Yabitangaje mu muhango wo kwibuka ku nshuro ya 22 abari abakozi b’icyahoze ari Minisiteri ya MINITRASO kuri ubu ibarizwa muri MINALOC, MININTER na MINFOP yabaye MIFOTRA, bazize Jenoside yakorewe abatutsi, wabaye ku mugoroba wo kuri uyu wa Gatanu tariki 20 Gicurasi 2016.

Yagize ati “Kibuka kwa nyako ni uguharanira kubaka Ubunyarwanda bwatsikamiwe mu gihe cya Jenoside yakorewe Abatutsi, tukanafatira hamwe ingamba zo guhangana n’ingengabitekerezo ya jenoside, twese twibaz uruhare rwa buri wese kugira ngo ibyabaye bizatasubia ukundi.”

Umunyamabanga uhoraho muri minisiteri y’Ubutegetsi bw’Igihugu Vincent Munyeshyaka, yavuze ko kuba izi minisiteri ziri kwibuka abari abakozi bazo bagera kuri 25 bishoboka ko atari bo bonyine, asaba abafite amakuru bakwiye gukomeza kuyatanga hakaboneka n’abandi nabo bakajya bibukwa.

Ati “Iyi mibare y’abantu 25 tumaze imyaka ibiri tuyibonye ariko borashoboka ko Ataribo bonyine akaba ari yo mpamvu dusaba umuntu wese waba ufite amakuru ko yatwegera akatubwira abandi yaba azi.”

Visi Perezida wa Ibuka Nkuranga Egide, yasabye abayobozi ba MINALOC gushyira imbaraga mu kurangiza ibibazo by’abacitse ku icumu batishoboye cyane cyane mu kububakira no gusana amazu.

Anasaba ko hakurikiranwa ikibazo cy’abarokotse Jenoside yakorewe abatutsi bafungiwe icyaha cya Jenoside, kubera akagambane ndetse n’amakosa yagiye akorwa mu gihe cy’inkiko Gacaca.

Abakozi bibutswe kuri uyu mugoroba, barimo 10 bahoze bakorera MITRASO harimo na Minisitiri wayo Ndasingwa Landouard, batandatu bo muri MINAFET n’umunani bo muri MINIFOP.