Mwendo ya Ruhango, by’umwihariko aga santere kitwa Gafunzo, kari hafi y’umugezi wa Kiryango, ryari ihuriro ry’amakomine atatu ari yo Mukingi, Masango, Murama, kongeraho Mushubati yari hafi, ndetse ko Komine ya Masango yayobowe n’uwitwaga Mpamo Esdras, se wa George Rutaganda wari Visi Perezida wa mbere w’Interahamwe ku rwego rw’Igihugu.

Abarokokeye i Mwendo bavuga ko amashuri yo muri ayo makomine yigishije ingengabitekerezo ya Jenoside kuva muri 1959, kuko abarezi baho ngo bahoraga basaba abanyeshuri kwitandukanya, Abatutsi ukwabo n’Abahutu ukwabo, kugira ngo babone uko batoteza abo mu bwoko bw’Abatutsi.

Aya ni amateka agarukwaho na Victoria Uwambaye w’imyaka 75 y’amavuko, akaba yarabaye umwigisha wa gatigisimu, na mugenzi we wabaye umwarimu mu ishuri rya Rwingwe, Marie Nyinawabayiro.

Bagarutse ku mubano mwiza warangaga Abanyarwanda mbere yo kubibwamo amacakubiri n’uburyo byahindutse babireba, ndetse abari bakuru mbere ya 1959 batahise babyakira.

Bavuga ko ubutegetsi bwashyize imbaraga mu kubiba amacakubiri mu Banyarwanda, bikaba byarateye ubuhunzi bamwe mu batutsi, abandi batotezwa kugeza kuri Jenoside yakorewe abatutsi 1994.

Hari n’abavanwaga mu makomine atandukanye bagatabwa mu mugezi wa Kiryango, uwa Nyabarongo, n’ubundi buryo bwinshi bwakoreshejwe.

Mu muhanda uva i Mwendo werekeza i Kabgayi, ni hamwe mu hiciwe Abatutsi yane cyane mu ikorosi ry’ahitwa mu Ngendombi, mu Byimana na Rugeramigozi, aho babaga bahungira mu bigo bya TRAFIPRO (bari bise CND) na Saint Joseph, mu iseminari no ku mashuri abanza by’i Kabgayi.

Mu bandi batanze ikiganiro n’ubuhamya Alex Karangwa na Barthelemy Busoro, bose babaye i Mwendo kuva mu buto bwabo, bagaragaje ubukana bwa Jenoside yakorewe abatutsi muri 1994, ubuzima bubi banyuzemo muri icyo gihe ariko bakaza kurokorwa n’Inkoranyi.

Karangwa na Busoro bahise biyemeza gufanya n’Inkotanyi urugamba rwo kubohora u Rwanda.

Umuyobozi w’Ihuriro ry’Abarokotse Jenoside yakorewe Abatutsi bakomoka mu Murenge wa Mwendo, Mukantagara Restituta, avuga ko muri Jenoside hari ababanzaga guhungira ku misozi ya Saruheshyi, Buha na Mwendo, n’ubwo hose hatabujije abicanyi kubasangayo.

Mu rwunge rw’amashuri rwa Rwingwe aba barokotse Jenoside bakomoka i Mwendo bahubatse urukuta rw’ayo mateka, barwandikaho amazina ya bamwe mubazize Jenoside yakorewe Abatutsi mu Murenge wa Mwendo, kugeza ubu bagera kuri 804.

Mukantagara avuga ko biyemeje guharanira ko ayo mateka atazima, kuko nyuma yo kubaka icyo kimenyetso cy’amateka cy’urwibutso, bazakomeza kuza kuhibukira, gukora umuganda n’izindi gahunda zatuma amateka y’i Mwendo atazima.

Mukantagara yagize ati "Biriya ni byiza kandi twifuza ko byagira umurongo bigakomera, twigeze no kugira ibikorwa dukora birimo no gutera inkunga abatishoboye no gutanga mituelle, iwacu heza ntihakazime twararokotse."

Ati "Turifuza guharanira ko duhora tuza iwacu tuzanywe n’ibikorwa bitandukanye, ari byo bizadufasha kubaka Ubumwe bw’Abanyarwanda, iyo umuntu abonye ko wa wundi wakabaye yarishwe agarutse, akaba yamugira inama yo kwiyubaka cyangwa akamufasha mu bundi buryo, birubaka."

Depite Izabiriza Marie Mediatrice, na we uvuka mu Murenge wa Byimana mu Ruhango hafi ya Mwendo, avuga ko Kwibuka muri ubu buryo bizafasha abari bafungiwe Jenoside badasohoka mu nzu ngo bajye gufatanya n’abandi muri gahunda zubaka Ubumwe n’Ubwiyunge.

Depite Izabiriza agira ati "Iki gikorwa cyo kuza kwibukira aho abantu bavuka gituma Ubumwe n’Ubwiyunge birushaho kugira imbaraga, nashimye cyane igikorwa cyo kuza (kw’abarokotse bakomoka i Mwendo) gukorana na bo umuganda, ndetse mukaba munafasha mu bindi bikorwa birimo ibya mituelle."

Ihuriro ry’Abarokotse Jenoside yakorewe Abatutsi bakomoka i Mwendo rivuga ko ibi bikorwa bijyana no gufasha barumuna babo biga mu rwunge rw’amashuri rwa Rwingwe n’ahandi, kwitoza amateka mashya atandukanye n’ayigishijwe muri iryo shuri mbere ya Jenoside yakorewe Abatutsi mu 1994.