Bolsonaro ushinja OMS kubogama avuga ko ashobora kugera ikirenge mu cya Perezida wa Amerika agahagarika imikoranire na OMS

Abivuze nyuma y’uko OMS iburiye Guverinoma z’ibihugu ku kaga gashobora gukurikirana no guhagarika ingamba zo gukumira icyorezo cya COVID-19 zirimo n’iyo kuguma mu rugo zari zashyiriweho kugabanya ikwirakwira ry’icyo cyorezo.

“Ndababwiza ukuri, Leta zunze ubumwe za Amerika zahagaritse imikoranire na OMS, natwe turi kubyigaho mu gihe kiri imbere. OMS igomba gukora itabogama cyangwa tuzahagarike gukorana na yo natwe” uku niko Perezida Bolsonaro yabibwiye abanyamakuru imbere y’ibiro bye ku wa Gatanu tariki 05 Kamena 2020.

Mu kwezi gushize kwa Gicurasi nibwo Perezida Donald Trump wa Leta zunze Ubumwe za Amerika yavuze ko igihugu cye kigiye guhagarika imikoranire na OMS, ayishinja kuba igikoresho cy’u Bushinwa bwagaragayemo Coronavirus bwa mbere.

Perezida Bolsonaro na we yakunze kugaragaza ko Coronavirus atari icyorezo gikomeye cyatuma abaturage babuzwa gusohoka, akanenga abayobozi basabye abaturage kuguma mu ngo. Yanakunze guhamagarira abaturage b’igihugu cye gukoresha imiti ya Chloroquine na Hydroxychloroquine yemeza ko ifasha mu guhangana na COVID-19.

Atangaje ko ashobora guhagarika gukorana na OMS nyuma gato y’uko Brazil itangaje ko abamaze guhitanwa na Coronavirus muri icyo gihugu basaga 35,000, kugeza ubu kikaba ari icya gatatu ku rutonde rw’ibifite abantu benshi bishwe na Coronavirus nyuma ya Amerika n’u Bwongereza.

Ku wa kane Minisitiri w’ubuzima wa Brazil yari yatangaje ko imibare y’abandura Coronavirus yazamutse ikagera ku 600,000 igahitana abagera ku 1,437 mu masaha 24.

Ku wa Gatanu tariki 05 Kamena 2020 nabwo inzego z’ubuyobozi zatangaje ko hapfuye abantu 1,005 ariko Perezida Bolsonaro akomeje gusaba ko amabwiriza yo kuguma mu rugo avanwaho vuba “kuko idindira ry’ubukungu riteye impungenge kurusha Coronavirus.”

Icyorezo cya COVID-19 muri Amerika y’Amajyepfo giteye impungenge cyane, hakaba habarurwa abantu basaga miliyoni kimaze guhitana, nk’uko OMS ibitangaza.

Mu gihe Brazil na Mexique biza ku isonga mu kugira ubwandu bushya, icyo cyorezo kiri no gusakara mu bihugu nka Peru, Colombia, Chile na Bolovia.

Benshi mu bayobozi b’ibihugu bya Amerika y’Amajyepfo bafashe ingamba zo kurwanya ikwirakwira ry’icyo cyorezo kurusha Perezida Bolsonaro. Gusa bamwe mu banyapolitiki bari bashyigikiye gahunda yo kuguma mu rugo mu kwezi kwa Werurwe na Mata, bari gusaba ko ibikorwa by’ubucuruzi byongera gufungura kuko inzara n’ubukene bikomeje kwiyongera.