Platini yari ategereje ko Jay Polly ava muri gereza bagakora amashusho y’indirimbo bise ‘Somaho’

Bamwe mu bamunenze bavuze ko atari igihe cyiza cyo gusohora indirimbo yakoranye na Jay Polly mu gihe abantu bakiri mu marira byongeye igasohoka yamamaza inzoga kandi bivugwa ko ari na yo yazize.

Umwe yagize ati "Biteye agahinda ku muhanzi nka Platini utinyuka gushinyagura mu bihe nk’ibi, agatinyuka agasohora indirimbo ngo arye Hit yisunze urupfu rwa mugenzi we Jay, biranavugwa ko atanagiye kumushyingura ibi si byo rwose".

Nyuma yo gukuraho iyo ndirimbo kuri YouTube, umuhanzi Platini abicishije mu kiganiro yatanze ku Isimbi TV yasabye imbabazi avuga ko Jay Polly yari inshuti ye magara ku buryo adashobora kumushinyagurira.

Yagize ati "Ntabwo byabaho ko nshinyagurira inshuti yanjye, mumbabarire ntabwo nari ngamije kurya Hit, abantutse cyane ni uko bari bababaye, sinzi uko byaducitse gusa I’m very sorry".

Platini yavuze ko Jay Polly yari inshuti ye magara kandi ko bari bamaranye igihe ndetse indirimbo Somaho yamamazaga inzoga bari bategereje ko ava muri gereza ngo bakore amashusho.

Akaba yavuze ko akomeje gushengurwa n’urupfu rw’umuhanzi nka Jay Polly wari ukunzwe na benshi kandi akagenda akiri muto agifite byinshi yari atarakora.

Indirimbo ‘Somaho’ n’ubwo hari abanenze igihe yasohokeye, hari abandi benshi bagaragaje ko bayikunze ikimara gusohoka, ikaba yiyongereye ku zindi aba bahanzi bagiye bakorana harimo nk’iyitwa ‘Mumutashye’ na yo yakunzwe n’abatari bake.

Umva indirimbo ‘Somaho’ ya Platini P na Jay Polly