Mu biganiro ku isana Mitima byamaze iminsi itatu mu Murenge wa Shyogwe Akarere ka Muhanga, kuva tarki ya 19 Kugeza ku ya 21 Werurwe, abayobozi b’imidugudu kugeza ku Murenge bagaragarijwe ko abayoborwa badashobora guhinduka hatabayeho kubitaho kandi abayobozi bakabanza guhinduka ubwabo.

Mbonyingabo avuga ko kugeza ubu hari imibare y’abantu benshi bamaze gukira ibikomere kubera kuganirizwa no kwihanganishwa ku bibazo bahuye na byo muri Jenoside yakorewe abatutsi muri Mata 1994.

Agira ati “Kugeza ubu tumaze kugira abantu benshi biyunze nyakuri, dufite benshi bakize ibikomere ubu basigaye baryama bagasinzira kandi dufite icyizere cy’uko bakize neza.”

Cyakora Mbonyingabo avuga ko kubera ko amacakubiri atajya ashira neza mu mitima y’abantu, ubu Abanyarwanda bamaze gusobanukirwa neza n’ibibazo bahuye na byo kandi bazi neza gutandukanya ikibi n’icyiza ku buryo hagize ibindi bibazo bishingiye ku macakubiri batapfa kongera kuyasubiramo.

Umuyobozi w’Akarere ka Muhanga, Yvonne Mutakwasuku, we asaba abayobozi b’inzego z’ibanze guhinduka bakabona guhindura n’abandi kuko abayoborwa bakurikiza ibyo abayobozi kakora.

Mutakwasuku akomeza avuga ko bibabaje kuba abayobozi bajya mu myanya ariko bagasiga ntacyo bahinduye mu isanamitima aho gutangirira abazabasimbura, kandi ngo ari byo byagatumye abaturage barushaho kwiyumvamo ubunyarwanda n’ubuyobozi bwabo.

Umuyobozi w’Akarere ka Muhanga yongeraho ko ngo hari abayobozi bahora mu bishya nk’ababumbyi kandi ngo igihugu kitagomba guhora mu bishya nk’ababumbyi.

Agira ati “Ntabwo igihugu gikeneye abayobozi bahora mu bishya nk’ababumbyi ahubwo hakenewe abayobozi bahinduka maze bagahindura n’abo bayobora kuko ni byo byafasha benshi mu gukira ibikomere.”

Dusengimana Aloys, umwe mu batangabuhamya ku kubohoka ku mutima, akaba anatanga ibiganiro ku isanamitima, avuga ko amasomo yo kwigishwa ubwiyunge n’isanamitima bikibangamirwa no kuba hakiri abantu bagifite ibikomere batabizi, ariko ngo iyo bamaze gusobanukirwa n’ikibazo bafite ku mutima bagenda basohoka muri ibyo.

Agira ati “Ni byiza ko haboneka abantu bahagarara mu cyuho bagasaba imbabazi, iyo mbonye umuntu uturutse mu cyiciro cy’abanyiciye akansaba imbabazi, bimfasha kubabarira nkabasha kumva nkeye ku mutima.”

Dusengimana akomeza avuga ko ari ngombwa ko abayobozi ubwabo babanza guhinduka no gukora neza kugira ngo abayoborwa barebereho kuko iyo abayobozi bahuzagurika n’abaturage babyanduriramo.

Ephrem Murindabigwi