Benama Theophile yita ku bafite ubumuga, atuye Musanze:

“Icyo numva by’umwihariko cyazigirwa mu nama y’umushyikirano nagendera ku bafite ubumuga, abantu barimo kwiteza imbere, imirimo iratangwa ariko ku bafite ubumuga haracyarimo imbogamizi, kugirira icyizere abafite ubumuga biracyari hasi”.

Amani Aimable yiga ubukerarugendo n’amahoteli, atuye mu Karere ka Musanze:

Avuga ko guhanga akazi uyu munsi bitoroha kubera ubumenyi buke n’ubushobozi bw’amafaranga, asaba ko boroherezwa kubona inguzanyo. “Bakatwohereza kubona inguzanyo byaba ngombwa bakanadufasha. Nubwo hari BDF usanga bifata inzira ndende rimwe na rimwe ugacika intege”.

Vedaste Ndizihiwe yikorera ku giti cye, mu Karere ka Gakenke:

“Icyo bakwibandaho cyane ni ibintu by’iterambere cyane cyane ko usanga hari uduce tumwe na tumwe iterambere rigeramo buhoro ahandi ugasanga ari cyane, nko mu duce dutuyemo urabona ko ari ahantu hakiri inyuma cyane mu iterambere nko mu buryo bw’umuriro w’amashanyarazi, umuhanda, amazi, turacyari inyuma cyane ugereranyije n’utundi turere”.

Mukansenga Angelique yiga mu ishuri ryisumbuye mu Karere ka Gicumbi:

Yifuza ko iyo nama yagaruka ku kibazo cy’ubushomeri mu rubyiruko rurangije amashuri yisumbuye bagatekereza uburyo bwo kuborohereza kwihangira imirimo no kubonamo inguzanyo bitagombye ingwate, ahubwo bakavugana uburyo bakwishyura banki.

Izabayo Remy ni umumotari, mu Karere ka Burera:

Asaba ko hakwigwa uburyo bunoze bwo gutanga “Authorization” (uruhushya rwemerera ikinyabiziga gukorera mu muhanda) ku bamotari : “Hari igihe umuntu atuma “authorization”, wamara gutanga amafaranga bikamara wenda nk’amezi atanu cyangwa se atandatu gutyo. Kandi noneho iyo ugeze mu muhanda, ugahura n’umupolisi arakwandikira ndetse wanamwereka na gitansi akaba atayemera kuko ntabwo ari “authorization” nyine.

Tito Niyibigira akorera Koperative y’Abahinzi-Borozi mu Gakenke:

“Jyewe numva bakwita cyane cyane ku kuvugurura ubuhinzi, kubera ko Abanyarwanda benshi ubuhinzi ni bwo bubatunze, ariko mu kuvugurura ubuhinzi bakita cyane ku bintu bijyanye no kubona imbuto, kuko hari igihe haboneka ikibazo cy’imbuto y’ibirayi ugasanga abantu barikubira imbuto zo guhinga, noneho ugasanga no mu gihe cy’ihinga ry’ibigori hamwe imbuto iraboneka ahandi ntayo”.

Sunday Emmanuel ni umuyobozi w’umudugudu mu Karere ka Gicumbi:

Yifuje ko inama y’umushyikirano yaziga ku kibazo cy’agahimbazamusyi k’abayobozi b’imidugudu kuko bakora akazi kavunanye bityo bikabafasha kuba banakorera mu mucyo birinda kubogama kuko hari uwagize icyo amupfumbatisha (ruswa).

Immaculee Mukankusi ni umuhinzi; atuye mu Karere ka Gakenke:

“Dufite amazi make cyane atadukwiriye abaturage mu Murenge wa Ruli n’ikibazo pe ku buryo ubona no mu Mujyi wa Ruli cyangwa iwacu ku Rwesero ikibazo cy’amazi mbona kiri mu bintu bitera ingaruka mbi ku baturage muri rusange nk’uburwayi bw’impishwi bituruka ku mibereho itari myiza”.

Ahishakiye Clement yarangije amashuri yisumbuye, atuye mu Karere ka Burera:

Asaba ko bakwiga uburyo bunononsoye bwo gushyira abantu mu byiciro by’ubudehe: “Bagena uburyo hajya habaho igenzura ryimbitse mbere y’uko (abayobozi b’inzego z’ibanze) batanga raporo (y’abashyizwe mu budehe) ku karere bakabanza kunononsora neza niba hari abasigaye cyangwa se niba bimeze neza, bakamenya impamvu hari abasigaye.

Abashyira abantu mu byiciro bagahabwa amahugurwa menshi niba hagiye kuba icyo gikorwa, kugira ngo abo bagiye kugikora bazagikorane ubushishozi, n’ubwitonzi…”.

Ahishakiye Tharcisse ni umunyonzi, mu Karere ka Burera:

“Nk’ubungu Polisi ntabwo zijya muri uyu muhanda w’ibitaka. (Polisi iramutse igiyemo) abatwara amatagisi ntibagende uko biboneye kuko haba igihe utwaye (igare), ugasanga imodoka ihagaze mu muhanda, ukabura ahantu unyura, ukaba wanamugwamo”.

Hatangimana Patrice umuhinzi w’inyanya mu mu karere ka Rulindo:

“Mu byo bazaganiraho bazibande ku kureba uko batugabaniriza ikiguzi cy’ifumbire mva ruganda, kandi banaganire uburyo badushakira amasoko ku musaruro wacu nkatwe b’abahinzi”.

Habyarimana Innocent ni umumotari; mu Karere ka Musanze:

“Icyifuzo cyanjye ni uko imihanda yo mu makaritsiye (quartiers) yo muri uyu mujyi wa Musanze yakorwa. Iratubangamiye ahantu hose usanga ari ibinogo rwose ntimeze neza. Nkatwe nk’abamotari idutera igihombo, usanga tugura morotoseri igihe cyose.”

Iki cyegeranyo cyateguwe n’abanyamakuru ba Kigali Today mu ntara y’Amajyaruguru