Ingingo y’umutekano w’u Rwanda imaze iminsi igibwaho impaka, nyuma y’uko hari ababiheraho bakavuga ko u Bwongereza bukwiye kureka umugambi wabwo wo kohereza abimukira mu Rwanda, kuko umutekano wabo mu Rwanda utizewe.

Kuba umubare munini w’Abadepite mu Bwongereza watoye mu cyiciro cya mbere ushyigikira ko u Rwanda rutekanye, birongerera ingufu amasezerano y’u Rwanda n’u Bwongereza yo kohereza abimukira mu Rwanda. Minisitiri w’Intebe w’u Bwongereza, Rishi Sunak, yatangaje ko icyiciro kizakurikiraho ari icyo gutora ko uwo mushinga uba itegeko.

Ibikorwa bya Adam Bradford byibanda ku iterambere ry’urubyiruko, harimo ibifasha urubyiruko rwabaswe n’imikino y’amahirwe kuyireka.

Mu byo kompanyi ye yitwa ‘The Adam Bradford Agency (ABA) ikora harimo kugira inama abantu bakora ubucuruzi ku buryo bateza imbere ishoramari ryabo.

Adam Bradford yizera ko inyungu za mbere ari izigaragaza ko ibikorwa bye bihindura ubuzima bw’abandi, kurusha kureba inyungu ze bwite akura mu bucuruzi. Avuga ko inyungu zose yabona aharanira kuzisangira na sosiyete.

Uwo Mwongereza umaze imyaka ibiri aba mu Rwanda, amara impungenge abimukira n’abandi basaba ubuhungiro mu Bwongereza bashobora koherezwa mu Rwanda. Agaragaza ko raporo zisohoka zigaragaza ko u Rwanda ruri mu bihugu bifite umutekano, atari uw’abasaba ubuhungiro bonyine, ahubwo ko n’abaturage ndetse n’abandi bagenda muri icyo gihugu baba bafite umutekano wizewe.

Ubwo yaganiraga na Televiziyo yo mu Bwongereza yitwa GB News, nyuma y’uko abagize Inteko Ishinga Amategeko bari bamaze gutora bashyigikira amasezerano y’u Rwanda n’u Bwongereza, Bradford yashimangiye ko mu Rwanda nta kibazo cy’umutekano muke gihari, kandi ko yumva atekanye kandi atewe ishema no kuba mu Rwanda.

Bradford ukunze kumvikana aratira abandi u Rwanda, avuga ko abiterwa cyane cyane n’abo abona birirwa basebya u Rwanda, barubeshyera, cyane cyane ababa mu bihugu by’i Burayi na Amerika.

Yagize ati “Hano bigaragara ko ubuyobozi bw’Igihugu bwakoze ibishoboka byose kugira ngo amahoro agaruke. Hari ibikorwa bifatika bibeshyuza abavuga ko u Rwanda ari igihugu gikoreshwamo igitugu, ndetse n’abavuga ko u Rwanda ari ahantu abantu badafite ubwisanzure.”

Yongeyeho ati “Mu by’ukuri u Rwanda ni Igihugu kirimo gutera imbere cyane, kirimo ubwisanzure, kandi cyakira neza abakigana. Hano hari impunzi zibarirwa mu bihumbi ijana zaturutse mu bindi bihugu, zimaze igihe zihatuye, kandi zifite n’uburyo bwo kubaho. Hari n’abandi bahimukiye baza kuhatura nkanjye, kubera amahirwe ahari yo kuhakorera ishoramari kandi ribyara inyungu.”

Adam Bradford yabajijwe ku bijyanye n’ubukungu bw’u Rwanda, niba abona butera imbere ndetse n’abaturage bakaba batera imbere, asobanura ko nubwo imibereho y’abaturage bose itaba iri ku rwego rumwe, ariko Leta yashyizeho ingamba zorohereza abashoramari n’izituma mu gihugu hahangwa imirimo, bityo uko abantu babona icyo bakora imibereho n’ubukungu bwabo na byo bigatera imbere.

'From experience I feel a lot safer living in Kigali, Rwanda, than I ever would living in London!'

Rwanda resident, Adam Bradford says the country 'has no problems at all' for migrants.

🔓 Become a GB News Member: https://t.co/mNsRsGC8ef pic.twitter.com/AczrIJa6oB

— GB News (@GBNEWS) December 12, 2023