Ubwo Perezida w’u Rwanda Paul Kagame yinjiraga muri stade ya ‘La Concorde’ i Kintélé, amashyi n’impundu byaturutse mu mbaga y’abantu byari byinshi cyane. Iki gishobora gufatwa nk’ikimenyetso cyerekana ko abaturage b’icyo gihugu bakunda Perezida Kagame, ndetse no ku rundi ruhande ni ikimenyetso cy’ubucuti n’ubufatanye bukomeje kuranga u Rwanda na Congo-Brazzaville.

Ariko se uyu mubano ukomoka he? Reka dusubize amaso inyuma turebe ku mateka y’umubano w’u Rwanda na Repubulika ya Congo.

Umubano w’u Rwanda na Congo Brazzaville wubakiye ku rufatiro rukomeye. Guhera mu mwaka wa 2011, kompanyi y’indege y’u Rwanda, RwandAir, yatangiye gukora ingendo zerekeza i Brazzaville. Izi ngendo zatumye amayira y’ubucuruzi n’ubuhahirane hagati y’ibihugu byombi afungurwa.

Mbere yaho, mu mwaka wa 2010 nibwo ibihugu byombi byari byongeye kumvikana gusubukura umubano wabyo. Mu mwaka wa 2016, nibwo u Rwanda rwafunguye Ambasade yarwo mu mujyi wa Brazzaville, ari wo murwa mukuru wa Repubulika ya Congo.

Usibye ubuhahirane no kugenderanira hagati y’abaturage b’ibihugu byombi, abakuru b’ibihugu byombi bagiye bakorera ingendo zitandukanye i Kigali n’i Brazzaville ndetse bakagirana n’ibiganiro byubaka ubufatanye n’ubucuti.

Muri Mata 2022 Perezida Kagame yagiriye uruzinduko rw’iminsi itatu muri Congo Brazzaville, aho yasuye n’Akarere ka Oyo. Aha hasinywe amasezerano y’ubufatanye mu by’ubuhinzi n’ubucuruzi.

Muri Nyakanga 2023 Perezida Denis Sassou Nguesso na we yasuye u Rwanda, yakirwa mu cyubahiro gikomeye aho yambitswe n’umudari w’icyubahiro w’u Rwanda uzwi nka "Agaciro", kubera uruhare rwe mu kubaka amahoro muri Afurika.

Icyo gihe Perezida Kagame mu ijambo rye, yaragize ati “U Rwanda na Congo bifitanye umubano ukomeye ushingiye ku bucuti n’ubufatanye. Mu myaka itatu ishize, ibibazo byugarije Isi byagiye bitwibutsa kenshi ko duhujwe kandi ko tugomba gukorana. Muri urwo rwego, intego y’uru ruzinduko ni ugushimangira ubushake bwacu bwo gukorera hamwe nk’ikipe imwe, kugira ngo twongere ubushobozi bwo guhangana n’ibibazo no kongera kubaka ubukungu bwacu mu buryo burambye. Muri kano kanya kandi, turizihiza ibikorwa by’indashyikirwa bya mukuru wacu, Perezida Sassou Nguesso. Nejejwe no kumuha umudali w’Icyubahiro w’Igihugu. Uyu mudali hano uzwi ku izina ry’Agaciro. Ni umudali ugushimira ku buyobozi bwawe bwiza n’ubwitange bwawe mu kubaka Afurika itekanye kandi itera imbere.”

Perezida Kagame tariki 21 Nyakanga 2023, yambitse Denis Sassou-Nguesso umudali w’icyubahiro witwa ‘Agaciro’ ku bw’imiyoborere ye idasanzwe

Ibihugu byombi bimaze gusinya amasezerano y’ubufatanye arenga icumi mu nzego zirimo: umutekano, imicungire y’ubutaka, ubukerarugendo, n’inganda.

Perezida Sassou Nguesso warahiye kuri uyu wa Kane tariki 16 Mata 2026, yatsinze amatora yabaye tariki 17 Werurwe 2026, ku majwi 95%.

Mu gusoza, abahanzi b’injyana ya gospel Ben & Chance bateguye igitaramo Easter Jubilee. Iki gitaramo kizaba kirimo abandi bahanzi ba gospel nka Papy Clever na Dorcas, ndetse na Alicia na Germaine. Iki gitaramo kizabera muri BK Arena ku cyumweru, ku munsi wa Pasika, guhera saa cyenda z’amanywa.

Mu gihe abanyarwanda binjiye muri weekend ndende izarangira ku wambere, ni ukuvuga iminsi ine yose y’ibyishimo, banashyiriweho ibikorwa bitandukanye bizabafasha kwizihiza umunsi mukuru wa Pasika byaba iwabo mu rugo, mu rusengero, ndetse n’ahandi hantu hatandukanye hahurira abantu benshi.

Dore hamwe mu hantu hazagufasha kugira weekend nziza guhera kuri uyu wa gatanu kugeza ku wa mbere.

Imikino y’abana izaba ari myinshi muri iyi weekend

Inzozi Park iherereye I Gahanga mu karere ka Kicukiro yateguye imikino y’abana itandukanye yiganjemo ibyicungo by’ubwoko butandukanye ndetse n’indi mikino y’abana. Kuva tariki 3 Mata kugeza 6 Mata, Inzozi Park izaba yanateguye ibiciro bidasanzwe ku biribwa bitandukanye, ku babyeyi n’abana bazabasura kuri ayo matariki.

Queen Park Entertainment nayo yateguye gahunda zihariye ku bana bifuza kwizihiza Pasika. Hagati ya tariki 3 na Tariki 5 Mata, bimuriye ibikorwa byabo I Gikondo ahasanzwe habera Expo, aho abana bateguriwe imikino itandukanye, ibyicungo, ndetse n’ibyo kurya bizabashimisha.

Spiderman Game Center iherereye i Masaka nayo yateguye Easter Celebration ihera kuri uyu wa gatanu tariki 3 Mata kugeza ku wa mbere tariki 6 Mata. Abana n’ababyeyi bazitabira ibi birori bazerekwa umukino usobanura ipfa n’izuka rya Yezu; abana kandi bazakina imikino itandukanye irimo uwo gushakisha amagi ya Pasika (Easter Egg Hunt), ubufindo, gushushanya ku isura (face paint), n’indi myinshi.

Zaria Court I Remera nayo yateguye imikino y’abana mu cyo bise Easter Weekend ihera tariki 3 Mata kugeza ku cyumweru tariki 5 Mata.

Ku wa gatandatu tariki 4 Mata, Bicu Lounge iherereye Kimihurura, yateguye ibirori by’abana “Kids Easter Festival”, aho abana bazabasha gukina imikino itandukanye no kujya mu byicungo bizaba byabateganirijwe.

Muri Kigali Universe iherereye mu nyubako ya CHIC, ku cyumweru tariki 5 Mata, ababyeyi n’abana bazabasha gukina imikino itandukanye irimo gushakisha amagi ya Pasika (Easter Egg Hunt) ku bana ndetse na “bowling” ku bakuru: byose biherekejwe n’icyo kunywa n’icyo kurya.

Abakuru bashaka kwishimisha batari kumwe n’abana nabo iyi weekend izabaryohera
Kuri uyu wa gatanu umuhanzi Davis D araba arimo gutaramira abari busohokere muri Paddock Lounge iherereye Kicukiro.

Umuhanzi wa Kinyatrap, Logan Joe, we arataramira muri Koolside Lounge nayo iri Kicukiro.

Ku bakunzi b’injyana gakondo, kuri uyu wa gatanu Itsinda ry’Indashyikirwa riraba ririmo gucurangira muri Sky Sports Lounge iherereye I Remera.

Aha muri Sky Sports Lounge kandi ku wa gatandatu tariki 4 Mata, hazabera ibirori byahawe izina rya “Blue Print”, bizasusurutswa n’aba DeeJays batandukanye barimo DJ Pukie, DJ Energy, DJ Yash, n’abandi.

Bushali

Ese urabikorera he? Dore zimwe muri gahunda ziteganyijwe muri izi mpera z’icyumweru zishobora kugufasha kugira ibihe byiza.

Duhereye kuri uyu wa gatanu, umuhanzi Bushali arataramira abari busohokere kuri Maison Noire iherereye Kicukiro.

Niba uri umukunzi w’ikinamico (theater), Umuhanzi Weya Viatora yateguye umugoroba wo kubara inkuru ariko iherekejwe n’umuziki (musical reading). Weya Viatora araba aherekejwe n’umucuranzi Esther Niyifasha. Iki gitaramo kiri bubere kuri Goethe Institut iherereye mu Kiyovu.

Kuri Mundi Center, umunyafurika y’epfo Khulekani Nxumalo uzwi ku izina ry’ubuhanzi rya “Pcee” ari butaramire abakunzi b’injyana y’amapiano, mu gitaramo cyahawe izina rya Musical Mania. Usibye Pcee iki gitaramo kiraba kirimo abaDJs batandukanye nka DJ Rusam, DJ Noble, n’abandi.

Kuri uyu wa gatandatu, undi muhanzi wo muri Afurika y’Epfo azaba arimo gutaramira abanyarwanda. Uwo ni umuhanzi Dlala Thukzin wo muri Afurika y’Epfo uzaba ari nawe mushyitsi w’imena mu gitaramo ngarukakwezi cya “Atmosfera”. Atmosfera ni igitaramo kimaze kumenyerwa cyane muri gahunda z’ibirori za buri kwezi zibera mu mugi wa Kigali, kikaba gitegurwa na DJ Lamper.

Dlala Thukzin ni umwe mu bahanzi bakora injyana ya 3-step ikunzwe cyane muri iyi minsi; akaba yaramenyekanye cyane mu ndirimbo nka “Mali” na “uValo.”
Igitaramo cya Atmosfera kizabera muri Kigali Conference and Exhibition Village ahazwi nka Camp Kigali.

Niba uri umukunzi w’injyana ya Rumba, kuri uyu wa gatandatu Maison IShya yateguye igitaramo cya “Soiree Rumba & Seben.” Ni igitaramo kizabera kuri Glimpse Hotel iherereye Kimuhurura.
Abakunda gusoma namwe ntabwo iyi weekend muzagira irungu! Institut Francais du Rwanda yateguye ihuriro mpuzamahanga ry’ibitabo (Rencontres Internationales du Livre Francophone).

Ni ihuriro ryatangiye ku wa 25 Werurwe rikaba rizarangira ku cyumweru tariki 28 Werurwe 2026. Abanditsi mu ngeri zitandukanye ndetse n’abakunda gusoma bakaba barimo guhurira hamwe bakaganira ku bikubiye mu bitabo, ndetse bagahana amasomo mu buryo bwo kwandika ibitabo. Institut Francais du Rwanda iherereye Kimihurura.

Ku bakunda ubugeni, by’umwihariko gushushanya, Ishema Art Center yateguye ihuriro ry’abakunda gushushanya cyangwa se abifuza kubyiga, ryahawe izina rya “Sip and Paint.” Sip and Paint izaba kuri uyu wa gatandatu tariki 28 Werurwe 2026, I Kimironko ku cyicaro cya Ishema Art Center.

Kuri uyu wa gatanu, umuhanzi w’injyana ya Kinyatrap ari butaramire abari busohokere mu kabari ka Bicu Lounge. Ni mu gitaramo cyahwe izina rya “Funky Friday” kiri bwitabirwe n’abahanzi batandukanye ndetse n’abavanga umuziki barimo DJ Juicy, Viper, Kavumbi, LionEyes n’abandi.
Bicu Lounge iherereye Kimihurura.

Ku bakunda kubyina, akabari ka Lemon Kigali kongeye kugarura Ijoro Rya Kompa cyangwa se “Kompa Night” mu cyongereza. Kuri uyu wa gatanu, Coach Danny araba arimo gutanga amasomo yo kubyina injyana ya Kompa ku babyifuza bari busohokere muri Lemon Kigali, iherereye Kimihurura.

Kimwe mu bishushanyo bya Douce Umugwaneza

Ku bakunzi ba cinema, Mundi Center yateguye ijoro rya cinema bahaye izina rya “Moonlight Movie.” Abari bwitabire iyi gahunda kuri uyu wa gatanu, bari bwerekwe film izwi nka “Hidden Figures” yerekana ubuzima bwa bamwe mu bagore b’abirabura bagize uruhare rukomeye mu kohereza ikiremwamuntu ku kwezi, mu mwaka w’1969. Mundi Center iherereye I Gikondo, ahazwi nka RWANDEX.

Mu rwego rwo gukomeza kwizihiza ukwezi kwa Werurwe kwahariwe abagore, umuhanzikazi ushushanya, Douce Umugwaneza yateguye igikorwa cyo kwigisha gushushanya ku babyifuza. Ni igikorwa kizabera kuri Zaria Court, I Remera, ku cyumweru tariki 15 Werurwe 2026.

Ku bakunzi ba muzika, by’umwihariko icuranze mu buryo bwa “live”, akabari ka Copenhagen gaherereye Kicukiro kateguye igitaramo cyahawe izina rya “Kigal-Buja Night”. Abazitabira iki gitaramo kizaba ku cyumweru, bazacurangirwa n’itsinda ry’abahanzi barimo Christian wavuye mu gihugu cy’Uburundi, umenyerewe cyane mu gukora umuziki mu buryo bwa live, aho azaba ari kumwe n’itsinda ry’abacuranzi rya Cool Band.

Reka dusoze iyi gahunda ya weekend n’umuhanzi G.C. Cameron, uzataramira I Kigali ku wa gatandatu, tariki 14 Werurwe, muri Atelier du Vin, iherereye Kicukiro.

Bushali Umwami wa Kinyatrap

Ku bakiri bato, bashobora kutamenya uwo ari we, cyangwa se ntibamenye amatsinda y’umuziki ya “The Spinners” na “The Temptations”. Aya ni amatsinda yakunzwe cyane mu myaka y’1960 n’1970, yakoraga injyana ya R&B mu nzu ikomeye y’umuziki ya Motown. G.C. Cameron rero yaririmbye muri aya matsinda yombi, ndetse aza no kuririmba ku giti cye. Imwe mu ndirimbo ze zakunzwe ni indirimbo “It’s So Hard to Say Goodbye to Yesterday” yagurishijwe inshuro zigera kuri miliyoni hirya no hino ku isi, ndetse iza gusubirwamo n’itsinda rya Boyz 2 Men.

Holi Festival

Mu rwego rwo kwizihiza umunsi mpuzamahanga w’abagore, inzu y’imyidagaduro ya Mundi Center yongeye gutegura ibirori ngarukakwezi bizwi ku izina rya “House of Queens.” Kuri iyi nshuro ibi birori bizaba bifite insanganyamatsiko igira iti “I’m every woman” cyangwa se “Ndimo buri mugore” umuntu agenekereje mu Kinyarwanda.

Ibirori bya “House of Queens” biteganyijwe kuba kuri uyu wa gatandatu tariki 7 Werurwe 2026, bizitabirwa n’abagore mu ngeri zitandukanye harimo na DJ Higa uzasusurutsa abazabyitabira. Muri ibi birori kandi hazabaho n’igikorwa cyo kwerekana no kugurisha bimwe mu bikorwa by’ubucuruzi by’abagore.

Kuri uyu wa gatandatu tariki 7 Werurwe 2026, muri Goethe Institut iherereye mu Kiyovu, haratangizwa imurika ry’ubukorikori ryateguwe n’umuhanzi Angella Ilibagiza. Ni imurika yahaye izina rya “We had no choice in it” bishatse kuvuga ngo “Nta ruhare twabigizemo” umuntu agenekereje mu Kinyarwanda; ryerekana uburyo umugore yari yarasigajwe inyuma mu Rwanda rwo hambere, ariko n’uburyo ari umuntu umaze kugira ikintu ageraho kandi ufite ushoboye.

Ilibagiza avuga ko iri murika rigamije kwigisha, kurinda uburenganzira bw’umugore, kumuha ubushobozi ndetse no kuzana impinduka mu muryango nyarwanda mu bijyanye n’uburenganzira bw’umugore.

Imurika rya “We had no choice in it” rizarangira tariki 18 Werurwe 2026.

Mu rwego rwo kwizihiza umunsi mpuzamahanga w’umugore kandi, akabari kazwi nka Bicu Lounge kateguye ibirori byahawe izina rya “Female Forces.” Ni ibirori bizasusurutswa n’umuhanzi Ariel Wayz ari kumwe na DJ Alida. Bicu Lounge iherereye Kimihurura.

Niba uri umukunzi w’injyana ya R&B, kuri uyu wa gatandatu itsinda rya Spin the Block ryateguye ibirori bihuriza hamwe abahanzi b’injyana ya R&B, ariko umwihariko ukaba ari uko ari abahanzi b’igitsinagore bagize uruhare rukomeye mu kumenyekanisha iyi njyana ku isi hose. Ibirori bya Spin the Block: R&B Divas Edition bizabera muri Kōzo iherereye Kimihurura, biyoborwe n’umunyamakuru Zuba Mutesi.

Niba kandi uri umukunzi w’injyana nyarwanda zo ha mbere, nawe kuri uyu wa gatandatu washyizwe igorora! Akabari kitwa Lemon gaherereye Kimihurura, kabateguriye ijoro ry’injyana nyarwanda zigeze gukundwa mu myaka yashize.

Mu zindi gahunda ushobora gukora kugira ngo ugire weekend nziza harimo n’ibirori bya Holi. Holi, izwi nanone ku izina ry’iserukiramuco ry’amabara (festival of colors), ni ibirori bifite ishingiro mu muco w’abahinde, bikaba ari ibirori byo kwishimira ko ibihe by’ubukonje birangiye, ndetse no gutsinda kw’icyiza hejuru y’ikibi. Hano mu Rwanda ibyo birori bizizihirizwa muri Mamba Sports Padel iherereye Kimihurura.

Hanyuma niba ukunda gukora siporo yo kuzamuka imisozi (hiking), HOA 360 bateguye urugendo rwo kuzamuka umusozi wa Huye. Abazitabira runo rugendo bazagenda ibilometero 40 mu minsi ibiri, ni ukuvuga tariki 7 na tariki 8 Werurwe 2026.

Duhereye kuri uyu wa gatanu, umuhanzi Victor Rukotana arataramira abari busohokere muri TicTac Boutique iherereye Kacyiru. Ni igitaramo yahaye izina rya Friday Romantic Night, gisoza ukwezi kw’abakundana kwa Gashyantare.

Niba ukunda kuririmba ibi bizwi nka “karaoke”, ushobora kwifatanya na Serge Dior, usanzwe uyobora gahunda za Karaoke mu tubari dutandukanye hano mu mugi wa Kigali. Kuri uyu wa gatanu araba arimo kuririmbira muri Kigali Sports Bar and Grill, iherereye Kimicanga.

Muri iyi weekend hateganyijwe ibikorwa byinshi by’abifuza gutemberera ahantu nyaburanga hatandukanye, harimo pariki, ku kiyaga cya Kivu n’ahandi.

Pictures From Afar bateguye urugendo rwerekeza mu nkengero z’ikiyaga cya Kivu mu karere ka Karongi. Ni urugendo ruzaba kuri uyu wa gatandatu tariki 28 Gashyantare, aho abari burwitabire bari bubashe kugendera mu bwato no gusura bimwe mu birwa biri mu kiyaga cya Kivu, ubundi birire inyama zokeje bicaye ku mucanga wo ku Kivu.

Ikigo RUA Safaris nabo bateguye urugendo rwerekeza muri Pariki y’Akagera. Abari bwitabire uru rugendo ruri bube kuri uyu wa gatandatu barabasha gusura inyamaswa zitandukanye ziri muri iyi pariki ndetse banabashe kwidagaduriramo bafata amafunguro, amaforo, n’umuziki.

Kalisa Safaris and Tours nabo bateguye urugendo rwerekeza muri Pariki ya Nyungwe aho abari burwitabire bari bubashe gukora ibikorwa bitandukanye harimo gusura isumo rya Ndambarare, kugendera ku kiraro cyo mu kirere (canopy walk) no kugendera ku migozi imanitse mu kirere (zipline).

Tukivuga ku ngendo zo gusura ahantu nyaburanga, ikigo KC Rides Tours cyateguye urugendo rwerekeza mu Bigwogwe. Ni urugendo ruzaba ku wa gatandatu tariki 26 Gashyantare 2026. Mu Bigogwe ni hamwe mu hantu harimo gusurwa cyane muri iyi minsi. Ubukerarugendo bwo mu Bigogwe bwibanda ku bworozi bw’inka ndetse n’umuco nyarwanda, aho abahagenderera bashobora gukora ibikorwa bitandukanye birimo gukama inka, gusimbuka urukiramende, kuzamuka imisozi itoshye ya Bigogwe n’ibindi.

Kuri uyu wa gatandatu kandi Ishema Art Center bateguye igikorwa bahaye izina rya “Sip & Paint” aho abari bucyitabire bari busangire icyo kunywa ari nako bafata amasomo y’ubuhanzi bwo gushushanya. Ishema Art Center iherereye Kimironko.

Niba uri umukunzi w’injyana zo ha mbere, iyi weekend uraba umeze neza mu gitaramo cyahawe izina rya “Old School Soirée.” Ni igitaramo kizitabirwa n’abakarazi b’umuziki (DJs) batandukanye barimo DJ King Reg, DJ Ry, Selekta Copain n’abandi batandukanye. Iki gitaramo kizabera mu kabari kazwi ku izina rya Atélier du Vin gaherereye Kicukiro, kuri uyu wa 28 Gashyantare 2026.

Kuri uyu wa gatandatu DJ Lamper aragarukana igitaramo cye ngarukakwezi yahaye izina rya “Atmosfera Kigali.” DJ Lamper ufite umubyeyi w’umunyarwanda n’undi w’umutaliyani amaze kuba umwe mu ba DJs bamaze kwandika izina mu ruganda rw’imyidagaduro rwo mu Rwanda. Igitaramo cyo kuri uyu wa gatandatu kiraba ari icya 12 akoze muri uru ruhererekane ngarukakwezi rw’ibitaramo bya Atmosfera Kigali. Niba ushaka kwitabira iki gitaramo, kizabera muri Camp Kigali (KCEV).

Niba uri umuntu ukunda kumenya indyo zinyuranye, zivuye mu bihugu bitandukanye, ntuzacikwe na “Food Fest” kuri uyu wa gatandatu, aho amaresitora atandukanye yo mu mugi wa Kigali azahurira kuri Mundi Center mu imurikagurisha ry’imirire. Mundi Center ni ikigo cy’imyidagaduro giherereye Kicukiro-Rwandex.

Mu gusoza, niba ukunda kureba filimi, Mist Valley Cinema bateguye igikorwa ryo kureba filimi abantu bicaye hanze mu busitani. “Movie Night From The Land of a Thousand Hills” izabera kuri Inyungu Art Hub, ikigo cy’ubuhanzi giherereye Kimironko (kwa Mushimire), kuri uyu wa gatandatu tariki 28 Gashyantare. Abateguye kino gikorwa bakugira inama yo kuzana inshuti zawe cyangwa se umukunzi wawe, mukaza mwitwaje ikiringiti kugira ngo muryoherwe na filimi ariko kandi munirinde akabeho ko ku mugoroba.

Wowe weekend yawe y’umuganda iraba yifashe ite?

Kimwe mu bitaramo bitegerejwe na benshi ni icya Princess Lover, umuhanzikazi wo mu ghugu cy’Ubufaransa wamenyekanye cyane mu ndirimbo “Mon Soleil’. Prince Lover azataramira abakundana ku munsi wa Saint Valentin, tariki 14 Gashyantare 2026, mu gitaramo kizabera muri Mövenpick Kigali Hotel, Kacyiru.

Princess Lover

Kuri uyu wa gatanu nabwo kandi, abahanzi Mico The Best na Social Mula bataramiye abasohokera mu kabari Madison Park Bar kari ku Ruyenzi, mu gitaramo cyahawe izina rya “Ijoro ry’Urukundo.

Mu ijoro rishyira ku munsi wa Saint Valentin kandi, umuhanzi w’injyana ya gakondo Ruti Joel, ari butaramiye abasohokeye mu kabari kazwi nka Bicu Lounge, mu gitaramo yise “Love in Gakondo.”

Ku munsi wa Saint Valentin, abakundana bashaka kugira ibihe byiza bashobora kuzasohokera mu karere ka Kicukiro aho abahanzi barimo Yampano, Marina, Alto na Social Mula bazataramira abazasohokera mu kabari ka Copenhagen, mu gitaramo cyahawe izina rya “Live In Love.”

Niba wowe n’umukunzi wawe mukunda guseka, umwe mu banyarwenya bakunzwe mu Rwanda, Rusine Patrick, yateguye igitaramo yise “The Funny Side of Love”. Ni igitaramo kizabera mu kabari ka Best Bel-Air, aho azerekana bimwe mu bintu bisekeje bibera mu rukundo.

Dusubiye inyuma gato kuri uyu wa gatanu itariki 13 Gashyantare 2026, umuhanzi Yvan Muziki yamuritse album ye ya mbere yise “Inganzo Ntahangarwa.” mu gitaramo kiri bubere mu nzu y’imyidagaduro ya Kigali Universe. Iki gitaramo kiri bwitabirwe n’abahanzi batandukanye barimo Intore Masamba, Kidumu, Marina, Jules Sentore n’Itorero Inyamibwa.

Ku munsi wa Saint Valentin, ibigo y’ubucuruzi bitandukanye, utubari ndetse n’amahoteli baba bateguye gahunda zidasanzwe zigamije gukurura abakundana. Usibye ibitaramo birimo abahanzi, hateguwe kandi na gahunda zo gusabana wihariye w’abakundana zizabera ahantu hatandukanye. Urugero ni Rakka Hotel, Marriot Hotel, Zaria Court, Ubumwe Grande Hotel, Pinot Blanc na Ti’ Amo Bistro.

Mu rukerera rwa tariki 7 Ukwakira 2023, abarwanyi bo mu mutwe wa Hamas wo muri Palestine batangije ibitero byibasiye ibice bitandukanye by’igihugu cya Israel. Ni ibitero byatangiranye n’ibisasu bya rokete (rockets) byoherejwe ku migi itandukanye y’aho muri Israel cyane cyane iyegereye intara ya Gaza, nyuma abarwanyi basaga 1000 ba Hamas basenya inkuta zitandukanya iyi ntara na Israel, maze binjira muri israel hagati. Mu kwihorera, Israel nayo yahise isubukura ibitero by’indege z’intambara maze isuka ibisasu mu ntara ya Gaza, ndetse minisitiri w’intebe Benjamin Netanyahu yavuze ko kuri ubu Israel iri mu bihe by’intambara.

Kugeza ubwo twandikaga iyi nkuru, iyi ntambara hagati ya Hamas na Israel yari imaze guhitana abanyaisrael barenga 800 ndetse n’abanyapalestine barenga 700, abatari bacye bava mu byabo.

Ibitero bya Hamas muri Israel byatunguye benshi, haba inzego z’ubutasi za Israel ndetse n’abandi bakurikirana ibibera mu gace k’uburasirazuba bwo hagati. Ni nabyo bitero bikomeye kandi byakorewe muri Israel hagati kuva mu myaka 50 ishize. By’umwihariko ibi bitero bikaba byaratunguranye kubera ubunini bwabyo ndetse n’ubushobozi abarwanyi ba Hamas babashije kugaragaza.

Uyu mutwe w’abarwanyi ba Hamas ukaba ari umutwe umaze igihe kinini urwanya leta ya Israel, ndetse ukavuga ko uharanira ukwishyira ukizana kw’abanyapalestine n’ishingwa rya leta yabo. Ariko se Hamas yavuye he? Ifite umugambo ki? Ivana he ubushobozi bwo gukora? Ibi ni bimwe mu bintu ukwiye kumenya ku mutwe wa Hamas.

Inkomoko ya Hamas

Ḥarakah al-Muqāwamah al-ʾIslāmiyyah (Hamas), ni umuryango washinzwe mu mwaka w’1987 Ariko amateka yawo ahera kera cyane mu mwaka w’1928 ubwo mu gihugu cya Misiri hatangizwaga umuryango w’Abavandimwe b’Abayislam (Muslim Brotherhood). Uyu ni umuryango ugamije gukwirakwiza indangagaciro za kisilamu zikava mu musigiti zikagera no mu buzima busanzwe bw’abaturage b’ibihugu ukoreramo.

Mu mwaka w’1935 ni bwo Muslim Brotherhood yatangiye gukorera muri Palestine, icyo gihe yari mu maboko y’abakoloni y’abongereza. Uyu muryango wakomeje gukorana n’abanyapalestine mu bihe bitandukanye harimo mu mwaka w’1948, ubwo hashingwaga leta ya Israel ku butaka bwahoze ari ubw’abanyapalestine, ndetse no mu 1967 ubwo Israel yiyomekagaho ubundi butaka bw’abanyapalestine mu kizwi nk’intambara y’iminsi itandatu (6-Day War).

Mu mwaka w’1973, umugabo witwaga Ahmed Yassin, wari ufite ubumuga bw’ingingo zose z’umubiri, yashinze ikigo kitwaga al-Mujama al-Islamiya cyakoraga nk’ishami rya Muslim Brotherhood mu ntara ya Gaza. Iki kigo kikaba cyarakoraga ibikorwa bitandukanye byo gufasha abatishoboye mu ntara ya Gaza, ku buryo leta ya Israel nayo yamuhaga amafaranga kugira ngo yagure ibikorwa bye. Binyuze muri uyu muryango nibwo Ahmed Yassin yatangiye gushakira abanyapalestine intwaro bifashishaga mu kurwanya Israel.

Nyuma y’uko umutwe wa Hamas utangiye gukora ni bwo bamwe mu bategetsi ba Israel bicujije impamvu bahaye uyu mugabo ubufasha. Umwe muri bo witwa Avner Cohen yavuze ko israel ubwayo ari yo yashinze Hamas binyuze mu bufasha yahaga Ahmed Yassin.

Ahmed Yassin

Mu mwaka w’1985, Ahmed Yassin yatawe muri yombi na leta Israel azira kuba umuryango we wari usigaye wivanga mu bikorwa byo gutanga intwaro zo kurwanya israel. Gusa uyu mugabo yaje kurekurwa mu mwaka wakurikiyeho w’1986 mu gikorwa cyo guhanahana imfungwa hagati ya Palestine na Israel.
Avuye mu munyururu muri Israel, Ahmed Yasssin yashinze umutwe wari ugamije gucunga umutekano w’ibikorwa bye ariko nanone ukaba wari ufite inshingano zo gutahura abatasi bajyaga kugurisha amakuru kuri Israel.

Tariki 9 Ukuboza 1987, imodoka y’igisirikare cya Israel yiciye abanyapalestine 4 kuri imwe mu nzira zinyurwamo binjira cyangwa se basohoka mu ntara ya Gaza. Ibi byatangije imyigagarambyo ikomeye yo kwamagana Israel yaje kumenyekana ku izina rya Intifada ya mbere. Mu minsi ya mbere y’iyi myigaragambyo, Ahmed Yassin ndetse na benshi mu bagize Muslim Brotherhood bahuriye iwe mu rugo maze bemeza ko nabo bagombaga kugira akantu bakora mu rwego rwo kwifatanya n’abandi banyapalestine.

Itangazo ryashyizwe ahagaragara tariki 14 Ukuboza 1987, niryo ryatangije ibikorwa bya Hamas, ariko izina “Hamas” ryo ryatangiye gukoreshwa guhera mu kwezi kwa Mutarama 1988.

Hamas ifite uwuhe mugambi?

Mu kwezi kwa Kanama 1988, nibwo Hamas yashyize ahagaragara inyandiko yerekanaga amategeko ayigenga ndetse n’imigabo n’imigambi yayo. Muri iyi nyandiko abagize Hamas bavugaga ko ari umuryango ushingiye kuri Muslim Brotherhood, ugamije gushinga leta igendera ku mahame ya kisilamu muri Palestine, igasimbura leta ya Israel isanzwe ihari. Hamas ivuga ibi bizagerwaho ari uko leta ya Israel ibanje kurimburwa cyangwa se igasenywa burundu. Hamas ivuga kandi ko nta kindi gisubizo gishoboka ku kibazo cya Palestine usibye intambara ntagatifu (Jihad), kuko ubuhuza bw’ibihugu n’imiryango mpuzamahanga nta musaruro bwigeze butanga kugeza ubu.

Ese Hamas ni umutwe w’iterabwoba?

Kuri ubu ibihugu bitandukanye birimo Israel USA, Canada, Ubwongereza, Ubuyapani n’ibihugu bigize umuryango w’ubumwe bw’Uburayi bivuga ko Hamas ari umutwe w’iterabwoba. Ariko ku rundi ruhande ibihugu nka Iran, Uburusiya, Turkiya Ubushinwa na Misiri ntabwo bifata Hamas nk’aho ari umutwe w’iterabwoba.
Kuba Hamas ifatwa nk’umutwe w’iterabwoba, ku ruhande rumwe bituruka ku kuba mu bihe bitandukanye yarakunze gukora ibitero by’ubwiyahuzi byagiye byibasira abanya-Israel baba abasirikare ndetse n’abasivili.

Hamas iyoborwa nande?

N’ubwo henshi ku isi izwi nk’umutwe w’iterabwoba uhanganye na Israel, mu by’ukuri iyo urebye imitere n’imikorere ya Hamas ubona ko imeze nk’ umuryango mugari ufite amashami atandukanye akora ibikorwa bitandukanye birimo ibyo gutanga serivisi zitandukanye zifasha abatuye muri Gaza kugira imibereho myiza, hakaba ishami rishinzwe ivugabutumwa rya kisilamu, ishami rishinzwe itangazamakuru, ishami rishinzwe ibikorwa bya politiki ndetse n’ishami rishinzwe ibya gisirikare ari naryo rikunze kuvugwa cyane. Iri shami rishinzwe ibikorwa bya gisirikare rikaba rizwi ku izina rya Izzedine al-Qassam Brigades. Niryo ritegura ndetse rikanashyira mu bikorwa ibikorwa bya gisirikare abanyapalestine bahanganyemo na Israel.

N’ubwo Hamas ari umutwe ufite ibikorwa byawo muri Palestine hagati, abayobozi bakuru b’uyu mutwe benshi baba hanze y’igihugu. Mu mwaka wa 2017, akanama ngenzuramikorere ka Hamas (Majlis al-Shura) ari nako gafata ibyemezo byose, katoreye Ismail Haniya kuyobora Hamas. Uyu Ismail Haniya akaba atuye mu gihugu cya Qatar.

Ismail Haniya

Ese Hamas ikura he ubushobozi bwo gukora?

Iki gihugu cya Qatar kimwe n’ibindi bihugu byinshi by’abarabu, ni bamwe mu baha Hamas ubufasha bw’amafaranga kugira ngo ibashe gukomeza ibikorwa byayo muri Gaza.

Mu mwaka wa 2011, Hamas ikaba yari ifite ingengo y’imari ya miliyoni 70 z’amadolari kandi 85% by’ayo mafaranga yavuye hanze yaPalestine. Usibye Qatar, ibindi bihugu bivamo amafaranga yo gufasha Hamas ni Iran, Jordan, Kuwait, Saudi Arabia, Ubwongereza, Leta Zunze Ubumwe za Amerika, Ubutaliyani ndetse n’Ubufaransa. Amenshi muri aya akaba ari amafaranga akusanzwa n’abantu bashyigikiye ibikorwa bya Hamas byo kurwanya leta ya Israel.

Kuki Hamas ikorera muri Gaza gusa?

Kuva mu mwaka wa 2007, Hamas niyo ifite ubutegetsi mu ntara ya Gaza, mu gihe ishyaka rya Palestine Liberation Organization (PLO) rifite ubutegetsi mu gace ka West Bank. Mu mwaka wa 2006, nyuma y’amatora y’inteko ishinga amategeko Hamas n’ishami rya PLO rizwi nka Fatah barwaniye ubutegetsi muri Gaza kugeza ubwo Hamas yatsindaga bituma abayoboke ba PLO bose birukanwa ku butegetsi muri Gaza, maze Hamas isigara ari yo ifite ubutegetsi gusa.

Hamas itegeka abantu barenga miliyoni ebyiri batuye muri iyi ntara ya Gaza ifite uburebure bwa kilometero 41 n’ubugari bwa kilometero 10 gusa. Ibitero byose Hamas ikora bikaba bituruka aho muri Gaza.

Uyu mwangavu witwa Neha Paswan akaba yarakubiswe inkoni nyinshi na sekuru ndetse na ba nyirarume nyuma y’intonganya zari zishingiye ku myambarire ye.

Nyina w’uyu mukobwa witwa Shakuntala Devi yabwiye BBC ko Paswan yari yiyirije umunsi wose, hanyuma ku mugoroba yambara ipantalo y’ikoboyi ndetse n’umupira mu gihe yari agiye mu masengesho. Ababyeyi be bakuru bamubwiye ko batishimiye iyi myambarire maze na we abasubiza ko ipantalo yagenewe kwambarwa kandi ko yari buyambare.

Hakurikiyeho intonganya na zo zaje kuvamo gukubitwa bikabije by’uyu mwana w’umukobwa, kugeza ubwo ataye ubwenge.

Shakuntala Devi agira ati: “Bahamagaye imodoka, bavuga ko bamujyanye kwa muganga, ariko banga ko mbaherekeza. Nahise ntabaza abo mu muryango wanjye, maze bageze ku bitaro basanga ntawe uhari. Umunsi wakurikiyeho nibwo twumvise inkuru ko hagaragaye umurambo w’umwana w’umukobwa umanitse munsi y’ikiraro. Twagiye kureba ibyo ari byo maze dusanga ari Neha.”

Inkuru dukesha BBC iravuga ko polisi y’aho mu Buhinde iri gukurikirana abantu icumi harimo ababyeyj bakuru ba Neha, ba nyirarume, ba nyirasenge, babyara be ndetse n’uwari utwaye imodoka kugira ngo bagezwe imbere y’ubutabera, kugeza ubu bane muri bo bakaba ari bo bamaze gutabwa muri yombi.

Shakuntala Devi avuga ko umuryango w’umugabo we washakaga ko ava mu ishuri, hakiyongeraho ko bamutotezaga kubera imyambarire ye, dore ko Neha yakundaga kwambara imyenda igezweho.

Abagore aho mu Buhinde bakunze gukorerwa ihohoterwa ry’uburyo butandukanye, harimo no kuba inda bizwi ko izavamo umukobwa hari igihe ikurwamo. Ni mu gihe kandi abagore 20 bicwa buri munsi bazizwa kuba batatanzweho inkwano ihagije.

Mu bice by’icyaro cy’u Buhinde abagore bategekwa kwambara imyenda runaka, bakabwirwa aho bashobora cyangwa se badashoboka kujya, abo batemerewe kuvugisha, kugeza n’aho umugore wahukanye kubera ko afatwa nabi n’umugabo we ashobora kubikubitirwa n’umuryango we. Hari kandi n’abandi bakubitwa kubera ko babafashe barimo kuvugira kuri telefone.

Ku itariki ya mbere Gicurasi nibwo ubukwe bw’aba bombi bwari buteganyijwe kuba. Uwo munsi warageze, maze imiryango yombi ihurira mu birori by’akataraboneka.

Mu gihe umusore n’umugeni we biteguraga kwambikana impeta z’urudashira, nibwo umukobwa yabwiye umusore ko agiye kubanza kumuha ikizamini cy’imibare.

Inkuru dukesha igitangazamakuru Russia Today iravuga ko uyu mukobwa yari asanzwe akeka ko umusore ashobora kuba atarakandagiye mu ishuri.

Ku munsi w’ubukwe rero nibwo umukobwa yahisemo guha umusore ikizamini cyo kuvuga mara ya kabiri (ni ukuvuga uburyo bwo gukuba kabiri n’indi mibare kuva kuri zeru kugera ku icumi), umusore iramunanira.

Mubyara w’uyu mukobwa yabwiye itangazamakuru ko nyuma yo kubona ko umusore ananiwe iki kizamini umuntu yavuga ko cyoroshye, umuryango w’umukobwa wabifashe nk’aho uw’umuhungu ari indyarya, bityo bafata icyemezo cyo guhagarika ubukwe, imiryango yombi ikaba yarumvikanye ko impano zose zari zaratanzwe zizagarurwa.

Si ubwa mbere ibintu nk’ibi bibaye mu ntara ya Uttar Pradesh, dore ko mu mwaka wa 2015, umukobwa yabenze umusore ku munsi w’ubukwe, ubwo yari amuhaye ikizamini cyo guteranya 15 na 6, maze umuhungu akavuga ko bingana na 17.

Undi mukobwa na we yabenze umusore ku munsi w’ubukwe nyuma yo gusanga uwo musore atazi kubara amafaranga.

Aho mu Buhinde bikaba bikiri umuco ko imiryango ari yo itegura ubukwe, umunsi w’ubukwe ukarinda ugera abageni batari bahura amaso ku yandi na rimwe.

Telefone ikora byinshi uretse guhamagara no kwitaba

Kuva kuri telefone za mbere zakoreshaga insinga kugira ngo zohereze amajwi (fixe), ukagera kuri telefone zifashisha iminara kandi umuntu ashobora kugendana (mobile), zose zifatwa ahanini nk’ibikoresho by’itumanaho cyane cyane binyuze mu majwi.

Guhera mu ntangiriro z’ikinyejana cya 21, telefone yavuye ku kuba ari igikoresho cyo kuganiriraho mu buryo bw’amajwi n’ubutumwa bwanditse gusa (SMS), ahubwo itangira kwifashishwa mu gufata no koherezanya amashusho, kujya kuri Internet, koherezanya ubutumwa bwihuse, kumenyana n’abantu ku mbuga nkoranyambaga n’ibindi.

Kubera ubushobozi bushyirwa mu ikorwa ry’amatelefone, zikongerwamo ibintu byinshi, kuri ubu telefone ishobora gukora ibindi byinshi birenze kuba yakohereza cyangwa se ikakira ubutumwa gusa.

1. Telefone ishobora kwifashishwa mu gupima imikorere y’umutima

‘Instant Heart Rate na Cardio’ ni applications (App) umuntu ashobora gushyira muri telefone ye maze akabasha gupima umutima. Icyo ukora, ni ugushyira urutoki rwawe imbere ya camera ya telefone, maze izo App zigapima uburyo ibara ry’uruhu rihinduka bitewe n’uburyo amaraso arimo kugenda mu mubiri. Nyuma y’igihe gito zishobora kukubwira uburyo umutima wawe utera.

2. Telefone yawe ishobora gusoma ‘bar codes’

“Bar Codes” ni uburyo bwo kubika amakuru hifashishijwe imirongo y’umukarara ifite umubyimba utandukanye, ndetse n’intera hagati y’iyo mirongo ikaba itandukanye.

Ubwo buryo bwavumbuwe mu 1951, bukaba bukoreshwa cyane mu maduka akomeye (supermarkets), kugira ngo uburyo bwo kwishyura bwihutishwe. Bar codes zifashishwa kandi mu kumenya amakuru arenzeho ku gikoresho ziriho.

Kwa muganga zifashishwa mu kubika amakuru yerekeye umurwayi, mu iposita zigakoreshwa mu kumenya aho ibaruwa cyangwa se umuzigo runaka ugeze mu rugendo.

Kugira ngo telephone ibashe gusoma bar code bisaba kuba washyizemo App ifite ubushobozi bwo kuyisomae, urugero iyitwa “QR&Barcode Scanner”.

3. Telephone yawe ishobora gufata za ‘negatif’ igakuramo amafoto

Telefone yagufasha gukura ifoto muri ’negatif’

Kuri ubu biroroshye cyane gufata telefone yawe, ugafotora, ifoto ukayisangiza inshuti zawe mu gihe kitageze no ku munota. Ariko kera siko byari bimeze. Iyo gafotozi yafataga ifoto, byasabaga ko abanza kuyijyana kuri “studio photo”, bakayihanagura, ubundi nyuma y’iminsi mike cyangwa se amezi menshi akaba ari bwo ubasha kubona ya foto yawe.

Zimwe muri camera zo muri telefone zigira ikizwi nka “negative effect” gituma ubasha gufata za negatif ubundi ugakuramo amafoto agaragara neza. Camera ya telefone yawe ibaye idafite iyi negative effect, washyiramo app yitwa “HELMUT Film Scanner”.

4. Camera ya telefone yawe ishobora kumenya umukono, ibintu, ndetse na resitora.

Kugira ngo camera ya telefone yawe ibashe kumenya ibintu biri imbere yayo bisaba gushyiramo Apps zitandukanye bitewe n’ubwoko bwa telefone ufite. Amazon’s Flow ni App igufasha kumenya igikoresho runaka, niba ukigeze ahantu utazi ikaba yakubwira izina ryaho.

App yitwa Google Lens, yo ushobora kuyifashisha no mu gusobanura ururimi rw’amahanga, urugero ubonye urupapuro rwanditseho ururimi utumva, ishobora kugusemurira ibyanditse kuri urwo rupapuro.

5. Camera ya telephone yawe ishobora kwifashishwa mu gufata ibipimo.

Telefone ishobora kuguha ingero z’ibikoresho runaka

Ushaka kureba ingano y’ikintu runaka (uburebure cyangwa se ubugari) wakoresha Apps zitandukanye harimo iyitwa “Ruler App”. Urugero niba ushaka kureba uko intebe cyangwa ameza mu nzu yawe bingana, cyangwa se ushaka kureba uko uruhande rumwe rw’inzu yawe rureshya, ariko ukaba udafite imetero yo gupima wakoresha iyo App.

6. Telefone yawe ishobora kugufasha mu kwita ku mwana wawe

Cloud Baby Monitor na BabyCam ni zimwe muri Apps zigufasha kumenya uko umwana wawe ameze mu cyumba cye. Izo Apps zikaba zifasha cyane cyane ababyeyi bafite abana b’impinja, kumenya niba umwana akangutse mu ijoro hagati, kumenya niba umwana agize ikibazo, zigahita zihamagara nimero y’umubyeyi.

7. Telefone ishobora gukora nka telekomande

Telefone yasimbura telecomande

Mu gihe wataye telekomande ya televiziyo yawe cyangwa se idakora neza, ushobora gushyira muri telefone yawe App zitandukanye zirimo iyitwa Universal TV Remote Control, maze ukabasha kuyikoresha mu gucana, kuzimya, no guhindura amashene kuri TV yawe.

8. Ushobora kwatsa imodoka yawe ukoresheje telefone!

Viper SmartStart ni App ishobora gusimbura imfunguzo z’imodoka yawe. Ukoresheje iyo App ushobora gufunga no gufunugura imiryango y’imodoka yawe cyangwa se ukabasha no kuyatsa bitabaye ngombwa ko ukenera urufunguzo.

Capitol: Inyubako iberaho umuhango w’irahira rya perezida wa USA

Iyi ni imwe mu mpamvu yatumye Perezida Donald Trump ahitamo kutitabira umuhango w’irahira rya Joe Biden ugiye kumusimbura kuri uwo mwanya. Ariko se wari uzi ko Donald Trump atari we perezida wenyine wa Amerika wanze kwitabira ukurahira k’uwo basimburanye?

Dore bimwe mu bintu bidasanzwe byagiye biranga imihango yo kurahira kw’abakuru b’igihugu muri USA:

1. George Washington wabaye Perezida wa mbere wa USA (1789–1797) yagombye kuguza amafaranga kugira ngo abashe kwitabira umuhango w’irahira rye. N’ubwo ku ruhande rumwe uyu mugabo yari umukire umuntu arebye ingano y’ubutaka yari atunze, dore ko yari afite hegitari zisaga ibihumbi 20 z’ubutaka, ku rundi ruhande yari umukene kuko ngo akenshi nta mafaranga mu ntoki yabaga afite. Byabaye ngombwa rero ko aguza amafaranga kugira ngo abashe gukora urugendo rwerekeza mu mujyi wa New York aho imihango yo kurahira yabereye.

2. Mu gihe kuri ubu imihango yose ijyanye no kurahira k’umukuru w’igihugu isigaye ibera mu murwa mukuru Washington, kera ntabwo ari ko byari bimeze. Kugeza mu mwaka wa 1801 imihango yo kurahira yaberaga mu mujyi wa New York cyangwa se uwa Philadelphia. Iyi mijyi yombi ikaba yarigeze kuba imirwa mikuru ya USA.

Mu gihe kandi ubu bimenyerewe ko iyi mihango ibera ku nzu y’inteko ishinga amategeko (The Capitol) kandi ikabera hanze, mu bihe byashize, kubera impamvu zitandukanye, yagiye ibera ahandi hantu hatandukanye harimo muri White House (ibiro bya Perezida), mu ndege, ndetse no muri Capitol imbere kubera ko ibihe byabaga byahindutse cyane bitewe ahanini n’ubukonje bwinshi.

3. Kuri ubu biramenyerewe ko imihango y’irahira ry’umukuru w’igihugu iba buri gihe tariki 20 Mutarama, ariko kugeza mu mwaka wa 1937, iyi mihango yabaga tariki 4 Werurwe. Inteko ishinga amategeko ya USA yahinduye itegeko nshinga mu mwaka wa 1933, ikemeza ko iyi mihango yimurirwa tariki 20 Mutarama. Iyo iyi tariki ihuye n’umunsi wo ku cyumweru, perezida mushya arahira mu muhango uba hari abantu bake, ubundi imihango rusange yo kurahira ikimurirwa ku wa mbere tariki 21 Mutarama. Ni ukuvuga ko iki gihe perezida mushya arahira inshuro ebyiri. Ibi bimaze kuba inshuro eshatu; mu 1957, 1985, na 2013 ubwo Barack Obama yarahiraga manda ya kabiri. Gusa mu mwaka wa 1849, Zachary Taylor wabaye Perezida wa 12 wa USA, yanze kurahira ku cyumweru kubera ko ngo yashakaga “kubahiriza umunsi w’isabato”. Ibi byatumye habaho icyuho mu butegetsi bw’icyo gihugu, ku buryo byabaye ngombwa ko hitabazwa perezida wa sena David Rice Atchison, kugira ngo abe ari we uba perezida mu gihe cy’amasaha 24. Kugeza ubu haracyagibwa impaka hibazwa niba David Rice Atchison na we yabarwa nka perezida w’icyo gihugu.

Donald Trump ubwo yarahiriraga kuyobora muri manda y’imyaka ine yarangiye kuri uyu wa Gatatu

4. N’ubwo Donald Trump atitabiriye irahira rya Joe Biden, si we perezida wenyine wakoze ibi mu mateka y’iki gihugu. Uwa mbere wabikoze ni John Adams (wabaye perezida wa 2 wa USA) wanze kwitabira irahira rya Thomas Jefferson mu 1081, kubera ko batumvikanaga. Uwa kabiri wabikoze ni umuhungu we John Quincy Adams (wabaye perezida wa 6 wa USA) wanze kwitabira irahira rya Andrew Jackson mu 1829. Martin Van Buren (wabaye perezida wa 8 wa USA) na we ntabwo yitabiriye irahira rya William Henry Harrison mu 1841 kubera impamvu zitamenyekanye. Andrew Johnson wabaye Perezida wa 17 wa USA we yahisemo gutegura Inama y’Abaminisitiri ku munsi wa nyuma wa manda ye aho kugira ngo yitabire irahira rya Ulysses S. Grant mu 1869. Undi ni Woodrow Wilson wabaye perezida wa 28 wa USA utarabashije kwitabira irahira rya Warren G. Harding mu 1921 kubera impamvu z’uburwayi.

5. Franklin Pierce wabaye perezida wa 14 wa USA, yanze “kurahirira ku mugaragaro” ahubwo ahitamo “kwemera ku mugaragaro” inshingano z’umukuru w’igihugu. Pierce akaba yarakoze ibi kubera ko yari amaze gutakaza ukwemera kwe, nyuma y’urupfu rw’umuhungu we rukumbi rwabaye amezi abiri mbere y’uko arahira. Bitandukanye n’abandi bategetsi ba USA, Pierce yanze gukoresha Bibiliya mu irahira rye.

6. William Henry Harrison wabaye perezida wa 9 wa USA, yesheje agahigo ko kuba ari we wavuze ijambo rirerire ubwo yarahiriraga inshingano ze mu mwaka wa 1841. Ijambo rya Harrison ryamaze amasaha abiri, arivugira mu bukonje bukabije. Ibi byamuteye indwara y’ibihaha yamuhitanye nyuma y’ukwezi kumwe gusa. Harrison akaba afite agahigo ko kugira ijambo rirerire no kuba ari we wamaze igihe gito ku butegetsi, dore ko yabumazeho iminsi 31 gusa.

Ni mu gihe George Washington we ijambo rye ryamaze igihe gito cyane kuko yakoresheje amagambo 135 gusa.

7. Barack Obama yarahiye inshuro 4! Mu mwaka wa 2009 ubwo yarahiraga bwa mbere, perezida w’urukiko rw’ikirenga yasomye nabi amwe mu magambo agize indahiro, biba ngombwa ko Barack Obama yongera kurahira ku nshuro ya kabiri, umunsi ukurikiyeho, mu rwego rwo kwirinda ko hari izindi ngaruka byazateza mu gihe kiri imbere. Barack Obama yongeye kurahira ku nshuro ya gatatu tariki 20 Mutarama 2013, ubwo yari atangiye manda ye ya kabiri. Ariko uwo munsi wahuriranye no ku cyumweru biba ngombwa ko yongera kurahira mu ruhame ku wa mbere tariki 21 Mutarama 2013.

Barack Obama yarahiye inshuro enye

8. Kurahira k’umukuru w’igihugu muri USA ni igikorwa gikurura itangazamakuru ryaba iry’aho muri USA ndetse n’ahandi ku isi.

Mu mwaka wa 1801 nibwo bwa mbere ikinyamakuru cyandika kuri iki gikorwa, aho ikinyamakuru National Intelligencer gisohora ijambo rya Thomas Jefferson.

Ifoto ya mbere y’irahira ry’umukuru w’igihugu muri USA yafashwe mu mwaka wa 1857, mu irahira rya James Buchanan.

Amashusho (video) ya mbere y’irahira ry’umukuru w’igihugu yafashwe mu mwaka wa 1897, ubwo William McKinley yatangiraga imirimo ye.

Mu 1925, irahira rya Calvin Coolidge ryanyujijwe kuri radio mu gihugu hose, naho mu 1949 irahira rya Harry S. Truman ryanyujijwe kuri televiziyo ku nshuro ya mbere.

Mu gihe kuri ubu abantu benshi hirya no hino ku isi bari bubashe kureba irahira rya Joe Biden binyuze kuri murandasi, mbere y’umwaka wa 1997, ntabwo byari bushoboke. Bill Clinton ni we Perezida wa mbere warahiye kandi imihango igacishwa kuri Internet.

Umukuru w’icyo gihugu, uwo ari we wese, agira ingaruka ku buzima bw’abanyamerika n’abatuye isi muri rusange, ari na yo mpamvu ibiri buve mu matora y’umukuru w’igihugu kuri uyu wa kabiri bizagira ingaruka kuri buri wese.

Dore bimwe mu by’ingenzi ukwiye kumenya ku matora yo muri USA:

1.Amashyaka

Politiki yo muri USA iganzwa cyane n’amashyaka abiri ari yo iry’Abarepubulikani (Republicans) n’iry’Abademokarate (Democracts). Ari na yo mpamvu umukuru w’igihugu buri gihe ava muri rimwe muri aya mashyaka.

Ariko aya mashyaka si yo yonyine akorera muri icyo gihugu kuko hari andi mashyaka abarirwa mu majana harimo azwi cyane nka Libertarian Party, Green Party, Constitution Party na Party for Socialism and Liberation. Harimo kandi amashyaka aharanira inyungu z’ikintu runaka nka Legal Marijuana Now Party riharanira ko ibiyobyabwenge byemerwa cyane cyane urumogi. Nk’uko tuza kubibona mu kanya, amenshi muri aya mashyaka afite abakandida na bo bari guhatana mu matora y’umukuru w’igihugu.

2. Inteko itora (Electoral College)

N’ubwo abaturage barenga miliyoni 255 ari bo bagomba kwitabira amatora y’umukuru w’igihugu muri USA, mu by’ukuri abantu 538 bagize inteko itora ni bo bazahitamo uzaba Perezida. Uzaba perezida akaba agomba kugira byibuze amajwi 270 muri aya 538.

Buri Leta muri 50 zigize USA igenerwa umubare w’abantu bagomba kuyihagararira muri iyi nteko itora hashingiwe ku mubare w’abantu batuye iyo Leta. Ni ukuvuga ko abaturage basanzwe baba barimo gutora ku rwego rwa Leta yabo kugira ngo bahe umukandida runaka amajwi ahagije y’abazamuhagararira mu nteko itora. Ni na yo mpamvu umukandida ashobora kugira amajwi menshi y’abaturage bamutoye (popular vote) ariko ntagire amajwi ahagije y’abamuhagarariye mu nteko itora. Ibi ni byo byabaye kuri Hillary Clinton mu mwaka wa 2016, ubwo yatsindwaga na Donald Trump.

Ikindi ni uko umukandida ugize amajwi menshi muri Leta ahita ahabwa amajwi yose y’abahagarariye iyo Leta muri ya nteko itora.

3. Hari Leta zifite ingufu kurusha izindi

Nyinshi muri Leta zigize USA ziba zifite ishyaka runaka zizwiho gushyigikira. Ni na yo mpamvu muri Leta 50 zigize icyo gihugu, inkeya ari zo zihabwa umwanya munini iyo abakandida barimo kwiyamamaza kuko zo ziba zizwiho kuba zashyigikira umukandida umwe cyangwa uwundi. Izo Leta zizwi nka «swing states ».

Zimwe muri zo harimo Florida na Ohio, mu gihe Arizona na Texas zari zisanzwe ari iz’Abarepubulikani, mu matora yo muri uyu mwaka na zo zirimo guhatanirwa n’abakandida bombi. Izindi Leta zishobora kubogamira ku Barepubulikani cyangwa Abademokarate ni Georgia, Iowa, Michigan, Minnesota, Nevada, New Hampshire, North Carolina, Pennsylvania na Wisconsin.

4. Ntabwo harimo gutorwa umukuru w’igihugu gusa

N’ubwo hakomeje kuvugwa amatora y’umukuru w’igihugu muri USA, ntabwo ari bo bategetsi bonyine barimo gutorwa. Abaturage ba Amerika barimo kandi gutora abagize inteko ishinga amategeko, imitwe yombi (Abadepite n’Abasenateri).

Imyanya yose uko ari 435 y’Abadepite irimo guhatanirwa, mu gihe muri Sena harimo guhatanirwa imyanya 33. Abademokarate barimo gushaka kugira abadepite benshi n’abasenateri benshi kugira ngo mu gihe perezida Donald Trump yakongera gutorwa bazabe bafite ubushobozi bwo gusubiza inyuma bimwe mu byemezo yafata.

5. Abakandida 1,214

Nk’uko twari tumaze kubivuga abakandida bahagarariye Abademokarate n’Abarepubulikani ni bo barimo kuvugwa cyane muri aya matora y’umukuru w’igihugu, ariko mu by’ukuri aya matora arimo abakandida 1,214 bahatanira umwanya wa Perezida.

Harimo abakandida bahagarariye ariya mashyaka yandi twavuze nka Jo Jorgensen uhagarariye ishyaka Libertarian Party, Howie Hawkins uhagararriye Green Party, Gloria La Riva uhagarariye Socialism and Liberation Party, n’abakandida bigenga, barimo icyamamare Kanye West.

Usibye Jo Jorgensen wabashije kwiyandikisha kuri lisiti y’itora muri Leta 50 zose zigize USA, abandi bakandida bagiye banditse kuri lisiti y’itora muri Leta zimwe mu gihe batagaragara kuri lisiti yo mu zindi.

Amategeko agenga itora aho muri Amerika kandi ateganya ko umukandida utagaragara kuri lisiti y’itora, ashobora gusaba abamushyigikiye kwandika izina rye ku rupapuro rw’itora bemeza ko ari we bahaye ijwi ryabo (write-in candidate).

Hifashishijwe BBC & Wikipedia

Icyuma iyi sake yakoreshaga irwana na ngenzi yayo ni cyo cyakomerekeje uyu mupolisi bimuviramo urupfu

Inkuru yatangajwe na televeision CNN iravuga ko ibi byabereye mu Ntara yitwa Samar iri mu Majyaruguru y’icyo gihugu, ubwo abapolisi bari mu gikorwa cyo guhagarika iyi mikino yari irimo kubera mu nzu iri munsi y’ubutaka cyangwa se ‘cave’.

Uyu mupolisi rero yagerageje guterura iyi nkoko ariko icyuma cyari cyashyizwe ku maguru yayo mu gihe yari irimo kurwana kimutema umutsi wo ku kuguru.

Ubusanzwe inkoko zishyirwa mu mikino yo kurwana zambikwa ibyuma ku maguru ari na byo bituma imwe yica ngenzi yayo bityo ikaba iratsinze.

Muri Philippines bakunda umukino wo kurwanisha amasake

Umuvugizi wa polisi yavuze ko uyu mupolisi witwa Christina Bolok yajyanywe kwa muganga arimo kuvirirana, ariko bamugezayo amaraso yamushizemo ahita ashiramo umwuka.

Imikino yo kurwanisha inkoko aho muri Philippines yari yarahagaritswe mu kwezi kwa munani nyuma yo gusanga aho ibera ari hamwe mu hantu haturukaga abarwayi benshi ba Covid-19.

Usibye iyi nkoko yishe umupolisi, aho byabereye bahasanze izindi nkoko zirindwi, mu gihe abantu batatu bari bahari batawe muri yombi, naho abandi batatu baratoroka.

Aba barimu bangana na 6.6% by’abarimu bose mu gihugu, bakaba bakora nta mpapuro cyangwa se dosiye bafite bitewe ahanini n’uburangare bw’abashinzwe kugenzura umurimo.

Iyi raporo itanga urugero rwo mu mashuri atandatu yo mu Karere ka Nyagatare, aho nta mwarimu n’umwe ufite ibyangombwa. Mu barimu 2,430 babarurwa muri ako karere, 807 nta byangombwa bafite.

Mu Karere ka Nyamagabe ho, abarimu 391 mu barimu 2,586 nta byangombwa bafite, mu gihe muri Gicumbi ari abarimu 187.

Iyo raporo ivuga kandi ko bidasobanutse uburyo abarimu 4,087 mu turere 11 bageze mu kazi kandi nta mabaruwa abashyira mu myaka barimo bafite.

Ni mu gihe kandi hari abarimu 762 bari mu kazi ariko batarigeze berekana impamyabumenyi zabo. Ibi bikaba bituma umuntu yakwibaza niba koko bafite ubushobozi bwo kuba bakwigisha.

Imibare ya Minisiteri y’Uburezi yerekana ko mu Rwanda habarurwa abarimu ibihumbi 63,986, muri bo abigisha mu mashuri abanza bujuje ibisabwa ni 98.6% mu gihe mu mashuri yisumbuye abujuje ibisabwa bangana na 76%.

Inkuru dukesha The New Times iravuga ko iyi raporo yagombaga kugezwa imbere y’Inteko Ishinga Amategeko ku gicamunsi cyo kuri uyu wa mbere.

Mu kiganiro n’itangazamakuru ejo ku cyumweru, Mutahi Kagwe yavuze ko abakiliya bajya mu tubari babyina imbyino izwi nka ‘Jerusalema Dance Challenge’ ariko bakirengagiza ibwiriza ryo gusiga intera hagati yabo.

Agira ati: “Nabwiwe ko hari imbyino nshya igezweho cyane mu tubari…ngo iyo Jerusalema igiyemo, amabwiriza yo kwirinda yose ahita ashyirwa ku ruhande. Ndabinginze, nimubyine Jerusalema ariko mwibuke gusiga intera hagati yanyu.”

‘Jerusalema Dance Challenge’ ni imbyino yamenyekanye cyane kuva iyi ndirimbo yasohoka; by’umwihariko muri iki gihe isi yose ikomeje guhangana n’icyorezo cya coronavirus.

Minisitiri Kagwe aravuga ibi mu gihe ejo ku wa kabiri Abadepite mu Nteko Ishinga Amategeko ya Kenya na bo bazashyira ahagaragara amashusho yabo na bo barimo kubyina iyi ndirimbo.

Mu mpera z’icyumweru gishize, aho muri Kenya habonetse abarwayi bashya 685 (ku wa gatandatu) na 616 (ku cyumweru). Ni mu gihe utubari, amashuri ndetse n’insengero byamaze gufungurwa.

‘Jerusalema’ ni indirimbo y’abahanzi bo mu gihugu cya Afurika y’Epfo, Master KG na Nomcebo. Ikaba ikunzwe cyane ku rwego mpuzamahanga, aho yageze ku rutonde rw’indirimbo zikunzwe cyane mu bihugu nka Leta Zunze Ubumwe za Amerika, u Bubiligi, u Busuwisi, u Butaliyani, Espagne, u Bufaransa, Canada n’ibindi.

Iyi ndirimbo ikaba imeze kurebwa inshuro zigera kuri miliyoni 190 ku rubuga rwa YouTube.

Uyu mugore w’imyaka 22 witwa Julija Adlesic yatahuweho kuba yarafashe ubwishingizi butanu butandukanye mu gihe cy’umwaka umwe wabanjirije uko guca ikiganza cye.

Iyo Adlesic adahamwa n’icyaha cy’uburiganya yari afite amahirwe yo guhabwa amafaranga y’indishyi agera kuri miliyoni imwe y’amapound ni ukuvuga asaga miliyari y’amafaranga y’u Rwanda.

Mu gihe Adlesic yavugaga ko ikiganza cye cyacitse mu gihe yari arimo gukata amashami y’ibiti, urukiko rwo mu murwa mukuru wa Slovenia, Ljubljana, rwasanze ahubwo yaragiciye ku bushake abifashijwemo n’umukunzi we ndetse n’abagize umuryango we.

Mu mwaka wa 2019 nibwo Adlesic na bamwe mu bagize umuryango we batawe muri yombi nyuma y’uko bagiye kwa muganga, uyu mugore nta kiganza afite.

Urukiko rwasanze baragiye kwa muganga kumuvuza ariko ikiganza bakagisiga inyuma ku bushake, kuko batashakaga ko abaganga bongera kukimuteraho. Ku bw’amahirwe (cyangwa se ibyago kuri Adlesic) abashinzwe ubutabazi babashije kubona icyo kiganza hakiri kare, barongera bagitera ku kuboko kwe.

Ubushinjacyaha buvuga ko umukunzi wa Adlesic yari yaranakoze ubushakashatsi kuri internet kugira ngo asobanukirwe n’imikorere y’ibiganza by’ibikorano mu minsi yabanjirije igikorwa, ari na ho bahera bavuga ko ibyo uwo mugore yakoze byari ku bushake, n’ubwo we akomeza kubihakana.

Inkuru dukesha BBC ivuga ko iyo umugambi wabo ugerwaho bari buhabwe amapound agera ku bihumbi 500, ku nshuro ya mbere, ubundi asigaye bakazajya bayahabwa buri kwezi.

Adlesic ashobora gufungwa imyaka ibiri, mu gihe umukunzi we yakatiwe gufungwa imyaka itatu.

Mu masoko harinjira abantu bakeya bagahaha, barangiza hakinjira abandi

Mu kiganiro yagiranye na KT Radio kuri uyu wa Gatanu tariki 21 Kanama 2020, Umuyobozi Nshingwabikorwa w’Akarere ka Kicukiro, Solange Umutesi, yavuze ko batangiye kugerageza uburyo bwo kwinjiza abaguzi mu matsinda y’abantu bake, bakagura ibyo bakeneye mu isoko, barangiza itsinda rikurikiyeho na ryo rikinjira.

Ubu buryo bushya bukaba buri kugeragezwa mu isoko rya Zinia riri mu Karere ka Kicurkiro.

Umutesi agira ati “Turasaba abaguzi kugerageza gukoresha umwanya muto ushoboka mu masoko. Ikindi ni uko turimo gusaba abaguzi kwirinda kwinjira igihiriri ari benshi ngo binjirire rimwe mu masoko. Twatangiye kubikora mu isoko rya Zinia, aho abantu binjira mu matsinda. Hakabanza hakinjira itsinda ry’abantu 50 bakagenda bakagura, bagahabwa iminota 15”.

Uwo muyobozi yongeraho ko iminota 15 ari yo myinshi, ariko bishobotse n’itanu yakoreshwa. Akomeza avuga ko kuva ubu buryo bwatangira kugeragezwa ku wa Gatatu tariki 20 Kanama 2020 mu isoko rya Zinia, babona burimo kugabanya ubucucike mu masoko.

Umutesi Solange avuga ko ingamba zidasanzwe zirimo gufatwa zijyana n’umwihariko wa buri soko. Ariko nanone akibutsa buri wese kugira uruhare rwe mu gutuma kino cyorezo kidakomeza gukwirakwira.

Ati “Ingamba zitandukanye zagiye zifatwa mu masoko bitewe n’umwihariko wa buri soko. Nari mvuze Zinia nk’umwihariko waho. Nitujya no mu isoko rya Gahanga na ho twahafatiye ingamba zihariye. Aho abaranguza, abagura ibintu byinshi, twabashyize ukwabo. Twabashakiye ahantu hihariye, ahantu hari ikibuga kugira ngo babashe kwisanzura”.

Yongeyeho ko izi ngamba zanageze mu masoko ya Kabeza n’isoko rya Gahoromani.
Ati “Ingamba zose zajyaho, ingamba ikomeye turimo dusaba abantu ni uko buri wese yakumva ko ibi bihe byarushijeho kuba ibidasanzwe. Cyane cyane ku bakoresha amasoko. Ibi birasaba ko buri wese yongera agatekereza, akumva ko niba bigeze aho amasoko asaba kuba afunze, ibihe birakomeye kurenza”.

Izi ngamba nshya ziri gufatwa ku masoko zije nyuma y’uko amasoko abiri manini yo mu Mujyi wa Kigali, ari yo isoko rya Nyarugenge (Kigali City Market), n’isoko ryo Kwa Mutangana yasanzwemo abantu benshi bafite ubwandu bwa Covid-19, bikayaviramo kuba afunzwe.

Mu minsi irindwi ishize mu Mujyi wa Kigali hakaba hamaze kuboneka abarwayi bashya ba Covid-19 basaga 400. Abenshi muri bo bakaba barabonetse muri ayo masoko.

Karen Gregory n’umugabo we Kevin Bevis

Uyu mugabo witwa Kevin Bevis, ukomoka mu gace ka Kent, mu gihugu cy’u Bwongereza, akaba yarafataga ibinini 20 buri munsi, rimwe na rimwe agasaba umukunzi we ko bajyana kwa muganga, ndetse muri uko kubeshya, inshuti z’umukobwa zamugiriye impuhwe zitangira gukusanya amafaranga yo kumufasha.

Mu buhamya bwe, madame Karen Gregory w’imyaka 50 avuga ko ubwo yari amaranye imyaka ibiri na Kevin w’imyaka 38, yamusabye ko batandukana. Icyo gihe ngo Kevin yifuzaga ko bajya baryamana n’abandi bantu, n’ubwo Karen we atabyifuzaga. Muri icyo gihe nibwo Kevin yaje kuvuga ko arwaye indwara ya cancer, bituma Karen ahagarika icyemezo yari yafashe cyo gutandukana, kuko yifuzaga kumwitaho mu burwayi bwe.

Wakwibaza uburyo umukunzi we witwa Karen Gregory, atigeze abasha gusobanukirwa iby’iki kinyoma mu gihe cy’umwaka wose.

Karen Gregory avuga ko iyo bajyaga kwa muganga, umugabo yasabaga umukunzi we kumutegerereza hanze, akamubwira ko atifuza ko amubona ari mu bitaro.

Madame Gregory agira ati: "Namujyanaga kwa muganga nkasigara mu modoka mutegereje. Yasohokaga afite ibipfuko ku mubiri we, akambwira uburyo abaforomo bamwitayeho. Yabaga afite ibikarito by’imiti yanywaga umunsi wose."

Karen yamufashaga kugenda yitwaje inkoni, kuko yavugaga ko adashobora kwigendesha.

Umushinjacyaha wo mu rukiko rw’aho i Kent, avuga ko muri uko kwitanga yita ku mukunzi we, Karen Gregory yemeraga no kuryamana n’abandi bagabo, kuko Kevin yavugaga ko bimushimisha.

Umunsi umwe Karen arimo gukora isuku mu nzu nibwo yaguye kuri ya miti maze asanga atari imiti ivura cancer, ahubwo ari ibinini bya vitamines ndetse n’izindi nyongera (supplements) zikenewe n’umubiri.

Mu mpera z’umwaka ushize wa 2019, nibwo Kevin yataye Karen ku munigo, avuga ko nta mpamvu yo kubaho afite. Karen yahise atanga ikirego mu rukiko bityo Kevin atabwa muri yombi. Imbere y’urukiko, Kevin yiyemerera ko atigeze arwara cancer.

Inkuru Kigali Today ikesha urubuga metro rwo mu Bwongereza ivuga ko Kevin yakatiwe n’urukiko igifungo cy’amezi 18, nyuma yo guhamwa n’ibyaha bibiri, birimo icyo gukubita no gukomeretsa n’icyo guhoza umukunzi we ku nkeke.

Aha bisaba gutunga urutoki ku mubare wa etaje wifuza kujyamo

Ku bantu bagira ubwoba bwo gukora ku mabuto ashobora kuba yanduye, umwenjeniyeri wo mu gihugu cy’u Buhinde yahimbye uburyo butuma umuntu abasha guhamagara asanseri, ikanamugeza kuri etaje yifuza kugeraho, bitabaye ngombwa ko hari buto n’imwe akanda akoresheje intoki.

Uyu Muhinde witwa Bhavin Ahir, asanzwe atuye muri etaje ya 12, mu nyubako ituwemo n’abantu amagana kandi bakoresha asanseri inshuro nyinshi ku munsi.

Avuga ko abantu bahora bafite ubwoba bwo gukora kuri buto ari na yo mpamvu yafashe icyemezo cyo kugira icyo abikoraho.

Ubwo u Buhinde bwatangiraga gahunda ya #GumaMuRugo mu kwezi kwa Werurwe uyu mwaka, Ahir yatangiye gukorera ubushakashatsi iwe mu rugo, ari na bwo yahimbye akuma kuri ubu kazwi nka ‘Sparshless’ (Sparsh bisobanura ‘gukora’ muri rumwe mu ndimi z’aho mu Buhinde).

Ako kuma gashyirwa iruhande rw’amabuto asanzwe ya asanseri. Kugira ngo umuntu ahitemo etaje ashaka kujyamo, icyo akora ni ugutunga urutoki ku mubare ujyanye n’iyo etaje. Urutoki rugomba kuba ruri kuri milimetero hagati y’icumi (10mm) na cumi n’eshanu (15mm) kugira ngo kano kuma gakore.

Kugeza ubu akuma ka Bhavin Ahir kari gukoreshwa mu miturirwa 15 yo mu Buhinde, kandi avuga ko amaze kubona abantu baturuka mu bindi bihugu birimo Kuwait, Leta Zunze Ubumwe z’Abarabu na Brazil, bashaka kumenya uko ako kuma gakora kugira ngo bakagure.

Si Bhavin Ahir wo mu Buhinde gusa wabashije guhimba uburyo bushya bwo gukoresha asanseri, kuko mu gihugu cya Thailand ho iduka rimwe ryashyizeho uburyo bwo gukoresha ikirenge kugira ngo uhitemo etaje ushaka kujyamo.

Aha ho bakoresha ikirenge

Mu Buyapani ho ikigo kimwe kirimo gucuruza uduti umuntu akoresha akanda buto, aho kugira ngo akoreshe intoki ze.

Inkuru dukesha shene ya televiziyo CNN, ivuga ko ubushakashatsi bwerekanye ko buto za asanseri zibaho umwanda uruta uwo ku ntebe zo mu misarani ya kizungu.

Ubushakashatsi kuri coronavirus bwerekanye kandi ko ibyago byo kwandurira muri asanseri biri hasi kuko umwuka uba ugenda neza, kandi abantu bakaba badatindamo.

Ariko nanone abahanga bavuga ko agakoko ka coronavirus gashobora kumara ahantu amasaha agera kuri 72, ari na yo mpamvu ari byiza kwirinda gukora kuri buto zo muri asanseri.

Ikigo cy’Abanyamerika gishinzwe gukumira indwara (CDC) kigira inama abaturage yo kwirinda gukora kuri za buto za asanseri n’intoki, ahubwo bakifashisha ikindi kintu, urugero agafuniko k’ikaramu, cyangwa se bagakoresha ubujana bw’intoki.

Muri iki gihugu abagore ntibemewe kwiyerekana mu ruhame

Rabia, yasubiye mu rugo ku mugabo we, amuha ‘ordonance’ (urupapuro rwa muganga) yari yahawe na muganga, kugirango amugurire imiti. Umugabo abonye izina ryanditse kuri ‘ordonance’, yahise atangira gukubita Rabia, amuziza kuba yaratanze izina rye ku wundi mugabo atazi.

Ibi byabaye kuri Rabia, ni ibintu bisanzwe aho muri Afghanistan, nk’uko igitangazamakuru BBC kibivuga.

Aho muri Afghanistan, akenshi imiryango itegeka igitsina gore guhisha amazina yabo no kutayabwira abantu bo hanze y’umuryango. Gukoresha izina ry’umugore mu ruhame ntibyishimirwa na benshi, ndetse hari ababifata nk’aho ari igitutsi.

Abagabo benshi muri icyo gihugu batinya kuvuga amazina ya bashiki babo, abagore babo cyangwa se ba nyina. Aho kuvuga amazina yabo, bahitamo gukoresha amagambo nka ‘mama wa kanaka’, ‘mushiki wa kanaka’ cyangwa se ‘umukobwa wa kanaka’; ndetse no mu gihe havutse umwana w’umukobwa, amategeko avuga ko ku cyemezo cy’amavuko handikwaho izina rya se gusa.

Ikibazo cyo kutagira izina ku bagore gitangira hakiri kare, kuko umwana ukivuka ahabwa izina hashize igihe kinini. Mu gihe ashatse umugabo, ntabwo izina rye rigaragara ku rupapuro rutumira mu birori by’ubukwe.

Iyo arwaye, ntabwo izina rye rishyirwa ku mpapuro zo kwa muganga. Mu gihe apfuye na bwo izina rye ntabwo rigaragara ku rupapuro rwemeza ko yapfuye, habe no ku mva ye.

Ibi byatumye bamwe mu bagore b’aho muri Afghanistan batangiza ubukangurambaga bwo guharanira ko bemererwa gukoresha amazina yabo bwite, uko babyifuza.

Umwe mu batangije ubu bukangurambaga bwahawe izina ‘Where is my name? (Izina ryanjye riri he?)’, Laleh Osmany, avuga ko yari arambiwe kwamburwa icyo we afata nk’uburenganzira bw’ibanze.

Avuga ko ubukangurambaga yatangije mu myaka itatu ishize butangiye gutanga umusaruro, aho Guverinoma ya Afghanistan iri hafi kwemeza ko izina ry’umubyeyi w’umugore na ryo ryakwandika ku rupapuro rw’amavuko y’umwana.

BBC iravuga ko umwe mu byegera bya Ashraf Ghani, Perezida wa Afghanistan, yemeje ko uyu muperezida yategetse urwego rushinzwe irangamirere kwiga ku buryo itegeko rigenga iyandikwa ry’amakuru yerekeye abanyagihugu ryavugururwa, kugira ngo abagore na bo bemererwe kugira amazina yabo ku byangombwa by’umwana ,birimo irangamuntu ndetse n’icyemezo cy’amavuko.

Gusa nubwo iri tegeko ryakwemezwa, Laleh Osmany na bagenzi be baracyafite urugamba rukomeye, dore ko hari benshi aho muri Afghanistan batifuza izi mpinduka harimo na bagenzi be b’abagore.

Umwe muri bo yagize ati “Iyo umuntu ambajije izina ryanjye, ngomba gutekereza ku cyubahiro cya musaza wanjye, icya data n’icy’umukunzi wanjye. Ndifuza kwitwa umukobwa wa papa wanjye, mushiki wa musaza wanjye, no mu gihe kizaza nkazitwa umugore w’umugabo wanjye na mama w’umuhungu wanjye”.

Mu muco wa Afghanistan, umugore mwiza ni utagaragara kandi ntiyumvikane, nk’uko byemezwa n’umuhanga mu mibanire y’abantu Ali Kaveh.

Minisitiri w’Ubuzima Dr. Daniel Ngamije

Minisitiri w’Ubuzima Dr. Daniel Ngamije, yabivugiye mu kiganiro n’itangazamakuru cyabaye kuri uyu wa mbere tariki 20 Nyakanga 2020. Ni ikiganiro cyari cyigamije gutanga ishusho y’icyorezo cya covid-19 mu Rwanda, mu mezi ane ashize kigeze mu Rwanda.

Muri kino kiganiro Dr. Ngamije yavuze ko nyuma y’amezi ane, hamaze gukoreshwa agera kuri miliyoni 60 z’amadolari ya Amerika, mu bikorwa byo guhangana na kino cyorezo.

Yagize ati “Ni byo ko kino cyorezo gihenze ku gihugu, hari ibikorwa byinshi bituma dusohora amafaranga, haba gufata ibizamini, gukurikirana abantu bahuye n’abanduye, gushyira abantu mu kato, Leta akaba ari yo itanga aho kuba n’ibyo kurya, kuvura abarwaye, n’ibindi bikorwa bituma tubasha kurinda ikwirakwira rya kino cyorezo.

Byose birahenze. Ntabwo twakwibagirwa amafranga atari kwinjira mu isanduku ya Leta kubera covid-19; na yo ni kimwe mu byo twavuga ko biri gutuma igihugu gitakaza amafaranga. Mu bijyanye n’amafaranga tumaze gukoresha, twakoze ingengo y’imari y’amezi atandatu ya miliyoni 73 z’amadolari, ubu tumaze kugeza hafi kuri miliyoni 60 z’amadolari tumaze gukoresha mu gihe cy’amezi ane, harimo ay’ibikoresho bitandukanye, abakozi, n’ibindi”.

Icyorezo Covid-19 cyagaragaye bwa mbere mu Rwanda tariki 14 Werurwe 2020, hanyuma tariki 21 Werurwe 2020, igihugu cyose gitangira gahunda ya Guma mu rugo yari igamije gukumira ikwirakwira ryacyo.

Imiti isukura intoki yarateganyijwe

Ku wa Gatanu tariki 17 Nyakanga 2020 inzego zose zifite aho zihurira n’ubwikorezi mu kirere zifatanyije n’iz’ubuzima zatembereye mu kibuga cy’indege mpuzamahanga cya Kigali mu rwego rwo kureba ingamba z’ubuzima n’umutekano zafashwe mu kwitegura kongera kwakira abagenzi muri iki kibuga.

Umuyobozi Mukuru w’Urwego rw’Igihugu rushinzwe Indege za Gisivili, Colonel Silas Udahemuka, yabwiye itangazamakuru ko imyiteguro irimo kugenda neza, kandi ko amabwiriza ya Minisiteri y’Ubuzima n’amabwiriza mpuzamahanga yose yakurikijwe.

Agira ati “Aho tugeze imyiteguro imeze neza. Kuva aho Guverinoma itangarije ko ubwikorezi bwo mu kirere, imizigo n’abagenzi, buzatangira ku ndege zose zitwara abagenzi ku itariki ya mbere z’ukwa munani, ndetse na mbere yaho; twakomeje twitegura kuzafungura. Hari amabwiriza MINISANTE itanga, hari amabwiriza mpuzamahanga yatanzwe n’ikigo cya Loni gishinzwe indege za gisivili, ayo yose n’ayo igihugu cyashyizeho yakuwemo amabwiriza agomba gukurikizwa n’abakora ubwikorezi bwo mu kirere”.

Umuyobozi Mukuru w’Urwego rw’Igihugu rushinzwe Indege za Gisivili, Colonel Silas Udahemuka

Yongeraho ko hakozwe ubugenzuzi buhagije, akaba yizeye ko gutangira ingendo zo mu kirere bizakorwa neza.

Dr. Sabin Nsanzimana uyobora Ikigo cy’Igihugu gishinzwe Ubuzima (RBC) avuga ko hateganyijwe uburyo butandukanye bwo gukora isuku mu kibuga cy’indege ndetse no mu ndege ubwayo hamwe n’abagenzi.

Agira ati “Hateganyijwe uburyo bwo gusukura, haba ikibuga cy’indege ubwacyo; hari uguhana intera, hari ugukaraba intoki hakoreshejwe umuti washyizwe ahantu hose, ariko hari n’umuti bazajya bakandagiramo kugira ngo n’uwazanye uburwayi mu ndege ntabwinjize binyuze mu kweto aba yambaye. Hazajya habaho no gupima abantu umuriro n’ibindi bimenyetso mbere y’uko bafatwa igipimo kizajyanwa muri laboratwari kugira ngo barebe niba afite Covid-19”.

Akomeza avuga ko mu ndege ubwaho hari gahunda zashyizwemo zirimo kwambara agapfukamunwa ku bantu bose bari mu ndege, guhana intera, n’abatanga serivisi mu ndege bazajya baba bafite ibyo basabwa kugira ngo batandura cyangwa se ngo banduze abagenzi.

Dr. Sabin Nsanzimana, Umuyobozi Mukuru wa RBC

Dr. Nsanzimana akomeza avuga ko amabwiriza yose azakurikizwa n’abagenzi azashyirwa ku mbuga nkoranyambaga kugira ngo umuntu wese wifuje kuza mu Rwanda abe azi uburyo agomba kwitwara.

Usibye amabwiriza yashyizweho na Guverinema y’u Rwanda azakurikizwa ku bibuga by’indege no mu ndenge, RBC yatangaje ko ku kibuga cy’indege hazashyirwa irobo yitwa ‘Urumuri’ izajya ifasha mu kubahiriza aya mabwiriza.

Robo yitwa Urumuri izajya ifasha abantu kubahiriza amabwiriza

Iyi robo izajya ibasha kureba niba umuntu yambaye agapfukamunwa nabi, imusabe kukambara neza; mu gihe abantu bazajya baba begeranye cyane, izajya ibasaba gutandukana.

Umuyobozi Mukuru wa Rwandair, Yvone Makolo avuga ko mu rwego rwo kurinda ko abakozi n’abagenzi, abakozi bo mu ndege bazajya bambara imyenda ibarinda irimo uturindantoki, udupfukamunwa n’uturindamaso.

Uburyo bwo kurira mu ndege na bwo ngo buzahindurwa kandi ngo bikorwe abantu bategeranye. Yvone Makolo avuga ko n’uburyo ibiribwa byatangwagamo mu ndege na bwo buzahinduka mu rwego rwo kwirinda ko abantu begerana mu ndege.

Umuyobozi Mukuru wa Rwandair, Yvone Makolo

Ku bijyanye n’ingendo, yavuze ko tariki ya 1 Kanama 2020, indege za Rwandair zizajya zerekeza mu bihugu byamaze gufungura imiryango yabyo. Bimwe muri ibyo bihugu ni Kenya, Zambia, Benin, Gabon na Dubai-UAE.

Yongeraho ko abagenzi bose bazaba bategetswe kwerekana icyemezo cy’uko batarwaye coronavirus.

Video :Richard Kwizera

Uyu muti uvugwaho kugira ubushobozi bwo guhangana na COVID-19 (Ifoto: Reuters)

Gilead Sciences ivuga ko iki giciro ari cyo kizajya gicibwa Guverinema za USA ndetse n’ibindi bihugu bikize ku rugero rumwe mu rwego rwo kwirinda ibiganiro bishobora gutuma gutangira gukoresha uyu muti bitinda.

Umuyobozi wa Gilead Sciences, Daniel O’Day yagize ati "Twifuza ko nta kibangamira ikoreshwa ry’uyu muti mu kuvura abarwayi. Iki giciro kizatuma abarwayi bose ku isi hose babasha kubona uyu muti."

Ku kibazo cyo kuba igiciro cy’uyu muti gihanitse cyane, Gilead ivuga ko iyo urebye amahirwe ahari yo kugabanya amafaranga ibitaro byasohoraga, n’amahirwe yo kurokora ubuzima bw’abantu, amadolari 390 ari munsi cyane y’agaciro uyu muti ufite.

Mu gihe ibi biciro bireba abarwayi bafite ubwishingizi bwa Leta, abarwayi bafite ubundi bwishingizi bw’ibigo byigenga, bo bazajya batanga amadolari 3,120 mu gihe cy’iminsi itanu (ni ukuvuga angana n’amafaranga y’u Rwanda miliyoni ebyiri n’ibihumbi 992).

Ku rundi ruhande, mu gihe ibi biciro bireba abaturage b’ibihugu bikize, Gilead Sciences ivuga ko yagiranye amasezerano n’ibigo bikora imiti mu buryo buhendutse (generic manufacturers) kugira ngo bikore Remdesivir ku buryo izacuruzwa ku masoko yo mu bihugu bikiri mu nzira y’amajyambere kandi ku gicirio kiri hasi.

Hari hashize amezi abiri Gilead Sciences ihawe uburenganzira bwo kuvura abarwayi ba Covid-19 ikoresheje Remdesivir, ariko ubu nibwo itangaje ibiciro by’uwo muti.

Iyi nama yateguwe n’ihuriro Corporate Council on Africa (CCA) rikorera muri Leta Zunze Ubumwe Za Amerika. Iri huriro rikaba ryibanda ku guhuza abakora ibikorwa by’ubucuruzi ku mugabane wa Afurika.

Iyi nama ifite insanganyamatsiko igira iti "Guteza imbere ubucuruzi buhuza Amerika na Afurika mu rwego rwo kuzahura ubukungu nyuma ya Covid-19", Perezida Kagame akaba ari buvuge ijambo ritangiza iyi nama, anatangemo ikiganiro.

Zimwe mu ngingo zizaganirwaho muri iyi nama izamara iminsi ine harimo uruhare rw’imari mu guhangana na Covid-19 muri Afurika, guhanga udushya mu bukungu n’ubuzima mu rwego rwo guhangana na Covid-19, izamuka ry’ubukungu nyuma ya Covid-19; no gukomeza ubucuruzi mpuzakarere na mpuzabihugu nyuma ya Covid-19.

Kuva icyorezo cya Covd-19 cyatangira, nibwo bwa mbere abakuru b’ibihugu, abagize Guverinoma zo ku mugabane wa Afurika, abikorera n’abayobozi b’imiryango mpuzamahanga bagiye guhurira hamwe baganira ku bucuruzi buhuza Leta zunze ubumwe za Amerika (USA) na Afurika.

Usibye Perezida Kagame, abandi bakuru b’ibihugu bitabira iyi nama ni Perezida wa Kenya Uhuru Kenyatta, Perezida wa Ghana Nana Addo Dankwa Akufo-Addo na Perezida wa Mozambique Filipe Nyusi.

Abategura iyi nama kandi bavuga ko iyi nama iri bwitabirwe n’undi wese ubyifuza binyuze mu ikoranabuhanga rya Zoom, YouTube n’izindi mbuga nkoranyambaga kuri Internet.

Urutonde iki kigo cyashyize ahagaragara tariki 17 Kamena 2020, rwerekana ibihugu bigifite ibyago byo kwanduriramo Covid-19, u Rwanda ni cyo gihugu cyonyine cyo mu karere kitarugaragaraho.

Mu butumwa yanyujije kuri Twitter, Minisitiri w’Ubuzima w’u Rwanda, Dr. Daniel Ngamije yavuze ko aya ari amakuru meza ku Rwanda kandi ko byerekana ko ingufu u Rwanda ruri gushyira mu guhangana na Covid-19 zirimo gutanga umusaruro.

Yagize ati: "Inkuru nziza ku rugamba rw’u Rwanda mu guhangana na Covid-19! N’ubwo hajemo Covid-19, U Rwanda ni ahantu hizewe ho gusura."

Yongeyeho ko aya makuru yayamenyeshejwe na Ambassaderi w’u Budage mu Rwanda Dr Thomas Kurz.

Ibindi bihugu byo ku mugabane wa Afurika bitagaragara kuri uru rutonde harimo ibirwa bya Seychelles na Mauritius, Tunisia, Chad ndetse na Sahara y’Iburengerazuba (Western Sahara).

RKI ikora uru rutonde buri munsi aho ikusanya amakuru yo mu ngeri zitandukanye mu bihugu byose ku isi, ubundi igakora urutonde rw’ibihugu bigifite ibyago byinshi byo kwanduriramo coronavirus.

Mu rwego rwa mbere, RKI ireba ibihugu byagaragarayemo abantu barenga 50 mu bantu ibihumbi ijana (100.000) banduye coronavirus mu minsi irindwi ishize. Mu rwego rwa kabiri hakarebwa niba mu bihugu biri munsi y’iyi mibare, hakiri ibyago ko ubwandu bushobora kwiyongera.

Aya makuru akaba akusanywa hifashishijwe amakuru atangwa n’abakozi ba za ambassade z’u Budage mu bihugu bitandukanye, byaba ngombwa hakifashishwa Minisiteri Ishinzwe Ubuzima ndetse na Minisiteri Inshinzwe Umutekano, na zo zitanga amakuru ku buryo ibihugu birimo kwitwara mu guhangana n’ikwirakwira rya coronavirus.

Bimwe mu byitabwaho harimo umubare w’abandura, ubwiganze bw’ubwandu (niba buri mu gace kamwe cyangwa se mu gihugu hose), ubushobozi bwo gupima harimo n’umubare w’abapimwa ugereranyije n’abatuye igihugu, ndetse n’ingamba zafashwe mu rwego rwo kwirinda ko haboneka ubwandu bushya (kwita ku isuku, gushakisha abahuye n’abanduye, n’ibindi).

Urubuga rwa RKI ruvuga ko abantu bose bageze mu bihugu bifatwa nk’aho bifite ibyago byo kwanduriramo Covid-19 mu minsi 14 yabanje, baba bategetswe kwishyira mu kato bakimara kwinjira mu Budage.

#Germany‘s reputed Robert Koch Institute is no longer listing Rwanda as a #COVID19 risk area - the only one in the region. #Rwanda's efforts in containing the pandemic did not go unnoticed. https://t.co/1spieOYXHv pic.twitter.com/TxcMt912Ds

— Susanne Maria Krauss (@susanneMkrauss) June 18, 2020

Yiyongereye ibiro birenga 100 mu mezi atanu gusa

Uyu musore witwa Zhou yajyanywe kwa muganga by’igitaraganya mu ntangiriro za Kamena 2020 nyuma yo kurembera mu rugo kubera umubyibuho ukabije.

Ubu Zhou apima ibiro 279, akaba ari we muntu ufite ibiro byinshi muri Wuhan.

Zhou wari usanzwe akora mu nzu bakoresherezamo murandasi (Internet Cafe), yatangiye kuguma mu rugo guhera mu mpera z’ukwezi kwa Mutarama 2020, nyuma y’uko icyorezo cya Covid-19 cyari gitangiye gukomera aho mu Bushinwa, by’umwihariko i Wuhan, ari na ho cyatangiriye.

Kumuhagurutsa bisaba abantu benshi

Nyuma y’uko ingamba zo gukumira ikwirakwira rya Covid-19 zari zitangiye koroshywa mu ntangiriro z’ukwezi kwa Mata, Zhou yakomeje kuguma mu rugo. Abagize umuryango we bavuga ko yari atakibasha kugenda kubera kugira ibiro byinshi.

Abaganga bari kumwitaho mu bitaro bya Zhongnan Hospital, bavuga ko yakunze kugira ibibazo by’umubyibuho ukabije ubuzima bwe bwose, nubwo yagerageje uburyo butandukanye bwo kugabanya ibiro.

Li Zhen, umuganga mu bitaro bya Zhongnan avuga ko uyu musore yamuhamagaye tariki 31 Gicurasi 2020 arimo gutabaza, avuga ko amaze amasaha 48 atabasha gusinzira.

Dr. Li avuga ko Zhou yari atakibasha kuvuga ubwo bamujyanaga kwa muganga tariki ya 1 Kamena 2020. Ajyanwa kwa muganga yikorewe n’abagabo icumi, kubera ubunini bwe.

Abaganga basanga umubyibuho ukabije yari afite waraziyemo ibindi bibazo birimo kuba umutima we wari utagikora neza, ndetse anafite ibibazo byo kudahumeka neza.

Zhou yongera kumera neza nyuma y’iminsi icyenda. Kuri ubu abaganga bakaba bateganya kumubaga kugira ngo bamukuremo igice kimwe cy’igifu, ibi bikazamufasha kugabanya ibiro.

Inkuru dukesha ikinyamakuru Daily Mail ivuga ko kugeza ubu abaganga batari babasha gusobanura uburyo uyu musore yabashije kwiyongera ibiro birenga 100 mu mezi atanu gusa.

Randy Juan Muller

Uyu mukinnyi w’imyaka 23 witwa Randy Juan Muller, yagiye mu Buhinde mu kwezi k’Ugushyingo, umwaka ushize wa 2019, aho yari agiye gukinira ikipe y’umupira w’amaguru yitwa ORPC Sports Club, iri mu mujyi wa wa Kerala, mu majyepfo y’u Buhinde.

Ubwo icyorezo cya Coronavirus cyadukaga kigatangira gukwirakwira ku isi, Randy Muller yaguze itike y’indege kugira ngo asubire mu gihugu cye cya Ghana ku itariki 30 Werurwe 2020.

Ubwo haburaga icyumweru kimwe ngo yurire indege, yafashe Gariyamoshi yerekeza mu mujyi wa Mumbai aho yari buhagurukire.

Uwo mukinnyi agira ati: "Numvise amakuru ko u Buhinde bwashoboraga gushyiraho gahunda ya Guma Mu Rugo. Nahise nza i Mumbai kuba mu nzu rusange (dormitory) kugira ngo indege itazansiga."

Gusa ageze i Mumbai tariki 21 Werurwe, yari asigaranye amafaranga make cyane, ndetse abura n’icyumba cyo kuraramo.

Akomeza agira ati: "Nta muntu n’umwe nari nzi i Mumbai, nabonye abapolisi, mbabwira ibyambayeho. Bangiriye inama yo kujya ku kibuga cy’indege."

Nyuma y’iminsi itatu ageze ku kibuga cy’indege nibwo Minisitiri w’Intebe w’u Buhinde, Narendra Modi, yatangaje ko icyo gihugu kigiye gufunga imiryango, abaturage bakaguma mu rugo.

Ingendo zose zo mu kirere zahise zihagarara, zaba izinjira n’izisohoka mu gihugu.

Randy Muller ngo yahise afata icyemezo cyo kuzajya aryama mu kibuga cy’indege mpuzamahanga cya Chhatrapati Shivaji Maharaj, aho i Mumbai; mu gihe yari ategereje ko indege zongera gukora, ariko amaso ahera mu kirere.

Agira ati: “Abakozi bo ku kibuga cy’indege baramfashije cyane, bampa ibyo kurya ndetse n’ibindi nabaga nkeneye. Umwe mu bashinzwe umutekano yampaye telefone isimbura iyanjye yari yangiritse."

Randy Muller yagerageje guhamagara Ambasade ya Ghana aho i Mumbai ariko akabwirwa ko ntacyo bashobora kumumarira.

Ibibazo bya Muller byarakomeje kugeza mu ntangiriro z’ukwezi kwa Kamena, ubwo yashyiraga ubutumwa kuri Twitter, atabaza.

Ubu butumwa bwageze ku munyamakuru, na we abugeza kuri Minisitiri ushinzwe ubukerarugendo n’ibidukikije, Aaditya Thackeray. Uyu muminisitiri ni na we uyobora ishyirahamwe ry’amakipe y’umupira w’amaguru aho mu mujyi wa Mumbai.

Mu gihe gito Randy Muller yahise avanwa mu kibuga cy’indege, ajyanwa kuba muri Hoteli. Iyi Hoteli ngo ni na yo azabamo kugeza ibintu byongeye gusubira mu buryo, agataha iwabo muri Ghana.

Randy Muller avuga ko nubwo amasezerano ye yo gukina umupira w’amaguru yarangiye, ndetse akaba yarahuriye n’ibibazo byinshi aho mu Buhinde, yifuza kuhagaruka.

Agira ati:"Navuye mu rugo kugira ngo nshake imibereho. Nimbona andi masezerano, nzagaruka nta kabuza."

Iyi kaminuza yitwa Texas Southern University (TSU) yatangaje ibi ku wa kabiri tariki 9 Gicurasi mu gihe habaga umuhango wo gushyingura George Floyd, umwirabura wishwe na polisi mu kwezi gushize kwa gatanu.

Itangazo ubuyobozi bw’iyi kaminuza bwashyize ahagaragara, rivuga ko Ubuyobozi bwa TSU bufatanyije n’abashinze kaminuza, bemeje kwishyurira amafaranga yose y’ishuri umwana wa George Floyd witwa Gianna Floyd . Rikomeza rivuga ko abakozi ba kaminuza bazategurira umwanya Gianna naramuka ashatse kuza kuhigira amashuri ya kaminuza.

Mu cyumweru gishize, video yashyizwe ahagaragara n’inshuti ya George Floyd yerekana Gianna avuga ko "ise yahinduye amateka y’isi."

George Floyd wavukiye muri Leta ya North Carolina, yakuriye mu mugi wa Houston, Texas. Muri uyu mugi niho yigiye amashuri yismbuye mu ishuri rya Jack Yates High School, ryegeranye na TSU. Nyuma ajya kuba mu mugi wa Minneapolis ari naho yicirwa n’umupolisi, tariki 25 Gicurasi.

Floyd yashyinguwe mu mva yubatse iruhande rw’iy’umubyeyi we (nyina).

Abashakashatsi bo muri iki kigo ari na bo bari kugira inama Guverinoma y’u Bwongereza ku bijyanye na covid-19 bavuga ko amabwiriza yo kuguma mu rugo yagize umumaro cyane mu gutuma iki cyorezo kidakomeza gukura.

Aba bashakashatsi bakaba barafashe imibare y’abapfuye muri ibyo bihugu mbere ya tariki 4 Gicurasi, hanyuma bayigereranya n’iyabantu bashoboraga gupfa iyo hatagira igikorwa, basanga byibuze abantu miliyoni 3 n’ibihumbi 100 ari bo babashije kurokoka kubera bategetswe kuguma mu rugo.

Ubushakashatsi bw’iki kigo bwerekanye kandi ko gahunda ya guma mu rugo yatumye umubare w’abantu buri murwayi wa covid 19 yari bwanduze, ugabanyuka kugera ku kigero cya 82%, aho buri murwayi yanduzaga abantu bari munsi y’umwe.

Abashakashatsi bavuga ko ibyemezo byafashwe mu guhangana na Covid-19 byakomeza gukurikizwa bibaye ngombwa mu rwego rwo gukomeza kwirinda ikwirakwira ryayo.

Ubushakashatsi bwerekana kandi ko byibuze abantu bari hagati ya miliyoni 12 na 15 banduye muri ibyo bihugu. Ni ukuvuga abari hagati ya 3.2 na 4 ku ijana by’abatuye ibyo bihugu.

Ubu bushakashatsi bukaba bwarakorewe mu bihugu by’ubudage, ubufaransa, ubutaliyani, ubwongereza, ububiligi, Autriche, Danmark, Norvege, Ubusuwisi na Swede.

Hagati aho ubundi bushakashatsi bwakoze n’ishuri rikuru UC Berkeley muri Leta Zunze Ubumwe z’Amerika, bwerekanye ko iyo hatagira igikorwa, abantu bagera kuri miliyoni 62 bari bwandure Covid-19 mu bihugu bitandatu bakoreyemo, ari byo: Koreya y’Amajyepfo, Ubutaliyani, Iran, Ubufaransa, na Leta Zunze Ubumwe za Amerika.

Ibipimo miliyoni icumi bigiye gufatwa bizerekana neza uko icyorezo Covid-19 cyifashe ku mugabane wa Afurika (Ifoto: EPA)

Kugeza ubu umugabane wa Afurika ufite abantu barenga ibihumbi 160 banduye coronavirus, mu gihe 4,600 bamaze guhitanwa na yo.

Gusa abahanga bavuga ko iyi mibare ishobora kuba irenga kubera ko hari abantu badapimwa.

Ikigo cya Afurika gishinzwe gukurikirana indwara (CDC) kivuga ko kugeza ubu kuri uyu mugabane hamaze gufatwa ibipimo bigera kuri miliyoni 2 n’ibihumbi 400.

Abahanga bizera ko ibi bipimo miliyoni icumi bigiye gufatwa, bizerekana neza uko icyorezo Covid-19 cyifashe ku mugabane wa Afurika.

Mu bihe byashize hakaba harakunze kubaho ikibazo cy’ibura ry’ibikoresho byifashishwa mu gupima coronavirus, ariko Umuryango wa Afurika yunze Ubumwe (AU) uravuga ko ibihugu byose bizagira amahirwe angana mu kubona ibi bikoresho.

AU irateganya kandi ko abakozi mu nzego z’ubuzima bagera ku bihumbi 100 bazahabwa amahugurwa, mu gihe abandi miliyoni bazifashishwa mu gukurikirana abantu bashobora kuba barahuye n’abanduye (tracing).

Mu butumwa bwe, Papa Francis yagize ati: "Bavandimwe muri muri Leta Zunze Ubumwe za Amerika, ntewe impungenge n’imyivumbagatanyo ikomeje kubera mu gihugu cyanyu, nyuma y’urupfu rubabaje rwa George Floyd."

Yongeraho ko asengera roho ya George Floyd kugira ngo aruhuke mu mahoro, agasengera n’abandi bantu bose babuze ubuzima bwabo kubera icyaha cy’ivanguraruhu.

Akomeza agira ati:"Nshuti zanjye, ntabwo dukwiye kwihanganira cyangwa se ngo twirengagize ivanguraruhu n’ihezwa iryo ari ryo ryose, ngo niturangiza tuvuge ko duharanira ubusugire bw’ubuzima bwa buri kiremwamuntu."

"Nanone tugomba kwemera ko imvururu zimaze iminsi zirimo kuba, ari twe zigiraho ingaruka. Nta nyungu n’imwe iva mu bikorwa by’ubugizi bwa nabi, kandi hari byinshi byangirika."

Hagati aho abantu bagera ku 9300 nibo bamaze gutabwa muri yombi kuva mu cyumweru gishize, bafatiwe mu bikorwa byo kwigaragambya birimo kubera aho muri Amerika.

Imijyi myinshi ikaba yarashyizeho ibihe by’umukwabu nyuma y’uko imyigaragambyo itangiye kuvamo ubujura n’ibindi bikorwa by’ubugizi bwa nabi.

Imyigaragambyo aho muri USA ndetse n’ahandi ku isi yatangiye nyuma y’uko amashusho yerekana iyicwa rya George Floyd agiye ahagaragara. Aya mashusho akaba yarongeye kuzamura umujinya uterwa n’iyicwa ry’abirabura bicwa na polisi ya Amerika, ndetse n’ibikorwa by’ivanguraruhu bikomeje kuvugwa muri icyo gihugu.

Uyu mugabo witwa Prahlad Jani yambaraga imyenda itukura n’iherena ku izuru nk’uko ibigirwamana by’aba-Hindu biba byambaye, akagira umusatsi muremure cyane ndetse n’ubwanwa bwinshi, akaba yari afite inkomoko mu ntara ya Gujarat iri mu burengerazuba bw’u Buhinde, aho yari abayeho ubuzima bwo gukora imyitozo ngororamubiri izwi nka "Yoga" akongeraho n’ibikorwa byo gutekereza mu buryo bwimbitse (meditation).

Sheetal Chaudhary wari umuturanyi w’uyu musaza, yabwiye AFP ko yitabye Imana mu gitondo cyo ku wa kabiri, azize izabukuru.

Agira ati "Yajyanywe kwa muganga mu ma saa sita z’ijoro, ariko yagiye kugerayo yamaze gupfa".

Umurambo w’uyu musaza, wavutse mu kwezi kwa Kanama umwaka wa 1929, wahise ujyanwa mu mujyi witwa Ambaji uzwiho kugira insengero nyinshi. Muri uyu mujyi, Prahlad Jani akaba yari yarahubatse inzu akoreramo Yoga, ndetse abatuye uwo mujyi bamwitaga "Mataji" bishatse kuvuga ngo Ikigirwamana.

Umuturanyi we, Sheetal Chaudhary avuga ko umubiri w’uyu musaza uzatwikwa ku wa kane w’iki cyumweru bijyanye n’imico y’aho mu Buhinde.

Inkuru z’uko Prahlad Jani yahawe umugisha n’ikigirwamana ubwo yari akiri umwana muto ku buryo yabashaga kubaho igihe kirekire nta kurya nta no kunywa, zatumye agira abayoboke benshi, n’ubwo abaganga bo bavugaga ko ari ibintu bidashoboka.

Yabwiye ibiro ntaramakuru AFP mu mwaka wa 2003 ko isoko y’ubuzima ayikura mu kobo kari mu kananwa ke, igatuma abasha kubaho nta biryo cyangwa se amazi afata. Akaba yaravugaga ko aheruka kurya mu mwaka wa 1940.

Icyo gihe nta buryo bwo kugenzura ko ibyo yavugaga kwari ukuri ariko abaganga bemeza ko nta muntu ushobora kubaho igihe kirekire atanywa cyangwa se ngo arye. Iyo bibayeho, umubiri w’umuntu utangira kwangirika.

Mu mwaka wa 2010, abaganga bo mu gisirikare cy’u Buhinde bamujyanye mu bitaro byo mu mujyi wa Ahmedabad kumukorera ibizamini. Icyo gihe bafashe ibizamini by’ingingo z’umubiri we, ubwonko, imiyoboro y’amaraso, bapima umutima, ibihaha ndetse n’ubushobozi bwo kwibuka ibintu. Icyo gihe ndetse yanakurikiranwaga n’ibyuma bifata amashusho (camera) umunota ku wundi.

Icyo gihe abaganga banzurye ko ataryaga, ntanywe, kandi ko atajyaga kwiherera. Umwe muri bo witwa Sudhir Shah avuga ko batazi uburyo uyu mugabo abasha kubaho.

Gusa ibiva muri ubu bushakashatsi ntabwo bishyirwa ahagaragara kugira ngo abandi bashakashatsi bagire icyo babivugaho.

Ikigo cya Amerika gishinzwe gukumira indwara (Center for Disease Control - CDC) kirimo kuburira Abanyamerika ko hari ibice bimwe by’icyo gihugu birimo kubona umubare w’imbeba wiyongera hafi y’abaturage kubera ko zitakibasha kubona ibyo zirya mu ngarani z’amaresitora.

CDC ivuga ko imbeba zitungwa cyane n’ibiryo ndetse n’ibindi bisigazwa biva muri za resitora n’utubari. Kuba rero izi resitora zarafunze, byatumye ibiribwa bigabanuka cyane, by’umwihariko mu duce tw’imijyi.

Iyi nkuru ya CNN ivuga ko igabanuka ry’ibiribwa mu mijyi rikaba ririmo gutuma imbeba zitangira gushakira imibereho mu bindi bice cyane cyane ahantu hagenewe guturwa. Mu gukora ibi ngo zikaba zirimo no guhindura imyitwarire aho zirushaho kugira amahane, ibi kandi bikajyana n’indwara zishobora guterwa n’imbeba.

Ikigo CDC kigira abaturage ba Amerika inama yo gufunga neza amazu yabo yo guturamo ndetse n’ay’ubucuruzi, ndetse no kwitondera aho bajugunya imyanda iva mu mazu yabo.

Umuyobozi w’Urwego rushinzwe Iterambere mu Rwanda (RDB), Clare Akamanzi, yatangaje ko uyu ari umusaruro w’ingenzi wavuye muri Rwanda Day.

Mu butumwa yanyujije kuri Twitter, Clare Akamanzi yahaye ikaze mu Rwanda ikigo cyitwa Zora Robotics, ari na cyo cyakoze izo robots u Rwanda rugiye gukoresha mu bikorwa byo gusuzuma no kuvura COVID-19.

Fabrice Goffin, Umuyobozi w’iki kigo cy’ikoranabuhanga ni umwe mu bitabiriye Rwanda Day yabereye mu Budage tariki 5 Ukwakira umwaka ushize wa 2019.

Mu ijambo yavugiye muri Rwanda Day, Fabrice Goffin yavugaga ko yiteguye gusura u Rwanda nyuma yo kubona uburyo u Rwanda rushyira ingufu mu kumenyekanisha ibyiza bihakorerwa.

Yagize ati "Mu mezi ane ashize, natangiye kuganira na Ambassade y’u Rwanda, ndetse ngeze hano nabashije kumenya ikintu kidasanzwe. Abantu bose barambwira bati ’uzasure u Rwanda, hari ibintu byinshi biri kubera mu Rwanda’. Mwashyize ingufu nyinshi mu kumenyekanisha igihugu cyanyu, ariko Abanyaburayi benshi bafite amakuru atari yo ku gihugu cyanyu. Ariko ibyo maze kubona muri aya mezi ane ashize, bituma numva mbubashye cyane. Ndateganya gusura u Rwanda mu kwezi gutaha."

Perezida Kagame yamusubije ko yiteguye kumwakira mu Rwanda, ndetse amusaba no kuzana robots ze mu Rwanda.

One of the direct outcomes of #Rwandaday.....Welcome to Rwanda @zorabots - Using robots will save Medics’ time and also minimize exposure while treating COVID-19 patients. https://t.co/MKepDikVXY

— Clare Akamanzi (@cakamanzi) May 20, 2020

Nyuma y’uko ageze mu Rwanda, mu mpera z’umwaka wa 2019, Fabrice Goffin avuga ko yagiranye ibiganiro n’abayobozi batandukanye, ndetse ahita atangiza ishami ry’ikigo cye ku mugabane wa Afurika, ZoraBots Africa.

Agira ati: "Twakunze u Rwanda n’abaturage barwo, kandi byigaragaza ko ari ho twari butangirize ibikorwa by’ikigo cyacu ku mugabane wa Afurika."

Akomeza avuga ko mu rugendo rwabo bahura n’abayobozi batandukanye barimo na Minisitiri w’ikoranabuhanga mu Rwanda, Paula Ingabire.

Agira ati: "Ibiganiro tugirana ni byiza kandi bitanga icyizere. Intambwe ikurikiraho ikaba kwari ugushinga ZoraBots Africa. Kwandikisha ikigo bikorwa mu munsi umwe gusa. Ubu ngubu dufite ibiro byacu bikora neza biri kumwe n’ahantu twerekanira ibikorwa byacu."

Robots za ZoraBots Africa zashyikirijwe Minisiteri y’Ubuzima ku wa kabiri tariki 19 Gicurasi 2020. Izi robots zahawe amazina y’Ikinyarwanda; ari yo: Akazuba, Ikizere, Mwiza, Ngabo, na Urumuri; zikazifashishwa cyane mu gupima ubushyuhe bw’umubiri, kugenzura uko ubuzima bw’umurwayi bwifashe, ndetse no kubika amakuru yose yerekeranye n’ubuzima bw’umurwayi.

Indi mirimo izi robots zishobora gukora harimo kugemurira abarwayi ibiribwa n’imiti mu byumba barwariyemo, kumenyesha abaganga ibibazo runaka bishobora kuvuka; zikaba zifite ubushobozi bwo gupima abarwayi bari hagati ya 50 na 150 ku munota.

Amafoto: RBC

Uyu mugore utatangajwe amazina, yari kumwe n’umugabo we ndetse n’abandi bana be bane (4); bakaba bari bavuye mu mujyi wa Nashik uri muri Leta ya Maharashtra, berekeza mu wundi mujyi witwa Satna uri muri Leta ya Madhya Pradesh.

Mu gihe bari mu rugendo, uyu mugore yagezeho arahagarara, abyara umwana w’umukobwa. Uyu mwana yavutse tariki 5 Gicurasi 2020.

Umupolisi witwa Kavita Kanesh yabwiye televisiyo y’Abanyamerika yitwa CNN ko uyu mugore yaruhutse igihe kiri hagati y’isaha imwe n’igice n’amasaha abiri nyuma yo kubyara, ubundi akomeza urugendo. Uyu muryango ukaba uhagarikwa n’uyu mupolisi bamaze iminsi itanu mu nzira.

Kavita Kanesh yagize ati “Nta mafaranga bari bafite, nta n’ubundi buryo bwo kugenda bari bafite; kandi nta n’umuntu washakaga guhagarara ngo abahe lifuti”

Kanesh akomeza avuga ko uyu muryango wavuye mu mujyi wa Nashik nyuma y’uko amabwiriza agamije gukumira ikwirakwira rya Covid-19 atangiye gukurikizwa aho mu Buhinde. Ibi bikaba byaratumye basigara nta buryo bwo gukorera amafaranga bafite, ndetse nta n’aho kuba bafite.

Kavita Kanesh akaba yarafashije uyu muryango kugera ku kigo nderabuzima aho umubyeyi abasha guhabwa ubuvuzi bw’ibanze.

Aho mu Buhinde, ibihumbi by’abimukira bagerageje guhunga imijyi yaho, basubira mu byaro nyuma y’uko hatangiye gukurikizwa amabwiriza yo gukumira ikwirakwira ry’icyorezo Covid-19.

Gusa ibi byagoye benshi kubera ko imodoka zitwara abagenzi zitarimo gukora, bityo bagahitamo gukora ingendo z’ibirometero amagana n’amaguru.

U Buhinde bumaze kugira abarwayi basaga 78,000 bwaraye Covid-19. Mu gihe abagera ku 2,551 bamaze guhitanwa na yo.

Minisitiri w’Ubuzima, Dr Daniel Ngamije, mu ntangiriro z’uku kwezi kwa Gatanu nibwo yari yatanze amakuru yerekeranye n’izi robots.

Izi robots Minisiteri y’Ikoranabuhanga na Inovasiyo ni yo yazishyikirije MINISANTE ku bufatanye n’Ishami ry’Umuryango w’Abibumbye rishinzwe Iterambere (UNDP), zikaba zarahawe amazina y’Ikinyarwanda ari yo: Akazuba, Ikizere, Mwiza, Ngabo, na Urumuri.

Izi robots zizifashishwa cyane mu gupima ubushyuhe bw’umubiri, kugenzura uko ubuzima bw’umurwayi bwifashe, ndetse no kubika amakuru yose yerekeranye n’ubuzima bw’umurwayi.

Minisitiri w’Ubuzima, Dr. Daniel Ngamije, yavuze ko izi robots zizihutisha imitangire ya serivisi, kandi zitume abaganga badahura n’ibyagira ingaruka ku buzima bwabo.
Yakomeje avuga ko kuba inzego zitandukanye ziri gushyira hamwe kugira ngo zishake ibisubizo byo guhangana na Covid-19, ari ibyo kwishimira. Ikaba ari indi ntambwe u Rwanda ruteye mu gukoresha ikoranabuhanga mu rwego rw’ubuzima.

Imwe mu yindi mirimo izi robots zishobora gukora harimo kugemurira abarwayi ibiribwa n’imiti mu byumba barwariyemo, kumenyesha abaganga ku bibazo runaka bishobora kuvuka, zikaba zifite ubushobozi bwo gupima abarwayi bari hagati ya 50 na 150 ku munota.

Ibyuma bifata amashusho y’umutekano muri iyi gereza byagaragaje amashusho y’abagerageza ibikorwa bigamije kwanduzanya COVID-19

Ibi bikaba byarabaye mu kwezi gushize kwa Mata, nk’uko bitangazwa n’ikinyamakuru TMZ.

Umuyobozi wa Polisi mu gace ka Los Angeles, Alex Villanueva, yabwiye iki kinyamakuru ko abafungwa bagera kuri 50 bafungiye muri gereza yitwa the Pitchess Detention Center bagerageje kwiyanduza coronavirus ndetse bamwe babasha kubigeraho.

Alex Villanueva avuga ko babonye umubare w’abarwaye Covid-19 mu buryo butunguranye kandi batazi aho baturutse. Iperereza ryahise rikorwa, ryerekana ko mu gace kamwe ka gereza hari harimo abantu bageragezaga kwiyanduza mu buryo bwose bushoboka.

Amashusho afatwa na camera zishinzwe umutekano muri gereza, yerekana izi mfungwa zigera kuri 50, zicaye ahantu hamwe zirimo gusangirira ku gikombe kimwe kandi bafata agapfukamunwa (mask) kamwe, buri wese akakambara. Bakaba bakora ibi kugira ngo umucamanza abagirire impuhwe, abavane muri gereza, maze bajye mu kato mu nzu iri hanze ya gereza.

Aba bagororwa bagera ku mugambi wabo igice kuko 21 muri bo ari bo bandura, ariko Sheriff Alex Villanueva yabwiye TMZ ko n’ubundi batazarekurwa, ahubwo bazakomeza gukurikiranwa.

Abashakashatsi bakaba barapimye iyi mibu basanga nta n’umwe muri yo wari ufite agakoko gatera malaria. Ibizamini bindi byakorewe muri laboratwari byerekanye ko iyi mikorobe (Microsporidia MB) ituma imibu igira ubwirinzi buyirinda agakoko gatera malaria.

Umwe mu bashakashatsi witwa Dr. Jeremy Herren yabwiye BBC ko imibare bafite kugeza ubu yerekana ko iyi mikorobe ihagarika malaria ku rugero rw’ijana ku ijana (100%). Hakaba hari icyizere ko ubu bwaba bumwe mu buryo bwo kurinda ikwirakwira rya malaria mu bantu, babanje kurinda ko ikwirakwira mu mibu.

Iyi mikorobe ikwirakwira mu mibu binyuze mu kwanduzanya hagati y’imibu ikuze, ndetse umubu ukaba ushobora kwanduza indi mibu iwukomokaho. Abashakashatsi bakaba barimo gutekereza uburyo bubiri bwo kuba bakongera ingano y’imibu imaze kwanduzwa n’iyi mikorobe.

Uburyo bwa mbere ni ugufata amagi menshi y’izi mikorobe ubundi akifashishwa mu kwanduza imibu myinshi. Uburyo bwa kabiri ni ukwanduza imibu y’ingabo (ubusanzwe itarumana), ubundi iyo mibu ikaba ari yo yanduza imibu y’ingore ari na yo itera malaria.

Aba bashakashatsi bavuga ko barimo kwiga uburyo imibu ifite iyi mikorobe yagezwa ahantu hatandukanye kugira ngo igabanye indwara ya malaria.

BBC ivuga ko byibuze 40% by’imibu yo mu gace runaka igomba kuba ifite iyi microbe kugira ngo bigire ingaruka igaragara mu guhagarika malaria.

Abantu bagera ku bihumbi 400 bakaba bahitanwa na malaria buri mwaka, abenshi muri bo ni abana bari munsi y’imyaka itanu.

Uyu muryango wahisemo kwita umwana wabo Covid Marie

Umubyeyi wa mbere uzwi kuba yaragize icyo gitekerezo ni uwitwa Sasikala wo mu Ntara ya Andra Pradesh mu Buhinde. Uyu mubyeyi wibarutse umwana w’umukobwa tariki 29 Werurwe, akaba yaramwise ‘Corona Kumari’.

Sasikala avuga ko kugira ngo yite umwana we Corona, yabigiriwemo inama na muganga wamubyaje.

Ikinyamakuru India Today, kivuga ko uyu muganga witwa Dr. SF Basha yongeye kandi kugira inama undi mubyeyi, yo kwita umwana we Corona. Uwo ni uwitwa Ramadevi wabyaye umwana we tariki 5 Mata 2020, na we agahita yita umwana we w’umuhungu “Corona Kumar”.

Aho mu Buhinde kandi hari ababyeyi bise abana babo andi mazina ajyanye na bino bihe turimo nka ‘Lockdown’ ndetse na ‘Sanitizer’.

Si mu Buhinde gusa ababyeyi barimo kwita abana babo amazina ajyanye na coronavirus, kuko no mu gihugu cya Philippines hari ababyeyi bise umwana wabo w’umukobwa ‘Covid Marie’.

Se w’uyu mwana witwa John Tupas yabwiye AFP ko yise umwana we Covid mu rwego rwo gushima.

Agira ati “Covid-19 yateje umubabaro mwinshi ku isi hose. Nashatse kwita umwana wanjye gutya kugira ngo nibutse ko Covid itazanye umubabaro gusa, kuko muri iki gihe ari na bwo twabonye umugisha”.

Ariko nanone aba babyeyi mu kwita abana babo aya mazina, ubona batitaye ku ngaruka z’igihe kirekire izina nk’iri rizagira kuri uwo mwana.

Tupas avuga ko hari abantu benshi bamugaye ku cyemezo yafashe cyo kwita umwana we Covid, ariko ko atazisubiraho. Avuga ko umwana we ashobora kuzahura n’abantu bamuserereza kubera izina afite, ariko ngo we azamutoza kuba umuntu mwiza.

I Kigali tariki 09 Werurwe 2020 ku nyubako ya Kigali Convention Centre hazamuwe ibendera rya Commonwealth, habera n’ibirori byo kwizihiza umunsi wahariwe kuzirikana uwo muryango, hakaba ari na ho inama ya CHOGM yagombaga kubera muri Kamena 2020

Umuryango uhuza ibihugu bikoresha ururimi rw’Icyongereza (Commonwealth), ni wo watangaje ko iyo nama yasubitswe kubera icyorezo cya COVID-19, aya makuru kandi akaba yanemejwe n’abo ku ruhande rw’u Rwanda.

Itangazo ryashyizwe ahagaragara n’Umuryango wa Commonwealth rivuga ko iyi nama yari igiye kuba ku nshuro ya 26, ndetse n’ibindi bikorwa bijyanye na yo byimuriwe ikindi gihe kizatangazwa.

Iri tangazo rikomeza rivuga ko Perezida w’u Rwanda Paul Kagame yavuze ko mu mezi ari imbere, buri gihugu mu bigize umuryango Commonwealth, kizaba gihugiye mu guhangana na COVID-19 ndetse n’ingaruka zayo ku mibereho y’abaturage.

Ngo ni muri urwo rwego ubunanaribonye ndetse n’ubufatanye biranga ibihugu bigize uyu muryango bizagira umumaro ukomeye mu gutuma nta gihugu gisigara inyuma.

Perezida Kagame akomeza avuga ko u Rwanda rwiteguye guha ikaze Umuryango wa Commonwealth mu Mujyi wa Kigali, mu gihe icyorezo kizaba kimaze gutsindwa.

Umunyamabanga wa CommonWealth Hon. Patricia Scotland QC na we yagize ati: “Icyorezo cya COVID-19 cyahinduye amateka yacu muri iyi minsi. Hari abatakaje ubuzima, ubukungu buri gusubira inyuma, kandi imibereho y’abantu yangiritse. Biragoye kuba umuntu yamenya uko ibihe biri imbere bizaba bimeze."

“Tugomba kwitondera ibyago inama zihuza abantu benshi zishobora guteza. Uko ibintu byifashe ubu bisaba ko hafatwa ibyemezo bikomeye ariko bya ngombwa. Twifatanyije n’u Rwanda, kandi turashima ibihugu bigize umuryango wacu, by’umwihariko u Bwongereza, ku kuba bikomeje kudushyigikira n’ubufatanye bikomeje kwerekana muri ibi bihe bitoroshye. Niteguye kongera guhura n’abanyamuryango ba Commonwealth, amaso ku yandi, mu gihugu cyiza cy’u Rwanda.”

Ubu akaba ari bumwe mu butumwa ababyeyi bo mu Mudugudu wa Kaziramire, mu Murenge wa Mwogo bagejwejeho tariki 8 Werurwe ubwo hizihizwaga umunsi mpuzamahanga w’umugore ku rwego rw’Akarere ka Bugesera.

Umuyobozi ushinzwe imibereho myiza y’abaturage mu Murenge wa Mwogo, Mukamana Janvière, avuga ko kugeza ubu muri uyu murenge habarurwa ingo mbonezamikurire esheshatu ziri mu tugari dutandatu muri 25 tugize uwo murenge.

Bavuga ko izi ngo mbonezamikurire zirimo kugira uruhare mu guhindura imibereho y’abana, ndetse n’iy’ababyeyi muri rusange kuko babona umwanya wo kugira indi mirimo bakora ibateza imbere, mu gihe abana bari kwitabwaho mu rugo mbonezamikurire. Ni mu gihe Mwogo ari umwe mu mirenge iza imbere mu kugira abana benshi barangwaho n’imirire mibi.

Ubwo hizihizwaga Umunsi Mpuzamahanga w’Umugore mu Karere ka Bugesera, abagore bongeye kwibutswa kujyana abana babo muri ibi bigo mbonezamikurire kuko ubumenyi n’uburere umwana ahakura bimushoboza kuzavamo umuntu w’ingirakamaro.

Yvette Imanishimwe, Umuyobozi wungirije w’Akarere ka Bugesera ushinzwe imibereho myiza y’Abaturage yagize ati: “Kuri uyu munsi ni n’umunsi wo kubashishikariza kwitabira ingo mbonezamikurire y’abana bato. Izo ngo zidufasha mu bice binyuranye, yaba uburezi n’uburere, ubuzima, imirire myiza, isuku n’umutekano by’umwana. Ibyo byose nk’ababyeyi turabikeneye kugira ngo tuzabone n’abadukorera mu ngata kuko hari aho tuzagera intege zigacika ariko umwana naba yararezwe neza, akitwabwaho, uwo mwana azatubera uw’ingirakamaro.”

Mukandamage Marceline ushinzwe imibereho myiza mu nama y’igihugu y’abagore ku rwego rw’Intara y’Iburasirazuba na we avuga ko gushyira abana mu ngo mbonezamikurire bikwiye kongerwa ku yindi mihigo abagore basanzwe bafite irimo gukomera ku muco, kuba ku ruhembe rw’iterambere, kugira isuku n’iyindi.

Mukandamage agira ati “Nimuze dushyire imbaraga mu bana bato, ejo batagwingira, tukazabura abo turaga igihugu cyacu. Tubagaburire neza, tubambike neza, tunabaganirize neza. Nitubaganiriza neza, bagakura ubwonko bwabo dushyiramo ifumbire ikwiye, bazaba Abanyarwanda beza. Icyo mbasaba ngo mucyongere kuri ya mihigo ni uko abana mubohereza muri izo ngo mbonezamikurire.”

Bamwe mu babyeyi barerera abana babo mu rugo mbonezamikurire rwa Kaziramire rwashinzwe n’umuryango “Terura Umwana Agiterurwa Rwanda”, bavuga ko kuva abana babo batangira kurererwa muri uru rugo hari icyahindutse ku mibereho yabo ndetse n’ubuzima bw’ababyeyi ubwabo burushaho kumera neza.

Uwitwa Nyirantezimana Peninah agira ati “Mu by’ukuri abana bacu bigira hafi ntibitugore, kandi ukabona bafite ubumenyi, bakiga bihagije. Kuba abana bigira aha hari ikintu byahinduye kuko iyo ngiye guhinga, ndamutunganya gusa ubundi nkahita ngenda na we agahita aza ku ishuri, ukabona ubuzima buroroshye.”

Semakura Jean Bosco we agira ati “Uburere tubaha n’ubwa hano birunganirana ugasanga hari icyo umwana ari kugeraho.”

Kuri uyu munsi mpuzamahanga w’abagore mu Karere ka Bugesera, abana barererwa ku rugo mbonezamikurire rwa Kaziramire, bakaba bahawe indyo yuzuye iherekejwe n’amata, ndetse abo bana bahabwa n’umwanya wo kwerekana bimwe mu byo bigishwa.

Biteganyijwe ko iki cyambu kizagabanya igiciro ndetse n’igihe byatwaraga kugira ngo ibicuruzwa bive mu byamvu bya Mombsa muri Kenya na Dar es Salam muri Tanzania.

Kugeza ubu gutwara kontineri imwe ivuye i Mombasa iza i Kigali bitwara amadolari hagati y’ibihumbi 3000 na 4000. Mu gihe kontineri iyo ivuye mu cyambu cya Shanghai mu Bushinwa yerekeza I Mombasa, bitwara amadolari ari hagati ya 500 n’1000 gusa.

Ni icyambu cyubatswe n’ikigo kitwa Dubai Ports World; icyiciro cya mbere kiri butahwe uyu munsi kikaba kigizwe n’aho za kontineri zizajya zishyirwa, ibyumba by’ububiko, ndetse n’ibiro abakozi batandukanye bazajya bakoreramo.

Iki cyambu kitezweho korohereza abacuruzi kugera ku masoko mpuzamahanga no kuzamura ubucuruzi bwabo kubera kubona ibikenewe byose ahantu hamwe.

Igice cyahariwe gushyirwamo kontineri gifite ubuso bwa metero kare 12,000 bushobora kujyaho kontineri ibihumbi 50. Mu gihe ibyumba by’ububiko bibiri bishobora kujyamo toni ibihumbi 640 ku mwaka, kuri buri cyumba.

Dubai Ports World ikaba yarashoye agera kuri miliyoni 80 z’Amadolari ya Amerika muri uyu mushinga.

Itangazo ryashyizwe ahagaragara n’iki kigo mu kwezi kw’Ugushyingo umwaka ushize wa 2018 ryavugaga ko iki cyambu kizatuma u Rwanda ruba igicumbi cy’ubucuruzi ku mugabane wa Afurika n’ubwo ari igihuhgu kidakora ku Nyanja.

Dubai Ports World yubatse iki cyambu isanzwe ifite ibindi byambu bigera kuri 78, mu bihugu bigera kuri 40 hirya no hino ku isi.

Amafoto: Plaisir Muzogeye

Inkuru bijyanye:

Mu Rwanda hafunguwe icyambu kizorohereza abaguzi bo muri Afurika no hanze yayo

Perezida Kagame yahawe ikaze na mugenzi we wa Santarafurika, Faustin-Archange Touadéra

By’umwihariko, Umukuru w’Igihugu cy’u Rwanda yavuze ko u Rwanda rwiteguye gufatanya n’abaturage ba Santarafurika mu rugendo rwabo rw’iterambere.

Yabivuze kuri uyu wa kabiri tariki 15 Ukwakira 2019 ubwo yari muri Repubulika ya Santarafurika mu ruzinduko rw’umunsi umwe yahagiriye, akaba yaratumiwe na Perezida w’icyo gihugu Faustin-Archange Touadéra.

Ku gicamunsi cyo kuri uyu wa kabiri, Perezida Kagame yakiriwe ku meza na mugenzi we wa Santarafurika, nyuma yo gushyira umukono ku masezerano y’ubufatanye mu nzego zitandukanye, hagati y’ibihugu byombi.

Perezida Kagame yavuze ko ibihugu byombi byanyuze mu mateka akomeye ariko ko bidakwiye ko biheranwa n’ayo mateka, ahubwo ko abaturage babyo bagomba guhitamo gukorera hamwe kugira ngo ahazaza habyo habe heza ndetse n’abaturage bumve bafite agaciro.

Perezida Kagame yatanze urugero rw’u Rwanda avuga ko icy’ingenzi mu kugarura amahoro mu gihugu kwari ukubaka ubwiyunge, ndetse no kwishakamo ibisubizo binyuze mu biganiro n’ubwumvikane.

U Rwanda na Repubulika ya Santarafurika byashyize umukono ku masezerano mu bijyanye n’igisirikare, ubucukuzi bw’amabuye y’agaciro na Peteroli, n’iterambere ry’ishoramari.

Perezida Kagame yahawe kandi umudari w’ikirenga uzwi nka “Grand Croix de la Reconnaissance”, ndetse anagirwa umuturage w’icyubahiro w’umujyi wa Bangui, umurwa mukuru wa Santarafurika.

U Rwanda ni kimwe mu bihugu bitanga abasirikare bajya mu butumwa bw’amahoro muri icyo gihugu cya Santarafurika, aho rufite abasirikare 1370 n’abapolisi 430.

Uru ni rwo rugendo rwa mbere Perezida Kagame agiriye muri icyo gihugu kuva Perezida Touadéra yajya ku butegetsi mu mwaka wa 2016.

Perezida Kagame yahawe ikaze na mugenzi we wa Santarafurika, Faustin-Archange Touadéra

Ni rwo ruzinduko rwa mbere Perezida Kagame agiriye muri icyo gihugu kuva Perezida Touadéra yajya ku butegetsi mu mwaka wa 2016.

Perezida Kagame yakiranywe icyubahiro muri Santarafurika

Perezida w’u Rwanda ari bugirane ibiganiro na Perezida wa Santarafurika, hanashyirwe umukono ku masezerano ku bijyanye n’igisirikare, ubucukuzi bw’amabuye y’agaciro na peteroli, iterambere ry’ishoramari, ndetse hanashyirweho komisiyo zihoraho hagati y’ibihugu byombi.

Muri urwo rugendo kandi Perezida Kagame ari buhabwe umudari w’ikirenga uzwi nka “Grand Croix de la Reconnaissance”, hamwe n’imfunguzo z’umujyi wa Bangui, umurwa mukuru wa Santarafurika, nk’ikimenyetso cy’umuturage w’icyubahiro muri uwo mujyi.

U Rwanda ni kimwe mu bihugu bitanga abasirikare bajya mu butumwa bw’amahoro aho muri Santarafurika, aho rufite abasirikare 1370 n’abapolisi 430.

Muri Santarafurika hashyizweho ibyapa bivuga ku ruzinduko rwa Perezida Kagame

Mu Buyapani, imibare ya Banki y’Isi n’Umuryango w’Abibumbye igaragaza ko abaturage bakomeje kugabanuka

Ibi birimo kugira ingaruka zitandukanye zirimo kuba umubare w’abatuye igihugu urimo kugabanuka, umubare w’abasaza ukaruta uw’urubyiruko, byose bikagira ingaruka ku bukungu bw’igihugu.

Mu gihugu cya Koreya y’Amajyepfo, Guverinoma y’icyo gihugu yatangaje ko umubare w’abana umugore ashobora kubyara wongeye kugabanuka mu mwaka ushize wa 2018, ugereranyije n’umwaka wa 2017. Kuri ubu umugore w’aho muri Koreya y’Amajyepfo ashobora kubyara abana 0.98, mu gihe muri 2017, uyu mubare wari uri kuri 1.05.

Icyegeranyo cya guverinoma ya Koreya y’Epfo cyerekana ko ikibazo cyo kutabyara kirimo kwiyongera cyane mu bakobwa barimo kwegera imyaka ya za 30.

Kuri ubu igihugu cya Koreya y’Amajyepfo kiza ku mwanya wa mbere ku isi mu kugira abagore batabyara. Ni mu gihe mu bindi bihugu nka Niger umugore ashobora kubyara abana 7.1; naho mu Rwanda, imibare iherutse gushyirwa ahagaragara n’ikigo cy’igihugu cy’ibarurishamibare (NISR) yerekana ko umunyarwandakazi abyara abana bagera kuri 4.2.

Kuba abaturage ba Koreya batarimo kubyara biri kugira ingaruka zitandukanye zirimo no kuba umubare w’abaturage utarimo kwiyongera, ndetse abasaza bakarushaho kwiyongera, mu gihe umubare w’urubyiruko ukiri hasi.

Kuri ubu aho muri koreya, 13.6% by’abatuye igihugu bari hejuru y’imyaka 65, uyu mubare ukaba uruta uw’abana bari hagati y’imyaka 0 na 14.

Ikibazo cy’abaturage batiyongera gihangayikishije abayobozi

Ikibazo cy’uburumbuke bw’abaturage ba Koreya y’Epfo gihangayikishije abayobozi b’icyo gihugu ku buryo batangiye gushyiraho uburyo bworohereza abaturage kubyara. Zimwe mu ngamba icyo gihugu cyashyizeho harimo kugabanya amasaha abakozi bamara mu kazi kugira ngo babone umwanya wa gusabana. Amasaha y’akazi akaba yaravuye kuri kuri 68 mu cyumweru, agera kuri 52.

Iki gihugu gifite kandi ikibazo cyo kuba abasore n’inkumi bahitamo kudashaka. Ubushakashatsi bwakozwe muri 2018 n’ikigo cya Koreya cyita ku buzima n’imibereho myiza, bwerekana ko igice kinini cy’abanyakoreya bari hagati y’imyaka 20 na 44 bakiri ingaragu.

51% by’abagabo na 64% bari muri iki kigero bavuga ko bahisemo kwiberaho ubuzima bwa kigaragu. Bavuga ko bahisemo ubu buzima kubera ko badafite umwanya, amafaranga cyangwa se ibyiyumviro byo kuba bajya gushaka umuntu bakundana. Ibi byose ngo bijyana no kuba kubona akazi muri icyo gihugu bigoranye, ku buryo abenshi bahitamo gushyira umwanya muto babona mu kwihugura no kubona impamyabumenyi nshya, kugira ngo badatakaza akazi kabo.

Iki kibazo kikaba kigeze ahakomeye ku buryo mu mashuri batangiye gushyiraho amasomo yihariye yigisha abanyeshuri uburyo bwo kureshya umukobwa (gutereta), gukundana, ndetse n’ibijyanye n’imibonano mpuzabitsina, nk’uko inkuru dukesha urubuga rwa CNN ibivuga.

Ikibazo nk’iki ntabwo kiri muri Koreya y’Amajyepfo gusa, kuko u Buyapani nabwo bumaze imyaka myinshi bufite ikibazo cy’umubare w’abaturage wabo urimo kugabanuka. Ubushakashatsi bwerekana ko umubare w’abatuye mu Buyapani uzava kuri miliyoni 127, bakagera kuri miliyoni 88 mu mwaka wa 2065.

Imibare ya Minisiteri y’Ubuzima yerekana ko mu mwaka wa 2017, aha mu Buyapani havutse abana 950.000, mu gihe hapfuye abantu miliyoni 1 n’ibihumbi 300.

Mu Buyapani naho batangiye gushyiraho gahunda zifasha abaturage baho kubyara abana benshi. Urugero ni umujyi umwe witwa Nagi, aho ababyeyi bahemberwa kubyara abana barenze umwe. Imiryango ituye muri uyu mujyi ishobora guhabwa amadolari agera ku 3518, iyo babyaye umwana wa kane.

Ni mu gihe u Rwanda rwitegura umuhango wo “Kwita Izina” abana b’ingagi ku nshuro ya 15.

National Geographic yateguye irushanwa riri kubera ku rubuga rwayo rwa Twitter, aho abantu bagera kuri miliyoni 23 babakurikira kuri uru rubuga, bari guhitamo mu mazina abiri, rimwe rizahabwa umwana w’ingagi.

Amazina bari guhitamo ni hagati y’izina “Intego” ndetse n’izina “Imyato”.

Mu butumwa buri kuri Twitter ya National Geographic buhamagarira abantu gutora, basobanura aya mazina mu rurimi rw’icyongereza, kugira ngo abanyamahanga babashe gutora bayumva, ndetse n’impamvu ari yo bahisemo.

Ubu butumwa buvuga ko izina “Intego” barihisemo kubera ko ubuzima bw’uyu mwana w’ingagi bufite intego muri gahunda u Rwanda rufite yo kurinda ibinyabuzima bigiye kuzimira. Naho izina “Imyato” riha icyubahiro abantu bose bafashije u Rwanda muri gahunda zo kurinda urusobe rw’ibinyabuzima.

National Geographic ni Televiziyo yo muri Leta zunze Ubumwe za Amerika. Ikora ibiganiro byibanda ku bidukikije, siyansi, umuco ndetse n’amateka. Iyi televiziyo ikaba ifite amashami mu bice bitandukanye by’isi.

Ibirori byo Kwiza Izina abana b’ingagi biteganyijwe tariki 6 Nzeri 2019, ahazitwa abana b’ingagi bagera kuri 25.

Nawe wifuza kugira uruhare mu Kwita Izina wajya ku rubuga rwa Twitter rwa National Geographic: https://twitter.com/NatGeo

Fifteen years on, the Kwita Izina tradition continues—and you can help choose the name of one of this year’s babies! You've got 72 hours to cast your vote and name one of Rwanda's new baby mountain gorillas.

— National Geographic (@NatGeo) August 28, 2019

Perezida wa Uganda Yoweri Museveni

Uwo munyeshuri witwa Hillary Seguya yatanze ikirego cye mu rukiko rukuru rw’i Kampala ku wa mbere tariki 26 Kanama 2019, aho yifuza ko uru rukiko rwemeza ko kuba Perezida Museveni yaramukumiriye kuri Twitter akanga ko uwo munyeshuri akurikira ibyo Museveni atangaza ari uguhonyora uburenganzira ahabwa n’itegeko nshinga rya Uganda bwo kudakorerwa ivangura.

Seguya avuga ko Perezida Museveni yamuvanye mu bamukurikira kuri Twitter tariki 30 Nyakanga 2019, ku buryo ngo atabashaga kubona ubutumwa bwa Museveni, ntabashe kumwandikira, n’ibindi; kandi ngo ibi Museveni yabikoze atabanje guteguza uwo musore wamukurikiraga.

Usibye Perezida Museveni, bwana Seguya yareze kandi umuvugizi wa Leta ya Uganda Ofwono Opondo n’umuyobozi wa Polisi ya Uganda Asan Kasingye kuba na bo baramukumiriye kuri Twitter, bakamukura mu mubare w’abareba ibyo bandika.

Mu kirego cye, bwana Seguya avuga ko imbuga za Twitter za bano bayobozi zifashishwa mu gutangaza amakuru kuri rubanda, kandi abanyagihugu na bo bakabasha gutangiraho ibitekerezo.

Agira ati “Nk’Umunya-Uganda uba hanze y’igihugu, Twitter ni bwo buryo bwonyine mbasha kubonamo amakuru yerekeranye n’uko igihugu kiyobowe, nkabasha no kuvugana n’abayobozi bacyo”.

Ikinyamakuru The Citizen cyo muri Tanzania cyanditse ko atari ubwa mbere umuturage arega umukuru w’igihugu mu rukiko kubera ko yamukuye mu mubare w’abamukurikira ku mbuga nkoranyambaga.

Mu kwezi gushize, Perezida wa Amerika Donald Trump na we yarezwe mu rukiko n’umuturage wamushinjaga kuba tyaramwimye uburenganzira bwo kumukurikira, kandi uyu muturage aratsinda. Icyemezo cy’urukiko kikaba cyaravugaga ko urubuga rwa Twitter rwa Perezida Trump ari ahantu hashobora guhurira abantu benshi kandi ko adafite uburenganzira bwo kubuza abatavuga rumwe na we kubona ubutumwa anyuza kuri uru rubuga, yitwaje gusa ko ngo atabishimiye.

Uyu mudepite witwa Zuleika Hassan avuga ko yinjiranye umwana mu cyumba cy’inteko mu gitondo cyo ku wa gatatu tariki 07 Kanama 2019, nyuma y’uko ngo agize ikibazo cyamutunguye, biba ngombwa ko amujyana mu kazi.

Inkuru yagarutsweho n’ibitangazamakuru bitandukanye birimo na Daily Nation iravuga ko Christopher Omulele wari uyoboye imirimo y’inteko ishinga amategeko yahise asaba Madame Hassan guhita asohoka muri icyo cyumba avuga ko atari ahantu haberanye no kwita ku mwana we.

Ibi ntibyashimishije bamwe mu badepite bagenzi be, barimo abagabo n’abagore, basabye Zuleika Hassan kuguma muri icyo cyumba. Hakurikiyeho intonganya hagati y’abari bashyigikiye Zuleika Hassan ndetse n’abifuzaga ko asohokana umwana we.

Byabaye ngombwa ko hifashishwa ushinzwe umutekano kugira ngo Zuleika Hassan n’abamushyigikiye basohorwe mu cyumba cy’inteko ishinga amategeko.

Avugana n’itangazamakuru nyuma y’ibyabereye mu nteko ishinga amategeko ya Kenya, undi mudepite witwa Sophia Abdi Noor yavuze ko bibabaje ko ikintu nk’iki cyabera ahantu hashyirirwaho amategeko, akibaza uko abagore bakorera mu bindi bigo muri icyo gihugu babayeho.

Yagize ati: “ Uyu mwana afite uburenganzira. Nibadashyiraho icyumba cyagenewe kugaburira abana, tuzasaba abagore bose bafite abana bonsa, kubazana mu cyumba cy’inteko ishinga amategeko, abe ari ho babikorera, kugira ngo dutange ubutumwa”.

Uyu mugore n’abari bamushyigikiye ntibumvaga impamvu bagomba gusohorwa mu nteko ishinga amategeko

Mu mwaka wa 2013, inteko ishinga amategeko ya Kenya yemeje ko hashyirwaho icyumba cyihariye mu nzu yayo, kizajya cyifashishwa n’ababyeyi bonsa, ariko kugeza ubu ntabwo cyari cyatangira gukoreshwa.

Bamwe mu badepite b’abagore bemeza ko ibi ari ukwirengagiza uburenganzira bw’abagore bonsa, kandi ko bigomba guhagarara.

Uwitwa Sarah Korere yagize ati: “Abashingamategeko bagomba kuba intangarugero. Uyu munsi natwe turavuga ko birambiranye”.

Igihugu cya Kenya ntabwo ari cyo cyonyine kitemerera abadepite b’abagore kuba bazana abana babo cyangwa se bakabonkereza mu nteko ishinga amategeko.

Nko mu gihugu cy’u Bwongereza, mu mwaka w’ibihumbi bibiri (2000), umudepite witwa Julia Brown yasabye uburenganzira bwo konsa umwana we ariko arabwimwa. Ndetse kugeza uyu munsi ntabwo byemewe kuzana umwana cyangwa konsa mu nzu y’inteko ishinga amategeko.

Muri Australia, mu mwaka wa 2003, umudepite witwa Kirstie Marshall yirukanywe mu nteko ishinga amategeko, mu gihe yari arimo konsa umwana we. Icyo gihe yabwiwe ko yirukanywe kubera ko yazanye umuntu utaratowe (ni ukuvuga urwo ruhinja) mu nzu y’abashingamategeko.

Gusa kuri ubu aho muri Autralia, ndetse no mu bindi bihugu nka Nouvelle Zelande, Espagne, Iceland, hari abagore benshi b’abadepite bajyana impinja zabo mu nteko ishinga amategeko, ndetse bamwe bagafata n’ijambo mu gihe barimo konsa.

Perezida Tshisekedi wa RDC hagati ya Perezida Kagame w’u Rwanda na Perezida Joao wa Angola

Ni ibiganiro byibanze ku mutekano mu karere k’ibiyaga bigari, ndetse n’ubufatanye mu bijyanye n’ubukungu.

Amafoto yashyizwe ahagaraga na Perezidansi y’u Rwanda yerekanye abayobozi b’ibyo bihugu uko ari bitatu bafatanye ibiganza nk’ikimenyetso cy’ibyutswa ry’umubano mwiza n’ubufatanye bw’ibyo bihugu.

Itangazo ryashyizwe ahagaraga nyuma y’ibyo biganiro riravuga ko Perezida wa RDC Félix Antoine Tshisekedi yashimiye mu izina rye n’iry’abaturage b’igihugu cye, abo bayobozi kuba bitabiriye umuhango wo gushyingura Etienne Tshisekedi wahoze ari minisitiri w’intebe w’iki gihugu akanaba se wa Perezida mushya wa Congo Kinshasa.

Ku kibazo cy’umutekano mu karere k’ibiyaga bigari, abakuru b’ibihugu uko ari bitatu biyemeje gufatanya mu gushaka umuti w’ikibazo cy’imitwe yitwaje intwaro ikorera muri Congo, ndetse no gukorana n’abandi bayobozi bo mu karere mu kugishakira umuti.

Aba bayobozi biyemeje kandi kongerera ingufu Inama Mpuzamahanga y’akarere k’ibiyaga bigari (ICGLR), kuko ari yo nzira nziza yo gukemura ibibazo byo mu karere, ndetse baniyemeza gukora ibishoboka byose kugira ngo imyanzuro bafashe ishyirwe mu bikorwa n’impande zose.

Akarere k’ibiyaga bigari gakomeje kuba isibaniro ry’imitwe yitwaje intwaro iteza umutekano muke, ahanini igashinga ibirindiro mu mashyamba y’inzitane yo muri Congo.

Imwe muri iyo mitwe harimo n’umutwe wa FDLR washinzwe na bamwe mu basize bakoze Jenoside yahitanye abatutsi barenga miliyoni imwe.

Ku bufatanye n’igisirikare cye Republika Iharanira Demokarasi ya Congo, bamwe mu bayobozi b’uyu mutwe batawe muri yombi, ndetse boherezwa mu Rwanda kugira ngo bakurikiranwe mu nkiko ku byaha bakoze.

Umwe muri abo hakaba harimo na Le Forge Fils Bazeye watawe muri yombi mu kwezi kw’Ukuboza umwaka ushize wa 2018.

Ibiganiro hagati y’abakuru b’ibihugu uko ari batatu bibaye mu gihe umubano hagati y’u Rwanda n’ibihugu by’ibituranyi bya Uganda n’Uburundi, ukomeje kutifata neza.

U Rwanda rukaba rushinja ibyo bihugu kuba bicumbikiye bamwe mu banyarwanda bashaka guhungabanya umutakano w’igihugu.

Ibi bikaba byemezwa na Callixte Nsabimana, wayoboraga umutwe witwa FLN wemeye mu rukiko ko abayobozi b’igisirikare b’Uburundi na Uganda bamufashije gutegura no gushyira mu itegurwa ry’ibitero ku Rwanda byahitanye abantu, ndetse byangiza n’imitungo myinshi.

Abagize ihuriro ry’Abakunzi na KT Radio bayihaye impano y’isaha

Ku wa gatandatu, tariki 29 Mata 2017, nibwo abagize iryo huriro ryasuye icyicaro cya Kigali Today Ltd, by’umwihariko basura studio ya KT Radio.

Muri uru rugendo, abakunzi ba KT Radio basobanuriwe imikorere yayo n’iya Kigali Today Ltd muri rusange. Banagize amahirwe yo guhura n’abanyamakuru bakunda mu biganiro bitandukanye barimo Ravy Ndizeye na Gasana Marcellin.

Mu rwego rwo kwerekana urukundo bafitiye KT Radio, abagize iri tsinda banageneye KT Radio impano y’isaha imanikwa mu nzu.

Abagize iri huriro ry’abakunzi ba KT Radio ntabwo bagarukira ku gukunda KT Radio gusa kuko banakora ibikorwa bitandukanye bigamije kubateza imbere.

Abagize ihuriro ry’Abakunzi na KT Radio batemberejwe muri studio ya KT Radio

Mutesi Angelique Olga, umuyobozi w’iri huriro akaba ari nawe warishinze, avuga ko kuri ubu bamaze gufungura konti bashyiraho amafaranga buri kwezi; bakaba bafite intego yo gukora ubworozi bw’ingurube.

Abagize iri huriro baherutse kandi gusura Urwibutso rwa Jenoside yakorewe Abatutsi rwa Ntarama ruri mu Bugesera. Barateganya kuremera uwarokotse Jenoside yakorewe Abatutsi utuye mu murenge wa Gatenga.

Iri huriro ry’abakunzi ba KT Radio ryatangiye mu kwezi kwa kabiri muri uyu mwaka wa 2017.

Abagize ihuriro ry’Abakunzi na KT Radio bifotoranya n’umunyamakuru wa KT Radio, Christophe Kivunge (uri imbere)