Hari bamwe mu bakurikirana ibihangano bya bamwe mu bahanzi bo mu Rwanda bavuga ko bimwe byumvikanamo ubutumwa butari bwiza, bamwe bakavuga ndetse ko ngo hari n’ibyumvikanamo amagambo mabi no gutukana.

Umuhanzi Young Grace ubusanzwe witwa Abayizera Grace yabwiye Kigali Today ko nawe abona ibyo ari ikibazo koko, ariko ngo abona atari ibya hafi ko abahanzi bahindura imyumvire kuko ngo umuhanzi aririmba ikimurimo.

Young Grace yagize ati: “Burya umuntu aririmba ikimurimo. Niba umuhanzi aririmba amagambo mabi burya nibyo biba bimurimo. Hari igihe koko abiririmba ashaka gutukana ariko dukwiye kubwizanya ukuri ntabwo ari byiza. Abahanzi bagenzi banjye ndetse n’abandi batanga ubutumwa runaka bose bari bakwiye kumenya ko bumvwa n’abantu b’ingeri zose, bakajya babagezaho ubutumwa bwiza.”

Uyu muhanzi avuga ko hari ubwo umuhanzi aba afite agahinda akagatura ikaramu n’urupapuro. Ngo nibwo uzasanga umuntu akora indirimbo itameze neza, indirimbo idatanga ubutumwa bwiza bitewe n’uko agahinda yagize ari nako yahise ajyana muri studio.

Uyu muhanzikazi yakomeje agira inama abahanzi bagenzi be kumenya ko hari benshi babareberaho, bityo ngo bakaba bakwiye kwitondera ubutumwa batanga mu bihangano byabo, ntibagendere cyane ku byo biyumvamo baba batewe n’agahinda ndetse n’ubuzima bwabo bwite, ahubwo bagahanga ibirimo ubutumwa bufasha umuryango Nyarwanda.

Young Grace usanzwe aririmba injyana ya Hip Hop, ni umwe mu bahanzi 10 bahatana mu irushanwa bita Primus Guma Guma Super Star4 ritegurwa n’uruganda Bralirwa rwenga ibinyobwa mu Rwanda.

Marie Clemence CYIZA UWIMANIMPAYE