Perezida Kagame ashyigikiye ubucuruzi hagati ya Afurika n’u Burusiya

Perezida wa Repubulika y’u Rwanda Paul Kagame arizera ko umubano hagati y’umugabane wa Afurika n’u Burusiya ushobora gukura mu gihe kiri imbere, mu gihe impande zombi zikomeje guteza imbere ubucuruzi ndetse n’imikoranire hagati y’inzego zitandukanye.

Perezida Kagame yavuze ibi ku wa kane tariki 24 Ukwakira 2019, i Sochi mu Burusiya, ku munsi wa kabiri w’inama yahuzaga ibihugu bya Afurika ndetse n’u Burusiya.

Perezida Kagame yavuze ko umubano w’u Burusiya na Afurika n’u Rwanda by’umwihariko umaze igihe kinini.

Avuga ko inama nk’iyo ibaye mu gihe cyiza kubera ko Afurika iri kunyura mu bihe bidasanzwe by’impinduka cyane cyane mu bijyanye n’ubucuruzi ndetse n’ikoranabuhanga.

Perezida Kagame yavuze ko isoko rusange rya Afurika rigiye gutangira rizaba ari ryo rinini ku isi, kandi rizaha amahirwe menshi y’ubucuruzi ibigo bitandukanye, abashoramari, ndetse n’abandi bafatanyabikorwa barimo n’u Burusiya.

By’umwihariko yavuze ko u Burusiya bwafatanya cyane na Afurika mu bijyanye n’ikoranabuhanga, ubushakashatsi, ndetse n’ubwoko bushya bw’ingufu dore ko u Burusiya ari kimwe mu bihugu biza imbere y’ibindi.

Perezida Kagame avuga ko umubano hagati y’impande zombi wari ukwiye gutanga umusaruro ufatika kandi ufitiye akamaro buri ruhande, akemeza ko ibi byatuma abaturage b’ibihugu byose bagira ejo hazaza heza.

MENYA UMWANDITSI

kigalitoday android app mobile

Ibitekerezo  

Ohereza igitekerezo

Igitekerezo cyanyu kiragaragara kuri Kigali Today nyuma y'isuzuma kandi mu gihe kidatinze. Udashaka ko izina ryanyu rimenyekana wakoresha alias, Turabashimiye.

Amakuru aheruka