Inama y’uyu mwaka iribanda ku ikoranabuhanga n’ubufatanye muri uyu muryango, ariko by’umwihariko ikaba ari inama igomba gusiga ishyizeho Umunyamabanga mukuru wa OIF kuko manda y’imyaka ine ya Louise Mushikiwabo wari usanzwe uwuyobora yarangiye.

Louise Mushikiwabo akaba yarongeye kwiyamamariza kuba umunyamabanga wa OIF kandi akaba ari we mukandida umwe rukumbi kuri uyu mwanya, ibintu birimo gutanga ikizere ko yongera gutorwa.

Iyi nama ihuza abakuru b’ibihugu na za guverinoma itegurwa buri myaka ibiri igafatirwamo ibyemezo bitandukanye.

Iyi nama igiye kuba yari imaze gusubikwa inshuro ebyiri kubera icyorezo cya COVID-19. Ubu ikaba iteranye ku nshuro ya 18 nyuma y’iyo myaka yari imaze idaterana.

Umuryango wa OIF urizihiza kandi isabukuru y’imyaka 50 umaze ubayeho kuko washinzwe mu 1970. Ugizwe n’ibihugu 88 bikoresha Ururimi rw’Igifaransa.

Ikigamijwe muri uyu muryango ni ukongera umubare w’abavuga ururimi rw’igifaransa ku isi ndetse no gusigasira uru rurimi kugira ngo rutagenda rwibagirana mu bihugu bimwe na bimwe kandi ari ururimi mpuzamahanga.

Perezida #Kagame na Madamu Jeannette #Kagame bamaze kugera i Djerba muri Tuniziya, aho bitabiriye Inama y'abakuru b'ibihugu na za guverinoma mu Muryango Mpuzamahanga w'ibihugu bikoresha Igifaransa, izatangira kuri uyu wa Gatandatu. #SommetDjerba2022 pic.twitter.com/H3FxkyzWS2

— RADIO RWANDA (@Radiorwanda_RBA) November 18, 2022