Muri uyu muhango wo kwibuka by’umwihariko Abatutsi bagera ku bihumbi 50 biciwe aha i Murambi no guherekeza mu cyubahiro izi nzirakarengane zegerejwe izindi, Depite Nkusi Juvenal wahagarariye imiryango yashyinguye ababo mu cyubahiro yavuze ko ari ukubasubiza icyubahiro batahawe mu gihe cya Jenoside.

Ati “ni ukubashyingura kugira ngo bahabwe icyubahiro bambuwe tukibasubize nk’abantu. Twongere twibuke kandi dufatanya no kwibuka abari hano i Murambi bose”.

Depite Nkusi avuga ko Jenoside yakorewe Abatutsi mu mwaka w’1963 itabashije gusiga icyimenyetso uretse agahinda yasize mu mitima, ariko ubu kuba ibimenyetso bya Jenoside yakorewe Abatutsi mu w’1994 bituma abantu babasha kwibuka ko yabayeho ndetse n’ingaruka zayo.

Guverineri w’intara y’amajyepfo, Munyantwali Alphonse yasabye abayobozi b’inzego z’ibanze guharanira ko ingengabitekerezo ya Jenoside yaranduka burundu mu mitima y’Abanyarwanda, n’ubwo bimaze kugabanuka mu buryo bugaragara.

“Abayobozi duhari, njyewe ndahamagarira cyane cyane abo muri iyi ntara (y’amajyepfo) kureba ko ingengabitekerezo ya Jenoside, amagambo atoneka tubihagaritse burundu. Nanabashima hari intambwe imaze guterwa ugereranyije n’ibyaha by’urwo rwego byajyaga bikunda kugaragara muri iki gihe cyo kwibuka,” Guverineri Munyantwali.

Minisitiri ufite umuco na Siporo mu nshingano ze, Protais Mitali, yagaye cyane abayobozi bari bafite inshingano zo kureberera abaturage ariko bakaba aribo bategura kurimbura bamwe muri bo, bakabitoza n’abaturage ngo bice bagenzi babo ndetse n’amahanga akabashyigikira abatiza umuhoro ngo bisenyere igihugu.

Minisitiri Mitali yakomeje avuga ko ikibabaje kurusha ibindi ari uko abo bayobozi harimo abakibungana hirya no hino uwo muhoro batijwe bagamije kugaruka kurangiza umugambi wabo n’ubwo batabishobora.

Ati “Ikibabaje kurushaho ni uko n’uwo muhoro batijwe bamwe muri bo n’ubu banze kuwutirura. Baracyawubungana ngo bazagaruke batsembe n’ubwo baziko batabishobora”.

Abatutsi bagera ku bihumbi 50 bari bahungiye aha i Murambi abandi bakahazanwa n’ubuyobozi babanje kujya baterwa bakirwanaho bakoresheje amabuye, ariko mu ijoro ryo kuwa 20 rishyira kuwa 21/04/1994 mu masaha ya saa cyenda nibwo batunguwe n’igitero cy’abantu benshi ndetse bafite intwaro nk’imbunda, amagerenade n’iza gakondo birwanaho nk’ibisanzwe ariko baza kuganzwa baricwa.

Aha i Murambi hagizwe urwibutso rwa Jenoside yakorewe Abatutsi hari hari kubakwa ishuri ry’imyuga ritaruzura, ubu habaye ishuri ry’amateka ya Jenoside kuko hari mu nzibutso zigaragaza nza uko yateguwe n’uko yashyizwe mu bikorwa.

Emmanuel Nshimiyimana