Babitangarije mu gikorwa cyo kwibuka Jenoside yakorewe Abatutsi mu Karere ka Ruhango ahahoze ari Komini Tambwe, ubu ni mu Murenge wa Ruhango, aho bagaragaje ko kurokoka kwabo kwabateye imbaraga bagaharanira kongera kuremya imiryango.

Akarere ka Ruhango kabarurwamo imiryango isaga 1000 yazimye muri Jenoside yakorewe Abatutsi, abarokotse bakavuga ko n’ubwo banyuze mu buzima bugoye batakiri umutwaro ku Gihugu, nyuma y’ibikorwa bitandukanye byatumye baremya ubuzima.

Nkurayija Jean Claude uhagarariye imiryango y’abafite ababo bashyinguye mu Rwibutso rwa Ruhango, avuga ko hari umuntu wajyaga amucyurira ko n’iyo yarokoka nta Mututsi uzasubira mu ishuri, ariko akaba avuga ko yize akanaminuza kandi akaba akomeye atakiri umutwaro ku Gihugu.

Agira ati "Hari umuntu witwa Secyenda wajyaga ambwira ko ari we uzi umunsi nzapfira njyewe ntawuzi, ariko ko n’iyo narokoka nta Mututsi uzasubira mu ishuri, uwamunyereka nonaha nkamubwira ko Abatutsi basubiye mu mashuri. Leta yaradufashije twasubiye mu mashuri turi bamwe mu bubaka Igihugu cyacu, Abarokotse Jenoside ntabwo ari umutwaro w’Igihugu ahubwo ni bamwe mu bagifasha gutera imbere, kandi tuzakomeza gufatanya ngo ibyatubayeho bitazagaruka ukundi".

Kimenyi illuminée warokotse Jenoside yakorewe Abatutsi na we ahamya ko nyuma y’ubuzima bugoye yanyuzemo akarokoka, yishimira ko yaremye umuryango akabyara agaheka, n’ubwo abana batagira ba nyirakuru, ariko azabibasobanurira bakabyakira kubera amateka y’Igihugu.

Agira ati "Abarokotse Jenoside turashimira Inkotanyi zaturokoye, tukaba turiho dukomeye, ba bandi batabashije kwiga amashuri twarayabigiye, imiryango irahari twariyubatse kandi tuzakomeza".

Abarokotse Jenoside yakorewe Abatutsi mu Karere ka Ruhango bavuga ko mu rugendo rwo kwiyubaka hari n’abafite imbogamiizi zirimo kuvuzwa, kubona amacumbi, no kuba hari amasanduku ashyinguyemo imibiri y’abazize Jenoside agenda asaza, bakifuza ko ku bufatanye bw’Akarere, hagira igikorwa ngo ibikibangamiye Abarokotse Jenoside bikemuke.

Minisitiri ushinzwe Ishoramari rya Leta, Rwigamba Eric, wari waje kwifatanya n’Abanyaruhango Kwibuka, yavuze ko kwibuka ari umwanya wo gutekereza ku masomo Jenoside yasize, hakigirwamo ingamba zo gutandukana n’amacakubiri mu Banyarwanda, kuko mu myaka 29 ishize Jenoside ihagaritswe u Rwanda rwongeye kwiyubaka bigizwemo uruhare n’Abanyarwanda bose n’ubuyobozi bwiza.

Yagize ati "Ni yo mpamvu dufata uyu mwanya twese mu Gihugu no hanze yacyo tugashyira imbaraga mu kwiga amateka ya Jenoside yakorewe Abatutsi, kuko ari umusingi ukomeye wo kubaka u Rwanda twifuza, tugasenya abagifite imigambi mibi yo guhembera urwango n’amacakubiri".

Rwigamba yasezeranyije Abarokotse Jenoside yakorewe Abatutsi ko Leta izakomeza gukora ibishoboka byose, ikita ku gukemura ibibazo bikibabangamiye kuko imibereho yabo ndetse n’ibibazo byagaragajwe n’Abanyaruhango bizigwaho bigakemurwa.