William Nkurunziza, uhagarariye w’u Rwanda mu Bwongereza wari witabiriye uwo muhango, yasabye Abanyarwanda aho bari hose kurwanya bivuye inyuma ingengabitekerezo ya Jenoside ndetse no gukumira uwashaka kubasubiza inyuma ndetse no kubacamo ibice.

Ambasaderi Nkurunziza yagarutse cyane cyane ku mateka yaranze u Rwanda kuva mu mwaka wa 1959 kugeza 1994, ndetse yagarutse cyane k’uburyo Abanyarwanda bagiye biyubaka kuva muri 1994 kugeza muri iki gihe.

Uhagarariye u Rwanda mu Bwongereza yayoboye umuhango wo gucana urumuri rw’icyizere ari kumwe n’abana bari mu kigero cy’imyaka 2 na 19, mu rwego rwo kwigisha abakiri bato ibibi bya Jenoside ndetse no kubakundisha igihugu cy’u Rwanda.

Abatanze ubuhamya bw’ibyababayeho muri Jenoside yakorewe Abatutsi, bose bagiye bagaruka ku ngingo yo kwigira berekana uburyo bashoboye kwiyubaka ndetse no kubabarira mu myaka 19 yose ishize.

Noel Ntakirutimana, uyoboye umuryango w’Abanyarwanda baba i Manchester, yavuze ko igikorwa cyo kwibuka abazize Jenoside yakorewe Abatutsi mu Rwanda kizahoraho.

Ntakirutimana yasabye abari bitabiriye uwo umuhango wo kwibuka, kuzitabira undi umuhango wo kwibuka abazazize Jenoside yakorewe Abatutsi mu Rwanda, wateguwe na “Council” ya Liverpool uzaba ku wa gatatu tariki 24/04/2013.

Norbert Niyizurugero