Kuri uyu wa gatanu tariki 23/5/2014 nibwo iki gikorwa cyo kwibuka cyari kitabiriwe n’abanyeshuri bavuye mu bigo by’amashuri bitandukanye byo muri aka karere berekezaga muri sitade yako karere.

Bahawe ibiganiro bitandukanye byibanze ku mateka mabi yaranze URwanda ari nayo yaje kugusha kundunduro ya Jenoside yakorewe abatutsi.

Bimwe mu biganiro bahawe harimo n’ikiganiro ku amateka ya “Ndi umunyarwanda”, cyatanzwe na Visi perezidanti wa komisiyo y’igihugu y’ubumwe n’ubwiyunge Uwimana Saveline, wabwiye abanyeshuri ko bagomba kwemera ko ari abanyarwanda bafite urenganzira busesuye ku gihugu cyabo.

Guverineri w’intara y’uburengerazuba, Mukandasira Caritas, yabwiye abana ko bafite inshingano zo kubaha ababyeyi babo kimwe n’abarezi abasaba kwima amatwi abaribo bose bifuza kubabibamo amacakubiri, ingengabitekerezo ya Jenoside n’imvangura iryariryo ryose.

Yabasabye kubamaganira kure kuko kugeza ubu ariwo musaraba Abanyarwanda bikoreye, aho bahangana n’ibibazo byatewe na jenoside. Yabwiye uru rubyiruko ko bagomba gusobanukirwa n’ingaruka za jenoside birinda ko yazongera kubaho ukundi.

Samuel Hitimana umwana wahagarariye bagenzi be muri uyu muhango wo kwibuka abana bazize Jenoside ku rwego rw’igihugu, yavuze ko aho URwanda rugeze abantu badakwiye guheranywa n’agahinda ko ahubwo bagomba guharanira icyatuma barushaho gutera imbere, kugirango abakoze amahano badakomeza kubishima hejuru.

Uyu mwana kandi yashimiye ingabo zahoze ari iza FPR INKOTANYI zahagaritse jenoside zikongera guhuza abanyarwanda bari baratatanye none ubu u Rwanda rukaba rutekanye.

Musabwa Euphre