Imbeba yatumye urugendo rw’indege ruhagarara

Yanditswe na

Malachie Hakizimana

22-09-2024 - 12:59' | Ibitekerezo ( )

Kompanyi y’indege Scandinavian Airlines (SAS) yatangaje ko imwe mu ndege zayo byabaye ngombwa ko ku wa Gatatu tariki 18 Nzeri 2024 igwa gihutihuti igahagarikira urugendo mu nzira, nyuma y’aho imbeba ivumbutse iva mu gakarito karimo ibiryo umugenzi wari mu ndege yari ahawe.

Indege ya Scandinavian Airlines yavaga muri Norvège igana muri Esipanye ariko ihagarara mu nzira itahageze kubera imbeba

Iyi ndege yarimo iva ku murwa mukuru wa Norvège, Oslo, ijya i Malaga muri Esipanye, biba ngombwa ko igwa hutihuti mu mujyi wa Copenhagen muri Danemark.

Umuvugizi w’iyi kompanyi, Oystein Schmidt, yabwiye ibiro ntaramakuru by’Abafaransa, AFP ko kugwa kw’iyo ndege kwakurikije amabwiriza ngenderwaho y’iyo kompanyi, kuko iyo mbeba ikimara kuvumbuka mu biryo by’umugenzi yahise ijya kwihisha mu ndege ahantu hatagaragaraga, biteza impungenge ku mutekano w’iyo ndege.

BBC yatangaje ko byabaye ngombwa ko abagenzi bari muri iyo ndege bahabwa indi ibageza i Malaga.

Ubusanzwe amakompanyi y’indege agendera ku mabwirizwa akomeye ajyanye n’udukoko two mu bwoko bw’imbeba n’imende twagaragara mu ndege, igihe tugaragaye, bikaba bisaba ko dukurikiranirwa hafi mu buryo bwihuse kugira ngo tutarya insinga z’indege.

Umugenzi wari muri iyo ndege witwa Jarle Borrestad wabonye ibyo bintu bwa mbere, yabwiye BBC muri videwo yifashe ko iyo mbeba yirutse iva mu gakarito k’ibiryo umugore bari bicaranye mu ndege yarimo afungura kugira ngo abirye.

Uwo mugenzi Jarle Borrestad avuga ko mu ndege abantu batahungabanye ahubwo baranzwe n’ituze, icyakora we yigira inama yo kwinjiza ipantalo mu masogisi kugira ngo iyo mbeba itaza kumwinjira mu maguru izamukiye mu ipantalo.