Yavuze ko ku ikubitiro haje robots eshanu zizahera akazi ko gupima virusi y’icyorezo Covid-19 (Coronavirus) ahari abanduye ubwo burwayi, ariko ko hari n’izindi Leta y’u Rwanda yatumije zizagezwa mu gihugu mu minsi ya vuba.

Dr Ngamije yabwiye RBA ati "Izi robots zije gutanga umusanzu kuko muri iki cyorezo hari ibyo twabonye byatwunganira, turazishyira ahari abanduye, aho ishobora gufata ibipimo by’umurwayi nk’umuriro, uko umuntu ahumeka n’ibindi."

"Ibi biratuma umuforomo cyangwa umuganga atajya kureba umurwayi inshuro nyinshi", bikaba ngo byanamufasha gukurikirana abantu benshi icyarimwe no kubona akanya ko kuruhuka.

Minisitiri w’Ubuzima akomeza agira ati "Izi robots tuzazifashisha mu minsi iri imbere ahantu hahurira abantu benshi nko muri gare, mu masoko, aho zishobora kumenya ufite ibimenyetso by’indwara ya Covid-19".

Izi mashini zimeze nk’umuntu (robots) eshanu zanahawe amazina y’Ikinyarwanda, hakaba harimo iyitwa Urumuri, Icyizere, Kazuba, Ngabo n’iyitwa Mwiza.

Minisiteri y’Ubuzima(MINISANTE) ikomeza ivuga ko gukoresha robot mu gupima Covid-19 bizajya byorohereza abantu kubona ibisubizo mu buryo bwihuse.

MINISANTE ikomeza ivuga ko muri iki gihe abantu boroherejwe bagasohoka hanze, atari umwanya wo kwirara, iyo Minisiteri ikaba isaba abantu gukomeza amabwiriza yo kwirinda.

We are introducing the use of robots in the management of our #COVID19 Treatment Centers to reduce transmission risks. Robots will screen temperature, monitor status, keep medical records of Patients. @RwandaICT @RISARwanda @RURA_RWANDA pic.twitter.com/2BXmUaT4HI

— Rwanda Biomedical Centre (@RBCRwanda) May 8, 2020