Nyuma y’abakozi ba Minisiteri y’Urubyiruko n’Umuco n’ umuryango wa YGF (Young Generation Forum) baherutse kuremera abacitse ku icumu bo mu Karere ka Musanze, Ishyirahamwe ry’Abacukuzi mu Rwanda ryateye ikirenge mu cyabo.

Umutesi Jeannette, Visi-Perezida wa RMA, avuga ko atari ubwa mbere iki gikorwa bagikoze, kuko buri mwaka ngo baremera abacitse ku icumu. Nyuma yo gusura no kuremera ab’Iburasizuba n’Amajyepfo, ngo hari hatahiwe abacitse ku icumu bo mu Ntara y’Amajyaruguru.

Akomeza avuga ko izo nka 10 baboroje zifite agaciro ka miliyoni 2 n’ibihumbi 600 zavuye mu mafaranga yakusanyijwe mu bakora ubucukuzi hirya no hino mu gihugu kugira ngo bafate mu mugongo abacitse ku icumu.

Ni bwo bwa mbere abacitse ku icumu bo muri Musanze borojwe inka nyinshi icyarimwe nk’uko Umukozi wa Komisiyo ishinzwe kurwanya Jenoside mu Karere ka Musanze, Gahongayire Louise. yabigarutseho ashimira abacukuzi uwo mutima mwiza bagize wo gufasha abacitse icumu bagifite ibibazo by’imibereho.

Aborojwe inka na RMA babwiye Kigali Today ko baherukaga korora mbere ya Jenoside yakorewe Abatutsi mu w’1994, kuko inka zabo ngo zariwe muri Jenoside.

Umubyeyi waremewe witwa Mukandahiro Seraphine wo mu Murenge wa Musanze, avuga ko iyi nka izamuha amata abana bagakura neza ndetse n’ifumbire yaguraga kugira ngo afumbire imyaka ntazongera kuyigura ukundi.

Yemeza ko iyi nka izagirira akamaro umuryango we n’abaturanyi kuko nikamwa na bo bazabona amata.

Umusaza w’imyaka 82 witwa Nyiramvukiye Claude wo mu Murenge wa Cyuve, ashimira Perezida Kagame watangije gahunda yo kuremera abatishoboye kuko atumye yongera gutunga inka inyuma y’imyaka 20.

Mu Rwanda habarurwa abacukuzi bagera ku bihumbi 37 ahanini bagizwe n’urubyiruko. Ngo RMA izakomeza gushyira imbaraga mu gukangurira abakora ubucukuzi kurwanya ingengabitekerezo ya Jenoside kugira ngo Jenoside itazongera kubaho ukundi.

NSHIMIYIMANA Leonard