Ibi yabivuze tariki 19/09/2013 ubwo yataramiraga abanyeshuri bo mu mashuri yisumbuye yo mu Murenge wa Tare mu Karere ka Nyamagabe, mu gitaramo cy’amahoro (Peace Concert) mu rwego rwo kwizihiza umunsi mpuzamahanga w’amahoro uba tariki 21 nzeri.

Ubwo yahaga abanyeshuri umwanya wo kumubaza ibibazo, umwe muri bo yamubajije niba ateganya kuzareka kuririmba indirimbo zisingiza Imana n’izindi akunze kuririmba akajya mu rukundo hagati y’abakobwa n’abahungu.

Kizito Mihigo aganira n’abanyeshuri.

Kizito yamushubije ko we nta kintu na kimwe atemerewe kuririmbaho mu gihe kimurimo.

Ati “Njyewe nta sujet n’imwe mbujijwe kuririmbaho. Byose nshobora kubiririmbaho bipfa kuba ari ibintu bindimo. Ntabwo ndirimba ibintu ari uko babimbwiye. Hari abajya bavuga ngo Kizito buriya ahimba indirimbo kubera ko ari mu cyunamo, cyangwa ahimba indirimbo kuko habaye ikintu, hoya ndirimba indirimbo iyo hari ikintu kinkozeho ngashaka kukivugaho”.

Aha yabahaye urugero rw’indirimbo yitwa “mon frère congolais” yahimbye kubera ibibazo byugarije amahoro mu karere u Rwanda rurimo.

Kizito Mihigo ati n’urukundo runjemo naruririmba.

Kizito yemeza ko n’urukundo ruri hagati y’abahungu n’abakobwa ashobora kururirimba biramutse bimujemo. “Nta kibazo n’urukundo naruririmba njyewe ariko il faut que (bisaba ko) biba bindimo njyewe,” Kizito.

Kizito Mihigo amenyerewe cyane mu ndirimbo zikoreshwa muri kiliziya gaturika n’indirimbo zo kwibuka Jenoside yakorwe Abatutsi muri mata 1994, ariko anaririmba n’ibindi bitandukanye biba bigezweho mu Rwanda, urugero nk’indirimbo yakanguriraga Abanyarwanda kwitabira amatora y’abadepite aherutse gusohora.

Emmanuel Nshimiyimana