Ubwo mu ku wa 16 Gicurasi 2015 hibukwaga abatutsi baguye kuri Paruwasi ya Muganza, nibwo Sibomana yahagurukije Kanyeshyamba maze amushimira mu ruhame kubera ubupfura yamugaragarije.

Sibomana avuga ko ubwo Jenoside yatangiraga abahigwaga benshi bahungiye kuri paruwasi ya Muganza we agasigara inyuma ashaka guhungisha inka zabo, gusa ngo baje kuzirya ataragera aho abandi bari.

Avuga ko ubwo we yageragezaga gusanga abandi kuri Paruwasi ya Muganza byamubereye ihurizo rikomeye kuko ngo inzira zose zari zuzuyemo abicanyi.

Nyuma ngo nibwo yatekereje guhungira mu rugo rwo kwa Rukwavu ariho iwabo wa Kanyeshyamba, maze ngo baramwakira, baramuzimanira, ndetse baza no kumuherekeza mu gicuku yerekeza i Muganza, ibintu we avuga ko bitakorwaga na benshi icyo gihe kuko abenshi bari bahindutse abicanyi.

Ati “Nahamagariye ku myugariro Kanyeshyamba araza asanga nijye, arankingurira njya mu nzu bampa ibyo kurya ndarya ndangije ndaryama. Mu gicuku nka saa saba n’igice nibwo namubwiye ko ngiye maze aramperekeza muri icyo gicuku, angeza ahantu hafi ariko arabikora. Niba ari hano ahaguruke mushimire rwose yambereye imfura”.

Umuyobozi wa Ibuka mu Karere ka Nyaruguru, Bertin Muhizi avuga ko abantu nka Kanyeshyamba bagiye barangwa n’ibikorwa byo gutabara ubu bari kubashaka mu karere kugira ngo bashimirwe mu ruhame, kuko ngo bakoze igikorwa cy’indashyikirwa.

Muhizi avuga ko iyo muri aka karere haza kuba abantu benshi nka Kanyeshyamba ngo umubare w’abarokotse Jenoside wari kuba ari munini.

Ati “Umuryango Ibuka ubu turi gushakisha abo bantu kugira ngo tubashimire kuko bakoze igikorwa cy’indashyikirwa kandi gikomeye. Iyo tuza kugira abantu nk’abo benshi mu Karere ka Nyaruguru, ubu tuba dufite abantu barokotse benshi”.

Mu Karere kose ka Nyaruguru ubu hamaze kuboneka abantu 4 gusa babashije kurokora abatutsi bahigwaga muri Jenoside, bose hamwe bakaba bararokoye abantu 7.

Charles RUZINDANA