Ubwo bari bageze kuri urwo rwibutso bunamiye inzirakarengane zirushyinguyemo ndetse bafata n’umwanya wo kwibuka uburyo Abatutsi bishwemo muri Jenoside bazizwa ubwoko batihaye.

Ubuhamya bwahatangiwe bwagarutse ku ruhare abari bashinzwe kurinda umutekano mu gihe cya Jenoside bagize mu kuyitiza umurindi birengagije inshingano bari bafite zo kubitaho nk’ikiremwamuntu.

Umuyobozi w’akarere ka Nyanza, Murenzi Abdallah, wari waje kwifatanya n’ubuyobozi bwa polisi y’igihugu mu Ntara y’Amajyepfo yavuze ko inzego zishinzwe umutekano muri iki gihe zitandukanye n’izahozeho mbere ya Jenoside yakorewe Abatutsi muri Mata 1994.

Yasobanuye ko byari ibintu bidasanzwe kuba umusivili yahagararana n’umusirikare cyangwa undi muntu wese ufite aho ahuriye no gucunga umutekano. Yasobanuye ko Nyuma ya Jenoside aribwo ibintu byatangiye kujya mu buryo maze hagati y’izo nzego n’abaturage bagatangira ubufatanye n’ubwuzuzanye nk’uko bigaragarira muri gahunda zinyuranye.

Assistant Commission of the Police Ntirushwa Faustin, ukuriye polisi y’igihugu mu Ntara y’Amajyepfo, yavuze ko bakoze urwo rugendo kugira ngo bifatanye n’abandi Banyarwanda mu bikorwa byo kwibuka Jenoside yakorewe Abatutsi mu Rwanda.

Kuba urwo rugendo rwakorewe mu karere ka Nyanza yasobanuye ko byo byatewe n’ubufatanye bwihariye busanzwe hagati y’ako karere n’ubuyobozi bwite bwa Polisi y’igihugu mu gukumira ibyaha bitaraba.

Iki gikorwa cyakozwe na Polisi y’igihugu ikorera mu Ntara y’Amajyepfo cyo kwibuka ku nshuro ya 19 jenoside yakorewe abatutsi mu Rwanda cyitabiriwe n’ubuyobozi bwayo bukorera mu turere tw’Intara y’Amajyepfo uko ari UMUNANI usibye akarere ka Kamonyi katabashije kukibonekamo kuko abaho bo bifatanyije na Polisi ikorera ku rwego rw’igihugu.

Jean Pierre Twizeyeyezu