Mu butumwa yanyujije kuri Twitter, Louise Mushikiwabo yagize ati “Abachou b’iwacu muraho! Mbashimiye byimazeyo ubutumwa bwiza mwakomeje kungezaho maze gutorerwa kongera kuyobora Francophonie. Nezezwa kandi ngaterwa ingufu mu mirimo nkora n’uko mfite iwacu. Twikomereze imihigo rero ibindi ni ‘problèmes gérables’ (ni ibibazo byakemuka).

Akimara kwandika ubu butumwa, Umuyobozi w’Akarere ka Bugesera, Richard Mutabazi, yahise amusubiza ati “Turagushimiye umuchou. Kugira iwanyu natwe tukagira uwacu ntako bisa. Imihigo rata, ibindi ubundi.”

Iyi mvugo ‘abachou’ yagarutsweho cyane ubwo Louise Mushikiwabo yazaga mu Rwanda yitabiriye umuhango wo kwita Izina Ingagi, bamwe mu bakoresha imbuga nkoranyambaga bamubwira ko abantu bakundana bitana ‘ba chou’. Amaze gusubira mu kazi aboherereza ubutumwa bubasezeraho anabamenyesha ko abakunda. Yongeraho Ati “Mushikiwabachou”.

Louise Mushikiwabo yongeye gutorerwa kuba Umunyamabanga mukuru w’Umuryango w’Ibihugu bivuga ururimi rw’Igifaransa (OIF), tariki ya 19 Ugushyingo 2022, umwanya yari asanzweho, akaba yari arangije manda ya mbere y’imyaka ine.

Mushikiwabo wari umukandida rukumbi kuri uwo mwanya, yemejwe binyuze mu bwumvikane busesuye bw’abahagarariye ibihugu byabo, mu nama ya OIF yabereye i Djerba muri Tunisia.

Tariki 12 Ukwakira 2018 nibwo Louise Mushikiwabo yatorewe kuba Umunyamabanga mukuru w’Umuryango w’Ibihugu bivuga ururimi rw’Igifaransa (OIF) muri manda ye ya mbere, asimbuye Umunya-Canada Michaelle Jean wawuyoboraga.

Abachou b'iwacu muraho! Mbashimiye byimazeyo ubutumwa bwiza mwakomeje kungezaho maze gutorerwa muri #SommetDjerba2022 kongera kuyobora Francophonie. Nezezwa kandi ngaterwa ingufu mu mirimo nkora nuko mfite iwacu. Twikomereze imihigo rero ibindi ni "problèmes gérables" 😉! pic.twitter.com/ApI3SD5tA4

— Louise Mushikiwabo (@LMushikiwabo) November 22, 2022