Umurenge SACCO wa Jabana mu yagize ikibazo cyamaganwe mu nama y’Umushyikirano, cyo kutavangura amafaranga yawo n’aya VUP

Muri iyo nama yashojwe kuri uyu wa gatanu, Perezida wa Repubulika, Paul Kagame yemeranyijwe n’abagize Guverinoma ko abatishoboye bagomba guhabwa amafaranga ya VUP yabagenewe nta mananiza bashyizweho.

Kuva mu mwaka wa 2010 imirenge SACCO yahawe inshingano yo kunyuzwamo amafaranga yagenewe abatishoboye kugira ngo bibakure mu bukene, muri gahunda yiswe “Vision Umurenge Program(VUP).

Mu nama y’Umushyikirano wa 2018, inzego zitandukanye zitanye ba mwana kuri ayo mafaranga imirenge SACCO yatangaga ku baturage iyacuruje ku nyungu ingana na 2% buri kwezi.

Guverinoma yemereye Perezida wa Repubulika ko habayeho kurangarana abo baturage bagombaga kujya bishyura ayo mafaranga ariyongera ajya kuri 11% buri mwaka.

Ministiri w’Intebe, Dr Edward Ngirente yagize ati:”Byahinduye isura aho amafaranga yari agenewe gufasha abakene yagiye gucuruzwa muri banki, ni aho habereye amakosa ariko turi hafi gukosora”.

Mu ngaruka z’uku guhenda kw’inguzanyo za VUP Umushyikirano wagaragaje, harimo ko abaturage bamwe bayahawe ngo bananiwe kuyishyura, abandi bemera kubana n’ubukene kuko batinye kuyisaba.

Bamwe mu batuye umurenge wa Jabana mu karere ka Gasabo baganiriye na Kigali today bavuga ko uretse iyo nguzanyo ihenze kwishyura, hari n’andi mafaranga yitwa imifuragiro arenga ku nyungu bazishyura.

Guverinoma yemereye amakosa imbere ya Perezida Kagame yiyemeza no kuyakosora byihuse

Umuhinzi w’umuceri mu gishanga cya Jabana agira ati:”Mu kwezi gushize twagiye turi itsinda gusaba inguzanyo y’amafaranga ibihumbi 510, ariko baduhaye 490, nyamara tuzishyura ayo ibihumbi 510 turengejeho inyungu ingana na 18%”.

“Impamvu bataduhaye amafaranga yuzuye ibihumbi 510, ngo bagomba kubanza gukuraho ay’agafuragiro, aya serivisi, ayo gusura ingwate ndetse no gukora umushinga”.

Umucungamutungo w’Umurenge SACCO wa Jabana, Alice Singanire yemera ko ubuyobozi bw’akarere ka Gasabo bwabahaye amafaranga arenga miliyoni 45 mu mwaka ushize, ariko ko barimo kuyatanga ku nyungu ya 11% aho kuba 18%.

Avuga ko abacibwa inyungu ya 18% ari abandi banyamuryango ubusanzwe bakwa inyungu ya 24%, ariko ko bayigabanije kugira ngo bagire umwete wo kubitsa muri icyo kigo cy’imari cyigeze guhombywa n’abagikoragamo arenga miliyoni 300.

SACCO ya Jabana nayo ishimangira ko mu gutanga inguzanyo ku baje bayisaba, itavanguraga amafaranga yayo bwite n’ayagenewe abafashwa na VUP.

Perezida Kagame avuga ko abayobozi bakoze amakosa muri VUP bagomba guhanwa byihuse kandi bikamenyekana

Mu gusoza umushyikirano wa 2018, Perezida wa Repubulika, Paul Kagame yatangaje ko abayobozi batumye amafaranga ya VUP acuruzwa na za SACCO bagomba kubihanirwa.

Agira ati:”Amafaranga yahindutse aya SACCO nyamara ari aya VUP, ntabwo bigera aho ngo umuntu abihindure ibye, ibi ni programu z’igihugu ntabwo ari iz’umuntu ku giti cye”.

“Iyo ubihinduye ibyawe utavuganye n’abandi wirengera ingaruka, umuntu aba akwiye kubibazwa, abo bayobozi baba aba mbere mu kwangiza gahunda ziriho za Leta, ni bo dukwiye guheraho, tubikore vuba na bwangu!”

Perezida Kagame asaba ko mu bagomba gukurikiranwa byihuse harimo abayobozi basabye inguzanyo ya VUP mu mirenge SACCO bakaba batarayishyuye.

Perezida Kagame yahaye umwanya munini abanyamakuru nyuma y’umushyikirano

Perezida kagame yasubizaga abajya bavuga ko u Rwanda n’u Burundi bagiye mu muryango w’ibihugu by’Afurika y’Uburasirazuba (EAC) bititeguye, avuga ko u Rwanda rwagiyemo kuko rwumvaga hari uruhare rwagira mu iterambere ry’akarere, kandi biri mu bushake ndetse n’uburenganzira bwarwo.

Yagize ati “Ntabwo ubwo twajyaga mu muryango w’ubumwe bw’Afurika twigeze dupfukamira uwo ariwe wese ngo twinginge, ntabwo ari imbabazi twagiriwe... byari amahitamo yacu kandi byari n’uburenganzira bwacu”.

Yongeyeho ko yemeza ko u Rwanda ruhagaze neza mu gushyira mu bikorwa amategeko n’amabwiriza agenga umuryango kurusha ibindi bihugu, ibi kandi byagiye byigaragaza, mu bihe bitandukanye.

Perezida Kagame yagarutse kandi ku bushotoranyi bw’igihugu cy’u Burundi, avuga ko icyo gihugu cyitwaza umwanya gifite muri EAC maze kikivugira ibyo gishaka ku Rwanda.

Minisitiri Nduhungirehe (uri iburyo) ngo ntiyigeze atuka minisitiri w’Afurika y’Epfo

Yagize ati “twakomeje gukurikirana ubushotoranyi bw’u Burundi ariko ntabwo twabihaye agaciro cyangwa ngo tubyiteye kuko baba babonye icyo bashaka aricyo kugaragaza ko nta kindi kibazo bafite uretse u Rwanda”.

Perezida kagame yavuze ko kugirango abantu bakorere hamwe bisaba ko buri wese atanga ndetse akanakira, iyo ibihugu byemeye kwishyira hamwe hari agace gato k’ubusugire gasa nk’agatakaye kugirango hubakwe ikintu kigari kirenze ubwo busugire.

Perezida Kagame yongeye kunenga ubuyobozi bw’igihugu cya Afurika y’Epfo, buhitamo kumva ibivugwa n’abanzi b’u Rwanda, maze bikaga ingaruka ku rugendo rwo kubaka ubumwe.

Yavuze ko ibyavuzwe na Afurika y’Epfo ko umunyamabanga wa Leta muri minisiteri y’ububanyi n’amahanga y’u Rwanda yatutse minisitiri wa Afurika y’Epfo byari ibinyoma ndetse na twitter bavugaga ko byabereyeho nta kibigaragaza yigeze abona.

Mu kiganiro cyamaze amasaha arenga abiri, Perezida Kagame yasubije abanyamakuru bo mu Rwanda ndetse n’abakorerera ibitangazamakuru mpuzamahanga ku bibazo bitandukanye byibanze ahanini ku mibanire y’igihugu n’amahanga, nka Afurika y’Epfo, Uganda n’u Burundi, ikigabo cy’umuhanda wa gali ya moshi, ikibuga cy’indege cya Bugesera n’ibindi.

Imyitozo ingabo z’u Rwanda ziherutsemo iri mu zavugishije benshi ko hari icyo u Rwanda rwitegura

Yasubizaga ikibazo cy’umunyamakuru wari umubajije niba imyitozo ingabo z’igihugu zimazemo iminsi ntaho yaba ihuriye no kwitegura urugamba kubera agatotsi rumaze iminsi rufitanye na bimwe mu bihugu by’ibituranyi nk’u Burundi na Uganda.

Perezida Kagame yavuze ko ntaho bihuriye kuko iyo myitozo yo mu rwego rwo hejuru isanzwe ikorwa. Ariko yanaboneyeho umwanya wo kwihanangiriza abashaka gushotora u Rwanda ko n’ubwo u Rwanda rutazabasubiza ariko ruhora rwiteguye uwaruteramo ibuye.

Yavuze ko mu myaka 25 ishize u Rwanda rwahuye n’ibizazane ndetse n’ibigeragezo haba ibishingiye kuri politiki cyangwa ku ntambara kandi byose rwarabitsinze, akemeza ko hari isomo byasize.

Yagize ati “Ugendeye ku mateka yacu ntitujenjeka ku bintu birebana n’umutekano wacu. Ugukubise kenshi akumara ubwoba, isomo twararibonye. Ntidushaka kwisanga twananiwe kwicungira umutekano, haba mu bibazo binini cyangwa bito.”

Perezida Kagame yemeje ko u Rwanda rukikijwe n’abanzi bihishe mu bagizi ba nabi, haba mu karere cyanywa kure, bose barajwe ishinga no kurusenya.

Ati “Akazi kacu karoroshye, si ukwivanga mu by’abandi. Twebwe tureba ibyacu kandi tukabyikemurira ndetse n’abadukanga turabihorera, tugakomeza ibyo twarimo. Ntabwo tugikeneye kwambuka imipaka, twabikoze kera kuko ari yo mahitamo twari dufite ariko ubu ntibishoboka.”

Perezida Kagame wagaragaje ukwerura mu bisubizo bye, yavuze ko bigaragara ko ibihugu nk’u Burundi byahisemo kugira u Rwanda nk’ikibazo cyarwo, bitewe n’urwiyenzo iki gihugu cyakomeje kugaragaza. Ariko Perezida yavuze ko igisubizo ari kimwe ari ugukomeza gukora ibyarwo.

Gusa yizeje ko u Rwanda rwiteguye gutanga umusanzu warwo mu kubaka iterambere ry’akarere ndetse no gukorana n’Umuryango wa Afurika y’Iburasirazuba (EAC) kugira ngo ibibazo bikemuke.

Perezida Kagame yahishuye kandi ko hari abantu bavuga ko u Rwanda n’u Burundi bitari bikwiye kujya muri uyu muryango, hakaba n’abarenga bakavuga ko ruri mu muryango rutabishaka.

Yabinyomoje avuga ko kuba u Rwanda ruri muri uyu muryango atari impuhwe z’uwo ari we wese kuko kuba muri EAC ari inyungu z’abanyamuryango bose kurusha uko zari inyungu za bamwe.

Kureba andi mafoto menshi y’umunsi wa kabiri w’Umushyikirano kanda AHA

Ibi byavuzwe kuri uyu wa gatanu tariki 14 Ukuboza 2018, ku munsi wanyuma w’inama y’igihugu y’umushyikirano, mu kiganiro kidasanzwe cyatumiwemo bamwe mu bayobozi bakuru b’igihugu ngo basobanure ibijyanye n’imikoreshereze y’amafaranga y’ingoboka yagenewe umuturage utishoboye azwi muri gahunda yiswe VUP.

Guhindura imikoreshereze y’amafaranga yagenewe guteza imbere abaturage batishoboye muri gahunda VUP, aho basabwaga uruhare rwa 2% bigashyirwa kuri 11%, birasa nk’aho aribyo biri ku isongo ry’ikigero cy’ubukene imibare igaragaza ko kitavuye aho kiri hagati ya 2016 na 2018.

Perezida wa Repubulika y’u Rwanda Paul Kagame, yasabye abayobozi bane bakuru b’igihugu bahura cyane n’iterambere ry’umuturage kwigira imbere bakongera bagasobanura ikibazo cy’imikoreshereze ya VUP cyitari cyavuzweho neza ku munsi wa mbere.

Itsinda riyobowe na Minisitiri w’intebe Dr Ngirente Edouard, Guverineri wa Banki nkuru y’igihugu John Rwangombwa, Minisitiri w’ubutegetsi bw’igihugu Prof Shyaka Anastase na Minisitiri w’igenamigambi Dr Gatete Claver ryemeye amakosa y’uburyo butandukanye ndetse rivuga ko agomba gukosorwa mu maguru mashya.

Minisitiri w’ubutegetsi bw’igihugu Prof Shyaka Anastase yavuze ko ikibazo gikomeye cyabaye ari ikurikirana.

Aba bayobozi bemeye amakosa yakozwe ndetse baniyemeza kubikosora byihuse

Yagize ati “N’ubwo amafaranga ya VUP yo gufasha abantu bafite intege nke ngo bazamuke yanyujijwe muri SACCO, inshingano zo kureba ko umuturage azamuka zisa n’izeguriwe SACCO nabyo kdi ari inshingano z’ubuyobozi. Ibyo tugiye gukora ni ugukora kuburyo VUP ikurikiranwe kdi itanga umusaruro”.

Yavuze kandi ko amafaranga ya VUP atari ari aya SACCO, kuko ifite umutahe wayo, ikagira n’uburyo ikora itanga inguzanyo n’inyungu zayo naho VUP ikaba uburyo leta iteganya kubantu bafite intege nke, ariko kugirango bagere kuri ayo mafaranga agaca muri SACCO, kugirango banagire umuco wo gutunga konti, ntibanafate amafaranga muntoki ako kanya.

SACCO rero yaje kubikora ukwayo, bigira ingaruka ku bukungu bw’umunyarwanda.

Yagize ati: VUP igitangira yari iri mu mirenge 120, ifite n’amafaranga make, nyamara abaturage ibihumbi 50 barayigannye... muri uyu mwaka n’ushize iri mu mirenge isaga 250, ariko abayigana bari munsi y’ibihumbi 30 kdi amafaranga asa naho yiyongereye”.

Yongeyeho ati “Ni kimwe mubyatumye n’ubukene bugabanuka mu myaka ya za 2006... no muri za 2011 na 2013 igipimo cy’ubukene cyaragabanutse cyane. Twabaye nk’abarangaye cyangwa byaraducitse ntibyakora neza”.

Guverineri wa Banki nkuru y’igihugu John Rwangombwa Rwangombwa, yibukije ko VUP yatangiye muri za 2008, abaturage bemejwe n’ubuyobozi bw’ibanze ku rwego rw’umurenge ko bakeneye ubufasha, icyo gihe hagatangwa nk’inyungu ya 2% akishyurwa mu gihe kitarenze umwaka.

Yavuze ko igihe cyageze icyo gikorwa kikava mu maboko y’inzego z’ibanze kikajya muri SACCO. Ati “Mukwiga uko SACCO yabikora, bashyizeho inyungu, bitera ikibazo urwunguko rugiye kuri 11%, baravugaga bati abarimo bishyura 14%, abasirikare muri css 13%, aba tubashyire kuri 11..Icyo ni icyemezo cyafashwe kurwego rw’inama y’abaminisitiri”.

Guverineri Rwangombwa yanavuze kandi ko SACCO ifite imikorere idahwitse muri rusange, ibintu bikwiye guhinduka.

Ati “Inguzanyo muri rusange zitishyurwa neza ziri 12.7%... amafaranga ya VUP atishyurwa neza ari kuri 35%... ibi byatumye SACCO itangira kugabanya ya myenda itanga ngo idakomeza guhomba”.

Perezida Kagame yabajije uburyo SACCO ihomba kandi amafaranga atari ayayo, maze bamwe mubagize guverinoma bemera ko ari ikosa.

Perezida Kagame yavuze ko ibi bintu bigomba gukurikiranwa, ndetse hagafatwa ingamba zikomeye kuburyo bitazongera.

Yagize ati “Bagomba gukurikiranwa kdi tukanabimenya, bigomba kugira ingaruka byanze bikunze... abo bayobozi baba abambere kuba aribo bangiza gahunda ziiriho za leta, nibo tugomba guheraho... mubikore vuba na bwangu”.

Perezida Kagame ati "Iki kibazo kibonerwe igisubizo mu gihe gito cyane!"

Perezida Kagame yagaragaje ko adashimishijwe na gato n’uko imirire gihagaze mu bana b’Abanyarwanda, cyane cyane mu minsi igihumbi ya mbere, ikibazo yemeza ko kitabuze igisubizo ahubwo ari ababishinzwe badakora uko bikwiye.

Yabitangarije mu ijambo risoza Umushyikirano wa 16 kuri uyu wa Gatanu tariki 14 Ukuboza 2018.

N’ubwo Umushyikirano w’uyu mwaka waganiriwemo ingingo nyinshi ziganisha ku bukungu, ubuzima, umuco n’umutekano, ariko Perezida Kagame asoza yatinze ku buzima bw’abana budahabwa agaciro.

Yagize ati “Ikintu kijyanye n’imirire idahagije mu bana, ikintu kijyanye na Bwaki kuva abana bacu bari mu nda kugeza muri ya ya minsi ya mbere, aho umwana akirira cyangwa apfira, tugomba kubishakira umuti wa vuba kandi mu gihe gito gishoboka.”

Perezida Kagame yavuze ko iki kibazo kireba inzego zose, kidakwiye guharirwa Minisiteri y’Ubuzima gusa kandi udindiza ishyirwa mu bikorwa byo gukemura icyo kibazo bikamugiraho ingaruka. Yavuze ko amikoro yose yo kurwanya imirire mibi mu bana kandi akwiye gukoreshwa uko bikwiye.

Ati “Ntabwo amikoro aba akwiye gushirira mu mishahara, mu ngendo cyangwa mu bindi, ugasanga mbere y’uko ubona abantu babanje barireba. Icyo nacyo gikwiye guhagarara.”

Perezida Kagame kandi yavuze ko imirire y’abana idakwiye gusigana n’ibijyanye n’uburere bw’abana ndetse n’imikurire yabo.

Kureba andi mafoto menshi y’umunsi wa kabiri w’Umushyikirano kanda AHA

Dr Richard Sezibera, Minisitiri w’Ububanyi n’amahanga

Minisitri Sezibera yanyuzwe n’amajwi ayunguruye y’abanyeshuri ba Nyundo, ubwo baririmbaga indirimbo zitandukanye zo gusururutsa abitabiriye Umushyikirano wa 16, bituma akoresha amagambo y’icyongereza akoreshwa iyo umuntu ashaka kugaragaza ko yanyuzwe bidasubirwa n’ikintu runaka maze agira ati ‘I want to be a #NyundoSchool of Art when I grow up’ uwagenekereza, akaba yavuga ko iyo aza kuba akiri muto yari kwifuza kuziga muri ririya shuri amaze gukura.

#Umushyikirano2018 I want to be a #NyundoSchool of Arts student when I grow up!!!! https://t.co/nC8V3v2jLx

— Richard Sezibera (@rsezibera) December 14, 2018

Chorale de Nyundo, ni itsinda ry’abaririmbyi benshi biga umuziki mu ishuri rya Nyundo, rifite inshingano zo kuririmba indirimbo yubahiriza igihugu mu nama y’umushyikirano, ikanaririmba izindi ndirimbo zitandukanye mu gihe bibaye ngombwa muri iyi nama.

Abanyeshuri biga umuziki ku Nyundo, bamaze kwandika izina mu bijyanye no gususurutsa abakomeye, kuko nibo basusurutsaga abashyitsi mu gihe cy’inama y’umuryango w’ubuwe bwa Afrika, inama za Transform Afurika ndetse n’izindi nama ziri ku rwego rwo hejuru hano mu Rwanda.

Hon. Bamporiki yemeza ko utamara imyaka 25 ntacyo urwanira ngo ube ukitwa umurwanyi, ko ahubwo uba uri ’umurwayi"

Byagenze gute?

Hon Bamporiki yari umwe mu batanze ikiganiro mu Mushyikirano wakomeje ku munsi wa kabiri muri Kigali Convention Center (KCC) ahahuriye ingeri z’Abanyarwanda baba mu Rwanda ndetse n’ababa hanze yarwo, abayobozi bo mu nzego nkuru z’igihugu ndetse no mu z’ibanze.

Mu kiganiro cyari gifite insanganyamatsiko igira iti “Gusigasira amateka ya Jenoside twimakaza indangagaciro zacu”, ingingo yari ihuriweho na Jean Damascene Bizimana ukuriye Komisiyo y’Igihugu ishinzwe kurwanya Jenoside (CNLG), Hon. Bamporiki nk’Umuyobozi w’Itorero ry’igihugu ndetse na Umutesi Geraldine, umuyobozi wungirije w’Umuryango Imbuto Foundation.

Hon. Bamporiki uzwiho kwifashisha amateka mo gusobanura uburyo amateka y’u Rwanda yagiye rupfukiranwa, yashimangiye ko mu muco nyarwanda ko gukomeza kurwanya uwagutsinze kandi afite ukuri ari ubugwari.

Hon. Bamporiki yabivugiye mu kiganiro yatanze mu nama y’Umushyikirano

Yifashishije urugero rwo mu gihe cy’abami, Bamporiki yavuze ko n’u Rwanda rwaguwe kuko aho Umwami yafataga abo asanze bayobokaga.

Yagize ati “Umwami wafataga u Bugesera avuye i Gasabo, Abanyabugesera bakamanika amaboko bati ubu twatsinzwe ubu turi abawe, abagore bacu, inka zacu ni ibyawe! Bakayoboka. Ariko ubu murebe imyaka 25 irashize tugifite abantu bitwa ngo bari muri FDLR bararwana.

“Ibyo kurwana sinjya mbishyikira neza kuko simbifitemo ubunararibonye, ubundi abantu bafite ubunararibonye mu burwanyi nabihindura nkabyita abarwayi, kuko kurwana imyaka 25 utarayoboka, utaremera ko watsinzwe ubundi si iby’i Rwanda.”

Bamporiki kandi yavuze ko ibyo bitizwa umurindi na bamwe mu babyeyi bagifite abana bakiri mu mashyamba ya Congo, batabakangurira ngo batahe.

Bamporiki kandi yibukije abagiriwe amahirwe yo kujya mu buyobozi kutirara ngo bumve ko baruta ubutumwa bahawe kurinda. Ati “Ubutumwa, icyo bampaye kuba nkora kiraremereye kurusha njyewe.”

Soma indi nkuru twigeze gukora ku cyo Hon. Bamporiki avuga k’uko abayobozi bakwiye kwibuka ko barindwa kubera ubutumwa bafite

Kureba andi mafoto menshi y’umunsi wa kabiri w’Umushyikirano kanda AHA

Dr Bizimana Jean Damascene, umunyamabanga nshingwabikorwa wa komisiyo yo kurwanya Jenoside

Mu kigano kigamije ku gusigasira amateka no gusigasira indangagaciro, uyu muyobozi atanze ishusho y’uko igihugu cyibubatse mu nzego zitandukanye nyuma ya jenoside ahereye munzego zitandukanye ahereye mumateka.

Yagize ati “Jenoside igihagarikwa, u Rwanda rwari rwasenyutse burundu, 17/7/1994 hasohotse itangazo rihamagarira imitwe ya politiki itari yaragize uruhare muri jenoside igira uruhare ngo u Rwanda rwongere rwiyubake mu ihuriro ryari ryiswe “Force Democratique du Changement”.

Yabuze kandi ko n’ubwo u Rwanda rwari rwarashyize umukono ku masezerano mpuzamahanga yo gukumira Jenoside ubwo hari tariki 16/04/1975, Jenoside yarinze iba nta tegeko rihana icyo cyaha mu mategeko y’u Rwanda.

Yagize ati “Itegeko rihana jenoside ryatowe tariki 30/08/1996... hateganywaga ko abakoze ibyaha bashyirwa mu byiciro bitandukanye nk’ abari kubutegetsi bagize uruhare mu itegurwa rya Jenoside, abaturage n’ibindi, bituma abantu badahanwa kimwe”.

Yavuze ko mu 1997 imanza za Jenoside zatangiye, ariko zitangira zigenda gake k’uburyo uwo mwaka haciwe imanza 330 gusa. Hagati y’umwaka 1998 na 2002, haciwe Imanza 8363, maze igihugu kibona ko bikomeje kuriya, byasaba imyaka ishobora no kugera ku 130 ngo izo manza zirangire, bivuze ko abantu abari gusaza batabonye ubutabera.

Byatumye hategekerezwa umuti wava mumuco, maze itegeko rishyiraho gacaca rijyaho mu 2001, gacaca itangira mu 2002, imara imyaka 10, irangira iciye imanza 1,958,634.

Ni imanza zari zifite intego zitandukanye, harimo ukugarura ubumwe bw’abanyarwanda.

Umunyamabanga Nshingwabikorwa wa komisiyo yo kurwanya Jenoside yavuze kandi ku ivugurura ry’urwego rw’ubutabera, ahereye mu gutanga ishusho y’uko byari bimeze mbere gato ya Jenoside.

Yagize ati “Mu mpera za 93, urwego rw’ inkiko n’ubushinja rwari rufite abakozi 719. Abari barize iby’amategeko bari 46 gusa. Babiri gusa nibo bari bari bafite PHD, abandi bose batarize iby’amategeko... Ubu nta muntu uri mu nkiko udafite byibura diplome mumategeko”.

Mubutabera kandi Dr Bizimana yibukije ko u Rwanda rwavanye mu mategeko yarwo igihano cy’urupfu, ndetse hajyaho itegeko rihana ingengabitekerezo ya jenoside rijyaho mu 2008 ndetse bitanga umusaruro.

Yagize ati “Ubushakashatsi bwa CNLG bwasanze hagati ya 1995 na 2015, ingengabitekerezo yagabanutseho 83,2%. Ubu ntashuri wabonamo ingenga... uretse umuntu nk’umwe cg babiri”.

Yavuze kandi ko mumahanga, ibihugu by’amahanga byagiye byumva uburemere bwa Jenoside kuburyo kuri ubu abantu 23 baciriwe imanza, 19 boherejwe mu Rwanda. ibihugu 9 by’amahanga byatoye itegeko rihanga gupfobya Jenoside yakorewe abatutsi.

Muburezi, yavuze ko FARG yaatngiye mu 1998, ababana bafashijwe kwiga amashuri abana na za kaminuza, kubury hishyuriwe abana barenga 52,000 amashuri yisumbuye, n’abarenga ibihumbi 15,000 bishyurirwa Kaminuza.

Yagize ati “Ubu hasigaye imibare micye cyane kuburyo muu myaka nk’ibiri cg itatu bose bazaba bamaze kwiga.”

Mu mibereho myiza, hubakiwe imiryango yarokotse Jenoside irenga 28,000 amazu 4123 arasanwa ndetse n’amazu agifite ibibazo azatunganywa.

Dr Bizimana avuga ko mubuzima hamaze kuvuzwa abantu barenga ibihumbi 313 harimo abarwaye indara zidakira.

Kureba andi mafoto menshi y’umunsi wa kabiri w’Umushyikirano kanda AHA

Minisitiri w’ubutegetsi bw’igihugu avuga ko inyungu nyinshi yatumye abafataga inguzanyo muri VUP bagabanuka

Yabivuze nyuma yo gutangiza inama ya 16 y’igihugu y’Umushyikirano, muri Kigali Convention Center kuri uyu wa Kane 13 Ukuboza 2018.

Hari nyuma y’uko hagaragajwe ikibazo cy’umubare w’abaturage bafata inguzanyo muri gahunda ya VUP wagabanutse, bitewe n’inyunngu ku nguzanyo ziyongereye.

Ubusanzwe gahunda ya VUP (Vision Umurenge Program), igira ibice bitatu aribyo inkunga y’ingoboka (amafaranga ahabwa abantu batishoboye ndetse batanashoboye gukora), imirimo y’amaboko (aho abatishoboye ariko bafite imbaraga zo gukora bahabwa imirimo bakayihemberwa) ndetse n’igice kitwa ’Financial services’ aho hatangwa inguzanyo ku baturage bakennye kugirango bakore imishinga ibateza imbere,wagabanutse ugereranije na mbere iyi gahunda igitangira.

Guverineri wa banki nkuru y’u Rwanda John Rwangombwa

Minisitiri w’ubutegetsi bw’igihugu Prof Shyaka Anastase yavuze ko uwo mubare wagabanutseho ½, kubera ko inyungu ku nguzanyo yavuye ku mafaranga 2%,igashyirwa kuri 11%,ibintu we yavuze ko bishobora kuba byaraciye abaturage intege.

Yagize ati ”Inyungu ku mafaranga ufite intege nke yagujije yatangaga inyungu ya 2%, bigeze nyuma iyo nyungu yarazamutse ishyirwa kuri 11%. Wareba umubare w’abaturage bakaga iyo nguzanyo ugasanga bagabanutse inshuro ebyiri. Icyo bivuze nta kindi ni ukuvuga ngo ubwo batinye ya nyungu y’umurengera ibaremerereye”.

Ni ikibazo guverineri wa banki nkuru y’igihugu John Rwangombwa avuga ko hashobora kuba harabayeho kutabyumva neza ku baturage, kuko inyungu ya 2% basabwaga kuyitanga ku kwezi, none ubu bakaba basabwa kwishyura inyungu ya 11% ku mwaka, kandi akaba ariyo make ugereranije na mbere.

Ubwo Perezida wa Repubulika na Madame bageraga mu cyumba kiberamo Umushyikirano

Guverineri Rwangombwa kandi avuga ko ikindi cyateye kudohoka ku gufata izo nguzanyo ari uko hari abaturage bahawe izo nguzanyo bakibwira ko ari impano leta ibahaye, bityo ntibazishyure, bigatuma hari abagombaga kuzihabwa batazihawe, haba muri iyi gahunda ya VUP ndetse no mu bigo by’imari muri rusange.

Ati ”Ikibazo kirimo ni uko abo bantu bahabwa umwenda ku nyungu yo hasi bo bawufata nk’impano, ugasanga ntibashaka kwishyura. Ibi bituma harabayeho kugabanuka kw’inguzanyo zitangwa muri rusange, haba kuri abo batishoboye no muri za SACCO”.

Perezida wa Repubulika Paul Kagame we avuga ko uko guhindagura gahunda zigenerwa abaturage ari imikorere mibi ku bayobozi baba bashinzwe gukorera abaturage.

Umukuru w’igihugu yavuze ko n’ubwo hashobora kubaho abaturage banga kwishyura inguzanyo bafashe babibazwa, ariko nanone abayobozi badakorera abaturage ibyo babagomba nabo bakabibazwa.

Ati ”Ibyo by’uko hari abantu batishyura, nabyo nibyo nyine, ni nk’uko hari n’abayobozi batuzuza inshingano zabo. Icyo gihe rero hari ubundi buryo bwo kubikosora, abatishyura bakabibazwa, abayobozi badakurikiza ibyo bagomba kuba bakurikiza nabo bakabibazwa”.

Kuri iki kibazo umukuru w’igihugu yasabye inzego bireba kongera kwicara zikagifatira umwanzuro, uzatuma ibyo abaturage bagenewe babihabwa kandi mu buryo bunoze.
Kuri uyu munsi wa mbere w’inama y’igihugu y’umushyikirano, hanatanzwe ikiganiro ku iterambere ry’igihugu ryubakiye ku muturage.

Uretse abitabiriye iyi nama muri Kigali Convention Cencer (KCC), hari n’abari kuyikurikiranira ku masite ya Nkombo mu karere ka Rusizi intara y’Uburengerazuba, Gankenke mu ntara y’Amajyaruguru, Huye mu ntara y’Amajyepfo na Kirehe mu ntara y’Uburasirazuba.

Andi mafoto y’Umunsi wa mbere w’inama y’igihugu y’Umushyikirano

Minisitiri w’intebe w’u Rwanda avuga ko abana bagera ku 55,000 basubiye mu ishuri

Kimwe mu byo yavuze byagezweho biturutse ku myanzuro y’umushyikirano wa 2017, ni ukuba abana barenga 55,000 barasubiye mu ishuri kandi bari bararivuyemo.

Dr Ngirente yagize ati “hasubijwe mu ishuri abanyeshuri bari bararivuyemo bagera kuri 55533”.

Yavuze kandi ko umushyikirano uheruka warangiye hafatwa imyanzuro icyenda, haba mu rwego rw’ubuzima, uburezi, ubukungu n’umuco, ugabanywamo ibikorw 56, maze ibigera kuri 44 bishyirwa mu bikorwa neza bingana na 80%.

K’umwanzuro warebanaga n’urwego rw’uburezi ibigo bigera kuri 286, bikoresha ikoranabuhanga mu kwigisha, naho amashuri 168, yashyizwemo umuyoboro wa interineti wihuta. Ibyo byatumye ibyumba 1370 bikoresha ikoranabuhanga mu bigo 710.

Abarimu barenga ibihumbi 62 bahuguwe ku mfashanyigisho nshya y’imyigishirize y’abanyeshuri, ndetse hatangira gahunda yo kwiga ingunga imwe yatangijwe mu mashuri yose, haherewe mu mwaka wa gatandatu bituma amasaha yo kwiga ava kuri ane agera kuri atandatu k’umunsi. Iyi gahunda kandi izatangizwe no mu mwaka wa gatanu mu 2019.

Mu burezi kandi hemejwe ko ingengabihe nshya, y’amashuri abanza n’ayisumbuye, izatuma abana batangira muri Nzeri aho kuba muri Mutarama, bigahura na Kaminuza.

Amashuri 18 mpuzamahanga akorera mu Rwanda yemeye gushyira ikinyarwanda mu nteganyanyigisho zayo ndetse byaratangiye.

Mu bijyanye n’ubuganga, abaganga bagera kuri 409, boherejwe kongera amashuri yabo hagamijwe kurushaho kugira abaganga benshi b’abanyamwuga.
Abaturage bagera ku 260,856, bavuwe indwara z’umwijima wo mu bwoko bwa Hepatite C na B, naho abagera ku 145,303 bagerwaho na gahunda yo kuvurira abaturage aho bari.

Biturutse ku nama y’igihugu y’umushyikirano uheruka kandi, hasanzwe amavuriro agera kuri atanu, hanubakwa amavuriro y’ingoboka mu turere turimo Rulindo, Kamonyi, Gatsibo, Kicukiro, Ngoma, Muhanga na Nyanza.

Ibirebana n’amategeko, igitabo cy’amategeko ahana cyaravuguruwe, maze abihano bihana abacuruza ibiyobyabwenge birazamuka bikaba bihsobora kugera no kugifungo cya burundu hagamijwe guca iyo ngeso.

Mu myanzuro yafashwe ubushize yasize abana b’inzererezi bagorowe bigishwa imyuga itandukanye irimo ubudozi, ubwubatsi, ububaji ndetse banigishwa gusoma no kwandika.

Ku bijyanye n’ingufu, izikoreshwa mu gihugu zavuye kuri Megawatt 208 zigera kuri 218 ubu ngubu.

Gahunda yiswe ‘ejo heza’, igamije guteza imbere guteza imbere umuco wo kwizigamira haherewe mu miryango iratangizwa muri uyu mushyikiraho, aho abagera ku 30660 bamaze kwiyemeza kuyigiramo uruhare bahereye ku mafaranga arenga miliyoni 17 z’amafaranga y’u Rwanda.

Perezida Kagame ubwo yagezaga ijambo ku bitabiriye Umushyikirano 2018

Mu ijambo rye atangiza inama y’igihugu y’umushyikirano ku nshuro ya 16, Perezida Kagame yabaye nk’unenga imigenzereze ya bimwe mu bihugu cyane cyane iby’ibituranyi ku bijyanye n’umubano wa byo n’u Rwanda.

Yagize ati "Ntabwo twavuga kubana no guhahirana, kandi aho umunyarwanda agiye bamuhiga kubera ko ari umunyarwanda. Ntabwo ari byo... abantu bazahahirana bate batagenderana ko uwambutse umupaka afatwa agafungwa cyangwa akazimira ntibamenye aho yarengeye?”

Perezida Kagame yibajije kandi ku mubano ushingiye ku magambo, ariko byagera ku bikorwa bikaba ibindi bitandukanye n’ibivugwa.

"Ntabwo wajyaho ngo wemerere ibikorwa bihungabanya umutekano w’abandi bishingire ku butaka bwawe cg ku bikorwa byawe ukoresheje ubusugire bw’igihugu cyawe kugirango uhungabanye ubw’abandi".

Abayobozi muri Guverinoma, abikorera n’Abanyarwanda bahurira mu Mushyikirano

N’ubwo bimeze bityo, perezida Kagame yasabye abanyarwanda kubana mbere y’uko tunareba n’abandi, kuko abashyize hamwe nta kibananira.

yagize ati "Mbere y’uko dusaba no kubana n’abandi twe tubanze tubane tubane neza tugire wa muco ushingira ku bintu bitatu... Ubumwe, gukora kuburyo ushobora kubazwa cyangwa kwibaza ibyo ukora ndetse no gutekereza birenze utuntu duto".

Yakomeje agira ati "Iyo ukomeje ukagerageza k’umuturanyi mubi, amahereza biramugaruka ntabwo ari wowe bigaruka. Nibo bigora kurusha uwo bagerageza."

Umwaka wa 2018 wabaye umwaka w’akazi kenshi

Atangiza uyu mushyikirano, Umukuru w’igihugu yavuze ko uyu mwaka wabaye uw’akazi kenshi ku ruhande rw’u Rwanda, kuko ari bwo bwa mbere muri Afurika hasinywe amasezerano akuraho imbogamizi mu bucuruzi bwo muri Afurika ndetse no gusinya ayorohereza urujya n’uruza rw’abantu.

Ayo masezerano yasinyiwe i Kigali mu nama rusange y’Umuryango wa Afurika yunze ubumwe (AU) muri Werurwe 2018.

Mbere y’uko uyu mwaka dusoza urangira kandi, Louise Mushikiwabo watanzweho nk’umukandida w’u Rwanda ku buyobozi bw’umuryango w’ibihugu bivuga ururimi rw’Igifaransa (OIF), yatsinze amatora ku bwiganze asimbura Umunya-Canada Michaelle Jean.

Abanyamahanga nabo baratumirwa

Mu buryo bwa dipolomasi na businesi nabwo u Rwanda rwatsuye umubano n’ibihugu bikomeye ku isi nk’u Bushinwa, aho abayobozi b’ibihugu byombi bagendereranye mu ngendo z’amateka.

U Rwanda kandi rwanabaye igihugu cya mbere muri Afurika mu kwinjira mu ihuriro ry’ubucuruzi rya sosiyete ikomeye yo mu Bushinwa “Alibaba Group.”

Inama y’igihugu y’Umushyikirano ya 16, kuri uyu wa Kane tariki 13 Ukuboza 2018, Perezida Kagame yavuze kandi ko ibyo byose byagize ingaruka nziza ku nyungu z’Abanyarwanda.

Inama y’igihugu y’Umushyikirano ku nshuro ya 16, iribanda ku ngamba zigamije guhindura imibereho myiza y’umuturage. Ikaba iri yitabirwa n’Abanyarwanda baturutse hirya no hino mu gihugu no hanze yacyo.

Mu minsi ibiri baraba baganira ku bibazo n’ibisubizo byakwihutisha u Rwanda mu iterambere ndetse no guhindura ubuzima bw’Abanyarwanda.

Inama y’igihugu y’umushyikirano iba buri mwaka ikaba igiye kuba ku nshuro ya 16

Nk’uko biteganywa mu Itegeko Nshinga rya Repubulika y’U Rwanda, Umushyikirano ni urubuga rw’ibiganiro aho Abanyarwanda bahura bakiga ku bibazo bitandukanye bijyanye n’ubuzima bw’igihugu, imikorere y’inzego z’ibanze z’ubuyobozi, ndetse n’ubumwe bw’Abanyarwanda.

Inama y’Igihugu y’Umushyikirano yitabirwa n’abagize Guverinoma, abagize Inteko Ishinga Amategeko, abahagarariye Abanyarwanda baba mu mahanga, Abayobozi mu nzego z’ibanze, Imiryango idashamikiye kuri Leta, itangazamakuru, n’abahagarariye ibihugu byabo mu Rwanda. Uyu mwaka, Umushyikirano uribanda ku ngamba zigamije guhindura imibereho y’abaturage.

Muri iyi nama, haraganirwa ku ngingo ijyanye n’iterambere ry’igihugu ryubakiye ku ruhare rw’umuturage.

Iki kiganiro kiribanda ku buryo abanyarwanda bakwiye kurushaho kugira ibikorwa by’iterambere ibyabo, ndetse no guhindura imyumvire, uyu ukaba ari umuco ugomba kuranga Abanyarwanda.

Abaturage bagomba kugira uruhare rusesuye no gutanga umusanzu bitari gusa mu kurinda ibyagezweho, ahubwo no gushakira ibisubizo ibibazo bibangamiye iterambere nk’imirire mibi, umwanda, icuruzwa ry’abantu, amakimbirane mu miryango, kuva mu ishuri, inda zitateganyijwe, n’ibindi.

harerekanwa kandi uburyo guhindura imyumvire ari ikintu cy’ingenzi mu guteza imbere no kumenyekanisha ibikorerwa iwacu – “Made in Rwanda”.

Ibi bisaba kubyaza umusaruro amahirwe yose no kugaragaza imbogamizi zihari, zirimo kugabanya ibigenda ku gicuruzwa, kongera ireme ry’ibikorerwa imbere mu gihugu, no kongerera icyizere abaguzi b’icuruzwa bikorerwa imbere mu gihugu.

Kwimakaza umuco wa “Buy-Rwanda Build-Rwanda” [haha mu Rwanda wubake u Rwanda] bizasaba gushyira hamwe ingufu mu nzego zose.

Iki kiganiro kirasiga hagaragaye akamaro ko kumva neza uruhare rwa buri rwego muri gahunda zo guteza imbere igihugu ndetse n’ubufatanye hagati ya Guverinoma, abikorera ku giti cyabo n’abaturage mu kwihutisha ishyirwa mu bikorwa ry’ingamba za “Made in Rwanda”.

Haraganirwa kandi ku bijyanye no gusigasira amateka, no kwimakaza indangagaciro aho komisiyo y’Igihugu yo Kurwanya Jenoside (CNLG) itanga ikiganiro ku ishyirwa mu bikorwa ry’imyanzuro yafashwe n’Inama ngishwanama yo muri 2016. CNLG Irerekana ibyagezweho n’ahagomba gushyirwa imbaraga mu myaka ibiri iri imbere.

Abatanga ibiganiro baratanga ubuhamya ku kuntu ubuzima bwabo bwagiye buhinduka uko imyaka yagiye ishira, banaganire ku bisubizo by’ ibibazo bihari uyu munsi.

Haraba kandi ikiganiro kigaruka ku kamaro ko kubaka umuryango Nyarwanda urangwa no kudatezuka ndetse no kwigira binyuze mu kuzamura umuco wo kwizigama.

Ubwizigame bw’abanyarwanda ku kigereranyo cy’Umusaruro mbumbe w’ubukungu bw’igihugu (GDP) buracyari hasi ku kigero cya 10.6% (2017), ibi bikaba bigira ingarakuka ku bukungu bw’igihugu zirimo kwiyongera kw’inguzanyo zituruka hanze y’igihugu mu mishinga y’ishoramari.

Abatanga ikiganiro kandi barerekana uburyo igice kinini cy’ ibikorwa by’iterambere gikwiye kubona inkunga iva imbere mu gihugu. Kugera ku ntego ya 16% y’ubwizigame ku mu saruro mbumbe w’ubukungu bw’igihugu (GDP) bitarenze 2024 birasaba kongera ubushake bw’umuntu ku giti cye no guhuriza hamwe imbaraga mu kwizigamira.

Mu mushyikirano utangira none, harerekanwa uburyo leta yashyizeho ingamba, politiki n’amabwiriza yo kongera no kuvugurura gahunda y’ubwizigame harimo gahunda y’igihe kirekire yiswe “Ejo Heza”.

Ubu ni uburyo bushya bufite intego yo kongera ubwizigame mu ngo, mu bucuruzi no muri leta. Gahunda ya “Ejo Heza” izafungurwa ku mugaragaro ku munsi w’ejo tariki 14 Ukuboza, ari nawo munsi wanyuma w’umushyikirano.

Itangazo ryashyizwe ahagaragara n’ibiro bya Perezida