Lando ubwo yaganiraga na Kigali Today yamusobanuriye inzira yanyuzemo kugeza afashe umwanzuro wo kwiga kogosha.

Ati: "N’ubwo ari ubuzima bushaririye bamwe duhuje, ariko njye nisanze nderwa na mama, sinigize ngira amahirwe yo kumenya data. Ubusanzwe mvuka mu Karere ka Ruhango. Naje kuza i Kigali ndangije amashuri yisumbuye gushaka imibereho. Nahazanywe n’umusore w’inshuti yanjye twiganye, nkajya nkora imirimo yo mu rugo, bukeye ngiye ku muhanda ngarutse nsanga bibye, aho baziye barankubita banjyana kumfungisha".

Avuga ko yagiriwe ubuntu n’umupolisi yahasanze kuko yamubwije ukuri ko atigeze yiba ahubwo abamuzanye banze kumwizera, nuko uwo mupolisi amuha amafaranga 10,000 y’u Rwanda amusaba kuva muri Kigali agasubira iwabo i Gacu muri Ruhango.

Avuga ko yagiye atazi aho yerekeje kuko abamureraga batari bameranye neza, maze ajya kwiryamira mu kizu kitari gisakaye, aryama mu bishogoshogo (ibishishwa) by’ibishyimbo byari biri muri icyo kizu.

Yaje kuhavanwa n’undi musore w’inshuti ye wogoshaga ajya kubimwigisha maze muri 2012 atangira kogosha bamuha na we amafaranga.

Lando avuga ko yogoshera i Remera ahazwi nko ku Gisimenti ndetse akaba akorera umushahara ku kwezi.

Salon yogosheramo yogoshera ibihumbi bitanu (5000) ariko we umuntu wese uje ashaka ko amwogosha ngo arabimukorera.

Ati: "Aho nkorera kwiyogoshesha ni 5000Frw, ariko iyo umuntu aje ashaka ko mwogosha kandi akennye atayafite mbwira boss (umukoresha we) akayanyandikaho bakazayankata ku kwezi ariko nkamwogosha agataha yishimye".

Mu basitari batandukanye hano mu Rwanda, Lando avuga ko yogosha barimo The Ben, Bruce Melody, Gisa cy’Inganzo, Abanyamakuru batandukanye, abakinnyi ba filime nyarwanda n’abandi.

Si abo gusa kuko Lando yogoshe n’abahanzi bo hanze barimo Eddy Kenzo, Diamond na Alikiba.

Lando yasobanuye uko byagenze kugira ngo yurire indege agiye mu kazi ko kogosha ibyamamare. Yagize ati: "Ubwo twari muri Guma mu rugo, The Ben yansabye ko twajyana muri Tanzania aho yari agiye gutegurira umushinga w’indirimbo na Diamond. Icyo gihe twagezeyo Diamond amubaza umuntu ujya amwogosha maze aranyerekana nuko nogosha Diamond gutyo ampa ibihumbi magana atanu y’u Rwanda. Alikiba na we yaje kuza aho twari turi na we ndamwogosha kuko yabonaga abo nogoshe nabogoshe neza. Nyuma yaho twaje kujya muri Uganda na ho mpogosha umuhanzi Eddy Kenzo".

Tuyisenge Landuard asaba urubyiruko cyangwa undi wese usuzugura akazi runaka wenda agendeye ku mashuri yize kubireka kuko bitakigezweho. Ati:"Nabagira inama yo kudasuzugura akazi kuko akazi kose kagutunga uramutse ubishyizemo ubushake. Urugero nk’ubu iyo nogoshe The Ben ampa amadolari ijana (ni ukuvuga abarirwa mu bihumbi ijana by’u Rwanda), kandi nkamwogosha kabiri mu cyumweru. Urumva ko ari amafaranga menshi. Ngize amahirwe agahora mu Rwanda nkabasha kumwogosha nahabonera igishoro kinini nkabasha kugera kure kurushaho ndetse nkatunga n’umuryango wanjye".

Lando wahoranye indoto zo kuzaba umusirikare nk’uko se yari umusirikare, avuga ko kuri ubu indoto ze zitakibaye impamo ariko yifuza kugira iterambere rigaragara kandi akarangwa n’urukundo kuko na we yagiriwe urukundo n’abantu batandukanye.

Kuri ubu Lando n’ubwo akora umurimo wo kogosha, yamaze no kwinjira mu muziki aho afite indirimbo zirimo iyo yise ‘For Love’ na ‘Cya Gikecuru’.

Reba indirimbo ‘For Love’ ya Lando The barber afatanyije na Baume