Safi Madiba yongeye kwigarurira ibihangano bye yari yarabujijwe

Yanditswe na

Kamanzi Natasha

6-01-2020 - 21:02' | Ibitekerezo ( )

Safi Madiba yandikishije ibihangano bye mu Rwego rw’Igihugu rushinzwe kwihutisha Iterambere (RDB), bimusubiza igisa n’uburenganzira yari yarambuwe na The Mane yabarizwagamo. The Mane yari yaratanze impuruza ko atemerewe gukoresha ibihangano byose yayikoreyemo.

Safi Madiba ubu ntakibarizwa muri The Mane

Nyuma y’uko Safi Madiba avugiye ko avuye mu nzu ya The Mane yari afitanye na yo amasezerano guhera muri 2016, ubuyobozi bwa The Mane bwumvikanye mu itangazamakuru bumushinja kwangiza amasezerano yari afitanye n’iyo nzu.

Ku itariki ya 19 Ukuboza 2019, ubuyobozi bwa The Mane bwasohoye ibaruwa, bumenyesha abanyamakuru n’abandi bacuranga imiziki ko umuhanzi Safi Madiba atemerewe gukoresha indirimbo zose yakoreye muri The Mane harimo indirimbo nka Kontwari, Kimwe Kimwe, igifungo, My Hero, Good Morning, Ina Million ndetse na Original.

Umuyobozi wa The Mane Mupenda Ramadhan uzwi nka Bad Rama yavugaga ko umuhanzi Safi yakoze ibinyuranyije n’amasezerano bari bafitanye, bityo inkurikizi akaba ari uko nta n’imwe mu ndirimbo yakoreye muri The Mane yazongera gucurangwa haba mu itangazamakuru ndetse n’utubyiniro.

Nyuma y’uko The Mane isohoye iyi baruwa ku wa 19 Ukuboza 2019, Safi Madiba yagiye kuri Rwanda Development Board (RDB) yandikisha indirimbo yakoze ari muri The Mane ko ari ibye nyuma y’iminsi mike.

Niyibikora Safi (Safi Madiba) yanditse ibaruwa avuga ko atamenye impamvu yavuye muri The Mane, anabashimira igihe cyose bakoranye ndetse n’ibyo bize. Yongera yibutsa abafatanyabikorwa ndetse n’abafana be ko indirimbo yakoreye muri The Mane ari ize ndetse afite icyemezo yakuye muri RDB kibyemeza. Yibutsa ko ari uburenganzira bwe kuzikoresha ndetse no kuzicuruza ntawe bazisangiye nkuko The Mane yabivugaga.