Ibi ngo bibafasha kuba banini kandi umugabo utowe ko ari we munini ngo aba akunzwe cyane na buri mukobwa kandi ngo ahora abyubahirwa iteka ryose.

Aba nibo batowe mu 2013, bazahora bashimirwa ko ari intwari mu bwoko bwabo.

Inkuru yatangajwe n’ikinyamakuru The Daily Mail cyo mu Bwongereza yagaragaje ko muri ubwo bwoko bw’Ababodi ngo bakunda cyane umugabo ubyibushye, bakaba banabikorera irushwanwa ariko bisaba ubwihangane budasanzwe ngo umusore afungure ibidasanzwe kugeza yegukanye agahigo ko kuba umusore ubyibushye.

Abasore bose bashaka kurushanwa ngo bamara amezi atandatu bafungiranye, barya byinshi kandi bakanywa amata n’amaraso bakazasohoka ku munsi bita Ka’el batangiriraho umwaka mushya, bakarushanwa uwemejwe nk’uwaciye agahigo akaba abaye intwari y’ubuzima bwose kandi ngo abakobwa bose baramubenguka, bakararikira kuzarongorwa n’umuntu nk’uwo.

Abari mu myiteguro ngo bazinduka mu rukerera banywa amata n’amaraso baba betegerejeho kubabyibushya.

Uko iri rushanwa rigenda rero, ngo buri muryango uhitamo umusore babona bizeye ko bazagaburira akavamo umugabo nyawe ubyibushye cyane.

Iyo bamaze kumwemeza ngo bamushyira mu nzu ya wenyine adasohokamo, aho abagore bamusanga bamugemuriye amafunguro menshi, ngo aba arimo cyane cyane amata n’amaraso y’inka. Ibi ngo babikorera ko bumva ko ari byo bibyibushya cyane. Aba kandi ngo bagomba kuba ari abasore batarashinga urugo.

Nyuma y’amezi atandantu ngo haba umuhango, buri muryango ukamurika umusore wabo. Bibera ahantu ku karubanda haba hari igiti cyahawe umugisha nuko abasore baba barikwijeho umubyibuho bose bagakora akarasisi karekare kandi mu mwanya munini kugeza igihe abakuru bo muri ubwo bwoko baza gutora no kwemeza ubyibushye kurusha abandi agahabwa ikamba kandi akemezwa mu bwoko hose ko abaye intwari izahora yibukwa.

Iyo abagabo bari mu myiteguro, bifungirana amezi atandatu badasohoka, bakagemurirwa amafunguro arimo amata n’amaraso y’inka ngo bazasohokemo barabyibushye bihagije.

Utowe kandi ngo usanga ariwe abakobwa batararongorwa birukira cyane, buri wese muri bo yumva amurongoye yaba agize umugisha wo kurongorwa n’umugabo w’intwari kandi wubashywe.

Iyo iyi mihango irangiye, abagabo bawitabiriye basubira mu buzima bwabo busanzwe, hakaba ubwo ngo bongera kugenda bananuka buhoro buhoro, bakazasubira ku mubyibuho usanzwe.

Iyi mihango ya Ka’el ariko ngo mu gihe gito irongera igatangira, abandi bashaka kurushanwa bagatangira imyiteguro y’amezi atandatu ngo bazatorwemo undi mugabo ubyibushye ku munsi wa Ka’el ukurikiyeho.

Iyo ibirori bya Ka’el bihumuje, abarushanwaga basubira mu buzima busanzwe.

Abiteguye biyizeye ku mubyibuho bakora akarasisi bakiyereka ababareba banabatoramo ubyibushye kurusha abandi.

Uyu arashyira mu mbavu ifunguro rye eya buri mugoroba ngo azakomeze kubyibuha.

Abakobwa ngo nabo baba babukereye mu birori kandi ngo bakigaragaza neza ngo barebe ko umugabo watowe yababenguka akazabashaka.

Ahishakiye Jean d’Amour