Inzu y’Amateka ya Jenoside yakorewe Abatutsi imaze kuzura, igizwe n’ibice bitatu birimo inzu ubwayo, ahazashyirwa ibikoresho by’ikoranabuhanga n’ibindi bibitse amakuru, n’ahazandikwa amazina y’abazize Jenoside ku Mayaga.

Umuyobozi wa AGSF Evode Munyurangabo, ashimira Ubuyobozi bw’Igihugu bwumvise ubusabe bwabo bukabaha iyo nzu, kuko izabika ibimenyetso bizigisha amateka abakiri bato, no gukomeza kubungabunga ibimenyetso byihariye by’uko Jenoside yakozwe ku Mayaga.

Agira ati, "Turashimira ko tugiye kwibuka ku nshuro ya 32 Jenoside yakorewe Abatutsi, dufite inzu y’Amateka, turashimira ubuyobozi bw’Igihuhu cyacu, n’Akarere ka Ruhango, bwatwubakiye iriya nzu igiye kutubera ishuri ry’abazadukomokaho bakamenya amateka ndengakamere ya Jenoside iwacu ku Mayaga".

Umuyobozi w’Inama Njyanama y’Akarere ka Ruhango Gasasira Jerome, avuga ko iyo nzu y’Amateka yuzuye nyuma yo gukora ubuvugizi busanzwe, kandi bishimira kuba Inama Njyanama y’Akarere ka Ruhango isoje Manda y’imyaka itanu iyo nzu yuzuye.

Gasasira avuga ko izafasha mu kubungabunga amateka ya Jenoside ku Mayaga, kandi abarokotse bo mu Karere ka Ruhango, bakumva ko ibyifuzo byabo bishyirwa mu bikorwa uko ubushobozi bubonetse.

Ibice bigize inzu y’Amateka ya Jenoside ku Mayaga biteye bite?

Ubwo basuraga iyo nzu y’amateka mu cyumweru cy’Umujyanama mu Karere ka Ruhango, abajyanama b’ako Karere bashimye aho imirimo igeze, ku cyiciro cya mbere cyo kuyubaka kuko iri hejuru ya 95%.

Perezida w’Inama Njyanama y’Akarere ka Ruhango Gasasira Jerome, avuga ko
Ifite ibice bitandatu by’ingenzi bigaragaza uko Amayaga yari ameze mbere y’umwaduko w’abazungu, igihe cya za Repubulika ya mbere n’iya kabiri, gukomeza kugeza Jenoside ihagaritswe.

Agira ati, "Ni inzu y’icyitegererezo twayihawe nyuma y’ubuvugizi, izaba isobanura ku buryo bukwiye amateka ya Jenoside yakorewe Abatutsi ku Mayaga no mu Karere ka Ruhango n’inkengero zako".

Naho Munyurangabo asobanura ko agashya kadasanzwe kuri iyo nzu, y’Amateka ari icyumba kiswe chambre noir (Icyumba cy’umukara), kizaba kirimo amafoto ya ba Ruharwa muri Jenoside barimo n’abo ku Mayaga.

Agira ati, "Icyumba cya chambre noir kizaba kirimo amazina n’amafoto ya bariya ba Ruharwa bataracibwa imanza, barimo n’uwahoze ari Burugumesitiri wa Komini hano, Abarundi bishe hano, n’abandi barimo na ba Bagosora n’abandi bacurabwenge ba Jenoside".

Abarokotse bo ku Mayaga bavuga ko Kwibuka ku nshuro ya 32 Jenoside yakorewe bujuje iyo nzu, ari iby’agaciro baha abazize Jenoside n’abarokotse muri rusange.