Uyu mukecuru utuye mu Mudugudu wa Nyarutovu, Akagari ka Buhoro, Umurenge wa Ruhango wo mu Karere ka Ruhango, ubwo hibukwagwa ku nshuro ya 19 Jenoside yakorewe abatutsi mu w’2013, Kigali Today yaramusuye isanga aba mu nzu mbi yakodesherezwaga n’ubuyobozi kuko atagiraga aho aba.

Iyi nzu y’ibyumba bibiri yayibanagamo n’abana be babiri ndetse n’amatungo akanayitekamo, akavuga ko ubu buzima yabagamo, bwari bumukomereye cyane, igihe cyo kwibuka Jenoside cyagera akarushaho kubabara cyane.

Nyuma y’umwaka umwe asuwe, ubu ngo yubakiwe inzu nziza abamo ifite sima ahantu hose, ikagira inzugi, ikagira igikoni, ubwogero n’ubwiherero.

Mukankundiye avuga ko ubu anezerewe cyane agashimira ubuyobozi bwamwubakiye iyi nzu, ariko ngo cyane cyane agashimira itangazamakuru ryamukoreye ubuvugizi akabasha kubakirwa.

Ati “Ndabashimira guhera kirya gihe mwansuraga mu cyunamo, n’ubu ndacyabashimira kuko nabashije kuva habi nkaba mbaho neza n’umuryango wanjye, umushyitsi yaza nkabona aho mwicaza”.

Uyu mukecuru avuga ko mbere iyo igihe cyo kwibuka cyageraga ngo yumvaga yiyanze akabura aho yerekeza, yatekereza uko yari abayeho mbere ya Jenoside, yareba n’ubuzima abayemo n’abe yabuze, akurushaho kumererwa nabi.

Akomeza avuga ko mu gihe hibukwa ku nshuro ya 21 Jenoside yakorewe Abatutsi yumva nibura atagiheranwa n’agahinda nka mbere.

Eric Muvara