Iyo mibiri irimo 122 yimuwe i Nyawera mu Murenge wa Mwili, indi ni iyagiye iboneka yari itarashyingurwa ndetse n’iyimuwe yari yarashyinguwe mu ngo z’abaturage.

Nkeshimana Telesphore warokokeye i Nyawera avuga ko ari kamwe mu duce tw’Akarere ka Kayonza twatangiriyemo Jenoside rugikubita, kuko tariki 09 Mata 1994 Abatutsi ba ho bari batangiye gutwikirwa no kwicwa.

Imibiri 158 y’abazize Jenoside yashyinguwe mu rwibutso rwa Mukarange.

Kwica Abatutsi b’i Nyawera no kubatwikira bitangira bamwe mu bari bahatuye bahungiye kuri paruwasi gatorika ya Mukarange bizeye ko ubwo bahungiye mu kiriziya babonye amakiriro n’ubwo atari ko byaje kugenda.

Abasigaye ku misozi ya Nyawera na bo ngo bishwe urw’agashinyaguro, ariko ikibabaje kurushaho kikaba ari uburyo abasaza, abakecuru n’abana bato batwikirwaga mu mazu.

Nkeshimana yagize ati “Abenshi bishwe urw’agashinyaguro kuko abasaza n’abakecuru badafite intege batwikirwaga mu mazu, ariko igiteye agahinda ni abana 22 bahungiye ku mugabo witwa Rusenyanteko, umuhungu we wari perezida w’interahamwe akabajyana mu rugo rw’Umututsi wari utuye hafi ya bo bakabatwikiramo”.

Nkeshimana avuga ko Abatutsi biciwe i Nyawera bishwe urw’agashinyaguro.

Visi perezida wa IBUKA ku rwego rw’igihugu, Nkuranga Egide yavuze ko n’ubwo ayo mahano yose yabaye hari abagihakana bakanapfobya Jenoside birengagije uburyo yateguwe.

Yavuze ko hagikenewe imbaraga nyinshi kugira ngo abahakana Jenoside yakorewe Abatutsi bareke gutsimbarara ku kinyoma, icy’ingenzi gikorerwa bene abo akaba ari ugukomeza kubigisha kugeza bahindutse cyangwa batanahinduka bakareka kuyobya abandi.

Nkuranga yavuze ko biteye isoni n’agahinda kuba hari abahakana bakanapfobya Jenoside yakorewe abatutsi kandi bazi neza ko yateguwe.

Mbere y’uko iyo mibiri ishyingurwa habanje guturwa igitambo cya misa mu rwego rwo gusabira abazize Jenoside, ndetse hanongera gushimwa abagize uruhare mu guhisha no kurokora abahigwaga.

Aba ni bamwe mu bagize imiryango yashyinguye ababo.

Bamwe mu bayobozi bifatanyije n’abaturage ba Mukarange mu gushyingura imibiri y’abazize Jenoside.

Cyprien M. Ngendahimana