari uje kumwica, ariko aza kumenya ko ari umusirikare wa FPR-Inkotanyi wari uje kumukiza.

Uwo musirikare yamujyanye ku Bitaro bya Rwinkwavu, aho yasanze abantu benshi cyane bakomeretse harimo n’Interahamwe, amusiga aho ku bitaro.

Nyuma haje undi musirikare, abona Umuhoza yihebye, amubaza aho avuye, Umuhoza abura icyo amusubiza, ariko uwo musirikare akomeza kumubaza, aza kugera aho amubaza ati “Mama wawe ari he?” Umuhoza amusubiza ko bamwishe, nyuma arongera ati, “Naho Papa wawe?”, Umuhoza yabuze icyo amusubiza ararira gusa, Umusirikare aramuhumuriza, aramujyana aho yabaga ngo ajye kumurera.

Uwo musirikare wari umujyanye kumurera yabanaga n’abandi basirikare bose b’igitsinagabo, abona ko ibyiza ari uko Umuhoza yakwitabwaho n’umuntu w’igitsina gore, ahita amushyira umusirikare witwa Joy.
.

Uwo musirikare witwa Joy yitaye kuri Umuhoza neza cyane, kugeza ubwo yamuhaye izina rya mama Joy. Uwo Joy ni we wanafashije mu gushaka inkomoko ya Umuhoza, kandi ngo byari ibintu bigoye, kuko ngo nta bintu byinshi yibukaga ku muryango we, uretse amazina y’ababyeyi be gusa.

Uko gushakisha, byamaze igihe kinini ntacyo bigezeho, nyuma ngo mubyara we umwe wabaga muri FPR- Inkotanyi aza kumenya amakuru y’aho akomoka.

Umuhoza ati “Mama Joy yategetse ko bajya kunyereka aho mvuka, ariko nyuma bakangarura, kandi ni ko babigenje”.

“Ni we muntu wenyine ku Isi wanyeretse urukundo nyarwo.”

Umuhoza Olive (ufite indangururamajwi) hamwe na Joy

Nyuma y’imyaka mikeya Umuhoza abana na Mama Joy, abo mu muryango wa Umuhoza biyemeje kuza gutwara umwana wabo, ariko iyo ngo ni yo yari intangiriro y’ubuzima bugoye.

Umuhoza ati “Ndi muri uwo muryango, nibwo namenye ko ndi jyenyine, ko burya ndi impfubyi koko ”.

“Hari imiryango imwe n’imwe yagiye ifata abana bacitse ku icumu rya Jenoside nk’abakozi bo mu rugo, hari n’ababafataga nk’abacakara, izo ni zimwe mu ngaruka twagize.”

Umuhoza yabaye muri uwo muryango afite imyaka hagati y’icumi na cumi n’ibiri(10-12), ariko ngo babaga bamubwira ko aramutse agize ibyago akabyara umwana atabona aho amushyira kuko Nyina yapfuye.

Ati “Imwe mu miryango yatwakiriye nyuma ya Jenoside, yumvaga kuba turiho bibabuza gutwara imitungo yasizwe n’ababyeyi bacu”.

“ Bashoboraga kuza bakambwira ngo, ubu uramutse ubyaye umwana wamujyana he ko mama wawe atakiriho?”

Umuhoza avuga ko yari yaramaze kwakira ubuzima bwo kutagira ababyeyi, ariko akumva akomeye kuko yari mu maboko meza ya mama Joy, ariko abo bo mu muryango we batumye asubira inyuma cyane ndetse ubuzima buramubihira cyane.

Atangiye amashuri yisumbuye, yashoboye kwiga neza umwaka wa mbere aratsinda, ariko ageze mu mwaka wa kabiri, yarasibiye kuko yigaga adatuje kuko yabaga atekereza aho azajya mu biruhuko.

Umuhoza ati “Nari umukobwa uhora arwaye, wanze Imana, Imana yanyiciye Umuryango wose”.

Afite imyaka 14, Umuhoza yafashe icyemezo cyo kujya kwijugunya mu ruzi, kugira ngo apfe, ariko ageze kuri urwo ruzi ahindura igitekerezo.

Yagize ati “Naratekereje nti ndamutse ntapfuye, uwo muryango wakongera ukambona, kandi nashakaga gupfa urupfu ruzatuma batabona n’umurambo wanjye. Nari umukobwa wababaye cyane” .

Kugira ngo Umuhoza ave muri uwo muryango, yafashijwe n’Ikigega cya FARG, cyamujyanye gutangira ubuzima kuri AVEGA Rwamagana.

Umuhoza ati, “Numvaga meze neza, nyuma baje kuzana n’abandi bana cumi n’umwe turabana, batugurira inzu. Dutangira umuryango umeze utyo”.

Buri mwana muri abo, yari afite ibikomere bye, ariko Umuhoza avuga ko Imana yamukoresheje mu gufasha abo bana bagenzi be, nubwo wa muryango wamufataga nabi wamubwiraga ko ntacyo azamara mu buzima.

Yagize ati “Aho ntangiriye gusenga, ubuzima bwanjye bwarahindutse burundu.”

Umuhoza yaje gukomeza kwiga, arangiza na Kaminuza. Ubu ni umugore wubatse ufite abana batatu kandi wahiriwe n’ubuzima. Ubu ahamya ko Imana yumva amasengesho kandi ishobora komora no gukiza ibikomere.

Ni inkuru yanditswe na Tabaro Jean de la Croix/KT Press yashyizwe mu Kinyarwanda

Padiri Wenceslas Munyeshyaka

Uretse gushumuriza Interahamwe n’abasirikare Abatutsi bari bahungiye muri Kiliziya ya Sainte Famille bakabicira mu mbuga ya Kiliziya, gufata ku ngufu abagore n’abakobwa abanze akabatanga bakicwa, Padiri Munyeshyaka na we ubwe yagize uruhare mu kurimbura ba nyirarume nk’uko byemezwa na Senateri Evode Uwizeyimana.

Senateri Uwizeyimana yagize ati “Nigeze kujya mu Karere ka Huye ahahoze ari muri Komine Ngoma aho Padiri Munyeshyaka akomoka, nza gutangazwa no kumva ko nyina yari Umututsikazi, ariko yadutse mu bantu ararimbura, muri ba nyirarume, no mu bandi bantu bafitanye isano. Ibyo ni ukubura ubumuntu ubwabyo.”

Senateri yakomeje avuga ko gutabara abantu bari mu kaga byari amahitamo Munyeshyaka yari afite, atanga urugero rw’umushumba wa Diyosezi ya Gikongoro Musenyeri Céléstin Hakizimana na we wari Padiri kuri Saint Paul mu Mujyi wa Kigali mu gihe cya Jenoside yakorewe Abatutsi, ariko akaba yarabashije gutabara abasaga 2,000 akaza no kwambikwa umudari w’Umurinzi w’Igihango.

Musenyeri Céléstin Hakizimana ashimirwa uruhare yagize mu kurokora abahigwaga

Senateri Evode Uwizeyimana avuga ko bibabaje kuba kugeza na n’ubu Munyeshyaka Wenceslas akomeje gukingirwa ikibaba aho yihishe mu Bufaransa, akaba ataratabwa muri yombi ngo aryozwe ubuzima bw’abantu batagira ingano bishwe ari we ubategeje Interahamwe n’abasirikare, n’abakobwa n’abagore yangirije ubuzima abafata ku ngufu.

Amakuru aheruka kuri Padiri Munyeshyaka Wenceslas, avuga ko yahagaritswe ku mirimo ye, nyuma yo kwemera ko ari we se w’umwana w’umuhungu yabyaranye n’umugore witwa Mukakarara Claudine, akaba yarahagaritswe n’Umuyobozi wa Diyosezi yakoreragamo.

Gukurwa ku mirimo y’ubupadiri, ibyo bita ‘Suspense a divinis’ mu kilatini, ni icyemezo cyafashwe na Musenyeri Christian Nourrichard, agifatiye Padiri Munyeshyaka Wenceslas. Ibyo bikaba bisobanuye ko Munyeshyaka atemerewe kongera gukora imirimo ijyanye n’ubupadiri, kandi ko abujijwe no gutanga amasakaramentu ayo ari yo yose.

Senateri Evode Uwizeyimana (uwa kabiri iburyo) yagarutse ku bikorwa bibi byaranze Padiri Munyeshyaka Wenceslas mu gihe cya Jenoside

Mu itangazo ryasohowe ku wa Gatanu tariki 3 Ukuboza 2021 aho Padiri Munyeshyaka yakoreraga, rivuga ko yahagaritswe ku mirimo nyuma y’uko yemeye ko ari we Se w’umwana muri Nzeri 2021 ahitwa i Gisors. Uwo mwana utavugwa amazina, ikinyamakuru www.tendanceouest.com cyanditse ko yavuze mu 2010.

Padiri Wenceslas Munyeshyaka yasabye kuba impunzi ya Politiki, kuva yagera mu Bufaransa mu 1994. Ubwo yari amaze imyaka ibiri muri icyo gihugu, yakiriwe muri Diyosezi ya Évreux, nyuma akorera muri za Paruwasi zitandukanye, iheruka yakoreyemo, ikaba ari Paruwasi ya Brionne.

Minisitiri Bizimana Jean Damascène

Mu kiganiro yagejeje ku bitabiriye igikorwa cyo Kwibuka no gushyingura mu cyubahiro imibiri yabonetse ku Rwibutso rwa Nyange mu Karere ka Ngororero, Minisitiri Bizimana yagaragaje uko ibintu bikwiye kuba bivugwa uko biri, kugira ngo byumvikane neza abantu basobanukirwe uko Jenoside yakozwe.

Dr. Bizimana avuga ko Jenoside irangwa no kuyikora, binyuze mu mugambi wo kwica abantu bazira uko bavutse uko baba bangana kose, bitandukanye n’abakeka ko Jenoside bivuze kwica abantu benshi gusa, kuko ibyo ngo bituma abantu bagwa mu mutego wo kuvuga ko Jenoside yageragejwe nyamara ahubwo yarakorwaga.

Agira ati "Nko muri Komini Kibirira abantu bakeka ko mu 1990 nta Jenoside yageragazwaga, kuko hatishwe Abatutsi miliyoni, nyamara iriya yari Jenoside kuko abishwe baziraga ko ari Abatutsi nta yindi mpamvu. Ntabwo ryari igerageza yari Jenoside kuko bicwaga byateguwe na Leta".

Urwitwazo rwo kwica Abatutsi mu 1990 muri Komini Kibirira

Minisitiri Bizimana asobanura ko nyuma y’iminsi mike Ingabo za RPA zitangije urugamba rwo kubohora Igihugu, mu kwezi k’Ukwakira 1990, muri Komini Kibilira, hakorewe inama yatumijwe n’uwari Superefe wa Superefegitura ya Ngororero, witwaga Niyitegeka Bernard, hamwe na Burugumesitiri wa Komini Kibirira, Jean Baptiste Nteziryayo.

Iyo nama yabereye ku Muhororo ngo yari yatumiwemo n’Abahutu bakomeye bavukaga i Kibirira bakoraga ahandi, barimo Leon Mugesera, icyo gihe yari umwarimu muri Kaminuza y’u Rwanda akaba n’umujyanama mu bya Politiki mu biro bikuru bya MRND.

Iyo nama kandi ngo yitabiriwe n’uwari umuyobozi w’ikigo gishinzwe ubuhinzi bw’ibirayi (PENAPE), Pierre Tegera, nk’uko biri muri Raporo y’inama yakozwe icyo gihe, ku ngingo y’umunsi hakaba hariho kwiga ku kibazo cy’inyangarwanda zateye Igihugu zifatanyije n’Abatutsi, kandi zishe abayobozi bakomeye bakomokaga muri Kibilira, bityo ko Abahutu ba Kibilira bagombaga kwica Abatutsi kubera ko babiciye abayobozi bahavukaga.

Agira ati "Muri iyo nama hahimbwemo ikinyoma cy’uko Inyangarwanda n’Abatutsi bishe uwari umugaba mukuru w’Ingabo, Laurent Serubuga na Charles Uwihoreye, wayoboraga Ikigo cy’Abajandarume cya Ruhengeri, bose bavugaka Kibirira, bityo ko Abahutu bakwiye guhaguruka bakikiza umwanzi wabiciye abategetsi bakomeye".

Minisitiri Dr. Bizimana asobanura ko ikinyoma nk’icyo atari gishya, kuko no mu 1959 hari hahimbwe ikindi kinyoma ko Mbonyumutwa wari umutware wa Ndiza yakubiswe n’Abatutsi, ndetse hakaba n’abavugaga ko yishwe, icyo gihe Abatutsi baricwa hirya no hino mu Gihugu uhereye za Ndiza, Ruhengeri na Kibuye n’ahandi.

Avuga kandi ko hari amakuru atajya avugwa ya Jenoside yakorewe Abatutsi mu myaka ya za 1960 kugeza 1963, aho muri Raporo ya Colonel Logiste wari umutegetsi mukuru w’u Rwanda, bigaragara ko hari Abatutsi bishwe mu Bumboga (Gasabo), ku rwitwazo rushingiye ku kinyoma cyahimbwe ko Abatutsi bishe uwari Minisitiri w’Ubutabera wtiwaga Anastase Makuza.

Agira ati "Icyo gihe Abatutsi barishwe abandi baratwikirwa muri Gasabo, ku kinyoma cy’uko Anastase Makuza yishwe n’Abatutsi nyamara yari yakoze impanuka y’imodoka nta n’icyo yabaye, batwikira Abatutsi za Bumbogo abandi barabica mu 1961".

Ikindi kinyoma Dr. Bizimana agaragaza cyabaye urwitwazo ngo Abatutsi ba Kibungo na Rwamagana bicwe, ni uko hadutse abavuga ko Umudepite bitaga Kajangwe yishwe n’Abatutsi, nyamara ngo yari yishwe n’Abaparimehutu kubera amakimbirane yari afitanye na mugenzi we babanaga muri iryo shyaka.

Ibyo ngo byarabaye kandi mu 1969 ubwo hicwaga Umuparimehutu ukomeye witwara Barthazar Bicamumpaka, kandi nabwo Abatutsi baricwa nk’uko byakomeje kugeza mu 1990 ubwo Abatutsi bicwaga muri Kibilira.

Abatutsi bicwaga urupfu rubi ku byiciro byose birimo n’abagore n’abana

Minisitiri Bizimana avuga ko Jenoside yakorwaga Abatutsi bicwa urupfu rubi bashinyaguriwe, kandi ibyiciro byose bigashishikarizwa kwica ndetse n’abagore bajya mu bwicanyi, nk’aho byakozwe mu yahoze ari Segiteri Gatumba muri Serire Makoma, aho uwayiyoboraga Josephine Mugeni, ari we wayoboraga ibitero mu 1990 bijya kwica Abatutsi.

Agira ati "Mu muco Nyarwanda ubundi nta mugore wicaga, ariko uwo Mugeni wanitwaga izina ryiza we yanavuzaga ingoma ayoboye ibitero, bijya kwica abana nabagore bagenzi be".

Raporo kandi zigaragaza ko nyuma yo kwica Abatutsi habarurwaga abishwe, abakomeretse, inzu zatwitswe, inka zariwe n’abahunze ndetse n’aho bahungiye mu rwego rwo kumenya uko bapima uko ubwicanyi bwakozwe n’ibizakurikiraho.

Minisitiri Bizimana atanga urugero rwa raporo y’uko Abatutsi bishwe muri Kibirira, yasohotse ku wa 19 Ukwakira 1990, ikozwe n’umuyobozi w’urwego rushinzwe iperereza witwaga Niyibizi Damien, igaragaza ko mu minsi itatu gusa hagati y’itariki ya 13 na 16 Ukwakira 1990, muri Superefegitura ya Ngororero hishwe Abatutsi 365.

Naho Raporo ya Komini Kibirira ikagaragaza ko hagati ya tariki 11 na 15 Ukwakira 1990, hishwe Abatutsi 236, hakomereka 45, hahunga 3107, harimo 701 bahungiye kuri Superefegitura ya Ngororero, kuri Paruwasi Muhororo hakaba 2385, Komini Buringa ya Gitarama hahungira 21, hakaba haratwitswe inzu zisaga 600, hafi 200 zirasenywa, haribwa inka n’ihene n’intama nyinshi ndetse hari n’abasaga 300 bari barahungiye mu baturage.

Minisitiri Bizimana agaragaza ko kuba abayobozi barafataga umwanya wo kubarura iyo mibare yose, aho gukora ibikorwa by’iterambere bizanira abaturage amahoro, ari umugambi karundura wa Jenoside yariho ikorwa.

Agira ati "Aho kugira ngo umuyobozi abe ariho yishimira gutanga raporo y’iterambere ry’abaturage, ahubwo arishimira gutanga raporo y’abantu bishwe, inka zariwe, murumva rero ko ari umugambi wa Jenoside, niyo mpamvu tugomba kuyifata no kuyita uko yitwa".

Icyo gihe kandi Raporo ya Burugumesitiri wa Buringa igaragaza ko hari Abatutsi bari bahungiye kuri Komini, ariko bo bataratangira ubwicanyi ariko hari abakomeretse bajyanywe kwa muganga, hari n’abakiri kwambuka muri Nyabarongo bagaterwa amacumu n’interahamwe zo muri Kibirira zitifuzaga ko bahunga.

Minisitiri Bizimana kandi agaragaza ko hari igitabo cya François Nsengiyumva, kigaragaza uko ubwicanyi bwakozwe muri Kibirira mu buryo bw’iyicarubozo, aho bicaga n’abana babashinyaguriye, nk’urugero rw’umwana bishe batemye amaguru bagasiga igihimba, nyina yasanga ataka agahitamo kwiyahurana na we muri Nyabarongo.

Hari kandi akandi kana batwikiye mu nzu iwabo ko ntikashya, ariko abicanyi baguma iruhande rw’iyo nzu iminsi itatu kugeza ako kana kanogotse, ibyo byose bikaba bigaragaza uko Jenoside yakorwaga mu bwicanyi butagira urugero.

Minisitiri w’Uburezi yunamiye Abatutsi bashyinguwe mu rwibutso rwa Jenoside rwa Kaminuza y’u Rwanda i Huye

Yabibwiye abari bitabiriye igikorwa cyo kwibuka ku nshuro ya 29 Jenoside yakorewe Abatutsi, muri Kaminuza y’u Rwanda cyabereye mu ishami rya Huye, tariki ya 22 Mata 2023.

Yagize ati “Batubwira ko ubundi intiti bivuga ibitoki bidahiye neza, byapfubye. Byatugaragariye rero ko abari abahanga muri Kaminuza koko babaye intiti. Barapfubye. Nta bumuntu bamenye, ni ibipfube. Bakiriye siyansi, umutimanama urabura, bamera nk’amarobo. Ubusanzwe siyansi ihura n’umutimanama bikarema umuntu w’ingirakamaro.”

Dr. Muganga yanavuze ko imyitwarire y’abo bahanga biyitaga intiti, yasigiye Kaminuza y’u Rwanda igisebo.

Yagize ati “Natwe nka Kaminuza y’u Rwanda badusigiye igisebo kidasanzwe. Igihe cyose duhuriye ahangaha twibuka, uba ari umwanya wo gufata ingamba, kugira ngo mu bumenyi bwacu tuzi n’ubwo twigisha, turusheho gukumira ikindi cyazabaho, bityo umwarimu, umushakashatsi, umukozi n’umunyeshuri uva muri kaminuza yacu cyangwa uyikoreramo, abe umuntu w’ingirakamaro mu Rwanda no ku Isi hose.”

Dr. Didace Kayihura Muganga, na we yunamiye Abatutsi bashyinguwe mu rwibutso rwa Jenoside rwa Kaminuza y’u Rwanda i Huye

Minisitiri w’Uburezi, Dr. Valentine Uwamariya wari waje kwifatanya na Kaminuza y’u Rwanda mu kwibuka, na we yavuze ko biteye isoni n’agahinda kubona abari abahanga mu Rwanda baragize uruhare muri Jenoside, anavuga ariko ko byaturutse ku kuba barabyigishijwe igihe kirekire, bikabacengera.

Yagize ati “Impamvu abateguye Jenoside bakoresheje abanyabwenge, ni uko nyine iyo uzi ubwenge ibyo ukora umenya uko ubikora mu bwenge, ari na yo mpamvu Jenoside yagize ubukana bukomeye. Abize bari ku isoko y’ingengabitekerezo ya Jenoside, noneho abaturage bagenda babyinjizwamo buhoro buhoro.”

Minisitiri Uwamariya yanifuje ko nk’uko uburezi bwabaye umuyoboro w’ingengabitekerezo ya Jenoside, uyu munsi bukwiye kuba umuyoboro wo kubiba urukundo no kubaka mu Banyarwanda ubumwe n’indangagaciro zubaka kurusha izisenya.

Urwibutso rwa Jenoside rwa Kaminuza y’u Rwanda, ishami rya Huye, rushyinguyemo imibiri isaga 400

Inkomoko y’inyito ‘Intiti’ ku ‘banyabwenge’

Ku rubuga rwa Facebook, uwitwa amatekanumuco.com yanditse ko akenshi abantu iyo bavuze “Intiti” baba bashaka kumvikanisha umuntu cyangwa itsinda ry’abantu b’abahanga (abanyabwenge), ariko ko ubundi Alexis Kagame arikoresha, abwira abarangije muri Kaminuza, yashakaga kubabwira ko bagifite urugendo rwo kumenya, nuko abaryumvise batangira kurikoresha mu buryo butari bwo.

Pascal Karangwa, umwe mu basheshe akanguhe uzi ayo mateka, yabwiye uwanditse aya makuru kuri amatekanumuco.com, ko ubundi ijambo ‘intiti’ Abanyarwanda barikoreshaga bashaka kuvuga ibitoki bidahiye neza bikirimo intirima.

Biturutse ku kuba Alexis Kagame yararibwiye abanyabwenge, abantu baryumvise nabi, bakeka ko yashatse kuvuga abahanga.

Dr. Kayihura avuga ko abiyitaga intiti babaye intiti koko, n’ikimenyimenyi bakoze Jenoside

Mu gikorwa cyo kwibuka banashyinguye imibiri yabonetse

Babigarutseho kuri iki Cyumweru tariki ya 23 Mata 2023, ubwo bibukaga ku nshuro ya 29 Jenoside yakorewe Abatutsi, ahanashyinguwe mu cyubahiro imibiri yabonetse 87.

Abatutsi babanje kwirwanaho bakoresheje amabuye n’imiheto ndetse ibitero by’Interahamwe babasha kubihashya, zimaze kunanirwa zitabaza abasirikare baraza barabarasa Interahamwe zibona uko zibica.

Mu buhamya bwa Ngutete Auxilie, yavuze ko mbere y’uko Jenoside itangira, Abahutu batangiye kwigabanya amasambu yabo, ku buryo bayakoreshaga babwirwa ko atakiri ayabo.

Mu gihe cya Jenoside ngo ibitero byayobowe n’abari ibikomerezwa harimo Pasiteri, Depite Mutabaruka, Burugumesitiri ndetse n’abari abacuruzi.

Imibiri yashyinguwe mu cyubahiro, imyinshi ni iy’abana bishwe muri Jenoside

N’ubwo ngo abenshi bari abagabo, yatunguwe no kubona mu bayobora ibitero harimo n’abagore nk’uwitwaga Mariam wari utuye i Shyembe, ari mu bayoboye ibitero byinshi kandi byahitanye benshi, kimwe n’umusirikare witwaga Hadidja wo kwa Semanyana.

Ikindi cyamutangaje ngo ni igitero cy’abana baje basanga Abatutsi benshi bari mu kibaya cyo kwa Mushoza, batangira kubatera amabuye ariko abantu bakuru bari bahari, babasha kubasubiza inyuma.

Yagize ati “Twari abantu benshi b’ingeri zitandukanye twicaye, twahise tubona igitero cy’abana kiza gituruka kwa Rutagiragahu, baza batera amabuye, abagabo baravuga bati aba bana baje kudutesha umutwe, barabirukanye baragenda, kumbe icyo gitero cyari kije gutata ngo babwire abakuru uko basanze tungana, hatarashira akanya igitero cyahise cyiza.”

Yavuze ko abakecuru batwikiwe mu nzu, abandi bararaswa ari nako batemagurwa, icyakora bamwe ngo babasha kwiruka barahunga.

Yashimiye Inkotanyi zabarokoye kuko zasanze batakigira aho bihisha, kuko imisozi yari yuzuye imibiri y’abishwe kandi ibitero binyuranamo, ndetse banazengurutswe n’ibiyaga n’imigezi ku buryo batabashaga no kubona aho bahungira.

Uwavuze mu izina ry’imiryango yashyinguye ababo mu cyubahiro, Kabandana Callixte, yavuze ko imibiri 87 ishyingurwa mu cyubahiro, benshi ari abana bato, benshi bakaba barishwe na Rwagatera wabicaga abaciyemo kabiri, kandi 90% byabo bagizwe n’abana bari bakiri bato.

Abandi nanone ngo ni abishwe n’uwari umupolisi witwa Ignace, wari ufite umwihariko wo kwica abana abanigishije imigozi.

Yifuje ko urwibutso rwa Rukumberi rwazitirwa, amatungo ntakomeze kurwinjiramo ndetse no kubaka inzu y’amateka ya Jenoside yakorewe Abatutsi i Rukumberi.

Yashimye Leta ko yafashije abarokotse Jenoside mu mibereho ku buryo atari bo bakene, ariko by’umwihariko kubaha agaciro kuko mbere bari bahatuye nk’abatari mu Gihugu.

Yasabye abakuru kwigisha abana amateka ya Rukumberi kandi y’ukuri, kuko bayibayemo nk’impunzi ariko bakaba babayeho neza nk’abenegihugu bose.

Ati “Twabaye hano i Rukumberi nta Gihugu dufite, kuhasohoka ari ugusaba ibyangombwa, uwize Serayi akaba arangije amashuri akomeye, kandi atabuze ubwenge, ariko Igihugu dufite ubu gitandukanye n’icyatwishe.”

Minisitiri w’Ubucuruzi n’Inganda, Dr Ngabitsinze Jean Chrysostome, yijeje ko mu kwibuka ku nshuro ya 30 Jenoside yakorewe Abatutsi, urwibutso rwa Jenoside rwa Rukumberi ruzaba rwarazitiwe, ndetse ngo n’inzu y’amateka ikazatangira kubakwa umwaka utaha.

Yagize ati “Uri ahangaha wese abitahane nk’umuhigo muri we, uzahaca akabona nta kirakorwa ajye atwibutsa. Twaje ahangaha ngo tubereke urukundo kuko murarukwiye kandi namwe murarutwereka. Ibikorwa nk’ibyo rero ndahamya ko mu Gihugu cyacu bitaburirwa amafaranga, ntabwo bishoboka na gatoya.”

Minisitiri w’Ubucuruzi n’Inganda, Dr Ngabitsinze Jean Chrysostome

Kwibuka ku nshuro ya 29 Jenoside yakorewe Abatutsi mu Murenge wa Rukumberi, byatangiye hakorwa urugendo ku maguru, hasurwa aho Abatutsi biciwe ari benshi, rusorezwa ku rwibutso rushyinguyemo imibiri y’Abatutsi bishwe muri Jenoside irenga 42,500.

Hakurikiyeho gucana urumuri rw’icyizere ndetse n’ijoro ryo kwibuka, ahumviswe ubuhamya butandukanye bugaragaza uko Abatutsi ba Rukumberi bishwe.

Umuyobozi w’Akarere ka Ngoma, Niyonagira Nathalie, yashimiye abantu bose baje gufata mu mugongo abafite ababo biciwe i Rukumberi

Bateguye aho gushyira indabo kuko nta rwibutso bahashyize

Mu bisigaratongo bikihaboneka, harimo ibiti by’imivumu biri hafi aho, ndetse n’amabuye yazimiriye mu byatsi by’umukenke yari yubatsweho inzu z’abaturage, n’ishuri ribanza ryitwaga Ecole Primaire Nyirarukobwa.

Bamwe mu baharokokeye, abari abaturanyi b’imiryango yazimye ndetse n’abigaga mu Ishuri rya Nyirarukobwa, bishyize hamwe bashinga Umuryango witwa ‘Nyirarukobwa Family’.

Bafatanyije n’Ubuyobozi bw’Akarere ka Bugesera n’inshuti, buri mwaka abagize Nyirarukobwa Family bajya kwibukira muri uwo mukenke, bagashyira indabo aho babonye bitewe n’uko nta rwibutso ruhari.

Umuyobozi wa Nyirarukobwa Family, Gaudence Karemera wari atuye haruguru y’ishuri, avuga ko Jenoside itangiye bahungiye ku musozi witwa Kayumba, izari ingabo za Leta (Ex FAR) zikabasukamo amasasu ku itariki 11 Mata 1994.

Karemera avuga ko abatarapfuye ako kanya bahise bahunga batatanira hirya no hino, ku buryo ngo hari imiryango yahungaga bari kumwe bose, bakicwa hakabura n’umwe usigara wo kubara inkuru.

Karemera avuga ko mu kibaya cya Nyirarukobwa cyari kirimo ishuri, aho bahora bajya kwibukira buri mwaka, ngo hakeneye gushyirwa urwibutso rw’ayo mateka.

Ati "Duhora tubisaba ko hashyirwa ikimenyetso, kucyubaka wenda twanacyubaka ariko urumva ko bisaba uburenganzira".

Hari n’abandi basaba ko muri Nyirarukobwa hashyirwa ishuri nk’uko ryahahoze, ariko bakabwirwa ko bidashoboka kuko ari mu kabande kenda kuba igishanga.

Umuyobozi w’Akarere ka Bugesera, Richard Mutabazi, avuga ko gahunda yo gushyira ikimenyetso cy’urwibutso aho abarokotse Jenoside yakorewe Abatutsi bifuza, ari gahunda irimo itekerezwaho na MINUBUMWE, ikazagena umurongo wabyo, kuko aho abantu baguye ari henshi kandi ikimenyetso kigomba kwemeranywaho no kurindwa.

Meya Mutabazi akomeza agira ati "Hano ishuri ryahoze ntibyoroshye ko rihasubizwa kuko ari mu gishanga, ahubwo ryubatswe ahandi habereye kandi rigumana izina rya Nyirarukobwa. Aha rero ubu ni urwuri (farm), ni mu gishanga".

Ati "Aha hahoze Ishuri, abaryigagamo n’abaryigishijemo n’imiryango yabo barahahurira kugira ngo bibuke amateka banyuzemo".

Umuryango Ibuka na Nyirarukobwa Family by’umwihariko bavuga ko bikigoranye kumenya abakoze Jenoside muri ako gace, bitewe n’uko abo bicanyi ngo batari bahatuye, kandi nta wababonye warokotse ngo abe yabavuga.

Mu rwego rwo kugira ngo Ishuri ribanza rya Nyirarukobwa ryari ryarashenywe ritazima, hongeye gushingwa iryitwa gutyo n’ubwo ritari muri ako gace kuko ryimuriwe ahitwa ku Ninda.

Niyitegeka Félicité yicanwe n’abamuhungiyeho

Intwari Félicité Niyitegeka wavutse mu 1934, yambuwe ubuzima n’interahamwe nyuma yo kwanga kwitandukanya n’Abatutsi yari yarahishe aho yabaga muri Centre Saint Pierre, ikigo cya diyosezi ya Nyundo, cyari gishinzwe amahugurwa n’umwiherero wa ‘Auxiliaires de l’Apostolat.

Niyitegeka yatumiye abakobwa bitwa abafasha b’ubutumwa bazwi nk’abakobwa ba Musenyeri tariki 4 Mata 1994, kuko yari asanzwe abahuza kabiri mu mwaka muri Diyosezi ya Nyundo.

Umunsi wo gutangira amasomo nibwo Jenoside yakorewe Abatutsi yatangiye, bituma abakobwa baguma aho, uko ibikorwa by’ubwicanyi byarimo biba mu mujyi wa Gisenyi, niko abantu bahungaga hirya no hino ndetse bamwe bagera kwa Niyitegeka, wari utuye muri metero nkeya z’umupaka uhuza Goma na Gisenyi, akabafasha kwambuka umupaka bagakiza ubuzima bwabo.

Hari abanyeshuri bigaga muri Kaminuza ya Mutagatifu Fidèle bahungira muri Hoteli Merdien ubu yabaye Serena Hotel, bari barinzwe n’Abafaransa ariko baza kubasiga barigendera, bajyanwa mu nzu yari izwi nk’ingoro ya Muvoma, ariko buri joro interahamwe zikaza gutwaramo bamwe zikajya kubica.

Zirimwabagabo wari Superefe yazanye icyo gikundi cy’abantu mu kigo kiyoborwa na Niyitegeka, amusaba kubagumana.

Umwe mu batangabuhamya wari kumwe na Niyitegeka ati “Superefe yasabye Niyitegeka kubagumana igihe gito, bagashakirwa aho bajyanwa, ndetse ahasiga n’abajandarume bo kubarinda. Gusa nyuma y’iminsi mikeya ba bajandarume baragiye, babasiga aho nta byo kurya bafite”.

Mu kwiyumanganya kwe, Niyitegeka yakomeje ibikorwa byo kurwana kuri abo bantu, ndetse abo ashoboye kwambutsa akabambutsa kugeza naho yagiye kureba Superefe Zirimwabagabo, amusaba abajandarume ariko ntibabamuha.

Ntiyacitse intege, ahubwo yakomeje kwakira abamugana, ndetse agahangayikishwa n’ubuzima bw’abantu afite kuko yashakaga kubakiza.

Ikigo cya Mutagatifu Petero Niyitegeka yari atuyemo cyari cyubatse muri metero nkeya ku mupaka munini uhuza umujyi wa Goma na Gisenyi, bigasaba iminota itageze kuri itanu ngo umuntu ukivuyemo abe ageze mu kindi gihugu.

Icyakora bitewe n’ubwoba abantu babagamo, ntibyari byoroheye buri wese kuhagera ngo akize ubuzima bwe, cyane ko hari n’interahamwe zikora igenzura.

Niyitegeka yiyambaje abajandarume barinda umupaka kugira ngo bamufashe kwambutsa abantu yari ahishe. Yambukije abantu inshuro ebyiri bagera i Goma bagahamagara abo basize bababwira ko nabo bamwiyambaza bakambuka.

Gutanga ayo makuru nibyo byatumye interahamwe zimenya ko ahungisha abantu, n’amayeri yakoreshaga harimo kubambutsa mu ma saa kumi za mu gitondo.

Tariki 20 Mata 1994 ni bwo Niyitegeka yari yateguye guhungisha itsinda ry’abantu 43 yari afite, nyuma yo kubwirwa na musaza we Col. Nzungize Alphonse, wari uyoboye ikigo cy’abasirikare cya Bigogwe, ko interahamwe zifite ubukana ndetse zishobora kumutera zikamwicana n’abo ahishe, nyuma yo gutera Cathedral ya Nyundo.

Gusa, Niyitegeka ntiyemeye gusiga abo ahishe ahubwo yahisemo kwandikira umuvandimwe we ko adashoboye kumurokorana n’abo yari ashinzwe kurinda, abareka bagapfana.
Yagize ati “Mon frère chéri, urakoze kuba washatse kunkiza. Ariko aho gukiza ubuzima bwanjye ntakijije abo nshinzwe, abantu 43, mpisemo gupfana nabo. Dusabire tugere ku Mana kandi unsezerere umukecuru (mama we) n’umuvandimwe. Ngeze ku Mana, nzagusabira. Witware neza! Bityo Ndagushimiye cyane”.

Ubusanzwe iyo abajandarume barinda umupaka babonaga inzira imeze neza nta nterahamwe zihari, bateraga amabuye ku mabati ya Shapele ya Bikira Mariya aho Niyitegeka yari atuye ku isaha ya saa kumi za mu gitondo, noneho agahita azana abantu yateguye bakambuka, ariko kuri iyo tariki ntibyakunze, amenya ko inzira itameze neza.

Tariki ya 21 Mata 1994, abantu biriwe mu kigo bacitse intege ndetse benshi kurya birabananira, kubera gutinya ko interahamwe zishobora kubasanga mu kigo zikabica, bikaba byaraterwaga n’amakuru yarimo avuga ko zishaka kuza gutwika icyo kigo.

Niyitegeka hamwe n’abajandarume bari bateguye ko uwo munsi ku isaha ya saa mbiri z’ijoro bari buze kwambutsa abantu, ndetse abari mu kigo abasaba kwitegura.

Isaha ya isaa kumi igeze abantu basabwe kujya mu misa ariko mu gihe bacyitegura, interahamwe zihonda urugi maze Niyitegeka ajya gukingura.

Mukarugira wari mu kigo ndetse agashobora kurokoka ageze kuri Komini Rouge, yabwiye Kigali Today ko ibyo byabaye mu gihe abakobwa bari mu kigo bari bamaze gutondeka amabuye yo kuririraho, kugira ngo batewe bahite bihungira.

Agira ati “Ubwo twari tumaze gushyiraho ayo mabuye nibwo umwe mu bakobwa yambwiye ko hari abantu baje, ngiye kureba mbona ni ba bandi baje ku manywa barimo bakubita igifunguzo cy’ikinyururu Niyitegeka. Nahise niruka mbwira abantu mu byumba ko interahamwe zije bakwihisha ariko nza guhura n’umwe mu nterahamwe ahita anjyana mu kibuga, bagenda bafata n’abandi baturunda mu kibuga, mu gihe ababashije gusimbuka igipangu bahise bigira muri Congo.”

Mukarugira avuga ko interahamwe zamaze kurundanya abantu zitangira kuburiza imodoka, Niyitegeka azibaza aho zimujyaniye abantu ariko ntizamusubiza, na we ahita yurira imodoka.

Umwe mu nterahamwe yahise amukurura amukuramo, ariko amubwira ati “niba mutampaye abantu banjye ndajyana nabo.”

Niyitegeka ngo yarebye abo bantu be arabakomeza ababwira ati “Ubwoba mufite ni ubw’iki? Ntwabo muzi uwo musanga?” Ahita atera indirimbo ‘Nzasanga Mariya mu bwami bw’Ijuru’.

Gusa benshi ntibashoboye kumwikiriza niko guhindura atera ishapule maze yungirizwa n’umukobwa witwa Kayitesi Beltha, wahise atera indirimbo “Izuba ry’umutima wanjye”.

Imodoka yari ibatwaye yanyuze kuri Hoteli Ubumwe, ikata ikomeza imbere ya Kaminuza Saint Fidèle, ariko ihagarara kuri bariyeri.

Interahamwe zasabye Niyitegeka guceceka maze asubiza n’umutima mwiza ati “Turimo kubasabira ku Mana kugira ngo ibyo mukorera abavandimwe banyu mubireke.” Icyakora ngo interahamwe yamusubije yishongora ngo “Nti turi abavandimwe b’Abatutsi kuko Imana y’Abatutsi si yo y’Abahutu.”

Mukarugira wari wabwiwe ko bajyanywe kuri Komini imodoka yabagejeje mu mujyi, abona ko batajyanywe kuri Komini, ahubwo atekereza ko bajyanywe kwicwa, maze ni ko kubwira Niyitegeka ati “Wowe bakubabariye kandi wisenya ufite imirimo myinshi.”

Yamusubije agira ati “Namwe nta cyaha mwakoze reka mbaherekeze mugereyo amahoro.”

Mukarugira avuga ko bageze aho kwicirwa ahazwi nka Komini Rouge, basanze hari ayandi matsinda y’abica n’abacuza abantu ibyo bafite, maze abakuwe mu modoka barundwa ukwabo ariko Niyitegeka ntiyitandukanya n’abantu be ahubwo akomeza gusenga.

Interahamwe zabazanye zabamishemo urusasu, naho Mukarugira agwa yubamye ariko isasu ntiryamufata. Ubwo amasasu yari acecetse yubuye amaso agira ngo arebe ko ari muzima ndetse abona interahamwe zisubiye mu modoka.

Ngo Niyitegeka yari yarashwe aryamye hasi agaramye n’imyenda ye. Mu gihe interahamwe zarimo zicuza abarashwe zibashyira mu cyobo, Mukarugira yabasabye kumurasa ariko baranga, ahubwo babwira abasigaye kumwica bamutemye nabo barangay, bavuga ko bamuhamba ari muzima.

Musaza wa Niyitegeka, Col Nzungize yaje kuhagera bumaze kugoroba asanga Niyitegeka n’abo bari kumwe bishwe yicwa n’agahinda, ariko kubera bwari bumaze kwira, arataha bukeye azana isanduku n’amashuka ashyingura umuvandimwe we n’abandi bantu babiri yari aziranye nabo.

Minisitiri Dr Jean Damascène Bizimana

Yabibwiye imbaga y’abitabiriye kwibuka Jenoside yakorewe Abatutsi mu Murenge wa Karama mu Karere ka Huye, tariki 21 Mata 2023, aboneraho gukosora n’izindi mvugo yumvise zitaboneye zifashishijwe.

Minisitiri Bizimana avuga ko abarokotse Jenoside badakwiye gukoresha imvugo y’uko abicanyi babahemukiye, kuko guhemuka ari ikintu cyoroshye, ugereranyije n’ibyo bakoze babicira ababo.

Ati “Guhemuka ni ikintu cyoroshye, kwica si uguhemuka. Ni ukuvuga ababiciye. Uvuze ngo uwaguhemukiye wagira ngo ni uwakwambuye amafaranga ijana, amafaranga igihumbi cyangwa miliyoni. Ndakosora ibyo kugira ngo bitwumvishe n’inshingano dufite yo kurinda ubuzima.”

Minisitiri Bizimana avuga kandi ko badakwiye kuvuga ko Abatutsi banyuze mu nzira y’umusaraba, kuko batabihisemo.

Yagize ati “Inzira y’umusaraba Yezu/Yesu yayinyuzemo kubera yuko Imana yari yaramuhaye misiyo yo kuzicwa atyo ngo arokore abantu. Ni ko abapadiri n’abanyamadini batwigisha. Ntabwo Abatutsi bari barahisemo kuyinyuzwamo.”

Yunzemo ati “Tujye tuvuga inzira ya Jenoside, kuko ni inzira yahiswemo n’abahisemo kubica.”

Indi mvugo yakosoye ni iyo kuvuga ngo Abatutsi bapfuye, yagize ati “Abatutsi barishwe. Kwicwa no gupfa biratandukanye. Hapfa uwarwaye malariya, kanseri, diyabete, ariko Abatutsi bo barishwe. Tujye rero dukoresha inyito ziri zo.”

Yaboneyeho no kwibutsa abajya bingingira abakoze Jenoside kubereka aho bajugunye imibiri y’Abatutsi nyuma yo kubica, kuko ngo bibaha imbaraga zo gukomeza kubashinyagurira.

Ati “Hashize imyaka 29 babwirwa bati muvuge aho imibiri iri, ishyingurwe. Benshi ntibarabikora, ariko hari n’ababikoze. Twaje gusanga abo binangiye bibaha imbaraga zo gukomeza gushinyagurira ba bandi banze kubwira aho ababo bari.”

Yunzemo ati “Ntabwo tubuza abantu gutanga amakuru, mujye mubyumva neza. Ahubwo ni ukubabwira ngo mwebwe mwikomeza guheranwa n’agahinda kubera yuko hari abatarababwira ahaherereye imibiri y’abanyu.”

I Karama hari hateraniye abatari bake bari baje kwibuka Jenoside yakorewe Abatutsi bari bahatuye mu 1994

Yasoje agira ati “Dufite ubuyobozi bwiza, dufite Leta nziza, iduha umwanya wo kubibuka no kubaha icyubahiro igihe cyose, n’ubwo tutazababona. Mukure ikiliyo, byoye gutuma muhungabana, byoye gutuma n’ushaka ko muhungabana, abigeraho.”

I Karama bibutse Jenoside yakorewe Abatutsi, banashyingura imibiri ibiri yabonetse

Hari mu gikorwa cyo kwibuka ku nshuro ya 29 Jenoside yakorewe Abatutsi mu 1994, i Karama mu Karere ka Huye, tariki 21 Mata 2023, cyajyaniranye no gushyingura mu cyubahiro imibiri ibiri yabonetse.

Ni nyuma yo kugaragarizwa bimwe mu bibazo abarokotse Jenoside b’i Karama bafite, harimo n’icyo kuba hari abadafite aho kuba, abubakiwe kera na bo inzu zikaba zibavira, abandi zenda kugwa.

Yagize ati “Umwanya wo kwibuka ntukabe uwo kuganya, umuntu nafata ijambo ngo Nyakubahwa Minisitiri turabibutsa ko hari amazu, hari imanza hari iki. Turabizi. Mujye mwigirira icyizere, ubuyobozi bwanyu muhore mubukunda, kandi muzahore mukomeye iteka ryose.”

Mu barokotse Jenoside bakurikiye ijambo rye hari abavuga ko ibibazo baba bafite kandi babona, nta babageraho ari byo bibatera kuba baganya.

Janvière Mukagahunga w’i Maraba ati “Hari igihe usanga no mu buyobozi batazi neza uko tumerewe twebwe, hasi. Wenda n’izo nzu yavugaga zikaba zirimo izititaweho kandi byakabaye ngombwa. Kubera ko baza batoranya umuntu akagira impungenge, akavuga ati ahari nimbivugira hariya bizashoboka.”

Ku rundi ruhande ariko, Mukagahunga avuga ko n’ubwo akomwa mu nkokora n’abajya bamutera mu rugo bakamumenera ibirahure by’inzu, umwe muri bo akaba yarabihaniwe, undi ngo ufite ikibazo cyo mu mutwe akaba amureba nabi, bitamubuza kuba aharanira kwigira, cyane ko na Leta y’u Rwanda ibitaho.

Ati “Ntabwo dusabiriza, buri wese yirwanaho, akabona icyo kurya, akagira imibereho nk’iy’abandi. Rwose nta kibazo dufite, kuba baraturihiye amashuri y’abana birahagije, byaratunejeje, kandi baduha n’inkunga y’ingoboka, ukagenda ukayihingisha nk’ikivi cy’ibijumba.”

Florence Umutoni we atekereza ko abantu badakirira rimwe, bityo abakiyumvamo kuganya cyane bakaba bakwiye kwegerwa, bagafashwa.

Ati “Nkanjye nahoraga numva mfite igikomere cy’uko nta jambo rya nyuma rya mama numvise, kuko yishwe tutari kumwe. Ariko naje kwibuka ko nkiri umwana hari ikibazo namubajije, akambwira ngo nzagusubiza warakuze ugeze mu wa 6 w’amashuri abanza. Mubwira mu mutima ko cya kibazo nagisubijwe kandi ko nsigaye ndi umumama nka we, mfite n’abana”.

Yunzemo ati “Njyewe nabashije kugera ku gisubizo, ariko hari abatarakigeraho. Abo batarakigerho rero bakwiye kwegerwa, bagafashwa.”

Uwitwa Karanwa na we ati “Ntabwo twahera mu maganya. Tugomba guharanira kubaho byanga bikunda, kuko ni uburenganzira bwacu nk’Abanyarwanda.”

Bashavujwe n’uburyo abagore n’abana bishwe urw’agashinyaguro

Babitangaje tariki ya 20 Mata 2023, ubwo hibukwaga ku nshuro ya 29 Jenoside yakorewe Abatutsi by’umwihariko abagore n’abana kuko i Sovu hafite umwihariko w’uko ari bo bahiciwe gusa. Hanashyinguwe mu cyubahiro imibiri umunani yabonetse.

Ku musozi wa Sovu hari hahungiye Abatutsi bari baturutse i Sovu, Rubona, Nawe, Munyaga no mu bindi bice, bose bakaba bari abagore, abakobwa n’abana bizezwaga kurindirwa umutekano.

Mukasinafi Velonique yageze i Sovu avuye ku musozi wa Rutonde bamaze kwica abana b’abahungu n’abagabo, abagore babasaba gusubira mu ngo zabo, ariko bahageze basanga amazu yarashenywe ari amatongo ahasigaye.

Umuyobozi wa Serile witwaga Nsengiyumva Francisco ngo yabashyize ahantu mu nzu abaha amazi yo kunywa ndetse abazanira n’ibiribwa.

Icyakora ngo ntibahatinze kuko haje Interahamwe zibabwira ko batemerewe kuba aho hantu ko ahubwo impunzi zijya mu buyobozi cyangwa mu mashuri.

Ngo babashoreye babakubita babajyana mu mashuri abanza ya Sovu babakingirana mu cyumba kimwe ndetse babaha n’Interahamwe zibarinda.

Icyo cyumba ngo bakiriwemo banakiraramo ariko ngo bakajya baza bagakuramo abakobwa ndetse n’abagore bakabajyana mu kindi cyumba bakabafata ku ngufu barangiza bakabica ndetse ngo bacana n’urusenda kugira ngo rubababaze ubwarwo.

Hashyinguwe mu cyubahiro indi mibiri umunani yabonetse

Yagize ati “Barazaga bagafata abana b’abakobwa bato bakabajyana mu ishuri riri haruguru hariya bakabafata ku ngufu, ababyeyi babo ntacyo twari bukore byari agahinda gusa. Nyuma bacanye umuriro barashyidika maze bashyiramo insenda maze ziratuzengereza, umuntu akitsamura umwuka ukenda guhera.”

Ku itariki 18 Mata 1994 ngo nibwo Interahamwe zabanje kujya kwica i Mwulire hanyuma zigaruka mu masaha y’igicamunsi na bo zitangira kubica.

Ati “Batangiye kutwicira mu cyumba cy’ishuri hanyuma bageze aho batujyana hanze badushyira ku murongo, bagahera ku wa mbere batema kugeza bageze ku muntu wa nyuma. Jye kurokoka bakubise umwana nari mpetse nikubita hasi hanyuma banshyiraho abakobwa babiri babantemera hejuru bazi ko napfuye bigeze saa yine z’ijoro mbikura hejuru njya gushaka ahandi nihisha.”

Visi Perezida wa Sena, Domitille Mukabaramba wifatanyije na bo mu kwibuka, yahumurije abarokotse Jenoside yakorewe Abatutsi, avuga ko batazimye ahubwo bariho kandi bazakomeza kubaho, abasaba kudaheranwa n’agahinda ndetse anabizeza ko Igihugu kibahoza ku mutima.

Agaruka ku bugome abishe abagore n’abana bari bahungiye i Sovu babikoranye, yavuze ko ari ikimenyetso kidashidikanywaho cy’ubugome bwakorewe Abatutsi kugeza bavukijwe ubuzima bazira uko baremwe.

Yavuze ko nk’Igihugu Abanyarwanda bahisemo kuba umwe, asaba buri wese kwirinda icyagarura amacakubiri mu Banyarwanda.

Ati “Turasaba buri wese kwirinda impamvu iyo ari yo yose yagarura amacakubiri mu Banyarwanda, kwirinda ibikorwa ibyo ari byo byose bigamije gupfobya no guhakana Jenoside yakorewe Abatutsi, kwirinda ingengabitekerezo ya Jenoside n’ibyo igaragariramo byose.”

Yabasabye kandi kunyomoza abapfobya Jenoside yakorewe Abatutsi no gutanga amakuru ku bakwirakwiza ingengabitekerezo ya Jenoside mu buryo ubwo ari bwo bwose.

Yasabye abakuru kandi gusobanurira urubyiruko urwiga n’urutiga ukuri ku mateka ya Jenoside no kubagaragariza ukuri ku miyoborere myiza y’Igihugu.

Mu Karere ka Rwamagana hakorewe ubwicanyi bukabije kuko hari abishwe bakajugunywa mu biyaga nka Muhazi na Mugesera.

Urwibutso rwa Jenoside rwa Sovu ruruhukiyemo imibiri y’Abatutsi bishwe muri Jenoside yakorewe Abatutsi 688 hakaba hiyongereyeho indi mibiri umunani yabonetse vuba na yo yashyinguwe mu cyubahiro.

Abiganjemo urubyiruko baturutse mu ishuri rikuru ry’ubuforomo n’ububyaza rya Ruli, ibitaro by’Akarere ka Gakenke, inzego z’ibanze, abikorera n’abanyamadini bo muri ako karere, basuye urwibutso rwa Jenoside yakorewe abatutsi rwa Kigali ruri ku Gisozi, ku wa 19 Mata 2023, basobanurirwa uko Jenoside yateguwe ikanashyirwa mu bikorwa.

Ndayishimiye Murara Samuel w’imyaka 22, agira ati “Ni ku nshuro ya mbere nsuye urwibutso. Nyuma yo gusobanurirwa amateka ya Jenoside yakorewe Abatutsi, nsanze byari ngombwa kuza hano. Ubu ngiye gushyira imbaraga mu gukoresha imbuga nkoranyambaga, mu rwanya abahakana bakanapfobya Jenoside”.

Mwizerwa Yvonne na we ati “Gusura inzibutso zibitse amateka ya Jenoside yakorewe Abatutsi ni ingenzi, kuko tuhungukira byinshi nkatwe twavutse nyuma yayo. Ubu menye uko Jenoside yateguwe ndetse ikanashyirwa mu bikorwa, bizatuma tubasha guhangana n’ingengabitekerezo yayo”.

Abayobozi batandukanye bari kumwe n’urwo rubyiruko muri icyo gikorwa, bavuga ko gusura uru rwibutso byari bikenewe, nk’uko bisobanurwa na Padiri Innocent Dushimiyimana, umuyobozi w’ishuri rikuru ry’ubuforoma n’ububyaza rya Ruli.

Ati “Urubyiruko turarusaba kugira uruhare mu kurwanya abahembera ingengabitekerezo ya Jenoside bakoresheje imbuga nkoranyambaga. Ku ishuri baba bafite ibikenewe, ku buryo basubiza abagoreka amateka ya Jenoside, bakabwira ay’ukuri, gusura urwibutso nk’uru rero ni ingenzi”.

Umuyobozi w’akarere ka Gakenke wungirije ushinzwe imibereho myiza y’abaturage, Uwamahoro Marie Thérèse, yasabye urwo rubyiruko rwabashije gusura urwibutso rwa Kigali, gusangiza abandi ibyo bungutse.

Yagize ati “ABagize amahirwe yo gusura uru rwibutso, bakamenya amateka ya Jenoside yakorewe Abatutsi mu 1994, turabasaba kuyasangiza bagenzi babo kugira ngo na bo bagire ubwo bumenyi, hanyuma bafatanye guhangana n’abapfobya Jenoside bakanayihakana, babaha amakuru y’ukuri”.

Aba biganjemo urubyiruko rwavutse nyuma ya Jenoside baturutse mu Karere ka Gakenke, banasuye Ingoro Ndangamateka y’urugamba rwo kubohora u Rwanda, basobanurirwa uko urwo rugamba rwagenze kugeza ubwo Ingabo zahoze ari iza RPA zirutsinze, zihagarika Jenoside.

Umwamikazi Rosalie Gicanda yishwe muri Jenoside yakorewe Abatutsi mu 1994

Tariki 20 Mata 1994 wari umunsi w’akaga ku Batutsi bari batuye hirya no hino mu yahoze ari Perefegitura ya Butare, ubu ni mu Ntara y’Amajyepfo. Kuri iyo tariki nibwo Jenoside yatangijwe ku mugaragaro muri ibyo bice.

Mu Kwibuka Jenoside yakorewe Abatutsi, ku itariki ya 20 Mata i Huye hibukwa n’ Umwamikazi Rosalie Gicanda.

Tariki 19 Mata 1994 nibwo Théodore Sindikubwabo wari Perezida wa Guverinoma yashyize mu bikorwa Jenoside, yageze mu mujyi wa Butare, akoresha inama abaturage maze ashishikariza Abahutu kwica Abatutsi.

Rosalie Gicanda na Mutara III Rudahigwa

Umwamikazi Rosalie Gicanda yishwe ku munsi wakurikiyeho, tariki 20 Mata 1994. Kwica Umwamikazi Rosalie Gicanda hamwe n’abo babanaga byabaye nk’intangiriro y’ubwicanyi mu buryo bugaragara kandi bukomeye mu mujyi wa Butare, kuko bukeye bw’uko yishwe, ku itariki ya 21/4/1994, aribwo abantu benshi batangiye kwicwa.

Umwamikazi Rosalie Gicanda yishwe ku itegeko rya Kapiteni Ildephonse Nizeyimana wari mu kigo cya ESO (École des Sous-Officiers).

Muri Jenoside yakorewe Abatutsi, Kapiteni Nizeyimana yafatanyije n’abandi basirikari bari mu bwicanyi nka Lt Colonel Muvunyi Tharcisse n’abasirikari bo mu Kigo cya gisirikari cya Ngoma cyayoborwaga na Liyetona Ildephonse Hategekimana na Jandarumuri yayoborwaga na Major Cyriaque Habyarabatuma ndetse n’Interahamwe.

Ubwo Kapiteni Nizeyimana yategekaga abasirikari kwica umwamikazi Rosalie Gicanda, mu baje mu rugo rw’Umwamikazi Rosalie Gicanda rwari hafi y’ibiro bya Komini Ngoma harimo Lieutenant Bizimana bitaga ’Rwatsi’, Lieutenant Gakwerere, Corporal Aloys Mazimpaka, hamwe na Dr. Kageruka.

Mu rugo bahasanze abandi bahigwaga harimo Jean Damascène Paris, Marie Gasibirege, Aurelie Mukaremera, Callixte Kayigamba na Alphonse Sayidiya. Harimo kandi n’uwitwa Uzamukunda Grace.

Uyu Uzamukunda Grace yararashwe ariko ntiyapfa, yaje kurokoka apfa nyuma ya Jenoside azize urupfu rusanzwe, akaba yari umukobwa wa Jean Damascene Paris, akaba ari na we watanze amakuru ya nyayo y’uburyo Umwamikazi Rosalie Gicanda n’abo bari kumwe bishwe.

Bisabwe n’umupadiri, Umwamikazi Gicanda yashyinguwe mu rugo rw’aho yari yaratujwe, ariko kuri ubu umubiri we wimuriwe i Mwima mu Karere ka Nyanza, ari na ho Umwami Rudahigwa na we yatabarijwe.

Umwamikazi Rosalie Gicanda abantu benshi bamwibukira ku mutima mwiza ndetse no gukunda abantu, aho buri wese wamusuraga yamwakirizaga amata meza y’inka yari yoroye, bakanamwibuka nk’umukirisitu kandi nk’umubyeyi wabakiranaga urugwiro.

Bavuga ko urugamba rwo kwirwanaho rwamaze iminsi 10 ruyobowe na Karenzi Guido afashijwe n’umukobwa witwaga Kirabirwa, hakoreshejwe amabuye n’izindi ntwaro za gakondo.

Mu barokokeye Jenoside i Mwulire mu Karere ka Rwamagana, harimo Egidia Mukarubuga uvuga ko ababyeyi n’abakobwa bari bashinzwe gushaka no kwegeranya amabuye yo kurwanisha, abagabo n’abasore bakajya imbere ku rugamba.

Avuga ko bari barishyize hamwe bashinga inkambi yo kwirwanaho, ku buryo ngo Interahamwe zari zamaze gutsindwa iyo hataza Abajepe n’izari ingabo z’Igihugu (Ex FAR).

Abajepe ngo bamaze iminsi baza kubica, babanza kubarasa ariko nyuma yaho batangira kujya bakoresha imihoro kugeza ubwo bishe abarenga ibihumbi 15.

Mukarubuga na we ngo bamutemye inshuro ebyiri aryama mu mirambo, agiye kuhapfira injangwe iraza itangira kumurigata ibisebe ikarya ahaboze, bituma ububabare bushira abasha kweguka aragenda.

Mukarubuga yahaye ubuhamya abayobozi n’imbaga y’abaturage bagiye kwibukira i Mwulire mu Karere ka Rwamagana kuri uyu wa Kabiri tariki 18 Mata 2023.

Mukarubuga ati "Abajepe Baratemye, baratema kugeza ubwo babonye ko bashoje igikorwa, nanjye mba aho mu mirambo, ubwo hari ku nshuro ya kabiri bari bantemye, umutwe barawucokacotse".

Ati "Ngiye kubona mbona agapusi karaje, karenga za ntumbi zose kansanga aho nari ndyamye, ndavuga nti ’iyi pusi yo ije kwenda iki! Iraza ijya muri bya bisebe byanjye irabirya, irabyoza, ibihu byose uko byumiyemo n’amaraso ipusi ibikuraho, hanyuma ndasinzira".

Mukarubuga warokokeye i Mwulire

Avuga ko yaje gukanguka, arambuye akaboko yumva kararambutse, agoroye ijosi bari batemaguye akumva riranyeganyeze kubera ko ibyateraga amasazi n’uburibwe ya njangwe ngo yari yabikuyemo.

Mukarubuga avuga ko yaje kubyuka aho mu mirambo biremera ndetse agarura ubwenge, agenda yerekeza iwabo hitwa i Nawe, ariko ageze mu Kamiranzovu ngo ahura n’uwamwiciye se witwa Kanyamusoro, amubwira ko nta muntu wasigaye w’iwabo.

Kanyamusoro ngo yanze kumwica ahubwo amugira inama yo kujya i Rwamagana kuko ngo yari yumvise ko Inkotanyi zahageze, akigenda ahura n’abandi barokotse Jenoside baramujyana ahitira kwa muganga.

Urwibutso rwa Jenoside yakorewe Abatutsi mu 1994 rw’i Mwulire ubu rushyinguwemo imibiri 26,958, bishwe baturutse mu byari amakomini ya Bicumbi, Gikoro na Rutonde.

Kugeza ubu ariko haracyaboneka abagiye bajugunywa ku misozi itandukanye, barimo abashyinguwe mu cyubahiro ku wa Kabiri bagera kuri 28, harimo imiryango ya Rwakibibi Pascal.

Rwakibibi avuga ko kuba abo babyeyi n’abavandimwe barakoresheje intwaro gakondo, na we ngo bimwibutsa ko abarokotse Jenoside bagomba kurangwa n’umuco gakondo w’Ubumwe bw’Abanyarwanda.

Rwakibibi Pascal wari uhagarariye imiryango yashyinguye ababo mu cyubahiro

Ati "Intwaro gakondo mbona ubu ntabwo ari amabuye cyangwa ntampongano nk’uko bariya babigenje, ahubwo ni umuco. Mu muco nyarwanda nta wicaga undi, ahubwo habagaho gufashanya tukagira ubumwe, Umunyarwanda ni nk’undi".

Minisitiri w’Ikoranabuhanga na Inovasiyo, Paula Ingabire wari mu Bayobozi bagiye kwibukira i Mwulire, avuga ko ubuhamya bwa Mukarubuga bwerekana ubutwari mu barokotse Jenoside yakorewe Abatutsi mu 1994.

Minisitiri Paula Ingabire

Ibi yabitangaje kuri uyu wa mbere tariki ya 17 Mata 2023, ubwo hibukwaga ku nshuro ya 29 Jenoside yakorewe Abatutsi Mata 1994, bashyinguye ku rwibutso rwa Jenoside rwa Ruramira.

Kwibuka Abatutsi biciwe I Ruramira, byabanjirijwe n’urugendo rwo kwibuka rwahereye ku cyuzi cya Ruramira cyajugunywemo Abatutsi mu gihe cya Jenoside kugera ku rwibutso hakurikiraho ijoro ryo kwibuka.

Kuri uyu wa mbere tariki ya 17 Mata 2023, uyu muhango wabanjirijwe no gushyira indabo ku mva zishyinguwemo imibiri y’Abatutsi bishwe muri Jenoside yakorewe Abatutsi Mata 1994 no kubunamira.

Umuyobozi w’Akarere ka Kayonza, Nyemazi John Bosco, yavuze ko Abatutsi ba Ruramira bishwe n’Interahamwe ziturutse mu bice bitandukanke nka, Gasetsa mu ka Karere Ngoma zari ziyobowe na Col Rwagafirita.

By’umwihariko yagarutse ku Batutsi benshi bagiye kwihisha hafi n’icyuzi cya Ruramira cyifashishwaga mu kuhira imyaka, aho yavuze ko bagiye bicwa Interahamwe zikabajugunya muri iki cyuzi ndetse abandi zikabajugunyamo ari bazima.

Uretse icyuzi cya Ruramira, ngo hari n’abandi Batutsi bagera kuri 250 bajugunywe muri Baraje ya Nkumba.

Yashimye ingabo zari iza RPA zarokoye Abatutsi bari basumbirijwe n’umwanzi, ndetse anashima Politiki nziza zashyizweho na Leta y’ubumwe.

Ibi yabitangarije mu gikorwa cyo Kwibuka Abatutsi hafi ibihumbi umunani bashyingiye mu rwibutso rwa Jenoside rwa Nyange, aho yagaragaje ko ibyateye Jenoside bitavuzwe ngo abantu babimenye babyumve, byarushaho gukomerera mu buryo bwo kuyirwanya hamwe n’Ingengabitekerezo yayo.

Minisitiri Dr. Bizimana avuga ko ashingiye ku buhamya bw’uwarokokeye Jenoside i Nyange bwamaze iminota itageze no kuri 15, kandi akabutanga asa n’utagaragaza neza amakuru aba akenewe mu gutanga ubuhamya, bigaragara ko igitsina gabo kigorwa no gutanga ubuhamya, nyamara baba bafite amakuru ibyo bikaba bituma hari ubuhamya butamenyekana ngo bishingirweho bigaragaza ukuri kuri Jenoside yakorewe Abatutsi.

Avuga ko Kwibukira i Nyange bifite amateka yihariye kuko ari ho habaye amahano akomeye ku Isi ubwo uwari Padiri mukuru wa Paruwasi ya Nyange Seromba yafataga umwanzuro wo gusenyera Kiliziya ku Batutsi bari bahahungiye, ibyo bikaba bikwiye gusobanuka neza kuko yanahamwe n’ibyaha bya Jenoside, agahanishwa gufungwa burundu.

Dr. Bizimana asobanura ko kuba hari abakorewe Jenoside mu myaka ya 1960, ariko imiryango yabo ikaba itarahawe amahirwe yo kubibuka, ubu ari igihe cyo gusubiza agaciro abishwe icyo gihe, kuko ubundi Leta yabihishiraga, gusa bikaba bigaragazwa na za raporo zigenda zigaragara zashingiweho hamenyekana amakuru ku bishwe icyo gihe.

Agira ati, "Impamvu kwerura bigora abantu, ni uko benshi bakuze bigishwa urwango kandi nta kundi bagomba kuba bameze kuko bakuriye muri ayo mateka".

Minisitiri Bizimana avuga ko Perefegitura ya Kibuye yakubititse kubera irondakarere n’irondabwoko ku buryo itashyizwemo ibikorwa by’iterambere n’amashuri kuko ari Perefegitura yari ifite Abatutsi benshi.

Ageza ikiganiro ku bitabiriye kwibuka ku rwibutso rwa Jenoside rwa Nyange, Minisitiri Dr. Bizimana yagaragaje ko mu mateka y’Isi ari bwo byabayeho ko padiri mukuru asenyera kiliziya ku bantu bari bamuhungiyeho, ibyo akaba abivoma mu mateka ye kuva mu 1970, aho yatotezaga Abatutsi.

Avuga ko Padiri Seromba wayoboraga Paruwasi Nyange yakatiwe gufungwa imyaka 15, ahamijwe ibyaha byibasiye inyoko muntu, kuko abacamanza bari basanze nta byaha bya Jenoside yakoze, cyakora mu bujurire bagaragaza neza uruhare rwe akatirwa igifungo cya burundu, ibyo bikaba bijyana n’amakuru yagendaga amutangwaho mu gushaka ibimenyetso nyabyo.

Avuga ko yakomeje kwiyita umusaseridoti kugeza igihe azapfira, nyamara ngo ntibikwiye ko habaho umusaseridoti w’umwicanyi, kabone n’ubwo Leta y’u Rwanda yemera ko abakoze ibyaha bya Jenoside babibabarirwa nk’amahitamo adasanzwe.

Agira ati, "Abagifite imitima ikinangiye nibo bivuna kuko Igihugu cyo kizakomeza kuguma ari cyiza kandi kibafitiye imbabazi".

Asaba ababyeyi bafite abantu bakoze Jenoside yakorewe Abatutsi, kubigisha bakaganira ku kuvugisha ukuri no kwatura bakabohoka imitima yabo Kandi gukomeza kwinginga abakoze Jenoside gutanga amakuru bigahagarara, kuko abanga kuyatanga bagamije gukomeza gukomeretsa abarokotse Jenoside.

Agira ati, "Abadashaka gutanga amakuru nimubareke ahubwo dukore ikiriyo cy’abacu, dukomeze tubahe icyubahiro, ahubwo dukomeze Kwibuka, aho turi hose ntitwibagirwe kuko nicyo gituma turwanya bariya bicanyi banze kuvugisha ukuri".

Asobanura ko kuvugisha ukuri ari ukurinda abana kuba bazakora nk’ibyo ababyeyi babo bakoze, kuko iyo abana bahishwe ukuri kuri Jenoside yakorewe Abatutsi, bakurana urwikekwe muri bagenzi babo.

Habanje urugendo rwo kwibuka rwahereye ahiswe Gorogota kubera kuhicira abantu benshi

Babivuze ku Cyumweru tariki ya 16 Mata 2023, mu muhango wo kwibuka ku nshuro ya 29 Jenoside yakorewe Abatutsi, by’umwihariko abiciwe i Nyakarambi.

Ni igikorwa cyabanjirijwe n’urugendo ku maguru kuva ahari hariswe Gorogota kubera kuhicira abantu benshi, kugera ku rwibutso hakurikiraho umugoroba wo kwibuka.

Urwibutso rwa Jenoside rwa Nyakarambi ruruhukiyemo imibiri y’Abatutsi bishwe muri Jenoside irenga 12,000, yakuwe mu Mirenge ya Kirehe, Kigina, Gatore, Gahara, Musaza, Kigarama, Nyamugari na Mahama.

Mu buhamya bwatanzwe n’umwe mu barokotse Jenoside utuye ahitwa Nyabigega, yavuze ko mbere ya Jenoside ise yishwe n’umuturanyi, amujijishe ko abana b’ihene ze bagiye mu rutoki rwe ndetse akaba ari nabwo bwa mbere yumvise ijambo inyenzi, rivuzwe n’uwo muturanyi wishe ise.

Mu gihe cya Jenoside abicanyi bishe umuryango we hafi ya wose, hanyuma we afatwa n’umusirikare wamuhohoteye inshuro nyinshi amufatanyije n’interahamwe.

Jenoside yakorewe Abatutsi ngo niyo yakoranywe ubugome ndengakamere kurusha izindi

Uyu musirikare ngo yamuhunganye mu Gihugu cya Tanzaniya akomeza kumuhohotera, igihe kigeze ariko abasha kumucika yimukira mu yindi nkambi nabwo naho ahohoterwa n’interahamwe kugeza agarutse mu Rwanda.

Kugaruka mu Rwanda ngo yazanywe n’umugabo bari baturanye iwabo amucikisha kimwe n’abandi bana b’Abatutsi, bari babashije kurokoka ariko nabo batari bamerewe neza mu nkambi kuko naho interahamwe zakomeje kwica.

Yagarutse afite inda ariko atabizi, ku bw’amahirwe abyaramo umwana n’ubu akaba amufite.

Yavuze ko abagize uruhare mu kumuhohotera kimwe n’abishe Abatutsi bakwiye kujya bakorwa n’isoni, kuko icyobo babacukuriye Inkotanyi zabatabaye batarakigeramo.

Ati “Ariko nabo bajye bakorwa n’isoni kubona umuntu yaraguciriye icyobo akanya nk’aka ukabona yicaye imbere yawe. Ubundi baravuga ngo niba umwanzi wawe yagukoreye ikintu kibi ukagira ibyiza, bimucishe imbere abona ko icyo yakoze ntacyo kimaze.”

Akomeza agira ati “Mbere yo gutumira inshuti yawe tumira wa mwanzi abone ko icyo yapanze kidahari. Icyobo baducukuriye Inkotanyi zaturokoye tutarakigeramo, ntabwo tuzasubira inyuma ahubwo turareba imbere.”

Bifuje ko urwibutso rwa Jenoside rwa Nyakarambi rwahabwa umukozi uhoraho wakira abarugana

Uwavuze mu izina ry’imiryango ifite ababo bashyinguwe mu rwibutso rwa Jenoside rwa Nyakarambi, Mukandengo Claudine, yavuze ko n’ubu bacyibaza icyo bazize kuko uko bavutse bataguhisemo.

Ikindi ngo nyuma ya Jenoside ntibashoboraga kwihorera kuko igisubizo cy’amahano bakorewe, cyatanzwe n’Inkotanyi kandi cyubatse Igihugu.

Yagize ati “Kwihorera ntabwo aricyo cyari kuba igisubizo, ariko igisubizo cyatanzwe n’abaduhaye ubuzima kandi kirimo kubaka u Rwanda, ari nabwo butumwa duha urubyiruko n’abadukomokaho.”

Umuyobozi wa Ibuka mu Karere ka Kirehe, Nduwimana Bonaventure, yashimye Leta kuba yarabahaye umwanya wo kwibuka ababyeyi babo, abavandimwe n’inshuti kuko bituma babatekerezaho kandi bigakomeza n’imitima yabo.

Yifuje ko urwibutso rwa Nyakarambi rwuzuye vuba rwashyirwamo igice cyagenewe amateka ya Jenoside, ndetse n’umukozi uhoraho uzajya wakira abarugana.

Senateri Bideri John Bonds, yasabye urubyiruko guhangana n’ingengabitekerezo ya Jenoside, no kwima amatwi abashaka kubabibamo ikintu cyose cyasenya ubumwe bw’Abanyarwanda.

Na we yunze mu ry’umuyobozi wa Ibuka, asaba ko amateka ya Jenoside yakorewe i Kirehe yakusanywa vuba, cyane ubuhamya kuko ababufite bashobora kuva mu buzima batabutanze, bityo amateka ya Jenoside ntaboneke yose.

Musabeyezu avuga ko iyo babonye Inkotanyi bibuka impuhwe zabagiriye

Yabigarutseho ku wa Gatandatu tariki ya 15 Mata 2023, mu muhango wo kwibuka ku nshuro ya 29 Jenoside yakorewe Abatutsi muri Mata 1994, by’umwihariko abiciwe ku biro by’icyahoze ari Komini Muhazi, Umurenge wa Gishari w’ubu. Muri uyu muhango hanashyinguwe mu cyubahiro imibiri itatu iherutse kuboneka.

Musabyeyezu avuga ko tariki ya 15 Mata 1994, saa munani z’amanywa aribwo Abatutsi bari bahungiye ku biro bya Komini Muhazi, batangiye kuraswa n’abasirikare ndetse n’abajandarume, nyuma haza igitero cy’interahamwe zikoresha intwaro gakondo mu guhuhura abakiri bazima.

Avuga ko n’ubwo abakoze Jenoside bangije ukwezi kwa Mata bakamena amaraso, bashimira ubuyobozi bwiza bwabagaruriye icyizere, uku kwezi kongera kuba Mata.

Avuga ko iyo hatabaho Inkotanyi nta Mututsi wari gusigara, kuko abicanyi bari baragambiriye kubarimbura.

Yagize ati “Twarokowe n’Inkotanyi kandi ziracyahari, iyo tuzibona twibuka za mpuhwe na bwa butwari zatweretse.”

Umuyobozi w’Akarere ka Rwamagana, Mbonyumuvunyi Radjab, avuga ko Kwibuka Jenoside yakorewe Abatutsi ari inshingano ya buri wese, kugira ngo akuremo imbaraga zo kongera kwiyubaka no kudaheranwa n’agahinda.

Yashimiye Inkotanyi zitanze zitizigama, ziyobowe na Nyakubahwa Paul Kagame zihagarika Jenoside, zikanarokora Abatutsi zasanze barimo kwicwa.

Meya Mbonyumuvunyi yizeje ko bazakomeza gufasha mu iterambere ry’abacitse ku icumu rya Jenoside

Yahumurije abarokotse anabizeza ko Jenoside itazongera kubaho mu Rwanda, kuko Inkotanyi zabarokoye zigihari.

Ati “Abarokotse Jenoside muhumure kuko Jenoside ntizongera ukundi, haba mu Rwanda no mu mahanga. Za Nkotanyi zabarokoye ziracyahari kandi n’ubu dufite Ubuyobozi bwiza. Nk’ubuyobozi tuzakomeza kwita ku barokotse Jenoside yakorewe Abatutsi kandi ntituzatezuka.”

Umurenge wa Gishari ufite Inzibutso za Jenoside yakorewe Abatutsi ebyiri, urwa Ruhunda ruruhukiyemo imibiri 5,081 n’urwa Gishari ruruhukiyemo imibiri 1,194.

Abaturage bakaba basabwe ko uwaba azi ahakiri imibiri y’abazize Jenoside, yatanga amakuru kugira ngo nayo ishyingurwe mu cyubahiro.

Abatutsi biciwe muri uru rusengero babarirwa hagati ya 250 na 500 ariko nta mubiri n’umwe wari waboneka ngo ushyingurwe mu cyubahiro

Umuyobozi wa IBUKA mu Karere ka Kayonza, Ndindabahizi Didas, avuga ko Abatutsi bahungiye i Midiho bari hagati ya 250 na 500, bakirwa na Pasiteri Gashumba, wayoboraga iyi Paruwasi.

Gashumba ngo yagerageje kubitaho akabaha icyayi ndetse n’amazi. Tariki ya 11 Mata 1994 nibwo ngo Interahamwe ziyobowe n’umujandarume witwaga Nsengiyumva waje afite imbunda na gerenade, batangira kwica Abatutsi bari bahahungiye.

Bigeze ku mugoroba ngo haje imodoka y’umucuruzi mu mujyi wa Kayonza witwa Kanyangoga Thomas, hifashishijwe Interahamwe, imibiri yose ngo yarapakiwe ijyanwa ahantu n’ubu hataramenyekana.

Avuga ko abakekwaho kwica Abatutsi bari bahungiye i Midiho, ngo bari mu byiciro bitatu.

Ngo hari abagabye igitero, abakekwaho kuzimiza imibiri ndetse n’abandi bakekwaho kwanga gutanga amakuru y’aho imibiri yajyanywe.

Aba bose aho bafungiye ngo baganirijwe kenshi ariko bose barinangira ku buryo imiryango y’abahaburiye ababo ikiri mu gahinda ko kutabona ababo ngo bashyingurwe mu cyubahiro.

Ati “Pasiteri Gashumba na Kanyangoga n’undi mukecuru Theresie twabasanze kuri gereza na Komisiyo y’Ubumwe n’Ubwiyunge, barigishwa ariko buri wese twamubaza akaduhakanira ngo ntazi iby’iyo mibiri. Kanyangoga we rwose yaranadukubise ngo ntitukamuteshe umwanya tumubaza ibintu bidafite agaciro.”

Kanyangoga ngo avuga ko adakwiye kubazwa ibintu biciriritse kuko ngo we yari ku rwego rwo hejuru.

Nyamara amakuru yatanzwe muri Gacaca agaragaza ko Pasiteri Gashumba yakabaye azi aho iyi mibiri iherereye kuko yari atuye kuri Paruwasi yayoboraga kimwe na Kanyangoga watanze imodoka yo kuyipakira.

Umukecuru Theresie na we ngo yari atuye hafi cyane n’aho abantu biciwe ariko na we akaba yarinangiye yaranze kuvuga aho akeka iyo mibiri yajyanywe.

Undi wakabaye abazwa iby’iyi mibiri ngo ni umushoferi wari utwaye iyi modoka witwa Karangwa bikekwa ko atuye ku Rusumo kuko atigeze anafungwa, gusa abatanze amakuru muri Gacaca bakaba bemeza ko ari we wayitwaye.

Aya makuru ngo yatanzwe muri Gacaca n’umwe mu bapakiye iyo mibiri abitegetswe n’Interahamwe ngo abafashe ariko na we akaba ataramenye aho yajyanywe.

Ndindabahizi Didas akeka ko kuba abo bantu bakomeje kwinangira babiterwa n’amafaranga bahawe ngo bigirwe ibanga bityo n’abafunzwe bazagirwe abere.

Agira ati “Amakuru twumva ariko tudafitiye igihamya ni uko aba bantu bose binangiye kubera amafaranga kuko ngo abafite aho bahuriye n’iyo dosiye arabahangayikisha cyane bagahitamo guceceka batinya kugwa muri gereza.”

Mukeshimana Vestine, umwe mu barokokeye ku rusengero rwa EAR Nyagatovu, i Midiho, avuga ko Interahamwe zabanje gukoresha gerenade nyuma bakoresha intwaro gakondo mu kubica.

Agira ati “Igitero cyaturutse hepfo hariya twari mu rusengero banagamo gerenade nyuma batangira gutemagura abantu bakiri bazima. Igitero cyaragiye nyuma y’akanya gato kiragaruka batemagura abari batarashiramo umwuka. Jye nari nihishe mu musarane wa Pasiteri.”

Abafite ababo biciwe i Midiho baracyafite agahinda ko kutabona imibiri y’ababo ngo bashyingurwe mu cyubahiro

Rutayisire Jean Louis na we warokokeye Jenoside kuri uru rusengero avuga ko ubwicanyi bwatangiye Pasiteri ahari kandi bwagizwemo uruhare rukomeye n’umucuruzi Kanyangoga Thomas, Konseye Kinyogote, umujandarume Nsengiyumva n’izindi nterahamwe zari ziturutse i Kiyenzi.

Ati “Twinjiye mu rusengero twese, sinzi uwavuganye na Pasiteri, Pasiteri asubira mu rugo nibwo haje umusore w’i Kiyenzi, amfatiraho icumu ngo dore iki gisore cyaje kwihisha ahangaha, anteye icumu ndarifata mubaza icyo ampora.”

Bifuza ko bagaragarizwa imibiri y’ababo igashyingurwa mu cyubahiro kuko byabaruhura imitima.

Bati “Twifuza ko Leta yashyiramo imbaraga nyinshi kuko ababishe bamwe bari batuye hano hafi kandi barahari, imirima barayihinga hari n’igihe dukeka ko aho bahinga ari ho babashyize. Iyo utekereje ko hari abawe utarashyingura bitera agahinda, bishengura umutima.”

Ubwo yari mu muhango wo kwibuka ku nshuro ya 29 Jenoside yakorewe Abatutsi mu Karere ka Kirehe i Nyarubuye, Umunyamabanga wa Leta muri Minisiteri y’Ubutegetsi bw’Igihugu, Ingabire Assumpta, yasabye abafite amakuru y’ahaba haherereye imibiri y’Abatutsi bishwe muri Jenoside kuhagaragaza byanashoboka agakoresha urupapuro rutazwi uwarwanditse (tract).

Yagize ati “Rwose uba afite amakuru nadufashe tubone imibiri itarashyingurwa mu cyubahiro. Niba utinya ko bamenya ko ari wowe, biremewe gukoresha tract ukavuga uti hariya hari imibiri, twajyayo tukayikurayo tukayishyingura mu cyubahiro.”

Kugeza ubu aha i Midiho nta mubiri n’umwe uragaragara mu bahiciwe ngo ushyingurwe uretse urukuta ntangabutumwa rwahashyizwe ruriho amazina 119 bamenyekanye bahiciwe mu gihe bivugwa ko abahiciwe bari hagati ya 250 na 500 bari bahahungiye.

Bibutse abiciwe i SAYI mu Murenge wa Munyiginya mu Karere ka Rwamagana

Yabitangaje ku wa Gatanu tariki ya 14 Mata 2023, mu muhango wo kwibuka ku nshuro ya 29 Jenoside yakorewe Abatutsi, by’umwihariko abari bahungiye kuri Sitasiyo y’amashanyarazi y’ahazwi nko kuri SAYI mu Murenge wa Munyiginya.

Uwatanze ubuhamya warokokeye i SAYI, Zaninka Jacqueline, yavuze ko hagati ya tariki ya 7-10 Mata 1994, Abatutsi benshi bahungiye kuri iyi Sitasiyo y’amashanyarazi nyuma y’uko Bisengimana Paul wayoboraga Komini Gikoro atangije irimburwa ry’Abatutsi bari batuye muri Komini yayoboraga.

Ku mugoroba wo ku wa 10 Mata 1994 nibwo Abajandarume barindaga iyi sitasiyo ya SAYI bahavuye babererekera Interahamwe, zirahagota zica Abatutsi bari bahahungiye barenga 1,000, zirabica ku buryo harokokeye Abatutsi mbarwa.

Abahungiye kuri sitasiyo y’amashanyarazi bizeye kuharindirwa banenga Abajandarume babasize mu maboko y’Interahamwe

Avuga ko batunguwe no kubona abantu bari baturanye basanzwe baziranye, basangira bagasabana ari bo babishe ngo babaziza Habyarimana nyamara yarapfuye batamuzi.

Ati “Jenoside yakorewe Abatutsi yarateguwe kuko ntiwambwira ukuntu nazira Habyarimana ntari nzi, jye nabaga ndagiye inka z’iwacu, sinari muzi yewe ntaranamubona mu maso, usibye kumwumva kuri Radio gusa.”

Interahamwe zimaze kwica ababyeyi ba Zaninka ngo zamushyingiye ku ngufu uwitwa Higiro wari Interahamwe. Amugejeje iwe yasubiye mu bitero, Zaninka ahita atoroka, ku bw’amahirwe ahita ahura n’Inkotanyi zimurokora gutyo.

Umuyobozi w’Akarere ka Rwamagana, Mbonyumuvunyi Radjab, yunamiye abiciwe muri aka gace

Umuyobozi w’Akarere ka Rwamagana, Mbonyumuvunyi Radjab, avuga ko Umurenge wa Munyiginya ugizwe n’igice cyari muri Komini Gikoro n’icyari muri Komini Muhazi.

Mbere ya Jenoside yakorewe Abatutsi, buri muyobozi ngo yabaga yarakoze urutonde rw’Abatutsi bagombaga kwicwa ku buryo Interahamwe zagendanaga urwo rutonde kugira ngo barebe ko abaruriho bose bamaze kwicwa, uwo batarica bakamuhiga.

Avuga ko kwibuka ari inshingano ya buri Munyarwanda kuko ari uguha agaciro inzirakarengane z’Abatutsi zishwe urupfu rubi rw’agashinyaguro bazizwa uko baremwe.

Yagize ati “Twibuka kugira ngo duhe icyubahiro abacu bishwe muri Jenoside yakorewe Abatutsi kandi tubunamire kuko tutagize umwanya wo kubaririra, tukanigisha abato amateka kugira ngo bayakuremo inyigisho n’imbaraga zo kurwanya ikibi.”

Yashimiye Ingabo za RPA/FPR Inkotanyi zahagaritse Jenoside yakorewe Abatutsi, zikarokora abicwaga, zikabohora Igihugu ndetse n’ubu zikaba ziri gutanga amahoro haba mu Rwanda no mu mahanga.

Yahumurije abarokotse Jenoside yakorewe Abatutsi, abasaba gukomera kuko bafite ubuyobozi bwiza, abasaba gukora icyateza imbere ubuzima n’imibereho myiza yabo.

Inzibutso 11 ziri mu Karere ka Rwamagana ziruhukiyemo imibiri y’Abatutsi bishwe muri Jenoside 83,795.

Bamwe mu Barundi bavugwaho kugira uruhare muri Jenoside yakorewe Abatutsi ni abigaga muri Kaminuza ya Mudende yakoreraga mu Karere ka Rubavu.

Mbarushimana Gérard

Mbarushimana Gérard ukuriye Ibuka mu Karere ka Rubavu, avuga ko amazina y’abanyeshuri b’Abarundi bagize uruhare mu iyicwa ry’Abatutsi ahari kuko hari abo biganye kandi babazi.

Agira ati "Turizera ko hazaba ubufatanye hagati y’ibihugu byombi, abagize uruhare mu iyicwa ry’Abatutsi muri Kaminuza ya Mudende bagakurikiranwa. Amazina yabo arazwi kuko hari abo biganye, kandi turizera ko u Burundi nk’Igihugu kiri mu muryango wa Afurika y’Iburasirazuba (EAC) kizabakurikirana."

Mbarushimana yabitangaje mu gusoza icyumweru cyo kwibuka ku nshuro ya 29 Jenoside yakorewe Abatutsi mu Karere ka Rubavu ahari abanyeshuri benshi b’Abatutsi bigaga muri Kaminuza ya Mudende bishwe.

Mbarushimana avuga ko abanyeshuri b’Abarundi bagize uruhare mu kwica Abatutsi mu Rwanda, bavugaga ko bahorera Perezida Ndadaye wishwe mu 1993.

Mbarushimana ati "Birababaje kuba hari abanyeshuri b’Abarundi bahungiye mu Rwanda, bakagira uruhare mu kwica Abatutsi ngo barahorera Perezida wabo wiciwe mu gihugu cy’u Burundi."

Nubwo Kaminuza ya Mudende yari Kaminuza y’Itorero ry’Abadiventisiti mu Karere k’Ibiyaga Bigari, hari hariho amabwiriza yo kutemerera Abatutsi kwiga ari benshi.

Prof Ruzibiza Stanislas wari Umuyobozi muri iyi Kaminuza kugera mu 1990, avuga ko yihanangirijwe n’abanyeshuri b’Abahutu bayigagamo.

Agira ati “Ubwo Kaminuza yatangiraga bashatse umwarimu wigisha imibare baramubura, basanga muri Goma hari Umunyekongo uyigisha niko kunsaba kuza nkayigisha. Nahageze mu 1985 kandi nasanze abaturage ba Mutura babanye neza, nta kibazo bafitanye. Nazengurutse Mutura nigisha ijambo ry’Imana. Abaturage ntibari bafitanye ikibazo, ariko wareba mu buyobozi ukabona bo bafite ikibazo."

Ati "Ni yo mpamvu naje muri Kaminuza nkabona harimo amazina atsinda neza ariko akananizwa, kubera ko ntari narahawe ayo mabwiriza ndetse n’abaje gusaba bafite amanota meza nkabareka bagahabwa imyanya. Bamwe mu banyeshuri baje kunyegera bambwira ko Abatutsi barimo kwiyongera muri Kaminuza, ko nareba uko mbagabanya kuko bigomba gukurikizwa."

Prof Ruzibiza avuga ko Inkotanyi zimaze gutera abandi banyeshuri b’inshuti bamwegereye bamusaba kuva mu Rwanda kubera ibigomba kuba.

Prof Ruzibiza avuga ko tariki 4 Ukwakira 1990 yasubiye muri Congo. Amaze guhunga ngo bamushyizeho icyaha cyo gukorana n’Inkotanyi ndetse abari inshuti ze barahohoterwa, mu gihe nyamara yagiye kubera abanyeshuri bagiye mu nama y’Interahamwe bakamusaba kuva mu Rwanda.

Mukamana Athanasie (uri imbere w’inzobe) watawe muri Nyabarongo inshuro eshatu akavamo

Mukamana Athanasie ni umuturage wo mu Karere ka Nyarugenge, mu Murenge wa Kigali, hafi y’inkengero z’uruzi rwa Nyabarongo.

Mu muhango wo gusoza icyumweru cyo kwibuka mu Karere ka Nyarugenge wabereye mu Murenge wa Kigali ku nkengero za Nyabarongo ku wa 13 Mata 2023, Mukamana yatanze ubuhamya bw’ukuntu Interahamwe zamujugunye muri Nyabarongo inshuro eshatu, ariko uruzi rukanga rukamuruka, kugeza ubwo ahuye n’Inkotanyi zikamurokora.

Ajugunywa muri Nyabarongo ku nshuro ya mbere, Mukamana avuga ko Interahamwe zabafashe we na sekuru, nyirakuru n’abavandimwe be zirabahambiranya zibajugunya muri Nyabarongo ari bazima, abandi bose barapfa we amazi amutembana amwerekeza mu byatsi biri ku nkombe abasha kubifata arabikomeza, agira amahirwe ahakurwa n’undi mubyeyi baroshye mu mazi akavamo kubera ko yari azi koga, abasha kumugeza hakurya ya Nyabarongo.

Kwibuka byabimburiwe no gushyira indabyo muri Nyabarongo

Mukamana mu buhamya bwe avuga ko akimara kurohorwa n’uwo mubyeyi bahise bafatwa n’abasirikare b’icyo gihe babajyana aho bari batuye babafata ku ngufu, barangije barabakubita babagira intere, Mukamana baranamutema barongera bajya kubajugunya muri Nyabarongo, amazi arongera amujugunya ku nkombe avamo ubugira kabiri, ariko mugenzi we ahasiga ubuzima.

Akimara kurokoka ku nshuro ya kabiri, Mukamana yigiriye inama yo kujya mu Kagari ka Rwesero mu Murenge wa Kigali ahari hatuye Nyirakuru, agira Imana asanga ba Nyirasenge baracyahari, ariko nabwo ngo ntibyatinze nyuma y’ibyumweru bibiri ikindi gitero cy’Interahamwe cyabagabweho, zimufatana na ba nyirasenge zirabahondagura zibagira intere zirongera zibajugunya muri Nyabarongo, amazi yongera kumutembana amwerekeza ku nkombe aho yaje gukurwa n’Inkotanyi zikamurokora.

Mukamana mu gusoza ubuhamya bwe agira ati “Iyi Nyabarongo mureba nyifata nka sogokuru, nkayifata nka nyogokuru n’abavandimwe banjye bose bayitikiriyemo muri Jenoside yakorewe Abatutsi.

Ubu mbayeho kubera Inkotanyi zitanze, zikihanganira imvura y’amahindu, inzara, n’umunaniro udasanzwe zikaza kudukiza abicanyi, ubu tukaba turiho mu mahoro asesuye. Ku bw’Inkotanyi ubu nariyubatse ndi umubyeyi w’abana batanu, uwazishimira ntiyabona aho ahera n’aho agarukira.”

Umuyobozi Wungirije w’Umujyi wa Kigali ushinzwe Imibereho y’Abaturage, Urujeni Martine, wari umushyitsi mukuru, yongeye guhumuriza abarokotse Jenoside yakorewe Abatutsi mu Murenge wa Kigali, anabizeza ko ashingiye ku buyobozi bwiza burangajwe imbere na Perezida Kagame, adashidikanya ko Jenoside itazasubira ukundi.

Yagize ati “Nshingiye ku Buyobozi bwiza dufite ubu, Nyabarongo ntizongera kujugunywamo Abatutsi ukundi, kuko Inkotanyi zunamuye icumu.”

Urujeni kandi yongeye kwibutsa abakuze bazi amateka ya Jenoside yakorewe Abatutsi, ko bafite umukoro ukomeye wo kwegera urubyiruko bakarugezaho amateka nyakuri kuri Jenoside, kugira ngo rubashe kuyumva rufate umwanzuro wo guhangana n’abiyemeje kugoreka amateka bagamije guhishira uruhare rwabo muri Jenoside yakorewe Abatutsi.

Visi Meya Urujeni Martine

Visi meya Urujeni yagize ati “Ababohoye u Rwanda ubu barimo kujya mu zabukuru. Ni ahanyu rubyiruko gusigasira iki gihugu n’ibyagezweho, hato mutazahura n’akaga nk’ako ababyeyi banyu babayemo. Kubikora rero bigomba gutangira ubu.”

Uyu muyobozi kandi yasabye abacitse ku icumu rya Jenoside yakorewe Abatutsi, ko mu kwibuka bagomba guharanira no kwiyubaka, bakagerageza kudaheranwa n’amateka kuko ari byo bizabafasha koroherwa n’ibikomere bya Jenoside no gutera imbere mu buzima.

Guverineri Habitegeko avuga ko Politiki mbi yatumye Abanyarwanda bica bagenzi babo kandi ntihabeho guhana

Abashaka kugoreka amateka bitwaza ko Jenoside yakorewe Abatutsi yatewe n’ihanurwa ry’indege ya Habyarimana Juvenal, ariko si byo kuko Ngororero ifite umwihariko w’uko kuva mu 1990 Abatutsi batangiye kwicwa.

Guverineri Habitegeko avuga ko abicanyi bakoraga Jenoside aho guhanwa bakagororerwa, politiki mbi ikimakaza ubugome bwo gutsemba igice kimwe cy’Abanyarwanda, kandi bari bakwiye kubaho no kubana mu mahoro.

Agira ati "Umusaruro twakuye muri Pilitiki mbi ni uyu wo kuza Kwibuka abacu bishwe nabi bakajugunywa muri Nyabarongo, ntabwo ari ko byari bikwiye kugenda kuko ntawe utarifuzaga kubaho, ariko ubuyobozi bubi bwagize uruhare mu kumara abantu, aho kubafasha kubaho no kugira ubuzima. Nta kundi ni uguhora tubibuka tukanibuka ko ubuyobozi bubi bugira ingaruka ku bayoborwa, bityo bidakwiye gusubira".

Guverineri Habitegeko avuga ko umunyepolitiki w’uyu munsi atandukanye n’uwo hambere, kuko ubu asabwa kubanisha neza abaturage, kubigisha kuba umwe, gutekereza kure no kubazwa inshingano, bigaragaza itandukaniro rya politiki yakanguriraga abaturage kwanga abaturanyi babo.

Agira ati "Kuba twibuka amateka tukarahirira rimwe ko bitazongera, ni imbuto nziza yeze kuri politiki nziza y’uyu munsi, umunapolitiki asabwa gusa kwereka umuturage uko yiteza imbere no kugira ubuzima bwiza, no kurushaho kubaka Igihugu".

Bashyize indabo ahashyinguye imibiri y’Abatutsi biciwe mu Ngororero

Tariki ya 13 Mata 1994, nibwo Abatutsi basaga ibihumbi 25 biciwe kuri Paruwasi ya Muhororo mu yahoze ari Komini Kibilira, naho ku mugezi wa Nyabarongo hakaba hibukirwa abasaga 400 bahiciwe bakanarohwa muri uwo mugezi, amazina yabo akaba yanditse ku rwibutso rwahashyizwe.

Perezida wa Ibuka mu Karere ka Ngororero, Ntagisanimana Jean Claude, avuga ko ayo amakuru y’abishwe bakajugunywa muri Nyabarogo agikomeje gukusanywa, kugira ngo n’abandi bazamenyekana, amazina yabo azandikwe ku rwibutso ruri kuri uwo mugezi.

Gasana Marcellin

Iwacu by’umwihariko, mu Mudugudu w’Ingenzi, Akagari ka Kabeza, Umurenge wa Muhima mu Mujyi wa Kigali, ibyaho bisa n’ibitandukanye gato n’ibyabereye ahandi; kuko ubwicanyi butahise butangira ako kanya; n’ubwo byari nko kuyobya uburari kuko icyari kigamijwe mu gihugu hose ari ukwica Abatutsi ntihasigare n’uwo kubara inkuru.

Mu ntangiriro, ku musozi wacu twari tubanye neza n’abaturanyi, ndetse ntitwatekerezaga ko Jenoside yari igiye kugera ku rwego rw’Igihugu cyose, ariko ntibyateye kabiri.

Nyuma y’ubutumwa bw’urwango bwanyuzwaga ubutitsa kuri radiyo rutwitsi ya RTLM Kantano na Bemeriki bashishikariza Abahutu bo mu bindi bice kutugabaho ibitero, uwari Konseye wa Segiteri Muhima, Kamatamu Euphrasie, yahise akusanya Interahamwe, atumiza n’abasirikare n’abapolisi batangira kugaba ibitero byo guhiga Abatutsi iwacu.

Batangiye kugaba ibitero simusiga hagati muri Mata, njye n’umuryango wanjye tujya kwihisha ku baturanyi b’Abahutu.

Twahungiye mu muryango w’umubyeyi witwa Agathe Nyirahabyarimana wemeye guhara amagara akakira Abatutsi mu rugo rwe, yirengagije ko yashoboraga kubizira. Ariko nyuma y’iminsi micye, Interahamwe zaje kumenya ko ari ho twihishe ziratumenesha, zibwira uwo muryango ko nibongera kuduhisha bazatwicana na bo.

Mukuru wa Gasana witwaga Gustave

Uwo munsi baradukubise bikomeye n’umuryango wa Agathe Nyirahabyarimana, ariko nyuma badusaba kwigura kugira ngo ntibatwice, tubasha kubona amafaranga y’u Rwanda ibihumbi mirongo ine (40.000FRW) tubifashijwemo na Agathe. Icyo gihe yari amafaranga menshi kuko abayobozi mu bigo byinshi bikomeye bahembwaga ibihumbi mirongo itandatu (60.000FRW).

Ubwo baba batujugunye hanze, babwira wa muryango ko nibongera guhisha inyenzi bazabicana na zo. Ubwo dusubira iwacu, ibitero na byo bikomeza kwiyongera.

Bamaze kudushushubikanya, abandi bo mu muryango wanjye bafashe umwanzuro wo kutongera kwihisha kuko Interahamwe zari zamaze kumenya ko abaturanyi bacu batashakaga kudutanga, ariko njyewe nkomeza kugira amakenga kuko nabonaga ibintu birimo kurushaho kuba bibi.

Nyuma y’uko umuturanyi ampaye amakuru ko Interahamwe zirimo gutegura kudutera ari nijoro, nahise nsubira muri wa muryango barongera baranyakira.

Mukuru wa Gasana witwaga Gabin

Kuri iyo tariki simusiga 09 Gicurasi 1994 ahagana saa moya z’umugoroba, umwana wa Agathe w’umukobwa w’imyaka icyenda yinjiye mu nzu yiruka, ubona ko afite icyo ashaka kuvuga ariko byamunaniye kubera ubwoba n’impumu nyinshi, nyuma yo kubona abasirikare bafite imbunda n’umuturage umwe witwaje umupanga berekeza iwacu.

Aho wa mwana abashirije kuvuga, nahise nsohoka niruka nyura ahantu hagati y’amazu hari hafunganye ariko mbasha kuhasesera, nerekeza inyuma y’amazu aho abaturanyi bamenaga imyanda, nicara aho mpebera urwaje.

Ibyabereye mu rugo byose narabyumvise kubera ko hatari kure y’aho nari nihishe. Abavandimwe banjye babiri bahise babica babatemye undi baramurasa, mama na we bamusiga ari intere ariko yaje kuzanzamuka bukeye, arakururuka yinjira mu nzu abasha kwihambira mu mutwe no ku kiganza cy’ibumoso cyaburaga gato ngo gitakare, ku bw’amahirwe abasha kurusimbuka.

Bavuye mu rugo bahise bajya kunshakisha njye na mukuru wanjye batari babonye, kuko baje bafite urutonde rw’amazina y’abicwaga. Ubwo binjira mu nzu aho nabanje kwihisha mbere barambura kuko nari nagiye kwihisha ahantu bamenaga imyanda hari hazwi n’abaturanyi gusa.

Inzira Gasana yanyuzemo ajya kwihisha

Muri urwo rugo ariko, hari harimo undi mugore wari wahahungiye witwaga Mathilde, baramusohora bamwicira ku muharuro numva arimo gutaka, ubwo ntangira gutitira nshaka guhaguruka ngo mpamve ariko mbura imbaraga zihamvana.

Naraye muri iyo myanda, mu rukerera nigira inama yo kuhava njya kwihisha mu musarane utari ufite umuryango, wasaga n’utagira ba nyirawo numva ko nta muntu ushobora kuwukenera.

Bigeze nka saa kumi n’ebyiri za mu gitondo numva intambwe z’umuntu ziza zigana ku musarane, ubwoba burantaha mbura amajyo, ariko niyemeza gusohoka ngira ngo mwereke ko ndi umuntu uvuye kwituma. Ku bw’amahirwe nsanga ni undi muturanyi w’Umututsi witwaga Gasana Gérard, na we atahwa n’ubwoba ashaka gusubira inyuma kuko atari yamenye ko ari njye.

Aho Gasana yihishe mu gihe cya Jenoside

Nahise muhamagara mu izina kugira ngo mumare igishyika, ubwo ahita ambwira ati sha ihangane nabimenye. Kandi nubwo nawe yari Umututsi, we ntabwo yagize ibibazo cyane kuko yari amaze igihe gito aje gutura aho, nta bandi bantu bamuzi usibye abaturanyi gusa.

Byongeye kandi, yari afite muramu we w’umusirikare wajyaga abasura yambaye gisirikare, na byo rero byatumye abasha kugira umutekano nubwo utari usesuye. Twembi tumaze gusubiza umutima impembero – ariko by’akanya gato – yaje kungira inama yo kujya iwe kuko yari yarasigaye mu nzu wenyine, umugore n’umwana barahungishijwe na muramu we wari umusirikare.

Ubwo niyemeza kujya kwa bazina wanjye Gasana utari ufite icyitwa ikiribwa mu nzu, ariko ku bw’ubumenyi rusange nari mfite ku mikorere y’umubiri w’umuntu, mubaza niba hari umunyu n’isukari byaba bihari, ati birahari.

Nabivanze n’amazi birantunga mu gihe cy’ibyumweru hafi bibiri, ariko ku manywa we yabashaga kujya gushaka aho arya mu bandi baturanyi, njyewe nkasubira mu bwihisho kuko natinyaga ko abicanyi bashoboraga kuhansanga.

Mu mpera za Gicurasi 1994, abasirikare ba RPA (Inkotanyi )bamaze kugera mu bice byinshi by’inkengero z’umujyi wa Kigali, Interahamwe n’abaturage batangira guhunga amasasu, nanjye mfata umwanzuro wo gusubira muri rwa rugo rwampishaga kuko nta bitero byari bikigabwa mu gace k’iwacu.

Ku itariki 29 Gicurasi, wa muryango na wo wiyemeje guhunga werekeza i Cyangugu aho bakomoka; ubwo kuko nta yandi mahitamo nari mfite, nahebeye urwaje niyemeza kujyana na bo n’ubwo icyemezo cyanjye cyabagoye kucyakira.

Umubyeyi wo muri urwo rugo arambaza ati “Ubwo se urabona wabasha kurenga umutaru koko! Nibakwaka indangamuntu se urerekana iki?” Ntabwo nari narababwiye ko nabashije kuyihindura nifashishije urwembe, nkavanamo umurongo uhagaze wambukiranyaga ijambo ‘Hutu’ maze nkanyuza ikaramu muri ‘Tutsi’.

Narayihinduye birakunda kubera ko yari ishaje, ndangije nshyiraho ‘amata’ y’umuyenzi n’agakungugu gake, indangamuntu ukabona ko ntacyo yigeze ikorwaho.

Mu gitondo cyo ku itariki 29 Gicurasi dufata inzira twerekeza i Cyangugu turi mu ikamyoneti ya Mazda y’umuhondo ifite karisori y’ubururu n’abantu babarirwa muri 70. Kuri njye ni urugendo rwasaga no kwiyahura kuko mu mihanda hari harimo za bariyeri nyinshi.

Ku bw’amahirwe ariko, inshuro eshatu twahagaritswe n’Interahamwe tutarasohoka muri Kigali nk’ahantu hari hanteye ubwoba cyane, abasirikare b’Inkotanyi bari ku musozi wa Jali barashe kuri za bariyeri Interahamwe zikizwa n’amaguru, tubasha gutambuka.

Ubu nabwo ni ubundi buryo Inkotanyi zagiye zirokora abantu mu bice bitandukanye ku bagize amahirwe yo kubaho nkanjye.

Mama wa Gasana yatabarutse mu 2020

Ikindi kandi, mu nzira hari harimo izindi mpunzi nyinshi cyane zagendaga n’amaguru ziturutse mu nkambi ya Nyacyonga, na zo zituma tudakomeza guhagarikwa bya hato na hato n’ubwo imodoka yagendaga nk’akanyamasyo.

Muri urwo rugendo rw’iminsi itatu, nagiye nicaye hasi muri kamyoneti ndi hamwe n’abantu bakuze n’abana bato kandi nifubitse igitenge ngo ngaragare nk’umuntu udafite intege, abandi bagabo n’abasore bagenda bahagaze cyangwa bicaye kuri karisori.

Nubwo bitabonekaga ko indangamuntu yanjye hari icyo nayikozeho, nafashe isume nyizengurutsa ku mutwe nsigaza amaso gusa kugira ngo hatagira unkeka.

Iyo Interahamwe zaduhagarikaga zikambaza impamvu nitandiye isume, nazibwiraga ko ndwaye ibicurane, maze bantegeka kugaragaza isura yose nkabanza kubyimbya amazuru ntaramanura isume, imyenge ikamera nk’iy’umuntu wishwe n’impumu kugira ngo izuru ribe rinini.

Henshi narahatambutse, ariko hari aho nageze muri Gikongoro kuri bariyeri y’ahitwa ku Cyitabi, umuyobozi wa bariyeri wari wanyatse irangamuntu afite icumu, arambwira ngo niba ndi umuhutu ninsige irangamuntu yanjye nkomeze ntayo mfite, ndamubaza nti ese n’iyo twaba turi mu mahoro, wowe bakubwiye gusiga irangamuntu wabyemera?

Ubwo ayijugunya mu gisambu ariko mbona aho yaguye, arambwira ngo ninjye kuyitora, maze ngendesha umugongo mureba mu maso mbasha kuyisingira nkirimo kumureba, abandi bamaze gusubira mu modoka bategereje ibiri bumbeho.

Gasana Marcellin na mukuru we Gratien

Ku bw’amahirwe na ho narahatambutse kubera kwihagararaho, na wa muryango twari kumwe wagendaga ubabwira ko ndi mwene wabo.

Tugeze ahitwa i Ntendezi (Cyangugu), kuri bariyeri yaho bambajije impamvu mpahungiye kandi atari ho nkomoka, mbabwira ko mpafite bene wacu kandi na bo turi kumwe mu modoka, na ho mbasha kuharenga.

Twageze mu mujyi wa Kamembe (Rusizi) mu ntangiriro za Kamena, tuhamara ukwezi, ariko nyuma wa muryango waje kwiyemeza guhungira muri Zaire (RDC y’ubu) Inkotanyi zimaze kubohora Umujyi wa Kigali n’ibindi bice byinshi by’Igihugu.

Icyo gihe byaranshobeye nibaza uko nzasubira iwacu i Kigali, ariko nza kumenya ko hari inkambi y’impunzi ya Nyarushishi yari yarahungiyemo abacitse ku icumu rya Jenoside yakorerwaga Abatutsi, ariko irimo n’Abahutu batari baragize uruhare mu bwicanyi kandi batashakaga kujya muri Zaire.

Kujya muri iyo nkambi kuri njye, na byo byari iby’amaburakindi kuko n’ubundi Interahamwe zabasangagamo zikabica mbere y’uko inkambi ifatwa n’abasirikare b’Abafaransa bari mu butumwa bwa Mission Turquoise, ingabo zatsinzwe n’Interahamwe bamaze guhungira i Bukavu.

Ninjiye mu nkambi ya Nyarushishi nsanga irinzwe n’Abafaransa hagati muri Nyakanga, ariko nagiye ntabwiye wa muryango kuko nangaga ko bashoboraga kumbuza bagira ngo dukomezanye muri Zaire.

Kongera guhura n’abanjye

Nagarutse i Kigali ku itariki 12 Kanama 1994, nsanga mama yarabashije gucika ku icumu ariko apfutse mu mutwe no ku maboko, ari kumwe na mukuru wanjye Gasana Gratien n’abana babiri ba mushiki wanjye w’imfura wishwe afite inda y’impanga y’amezi umunani.

Mushiki wa Gasana M, Kayitesi Chantal wishwe atwite impanga (inda y’amezi 8)

Wa muryango wamfashije mu gihe cya Jenoside wahungutse uva muri Congo mu 1997, baraza dukomeza kuba abaturanyi beza nk’uko byari bimeze na mbere ya Jenoside.

Mu muryango wa Gasana w’abana icyenda, bane ni bo bacitse ku icumu rya Jenoside, hamwe na mama waje kwitaba Imana muri Nzeri 2020 azize uburwayi.

Wa mugenzi wanjye (Gérard) wampaye umunyu n’isukari nkabivanga n’amazi ngo nticwa n’inzara, na we yabashije gucika ku icumu rya Jenoside, ariko na we yitabye Imana mu 2011 azize uburwayi.

Abandi bavandimwe ba Gasana hamwe na mubyara wabo

Yabitangaje kuri uyu wa 14 Mata 2023, mu muhango wo kwibuka ku nshuro ya 29 Jenoside yakorewe Abatutsi Mata 1994, Abatutsi biciwe kuri Paruwasi ya Nyarubuye mu Karere ka Kirehe.

Umuyobozi wa Ibuka mu Karere ka Kirehe, Ndiwimana Bonaventure, yashimye Leta ku bufasha butandukanye igenera abarokotse Jenoside harimo ubuvuzi, uburezi n’izindi gahunda zitandukanye zigamije imibereho myiza yabo.

Ariko nanone yagaragaje ikibazo cy’abana barokotse Jenoside batazi cyangwa bazi inkomoko yabo imitungo yabo ikaba yariyanditsweho n’ababareze.

Yagize ati “Hari abana barokotse Jenoside bakiri bato ariko uyu munsi barakuze barashaka kumenya inkomoko y’iwabo ariko ikibabaje ugasanga bamwe mu miryango y’ababasigaranye, babareze, imitungo yabo bayiyanditseho, ntaruvugiro bafite, tukifuza ko icyo kibazo cyahabwa umurongo.”

Umunyamabanga wa Leta muri Minisiteri y’Ubutegetsi bw’Igihugu, Ingabire Assumpta, avuga ko iki kibazo cyahawe umurongo kuburyo abagifite bakwiye kwegera ubuyobozi bukabafasha byanashoboka bagafashwa mu butabera imitungo yabo ikagaruzwa.

Avuga ko kurera umuntu, kumufasha mu buzima busanzwe cyangwa kumwigisha bitavuze kumuzungura.

Ati “Kurera umuntu, kumufasha gutera imbere, kwiyubaka, kumwigisha ntibivuze ko wanamuzungura, tuzafatanya mutugejejeho ayo makur, abana basubizwe uburenganzira ku mitungo yabo, turabita abana ariko bamaze gukura bafiteuburenganzira bwo kugira imitungo no kuyibyaza umusaruro.”

Mu buhamya bwatanzwe na Sumwiza Jeannette yagarutse ku itotezwa bakorewe bakiri abana bagitangira amashuri abanza aho mu ishuri mbere y’uko umwarimu atanga isomo yabanzaga kureba abasibye hanyuma mu gusoma amazina yagera ku Mututsi akamuhagurutsa akavuga umwirondoro we wose n’ubwoko bwe.

Mu gihe bafashe amanota ngo abanyeshuri bagenzi be bamutegeraga nzira bakamukubita bamubwira ko adakwiye kubarusha amanota ndetse ngo agera n’aho abwirwa ko bazamuhuha.

Akoze ikizamini cya Leta gisoza amashuri abanza ngo yabaye uwa gatatu muri Komini Rukira ariko ntiyahamagarwa kuko umwanya we wahawe Umuhutu.

Tariki ya 07 Mata 1994 ngo umuturanyi wabo wazinduye iwabo ngo baza ise umubyara niba yamenye ko Perezida Habyarimana yapfuye undi amusubiza ko atabimenye, undi nawe amubwira ko yapfuye kandi ak’Abatutsi kashobotse.

Ubwicanyi butangiye ngo bahisemo guhungira kuri Paruwasi ya Nyarubuye kuko ngo nyina yari yarababwiye ko mu nzu y’Imana batahicirwa.

Tariki ya 14 Mata, ngo haje interahamwe zambaye amashara kuburyo batamenya umuntu, zisaba ko Abahutu bari bivanze n’Abatutsi muri Kiliziya gusohoka, batangira kubateramo gerenade n’amasasu y’imbunda abandi batemwa, abaterwa ibisongo ndetse n’abakubitwa uduhiri.

N’ubwo yabashije kurokoka, avuga ko agifite igikomere cyo kuba atarabona umubiri wa se n’uwa mukuru we ngo abashyingure mu cyubahiro, akaba yasabye ababa bazi aho imibiri yabo iherereye kumufasha bakahamurangira.

Yashimiye Ingabo zahoze ari iza RPA zabarokoye zikabaha ubuzima mugihe abicanyi bari barahiriye kukubambura.

Urwibutso rwa Jenoside rwa Nyarubuye rushyinguyemo imibiri y’Abatutsi bazize Jenoside irenga 58,000.

Ubwicanyi bwakorewe I Nyarubuye rufite umwihariko kuko abicanyi bamenaga urusenda mu mibiri kugira ngo uwaba akiri muzima yitsamure bamuhuhure, abicanyi bazanye imivure bakajya basukamo amaraso y’Abatutsi bamaze kwica ngo barebe ko ahinduka amata ndetse banazana n’akuma gasya aho bashya imitima y’Abatutsi bamaze kwica bakayishyira mu ifuru bakotsa barangiza bakayirya.

Ati “Aha rero ni hamwe mu hateguriwe Jenoside bikozwe n’ishyaka ryari ku butegetsi MRND ariko n’inkotanyi zaharokoreye benshi zibavana mu bice by’umujyi wa Kigali.

Minisitiri Dr Bizimana avuga ko tariki 17/10/1992 Kapiteni Simbikangwa yayoboreye muri iyi Hotel L’ Horizon inama yafatiwemo icyemezo cyo gushaka abantu bose bari baravuye mu gisirikare bakinjizwa mu nterahamwe.

Bukeye tariki 18 /10/1992 hishwe Abatutsi benshi muri Kigali barimo Byabagamba Straton wari umunyamakuru akaba yarashinzwe ikiganiro cya Kiliziya Gatolika kuri Radiyo Rwanda akaba yari n’umukuru w’ishyaka PR mucyahoze ari Komine Kanombe, yiciwe iwe ku manywa, n’abantu 4 baje mu modoka y’ijipe binjira mu gipangu iwe baramurasa.

Minisitiri Dr Bizimana avuga ko itangazamakuru ryabicukumbuye ryerekanye ko abasirikare bamwishe bari abo mu mutwe warindaga Perezida Habyarimana.

Tariki 20 /11/1993 Perezida Habyarimana yayoboye inama muri iyi Hotel hafatirwamo icyemezo cyo guha Interahamwe n’impuzamugambi intwaro zagombaga gukoreshwa mu kwica Abatutsi n’abatavugaga rumwe n’ishyaka rya MRND na CDR ikwirakwizwa ry’izo ntwaro ryakorwaga hifashishijwe Bus za Leta z’ikigo cya Onatracom.

Tariki 27/2 /1994 kuri iyi Hoteli habereye inama yahuje abayobozi bakuru b’interahamwe yitabirwa na Michel Bagaragaza wayoboraga ikigo cy’igihugu cyari gishinzwe ubucuruzi bw’icyayi, Joseph Nzirorera wari umunyamabanga mukuru wa MRND, Augustin Ngirabatware wari Minisitiri w’igenamigambi, Claver Mvuyekure wari umuyobozi mukuru wa Banki ya Kigali, Pasteur Musabe wari umuyobozi mukuru wa BACAR, Seraphe Rwabukumba wari umwe mu bayobozi ba Banki nkuru y’igihugu akaba na muramu wa Perezida Habyarimana, na Robert Kajuga wari umuyobozi mukuru w’Interahamwe.

Iyo nama yemeje ko bagiye gushaka amafaranga yo gushyigikira Interahamwe mu rwego rwo gutsemba Abatutsi ari nayo mpamvu hari hatumiwemo abayobozi b’amabanki.

Minisitiri Dr Bizimana yashimiye abanyapolitike baharaniye kwamagana ikibi bagaharanira iyubahirizwa ry’uburenganzira bwa buri Munyarwanda ndetse bakanabizira.

Ati “Aha nagiye mbaha ingero ivanguramoko, akarengane, uburyo byari byaragizwe Politike, ababirwanyije rero bamwe bakabizira tugomba guhora tubaha icyubahiro kibakwiye kandi tukavanamo isomo ryo kubaka u Rwanda rwa twese”.

Minisitiri Dr Bizimana yavuze ko hari abazwi bashyinguye kuri uru rwibutso rwa Rebero, hari n’abasanzwe bazwi nka nyakwigendera Minisitiri Ngurinzira Boniface waharaniye amahoro mu mushyikirano wa Arusha ariko bakaba batagaragara kuri uru rwibutso nabo Minisiti yifuza ko kuzahabwa umwanya bakwiye muri uru rwibutso bakajya bubahwa kimwe nabahashyinguye.

Yabasabye abandi Banyapolitike guharanira Politike nziza yubaka u Rwanda rwa bose ica burundu ivangura n’amacakubiri rishingiye ku moko ryagejeje kuri Jenoside yakorewe Abatutsi.

Aho ni mu karere ka Rulindo ahibasiwe na Jenoside, bitewe n’imiterere y’aho hantu hagoye Abatutsi guhunga abicanyi, imwe mu miryango yabo irazima burundu dore ko ako gasozi kari ibirindiro bya FAR aho bari bafite intwaro zikomeye, muri ako gace Jenoside kandi yahawe ingufu n’abayobozi bakomeye muri Leta yiyise iy’Abatabazi bahavukaga.

Ni naho hazwi nka Remera y’Abaforongo yo mu murenge wa Cyinzuzi, ahazwi amateka y’Igikomangoma Forongo uzwi ku izina ry’ubwami Mibambwe I Sekarongoro I Mutabazi wayoboye igitero cyanesheje Abanyoro.

Mvuzo na Mugote, ni tumwe mu duce rw’u Rwanda twabohowe n’Inkotanyi nyuma y’utundi, bamwe mu batuye ako gace bemeza ko ingabo za FAR zari zikambitse muri ako gace zavuye mu birindiro byazo ku itariki 05 Nyakanga 1994.

Ni nyuma y’uko ariho hantu ingabo za FAR zari zisigaranye zihangana n’Inkotanyi, aho barasaga ku muzosi wa Jali ngo bisubize Kigali ubwo yari yaze gufatwa.

Mvuzo na Mugote, ni imisozi iteganye ariko iri mu mirenge inyuranye, aho Mvuzo iri mu murenge wa Murambi, mu gihe Mugote iri mu murenge wa Ngoma, iyo misozi yombi igakikizwa n’imirenge ya Cyinzuzi, Burega, Masoro na Ntarabana, aho hahoze hari Komini Buriza.

Muri Mvuzo ni naho hasorejwe icyumweru cyo kwibuka ku nshuro ya 29 ku rwego rw’Intara y’Amajyaruguru kuri uyu wa kane tariki 13 Mata 2023, ahubatse n’urwibutso rwa Jenoside rushyinguyemo imibiri 6706, ari nawo munsi hashyinguwe mu cyubahiro imibiri itatu iherutse kuboneka.

Mu kumenya neza amakuru yaranze Jenoside yakorewe Abatutsi muri ako gace, Kigali Today yegereye abarokokeye kuri iyo misozi barimo Nyagatare Narcisse Umuyobozi wa Ibuka mu murenge wa Murambi, agira byinshi atangaza kuri ayo mateka.

Yagize ati “Mvuzo na Mugote ni udusozi duteganye, n’imiturire yatwo mbere ya Jenoside wabonaga ari abantu basangira, bari nk’abavandimwe. Ari Mvuzo ari Mugote ni ahantu hari hatuwe n’imiryango myinshi y’Abatutsi, ariko uyu munsi wajya kureba ugasanga ahenshi ari amatongo”.

Uwo mugabo yagarutse ku ndirimbo yo kwibuka Umuhanzi Munyanshoza Dieudonné yahimbiye ako gace, igaragaza amateka ya Jenoside yahabereye.

Arongera ati “Buriya iriya ndirimbo ya Munyanshoza ni iy’amateka yacu, kuko iyo aririmba turiyumva ariya mazina avuga yose turayazi, n’abakuru kuri njyewe ni abantu babanye basangiye, imigezi avuga mu ndirimbo dore umwe ni uriya ubona mu gishanga, ariko byose iyo abivuga umuntu afite uko yiyumva, agira imbamutima zizamutse hejuru”.

Arongera ati “Jenoside, muri uyu murenge yari ifite ubukana burenze bitewe n’uko hano hari ingabo za Habyarimana kandi zifite imbaraga, hano hanavuka abanyepolitike bakomeye muri MRND, barimo Munyazesa Fautsin wari Minisitiri w’Ubutegetsi bw’igihugu”.

Yavuze kandi ko muri ako gace hari interahamwe zikomeye zari zarafatiye imyitozo i Gako, aho zishe abantu benshi ziyobowe na Perezida wazo bitaga 200, nawe yavukaga kuri uyu musozi.

Ikindi ngo cyazamuye ubukana bwa Jenoside muri ako gace, ngo ni ubukangurambaga bwakozwe na Perezida wa MRND Mathieu Ngirumpatse, nawe wakomokaga hafi y’uwo musozi mu cyahoze ari Komine Mbogo, ubwo bukangurambaga bugaherekezwa n’indirimbo za Bikindi.

Nyagatare yavuze ko ½ cy’imiryango yari ituye Mvuzo yazimye, ati “Ubundi muri rusange muri uyu murenge wacu dufite imiryango igera mu 1000, hafi ½ ni imiryango y’Abatutsi yazimye, iyo tuvuga imiryango yazimwe bijye byumvikana, ni ukuvuga ko hatari n’uwo kubara inkuru”.

Nyuma y’uko Jenoside yibasiye Abatutsi muri ako gace, hari imibiri y’Abatutsi bishwe itaraboneka ngo ishyingurwe mu cyubahiro, bikaba bikomeje kubabaza abarokotse Jenoside nk’uko Nyagatare abivuga.

Ati “Kubona imibiri y’abacu na n’ubu nibyo turacyarwana nabyo, nk’uyu munsi dushyinguye imibiri itatu yaturutse mu mirenge itatu itandukanye, hari umwe wa hano I Murambi, uwa Burega n’uwa Kinzuzi, ariko bose baboneka mu buryo butunguranye”.

Arongera ati “Ni kwa kundi baba bahinga bimbika isuka hasi, bakagwa ku mubiri, cyangwa se baba bacukura umusarani umuntu bakamugwaho, uyu munsi dufiye ikibazo cy’abantu banze kwerekana aho bajugunye abantu bacu, turabibabaza tukabinginga ariko ntacyo bavuga, icyo kibazo twakimenyesheje inzego zitandukanye z’ubuyobozi ntibyagira icyo bitanga”.

Mukamwezi Vestine nawe ni uwarokokeye kuri iyo misozi, aho abenshi mu muryango we bishwe, ariko akaba ashimira Leta uburyo yamurokoye inamugarurira icyizere cy’ubuzima.

Ati “Ndashimira Leta y’u Rwanda, ngashimira igihugu cyacu ngashimira Inkotanyi zaturokoye, ubu nk’anjye n’abavandimwe banjye barokotse dufite intambwe twateye, narize, mfite umuryango tubayeho neza, abana bariga nanjye mfite akazi, dufite ibikorwa twagezeho, Leta y’u Rwanda ndayishimira cyane kuko yadukuye ahakomeye”.

Arongera ati “Turi kwibuka ariko tuniyubaka, nkamenyesha ko abatwiciye twabababariye, icyo twifuza n’uko batwegera bakatwereka imibiri y’abacu tukabashyingura mu cyubahiro”.

Murebwayire Alphonsine, Umuyobozi wa Ibuka mu karere ka Rulindo n’abandi barokokeye muri ako gace baremeza ko kuba babayeho neza, babikesha imiyoborere myiza, aho bakomeje gushimira Inkotanyi zabarokoye zirangajwe imbere na Parezida Paul Kagame, bakaba bimakaza gahunda ya Ndi Umunyarwanda baharanira kubaka igihugu kizira amacakubiri.

Mu butumwa umuyobozi w’Intara y’Amajyaruguru yageneye abarokotse Jenoside yakorewe Abatutsi muri Mvuzo na Mugonde n’abo mu mirenge ikikije iyo misozi, n’abatuye muri rusange Intara y’Amajyaruguru, yasabye abaturage kuba hafi abarokotse Jenoside babahumuriza banabafata mu mugongo, banabafasha ibyo babona bikenewe nk’uko Guverineri Nyirarugero Dancille yabitangarije muri uwo muhango wo kwibuka.

Uwo muyobozi kandi yasabye abazi aho imibiri y’abazize Jenoside iri, kuyerekana kugira ngo ishyingurwe mu cyubahiro kandi banarwanya ingengabitekerezo ya Jenoside, birinda no kuyicengeza mu bana.

Urubyiruko ngo rwiyemeje guhuza imbaraga mu gusana amacumbi ya bamwe mu barokotse Jenoside yakorewe Abatutsi

Nibishaka wo mu Mudugudu wa Mwidagaduro, Umurenge wa Cyuve mu Karere ka Musanze, ni umusaza warokotse Jenoside yakorewe Abatutsi, akaba agaruka ku kuba akomeje kugorwa no kuba atuye mu nzu yamaze kumusaziraho.

Agira ati “Ikibazo cy’inzu zishaje kiradukomereye cyane. Nk’ubu njye inkuta z’inzu yanjye hafi ya zose zahomotse isima, amabati yayo n’ay’igikoni aratoboka bitewe n’igihe kinini imaze, kuko nayitujwemo muri 2005. Uretse abatuye mu nzu nk’izo, hari abandi bakigowe no kuba mu nzu bakodesha aho babona amafaranga y’ubukode. Ni ikibazo kidukomereye rwose dusaba inzego bireba kudutabara zikagira icyo zigikoraho kuko bitubangamiye”.

Mu Midugudu ya Susa uherereye mu Murenge wa Muhoza ndetse n’uwa Mwidagaduro n’uwa Bwiza yo mu Murenge wa Cyuve, urubyiruko rw’abakorerabushake ruteganya kuhasana inzu umunani binyuze mu kuyahoma na sima (kuyatera igipande), mu rwego rwo kunganira iyo miryango gutura ahaboneye.

Umurerwa Yvonne ati “Muri iki gihe abarokotse Jenoside bakeneye guhabwa ihumure no kubafasha kwiyumva ko batari bonyine. Twahisemo ko imwe mu miryango bigaragara ko ituye mu nzu zishaje twahuza imbaraga zacu mu kuyisanira, ku buryo iyi minsi 100 yo kwibuka Jenoside yakorewe Abatutsi twiyemeje ko izarangira hari intambwe ifatika dufashije iyo miryango gutera, mu rwego rwo kuyigarurira icyizere no kubagaragariza ko batari bonyine”.

Mu Karere ka Musanze, habarurwa inzu 108 z’abarokotse Jenoside yakorewe Abatutsi zikeneye gusanwa, mu gihe imiryango 39 y’abarokotse Jenoside yakorewe Abatutsi, yo ikeneye kubakirwa inzu zo kubamo.

Abatuye mu nzu zabasaziyeho bakunze kugaragaza ko bibangamiye imibereho yabo

Umuyobozi w’Akarere ka Musanze wungirije ushinzwe imibereho myiza y’Abaturage, Kamanzi Axelle, avuga ko ku bufatanye na MINUBUMWE, uyu mwaka w’ingengo y’imari wa 2022-2023, uzarangira huzuye inzu umunani zizatuzwamo imwe muri iyo miryango itagiraga aho kuba.

Ni mu gihe hanakomeje gushyirwa imbaraga mu kongera imikoranire ya hafi n’abafatanyabikorwa, hagamijwe kugabanya umubare w’abagituye mu nzu zikeneye gusanwa n’abagomba kubakirwa uhereye ku bababaye kurusha abandi.

Bibukira mu birombe by’amabuye y’agaciro ahajugunywe Abatutsi bishwe basaga 400

Babivugiye mu gikorwa cyo Kwibuka ku nshuro ya 29 Jenoside yakorewe Abatutsi, aho bagaragaje ko hari intambwe bamaze gutera mu kwiyubaka, ariko hari n’abagihura n’imbogamizi z’aho gutura, kubera ko inzu bubakiwe zishaje, kandi hari abadafite ubushobozi bwo kuzisanira.

Mutaganda Desiré wo mu Murenge wa Rugarika, avuga ko nyuma ya Jenoside, Leta y’Ubumwe ntako itagize ngo ubuzima bw’uwarokotse Jenoside burusheho kumera neza, ariko hari inzu yubatswe zigenda zangirika kubera kutagira ubushobozi bwo kuzitaho kuri bamwe.

Agira ati "N’ubwo twagerageje kwiyubaka uko bishoboka, ariko hari abanyantege nke bakomeje kubura uko bisanira inzu ku buryo hari impungenge z’uko zanabagwira, hakenewe kugira igikorwa".

Abarokotse ku Rugarika bavuga ko abanyantegeke nke bakeneye ubufasha mu kubona amacumbi meza

Umunyamabanga Nshingwabikorwa w’Umurenge wa Rugarika, Nkurunziza Jean de Dieu, avuga ko hari inzu zisaga 200 zabaruwe ngo zisanwe n’izindi zigera muri 40, zigomba kubakwa bundi bushya, kandi ko hakomejwe gukorwa ubuvugizi kugira ngo zuzure.

Depite Uwera Kayumba Alice wari waje kwifatanya n’abaturage ba Rugarika, kwibuka Jenoside yakorewe Abatutsi, avuga ko Inkotanyi zasubije ubuzima abarokotse Jenoside zitananirwa kubakira inzu abadafite amikoro, ariko byose bikorwa kubera ubushbozi buba bwabonetse, kandi ko nk’intumwa ya rubanda bazakomeza gukora ubwo buvugizi.

Abarokotse bo ku Rugarika bashimira uburyo Leta yakomeje kubegereza ibikorwa byo kubafasha mu buzima busanzwe, kandi nabo bakomeje kwiyubaka uko bishoboka, kandi bazakomeza gukora ibishoboka iterambere bagezeho ntirisubire inyuma.

Abaturage bari benshi mu kwibuka ku Rugarika

Innocent Mutabazi ati gutanga ubuhamya kuri Jenoside si ukugaragaza inzika dufitiye abicanyi

Yabibwiye abitabiriye igikorwa cyo gusoza icyumweru cy’icyunamo mu nkengero z’icyuzi cya Cyamwakizi, tariki 13 Mata 2023, iki cyuzi kikaba giherereye mu Karere ka Gisagara, hagati y’Imirenge ya Kansi, Kigembe na Mugombwa.

Ni nyuma yo gutanga ubuhamya bugaragaza ko mu gihe cya Jenoside, afite imyaka 14, bamujyanye kumuroha muri Cyamwakizi, kimwe n’abandi Batutsi harimo na se, agakizwa n’uko habaye kuvangura abana b’Abahutu n’ab’Abatutsi, hanyuma na we akiyita umuhutu.

Abicanyi bagiye bashaka kumwica kenshi akagarukira kure, umunsi umwe bamukubita ubuhiri mu mutwe banamujugunya mu musarane bibwira ko yapfuye, ariko aza kuvamo.

Jérôme Rutaburingoga, Umuyobozi w’Akarere ka Gisagara

Yaje kujya iwabo wa nyina asanga na we yarahungiyeyo, ariko nyirarume arabirukana, ni ko kujya kwa nyirakuru ubyara se ariko nyuma y’igihe bashatse kubica, basubira iwabo wa nyina, noneho nyirarume aboherereza umwicanyi wari uzwi, ariko na we aho kubica ahubwo abwira uwo nyirarume ko abo yishe bahagije, ko bo abihoreye kandi ko uwo nyirarume naramuka abishe na we azamwica hamwe n’umuryango we.

Yashoje ubuhamya bwe agira ati "Rubyiruko muri aha mufite ababyeyi bakoze Jenoside, ibi tuba tuvuga hano si inzika tuba dufitiye ababyeyi banyu. Ni amateka tuba tubasangiza. Murabizi abicanyi narabababariye, ntawe twigeze twishyuza imitungo, narabababariye. No mu bampemukiye muri Jenoside hari uwo dukorana neza, muri bizinesi yo gucuruza inka".

Perezida wa Ibuka mu Karere ka Gisagara, Jérôme Mbonirema, na we yunze mu rye avuga ko kwibuka no kumva ubuhamya atari umwanya wo guhembera urwango, ahubwo uwo kwibukiranya amateka ya Jenoside kugira ngo Umunyarwanda wese wumva afite ubwenge buzima, aharanire ko itazasubira.

Perezida wa Ibuka mu Karere ka Gisagara, Jérôme Mbonirema

Yaboneyeho no gushima ko ibyaha by’ingengabitekerezo ya Jenoside byagabanutse, ariko ko hari ibyagaragaye muri iyi minsi harimo icy’umugore w’i Mugombwa wabwiye uwarokotse Jenoside, watangaga ubuhamya ngo "ntakavuge abo yiciwe ajye avuga abo yishe, ko na we iwe haguye benshi".

Hari n’icyaha cyo kurandura imyumbati mitoto y’uwarokotse Jenoside i Mugombwa.

Mbonirema yagize ati "Ibyo mu by’ukuri ni ukubakoma mu nkokora kandi atari byo byakagombye. Dukomeze twamagane uwo ari we wese watuzanamo ingengabitekerezo ya Jenoside".

Guverineri w’Intara y’Amajyepfo na we yatanze ubutumwa busaba abantu bose kureka ingengabitekerezo ya Jenoside kuko isenya ubumwe bw’Abanyarwanda agira ati “Turabasaba kubyirinda tubibutsa ko ari icyaha kibi gisenya ubumwe bw’Abanyarwanda kandi gihanwa n’amategeko y’igihugu, ko n’uwo babibonaho bamwamagana bakanamushyikiriza ubuyobozi kugira ngo akurikiranwe.”
Marie Claire Joyeuse

Alice Kayitesi, Guverineri w’Intara y’Amajyepfo

Abitabiriye gusoza icyunamo bari biganjemo urubyiruko

Dr Murangira B. Thierry, Umuvugizi wa RIB

RIB ivuga ko ibyaha byagaragaye mu Kwibuka ku nshuro ya 28 mu mwaka ushize nta tandukaniro rinini rihari ugereranyije no Kwibuka muri uyu mwaka ku nshuro ya 29.

RIB ivuga ko amadosiye yakiriwe ajyanye n’ingengabitekerezo ya Jenoside yagabanutse ku rugero rwa 5.7% ugereranyije n’ubushize, kuko ngo hagaragaye abantu 62 bakekwaho ibyaha 61.

RIB ivuga ko hari amadosiye 50 yihariye y’ingengabitekerezo ya Jenoside n’ibyaha bifitanye isano na yo, mu gihe mu mwaka ushize wa 2022 yari 53.

Umuvugizi wa RIB, Dr Thierry Murangira, avuga ko muri 62 bakurikiranyweho ibyaha by’ingengabitekerezo ya Jenoside hamwe no kuyipfobya, abafunzwe ari 56, umwe akurikiranywe ari hanze ya kasho, mu gihe abakirimo gushakishwa ari 5.

Dr Murangira avuga ko icyaha cyiganje kiza ku isonga ari uguhohotera uwarokotse Jenoside cyihariye 44.3%, gupfobya Jenoside byaje ku rugero rwa 14.8%, ingengabitekerezo ya Jenoside na yo ifite 14.8%, guhakana Jenoside bifite 6.6%, gukurura amacakubiri na byo bifite 6.6%.

Hari ukuzimiza cyangwa gutesha agaciro ibimenyetso n’amakuru byerekeye Jenoside na byo bifite 4.9%, ivangura rifite 4.9%, mu gihe guha ishingiro Jenoside biri ku kigero cya 3.3%.

Dr Murangira agira ati “Iki cyo guhohotera uwacitse ku icumu cyihariye 44.3%, kigaragara mu magambo ashengura umutima abwirwa uwarokotse Jenoside, ayo magambo akaba yihariye 64.3% ugereranyije n’ibindi bikorwa byagiye bigaragara".

Icyo cyaha kandi ngo cyagaragajwe no kurandura imyaka y’uwarokotse Jenoside gifite 7.1%, gutera amabuye ku nyubako cyangwa urugo rw’uwarokotse gifite 5.4%.

Kwiba no kwangiza ibirango byakozwe kiri ku rugero rwa 5.4%, hakaba n’ibirego bibiri byo kwifata amajwi yohererejwe uwarokotse ariko bikozwe n’abari hanze y’Igihugu, ngo harimo ubutumwa bwo gushinyagura cyangwa kubabaza umutima.

Dr Murangira avuga ko inyandiko zibasira abarokotse Jenoside zitagaragaza uwazanditse(tract) ziri ku rugero rwa 3.6%, kandi ko habayeho kwica amatungo(ingurube) hakoreshejwe kuyahumanya.

Hanagaragaye icyaha kimwe mu Karere ka Huye cyo kuzimiza cyangwa gutesha agaciro ibimenyetso, aho umuntu wireze mu buryo budahahije kuba yarakoze Jenoside, kuko atagaragaje aho imibiri y’abishwe yajugunywe.

Dr Murangira avuga ko iyo sambu yasizwemo imibiri yaje kugurishwa, uwayiguze ubwo yarimo gusiza akabonamo imibiri, kandi ko iperereza ry’ibanze ryerekana ko abari bahatuye bari bafite ayo makuru ariko bagaceceka.

Umuvugizi wa RIB avuga ko abantu b’igitsina gabo ari bo benshi bagaragaweho ibi byaha by’ingengabitekerezo ya Jenoside ku rugero rwa 74.1%, abagore bakaba ari 25.9%.

Abakekwaho ibyo byaha byose barimo 7 bari barigeze gufungirwa Jenoside yakorewe Abatutsi, bamaze muri gereza imyaka ibarirwa hagati ya 12-15.

Dr Murangira ati "Usanga amagambo bavuga agira ati ’mwaramfunze ariko noneho ukwa kane kurageze nshobora gukora akantu nkongera ngasubirayo’, cyangwa se ati ’nakwica ngasubirayo kuko umunyururu narawumenyereye".

Dr Murangira avuga ko abandi bose bangana na 77.1% bafite ibyaha by’ingengabitekerezo ya Jenoside n’ubwo bo batari barigeze bahamwa no kuyikora, ari abari basanzwe bafitanye ibibazo n’amategeko.

Umuvugizi wa RIB yahaye iki kiganiro Televiziyo y’u Rwanda ari kumwe na Dr Assumpta Muhayisa ushinzwe ibikorwa byo Kwibuka muri Minisiteri y’Ubumwe bw’Abanyarwanda n’Inshingano Mboneragihugu (MINUBUMWE).

Dr Muhayisa avuga ko n’ubwo ibyaha by’ingengabitekerezo ya Jenoside bitarimo kwiyongera, hakenewe uruhare rwa buri Muturarwanda kugira ngo ibihari bigabanuke.

Yagize ati "Imbaraga zikoreshwa kugeza ubu twavuga ko zikwiye kwiyongera kurushaho, zirahari, dufite icyo tugeraho ari na byo tumaze kubona, ariko kuba ibyaha bigihari ni ikibazo, urugendo ruracyari rurerure".

RIB na MINUBUMWE bavuga ko kurwanya ingengabitekerezo ya Jenoside bishobora kwifashisha imbuga nkoranyambaga, ndetse no kuba buri wese yakumva cyangwa agakurikirana abagaragaraho ibyo byaha akabivuga.

Antoine Cardinal Kambanda yifatanyije n’abandi mu kwibuka Abatutsi biciwe kuri Paruwasi ya Musha

Yabitangaje ku wa Kane tariki ya 13 Mata 2023, mu muhango wo gusoza icyumweru cyo kwibuka ku nshuro ya 29 Jenoside yakorewe Abatutsi Mata 1994, aho yifatanyije n’abaturage b’Akarere ka Rwamagana mu kwibuka inzirakarekangane ziciwe i Musha.

Muri uyu muhango kandi hanashyinguwe mu cyubahiro imibiri umunani yabonetse isanga indi 23,261 isanzwe ishyinguwe muri urwo rwibutso. Muri rusange Akarere ka Rwamagana kakaba gafite inzibutso za Jenoside 11, zishyinguyemo imibiri 83,795y’Abatutsi bishwe muri Jenoside.

Kwibuka ku nshuro ya 29 Jenoside yakorewe Abatutsi by’umwihariko abiciwe i Musha, byabanjirijwe n’ijoro ryo kwibuka, ahatanzwe ubuhamya butandukanye ku bukana Jenoside yo muri aka gace yakoranywe.

Kayitare Eric warokokeye i Musha, yagaragaje inzira y’umusaraba Abatutsi banyuzemo, by’umwihariko urupfu abo mu muryango we ndetse n’abaturanyi bishwemo, ariko nyuma akaza guhura n’Inkotanyi zamurokoye akanazibonamo umusirikare wamwise imfura ye ‘First born’, akamurera mu muryango kugeza n’ubu bakibana nk’umubyeyi n’umwana kuko umuryango we washize.

Umuyobozi w’Akarere ka Rwamagana, Mbonyumuvunyi Radjab, yavuze ko Umurenge wa Musha uri ahahoze ari Komine Gikoro, ukikijwe n’Ikiyaga cya Muhazi ndetse n’icyari Komine Bicumbi.

Yavuze ko Abatutsi baho bagerageje kwirwanaho ariko Burugumesitiri wa Komini Bicumbi afatanyije n’interahamwe, abasirikare n’abapolisi babarusha imbaraga barabica.

Guverineri Gasana avuga ko Abanyarwanda bagomba guhora bibuka kandi bakubakira ku mahitamo y’Igihugu, ariyo kwiyemeza kugumana, kureba kure no kubazwa inshingano.

Yavuze ko iki ari igihe gikomeye haba mu Rwanda no ku Isi, aho Abanyarwanda n’Isi bibuka inzirakarengane zazize uko zaremwe.

Yavuze ko muri iki gihe hibukwa by’umwihariko inzira y’umusaraba abarokotse Jenoside yakorewe Abatutsi banyuzemo mu gihe cy’iminsi 100, ibikomere bagendana, bityo bakwiye kwihanganishwa bakanahumurizwa.

Ariko nanone ngo abarokotse Jenoside yakorewe Abatutsi bashimirwa iteka ubutwari bubaranga, kuba baremeye kudaheranwa n’agahinda n’amateka mabi, bakiyubaka, bakanemera gutanga imbabazi.

Guverineri Gasana yavuze ko by’umwihariko bashimira Ingabo zahoze ari iza RPA-Inkotanyi, zari zirangajwe imbere na Nyakubahwa Perezida Paul Kagame.

Yongeyeho ko izo ngabo ahanini zari zigizwe n’urubyiruko, urungano rufite intego, bitanze bihebuje babohora Igihugu, bahagarika Jenoside, bazana umutekano, bafasha kubaka Iguhugu cyunze ubumwe, cyubakiye ku ndangagaciro nyarwanda, bagarura umuco, bahesha Abanyarwanda agaciro, himakazwa Ndi Umunyarwanda.

Yavuze ko mu kwibuka, hakwiye no gusuzuma ibimaze kugerwaho, gusuzuma aho Igihugu kigeze mu kwimakaza politiki ishyira umuturage ku isonga, ariko no kongera kwiyemeza ko nta Jenoside izongera kuba ukundi.

Guverineri Gasana yavuze ko Abanyarwanda muri rusange bafite umukoro wo gukora ibishoboka byose ngo Igihugu gikomeze kwibohora.

Yagize ati “Dufite Umukoro ukomeye wo gukora ibishoboka byose ngo u Rwanda rukomeze kwibohora. U Rwanda ni urwa twese, mureke turukomereho twubakiye ku mahame yaranze Inkotanyi.”

Mu Karere ka Nyagatare, gusoza icyumweru cyo kwibuka byabereye ku rwibutso rwa Jenoside rwa Gatunda, ahashyizwe indabo ku mva no kunamira imibiri 23 y’abatutsi bashyinguye muri uru rwibutso.

Muri rusange Akarere ka Nyagatare gafite inzibutso za Jenoside eshatu ziruhukiyemo imibiri y’Abatutsi 92, ariko ikazimurirwa mu rwibutso rushya rw’Akarere rwamaze kuzura mu Murenge wa Nyagatare.

Ni mu gihe mu Karere ka Bugesera, gusoza icyumweru cyo kwibuka byabereye mu Mirenge ya Kamabuye, Ngeruka, Mareba, Nyarugenge, Shyara na Ruhuha ahahoze Komine Ngenda, ku rwibutso rwa Jenoside rwa Ruhuha, rushyinguyemo imibiri y’Abatutsi bishwe muri Jenoside hafi 10,000.

Gusoza iki cyumweru cyo kwibuka byabanjirijwe n’ijoro ryo kwibuka, ahatanzwe ubuhamya butandukanye bwagarutse ku nzira y’umusaraba Abatutsi banyuzemo.

Rev. Ndengeyimihigo Sylver, watanze ubuhamya yavuze ko ubundi bari babanye neza ariko nabo batamenye ukuntu Abahutu baje kubahinduka.

Ijambo ry’ihumure ngo baribonye ku wa 13 Mata 1994, ubwo Inkotanyi zabageragaho bihebye maze zirababwira ngo “Ntimugipfuye”, mu gihe batatekerezaga ko bashobora kubona ababatabara.

Akarere ka Ngoma, gusoza icyumweru cyo kwibuka ku nshuro ya 29 Jenoside yakorewe Abatutsi mu 1994, byabereye mu Mirenge ya Rukira na Murama.

Mu buhamya bwatanzwe na Liliose Mukantaganzwa, yagaragaje inzira y’umusaraba yanyuzemo mbere yuko arokorwa n’Inkotanyi, ashimira Leta yafashije abarokotse Jenoside, n’abana bagashobora gusubira mu mashuri ubu bakaba bakomeje kwiteza imbere.

Ni mu gihe mu Karere ka Kayonza iki gikorwa cyabereye ku rwibutso rwa Jenoside rwa Rukara, ruruhukiyemo imibiri y’Abatutsi 8,304.

Umuyobozi w’Akarere ka Kayonza, John Bosco Nyemazi, yagarutse ku mateka n’ishusho y’ubwicanyi bwabereye mu cyahoze ari Komini Rukara, yavuze ko abahiciwe bari baturutse muri Rukara no mu bice birimo Murundi, Mwili, Gahini n’abaturutse i Murambi, bahunga ibitero byari biyobowe na Gatete.

Yagaragaje ko nyuma y’ubwitange bw’Ingabo za RPA-Inkotanyi, Leta y’Ubumwe yakomeje kwita ku bacitse ku icumu rya Jenoside.

Nyemazi yavuze ko mu kubungabunga amateka ya Jenoside yakorewe Abatutsi, harimo kubakwa urwibutso rwa Jenoside rwa Mukarange, rukazashyingurwamo imibiri y’abazize Jenoside ndetse rukaba rufite igice kigaragaza amateka y’abazize Jenoside muri Kayonza.

Mu Karere ka Kirehe, uyu munsi wabereye ku rwibutso rwa Jenoside rwa Nyabitare mu Murenge wa Nyarubuye, bikaba byabanjirijwe no gushyira indabo aharuhukiye imibiri 4,673 y’Abatutsi bishwe muri Jenoside.

Bibukiye kuri Nyabarongo aharoshywe Abatutsi, bashyiramo indabo

Babitangarije mu gikorwa cyo gusoza icyunamo cyo Kwibuka ku nshuro ya 29 Jenoside yakorewe Abatuti, cyabereye ku mugezi wa Nyabarongo, aho izo modoka ubundi zari zisanzwe zitwara abagenzi, zifashishijwe mu gutwara Abatutsi bavanwa i Kabgayi, bakajya kwicirwa ku mugezi wa Nyabarongo bakanarohwamo.

Umuyobozi wa Ibuka mu Karere ka Muhanga, Ingabire Benoit, avuga ko Leta yakomeje gufasha abarokotse Jenoside yakorewe Abatutsi, kwibuka no gushyiraho ibimenyetso by’amateka ya Jenoside, ariko hakiri ibindi bikwiye gukomeza kwinjizwa muri ayo mateka, kugira ngo adasibangana.

Avuga ko bisi zakoreshejwe batunda Abatutsi bavaga i Kabgayi, ari ikimenyetso nk’ibindi bishyirwa mu nzibutso cyangwa inzu z’amateka, ku buryo aho yabagezaga bagiye kwicwa ikwiye kuba ihari, nayo ikajya isobanura amakuru y’uko bicwaga.

Bafashe umunota wo kwibuka Abatutsi bishwe

Agira ati "Bisi ni kimwe mu bikoresho byakoreshejwe bavana Abatutsi hirya no hino, by’umwihariko i Kabgayi. Kugira ngo dukomeze kwibuka neza ni ngombwa ko nayo yazanwa hano nk’ibindi bimenyetso, bishyirwa ahantu hafite amateka y’umwihariko wo kwica Abatutsi".

Umuyobozi wungirije w’Inama Njyanama y’Akarere ka Muhanga, Nshimiyiman Gilbert, avuga ko na we yumva ikimenyetso cy’amateka nka bisi, cyashyirwa ku mugezi wa Nyabarongo ku rugabano rw’Intara y’Amajyepfo n’iy’Iburengerazuba, kuko abarokotse Jenoside bazi amateka y’izo modoka n’ingaruka zabagizeho.

Ati "Abarokotse Jenoside bafite amateka akomeye kuri iriya bisi, zavanaga abantu i Kabagayi zibazanye kwicirwa kuri Nyabarongo. Hari aho ziri zapfuye ziparitse, baduhaye imwe ikaba hano nk’ikimenyetso cy’amateka yaho ntacyo byaba bitwaye".

Bakoze urugendo rugana kuri Nyabarongo aharohwagwa Abatutsi

Abarokotse Jenoside yakorewe Abatutsi bavuga ko kuba Nyabarongo yaratwaye Abatusti benshi batazwi umubare, kandi hakoreshejwe intwaro zitandukanye zirimo n’imodoka zitwara abagenzi, ari kimwe mu bigaragaza uko Jenoside yateguwe ikanashyirwa mu bikorwa, kuko hari abakomeje kuvuga ko ari ubwicanyi busanzwe cyangwa gusubiranamo kw’abaturage.

Urwibutso rw’abishwe

Icyo kigo cyari gisanzwe cyakira Abakirisitu Gatolika baje mu nama no mu masengesho, ariko hakabamo Abapadiri b’Abayezuwiti b’Abanyarwanda n’Abanyamahanga.

Mugunga Antoine ushinzwe Kwibuka mu Murenge wa Remera avuga ko mu mpera z’umwaka wa 1993 Centre Christus yahungiwemo n’Abatutsi barenga 4500 bari bahunze Interahamwe zo mu ishyaka CDR, ngo zabazizaga ko Umukuru wazo witwaga Bucyana yishwe n’Inkotanyi.

Mugunga w’imyaka 59 yatangiye gukora muri "Centre Christus" mu mwaka wa 1985, akaba yaraje kuhava muri 2012.

Mugunga ati "Ntabwo Bucyana yishwe n’Inkotanyi nk’uko babituzizaga bavuga ko turi ibyitso byazo, ahubwo yishwe n’insoresore zo mu Ishyaka PSD zitwaga Abakombozi".

Mugunga avuga ko Interahamwe zabonaga Abapadiri b’abazungu muri Centre Christus zigatinya kwica Abatutsi bari bahahungiye.

Kugeza mu ntango z’ukwezi kwa Kane mu 1994 abo bose bari bamaze gusubira mu ngo zabo, batazi ikizaba guhera ku itariki 7 z’uko kwezi kwa Mata.

Iyo tariki yageze muri Centre Christus harimo Abapadiri n’Ababikira 17 b’Abanyarwanda baje kurangizwa n’Abajepe bari bavuye kwica uwitwaga Landouard Ndasingwa(Lando) wari uyoboye ishyaka PSD, nk’uko Mugunga akomeza abisobanura.

Mugunga avuga ko Abapadiri 3 b’Ababiligi bari muri Christus bo batigeze bicwa kuko Inkotanyi ngo zahageze zikabahungishiriza muri Sitade Amahoro ubwo bagenzi babo b’Abanyarwanda bo bari bamaze guterwamo za gerenade.

Umuyobozi wungirije w’Umujyi wa Kigali, Martine Urujeni avuga ko ibice bya Remera byari indiri y’abicanyi, ku buryo ngo bari barihariye utubari, Umututsi yahanyura bakamushyira ku rutonde rw’abazicwa.

Urujeni Martine mu gikorwa cyo Kwibuka cyabereye mu Murenge wa Remera

Mu Karere ka Gasabo uretse Umurenge wa Remera, indi mirenge yabereyemo igikorwa cyo Kwibuka kuri uyu wa Gatatu , ni uwa Kacyiru n’uwa Kimihurura.

Nsengiyumva Innocent na Nyinawimanzi Charlotte barokokeye ku Kacyiru bavuga ko Ikigo cya Jandarumeri(Gendarmerie) ari cyo cyahaye imbunda abaturage barimo abakozi ba za Minisiteri zihakorera.

Nyinawimanzi agira ati "Abo bakozi ba za Minisiteri ni bo bari abantu basobanutse, baramanutse baza kwifatanya n’Interahamwe zo muri karitiye, ubwo iyo bavaga muri iyo myitozo nta Mututsi wagiraga amahoro, ndibuka ko babwiraga Papa ko afite abana bagiye mu Nkotanyi".

Kwibuka ku Kacyiru

Abarokotse Jenoside bo mu mirenge ya Remera na Kacyiru bavuga ko nyuma yo kurokorwa n’Inkotanyi ubu batuje kandi ngo bumva bishimiye Igihugu cyabo.

Umunyamabanga Nshingwabikorwa w’Umuryango w’abahoze ari abanyeshuri barokotse Jenoside yakorewe Abatutsi (GAERG), Nsengiyaremye Fidèle, avuga ko kuva muri 2009 kugeza mu 2019, uyu muryango watangiye gukora ubushakashatsi bugamije kumenya imiryango yazimye muri Jenoside yakorewe Abatutsi, basanze iyi miryango yose yarazimye bikagaragaza ko Jenoside yakoranywe ubukana n’ubugome ndengakamere.

Ati “Amakuru twegeranyije mu myaka 10 ibikorwa by’ibarura byamaze, agaragaza ishusho y’agateganyo y’imiryango yazimye mu Rwanda. Turateganya gushyiraho uburyo bw’ikoranabuhanga buzadufasha gusuzuma ko imiryango yose yabaruwe mu buryo bwuzuye.

Kwibuka imiryango yazimye bikorwa buri mwaka bikagira ahantu runaka bikorerwa hazwi, nk’uko Nsengiyaremye abisobanura.

Ati “Iyo hibukwa imiryango yazimye bikorerwa hirya no hino mu gihugu, ariko kwibuka kuri iyi nshuro ya 29 bizakorwa ku itariki ya 27 Gicurasi 2023. Iyi gahunda izabera kuri sitade y’Akarere ka Bugesera”.

Kugira ngo iyi miryango imenyekane ko yazimye burundu, hakozwe ibarura mu gihugu hose, hakusanywa amakuru yo kumenya abari bagize iyo miryango.

Nsengiyaremye avuga ko kwibuka imiryango yazimye ari ukugira ngo iyo itibagirana burundu, kandi hari abana barokotse bagomba kwibuka imiryango yazimye.

Ati “Ntibazimye twararokotse, bariho kubera ko tukiriho, kubibuka ni wo muzuko wabo”.

Nsengiyaremye avuga ko kubarura imiryango yazimye byagize akamaro, kuko hari bajya babona abantu babaza amakuru ku miryango yabo niba baba bakiriho, bareba aho babaruriye iyo miryango bagasanga uwo muryango warazimye.

Ati “Iyo umuntu atubajije niba hari amakuru dufite ku muryango we tugasanga barabaruwe ko bazimye, tumuha amakuru agasigara akora urugendo rwo kwakira kubura umuryango we”.

Asobanura ko abadafite nomero zo kwivurizaho bamaze kubarura babarirwa muri 60, kandi ko uwo mubare ushobora kwiyongera, biturutse ku kuba hari abadatuye i Gisagara.

Ati “Mu rwego rwo kugira ngo hamenyekane abagenerwabikorwa bacyo bujuje ibya ngombwa, Ikigega cyo gutera inkunga abarokotse Jonoside (FARG), cyashyizeho uburyo bw’uko abagenerwabikorwa bacyo bazwi bahabwa nomero (PIN) ibaranga, mbese nk’uko wagira nomero y’indangamuntu.”

Akomeza agira ati “Ibyo byabaye mu myaka yatambutse, ariko hari abacikanwe cyangwa se batabimenye cyangwa batari mu Karere. Abo uyu munsi wa none ntabwo bafashwa kubona serivisi y’ubuvuzi.”

Aba kandi ngo Ibuka yagerageje kubakorera ubuvugizi, ariko ngo n’ubwo babasabye ko aba bagenerwabikorwa bashakisha ibya ngombwa bahereye mu tugari, imbogamizi ihari ari uko Minisiteri y’Ubumwe bw’Abanyarwanda n’Inshingano Mboneragihugu (MINUBUMWE) igenda iha izo nomero bake bake.

Ku bw’ibyo, Mbonirema atekereza ko byarushaho kuba byiza hongeye gushyirwaho gahunda rusange yo guha nomero abacikanwe.

I Gisagara kandi n’ubwo hari abari abagenerwabikorwa ba FARG bahabwaga inkunga y’ingoboka bakiri batoya, muri uyu mwaka w’ingengo y’imari hakaba hari 54 muri bo byagaragaye ko hari aho bigejeje, ubu bakaba barakuwe mu cyiciro cy’abafashwa, abakeneye iyi nkunga bashya ni bo benshi kuko bo bagera kuri 602.

Mbonirema ati “Muri aba 602 harimo abahoze bafite agatege, uko imyaka yisunika zikagenda zicika, cyangwa se barahoze baba ahandi hantu uyu munsi bakaba baragarutse iwabo”.

Ubwo i Gisagara batangizaga icyumweru cyo kunamira Abatutsi bishwe muri Jenoside yakorewe Abatutsi mu 1994, uyu muyobozi wa Ibuka mu Karere ka Gisagara yanagaragaje ko hari Abarokotse Jonoside badafite aho kuba bagera ku 113, hakaba n’abatuye mu nzu zikeneye gusanwa bagera kuri 818.

Anavuga ko hagenda haboneka ingengo y’imari yo kubaka inzu nshyashya, ariko ko hari hakwiye kubaho n’iyo gusana inzu zishaje, kuko na byo bikenewe.

Ku bijyanye na nomero zo kwivurizaho, umuyobozi mukuru w’ishami ry’itumanaho n’imikoranire (Communication & partenariat) muri MINUBUMWE, Paul Rukesha, avuga ko nta wacitse ku icumu rya Jenoside uzimwa azikwiye.

Ati “Uwacitse ku icumu utishoboye wese, akwiye PIN. Abacikanwe bemezwa na komite z’imirenge yabo, kandi akarere ni ko kohereza amadosiye yabo kuri MINUBUMWE, na yo ikabaha PIN. Serivisi irihuta cyane.”

Abakeneye inkunga y’ingoboka na bo ngo akarere babarizwamo ni ko gakora amalisiti yabo, kakayohereza kuri MINUBUMWE, hanyuma na yo ikabagenera iyo nkunga.

Abadafite aho kuba kimwe n’abatuye mu nzu zashaje na bo ngo ku bufatanye bwa Minisiteri y’Ubutegetsi bw’Igihugu, MINUBUMWE na Minisiteri y’Ibikorwa Remezo bagenda bashakirwa ibisubizo.

Ibyabaye kuri Kayigi n’ubu iyo abitekereje byongera kumubabaza

Yaje kugenda arorongotana agera i Kabgayi aho yahuye n’ubuzima bukomeye burimo uburwayi, inzara no kubaho atazi ko buri bucye kubera ubwicanyi bwakorwaga n’Interahamwe.

Kayigi ageze i Kabgayi yahavuye akurikiye impunzi z’Abanyarwanda zahungiye muri Repubulika Iharanira Demokarasi ya Congo yitwaga Zaire muri icyo gihe. Inzira yose yagiye ahura n’Interahamwe zigashaka kumwica akazirokoka ku buryo bw’igitangaza.

Mu rugendo rwe, yaje kugirirwa impuhwe n’umwe mu miryango yiteguraga guhunga uza kumuhererekanya n’izindi mpunzi ziramwambukana muri Congo i Goma, aho muri Congo (yahoze yitwa Zaire) ntiyabaye mu nkambi ahubwo yajyanwe mu muryango w’umukire witwa Gakwavu wamuhaye nyina ngo ajye amumara irungu.

Uyu mukecuru ariko yari afite urwango rukomeye rw’Abatutsi maze n’ubwo Kayigi yari yaramuhishe ko ari Umututsi, aramutoteza bikomeye akamukoresha imirimo ivunanye kandi yari yarashyizeho abazajya bamukubita gatatu ku munsi. Hari n’ubwo yigeze kumuzirika ku cyobo cy’umusarani wuzuye.

Ibi Kayigi yabibayemo igihe kinini.

Amafoto agaragaza Kayigi mu bihe bitandukanye

Uburyo Kayigi yaje kuva muri ako kaga akaza gutahuka mu Rwanda n’uburyo akomeje kwiyubaka, ni byo bikubiye muri iki kiganiro:

Hagenimana Antoine

Mu kiganiro kuri KT Radio cyatambutse kuri uyu wa 11 Mata 2023, yavuze ko nyuma yo kumenya ibyabaye ku mubyeyi we, yanze guheranwa n’ayo mateka ahitamo kuyandika kugira ngo bimufashe kubyakira.

Igitabo cye ‘Le Chagrin de ma Mère Un trésor caché sous une montagne’ tugenekereje mu Kinyarwanda bivuga “Agahinda ka Mama, Ubutunzi buhishe munsi y’umusozi”.

Hagenimana asobanura uko mu gihe cya Jenoside yakorewe Abatutsi mu 1994, umubyeyi we yashimuswe n’interahamwe, ziramusambanya, zimukorera amahano ku buryo yasigaranye ibikomere ku mutima no ku mubiri.

Ati “Ni urugendo rukomeye mama yanyuzemo nyuma yo kwicirwa umuryango we wose, yashimuswe n’interahamwe, ziramujyana, ziramuhohotera, zimufata ku ngufu, zimusigira ibikomere ku mutima no ku mubiri.”

Muri icyo gitabo, agaruka ku kuntu abicanyi bakomeje kwirukanka inyuma y’umuryango we, kuva tariki 6 Mata no ku matariki 18 na 19 Mata 1994.

Avuga ko umubyeyi we yamaranye igihe ibikomere kugeza ubwo baje kubikeka, nyuma uyu mubyeyi afata icyemezo cyo kubaha ubuhamya bw’ibyamubayeho.

Hagenimana avuga ko umubyeyi we yagize ubudaheranwa budasanzwe, kuko yafashijwe n’Umuryango AVEGA-Agahozo abasha kongera kwiyubaka.

Ati “Igitabo cyanjye kigaragaza ko Jenoside yakorewe Abatutsi yabaye kandi ifite uburemere. Ikindi kugeza uyu munsi hari abakibana n’ibikomere, bakeneye gukomeza komorwa.”

Nyuma y’urugendo umubyeyi we yanyuzemo yaje kwitaba Imana, ariko yaramaze kumubwira urugendo rw’ubuzima bwe bwose, yumva amusigiye umwenda wo kuzavuga ubwo buhamya.

Igitabo Le Chagrin de ma Mère kuri ubu kiri mu rurimi rw’Igifaransa, umwanditsi wacyo avuga ko yacyanditse mu gihe cy’imyaka ibiri, ubu ngo afite gahunda yo kugishyira mu zindi ndimi.

Igitabo Le Chagrin de ma Mère gifite paji 144, cyamuritswe mu mugaragaro kuu ya 30 Werurwe 2023, kikaba kiboneka muri Librairie Ikirezi mu Mujyi wa Kigali.

Barimo abatoraguwe mu nkomere no mu mirambo y’abicwaga muri Jenoside, ariko ababatoraguye bakabura ubushobozi cyangwa ubushake bwo gukomeza kubitaho, bagatangira kubaho mu buzima bumeze nko gupfundikanya.

Iradukunda Kalisa Kevin w’imyaka hafi 30, yakuwe mu mirambo hafi y’umusigiti w’i Nyamirambo n’umuntu wari mu ngabo z’Inkotanyi wari ushinzwe kwita ku nkomere witwaga Annonciata(irindi zina Kalisa ngo ntaryibuka).

Kalisa akiri umwana ndetse n’igihe yari amaze kuba mukuru

Kalisa yamenye ubwenge ari mu rugo rwa Annonciata n’umugabo we rwari ku Muhima, bakaba baraje gusezererwa mu Nkotanyi, batangira gucuruza mu Mujyi wa Kigali.

Annonciata yaje kubura ubushobozi bwo kurera Kalisa, dore ko n’umugabo we ngo yari yaramutaye asubira muri Uganda kurera abana b’uwari umugore we mukuru wari waritabye Imana, bamaze guhomba ibyo bacuruzaga.

Annonciata yatandukanye na Kalisa muri 2004 ajya gutura ku Kamonyi, Kalisa ajya kuba ku mubyeyi witwa Shangazi Rugina, ahava ajya i Kimisagara aho yari amaze kubona ishuri, aba mu rugo rw’uwitwa Mama Credo, ahava ajya kuba mu ngo zitandukanye z’i Kigali.

Uwitwa Tonton Jean Pierre ngo yaje kumuvana mu rugo rw’umuntu aho yabaga i Nyamirambo, ajya kumurerera mu Kigo kirimo abana b’impfubyi za Jenoside kiri i Rwamagana cyitwa ’Agahozo Shalom Youth Village’.

Kalisa avuga ko yarangije kwiga ibijyanye n’indimi muri Agahozo Shalom muri 2015, Ikigega FARG kimufasha kwiga umwuga wo gukora muri Hotel muri IPRC-Musanze kugera muri 2019.

Hagati aho ubwo yazaga muri CNLG nk’umwana iyo Komisiyo yakurikiranaga, Kalisa yahahuriye n’abo bahuje ikibazo cyo kutamenya inkomoko barimo Ndayambaje David, Muhirwa Yves, Musafiri Oswald, Clementine, Uwambajimana Claudine n’abandi.

Kalisa afatanyije n’abo bana, bashinze Umuryango witwa "Children of Rwanda" ubafasha kwikorera ubuvugizi no gushakisha niba hari uwabo waba akiriho.

Kugeza ubu muri abo basore n’inkumi bamaze kugera kuri 52, umunani ni bo bonyine ngo bamaze kubona bamwe mu miryango yabo barokotse, bakabishimira ibitangazamakuru bibigiramo uruhare kugira ngo abo bantu baboneke.

Kalisa avuga ko barimo bake babashije kwiga ariko bakaba na bo ngo badashobora guhabwa akazi, kuko nta mwishingizi cyangwa umubyeyi ufite aderesi izwi bakwereka abakoresha.

Agira ati "Harimo abatarize benshi, abize ni mbarwa, ni cyo gituma tudafite akazi, cyangwa se n’uwize akakabura bitewe n’uko ntabwo ufite uri bugutangire ubuhamya cyangwa ngo akwishingire, ubwo iyo umaze kubabura akazi uba ugatakaje kuko nta muntu n’umwe baba bazi cyangwa se ngo bazakubarize aha n’aha".

Uwitwa Amina Uwimana wakuwe mu mirambo hafi y’ahahoze Ikigo cy’Itangazamakuru(ORINFOR) ari uruhinja rw’amezi atanu, avuga ko nta bantu bapfa kwemera gushyingiranywa n’abameze nka we, kuko nta miryango isabwa umugeni agira.

Uwimana ati "Ugira ngo upfa kubona abagushaka iyo udafite umuryango? Icyo kibazo kiri ku bana benshi ntabwo ari jyewe jyenyine, n’ugushatse agufata nabi, hari mugenzi wacu twasuye atubwira ko umugabo amukubita".

Uwimana avuga ko ikindi gituma hari benshi batakwemera gushakana na we, ari uko ngo baba babona ntaho yakura ibikoresho byo mu nzu bita amajyambere, ndetse nta n’uwamusura ngo amuhembe yabyaye.

Aba bana batazi inkomoko bavuga kandi ko bahangayikishijwe no kutagira amacumbi.

Umuyobozi Nshingwabikorwa ushinzwe Ubudaheranwa muri Minisiteri y’Ubumwe bw’Abanyarwanda n’Inshingano Mboneragihugu, Uwacu Julienne mu kiganiro yagiranye n’Itangazamakuru tariki 5 Mata 2023, yavuze ko bigoye kwemeza ko abatazi inkomoko bose barokotse Jenoside.

Uwacu akomeza agira ati “Gahunda zifasha abatishoboye ntabwo ziba muri MINUBUMWE gusa, uwo musore cyangwa iyo nkumi ashobora kudafashwa nk’uwacitse ku icumu kuko kugeza ubu biba bigoranye no kwemeza ko yacitse ku icumu koko."

Uwacu avuga ko aheruka kugirana inama n’abayobozi b’abo bana batazi inkomoko, akaba abizeza kuzakomeza gukorana na bo kugira ngo MINUBUMWE ifatanye n’izindi nzego kubashakira igisubizo.

Ibi byagarutsweho mu muhango wo gusoza icyumweru cyo kwibuka ku nshuro ya 29 Jenoside yakorewe Abatutsi, wabereye ku rwibutso rwa Rebero mu Mujyi wa Kigali, hibukwa Abanyapolitiki bazize Jenoside yakorewe Abatutsi. Hashyizwe indabo ku mva z’Abanyapolitiki 13 bashyinguye mu rwibutso rwa Rebero mu rwego rwo kubibuka no kubaha icyubahiro.

Dr Bizimana Jean Damascène uyobora Minisiteri y’Ubumwe bw’Abanyarwanda n’Inshingano Mboneragihugu, yavuze ko amashyaka yagiye ashingwa ashingiye ku bwoko aho gushingira ku kubaka ubumwe bw’Abanyarwanda bose. Hanashyizweho kandi politiki zitandukanye zigamije kwibasira abo mu bwoko bw’Abatutsi muri Repubulika zombi.

Yatanze urugero ko ubwo hashingwaga ishyaka MDR Parmehutu, uwari Perezida Kayibanda Grégoire yavuze ko rije gushyira imbere inyungu z’Abahutu mu Rwanda.

Minisitiri Dr Bizimana Jean Damascène

Ati: “Ishyaka ryacu rirareba inyungu z’Abahutu. Tugomba kuba urumuri rwa rubanda nyamwishi. Tugomba gusubiza Igihugu bene cyo; Igihugu ni icy’Abahutu”.

Ibi kandi byiyongereyeho politiki mbi zinyuranye ziheza Abatutsi harimo kubambura uburenganzira ku mitungo y’abari barahunze, ndetse no kubashyiriraho amananiza muri gahunda nyinshi zigenewe abenegihugu.

Ibi byagiye bitiza umurindi ukudasenyera umugozi umwe kw’Abanyapolitiki ahubwo bakomeza kubiba urwango mu gihe kirenga imyaka 20 ari rwo rwagejeje mu 1994 ubwo Jenoside yakorewe Abatutsi yabaga.

Perezida wa Sena, Dr Kalinda François Xavier

Perezida wa Sena y’u Rwanda, Dr Kalinda François Xavier, yavuze ko Leta izirikana uruhare rw’Abanyapolitiki bibukwa ku bwo kwitandukanya n’ikibi ndetse bakanabizira mu gihe cya Jeonside. Yavuze ko iyo haza kuboneka Abanyapolitiki benshi bahakana urwango rwari rwarimitswe Jenoside iba itarashobotse kuko yahagarikiwe n’abandi banyapolitiki b’urwango bari benshi icyo gihe.

Yavuze ko Leta y’u Rwanda ubu yatangiye icyerekezo gishya cy’imiyoborere myiza igamije ubumwe, iterambere ridaheza ndetse na Demokarasi. Na none ariko yasabye Abanyarwanda gusigasira iyo ntambwe imaze guterwa kuko uyu munsi hari abacyifuza ko Igihugu gisubira mu mateka mabi cyanyuzemo.

Ati: “Ibikorwa byo guhakana no gupfobya Jenoside yakorerewe Abatutsi n’ingengabitekerezo yayo biracyagaragara hamwe na hamwe mu gihugu ndetse bikomeje kwiyongera mu Karere u Rwanda ruherereyemo. Abagize uruhare muri Jenoside yakorerewe Abatutsi barakidegembya. Umutwe w’Iterabwoba wa FDLR ukomeje gukwirakwiza ingengabitekerezo ya Jenoside, ukaba utarareka n’umugambi wo kongera gukora Jenoside mu Rwanda. Buri wese rero arasabwa kurwanya abo bose batifuriza u Rwanda amahoro”.

Kureba andi mafoto, kanda HANO

Reba ibindi muri iyi Video:

Amafoto: Moise Niyonzima/Kigali Today

Video: Eric Ruzindana/Kigali Today

Guverineri Nyirarugero afatanyije na Depite Bitunguramye Diogene bashyize indabo ku mva mu kunamira imibiri iharuhukiye

Ibi yabigarutseho mu muhango wo kwibuka abikoreraga bazize Jenoside yakorewe Abatutsi mu Rwanda mu 1994, wateguwe n’abikorera bo mu Karere ka Gakenke, wabereye ku Rwibutso rwa Muhondo ku wa kabiri tariki 11 Mata 2023.

Urwibututso rwa Muhondo, ruherereye mu Murenge wa Muhondo mu Karere ka Gakenke, aka Karere kakaba karahurijwe hamwe ayahoze ari ama Komini ya Cyabingo, Ndusu, Gatonde, Nyarutovu, Cyeru, Musasa, Shyorongi na Tare.

Aho hose amateka agaragaza uruhare rw’ubutegetsi bwariho mbere ya Jenoside, bwimitse politiki y’ingengabitekerezo y’urwango, amacakubiri, byabibwe n’abakoloni bigasenya ubumwe bw’Abanyarwanda, ari nabyo byaje kwibasira bikomeye Abatutsi kugeza no mu gihe cya Jenoside.

Mu buhamya bwa Uwihirwe Janvier worokotse Jenoside, yagize ati “Guhera mu 1959 Abatutsi baratotejwe batwikirwa inzu zabo, barameneshwa aho bamwe bagiye bahungira mu Bugesera abandi bakamenenganira hanze y’u Rwanda. Ibyo byarakomeje bigera mu myaka ya za 1973 na 1990 ubwo Inkotanyi zatangizaga urugamba rwo kubohora Igihugu, Abatutsi bavutswa umutekano mu buryo bwose bushoboka”.

Ati “Ubwo indege ya Habyarimana yahanurwaga, interahamwe ntizazuyaje kwirara mu Batutsi bo muri kano gace, zibica urw’agashinyaguro, zirya inka bari boroye, basahura imitungo yabo. Muri urwo rugendo rutari rutworoheye, Abatutsi bari bahungiye muri Shyorongi, abandi bakwiriye imishwaro za Ruli na Rwankuba, ari nako bahicirwa ku bwinshi”.

Arongera ati “Byageze ahitwa Rwintare ya Rusiga, Abatutsi zahiciwe zibajugunya mu cyobo izo nterahamwe zari zarise muri CND, mu gihe hari n’abandi ziciye mu rusengero rw’Abapantekote rwo muri ako gace, njye nkaba nari muri bacye barokotse ariko nabwo nsigara bankubise umubiri wose bawushenjaguye bazi ko nashizemo umwuka”.

Ibindi bihe bikomeye bitazibagirana kuri Uwihirwe, ngo ni igitero simusga bagabweho n’interahamwe zihurije hamwe zikabateranira ziturutse mu makomini ya Rushashi, Musasa, Tare, Nyamugari, Nyarutovu, Mbogo na Shyorongi. Ngo zigabije imbaga y’Abatutsi bari bahungiye ahitwa mu Kiziba cya Shyorongi, zirabica.

Yagize ati: “Icyo gitero interahamwe zakigabye ku itegeko ry’uwari Perefe wa Kigali Ngari, nyuma y’inama yakoresheje abaturage ikabera ku Rushashi. Akaba yarashishikarije interahamwe kwahuka mu bintu byose by’abatutsi, yaba imitungo, imyaka bari barahinze n’amatungo yabo bakabitema, ntihagire na kimwe basigaza, kugira ngo Inkotanyi niziza kubatabara zizasange ntacyo kubara inkuru gisigaye. Ubwo rero nizo zaje zitwahukamo ziradutema zikoresheje inkota, ziturasa n’amasasu na za gerenade, ku buryo Abatutsi bari bahungiye bavuye mu makomini atandukanye basaga ibihumbi 10 zabiciye ahongaho”.

Ubuhamya bwa Uwihirwe Janvier bwagarutse ku buzima Abatutsi babayemo mbere ya Jenoside no mu gihe yakorwaga

Mu muhango wo kwibuka izo nzirakarengane, abawitabiriye bashyize indabo ku mva iruhukiyemo imibiri 203 ishyinguwe mu rwibutso rwa Muhondo.

Mbaga Daniel ukuriye Urugaga rw’Abikorera mu Karere ka Gakenke, avuga ko ari ngombwa kumenya aya mateka, no kuyashingiraho bakoresha ubushobozi bwabo mu byubaka Igihugu.

Yagize ati “Uyu uba ari umwanya tuboneraho wo kumva ayo mateka mabi yaranze Igihugu cyacu, n’uruhare abikorera ku giti cyabo b’icyo gihe babigizemo kugira ngo tugire isomo dukuramo. Hari abikorera bagiye batanga imodoka zabo ngo zitware interahamwe zigiye kwica Abatutsi. Hari abagiye batanga amafaranga mu gushyigikira inama zategurirwagamo ibyo bikorwa bigayitse no kugura ibikoresho byagiye byifashishwa mu kwica abatutsi, tutibagiwe n’uruhare rw’abikorera bashoye imari mu gushinga Radio RTLM yabibye urwango no gushishikariza interahamwe kwica Abatutsi”.

Ati “Ibyo byose iyo tubisesenguye, twe nk’abikorera b’ubungubu, bidusigira isomo rikomeye, rituma duharanira ko Jenoside itazongera ukundi, tugaharanira gushyira imbere ubumwe n’ubudaheranwa ari nako dushishikarira ibikorwa byiza bishyigikira iterambere ry’Igihugu cyacu”.

Perezida wa Ibuka mu Karere ka Gakenke, Twagirimana Hamdoun, agaragaza ko n’ubwo urugendo rutari rworoshye rwo kwiyubaka muri iyi myaka 29 ishize Jenoside yakorewe Abatutsi ihagaritswe, abarokotse bagerageza uko bashoboye.

Yagize ati “Hejuru y’intambwe tugenda dutera yo kwiyubaka, abarokotse Jenoside yakorewe Abatutsi babanye neza n’abandi banyarwanda binyuze no mu matsinda bahuriyemo n’ababahemukiye, bireze bakemera icyaha aho biyemeje kurenga ayo mateka, bakaba bicara hamwe bakajya inama y’ibibateza imbere”.

Arongera ati “Gusa kugeza ubu hari imibiri myinshi y’abacu bishwe itaraboneka ngo ishyingurwe mu cyubahiro, kuko iyo urebye nk’ishyinguye muri uru rwibutso, ukayigereranya n’Abatutsi bose bishwe, ubona ko hakiri icyuho gikomeye cy’itaraboneka ngo ishyingurwe. Tugasaba abafite amakuru y’aho iri kuyatubwira kugira ngo tuyishyingure mu cyubahiro”.

Guveriner Nyirarugero yashimiye umuhate Abarokotse Jenoside bakomeje kugaragaza mu rugamba rwo kwiyubaka. By’umwihariko ku bikorera bateguye iki gikorwa, kigahuzwa no gufata mu mugongo Abarokotse Jenoside, asanga iyi ari intambwe nziza mu kugera ikirenge mu cy’Ingabo zari zirangajwe imbere na Nyakubahwa Paul Kagame, zahagaritse Jenoside.

Yagize ati “Nsaba abaturage muri rusange kwimakaza umuco w’amahoro hagati y’umuntu n’undi kuko bizadufasha kwamagara ibikorwa byose byacamo Abanyarwanda ibice. By’umwihariko ku bikorera, ni ngombwa ko mu byo bakora byose, bashyira imbere intego yo kunga ubumwe bakumira urwango kuko twamaze gusobanukirwa neza aho byagejeje u Rwanda. Iki nicyo gihe nyacyo cyo gutoza by’umwihariko abakiri bato gukurana izo ndangagaciro, kuko aribyo bizadufasha kubakira igihugu cyacu ku musingi ukomeye”.

Guverineri Nyirarugero, yasabye abikorera kurandura amacakubiri n’ingengabitekerezo ya Jenoside

Mu gihe cy’iminsi Ijana yo kwibuka Jenoside yakorewe Abatutsi, Abikorera bo mu Karere ka Gakenke bazafasha imiryango yarokotse Jenoside itishoboye, bayigenere ibiribwa n’ibindi bikoresho by’ibanze, kuyoroza inka, kububakira inzu no kwishyurira imwe muri yo ubukode bw’inzu mu gihe cy’amezi atandatu, gutanga ubwisungane mu kwivuza n’ibindi.
Ibikorwa nk’ibi bikazanakorwa mu tundi Turere tugize Intara y’Amajyaruguru nk’uko byagaragajwe na Mukanyarwaya Donatha Perezida wa PSF ku rwego rw’Intara y’Amajyaruguru.

Abaturage basabwe kubakira ku musingi w’urukundo n’ubumwe mu kwirinda ko igihugu cyasubira mu mateka mabi

Muri iki cyumweru, ibikorwa by’imikino n’imyidagaduro byarahagaze, mu rwego rwo kuzirikana no guha agaciro inzirakarengane zazize Jenoside yakorewe Abatutsi mu mwaka wa 1994.

Amakipe atandukanye mu Rwanda n’amashyirahamwe y’imikino itandukanye, yafashe umwanya wo gutanga ubutumwa bwo kwifatanya n’Abanyarwanda ndetse no kwamagana imvugo zihembera urwango.

Rayon Sports

Ikipe ya Rayon Sports usibye ubutumwa yanyujije ku mbuga nkoranyambaga, yakoze urugendo rwo kwibuka, isura urwibutso rwa Jenoside ruri i Nyanza ya Kicukiro, ndetse n’ubusitani bw’urwibutso na bwo buri ku Kicukiro, bugaragaza uruhare rw’ibimera mu mateka ya Jenoside.

Kiyovu Sports

Abakinnyi ba Kiyovu Sports batanze ubutumwa bw'ihumure muri ibi bihe abanyarwanda n'inshuti z'u Rwanda barimo byo kwibuka kunshuro ya 29 Jenoside yakorewe Abatutsi mu 1994. pic.twitter.com/e0dUdAhoCc

— Kiyovu Sports (@SCKiyovuSports) April 9, 2023

Kiyovu Sports, na yo yifashishije amashusho arimo abakinnyi batandukanye bayo barimo Abanyarwanda n’abanyamahanga, itanga ubutumwa bwo Kwibuka.

Abakinnyi ba Kiyovu Sports batanze ubutumwa bw'ihumure muri ibi bihe abanyarwanda n'inshuti z'u Rwanda barimo byo kwibuka kunshuro ya 29 Jenoside yakorewe Abatutsi mu 1994. pic.twitter.com/e0dUdAhoCc

— Kiyovu Sports (@SCKiyovuSports) April 9, 2023

AS Kigali

Umuryango mugari wa AS Kigali wifatanyije n'Abanyarwanda n’isi yose kwibuka ku nshuro ya 29 Jenoside yakorewe Abatutsi mu 1994.

Twibuke twiyubaka.#Kwibuka29 pic.twitter.com/U6MPRT1kif

— AS KIGALI (@AS_KigaliFC) April 7, 2023

"Dushyire imbaraga zacu mu kubaka urwatubyaye kandi turwanye abahakana n'abapfobya Jenoside yakorewe Abatutsi"- Kankindi Anne-Lise pic.twitter.com/BhDhobRd3L

— AS KIGALI (@AS_KigaliFC) April 10, 2023

Police FC

Players and staff of POLICE FC join all Rwandans in the 29th commemoration of the 1994 genocide against Tutsi. #Kwibuka29
Remember-Unite-Renew pic.twitter.com/DSSB8fWrZs

— Police Football club (@Policefc_Rwanda) April 7, 2023

Gasogi United

#Kwibuka29 #KwibukaTwiyubaka @KwibukaRwanda pic.twitter.com/G7Zah0iLsy

— Gasogi United FC (@gasogi_united) April 7, 2023

Mukura VS

Kwibuka 29

Twibuke Twiyubaka pic.twitter.com/KXUwzy02Li

— Mukura Victory Sports et Loisirs (@MukuraVS) April 6, 2023

Gorilla FC

View this post on Instagram

A post shared by GORILLA FC RWANDA (@gorillafcofficial)

Musanze FC

Ikipe ya Musanze FC yifatanyije n'Abanyarwanda n’isi yose kwibuka ku nshuro ya 29 Jenoside yakorewe Abatutsi mu 1994.
Twibuke twiyubaka#Kwibuka29 pic.twitter.com/8YTFLdhWLK

— Musanze FC (@musanzefc) April 7, 2023

Bugesera FC

Ikipe ya Bugesera FC na yo ku munsi wo gutangiza Icyumweru cy’Icyunamo, yifatanyije n’Abanya-Bugesera mu kwibuka ku nshuro ya 29 Jenoside yakorewe Abatutsi.

Muri iki gihe Abanyarwanda twibuka ku nshuro ya 29 Jenoside yakorewe Abatutsi mu 1994, ikipe ya Bugesera FC yifatanyije n'abaturage b'Akarere ka Bugesera mu gutangira icyumweru cy’Icyunamo.

Twibuke Twiyubaka#Kwibuka29 pic.twitter.com/vgn4lfqNlF

— Bugesera Football Club (@Bugesera_fc) April 7, 2023

Rutsiro FC

Ubuyobozi n'abakozi ba @rutsirofc twifatanyije n'abanyarwanda bose, kwibuka ku nshuro ya 29, Jenoside yakorewe Abatutsi mu 1994.#twibuketwiyubaka #kwibuka29 pic.twitter.com/uEi3WqkQtU

— RUTSIRO FC OFFICIAL (@rutsirofc) April 7, 2023

Marine FC

#TWIBUKETWIYUBAKA pic.twitter.com/64R5xCOjNc

— MARINE FC Officiel (@mrneofficiel) April 6, 2023

ESPOIR FC

Umuryango wa Espoir football club wifatanyije n'abanyarwanda muri iki gihe cyo kwibuka abazize Jenoside yakorewe Abatutsi mu 1994.

Twibuke Twiyubaka. pic.twitter.com/IBMJRY9KY4

— ESPOIR FC 🇷🇼 (@espoirfc1) April 7, 2023

REG Basketball Club

#Kwibuka29 pic.twitter.com/coRvzEDlpD

— REG BASKETBALL CLUB 🏀🇷🇼 (@regbbcofficial) April 7, 2023

REG Women Basketball Club

#Kwibuka29 pic.twitter.com/pWz8iNYdvz

— REG Women BBC Official (@regwomenbbc) April 7, 2023

APR WOMEN Basketball Club

APR Women BBC joins all Rwandans in the 29th commemoration of the 1994 Genocide against the tutsi

Kwibuka Twiyubaka#Kwibuka29 pic.twitter.com/cKyjFBwzWv

— APR Women BBC official (@AprWomenbbc) April 7, 2023

Amashyirahamwe y’imikino

FERWAFA

As we remember our brothers and sisters victims of the 1994 Genocide against the Tutsis, as football athletes we pay tribute to the lives that were cut short and pledge our full support in building a united Rwanda.#Remember_Unite_Renew#Kwibuka29 pic.twitter.com/U8YKpYvo5E

— Rwanda FA (@FERWAFA) April 7, 2023

« Rubyiruko duharanire kwiga amateka kandi dukosore ibyakozwe nabi bityo tuzubaka u Rwanda twifuza kandi rubereye bose. »@HenryMuhireh #Kwibuka29 pic.twitter.com/2iPtvc433a

— Rwanda FA (@FERWAFA) April 9, 2023

« Mu gihe twibuka ku nshuro ya 29 Jenoside yakorewe Abatutsi muri Mata 1994 dukwiye no kuzirikana ku butwari, umurava n’ubudaheranwa byaranze abayihagaritse »

Bwana @OlivierNMugabo
Perezida wa FERWAFA#Kwibuka29 pic.twitter.com/huNlNz9KsS

— Rwanda FA (@FERWAFA) April 8, 2023

FERWAHAND

Ishyirahamwe ry'umukino wa Handball mu #Rwanda ryifatanyije n'abanyarwanda mu #Kwibuka ku nshuro ya 29 Jenoside yakorewe Abatutsi mu mwaka wa 1994.#Kwibuka29#KwibukaTwiyubaka pic.twitter.com/kQQVbfZRcX

— Rwanda Handball Federation (@FerwahandRwanda) April 7, 2023

Basketball Africa League (BAL)

Remember. Unite. Renew. #Kwibuka29 pic.twitter.com/P6EAs7HhKU

— Basketball Africa League (@theBAL) April 7, 2023

FERWABA

Today, we join Rwandans in the 29th commemoration of the 1994 Genocide against the Tutsi.

Remember-Unite-Renew

Ubuyobozi n'abakozi ba FERWABA bifatanyije n'Abanyarwanda kwibuka ku nshuro ya 29 Jenoside yakorewe Abatutsi muri 1994.

Kwibuka Twiyubaka#Kwibuka29 pic.twitter.com/kNsXjBWdOU

— FERWABA 🏀🇷🇼 (@ferwabaRW) April 6, 2023

FRVB

Today, Rwanda Volleyball Federation joins all Rwandans and the world for the 29th commemoration of the 1994 Genocide against the Tutsi.

Remember-Unite-Renew#Kwibuka29 pic.twitter.com/V6f30R7BgM

— FRVB | RWANDA VOLLEYBALL (@Rw_Volleyball) April 7, 2023

FERWACY

Fédération Rwandaise du Cyclisme (FERWACY) joins Rwandans and the world as we commemorate the 1994 Genocide against the Tutsi.

Remember - Unite - Renew #Kwibuka29 pic.twitter.com/n6CYTMVyfx

— 𝙁𝙀𝙍𝙒𝘼𝘾𝙔 (@cyclingrwanda) April 6, 2023

Abayobozi batandukanye bunamiye Abatutsi bazize Jenoside

Husi yabibasabye ku wa Gatatu tariki 12 Mata 2023, ubwo we kimwe n’abandi bayobozi biganjemo ab’amatorero, abakristu n’abandi, bitabiraga umuhango wo Kwibuka ku nshuro ya 29 Jenoside yakorewe Abatutsi mu 1994, by’umwihariko abari abayoboke b’Itorero ry’ivugabutumwa ry’Inshuti mu Rwanda (Eglise Evangelique des Amis au Rwanda) ryateguye icyo gikorwa, barimo abakristu, abarimu, abanyeshuri n’abakozi b’iryo torero bishwe muri Jenoside.

Ni igikorwa cyabereye mu Murenge wa Kagarama mu Karere ka Kicukiro, ahari icyicaro cy’iryo torero, ariko kikaba kigenda kibera no mu tundi turere 19 rikoreramo. Muri Kigali babashije kumenya abantu 35 bishwe muri Jenoside, ari na bo amazina yabo yanditse ku rukuta rw’ikimenyetso cyo Kwibuka, ariko bakaba bagishakisha n’abandi kuko ngo hari benshi babuze.

Husi Monique ashyira indabo ahari ikimenyetso cyo Kwibuka

Mu butumwa Husi yagejeje ku bitabiriye icyo gikorwa, yasabye Abashumba b’amatorero kwigisha ibikumira amacakubiri yoretse u Rwanda.

Yagize ati “Ubutumwa duha abashumba b’amatorero n’abanyamadini muri rusange, ni ugukangurira abayoboke babo kugira urukundo, gufatanya no kubana amahoro, kugira ngo icyahembera amacakubiri gikumirwe. Nk’abashumba batanga ubutumwa bukumvwa na benshi, turabakangurira kwimakaza umuco w’amahoro babicishije mu ivugabutumwa”.

Yakomeje asaba Abanya-Kicukiro n’Abanyarwanda muri rusange gutanga amakuru y’abishwe muri Jenoside hataramenyekana aho bajugunywe, gukira ngo bashyingure mu cyubahiro kuko biri mu biruhura abarokotse.

Husi yasabye Abashumba b’amatorero kwigisha ibikumira amacakubiri

Kayitesi Marie Rose watanze ubuhamya, yavuze uko yatotejwe ku ishuri mbere gato ya Jenoside, by’amahirwe ararokoka.

Ati “Noherejwe kwiga mu yisumbuye i Rwaza muri Musanze, ngezeyo ndi kumwe na papa, abana baratuzenguruka bakomera ngo dore Abatutsi sha! Ibyo byarakomeje mu ishuri, abarimu bakajya baduhagurutsa ngo abandi barebe Abatutsi, ku buryo byanteye ihungabana. Gusa hari umukobwa wagiraga umutima mwiza witwa Elina, akankomeza, ku buryo n’igihe kigeze cyo kuduhiga ngo batwice, yandwanyeho, kugeza nsubiye mu rugo i Kigali, ku bw’imana ndarokoka”.

Kayitesi ashima itorero ry’ivugabutumwa ry’Inshuti abarizwamo, kuko ryamwomoye ibikomere, abasha kwiyakira, ariyuba, ubu akaba ageze igihe cyo gufasha abandi bahura n’ihungabana.

Uwiragiye Geneviève yashimiye Inkotanyi zahagaritse Jenoside

Uhagarariye abacitse ku icumu muri iryo torero, Uwiragiye Geneviève, avuga ko bishimira kuba u Rwanda rwarabohowe, ubu bakaba babayeho mu mahoro.

Ati “Nk’abarokotse Jenoside yakorewe Abatutse, Inkotanyi turazishimira cyane kuko ari zo zaduhaye ubuzima. Abari abana ubu twabaye abagore n’abagabo bahamye, twariyubatse kubera Leta y’Ubumwe itwitaho uko bishoboka, twarize turaminuza, mbese dufite ikizere cyo kubaho”.

Yakomeje asaba abarokotse muri rusange gukomera, kudaheranwa n’agahinda ndetse Kwibuka bigakomeza guhabwa agaciro, bagahesha abishwe bazira uko baremwe, ariko kandi batazimye kuko amashami yabo yashibutse.

Umuvugizi w’Itorero ry’Ivugabutumwa ry’Inshuri mu Rwanda, Pasiteri Mupenda Aron, yihanganishije abarokotse Jenoside ndetse avuga ko itorero rizakomeza kubaba hafi.

Ati “Turihanganisha abacitse ku icumu rya Jenoside. Mu nshingano zacu nk’itorero tubaba hafi, turabasura, tubakomeza ndetse tukabaremera, nk’uko itegeko ry’Imana rivuga ngo ‘itorero cyangwa idini ry’ukuri ni irisura abababaye’. Dutanga ubutumwa kandi buri gihe bwo kurwanya ingengabitekerezo ya Jenoside ndetse twamagana abapfobya n’abahakana Jenoside, kugira ngo itazongera ukundi”.

Pasiteri Mupenda Aron, Umuvugizi w’Itorero ry’Ivugabutumwa ry’Inshuri mu Rwanda

Yasabye abakristu n’Abanyarwanda muri rusange gukomeza gusigasira amateka ya Jenoside, bayigishe abana, kugira ngo atazibagirana, ariko kandi bababwira n’ibikorwa by’ubutwari byaranze bamwe mu Banyarwanda, ari byo bigejeje u Rwanda ku iterambere.

Uwo muhango waranzwe n’ubuhamya, indirimbo zo kwibuka, urubyiruko ruvuga ibyaranze imibereho y’abibukwa ndetse hacanwa urumuri rw’ikizere.

Bibukijwe ko kudatanga amakuru y’ahari imibiri y’abishwe muri Jenoside ari icyaha

Yabigarutseho ku wa 12 Mata 2023, mu muhango wo Kwibuka ku nshuro ya 29 Jenoside yakorewe Abatutsi muri Mata 1994, biciwe kuri Paruwasi Gatolika ya Mukarange.

Uwamahoro Marie Claire watanze ubuhamya, yavuze ko abantu benshi batangiye guhungira kuri Paruwasi ya Mukarange, guhera tariki ya 09 Mata bizeye umutekano kuko bumvaga ko abicanyi batatinyuka kubicira mu nzu y’Imana.

Ariko ngo ikizere cyaraje amasinde kuko ku itariki ya 12 Mata 1994, abicanyi bayobowe na Burugumesitiri Senkware Celestin binjiye muri Kiliziya bica Abatutsi bari bahahungiye, bataretse n’abapadiri kuko bari banze gutanga intama z’Imana zabahungiyeho.

Mu kubica ngo babanje gusoma urutonde rw’abo babanza kwica, hanyuma abo bashakaga mbere babasoje bakurikizaho n’abandi.

Umuyobozi w’Akarere ka Kayonza, John Bosco Nyemazi, yagarutse ku mateka ya Paruwasi ya Mukarange mu gihe cya Jenoside yakorewe Abatutsi mu 1994, ahahungiye abantu benshi baturutse mu bice bitandukanye by’icyari Komine Muhazi, Kayonza, Rukara ndetse n’abaturutse muri Komine Murambi, bahunze ubwicanyi n’ubugome bwa Gatete.

Yagarutse kuri bamwe mu banyapolitiki bagize uruhare mu bwicanyi bwakorewe kuri Paruwasi ya Mukarange ku tariki ya 12 Mata 1994, barimo Burugumesitiri Senkware Celestin, Kosima Kayisabe wari Assistant Burugumesitiri, Segihamira na we wari Assistant Burugumesitiri wa Kayonza, Nsabimana wari Inspecteur w’amashuri, Rwabuhungu wari umucamanza i Murambi, Konseye Uwimana n’abandi.

Ubusanzwe Mukarange yari muri Komini Muhazi ariko kubera ko yari yegereye Senkware, kandi akaba yari interahamwe ikomeye mu gihe cya Jenoside, ni we wayoboye ako gace.

Uwavuze mu izina ry’imiryango ifite imibiri yabonetse vuba yashyinguwe, Nyirishema Jean de Dieu, wo mu Murenge wa Murama, yavuze ko iyicwa ry’Abatutsi ryateguwe kera kuko byigishijwe mu mashuri no mu miryango ndetse banahezwa mu Gihugu.

Uyu umaze gushyingura umubyeyi we inshuro ebyiri kubera ko yatemwemo ibice, avuga ko bibabaje kuba abagize uruhare mu kumwica bataramuhaye amakuru y’aho bataye umubiri we, kandi ari mu murima bahingamo ndetse n’uwamwishe yararangije igihano cye, akamuha n’imbabazi ariko agakomeza kumuhinga hejuru.

Yasabye abakoze Jenoside basoje ibihano bakagaruka mu baturage, abo mu miryango yabo babonye ahagiye hajugunywa imibiri y’Abatutsi bishwe muri Jenoside, kuyigaragaza igashyingurwa mu cyubahiro.

Ati “Nagira ngo nsabe abakoze Jenoside bagarutse mu miryango, nsabe imiryango yabo, hari abana babibonye turi mu kigero kimwe, hari abagore babo babirebaga, ni byiza ko bagaragaza aho bajugunye iyo mibiri kuko iracyahari.”

Imibiri yabonetse vuba yashyinguwe mu cyubahiro

Senateri Bideri John Bonds na we yagarutse ku kibazo cy’imibiri itaraboneka ngo ishyingurwe mu cyubahiro.

Yibukije ko hari itegeko rihana abafite amakuru bakayahishira ku bushake, bityo ko buri wese akwiye gutera intambwe akagaragaza aho iyo mibiri iherereye.

Yagize ati “Tunibutsa ko hari itegeko rihana ababa bafite amakuru bakayahishira ku bushake. Twagira ngo twibutse ababa bafite ayo makuru kuyatanga.”

Abarokokeye i Mukarange kimwe n’uwavuze mu izina rya Ibuka, Mudahemuka Audace, bashimiye Ingabo zahoze ari iza RPA ku bwitange zagaragaje zikabakiza abicanyi.

Ibuka yasabye by’umwihariko urubyiruko kurwanya ingengabitekerezo ya Jenoside, ahubwo rugakunda Igihugu kuko ari bo bayobozi b’ejo.

Mu Rwibutso rwa Jenoside rwa Mukarange kugeza ubu hashyinguyemo imibiri 8,732, harimo Abatutsi bari bahungiye kuri Paruwasi ya Mukarange bakahicirwa n’abandi biciwe ahantu hatandukanye mu Karere ka Kayonza, mu byahoze ari amakomini yahujwe akabyara ako karer.

Mu kwibuka ku nshuro ya 29 Jenoside yakorewe Abatutsi muri Mata 1994, i Mukarange hashyinguwe mu cyubahiro imibiri irindwi yabonetse mu Mirenge ya Mukarange, Murama na Mwiri.

IPRC Tumba yageneye ibiribwa n’ibiryamirwa imwe mu miryango y’abarokotse Jenoside nyuma yo kubaha umuriro uturuka ku mirasire y’izuba

Imiryango yasuwe na IPRC Tumba iherutse guhabwa amashanyarazi akomoka ku mirasire y’izuba, inagenerwa ibiribwa n’ibiryamirwa.

Igikorwa cy’iryo shuri rikuru cyo gusura abarokotse Jenoside yakorewe Abatutsi cyo ku itariki ya 11 Mata 2023, cyahuriranye n’umuhango wo kwibuka ku nshuro ya 29 Jenoside yakorewe Abatutsi mu 1994, aho muri iryo shuri yari inshuro ya 19 hategurwa umuhango wo kwibuka Jenoside, umuhango watumiwemo n’umuhanzi Munyanshoza Dieudonné.

Umuyobozi wa IPRC Tumba, Eng. Mutabazi Rita Clemence, yavuze ko umuhango ngarukamwaka wo kwibuka Jenoside muri iryo shuri, ari umwanya wo gutanga ubutumwa ku rubyiruko, ukaba n’umwanya wo gusura abacitse ku icumu barabacanira, banabaha ibiribwa.

Ati “Mu gihe twibuka ducana urumuri, twahisemo gukora igikorwa ngarukamwaka cyo gucanira imiryango y’Abacitse ku icumu rya Jenoside, kugira ngo tujye twifatanya n’iyo miryango, tunabafasha kongera icyizere cyo kubaho, ariko kandi tunigisha urubyiruko”.

Umuyobozi wa IPRC Tumba, Eng. Mutabazi Rita Clemence

Uwo muyobozi yavuze ko iryo shuri rimaze gucanira imiryango irenga ijana, ibyo bikajyana n’amasomo abanyeshuri biga ubwo bumenyi bugafasha n’igihugu kwesa imihigo ya 2024 aho buri munyarwanda azaba afite umuriro. Avuga kandi ko ari n’umwanya wo kwerekana igisobanuro cyo gutanga urumuri ku bacitse ku icumu rya Jenoside.

Imiryango 20 y’abarokotse Jenoside yahawe umuriro, ibiribwa n’ibiryamirwa, ni iyo mu mirenge ya Burega, Cyinzuzi, Kinihira. Ni mu gihe abo muri Tumba na Bushoki bahawe umuriro mu mwaka ushize, ubu bahawe ibiribwa.

Icyo gikorwa cyo gucanira abarokotse Jenoside no kubasura, cyashimishije abaturage muri rusange, bavuga ko ubuzima bwabo bugiye kurushaho kugenda neza.

Mukakamanzi Donatha yishimiye umuriro yahawe na IPRC Tumba

Mukakamanzi Donatha wo mu Murenge wa Burega ati “Ibyishimo byansaze kuba ndi umukecuru w’imyaka irenga 80 nkabona baza kuncanira! Nagendaga ngwa ku gikuta cy’inzu, ubu ndumva umutima wanjye ukeye”.

Arongera ati “Ibi bikoresho ndabifata neza kuko umuriro uje ukenewe cyane. Kunsura bingaruyemo icyizere kuko umuntu yahoraga agira umutima uhagaze, ariko iyo ubonye abantu bagusura biguha imbaraga”.

Karasi Faustin ati “Sinabona uko nashimira iri shuri, ndanezerewe nari mu kizima, ngacana isitimu ikazima, ngacana urubingo rukazima, nkaba mu bwigunge”.

Arongera ati “Mfite ka matora ko mu 1996, kari gashaje ndaryama nkamera nk’uryamiye imbaho, ariko ubu ngiye kurara nepa. Kudusura bitwongerera icyizere cyo kubaho, ni ukudufata mu mugongo, muri intumwa za Perezida wa Repubulika mumudushimire”.

Umuyobozi w’Akarere ka Rulindo wungirije ushinzwe imibereho myiza y’Abaturage, Mutaganda Théophile

Umuyobozi w’Akarere ka Rulindo wungirije ushinzwe imibereho myiza y’Abaturage, Mutaganda Théophile, waje kwifatanya na IPRC Tumba mu kwibuka Jenoside yakorewe Abatutsi, yavuze uburyo muri Jenoside urubyiruko rwakoreshejwe mu gusenya Igihugu, Leta y’Ubumwe bw’Abanyarwanda ikaba yarahisemo kurukoresha mu kucyubaka.

Mutaganda yagarutse ku ruhare rwa IPRC Tumba n’abanyeshuri bayo mu gufasha abarokotse Jenoside.

Ati “Ndashimira abayobozi, abarimu n’abanyeshuri ba IPRC Tumba, kuko bitaye cyane ku barokotse Jenoside batari bafite amashanyarazi, mukaba mwabafashije kuva mu mwijima, tubashimira kandi ko mwatekereje no kubaremera”.

Uwo muyobozi muri Rulindo yasabye urwo rubyiruko kwirinda abaruyobya, abashishikariza guharanira gukora ibyiza, ibibi bakabyamaganira kure.

Abiga muri IPRC Tumba bacanye urumuri rw’icyizere

Abayobozi muri IPRC Tumba n’abanyeshuri, basuye imiryango y’Abarokotse Jenoside

Imibiri itandatu yashyinguwe mu cyubahiro mu rwibutso rwa Kiziguro

Yabitangaje ku wa Kabiri tariki ya 11 Mata 2023, mu kwibuka ku nshuro ya 29 Jenoside yakorewe Abatutsi Mata 1994, ku musozi wa Kiziguro.

Ni umuhango wabanjirijwe n’urugendo ku maguru rwakozwe ku gicamunsi cyo kuri uyu wa Mbere tariki ya 10 Mata 2023, hakurikiraho ijoro ryo kwibuka, ahatanzwe ubuhamya ku bwicanyi bwakorewe kuri Paruwasi ya Kiziguro.

Ku musozi wa Kiziguro by’umwihariko Abatutsi bari bahungiye muri Paruwasi Gatolika ya Kiziguro, tariki ya 11 Mata ntijya iva mu mutwe ababashije kurokoka, kuko bishwe n’interahamwe zifatanyije n’abasirikare barimo bahunga urugamba i Gabiro, ndetse bamwe bajugunywa mu cyobo cya metero hafi 28 z’ubujyakuzimu ari bazima.

Hashize imyaka ibiri uru rwobo, rugomorowe, imibiri yari yarajugunywemo ikurwamo, iratunganywa ndetse ishyingurwa mu cyubahiro.

Sibomana, ashima Leta ku bw’inkunga ikomeje gufashisha abarokotse Jenoside yakorewe Abatutsi aho mu myaka 29, imaze kubatangaho arenga Miliyari 336Frw mu nzego zose harimo ubuzima, uburezi, kububakira amacumbi ndetse n’inkunga y’ingoboka ku bakecuru n’abasaza, ndetse n’abandi bafite intege nke kimwe n’inkunga zijyanye n’imishinga iciriritse.

Mu izina ry’abacitse ku icumu rya Jenoside yakorewe Abatutsi mu Karere ka Gatsibo, cyane aborokokeye kuri Paruwasi Gatolika ya Kiziguro, yavuze ko bifuza ko muri Kiliziya hashyirwa ikimenyetso nk’ahantu haguye abantu benshi kandi abenshi muri bo ari abakirisitu Gatolika.

Yifuje kandi ko ahakorerwa ibikorwa byo kwibuka i Kiziguro, hakubakwa inzu yakwifashishwa mu kwita ku bahura n’ihungabana, cyane igihe cyo kwibuka.

Ikindi yavuze ko bifuza ko mu rwibutso rushya rwamaze kuzura, hashyirwamo amateka ya Jenoside yakorewe mu cyahoze ari Komini Murambi.

Icyihutirwa ariko ngo mu rwego rwo kwibuka ku nshuro ya 30 Jenoside yakorewe Abatutsi, nka Ibuka ngo bateguye umushinga wo gukora ubuhamya 100 bwanditswe neza, bwifashishwa mu gihe cyo kwibuka hazakurwamo 30 buzifashishwa mu kwibuka Jenoside yakorewe Abatutsi, ku nshuro ya 30.

Ati “Umwaka utaha tuzaba twibuka ku nshuro ya 30, nka Ibuka twateguye umushinga wo gukora ubuhamya 100 twazifashisha twibuka, tukazakuramo 30 tuzifashisha twibuka ubutaha ku nshuro ya 30. Uwabidushyigikiramo twashima tukazanawumugezaho kuko nitutandika ubu buhamya abakuru barasaza kandi natwe ntirudutinya, si byiza ko babusazana ahubwo twabwandika mu buryo bwa gihanga.”

Mu buhamya bwatanzwe na Uwihanganye Didier, yagarutse ku nzira y’umusaraba Abatutsi banyuzemo aho bicwaga n’interahamwe ndetse n’abasirikare, ku mabwiriza yari yatanzwe na Burugumesitiri Gatete Jean Baptiste.

Yavuze ko abantu benshi cyane aho yarokokeye i Gakoni ngo bapfuye ku itariki 11, ahanini bitewe n’ikinyoma cyahimbwe n’umuyobozi witwaga Munyabuhoro, yagendaga avuga ko batanze ihumure abantu benshi bava mu bwihisho barabica.

Yagize ati “Yamaze kubeshya gutyo maze ababyeyi bacu n’abavandimwe bavaga aho bari bihishe kuko mbere bari barababuze, uwo munsi ubwo i Kiziguro barimo kwicwa n’i Gakoni, ni uko byari bimeze kuko bishe abantu benshi cyane.”

Abatanze ubuhamya bose bashimye Ingabo zai iza RPA/FPR Inkotanyi, ku bwitange bagaragaje bakabakura mu menyo ya rubamba, bakabasubiza ubuzima ndetse bakanabubakira Igihugu gifite icyerekezo, gishyira imbere ubumwe bw’Abanyarwanda.

Muri uyu muhango wo kwibuka ku nshuro ya 29 Jenoside yakorewe Abatutsi, hanashyinguwe mu cyubahiro imibiri itandatu yabonetse vuba mu Mirenge ya Rugarama na Kiziguro.

Umunyamabanga wa Leta muri Minisiteri y’Ubutabera, Amb. Solina Nyirahabimana, yavuze ko bibabaje kuba ku nshuro ya 29 hibukwa Jenoside yakorewe Abatutsi, hakiri imibiri ishyingurwa mu cyubahiro ndetse hari n’indi itaraboneka, ariko abantu bakaba badatanga amakuru.

Yashishikarije buri wese ufite amakuru ku hantu haba hari imibiri itarashyingurwa mu cyubahiro, kuyatanga igashyingurwa mu cyubahiro.

Yagize ati “Birababaje kuba imyaka 29 ishize tugishyingura imibiri igenda iboneka ku gasozi. Rwose turasaba uwaba afite amakuru y’ahari imibiri kuyatanga nayo igashyingurwa mu cyubahiro.”

Urwibutso rwa Jenoside rwa Kiziguro, ruruhukiyemo imibiri y’Abatutsi bazize Jenoside 20,121 hakaba hiyongereyeho indi itandatu yabonetse mu Mirenge ya Rugarama na Kiziguro.

Habayeho urugendo ruva ahahoze ETO-Kicukiro rwerekeza i Nyanza ya Kicukiro mu kwibuka urugendo abishwe babanje gukoreshwa

Ikigo cy’ishuri ry’imyuga rya Kigali (ETO) ryari ishuri ry’abapadiri b’Abasalizayani, kuva mu 1963 Abatutsi babahungiragaho bakabafasha ariko bigeze mu 1994 ntabwo bigeze babafasha muri icyo kigo tariki ya 8 Mata 1994 kugeza tariki ya 11/04/1994. Abarimo barishwe, abandi bajyanwa kwicirwa i Nyanza ya Kicukiro.

Mu 1994 muri ETO hari ingabo za MINUAR zari mu butumwa bw’amahoro. Byatumye Abatutsi bahahungira ari benshi bizeye kurindwa n’ingabo zifite intwaro.

MINUAR ntiyigeze ibarinda ahubwo yabasize mu menyo y’Interahamwe n’abasirikare batangira kubica ku wa 11/04/1994.

Col Rusatira Leonidas yazanye abasirikare benshi batangira Abatutsi bashakaga guhungira kuri CND ku ngoro y’Inteko Ishinga Amategeko no kuri Sitade Amahoro i Remera, barabashorera bagenda babica kuva ahitwa Sonatubes kugera i Nyanza ya Kicukiro.

Ingabo z’Ababiligi zatereranye Abatutsi muri ETO zari ziyobowe na Lieutenant Luc Lemaire, akaba yari akuriwe na Lieutenant-Colonel Dewez, bose bakaba bari bayobowe na Colonel Luc Marshall ari na we wari wungirije Jenerali Dallaire ku buyobozi bw’ingabo za MINUAR. Abo ni bo bakwiye kubazwa mbere y’abandi iyicwa ry’Abatutsi bari bahungiye muri ETO.

Minisitiri Dr Bizimana avuga ko mu kwibuka Abatutsi biciwe i Nyanza ibyo byose bikwiye kwibukwa kandi bigahabwa agaciro n’amahanga akamenya uruhare rwayo.

Ati “Uyu munsi turibuka tuzirikana uruhare rw’amahanga, uruhare rw’ibihugu by’umuryango mpuzamahanga w’abibumbye wagize mu gutererana Abatutsi bakicwa. Ibyo abakiri bato mubimenye u Bubiligi bwaradutereranye kuva kera”.

Minisitiri Dr Bizimana avuga ko u Bubiligi bwakoronije u Rwanda bubihawe n’Umuryango w’Abibumbye habaho n’amasezerano bise ay’indagizo kuko mu mwaka wa 1946 u Bubiligi bwashyizeho itegeko rigena uburyo buzubahiriza icyo ayo masezerano yateganyaga ko u Bubiligi bufite inshingano yo kugeza ku Rwanda ku bwisanzure bwuzuye mu rwego rwa Politiki, ubukungu, imibereho myiza y’abaturage n’iterambere mu burezi, gufasha abenegihugu kugira ubushobozi bwo kwigenera ibibakwiye no kuyobora igihugu cyabo ubwabo, gufashwa mu iyubahirizwa ry’uburenganzira bwa muntu n’ubwisanzure bwa bose nta vangura rishingiye ku bwoko, igitsina ururimi cyangwa idini.

Ati “Ngira ngo murabyumva iyo ayo masezerano yubahirizwa ntabwo Jenoside yari kuba”.

Minisitiri Dr Bizimana avuga ko ubukoroni ari bwo bwashyizeho umutegetsi bushingiye ku irondabwoko.

Umwe mu barokokeye i Nyanza ya Kicukiro, Niwemfura Kaberuka Marie Aimée, yatanze ubuhamya bw’ibyahabereye tariki 11 Mata 2023 mu gihe cya Jenoside ingabo za MINUAR zikahabasiga Interahamwe zikabica.

Mu nzira y’Inzitane yanyuzemo yabashije kurokoka wenyine na Se, abavandimwe be 3 na nyina barabica.

Yaje kwiyubaka ntiyaheranwa n’agahinda ndetse aranashibuka akaba ashimira ingabo z’Inkotanyi zamurokoye.

Nyanza ya Kicukiro hari Urwibutso rwa Jenoside rushyinguyemo imibiri y’Abatutsi basaga ibihumbi 105, barimo abiciwe aho i Nyanza n’abandi bavanywe mu bice bitandukanye by’Akarere ka Kicukiro.

Mu bitabiriye uyu muhango harimo Ambasaderi w’u Bubiligi mu Rwanda, Bert Versmessen, Ambasaderi wa Israel mu Rwanda, Dr. Ron Adam n’abandi bahagarariye inyungu z’ibihugu byabo mu Rwanda.

Kureba andi mafoto, kanda HANO

Amafoto: Moise Niyonzima/Kigali Today

Buri mwaka amashyirahamwe atandukanye y’imikino mu Rwanda ategura irushanwa rigamije kwibuka Abasportifs bazize Jenoside yakorewe Abatutsi 1994 (Genocide Memorial Tournament - GMT).

Muri uyu umwaka wa 2023, amashyirahamwe agera kuri 20 y’imikino yamaze gutangaza amatariki hazakinirwaho GMT 2023, aho imikino izabimburirwa na Federasiyo y’umukino wo koga ifite iri rushanwa mu mpera z’iki Cyumweru tariki 15/04/2023.

Kiziguro SS yegukanye igikombe mu bagore muri GMT 2022

Gicumbi mu bagabo ni yo yegukanye iki gikombe umwaka ushize muri Handball

Gahunda y’imikino yatanzwe n’amashyirahamwe atandukanye ndetse n’aho iyi mikino izabera:

1. 15/04/2023 (Kigali, Nyarutarama): Federasiyo y’umukino wo Koga:

2. 22/04/2023 (Kigali): Federation ya Table Tennis

3. 30/04/2023 (Kigali): Federasiyo y’umukino w’amagare ‘FERWACY”:

4. 06/05/2023 (Kigali, Kimisagara): Badminton

5. 06/05/2023 (Kigali, Nyarutarama): Golf

6. 13/05/2023 (Nyaruguru): Federasiyo ya Triathlon

7. 13/05/2023 (Kigali, Kacyiru): Federasiyo ya Rugby

8. 15-20/05/2023 (IPRC Kigali): Federasiyo ya Tennis mu Rwanda

9. 20/05/2023 (Kigali, Ecole Notre Dame des Anges): Federasiyo ya Karate

10. 20/05/2023 (Kigali, Gisimba Hall): Federasiyo ya Fencing

11. 20-21/05/2023 (Kigali): NPC/WheelChair Basketball

12. 02-04/06/2023 (Kigali): Federasiyo ya Volleyball

13. 02-04/06/2023 (Kigali): Federasiyo y’imikino y’abakozi

14. 03-04/06/2023: Federasiyo ya Handball mu Rwanda “FERWAHAND”

15. 08-21/06/2023 (Kigali, Gahanga Cricket Stadium): Federasiyo ya Cricket

16. 10/06/2023 (Kigali): Skating

17. 10-11/06/2023: NPC/Sitting Volleybal

18. 15-18/06/2023 (Kigali): Federasiyo ya Basketball

19. 17-18/06/2023 (Kigali): NPC/ GoalBall

20. 17-18/06/2023 (Kigali): Kung-Fu Wushu

Gen Kabarebe James

Bamwe ngo bavugaga ko rutashobora kubaho nk’Igihugu, ahubwo ko rwagabanywamo ibice bikomekwa ku bihugu bituranye na rwo. Abandi ngo babonaga ibyiza ari ukugabanya u Rwanda mu bice bice, igice cy’Iburasirazuba kigatuzwamo Abatutsi bakeya bari basigaye, naho igice cy’Iburengerazuba kigatuzwamo Abahutu, n’ubwo Gen Kabarebe we avuga ko atumva uko byari gukorwa.

Impamvu y’ibyo byose byavugwaga, ngo ni uko urugamba rwo kubohora igihugu no guhagarika Jenoside rwarangiye nta kintu kiri mu gihugu cyashingirwaho kiyubaka kuko Guverinoma yari yasenyutse, abaturage bahunze, hasigaye gusa abantu bakeya bari bacitse ku icumu, n’abandi Banyarwanda bari batahutse bava mu bihugu bari barahungiyemo.

Yavuze ko Igihugu ntacyo cyari gisigaranye cyashingiraho kiyubaka, kuko nta na kimwe cyari gihari, uretse kuba cyaragize Umuyobozi umwe, kandi ushoboye ari we Perezida Kagame wavuze ati, u Rwanda rugomba gukomeza kubaho.

Gen Kabarebe yagize ati “Ngira ngo mu gihe turimo tugerageza kumva igisobanuro cy’ubuyobozi, ntekereza ko kureba aho u Rwanda rwavuye, n’aho turi uyu munsi, biduha igisubizo cyiza”.

Gen Kabarebe yavuze ko mu 1990, urugamba rwo kubohora u Rwanda rutangira, rwatangijwe n’urubyiruko rw’abasore bari bafite mu myaka 20, bari bafite ababyeyi bamaze imyaka isaga 30 mu bibazo byinshi birimo ubuhunzi, badafite Igihugu bita icyabo, nyuma abari bakuru muri urwo rubyiruko bari mu gisirikare cya Uganda bakivamo, batangira urugamba ari abantu bakeya bagera nko kuri 400 ku buryo abazi iby’igisirikare bavugaga ko ibyo ari ukwigerezaho.

Ibyakozwe n’urwo rubyiruko byafashwe na bamwe nko kwigerezaho kuko ngo ubusanzwe bitabaho kumva abantu bangana batyo batera Igihugu gifite ibikoresho bikomeye bijyanye n’intambara, gifite ibihugu by’inshuti, n’ibindi ngo batekereze ko bazatsinda iyo ntambara. Ariko Kabarebe avuga ko byabaye, ndetse urwo rubyiruko rugatsinda urugamba.

Gen Kabarebe avuga ko mu byumweru bikeya nyuma y’uko urugamba rwo kubohora u Rwanda rutangira, Guverinoma yariho icyo gihe, yari ishyigikiwe n’ibihugu by’inshuti, harimo u Bufaransa, u Bubiligi, Mobutu wari Perezida w’icyahoze ari Zaire na we ngo yohereje ingabo nyinshi, ingabo z’ibyo bihugu byose ziza ziyongera ku ngaho za Leza yariho icyo gihe, zose zije kurwanya ingabo nkeya zari zambutse ziva muri Uganda, zihanganira mu Burasirazuba bw’u Rwanda.

Mu byumweru bikeya, urugamba rutangiye, byagaragaraga ko urugamba rwananiranye nyuma y’uko uwari umuyobozi mukuru w’ingabo icyo gihe, Gen. Fred Rwigema n’abandi bayobozi ndetse n’abasirikare bamwe bishwe, abandi bakomeretse, ndetse biba ngombwa gusubira inyuma nk’uko Gen. Kabarebe yabisobanuye.

Perezida Paul Kagame uyoboye u Rwanda muri iki gihe, wari umunyeshuri muri Amerika, ngo yabaga akurikira ibibera ku rugamba, nyuma aza gufata umwanzuro wo kuva mu ishuri aho yari ari aza ku rugamba. Mu bintu by’ibanze yakoze akihagera ngo kwari ukubaza abayobozi b’urugamba igituma batsindwa ku rugamba, ababwira ko kuvuga ko umwanzi afite ingufu nyinshi byaba ari urwitwazo ku ntege nkeya zabo.

Icyo yakoze akihagera ngo kwari ukugirana ibiganiro n’abasirikare ndetse n’abayobozi b’urugamba icyo gihe, abasobanurira ibyo we yatekerezaga byafasha mu gutsinda urwo rugamba bari barimo, ababwira ikintu cyo gukunda Igihugu, nyuma bibinjiramo, ku buryo ngo n’uwapfaga yabaga azi ko apfuye kubera impamvu yumvikana kandi ikwiye yo gukunda Igihugu.

Ikindi yababwiye, ngo ni ikintu cyo kutirebaho no kutikunda ngo umuntu yirebe wenyine ku giti cye (selfishness). Uko kugira umutima wo gukunda Igihugu, kutikunda no kutirebaho umuntu ku giti cye gusa, kugira imyitwarire iboneye (Discipline), kumenya kubaho mu buzima uko bumeze kose(adaptation) no kumenya kwiyemeza no gufata umwanzuro nubwo byaba bikomeye (taking risks), n’ibindi …, Gen Kabarebe avuga ko byo byafashije gutsinda urugamba rwo kubohora Igihugu nubwo barwanaga n’ingabo zikomeye kandi zifite ibikoresho kuva urugamba rutangira”.

Yagize ati “Mu gihe cy’urugamba rwacu, hari ibyemezo byinshi bikomeye cyane byafashwe (taking risks), ariko ibyo byemezo ni byo byaje kutugeza ku musaruro mwiza. Ikindi kintu gikomeye cyadufashije muri uru rugendo, ni ukugira umurongo usobanutse tugenderaho, wadutandukanyaga n’abo twarwanaga. Ku bo twarwanaga, umurongo wabo, ingengabitekerezo yabo yari imwe, yari iyo gukora Jenoside, kwica abantu. Iyo bafataga umusirikare wacu wakomeretse, baramwicaga, bamukoreraga iyicarubozo kugeza apfuye. Ariko twe iyo twafataga umusirikare w’umwanzi wakomeretse, twaramutwaraga, tukamuvura, nyuma tukamwinjiza mu gisirikare cyacu, kandi ibyo hari icyo byadufashaga mu bijyanye no kubona amakuru twabaga dukeneye mu guhangana n’umwanzi”.

Gen. Kabarebe yavuze ko nubwo abasirikare bari kumwe ku rugamba bumvaga neza icyo barwanira, kandi bifuza kukigeraho, ariko kugira ngo bakomeze kurwana no kudacika intege, byasabaga kugira ubuyobozi budasanzwe bw’umuyobozi w’urugamba icyo gihe, ari we uyoboye u Rwanda muri iki gihe, Perezida Paul Kagame.

Yagize ati “Mu gihe nta kindi kintu na kimwe cyari gihari, nta nkunga twari dufite yaturukaga aho ari ho hose, nta ntwaro nyinshi, nta bunararibonye ku bayobozi b’abasirikare kuko abenshi bari bavuye ku mashuri nk’uko nabibabwiye, rero ubushishozi budasanzwe bw’umuyobozi wacu, bwabaye umusemburo ukomeye mu gutsinda urwo rugamba”.

Gen Kabarebe avuga ko nyuma y’Urugamba rwo kubohora u Rwanda no guhagarika Jenoside, ingabo za Leta y’icyo gihe, zitahunze zose, ku buryo muri Nyakanga 1994, hari izigera ku 1500 zishyikirije ingabo zari zitsinze urugamba, kandi zirazakira barakorana, ibintu avuga ko byari bigoye kubyumva muri icyo gihe, kureba uko imirambo y’Abatutsi bishwe na Leta yariho icyo gihe ikwiriye igihugu cyose, no kubona ingabo zari ku ruhande rw’iyo Leta ziza bagakorana, aho na ho ngo hakaba hagaragaza umurongo usobanutse ingabo zabohoye u Rwanda zigenderaho.

Izo ngabo zari zimaze gutsindwa zikiyemeza kuza gukorana n’ingaho zahagaritse Jenoside, bamwe muri zo ngo bahawe imyanya ikomeye mu gisirikare no muri Polisi y’Igihugu icyo gihe yitwaga ‘gendarmerie’ aho ngo ni ho u Rwanda rwahereye inzira y’ubumwe n’ubwiyunge.

Gen Kabarebe yabwiye abo banyeshuri ba Kaminuza ya African Leadership University – ALU, ko urebye aho u Rwanda ruri uyu munsi, n’ibyo rwanyuzemo byose, ubona ko nta kindi cyarufashije kongera kubaho no kwiyubaka, uretse ubuyobozi bwiza, n’umuyobozi ushoboye. Ibyo bikaba ari urugero ko umuyobozi umwe gusa, yahindura ibintu, yahindura Igihugu kandi bigakunda.

Yabwiye abo banyeshuri ko ubuyobozi (Leadership) ari ikintu cy’ingenzi muri byose, kandi ko bashatse kumva neza icyo ubuyobozi buvuze, basoma igitabo bafite, ari cyo ubuyobozi bwa Perezida Paul Kagame, bakagisoma bahereye ku ntangiriro aho yinjiriye mu rugamba rwo kubohora u Rwanda nyuma y’ibyumweru bikeya rutangiye, kugeza ubu.

Reba ibindi muri iyi Video:

Kurasa burende yari igeze i Kagugu byatumye Jenoside ku Gisozi ihagarara

Iyi burende yari igeze i Kagugu mu rugabano rw’uwo murenge n’uwa Kinyinya mu Karere ka Gasabo, ikaba yaragizwe urwibutso rw’amateka ndetse bayishyira iruhande ibibumbano bishushanya abasirikare b’Inkotanyi bayirashe.

Kalinda Callixte uri mu barokotse Jenoside mu Murenge wa Kinyinya, yaganiriye na Kigali Today mu myaka yashize, avuga ko mu gitondo cyo ku itariki 11 Mata 1994 hari Inkotanyi zari zaraye zinjiye mu mujyi wa Kigali, zikambitse ku musozi wa Kagugu.

Abo basirikare b’Inkotanyi ngo ni bo barashe iyo burende yari ishoreranye n’izindi ebyiri zari zigiye kubuza Abatutsi guhungira kuri ako gasozi ka Kagugu, kuko ngo bari bumvise ko Inkotanyi zahageze.

Kalinda yagize ati “Iyi burende iyo itaraswa ingabo za Habyarimana zari zigiye kumara Abatutsi baturukaga hakurya Karuruma, Kabuye, Gisozi, Kagugu na Gacuriro.”

Uwitwa Sangwa Didier Seth warokokeye ku Gisozi mu Mudugudu wa Gasharu, ahitwa kuri Beretware hafi y’aho Inkotanyi zarasiye iyo burende, avuga ko Jenoside yamaze iminsi itanu gusa muri Gisozi imaze guhitana Abatutsi 100, barimo sekuru na mukuru we.

Avuga ko interahamwe zabishe zari ziyobowe n’uwitwa Oswald Rurangwa, uheruka koherezwa mu Rwanda n’Ubutabera bwa Leta Zunze Ubumwe za Amerika mu mwaka wa 2021, akaba ngo yari umugenzuzi (Inspecteur) w’ibigo by’amashuri abanza.

Sangwa yakomeje agira ati "Jenoside hano ku Gisozi yamaze iminsi itanu, abantu bishwe mbere Inkotanyi zitaratwika iriya burende, Umuhutu wari ufite umuhoro yarebye aho awushyira, hano nta Mututsi wongeye gupfa kereka abari bahungiye kuri Croix Rouge (ku Kacyiru) no kuri Sainte Famille".

Sangwa avuga ko Inkotanyi zitarabatabara yari yahungiye k’uwitwa Muberuka Albert wabahishe ari abantu bagera kuri 20, ubu akaba yaragizwe Umurinzi w’Igihango.

Ubuyobozi bw’Akarere ka Gasabo buvuga ko Urwibutso rwa Jenoside rwa Kigali kuba ruri ku Gisozi, abahatuye basabwa kuhibukira bakamenya amateka arurimo kandi bakarwitaho.

Umuyobozi Nshingwabikorwa w’Akarere ka Gasabo, Pauline Umwali agira ati "Dusaba abaturage b’Akarere ka Gasabo kwitabira Kwibuka kuko hatangirwa amateka y’Igihugu. Abatuye ku Gisozi, ufite uwe washyinguwe hano araza akibuka, ariko banasabwa kurubungabunga bahakora umuganda".

Umwali asaba kandi abaturage b’Akarere ka Gasabo n’Umujyi wa Kigali muri rusange batahigwaga, kureka ingengabitekerezo ya Jenoside no kuvuga ahatawe imibiri itaraboneka ngo ishyingurwe mu cyubahiro.

Mu rwibutso rwa Gashora hari hasanzwe haruhukiyemo imibiri 5,194

Ni imibiri yabonetse mu bihe bitandukanye, mu Murenge ya Rilima habonetse umunani n’undi umwe wabonetse muri Juru, hahoze ari muri Komine Gashora kubera ko cyera u Bugesera bwari bugizwe na Komine Gashora, Kanzenze na Ngenda.

Imibiri yashyinguwe ku wa Kabiri tariki 11 Mata 2023, mu muhango wo kwibuka wabereye ku rwibutso rwa Gashora, yagiye ikurwa aho yajugunywe ikaba yarabonetse ku makuru yagiye atangwa n’abaturage.

Jenoside yakorewe Abatutsi mu cyahoze ari Komine Gashora ifite umwihariko, kubera ko benshi mu bwoko bw’Abatutsi bari bahungiye muri uyu Murenge mu matariki ya 08 na 09 Mata, bari bahungiye muri ISAR Karama, basabwe n’uwari konseye witwaga Modeste, kujya kuri Komine abizeza umutekano.

Barabyizeye bavayo baraza kubera ko abari barahahungiye mu 1992 ntacyo bari barabaye, benshi baza kwicwa n’abasirikare, abapolisi n’interahamwe barimo abageragezaga guhungira kuri Kiliziya ndetse no ku bitaro bya Rilima.

Abatutsi bari batuye i Gashora benshi biciwe kuri Komine bari bahizeye ubutabazi

Kuri uyu munsi hanazirikanwa ubutwari bwaranze abiciwe ku cyahoze ari Komine Gashora, kuko n’ubwo haguye benshi ariko bari babanje kwirwanaho bakoresheje intwaro gakondo, bagahashya ibitero bitandukanye bagabwagaho n’interahamwe, ariko bagera igihe barananirwa kuko interahamwe zaje gufashwa n’abasirikare n’abapolisi bari bafite imbunda.

Bamwe mu barokokeye ku cyahoze ari Komine Gashora bavuga nta cyizere bari bafite cyo kurokoka, kubera ko isaha n’isaha babaga bategereje urupfu.

Adiel Ntivuguruzwa ni umwe muri bo, avuga ko batangiye gutotezwa guhera mbere ya Jenoside yakorewe Abatutsi.

Ati “Ibitero byagendaga mu nsisiro hirya no hino, bisenya bikubita abantu, uwo bishyikiriye bikamwica, ariko urebye intego yabyo yari kuduhindira hano kuri Komine, mu cyahoze ari Gashora, twahungiye ku masite atatu. N’ubwo abandi bagiye bagwa mu nzira, ariko hari abahungiye muri ISAR, kuri gereza ya Rilima niho babiciye, natwe twahungiye hano kuri Komine, umunsi wabaye umwe, tariki ya 10 na 11”.

Abarokokeye mu cyahoze ari Komine Gashora bavuga ko buri saha babaga bazi ko bari bwicwe

Umuyobozi w’Akarere ka Bugesera, Richard Mutabazi, yashimiye by’umwihariko abacitse ku icumu kuba baragize ubutwari bagakomeza guhangana n’ibibazo bitandukanye basigiwe na Jenoside, bagashyiramo umutima n’imbaraga byo kubana n’babahekuye ndetse bakiyubakamo icyizere cy’ejo hazaza.

Ati “Iki gihe twibukamo gihuriranye n’igihe abapfobya bakajije umurego, ni gihe cyo kuba maso no kurwana urwo rugamba. Abenshi urugamba rwo guhakana Jenoside yakorewe Abatutsi mu buryo bweruye barabona ko rwabananiye, hatangiye amayeri yo gusa n’abayemera, ariko bakaza kugobekamo ibipfobya, biradusaba kuba maso”.

Akomeza agira ati “Hatangiye kubaho amashyirahamwe yemera, anitwa ko ari ay’abacitse ku icumu rya Jenoside yakorewe Abatutsi ariko bakagerekaho n’ibindi. Bivuze ko kwerura ngo bavuge ko iyo Jenoside itabayeho barabona ari urugamba barimo batsindwa, ariko ntabwo barekuye, baratangira bemera ko yabayeho bakaza kugoreka ibindi, cyangwa bagasoreza ku mwanzuro utandukanye n’uwo kwibuka”.

Hashyinguwe imibiri icyenda yagiye ikurwa hirya no hino

Urwibutso rwa Gashora rwari rusanzwe ruruhukiyemo imibiri 5194 y’Abatutsi biciwe mu bice bitandukanye.

Ntivuguruzwa warokokeye kuri Komine Gashora avuga amahano yahabereye

Meya Mutabazi avuga ko iki ari igihe cyo guhangana n’abapfobya bakanagoreka amateka ya Jenoside

Bifuza ko Urwibutso rwa Musanze rwongerwamo ibifasha gusobanukirwa amateka ya Jenoside

Urwibutso rwa Jenoside yakorewe Abatutsi mu 1994 rw’Akarere ka Musanze, ruri ahahoze Cour d’Appel Ruhengeri(Urukiko rw’Ubujurire rwa Ruhengeri), aho mu gihe cya Jenoside, hiciwe Abatutsi basaga 800 bari bahakusanyirijwe, ubutegetsi bwariho icyo gihe bubizeza ko ariho bacungirwa umutekano.

Ubwo bari bamaze kwicwa, bajugunywe mu byobo byari byaracukuwe inyuma gato yaho, nyuma y’imyaka irari muke hakaba harakurikiyeho urugendo rwamaze igihe, abo mu miryango y’abatutsi bahiciwe, basaba ko hahindurwa urwibutso.

Ni ubusabe bwaje guhabwa agaciro n’inzego zirimo n’izishizwe ubutabera, maze hatangira gahunda yo kuvugurura izo nyubako no kubaka izindi nshya, hagirwa Urwibutso ndetse mu mwaka wa 2022, imibiri yari imaze imyaka isaga 28 ishyingurwa mu cyubahiro muri urwo rubitso.

Hirwa Cedric agira ati “Uru rwibutso nirwo rwonyine rwihariye amateka muri Jenoside zose zabereye ku isi, nk’ahantu hahoze ari inzu y’ubutabera yiciwemo inzirakarengane mu mwanya wo kuhabonera ubutabazi cyangwa amakiriro. Usibye ayo mateka ashaririye y’iyicwa ry’Abatutsi bari bahahungiye, abazi neza amateka y’icyahoze ari Perefegitura ya Ruhengeri, bakunze kugaruka ku ruhare rw’ubutegetsi bwariho mbere ya Jenoside, mu itegurwa ryayo no kuyishyira mu bikorwa”.

Ati “Twe nk’urubyiruko, dukeneye ko muri uru rwibutso hashyirwa ibyereka abarungana ayo mateka, yaba mu buryo bw’inyandiko, amashusho cyangwa amafoto bigaragarira abarusura bitagumye mu kuyabwirwa gusa. Ibyo bizadufasha kumenya ayo mateka mu mizi no kuyasigasira ngo atazasibangana”.

Ibi babishingira ku kuba inzibutso nyinsi mu zibarizwa hirya no hino, zo usanga zifite inzira zigaragaza amateka yose y’uko Jenoside yakorewe Abatutsi yateguwe, n’uburyo yashyizwe mu bikorwa, bagasanga n’uru rwibutso rw’Akarere rwa Musanze, arushyizwemo byarushaho kuyumvikanisha byisumbuyeho.

Urwibutso rwa Jenoside yakorewe Abatutsi rwa Musanze ruruhukiyemo imibiri 800 y’inzirakarengane

Ni urugendo Umuyobozi wa Ibuka mu Karere ka Musanze, Rusisiro Festo, ahamya ko rwatangiye, ibitanga icyizere cy’uko mu gihe kiri imbere, iki cyifuzo kizaba cyamaze gushyirwa mu ngiro.

Yagize ati “Mu by’ukuri koko haracyari ibintu byinshi bitarashyirwa muri uru rwibutso, bigaragaza inzira z’amateka yihariye y’aka gace. Nka Ibuka twavuganye n’Akarere, kandi mu makuru kaduha, ni uko katangiye gahunda yo gufatanya na MINUBUMWE ndetse na AEGIS Trust ishinzwe kubungabunga inzibutso, kugira ngo habeho gukusanya ibikenewe byose harimo no gushaka rwiyemezamirimo ugomba gukora iyo mirimo, ku buryo twizeye neza ko ubwo bufatanye, buzatugeza ku kuba nibura umwaka utaha bizaba byamaze gukorwa”.

Ni imirimo yateganyirijwe ingengo y’imari ya miliyoni zisaga 80, kandi kuri ubu ngo amafaranga arahari, igisigaye akaba ari uko iyo gahunda itangira gushyirwa mu bikorwa.

Hashyizwe indabo ku Rwibutso rwa Ruhango i Kinazi

Mu kiganiro yagejeje ku bitabiriye Kwibuka ku nshuro ya 29 Jenoside yakorewe Abatutsi mu Murenge wa Kinazi, ahahoze ari Komini Ntongwe, Mugabo Selemani, Perezida wa Ibuka mu Murenge wa Ruhango, yasabye Abanyarwanda kongera Kwibuka ko Ubumwe bwabo bwakomwe mu nkokora n’abakoloni, kandi ko bakwiye gushyira imbaraga mu kongera kubusigasira, kuko ari bwo shingiro ry’imibereho myiza yabo.

Zimwe mu ndangagaciro agaragaza zangijwe, harimo gukuraho itorero ry’Igihugu, gukuraho kirazi no kubiba amacakubiri mu Banyarwanda, hashingiwe ku byiciro by’imibereho yabo byo korora, guhinga no guhiga.

Ibyo ngo byakurikiwe no gushyiraho ibimenyetso bitandukanye bya bya byiciro bishingiye ku byo bari bamaze kurema nk’amoko, Abanyarwanda baba baremwe bushya mu moko y’ubukoloni, ndetse bahabwa ibya ngombwa byanditsemo ayo moko.

Avuga ko n’ubwo amoko yari amaze kuremwa, Abanyarwanda bakanerekwa aho buri bwoko bwakomotse harimo Etiyopiya na Cadi, abandi bavukiye mu Rwanda, hakurikiyeho kwereka ubwoko bw’Abahutu ko Abatutsi babatsikamiye.

Abahutu nabo ntibabashije gusesengura ngo bamenye ko byose byari bigamije kugira igice runaka kibasira ikindi, kugira ngo ubumwe bw’Abanyarwanda busenywe, ubukoloni bukomeze gucengera bunyuze ku kindi gice.

Imiryango y’abashyinguye mu Rwibutso rwa Kinazi nayo yashyizeho indabo

Avuga ko urwango rw’Abahutu ku Batutsi rwakomeje kwigishwa ku butegetsi bwa Repubulika ya mbere n’iya kabiri, kuko zose zitigeze zishyiraho umurongo wa Politiki, guha amahirwe angana Abanyarwanda, nko gushyira mu mashuri uwabitsindiye.

Asaba urubyiruko kwihatira gusobanukirwa n’amateka, ntibafate ibiganiro bitangwa nk’imikino ya Politiki, ahubwo ko hagamijwe kubasobanurira ububi bw’ivangura n’amacakubiri.

Avuga ko nk’urugero ku mashuri, abana bahamagarwaga hakurikijwe amoko, hagamijwe kwereka ababyiruka uko bakwiye kwitandukanya hakiri kare, kuko ku gihe cy’ubukoloni Abatutsi bahawe ibimenyetso, by’uko bareshya, uko basa n’uko bangana, kuri Leta ya Habyarimana bahabwa amazina.

Amwe muri ayo mazina ni nk’inyenzi, ako kakaba agasimba gateza umutekano mucye mu nzu, bitwa inzoka, bitiza umurindi ibyanditswe muri manifesto y’Abahutu yanditswe na Joseph Gitera, agaragaza ko Abatutsi atari abantu.

Agira ati "Leta ya Habyarimana yaje ivoma muri Repubulika ya mbere, Abatutsi bakomeza guhohoterwa, kugeza ubwo ukubaho kwabo bumvise ko bagukesha impuhwe z’abandi bantu, bariheba, bata agaciro ku buryo umwana muto yashoboraga kwica umugabo mukuru kubera ko bari baramaze kwiheba, no gutakaza ubumuntu".

urubyiruko rwaganirijwe ku mateka ya Jenoside yakorewe Abatutsi rusabwa kubungabunga ibyagezweho

Avuga ko Abatutsi bakomeje guhohoterwa binyuze mu myigaragambyo y’abanyeshuri kugira ngo hagire abicwa, impanuka zidasobanutse zahitanaga Abatutsi, ndetse no kubica ku mugaragaro habanje kubaho urwitwazo ko Abatutsi ari babi. Nk’urugero aho abari mu Gihugu bishwe ubwo Inkotanyi zatangizaga urugamba rwo kubohora Igihugu.

Agira ati "Ubwo bafungaga Abatutsi muri stade, urukweto rwa tigana rwarahenze cyane kuko nirwo rwifashishwaga kudaha no kunywesha igikoma ku bari bahafungiye, kuko bakizanaga mu ngunguru ntacyo kunywesha gihari, ahubwo babasabaga kudubikamo umutwe ngo banyweshe, ngubwo ubuzima bw’Umututsi icyo gihe".

Avuga ko igihe cy’amashyaka menshi urubyiruko rwabaye igikoresho gikomeye cyo kwica Abatutsi, kuko bashyizwe mu mitwe itandukanye ishingiye ku mashyaka, irimo interahamwe zari iza MRND, impuzamuhambi za MDR, amajyogi ya PSD n’indi mitwe, yose yaje kwinjira mu cyiswe (PAWA).

Agira ati "Rubyiruko ibi mubyumve cyane, kuko haba mu mashyaka no mu gisirikare haremwe imitwe, no mu giturage iraremwa kugeza mu 1994, aho Jenoside rurangiza yatangizwagwa hitwajwe ko Umukuru w’Igihugu yishwe. Nyamara byari urwitwazo kuko Abatutsi mu bice byose by’Igihugu bari baratangiye kwicwa ku mugaragaro".

Inzego z’umutekano zari zihari

Avuga ko Jenoside yo mu 1994, yihutishijwe mu mezi atatu hagapfa Abatutsi basaga miliyoni, ndetse n’Abahutu bageragezaga kubahisha ntibitabire ubwicanyi biswe ba ’Ntibindeba’, utisubiyeho ngo yitabire kwica na we yicwaga, kugeza ubwo izari Ingabo za RPA-Inkotanyi zahagarikaga Jenoside Igihugu kikabohorwa.

Asaba kandi urubyiruko gukomeza kwima amatwi abagishaka guhembera amacakubi n’Ingengabitekerezo ya Jenoside, kuko bagihari haba hanze n’imbere mu Gihugu, ahubwo bagaharanira gusigasira ibimaze kugerwaho, u Rwanda rugaragaza nonaha.

Agira ati "Urubyiruko mufite inshingano zo kurinda ibyagezweho mu busugire bw’Igihugu mukumva mugatekereza, kugira ngo abagihembera amacakubiri batazongera kubasenyera Igihugu mwavukiyemo gifite umucyo kuko twebwe abakuru tuzi umwijima twanyuzemo. Mwe mutawuzi murasabwa gusigasira uyu mucyo, niyo mpamvu ducana urumuri rw’icyizere ngo umucyo ugumeho".

Abayobozi bakurikiranye ibiganiro

Avuga ko Ababyeyi nabo bakwiye gucira ibibi bamize, kugira ngo bashobore kubaka urubyiruko ruzashobora kubaka u Rwanda ruzira Jenoside.

UNESCO yemeza ko Urwibutso rwa Nyamata rurusha izindi kwerekana Jenoside

Minisitiri w’Ubumwe bw’Abanyarwanda n’Inshingano Mboneragihugu, Dr Jean Damascène Bizimana, avuga ko abakozi ba UNESCO basuye inzibutso za Jenoside mu Rwanda, bagasanga urwa Nyamata rumeze neza neza nk’uko rwari ruteye mu 1994, mu gihe izindi hari ibyahinduweho cyangwa zikaba zarubatswe nyuma.

Minisitiri Dr Bizimana mu kiganiro yagiranye n’Abanyamakuru mu cyumweru gishize yagize ati "Impuguke za UNESCO zasuye Urwibutso rwa Nyamata zigaragaza ko rwaza mu za mbere kurusha izindi, kubera ko Kiliziya ya Nyamata (yagizwe urwibutso), iracyateye neza neza nk’uko yari imeze mu 1994 abantu bahicirwa".

Minisitiri Dr Bizimana akavuga ko abakozi ba UNESCO bahageze bakabona amasasu aho yanyuze mu gisenge no mu mpande, aho abantu bicaraga, imyenda bari bambaye ndetse na Kiliziya ubwayo ikaba ari ya yindi yo mu 1994.

Mu rwego rwo gusigasira amateka ya Jenoside yakorewe Abatutsi mu 1994 mu Rwanda, UNESCO irateganya gushyira ku rutonde rwa site z’umurage w’Isi, inzibutso 4 z’iyo Jenoside.

Izo nzibutso ni urwa Kigali ruri ku Gisozi, urwa Nyamata mu Karere ka Bugesera, urwa Bisesero muri Karongi ndetse n’urwa Murambi mu Karere ka Nyamagabe.

Dr Bizimana avuga ko hari raporo y’izo nzibutso Leta y’u Rwanda yahaye UNESCO, ikazagereranywa n’iyo impuguke z’uwo muryango zizikorera nyuma yo kuva mu Rwanda, aho zasuye mu kwezi gushize kwa Werurwe 2023.

Inama izafata umwanzuro ku gushyira mu murage w’Isi inzibutso za Jenoside yakorewe Abatutsi, iteganyijwe kubera mu Rwanda muri Nzeri uyu mwaka wa 2023.

Minisitiri Dr Bizimana avuga ko mu byo u Rwanda rusabwa na UNESCO n’ubwo dosiye yarwo ngo basanze imeze neza, ari ugukomeza kwita ku nzibutso, kuhashyira amateka ku buryo uhasuye ashobora kumenya ibyahabereye, bitabaye ngombwa kwitabaza umusobanuzi.

Mu gutangiza ibikorwa byo kwibuka ku nshuro ya 29 Jenoside yakorewe Abatutsi mu Karere ka Rubavu, abarokotse Jenoside bongeye gusaba abazi ahari imibiri y’abishwe kuyigaragaza igashyingurwa kuko hari imibiri myinshi itaragaragazwa ngo ishyingurwe.

Iyahoze ari Komini Rwerere yari yegereye umupaka wa Repubulika Iharanira Demokarasi ya Congo, ndetse ikaba inzira yanyuzwemo n’Abatutsi benshi bashakaga gukiza ubuzima bwabo banyura mu kibaya gihuza u Rwanda na Congo. Icyakora habaga bariyeri z’Interahamwe zikabica ariko imibiri yabo ikomeje kuburirwa irengero.

Nyirakarera Asnath wakorotse Jenoside yakorewe Abatutsi mu 1994, avuga ko abaturage bakwiriye kureka kwinangira, bagatanga amakuru y’ahatawe imibiri y’ababo itarashyingurwa mu cyubahiro igashyingurwa.

Agira ati “Turabasaba tunabinginga ngo batwereke ahari imibiri y’abacu kugira ngo tubashyingure mu cyubahiro hamwe n’abandi, natwe turuhuke.”

Murenzi Anastase utuye Busasamana avuga uwaba azi ahatawe imibiri ashobora no gutanga amakuru atigaragaje.

Agira ati "Ntabwo tuvuze ngo bazajye kutwereka aho bari nyirizina, ahubwo bashobora no kwandika urwandiko bakaruta mu rugo twabyuka tukaruhasanga bigatuma duha amakuru inzego z’ibanze zikadufasha kubashakisha.”

Semanza Faustin utuye mu murenge wa Busasamana wabashije kugaragaza ahakiri imibiri itarashyingurwa mu cyubahiro, avuga ko impamvu abaturage bo muri Busasamana bagicecetse biterwa no guhishirana.

Agira ati “Habanje kubaho ceceka kubera ko ari imiryango iba ishaka guhishirana, muri 1994 narokoye abatutsi 16 barantema ndahunga, ariko aho ntangiriye kumenya ahari imibiri ngenda mbibwira abayobozi, mu gihe hari imiryango yanga kwivamo no gutanga amakuru.”

Uboyobozi bw’Akarere ka Rubavu butangaza ko bugiye gushyira imbaraga mu kwigisha abaturage babashe gutanga amakuru.

Umuyobozi w’Akarere ka Rubavu Kambogo Ildephonse agira ati “Hano muri Gacurabwenge hari imibiri y’Abatutsi bahiciwe ubwo bageragezaga guhungira muri Repubulika iharanira Demukarasi ya Congo banyuze mu kibaya, ariko imibiri imaze kuboneka iracyari mike, twasabye abaturage gutanga amakuru kandi turafatanya n’abafatanyabikorwa tubigishe Ndi Umunyarwanda bigishwe gutanga amakuru.”

Mu Murenge wa Busasamana mu Kagari ka Gacurabwenge hamaze kuboneka Imibiri 11 izashyingurwa mu cyubahiro muri uyu mwaka, hari abatutsi benshi biciwe muri uyu murenge bashaka guhungira mu kibaya cya Repubulika Iharanira Demokarasi ya Congo.

Habanje gukorwa urugendo ku maguru hazirikanwa inzira y’umusaraba Abatutsi banyuzemo muri Jenoside

Byatangajwe kuri iki cyumweru tariki 09 Mata 2023, ubwo Urugaga rw’abikorera mu Rwanda, PSF, rwifatanyaga n’abikorera bo mu Karere ka Kayonza mu kwibuka ku nshuro ya 29, bagenzi babo bishwe mu Jenoside.

Ni igikorwa cyateguwe ku bufatanye bw’abikorera mu Karere ka Kayonza, Ubuyobozi bw’Akarere ndetse n’abikorera ku rwego rw’Intara y’Iburasirazuba.

Uyu muhango wabanjirijwe n’urugendo rwo Kwibuka no gushyira indabo ku rwibutso rwa Jenoside rwa Mukarange.

Umuyobozi w’Akarere ka Kayonza, Nyemazi John Bosco, yagarutse ku rugendo rwo kwiyubaka kw’abarokotse, gahunda za Leta zibateza imbere ndetse na bimwe mu bimaze gukorwa mu rwego rwo kubungabunga amateka, harimo igitabo kigaragaza amateka yaranze Jenoside yakorewe Abatutsi mu Karere, kimaze kwandikwa ndetse hakaba harimo kurangizwa inzu y’amateka ya Jenoside yakorewe Abatutsi muri aka Karere.

Bunamiye Abatutsi biciwe ku musozi wa Mukarange by’umwihariko muri Kiliziya Gatolika ya Mukarange

Umuyobozi wa PSF mu Ntara y’Iburasirazuba, Nkurunziza Jean de Dieu, yashimye Leta y’u Rwanda ishyigikira abikorera, anavuga ko muri ibi bihe byo Kwibika ku nshuro ya 29 Jenoside yakorewe Abatutsi, mu Ntara yose bazifatanya bakanashyigikira abarokotse batishoboye baha inka abagera ku 100.

Depite Safari Henry watanze ikiganiro, yagarutse ku mateka yaranze u Rwanda, aho yibukije ko Abanyarwanda bari bunze ubumwe, bukaza gusenywa n’abakoloni, bishyigikirwa na Repubulika ya mbere n’iya kabiri zabibye ingengabitekerezo ya Jenoside n’amacakubiri, yagejeje u Rwanda kuri Jenoside yakorewe Abatutsi mu 1994.

Yashimye Ingabo zari iza RPA na Perezida Paul Kagame, bahagaritse Jenoside, bakongera kurema icyizere mu Banyarwanda.

Ndangamira Faustin watanze ubuhamya, yagarutse ku ruhare bamwe mu bacuruzi bagize muri Jenoside, aho abacuruzi bagera kuri 11 bari bakomeye bagize uruhare rudasanzwe mu bwicanyi bwabereye muri Kayonza.

Urwibutso rwa Jenoside yakorewe Abatutsi rwa Mukarange

Bamwe mu bishe abacuruzi bagenzi babo, aho ngo bari bayobowe na Kanyangoga afatanyije n’uwari Bugumesitiri Senkware Celestin, wayoboraga Komini Kayonza, aho ngo banafatanyije mu kwica Abatutsi bari bahungiye kuri Paruwasi Gatolika ya Mukarange.

Ndindabahizi yashimye abikorera bo mu Ntara y’Iburasirazuba, kuba bakomeje kuba hafi abarokotse Jenoside yakorewe Abatutsi 1994.

Yasabye abitabiriye uyu muhango kurushaho gutanga amakuru ku bayazi, ku mibiri itaraboneka kugira ngo nayo ishyingurwe mu cyubahiro.

Guverineri w’Intara y’Iburasirazuba, Emmanuel K. Gasana, yashimiye abikorera uruhare bagira mu bikorwa bitandukanye mu Ntara by’umwihariko mu gufasha no kuba hafi abarokotse Jenoside.

Yihanganishije abarokotse, ashimangira ko Leta izakomeza kubaba hafi no kubashyigikira muri byose.

Ndangamira Faustin, yemeza ko abacuruzi ba Kayonza bishwe na bagenzi babo

Yanagarutse ku ruhare rwa PSF mu kuzamura ubukungu bw’Igihugu, hagamijwe kwihutisha iterambere no kugira umuturage utekanye kandi uteye imbere.

Yasabye abitabiriye uyu muhango n’abaturage muri rusange, kurwanya ingengabitekerezo ya Jenoside by’umwihariko imvugo n’ibikorwa bisesereza, n’ibindi byose byahembera ingengabitekerezo ya Jenoside.

Ashimira Inkotanyi zabatabaye

Ni na byo byabaye kuri Mukakibibi Epiphanie wo mu Kagari ka Rutonde mu Murenge wa Shyorongi, Akarere ka Rulindo, warokotse Jenoside ubwo yari afite imyaka 23, aho mu muryango w’abantu icyenda harokotse babiri, ababyeyi be bicanwa n’abavandimwe be batanu.

Ni umubyeyi ugaragaza ugukomera nyuma y’ibyo yanyuzemo, aho mu mivugire ye biboneka ko afite icyizere cy’ubuzima. Ati “Twavutse turi abana barindwi, batanu babicana n’ababyeyi, turokoka turi babiri, ubu ni ukuri nariyubatse mfite abana batandatu, nkagira abakwe n’abuzukuru, ubu ndumva nkomeye cyane mu buzima bwanjye mparanira kubaho kuko nanze guheranwa n’agahinda”.

Mu buhamya yatangiye mu muhango wo gutangiza icyumweru cyo kwibuka Jenoside yakorewe Abatutsi mu rwego rw’Akarere ka Rulindo, igikorwa cyabereye ku mugezi wa Nyabarongo ahajugunywe inzirakarengane zitabarika, yagaragaje inzira ndende yanyuzemo.

Yatangiye ubuhamya bwe asenga, ati “Mbanje gushimira Imana inyongereye iminsi yo kubaho, ikangeza mu gihe nk’iki kuri uyu munsi twibuka ku nshuro ya 29 Jenoside yakorewe Abatutsi mu 1994. Imana nishimwe”.

Uwo mubyeyi yavuze ko mu gitondo cyo ku itariki 07 Mata 1994, aribwo urugendo rwo kurwana ku buzima rwari rutangiye, aho umusaza bari baturanye witwa Nyirinkindi yaje iwabo mu rugo, aho yari abazaniye inkuru y’urupfu rwa Perezida Habyarimana.

Ati “Ababyeyi bari bakiryamye njya kubakangura mbwiye Papa nti umusaza Nyirinkindi ambwiye ko Habyarimana yapfuye, yahise abyuka ako kanya mbona aguye mu kantu, aratubwira ati bana banjye mwegerane ntimugire aho mujya ibintu byakomeye, mbona ahinze umushyitsi cyane”.

Arongera ati “Nahise mubaza nti, ese Papa ko ugize ubwoba niba Habyarimana yapfuye ni ngombwa ko natwe dupfa? Arambwira ati ntimugire aho mujya”.

Ngo hahise haza undi mugabo witwa Nsengiyumva, ababwira ko Interahamwe ziri kwica abantu hafi aho, ababwira ko na wa Musaza (Nyirinkindi) wari wazindutse abazaniye amakuru y’urupfu rwa Perezida Habyarimana, ko na we ari mu bamaze kwicwa.

Ati “Nsengiyumva na we yaje atubuza kugira aho tujya, hari mu ma saa tatu, inka yacu yari yaburaye ndatambuka njya kuyahirira urubingo inyuma y’urugo, ntangiye kwahira wa Mugabo Nsengiyumva aragaruka, ati nonaha subira mu rugo ibintu byakomeye, igitero kigeze Nyakabingo cyishe umusaza Nyirishema cyica na Nyirinkindi n’umugore we”.

Mukakibibi n’umuryango we ngo bakomeje kwihishahisha mu rugo bigeze ku mugoroba bafata icyemezo cyo gusanga abandi bari bahungiye kwa muganga, ari nabwo ngo imodoka ya Gisirikare yaje ibarasaho amasasu y’urufaya, ikomereza no mu Kiliziya abo basirikare bafatanyije n’Interahamwe birara mu bahungiye mu Kiliziya barabarasa abandi bakoresha imihoro hagwa benshi.

Mukakibibi yavuze ko we n’umuryango we bagerageje kwihisha mu masaka, bararamo bukeye bigira inama yo guhungira muri bene wabo bo mu bwoko bw’Abasinga bari batangiye guhangana n’Interahamwe.

Ngo bageze muri ako gace basanze Interahamwe zakamejeje, ariko ngo abo Batutsi bakomeza kwihagararaho bifashishije amabuye barwana na zo rubuze gica, aho bari bayobowe n’umugabo witwa Kanamugire bafataga nk’intwari.

Ngo ubwo Interahamwe zari zitangiye kuneshwa, hahise hitabazwa abasirikare baza barasa Abatutsi, baricwa harokoka mbarwa.

Abasirikare ngo bategetse abatutsi gucukuza imyobo amazuru

Mukakibibi wari uhetse umwe muri barumuna be, avuga ko bagerageje guhungira ku musozi wa Shyorongi, aho bageze ahitwa ku Ngagi bahasanga abandi basirikare, ari na bo babategetse kwicukurira imyobo bakoresheje amazuru.

Ati “Turakomeza tuzamuka iya Shyorongi tugeze hariya bita ku Ngagi, tuhasanga abasirikare bo kwa Habyarimana baraduhagarika, nta kindi batubwiye baratubwiye ngo ntabwo dupfusha ubusa amasasu yacu, umwe muri bo ati mbone buri wese yacukuye umwobo yawugiyemo”.

Arongera ati “Mu gihe tukirebana twabuze uko tubigeza, yabaye nk’utirimuka gato, mu kanya ahita agaruka ati na n’ubu ntimuracukura, naramubajije nti ese ko nta bisongo twitwaje turacukuza iki, ati umva uko byabaye, umva ubwenge bwabo, none se nta mazuru mufite? mucukuze amazuru yanyu, dutangira kwibaza ukuntu amazuru yacukura umwobo ubwo tubona ko ari urupfu”.

Mu gihe bacyibaza uko babigenza ngo babonye ba basirikare birutse berekeza i Jari, bibaza impamvu birukanse bahabwa amakuru ko ari Inkotanyi bari bikanze.

Mukakibibi avuga ko muri urwo rugendo yari yamaze gutandukana n’ababyeyi be, aho yakomeje urugendo bahura n’igitero cy’Interahamwe zifite imipanga mishya yuzuyeho amaraso, zibasaba kumanika amaboko.

Ati “Nagerageje kwihisha mu materasi, bakimbona bari bafite imihoro ikiri mishya iriho amaraso baza bansanga bamanitse imihoro, nkurikije uko bagiye kuntema manika amaboko ndavuga nti mumbabarire ntimunteme ahubwo nimunige”.

Arongera ati “Barambwiye ngo umva bwa bwenge bwabo, uradutegeka uko tukwica, bahise bankubita ibibatira by’imihoro nkomereka umubiri wose, barambwira bati niba udutegetse uko tukwica duhe amafaranga tukunige, baransaka bayabuze bankubita ibibatira barandeka, bageze aho barumuna banjye bari bihishanye hamwe n’abandi bahita babica ndeba”.

Yigiriye inama yo kujya kwihisha kwa Nyirasenge wari utuye muri ako gace, agezeyo asanga ari ho biciye se na murumuna we.

Ati “Nkigera kwa Masenge wari ufite umugabo w’umuhutu, akimbona yahise anyereka aho biciye umuryango wanjye ati dore so bamwiciye hariya, murumuna wawe babiciye aho inyuma”.

Yakomeje kwihisha, Interahamwe zikamunyuraho ntizimubone, agera ahitwa Nyakabingo ahasanga abantu bamuzi bamwereka inzira anyuramo aribwo yisanze yageze kuri bariyeri, aho yasanze zimwe mu nterahamwe zari zimuzi, ziramusaka zibuze amafaranga zisiganira kumwica, ari nabwo zamushoreye ngo zijye kumuroha mu mugezi hamwe n’abandi, zitinya kumwicira aho kugira ngo atabanukira.

Ngo Interahamwe ebyiri zaramushoreye aribwo zageze ku yindi bariyeri bahasanga Interahamwe bitaga ruharwa yiyise Pirato, itegeka ko bakomeza kumushorera bamujyana kwa Konseye kumwicira hamwe n’abandi bari ku mugezi wa Nyabarongo.

Ati “Namaze kubona ko Pirato yambonye nti akanjye kararangiye, Pirato abategeka ko banshorera bakajya kunyicira hamwe n’abandi. Abo bagabo bari banshoreye bagiye bambwira amagambo ateye ubwoba, umwe wari ufite inkota nini yuzuye amaraso akambwira ati, ntureba kino cyuma kimaze kwica abantu barindwi ugiye kuba uwa munani”.

“Akomeza kuntera ubwoba ambwira ati, sha mwarigenje ndabanza ngukuremo ijisho, ngaho se nimwongere mucurange Radio Muhabura, undi akambwira ati, sha mwarigenje ngiye kubanza nguce ino nkurikizeho urutoke, nagiye kwibona nisanga bangejeje ku ruzi”.

Ngo bakimugeza ku ruzi, ngo barangariye bamwe mu batutsi barohaga mu mugezi ari bazima abazi koga bakabacika, ngo mu gihe barangaye bagitabaza abo hakurya ngo babice, nibwo yabaciye mu rihumye ajya mu gifunzo, bagarutse ngo bamurohe baramubura bakeka ko uruzi rwamujyanye, ari nabwo bakomeje kwicira abantu imbere ye, ababona ariko bo batamubona.

Ati “Muri uko kuroha abatutsi bamwe bakoga bakabacika, bagize umujinya batangira kwica bababaze. Umugabo twari duturanye witwa Kanyamugenge bamubagira imbere yanjye bamuhambiriye amaguru n’amaboko bamujugunya mu mazi bati ngaho genda, nibwo haje umusirikare arasa amasasu menshi mu rufunzo no mu bisheke ashaka kureba ko hari abihishemo, k’ubw’amahirwe ntibambona kugeza ubwo bagiye.

Mukakibibi ngo yavuye aho yari yihishe ariko kubera ko umubiri wose wari ibisebe kugenda biramunanira, ariko agerageza gukambakamba ijoro ryose bucya ageze ku muhanda werekeza kuri Komine Runda, aho yageze kuri mwenewabo amusabye kumuhisha baranga ngo atabateza ibibazo, bamwambura n’imyambaro bari bamutije akomeza kugenda yambaye ibyuzuyeho amaraso.

Ngo bwarakeye akomeza urugendo ageze kuri bariyeri abasirikare baramufata bamubaza aho agiye, ati mpunze Interahamwe, bararakara baramukubita babonye ko adashobora gukira baramureka ngo atagwa aho umurambo ukabanukira.

Uburyo yahuye n’Inkotanyi ziramurokora

Uwo mubyeyi avuga ko yakomeje kunyura mu nzira ikomeye, kugeza ubwo imyambaro ye yari yuzuye amaraso imucikiyeho, uwo bahuye wese akamuhunga akeka ko yasaze, ibyo bikamuha amahirwe yo kurokoka.

Ubwo bakomeje guhunga bihishahisha, nibwo bahuye n’Inkotanyi zibajyana i Runda ari na ho bahawe ubufasha bwihuse, baravurwa, baragaburirwa, baranambikwa.

Mukakibibi ashimira Inkotanyi zabarokoye nyuma y’urugendo rurerure rw’akababaro yanyuzemo.

Ati “Ubwo twakurikiraga abahungiye muri Kongo, twahuye n’abasirikare b’Inkotanyi, ni bo batugaruye batugeza kuri Komini Runda, baratwondora, baratwambika, ntabwo nzibagirwa Inkotanyi uko baturokoye, baratugaburiye tugubwa neza, turanezerwa, Nkotanyi mfura z’u Rwanda ndabashimiye, tuzahora tubafatiye iry’iburyo”.

Arongera ati “Perezida Kagame Paul, turagushima warakoze Imana yo mu ijuru izakomeze ikurinde, Mana yacu Mana igira neza, twebwe abarokotse Jenoside yakorewe Abatutsi, turagushima ni ukuri, kandi tuzi ko uri iruhande rwacu”.

Uwo mubyeyi ngo yishimiye uburyo abayeho, aho yagiriwe icyizere ashyirwa mu buyobozi mu nzego z’ibanze akaba n’Umujyanama w’ubuzima.

Arongera ati “Ntabwo nkiri umwe, mfite umuryango, abana abakwe n’abuzukuru, ni ukuri nanjye ndateta, Mana ndagushimiye wampaye agakiza unzana mu nzu yawe mbona amahoro ya yandi ab’isi badatanga ndagushimiye, Twibuke twiyubaka.”

Buri mwaka abafite ababo baruhukiye muri uru rwibutso barahasura bakunamira bakanabunamira

Abazi neza amateka y’Urwibutso rwa Jenoside yakorewe Abatutsi rwa Kinigi, bahamya ko rwihariye amateka yo kuba imibiri iruruhukiyemo, ari iy’Abatutsi bishwe ubwo Leta yariho icyo gihe yageragezaga Jenoside mu 1991, mbere yo kuyishyira mu bikorwa mu 1994.

Munyarutete Joseph, yavukiye mu cyahoze ari Segiteri Nyarugina muri Komini Kinigi, agira ati “Abatutsi bo mu cyahoze ari Komini Kinigi, batangiye kumeneshwa mu byabo, bagatotezwa aho byaje kudukomerera cyane nyuma y’iminsi itatu yakurikiye ifungurwa ry’Abatutsi bari muri Gereza ya Ruhengeri tariki 23 Mutarama 1991, bashinjwa kuba ibyitso by’Inkotanyi. Nibuka neza ko mu bari bafunguwe barimo uwitwa Elie n’abandi barimo n’umusaza witwa Bagayindiro”.

Ngo uwo musaza ni we wabimburiye Abatutsi bo muri ako gace kwicwa, ubwo hari tariki 26 Mutarama 1991, bikozwe n’abagore bamuteraniye bamwicisha amabuye.

Ati “Urupfu rwe rwaje gukurikirwa n’ikindi gitero simusiga abaturage bafatanyije n’Ingabo zari ku butegetsi, zagabye bucyeye bwaho ku Batutsi bari bakusanyije babakuye mu duce tunyuranye harimo nk’ahitwa Kidendezi, Rwunga, Kaniga n’ahandi, babica babarashe mu rwego rwo kubihimuraho babita ibyitso by’Inkotanyi”.

Urwibutso rwa Kinigi ruruhukiyemo imibiri 166 y’Abatutsi bishwe mu 1991

Abatutsi bakomeje kwibasirwa n’ubwicanyi bwabakorerwaga, kugeza tariki 23 Gashyantare 1991, ubwo abanyuma bishwe barimo n’uwari umubyeyi wa Munyarutete witwaga Akumwami.

Ngo byagiye kugera mu 1994 Jenoside ishyirwa mu bikorwa, nta mututsi wari usigaye mu cyahoze ari Komini Kinigi, kuko abatari barahiciwe mu igerageza rya Jenoside, bari barahungiye mu yandi makomini atandukanye, n’ubwo harimo abagiye bicirwayo mu gihe cya Jenoside, mu babashije kurokoka bakaba barimo abo Ingabo zahoze ari iza RPA-Inkotanyi, zakuye muri Komini Mukingo aho bari barahungiye mu rusengero rw’Abadivantisiti, mu gitero zagabye tariki ya 8 Gashyantare 1993, zikabahungishiriza muri zone zari zarafashe i Butaro.

Abarokotse Jenoside yakorewe Abatutsi, bavuga ko ubutegetsi bubi bwariho kuva mbere ya Jenoside, bwabibye urwango uhereye ku bato n’abakuru, kugeza ku rwego rw’uko Umututsi wese aho yabaga ari yafatwaga nk’inzoka.

Munyarutete Joseph, umwe mu barokotse Jenoside yakorewe Abatutsi mu Kinigi

Munyarutete ahera kuri aya mateka, agaya abakiyagoreka kugeza ubu bavuga ko Jenoside itigeze itegurwa.

Ati “Abagoreka amateka bitwaza ihanurwa ry’indege y’uwari Perezida w’u Rwanda Habyarimana Juvenali, ko ariyo mbarutso yatumye abahutu barakara bakica Abatutsi ngo bahorere umubyeyi wabo wari umaze gupfa. Ibyo sibyo kuko iyicwa ry’Abatutsi bo mu cyahoze ari Komini Kinigi ryabayeho mu 1991, ni igihamya ntakuka kigaragaza uburyo Jenoside yakorewe Abatutsi yateguwe kuva na mbere hose, ikanageragezwa mu buryo bweruye, ibyaje gukurikirwa no kuyishyira mu bikorwa mu 1994”.

Ati “Abo bacyifitemo ubugome no kwimika ubugwari bapfobya ayo mateka y’abacu nkana, birakwiye ko bazibukira bagafata iya mbere bakemera amateka nyayo y’ukuri kw’ibyabaye, no kuyavuga uko ari kuko aribwo tuzubaka u Rwanda ruzira ipfobya n’amacakubiri”.

Abarokotse Jenoside yakorewe Abatutsi, nyuma y’inzira itoroshye y’amateka banyuzemo, imyaka 29 ikaba ishize Jenoside ihagaritswe, ubu ngo bashishikajwe n’urugamba rwo kwiyubaka.

Urwibutso rwa Jenoside yakorewe Abatutsi rwa Kinigi ruruhukiyemo imibiri iy’Abatutsi bishwe mbere ya 1994

By’umwihariko bagahamagarira abatsimbaraye ku kwanga kugaragaza imibiri y’Abatutsi kugeza ubu itaraboneka, gutanga amakuru y’aho iherereye kugira ngo ishyingurwe mu cyubahiro.

Ibi babihera ku kuba Abatutsi benshi bo mu cyahoze ari Komini Kinigi, muri icyo gihe cy’igerageza rya Jenoside, abari begereye igice cy’ishyamba ryo mu birunga, barimo ababashije kurimeneramo babasha guhunga, hakaba n’abagiye batangirirwa mu mayira bakicwa.

Imibiri imwe n’imwe ikaba yaragiye iboneka ariko hakaba n’itarabineka kugeza na n’ubu, bikekwa ko biciwe mu Tugari twa Kampanga, Nyabigoma, Kaguhu no muri Pariki y’Ibirunga hagati ya Sabyinyo na Karisimbi, n’ubwo ntawe uzi nyirizina ibice bajugunywemo.

Urwibutso rwa Jenoside yakorewe Abatutsi rwa Kinigi, ruruhukiyemo imibiri 166. Kimwe n’izindi nzibutso ziri hirya no hino, abafite ababo baruruhukiyemo, buri mwaka mu gihe cyo kwibuka, barahasura bakanashyira indabo ku mva baruhukiyemo, mu rwego rwo kubunamira no kubasubiza agaciro bambuwe.

Uyu muhango wabaye tariki 8 Mata 2023, mu murwa mukuru wa Suède, Stockholm, wabanjirijwe n’urugendo rwo Kwibuka.

Wateguwe n’Umuryango Ibuka-Suède, ku bufatanye na Ambasade y’u Rwanda mu bihugu biri mu Majyaruguru y’u Burayi, ndetse na Diaspora y’Abanyarwanda batuye muri icyo gihugu.

Kanamugire Josine, Umuyobozi wa Ibuka muri Suède, yashimiye cyane abateguye umuhango wo Kwibuka ku nshuro ya 29, ndetse ashimangira ko Kwibuka ari ugusubiza icyubahiro n’ubumuntu Abatutsi bishwe muri Jenoside mu 1994.

Yagize ati "Turabikora kugira ngo dusubize icyubahiro n’ubumuntu byambuwe Abatutsi ubwo bicwaga urw’agashinyaguro. Iyo twibutse dufatanya gukirira hamwe ibikomere."

Yakomeje avuga ko Kwibuka bigamije kugaragaza no kuvuga amateka nyakuri, kugira ngo abahakana bakanapfobya Jenoside yakorewe Abatutsi, badahabwa umwanya wo kugoreka ukuri.

Kanamugire yavuze kandi ko Kwibuka bigamije kuburira Isi, mu gihe haba hari ahandi hagaragara ibimenyetso bya Jenoside.

Ati "Twibuka kugira ngo tubashe kuburira Isi mu gihe tubonye ibimenyetso bya Jenoside, haba mu kuyitegura no kuyishyira mu bikorwa. Nk’uburyo Abanyamulenge bakomeje gufatwa, bakamburwa ubumuntu nk’uko natwe byatubayeho."

Yasoje avuga ko ibikorwa byo kwibuka kuri iyi nshuro ya 29 Jenoside yakorewe Abatutsi mu, bigamije gutuma nta gisekuru yaba icy’uyu munsi n’ibihe bizaza, kizabaho gihigwa cyangwa ngo gihohoterwe nk’inzira y’umusaraba banyuzemo mu gihe cya Jenoside.

Abitabiriye uyu muhango wo kwibuka muri Suède, biganjemo cyane cyane urubyiruko, basobanuriwe amateka asharira ababyeyi babo banyuzemo, biciye mu biganiro ndetse n’ubuhamya bwahatangiwe.

Ambasaderi w’u Rwanda mu bihugu by’Amajyaruguru y’u Burayi, Dr Diane Gashumba, witabiriye uyu muhango, yaboneyeho guhumuriza Abanyarwanda bose, no kubibutsa ko badakwiye guheranwa n’agahinda cyangwa kwiheba.

Guverineri Gasana yunamiye inzirakarengane zazize Jenoside

Abakozi bibutswe ni abari aba Diyoseze, ab’ibitaro bya Gahini ndetse n’ab’ibigo by’amashuri ya EAR, biciwe ku musozi wa Gahini.

Uyu muhango watangijwe no gushyira indabo ku rukuta rwanditseho amwe mu mazina y’abamenyekanye ko biciwe i Gahini, hakaba hagaragara amazina y’abantu 100 ariko ngo hari abandi benshi bagishakishwa.

Abari kuri urwo rutonde ni Abatutsi bari batuye i Gahini, abakoreraga ibigo bya EER, aribyo: Ecole des Lettres de Gahini, Hôpital de Gahini, Seminari ya Gahini, Ecole artisanale, Ecole Primaire Gahini, Centre de réadaptation hazwi nko Kwa Harding (umuzungu wahayoboraga) hakiyongeraho n’abandi bibukwa baroshywe mu kiyaga cya Muhazi ahegereye amasambu y’icyari Paroisse Gahini icyo gihe.

Gatera Faustin, watanze ikiganiro kigaruka ku bumwe bw’Abanyarwanda mbere y’umwaduko w’abakoloni, isenywa ry’ubumwe bw’Abanyarwanda by’umwihariko u Rwanda, ku butegetsi bwa gikorloni, ndetse n’ikwirakwizwa ry’ingengabitekerezo ya Jenocide kuri Repubulika ya mbere n’iya kabiri, n’itegurwa n’ishyirwa mu bikorwa rya Jenoside yakorewe abatutsi mu 1994. Yagaragaje ko Abanyarwanda bari babanye neza bahindurwa n’abakoloni bifashishije iturufu y’amoko.

Urwango rwabibwe n’abakoloni ngo rwabaye intwaro ikomeye ku bayobozi muri Repubulika ya mbere n’iya kabiri, ingaruka yabyo iba Jenoside yakorewe Abatutsi.

Yasoje ashimira Ingabo zari iza RPA zahagaritse Jenoside, hakongera kubakwa u Rwanda n’indangaciro z’umuco nyarwanda.

Inzego z’Umutekano zashimiwe uburyo zidahwema kurinda abaturage

Mushi Jean Bosco, umwe mu bacitse ku icumu rya Jenoside yakorewe Abatutsi i Gahini, yatanze ubuhamya bw’uko mu minsi itatu gusa ya Jenoside, i Gahini Abatutsi bari bamaze kwicwa guhera ku itariki ya 07 kugeza ku 10 Mata 1994.

Yavuze ko abari barokotse i Gahini bajyanwe i Karubamba kuri Paruwasi gatolika, mu minsi ibiri gusa nabwo bakicwa.

Abari bagihigwa ngo nibo baje kurokorwa n’Ingabo zari iza RPA, maze abicanyi bakwira imishwaro, inkomere n’abari bihishe ahantu hatandukanye babona ubuzima.

Yashoje ashimira ingabo za RPA-Inkotanyi zabakuye mu menyo ya rumba, by’umwihariko ashimira imiyoborere myiza yatumye abasha kwiga no kwiteza imbere.

Mu biciwe i Gahini harimo n’abarwayi bari baje kwivuza

Umuyobozi wa Ibuka mu Karere ka Kayonza, Didas Ndindabahizi, yavuze ko Kwibuka ari umwanya wo gushima Inkotanyi ndetse ashimira imiyoborere myiza, kuko abari barabujijwe kwiga basubiye mu ishuri.

Yavuze ko nyuma ya Jenoside yakorewe Abatutsi, abataragiraga aho kuba bubakiwe amacumbi, abakeneye ubuvuzi barabuhabwa n’ubu ngo bigikomeza.

Yashimye ubutabera bwunga (Gacaca), bwatekerejwe na Leta y’u Rwanda ndetse anashimira ubuyobozi bw’Intara y’Iburasirazuba, kuba bwafatanyije n’inzego z’ibanze mu gukurikirana imanza za Gacaca zikaba ziri hafi kurangira.

Guverineri w’Intara y’Iburasirazuba, Emmanuel K. Gasana, yibukije abitabiriye uyu muhango ko Imana yakoresheje FPR-Inkotanyi iyiha umuntu yitoranyirije, ariwe Perezida Paul Kagame, ayobora urugamba rwahagaritse Jenoside.

Yavuze ko ibi byuzuzanya n’amateka yo muri Bibiliya mu Baroma, yibutsa ko buri bwoko bw’abantu ku Isi, hagira uhabwa umutima, ubwenge, ubushake n’ubushobozi byihariye, akabajya imbere, akabakura mu kaga, akabereka inzira y’amajyambere.

Yagize ati “Nyakubahwa Paul Kagame, uturangaje imbere, yashyiriweho kubaka umusingi ku binyejana biri imbere. Tugomba kwirinda ingengabitekerezo ya Jenoside, tuzirikana itegeko rihana ihakana n’ipfobya ryayo, dutangira amakuru ku gihe, duharanira kurushaho kwigisha amateka.”

Perezida Paul Kagame

Umukuru w’Igihugu yabinyujije mu butumwa yashyize ku mbuga nkoranyambaga ze, kuri iki Cyumweru tariki 9 Mata 2023.

Muri ubu butumwa kandi, yakomeje avuga ko Kwibuka ari uburyo bwiza bwo kugaragariza ukuri abashaka gushakira indi nyito ibyabaye mu Rwanda.

Yagize ati "Kuri abo bashaka amagambo yabo bita ibyo Igihugu cyacu cyanyuzemo, Kwibuka ni amahirwe yo kubyibuka no gukomeza kurushaho kwegera ukuri."

Kuva tariki 7 Mata 2023, u Rwanda rwatangiye icyumweru cy’Icyunamo n’iminsi 100 yo kwibuka ku nshuro ya 29 Jenoside yakorewe Abatutsi mu 1994.

Abo bayobozi bihanganisha Abanyarwanda, barimo Umunyamabanga Mukuru w’Umuryango w’Abibumbye, Antonio Guterres, Mussa Faki Mahammat wa AU, Louise Mushikiwabo, Umuyobozi w’Umuryango w’Ibihugu bikoresha ururimi rw’Igifaransa n’abandi.

Uyu muhango wabaye ku wa Gatanu tariki 7 Mata 2023, witabiriwe n’abayobozi baturutse muri Guverinoma y’u Buhinde, Abadipolomate, abahagarariye imiryango mpuzamahanga n’abandi.

Ambasaderi Mukangira mu butumwa yatanze, yavuze ko uyu munsi Isi igomba gukura amasomo ku mateka mabi u Rwanda rwanyuzemo, ndetse amahanga agaharanira kurwanya ingengabitekerezo ya Jenoside.

Yakomeje agira ati "Ni ngombwa cyane ko twese dufatanya mu kurwanya abagihakana bakanahembera Jenoside n’ingengabitekerezo yayo. Dufite intego nyamukuru yo guhindura Isi yose, tukayigira ahantu hari amahoro hazatura ikiragano cy’uyu munsi ndetse n’icy’ahazaza."

Umunyamabanga wa Leta muri Minisiteri y’Ububanyi n’Amahanga y’u Buhinde, Meenakashi Lekhi wari witabiriye uwo muhango, yihanaganishije Abanyarwanda muri ibi bihe bitoroshye.

Madamu Lekhi yagaragaje ko mbere y’imyaka ibiri mu 1992, u Buhinde bwatanze impuruza mu Muryango w’Abibumbye ko hashoboraga kuba Jenoside mu Rwanda, ndetse bunasaba Umuryango Mpuzamahanga kugira icyo ukora.

Muri uyu muhango wo Kwibuka ku nshuro ya 29 wabereye i New Delhi, Cynthia McCaffrey, uhagarariye UNICEF mu Buhinde, yatanze ubutumwa bw’Umunyamabanga mukuru w’Umuryango w’Abibumbye, António Guterres.

Ubutumwa bwibanze ku rugendo Abanyarwanda bayuzemo mu rwego rwo kongera kwiyubaka no gukira ibikomere, ndetse no kwimakaza ubumwe n’ubwiyunge. Yibukije amahanga kuzirikana ayo mahano yabereye mu Rwanda, ndetse asaba ashikamye ko atazongera kuba ahandi ku Isi.

Ati "Ikiragano cyo kuva muri Jenoside, ntitugomba na rimwe kwibagirwa ibyabaye ndetse no gusaba ko ab’ikiragano kizaza bazahora bibuka."

Uyu muhango wo kwibuka waranzwe no kwerekana filime mbarankuru, gucana urumuri rw’icyizere n’umuvugo wakurikwe n’ikinamico yerekana Jenoside mu 1994.

D’Amour Selemani

Mu kiganiro cyatangajwe n’Umuyoboro wa YouTube wa X Large Ku itariki 7 Mata uyu mwaka, uyu mukinnyi wa filime wabigize umwuga, yasobanuye uko yinjiye mu Nkotanyi kugeza zitsinze urugamba zigahagarika Jenoside yakorerwaga Abatutsi mu 1994.

Mbere ya Jenoside, Selemani avuga ko yari atuye iwabo mu cyahoze ari Komine Ngarama mu Mutara, kuri ubu hakaba ari mu Karere ka Gatsibo mu Ntara y’Iburasirazuba. Mu mwaka 1990 ubwo urugamba rwo kubohora Igihugu rwatangizwaga na RPF-Inkotanyi, yari umusore w’imyaka 15 wasoje amashuri abanza, ariko ntiyabasha gukomeza bitewe n’imibereho y’icyo gihe.

Acyiga avuga ko mu ishuri barangwaga no gukorerwaho ibikorwa by’ivangura, ariko bataramenya neza ikigamijwe. Urugamba rutangira nk’umuntu wari utuye mu Mutara aho rwatangiriye bararwumvaga, ndetse aho bari batuye hari hegeranye n’inkambi y’ingabo za Leta icyo gihe (Ex FAR).

Nyuma mu 1992 Selemani yaje kuza i Kigali kwa Nyirarume arahaguma, ari naho umugambi wo kwinjira mu Nkotanyi watangiriye. Akimara kumenyera aho bari batuye mu Murenge wa Gatsata, yatangiye guhura n’urungano batangira kuganira ku byo babonaga birimo ubusahuzi n’ubundi bugizi bwa nabi bwakoraga ubutegetsi burebera.

Bagize umugambi wo kujya mu gisirikare cy’Inkotanyi ngo batange umusanzu wabo mu kubohora Igihugu, ariko nta buryo bworoshye bwo kubikora bari bafite, icyo gihe we yari agize imyaka 17 y’amavuko.

Ati “Turavuga tuti rero nkatwe nk’urubyiruko reka tujye mu gisirikare, ariko dusanga kugira ngo tuzagere mu Nkotanyi byari bigoye pe! Bati nta yindi nzira usibye guca mu Burundi, cyangwa se ugaca muri Tanzaniya cyangwa se muri Kongo ni bwo wagera muri Uganda.

Akomeza avuga ko nta bushobozi bw’amafaranga bari bafite ndetse ko byari binagoye gusohoka Igihugu, kuko byakekwaga ko ugiye mu Nkotanyi ukagirirwa nabi. We na bagenzi be batandatu biyemeje guca mu Burundi n’ubwo batari bizeye uko mu nzira bizagenda. Gusa bakoze uko bashoboye bagurisha utwo bari bafite turimo inkweto n’amagare y’abana, ubundi basezera imiryango banzika urugendo.

At “Ndibuka twazamutse uno muhanda wa Nyamirambo tujya gutegera muri gare hariya hubatse ‘City Tower’, tuba dufashe bisi ya ONATRACOM. Tugeze i Butare muri gare yaho tuvamo dutangira urugendo rw’amaguru kugira ngo tugere ku Kanyaru”.

Baciye mu duce turimo Kigembe, Kansi na Nyaruteja mu Karere ka Gisagara, bageze ku mupaka w’u Rwanda n’u Burundi bizeye ko bazabona uburyo bazagera ku Nkotanyi bazegurutse bagaca muri Tanzaniya.

Ati “Hari mu gitondo mu rukerera twaraye mu ishyamba hafi y’Akanyaru. Tubona umuntu w’umuturage tumuha ibihumbi bibiri aratwambutsa. Twari turi muri ‘risk’ (ibyago) byo kuba twanapfa, baravugaga bati interahamwe nizibafata cyangwa abapolisi bakamenya ko muri muri iri shyamba barabica. Tuba turambutse tugeze i Burundi.

Selemani avuga ko bakigerayo bahisemo kwiyita impunzi za politiki kuko n’ubundi hari hasanzwe izindi mpunzi zavaga mu Rwanda. Baje kwakirwa mu nkambi nk’impunzi zari zimaze no kuba nyinshi cyane z’Abanyarwanda, zagiye zijyayo kuva mu 1959 ndetse hakomeza kuza n’abandi barimo n’urubyiruko.

Asobanura uko we na bagenzi be binjiye mu gisirikare yagize ati “Habagaho rero abo bita abakada; ubwo ni abantu babaga bakorana n’Inkotanyi baje gukura abantu mu nkambi z’impunzi. Bakabanza kutwigisha amahame y’Icyama, bakatubwira bati ni ukubohoza Igihugu cyacu, tugomba gutaha. Igihe kikagera bakazana imodoka bakadufata tugashiduka twageze ahaberega imyitozo ya gisirikare. Ni uko nagiye mu gisirikare kugeza igihe indege ya Habyarimana yahanukiye, turataka turarwana turinda tubohora Igihugu”.

We n’abandi bamaze kugera mu gihugu ubwo Jenoside yakorewe Abatutsi yarimo ikorwa, avuga ko ari mu batozaga abasirikare bagenzi be iby’urugamba, kuko we yabyumvaga cyane. Bidatinze Inkotanyi zatangiye gufata uduce tw’Igihugu kamwe ku kandi zitwambuye umwanzi, maze zigera ku ntsinzi ubwo Jenoside zirayihagarika.

Mu rugamba rugikomeza rwo kubaka Igihugu no kwiteza imbere, uyu mukinnyi wa filime yibutsa urubyiruko ko aya amahoro n’iterambere bitizanye bityo, ko buri wese akwiye kuyishimira ariko agakora icyatuma bisugira, kandi na we akiteza imbere abikuye muri icyo gishoro.

Bamwe mu bamaze kugera ku bumwe n’ubwiyunge binyuze mu nyigisho bahabwa mu matsinda yiswe ‘Mvura nkuvure’, yashyizweho n’umuryango ‘Interpeace’ (umuryango mpuzamahanga utari uwa Leta uharanira amahoro), ku bufatanye na ‘Prison Fellowship Rwanda’ (Umuryango Nyarwanda ugendera ku mahame y’iyobokamana, ugamije ubumwe n’ubwiyunge, isanamitima no gukomeza kubanisha Abanyarwanda muri rusange), mu mushinga bafatanyije mu Karere ka Bugesera, ugamije isanamitima n’imibereho myiza.

Nk’uko abahawe izo nyigisho zo mu matsinda ya Mvura nkuvure babyivugira, barahindutse baba abandi bantu batandukanye n’uko bahoze bameze mbere yo kwigishwa, ku buryo ubu nabo ngo batanga umusanzu wabo mu kwigisha bagenzi babo.

Mukaremera Françoise w’imyaka 50 y’amavuko, akaba yaracitse ku icumu rya Jenoside yakorewe Abatutsi, ariko benshi mu bari bagize umuryango we barishwe. Atuye mu Mudugudu wa Bitega, mu Kagari ka Musovu, mu Murenge wa Juru mu Karere ka Bugesera, avuga ko Jenoside ikirangira yumvaga yakwihorera.

Yagize ati “Mbese numvaga mfite ubushobozi, abanyiciye nabica nanjye, ariko ubwo bushobozi ntibwanabonetse kubera Leta y’Ubumwe, iranyigisha nyine, ariko ubundi numvaga nta no kubabarira nagiraga, nabonaga uwo ari we wese nkumva ndamwanze. Nyuma nza kumva ibya Mvura nkuvure, umuntu umwe aza kubinganirizaho, ariko ntiyabinganirizaho neza, abatanga ibiganiro baza kuza mu rugo bati turagukeneye uzaze muri Mvura nkuvure, ndababaza nti mbese izamvura ibyo numva mfite mu mutima wanjye? Barambwira bati birakunda”.

Mukaremera avuga ko nyuma yo kujya muri izo nyigisho nk’inshuro eshatu, yatangiye kumva agenda abohoka gato ariko ikintu gisa n’ikibyimba yari afite mu mutima kitarameneka, kuko aho muri izo nyigisho yanahuriragamo n’abamwiciye abe.

Umunyamakuru wa Kigali Today, Simon Kamuzinzi, aganira na bamwe mu bashima Mvura Nkuvure mu Bugesera

Aho mu nyigisho buri wese ngo yavugaga ibimuri ku mutima, bakamufasha kubivuga kugira ngo aruhuke, ku buryo n’abavuze ko ari bo bishe bamwe mu bagize umuryango we, yumvise abababariye atazi aho akuye imbabazi.

Yagize ati “Mvura nkuvure yaramvuye, uko yamvuye mbyifuriza n’abandi ko igomba kubavura. Uruhare ngira, nk’ubu abo nturanye nabo, hari umusaza ukunda kuzana ibintu by’amagambo nkamubwira nti, wibuke uko nari meze, jya ureka iby’amoko. Mvura nkuvure ni umuti Abanyarwanda bose bagomba kunywaho, nanjye narawunyoye kandi narakize, Imana ishimwe”.

Ku rundi ruhande hari Gatanazi Innocent, wakoze Jenoside ndetse akanafungwa nyuma akaza kwitabira gahunda yo kwemera ibyaha no kubisabira imbabazi, biza kumufasha gufungurwa vuba kuko igihano yari yarakatiwe cyaragabanutse, nubwo ageze hanze ngo yahoraga yumva adatuje.

Nyuma na we yaje kujya muri Mvura Nkuvure, asaba imbabazi abo yiciye abantu harimo na Mukaremera, ibyo ngo bimuha kumva atuye umutwaro ndetse atangira kujya aryama agasinzira, kuko ubu yumva abanye neza n’abaturanyi be.

Yagize ati “Njyewe ubundi, mu 1994 nitabiriye Jenoside, nkora nabi, njya mu bitero, nica abantu b’inzirakarengane, icyakurikiyeho ni ugufungwa kandi byari bikwiye. Bageze aho baratwigisha, Leta y’Ubwumwe iratwigisha, ngo uwemera icyaha akavugisha ukuri, agasaba imbabazi, azababairwa, ndandika nsaba imbabazi.”

Ati “Byabaye rero ikibazo ngiye kujya muri Mvura Nkuvure, bivuze ko ntiyakiraga neza n’ubwo nari narafunguwe, nari narafunguwe by’umubiri, ariko umutima wari ufunze. Nta mahoro numvaga mfite, abantu narabarebaga nkumva ko bose ari jye bareba. Uubwo rero aho ngereye muri Mvura Nkuvure, nahuye n’abandi bagenzi banjye, nshyira hasi ibyanjye, bati na we ruhuka, wumvise ko tunafite n’akantu keza ko kuvuga ngo ibyavugiwe hano ntibikahave”.

Umuyobozi Nshingwabikorwa ushinzwe ubudaheranwa muri Minisiteri y’Ubumwe bw’Abanyarwanda n’Uburere Mboneragihugu, Uwacu Julienne, yasobanuye ibyo iyo Minisiteri irimo gukora kugira ngo izo gahunda zigamije ubumwe n’ubwiyunge n’isanamitima zikomeze bihoraho.

Yagize ati “Prison Fellowship ni imwe muri ya miryango icumi (10) irimo gukorera mu Turere dutatu, twagiranye nabo amasezerano. Interpeace nabo ni bamwe mu bo dukorana, yatangiye umushinga ‘pilote’ iwukorera muri Bugesera, ariko ubungubu bagiye mu Turere dutanu, ariko mu bo dufatanya, hari n’indi miryango icumi isanzwe ibikora, ariko noneho twashyizeho amasezerano yihariye”.

Ati “Icya kabiri dufite ubufatanye n’amadini n’indi miryango ishingiye ku myemerere, hanyuma hari n’izindi nzego. Turifuza ko icyo gikorwa cy’isanamitima, kitakorwa n’umushinga wabonye inkunga ngo nurangiza ugende. Turashaka gushyiraho urwego nka kumwe tugira Abajyanama b’ubuzima cyangwa ab’ubunzi n’abandi, hakaba abantu bafite ubumenyi ku bijyanye n’isanamitima, bari mu muryango Nyarwanda babe bashobora gufasha bagenzi babo”.

Abayobozi mu nzego zitandukanye bashyize indabo kuri uru rwibutso rushyinguwemo imibiri y’Abatutsi barenga 400, bakuwe mu cyahoze ari Perefegitura ya Byumba, ubu ni mu Turere twa twa Nyagatare, Gatsibo na Gicumbi.

Ku ruhande rw’Akarere ka Gatsibo, 16 nibo bamaze kumenyekana batwawe mu biswe ibyitso bakicirwa i Gicumbi.

Abafashwe bitwa ibyitso by’Inkotanyi muri utu Turere, biciwe ahahoze Parike ya Byumba bajugunywa mu cyobo, bakaba baratwikishijwe amapine y’imodoka n’amakara byamenweho lisansi.

Umuyobozi w’Akarere ka Gicumbi, Nzabonimpa Emmanuel, yabanje kwihanganisha Abanyarwanda muri rusange n’abafite ababo bashyinguye muri uru rwibutso rwa Gisuna na Mukeri by’umwihariko, avuga ko ari inshingano z’Abanyarwanda kwibuka inzirakarengane zazize Jenoside, kuko ari ukubasubiza icyubahiro bambuwe.

Yasabye buri wese kuba hafi y’abarokotse muri ibi bihe bitoroshye bibuka ababo bavukijwe ubuzima bazira uko baremwe.

Yavuze ko bababazwa cyane n’iyicarubozo abiciwe ahahoze Parike ya Byumba bakorewe, ariko anizeza ko inyigo yo kubaka uru rwibutso ku buryo buhesha icyubahiro abaruruhukiyemo yarangiye, hagiye gutangira ibikorwa byo kurwubaka.

Yagize ati “Tubabazwa n’iyicarubozo bakorewe ndetse no kuba tutazi umubare wabo nyawo kubera uburyo bishwemo. Ubu dukomeje ibikorwa byo gutunganya aho baruhukiye, ubu inyigo yo kubaka uru rwibutso ku buryo ruhesha icyubahiro abaruhukiyemo yararangiye, hasigaye ibikorwa byo kubaka.”

Depite Ndoliyobijya Emmanuel, yavuze ko kugeza uyu munsi hari imibiri y’Abatutsi bishwe muri Jenoside itaraboneka, asaba buri wese waba ufite amakuru y’aho yaba iherereye, kuyatanga nayo igashyingurwa mu cyubahiro.

Madamu Jeannette Kagame na we yitabiriye kureba ikinamico Hate Radio

Iyi kinamico yakurikiwe n’abayobozi batandukanye barimo Madamu Jeannette Kagame, umuvugizi wa Guverimona, Yolande Makolo hamwe n’umujyanama wa Perezida Kagame mu by’umutekano, James Kabarebe n’abandi bantandukanyendetse ndetse n’abaturage muri rusange.

Iyi kinamico yakinwe mu buryo bushushanya uko RTLM yakoraga, yeretse abari bitabiriye uko iyo radio yabibye urwango mu mitima y’Abahutu muri rusange.

Iyo kinamico kandi yakinwe n’abahanga mu gutegura no gukina ikinamico, barimo n’umunyarwenya w’Umunyarwanda, Ntalindwa Diogène wamamaye ku izina rya Atome.

Ntarindwa yakinnye agaragaza uburyo iyi radio yakoresheje kugira ngo ibe icyamamare, ko yashatse abanyamakuru b’abahanga kurusha abandi barimo Habimana bise Kantano, ndetse n’umuyobozi wayo w’ibanze, wari umunyamateka ukomeye witwa Dr. Ferdinand Nahimana.

Umugore witwa Valérie Bemeriki na we yari azi gutangaza amakuru kandi akagira ijwi benshi bakundaga, akaba n’umwe mu bakanguriraga urubyiruko gufata intwaro bagakora Jenoside.

Mu biganiro yatambutsaga, RTLM yakoraga ku buryo abayumva, cyane cyane urubyiruko, bumva ko ifite itandukaniro na Radio Rwanda muri icyo gihe.

Kubera ko Abanyarwanda bamenyaga amakuru bayumvise kuri Radio Rwanda na RTLM, byoroheye iyi Radio gukwiza ibihuha n’urwango mu Banyarwanda, maze uburyo Jenoside yateguwemo bigatangarizwaho, bikagera ku muturage wo hasi.

RTLM yavutse mbere gato ya 1994, ihita itangira ubukangurambaga bwo kurimbura ubwoko bw’Abatutsi.

Atome yavuze ko uyu mukino werekanwe mu Rwanda nk’Igihugu cyabayemo Jenoside yakorewe Abatutsi, RTLM ikaba Radio yatumye ikoranwa ubukana.

Yavuze ko indi mpamvu ikomeye yatumye bawereka Abanyarwanda, ari ukugira ngo Igihugu kibe igicumbi cyo kwamagana ibyabaye ku buryo bitazongera kubaho ukundi.

Ati "Ngendeye ku birimo kuba mu Karere by’umwihariko mu gihugu cy’abaturanyi, nifuje ko u Rwanda rwaba igicumbi cya nyirantarengwa kuri ibyo bintu, imvugo z’urwango n’amacakubiri ntibihabwe intebe ahantu aho ari ho hose. Uyu mwanya rero ni mwiza w’ubukangurambaga bwo kwamagana imvugo z’urwango."

Minisitiri w’Ubumwe bw’Abanyarwanda n’Inshingano Mboneragihugu, Dr Bizimama Jean Damascène, yavuze ko itangazamakuru ryafashije cyane Leta yateguye ikanashyira mu bikorwa Jenoside yakorewe Abatutsi.

Yagaragaje ko kuva mu 1959, itangazamakuru ryabaye igikoresho cy’amashyaka n’ubutegetsi mu kwangisha Abahutu Abatutsi, ndetse rigafasha Leta kubishyira mu bikorwa.

Ati "Gukoresha itangazamakuru mu kwigisha urwango ntibyatangiranye na RTLM, ni ibya cyera. Amashyaka ya mbere yashinzwe mu Rwanda mu 1959, ni yo yatangije ibinyamakuru byigisha urwango. RTLM ifite aho yabivanye, ifite abakurambere bayo."

Minisitiri Dr Bizimana yibukije urubyiruko ko bakwiye kuvana amasomo muri aya mateka bagakunda Igihugu, bakarwanya ingengabitekerezo ya Jenoside, bagaharanira ishema ry’Igihugu n’ubuyobozi bwacyo.

Ati “Urubyiruko ni mwe mugomba kubungabunga aya mahoro dufite, kugira,ngo ibyabaye bitazongera kubaho ukundi, kandi mugahagurukira kwamagana ikintu cyose cyacamo amacakubiri Abanyarwanda.

Reba andi mafoto HANO

Reba ibindi muri iyi video:

Ni umuhango witabiriwe n’Abanyarwanda batuye muri Leta zitandukanye. Hari kandi abanyacyubahiro bahagarariye USA, bari bayobowe na Molly Phee, umunyamabanga wa Leta wungirije ushinzwe Afurika muri Ministeri y’Ububanyi n’Amahanga, abahagarariye ibihugu n’imiryango itandukanye.

Ambasaderi w’u Rwanda muri Amerika, Matilde Mukantabana, yashimiye abitabiriye uyu muhango, aho yagaragaje ko mu gihe cyo kwibuka, ari bwo ubona inshuti nyayo.

Yagize ati "Ubufatanye bwanyu n’Abanyarwanda muri ibi bihe twibuka ibyaranze amateka yacu, ni iby’agaciro gakomeye. Mu bihe nk’ibi ni ho uba ukeneye inshuti kandi mwaje. Ndabashimiye ku bw’ubucuti no gufatanya."

Yashimiye mu buryo bwihariye USA yise umufatanyabikorwa wo kwiringirwa, wafashije u Rwanda kongera kwiyubaka no kugera ku majyambere.

Yagize ati "Twizeye kandi ko tuzakomeza kugira umubano mwiza no gushimangira ubucuti."

Yakomeje avuga kandi ko yizeye ko USA izakomeza gufatanya n’u Rwanda mu gushaka no guta muri yombi abakoze Jenoside, bagashyikirizwa ubutabera.

Yashimiye Perezida Kagame n’ubuyobozi bwe, washoboye gufasha Abanyarwanda gukora ibidasanzwe amahanga atatekerezaga, bagafata icyemezo cyo kudacogora no kwemera ko Jenoside iba ijambo rya nyuma.

Ambasaderi Mukantabana yashimangiye ko n’ubwo Jenoside yakorewe abatutsi mu 1994, yahungabanyije Isi kubera ubugome yakoranywe, ariko bitabaye bitunguranye cyangwa se impanuka, kuko igitekerezo cyayo cyari kimaze imyaka myinshi mbere yuko gishyirwa mu bikorwa ku ya 7 Mata 1994.

Molly Phe yavuze ko Amerika ikomeje umugambi wayo imaranye igihe kinini, wo gushakisha no gufasha guta muri yombi abahekuye u Rwanda.

Yibukije ko Amerika iri mu bihugu byafashije gushyiraho urukiko mpuzamaganga mpanabyaha rwashyiriweho u Rwanda, rwakoreraga muri Tanzania.

Yagize ati "Ntabwo Amerika izahagarika gukorana n’u Rwanda mu gufata abakoze Jenoside no kubashyikiriza ubutabera."

Muri uyu muhango wo kwibuka humviswe ubuhamya bw’Umunyarwandakazi, Consolée Nishimwe warokotse Jenoside. Uyu yavuze ko n’ubwo hashize imyaka 29 igihe kigera ukongera ugasubira inyuma, ugatekereza inzira waciyemo n’abawe wabuze.

Consolée Nishimwe

Jason Nshimye uhagarariye Ibuka muri USA, yagarutse ku bumwe bw’Abanyarwanda, ashimangira ko batazemerera ukundi uwo ari we wese uzashaka kubabibamo urwango.

Abandi bayobozi mu nzego zitandukanye muri Amerika nabo bagiye batanga ubutumwa, bwo kwifatanya n’Abanyarwanda muri ibi bihe byo kwibuka Jenoside yakorewe Abatutsi.

Prof. Fiacre Bienvenu, impuguke mu bijyanye n’amakimbirane, yatanze ikiganiro ku mpamvu ndetse n’itegurwa rya Jenoside yakorewe Abatutsi mu 1994. Yagaragaje uburyo igitsina gore cyakoreshejwe nka poropaganda, cyane cyane mu kwibasira abagore b’Abatutsi.

Amb Matilde Mukantabana

Guverineri Gasana yasabye abaturage kuba hafi abarokotse

Yabigarutseho ku wa Gatanu tariki ya 07 Mata 2023, mu gikorwa cyo gutangiza icyumweru cyo Kwibuka Jenoside yakorewe Abatutsi, ku rwego rw’Intara kikaba cyaratangirijwe ku rwibutso rwa Jenoside rwa Nyakarambi mu Karere ka Kirehe.

Mu gutangiza iki cyumweru, abaturage b’Akarere ka Bugesera bahuriye ku rwibutso rwa Nyamata rushyinguwemo imibiri 45,000 rukaba rugomba gushyirwa mu murage w’Isi (UNESCO).

Inzobere mu mateka y’u Rwanda, Rutayisire, yagejeje ku bitabiriye uyu muhango ikiganiro ku mateka ya Jenoside yakorewe Abatutsi mu 1994, ibyayiteye, gusuzuma aho u Rwanda rugeze rwiyubaka no gufata ingamba zo gukomeza guhangana no gutsinda ibisenya u Rwanda.

Muri iki kigariro, yagarutse ku bumwe bw’Abanyarwanda mbere y’umwaduko w’abakoloni, isenywa ry’ubumwe bw’Abanyarwanda, Guhagarika Jenoside no kongera kubaka u Rwanda.

Umuyobozi w’Akarere ka Bugesera wungirije ushinzwe iterambere ry’Ubukungu, Umwali Angelique, yashimiye Ingabo zahoze ari iza RPA zabohoye Igihugu, ndetse zihagarika Jenoside, by’umwihariko Umuryango FPR-Inkotanyi ukimakaza imiyoborere myiza ariyo nkomoko y’iterambere ry’Akarere ka Bugesera, ati “Harakabaho intwari zarwitangiye.”

Ku rwego rw’AKarere ka Gatsibo, uwo muhango wabereye mu Mudugudu wa Cyoto mu Kagari ka Cyabusheshe, mu Murenge wa Gitoki.

Depite Uwamahoro Bertilde yatanze ikiganiro cy’amateka yaranze amacakubiri mu Banyarwanda, akageza no kuri Jenoside yakorewe Abatutsi, yavuze ko ubu Abanyarwanda babanye neza kubera imiyoborere myiza.

Umwe mu barokokeye mu Kagari ka Cyabusheshe, Rukundo Gedeon, yagarutse ku mateka yanyuzemo na bagenzi be mu gihe cya Jenoside, asaba ko aya mateka yakwandikwa.

Perezida wa Ibuka mu Karere ka Gatsibo, Sibomana Jean Nepomscène, yashimiye ubufasha Leta ikomeje guha abarokotse Jenoside yakorewe Abatutsi, burimo amacumbi, uburyo bwo kwiga, korozwa amatungo n’ibindi, kugira ngo bakomeze kwiyubaka.

Banakomereje ku rwibutso rwa Jenoside yakorewe Abatutsi mu Mata 1994, rwa Kiziguro hashyirwa indabo ku mva ndetse hacanwa urumuri rw’ikizere.

Mu Karere ka Kayonza icyumweru cyo Kwibuka cyatangirijwe mu Murenge wa Rwinkwavu, hanashyirwa indabo ku byobo byacukurwagamo amabuye y’agaciro, byajugunywemo imibiri y’Abatutsi bishwe 1994.

Umuyobozi w’ako karere, Nyemazi John Bosco, yagaragaje ko mu Karere hari inzibutso zishyinguyemo imibiri 25,686 zirimo Mukarange, Rukara, Ruramira na Rwinkwavu.

Yavuze ko hari imibiri itaraboneka ngo ishyigurwe mu cyubahiro, nk’iyabajugunywe mu byobo byacukurwagamo amabuye y’agaciro (indani) i Rwinkwavu n’ahandi, anashima Ingabo zari iza RPA zarokoye Abatutsi bicwagwa.

Yavuze kandi ko mu rwego rwo kubungabunga amateka handitswe igitabo, hakanubakwa inzu y’amateka yaranze Jenoside yakorewe Abatutsi mu 1994.

Ku rwibutso rwa Nyakarambi mu Karere ka Kirehe, niho hatangirijwe icyumweru cyo Kwibuka ku nshuro ya 29 Jenoside yakorewe Abatutsi.

Umuyobozi w’Akarere ka Kirehe, Rangira Bruno, yasabye abafite amakuru ku haba hari imibiri itarashyingurwa kuyatanga, nabo bagashyingurwa mu cyubahiro.

Guverineri Gasana ari kumwe n’abandi bayobozi bashyize indabo ku mva zishyinguwemo imibiri y’Abatutsi, mu rwego rwo kubunamira no kubasubiza agaciro bambuwe, hacanwa urumuri rw’icyizere.

Guverineri Gasana yavuze ko Abanyarwanda bagomba kwibuka biyubaka, bigira, biha agaciro, baharanira umutekano n’iterambere kandi ntawe uhejwe.

Yasabye ko mubihe nk’ibihe abaturage bose bakwiye kuba hafi y’abarokotse, babahumuriza.

Yagize ati “Mu bihe nk’ibi tube hafi y’abarokotse kandi tubafashe mu rugendo rwo kwiyubaka no kubaka ubumwe bw’Abanyarwanda. Gupfobya, amagambo asesereza n’ibindi bikorwa bitari byo nta mwanya bifite kandi bihabanye n’amahitamo yacu. Ubu butumwa ni ubwa bose kandi mu Midugudu aho turi tubyifatemo neza.”

Mu Karere ka Ngoma, icyumweru cyo kwibuka cyatangirijwe ku rwibutso rwa Jenoside rwa Kibungo, aho Umuyobozi w’Akarere, Niyonagira Nathalie, yibukije ko kwibuka inzirakarengane zazize Jenoside ari Igihango bafitanye nabo kandi badateze gutatira.

Yagize ati “Kwibuka Inzirakarengane zazize Jenoside, ni igihango dufitanye nabo, tudateze gutatira kuko iyo twibuka ni ugusubiza agaciro abacu bambuwe, bazira uko Imana yabaremye kandi twese ntabwo twahisemo aho tuvukira".

Ku rwibutso rwa Jenoside yakorewe Abatutsi rwa Nkungu, rushyinguyemo imibiri 1,001, niho icyumweru cyo kwibuka Jenoside yakorewe Abatutsi 1994, cyatangirijwe mu Karere ka Rwamagana.

Umuyobozi w’ako karere, Mbonyumuvunyi Radjab, yihanganishije imiryango yabuze ababo, kandi asaba buri wese guharanira ko nta Jenoside yazongera ukundi.

Yavuze ko kwibuka ari umwanya wo kuzirikana icyasenye ubumwe bw’Abanyarwanda, no gufata ingamba zo kudasubira inyuma.

Abitabiriye uyu muhango wo gutangiza icyumweru cy’icyunamo n’iminsi 100 yo Kwibuka Jenoside yakorewe Abatutsi, bunamiye abashyinguye mu rwibutso rwa Jenoside rwa Nkungu, banashyira indabo ku mva rusange ishyinguyemo imibiri 1,001 y’abazize Jenoside.

Perezida wa IBUKA muri Senegal, Dr Yves Rwogera Munana, yagarutse ku nzira y’umusaraba Abatutsi banyuzemo, aho batereranywe n’Umuryango Mpuzamahanga warebereye hakarinda hicwa abasaga miliyoni mu minsi ijana, agaragaza ko abacitse ku icumu rya Jenoside yakorewe Abatutsi bataheranywe n’amateka, biyemeza guharanira kubaho kandi neza.

Yakomeje abacitse ku icumu abasaba gukomeza gutwaza kuko batari bonyine, no gushima by’umwihariko ubutwari bwaranze Ingabo zari iza FPR-Inkotanyi, zahagaritse Jenoside yakorerwaga Abatutsi, zikabohora Igihugu, anasaba ko Abanyarwanda bakomeza gutahiriza umugozi umwe mu guteza imbere igihugu, kandi bagakomera ku bumwe bwabo.

Ambasaderi w’u Rwanda muri Senegal, Jean Pierre Karabaranga, unashinzwe Ibihugu bya Mali, Gambia, Cabo Verde na Guinea Bissau, yagarutse ku mateka mabi u Rwanda rwanyuzemo yaranzwe na politiki y’ivangura, kuva mu 1959 kugeza mu 1994, aho Jenoside yagizwemo uruhare n’abantu benshi bitewe n’inyigisho mbi zatanzwe muri iyo myaka yose.

Yagaragaje ko Jenoside yahitanye Abatutsi bari mu byiciro byose, kuva ku duhinja kugera ku basaza n’abakecuru, bose bazize ubwoko bwabo gusa.

Yaboneyeho gushima Ingabo zari iza FPR-Inkotanyi, zitanze ubutizigama zigahagarika Jenoside yakorerwaga Abatutsi, zikabohora Igihugu, hagashyirwaho politiki nziza ihuza Abanyarwanda, aho buri wese yisanzuye mu Rwanda.

Yasabye kwamagana abahakana Jenoside n’abagikwirakwiza ingengabitekerezo yayo, kuko aricyo cyiciro abateguye bakanakora Jenoside bagezeho. Abagize uruhare muri Jenoside bari hirya no hino kimwe n’abayipfobya, bakwiye gukurikiranwa bakabiryozwa. Yasabye Umuryango Mpuzamahanga gukumira ibikorwa byose byaganisha kuri Jenoside, anagaruka ku mwanzuro w’Inteko Rusange y’Umuryango w’Abibumbye mu 2018, yemeje ko itariki ya 7 Mata ya buri mwaka ari umunsi mpuzamahanga wo kuzirikana Jenoside yakorewe Abatutsi mu Rwanda mu 1994.

Amb Karabaranga yashimye cyane Ingabo za Senegal zari mu Rwanda mu gihe Jenoside, n’ubwo zari nke zakoze ibishoboka byose zikagira abarokoka ndetse n’umwe muri zo ariwe Cpt Mbaye Diagne akahasiga ubuzima. Yashimye umubano mwiza uri hagati y’u Rwanda na Senegal, aho icyo gihugu cyanahaye Ambasade ahashyizwe ikimenyetso cyo kwibuka abishwe muri Jenoside yakorewe Abatutsi, ndetse hakaba hanongeweho igice gisobanura amateka arambuye ku itegurwa n’ishyirwa mu bikorwa bya Jenoside yakorewe Abatutsi.

Yasabye abantu bose gukomeza kwamagana abakirangwa n’imvugo n’ibikorwa byo guhakana no gupfobya Jenoside, kimwe n’abakwirakwiza ingengabitekerezo yayo, barimo bamwe mu basize bahekuye u Rwanda.

Uwari uhagaraiye Guverinoma ya Senegal muri uwo muhango, Mamadou Saliou Sow, Minisitiri ushinzwe guteza imbere Ubureganzira bwa Muntu n’Imiyoborere myiza muri Ministeri y’Ubutabera, yashimye uko Abanyarwanda bishatsemo ibisubizo nyuma y’imyaka 29 Jenoside yakorewe Abatutsi ihagaritswe, ko n’ubwo banyuze mu mateka mabi, ubu bishimira ibyagezweho muri gahunda yo kubaka ubumwe bw’Abanyarwanda na gahunda z’iterambere ry’ubukungu muri rusange. Yagaragaje ko Senegal izakomeza gushimangira umubano mwiza uri hagati y’ibihugu byombi.

Abitabiriye icyo gikorwa banagejejweho ubuhamya bwa Monique Usanase warokotse Jenoside, uba mu Gihugu cy’u Bubiligi, wagarutse ku nzira y’umusaraba we n’abandi Batutsi bari baturanye mu Murenge wa Nyakabanda, mu Mujyi wa Kigali banyuzemo.

Urubyiruko ruba muri Senegal kandi rwanabagejejeho umuvugo wanditswe na Denyse Muhoza yise ISHAVU, ugaragaza agahinda kasizwe na Jenoside yakorewe Abatutsi, unatanga inama ku bagifite ingengabitekerezo ya Jenoside, ko bareka kwinangira ahubwo bagataha, bagafatanya n’abandi Banyarwanda kubaka Igihugu cyabo.

Abayobozi mu nzego za Leta ya Congo, bifatanyije n’Abanyarwanda uyu muhango

Uyu muhango witabiriwe n’abarimo ba Ministiri n’abandi bayobozi mu nzego za Leta ya Congo, abahagarariye ibihugu byabo ndetse n’imiryango mpuzamahanga muri icyo gihugu, inshuti z’u Rwanda ndetse na diaspora nyarwanda.

Ambasaderi w’u Rwanda muri Repubulika ya Congo, Théoneste Mutsindashyaka, yabibukije ko bafite inshingano zo gukomeza kurwanya ingengabitekerezo ya Jenoside, ndetse no gutanga amakuru ku bateguye bakanashyira mu bikorwa Jenoside yakorewe Abatutsi, bacyidegembya hirya no hino mu mahanga bagahanwa.

Yanavuze kandi ko u Rwanda rukomeje gukorana na Repubulika ya Congo, kugira ngo abakoze Jenoside bari muri iki gihugu bagezwe imbere y’Ubutabera.

Bafashe umunota wo Kwibuka abazize Jenoside yakorewe Abatutsi

Yanaboneyeho kumenyesha ko ingengabitekerezo ikomeje kugaragara mu karere k’Ibiyaga bigari, yazanywe ikaba inakwirakwizwa n’umutwe w’iterabwoba wa FDLR. Yakomeje anavuga ko imvururu ziri mu burasirazuba bwa Repubulika Iharanira Demokarasi ya Congo zongereye umurego n’imvugo zibiba urwango ku Batutsi, nk’uko byemejwe n’umujyanama w’Umunyamabanga Mukuru w’Umuryango w’Abibumbye mu gukumira Jenoside.

Muri uyu muhango hatanzwe ubuhamya, aho Umunye-Chad, Dr Apollos Derguedbé Nebardoum, yagarutse ku byo yabonye mu Rwanda, mu gihe yahakoraga guhera mu kwezi k’Ukwakira 1994, nyuma gato ya Jenoside yakorewe Abatutsi, ku buzima n’imibereho y’Abanyarwanda muri icyo gihe Igihugu cyari gisohotse muri Jenoside yatwaye abarenga miliyoni.

Bacanye urumuri rw’ikizere

Herekanywe kandi ubuhamya bwa Uwase Assiah, warokotse Jenoside yakorewe Abatutsi ndetse hanacanwa urumuri rw’icyizere.

Amb Mutsindashyaka yibukije ko abakoze Jenoside bacyidegembya bagomba gukurikiranwa, bagahanwa

Hon Mukarugwiza ashyira indabo ahashyinguye abishwe mu rwibutso rwa Nyamata

Abatuye mu Murenge wa Nyamata bibukijwe ko umugambi wa Jenoside mu Karere ka Bugesera watangiye cyera mu myaka ya 1959, aho Abatutsi bakuwe mu bice bitandukanye by’Igihugu bagashyirwa mu Bugesera hatagiraga ibikorwa remezo, aho bari bizeye ko bagiye gupfa bishwe n’imibereho mibi ndetse n’indwara cyane cyane isazi ya Tsetse.

Umurenge wa Nyamata by’umwihariko ufite amateka yihariye, kuko wahoze uri mu cyahoze ari Komine Kanzenze, wabereyemo igerageza rya Jenoside mu Kwakira 1992, aho Abatutsi benshi bishwe, abandi bagatwikirwa inzu n’ibyabo, inka zabo ziricwa izindi zirasahurwa, ndetse kuva icyo gihe bamwe ntibasubiye mu byabo kugera ubwo RPF-Inkotanyi yahagarikaga Jenoside.

Urwibutso rwa Nyamata rufite icyo ruvuze mu kwibuka amateka ya Jenoside yakorwe Abatutsi, kubera ko muri kiliziya ya Nyamata ariho hahungiye Abatutsi benshi bizeye amakiriro, abandi bahazanwa bavanywe ku biro bya Komine Kanzenze, aho bari bamaze kubura ubutabazi bw’ubuyobozi.

Imiryango y’abarokotse Jenoside i Nyamata ishyira indabo aharuhukiye abavandimwe babo

Bamwe mu barokokeye mu Karere ka Bugesera, bavuga ko mbere ya Jenoside bari babayeho mu buzima bugoye, kubera ko nta mashuri n’amavuriro byahabaga, ku buryo ishuri rya mbere ryahubatswe ari GS Ririma, nabwo ryubakiwe impunzi z’Abarundi zari zarahacumbikiwe.

Michel Jackson Rutayisire ni umwe mu baharokokeye, avuga ko n’ubwo babayeho muri ubwo buzima bugoye bikaza kuba akarusho muri Jenoside yakorewe Abatutsi, ubwo bicwaga bazira uko bavutse, ariko nyuma y’imyaka 29 ishize hari byinshi bishimira.

Ati “Nyuma y’imyaka 29 Jenoside ihagaritswe, hari byinshi byo kwishimira. Uyu munsi mu Mirenge 15 y’Akarere ka Bugesera, buri Murenge ufite ishuri, yewe ufite ikigo nderabuzima, dufite imihanda igera hirya no hino mu Mirenge, twabonye kaburimbo ihuza Akarere ka Bugesera n’Umujyi wa Kigali. Ikibuga cy’indege kirimo kubakwa, inyubako zarazamutse mu Mujyi, ubuzima bwarahindutse, abantu bafite icyizere cyo kubaho.”

Hon Mukarugwiza yasabye urubyiruko kwigira ku mateka y’Igihugu

Umuyobozi wa Ibuka mu Karere ka Bugesera, Chantal Bankundiye, avuga ko n’ubwo ubuzima bwari bushaririye mu gihe cya Jenoside, ariko nyuma y’imyaka 29 hari byinshi bashimira Leta y’Ubumwe.

Ati “Ni ibikorwa byinshi Leta yakoze, yashatse amacumbi, amashuri ku bari bakiri bato, habayeho gahunda yo kuvuza abarokotse Jenoside bari bafite ibikomere, hari ababazwe inkovu, sinavuga ngo zirasibanganye ariko ziragabanuka. Hari abarimo kuvuzwa n’uyu munsi bagikurikiranwa, ndetse no hanze y’Igihugu bakaba bajya kuvurizwayo, kuko Jenoside yasize uburwayi bukomeye cyane.”

Asubiza ibibazo byagaragajwe n’abagizweho ingaruka na Jenoside yakorewe Abatutsi, batashoboye gukomeza kwiga, Umuyobozi w’Akarere ka Bugesera wungirije ushinzwe Iterambere ry’Ubukungu, Angelique Umwali, yavuze ko hari uburyo bafashwa.

Yagize ati “Tubafasha kwiga imyuga ariko tukabaha n’ibikoresho by’ibanze, kugira ngo babashe guhobera ubuzima batangire akazi biteze imbere, utabasha kwiga imyuga abasha gukora imirimo y’amaboko. Ashobora kuba umuhinzi tukamushyigikira mu guhabwa inguzanyo, kugira ngo ahinge yeze tukamuha iby’ibanze, imbuto n’ifumbire ariko tukanamuherekeza, utanabishoboye ashobora gukora imishinga iciriritse tukamufasha guhabwa inguzanyo, binyuze muri VUP cyangwa mu bigo by’imari”.

Hafashwe umunota wo kunamira no kwibuka abagera ku bihumbi 45 bashyinguye mu rwibutso rwa Nyamata

Mu butumwa yageneye urubyiruko, Hon Annonciata Mukarugwiza wifatanyije n’abatuye mu Karere ka Bugesera muri uyu muhango, yabasabye kubaka ubumwe bw’Abanyarwanda.

Yagize ati “Urubyiruko icyo turusaba ni ukwigira ku mateka y’Igihugu twakiyemo nk’Abanyarwanda, bakubaka ubumwe bw’Abanyarwanda batavangura, nk’uko ubuyobozi bw’Igihugu cyacu bwabishyize imbere, kandi bakubakira ku bimaze kugerwaho byiza bigaragaza iterambere ry’Igihugu cyacu. Ibyo bibafasha kugira ngo bubakane hagati muri bo, ndetse babashe kubirinda no kubisigasira, bubakiraho ibindi byabo by’ejo hazaza”.

Mu nzibutso enye ziri mu Karere ka Bugesera, harimo ebyiri ziri ku rwego rw’Igihugu zirimo urwa Nyamata ndetse n’urwa Ntarama, n’izindi zo ku rwego rw’Akarere harimo urwa Gashora ndetse na Ruhuha.

Uretse izo nzibutso hanazirikanwa urufunzo rwiswe CND rwahishe benshi, ariko hakanibukwa abandi benshi batashoboye kuvanwamo kuko bamizwe n’isayo.

UUmwali avuga ko hari gahunda zitandukanye zifasha abarokotse Jenoside yakorewe Abatusti kugira ngo imbere

Abatuye mu Murenge wa Nyamata bibukijwe amateka n’ubukana bwa Jenoside yakorewe Abatutsi

Senateri Nsengiyumva yunamiye inzirakarengane ziruhukiye mu rwibutso rwa Rwentanga

Yabitangaje ku wa Gatanu tariki ya 07 Mata 2023, mu muhango wo gutangiza gahunda yo Kwibuka ku nshuro ya 29 Jenoside yakorewe Abatutsi, igikorwa cyabereye mu Murenge wa Matimba ku rwibutso rwa Rwentanga rubitse imibiri 66 y’Abatutsi bishwe muri Jenoside.

Uwatanze ubuhamya, Gashugi Rwamushayija Augustin, yavuze ko abari batuye aho Rwentanga, Mitayayo na Nyabweshongwezi bari babanye neza, ikibazo kiza kuba kubera Politiki.

Avuga ko nta wari kuvuga Umuhutu cyangwa Umututsi ahubwo barashyingiranaga bakagabirana inka.

Urugamba rwo kubohora Igihugu rugitangira ngo we n’abandi umunani bafunzwe amezi atandatu, i Ngarama bashinjwa kuba ibyitso.

Icyakurikiyeho ngo bahise bashyiraho Konseye ugomba gutegura ubwicanyi, aba ariwe unatangira kubiba urwango mu baturage.

Agira ati “Ino aha hagumye gutyo abantu bibaniye ariko bahise bashyiraho undi mukonseye witwaga Uwimana Donatien, wari umwarimu hano mu mashuri abanza, yari yaraturutse i Kivuye, aza yumva ko ari Umuhutu ukase, agenda abishyira mu bandi, babona uwo batazi bati ni ikitso, babona undi ngo ni Umututsi, ni abangaba bashyinguwe hano bababwiye.”

Undi mwihariko wari uhari ku bantu bari batuye muri aka gace, ni uko nta munyeshuri wari wemerewe kwiga amashuri yisumbuye, n’uwayize ngo yayigiye mu zindi Ntara cyangwa hanze y’Igihugu.

Ati “Nta mwana w’ino aha wajyaga yiga segonderi, nanjye ubwanjye nayigiye muri Congo, ndi mu bambere bize segonderi mu Mutara. Icyo gihe mbere ya 1980 twari abantu batarenze bane nabwo batigiye aha.”

Senateri Nsengiyumva aganira n’abitabiriye icyo gikorwa

Senateri Nsengiyumva, na we ashimangira ko byari bigoranye kwiga umuntu agasoreza amashuri yisumbuye mu Mutara, hatitawe ku bwoko akomokamo, ahubwo byasabaga ko bajya kwigira mu zindi Ntara zari zifite ayo mashuri cyangwa hanze y’Igihugu.

Yagize ati “Natwe aho twajyaga gushaka amashuri hanze y’ahangaha, iyo wagiraga ngo uravuze bakakwita uwo mu bwoko bw’Abahutu, abenshi baravugaga ngo nta Muhutu w’Umuhima ubaho. Ariko ubwo n’Imana yabijyagamo ukagira amahirwe, nkaba mpagaze imbere yanyu kubera ayo mahirwe nagize.”

Yabwiye abarokotse Jenoside ko batari bonyine, kuko Igihugu kizirikana agahinda batewe no kubura ababo kandi bakaba banashimirwa ubutwari bagize, bakaba bataraheranwe n’ibyababayeho ahubwo bakiyubakamo ikizere cyo kubaho.

Abaturage basabwe kwitabira ibikorwa byo kwibuka

Yasabye abaturage muri rusange kwitabira ibikorwa byo kwibuka, kuko byubaka buri wese nk’umwenegihugu.

Umuyobozi w’Akarere ka Nyagatare, Gasana Stephen, yavuze ko mu bikorwa byakozwe kandi bikomeza, ngo ni ukubungabunga umutekano w’Abarokotse n’imitungo yabo, kuko ngo bagiye babona abantu bagifite ibitekerezo bibi babahohoteraga.

Ikindi ngo umwaka ku wundi bagiye babubakira inzu, by’umwihariko umwaka w’ingengo y’Imari ushize bakaba barubakiye banatuza imiryango itandatu, uyu mwaka nabwo bakaba barimo kubaka izindi zizatuzwamo imiryango itandatu, hakaba harimo no kuvururwa izindi 21.

Yavuze kandi ko hari abafashwa mu bikorwa by’ubuvuzi kubera ibikomere basigiwe na Jenoside, gufasha abanyeshuri kwiga no gutanga inkunga ku bafite intege nke.

Mazina Déogratias, Umuyobozi wa RESIRG

Itangazo Urugaga Mpuzamahanga rw’Abashakashatsi kuri Jenoside rufite icyicaro mu Bubiligi (RESIRG), rwashyize ahagaragara kuri uyu wa Gatanu 07 Mata, riragira riti:

“Imyaka 29 irashize twibuka abahitanywe na Jenoside yakorewe Abatutsi igatwara ubuzima bw’abasaga miliyoni imwe, uhereye ku bakambwe kugera ku mpinja no ku bari bakiri insoro mu nda z’ababyeyi batazigera babona izuba…Ibyo kwibagirwa byo ntabyo”.

Adolf Hitler yigeze kuvuga ati “Ni inde wibuka abanya-Armenia?” Hari ku itariki 22 Kanama 1939, haraye haribukorwe Jenoside yakorewe Abayahudi (Holocaust), igahitana ababarirwa muri miliyoni esheshatu.

Ku bashobora kugwa mu mutego wo kwibagirwa cyangwa abamaze kwibasirwa n’uburwayi bwo kwibagirwa, ndetse no guhuzagurika mu gusobanura ibitekerezo byabo, uwitwa Elie WIESEL afite ubutumwa butareba gusa abacitse ku icumu, ahubwo ikiremwamuntu iyo kiva kikagera, ubutumwa bugira buti “Umwicanyi yica inshuro ebyiri: Iya mbere akoresha inkota, iya kabiri agakoresha kwibagiza”.

Uyu mwaka, kwibuka Jenoside yakorewe Abatutsi bibaye mu gihe harimo kuba ibikorwa biganisha kuri Jenoside, mu gihugu cy’abaturanyi cya Repubulika Iharanira Demokarasi ya Congo (RDC), nk’aho ijambo “Ntibizongera ukundi”, ryavuzwe nyuma ya Holocaust, ntacyo ryari rivuze cyangwa ryari urwiyerurutso.

Mu itangazo rigenewe itangazamakuru ryo ku wa 19 Ukuboza 2022, RESIRG yatanze impuruza ku bushyamirane burimo kubera muri RDC.

Amagambo yavuzwe n’abayobozi yo kubiba urwango no kwenyegeza ubugizi bwa nabi, yatumye habaho ibikorwa byo kwibasira Abatutsi bo muri Congo bavuga Ikinyarwanda, kwangiza ibirango n’ibikorwa remezo birimo insengero ahanini zifatwa nk’iz’abo baturage.

Uburyo bukoreshwa hano buributsa igitekerezo cya John Gregory Stanton, kigabanyijemo ibyiciro 10: Gushyira mu byiciro, gushyiraho ibimenyetso, kuvangura, kwamburwa ubumuntu, guhuriza hamwe, gutandukanya kweruye, gutegura, gutoteza, umushinga wo gutsemba no guhakana Jenoside.

Hamwe no kudahana kweruye, ibikorwa byo kwenyegeza urwango no gutsemba ubwoko, bikomeza gucicikana ku mbuga nkoranyambaga mu buryo busesuye, kubera ko biba bishyigikiwe mu buryo buziguye cyangwa butaziguye, n’abayobozi bo ku rwego rwo hejuru.

Amateka atwereka ko umuryango mpuzamahanga, mu bihe byashize wirengagije izo mpuruza bishyira kera, kugeza ubwo habaye amarorerwa. Aha kandi hakaba n’ikibazo cyo gutabara amazi yamaze kurenga inkombe. Kandi burya kuzarira biganisha ku gukererwa burundu.

Nyamara, Umuryango w’Abibumbye (UN), kimwe na za Guverinoma n’imiryango mpuzamahanga, byashyizeho icyo bise ‘integuza ya kare’, nk’igikorwa gishingiye by’umwihariko ku kohereza indorerezi mu kazi, kugira ngo zibe zatabara ku gihe ari mu bikorwa by’ubutabazi n’ibya gisirikare.

Turizera ko UN, nk’uko yemeje ko tariki 07 Mata ari Umunsi Mpuzamahanga wo Kuzirikana Jenoside yakorewe Abatutsi mu Rwanda mu 1994, yiteguye kuvana amasomo mu mateka no kudatiza umurindi kubera guterera iyo, itegurwa ry’ubwicanyi bw’imbaga nk’uko yabigenje ubwo hategurwaga Jenoside yakorewe Abatutsi mu Rwanda.

Rushingiye ku butumwa rwihaye uko bwakabaye, intego zarwo n’ibyo ruharanira, Urugaga Mpuzamahanga rw’Abashakashatsi kuri Jenoside (RESIRG asbl), rufite gahunda yo gukora ubushakashatsi, butagarukira gusa ku gusigasira ibikorwa byo kwibuka abishwe muri Jenoside yakorewe Abatutsi, ahubwo rwaniyemeje gukangura imbaga, igihe bigaragaye ko hari ahashobora gukorwa Jenoside kugira ngo urumuri rwa “Ntibizongera ukundi” rutazigera ruzima.

Mu ijambo yavugiye ku cyicaro cya UN ku wa 29 Mutarama 2007, Simone Veil yagize ati “Iyo inzira yo kwamburwa ubumuntu ishyizweho akadomo, bituma habaho ugutekereza ku buryo buhoraho ku mutimanama n’icyubahiro bya muntu, kubera ko amarorerwa arashoboka igihe cyose”.

Perezida wa Ibuka mu Karere ka Gasabo, Kabagambire Théogène, yabitangarije ku Rwibutso rw’i Ruhanga kuri uyu wa 07 Mata 2023, ahatangirijwe ku rwego rw’akarere gahunda yo Kwibuka ku nshuro ya 29, Jenoside yakorewe Abatutsi mu 1994.

Ati "Dusaba abatarahigwaga icyo gihe kudufasha bakatwereka imibiri y’abacu,
Leta yatanze imbabazi ariko bamwe ntibazishaka, kuzakira ni uko bakorwa ku mutima ntibakomeze kwituma hejuru y’imibiri y’abacu".

Kabagambire avuga ko imiryango 59 yazimye burundu, yari igizwe n’abantu 342 hatabaruwemo abana bari bakiri bato, ubu ngo nta n’umwe ubasha kuboneka kugira ngo babashyingure mu cyubahiro.

Avuga ko uretse guceceka kw’abafite amakuru y’ababo bishwe, hari n’abababwira ko umubano utifashe neza bitewe n’uko abarokotse Jenoside ngo bafite Ikigega kibafasha.

Kabagambire akavuga ko hari amakuru yumvise y’uko imiryango y’abakoze Jenoside, na yo irimo kwisuganya igashaka amafaranga yo gutanga mu nkiko, kugira ngo ifunguze abafungiwe Jenoside batarangije ibihano.

Umuyobozi Nshingwabikorwa w’Akarere ka Gasabo, Umwali Pauline, avuga ko bidashoboka ko inkiko zarekura abantu batarangije igihano, ndetse ko gushinga ikigega cyihariye cyo gufasha abarangije igihano batishoboye bitemewe.

Umwali agira ati "Ibyo kwishyiriraho ikigega ntabwo byaba ari byo, ahubwo bagana ubuyobozi tukareba, iyo atishoboye tumushyira muri gahunda isanzwe y’Abaturage bacu batishoboye, ku buryo bitaba ari byo kumva ko bakwishyiriraho ikigega. Nibahumure rwose Leta ntabwo irobanura".

Icyakora muri iki gihe cyo Kwibuka, Abaturarwanda muri rusange basabwa kuba hafi abarokotse Jenoside, nk’uko Umwali yakomeje abyibutsa, asaba abafite amakuru y’abishwe muri Jenoside bataraboneka kuyatanga.

Ibuka ivuga ko abarokotse ubu batakibasha kugera ahabera ibikorwa byo Kwibuka, biganjemo ab’igitsina gore ngo bangijwe bikomeye, abatarabashije kwiga ndetse n’abageze mu zabukuru.

Urwibutso rw’i Ruhanga kugeza ubu rushyinguwemo imibiri 37,768 biciwe mu rusengero rwari urwa Angilikani.

Bari baturutse mu bice bitandukanye bikikije ako gace, bazi ko interahamwe ngo ziza gutinya Inzu y’Imana, nk’uko biri mu buhamya bwa Jean Pierre Rudasingwa waharokokeye.

Mu barenga 1,074,817 bazize Jenoside yakorewe Abatutsi mu 1994, nk’uko imibare Leta y’u Rwanda ivuga, Akarere ka Gasabo by’umwihariko ngo kiciwemo abagera ku 134,426.

Bashyize indabo aharuhukiyemo imibiri isaga 800 mu Rwibutso rw’Akarere ka Musanze

Umuhango wabaye kuri uyu wa Gatanu tariki 7 Mata 2023, wo gutangiza icyumweru cyo kwibuka, ku rwego rw’Akarere ka Musanze, wabereye ku Rwibutso rw’Akarere ka Musanze, ruruhukiyemo imibiri isaga 800 y’Abatutsi biciwe mu cyahoze ari Cour d’Appel Ruhengeri.

Ubuhamya bwa Gakiga Jean Chrisostome, wari uhagarariye imiryango y’abaharokokeye, bwagarutse ku nzira y’umusaraba Abatutsi banyuzemo, kuva mbere ya Jenoside.

Avuga ko umuryango wabo kimwe n’indi y’Abatutsi, guhera mu 1959 bagabwagaho ibitero bya hato na hato, gufungwa, kwicwa, gusenyerwa no gutwikirwa inzu, itotezwa n’akato mu mashuri n’ahandi, kugeza ubwo Jenoside yakorewe Abatutsi ishyizwe mu bikorwa.

Muri icyo gihe Abatutsi bahungishirijwe mu cyahoze ari Cour d’Appel Ruhengeri, bavanwe aho babaga bihishe mu bice by’icyahoze ari Komini Kigombe na superefegitura ya Busengo, bizezwa ko barindirwa umutekano bakanabonera ubutabera muri urwo rukiko, bakaba ariho interahamwe zabiciye tariki 15 Mata 1994, zibajugunya mu byobo byari byaracukuwe hafi yarwo.

Ikiganiro kigaruka ku mateka y’u Rwanda cyatangiwe muri uyu muhango, ndetse n’ubutumwa bwa Rusisiro Festo, Perezida wa Ibuka mu Karere ka Musanze, bwashimangiye akamaro ko Kwibuka nk’ikimenyetso cyo gusubiza Abatutsi agaciro bambuwe.

Kuri we ndetse n’abayirokotse, bahamya ko bibagarurira ihumure no kububakamo ubudaheranwa, nk’intwaro ikomeye bubakiraho mu kubaka iterambere ry’Igihugu.

Perezida wa Ibuka mu Karere ka Musanze, Rusisiro Festo

Yanenze abagifite ingengabitekerezo ya Jenoside, kuko ikomeretsa abarokotse Jenoside, ikanadindiza iterambere.

Guverineri Nyirarugero, yasabye abaturage kwimakaza umuco w’amahoro no kwamaganira kure ingengabitekerezo ya Jenoside aho iva ikagera, n’abayigiramo uruhare bose.

Yagize ati "Muri iyi minsi ikomeye twibuka Jenoside yakorewe Abatutsi, duhamagarira abaturage kuba hafi abayirokotse. Kubasura kenshi babashyigikira mu mibereho ni ingenzi cyane mu nzira barimo yo kwiyubaka no kwimakaza umuco w’amahoro. Twamaganiye kure ibikorwa byose ndetse n’amagambo agaragaramo ingengabitekerezo ya Jenoside".

Ni umuhango witabiriwe n’abayobozi mu ngeri zinyuranye hamwe n’abaturage

Ibikorwa byose bifitanye isano n’ingengabitekerezo ya Jenoside igaragarira mu gupfobya, imvugo z’urwango, izikomeretsa no guhohotera abarokotse Jenoside, kwangiza imitungo yabo n’ibindi bikorwa byose by’urugomo, Guverineri Nyirarugero, yibukije abaturage b’Intara ayoboye kubyirinda, no kwamagana uwo ari we wese wahirahira abigiramo uruhare.

Yakanguriye urubyiruko kuba aba mbere mu kurinda ibyagezweho, kubibyaza umusaruro, kandi bikajyana no kuvuguruza abagoreka amateka, bakifashisha ikoranabuhanga bayavuga uko ari.

Yanakomoje ku byo Leta yahagaritse Jenoside yakorewe Abatutsi, ikomeje gukora muri iyi myaka 29 ishize, biteza imbere imibereho myiza y’abaturage, abasaba kugira uruhare rufatika mu kubisigasira no kubirinda.

Mu Karere ka Musanze, umuhango wo Kwibuka ku nshuro ya 29 Jenoside yakorewe Abatutsi mu Rwanda, wabimburiwe no gucana urumuri rw’icyizere no gushyira indabo ku mva yo ku Rwibutso rw’Akarere ka Musanze.

Wanabaye umwanya wo gushima ubutwari bw’Ingabo zabohoye Igihugu, by’umwihariko Nyakubahwa Perezida wa Repubulika, Paul Kagame wari uziyoboye mu rugamba rwo guhagarika Jenoside yakorewe Abatutsi.

Abayobozi mu nzego zinyuranye ku rwego rw’Intara y’Amajyaruguru n’Akarere ka Musanze, ndetse na bamwe mu ntumwa za rubanda mu Nteko Ishinga Amategeko, bifatanyije n’abaturage muri uyu muhango.

Bamwe mu Badepite bifatanyije n’abaturage bo mu Majyaruguru Kwibuka

Umuhuzabikorwa w’Ishami Mpuzamahanga rishinzwe Ibyaha (ICD) mu Kigo cy’Igihugu cy’Ubushinjacyaha (NPPA), Charity Wibabara, avuga ko icyo kigo cyakoze iperereza ku bakekwaho Jenoside bashakishwa n’ubutabera aho bahungiye mu bihugu bitandukanye, kugira ngo bafatwe bashyikirizwe ubutabera.

Kugeza ubu, nk’uko Wibabara abivuga, mu birego 1.148 byatanzwe, n’ibyemezo mpuzamahanga byo guta muri yombi byoherejwe, 1.094 muri byo ntibirakorwaho.

Imibare itangwa n’Ubushinjacyaha bw’u Rwanda yerekana ko Repubulika ya Demokarasi ya Congo (RDC) ari yo ifite abantu benshi bashakishwa, n’ibyemezo mpuzamahanga byinshi byo guta muri yombi abakekwaho Jenoside kuko hoherejweyo ibirego 408 nk’uko inkuru ya The New Times ibivuga.

Mu gushakira umuti iki kibazo, Wibabara avuga ko Ubushinjacyaha bw’u Rwanda bwakoze ingendo z’ubugenzuzi mu bihugu bitandukanye, kugira ngo bashishikarize ishyirwaho ry’inzego z’amategeko mu bihugu bitari byahana abakoze ibyaha bya Jenoside n’ibyibasiye inyoko muntu, ndetse no gushyiraho amasezerano y’impande zombi arebana no guta muri yombi no kohereza abakekwaho Jenoside.

Mu ijambo rye, atangiza Kwibuka ku nshuro ya 29 Jenoside yakorewe Abatutsi mu 1994, Perezida Paul Kagame yageneye ubutumwa abagize uruhare muri Jenoside n’abakomeje kubakingira ikibaba, aho bahungiye hirya no hino ku Isi.

Perezida Kagame yagize ati “Mushobora kwirukanka ariko ntimushobora kwihisha, ntaho mufite ho kwihisha ibingibi mubona byaranze amateka yacu, rero na ba bandi bafite umwanya wo kuvuga ibyo bashaka kuvuga, ibyo ari byo byose bazabivuga. Kandi bashobora no gukora ibintu byinshi bagendeye kuri ibyo, ariko ikiriho ni uko badashobora kubona aho bihisha”.

Mwizerwa Eric

Mwizerwa Eric yavuze ko ubwo Jenoside yatangiraga yari umwana usoje amashuri abanza, akaba yarabanaga n’umuryango we mu cyahoze ari Komini Bicumbi muri Rwamagana. Mbere y’uko Jenoside iba, Mwizerwa yavuze ko we n’umuryango we bari baragiye bakorerwaho ibindi bikorwa by’urwango by’igerageza rya Jenoside.

Ku itariki 7 Mata 1994 ubwo Jenoside yatangiraga mu gitondo, Mwizerwa n’umuryango we batekerezaga ko ari umunsi wabo wa nyuma, ariko baza guhungira hafi aho ku kigo cy’amashuri abanza cyariho izindi mpunzi hafi 200 baraharara, Interahamwe zibasomera amazina y’abagombaga kwicwa.

Ku munsi wakurikiyeho ku itariki 8 Mata, bimukiye ahari urusengero rw’Abangilikani rw’ahitwa i Ruhanga bahizeye ubuhungiro. Bigeze ku itariki ya 12 Mata, bari bamaze kugera ku bantu ibihumbi 15 bahahungiye. Uwo munsi haje Abajandarume babasaba ko abasore bafite intwaro gakondo ko bazirekura maze bakabasha kurindwa, ariko barabyanga kuko ngo wari umugambi mubisha wo kugira ngo bazabone uko babica badashobora kwirwanaho. Abo bajandarume bagiye bavuga ko izo mpunzi zirinzwe n’inyenzi zavuye muri CND ariko ntibyari byo.

Ku itariki ya 14 Mata 1994 Interahamwe zivuye muri Komine Bicumbi, Rubungo, Gikomero na Gikoro nibwo zagerageje kubiraramo ngo zibice. Ati: “Twarwanye na bo ku itariki 14 kuva mu gitondo kugera saa kumi n’imwe. Ariko batinye kwinjiramo imbere kuko bari bazi ko turi Inyenzi zavuye muri CND basubirayo, batanga raporo ko i Ruhanga hadashobora guterwa kuko harinzwe n’Inyenzi zavuye muri CND”.

Arakomeza ati: “Ku itariki 15 ni yo yari imperuka y’aho twari turi. Twabyutse dusanga aho twararaga huzuye abasirikare bagose noneho bongeraho na za Nterahamwe zavuye mu ma komine. Twumvaga ari ibisanzwe dutera amabuye ariko mu kanya gato hahita haza kajugujugu ya gisirikare itangira kuturasamo amasasu. Baraturasa tugenda twisungana bamwe binjira mu mashuri abandi bajya mu rusengero”.

Mwizerwa yakomeje avuga ko ubwo bamwe bamaze kwinjira mu mashuri hari umugabo na we warokotse wahise ufunga urusengero n’amashuri barimo n’ingufuri arangije ariruka. Abicaga bashatse uko babona imfunguzo ariko ntibyashoboka bahitamo gusiga bishe banatwikiye mu nzu umuryango w’umupasiteri w’Umuhutu bazakaga wari utuye hafi aho.

Ati: “Bahita baza rero bakubita inzugi binjiramo imbere, bakora ibyo bakora bararasa, bateramo ibisongo. Ariko ntibashirwa baravuga bati aba bantu binjiye hano ni benshi ntabwo twaba tubishe bose, binjiramo ariko basiga ikindi gikundi hanze, baratubwira bati muhaguruke n’uwakomeretse buhoro nahaguruke turahaguruka. Cya gikundi rero cyari inyuma gihita kinjira n’imbunda n’intwaro kiti twababonye mugume aho ngaho. Nta n’ikintu nari nabaye ngewe hanyuma bafatamo abasore barababwira bati mugende mufate iriya mirambo muyikoremo ibirundo nk’uko barunda amasiteri kugira ngo turebe koko niba nta muntu ukiriho”.

Nyuma bongeye kubatondesha imirongo ibiri, umwe ari uw’abafite amafaranga bagombaga kuraswa naho uw’abatayafite bagomba gutemwa.

Ati: “Nge rero nta mafaranga nari mfite ariko Imana irinda umuntu igira uko imurinda. Naravugaga nti ndirukanka bandase ariko ntabwo ndi buhagarare ngo banteme. Ubwo mbona umumama wari uhagaze ku murongo yari ahetse umwana afite amafaranga igihumbi mu ntoki ndagenda muhagarara imbere. Bati wowe ufite amafaranga, nti mama arayafite. Ahita yishyura bahita bamurasa. Mperuka ibyo ngibyo kuko nahise nta ubwenge. Hari nko mu ma saa yine imirambo igenda ingwa hejuru myinshi hanyuma barangije bazana lisansi basuka kuri ya mirambo baratwika”.

Akomeza avuga ko byageze nka saa munani akazanzamuka agasohoka mu mirambo abicaga bagiye, ubwo we n’abandi batari bishwe bafatanya kurokorana no kongera guhunga. Bamwe bahunze ukwabo, ariko we n’abo bahunganye berekeje kuri CND ariko bageze mu nzira bongera gutangirwa n’Interahamwe zirabatangatanga barihisha ariko ntibabica bose, yongera kurokoka atyo.

Bongeye kwibasirwa n’abo bari bahunganye bwa kabiri ariko na bwo yongera korokoka. Ati: “Turahava turagenda tubona akazu k’ibyatsi kari gafunze turavuga tuti aka ngaka wasanga ari abahunze turakica twinjiramo. Nka saa kumi n’imwe za mu gitondo uwo twari duhunganye aratubwira ati wowe fata abo bana ubajyane mwihishe hariya mu nsina twe gusohokera icyarimwe batatubona nange ndasigarana n’aka gakobwa tugaheke kananiwe, ubwo mushiki wange aragaheka. Nkivamo nyiri inzu araza asanga inzu irakinguye yari inzu y’umwicanyi. Avuza induru baragaruka [abo bari bari kwicana] bahita babatwikiramo na bo barapfa. Nsigara ndi mukuru [kandi] CND ntago nari mpazi[…]. Ndavuga nti reka noneho mbajyane [ba bana nari nihishanye na bo mu nsina] iwacu ho ndahazi”.

Akomeza avuga ko mu nzira asubira iwabo na ho yagiye ahura n’ibigeragezo babiri mu bana bari kumwe bakaza kwicwa undi akaza kurokoka ukwe bikarangira asigaye wenyine.

Ati: “Hasigara ngewe noneho w’igihangange nsohoka noneho nange ntifite baramfata. Barankubita bihagije bansimburanaho. Hanyuma uwari perezida w’interahamwe aho ngaho arababwira ati nimurekere aho ngaho mukampereze yari ari kurya burusheti bamwokereje y’inka.

Ati reka nkicarire ndarangiza izi burusheti kapfuye. Anyicaraho ku gikanu numva ngiye guturika. Ariko sinzi ukuntu mu mutwe byaje [nibuka ko] kera hari konseye witwaga Athanase. Yari afite umuhungu we twiganye mu wa Gatandatu witwaga Jean Paul abarimu baratwitiranyaga ntibari bazi kudutandukanya.

Ndamubwira nti ariko nubwo unyishe ndi Umuhutu mwene wanyu mama wange ni we mututsi. Ati gute? Nti ndi umuhungu wa Athanase konseye. Ati wowe uri nde? Nti ndi Jean Paul rero nunyica uraba wishe mwene wanyu. Arahaguruka ati twikoze mu nda, arampagurutsa abwira uwari aho ngaho ati uyu mwana mumumuherekeze mumugeze kwa se Athanase”.

Mwizerwa nyuma yafashe inzira ijya aho kwa Athanase ariko aza guhura n’Interahamwe yari yarishe mukuru we imuzi neza. Yayibwiye ko imukoza icyo ishaka ni uko iramushorera iramujyana ngo ijye kumwicira mu rugo ariko bahageze Mwizerwa ahahurira na nyina wari warokotse ubundi bwicanyi na we yazanywe ngo yicirwe aho.

Ati: “Tuhageze arambwira ati uriya ni nde? Ndamubwira nti ni mama. Ati reka duhagarare turebe noneho. Turahagarara, ibyo yavugaga twarabyumvaga mpagararana n’uwo mugabo unzanye kunyica. Aramubaza [umubyeyi wange] ati nta kindi wongeraho ati nta cyo cyakora mpa umwanya nsenge. Arangije haza umugore aravuga ati ntimumwicane ibi bitenge ni bishyashya ndabishaka abimukuraho arabitwara byose baramwica”.

Asoza ubuhamya bwe avuga ko nyina bamaze kumumwicira mu maso ye bamubwiye ko na we nta rupfu ruruta urwo ko ahubwo akwiye kuhava akazicwa n’urundi, nuko ajya kwihisha mu itongo amaramo icyumweru nyuma aza guhura n’Inkotanyi ziramurokora.

Nyuma yo kurokoka, Mwizerwa Eric avuga ko ubuzima bwakomeje aza no kugira amahirwe harimo kwitabira amahugurwa muri Afurika y’Epfo muri 2006 ariko agifite ipfunwe riterwa n’uko abantu bafataga u Rwanda icyo gihe mu isura ya Jenoside. Nyuma muri 2016 yaje kongera kugira amahirwe ajya muri Singapore ariko bwo asanga amahanga yaramaze kubona u Rwanda mu isura nziza, ndetse bimutera ishema n’amahirwe anyuranye mu minsi yakurikiyeho.

Kuri ubu yashinze ikompanyi y’ubukerugendo imufasha kumuteza imbere ndetse igateza imbere n’Igihugu muri rusange.

Umva ubuhamya bwose bwa Mwizerwa Eric muri iyi Video:

Minisitiri w’Ubumwe bw’Abanyarwanda n’Inshingano Mboneragihugu, Dr Jean Damascene Bizimana

Ni ubutumwa yatangiye mu muhango wo gutangiza icyumweru cy’Icyunamo wabereye ku Gisozi mu Mujyi wa Kigali, kuri uyu wa Gatanu tariki 7 Mata 2023.

Buri tariki ya 7 Mata buri mwaka, hatangira iminsi ijana yo kwibuka Abatutsi barenga Miliyoni bishwe mu 1994 bazira uko bavutse.

Minisitiri w’Ubumwe bw’Abanyarwanda n’Inshingano Mboneragihugu, Dr Jean Damascene Bizimana, ubwo yasobanuraga icyerekezo amahanga yahaye uyu munsi, yagize ati: “Kuva mu mwaka wa 2004, nibwo Umuryango w’Abibumbye wemeje ko tariki ya 7 Mata ari umunsi ibihugu bizirikana Jenoside yakorewe Abatutsi mu Rwanda, bigamije gukuramo amasomo yo gukumira indi Jenoside”.

Minisitiri Bizimana yakomeje avuga ko nubwo byemejwe ariko bitaragerwaho. Ati: “Ni icyemezo kitaragera ku ntego cyashyiriweho kuko ingengabitekerezo ya Jenoside itaracika mu Karere, dore ko umutwe w’abasize bakoze Jenoside mu Rwanda (FDLR) n’abakigendera ku ngengabitekerezo yayo utararandurwa”.

Yavuze ko Repubulika Iharanira Demokarasi ya Congo ifatanya na wo ikanimika urwango n’ubwicanyi byibasira Abanyekongo b’Abatutsi batuye muri Congo kubera amateka batahisemo.

Minisitiri Bizimana yakomeje asobanura ko Jenoside yakorewe Abatutsi ifite imizi mu bukoloni butubahirije amasezerano bwagiranye n’Umuryango w’Abibumbye mu mwaka wa 1922 akavugururwa mu 1946.

Mu ngingo ya 76 y’ayo masezerano, u Bubiligi bwahawe inshingo yo guha Abenegihugu ubwisanzure bwuzuye mu kwiyoborera Igihugu, nta vangura rishingiye ku bwoko, igitsina, ururimi cyangwa idini.

Tariki ya 13 Ukuboza 1946, u Bubiligi bwashyizeho itegeko rigena ko buzabyubahiriza ariko nyuma bubirengaho bushyira mu Rwanda ubutegetsi bw’irondabwoko bwa PARMEHUTU ari bwo bwabaye intandaro ya Jenoside mu mateka y’u Rwanda kuva mu 1959.

Minisitiri Bizimana yemeza ko ingaruka z’iyi ngengabitekerezo y’urwango yashinzwe mu Rwanda igikurikirana Abanyarwanda.

Kurikira ibindi bisobanuro bya Minisitiri Dr Bizimana muri iyi Video:

Yavuze ko kwibuka atari ijambo gusa cyangwa se igihe bimaze. Yagize ati “Kwibuka, si ijambo gusa! Kwibuka, si igihe gusa! Kwibuka, si imyaka 29 tumaze, Kwibuka ni ukubana n’abacu kuko batazimye”.

Ubu butumwa Madamu Jeanette Kagame yabutanze kuri uyu wa Gatanu tariki 7 Mata 2023, umunsi wo gutangiza Icyumweru cy’Icyunamo ndetse n’iminsi 100 yo kwibuka ku nshuro ya 29 Jenoside yakorewe Abatutsi mu 1994.

Muri uyu muhango aba bayobozi bombi bashyize indabo aharuhukiye imibiri y’abishwe muri Jenoside yakorewe Abatutsi mu 1994, Perezida Kagame na Madamu bacana n’Urumuri rw’Icyizere.

Ni ubutumwa by’umwihariko bwari bugenewe abagize uruhare muri Jenoside n’abakomeje kubakingira ikibaba, aho bahungiye hirya no hino ku Isi.

Perezida Kagame yagize ati “Mushobora kwirukanka ariko ntimushobora kwihisha, ntaho mufite ho kwihisha ibingibi mubona byaranze amateka yacu, rero na babandi bafite umwanya wo kuvuga ibyo bashaka kuvuga, ibyo ari byo byose bazabivuga. Kandi bashobora no gukora ibintu byinshi bagendeye kuri ibyo, ariko ikiriho ni uko badashobora kubona aho bihisha”.

Akomoza ku buhamya bwatanzwe n’umwe mu bacitse ku icumu rya Jenoside, wavuze ku nzira y’umusaraba yanyuzemo akabasha kurokoka, nyuma yo guhinduranya imirongo y’abicwaga mu buryo bubiri (abicishwaga imihoro kubera ko nta mafaranga n’abaguraga kwicwa barashwe), akabasha kuva mu w’abaraswaga akiruka akabacika, Perezida Kagame yavuze ko umuntu aramutse afite amahitamo hagati yo kugira ineza no kuba umunyakuri, ibyiza ni uguhitamo kuba umuntu mwiza, kubera ko guhitamo kugira ineza, uba ubaye n’umunyakuri.

Perezida Kagame yakomeje agira ati “Ariko icyo gihe ineza nta yari ihari, ibyo rero, ni byo dukomeza kurwana nabyo umunsi ku munsi. Uyu munsi twahuriye hano ngo duhe icyubahiro ibitambo bikomeje gutangwa n’abacitse ku icumu kandi twibuka abo twabuze bose, muri Jenoside yakorewe Abatutsi, ndavuga uburyo abantu bakomeje guhigwa no kwicwa kubera abo bari bo, kandi nta muntu n’umwe hano cyangwa ahandi hose ku Isi uhitamo icyo ari cyo muri uri rwego, nta n’umwe wigeze ahitamo ubwoko, ibara ry’uruhu, umuryango n’ibindi”.

Ati “Hari byinshi dushobora guhitamo kuba byo, dushobora guhitamo aho dusengera…ariko ntushobora guhitamo kuba umuntu uhigwa, ndetse n’ababahigaga, nabo ubwabo ntabwo bahisemo kuba muri ubwo bwoko, ibintu nk’ibyo”.

President Kagame yafashe n’umwanya wo gushimira Abanyarwanda ubutwari n’imbaraga bakomeje kugaragaza, mu kwanga guheranwa n’amateka mabi yashegeshe Igihugu cyabo.

Yagize ati “Ariko Banyarwanda, ndabashimira mwese kuba mwaranze guheranwa n’aya mateka y’incamugongo, abantu babashije guhindura urupapuro batera intambwe ijya mbere, biyemeza kureka guheranwa n’agahinda n’amarira. Abantu biyemeje guhobera ubuzima ndetse barashikamye biyemeza gukora ikintu kigoye cyane…biyemeje kubabarira, yego byarakozwe, ariko ntidushobora kwibagirwa”.

Nk’ibisanzwe, ibikorwa byo kunamira abishwe muri Jenoside yakorewe Abatutsi, buri mwaka bibimburirwa no gucana urumuri rw’icyizere, bigaherekezwa n’indirimbo, aho uyu munsi haririmbye abanyeshuri biga muzika mu ishuri rya Nyundo.

Reba ibindi muri iyi video:

Inkuru bijyanye:

Nyuma y’imyaka 29 hari abakekwaho Jenoside basaga 1000 batarafatwa

Perezida Kagame yabigarutseho nyuma y’ubuhamya bwatanzwe n’umwe mu barokotse Jenoside yakorewe Abatutsi, bukubiyemo ubuzima bugoye yanyuzemo kugeza arokowe n’Inkotanyi, no ku byavuzwe na Minisitiri w’Ubumwe bw’Abanyarwanda n’Inshingano Mboneragihugu, Dr. Bizimana Jean Damascène, ku macakubiri yaranze u Rwanda kugeza arugejeje kuri Jenoside.

Perezida Kagame yavuze ko mu mateka yabaye, Abanyarwanda bagize imbaraga z’uko ntawe uzababwiriza uko babaho, cyangwa ngo abazanemo amacakubiri.

Ati “Ushobora kwiruka, ariko ntushobora kwihisha, ntaho kwihisha uku kuri kw’aya mateka yacu, n’abo bavuga ibyo bashaka kuvuga, baravuga, ndetse bagakora ibikorwa bashaka gukora, ariko ukuri ni uko nta hantu bazabona ho kwihisha.”

Perezida Kagame yabwiye Abanyarwanda ko ari bo bakwiriye kwigira, kandi ko mu myaka ishize bize byinshi ku buryo kubigeraho bishoboka.

Ati “Niba hari uje kudutera inkunga, turamushima ariko nibatanaza, ntabwo tuzapfa ngo dushire ngo ni uko kanaka ataje kudufasha.”

Perezida Kagame akomeza avuga ko u Rwanda rwize guhindura ibibazo, bikavamo amahirwe yo kugira icyo rugeraho, ndetse rugakoresha bike rufite kugira ngo rugere kuri byinshi, kuko nyuma y’amateka akomeye Abanyarwanda banyuzemo nta kintu badashobora gutsinda.

Ati “Abanyarwanda baranzwe n’ubutwari, batsinda ibikomeye byari bibasumbirije babasha kwiyubakira Igihugu gishya kibereye twese”.

Aha ni naho Perezida Kagame yashimye ubudaheranwa bw’abarokotse Jenoside yakorewe Abatutsi, bagize umutima wo kubabarira ababiciye ababo muri Jenoside, ashimangira ko nta muntu n’umwe ufite uburenganzira bwo guhitiramo Abanyarwanda uko bagomba kubaho.

Perezida Kagame yavuze ko aya mateka yatumye Abanyarwanda bashibukamo imbaraga, zo kwihitiramo icyerekezo baha Igihugu cyabo.

Umukuru w’Igihugu yasabye urubyiruko kwigira kuri ayo mateka, bagakomeza gutanga umusanzu mu kwiyubakira Igihugu kizira ivangura.

Ati “Ngicyo icyo Kwibuka twiyubaka bivuze.”

Yavuze ko kuba Isi yarateye umugongo Abanyarwanda, bitanga ubutumwa bw’uko bagomba kwiga kwigira kandi ko iryo somo ryafashe.

Binyuze ku mbugankoranyambaga zabo mu butumwa banditse ikipe ya Arsenal yagize iti “Uyu munsi twifatanyije n’u Rwanda Kwibuka ku nshuro ya 29 Jenoside yakorewe Abatutsi mu 1994.“

Arsenal yifatanyije n’u Rwanda mu kwibuka Jenoside yakorewe Abatutsi mu 1994

Ubu butumwa bwanaherekejwe n’ubwatanzwe mu mashusho n’abakinnyi batandukanye ba Arsenal barimo ,Fabio Vieira, Emile Smith Rowe na Jorginho.

Muri butumwa batanze uko bakurikiranye bagize bati"Buri mwaka twifatanya n’u Rwanda kwibuka Jenoside yakorewe Abatutsi mu 1994 duha icyubahiro abarenga miliyoni babuze ubuzima tunaha agaciro imbaraga n’umuhate by’abarokotse."

Aba bakinnyi bakomeje bagira bati “Nyuma y’imyaka 29, u Rwanda ni urumuri rwo kwihangana, guhinduka n’igihamya cy’umwuka uhoraho w’ubumuntu."

Ubu butumwa busoza ikipe ya Arsenal isaba abakunzi bayo guhaguruka bakarwanya ibikorwa byose by’urwango ndetse n’ivangura iryo ariryo ryose.

Kuva Arsenal yatangira imikoranire n’u Rwanda mu 2018 binyuze muri gahunda ya Visit Rwanda buri mwaka yifatanya n’Abanyarwanda mu Kwibuka Jenoside yakorewe Abatutsi mu mwaka wa 1994 itanga ubutumwa binyuze mu bakinnyi ndetse n’ubundi buryo butandukanye.

Ni umuhango waranzwe no gushyira indabo aharuhukiye imibiri y’ahashyinguwe abishwe muri Jenoside yakorewe Abatutsi mu 1994, Perezida Kagame na Madamu bacana n’Urumuri rw’Icyizere.

Kureba andi mafoto, kanda HANO

Amafoto: Moise Niyonzima/Kigali Today

Antonio Guterres

Antonio Guterres yashimye uruhare rw’Abanyarwanda muri gahunda z’ubumwe n’ubwiyunge nyuma y’imyaka 29, habaye Jenoside yakorewe Abatutsi.

Umunyamabanga Mukuru wa ONU yatangaje ibi mu gihe kuri uyu wa Gatanu u Rwanda rwatangiye icyumweru cy’icyunamo ahibukwa ku nshuro ya 29 Jenoside yakorewe Abatutsi mu 1994.

Antonio Guterres ubwo yatangaga ubutumwa bwo kunamira abazize Jenoside yakorewe Abatutsi mu 1994, yashimye uruhare rukomeye Abanyarwanda bagize muri gahunda z’ubumwe n’ubwiyunge bwabagejeje kuri iyi nzira yo kwiyubaka.

Guterres yagize ati “Turunamira inzirakarengane zirenga miliyoni z’abana, abagore n’abagabo zishwe mu minsi ijana gusa, mu myaka 29 ishize”.

Akomeza agira ati “Turunamira inzirakarengane z’Abatutsi n’abandi bishwe bazira kwitandukanya n’umugambi mubisha wo kwica Abatutsi. Turashima kandi ubudaheranwa bw’abarokotse Jenoside yakorewe Abatutsi, tukanashima by’umwihariko uruhare rw’Abanyarwanda mu rugendo rw’ubumwe n’ubwiyunge.”

Kimwe mu bigaragazwa nk’ibyatije umurindi ishyirwa mu bikorwa rya Jenoside yakorewe Abatutsi mu Rwanda, ni uruhare ruziguye rw’umuryango mpuzamahanga, aho ndetse na nyuma yayo; hari bimwe mu bihugu byagiye bigaragara mu bikorwa bitandukanye birimo nko gutiza umurindi ingengabitekerezo ya Jenoside ndetse ibindi bigacumbikira abayigizemo uruhare.

Aha ni ho Antonio Guterres, ahera ashimangira ko igihe kigeze Isi yose igahuriza hamwe imbaraga mu kurwanya ibyaha bya Jenoside ndetse n’ibindi byibasira inyokomuntu ku Isi.

Ati “Kuri uyu munsi kandi tuzirikana ikimwaro cyo gutsindwa k’umuryango mpuzamahanga muri kiriya gihe”.

Guterres avuga ko akurikije ibyabaye abantu badakwiye na gato kubyibagirwa, kandi bakazirikana uburyo imvugo zihembera urwango zabaye imbarutso ya Jenoside yakorewe Abatutsi, bikavamo ibyaha ndengakamere. Avuga ko nta gihe nyacyo cyo gukumira ibintu nk’ibi kitari none, agaragaza ko kurwanya Jenoside n’ibyaha byibasira inyokomuntu ari inshingano zihuriweho na buri wese.

Yakomeje avuga ko ibi bireba n’ibihugu binyamuryanyo mu Muryango w’Abibumbye. Ati “Ni inshingano za buri munyamuryango w’Umuryango w’Abibumbye ko twese duhaguruka tukarwanya ikibi icyo ari cyo cyose, kandi tugahora turi maso. Reka twese hamwe twunamire izi nzirakarengane zazize Jenoside, twubaka ahazaza h’umutekano uhamye, ubutabera ndetse n’uburenganzira bwa muntu”.

Kuva mu mwaka wa 2004 Umuryango w’Abibumbye wemeje tariki ya 7 Mata nk’umunsi mpuzamahanga uhoraho wo kwibuka Jenoside yakorewe Abatutsi mu 1994, ibi byaje gushimangirwa cyane mu mwaka wa 2018.

Ku wa Gatanu tariki ya 14 Mata, hateganyijwe umuhango wo kwibuka ku nshuro ya 29 Jenoside yakorewe Abatutsi mu Rwanda, uzabera ku cyicaro gikuru cy’Umuryango w’Abibumbye i New York, kizaba kirimo ijambo ry’Umunyamabanga Mukuru, Perezida w’Inteko Rusange y’Umuryango w’Abibumbye, n’abandi bayobozi batandukanye ndetse unitabirwe n’umwe mu barokotse Jenoside yakorewe Abatutsi uzabagezaho ijambo.

Ni mu gihe ku wa Kane tariki ya 13 Mata, ku biro by’Umuryango w’Abibumbye i Genève, hazabera umuhango wo gucana urumuri ndetse hakazatambuka imbwirwaruhame zitandukanye z’abayobozi muri uyu muryango ndetse n’ubuhamya bw’abarokotse Jenoside yakorewe Abatutsi muri Mata 1994.

Bosco (ufite imbago), abarokotse Jenoside barifuza ko yagirwa Umurinzi w’Igihango

Uru rwibutso rwubatse muri Kilometero ebyiri uvuye ku mupaka uhuza u Rwanda na Tanzania mu Ntara y’Akagera.

Umuyobozi wa Ibuka mu Karere ka Kirehe, Nduwimana Bonaventure, avuga ko muri Jenoside, hari abagiraneza bo mu itorero ry’Abaruteri (Luther), bakoreraga muri ako gace bafasha impunzi, bagiye barohora imibiri y’abishwe bakajugunywa mu mugezi w’Akagera, uwo muturage witwa Bosco, yemera ko bashyingurwa mu cyubahiro mu butaka bwe.

Uru rwibutso rushyinguwemo imibiri 917 y’Abatutsi bishwe muri Jenoside, guhera mu mwaka wa 2010, abacitse ku icumu rya Jenoside bakaba bajya kuhakora isuku, mu gihe batagiyeyo Bosco akaba ariwe uhakorera isuku.

Ati “Bosco navuga ko ari umuntu ufite ubumuntu, yanze ko abantu bakomeza kureremba ku mazi yifatanya n’Abaruteri barohora iyo mibiri ishyingurwa mu butaka bwe, ndetse akomeza no kujya ahakorera isuku.”

Urwibutso rwo mu Ntara ya Kagera ruruhukiyemo imibiri 917 y’Abatutsi bishwe muri Jenoside

Ku wa Kane tariki ya 06 Mata 2023, abacitse ku icumu rya Jenoside yakorewe Abatutsi mu Karere ka Kirehe, bagiyeyo kuhakorera isuku ndetse na we aza kwifatanya nabo.

Ibikorwa by’uyu mugabo ngo byabakoze ku mutima, ku buryo bifuza ko bishoboka yashyirwa mu barinzi b’Igihango.

Ati “Twamugereranya n’abarinzi b’Igihango, hari abantu bemeye guhisha no kurokora Abatutsi mu gihe abandi barimo babica. Twamugereranya n’abemeye kubahisha n’ubwo we yarohoraga imibiri y’abamaze gupfa. Na we bishoboka twamushyira mu barinzi b’Igihango b’Abanyarwanda, cyangwa abanyamahanga bagiye bagaragaza ibyo byiza.”

Nduwimana ariko avuga ko nanone nk’abarokotse Jenoside yakorewe Abatutsi, batishimira amagambo yanditse kuri urwo rwibutso kuko atagaragaza ko ari Abatutsi bishwe muri Jenoside, icyakora akishimira ko Ibihugu byombi byatangiye ibiganiro kuri iki kibazo.

Agira ati “Turimo gushaka ko amagambo yanditseho ahindurwa kuko avuga ko ari Abanyarwanda basubiranyemo, mu by’ukuri amagambo yanditseho ntavuga ko bazize Jenoside, gusa turishimira ko ibiganiro hagati y’Ibihugu byombi byatangiye, kandi batubwira ko vuba aha bagiye kuhubaka neza ndetse n’ayo magambo agahindurwa.”

Abarokotse Jenoside buri mwaka bajya kuhakora isuku

Ikindi ariko, yifuza ko mu minsi 100 yo kwibuka, uru rwibutso narwo bakwemererwa bakajya bajya kurwibukiraho, nk’uko bikorwa ku nzibutso ziri mu gihugu cya Uganda.

Ni ibikorwa urwo rubyiruko ruvuga ko biri mu rwego rwo gusigasira amateka ya Jenoside kugira ngo adasibangana; rukemeza ko rubikomora ku rugero rw’urubyiruko bagenzi babo, bahoze ari ingabo za RPA Inkotanyi, bitanze bagahagarika Jenoside.

Umwe muri urwo rubyiruko witwa Uwitonze Patricia yagize ati: “Gusigasira aya mateka tubungabunga inzibutso ziruhukiyemo imibiri y’abishwe muri Jenoside yakorewe Abatutsi, tubishingira ku rugero rwa bagenzi bacu b’urubyiruko bafashe iya mbere bakibwiriza, bagahagarika Jenoside yakorewe Abatutsi; none ubu umutekano dufite ukaba ugaragarira mu gihugu cyacu n’amahanga”.

Yongeyeho ati “Kuba urugamba rw’amasasu bararuhagaritse, tukaba dusigaranye urugamba rw’ibikorwa bizamura iterambere ry’Igihugu, dusanga muri byo no kubungabunga dusigasira inzibutso, aho bibaye ngombwa tukanazisana, biri mu byadufasha gusigasira amateka mu buryo buhoraho, bityo n’aho Igihugu kigana hagashingira ku kuba abantu twese dusobanukiwe kandi tuzi aho Igihugu cyavuye n’aho kiri ubu n’aho kigana”.

Umuhuzabikorwa w’ibikorwa bya Polisi n’Abaturage mu Ntara y’Amajyaruguru, akaba n’Umuvugizi wa Polisi y’u Rwanda muri iyo Ntara, Superintendent of Police (SP) Alex Ndayisenga, mu kiganiro kigaruka ku mateka ya Jenoside yakorewe Abatutsi mu Rwanda aherutse kugeza ku bitabiriye Inteko rusange y’Urubyiruko rw’Abakorerabushake, yabereye mu Karere ka Gakenke mu cyumweru gishize, yagize ati: “Mukurikije urugendo Abanyarwanda bagenze uko rungana muri iyi myaka 29 ishize Jenoside yakorewe Abatutsi ihagaritswe, ndetse n’imbaraga zashyizwe mu kubaka ubumwe bw’Abanyarwanda no kubwimakaza, bamwe ntibari bazi ko bizanashoboka ariko byarakunze, ari na yo mpamvu ubu turiho dufite icyizere cy’uyu munsi n’ejo hazaza”.

Yakomeje ati “Ubu umuntu agenda aho ashaka yemye, aho buri wese afite uburenganzira bwo gutanga igitekerezo cye ntawe umuhutaje, uwize akabona imirimo akora hatagendewe ku bwoko ubu n’ubu, akabasha gukoresha imbaraga ze mu biteza imbere Igihugu ntawe umubangamiye. Ibyo biri mu byo Ingabo zahoze ari iza RPA Inkotanyi zahagaritse Jenoside yakorewe Abatutsi zaharaniraga ari na byo tubona ubu, tugasaba ko nkamwe urubyiruko izo ngero muzireberaho.”

Inzibutso uko ari eshatu za Jenoside yakorewe Abatutsi mu 1994 zibarizwa mu Karere ka Gakenke, harimo Urwibutso rwa Buranga, Urwibutso rwa Muhondo n’Urwibutso rwa Ruli.

Ni icyumweru ngarukamwaka, kibamo ibikorwa bitandukanye byo kwibuka ndetse no kunamira Abatutsi barenga miliyoni bishwe urw’agashinyaguro bazira uko baremwe, harimo no gucana urumuri rw’icyizere.

Mu rwego rwo kurushaho guha icyubahiro Abatutsi bazize Jenoside mu 1994, guhera tariki 07-13 Mata mu Rwanda ibikorwa byose by’imyidagaduro ndetse n’imikino birahagarara, hakibandwa cyane ku bijyanye no kwibuka, kumva ubuhamya bw’abacitse ku icumu, ndetse no gushyingura mu cyubahiro imibiri iba yarabonetse.

Gahunda yo kwibuka imaze kuba umuco kuko ituma Abanyarwanda barushaho kuba umwe, bakaba bamaze gusobanukirwa neza ko by’umwihariko mu cyumweru cyo kwibuka, baba bagomba kuba hafi cyane y’imiryango yacitse ku icumu, mu rwego rwo kubahumuriza no kubereka ko batari bonyine, bakabarinda ibikorwa byose bishobora kubahungabanya, nko kuvuga amagambo cyangwa gukora ibikorwa bishobora kubakomeretsa.

Ubushakashatsi bugaragaza ko kwibuka byafashije Abanyarwanda barenga 90% kugera ku ntambwe y’Ubumwe, ku buryo ingengabitekerezo yagabanutse kugera ku rugero rwa 94.7%, ndetse no kugabanya ubukana, aho ngo isigaye yigaragaza ahanini mu magambo abantu bavuga, mu gihe mbere harimo no kwica.

Mu rwego rwo kubungabunga amateka, muri iki gihe u Rwanda rugiye kwibuka ku nshuro ya 29 Jenoside yakorewe Abatutsi, Minisiteri y’Ubumwe bw’Abanyarwanda n’Inshingano mboneragihugu (MINUBUMWE), yasabye abantu bose bazategura ibikorwa byo kwibuka Jenoside yakorewe Abatutsi mu 1994, gufata amashusho n’amajwi by’ubuhamya buzatangwa.

Mu kiganiro abayobozi muri MINUBUMWE bagiranye n’itangazamakuru tariki 05 Mata 2023, Umunyamabanga uhoraho muri iyo Minisiteri, Clarisse Munezero, yavuze ko ayo mateka yose agomba kubikwa.

Yagize ati “Dusaba abantu gufata amashusho n’amajwi kugira ngo bitugaragarize uko igikorwa cyagenze, ni mu rwego rwo kugira ngo tubungabunge amateka, ntihazagire na kimwe kizaducika.”

Ngo si ngombwa ko mw’ifatwa ry’amajwi n’amashusho hakoreshwa ibikoresho bihambaye, kuko hashobora no gukoreshwa telefone nka kimwe mu gikoresho gifitwe na benshi.

Mu cyumweru cyo kwibuka haba hari ibikorwa byateganyijwe bitandukanye, kuri iyi nshuro MINUBUMWE ikaba yarashyize ahagaragara amabwiriza agomba gukurikizwa.

Asobanura ibijyanye n’amasaha atagomba kurenzwa, Minisitiri w’Ubumwe bw’Abanyarwanda n’Inshingano Mboneragihugu, Dr. Jean Damascène Bizimana, yavuze ko gahunda zose zijyanye no kwibuka zitagomba kurenza amasaha atatu.

Yagize ati “Aha ndahatsindagira kubera ko hari aho usanga mu turere abantu bategura igikorwa cyo kwibuka, ariko ntibite ku mabwiriza y’uko ibikorwa bigomba gukurikirana, bakabikora uko babyumva kandi ibyo bitera ingaruka nyinshi. Twaje gusanga iyo amasaha arenze atatu bitera ikibazo cy’umunaniro bikanongera ihungabana, kuko uko igikorwa kiba kirekire ni ko umwanya w’agahinda na wo ugenda wiyongera, abafite intege nke ka gahinda kakabaganza, kakaba kenshi ihungabana rikaba ryinshi kandi atari cyo kigamijwe.”

Amasaha atatu yateganyijwe ngo arahagije kuba hatangwamo ikiganiro, Ubuhamya, Ubutumwa, Indirimbo cyangwa umuvugo n’ibindi biri mu mabwiriza n’uko bigomba gukurikirana, kandi igikorwa kikarushaho kugenda neza, ku buryo abantu bataha rya hungabana ritabaye, cyangwa rikaba ricye.

Bimwe mu bikorwa bibujijwe muri iki cyumweru cy’icyunamo, birimo ibirori by’ibyishimo bihuza imbaga y’abantu, nk’ubukwe n’imihango ijyanye nabwo, amarushanwa yose uretse siporo zikorwa n’abantu ku giti cyabo.

Habujijwe kandi umuziki utajyanye no Kwibuka haba mu tubari, aho bafatira amafunguro, aho batunganyiriza imisatsi (salon de coiffure), aho batunganyiriza umuziki (studio) n’ahandi hantu hahurira abantu benshi nk’ahategerwa imodoka, imikino y’amahirwe n’ahandi.

Ibindi bibujijwe ni ibikorwa byo kwerekana imipira, ibitaramo mu tubyiniro, iby’urwenya, iby’indirimbo, iby’imbyino, sinema n’ikinamico itajyanye no Kwibuka.

Ibikorwa byo kwibuka birakomeza mu minsi ijana kugeza tariki ya 3 Nyakanga 2023, birimo gushyingura imibiri yabonetse cyangwa iyimurwa muri gahunda yo guhuza inzibutso yumvikanyweho n’Uturere.

Mu gikorwa cyo Kwibuka Jenoside yakorewe Abatutsi, nta busumbane bugomba kuba mu madini. Misa n’amateraniro ntibishyirwa muri icyo gikorwa, kuko abitabira Kwibuka Jenoside yakorewe Abatutsi atari abayoboke b’idini rimwe.

MINUBUMWE yatangaje ko mu gihe igikorwa cyo kwibuka Jenoside yakorewe Abatutsi cyateguwe n’idini, itorero cyangwa ibigo by’Abihayimana byemewe n’amategeko, hagamijwe Kwibuka abayoboke babo, cyangwa abanyamuryango babo bishwe muri Jenoside, icyo gihe abateguye icyo gikorwa babikora bakurikije uko imyemerere yabo iteye, hakubahirizwa ibiteganywa n’amategeko n’amabwiriza.

Umugoroba w’ikiriyo ubanziriza umunsi wo Kwibuka cyangwa gushyingura imibiri y’abazize Jenoside yakorewe Abatutsi uremewe, ariko usozwa bitarenze saa yine z’ijoro, mu rwego rwo kubungabunga ubuzima n’umutekano w’abantu.

Inzego zose zateguye Kwibuka Jenoside yakorewe Abatutsi, zigomba gufata amashusho n’amajwi by’icyo gikorwa bigashyikirizwa MINUBUMWE, mbere y’isozwa ry’iminsi 100 yo kwibuka.

Hanagaragajwe kandi ko abategura nk’ibikorwa byo gufasha abatishoboye barokotse Jenoside yakorewe Abatutsi, bagomba kubanza kubisaba kugira ngo harebwe ku bababaye cyane kurusha abandi, kuko iyo mibare iba ifitwe na Minisiteri.

MINUBUMWE mu kiganiro n’Abanyamakuru kuri uyu wa Gatatu

Umunyamabanga Uhoraho muri MINUBUMWE, Clarisse Munezero, avuga ko ayo mateka yose agomba kubikwa n’iyo Minisiteri.

Munezero agira ati "Dusaba abantu gufata amashusho n’amajwi kugira ngo bitugaragarize uko igikorwa cyagenze, ni muri urwo rwego rwo kugira ngo tubungabunge amateka ntihazagire na kimwe kizaducika".

Munezero avuga ko atari ngombwa gukoresha ibikoresho bihambaye, ahubwo ko bashobora kwifashisha telefone nk’igikoresho gifitwe na benshi.

Umunyamabanga Uhoraho muri MINUBUMWE, Clarisse Munezero

Mu kiganiro MINUBUMWE yagiranye n’Abanyamakuru kuri uyu wa Gatatu tariki 05 Mata 2023, yavuze ko gahunda yo Kwibuka imaze kuba umuco, kandi ituma Abanyarwanda barushaho kuba umwe.

Minisitiri Dr Jean Damascène Bizimana agira ati "Kwibuka byabaye kamere, byatwinjiyemo, biri mu muco nyarwanda, ubushakashatsi bugaragaza ko Kwibuka byafashije Abanyarwanda barenga 90% kugera ku ntambwe y’Ubumwe".

Minisitiri Bizimana avuga ko abarokotse Jenoside batanga ubuhamya ntawe usoza adashimiye Inkotanyi, ko zamurokoye kandi yabashije kwiyubaka.

Minisitiri Dr Jean Damascène Bizimana

Akomeza ashima ko ingengabitekerezo ya Jenoside ngo imaze kugabanuka ku rugero rwa 94.7%, ndetse no kugabanya ubukana, ikaba ngo isigaye yigaragaza cyane mu magambo abantu bavuga mu gihe mbere harimo no kwica.