Izi mpanga z’abakobwa bamaze ibyumweru bine bavutse bahawe amazina ya Candice Anne ufite umubiri, imisatsi n’amaso by’abirabura na Aleisha Lilly ufite ikimero, umusatsi n’ibimuriho byose by’abazungu.

Umuganga yasobanuriye uyu mubyeyi ko nubwo kubyara impanga zidasa bitajya bikunda kubaho ariko bibaho, dore ko ngo bibaho inshuro imwe kuri miliyoni; nk’uko bitangazwa na The Sun.

Ngizo impanga z’abakobwa zavutse zidahuje uruhu.

The Sun ivuga ko uwo mudogiteri yabanje kubaza Pamela ababyeyi avukaho kugira ngo abone uko amumara impungenge kuri izo mpanga yabyaye.

Pamela yasubije ko nyina ari Umunyajamayika, Umunyafurika uvanzemo no kuba umunya Irlande. Papa we ni umwera w’umuyahudi. Ababyeyi b’umugabo wanjye ni abanyajamayika na Irlande.

Amaze kumva ibi, Dogiteri yahise amubwira ko ahereye kuri iyo miterere y’ababyeyi babo, ibyo byamubayeho ari ibintu bisanzwe kuko uko byamera kose hagomba kubaho ko basaza be na bakuru be cyangwa barumuna be badasa neza kandi ibara ry’impu zabo atari rimwe. Gusa ngo ubusanzwe ibi ntibikunda kugaragara ku mpanga.

Ise na nyina b’abana nubwo babonye ari ibintu bidasanzwe ariko babyakiriye neza.

Pamela yishimiye aba bana bombi yabyaye aho yagize ati “Kuri njye, abana banjye kuba badasa kandi ari impanga nicyo kibagira agahebuzo cyane.’’

Ise w’aba bana witwa Oswald, abajijwe uburyo yakiriye aba bana dore ko ngo hari abagabo babona abagore babo babyaye batya bagatekereza ko babaciye inyuma, yasubije ko yakiriye neza n’ibyishimo aba bana kandi umugore we akimara kubyara yahise yumva abakunze cyane. Yongeraho ko kandi nubwo badahuje uruhu, ariko basa cyane.

Nubwo batarakura, Aleisha ngo aracangamutse nka mama we naho Candice we ngo atuje nka papa we.

Egide Kayiranga