Abinyujije ku rubuga rwa Instagram, Oleg Tinkov, yagize ati “Nafashe umwanzuro wo kureka ubwenegihugu bwanjye bw’u Burusiya. Sinshobora kandi sinshaka gukomeza kwifatanya n’igihugu cy’ikinyagitugu cyashoye intambara mu gihugu cy’amahoro cy’abaturanyi, ubu kikaba kirirwa cyica abantu b’inzirakarengane”.

“Ndizera n’abandi banyemari b’Abarusiya bakomeye, bazakurikiza urugero rwanjye, kugira ngo ubutegetsi bwa (Vladimir) Poutine bucike intege, n’ubukungu bwe bumanuke bityo bizarangire atsinzwe”.

Ubwo butumwa yanditse ku rubuga rwa Instagram, yabukurije ifoto yerekana ko ‘consulat’ y’u Burusiya yemeza ko ubwenegihugu bwe burangiye.

Oleg Tinkov yakomeje agira ati, “Nanga u Burusiya bwa Poutine, ariko nkunda Abarusiya bose bagaragaza neza ko badashyigikiye iyi ntambara nagereranye n’ibisazi”.

Oleg Tinkov washinze banki yitwa ‘Tinkoff’, ngo ni umukire wazamutse mu buryo bwihuse, ku buryo mu mwaka wa 2020 iyo banki ye yari ku mwanya wa Gatatu mu banki akomeye aho mu Burusiya, nyuma y’izitwa Sberbank na VTB.

Ni banki kugeza ubu ngo ifite abakiriya bagera kuri Miliyoni 20. Oleg yamaganye intambara u Burusiya bwashije muri Ukraine guhera muri Mata 2022, asaba Abanya-Burayi gushyira iherezo kuri ubwo bwicanyi.