Iri tegeko ryazanywe mu Nteko ishinga amategeko ya Misiri n’abadepite bakomeye ku mahame ya kiyisilamu. Abagore bahuriye mu nama y’igihugu y’abagore mu Misiri bamaganye ireme ry’iri tegeko, ariko abadepite babatera utwatsi bavuga ko iri tegeko rizigwaho mu Nteko, ndetse rikaba rishobora kwemezwa mu minsi mike.

Gutekereza ko umugabo ashobora gukorana imibonano n’umugore we witabye Imana byadukanywe n’umuyisilamu wo muri Maroko witwa Zamzami Abdul Bari, ubwo muri Gicurasi 2011 yigishaga mu musigiti ko n’iyo umwe mu bashakanye yapfuye, aba agifitanye igihango n’uwo basezeranye, ndetse ngo ukiri muzima akaba yemerewe imibonano mpuzabitsina n’uwo uba watabarutse.

Urubuga alarabiya.net rwatangaje ko kubera ko Zamzami Abdul Bari ari umubwiriza ukomeye mu idini rya kiyisilamu, abayoboke be batangiye kwemeza ko bashaka koko uburenganzira bwo gukora iyo mibonano mpuzabitsina yazajya iba ari iya nyuma.

Abagore nabo kandi bazahabwa ubwo burenganzira bwo kuba bakora iyo mibonano ubwa nyuma n’abagabo babo bapfuye. Iri tegeko ryashyikirijwe abadepite ngo baryigeho ryiswe Umushinga w’itegeko rigena imibonano mpuzabitsina y’agasezero (Farewell Intercourse draft law).

Izindi ngingo z’iri tegeko zirimo n’iteganya ko mu Misiri abakobwa bajya bemererwa kurongorwa ku myaka 14.

Ahishakiye Jean d’Amour