Ni igikorwa cyabaye ku wa Gatandatu tari 31 Gicurasi 2025, aho Abadepite batandukanye n’abayobozi bo mu zindi nzego, bifatanyije n’ubuyobozi bw’uru ruganda kwibuka abari abakozi barwo.

Senateri Mureshyankwano yasabye abaturage gukomeza kugaragaza ahakiri imibiri y’abishwe muri Jenoside yakorewe Abatutsi, kugira ngo ababo babashyingure mu cyubahiro.

Ati “Iyo umuntu yashyinguye uwe araruhuka, ikindi bimufasha gukira ibikomere kuko aba azi ko uwe yatabarutse, ni yo mpamvu mbasaba gutanga amakuru y’ahakiri imibiri yabo kugira ngo bashyingurwe mu cyubahiro kimwe n’abandi”.

Senateri Mureshyankwano yagaye mu ruhame abari abayobozi babi bateguye bakanashyira mu bikorwa Jenoside yakorewe Abatutsi, by’umwihariko abari abayobozi ba Mata Tea Company Ltd batoteje Abatutsi bakanatanga n’imodoka zo gutwara abicanyi.

Yakomeje ahumuriza abarokotse Jenoside yakorewe Abatutsi, asaba abaturage bose kwirinda ingengabitekerezo ya Jenoside, kwirinda amacakubiri no kubungabunga ubumwe n’ubudaheranwa bw’Abanyarwanda.

Perezida wa IBUKA mu Karere ka Nyaruguru, Habimana yasabye urubyiruko gushishoza no gushungura, kuko hakiri bamwe bagikwirakwiza ingengabitekerezo ya Jenoside kugira ngo babashe kumenya ingaruka mbi yazanye mu Rwanda.

Ati “Rubyiruko mwirinde ababashuka ndetse mujye mushishoza mubashe gushungura ibivugirwa ku mbuga nkoranyamba, kuko hakiri abantu bafite urwango ndetse babiba ingengabitekerezo ya Jenoside”.

Mu rwibutso rwa Jenoside rwa Mata Tea Company Ltd hashyinguyemo abazize Jenoside bagera kuri 382.