KT TV
Kwibuka Rutsiro: Abanyamuryango ba AVEGA bibutse baremera n’abapfakazi ba Jenoside batishoboye
Abanyamuryango b’ishyirahamwe ry’abapfakazi ba Jenoside yakorewe Abatutsi (AVEGA) bafatanyije na Unity Club ndetse n’akarere ka Rutsiro, bibutse Jenoside yakorewe Abatutsi, baremera abapfakazi, incike hamwe n’abatishoboye barokotse Jenoside yakorewe Abatutsi mu 1994.
Kwibuka inzirakarengane zishyinguye mu rwibutso rw’akarere ka Rutsiro no kuremera abapfakazi ba Jenoside batishoboye byabaye tariki 24/06/2014, bitangizwa no gusobanurirwa amateka ya Jenoside mu karere ka Rutsiro, hakurikiraho umuhango wo kunamira abahashyinguye no kurambika indabo ku mva bashyinguyemo mu rwego rwo kubasubiza icyubahiro.
Intego nyamukuru yo gufata mu mugongo abapfakazi ba Jenoside bo mu karere ka Rutsiro ni ukugira ngo abarokotse bagaragarizwe urukundo, ko batari bonyine, ndetse ko bazirikanwa igihe cyose.
Mukandori Dancila waturutse ku rwego rw’igihugu akaba yaje ahagarariye umuryango wa AVEGA Agahozo yashimye ko abapfakazi ba Jenoside mu karere ka Rutsiro hari intambwe bamaze gutera, bitandukanye no mu bihe byo hambere, ubwo AVEGA yabegeraga igasanga barigunze, nta n’icyo bakora.
Mukandoli ati “ubwo twazaga mu minsi ishize twasangaga abantu bagihungabanye, abantu batarabona imbaraga zo gukora, bataragira no mu mutwe hatekereza, birashimishije ko twasanze barashoboye kwiyubaka, bafite icyizere cyo kubaho, twasanze ejo habo hazaza hafite icyizere cy’uko bazagendana n’abandi Banyarwanda.”
Mary Ashimwe, umunyamuryango wa Unity Club, umuryango uhuriza hamwe abafasha b’abayobozi bakuru b’igihugu, yakomeje abacitse ku icumu, ababwira ko nubwo ibibazo bitarangira, ariko ko babari hafi, babereka ko babazirikana, kandi ko bakwiye gukunda umurimo.
Mu karere ka Rutsiro abapfakazi ba Jenoside bagiye bibumbira hamwe bagamije kwiteza imbere mu rwego rwo gukomeza ubuzima bwabo. Icyakora bamwe muri bo bagaragaza imbogamizi z’amazu bubakiwe atameze neza kuko yubatswe nabi, hutihuti, bakaba bifuza ubufasha bwo gusanirwa ayo mazu yatangiye gusenyuka.
Umuyobozi wungirije ushinzwe imibereho myiza y’abaturage mu karere ka Rutsiro, Nyirabagurinzira Jacqueline, yamaze impungenge abacitse ku icumu rya Jenoside, ababwira ko abafite amazu atameze neza bazubakirwa mu minsi ya vuba.
Nyirabagurinzira avuga ko muri uyu mwaka mu karere ka Rutsiro hasanwe amazu 23, bakaba bafite gahunda yo gusana andi mazu 26 mu mwaka utaha.
Muri uko gufata mu mugongo abacitse ku icumu rya Jenoside batishoboye, baboneyeho no kubaremera, babakomeza mu mitima, ndetse babagira inama z’ubuzima.
Muri iki gihe cy’iminsi 100, AVEGA ndetse n’indi miryango irimo kwita cyane ku bacitse ku icumu bababaye kurusha abandi, harimo abafite amazu atarasanwa, kwegera abakuze ndetse n’abatagira ababahora hafi mu rwego rwo kubarinda guheranwa n’agahinda.
Malachie Hakizimana
Ibitekerezo
Ohereza igitekerezo
|
|
