Perezida Kagame yasabye abayobozi guca bugufi bakita ku bo bayobora

Perezida Kagame yabwiye aba bayobozi ko kwiremereza ari umuco mubi udafite icyo umarira nyirawo, ahubwo usanga udindiza akazi, ugasanga umuyobozi uwufite ntacyo amariye abaturage.

Yagize ati” Kumva ko kuba umuyobozi ari ukwicara abaturage bakakugana bakagushengerera gusa, ni ikibazo kijyanye n’umuco imyifatire ndetse n’imikorere idahwitse.

N’umuyobozi umanutse kureba abaturage agerayo yakabije abantu bose bagomba kumenya ko yaje. Bigatuma bamukinga urukuta rw’icyo bashaka ko abona, ikibazo kiri inyuma y’urwo rukuta ntakibone.”

Yatanze ingero za bamwe mu bayobozi yahishiriye amazina, avuga ukuntu usanga bakunda ababahakwaho benshi muri za Porotokole, bagera no mu baturage ugasanga ntimamenye ibibazo bafite kuko baba bahugiye mu kwitabwaho gusa.

Yatanze kandi n’ingero za bamwe mu baminisitiri bajya kuva mu ndege mu butumwa runaka ugasanga bahagaritse akazi k’abashinzwe umutekano ku kibuga cy’indege ndetse n’abayobozi b’ikibuga bose bahagaritse akazi akazi baje kwakira Minisitiri uvuye hanze.

Kuri ibi Perezida Kagame yagize ati” Ibi by’amaporotokole Birahenze kandi ntacyo bimaze. Nimubicikeho mukore akazi kanyu.”

Yakomeje agira ati” Ibi bimaze kungera ahantu, hari n’uwo nahamagaye mubwira ko ninongera kubona bamukorera ibyo byose nzamwirukana.”

Perezida Kagame yibukije aba bayobozi ko bakwiye gufata urugero ku bihugu bimwe byateye imbere, kuko ababiyobora barangwa n’umuco wo kwiyoroshya no guca bugufi, ahubwo bakimakaza umuco wo gukora cyane kugira ngo biteze imbere.

Ati” Mu bihugu bimwe na bimwe byo mu Burayi bagira umuco wo kwitwara nk’abantu, bakanagira umuco wo kwicisha bugufi bagakora, kandi ntibibabuza kuza ku mwanya mwiza w’imibereho ku rwego rw’isi”.

Yakomeje agira ati” Ikigira Amerika igihange buriya ni Umuco nta Kindi. Bafite umuco wo Kwigirira icyizere kandi ntabwo batinya kurwanira inyungu no kubaho kwabo.”

Perezida Kagame yagarutse ku bayobozi bakorera ku jisho.

Abayobozi bakorera ku Jisho Perezida Kagame yabihanangirije

Mu ijambo risoza umwiherero kandi Perezida Kagame yihanangirije abayobozi bafite umuco wo gukorera ku jisho, abasaba kuwucikaho.

Yatanze ingero z’uko hari aho aba ari bujye gusura hamaze imyaka igera ku 10 nta muhanda uhaba, ariko bakumva ko azahasura mu cyumweru kimwe hakaba hageze umuhanda umeze neza.

Ati “Iyo nagiye ahantu, ahatari umuhanda barawuhashyira. Nkibaza ukuntu iyi mihanda itari ihari mu myaka 10, mu cyumweru kimwe ubushobozi buvuye he? Ubushobozi buboneka igihe perezida agiye gusura ahantu buvahe? Kuki Buboneka uwo munsi? “

Yanatanze urugero rw’aho yari busure mu Ntara y’Uburasirazuba ntiyabasha kujyayo kubera impamvu z’akazi, abaturage bakamutumaho bamusaba kuzajya ababwira buri gihe ko ari buze kubasura, ngo kuko iyo abivuze nubwo atabasha kuhagera ibibazo bafite bikemuka.

Perezida Kagame yasoje ashimira abayobozi ku biganiro byiza bagize muri iyi minsi ine bamaze mu mwiherero, abashimira kubitekerezo byiza kandi byubaka byatanzwemo, abasaba ko bi byose bibafasha gutera imbere mu mpinduka u Rwanda rwifuza yaba mu mikorere mo mu musaruro.

Abafite umuco wo guca Intege abashaka kuzana impinduka baburiwe

Perezida Kagame yasabye Minisitiri w’Intebe Dr Ngirente Eduard kuzima amatwi abashaka kumuca intege

Perezida Kagame yakomoje no ku bayobozi baca intege bagenzi babo bifuza kuzana impinduka bitwaje ko babarusha imyaka cyangwa se uburambe mu buyobozi, ababirwa ko uwo bizagaragaraho atazihanganirwa.

Yagarutse kuri Minisitiri w’Intebe Dr Eduard Ngirente amusaba kuzirinda abamuca intege kuko ari mushya, amusaba kuzabima amatwi agakora igikwiye.

Ati"Uracyari mushya, buriya uzagira abajyanama benshi utazi aho bavuye bazajya bakubwira ngo ’oya have, ibyo ntabwo bikorwa hano!’ Niba bitaraba, bizaba. Umunsi byabaye, ntuzabyemere."

Aburira abo baca intege bagenzi babo yagize ati" Hagomba kubaho ingaruka ku bayobozi babangamira, bakanaca intege abashaka kuzana impinduka."

Perezida Kagame yasabye abayobozi kuva mu biro bakegera abaturage bakabakemurira ibibazo

Perezida Kagame yababazaga impamvu bananiwe gukemura bimwe mu bibazo byoroshye birimo “isuku nke mu baturange” nko kurarana n’amatungo no kurwara amavunja kandi bahorana babibona.

Mu bafashe ijambo bose nta n’umwe washoboye kugira igisubizo gifatika agitangaho, ariko bose bemeye ko ari amakosa yo kudakurikirana, baniyemeza kubihagurukira.

Umwe mu bayobozi b’akarere wafashe ijambo yagize ati “Mwarabitubwiye kandi muhora mubitubwira ariko njyewe ndemeza ko twagize uburangare bwo kuba tutaragiye tujya mu baturage tukumva ko gukoresha inama bihagije.”

Nyuma yo gukomeza kubahata kugira icyo basubanura kuri ubwo burangare, umuyobozi w’Akarere ka Kicukiro Dr Nyirahabimana Jeanne yagize ati “Igikwiye ni uko dusohoka mu biro no kongera kwegera abaturage kurushaho.”

Perezida Kagame yavuze ko aba bayobozi bakwiye kuva mu kuvuga kuko hashize imyaka 15 havugwa ikintu kimwe ariko nta na kimwe gikorwa. Ati “Kuki nta bikorwa, muri mu kuganira gusa, muraganira ibiki bitazwi.”

Perezida Kagame yagereranyije abayobozi nk’amashanyarazi abaturage babona abanyura hejuru ariko ntacyo abamariye, kuko nubwo hari abamanuka bakajya mu baturage usanga birangiye nta kintu babafashije.

Minisitiri w’Ubutegetsi bw’Igihugu, Francis Kaboneka, yavuze ko ikibazo abona gikomeye mu nzego z’ibanze ari imyumvire yo hasi abayobozi bagifite ariko bakwiye ghindura.

Ati “Hari aho ugera umuntu yari ahahagaze wawumwereka (umwanda) we akakubwira ko atabibonaga. Rwose ibyo turabibona hirya no hino.”

Minisitiri Kaboneka yavuze ko ikibazo cy’imyumvire kiri no mu baturage ariko inshingano nkuru zikaba zifitwe n’abayobozi.

Ati “Hari n’aho tugera tugasanga abaturage bararwaye bwaki kandi bafite ibisabwa byose ngo bivuze.”

Perezida Kagame yavuze ko uyu mwiherero ukwiye gufasha abayobozi kumva neza niba icyerekezo igihugu kihaye bacyumva bose, kandi bakamenya uko bitwara mu rugendo rugana aho igihugu kifuza kugera.

Perezida Kagame, ubwo yatangizaga umwiherero wa 15

Tariki 31 Kamana 2017 ni bwo Perezida Kagame yahishuye bwa mbere ko zimwe muri minisiteri zirimo amakimbirane aturuka ku kutumvikana hagati y’abayobozi bakuru.

Icyo gihe yizeje ko atazongera kubahishira, kuko kudakorana mu buryo bunoze ari bimwe mu bidindiza igihugu. Minisiteri y’Ubuzima (MINISANTE) na Minisiteri y’Ibikorwaremezo (MININFRA) ni zimwe mu zo yari yatunze agatoki n’ubwo yirinze kugira amazina atangaza.

Ubwo yatangizaga umwiherero wa 15, Kuri uyu wa Mbere tariki 26 Gashyantare 2018, Perezida Kagame yongeye gutinda kuri iki kibazo. Yavuze ko ntaho igihugu cyagera abayobozi bakorana batavugana cyangwa ngo bajye inama.

Yagize ati “Kutavugana, kutajya impaka ngo mugire icyo mugeraho, kutuzuzanya mu nshingano mufite… nimumbwire ngo bivuze iki?

“Ese biranashoboka ko umuntu yajya yihitiramo abo ashaka gukorana nabo!? Uwakubwira ngo ‘Hitamo noneho abo wikoranira nabo, byo amaherezo wakorana nabo!?”

Yasabye abayobozi kuva mu biro bakegera abaturage kuko ari bo bakorera

Yavuze ko abayobozi bakwiye gushyira ku ruhande ibibazo byabo bwite bafite kuri bagenzi babo, ahubwo bagashyira imbere akazi.

Ati “Wenda hari ubwo uvuga uti ‘badushyira ku mirimo baragiye bampa umuntu ku ruhande ntazi iyo ava, (cyangwa) bampaye undi kandi ntibazi ko atari inshuti yanjye, (cyangwa) barongera bampa undi bataziko ashoboye ibyo akora, (cyangwa) undi sinzi iyo aturuka hatameze neza…

“Noneho ndavuze nti uwaguha ngo wihitiremo uzakungiriza, uzakora indi mirimo yindi ukitoranyiriza, bo wakorana nabo? Bo mwakuzuzanya uko bikwiye kurusha abo baguhaye utashakaga?”

Yanenze abayobozi guhoza imvugo imwe mu kanwa nyamara ibibazo bigarukwaho mu mwiherero buri mwaka, none imyaka 15 ikaba ishize nta gihinduka.

Perezida Kagame yagaragaje ko atishimira na gato uburyo inzego zitandukanye mu gukemura ikibazo cy’isuku mu baturage n’imirire mibi mu bana. Yavuze ko inzego zibishinzwe zirimo iz’ibanze ari zo nyirabayazana wo gutuma bidakemuka.

Madame Jeannette Kagame yitabiriye uyu mwiherero wa 15

Perezida Kagame niwe uba uwuyoboye

Ku mugoroba wo kuri iki Cyumweru tariki 25 Gashyantare nibwo abayobozi barenga 300 bo muri Guverinoma, ibigo bya Leta n’iby’ubucuruzi byigenga, bahaguruka berekeza mu mwiherero uzamara iminsi ine.

Muri iki gikorwa kizaba kiyobowe na Perezida Paul Kagame, Minisitiri w’Intebe Edouard Ngirente azabanza kugeza ku bawitabiriye uko imyanzuro y’Umwiherero wa 2017 yashyizwe mu bikorwa.

Hazakurikiraho ibiganiro bizibanza ku nkingi eshashatu za Guverinoma, zirimo kureba aho igihugu kigeze mu kwesa imihigo y’iterambere rirambye cyiyemeje, kureba inkingi z’ibanze zizubakirwaho iterambere ryihuse no kureba uruhare rw’ iterambere ry’inganda n’imigi no kunoza ubukungu.

Hazanarebwa kandi uko uburezi nk’umusingi w’ubukungu bushingiye ku bumenyi bwifashe, uko hatezwa imbere serivisi z’ubuzima n’uko zihagaze ndetse harebwa uko u Rwanda muri Afurika no mu ruhando mpuzamahanga.

Buri muyobozi yitwaza ibikoresho azakoresha harimo n’imyenda ya siporo

Umwiherero ni igikorwa gishingiye ku muco nyarwanda aho abayobozi b’igihugu bahuraga bakaganira ku bibazo byugarije abaturage.

Intego y’izi nama yari ugushaka ibisubizo ku bibazo byagaragajwe no kwiyemeza kubishyira mu bikorwa.

Kuri ubu, iki gikorwa gikoreshwa nk’umwanya udasanzwe aho abayobozi bagaragaza ibyo bakoze, ibitaragezweho n’impamvu.

Abawitabira banarebera hamwe aho iterambere ry’igihugu rigeze ndetse bakanafata ingamba, ku buryo bwakoreshwa mu kwihutisha ibikorwa by’ingenzi bijyana n’iterambere rirambye.

Ibiganiro bihatangirwa nibyo igihugu kigenderaho mu gushyiraho gahunda z’iterambere