#Kwibuka32: Ab’i Gahanga basuye urwibutso rwa Rukumberi, biyemeza ko Jenoside itazongera ukundi

30-06-2026 - 11:10' | Ibitekerezo ( )

Abaturage barenga 700 bo mu Murenge wa Gahanga mu Karere ka Kicukiro, bari kumwe n’Ubuyobozi bw’Umurenge, ndetse n’Umuyobozi w’Imirimo Rusange y’Akarere ka Kicukiro, Murenzi M. Donatien, tariki 01 Nyakanga 2026 basuye Urwibutso rwa Jenoside yakorewe Abatutsi rwa Rukumberi ruherereye mu Murenge wa Rukumberi mu Karere ka Ngoma mu Ntara y’Iburasirazuba, bunamira inzirakarengane ziharuhukiye, banashyira indabo ku mva mu rwego rwo kubasubiza icyubahiro no kuzirikana amateka ya Jenoside yakorewe Abatutsi.

Bashyize indabo mu kiyaga cya Mugesera cyajugunywemo Abatutsi mu gihe cya Jenoside

Ni igikorwa cyatangijwe no gushyira indabo mu Kiyaga cya Mugesera, ahibutswe Abatutsi benshi bajugunywe muri icyo kiyaga, hakurikiraho umunota wo kubunamira. Abitabiriye basobanuriwe amateka y’ubwicanyi ndengakamere bwahakorewe n’ingaruka Jenoside yasize.

Bakomereje ahubatse Urwibutso rwa Jenoside yakorewe Abatutsi rwa Rukumberi rushyinguyemo Abatutsi barenga ibihumbi 45, basobanurirwa ibice bigize urwo rwibutso, n’ibimenyetso bya Jenoside bihagaragara, ndetse n’uko Jenoside yashyizwe mu bikorwa muri ako gace.

Habimana Raymond watanze ubuhamya kuri Jenoside yakorewe Abatutsi i Rukumberi, yavuze ibihe bigoye banyuzemo, aho bari bahungiye bagera mu bihumbi 45 ariko hafi ya bose bakicwa, hakarokoka ababarirwa muri 700 bonyine mu buryo bugoranye. Avuga ko bishwe n’abaturukaga mu masegiteri yari abagose, dore ko bo bari batuye mu Murenge wa Rukumberi waciriwemo Abatutsi bavanwaga mu bice byo ku Gikongoro no mu Majyepfo, ngo bazahagwe kuko hari mu mashyamba ndetse hanakikijwe n’ibiyaga.

Habimana anenga abumvikana bahakana Jenoside yakorewe Abatutsi, ati “Uhakana Jenoside azaze hano yirebere.”

Manege Alphonse Abdulkadir agaragaza ko gusura inzibutso bifite akamaro kanini kuko byongerera cyane cyane abaturage ubumenyi kuri Jenoside yakorewe Abatutsi bityo bagafata ingamba zituma itazongera kubaho ukundi

Manege Alphonse Abdulkadir wari uhagarariye abafatanyabikorwa b’Umurenge wa Gahanga, bakaba ndetse baragize uruhare rukomeye mu gutegura igikorwa cyo kujya gusura urwibutso rwa Jenoside rwa Rukumberi, avuga ko iki gikorwa cy’urugendoshuri ari ingirakamaro, mu kumenya amahano u Rwanda rwahuye na yo, bityo abantu bagafata ingamba z’uko bitazongera ukundi. Yagize ati “Twamenye amateka y’abantu bimuwe ku butaka bahozeho, bakaza gucirirwa hano hameze nko ku kirwa kugira ngo babone uko bazabarangiza. Ni amateka afasha abaturage b’Umurenge wa Gahanga kwiga no kumenya ibyabayeho bitari byiza mu bihe byahise, bityo bamenye uko bategura ejo habo heza, n’uko bazabanira neza abandi muri rusange.”

Amateka ya Jenoside yakorewe Abatutsi i Rukumberi afitanye isano n’aya Jenoside yakorewe Abatutsi muri Gahanga. Abari batuye i Rukumberi bari bakikijwe n’ibiyaga, ahandi bashoboraga kunyura hari za bariyeri ziriho abicanyi. Bamwe biyemeje guhungira muri za Kiliziya n’insengero, ariko barahicirwa. Abandi bagerageje kwirwanaho ariko ingufu zibabana nke, bamwe bahitamo kwiroha mu mazi y’ikiyaga barapfa.

Ibi bisa n’ibyabaye muri Gahanga kuko ari Umurenge ukikijwe n’umugezi wa Nyabarongo ndetse n’uruzi rw’Akagera. Inzira zo kwifashisha mu guhunga zari zigoye, abenshi bahitamo guhungira mu nsengero na za Kiliziya bizeye kuharokokera, ariko barahicirwa, abandi bicirwa mu bishanga, nk’uko Ndagijimana Anastase uhagarariye IBUKA mu Murenge wa Gahanga yabisobanuye.

Ndagijimana Anastase uhagarariye IBUKA mu Murenge wa Gahanga

Mu baturage basaga 700 baturutse i Gahanga bagiye kwigira ku mateka ya Jenoside yaranze Rukumberi, harimo ibyiciro byose ariko higanjemo n’urubyiruko.

Ubuyobozi bw’Umurenge wa Gahanga buvuga ko bwibanze ku rubyiruko kugira ngo rumenye ayo mateka, bityo ruzubake u Rwanda rwiza, kuko urubyiruko ari rwo mbaraga, rukaba n’amizero y’ubu n’ejo hazaza heza h’u Rwanda.

Mutamba Jane, Umuyobozi w’Inama Njyanama y’Umurenge wa Gahanga, avuga ko kwibuka biri mu byo ubuyobozi n’abaturage biyemeje kandi ko babikora kenshi kugira ngo Jenoside itazongera ukundi.

Mutamba yasobanuye impamvu bahisemo gusura urwibutso rwa Rukumberi mu Karere ka Ngoma nk’ahantu hafite umwihariko. Yagize ati “Ni ahantu Jenoside yakoranywe ubugome budasanzwe. Uyu Murenge murabona ko ukikijwe n’ibiyaga bya Mugesera, Birira, Sake, ndetse n’uruzi rw’Akagera. Leta yazanye abaturage hano, batura ahantu hari habi, bakikizwa n’abari ku ruhande rw’abakoze Jenoside, bafunga inzira bashoboraga gusohokeramo bahunga, bahashyira bariyeri. Bivuze ngo uburyo bwo gusohoka ntabwari buhari.”

“Ni muri urwo rwego twatekereje kuza i Rukumberi kugira ngo twumve aya mateka, tunasobanukirwe ukuntu ubutegetsi bwariho bwateguye Jenoside igihe kirekire, kugira ngo bazayishyire mu bikorwa nk’uko babyifuzaga, ariko nk’uko mwabibonye umugambi wabo ntiwabahiriye ijana ku ijana.”

Mutamba Jane, Umuyobozi w'Inama Njyanama y'Umurenge wa Gahanga, avuga ko avuga ko ubuyobozi n'abaturage muri rusange bafatanyiriza hamwe mu guharanira ko Jenoside itazongera ukundi

Mu rwego rwo gukomeza gufata mu mugongo abarokotse Jenoside yakorewe Abatutsi, abaturage b’Umurenge wa Gahanga baremeye abarokotse Jenoside bo mu Murenge wa Rukumberi, baboroza inka ebyiri, nk’ikimenyetso cy’ubufatanye, urukundo no gukomeza kububakira icyizere cy’ejo hazaza.

Ubuyobozi bw’Akarere ka Ngoma bwashimiye abaturage b’Umurenge wa Gahanga n’abayobozi babo ku bw’icyo gikorwa cyo gusura urwibutso rwa Rukumberi no kuremera abarokotse Jenoside yakorewe Abatutsi, biyemeza gufatanyiriza hamwe kubungabunga amateka, kurwanya ingengabitekerezo ya Jenoside no kwimakaza ubumwe n’ubudaheranwa bw’Abanyarwanda.