Aba barokotse bagaragaje inzira mbi baciyemo mu gihe cya Jenoside aho bari barahungiye mu bigo by’abihayimana biri ku musozi wa Kabayi bizeye ko bazabarwanirira cyane ko bari bafite ijambo ku butegetsi bwariho ariko bagatungurwa no kubona bagize uruhare mu iyicwa ry’impunzi.

Daniel Renzaho nawe wari warahungiye aha i Kabgayi avuga ko mu rwego rwo kubona uko babica, batemye amatiyo yajyanaga amazi mu bigo bya Kabgayi mu rwego rwo kugirango impunzi zibure amazi zijye kuvoma mu kabande maze bajyende babica gahoro gahoro.

Aha ngo iri bura ry’amazi rikaba ryarateje ibibazo kuko ryatumye abantu barwara indwara zitandukanye zirimo izikomoka ku mwanda kubera kubura amazi bituma abatari bacye bahagwa.

Adeline Nyinawumuntu nawe wari warahungiye mu bihayimana b’i Kabgayi avuga ko aba bihayimana batigeze batinya kwijandika muri Jenoside kuko ngo wasangaga akenshi aribo baranga ahihishe abatutsi maze bakabatahura bakicwa nabi n’Interahamwe cyangwa abasirikare.

Aba barokotse basaba ko ku rwibutso rushya rujyiye kubakwa i Kabgayi hashyirwa ibimenyetso bigaragaza ibikorwa bibi Abatutsi bakorewe ndetse ruzabe runagaragaza amateka mabi abihayimana bagize mu gihe cya Jenoside.

Umuyobozi w’intara y’Amajyepfo, Alphonse Munyentwali, yasabye abarokotse Jenoside kimwe n’abandi Banyarwanda guharanira gukora kugirango babashe kwigira kuko ibi ariyo nzira nziza yo kuzirikana no guha icyubahiro ababo bazize Jenoside.

Yakomeje asaba Abanyarwanda gucika ku muco bamwe batojwe kuva bakiri bato wo guhakana no gupfobya ubumuntu bwa bagenzi babo ahubwo bakumva ko ubuzima bw’abandi bufite agaciro kandi ko nta muntu ufite uburenganzira bwo kwambura ubuzima undi kuko atariwe wabumuhaye.

Gerard GITOLI Mbabazi