Ni igikorwa basanganwe cyo gufasha abacitse ku icumu rya Jenoside batishoboye mu kubafasha kubaho biyubaka.

Nyirihirwe Hiraire umwe mu bahagarariye uwo muryango avuga ko “Kwacu” ari umuryango ugizwe n’abacitse ku icumu rya Jenoside baba hirya no hino mu gihugu baburiye imiryango yabo i Nyarubuye muri Jenoside yakorewe Abatutsi mu mwaka 1994.

Avuga ko bibumbiye hamwe bagamije gukora ibikorwa byo kwibuka n’ibindi byagirira akamaro abaturage baganisha ku kwamagana ingengabitekerezo ya Jenoside no gufatanyiriza hamwe bakora ibikorwa bijyanye no kwiteza imbere.

Avuga ko ingamba bafite zigizwe n’ibikorwa bitandukanye birimo gukora urutonde rw’imiryango yazimye bakayibuka n’ibindi.

Ati “Turashaka gukora firimi ku buryo amateka ya Nyarubuye yamenyekana, gukora ubuvugizi ku nzibutso za Jenoside ziri mu Karere ka Kirehe usanga zidafashwe neza no gukora ubushakashatsi hagamijwe gukora urutonde rw’amazina y’abantu baguye i Nyarubuye”.

Umuryango “Kwacu” ugizwe n’abantu basaga ijana bakaba bifuza ko umubare wakwiyongera kugira ngo uwo muryango wagure ibikorwa biganisha ku iterambere.

Si impano y’ubwisungane mu kwivuza gusa yatanzwe ngo bazakomeza gukora ibikorwa binyuranye byo gufasha abacitse ku icumu batishoboye birimo no kubasanira inzu.

Servilien Mutuyimana