Perezida Kagame na Perezida Trump

Perezida Kagame uri mu nama yiga ku bukungu bw’isi i Davos mu Busuwisi, yagiranye ikiganiro na Perezida Trump nawe wayitabiriye, kuri uyu wa Gatanu tariki 26 Mutarama 2018.

Perezida Kagame yavuze ko Amerika yaherekeje u Rwanda mu bikorwa byose by’iterambere rwatangiye.

Yagize ati “U Rwanda rwungukiye mu nkunga ya Amerika mu bice byinshi, Amerika yatubaye hafi iradushyigikira nko mu bukungu, ubucuruzi no mu ishoramari.”

Yanamwizeje ko ibihugu byose biri mu muryango w’Afurika yunze Ubumwe byiteguye gukorana neza n’Amerika. Avuga ko amavugururwa ari kuba muri uyu muryango azafasha mu kunoza imikorere y’Afurika n’ibihugu bisigaye byo ku isi.

Perezida Trump we yabwiye Perezida Kagame ko ari inshuti nziza ya Amerika, amwizeza gukomeza ubwo bufatanye.

Iki kiganiro cyari kitezwe na benshi nyuma y’amagambo Trump yatangaje kuri Afurika mu ntangiriro z’uyu mwaka.

Aya magambo "aharabikana" yateje impaka mu bihugu byinshi by’Afurika, bimwe bimusaba gusaba imbabazi n’ubwo we yabihakanye.

Reba Video Perezida Kagame na Perezida Donald Trump babwira itangazamakuru icyo ibiganiro byabo byibanzeho

Perezida Kagame aramukanya na Donald Trump

Perezida Kagame ugiye kuyobora Umuryango w’Afurika yunze Ubumwe (AU), yaganiriye na Trump ku bijyane n’imikoranire y’Afurika n’Amerika.

Ariko igitegerejwe na benshi ni ukumva niba Perezida Trump yisobanura ku magambo yavuze yandagaza Afurika, mu byumweru bibiri bishize.

Benshi biteze kuza kumva niba Trump ari bukomoze kuri iyo mvugo ko "Afurika ari ahantu hajugunywa imyanda", cyane cyane ko abashinzwe kumuvuganira bahakanye ayo magambo.

Amakuru aturuka muri Perezidansi ya Amerika, yavugaga ko Perezida Kagame na Trump baza kugirana ibiganiro bigamije gushimangira umubano hagati y’ibihugu byombi, bakanungurana ibitekerezo ku bikorwa bifitiye inyungu impande zombi nk’ubucuruzi n’umutekano.

Abahagarariye u Rwanda na Amerika nabo bari bitabiriye ibi biganiro

Mu ntangiriro z’uku kwezi, nibwo Perezida Trump yamaganiwe kure n’amahanga menshi, nyuma y’uko avuze ko ibihugu bya Afurika na Haiti ari imisarane. Hari mu biganiro Trump yagiranye n’abasenateri mu biro bye bavuga ku bimukira baza muri USA.

Afurika y’Epfo, Haiti, Senegal, Ghana n’ibindi bihugu byinshi bya Afurika byahise bitumiza abahagarariye USA bibasaba ibisobanuro ku magambo ya Trump.

Impande zombi, Perezidansi y’u Rwanda n’iya Amerika, zizeje ko ziri bushyire hanze itangazo rivuga ku byaganiriweho muri iki kiganiro mu gihe kitarambiranye.

Turakomeza kubibakurikiranira.

Perezida Kagame aganira na Tony Blair wigeze kuba Minisitiri w’Intebe w’u Bwongereza

Nyuma ya Jenoside yakorewe Abatutsi mu 1994, ibintu mu Rwanda byari byarazambye ku buryo benshi mu bari bafite ijambo icyo gihe batizeraga ko u Rwanda rwakongera kuba igihugu.

Bamwe babishingiraga ko igihugu cyari cyarasenyutse ku buryo kitakongera kwiyubaka, mu gihe abandi babireberaga mu ndererwamo y’amoko aho hari abakekaga ko Abatutsi barokotse nabo bashobora kuzihorera.

Nyuma y’imyaka igera kuri 24 Jenoside ihagaritswe n’ingabo zari iza RPF, Perezida Kagame ari nawe wayoboye urugamba rwo kubohora igihugu, agenda ahishura amwe mu mabanga y’ibyagendaga biba icyo gihe.

Yagiye ahishura uko hari bamwe mu bayobozi bakomeye ku isi basabaga ingabo za RPF gushyira intwaro hasi kugira ngo abakoraga Jenoside bayihagarike.

Yanahishuye ko hari bamwe mu baterankunga bashatse guha u Rwanda inkunga y’amafaranga ariko nyuma bakaza kubihindura bagashaka gutanga inkunga y’umuceri mu cyimbo cy’amafaranga.

Kuri iyi nshuro, ubwo yari mu nama yiga ku bukungu bw’isi (World Economic Forum 2018), Perezida Kagame yavuze ko Jenoside ikirangira hari bamwe mu bo atavuze amazina bamusabye ko u Rwanda yarugabanyamo intara kugira ngo amoko atandukane kuko bakekaga ko ubwiyunge butashoboka.

Aha Perezida Kagame yaganiraga na John Kerry wigeze kuba umunyamabanga wa Leta y’Amerika

Perezida Kagame yari abihereye ku kiganiro yari yitabiriye cyavugaga ku kubaka amahoro muri Afurika, aho we ashimangira ko ibisubizo bya mbere bigomba kuva mu Banyafurika kuruta uko byaturuka mu banyamahanga.

Yagize ati “Abantu bari bari kudusaba ko twagabanya u Rwanda mo intara nto ariko turabiseka. Twababwiye ko tugomba kwicara nk’Abanyarwanda tukabiganiraho. Ahubwo turababaza tuti mwebwe muri bande mutubwira icyo gukora?”

Yavuze ko nyuma y’icyo gihe u Rwanda rwatangiye gutera imbere kandi aho rwageraga bikabera Abanyarwanda imbaraga zo kugera ku bindi byisumbuyeho, bakarushaho kureba ahari ibisubizo bya nyabyo bakanubaka n’ubushobozi bwabo kugira ngo bagere kuri byinshi kurenzaho.

Icyo Perezida Kagame yatangarije muri iyi nama, bisa n’ibyunganira ibyo abandi bantu bakomeye ku isi bagiye baza mu Rwanda Jenoside igihagarara, bakongera kugaruka nyuma y’imyaka 20. Abenshi bemeza ko icyo gihe u Rwanda nta cyizere rwatangaga ariko ubu rukaba ari rumwe mu bihugu by’ikitegererezo ku isi.

Kuri uyu wa Kabiri tariki 23 Mutarama 2018, Senateri muri Sena y’Amerika, Jim Inhofe, yatanze ikiganiro cy’iminota 42 muri Sena y’iki gihugu, agaragaza uburyo u Rwanda rwavuye ku gihugu kitatangaga icyizere nyuma ya Jenoside kikaba “igitangaza” muri Afurika kubera impinduka rwagaragaje.

Mu nama ya WEF hagenda habamo ibiganiro bito bito kandi byinshi, kuri iyi nshuro Perezida Kagame yari yitabiriye ikivuga ku kwimakaza amahoro muri Afurika

Ku rundi ruhande, Perezida Kagame avuga ko ibyo u Rwanda rwagezeho atari ibitangaza nk’uko umuntu yabikeka, kuko byasabye Abanyarwanda guhitamo gukora igikwiye no gukora cyane kugira ngo bahindure ubuzima bubi bari baramenyerejwe n’ubuyobozi bwabanje.

Muri iki kiganiro, kimwe muri byinshi birimo kubera muri iyi nama ya WEF 2018 iteraniye i Davos mu Busuwisi, Perezida Kagame yavuze ko Abanyarwanda bamenye ko icyo bashaka kugeraho nta wundi uzakibagezaho atari bo ubwabo.

Ati “Nta bitangaza byabaye mu Rwanda. Twagerageje guhangana n’ibibazo byacu kandi tumenya ko ari twebwe Banyarwanda dukwiye gukora ibyacu nta wundi wabidukorera.”

Yavuze ko bitashoboka ko ibisubizo bivuye ahandi byahabwa abatarabigizemo uruhare ngo bigire icyo bigeraho. Yavuze ko Abanyarwanda bahisemo guhangana n’ibibazo byabo ariko badasuzuguye inama z’abandi.

Perezida Kagame aragiraga ikiganiro na Perezida Donald Trump kuri uyu wa Gatanu

Aya makuru yatangajwe n’umujyanama mu by’umutekano wa Perezida Donald Trump, Jenerali Herbert Raymond McMaster.

Ibi biganiro biteganyijwe kuri uyu wa gatanu tariki ya 26 Mutarama 2018, aba bayobozi bombi ngo bazaba baganira ku mubano wa Amerika n’ibihugu bya Afurika, baganire ku mutekano ndetse no ku buhahirane hagati ya Amerika n’ibihugu bya Afurika.

Mu mpera z’uku kwezi nibwo Perezida Kagame azatangira imirimo yo kuyobora Afurika Yunze Ubumwe.

Muri iri huriro, Perezida wa Repubulika azatanga ikiganiro mu isangira ryateguwe n’agashami ka Wanshington Post gashinzwe ububanyi n’amahanga, anageze ijambo risoza ku bazitabira inama yiga ku kubaka amahoro ku mugabane wa Afurika.

Iri huriro rimara iminsi ine rizibanda ku buryo bwo kubaka ahazaza hasangiwe na bose mu Isi imaze gucikamo ibice.

Ihuriro ry’uyu mwaka riyobowe n’abagore gusa barimo: Sharan Burrow, Umunyamabanga Mukuru w’Ihuriro Mpuzamashyirahamwe Mpuzamahanga ry’Ubucuruzi, ITUC; Fabiola Gianotti, Umuyobozi Mukuru w’Ikigo gikora ubushakashatsi ku bitwaro bya kirimbuzi cy’i Burayi; na Isabelle Kocher, Umuyobozi wa ENGIE.

Harimo kandi Christine Lagarde, Umuyobozi Mukuru w’Ikigega Mpuzamahanga cy’Imari (IMF); Ginni Rometty, Umuyobozi wa IBM; Chetna Sinha, washinze akaba anayobora Deshi Foundation; na Erna Solberg, na Minisitiri w’Intebe w’igihugu cya Noruveje.

Uyu mwaka, iri huriro ryiga ku bukungu bw’Isi riratangizwa n’ijambo rya Perezida Alain Berset w’u Busuwisi, rikurikirwa n’ijambo ry’ikaze rya Professor Klaus Schwab.

Minisitiri w’Intebe w’u Buhinde Narendra Modi akaba ariwe uri butange ijambo nyamukuru ritangiza iri huriro ngarukamwaka ribaye ku nshuro ya 48.

Gahunda y’ihuriro ry’uyu mwaka yubakiye ku ngingo enye z’ingengi zirimo: Guteza imbere ubukungu burambye; kurebera hamwe Isi irimo imbaraga n’imyumvire bitandukanye; guhashya amacakubiri mu muryango w’abatuye Isi, no guha icyerekezo ikoreshwa ry’ikoranabuhanga rikigaragaramo intege nke.