Uyu mukobwa wa Senderi Hit avuga ko mu bahanzi b’Abanyarwanda yikundira Knowless ariko mu kuririmba akazakurikiza se.

Senderi Hit n’umukobwa we Kevine Hit

Uyu mwana ufite gusa imyaka 8 y’amavuko, amazina ye ni Keza Kevine ariko izina ry’ubuhanzi ngo akaba yarahisemo gukoresha Kevine Hit nk’uko se akoresha Senderi Hit.

Kevine Hit kuri ubu ari muri studio aho ari gutunganyirizwa indirimbo na Pacentho ikaba izasohoka mu minsi mike iri imbere. Ni indirimbo yise “Icyizere” ikubiyemo ubutumwa bwo kwigirira ikizere mu bikorwa bya buri munsi.

Ubwo twaganiraga na se kuri uyu wa 2 Mutarama 2016, yatwumvishijeho gato (sample) kuri iyi ndirimbo itari yasohoka, ariko uwayumva ntiyabasha kwemera ko ari umwana w’imyaka 8 wayiririmbye kandi ngo abashe kwemera ko ari indirimbo ye ya mbere aririmbye dore ko umwumva aririmba wagira ngo asanzwe ari umwuga akora.

Kugeza ubu ntiturabasha kuvugana na Kevine Hit, kuko azatangira neza kwigaragariza intagazamakuru ari uko indirimbo ye yamaze kujya hanze, bikaba biteganyijwe ko izajya hanze tariki 15 Mutarama 2016.