Mu mvura nyishi yaguye ku gicamunsi cyo kuwa Kane, icyo gikorwa cyabimburiwe n’urugendo rwo kwibuka rwatangiriye ku Murenge wa Gisozi rusozererwa k’Urwibutso rwa Gisozi, bahashyira indabo ku mva zishyinguyemo imibiri y’Abatutsi bishwe muri Jenoside.

Nyuma yo kunamira izi nzirakarengane urugendo rwa komereje muri Kaminuza yigenga ya Kigali ‘’ULK’’, aho abaturage bakomereje ibi bikorwa byo kwibuka, bagejejweho ibiganiro bitandukanye.

Honorable Francis Kaboneka watanze ikiganiro cyavugaga ku mateka n’ibimenyetso bya Jenoside yatangarije abaraho ko Jenoside yateguwe ko yagiye igeragezwa mu Bugesera no mu bindi bice bitandukanye by’igihugu.

Yatanze urugero rwa Radio rutwitsi RTLM yari imaze iminsi itangaza ko hari akantu karimo gutegurwa mu mujyi wa Kigali, n’ikinyamakuru KANGUKA cyari cyaranditse inkuru ko Habyarimana azicwa mu minsi yavuba.

ACP Theos Badege yaganiriye abaraho ku bijyanye n’umutekano muri rusange. Yababwiye ko umutekano w’abacitse kw’icumu rya Jenoside byu mwihariko ucunzwe neza no muri rusange umutekano mu gihugu umeze neza.

Yatangaje ko Leta yu Rwanda itazihanganira na gato umuntu wese uzagaragaraho amagambo asesereza cyangwa apfobya Jenoside.

Mu buhamya bwe, Faїna Musanabera wacitse kw’icumu rya Jenoside yakorewe Abatutsi, yagaragaje inzira y’umusaraba yaciyemo, ariko ubu akaba ari mu nzira nziza yo kwigira aho ubu yiga muri kaminuza nkuru i Butare ‘’UNR’’ ageze mu mwaka wa nyuma.

General Major Augustin Turagara wari witabiriye uwo muhango, watangiye yihanganisha abacitse kw’icumu mu Murenge wa Gisozi, mu butumwa ya gejeje kubari bateraniye aho yavuze ko nta kintu kiza kiruta amahoro, ko iyo ufite amahoro, ushobora kugera kubyo ushaka byose, yasabye abaraho bose gukomeza kubumbatira amahoro dufite.

Willy Ndizeye, Umuyobozi w’Akarere ka Gasabo, yashimiye abaturage b’umurenge wa Gisozi ubwitabire. Yabwiye abari bateraniye aho ko kwibuka arinshingano kuri buri Munyarwanda.

Yavuze ko batagomba kwibagirwa na gato. Yashimiye abacitse kwicumu rya Jenoside mu Murenge wa Gisozi ko mu bushobozi bucye bafite bagerageza kwigira banihesha agaciro.

Kizito Munyaburanga