Icyakora ibijyanye no gufungurwa bishobora kutabaho kuko mu isaha imwe irenga abacamaza bamaze basoma dosiye y’urubanza ifite amapaji arenga 170, Maj Habib Mudathiru yahamijwe icyaha cyo kuba yarabaye umutoza mukuru w’abarwanyi ba P5.

Urukiko kandi rwatesheje agaciro ibyavugwaga na Maj Habib Mudathiru ko yinjiye atabishaka muri iyo mitwe iregwa iterabwoba.

Urukiko rukaba ruvuga ko uregwa yari azi neza ko intego nyamukuru yari ugukuraho ubutegetsi buriho mu Rwanda hakoreshejwe igitero cy’intambara.

Mu kwezi k’Ukuboza 2020 nibwo Umucamanza mu Rukiko rwa gisirikare yasoje imirimo y’iburanisha ry’urubanza rwa Major Habib Mudathiru na bagenzi be.

Maj Habib Mudathiru wahoze mu ngabo z’u Rwanda aregwa kuba mu mutwe w’iterabwoba wa Rwanda National Congress (RNC) ufatanyije n’indi mitwe yibumbiye hamwe ikitwa P5.

Maj Mudathiru ashinjwa kuba mu bashinze imitwe y’iterabwoba, gushakisha abarwanyi no kubatoza kugirira nabi ubutegetsi buriho mu Rwanda.

Mu iburanisha, Maj Mudathiru yasabye imbabazi ku cyaha cyo kwinjira mu mutwe w’ingabo utemewe, icyo kuba mu mutwe w’abarwanyi ugamije kugirira nabi ubutegetsi, hamwe n’icyo kugirana umubano n’ibihugu by’amahanga hagamijwe kugirira nabi ubutegetsi bw’u Rwanda.

Yavuze ko yicuza kuba yarabaye mu ngabo z’u Rwanda nyuma agahindukira akaba mu ruhande rw’abarwanya Igihugu aho yagize ati "Ndasaba urukiko guca inkoni izamba".

Icyakora arahakana icyaha cyo kurema umutwe w’ingabo utemewe kuko avuga ko yasanze uwo mutwe warashinzwe kandi ngo nta ruhare afite mu byaha by’iterabwoba.

Ubushinjacyaha buvuga ko Maj Habib ari we wari ukuriye itsinda ry’abo baregwa hamwe 31 barimo Umunya-Uganda umwe ndetse n’Umurundi.

Aba banyamahanga bavuga ko bashowe mu mitwe irwanya igihugu kitari icyabo ariko batabishaka kuko ngo bizezwaga ko bagiye gushakirwa akazi, bakaba basaba ubuhungiro mu Rwanda kuko ngo mu gihe basubizwa iwabo bashobora kugirirwa nabi.

Maj (Rtd) Habib Mudathiru agendera ku mbago

Mu rubanza rw’uyu munsi umushinjacyaha wa gisirikare yagaragarije urukiko ko Maj (Rtd) Habib Mudathiru, yafatanyaga n’itsinda ry’abandi bantu benshi bakoreraga mu Burundi no muri Uganda bashakisha abasore bakiri bato bo kujyana muri P5, aho ubwe yigiraga cyane cyane mu nkambi irimo Abanyarwanda muri Uganda kubakurayo.

Mu mpera z’umwaka wa 2017, Mudathiru yayoboye itsinda ry’abantu 40 b’impunzi z’Abanyarwanda zari zivuye muri Uganda, bakaba bari bafite ibyangombwa by’ibihimbano bya Uganda, bagombaga kunyura muri Tanzaniya kugira ngo bagere mu Burundi bityo biborohere kwambuka bajya mu mashyamba ya Congo mu myitozo ya gisirikare y’umutwe wa RNC.

Icyo gihe ngo ntibyabahiriye kuko Polisi ya Uganda ifatanyije n’iya Tanzaniya bahise bafata rya tsinda ry’abantu 40, bari barimo Mudathiru na Cap Sibo Charles bafatanyaga muri ibyo bikorwa, aho hari ku mupaka wa Kikagati uri hagati y’ibihugu byombi.

Uwo mushinjacyaha yakomeje avuga ko bamaze gufatwa, umusirikare mukuru wo mu rwego rw’ubutasi bwa Uganda, Capt Charles Byaruhanga, yakoze uko ashoboye kugira ngo babarekure, abwira abo ku mupaka bari babafashe ko abo bantu babazi bityo babareke bambuke. Ngo bahise barekura Sibo na Mudathiru, naho abandi barabasigarana batangira kubahata ibibazo.

Ngo babanje kubeshya ko bari bagiye mu gikorwa cy’ivugabutumwa muri Tanzania, ariko ibibazo byashamikiyeho ni byo batabashije gusubiza birangira bemeye ko bari bagiye kunyura i Burundi bakajya mu basirikare ba P5, gusa Mudathiru ntiyahawe umwanya ngo agire icyo abivugaho.

Mu bireguye uyu munsi hari harimo itsinda rigizwe ahanini n’abasirikare bari aba RDF, ari bo Pte Muhire Dieudonné, Pte Igitego Champagnat, Kaporali Dusabimana Jean Bosco na Kaporali Kayiranga Viateur ndetse n’abasivili ari bo Pacifique Muhire na Richard Nzafashwanimana.

Pte Muhire wasaga n’ukuriye iryo tsinda, yemeye icyaha ashinjwa cyo gutoroka igisirikare cy’u Rwanda, ariko ahakana icyo kurema umutwe w’abagizi ba nabi no gushishikariza abandi kuwujyamo, kuko ngo nta mutwe yafatiwemo cyangwa ngo afatanwe intwaro runaka.

Pte Muhire yabajijwe n’urukiko niba yemera ibyo yavugiye mu bugenzacyaha no mu bushinjacyaha aho yafashwe ijwi yemera icyaha cyo gushishikariza abantu kujya mu mutwe wa FLN, yasubije urukiko ko byose atabyemera, icyakora umucamanza yahise avuga ko umuntu atahakana ibyo yemereye imbere y’inzego ebyiri, keretse avuze ko hari iterabwoba yashyizweho.

Undi wabajijwe ni umusivili Muhire Pacifique na we uri muri iryo tsinda, uvuga ko yagiye mu mutwe wa FLN wa Nsabimana Callixte, ajyanywe no gushaka amafaranga gusa kuko yabonaga ko uwo mutwe utari kubasha gukuraho ubutegetsi bw’u Rwanda.

Muhire Pacifique ngo yagiye muri uwo mutwe abishishikarijwe na Pte Muhire Dieudonné amusanze aho yari atuye muri Uganda, abanza kubyanga ariko amwemerera ko azamuha amafaranga azasigira umuryango we, abibwiye se n’umugore we barabimubuza ariko biba iby’ubusa aragenda.

Umucamanza kandi yagarutse ku witwa Pte Ruhinda wari umusirikare mu Ngabo z’u Rwanda (RDF) aza gutoroka igisirikare muri 2004, gusa we n’ubu ntarafatwa aracyashakishwa, uyu ngo yagize uruhare rukomeye mu gushinga P5 ndetse no kuyishakira abarwanyi, cyane ko na Mudathiru yayimusanzemo.

Kwiregura ku bandi bagize iryo tsinda ry’abari abasirikare mu ngabo z’u Rwanda (RDF) batorotse igisirikare bakajya muri iyo mitwe y’iterabwoba birakomeza kuri uyu wa Gatanu tariki 18 Nzeri 2020.

Urwo rubanza ruregwamo abantu 32, rwakomeje kuri uyu wa 16 Nzeri 2020, aho mu bindi byaha baregwa harimo kugirana umubano na Leta y’amahanga hagambiriwe gushoza intambara, gucura umugambi wo gukora icyaha cy’iterabwoba, kurema umutwe w’abagizi ba nabi no koshya abandi kuwujyamo.

Abisobanuye guhera ku wa Kabiri tariki 15 Nzeri 2020, bose bahurizaga ku kuba baragiye muri iyo mitwe y’iterabwoba batabishaka ndetse ahubwo ko bashutswe, kimwe n’abarimo kwiregura kuri uyu wa Gatatu, gusa ubushinjacyaha bwa Gisirikare ntibwemeranya na bo kuko hari ibimenyetso byerekana ko ibyo bagiyemo bari babizi.

Umushinjacyaha muri urwo rukiko, Cpt Jacques Rugamba, yavuze ko ubwiregure bw’abavuga ko bagiye muri iyo mitwe ku gahato budafite ishingiro kuko ngo hari amasoko bajyagamo aho bari mu mashyamba yo mu Minembwe, abatiyumvaga muri ibyo bikorwa bagatoroka cyangwa bakishyikiriza MONUSCO.

Yavuze kandi ko hari benshi babikoze uko, batoroka iyo mitwe bakomeza urugendo baza mu Rwanda kandi bakiriwe neza kuko basabye imbabazi bagaragaza ko bitandukanije n’iyo mitwe, ndetse bakaba bataranagejejwe mu rukiko.

Ibyo byashimangiwe na Maj (Rtd) Habib Mudathiru, ukomeje kuvuga ko ntawe yabujije gutoroka kuko bose bari bafite uburyo bwinshi bwari gufasha uwari kubyifuza akagenda kuko abo basirikare ngo ari bo bakoraga uburinzi ku buryo uwari kugenda atari gupfa kubimenya.

Umwe mu bavugaga ko babuze uko batoroka kubera Mudathiru ni uwitwa Mbarushimana Ildephonse unaburana ahakana icyaha cyo kujya mu mutwe w’abagizi ba nabi, ariko Mudathiru agahamya ko atari byo, anatanga urugero.

Ati “Hari ubwo narwaye cyane njya kwivuriza i Burundi, mu bamperekeje na Mbarushimana yari arimo anafite imbunda. Nageze aho nambukira ndagenda na bo basubira inyuma, babujijwe n’iki gutoroka ko jyewe ntari mpari”!

Uwo Mbarushimana ngo yagiye muri P5 muri 2018 aturutse i Burundi aho yakoraga ubucuruzi, ariko akavuga ko yabeshywe ari ko kwisanga muri uwo mutwe mu mashayamba ya Congo, akongeraho ko umirimo yaje guhabwa nyuma wari uwo kurinda Maj (Rtd) Mudathiru wari umuyobozi wabo.

Aha ni ho urukiko rwahise ruvuga ko Mbarushimana yari umwizerwa muri P5 kuko nta kundi yari guhabwa akazi ko kurinda umuyobozi, bityo ko ibyo avuga y’uko yahatiwe kujya muri uwo mutwe nta kuri kurimo.

Mu bandi bireguye harimo Ngiruwera Shadrack wari waragiye muri Uganda gukora akazi ko koza imodoka, nyuma ngo haza umuntu umubwira ko agiye kumushakira akazi muri Afurika y’Epfo ariko yisanga mu mashyamba muri RDC.

Hari kandi Nsabimana Jean Marie, Habanabakize Innocent, Nsengumuremyi Janvier, Ndikumana Issa, abo na bo baburanye bahakana ko batagiye muri iyo mitwe y’iterabwoba ku bushake bwabo kuko bavanwaga aho bari mu mirimo yabo, cyane cyane i Bujumbura mu Burundi no muri Uganda, bakagenda bashutswe babwiwe ko bagiye guhabwa akazi keza bakisanga muri iyo mitwe.

Umwe mu bunganira abaregwa, yavuze ko abakiriya be batigeze bagambirira kujya muri iyo mitwe y’iterabwoba ahubwo ko babeshywe ko bagiye guhabwa akazi keza, bityo urukiko ngo rukaba rwashishoza, rukabishingiraho rubahanaguraho icyaha.

Kwisobanura ku baregwa muri urwo rubanza birakomeje, ejo ku wa Kabiri hakaba harireguye abantu 11 muri 32 baregwa ibyaha bimwe, muri bo hakaba harimo n’abari abasirikare mu ngabo z’u Rwanda (RDF), baza gutoroka igisirikare bajya muri iyo mitwe irwanya u Rwanda, kikaba ari n’icyaha cyiyongera ku byo abandi baregwa kuko bo bari abasivili.

Abarebwa n’urwo rubanza ni 32 barimo bane (4) bo mu ngabo z’u Rwanda (RDF), Maj (Rtd) Mudathiru, naho abandi ni abasivili barimo Abanyarwanda, Abarundi n’Abagande, benshi bakaba baregwa kwinjira mu mutwe wa P5 ukorera muri Repubulika Iharanira Demokarasi ya Congo (DRC), ufite intego yo guhungabanya umutekano w’u Rwanda.

Abaregwa bagejejwe imbere y’urwo rukiko i Kanombe kuri uyu wa Kabiri tariki 15 Nzeri 2020, nyuma y’amezi abiri imanza zihagaritswe kubera icyorezo cya Coronavirus, ariko zikaba zigiye gukomeza nk’uko byari biteguye.

Benshi mu baregwa bemeye icyaha cyo kwinjira mu mitwe y’iterabwoba yitwara gisirikare yakoreraga muri RDC no mu Burundi, igamije guhungabanya umutekano w’u Rwanda, ariko ko batayigiyemo ku bushake bwabo.

Umwe mu baregwa witwa Nsanzimana Patrick ni umusivili w’Umunyarwanda wagiye i Burundi muri 2003 gukora akazi k’ubuganga, nyuma ngo aza guhura n’Umurundi witwa Eugène amubwira ko yamubonera akazi kamuhemba neza.

Ibyo yavuze ariko bitandukanye n’ibyo yari yavuze mu bugenzacyaha, kuko byo bivuga ko yari yasanze batayo y’abaganga aho yahise azamurirwa ipete ari muri P5, ahita anaherekezwa yambuka umupaka ajya muri DRC gukomerezayo akazi.

Nsanzimana yavuze kandi ko ngo kubera ko yari umushomeri yahise yemera gukora ako kazi ari nabwo yisanze muri P5, ngo agerageza gutoroka biramunanira.

Umucamanza yamusabye kwerekana igihamya ko nta bushake yari afite bwo kujya muri uwo mutwe, Nsanzimana asubiza ko uwabihamya ari Maj (Rtd) Mudathiru.

Ati “Ku itariki 28 Werurwe 2018 nagerageje gutoroka biranga kuko nafashwe, ibyo byakwemezwa na Mudathiru kuko yabimpaniye. Nongeye kugerageza gutoroka nabwo birananira nyuma yo kumva amasasu menshi, mfite n’imvune”.

Yongeyeho ko Mudathiru yari umusirikare mukuru muri P5 wari ushinzwe ibikorwa, bityo ko yari azi inshuro zose uwo Nsanzimana yagerageje gutoroka bikanga.

Nsanzimana yemera ko yinjiye muri P5 ariko ko atabishakaga, atirengagije ko ingabo z’u Burundi zamuhaye imyenda n’ibikoresho bya gisirikare zinamufasha kwambuka ajya muri RDC.

Mudathiru uyu munsi wari wanze guhagarara imbere y’abacamanza kuko atari afite avoka we ndetse akaba atarakira ukuguru, aho yicaye ariko hari icyo yavuze ku byo Nsanzimana yari amaze kuvuga.

Ati “Ndashaka gusobanura ko Nsanzimana yari umusirikare mukuru, kandi ko bose bazaga muri P5 bakabanza kubazwa niba bazi ibyo bajemo, bagasubiza bati “Yego”, bivuze ko bose bari bazi icyo baje gukora”.

Icyakora Mudathiru yemeje ko hari benshi mu bari barinjiye muri uwo mutwe bagerageje gutoroka bamaze kumenya neza icyo ugamije, kimwe n’abandi bumvaga batishimiye kuwubamo.

Ati “Hari abageragezaga gutoroka ariko benshi bagafatwa bakagarurwa, nzi ko Nsanzimana yatorotse inshuro ebyiri ariko biramunanira. Gusa si njye wababereye inzitizi mu itoroka ryabo kuko ishyamba ryabaga rifunguye”.

Mu bandi bireguye harimo Joseph Gatwere ukomoka muri Uganda, Umurundi witwa Jean Minani, Umunyarwanda Jean Bosco Habyarimana n’abandi, bose bavuze ko bagiye muri P5 ariko batigeze babisaba ahubwo bashutswe ndetse baranashimutwa bisanga muri RDC.

Bavuga kandi ko bagerageje gutoroka ntibyabakundira kuko ishyamba ryababanye rinini kandi nta mafaranga bari bafite nubwo ngo bari barijejwe guhembwa, kuko nka Minani ngo yari yaremerewe umushara w’Amadolari ya Amerika 150 buri kwezi, wagombaga guturuka muri RNC.

Bavuga kandi ko ibyo byose Maj (Rtd) Mudathiru yari abizi kuko ari we wari ubayoboye, gusa we akaba yabiteye utwatsi mu rukiko.

Yagize ati “Amakuru yo guhembwa nanjye narayumvaga ariko babeshywe n’ababazanye, ibyo banshinja rero simbyemera kuko ntabizi”.

Urubanza rurakomeza kuri uyu wa Gatatu tariki 16 Nzeri 2020, aho urukiko rukomeza kumva abandi biregura kuri icyo cyaha cyo kwinjira mu mutwe w’iterabwoba witwara gisirikare.

Urukiko rukuru rwa gisirikare rukorera i Kanombe rwasubitse urwo rubanza rwari rwatangiye kuburanishwa mu mizi muri iki cyumweru, rukazasubukurwa ku matariki ya 20-24 Nyakanga 2020.

Icyo cyemezo cy’urukiko kandi cyafashwe kugira ngo umwe muri abo basirikare witwa Pte Muhire Dieudonné ari na we ubarangaje imbere, abanze akurikirane iby’inzitizi yagaragaje y’uko afashwe nabi kandi adafungiwe muri gereza.

Abaregwa uko ari 33, harimo abasirikare ba RDF batanu bakurikiranyweho ibyaha byo kwinjira mu mutwe w’ingabo utemewe, kugambirira kugirira nabi ubutegetsi buriho, kugirana umubano na Leta y’amahanga bigiriwe gushoza intambara, kurema umutwe w’abagizi ba nabi, ndetse no gucura umugambi wo gukora icyaha cy’iterabwoba.

Iri tsinda ryatangiye kuza mu rubanza rigizwe n’abantu 25 bafatiwe mu bitero by’ingabo za Congo(FARDC) nyuma bakoherezwa mu Rwanda, barangajwe imbere na Maj Habib Mudathiru wo muri RNC, ariko ubu rimaze kwiyongeramo abasirikare batanu bo muri RDF ndetse n’abasivili batatu.

Icyakora baraburana ari 32 kuko umusirikare umwe wa RDF witwa Ruhinda Jean Bosco adahari kuko ngo atarafatwa, yatorotse igisirikare cy’u Rwanda(RDF) mu mwaka wa 2014, ndetse akaba umwe mu batangiranye na RNC ashinzwe ibijyanye n’itumanaho muri P5.

Ubushinjacyaha bwa gisirikare buvuga ko bufite ibimenyetso bidashidikanywaho ko amatsinda abiri, rimwe rirangajwe imbere na Maj Mudathiru, irindi rihagarariwe na Pte Muhire Dieudonné, yakoranaga bya hafi mu guca intege abasirikare b’u Rwanda ndetse no kubahamagarira kwinjira mu mitwe y’inyeshyamba muri Congo.

Pte Muhire Dieudonné yakoreraga mu kigo cya gisirikare cya Mukamira mu karere ka Nyabihu. Mu 2017 ngo yibye sheki ya mugenzi we witwa Pte Bunani Jean, ahamagara undi muntu ujya kumubikuriza miliyoni 1.9 Frw, barayagabana.

Pte Muhire yahise atabwa muri yombi ariko atoroka kasho yari afungiwemo yerekeza muri Uganda. Yaje kujya muri RNC ya Kayumba Nyamwasa na FDLR mu mashyamba ya Congo anyuze mu Burundi.

Umushinjacyaha yakomeje avuga ko RNC yaje gucikamo ibice, Pte Muhire akurikira igice cyarimo Noble Marara cyaje no kwihuza n’andi mashyaka bikabyara MRCD, bifite umutwe witwara gisirikare, FLN, ari na wo Callixte Nsabimana wiyise Sankara yari abereye umuvugizi.

Pte Muhire ngo yahawe ubutumwa bwo gushakira uwo mutwe abarwanyi bashya ahereye ku bo babanaga mu ngabo z’u Rwanda RDF n’abandi ashobora kubona.

Umushinjacyaha avuga ko Pte Muhire yegereye Pte Igitego Champagnat hamwe na Caporal Kayiranga Viateur, bombi bari mu butumwa bw’amahoro muri Sudani y’Epfo bakorera mu murwa mukuru Juba mu mwaka wa 2017.

Nyuma yaho Pte Muhire ngo yaje no kwegera Caporal Dusabimana Jean Bosco, amwumvisha ko agomba gutoroka akamusanga, abifashijwemo n’umumotari witwa Nzafashwanimana Richard na we uri mu baburana.

Umushinjacyaha yakomeje avuga ko Pte Muhire yinjije n’abandi batabashije gufatwa barimo Pte Nshimiyimana Dan na Caporal Mudatenguha Phocas bakaba bakiri muri Uganda.

Pte Muhire Dieudonné ngo yoshyaga abantu kujya muri FLN ababwira ko bazajya bahabwa amafaranga menshi angana n’amadolari ya Amerika 5000 yo gusigira imiryango, ndetse ngo yari yarijejwe ko azahabwa ipeti rya Lieutenant muri FLN.

Amajwi yumviswe mu rukiko

Mu rukiko humviswe amajwi ya Pte Muhire arimo kuganira kuri telefoni na Caporal Dusabimana. Akaba ari amajwi Pte Muhire yoherereje Noble Marara mu kumwereka ko afatanyije na bo, undi ahita ayashyira kuri YouTube.

Muri ayo majwi, Pte Muhire abaza Caporal Dusabimana wari ukiri mu gisirikare, ati “Abo bahungu se mwiteguye kubakira gute baje muri Nyungwe?” arongera ati “Mugire muze muri izo ntambara mudashobora no kurwana mutazi n’aho zahereye.” Undi asa n’uvuga ko atazajyayo, avuga ko ari ugupfira ubusa.

Pte Muhire ngo yakomeje avuga ati “Njye ndahari umunsi uzumva ko ugiye kuza.” Amubwira ko nabona n’abandi benshi yazabazana “twihingire ibigori”, “abandi besurane turebe”.

Ayo majwi akomeza yumvikanisha Pte Muhire abaza Caporal Dusabimana ibirindiro by’abasirikare muri Rusizi, Karongi no ku ruganda rw’icyayi. Ibi ubushinjacyaha bukabifata nk’ibigamije kumenya aho ibirindiro by’ingabo biri mu rwego rwo kuzazigabaho ibitero.

Uburyo batangiye gufatwa

Umushinjacyaha avuga ko Caporal Dusabimana wari ukiri mu gisirikare mu Rwanda akimara gufatwa ngo byoroheye inzego z’iperereza gushakisha Muhire Dieudonné na Muhire Pacifique bafatanyaga bari muri Uganda.

Uyu Dusabimana amaze gutabwa muri yombi ngo yakomeje kuvugana na Pte Muhire atazi ko yafashwe, kugeza ubwo yaje kumufata ku mupaka w’u Rwanda ngo amutware muri iyo mitwe, niko gusanga abashinzwe umutekano w’u Rwanda bamutegereje. Hari tariki 06 Werurwe 2019.

Ubwo yajyaga ku mupaka ngo yajyanye n’umusivili witwa Muhire Pacifique wari umutwaye kuri moto, bombi barafashwe ubu na we azajya aza mu rukiko.

Muhire Pacifique avuga ko atigeze yinjira mu mitwe irwanya u Rwanda, ahubwo ngo bagiye gufata Dusabimana bumvikanye amashilingi ya Uganda imitwaro 35, akaba anasaba imbabazi.

Ibiregwa Caporal Kayiranga na Pte Igitego

Ubushinjacyaha buvuga ko ubwo Caporal Kayiranga Viateur na Pte Igitego Champagnat bari mu butumwa bw’amahoro muri Sudani y’Epfo, bavuganaga kenshi na Pte Muhire waje no kubongera ku rubuga rwa WhatsApp rwitwa Abataripfana.

Pte Muhire ngo yajyaga aboherereza amafoto y’abayobozi b’u Rwanda bashushanyijwe nk’inyamaswa mu rwego rwo kubangisha abantu.

Ku byaha Pte Igitego Champagnat aregwa, haniyongeraho n’ikijyanye n’amagambo agaragaza ingengabitekerezo ya Jenoside ndetse n’icyo gukora no gukoresha inyandiko mpimbano aho yafashwe yiyita Champagne.

Nzafashwanimana w’umumotari

Ubushinjacyaha buvuga ko Pte Igitego na Pte Muhire ngo bajyaga baganira Pte Muhire akabwira mugenzi we ati “Warakoze kubayoba, mba ngusengera, va ku barezi!"

Pte Muhire ngo yabazaga Pte Igitego igihe azamugeraho, akamurangira Nzafashwanimana Richard w’umumotari wakoreraga mu Karere ka Burera, Pte Igitego na we akamubwira ko amuzi, ati “ni ingurutsi, ni we ufasha abantu baciye isheni”.

Nzafashwanimana aregwa ibyaha by’ ubufatanyacyaha mu bugambanyi bwo kugirira nabi ubutegetsi buriho cyangwa kubuhirika hakoreshejwe intambara cyangwa izindi mbaraga, kuba icyitso mu gufasha kurema umutwe w’abagizi ba nabi no kugira uruhare mu bikorwa by’ishyirahamwe rikora iterabwoba.

Umushinjacyaha avuga ko Nzafashwanimana ari we wambukije Pte Muhire Dieudonné amukuye mu Karere ka Musanze akamugeza muri Uganda baciye mu nzira zitemewe, ndetse ngo yambukije n’abandi barimo Pte Nshimiyimana Dan na Caporal Mudatenguha Phocas.

Uwo mumotari anaregwa kuba yarambukije muri Uganda umugore n’abana ba Pte Muhire ndetse n’aba Mudatenguha na Nshimiyimana.

Uyu na we (Nsabimana Callixte) yarafashwe azanwa mu Rwanda, ubu afungiwe muri gereza iherereye mu Karere ka Nyanza.

Aba basirikare ba RDF biyongereye mu rubanza ruregwamo Maj(Rtd) Habib Mudathiru na bagenzi be 24 bafatiwe muri Repubulika Iharanira Demikarasi ya Congo mu mwaka ushize bakazanwa mu Rwanda, bashinjwa kuba mu mitwe irwanya u Rwanda(P5) irimo uwa RNC.

Amazina y’abo basirikare ba RDF ni Pte Muhire Dieudonné, Corporal Kayiranga Viateur, Corporal Dusabimana Jean Bosco, Pte Ruhinda Jean Bosco, Pte Igitego Champagnat, hamwe n’abasivili babiri ari bo Muhire Pacifique na Nzafashwanimana Richard.

Bararegwa ibyaha byo gutoroka igisirikare cy’u Rwanda(RDF), ubufatanyacyaha mu kugambirira guhirika ubutegetsi buriho hakoreshejwe intambara, kurema umutwe w’abagizi ba nabi no koshya abandi kuwujyamo, ndetse no kugira uruhare mu bikorwa by’ishyirahamwe rikora iterabwoba.

Baburanye uwitwa Ruhinda Jean Bosco adahari kuko ngo atarafatwa, yatorotse igisirikare cy’u Rwanda(RDF) mu mwaka wa 2014, ndetse akaba umwe mu batangiranye na RNC ashinzwe ibijyanye n’itumanaho muri P5.

Urukiko rwamenyesheje abahari barangajwe imbere na Pte Muhire Dieudonné ibyaha baregwa, bihera ku kugumura abandi babangisha igisirikare barimo n’Igihugu muri rusange, ndetse no gutoroka bagatangira gushakira abayoboke umutwe wa FLN ushinjwa kwica abaturage i Nyaruguru na Nyamagabe.

Ubushinjacyaha buvuga ko Pte Muhire na bagenzi be babanje kujya mu mutwe wa RNC mu mashyamba ya Congo ubwo bari bagitoroka igisirikare cy’u Rwanda.

Buvuga ko Pte Muhire yatorotse kasho ya gisirikare muri 2017 ajya muri Uganda, atangira gukorana n’abagize RNC ya Kayumba Nyamwasa na FDLR, bamufasha kujya muri RNC anyuze i Burundi.

Mu mashyamba ya Congo Muhire ngo yasanzeyo Pte Ruhinda Jean Bosco, ariko RNC barimo ngo iza gucikamo ibice, aza kuyivamo ajya muri FLN.

Mbere yo gutangira kumva ibyo baregwa, Pte Muhire Dieudonné yagaragarije Urukiko ko afunzwe mu buryo bunyuranyije n’amategeko, kuko afungiwe mu kigo cya gisirikare i Kanombe, nyamara ngo yagombye kuba ari muri gereza ya gisirikare ku Mulindi.

Urukiko rwamugiriye inama yo kubitangira ikirego kugira ngo ruzasuzume niba rufite ububasha bwo kukiburanisha ku rwego rw’ibanze.

Uru rubanza rwaje gusubikwa abaregwa bose bamaze kumva ibyo bashinjwa rukazasubukurwa tariki 20-25 Nyakanga 2020.

N’ubwo uru rubanza rwatangiye kuburanishwa mu mizi kuri uyu wa mbere, hiyongereyemo abasirikare batanu bo mu Ngabo z’u Rwanda ndetse n’abasivili babiri.

Aba ni Pte Muhire Dieudonné, Corporal Kayiranga Viateur, Corporal Dusabimana Jean Bosco, Pte Ruhinda Jean Bosco, Pte Igitego Champagnat, hamwe n’abasivili ari bo Muhire Pacifique na Nzafashwanimana Richard.

Bararegwa ibyaha byo gutoroka igisirikare, ubufatanyacyaha mu gushaka guhirika ubutegetsi no koshya abandi kujya mu mutwe w’abagizi ba nabi.

Abari basanzwe baburana bararegwa ibyaha byo kwinjira mu mutwe w’ingabo utemewe, kugambirira kugirira nabi ubutegetsi buriho, kugirana umubano na Leta y’amahanga bigiriwe gushoza intambara, kurema umutwe w’abagizi ba nabi, ndetse no gucura umugambi wo gukora icyaha cy’iterabwoba.

Maj Mudathiru hamwe n’abandi 24 bafashwe n’ingabo za Congo (FARDC) mu mwaka ushize wa 2019, bakaba barashyikirijwe u Rwanda ku itariki 18 Kamena muri uwo mwaka.

Urubanza ruregwamo Maj Habib Mudathiru wayoboraga umutwe w’Ihuriro ry’amashyaka arwanya u Rwanda (P5) hamwe na bagenzi be 24, ndetse n’abasirikare bari basanzwe mu ngabo z’u Rwanda(RDF), rwatangiye kuburanishwa mu mizi kuri uyu wa mbere. Ubushinjacyaha bwagaragarije abagize P5 uburyo bari biteguye gutera u Rwanda. Kanda HANO usome inkuru yose.

Major(Rtd) Mudathiru yayoboraga ibikorwa n’imyitozo mu Gisirikare cy’ihuriro ry’amashyaka atanu ari yo Amahoro People’s Congress, Forces Démocratiques Unifieés – Inkingi (FDU-Inkingi), People’s Defence Pact-Imanzi (PDP-Imanzi), Rwanda National Congress (RNC) na PS Imberakuri.

Ubushinjacyaha buvuga ko iki gisirikare cya bose ngo gikuriwe na Kayumba Nyamwasa ushinjwa ibikorwa bitandukanye by’iterabwoba no guhungabanya umutekano w’u Rwanda.

Maj Mudathiru na bagenzi be baregwa ibyaha byo kwinjira mu mutwe w’ingabo utemewe, kugambirira kugirira nabi ubutegetsi buriho, kugirana umubano na Leta y’amahanga bigiriwe gushoza intambara, kurema umutwe w’abagizi ba nabi, ndetse no gucura umugambi wo gukora icyaha cy’iterabwoba.

Maj Mudathiru wigeze kuba mu gisirikare cy’u Rwanda yavuye mu gihugu yerekeza muri Uganda mu mwaka wa 2013, ajya kuba mu nkambi y’impunzi y’ahitwa Arua, akaba ari na ho ngo yahagurutse mu 2017 yerekeza i Mulenge muri Congo gutegura ibitero byo kurwanya u Rwanda.

Ntabwo ariko byaje kubahira (nk’uko Urukiko rwatangiye rubasomera imiterere y’urubanza) kuko we (Maj Mudathiru) hamwe n’abandi 24 baje gufatwa n’ingabo za Congo(FARDC), zibashyikiriza u Rwanda ku itariki 18 Kamena 2019, zibakuye muri P5, FDLR, RUD Urunana ndetse na FLN.

Urubanza ku ifungwa n’ifungurwa ry’agateganyo rwatangiye ruburanisha abo 25 barimo Abanyarwanda n’abanyamahanga, rwiyongereyemo abasirikare batanu bo mu Ngabo z’u Rwanda ndetse n’abasivili babiri.

Hari Pte Muhire Dieudonné, Corporal Kayiranga Viateur, Corporal Dusabimana Jean Bosco, Pte Ruhinda Jean Bosco, Pte Igitego Champagnat n’abasivili Muhire Pacifique na Nzafashwanimana Richard.

Bararegwa ibyaha byo gutoroka igisirikare, ubufatanyacyaha mu gushaka guhirika ubutegetsi no koshya abandi kujya mu mutwe w’abagizi ba nabi.

Ubushinjacyaha buvuga ko imitwe aba barwanyi bose babarizwagamo ngo yakoreraga muri Congo(RDC) ibifashijwemo n’ibihugu by’abaturanyi, cyane cyane Uganda n’u Burundi.

Ubushinjacyaha buvuga ko Maj Mudathiru yavuye mu Rwanda ku itariki 01/01/2013, aba muri Uganda yitwa impunzi, nyuma yaho Maj Higiro Robert, Capt Apollo Rubagumya (na we wahoze muri RDF), ndetse na Ntwali Frank (Muramu wa Kayumba Nyamwasa), bamwinjije muri RNC.

Maj Mudathiru ngo waje no kubyemererwa na Ben Rutabana, yahuriye mu nkambi ya Arua n’uwitwa Rtd Cpt Sibo, babwirwa ko igisirikare gishya bagiye kurema ngo kizakorera muri Congo muri Kivu y’Amajyepfo ahitwa Bijabo.

Ubushinjacyaha bwabwiye urukiko ko aba bagabo baje kuva mu nkambi ya Arua bagendeye ku byangombwa by’ibihimbano, baherekezwa na bamwe mu bagize igisirikare cya Uganda(CMI), banyura muri Tanzania n’i Burundi.

Abaregwa bakomeje basomerwa imiterere y’ibyaha, aho ngo bageze i Burundi bakakirirwa muri Transit Hotel i Bujumbura, kuko Kayumba Nyamwasa ngo yari yabateguriye inzira neza, amafaranga y’urugendo n’ibikoresho by’intambara bihari.

Muri iyo Hotel ngo bahahuriye n’uwitwa Col Sibomana, abahamagarira Colonel Nyamusaraba w’Umunyamulenge wayoboraga umutwe witwa Gumino bagombaga kujya bitorezamo mbere yo kujya mu birindiro.

Baje kujya muri Congo bahawe imbunda zo.ku bwoko bwa SMG 13, LMG ebyiri na NMG(machine gun) imwe, hamwe n’amasasu ibisanduku bine bya SMG, shene eshatu z’amasasu ya NMG, bajyana n’imodoka ebyiri hamwe n’abagabo barindwi baturutse muri FDU Inkingi, ari bo Schadrack, Venuste, Kayibanda, Naphtal, Nshimiyimana, Aimé na Panphille.

Bageze mu Bijabo ngo Rtd Sibo yahise aba umuyobozi, Mudathiru aramwungiriza, ashingwa imyitozo, ariko Kayumba Nyamwasa ngo yaje gufasha Gumino guhuzwa na P5, Colonel Nyamusaraba aba umuyobozi mukuru, yungirizwa na Sibo, Mudathiru ashingwa ibikorwa, Semahurungure ashingwa imyitozo, Richard ashingwa ibikoresho.

Ubushinjacyaha buvuga ko mu kwezi kwa Mutarama 2019, Kayumba Nyamwasa yahamagaye Sibo, Mudathiru n’uwitwa Richard, abaha gahunda yo kuva muri Kivu y’Amajyepfo bakerekeza muri Kivu y’Amajyaruguru, kugira ngo begere umupaka wa Uganda kandi hafi y’u Rwanda.

Ibi byakozwe "kugira ngo batangire bya bikorwa by’iterabwoba bari hafi y’u Rwanda ndetse na Uganda ikabona uburyo bwo kubaha ubufasha buhagije.”

Ubwo Kayumba ngo yaje kubabaza ibikenewe, anaboherereza amadolari ya Amerika ibihumbi 12 anyujijwe kuri Western Union, abamenyesha ko yoherejwe na Ben Rutabana.

Ubushinjacyaha buvuga ko baje guhurira na Rutabana muri Kivu y’Amajyaruguru bageze ahitwa Kalehe, bakirwa n’ingabo za MRCD zitwa FLN ziyobowe na Gen Wilson Irategeka, ngo baraganira ababwira ko bo batangiye akazi, ibikorwa byahereye muri Nyungwe.

Maj Mudathiru n’abo bari kumwe ngo bakomereje i Masisi, baza kugwa mu birindiro bya FARDC bamwe bararaswa, abandi bafatwa mpiri.

Umushinjacyaha ati “Ni muri urwo rwego bafashwe bari kwegera hafi y’u Rwanda na Uganda kuko bari bijejwe ubufasha.” Icyo gihe barashwe na FARDC bamwe barafatwa, abandi bagenda bafatwa na MONUSCO, banashyikirizwa u Rwanda.

Mu rubanza Mudathiru na bagenzi be baburana bemera icyaha cyo kujya mu mutwe w’ingabo utemewe, ariko ngo ntabwo bari bazi ko ari wo bagiyemo.

Urubanza rurakomereza mu Rukiko rwa Gisirikare i Kanombe kuri uyu wa kabiri tariki 23 Kamena 2020 guhera saa mbili za mu gitondo.

Ni urubanza ku ifungwa n’ifungurwa ry’agateganyo, ruregwamo Maj (Rtd) Habib Mudathiru na bagenzi be 24, rukaba ari uko rukijijwe, kuri uyu wa 28 Ukwakira 2018.

Urukiko rwatangiye rwibutsa ibyaha bose uko ari 25 baregwa ari byo kwinjira mu mitwe y’ingabo itemewe, kugirana umubano n’ibindi bihugu hagamijwe gushoza intambara, kurema umutwe w’abagizi ba nabi no kugirira nabi ubutegetsi buriho.

Urukiko kandi rwibukije inzira bose banyuzemo kugira ngo bagere muri iyo mitwe y’abarwanyi yibumbiye mu cyitwa P5, ndetse runavuga uko bose bisobanuye, aho ahanini bavuze ko bajyanywe bazi ko bagiye guhabwa akazi kazabahemba neza.

Nyuma y’isomwa ry’icyemezo cy’urukiko, Maj (Rtd) Mudathiru, wemeye ibyaha byose kuva urubanza rugitangira ndetse anabisabira imbabazi, yasabye ijambo maze urukiko rurarimuha, agira ati "Ntacyo mfite navuga ku cyemezo cy’urukiko kuko ibyaha twarabikoze tugomba guhanwa".

Ati " Gusa ndashimira Leta y’u Rwanda kuko uburyo dufunzwemo ari ubwa kimuntu, nta totezwa dukorerwa muri make dufashwe neza".

Maj (Rtd) Mudathiru ashima uko bitaweho mu Rwanda

Mudathiru urwaye ukuguru abashinzwe umutekano banagira uruhare mu kumwitaho kugira ngo abashe kugera ahabera urubanza

Reba Video igaragaza uko urubanza rwagenze

Ni urubanza rutatwaye umwanya munini, aho abaregwa baburanye ku ifungwa n’ifungurwa ry’agateganyo.

Barimo uwitwa Mudathiru Habib wasezerewe mu ngabo muri 2013 afite ipeti rya Majoro, Desideriyo Fred wo muri Uganda, Ndirahiye Jean de Dieu wo mu Burundi na Bihoyiki Diogene.

Maitre Rwagasore Jean Claude wunganira babiri muri aba mu mategeko yasabye ko bafungurwa by’agateganyo, mu gihe hataboneka impamvu yumvikana yatuma bakomeza gufungwa.

Yavuze ko gufungura abaregwa byatanga ubutumwa bwiza bw’uko mu Rwanda batagamije gufunga abantu, anavuga ko byatuma n’abakiri mu mashyamba bayavamo bagataha mu Rwanda.

Mudathiru wasezerewe mu ngabo yasabye urukiko ko yakwemererwa gukurikiranwa ari hanze kuko afite aho abarizwa hazwi, byongeye akaba arwaye ku kaguru ku buryo atabasha kugira aho ajya kuko n’aho agiye hose bisaba guterurwa.

Umurundi Ndirahiye Jean de Dieu yasabye ko urukiko rwamurekura, anasaba Leta y’u Rwanda kumuha ubuhungiro kuko atizeye kubonera umutekano mu Burundi bitewe n’uko mu bamushutse ngo ajye muri RNC harimo na bene wabo bashobora kumugirira nabi.

Umugande Desideriyo Fred na we yasabye urukiko ko yakwemererwa kuburana ari hanze nk’abandi.

Maitre Rwagasore yasabye ko bishobotse abakiliya be babiri banyuzwa mu kigo cya Mutobo bagasubizwa mu buzima busanzwe, nk’uko byakozwe ku bandi bagiye bafatwa no ku batahutse bavuye mu mitwe ya gisirikare irwanya Leta y’u Rwanda.

Iki cyifuzo kandi cyanatanzwe n’abandi bunganizi mu iburanishwa ryabaye ku wa mbere tariki 21 Ukwakira 2019.

Urukiko ruyobowe na Lt Col Charles Madudu rumaze kumva ibyo abaregwa barusaba runashingiye ku cyifuzo cy’ubushinjacyaha bwa gisirikare, rwemeje ko umwanzuro ku ifungwa n’ifungurwa ry’abaregwa gukorana na RNC uzasomwa ku itariki 28 Ukwakira 2019.

Abaregwa muri urwo rubanza bakomereje aho bari bageze ubushize bisobanura ku kwemera no kutemera icyaha.

Abaregwa bari bambaye umwenda ukeye ugenewe imfungwa bambaye n’inkweto zenda gusa kandi bigaragara ko ari nshyashya.

Ibirego bose baregwa ni bine ari byo kujya mu mutwe w’ingabo, kugirana umubano n’ibindi bihugu bagambiriye gushoza intambara, ubugambanyi, no kurema umutwe w’abagizi ba nabi.

Kuri uyu munsi uwabimburiye abandi mu kuburana ni ildephonse Mbarushimana. Yavuze ko yemera icyaha cyo kujya mu mutwe w’ingabo no no kurema umutwe w’abagizi ba nabi, ibindi byose arabihakana.

Ildephonse Mbarushimana yavuze ko yinjiye muri uwo mutwe atabizi kuko ubwo yahuraga n’umuntu witwa Mandela ngo yari yabemereye kubona akazi muri Repubulika iharanira Demokarasi ya Congo.

Ngo bafashe urugendo rw’icyumweru kugira ngo bagere muri Congo bavuye mu Burundi.

Mbarushimana ati: "Ngezeyo saa yine z’ijoro nisanze ndi mu bindi bya gisirikare ariko ntabwo ari byo nari ngambiriye. Gusa ndabisabira imbabazi."

Uwunganira Mbarushimana yavuze ko umukiriya we ari umusore bigaragara ko yashakaga akazi kugira ngo abeho, amusabira ko yarekurwa by’agateganyo.

Uwa kabiri wireguye ni Gashumba André ukuze usa n’uri mu kigero cy’imyaka 50 y’amavuko.

Ngo Abarundi bamubwiye ko agiye gukora akazi k’ubucukuzi muri Congo. Nga baciye muri Uganda na Tanzania barara muri hoteli ngo baza guhabwa imyenda yabugenewe, barabatwara mu ijoro baciye mu mazi, bagezeyo batungurwa n’uko abo bahasanze babahaye ibikoresho bya gisirikare, nuko batangira kwitoza igisirikare.

Uwa gatatu wisobanuye ni Jackson Habarurema uri munsi y’imyaka 30. Avuga ko yemerewe akazi ko mu rugo n’umugore, ariko bageze muri Congo baramubwira ngo baragatanze. Yemera kuhaguma akora akazi gasanzwe ariko ngo yagerageje gutoroka biranga, aza guhamagara bamwe mu bantu yamenye aho muri Congo, aho kumufasha gutoroka, ahubwo bamusubiza muri uwo mutwe.

Icyaha cy’ubugambanyi aracyemera ariko ngo yabitewe n’uko yari afite ingufu nke, ababimushoyemo bakaba baramurushije ingufu.

Icyaha cyo kugirana umubano n’ibindi bihugu bagambiriye gushoza intambara aragihakana, icyaha cyo kurema umutwe ngo ntabwo abizi neza ariko yabigizemo uruhare.

Uwa kane uburana ni Lambert Ndibanje uri munsi y’imyaka 30 y’amavuko.

Avuga ko yaje kwinjira muri uwo mutwe avuye muri Malawi aho yabanaga n’ababyeyi be yiga mu mwaka wa kabiri w’amashuri yisumbuye. Ngo uwitwa Rashid yamubwiye ko agomba kuza akamurangira akazi ko mu bworozi bw’inka gahemba amadolari ya Amerika 300 ku kwezi kamara amezi atatu, ngo ariko amusaba kubigira ibanga niba ashaka kugeraho. Ngo yasabwe kudasezera ababyeyi n’inshuti, arabyubahiriza.

Ubwo ngo muri 2017 ahagana mu minsi ya Noheli hari ubushomeri ni yo mpamvu yemeye ako kazi.

Ati “Baduhaye imyenda yo kwambara kugira ngo tudasezera abandi bantu. Njye nasanzeyo abandi 5 bavuye mu nkambi y’impunzi ubwo tuba batandatu, dufata bisi kuva Lilongwe duca muri Tanzania ariko umunsi ukurikira tugeze muri Congo nahawe indangamuntu yanditseho "Silvestre Banje" na nasabwa kuvuga ko ngiye gutabara."

Ngo bagezeyo bakiriwe n’Abarundi, yumva bavuga ngo "Twazanye imineke 6 ariko ine irahiye indi 2 ntabwo irashya"

Bashyizwe mu gipangu aho basanzeyo abandi 18, babatangiza imyitozo ya gisirikare.

Ndibanje avugira imbere y’urukiko, yakoreshaga amagambo byumvikana ko ari ay’igisirikare, urugero nka ambushi ya aduyi, twaratawanyitse baduteye,…bigaragaza ko yari yarinjiye mu mutwe wa wa gisirikare nk’uko na we abyiyemerera.

Icyakora ngo baguye mu gico (ambush) cy’ababateze inshuro ebyiri muri Masisi muri Congo, atandukana n’uwari umukuriye (Afande) witwa Ali ahitamo kubivamo kuko ngo atabashaga kugenda n’amaguru kubera umunaniro n’inzara.

Uwamushutse witwa Habib ngo yamubwiraga ko muri Congo ari mu ijuru, ariko nyamara asanga ibyo bamwizezaga ari ibinyoma. Ngo ibyo bikorwa ntacyo byamumariye kuko ntacyo yagezeho, akaba abisabira imbabazi.

Icyaha cyo gukorana n’ibindi bihugu aragihakana akavuga ko atari we wahisemo kuva iwabo ngo yisange mu bindi bihugu kuko baramushutse.

Ndirahiye Jean de Dieu (Umurundi) we ngo yakoraga akazi mu isoko i Burundi. Avuga ko yijejwe guhabwa akazi ko gukora mu iduka. Ahura na Rashid amujyana mu gipangu ahasanga abandi basore bose hamwe baba 18.

Ngo muri icyo gipangu harimo abasirikare b’Abarundi barimo Ali, Richard na Musa. Batangiye imyitozo ya gisirikare ngo agira ubwoba aratoroka ariko ngo abasirikare ba Mayi-Mayi baramufata baramukubita banamusubizayo.

Ndirahiye avuga ko icyaha yemera ari kimwe gusa cyo kujya mu mutwe wa gisirikare.

Undi w’Umuganda witwa Fred Desideriyo ufite imyaka ibarirwa muri 23 ngo we yaje kwisanga muri RNC bitewe n’umumotari witwa Herbert wamubeshye ko agiye kumuhesha akazi ko gucuruza amandazi. Ngo ariko bihura n’uko nyina wa Fred yari arwaye, ubwo Herbert amushukisha ibihumbi 10 by’amagande yohereje mu rugo, bamuha n’andi ibihumbi 50 y’amagande akoresha mu rugendo yambuka agana i Burundi.

Ngo bamufatiye ku mupaka wa Uganda kubera ko ari umwana, ariko atanga ruswa y’ibihumbi 30 by’Amashilingi ya Uganda. Ageze ku mupaka w’u Burundi yongeye gutanga andi ibihumbi icumi, agerayo atyo yinjira mu mutwe wa RNC.

Umunyamategeko Rwagasore ubunganira avuga ko aba banyamahanga nta mutima mubi nta n’umugambi mubi bari bafitiye u Rwanda ahubwo ngo barashutswe. Ngo ntibigeze banarema imitwe ya gisirikare, ahubwo bisanzemo kubera ibibazo no kubabeshya.

Abarundi bari muri uru rubanza bane, n’Abanya-Uganda batatu bavuga ko bagiye muri uyu mutwe wa RNC batazi ibyo ari byo. Banasaba Leta y’u Rwanda imbabazi, bakavuga ko Leta y’u Rwanda ikwiye gukurikirana abo bayobozi baremye iyo mitwe n’iyo migambi yo gushoza intambara mu Rwanda.

Ubushinjacyaha bwa gisirikare buravuga ko bose baba Abanyarwanda cyangwa Abanyamahanga bagomba kuryozwa kimwe kuko bari mu bikorwa bitemewe.

Muri rusange, benshi mu bamaze kuburana bashinjwa gukorana na RNC ngo babaga bababeshye akazi karuta ako bakoraga cyangwa bakabizeza kuva mu bushomeri, ariko bakisanga mu bikorwa bya gisirikare.

Icyakora bamwe ngo baratoroka kuko babazana muri ibyo bikorwa bya gisirikare batababwije ukuri.

Abunganira abaregwa nka Me. Dativa Mujawamariya baravuga ko icyaha cyo kujya mu mutwe wa gisirikare kigomba gushakirwa mu bushake baba baragize.

Ngo ibindi byaha ntabwo bifata abaregwa usibye icyo kwinjira mu mutwe wa gisirikare. Ngo ahubwo bakeneye ubutabera no kurenganurwa n’amategeko kuko ngo bakorewe ihohoterwa kandi bakeneye umutekano.

Nyuma yo kumva ibyo bisobanuro, urukiko rwafashe akaruhuko k’isaha imwe, nyuma rwumva impande zombi abaregwa n’ Ubushinjacyaha ku cyifuzo cyo gufungwa cyangwa kurekurwa by’agateganyo. Kubera ko batatu mu bunganira abaregwa batabonetse mu rubanza, urubanza rurakomeza kuri uyu wa kabiri saa munani haburana abasigaye bane.

Ibyo byavugiwe mu rukiko rwa gisirikare ruri i Nyamirambo kuri uyu wa 18 Ukwakira 2019, ubwo urubanza rwabo rwasubukurwaga, rukaba rwari rwasubitswe ubushize kuko hari havutse inzitizi ivuga ko urwo rukiko rutemerewe kuburanisha abasivili, ariko iyo nzitizi iza guteshwa agaciro, ari yo mpamvu urubanza ari ho rwakomereje.

Maj (Rtd) Habib Mudathiru (wicaye imbere) yemeye ibyaha aregwa

Ibyaha abo 25 baregwa ni bine ari byo, kwinjira mu mitwe y’ingabo itemewe, kugirana umubano n’ibindi bihugu hagamijwe gushoza intambara, kurema umutwe w’abagizi ba nabi no kugirira nabi ubutegetsi buriho, nk’uko ubushinjacyaha bwabyibukije mu rukiko.

Hakurikiyeho kwisobanura kuri buri wese, urukiko rukaba rwahereye kuri Maj (Rtd) Mudathiru.

Mu kwisobanura kwa Maj (Rtd) Mudathiru, yongeye kwemera ibyaha byose uko ari bine, gusa kuri buri cyaha akaba yagiye avuga ko hari ibyo ubugenzacyaha butasobanuye neza, ariko biza gusobanurwa.

Urugero ni aho ku cyaha cyo kurema umutwe w’abagizi ba nabi ugamije gutera u Rwanda, uregwa yasobanuye ko yemera kurema uwo mutwe ariko ko atigeze avuga ko wari uwo gutera u Rwanda nubwo ngo byashoboraga kuzabaho.

Uwunganira Maj (Rtd) Mudathiru, Me Umulisa Paola, yavuze ko ibyo umukiriya we yavuze yemera ibyaha na we batanyuranya, hanyuma asaba urukiko ko urubanza rwakwihutishwa.

Maj (Rtd) Mudathiru yaje gusubizwa ijambo, avuga ko ibyo ubushinjacyaha bwasobanuye ku byo aregwa muri rusange ari byo, ko abyemera ndetse anabisabira imbabazi.

Urubanza rw’abo 25 bakekwaho gukorana na RNC, rukaba rukiburanishwa ku ifungwa n’ifungurwa ry’agateganyo.

Urubanza rwatangiye harebwa niba abaregwa bose bafite ababunganira. Urukiko rwasanze hari abatabafite kuko hari abunganizi babiri batabonetse, umwe muri bo akaba nta n’impamvu yatanze.

Urukiko rwabajije ubushinjacyaha niba bubona urubanza rwakomeza, maze buvuga ko bwumva rwasubikwa.

Urukiko rwahise rubaza abunganizi mu by’amategeko uko babyumva, benshi muri bo basaba ko rwaburanishwa kuko abaregwa benshi bafite abunganizi.

Imbogamizi abunganira abaregwa batanze ntizahawe agaciro

Urukiko rwemeye ko urubanza rukomeza, icyakora bamwe mu bunganizi batanga inzitizi ivuga ko abaregwa bose ari abasivili bityo ko urukiko rwa gisirikare atari rwo rugomba kubaburanisha.

Urukiko rwabajije ubushinjacyaha icyo rubivugaho, buvuga ko hari urundi rubanza ruregwamo abandi bantu bafite ibyaha bimwe kandi rurimo abasirikare, aho batanze urugero ku witwa Private Muhire Dieudonné, bityo ko zombi zahuzwa, hanyuma urubanza rukaburanishwa.

Abunganizi mu by’amategeko basobanuye ko guhuza imanza zombi bitashoboka bashingiye ku ngingo ya 99, ivuga ku bubasha bw’inkiko, ngo izo manza zombi ntabwo zihuje kamere, cyane ko rumwe rwatangiye kuburanishwa mu mizi (ururimo Private Muhire Dieudonné) mu gihe urw’aba 25 rukiri mu iburanisha ku ifungwa n’ifungurwa.

Abaregwa bazakomeza kuburanira mu rukiko rwa gisirikare

Maj (Rtd) Habib Mudathiru wo mu baregwa, na we yagaragarije urukiko ko atumva impamvu y’ihuzwa ry’imanza zombi kuko we n’abo bareganwa ngo bafite ibyaha byabo bemera ari na byo bazaburana.

Kuri icyo kibazo urukiko rwavuze ko rugiye kwiherera ngo rusuzume niba koko nta bubasha rufite bwo kuburanisha urwo rubanza, rukaza kugitangaho umwanzuro saa munani (14:00).

Urukiko rwanzuye ko urwo rubanza rukomeza kuburanishirizwa mu rukiko rwa gisirikare

Nyuma y’uko kwiherera, urukiko rwa gisirikare rwasuzumye iby’iburabubasha mu iburanisha ry’urubanza rwa Maj Mudathiru na bagenzi be, rusanga rufite ububasha bwo kuburanisha urwo rubanza, bityo inzitizi yari yatanzwe y’uko abasivili bataburanira mu rukiko rwa gisirikare iba iteshejwe agaciro.

Icyo cyemezo urukiko rugifashe rushingiye ku ngingo ya ya 94 yo mu itegeko numero 30/2018 rigena ububasha bw’inkiko.

Rushingiye kandi ku ngingo ya 99 y’iryo tegeko ivuga ku manza zisobekeranye, aha rukemeza ko urubanza rwa Maj (Rtd) Mudathiru na bagenzi be n’urwa Private Muhire Dieudonné zifite aho zihuriye, kuko muri izo manza zombi bafite aho bahuriye na RNC ndetse n’ihuriro ry’imitwe yishyize hamwe irwanya u Rwanda yiyise P5.

Urubanza rwahise rwimurirwa ku itariki ya 18 Ukwakira 2019, ku rukiko rwa gisirikare na none i Nyamirambo.

Nyuma y’iburanisha abaregwa bashyira umukono ku myanzuro y’urukiko

Reba Video igaragaza uko urubanza rwabo rwagenze

Ibazwa ryahereye kuri Maj (Rtd) Habib, avuga ko atashobora kwiburanira, ko akeneye umwunganizi mu mategeko.

Abandi na bo ni ko byagenze, bavuze ko bakeneye ababunganira kuko ngo iby’amategeko batabisobanukiwe.

Urukiko rwahise rubaza ubushinjacyaha icyo bubitekerezaho, maze buvuga ko abaregwa bafite uburenganzira busesuye bwo kubona ababunganira.

Urukiko rwasobanuriye abaregwa ko ufite amafaranga yahita yishakira umwunganizi, udafite ubushobozi akandikira urugaga rw’abavoka mu Rwanda rukabashakira abunganizi.

Urubanza ruhise rusubikwa rukazasubukurwa ku wa mbere tariki 14 Ukwakira 2019.

Rwari urubanza rwo kuburana ifungwa n’ifungurwa ry’agateganyo.

Aba bose uko ari 25 bageze ku rukiko barinzwe bikomeye, baherekejwe n’abasirikare bashinzwe imyitwarire mu gisirikare (Military Police).

Urukiko rwabanje gusuzuma imyirondoro yabo umwe kuri umwe.

Abenshi muri aba bavuga ko babaga muri Uganda no mu Burundi, mbere y’uko bajya gukorana na RNC na FDLR. Bafatiwe muri RDC, aho bari mu myitozo, bafatirwa mu mikwabu ya gisirikare, nyuma bashyikirizwa Leta y’u Rwanda.

Muri aba 25, harimo umugande witwa Lubwama Sulaiman. Yavuze ko yari umushoferi, akaba afite abana batandatu.

Umutekano wari wakajijwe

Nyuma y’uko bose uko ari 25 basomewe imyirondoro yabo, umwanditsi w’urukiko rwa Gisirikare abasomeye ibyo baregwa, birimo: Kwinjira mu mitwe y’ingabo itemewe, Kugirana umubano n’ibindi bihugu, hagamijwe gushoza intambara, Kurema umutwe w’abagizi ba nabi, Kugirira nabi ubutegetsi buriho.

Benshi mu baregwa ni Abanyarwanda babaga i Burundi na Uganda, bakaba baroherezwaga muri RDC, muri Kivu y’Amajyepfo babifashijwemo n’ingabo za Leta y’u Burundi, bakakirwa na Maj. (Rtd) Habib Mudathir (izina yiyongereyeho agezeyo) kuko we yagiye mbere.

Bageyo ngo babwirwaga ko bagiye gukora igisirikare cya P5 (Imitwe yishyize hamwe irwanya Leta y’u Rwanda ikuriwe na Kayumba Nyamwasa).

Ubushinjacyaha bwavuze ko bakoraga imyitozo ya gisitikare mu gihe cy’amezi atatu, bagahabwa ibikoresho ubundi bakabwirwa kujya muri Kivu y’Amajyaruguru, ahegereye igihugu cya Uganda kuko bari bizeye inkunga ifatika ya Leta y’icyo gihugu nk’uko babyivugiye mu ibazwa ryabo mu bugenzacyaha.

Bose bahuriza ku kuba muri urwo rugendo bava muri Kivu y’Amajyepfo bajya muri Kivu Y’Amajyaruguru, ngo bageze mu misozi ya Masisi bagwa mu gico (amboush), baraswa cyane n’ingabo za RDC, abafashwe ari na bo barimo ababuranaga ngo bahise bohererezwa u Rwanda, na bo bibonye bageze mu Rwanda.

I Burundi ngo bacumbikirwaga muri ’Transit Hotel’ bose, mbere yo koherezwa muri RDC.

Nyuma yo gusomera buri wese ibyo yavuze mu bugenzacyaha, urukiko rusubitse urubanza kubera igihe, rukaba ruzasubukurwa ejo ku wa kane tariki 3 Ukwakira 2019 saa tatu za mu gitondo.

Mu baregwa uko ari 25, 18 bagiye muri iyo mitwe baturutse i Burundi, umunani baturutse muri Uganda, babiri baturutse muri Kenya naho umwe yavuye muri Malawi.

Muri abo 25 kandi harimo Abagande batatu, Abarundi bane, abandi bose ni Abanyarwanda.