Zimwe mu ngabo z’Inkotanyi mu rugamba rwo kubohora igihugu

Umunyamabanga Mukuru muri Sena y’u Rwanda, Sostene Cyitatire uri mu batanga ibiganiro bya CNLG yasobanuye ko ibyo biganiro biri mu rwego rwo kwamagana ibyaha by’Intambara bishinjwa ingabo zari iza FPR-Inkotanyi.

Avuga ko aba ex-FAR barambitse intwaro hasi bakishyikiriza Inkotanyi bagera ku bihumbi 15, kandi ko uyu mubare ari wo Habyarimana yavugaga ko afite nk’Ingabo z’Igihugu zose.

Yagize ati ”Mu masezerano ya Arusha bavugaga ko bafite ingabo ibihumbi 15, ariko si byo kuko uwo mubare twari tumaze kuwakira duhereye muri 1995 kugera muri za 2.000 ubwo abanyuma barimo ba Rwarakabije bazaga.”

Intumwa ya CNLG yatanze ikiganiro mu mudugudu wa Byimana, akagari ka Musezero ku Gisozi mu karere ka Gasabo, yagaragaje ko abashinja Inkotanyi ibyaha by’intambara bataramenya ukuri

Asobanura ko kuba Inkotanyi zarakiraga ababaga bari ku ruhande ruzirwanya, ari kimwe mu bikuraho ibirego bizishinja ibyaha by’intambara n’ibindi byibasiye inyoko muntu.

Ati ”Ni ukutamenya gutandukanya ibintu kuko ingabo za ex-FAR zashyiraga imbere Interahamwe, kandi izo nterahamwe zikagenda zitwaje intwaro.
“Ku ruhande rwa FPR-Inkotanyi, umuntu wese ufite ikirwanisho (intwaro) n’ubwo yaba atambaye umwenda wa gisirikare aba yiyemeje kwitwara gisirikare.”

Hari bamwe mu banyamuryango ba FPR-Inkotanyi bavuga ko Habyarimana yari amaze kugira abasirikare barenga ibihumbi 42 hatabariwemo Interahamwe.

Intumwa za CNLG zahawe gusobanurira abaturage muri iki gihe cy’icyunamo uko bakwiriye gutandukanya ibyaha bya Jenoside, iby’intambara n’ibyibasiye inyoko muntu, hashingiwe ku mateka y’urugamba rw’Inkotanyi.

Izi ntumwa zikavuga ko Leta y’u Rwanda yahagurukiye kurwanya ibi byaha byose ihereye ku ishyirwaho ry’amategeko abikumira no kuba yarashyize umukono ku masezerano mpuzamahanga anyuranye ajyanye no guha umuntu agaciro.

MENYA UMWANDITSI

Simon Kamuzinzi

Umunyamakuru

@SimonKamuzinzi

Reba inkuru zose nanditse ( 2457 )